စက်မှု၊ စိုက်ပျိုး၊ မွေးမြူရေးတက္ကသိုလ်ဝင်စာမေးပွဲ ပဉ္စမနေ့တွင် ကျောင်းသား၊ ကျောင်းသူ(၃,၃၆၄)ဦးဝင်ရောက်ဖြေဆို

၂၀၂၆ ခုနှစ်၊ စက်မှု၊ စိုက်ပျိုး၊ မွေးမြူရေးတက္ကသိုလ် ဝင်စာမေးပွဲ ပဉ္စမနေ့အား ယနေ့ မတ် ၁၆ ရက်ကဆက် လက်ကျင်းပရာ စာစစ်ဌာန(၅၃)ခုတွင် ကျောင်းသား၊ ကျောင်းသူ(၃,၃၆၄)ဦးဝင်ရောက်ဖြေဆိုခဲ့ကြကြောင်း သိရသည်။

စက်မှုအတတ်ပညာ(မြေတိုင်းပညာ၊ လျှပ်စစ်ဆိုင်ရာစက်ပစ္စည်းများ၊ ဂဟေဆက်နည်းပညာ)၊ စိုက်ပျိုးရေးအတတ်ပညာ(သီးနှံကာကွယ်ရေး)နှင့် မွေးမြူရေးအ တတ်ပညာ(ရေသတ္တဝါမွေးမြူရေးနှင့် ပျားမွေးမြူရေး) ဘာသာရပ်တို့ကိုဖြေဆိုခဲ့ကြကြောင်း သိရသည်။

ထို့ပြင် တက္ကသိုလ်ဝင်စာမေးပွဲ၏ ရူပဗေဒဘာသာရပ်နှင့် သမိုင်းဘာသာရပ်တို့ကိုလည်း နေပြည်တော်အပါ အဝင် တိုင်းနှင့် ပြည်နယ်အလိုက် ခရိုင်၊ မြို့နယ်၊ စာစစ်ဌာနများနှင့် နိုင်ငံခြားစာစစ်ဌာနအပါအဝင် စာစစ်ဌာန (၈၈၇)ခု၌ ကျောင်းသား၊ ကျောင်းသူ(၂၅၄,၆၄၉)ဦးဝင်ရောက်ဖြေဆိုခဲ့ကြကြောင်း သိရသည်။

ကျောင်းသား၊ ကျောင်းသူများ စိတ်အေးချမ်းသာစွာနှင့် ဘေးအန္တရာယ်ကင်းရှင်းစွာဖြေဆိုနိုင်ရေးအတွက် သက်ဆိုင်ရာ လုံခြုံရေးအဖွဲ့ဝင်များ၊ ကျန်းမာရေးဝန် ထမ်းများ၊ မီးသတ်တပ်ဖွဲ့ဝင်များနှင့် ရပ်ကွက်ကျေးရွာအုပ်ချုပ်ရေးအဖွဲ့ဝင်များက စနစ်တကျစောင့်ကြပ်ကြည့်ရှုပေးလျက်ရှိပြီး တာဝန်ရှိသူများကလည်းကြည့်ရှုအားပေးခဲ့ကြကြောင်း သိရသည်။

ကရင်ပြည်နယ်နှင့် ဧရာဝတီတိုင်းတို့မှ တပ်မတော်သားလွှတ်တော်ကိုယ်စားလှယ်(၂)ဦးကို အစားထိုးပြောင်း လဲ

ကရင်ပြည်နယ်လွှတ်တော်နှင့် ဧရာဝတီတိုင်းလွှတ်တော်တို့မှ တပ်မတော်သားလွှတ်တော်ကိုယ်စားလှယ်(၂)ဦးကို အစားထိုးပြောင်းလဲခဲ့ကြောင်း ပြည်ထောင်စုရွေး ကောက်ပွဲကော်မရှင်(UEC)မှ ယနေ့ မတ် ၁၆ ရက်တွင် ကြေညာချက်အမှတ်(၃၆ /၂၀၂၆)ဖြင့် ထုတ်ပြန်ခဲ့သည်။

ကရင်ပြည်နယ်လွှတ်တော်အတွက် ဗိုလ်မှူးကြီးမင်းသူကျော်အစား ဗိုလ်မှူးကြီးစိုးမိုးဝင်း၊ ဧရာဝတီတိုင်းလွှတ် တော်အတွက် ဗိုလ်မှူးကြီးခန့်မွန်ဆွေအစား ဗိုလ်မှူးကြီးစိုးမင်းဦးတို့ကို အစားထိုးပြောင်းလဲခဲ့သည်။

၎င်းတို့အား တပ်မတော်ကာကွယ်ရေးဦးစီးချုပ်က အ မည်စာရင်းတင်သွင်းထားသော တပ်မတော်သားတိုင်းဒေသကြီးလွှတ်တော်(သို့)ပြည်နယ်လွှတ်တော် ကိုယ် စားလှယ်နှစ်ဦးကို အမည်စာရင်းပြောင်းလဲလိုကြောင်း တိုင်းဒေသကြီးလွှတ်တော် (သို့) ပြည်နယ်လွှတ်တော် ရွေးကောက်ပွဲဥပဒေပုဒ်မ ၃၃ နှင့်အညီအကြောင်းကြားခဲ့ခြင်းဖြစ်သည်။

ထို့ကြောင့် UEC မှစိစစ်ပြီးနောက် ကော်မရှင်၏ကြေ ညာချက်အမှတ်(၃၅ /၂၀၂၆ )တွင် ဖော်ပြထားသည့်အတိုင်းအစားထိုးပြောင်းလဲခဲ့ခြင်းဖြစ်သည်ဟု ထုတ်ပြန်ခဲ့သည်။

ရန်ကုန်အပါအဝင် တိုင်းနှင့် ပြည်နယ်အချို့တွင် မိုးရွာသွန်းခြင်းနှင့်အတူ လေပြင်းတိုက်ခတ်ခြင်းများဖြစ်ပေါ်နိုင်သဖြင့် ကြိုတင်သတိပြုရန် မိုး/ဇလ နှိုးဆော်

ရန်ကုန်တိုင်းအပါအဝင် တိုင်းနှင့်ပြည် နယ်အချို့တွင် မနက်ဖြန် မတ်လ (၁၇) ရက် ၊ နံနက်ပိုင်း၌ မိုးရွာသွန်းခြင်းနှင့်အတူ လေပြင်းတိုက်ခတ်ခြင်း၊ မိုးထစ်ချုန်းခြင်း၊ မိုးကြိုးပစ်ခြင်း၊ လျှပ်စီးလက်ခြင်းနှင့် မိုးသီးကြွေခြင်းစသည့် မိုးလေဝသဖြစ်စဉ်များဖြစ်ပေါ်နိုင်သဖြင့် ကြိုတင်သတိပြုကြရန် မိုး/ဇလက ယနေ့ ညနေပိုင်းတွင် အသိပေးနှိုးဆော်ထားသည်။

ရန်ကုန်တိုင်း၊ စစ်ကိုင်းတိုင်းအထက်ပိုင်း၊ ဧရာဝတီတိုင်း၊ တနင်္သာရီတိုင်း၊ ကချင်ပြည်နယ်၊ ကယားပြည်နယ်၊ ကရင်ပြ ည်နယ်နှင့် ရှမ်းပြည်နယ်တို့တွင် မိုးတိမ်တောင်များဖြစ်ထွန်းလျက်ရှိပြီး အဆိုပါ မိုးတိမ်တောင်များရွေ့လျားရာနေရာတလျှောက်တွင် မိုးရွာသွန်းခြင်းနှင့်အ တူ လေပြင်းတိုက်ခတ်ခြင်း၊ မိုးထစ်ချုန်းခြင်း၊ မိုးကြိုးပစ်ခြင်း၊ လျှပ်စီးလက်ခြင်းနှင့် မိုးသီးကြွေခြင်းစသည့် မိုးလေဝသဖြစ်စဉ်များ ဖြစ်ပေါ်နိုင်သည်ဟု ဆိုထားသည်။

မိုးရွာသွန်းမည့် အခြေအနေအရ ကချင်ပြည်နယ်တွင် နေရာအနှံ့အပြား၊ စစ်ကိုင်းတိုင်းအထက်ပိုင်းတွင် နေရာစိပ်စိပ်၊ ရှမ်းပြည်နယ်တွင် နေရာကျဲကျဲနှင့် ရန်ကုန်တိုင်း ၊ မန္တလေးတိုင်း၊ စစ်ကိုင်းတိုင်းအောက်ပိုင်း၊ ဧရာဝတီတိုင်း၊ တနင်္သာရီတိုင်း၊ ကယားပြည်နယ်၊ ကရင်ပြည်နယ်၊ ချင်းပြည်နယ်နှင့် မွန်ပြည်နယ်တို့တွင် နေရာကွက်ကျား မိုးထစ်ချုန်းရွာသွန်းမည်ဖြစ်ကာ ရွာရန်ရာနှုန်း (၈၀) ဖြစ်ကြောင်း ဆိုသည်။

ဘင်္ဂလားပင်လယ်အော်မြောက်ပိုင်းတွင် တိမ်အသင့်အတင့် ဖြစ်ထွန်းနေပြီး ကပ္ပလီပင်လယ်ပြင်နှင့် ကျန်ဘင်္ဂလားပင်လယ်အော်တို့တွင် တိမ်အနည်းငယ် ဖြစ်ထွန်းနေကြောင်း သိရသည်။

မြန်မာ့ပင်လယ်ပြင်တွင်လှိုင်းအနည်းငယ်မှ လှိုင်းအသင့်အတင့်ရှိမည်ဖြစ်ကာ လှိုင်းအမြင့်မှာ မြန်မာ့ကမ်းရိုးတန်းတစ် လျှောက် နှင့် ကမ်းလွန်ပင်လယ်ပြင်တို့တွင် (၄) ပေမှ (၆) ပေ ခန့် ရှိနိုင်ကြောင်း အသိပေးထားသည်။

ပဲခူးတိုင်းဒေသကြီး တတိယအကြိမ် လွှတ်တော်အစည်းအဝေးကို မတ်လ ၂၀ ရက်တွင် စတင်ကျင်းပမည်

ပဲခူးတိုင်းဒေသကြီး လွှတ်တော် တတိယအကြိမ် ပထမပုံမှန် အစည်းအ​ဝေးကို မတ်လ ၂၀ ရက်တွင် အစီအစဉ် (၁၈)ရပ်ဖြင့် စတင်ကျင်းပသွားမည်ဖြစ်ကြောင်း သိရသည်။

တတိယအကြိမ် ပဲခူးတိုင်းဒေသကြီး လွှတ်တော် မိတ်ဆက်အခမ်းနားကိုလည်း ယမန်နေ့က တိုင်းဒေသကြီး လွှတ်တော်ရုံး အစည်းအဝေးခန်းမတွင် ကျင်းပခဲ့ကြောင်းလည်း သိရသည်။

လွှတ်တော် ၏ တာဝန်များဖြစ်သည့် ဥပဒေပြုခြင်း၊ ပြည်သူလူထုကို ကိုယ်စားပြုခြင်း၊ စောင့်ကြည့်ထိန်းသိမ်းခြင်း စသည်တို့ကို ပြည်သူများ ထိထိရောက်ရောက်အကျိုးခံစားနိုင်စေရေး ကြိုးပမ်းဆောင်ရွက်သွားရမည်ဖြစ်ကြောင်း တိုင်းဒေသကြီးဝန်ကြီးချုပ် ဦးမျိုးဆွေဝင်း ကပြောကြားခဲ့သည်။

ပြည်သူတို့ တို့၏ မျှော်လင့်ချက်ကို လွှတ်တော်က ဖော်ဆောင်သည့်အတိုင်း လွှတ်တော်ကိုယ်စားလှယ်များ အားလုံးက ပူးပေါင်းဆောင်ရွက်ရမည်ဖြစ်ပြီး လွှတ်တော်၏ အဓိကလုပ်ငန်းစဉ် ၃ ရပ်ကိုလည်း ပြည်သူများ စိတ်ဝင်တစားပူးပေါင်းလာသည့်နှင့် အမျှ အားကောင်းပြီး ထိရောက်သည့် လွှတ်တော်တစ်ရပ်အဖြစ် ဖော်ဆောင်နိုင်မည်ဖြစ်ကြောင်းလည်း တိုင်းဒေသကြီး ဝန်ကြီးချုပ် ဦးမျိုးဆွေဝင်းက ပြောသည်။

ထို့နောက် တိုင်းဒေသကြီးလွှတ်တော်ကိုယ်စားလှယ်များက မိတ်ဆက်ခဲ့ပြီး လွှတ်တော် ပထမပုံမှန်အစည်းအဝေးကျင်းပမှုပုံစံနှင့် ရွေးချယ်တင်မြှောက်ခြင်းဆိုင်ရာ လုပ်ငန်းစဉ်များကိုလည်း ရှင်းလင်းခဲ့ကြောင်း သိရသည်။

မန္တလေးတိုင်းနှင့် တနင်္သာရီတိုင်းဒေသကြီး တို့တွင် ရင်းနှီးမြှုပ်နှံမှုကော်မတီ အစည်းအဝေးကျင်းပ

ပြည်သူများနှင့် သဘာဝပတ်ဝန်းကျင်အပေါ် အကျိုးသက်ရောက်မှုကောင်းများရှိစေသည့် ရင်းနှီးမြှုပ်နှံမှုများ ဖိတ်ခေါ်

မန္တလေးတိုင်းဒေသကြီးရင်းနှီးမြှုပ်နှံမှုကော်မတီ အစည်းအဝေးကို ယမန်နေ့က ကျင်းပခဲ့ကြောင်း သိရသည်။

ရင်းနှီးမြှုပ်နှံမှုများအား ပြည်သူများ နှင့် သဘာဝပတ်ဝန်းကျင်အပေါ် အကျိုးသက်ရောက်မှုကောင်းများရှိစေသည့် ရင်းနှီးမြှုပ်နှံမှုများကို အားပေးမြှင့်တင့်ကာ ကာလတို ကာလလတ် အစီအမံများချမှတ်ဖိတ်ခေါ်ဆောင်ရွက်နေကြောင်းလည်း သိရသည်။

ဥပဒေလုပ်ထုံးလုပ်နည်းနှင့်အညီ စိစစ်ခွင့်ပြုနေပြီး တင်ပြလျှောက်ထားလာမှုနှင့် မြေပြင်တွင် အမှန်တကယ် လုပ်ငန်းလုပ်ကိုင်ဆောင်ရွက်မှုများနှင့် ကိုက်ညီရန် လိုအပ်ကြောင်း မန္တလေးတိုင်းဒေသကြီး ဝန်ကြီးချုပ် ဦးမျိုးအောင်က ပြောသည်။

ဈေးကွက်စီးပွားရေးစနစ်ဖြစ်သည့်အတွက် ဈေးကွက်ဖွံဖြိုးရေး အသစ်ရရှိရေးနှင့် ဈေးကွက်ချဲ့ထွင်နိုင်ရေးအတွက် အားလုံးကြိုးပမ်းဆောင်ရွက်ရမည်ဖြစ်ကြောင်းလည်း မန္တလေးတိုင်းဝန်ကြီးချုပ် ဦးမျိုးအောင် ကပြောကြားခဲ့ကြောင်း သိရသည်။

ထို့အတူ တနင်္သာရီတိုင်းဒေသကြီး ရင်းနှီးမြှုပ်နှံမှုကော်မတီအစည်းဝေးကိုလည်း ယမန်နေ့ ကကျင်းပခဲ့ပြီး တိုင်းဒေသကြီးဖွံ့ဖြိုးတိုးတက်ရေးအတွက် ရင်းနှီးမြှုပ်နှံမှုများ အရှိန်အဟုန်မြှင့်လုပ်ကိုင်ဆောင်ရွက်မည်ဖြစ်ကြောင်း တိုင်းဒေသကြီးဝန်ကြီးချုပ် ဦးမြတ်ကိုကပြောကြားခဲ့ကြောင်း သိရသည်။

တရားမဝင်ငွေကြေးများကို တရားဝင်ဘဏ် လုပ်ငန်းစနစ်အသုံးချပြီး လွှဲပြောင်း နေရာချထားမှု ဆောင်ရွက်ခြင်းကြောင့် နိုင်ငံစီးပွားရေတည်ငြိမ်မှုတို့ကို ထိခို-က်စေနိုင်

တရားမဝင်ငွေကြေးများကို တရားဝင်ဘဏ်လုပ်ငန်းစနစ် အသုံးချပြီး ငွေလွှဲပြောင်းခြင်း နေရာချထားခြင်း ဆောင်ရွက်ခြင်းတို့ကြောင့် နိုင်ငံ၏ စီးပွားရေး တည်ငြိမ်မှု၊ငွေရေးကြေးရေး ကဏ္ဍခိုင်မာမှုနှင့် ရင်းနှီးမြုပ်နှံမှုတို့ကို ထိခိုက်စေနိုင်ကြောင်း ဘဏ္ဍာရေးနှင့်အခွန်ဝန်ကြီးဌာန ပြည်ထောင်စုဝန်ကြီး ဒေါက်တာ ကံဇော်ကပြောသည်။

ထိုကြောင့် ကြီးကြပ်မှုအာဏာပိုင်များနှင့် တရားဥပဒေစိုးမိုးရေးအဖွဲ့အစည်းများ အနေဖြင့် ကဏ္ဍ အလိုက် အလေးထားကြီးကြပ်ဆောင်ရွက်ပြီး ထိရောက်စွာ ပူးပေါင်းဆောင်ရွက်ရန် လိုအပ်ကြောင်းလည်း ပြည်ထောင်စုဝန်ကြီး ကပြောကြားခဲ့ကြောင်း သိရသည်။

ယမန်နေ့က ကျင်းပသည့် ငွေကြေးခဝါချမှုနှင့် အကြမ်းဖက်မှုကို ငွေကြေးထောက်ပံမှု တို-က်ဖျ-က်ရေးဆိုင်ရာ လုပ်ငန်းစွမ်းဆောင်ရည်မြှင့်တင်ရေးသင်တန်း ဖွင့်ပွဲတွင် ပြည်ထောင်စုဝန်ကြီး ကပြောကြားခဲ့ခြင်းလည်း ဖြစ်သည်။

ငွေကြေးခဝါချမှုနှင့် အကြမ်းဖက်မှုကို ငွေကြေးထောက်ပံ့မှုတို-က်ဖျ-က်ရေးဆိုင်ရာ လုပ်ငန်းစဉ်များတွင် ဝန်ကြီးဌာန အောက်ရှိ ဌာနအလိုက်ပိုမိုထိရောက်စွာ ပူးပေါင်းအကောင်ထည်ဖော်ဆောင်ရွက်ရန် သင်တန်းဖွင့်လှစ်ခြင်းဖြစ်ကြောင်းလည်း သိရသည်။

သံသယဖြစ်ဖွယ် ငွေကြေးလွှဲပြောင်းမှု၊သတ်မှတ်ပမာဏထက်ကျော်လွန်၍ ငွေကြေးလွှဲပြောင်းမှုများကို စိစစ်ပြီး သတင်းပို့ချက် အစီရင်ခံစာများပေးပို့ခြင်း လုပ်ငန်းစဉ်များကို အချိန်မီဆောင်ရွက်ကြရန် လိုအပ်ကြောင်းလည်း ပြည်ထောင်စုဝန်ကြီး ကပြောကြားခဲ့ကြောင်း သိရသည်။

ထိုင်းလွှတ်တော်က မတ်၁၉ တွင် ဝန်ကြီးချုပ်အသစ်ကို မဲပေး ရွေးချယ်မည်

မတ်လ ၁၉ ရက်နေ့၏ လွှတ်တော်အစီအစဉ်တွင် ထိုင်းနိုင်ငံ၏ ဝန်ကြီးချုပ်သစ်ကို ရွေးကောက်တင်မြှောက်ရန် မဲပေးမည့် အစီအစဉ်ထည့်သွင်းသွားမည်ဟု မကြာခင်က လွှတ်တော်ဥက္ကဌအဖြစ် ခန့်အပ်ခံထားရသော ဆိုဖွန်ဆာရမ်က ပြောကြားခဲ့သည်။ တနင်္လာနေ့တွင် ၎င်းနှင့် ဒုတိယဥက္ကဌနှစ်ဦးကို တရားဝင်ခန့်အပ်သည့် ဘုရင့်အမိန့်ထွက်လာပြီးနောက် ၎င်းက ထိုသို့ပြောကြားခဲ့ခြင်းဖြစ်သည်။

နိုင်ငံသည် အကြပ်အတည်းများစွာနှင့် ရင်ဆိုင်နေရသောကြောင့် ဆောင်ခရန်ပွဲတော်မတိုင်မီ အပြည့်အဝအာဏာရှိသော အစိုးရတစ်ရပ်ကို သူ မြင်တွေ့လိုကြောင်း ဆိုဖွန်ဆာရမ်က ပြောကြားခဲ့သည်။

တော်ဝင်အမိန့်တော်အရ ဆိုဖွန်ကို အောက်လွှတ်တော်ဥက္ကဌ၊ မာလီကာ ဂျီရာပန်ဗန်နစ်ကို ဒုတိယဥက္ကဌ(၁)၊ လာ့တ်ဆက် ပတ်တနာချိုင်ကူလ်ကို ဒုတိယဥက္ကဌ(၂) အဖြစ် တရားဝင်ခန့်အပ်ခဲ့သည်။ မတ်လ ၁၅ ရက်နေ့ လွှတ်တော်မဲပေးမှုများအပြီးတွင် ခန့်အပ်မှုများလုပ်ခဲ့ပြီး တနင်္လာနေ့မွန်းလွဲပိုင်းတွင် တော်ဝင်အမိန့်တော်ကို လက်ခံရရှိသည့် အခမ်းအနားကို လွှတ်တော်၌ ကျင်းပခဲ့သည်။

ယခင်လွှတ်တော်က မပြီးပြတ်ခဲ့သော ဖွဲ့စည်းပုံအခြေခံဥပဒေပြင်ဆင်ရေး ကြိုးပမ်းမှုများနှင့် ပတ်သက်၍ မေးမြန်းရာတွင် လမ်းညွှန်ချက်ကို လာမည့်အစိုးရက ဦးစွာအတည်ပြုရမည်ဖြစ်ပြီး အစိုးရအဖွဲ့သစ်ကို တာဝန်ထမ်းဆောင်ရန် စောင့်ဆိုင်းရမည်ဟု ဆိုဖွန်က ပြောကြားခဲ့သည်။

Ref: သည်နေရှင်း

လားရှိုး၊ ကွတ်ခိုင်လမ်း ကုန်စည်စီးဆင်းမှု ပြန်ပွင့်

TNLA သိမ်းပိုက်ထားတဲ့ ကွတ်ခိုင်မြို့ကို ကိုးကန့်တိုင်းရင်းသားလက်ကိုင် တပ်ဖွဲ့က မနေ့ညပိုင်းမှာ သိမ်းပိုက်ခဲ့ပြီးနောက်ပိုင် လားရှိုးမြို့နဲ့ ကွတ်ခိုင် မြို့ကြားမှာ ဒီမနက်ပိုင်း ကုန်စည် စီးဆင်းမှုတွေ ပြန်ပွင့်လာပြီလို့ ဒေသခံ တွေထံကနေ သိရပါတယ်။

ပြီးခဲ့တဲ့ ဖေဖော်ဝါရီလကတည်းက ကွတ်ခိုင်တက်မယ့် ကုန်ကားတွေကို သိန္နီတိုး ဂိတ်ကနေ ကိုးကန့်တပ်ဖွဲ့က ပိတ်ဆို့ထားခဲ့တာဖြစ်ပါတယ်။
“ ဒီမနက်တော့ လမ်းတွေ ပြန်ပွင့်ဖွင့်ပေးလိုက်ပြီ။ ကွတ်ခိုင်၊ လားရှိုးတော့ ပုံမှန်သွားလာလို့ရပြီ။ ကုန်တွေလည်း ပြန်ပေးသွားတယ်လို့” ကွတ်ခိုင်မြို့ခံ တယောက်က ပြောပါတယ်။

တိုက်ပွဲကြောင့် ပိတ်နေတဲ့ ခရီးသည်ကားတွေကိုလည်း ပြန်ဖွင့်ပေးလိုက်ပြီလို့ သိရပါတယ်။
ကွတ်ခိုင်မြို့ထဲမှာတော့ အခြေအနေတွေ တည်ငြိမ်နေပြီး ဈေးဆိုင်တွေလည်း ပြန်ဖွင့် နေပြီလို့ သိရပါတယ်။

“ အခု ကွတ်ခိုင်မှာက ကိုးကန့်တဖွဲ့ပဲကျန်တယ်။ အခုတော့ အားလုံး ငြိမ်သွားပြီ။ လူတွေလည်း သွားလာနေကြပြီ။ ဘာတွေ ဆက်ဖြစ်အုံးမယ် တော့ မသိဘူးပေါ့။ စိုးရိမ်နေရတုန်းပဲ” လို့ ကွတ်ခိုင်မြို့ခံ နောက်တယောက်က ပြော ပါတယ်။

ပြီခဲ့တဲ့ ဖေဖော်ဝါရီလက ကွတ်ခိုင်မြို့မှာ CCTV တွေတပ်တာနဲ့ ပတ်သက်ပြီး ကိုးကန့်တပ်ဖွဲ့နဲ့ TNLA တို့ ပြဿနာ ဖြစ်ခဲ့ကြပါတယ်။

ဒီပြဿနာကို အခြေခံပြီး ကိုးကန့်တပ်ဖွဲ့က ကွတ်ခိုင်မြို့အတွင်း စားနပ်ရိက္ခာ သယ်ဆောင်ခွင့်တွေ ပိတ်ခဲ့ပြီး မြို့ပတ်လည်မှာ စစ်အင်အားတွေဖြည့်ခဲ့ပါတယ်။

အခုလ ၁၄ ရက်နေ့မှာတော့ ကိုးကန့်တပ်ဖွဲ့က ကွတ်ခိုင်မြို့ကို ဝင်ရောက် တိုက်ခိုက်ခဲ့ပြီး နောက် တရက်မှာပဲ ကွတ်ခိုင်မြို့ကို သိမ်းပိုက်ခဲ့တာ ဖြစ်ပါတယ်။

ဒီနေ့ညနေပိုင်းအထိ နမ့်ဖတ်ကာနဲ့ နမ့်ခမ်းကြားက ကျေးရွာတွေမှာ တိုက်ပွဲတွေ ဆက်ဖြစ်နေတယ်လို့ ဒေသခံတွေ ထံကနေသိရပါတယ်။

ယာဥ်စီးခ ပိုတောင်းတဲ့ CNG တက္ကစီတွေကို အရေးယူမယ်

စက်သုံးဆီအခက်အခဲ ဖြစ်ပေါ်နေချိန် အခွင့်ကောင်းယူပြီး ယာဥ်စီးခ ပိုတောင်းတဲ့ CNG တက္ကစီတွေကို အရေးယူသွားမှာ ဖြစ်တယ်လို့ စွမ်းအင်ဝန်ကြီးဌာန ပြည်ထောင်စုဝန်ကြီး ဦးကိုကိုလွင်က မနေ့ မတ် ၁၅ ရက်က နေပြည်တော် စွမ်းအင်ဝန်ကြီးဌာနရုံးမှာ ပြုလုပ်တဲ့ လုပ်ငန်းညှိနှိုင်း အစည်းအဝေးမှာ သတိပေး ပြောဆိုခဲ့ပါတယ်။

“CNG တက္ကစီတွေနဲ့ ပတ်သက်လို့ ငှားရမ်းခ တိုးမြှင့် တောင်းခံတာတွေအတွက် တိုင်ကြားတာတွေ ရှိလာရင် CNG သုံးစွဲခွင့်စာရင်းကနေ ပယ်ဖျက်ပြီး သုံးစွဲခွင့် တောင်းခံထားတဲ့ တခြား မော်တော်ယာဉ်တွေကို ခွင့်ပြုပေးသွားမှာ ဖြစ်ပါတယ်။ ဒါကြောင့် CNG သုံး တက္ကစီယာဉ်တွေအနေနဲ့ နိုင်ငံတော်က စိုက်ထုတ်ပေးထားတဲ့ အခွင့်အရေးကို ပြည်သူတွေ ခံစားခွင့်ရရှိစေဖို့ ပူးပေါင်း ဆောင်ရွက်ကြစေလိုပါတယ်” လို့ ဦးကိုကိုလွင်က ပြောပါတယ်။

စွမ်းအင် ဝန်ကြီးဌာနအနေနဲ့ အများပြည်သူ သယ်ယူပို့ဆောင်ရေး ကဏ္ဍအတွက် အရေးပါတဲ့ YBS ယာဉ်တွေနဲ့ တက္ကစီယာဉ်တွေ (ဒါမှမဟုတ်) သဘာဝဓာတ်ငွေ့ (CNG) တွေကို မပြောင်းလဲတဲ့ ဈေးနှုန်းဖြစ်တဲ့ ၁ ကီလိုဂရမ်ကို ၂၇၃ ကျပ် ၂၅ ပြားနှုန်းနဲ့ ၂၀၀၇ ခုနှစ်ကနေ စတင်ပြီး ရောင်းချပေးနေတာ ဖြစ်တယ်လို့ ဆိုပါတယ်။

ဒါကြောင့် ဒီဈေးနှုန်းတွေဟာ နိုင်ငံတကာဈေးနှုန်းနဲ့ နှိုင်းယှဉ်ပါက ထက်ဝက်ခန့် သက်သာနေတာ ဖြစ်သလို စက်စွမ်းအားတူညီတဲ့ ဓာတ်ဆီ၊ ဒီဇယ်သုံး မော်တော်ယာဉ်တွေရဲ့ တူညီခရီး အကွာအဝေးနဲ့ လောင်စာဆီ ကုန်ကျစရိတ်ကို နှိုင်းယှဉ်ပါကလည်း CNG ဟာ သုံးပုံ တပုံခန့်သာ ကုန်ကျမှာဖြစ်တယ်လို့ ပြည်ထောင်စုဝန်ကြီးက ပြောပါတယ်။

ဝန်ကြီးဌာနအနေနဲ့ CNG အသုံးပြုနေတဲ့ မော်တော်ယာဉ်တွေကို ထိရောက်စွာ ထိန်းချုပ်နိုင်ရေးအတွက် မကြာမီအချိန်အတွင်း Metering စနစ်တပ်ဆင်ခြင်း၊ နည်းပညာအသုံးပြုကာ ထိန်းချုပ် ဖြန့်ဖြူးခြင်းတို့ကို ဆောင်ရွက်သွားမှာဖြစ်တယ်လို့ ဆိုပါတယ်။

ဒါနဲ့ပတ်သက်လို့ တက္ကစီ ယာဥ်မောင်းတယောက်က “ပြောစရာရှိတာက CNG ကိုလည်း ရောက်ထည့်၊ ပရက်ရှာ အပြည့်ပေး၊ တန်းစီချိန် မရှိစေရအောင်လည်း စွမ်းအင်ဝန်ကြီးဌာနက ကြပ်မတ်ပေးသင့်တယ်။ တက္ကစီ ယာဥ်မောင်းတွေဘက်က အဆမတန် အမြဲတမ်းတက်၊ တိုးတိုးပြီး ပိုတောင်းနေတဲ့ အုံနာကြေးကိုရော ဘယ်လိုကိုင်တွယ် ဖြေရှင်းပေးမလဲ။ အရေးကြီးတာ အဲဒီ အုံနာကြေးနဲ့ ကားပြင်စရိတ်၊ အင်ဂျင်ဝိုင်၊ ဂီယာဝိုင်နဲ့ တာယာတွေ စျေးတွေ မတက်ဖို့ကိုလည်း လုပ်ပေးစေချင်တယ်” လို့ ပြောပါတယ်။

သမာအာဇီဝ လုပ်ကိုင်ရှာဖွေနေတဲ့ တက္ကစီ ယာဥ်မောင်းတွေအတွက်လည်း ထည့်သွင်း စဥ်းစားပေးမှသာ တရားမျှတမှာဖြစ်ပြီး ယာဉ်မောင်းတွေလည်း ပြည်သူတွေပဲ ဖြစ်တာကြောင့် ဘယ်အရာကိုမှ တဖက်သတ် မကြည့်စေချင်ဘူးလို့ သူက ပြောပါတယ်။

ဒါအပြင် နောက်ထပ် ယာဉ်မောင်းတယောက်ကလည်း “အုံနာကြေးကရော မောင်းသူဘက်က ဘယ်လိုစီစဥ်ကြမလဲ။ ရန်ကုန်မှာ CNG ကားက တရက်အုံနာကြေး ငါးသောင်းခွဲ၊ ခြောက်သောင်း၊ တချို့ဆို ခြောက်သောင်းကျော်တယ်။ CNG ယာဉ်စီးခစျေး ဆိုတာက ယာဥ်မောင်းနဲ့ မဆိုင်ဘူး၊ CNG အုံနာနဲ့ပဲ ဆိုင်တာ” လို့ ပြောပါတယ်။

ဒါအပြင် လက်ရှိမှာ ကားအပိုပစ္စည်း ဈေးတွေလည်း အဆမတန် မြင့်တက်နေတာကြောင့် သက်ဆိုင်ရာ အဖွဲ့အစည်းတွေအနေနဲ့ ကားအပိုပစ္စည်း ရောင်းချတဲ့ ဆိုင်တွေကိုလည်း ကြပ်မတ်သင့်ပြီး အင်ဂျင်ဝိုင်စျေးတွေ၊ ကားတာယာစျေးတွေ ဈေးမြင့်တက်နေတာတွေကိုပါ အရေးယူပေးစေချင်တယ်လို့ သူက ပြောပါတယ်။

အငှားယာဉ် စီးနင်းသူတွေကတော့ စုံ/မ သတ်မှတ်ချက် ထွက်ပေါ်လာပြီးနောက်ပိုင်း ဆီကားတွေသာမက CNG, EV ကားတွေပါ ကားငှားရမ်းခ ဈေးနှုန်းတွေ မြင့်တက်လာတာ ဖြစ်တယ်လို့ ပြောပါတယ်။

“အခုက ဟိုနားဒီနားကို CNG ကားသမားတွေက အနည်းဆုံး ခုနစ်ထောင် တောင်းနေကြတာ။ စွမ်းအင် ဝန်ကြီးဌာနအနေနဲ့ စည်းကမ်း သတ်မှတ်မယ်ဆို ငှားရမ်းခက နှုန်းထားတွေကိုလည်း တပါတည်း သတ်မှတ်ပေးစေချင်တယ်။ အခုက တောင်းချင်တိုင်းတောင်း၊ ပါးစပ်ဈေး ဖြစ်နေတာ။ ဈေးက ဆီကားကိုပေးရတဲ့ဈေးနဲ့ အတူတူလောက် ဖြစ်နေတာ။ Grab တွေလည်း အဲဒီလိုပဲ။ အရင်ကထက် နှစ်ဆ ပိုတောင်းလာတာ။ ဒါတွေအကုန်လုံးကို စောင့်ကြည့် အရေးယူပေးစေချင်တယ်” လို့ အငှားယာဉ် စီးနင်းသူတယောက်က ပြောပါတယ်။

စွမ်းအင်ဝန်ကြီးဌာနကတော့ ခရီးသည်တွေအနေနဲ့ CNG တက္ကစီတွေ ယာဥ်စီးခ ပိုမိုတောင်းခံပါက ရန်ကုန်မှာရှိတဲ့ မြန်မာ့ရေနံနှင့် သဘာဝဓာတ်ငွေ့လုပ်ငန်း ညွှန်ကြားရေးမှူးရုံးကို တိုင်ကြားနိုင်သလို နီးစပ်ရာ ယာဥ်ထိန်းရဲတပ်ဖွဲ့ ရုံးတွေမှာ တိုင်ကြားနိုင်တယ်လို့ သတင်း ထုတ်ပြန်ထားပါတယ်။

မြဝတီမှာ မိသားစုလိုက် အစာအဆိပ်သင့်ပြီး ကလေးနှစ်ယောက်သေ၊ ခြောက်ယောက်ဆေးကုသမှုခံယူနေရ

ကရင်ပြည်နယ် ၊ မြဝတီမြို့မှာ မိသားစုလိုက် အစာအဆိပ်သင့်ပြီး ကလေးနှစ်ယောက်သေဆုံးကာ နောက်ထပ်ခြောက်ယောက် ဆေးကုသမှုခံယူနေရတယ်လို့ သိရပါတယ်။

မနေ့က မတ်လ ၁၅ ရက်နေ့မှာ ကြက်သားဟင်းချက်စားရာမှာ ဆားကိုထည့်ရမယ့်အစား ဆိုဒီယမ်နိုက်ထရိုက်အမှုန့်ကို ထည့်ပြီးချက်စားခဲ့တဲ့အတွက် အစာအဆိပ်သင့်ပြီး အသက် ၁၂ နှစ်အရွယ်နဲ့ အသက် ၈ နှစ်အရွယ် ကလေးငယ်နှစ်ယောက်သေဆုံးခဲ့ရတာ ဖြစ်တယ်လို့ သိရပါတယ်။

"ဖြစ်တာက သာမန်လက်လုပ်လက်စား မိသားစုပါ ။ကြက်သားထဲကို ဆိုဒီယမ်နိုက်ထရိုက် အထုတ်ထည့်စားတာကနေ ဖြစ်တာလို့သိရတယ်။ အဲဒီအထုတ်ကလည်း ကျားဖြန့်ဆိုက်တွေက ကောက်လာတာလား ဘာလားတော့ မသိဘူး ။ ကလေးနှစ်ယောက်က ဆေးရုံရောက်လာကတည်းက အသက်မပါတော့ဘူးသိရတယ်။ " လို့ ဒေသခံက ပြောပါတယ်။

အဆိုပါ အစာအဆိပ်သင့်ခဲ့တဲ့ မိသားစုဟာ မြဝတီမြို့ အမှတ် ၄ ရပ်ကွက်က ဖြစ်ပြီး
လက်ရှိမှာ အစာအဆိပ်သင့်မှုကြောင့် မိဘတွေအပါအဝင် မိသားစုဝင်ခြောက်​ယောက်ဟာ မြဝတီဆေးရုံကြီးမှာ ကူသမှုခံယူနေရဆဲဖြစ်ပြီး ကျန်းမာရေးအခြေအနေ ကောင်းမွန်တယ်လို့ သိရပါတယ်။

ဇန်နဝါရီလ ၂၀ ရက်နေ့ကလည်း ဧရာဝတီတိုင်း ၊ငွေဆောင်မြို့ ၊ ငွေဆောင်ကမ်းခြေမှာ ငါးပူတင်းကို ချက်စားခဲ့တဲ့ သားအဖနှစ်ယောက်လည်း အစာအဆိပ်သင့်ပြီး သေဆုံးမှု ဖြစ်ပွားခဲ့တယ်လို့ သိရပါတယ်။