မြန်မာ-ဗီယက်နမ်နှစ်နိုင်ငံ အာဆီယံအပါအဝင် ဒေသတွင်းနှင့် နိုင်ငံတကာမျက်နှာစာတွင် ပိုမိုနီးကပ်စွာပူးပေါင်းဆောင်ရွက်ရန်ဆွေးနွေး

နိုင်ငံခြားရေးဝန်ကြီးဌာန၊ ပြည်ထောင်စုဝန်ကြီးဦးတင်မောင်ဆွေနှင့် မြန်မာ နိုင်ငံဆိုင်ရာ ဗီယက်နမ်နိုင်ငံသံအမတ်ကြီး မစ္စတာ ငုယင်အန်းဒပ် တို့ သြဂုတ် ၁၃ ရက်နံနက်ပိုင်းကတွေ့ဆုံစဥ် အထက်ပါအကြောင်းအရာကို ဆွေး နွေးခဲ့ကြခြင်းဖြစ်သည်။
တွေ့ဆုံစဉ် နှစ်ဖက်အပြန်အလှန်အကျိုးဖြစ်ထွန်းစေမည့် ပူးပေါင်းဆောင်ရွက်မှုများအရှိန်အဟုန်မြှင့်တင်ရေး၊ နှစ်နိုင်ငံနှင့် ပြည်သူများကြား ကာလရှည်ကြာတည်ရှိပြီးဖြစ်သောချစ်ကြည်ရင်းနှီးသည့်ဆက်ဆံရေး ပိုမိုတိုးမြှင့်ရေး၊ နှစ်နိုင်ငံကြားတည်ထောင်ထားရှိသည့် ယန္တရားများပြန်လည်စတင်ရေးတို့ကိုလည်း ဆွေးနွေးခဲ့ကြသည်။

USDP နှင့် ဘယ်လာရုစ် Belaya Rus ပါတီတို့ ပူးပေါင်းဆောင်ရွက်ရေး လမ်းပြမြေပုံ အကောင်အထည်ဖော်မှု ဆွေးနွေး

ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP) ဥက္ကဋ္ဌ ဦးခင်ရီနှင့် မြန်မာနိုင်ငံသို့ ချစ်ကြည်ရေးခရီး ရောက်ရှိနေသည့် ဘယ်လာရုစ်နိုင်ငံ Belaya Rus ပါတီဥက္ကဋ္ဌ H.E. Volha Chamadanava တို့သည် ဩဂုတ် ၁၃ ရက် နံနက်ပိုင်းက နေပြည်တော်၌ တွေ့ဆုံ၍ နှစ်ပါတီအကြား သဘောတူညီချက်နှင့် အကောင်အထည်ဖော်မည့် လမ်းပြမြေပုံပါ လုပ်ငန်းစဉ်များ ဆောင်ရွက်ရေး ဆွေးနွေးခဲ့ကြသည်။
တွေ့ဆုံစဉ် USDP နှင့် Belaya Rus ပါတီတို့အကြား ရရှိထားသည့် နှစ်ပါတီသဘောတူညီချက်နှင့် လမ်းပြမြေပုံပါ လုပ်ငန်းစဉ်များကို လက်တွေ့အကောင်အထည်ဖော် ဆောင်ရွက်မည့် အခြေအနေများနှင့်ပတ်သက်၍ အမြင်ချင်းဖလှယ်ခဲ့ကြသည်။
ထို့ပြင် လူငယ်ရေးရာကဏ္ဍတွင် နှစ်ပါတီမှ လူငယ်များအကြား ပူးပေါင်းဆောင်ရွက်မှုနှင့် အပြန်အလှန်ဖလှယ်မှုများ တိုးမြှင့်ရေးအပြင် မီဒီယာကဏ္ဍတွင်လည်း ပူးပေါင်းဆောင်ရွက်မှုများ ပိုမိုကျယ်ပြန့်စွာ ဆောင်ရွက်နိုင်ရေးတို့ကို ဆွေးနွေးခဲ့ကြကြောင်း သိရသည်။
ဘယ်လာရုစ်နိုင်ငံ Belaya Rus ပါတီဥက္ကဋ္ဌ H.E. Volha Chamadanava ဦးဆောင်သည့် ချစ်ကြည်ရေးကိုယ်စားလှယ်အဖွဲ့သည် USDP ပါတီ၏ ဖိတ်ကြားချက်အရ မြန်မာနိုင်ငံသို့ လာရောက်ခြင်းဖြစ်ကြောင်း သိရသည်။

မြန်မာ-ဗီယက်နမ် လူဝင်မှုကြီးကြပ်ရေးဆိုင်ရာ ပူးပေါင်းဆောင်ရွက်မှု တိုးမြှင့်ရေး ဆွေးနွေး

လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန ပြည်ထောင်စုဝန်ကြီး ဦးမြင့်ကြိုင်နှင့် မြန်မာနိုင်ငံဆိုင်ရာ ဗီယက်နမ်နိုင်ငံ သံအမတ်ကြီး H.E. Mr. Nguyen Anh Duc တို့သည် ဩဂုတ် ၁၃ ရက် မွန်းလွဲပိုင်းက နေပြည်တော်၌ တွေ့ဆုံ၍ နှစ်နိုင်ငံ လူဝင်မှုကြီးကြပ်ရေးဆိုင်ရာ ကိစ္စရပ်များ ပူးပေါင်းဆောင်ရွက်မှု တိုးမြှင့်ရေး ဆွေးနွေးခဲ့ကြသည်။
တွေ့ဆုံစဉ် မြန်မာနှင့် ဗီယက်နမ်နိုင်ငံတို့သည် အာဆီယံအဖွဲ့ဝင်နိုင်ငံများဖြစ်သည့်အလျောက် နှစ်နိုင်ငံ ချစ်ကြည်ရင်းနှီးမှုကို အခြေခံ၍ လူဝင်မှုကြီးကြပ်ရေးဆိုင်ရာ လုပ်ငန်းများတွင် ဆက်လက်လက်တွဲ ပူးပေါင်းဆောင်ရွက်သွားရေး ဆွေးနွေးခဲ့ကြသည်။
ထို့ပြင် နှစ်နိုင်ငံအကြား ပြည်ဝင်ဗီဇာနှင့် နေထိုင်ခွင့်ဆိုင်ရာ ကိစ္စရပ်များ အပြန်အလှန်ခွင့်ပြုဆောင်ရွက်ပေးနေမှု၊ မြန်မာနိုင်ငံအတွင်း တရားမဝင်ဝင်ရောက်လာပြီး ဖော်ထုတ်ဖမ်းဆီးရမိသည့် ဗီယက်နမ်နိုင်ငံသားများအနက် ကူညီကယ်တင်ပေးရန် ညှိနှိုင်းထားသူများကို နှစ်နိုင်ငံချစ်ကြည်ရင်းနှီးမှုအရ အရေးယူခြင်းမပြုဘဲ ပြည်နှင်လွှဲပြောင်းပေးခဲ့မှုတို့နှင့်ပတ်သက်၍ အမြင်ချင်းဖလှယ်ခဲ့ကြသည်။
အလားတူ အွန်လိုင်းငွေကြေးလိမ်လည်မှုဖြစ်စဉ်များနှင့် ဆက်နွှယ်၍ အရေးယူခံရကာ ပြစ်ဒ-ဏ်ကျခံနေသည့် ဗီယက်နမ်နိုင်ငံသားများ၏ အခြေအနေများကိုလည်း ဆွေးနွေးခဲ့ကြသည်။
ယင်းအပြင် ဗီယက်နမ်နိုင်ငံသားများ မြန်မာနိုင်ငံသို့ တရားဝင်လမ်းကြောင်းမှ လာရောက်နိုင်ရေးနှင့် တရားမဝင် ဝင်ရောက်မှုများ မဖြစ်ပေါ်စေရေးအတွက် သက်ဆိုင်ရာဘက်မှ အသိပညာပေးမှုများ ဆောင်ရွက်ထားရန် လိုအပ်သည့်ကိစ္စရပ်များကိုလည်း နှစ်ဖက်ဆွေးနွေးခဲ့ကြကြောင်း သိရသည်။

အမြန်လမ်း ၁၁၅ မိုင် DENKO ဆီဆိုင်တွင် ရွှေထုပ်တစ်ထုပ် ကောက်ရထား၊ ပိုင်ရှင်လာရောက်ဆက်သွယ်နိုင်

ရန်ကုန်-မန္တလေးအမြန်လမ်း မိုင်တိုင် ၁၁၅ မိုင်ရှိ DENKO ဖြူး ဆီဆိုင်တွင် ရွှေထည်ပစ္စည်းများပါဝင်သည့် ရွှေထုပ်တစ်ထုပ် ကောက်ရထားကြောင်း ဆီဆိုင်ဘက်က ယနေ့ ဩဂုတ် ၁၄ ရက်တွင် အသိပေးထုတ်ပြန်ထားသည်။
အဆိုပါ ကောက်ရထားသည့် ရွှေထုပ်နှင့်ပတ်သက်၍ ပိုင်ရှင်ဖြစ်သူအနေဖြင့် သက်ဆိုင်ရာ DENKO ဖြူး (အမြန်လမ်း ၁၁၅ မိုင်) ဆိုင်ခွဲသို့ လာရောက်ဆက်သွယ်နိုင်ကြောင်း အသိပေးထားသည်။
သို့သော် ကောက်ရထားသည့် ရွှေထုပ်အတွင်း ပါဝင်သည့် ရွှေထည်အမျိုးအစား၊ အရေအတွက်နှင့် တန်ဖိုးတို့ကို ထုတ်ပြန်ချက်တွင် အသေးစိတ်ဖော်ပြထားခြင်း မရှိသေးကြောင်း သိရသည်။

အီရန် New Development Bank သို့ မကြာမီ ဝင်ရောက်မည်ဟု ဗဟိုဘဏ်ဥက္ကဋ္ဌ ပြော

အီရန်နိုင်ငံသည် BRICS အဖွဲ့က တည်ထောင်ထားသည့် New Development Bank (ND သို့ မကြာမီ အဖွဲ့ဝင်နိုင်ငံအဖြစ် ဝင်ရောက်မည်ဖြစ်ကြောင်း အီရန်ဗဟိုဘဏ်ဥက္ကဋ္ဌ အဗ္ဗဒူလ်နာဆာ ဟမ်မာတီက ပြောကြားသည်။
အိန္ဒိယနိုင်ငံတွင် ကျင်းပသည့် BRICS ဘဏ္ဍာရေးဝန်ကြီးများနှင့် ဗဟိုဘဏ်ဥက္ကဋ္ဌများ အစည်းအဝေးသို့ တက်ရောက်နေသည့် ဟမ်မာတီက BRICS ပူးပေါင်းဆောင်ရွက်မှု၏ အရေးပါသည့် ရလဒ်တစ်ခုမှာ NDB တည်ထောင်နိုင်ခဲ့ခြင်းဖြစ်ပြီး အီရန်အနေဖြင့် မကြာမီ ဘဏ်၏အဖွဲ့ဝင်ဖြစ်လာမည်ဟု ပြောကြားခဲ့ခြင်းဖြစ်သည်။
သို့သော် အီရန်၏ NDB အဖွဲ့ဝင်ဖြစ်ရေးနှင့်ပတ်သက်သည့် အသေးစိတ်အချက်အလက်များကို လက်ရှိအချိန်အထိ အတည်မပြုနိုင်သေးကြောင်း NDB ၏ ကော်ပိုရိတ်ဆက်သွယ်ရေးဌာနက ရိုက်တာသတင်းဌာနသို့ ပြောကြားထားသည်။
အီရန်သည် ၂၀၂၄ ခုနှစ်တွင် BRICS အဖွဲ့သို့ ဝင်ရောက်ခဲ့ပြီးနောက် NDB ၏ အဖွဲ့ဝင်နှင့် ရှယ်ယာရှင်နိုင်ငံတစ်နိုင်ငံ ဖြစ်လာရန် ဆန္ဒရှိကြောင်း ထုတ်ဖော်ပြောကြားခဲ့သည်။
NDB ကို အခြေခံအဆောက်အအုံနှင့် ရေရှည်တည်တံ့သော ဖွံ့ဖြိုးတိုးတက်ရေးစီမံကိန်းများအတွက် ငွေကြေးထောက်ပံ့ပေးရန် ဘရာဇီး၊ ရုရှား၊ အိန္ဒိယ၊ တရုတ်နှင့် တောင်အာဖရိကတို့က ၂၀၁၅ ခုနှစ်တွင် တည်ထောင်ခဲ့ခြင်းဖြစ်သည်။
ထို့ပြင် BRICS အဖွဲ့ဝင်နိုင်ငံများအကြား အမေရိကန်ဒေါ်လာအပေါ် မှီခိုမှုလျှော့ချပြီး သက်ဆိုင်ရာနိုင်ငံသုံးငွေကြေးများဖြင့် ကုန်သွယ်မှုနှင့် ငွေကြေးလွှဲပြောင်းမှုများ တိုးမြှင့်နိုင်ရေး ကြိုးပမ်းနေကြောင်း၊ အီရန်အနေဖြင့်လည်း အခြားအဖွဲ့ဝင်နိုင်ငံများနှင့် နှစ်နိုင်ငံ၊ သုံးနိုင်ငံအလိုက် ငွေကြေးဆိုင်ရာ ပူးပေါင်းဆောင်ရွက်မှုများ တိုးမြှင့်ရန် ကြိုးပမ်းနေကြောင်း ဟမ်မာတီက ပြောကြားခဲ့သည်။

ဘဏ်များ၏ ကိုယ်ပိုင်ရန်ပုံငွေဖြင့် စိုက်ပျိုးမွေးမြူရေး၊ စက်မှုနှင့် MSME လုပ်ငန်းများသို့ ရင်းနှီးမြှုပ်နှံမှု ပိုမိုတိုးမြှင့်မည်

ဘဏ်များအနေဖြင့် စိုက်ပျိုးရေး၊ မွေးမြူရေး၊ စက်မှုနှင့် အသေးစား၊ အငယ်စားနှင့် အလတ်စားစီးပွားရေးလုပ်ငန်း (MSME) များသို့ ၎င်းတို့၏ ငွေကြေးရန်ပုံငွေဖြင့် ရင်းနှီးမြှုပ်နှံမှုများ ပိုမိုဆောင်ရွက်နိုင်ရေး ဆောင်ရွက်လျက်ရှိကြောင်း မြန်မာနိုင်ငံတော်ဗဟိုဘဏ် ဥက္ကဋ္ဌ ဒေါက်တာခင်နိုင်ဦးက ပြောကြားသည်။
ဩဂုတ် ၁၃ ရက် နံနက်ပိုင်းက မြန်မာနိုင်ငံတော်ဗဟိုဘဏ်၊ နေပြည်တော်၌ ကျင်းပသည့် ဘဏ်များ၏ ငွေကြေးရန်ပုံငွေဖြင့် စိုက်ပျိုးရေး၊ မွေးမြူရေး၊ စက်မှုနှင့် MSME လုပ်ငန်းများသို့ ရင်းနှီးမြှုပ်နှံမှု ပိုမိုဆောင်ရွက်နိုင်ရေးဆိုင်ရာ အစည်းအဝေးတွင် ယင်းကဲ့သို့ ပြောကြားခဲ့ခြင်းဖြစ်သည်။
ဗဟိုဘဏ်ဥက္ကဋ္ဌက ဘဏ်များတွင် ပြည်သူများစုဆောင်းအပ်နှံထားသည့် ငွေကြေးများကို နိုင်ငံအတွက် အကျိုးဖြစ်ထွန်းစေမည့် ရင်းနှီးမြှုပ်နှံမှုနှင့် ထုတ်လုပ်မှုကဏ္ဍများသို့ ထိရောက်စွာ စီးဆင်းရောက်ရှိစေရေးသည် ဘဏ်လုပ်ငန်းကဏ္ဍ၏ အရေးကြီးသည့် လုပ်ငန်းတာဝန်တစ်ရပ်ဖြစ်ကြောင်း ပြောကြားသည်။
ယင်းသို့ ဆောင်ရွက်ခြင်းဖြင့် ဘဏ်များသည် ငွေကြေးကြားခံအဖွဲ့အစည်း (Financial Intermediary) အဖြစ်သာမက နိုင်ငံ၏ စီးပွားရေးဖွံ့ဖြိုးတိုးတက်မှု၊ ထုတ်လုပ်မှုမြှင့်တင်ရေးနှင့် အလုပ်အကိုင်အခွင့်အလမ်း ဖန်တီးပေးနိုင်ရေးတို့အတွက် အရေးပါသည့် မောင်းနှင်အားတစ်ရပ်အဖြစ် ပါဝင်နိုင်မည်ဖြစ်ကြောင်း ဆိုသည်။
ထို့ပြင် ပြည်သူများ၏ အပ်နှံငွေများကို စီးပွားရေးလုပ်ငန်းများသို့ ချေးငွေအဖြစ် ပြန်လည်ထုတ်ချေးရာတွင် ဆုံးရှုံးနိုင်ခြေကို လျှော့ချနိုင်ရေးနှင့် အရည်အသွေးကောင်းမွန်သည့် ချေးငွေ (Quality Loan) များ ဖြစ်ပေါ်စေရေး အရေးကြီးသဖြင့် ချေးငွေအရည်အသွေးနှင့် ပြန်လည်ပေးဆပ်နိုင်စွမ်းတို့ကို အလေးထားစောင့်ကြည့်ရန် လိုအပ်ကြောင်းလည်း ဗဟိုဘဏ်ဥက္ကဋ္ဌက ပြောကြားခဲ့သည်။
အစည်းအဝေးတွင် ပုဂ္ဂလိကဘဏ်များမှ တာဝန်ရှိသူများက လက်ရှိကြုံတွေ့နေရသည့် အခက်အခဲများနှင့် ၎င်းတို့၏ ငွေကြေးရန်ပုံငွေဖြင့် စိုက်ပျိုးမွေးမြူရေး၊ စက်မှုနှင့် MSME ကဏ္ဍများသို့ ရင်းနှီးမြှုပ်နှံမှု ပိုမိုဆောင်ရွက်မည့် အစီအစဉ်များကို ဆွေးနွေးခဲ့ကြောင်း သိရသည်။

ဧရာဝတီ-ဟင်္သာတတာနှင့် ငဝန်ရေကာတာ ကြံ့ခိုင်ရေး မပြတ်စောင့်ကြည့်ရန် ဒုတိယဝန်ကြီး ဦးဗိုလ်ဗိုလ်ကျော် မှာကြား

ဧရာဝတီတိုင်းဒေသကြီး ဇလွန်နှင့် ဟင်္သာတမြို့နယ်တို့ရှိ တာတမံများ ကြံ့ခိုင်ရေးနှင့် ကြိုတင်ကာကွယ်ရေးလုပ်ငန်းများကို အချိန်နှင့်တစ်ပြေးညီ ဆောင်ရွက်ရန်နှင့် ရေကင်းအဖွဲ့များဖြင့် အလှည့်ကျ မပြတ်ကင်းလှည့်စောင့်ကြည့်ရန် စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ဒုတိယဝန်ကြီး ဦးဗိုလ်ဗိုလ်ကျော်က မှာကြားခဲ့သည်။
ဒုတိယဝန်ကြီးသည် ဩဂုတ် ၁၃ ရက်က ဇလွန်မြို့နယ်ရှိ ဧရာဝတီ-ဟင်္သာတတာ ကြံ့ခိုင်ရေးနှင့် ရေဘေးကြိုတင်ကာကွယ်ရေးလုပ်ငန်းများကို ကွင်းဆင်းကြည့်ရှုစစ်ဆေးစဉ် ယင်းသို့ မှာကြားခဲ့ခြင်းဖြစ်သည်။
လက်ရှိတွင် ဧရာဝတီ-ဟင်္သာတတာ၏ တာမိုင် (၃၀/၀) မှ (၃၀/၃) အတွင်းနှင့် တာမိုင် (၃၂/၀) မှ (၃၂/၃) အတွင်းရှိ နေရာများတွင် ရေခွေပြုလုပ်၍ သဲအိတ်များချကာ တာတမံကြံ့ခိုင်ရေးနှင့် ရေတိုက်စားမှုကာကွယ်ရေးလုပ်ငန်းများ ဆောင်ရွက်ထားကြောင်း သိရသည်။
ဒုတိယဝန်ကြီးသည် ဟင်္သာတမြို့နယ်၊ အိပ်ပျက်ကျေးရွာအုပ်စု၊ ဖောင်ဆိပ်ကျေးရွာအနီး ဟင်္သာတကမ်းနားတာ တာမိုင် (၅/၄) ရှိ ရေကင်းစခန်းအမှတ် (၉)၊ တာမိုင် (၅/၃) ရှိ တာတမံနှင့် မြစ်ကမ်းအခြေအနေတို့ကို ကြည့်ရှုစစ်ဆေးခဲ့ပြီး ဖြတ်တာ (၁-င) နှင့် မဲဇလီညွန့်ဖြတ်တာတို့၏ အခြေအနေများကိုလည်း စစ်ဆေးခဲ့သည်။
ထို့ပြင် ဩဂုတ် ၁၀ ရက်က လေးမျက်နှာမြို့နယ်ရှိ ငဝန်ရေကာတာ၏ တာမိုင် (၂၆/၃) မှ (၂၆/၄)၊ တာမိုင် (၂၇/၀) မှ (၂၇/၁) နှင့် တာမိုင် (၃၁/၂) မှ (၃၁/၃) အတွင်း တာကြံ့ခိုင်မှုများကို ကွင်းဆင်းစစ်ဆေးခဲ့သည်။ ယင်းခရီးစဉ်အတွင်း ငဝန်မြစ်ကြောင်းတစ်လျှောက် သဲသောင်ဖြစ်ပေါ်နေမှု၊ ကမ်းပြိုကမ်းစားမှုနှင့် Geotextile များအသုံးပြု၍ ကမ်းပြိုကာကွယ်ထားမှုတို့ကိုလည်း ကြည့်ရှုခဲ့သည်။
စစ်ဆေးမှုများအပြီးတွင် လိုအပ်သည့်နေရာများ၌ ကမ်းပြိုကမ်းစားမှု လျော့နည်းစေရေးနှင့် ရေကာတာများအပေါ် ရေတိုက်စားမှု သက်သာစေရေးအတွက် ရေလမ်းကြောင်းပြန်တည့်ခြင်း၊ သဲသောင်တူးဖော်ခြင်းနှင့် လိုအပ်သည့် ကြိုတင်ကာကွယ်ရေးလုပ်ငန်းများ ဆောင်ရွက်နိုင်ရေး နည်းပညာပိုင်းဆိုင်ရာ ကိစ္စရပ်များကို ဆွေးနွေးခဲ့ကြောင်း သိရသည်။

ဆီးချို၊ HIV၊ ကင်ဆာအပါအဝင် ဆေးဝါးအမယ်သစ် ၆ မျိုး သုတေသနစမ်းသပ်အောင်မြင်၊ ပြည်တွင်းဆေးဝါးစက်ရုံများသို့ နည်းပညာလွှဲပြောင်း

ဆီးချို၊ HIV၊ အရိုးအကြောအဆစ်နှင့် ကင်ဆာရောဂါကုသဆေးများအပါအဝင် ဆေးဝါးအမယ်သစ် ခြောက်မျိုးကို သုတေသနပြုစမ်းသပ်၍ အောင်မြင်ခဲ့သည့် ပညာရှင်များအား ဂုဏ်ပြုသည့်အခမ်းအနားကို ဩဂုတ် ၁၃ ရက်က ရန်ကုန်မြို့၌ ကျင်းပခဲ့ကြောင်း သိရသည်။
သုတေသနစမ်းသပ်အောင်မြင်ခဲ့သည့် ဆေးဝါးအမယ်သစ်များမှာ ဆီးချိုရောဂါကုသဆေး နှစ်မျိုး၊ HIV ရောဂါကုသဆေး တစ်မျိုး၊ အရိုးအကြောအဆစ်ရောဂါကုသဆေး တစ်မျိုး၊ ကင်ဆာရောဂါကုသဆေး တစ်မျိုးနှင့် မေ့ဆေးတစ်မျိုး စုစုပေါင်း ခြောက်မျိုးဖြစ်သည်။
အဆိုပါ ဆေးဝါးများသည် အစားအသောက်နှင့် ဆေးဝါးကွပ်ကဲရေးဦးစီးဌာန (FDA) ၏ ခွင့်ပြုချက်ရရှိထားပြီး ပြည်တွင်းဆေးဝါးစက်ရုံများသို့ နည်းပညာလွှဲပြောင်းပေးနိုင်ခဲ့သဖြင့် ပြည်တွင်းဆေးဝါးထုတ်လုပ်မှု အားကောင်းလာစေရေးနှင့် ပြည်ပဆေးဝါးတင်သွင်းမှုအပေါ် မှီခိုမှုလျှော့ချရေးကို အထောက်အကူပြုနိုင်မည်ဖြစ်ကြောင်း သိရသည်။
၁၉၈၂ ခုနှစ်မှ ယနေ့အထိ သုတေသနဌာနက ဆေးဝါးအမျိုးအစား ၆၆ မျိုးကို အောင်မြင်စွာ စမ်းသပ်ဖော်ထုတ်နိုင်ခဲ့ကြောင်းလည်း သိရသည်။
အခမ်းအနားတွင် စက်မှုနှင့် အသေးစား၊ အငယ်စား၊ အလတ်စား စီးပွားရေးလုပ်ငန်းများ ဖွံ့ဖြိုးတိုးတက်ရေးဝန်ကြီးဌာန ပြည်ထောင်စုဝန်ကြီး ဒေါက်တာချာလီသန်းက ဆေးဝါးများကို ပြည်တွင်း၌ ထုတ်လုပ်နိုင်ခြင်းကြောင့် ပြည်သူများအနေဖြင့် အရည်အသွေးကောင်းမွန်၍ ဘေးကင်းလုံခြုံသည့် ဆေးဝါးများကို အချိန်မီ၊ ကုန်ကျစရိတ်သက်သာစွာ ရရှိနိုင်မည်ဖြစ်ကြောင်း ပြောကြားသည်။
ထို့ပြင် ပြည်ပဆေးဝါးများအပေါ် မှီခိုမှုကြောင့် ဖြစ်ပေါ်နိုင်သည့် ငွေကြေးအခက်အခဲများကို လျှော့ချနိုင်မည်ဖြစ်ပြီး ပြည်သူများ၏ ကျန်းမာရေးလိုအပ်ချက်များ ဖြည့်ဆည်းပေးနိုင်ရန် ပိုမိုကောင်းမွန်သည့် ဆေးဝါးအမျိုးအစားသစ်များကို ဆက်လက်သုတေသနပြု တီထွင်ထုတ်လုပ်သွားရန်လည်း တိုက်တွန်းခဲ့သည်။
ယင်းနောက် ဆေးဝါးအမယ်သစ် ခြောက်မျိုးကို အောင်မြင်စွာ သုတေသနစမ်းသပ်ခဲ့သည့် ပညာရှင်များအား ဂုဏ်ပြုမှတ်တမ်းလွှာများ ပေးအပ်ခဲ့ကြောင်း သိရသည်။

မြန်မာ-ဘယ်လာရုစ် အမျိုးသမီးရေးရာကဏ္ဍ ဖွံ့ဖြိုးတိုးတက်ရေးနှင့် နည်းပညာပူးပေါင်းဆောင်ရွက်မှု မြှင့်တင်ရန် ဆွေးနွေး

မြန်မာနှင့် ဘယ်လာရုစ် နှစ်နိုင်ငံအကြား အမျိုးသမီးများ ဖွံ့ဖြိုးတိုးတက်ရေး၊ အကြမ်းဖက်မှုတားဆီးကာကွယ်ရေးနှင့် နည်းပညာဆိုင်ရာ ပူးပေါင်းဆောင်ရွက်မှုများ အပါအဝင် အမျိုးသမီးရေးရာကဏ္ဍ၌ အနာဂတ်ပူးပေါင်းဆောင်ရွက်မှုများ ဆက်လက်မြှင့်တင်နိုင်ရေး ဆွေးနွေးခဲ့ကြောင်း သိရသည်။
အမျိုးသမီးရေးရာဝန်ကြီးဌာန ပြည်ထောင်စုဝန်ကြီး ဒေါက်တာသက်သက်ဇင်နှင့် မြန်မာနိုင်ငံသို့ ရောက်ရှိနေသည့် ဘယ်လာရုစ်သမ္မတနိုင်ငံ Belaya Rus ပါတီဥက္ကဋ္ဌ Ms. Olga Chemodanova ဦးဆောင်သော ကိုယ်စားလှယ်အဖွဲ့တို့ တွေ့ဆုံစဉ် ယင်းကဲ့သို့ ဆွေးနွေးခဲ့ခြင်းဖြစ်သည်။
တွေ့ဆုံစဉ် ပြည်ထောင်စုဝန်ကြီးက မြန်မာနိုင်ငံတွင် အမျိုးသမီးများဖွံ့ဖြိုးတိုးတက်ရေး နိုင်ငံတော်အဆင့် မဟာဗျူဟာစီမံကိန်း (National Strategic Plan for Advancement of Women-NSPAW) ကို အကောင်အထည်ဖော်လျက်ရှိသည့်အပြင် အမျိုးသမီးများအပေါ် အကြမ်းဖက်မှု တားဆီးကာကွယ်ရေးလုပ်ငန်းများကိုလည်း ဆောင်ရွက်လျက်ရှိကြောင်း ပြောကြားသည်။
အမျိုးသမီးများနှင့် အမျိုးသမီးငယ်များ၏ စွမ်းဆောင်ရည်မြှင့်တင်ရေးနှင့် လူမှုဘဝလုံခြုံရေးအတွက် အမျိုးသမီးရေးရာဝန်ကြီးဌာနကို ဖွဲ့စည်းတည်ထောင်ထားပြီး အမျိုးသမီးဖွံ့ဖြိုးတိုးတက်ရေးနှင့် အကြမ်းဖက်မှုတားဆီးကာကွယ်ရေးကဏ္ဍများတွင် နည်းပညာပူးပေါင်းဆောင်ရွက်မှု တိုးမြှင့်ရန်နှင့် အခြားနိုင်ငံများ၏ အတွေ့အကြုံကောင်းများကို လေ့လာလိုကြောင်းလည်း ပြည်ထောင်စုဝန်ကြီးက ပြောကြားခဲ့သည်။
ဘယ်လာရုစ်ဘက်မှ Ms. Olga Chemodanova က ၂၀၂၆ ခုနှစ်ကို ဘယ်လာရုစ်သမ္မတနိုင်ငံ၏ အမျိုးသမီးများနှစ် အဖြစ် သတ်မှတ်ထားကြောင်း၊ အမျိုးသမီးများ ကာကွယ်စောင့်ရှောက်ရေးလုပ်ငန်းများတွင် မိသားစုနှင့် ကလေးသူငယ်များအား ကာကွယ်စောင့်ရှောက်နိုင်ရေး အသိပညာပေးအစီအစဉ်များ ထည့်သွင်းဆောင်ရွက်ရန် လိုအပ်ကြောင်း ဆွေးနွေးခဲ့သည်။
ထို့ပြင် အမျိုးသမီးများ၏ ကျန်းမာရေးသည် အရေးကြီးသည့်အတွက် ကျန်းမာရေးဆိုင်ရာ အသိပညာမြှင့်တင်ပေးရေးကိုလည်း အလေးထားဆောင်ရွက်ရန် လိုအပ်ကြောင်း အမြင်ချင်းဖလှယ်ခဲ့ကြသည်။
မြန်မာနိုင်ငံ လူဦးရေ၏ ၅၃ ရာခိုင်နှုန်းခန့်မှာ အမျိုးသမီးများဖြစ်ပြီး ကျေးလက်နေအမျိုးသမီးများနှင့် အမျိုးသမီးငယ်များ ဖွံ့ဖြိုးတိုးတက်ရေးကို ဦးစားပေးဆောင်ရွက်လျက်ရှိကြောင်း သိရသည်။

မူဆယ်နဲ့ လဲချားမှာ ကျားဖြန့်လုပ်တဲ့ တရုတ်နိုင်ငံသား အယောက် ၁၀၀ ဝန်းကျင် ဖမ်းမိ

ရှမ်းပြည်တောင်ပိုင်း၊ လဲချားမြို့နဲ့ ရှမ်းပြည်မြောက်ပိုင်း၊ မူဆယ်မြို့တွေမှာ အခုရက်ပိုင်းအတွင်း ကျားဖြန့်(အွန်လိုင်းငွေလိမ်လုပ်ငန်း) လုပ်ကိုင်နေတဲ့ တရုတ်နိုင်ငံသား အယောက် ၁၀၀ ဝန်းကျင် ဖမ်းဆီးရမိခဲ့တယ်လို့ အစိုးရ ထုတ်ပြန်ချက်နဲ့ ဒေသခံတွေရဲ့ပြောကြားချက်တွေအရ သိရပါတယ်။
မူဆယ်မြို့နယ်အတွင်းက တော်ရွက်ရပ်ကွက်ထဲက ငွေလိမ်ဂိုဏ်းတခုကို ရဲတပ်ဖွဲ့နဲ့ ပြည်သူ့စစ် ပူးပေါင်းအဖွဲ့တွေက အခုလ ၁၁ ရက်နေ့မှာ ဝင်ရောက် ဖမ်းဆီးခဲ့တာမှာ တရုတ်နိုင်ငံသား အယောက် ၆၀ ကို ဆက်စပ်ပစ္စည်းတွေနဲ့ ဖမ်းဆီးရမိခဲ့တာပါ။
“သတင်းရလို့ ဝင်ဖမ်းတာလို့ပြောတယ်။ တရုတ်တွေ မိတာရှိတယ်။ တခြား နေရာတွေမှာလည်း ရှိသေးတယ်။ မူဆယ်က တရုတ်နဲ့ ကပ်နေတော့ ကျားဖြန့် တွေက ဝင်လိုက်ထွက်လိုက်ပါပဲ” လို့ မူဆယ်မြို့ခံတယောက်က ပြောပါ တယ်။
မူဆယ်မြို့ဟာ အစိုးရတပ်ရဲ့ ထိန်းချုပ်မှုအောက်မှာ ရှိတာဖြစ်ပြီး ပြည်သူ့ စစ်တပ်ဖွဲ့တွေ အများအပြား လှုပ်ရှားတဲ့ တရုတ်နယ်စပ်မြို့တခု ဖြစ်ပါတယ်။
ရှမ်းပြည်တောင်ပိုင်း၊ လဲချားမြို့နယ်၊ ဆီဆောကျေးရွာအနီးမှာလည်း အခုလ ၁၀ ရက်နေ့က ကျားဖြန့်လုပ်ငန်း လုပ်ကိုင်နေတဲ့ နေရာတွေကို အစိုးရတပ်က ဝင်ရောက်စီးနင်းခဲ့တာမှာ တရုတ်နိုင်ငံသား ၃၄ ယောက် ဖမ်းမိခဲ့တယ်လို့ အစိုးရဘက်က သတင်းထုတ်ပြန်ပါတယ်။
ဖမ်းဆီးရမိတဲ့သူတွေကို စစ်ဆေးနေပြီး နောက်ကွယ်ကနေ ပါဝင်သူတွေကို လည်း အရေးယူမယ်လို့ အစိုးရဘက်က ထုတ်ပြန်ထားပါတယ်။
လဲချားမြို့နယ်အတွင်းမှာ အစိုးရတပ်အပြင် မန်ပန်ပြည်သူ့စစ်၊ ရှမ်းလက်နက်ကိုင်တပ်ဖွဲ့တွေဖြစ်တဲ့ (SSPP/SSA) နဲ့ (RCSS/SSA) တပ်ဖွဲ့နှစ်ဖွဲ့လုံး လှုပ်ရှားတဲ့ နေရာဖြစ်ပါတယ်။
အဲဒီဒေသအတွင်းမှာ ၂၀၂၄ ခုနှစ်ကတည်းက ကျားဖြန့်လုပ်ကိုင်တဲ့ တရုတ်နိုင်ငံသားတွေ နေရာအနှံ့မှာ ရောက်နေတာလို့ ဒေသအခြေစိုက် မီဒီယာတွေမှာ ဖော်ပြပါတယ်။
အခုလအတွင်းမှာ ရှမ်းပြည်တောင်ပိုင်းဒေသအတွင်းကနေ ကျားဖြန့်လုပ်ငန်း တွေကို အစိုးရတပ်က မကြာခဏဆိုသလို ဖမ်းဆီးရမိနေတာဖြစ်ပါတယ်။
အခုလ ၄ ရက်နေ့ကလည်း နမ့်စန်းမြို့နယ်၊ နားရိုင်ရွာသစ်ကျေးရွာ တောင်ဘက် မီတာ ၂၅၀ ခန့်အကွာမှာရှိတဲ့ ကျားဖြန့် ရုံကို အစိုးရတပ်က ဝင်ရောက် စီးနင်းခဲ့တာမှာ တရုတ်နိုင်ငံသားတွေ အပါအဝင် ၄၃ ယောက်ကို လက်နက်တွေနဲ့အတူ ဖမ်းဆီးရမိခဲ့ပါတယ်။