အလေးချိန်(၁၁,၀၀၀ ကရက်)ရှိ တန်ဖိုးကြီးမားသော မိုးကုတ်ရတနာမြေမှရှာဖွေတွေ့ရှိသည့် ပတ္တမြားကြီးကို နိုင်ငံတော်သမ္မတကြည့်ရှု

မန္တလေးတိုင်း၊ မိုးကုတ်ရတနာမြေမှထူးခြားလှပပြီး အရွယ်အစားကြီးမားသည့် အလေးချိန်(၁၁,၀၀၀ က ရက်)ရှိ တန်ဖိုးကြီးမားသော ပတ္တမြားတစ်ပွင့်ကိုရှာဖွေတွေ့ရှိခဲ့ရာ နိုင်ငံတော်သမ္မတ ဦးမင်းအောင်လှိုင်က ယနေ့ မေ ၇ ရက်တွင် နိုင်ငံတော်သမ္မတရုံးတော်၊ ဧည့်ခန်းမဆောင်၌ကြည့်ရှုခဲ့သည်။
ယင်း ပတ္တမြားကြီး၏အချက်အလက်များကို နိုင်ငံ တော်သမ္မတရုံး ပြည်ထောင်စုဝန်ကြီးနှင့် သယံဇာတနှင့်သဘာဝပတ်ဝန်းကျင်ထိန်းသိမ်းရေးဝန်ကြီးဌာန ပြည် ထောင်စုဝန်ကြီးတို့ကရှင်းလင်းတင်ပြခဲ့ကြသည်။
ယခုရှာဖွေတွေ့ရှိခဲ့သော ပတ္တမြားသည် အလေးချိန် ၂,၂၀၀ ဂရမ်(၁၁,၀၀၀ ကရက်)ရှိကာ အရွယ်အစားကြီးမားသဖြင့်ရှာဖွေတွေ့ရှိရန်ခက်ခဲပြီးရှားပါးကာ ပတ္တမြားကြီးသည် ခရမ်းရောင်သမ်းသော အနီရောင်တွင် အဝါရိပ်ဖောက်သောအရောင်ရှိပြီး အရောင်အဆင့်အတန်းကောင်းမွန်ကာ အလင်းပေါက်အား သင့်တင့်ပြီးဖန်ရောင်လက်ကောင်းမွန်ပြီး ပြုပြင်ထားခြင်းမရှိသော သဘာဝအတိုင်းရှိသည့် ပတ္တမြားကြီးဖြစ်သည်။
ယခင်က မြန်မာနိုင်ငံတွင် ရှားပါးပြီးတန်ဖိုးရှိသည့် ၁၉၉၀ ပြည့်နှစ်တွင် ရရှိခဲ့သော အလေးချိန်(၉၉ ဒသမ ၂၅)ဂရမ်(၄၉၆ ဒသမ ၂၅ ကရက်)ရှိ နဝတ ပတ္တမြား၊ ၁၉၉၆ ခုနှစ်တွင်ရရှိခဲ့သော အလေးချိန်(၄,၂၉၀)ဂရမ် (၂၁,၄၅၀ ကရက်)ရှိပတ္တမြားနှင့် ၂၀၂၂ ခုနှစ်တွင်ရရှိခဲ့သော အလေးချိန်(၅၅၇ ဒသမ ၈၅)ဂရမ်(၂,၇၈၉ ဒသမ ၂၅ ကရက်)ရှိ နစက ပတ္တမြားတို့ကိုရှာဖွေတွေ့ရှိခဲ့ပြီးဖြစ်ရာ ယခုပတ္တမြားအပါအဝင် ပတ္တမြား(၄)ပွင့်လုံးသည် မိုးကုတ်ဒေသမှထွက်ရှိပြီး သက်ဆိုင်ရာပတ္တမြားတစ်ပွင့်ချင်းအလိုက် ဂုဏ်သတ္တိထူးခြားချက်များရှိ၍ အလွန်တန်ဖိုးရှိသည့် ပတ္တမြားများဖြစ်သည်။
ထို့ပြင် ၁၉၉၆ ခုနှစ်ကရရှိခဲ့သော ပတ္တမြားသည် အ လေးချိန်အများဆုံးဖြစ်သော်လည်း အရောင်နှင့်အရည်အသွေးနှိုင်းယှဉ်ပါက ယခုနောက်ဆုံးတွေ့ရှိခဲ့သော ပတ္တမြားမှာ အရောင်နှင့် အရည်အသွေးပိုမိုကောင်းမွန်သောကြောင့် တန်ဖိုးပိုမိုမြင့်မားသည်။

မိတ္ထီလာမြို့နယ်ရှိ ကျေးရွာ(၆၁)ရွာ၌ လျှပ်စစ်ဓာတ်အားပြ-တ်တေ-ာက်နေ

မန္တလေးတိုင်း၊ မိတ္ထီလာမြို့နယ်ရှိ ကျေးရွာ(၆၁)ရွာတွင် ယနေ့ မေ ၇ ရက်နံနက် ၇ နာရီခွဲခန့်မှစတင်၍ လျှပ်စစ်ဓာတ်အားပြ-တ်တေ-ာက်လျက်ရှိသည်ဟု လျှပ်စစ်နှင့် စွမ်းအင်ဝန်ကြီးဌာနထံမှ သိရသည်။
မိတ္ထီလာ-ကျောက်ပန်းတောင်းလမ်းဘေး/ညောင်ပင်သာကျေးရွာအနီး နှစ်ရှည်"လက်ပံ"ပင်အောက်ခြေမှ ကျိုးပဲ့လဲကျကာ 33/11kV,(5)MVA ဖလန်ကျင်းခွဲရုံ၏ 11kV ရေဝေဓာတ်အားလိုင်းရှိ Tension H Pole (၂)တိုင်စင်ကျိုးပဲ့ပြီး Suspension Arm (၃)ချောင်း/လိုင်းကြိုး ACSR 95 mm2 (၁၃၀)ပေခန့်ပျက်စီးခဲ့ကြောင်း သိရသည်။
အဆိုပါ ဖြစ်စဉ်ကြောင့် မိတ္ထီလာမြို့နယ်ရှိ ကျေးရွာ (၆၁)ရွာတွင် လျှပ်စစ်ဓာတ်အားပြ-တ်တေ-ာက်လျှက်ရှိ၍ လျှပ်စစ်ဓာတ်အားပြန်လည်ပေးပို့နိုင်ရန် လျှပ်စစ်ကျွမ်းကျင်ဝန်ထမ်းများကဆောင်ရွက်လျက်ရှိကြောင်း သိရသည်။

အမေရိကန်နှင့် ကုန်သွယ်ရေးသဘောတူညီချက် အတည်ပြုရန် EU ကို ထရန့် ရာဇသံပေး

အမေရိကန်သမ္မတ ဒေါ်နယ်ထရန့်သည် ဥရောပသမဂ္ဂ(EU) အနေဖြင့် အမေရိကန်အပေါ် ကောက်ခံထားသော အခွန်နှုန်းထားများကို သုညအထိ လျှော့ချပေးရန် ပျ-က်ကွက်ပါက ဇူလိုင်လ ၄ ရက်နေ့တွင် EU အပေါ် "ပိုမိုမြင့်မားသော" အခွန်အတုတ်များ တိုးမြှင့်ကောက်ခံမည်ဟု ခြိမ်းခြောက်ပြောဆိုလိုက်သည်။
ဥရောပကော်မရှင်ဥက္ကဋ္ဌ အာဆူလာ ဗွန်ဒါလီယန် (Ursula von der Leyen) နှင့် ဖုန်းဖြင့် ဆွေးနွေးပြီးနောက် ထရန့်က ပြောကြားရာတွင် "ကျွန်ုပ်တို့နိုင်ငံ၏ (၂၅၀) ကြိမ်မြောက် မွေးနေ့" (ဇူလိုင် ၄ ရက်) အထိ အချိန်ပေးရန် သဘောတူညီခဲ့ကြောင်း၊ သို့မဟုတ်ပါက "၎င်းတို့၏ အခွန်နှုန်းထားများသည် ပိုမိုမြင့်မားသော အဆင့်သို့ ချက်ချင်းခုန်တက်သွားလိမ့်မည်" ဟု ဆိုသည်။
သို့သော်လည်း ဗွန်ဒါလီယန်ကမူ ထရန့်သတ်မှတ်ထားသည့် နောက်ဆုံးရက်မတိုင်မီ အခွန်လျှော့ချရေးအတွက် အဖွဲ့ချုပ်အနေဖြင့် "ကောင်းမွန်သော တိုးတက်မှုများ" ရရှိနေကြောင်း ပြောကြားခဲ့သည်။
တရားရုံး၏ ဆုံးဖြတ်ချက်နှင့် အခက်အခဲများ
ဤခြိမ်းခြောက်မှု ထွက်ပေါ်လာပြီး နာရီပိုင်းအကြာတွင်ပင် အမေရိကန် ကုန်သွယ်ရေးတရားရုံးက ထရန့်၏ နောက်ဆုံးထုတ်ပြန်ထားသော ၁၀% ကမ္ဘာလုံးဆိုင်ရာ အခွန်တိုးမြှင့်မှုသည် အမေရိကန် ကုန်သွယ်ရေးဥပဒေအရ တရားမျှတမှုမရှိကြောင်း ဆုံးဖြတ်ခဲ့သည်။ ယင်းဆုံးဖြတ်ချက်ကြောင့် နောင်တွင် တရားရုံး၌ စိန်ခေါ်မှုများ ထပ်မံပေါ်ပေါက်လာနိုင်ချေ ရှိနေသည်။
ပြီးခဲ့သည့်နှစ် ဇူလိုင်လက ဗွန်ဒါလီယန်နှင့် ထရန့်တို့ကြား ကုန်သွယ်ရေးသဘောတူညီချက် တစ်ရပ်ရရှိခဲ့သော်လည်း ပြီးခဲ့သည့် ဗုဒ္ဓဟူးနေ့က EU ဥပဒေပြုအမတ်များနှင့် အစိုးရများကြား ဆွေးနွေးပွဲများ သဘောတူညီမှုမရဘဲ ပြီးဆုံးသွားခဲ့သဖြင့် အကောင်အထည်ဖော်ရန် ခက်ခဲနေခြင်းဖြစ်သည်။
ဗွန်ဒါလီယန်ကမူ "ကျွန်ုပ်တို့ နှစ်ဖက်စလုံးအနေနဲ့ ဒီသဘောတူညီချက်ကို အကောင်အထည်ဖော်ဖို့ အပြည့်အဝ ကတိပြုထားဆဲပါ" ဟု ကြာသပတေးနေ့က X တွင် ရေးသားခဲ့သည်။
သဘောတူညီချက်၏ အသေးစိတ်အချက်အလက်များ မူလသဘောတူညီချက် - EU မှ တင်ပို့ကုန်များအပေါ် အမေရိကန်က ၁၅% အခွန်ကောက်ခံရန်။
ထရန့်၏ ခြိမ်းခြောက်မှု - ဥရောပကုန်စည်များအပေါ် အခွန် ၃၀% အထိ တိုးမြှင့်မည်။
ဥရောပပါလီမန်၏ ရပ်တည်ချက် - မတ်လအတွင်းက ဥပဒေပြုအမတ်အများစုက ဤသဘောတူညီချက်ကို အတည်ပြုခဲ့သော်လည်း အမေရိကန်ဘက်က ကတိတည်စေရန် "ကာကွယ်ရေးအချက်အလက်များ" ထည့်သွင်းထားသည်။

နိုင်ငံ ၈ နိုင်ငံ ၏ ယဥ်ကျေးမှုများ လေ့လာနိုင်မည့် "𝐂𝐮𝐥𝐭𝐮𝐫𝐚𝐥 𝐂𝐨𝐧𝐧𝐞𝐜𝐭𝐢𝐨𝐧𝐬 " ကို မေလတွင် ပြုလုပ်မည်

"𝐂𝐮𝐥𝐭𝐮𝐫𝐚𝐥 𝐂𝐨𝐧𝐧𝐞𝐜𝐭𝐢𝐨𝐧𝐬" အစီအစဉ် ဖြင့် ကနေဒါ၊ ပြင်သစ်၊ ဂျာမနီ၊ အီတလီ၊ ဂျပန်၊ ကိုရီးယား၊ ယူကေ နှင့် အမေရိကန်သံရုံးများ၏ ယဉ်ကျေးမှုစင်တာများတွင် သက်ဆိုင်ရာနိုင်ငံအသီးသီး၏ ယဉ်ကျေးမှုများကို ရန်ကုန်မြို့တွင် ဝင်ရောက်လေ့လာနိုင်ရန် စီစဥ်ထားမည်ဖြစ်ကြောင်း မြန်မာနိုင်ငံဆိုင်ရာအမေရိကန်သံရုံး၏ အသိပေးထုတ်ပြန်ချက်အရသိရသည်။
အတွေ့အကြုံအသစ်များ နှီးနှောဖလှယ်မှုအသစ်များနှင့် အတူ မေလတွင် ပြုလုပ်မည်လည်း ဖြစ်သည်။
𝐂𝐮𝐥𝐭𝐮𝐫𝐚𝐥 𝐂𝐨𝐧𝐧𝐞𝐜𝐭𝐢𝐨𝐧𝐬" သည် လာရောက်လည်ပတ်သူများကို အနုပညာ၊ ဂီတ၊ အစားအစာများနှင့် လက်တွေ့ပါဝင်ဆင်နွှဲနိုင်သည့် အစီအစဉ်များမှ တဆင့် ရိုးရာဓလေ့၊ တီထွင်ဖန်တီးမှုများ နှင့် လူမှုအသိုက်အဝန်းအကြောင်းကို တွေ့ကြုံခံစားနိုင်မည့် အခွင့်အရေးများပေးအပ်သွားမည့် နိုင်ငံတကာယဉ်ကျေးမှုပွဲတော်တစ်ခုဖြစ်ကြောင်း သိရသည်။
နိုင်ငံတစ်နိုင်ငံချင်းစီ၏ အကြောင်းကို ပိုပြီးနားလည်နိုင်ရန် ၊ ဆက်ဆံရေးတည်ဆောက်ကြရန်နှင့် မိတ်ဖက်ပူးပေါင်းဆောင်ရွက်မှုများကို အားကောင်းစေမည့် တမူထူးခြားသည့် အခွင့်အလမ်းများ ရှိနေမည်ဖြစ်ကြောင်း ထုတ်ပြန်ချက်တွင် အသိပေးထားသည်။

စစ်ကိုင်းတိုင်းဒေသကြီးအတွင်းသွေးလွန်တုပ်ကွေးဖြစ်ပွားမှုမြင့်မားလျက်ရှိ

စစ်ကိုင်းတိုင်းဒေသကြီးအတွင်း သွေးလွန်တုပ်ကွေးဖြစ်ပွားမှု မြင့်မားလျက်ရှိပြီး ချောင်းဦးနှင့် ဒီပဲယင်း မြို့နယ်များတွင် အဆိုပါရောဂါကြောင့် ‌ေ-သဆုံးမှုရှိကြောင်း စစ်ကိုင်းတိုင်းဒေသကြီး ပြည်သူ့ကျန်းမာရေးဦးစီးဌာနမှူး ဒေါက်တာမြင့်ကျော်ထံမှ သိရသည်။
စစ်ကိုင်းတိုင်းဒေသကြီးအတွင်း ရွှေဘို၊ စစ်ကိုင်း၊ ကလေးနှင့်မုံရွာ မြို့နယ်များတွင် သွေးလွန်တုပ်ကွေးဖြစ်ပွားမှုအများဆုံး မြို့နယ်များဖြစ်ပြီး စစ်ကိုင်းတိုင်းဒေသကြီးအတွင်းရှိပြည်သူလူထုများနှင့် အနာဂတ်မျိုးဆက်သစ်ကလေးငယ်များ၏ ကျန်းမာရေးနှင့် အသက်အန္တရာယ်ကို ခြိမ်းခြောက်နေသည့် သွေးလွန်တုပ်ကွေးရောဂါကို အရှိန်အဟုန်မြှင့် ကာကွယ်နှိမ်နှင်းနိုင်ရန်အတွက် မဟာဗျူဟာမြောက် အရေးကြီး အစည်းအဝေးကို မေလ (၇)ရက် ၊ မွန်းလွဲ (၁) နာရီကမုံရွာမြို့ရှိ စစ်ကိုင်းတိုင်းဒေသကြီး ပြည်သူ့ကျန်းမာရေးဦးစီးဌာန အစည်းအဝေး ခန်းမတွင်ကျင်းပခဲ့ကြောင်း သိရသည်။
"လက်ရှိ မြန်မာနိုင်ငံတစ်ဝန်းလုံး အတိုင်းအတာနဲ့ ကြည့်ရင်ရာသီဥတုဖောက်ပြန် ပြောင်းလဲမှုတွေ ၊ မိုးရွာသွန်းမှုပုံစံ မမှန်တာတွေကြောင့်သွေးလွန်တုပ်ကွေးရောဂါဟာရာအများအပြားမှာ စိုးရိမ်ရတဲ့ အခြေအနေမှာရှိနေပါတယ်။ အထူး သဖြင့်ကမ္ဘာလုံး ဆိုင်ရာအပူချိန်မြင့်တက်မှုနဲ့အတူ ခြင်ပေါက်ပွားမှု သံသရာဟာ ပိုမိုမြန်ဆန်လာတဲ့အတွက် သွေးလွန်တုပ်ကွေးဟာ ပြည်သူ့ကျန်းမာရေးဆိုင်ရာ အဓိကစိန်ခေါ်မှု တစ်ခု ဖြစ်လာတဲ့အတွက်ကြောင့် ကလေးတွေကို ဘောင်းဘီရှည်၊ အင်္ကျီလက်ရှည်ဝတ်ဆင်ဖို့ မိဘတွေကို တိုက်တွန်းလိုပါတယ်။ လူဦးရေ ထူထပ်တဲ့ မြို့ပြဒေသတွေသာမကကျေးလက်ဒေသတွေမှာပါ ရောဂါပိုးရှိတဲ့ခြင်တွေ ပျံ့နှံ့ နေပြီဖြစ်ပါတယ်။ အထူးသဖြင့် ရောဂါဖြစ်ပွားမှုအမြင့်ဆုံးလတွေဖြစ်တဲ့ ဇူလိုင်နဲ့ ဩဂုတ်လတွေမှာခြင်ဆေးဖျန်းခြင်းနဲ့အဘိတ် (Abate)ဆေး ခတ်ခြင်းတွေကို အရှိန်အဟုန်မြှင့်ဆောင်ရွက်ရမှာဖြစ်ပါတယ်။ သွေးလွန်တုပ်ကွေးကာကွယ်ရေးဟာကျန်းမာရေး ဌာနတစ်ခုတည်းရဲ့ တာဝန်မဟုတ်ဘဲစစ်ကိုင်းတိုင်းဒေသကြီးအစိုးရ အဖွဲ့၊ ဌာနဆိုင်ရာအားလုံးနဲ့ပြည်သူလူထုရဲ့ စုပေါင်းအင်အားနဲ့ ဆောင်ရွက်မှသာ အောင်မြင်မှာဖြစ်ပါတယ်"ဟု စစ်ကိုင်းတိုင်းဒေသကြီးပြည်သူ့ကျန်းမာရေးဦးစီးဌာနမှူး ဒေါက်တာမြင့်ကျော်က ပြောသည်။
မဟာဗျူဟာမြောက်အစည်းအဝေးကို စစ်ကိုင်းတိုင်းဒေသကြီးအစိုးရအဖွဲ့၏ အနီးကပ်ကြီးကြပ်ကျင်းပခြင်းဖြစ်ပြီးတိုင်းဒေသကြီး၊ ခရိုင်၊ မြို့နယ်အဆင့် ဌာနဆိုင်ရာ တာဝန်ရှိ သူများ၊ ခရိုင်/မြို့နယ်စီမံအုပ်ချုပ်ရေးအဖွဲ့ ဥက္ကဋ္ဌများ၊ ကျန်းမာရေးဝန်ထမ်းများ နှင့် လူမှုရေးအသင်းအဖွဲ့များ တက်ရောက်ခဲ့ကြသည်။
အစည်းအဝေးတွင် စစ်ကိုင်းတိုင်းဒေသကြီး ပြည်သူ့ကျန်းမာရေးဦးစီးဌာနမှူးဒေါက်တာမြင့်ကျော်က အမှာစကားပြောကြားပြီး စစ်ကိုင်းတိုင်းဒေသကြီး ပြည်သူ့ကျန်းမာရေးဦးစီးဌာန ဒုတိယတိုင်းဒေသကြီးဦးစီးမှူး ဒေါက်တာမြတ်ကျော်သူက စစ်ကိုင်းတိုင်းဒေသကြီးအတွင်း သွေးလွန်တုပ် ကွေး ရောဂါဖြစ်ပွား‌ေ-သဆုံးမှု အခြေအနေများနှင့်သွေးလွန်တုပ်ကွေးကာကွယ်နှိမ်နှင်းရေးလုပ်ငန်းများဆောင်ရွက်နိုင်မှုအခြေအနေများကို ရှင်းလင်းပြောကြားသည်။
တက်ရောက်လာသူများ၏ ဆွေးနွေးတင်ပြမှုများအပေါ် စစ်ကိုင်းတိုင်းဒေသကြီး ပြည်သူ့ကျန်းမာရေးဦးစီးဌာနမှူး ဒေါက်တာမြင့်ကျော်က တာဝန်ရှိသူများနှင့် ညှိနှိုင်းပေါင်းစပ်ဖြည့်ဆည်းဆောင်ရွက်ခဲ့ကြောင်း သိရသည်။

မြေ၊ အဆောက်အအုံနှင့် အခြားပိုင်ဆိုင်ပစ္စည်းများကို နှစ်တို၊ နှစ်ရှည်ငှားရမ်းခွင့်ပြုခြင်းဖြင့် ပြည်တွင်း/ပြည်ပရင်းနှီးမြှုပ်နှံမှုလုပ်ငန်းများ ပိုမိုတိုးတက်လာနိုင်

ဌာန(သို့)အဖွဲ့အစည်းကစီမံခန့်ခွဲပိုင်ခွင့်ရှိသည့် မြေ၊ အဆောက်အအုံနှင့် အခြားပိုင်ဆိုင်ပစ္စည်းများကို နှစ်တို၊ နှစ်ရှည်ငှားရမ်းခွင့်ပြုခြင်းဖြင့် ပြည်တွင်း/ပြည်ပရင်းနှီးမြှုပ်နှံမှုလုပ်ငန်းများ ပိုမိုတိုးတက်လာနိုင်မည်ဖြစ်သည်။
အမျိုးသားစီမံကိန်း၊ ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာနက ပြည်တွင်း/ပြည်ပရင်းနှီးမြှုပ်နှံမှုလုပ်ငန်းများအတွက် ဌာန(သို့)အဖွဲ့အစည်းက စီမံခန့်ခွဲပိုင်ခွင့်ရှိသည့် မြေ၊ အဆောက်အအုံနှင့် အခြားပိုင်ဆိုင်ပစ္စည်းများငှားရမ်းခွင့်ပြုခြင်းအတွက် ညှိနှိုင်းအစည်းအဝေးကို မေ ၇ ရက်ကကျင်းပခဲ့သည်။
အစည်းအဝေးတွင် အမျိုးသားစီမံကိန်း၊ ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန ပြည်ထောင်စုဝန်ကြီးဦးအောင်ကျော်ဟိုးက ရင်းနှီးမြှုပ်နှံမှုလုပ်ငန်းများအတွက် ဌာန(သို့)အဖွဲ့အစည်းက စီမံခန့်ခွဲပိုင်ခွင့်ရှိသည့် မြေ၊ အဆောက်အအုံနှင့် အခြားပိုင်ဆိုင်ပစ္စည်းများကို နှစ်တို/နှစ်ရှည် ငှားရမ်းခွင့်ပြုခြင်းဖြင့် နိုင်ငံတော်၏ ရင်းနှီးမြှုပ်နှံမှုဆိုင်ရာ မူဝါဒလုပ်ငန်းစဉ်များပိုမိုတိုးတက်ကောင်းမွန်လာစေမည့်အပြင် အစိုးရဌာန၊ အစိုးရအဖွဲ့အစည်းများနှင့် ရင်းနှီးမြှုပ်နှံမှု လုပ် ငန်းများကြား ပိုမိုထိရောက်စွာပေါင်းစပ်ညှိနှိုင်းဆောင် ရွက်ပေးနိုင်သည့်အကျိုးကျေးဇူးများရရှိလာနိုင်မည်ဟု ပြောကြားခဲ့သည်။
ထို့နောက် ဒု-ဝန်ကြီးနှင့် တက်ရောက်လာကြသူများမှ ဌာန(သို့)အဖွဲ့အစည်းကစီမံခန့်ခွဲပိုင်ခွင့်ရှိသည့် မြေ၊ အ ဆောက်အအုံနှင့် အခြားပိုင်ဆိုင်ပစ္စည်းများငှားရမ်းခွင့်ပြုခြင်းလုပ်ငန်းစဉ်ဆိုင်ရာ ညွှန်ကြားချက်အမှတ် (၁/၂၀၂၆)ပါလုပ်ငန်းစဉ်အဆင့်ဆင့်၊ လက်ရှိလုပ်ငန်းဆောင်ရွက်နေမှုအပေါ် တွေ့ကြုံရသည့်အကြောင်းအရာများကိုဆွေးနွေးခဲ့ကြသည်။

နီပေါ သံအမတ်ကို နိုင်ငံခြားရေးပြည်ထောင်စုဝန်ကြီး လက်ခံတွေ့ဆုံ

နှစ်နိုင်ငံအကြား ပူးပေါင်းဆောင်ရွက်မှုများ ချဲ့ထွင်နိုင်မည် နည်းလမ်းများဆွေးနွေး
နိုင်ငံခြားရေးဝန်ကြီးဌာန ပြည်ထောင်စုဝန်ကြီး ဦးတင်မောင်ဆွေသည် မြန်မာနိုင်ငံဆိုင်ရာ နီပေါသံအမတ်ကြီး H.E. Mr.Harish-chandra Ghimire ကို ယမန်နေ့က လက်ခံတွေ့ဆုံခဲ့ကြောင်း သိရသည်။
နေပြည်တော်ရှိ နိုင်ငံခြားရေးဝန်ကြီးဌာန၌ လက်ခံတွေ့ဆုံခဲ့ပြီး ဆွေးနွေးမှုများလုပ်ဆောင်ခဲ့ကြောင်း သိရသည်။
မြန်မာနှင့် နီပေါနိုင်ငံတို့အကြား ရှိရင်းစွဲချစ်ကြည်ရင်းနှီးမှုနှင့် ကောင်းမွန်သည့် ဆက်ဆံရေးကို ပြန်လည်သုံးသပ်ကြပြီး နှစ်နိုင်ငံအကြား အပြန်အလှန်အကျိုးဖြစ်ထွန်းစေမည့် ကဏ္ဍများတွင် ပူးပေါင်းဆောင်ရွက်မှုများ ချဲ့ထွင်နိုင်မည့်နည်းလမ်းများကို ဆွေးနွေးခဲ့ကြောင်း သိရသည်။

ဧပြီ လ (၃၀)ရက်မှ မေလ (၇)ရက်အထိ တစ်ပတ်အတွင်း မအူပင်မြို့တွင် ငလျင် (၉)ကြိမ်လှုပ်ခတ်ခဲ့

ဧရာဝတီတိုင်းဒေသကြီး မအူပင်မြို့တွင် ဧပြီလ (၃၀)ရက်မှ မေလ (၇)ရက်အထိ တစ်ပတ်အတွင်း ငလျင် (၉)ကြိမ် လှုပ်ခတ်ခဲ့ကြောင်း ဒေသခံများ၏ ပြောကြားချက်အရသိရသည်။
ယင်းသို့ ငလျင်လှုပ်ခတ်ခဲ့မှုများနှင့်ပတ်သတ်၍ အမျိုးသားလွှတ်တော်ကိုယ်စားလှယ် ဦးအောင်ကျော်မင်းမှ "သက်ဆိုင်ရာဌာနတွေအနေနဲ့တော့ ငလျင်နဲ့ပတ်သက်ပြီး စီမံထားတာတွေရှိပါတယ်။ ငလျင်နဲ့ပတ်သတ်ပြီး ဆောင်ရန်ရှောင်ရန်တွေ၊ပညာပေးလုပ်ငန်းတွေ ကြေညာထားတာရှိတယ်၊ အဲ့ဒီဟာလေတွေကိုသိအောင်တော့ လေ့လာထားသင့်ပါတယ် ၊ ဒါပေမယ့် တကယ်လက်တွေ လှုပ်တော့လည်း ကျွန်တော်တို့မလုပ်ဖြစ်ဘူးဗျ ။ ငလျင်လှုပ်တော့လည်း အကုန်လုံး အပြင်ပဲ ပြေးထွက်ကြတာပါပဲ ၊ အဓိကအနေနဲ့ ကျွန်တော်အကြံပြုချင်တာကတော့ ဘာဘဲဖြစ်ဖြစ် ငလျင်မှ မဟုတ်ဘူး၊ ဘေးအန္တရာယ်တစ်ခုဖြစ်လာရင် အရမ်းမကြောက်သွားဘဲနဲ့သတိကြီးကြီးလေးနဲ့ ရင်ဆိုင်ပါလို့ အဲ့ဒါပဲ ပြောချင်ပါတယ်။ ရေရှည်အစီအစဉ်ကတော့သက်ဆိုင်ရာဌာနကိုမေးမြန်းတာပိုကောင်းပါလိမ့်မယ်" ဟု ပြောသည်။
ငလျင်နှင့် ပတ်သက်သည့် အသိပညာပေးဟောပြောဆွေးနွေးမှုများကို သဘာဝဘေးစီမံခန့်ခွဲရေးဌာနများနှင့် ပူးပေါင်းဆောင်ရွက်လျက်ရှိကြောင်းလည်း သိရသည်။
ယင်းကဲ့သို့ ငလျင်ဆက်တိုက်လှုပ်ခတ်နေမှုနှင့်ပတ်သက်​ပြီး "ငလျင်ကတော့ တောက်လျှောက်လှုပ်နေတယ်ပေါ့နော်၊ အဲ့အတွက်လည်း ရှာဖွေကယ်ဆယ်ရေးပစ္စည်းတွေကိုလည်းအဆင်သင့်ပြင်ဆင်ထားပါတယ် ၊ အသိပညာပေးပွဲတွေက ကျွန်တော်တို့လုပ်ထားတာတွေရှိပါတယ်၊ ဌာနဆိုင်ရာတွေ ကျောင်းတွေ မှာ ဟောပြောပွဲတွေလုပ်ခဲ့ပါတယ်။ ငလျင်ဆိုတာကတော့ ခန့်မှန်းလို့မရတဲ့သဘာဝဘေးတစ်ခုပါ ၊ ကျွန်တော်တို့လည်းပြည်သူတွေနဲ့အတူ ခံစားနေရပါတယ်။ ကျွန်တော်အထင်ပြောရရင်တော့ ငလျင်အသေးလေးတွေ လာတဲ့အတွက် ငလျင်ကြီး လာဖို့မရှိဘူးလို့ ကျွန်တော်အမြင်အရတော့ထင်ပါတယ်။ ပြည်သူတွေအနေနဲ့လည်း သတိလေးနဲ့နေဖို့ရယ်၊ ငလျင်နဲ့ပတ်သက်ပြီး ပညာပေးတွေကို လေ့လာဖို့ရယ် ပြောချင်ပါတယ်။ နောက်ရက်တွေမှာလည်း ငလျင်နဲ့ပတ်သက်တဲ့ပညာပေးတွေကို သဘာဝဘေးစီမံခန့်ခွဲရေးဌာနတွေနဲ့ ပူးပေါင်ပြီး ဆောင်ရွက်သွားဖို့ရှိပါတယ်" ဟု မအူပင်မြို့နယ် မီးသတ်ဦးစီးမှူး က ပြောသည်။
မအူပင်မြို့တွင် ယမန်နေ့ မေလ (၆)ရက်နေ့ ည (၁၁)နာရီကျော်အချိန်က ငလျင်ငယ်တစ်ခုလှုပ်ခတ်သွားသေးကြောင်းလည်း သိရသည်

သိပ္ပံနှင့်နည်းပညာဝန်ကြီးဌာန ပြည်ထောင်စုဝန်ကြီး နှင့် မြန်မာနိုင်ငံဆိုင်ရာ ပါကစ္စတန်သံအမတ်ကြီးတို့ တွေ့ဆုံ
နှစ်နိုင်ငံအကြား နည်းပညာဖွံ့ဖြိုးတိုးတက်ရေးကိစ္စရပ်များဆွေးနွေး

သိပ္ပံနှင့်နည်းပညာဝန်ကြီးဌာန ပြည်ထောင်စုဝန်ကြီး ဒေါက်တာမျိုးသိန်းကျော်သည် မြန်မာနိုင်ငံဆိုင်ရာ ပါကစ္စတန်နိုင်ငံ သံအမတ်ကြီး H.E. Mr. Tariq Karim ကို ယမန်နေ့ က လက်ခံတွေ့ဆုံခဲ့ကြောင်း သိရသည်။
မြန်မာနိုင်ငံနှင့် ပါကစ္စတန် နှစ်နိုင်ငံအကြား သိပ္ပံနှင့်နည်းပညာဆိုင်ရာ ပူးပေါင်းဆောင်ရွက်မှုတိုးမြှင့်ရေး၊ နည်းပညာဖွံ့ဖြိုးတိုးတက်ရေး၊ လူ့စွမ်းအားအရင်းအမြစ်ဖွံ့ဖြိုးတိုးတက်ရေး၊ IT ကဏ္ဍဖွံ့ဖြိုးတိုးတက်ရေးဆိုင်ရာကိစ္စရပ်များကို ဆွေးနွေးခဲ့ကြောင်း သိရသည်။
အဆိုပါ တွေ့ဆုံပွဲသို့ ဒုတိယဝန်ကြီး ဒေါက်တာနေခြည်လဲ့လဲ့သိန်းနှင့် တာဝန်ရှိသူများ၊ မြန်မာနိုင်ငံဆိုင်ရာ ပါကစ္စတန်နိုင်ငံသံရုံးမှ တာဝန်ရှိသူများတက်ရောက်ကြကြောင်း သိရသည်။

ကုန်သွယ်ရေးသဘောတူညီချက်ကို အတည်ပြုရန်အီးယူကို ဇူလိုင်လ ၄ ရက်နေ့အထိအချိန်ပေးမည်--ထရမ့်ပ်

အမေရိကန်သမ္မတ ဒေါ်နယ်ထရမ့်ပ်သည် ဥရောပသမဂ္ဂအနေဖြင့် အမေရိကနှင့်ချုပ်ဆိုထားသော ကုန်သွယ်ရေးသဘောတူညီချက်ကို လာမည့် ဇူလိုင်လ ၄ ရက်ထက် နောက်မကျဘဲ အတည်ပြုရမည်ဖြစ်ကြောင်း၊ သတ်မှတ်ချိန်အတွင်း အတည်မပြုနိုင်ပါက သွင်းကုန်အခွန်များကို ယခုထက်များစွာမြင့်မားသော နှုန်းထားများဖြင့် တိုးမြှင့်ကောက်ခံသွားမည်ဖြစ်ကြောင်း ကြာသပတေးနေ့တွင် ပြောကြားခဲ့သည်။ ဥရောပတာဝန်ရှိသူများအကြား အဆိုပါသဘောတူညီချက်နှင့်ပတ်သက်၍ တညီတညွတ်တည်း ဆုံးဖြတ်ချက်မချနိုင်ဖြစ်နေပြီးနောက် ထရမ့်က ယခုကဲ့သို့ သတိပေးလိုက်ခြင်းဖြစ်သည်။
အမေရိကန်သမ္မတက ၎င်းအနေဖြင့် အီးယူ အကြီးအကဲ အာဆူလာ ဗွန်ဒါလီယန် နှင့် ဆွေးနွေးခဲ့ပြီးဖြစ်ကြောင်းနှင့် “ကျွန်တော်တို့နိုင်ငံရဲ့ နှစ် ၂၅၀ ပြည့် မွေးနေ့အထိ အချိန်ပေးဖို့ သဘောတူခဲ့ပါတယ်။ အဲဒီအချိန်မှာမှ မပြီးမြောက်ဘူးဆိုရင်တော့ စိတ်မကောင်းစွာနဲ့ပဲ သူတို့ရဲ့ သွင်းကုန်ခွန်နှုန်းထားတွေဟာ ချက်ချင်းဆိုသလို အမြင့်ဆုံးအဆင့်ကို ခုန်တက်သွားပါလိမ့်မယ်” ဟု ပြောကြားခဲ့သည်။
ယခုနှစ် ဇူလိုင်လ ၄ ရက်သည် အမေရိကန်ပြည်ထောင်စုက ဗြိတိသျှလက်အောက်မှ လွတ်လပ်ရေးကြေညာခဲ့သည့် နှစ်ပေါင်း ၂၅၀ ပြည့်မြောက်သော အထိမ်းအမှတ်နေ့လည်း ဖြစ်သည်။
အဖွဲ့ဝင် ၂၇ နိုင်ငံပါဝင်သော အီးယူ နှင့် အမေရိကန်တို့သည် ပြီးခဲ့သည့်နှစ် ဇူလိုင်လအတွင်းက အီးယူကုန်စည်အများစုအပေါ် သွင်းကုန်ခွန် ၁၅ ရာခိုင်နှုန်း သတ်မှတ်ရန် သဘောတူညီခဲ့ကြသော်လည်း အဖွဲ့ဝင်နိုင်ငံများအကြား နောက်ဆုံးသဘောတူညီချက်ကို အတည်မပြုနိုင်သေးခြင်းကြောင့် ဝါရှင်တန်ရှိ တာဝန်ရှိသူများအကြား စိတ်ပျက်မှုများ ဖြစ်ပေါ်လျက်ရှိသည်။
ပြီးခဲ့သည့်သီတင်းပတ်အတွင်းကလည်း ထရမ့်ပ်သည် အီးယူ ဘက်မှ သဘောတူညီချက်ကို လိုက်နာရန် ပျက်ကွက်နေသည်ဟု စွပ်စွဲကာ အီးယူ ထုတ်ကားနှင့် ကုန်တင်ကားများအပေါ် သွင်းကုန်ခွန်ကို ၂၅ ရာခိုင်နှုန်းအထိ တိုးမြှင့်ကောက်ခံသွားမည်ဟု ကတိပြုထားခဲ့သည်။
ဥရောပသမဂ္ဂကောင်စီ၏ အလှည့်ကျဥက္ကဋ္ဌတာဝန် ယူထားသော ဆိုက်ပရပ်စ်နိုင်ငံကမူ မေလ ၁၉ ရက်နေ့တွင် ဥရောပပါလီမန်အမတ်များနှင့် ပြုလုပ်မည့် ဆွေးနွေးပွဲများတွင် အပြုသဘောဆောင်သော အရှိန်အဟုန် ကို ဆက်လက်ထိန်းသိမ်းသွားလိုကြောင်း ပြောကြားထားသည်။