ဧပြီလမှစတင်၍ လေကြောင်းခရီးစဉ်များ လျော့နည်းသွားနိုင်
အီရန်စစ်ပွဲကြောင့် တရုတ်နှင့် ထိုင်းနိုင်ငံတို့က လေယာဉ်ဆီတင်ပို့မှုကို ရပ်ဆိုင်းလိုက်ပြီးနောက် လာမည့် ဧပြီလမှစတင်၍ လေကြောင်းခရီးစဉ်များ လျော့နည်းသွားနိုင်ခြေရှိသဖြင့် ကြိုတင်ပြင်ဆင်ထားရန် ဗီယက်နမ်အာဏာပိုင်များက နိုင်ငံ၏ လေကြောင်းကဏ္ဍကို သတိပေးလိုက်ကြောင်း သိရသည်။
ဗီယက်နမ်သည် ၎င်း၏လေယာဉ်ဆီလိုအပ်ချက် သုံးပုံနှစ်ပုံကျော်ကို ပြည်ပမှတင်သွင်းနေရပြီး ထိုတင်သွင်းမှု၏ ၆၀ ရာခိုင်နှုန်းမှာ တရုတ်နှင့် ထိုင်းနိုင်ငံတို့မှဖြစ်ကြောင်း သိရသည်။
“ဧပြီလအစောပိုင်းနဲ့ နောက်ပိုင်းလတွေမှာ ဗီယက်နမ်လေကြောင်းလိုင်းတွေအတွက် လေယာဉ်ဆီပြတ်လပ်မှု ဖြစ်နိုင်ခြေရှိပါတယ်” ဟု ဗီယက်နမ် လေကြောင်းဦးစီးဌာနက ပို့ဆောင်ရေးဝန်ကြီးဌာနသို့ မတ်လ ၉ ရက်နေ့က ပေးပို့သည့် စာတွင် ဖော်ပြထားပါသည်။
လေကြောင်းလိုင်းများအနေဖြင့် ၎င်းတို့၏ ခရီးစဉ်ပျံသန်းမှု အစီအစဉ်များ၊ အထူးသဖြင့် ပြည်တွင်းခရီးစဉ်များကို ပြန်လည်သုံးသပ်သင့်ကြောင်းနှင့် လေဆိပ်လုပ်ငန်းလုပ်ကိုင်သူများအနေဖြင့် ဗီယက်နမ်လေယာဉ်များ ရပ်နားရန် အပိုနေရာများ ကို ပြင်ဆင်ထားရန် ညွှန်ကြားထားသည်။ ထို့အပြင် စင်ကာပူနိုင်ငံမှ တင်သွင်းမှုများလည်း လျော့ကျလာကြောင်း အဆိုပါစာတွင် ဖော်ပြထားသည်။
အဓိက လေယာဉ်ဆီတင်သွင်းသည့် ပက်ထရိုလီမက် နှင့် စကိုင်းပတ် ကုမ္ပဏီတို့က မတ်လအတွက်သာ ဆီပေးသွင်းမှုကို အာမခံနိုင်ကြောင်း ပြောကြားခဲ့သည်။ အကယ်၍ ပဋိပက္ခမှာ ဆက်လက်ရှည်ကြာနေပါက မရှိမဖြစ်လိုအပ်သည့် ပြည်တွင်းခရီးစဉ်များမှလွဲ၍ ကျန်လေကြောင်းပျံသန်းမှုများကို ကန့်သတ်ရန် စကိုင်းပတ် က တောင်းဆိုထားသည်။
ဤစာရွက်စာတမ်းအားလုံးမှာ တရုတ်နိုင်ငံက ၎င်း၏ရေနံချက်စက်ရုံများကို ပို့ကုန်အသစ်များ ကို သဘောမတူရန် ယခုလအစောပိုင်းတွင် တိုက်တွန်းပြီးနောက် ထွက်ပေါ်လာခြင်းဖြစ်သော်လည်း မတ်လ ၁၁ ရက်မှစ၍ ချမှတ်လိုက်သော လောင်စာဆီတင်ပို့မှု အလုံးစုံပိတ်ပင်ချက် မတိုင်မီက ဖြစ်သည်။ ထိုင်းနိုင်ငံကမူ မတ်လ ၆ ရက်နေ့တွင် မြန်မာနှင့် လာအိုမှလွဲ၍ ကျန်နိုင်ငံအားလုံးသို့ လေယာဉ်ဆီအပါအဝင် ရေနံထွက်ပစ္စည်း တင်ပို့မှုကို ပိတ်ပင်ခဲ့သည်။
တရုတ်အကောက်ခွန်အချက်အလက်များအရ ဗီယက်နမ်သည် ပြီးခဲ့သည့်နှစ်က သြစတြေးလျနှင့် ဂျပန်ပြီးလျှင် တရုတ်နိုင်ငံထံမှ လေယာဉ်ဆီကို တတိယမြောက် အများဆုံးဝယ်ယူသည့် နိုင်ငံဖြစ်သည်။ ဗီယက်နမ်သည် ဤပြဿနာနှင့်ပတ်သက်၍ ၎င်း၏အဓိက ပေးသွင်းသူများဖြစ်သော တရုတ်နှင့် ထိုင်းနိုင်ငံတို့နှင့် ဆွေးနွေးလျက်ရှိသည်။
တနင်္ဂနွေနေ့က ဟနွိုင်းမြို့တွင် ပြုလုပ်သည့် တွေ့ဆုံမှု၌ ဗီယက်နမ်နိုင်ငံခြားရေးဝန်ကြီး လီဟွိုင်ထရူးက တရုတ်နိုင်ငံခြားရေးဝန်ကြီး ဝမ်ယိကို “စွမ်းအင်ဖူလုံရေး သေချာစေရန်” အတွက် နီးကပ်စွာ ပူးပေါင်းဆောင်ရွက်ပေးရန် တောင်းဆိုခဲ့သည်။ တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူကလည်း စွမ်းအင် ဖူလုံရေးပြဿနာကို ပူးပေါင်းဖြေရှင်းရန် အဆင်သင့်ရှိကြောင်း တနင်္လာနေ့တွင် ပြောကြားခဲ့သည်။
ထို့ပြင် ဗီယက်နမ်ဝန်ကြီးချုပ် ဖမ်မင်းချင်းကလည်း ဆီပြတ်လပ်မှုပြဿနာကို ကူညီဖြေရှင်းပေးရန် ထိုင်းသံအမတ်ကို သောကြာနေ့က တောင်းဆိုခဲ့ကြောင်း သိရသည်။ ဗီယက်နမ်လေကြောင်းအာဏာပိုင်များက တောင်ကိုရီးယား၊ ဂျပန်၊ ဘရူနိုင်းနှင့် အိန္ဒိယတို့ကဲ့သို့ အခြားရင်းမြစ်များမှ တင်သွင်းရန် အကြံပြုထားသော်လည်း “လက်ရှိအခြေအနေတွင် ပေးသွင်းသူအသစ်ရှာရန် ခက်ခဲသည်” ဟု ဝန်ခံထားသည်။
ဆီရရှိမှု အခြေအနေ တည်ငြိမ်သွားလျှင်ပင် လောင်စာဆီဈေးနှုန်းများက အဆမတန် ထိုးတက်နေခြင်းကြောင့် လေကြောင်းကဏ္ဍကို အနှောင့်အယှက်ဖြစ်စေပြီး ခရီးစဉ်အများအပြားမှာ အရှုံးပေါ်နိုင်ကြောင်း သတိပေးထားသည်။ စင်ကာပူလေယာဉ်ဆီဈေးနှုန်းမှာ တစ်စည်လျှင် အမေရိကန်ဒေါ်လာ ၁၅၇ ဝန်းကျင်ရှိနေပြီး ယင်းမှာ စစ်ပွဲမတိုင်မီကထက် တစ်ဆခွဲကျော် မြင့်တက်နေခြင်းဖြစ်သည်။
Ref: ဆော့သ်ချိုင်းနားမောနင်းပို့စ်
