လက်ဖြင့် သွင်းယူတဲ့ ဂိုးအတွက် ပွဲပယ်ခံလာရတဲ့ ဝက်စ်ဘရွန်းတိုက်စစ်မှူးဟက်ဂီဘို
===================

ဝက်စ်ဘရွန်းတိုက်စစ်မှူးအွန်ဟက်ဂီဘိုဟာ စနေနေ့တုန်းက နော့ဝှစ်ချ်စီးတီးအား ၂-၁ ဖြင့် အနိုင်ရတဲ့ပွဲစဉ်တွင် လက်ဖြင့် ဂိုးသွင်းယူခဲ့မှုအတွက် အက်ဖ်အေရဲ့ ၂ ပွဲပယ်ပြစ်ဒဏ်ချမှတ်ခြင်းခံလာရပါတယ်။
နော်ဝေတိုက်စစ်မှူးဟာ ယင်းပွဲရဲ့ ပွဲချိန် ၇၅ မိနစ်တွင် ဘယ်တောင်ပံမှ ဂျေးမော်ဂန်ရဲ့ ဖြတ်တင်ဘောမှတဆင့် လက်ဖြင့် သွင်းယူခဲ့တာ ဖြစ်ပြီး အက်ဖ်အေရဲ့ စည်းမျဉ်း အပုဒ် E3.1 ကို ချိုးဖောက်မှုဖြင့် စွဲချက်တင်ခြင်းခံခဲ့ရပါတယ်။
ပွဲအပြီးတွင် နော့ဝှစ်ချ်နည်းပြဖီးလစ်ပီကလီးမန့်က ယင်းဂိုးက ပွဲကို အဆုံးအဖြတ်ဖြစ်စေခဲ့တဲ့ ဂိုးဖြစ်ကြောင်း၊ ယင်းဂိုးအား ခွင့်မပြုသင့်ကြောင်း ပြောကြားခဲ့ပါတယ်။
ယခုအခါ အက်ဖ်အေက ဟက်ဂီဘိုမှာ လက်ဖြင့် ရည်ရွယ်ချက်ရှိရှိ ဂိုးသွင်းကာ ဒိုင်လူကြီးအား အောင်မြင်အောင် လှည့်စားနိုင်ခဲ့ကြောင်း ဆိုထားပါတယ်။
တဖက်တွင် ဝက်စ်ဘရွန်းက ဟက်ဂီဘိုမှာ မတော်တဆ လက်ဖြင့် သွင်းခဲ့ခြင်းမျှသာ ဖြစ်ပြီး ဘောလုံးမှ နော့ဝှစ်ချ်ဂိုးသမားနဲ့ထိပြီး ရောက်လာခြင်းဖြစ်ရာ ကစားသမားမှာ ရည်ရွယ်ချက်မရှိဘဲ လက်ဖြင့် သွင်းယူခဲ့ခြင်းသာဖြစ်ကြောင်း အယူခံဝင်ခဲ့ပါတယ်။
ယခုအခါမှာတော့ ဟက်ဂီဘိုဟာ နှစ်ပွဲပယ်ခံရပြီးနောက် တနင်္ဂနွေနေ့ ဘန်လေနှင့် ချန်ပီယံရှစ်ပွဲအပြင် ဩဂုတ်လ ၂၆ ရက်နေ့ နယူးကာဆယ်နှင့် ခါရာဘောင်ဖလားဒုတိယအဆင့်ပွဲစဉ်ကိုလည်း လွဲချော်လာတော့မှာ ဖြစ်ပါတယ်။
အက်ဂီဘိုရဲ့ လက်ဖြင့် သွင်းယူတဲ့ဂိုးကြောင့် ချန်ပီယံရှစ်တွင်လည်း VAR အသုံးပြုသင့်သလားဆိုတာနဲ့ပတ်သက်ပြီး ဆွေးနွေး ငြင်းခုံမှုများ မြင့်တက်လာပါတယ်။

အသက် ၄၆ နှစ်အရွယ်တွင် ဘောလုံးလောကတွင် ပြန်ခြေချလာကာ ၃၀၀ မြောက်ဂိုးအား သွင်းယူနိုင်ရန် ရော်နယ်ဒင်ဟို မျှော်လင့်နေ
======================

ဘရာဇီဂန္ထဝင်ရော်နယ်ဒင်ဟိုက အသက် ၄၆ နှစ်အရွယ်တွင် အီတလီတတိယတန်းကလပ် ရီဗန်နာသို့ ပြောင်းရွှေ့လာပြီးနောက် ကစားသမားဘဝ ၃၀၀ မြောက်ဂိုးအား သွင်းယူနိုင်ရန် မျှော်လင့်နေကြောင်း ပြောကြားလာပါတယ်။
၂၀၁၅ ခုနှစ်တွင် ကစားသမားဘဝမှ အနားယူခဲ့တဲ့ ပီအက်စ်ဂျီ၊ ဘာစီလိုနာနှင့် အေစီမီလန်ဂန္ထဝင်ကစားသမားဟာ "Ronaldinho Day" ခေါင်းစဉ်ဖြင့် မိတ်ဆက်ပွဲ ကျင်းပလာခဲ့ပြီး ထောင်ပေါင်းများစွာသောပရိသတ်များ လာရောက်ကြည့်ရှုအားပေးခဲ့ကြပါတယ်။
စီးရီးစီကလပ်ရဲ့ ရှယ်ယာရှင်တစ်ဦး ဖြစ်လာတဲ့ ရော်နယ်ဒင်ဟိုက "သူငယ်ချင်းတွေနဲ့အတူ လာရောက်ခွင့်ရလို့ အရမ်းပျော်တယ်။ ကျွန်တော်တို့မှာ ကောင်းတာ တခုခု လုပ်ပြနိုင်တဲ့အသင်းတစ်သင်း ပိုင်ဆိုင်ထားပြီ။ ကျုပ်ကစားတာ မြင်ရမလား။ မသိပါဘူး။ နည်းပြပဲ သိပါလိမ့်မယ်။ အီတလီဘောလုံးလောကသို့ ပြန်လာခွင့်ရတာ အရမ်းအံ့ဩစရာကောင်းတယ်။ အသင်းဖော်တွေ အနိုင်ရအောင် ကူညီဖို့ ရောက်လာတာပါ။ ကျွန်တော့်ပုံစံ အကောင်းဆုံးဖြစ်နေတာ အားလုံးလည်း မြင်ကြမှာပါ။ ၃၀၀ မြောက်ဂိုးကို သွင်းနိုင်ရင်တော့ အရမ်းကို လှပလာမှာပါ"လို့ ပြောကြားသွားပါတယ်။
ရော်နယ်ဒင်ဟိုဟာ ဘရာဇီးကလပ် ဖလူးမီးနက်စ်အတွက် နောက်ဆုံးပရော်ဖက်ရှင်နယ်ပွဲ ကစားခဲ့တာ ဖြစ်ပါတယ်။
သူဟာ ဘရာဇီးနှင့်အတူ ၂၀၀၂ ကမ္ဘာ့ဖလားဆွတ်ခူးခဲ့သလို ၂၀၀၅ ခုနှစ် Ballon d'Or ဆုကိုလည်း ဆွတ်ခူးခဲ့ပါတယ်။
ရော်နယ်ဒင်ဟို ပြန်လာမယ့်အကြောင်းကို ၂၀၂၄ ခုနှစ်ကတည်းက ကလပ်ကို ပိုင်ဆိုင်လာခဲ့တဲ့ အမေရိကန်-အီတလီစီးပွားရေးလုပ်ငန်းရှင် အိုင်ဂနာဇီယိုစီပရီယာနီက ကြေညာခဲ့ပါတယ်။
ရော်နယ်ဒင်ဟိုဟာ တနင်္လာနေ့ ရက်ဂျီယာနာနှင့် ရင်ဆိုင် ကစားရမယ့် စီးရီးစီ အဖွင့်ပွဲစဉ်တွင် ပါဝင်လာဦးမှာ မဟုတ်ပါဘူး။
ရီဗန်နာဟာ ပြီးခဲ့တဲ့ရာသီတုန်းက စီးရီးစီ အုပ်စု(ဘီ)တွင် အဆင့် ၃ နေရာမှာ ရပ်တည်ခဲ့တဲ့အသင်း ဖြစ်ပါတယ်။ ၎င်းတို့ဟာ ၂၀၀၈ ခုနှစ်ကတည်းက စီးရီးဘီသို့ တက်လှမ်းလာနိုင်ခဲ့ခြင်း မရှိပါဘူး။

ရှမ်းယူနိုက်တက်အသင်း နည်းပြချုပ်အဖြစ် မြန်မာဘောလုံးငွေခေတ် လက်ရွေးစင်ဟောင်း ဦးအောင်ခိုင်ကို ခန့်အပ်

MNL လက်ရှိချန်ပီယံ ရှမ်းယူနိုက်တက်အသင်းဟာ နည်းပြချုပ်အဖြစ် မြန်မာဘောလုံးငွေခေတ် လက်ရွေးစင်ဟောင်း ဦးအောင်ခိုင်ကို တာဝန်ပေးခန့်အပ်လိုက်ကြောင်း သိရပါတယ်။
ရှမ်းယူနိုက်တက်အသင်းဟာ ဦးအောင်ခိုင်ကို နည်းပြချုပ်အဖြစ် တာဝန်ပေးခန့်အပ်လိုက်ကြောင်း တရားဝင်သတင်းထုတ်ပြန်ခဲ့ပေမဲ့ စာချုပ်သက်တမ်းကိုတော့ထည့်သွင်းဖော်ပြခြင်းမရှိခဲ့ပါဘူး။ ရှမ်းယူနိုက်တက်အသင်းရဲ့ တရားဝင်သတင်းဖော်ပြချက်အရ ဦးအောင်ခိုင်ကို ၂၀၂၆- ၂၀၂၇ ရာသီအတွက် တာဝန်ပေးခန့်အပ်လိုက်ကြောင်းကိုသာ သတင်းထုတ်ပြန်ခဲ့ပါတယ်။ ဒါကြောင့် ဦးအောင်ခိုင်ဟာ ယခုရာသီဖြစ်တဲ့ ၂၀၂၆- ၂၀၂၇ ရာသီမှာ ရှမ်းယူနိုက်တက်အသင်းကို ချန်ပီယံဆု ဆက်လက်ထိန်းသိမ်းနိုင်ရန် အဓိကထား ဆောင်ရွက်ပေးရမှာဖြစ်ပြီး စွမ်းဆောင်မှုအပေါ် မူတည်ကာ သက်တမ်းတိုးစာချုပ် ဆက်လက်ချုပ်ဆိုသွားဖွယ်ရှိနေကြောင်း သိရပါတယ်။ ဦးအောင်ခိုင်ဟာ မြန်မာဘောလုံးငွေခတ် လက်ရွေးစင်ဟောင်း ရှေ့တန်းကစားသမားဖြစ်ပြီး ပြည်ပနိုင်ငံများတွင်လည်း ပရော်ဖက်ရှင်နယ်အဖြစ် သွားရောက်ကစားထားခဲ့ဖူးသူပါ။ ဦးအောင်ခိုင်ဟာ ကစားသမားဘဝမှ အနားယူပြီးနောက် နည်းပြဘဝသို့ ကူးပြောင်းခဲ့ပြီး မြန်မာ ယူ-၁၈၊ မြန်မာယူ-၂၀၊ မြန်မာယူ-၂၁၊ မြန်မာ ယူ-၂၃ အသင်းများကို တာဝန်ယူကိုင်တွယ်ခဲ့ကြောင်း သိရပါတယ်။
ဒါ့အပြင် ဦးအောင်ခိုင်ဟာ ချင်းယူနိုက်တက်အသင်းနဲ့ ဧရာဝတီယူနိုက်တက်အသင်းများမှာလည်း လက်ထောက်နည်းပြ၊ နည်းပြချုပ်များအဖြစ် တာဝန်ယူကိုင်တွယ်ခဲ့ဖူးကြောင်း သိရပါတယ်။ ဦးအောင်ခိုင်အနေနဲ့ ရှမ်းယူနိုက်တက်အသင်း မတိုင်ခင် နောက်ဆုံးအဖြစ် ပြီးခဲ့တဲ့ရာသီက ISPE အသင်းကို နည်းပြချုပ်အဖြစ် တာဝန်ယူကိုင်တွယ်ခဲ့ပါတယ်။ ဦးအောင်ခိုင်ဟာ ရာသီအကုန်မှာ MNL အမှတ်ပေးလိဂ်ပြိုင်ပွဲမှာ ISPE အသင်းကို အဆင့် (၄) နေရာရောက်အောင် ပို့ဆောင်ပေးနိုင်ခဲ့ပါတယ်။ ရှမ်းယူနိုက်တက်အသင်းဟာ ယခုရာသီမှာ ပြည်တွင်းပြိုင်ပွဲများသာမက ပြည်ပပြိုင်ပွဲများအဖြစ် AFC Challenge League ပြိုင်ပွဲနဲ့ အာဆီယံကလပ်ချန်ပီယံရှစ်ပြိုင်ပွဲများကိုလည်း ဝင်ရောက်ယှဉ်ပြိုင်ရမှာဖြစ်ကြောင်း သိရပါတယ်။ ရှမ်းယူနိုက်တက်အသင်းဟာ MNL ပြိုင်ပွဲမှာ (၇)ကြိမ်ဗိုလ်စွဲထားပြီး အအောင်မြင်ဆုံးအသင်းအဖြစ် ရပ်တည်နေပါတယ်။

မြန်မာ ယူ- ၁၂ လူငယ်အသင်း သြဂုတ် (၂၁) ရက်မှာ တစ်ပွဲ၊ သြဂုတ် (၂၂) ရက်မှာ နှစ်ပွဲ ကစားရမယ်

ဂျပန်နိုင်ငံက အိမ်ရှင်အဖြစ် လက်ခံကျင်းပပြုလုပ်မယ့် U-12 Junior Soccer World Challenge ပြိုင်ပွဲကို မြန်မာ ယူ- ၁၂ လူငယ်အသင်း ဝင်ရောက်ယှဥ်ပြိုင်သွားမှာဖြစ်ပြီး သြဂုတ် (၂၁) ရက်မှာ တစ်ပွဲ၊ သြဂုတ် (၂၂) ရက်မှာနှစ်ပွဲ ကစားရမှာဖြစ်ပါတယ်။
မြန်မာ ယူ- ၁၂ လူငယ်အသင်းဟာ ဂျပန် U-12 Junior Soccer World Challenge ပြိုင်ပွဲဝင်ရန် သြဂုတ် (၁၉) ရက်က ထွက်ခွာသွားပြီး အုပ်ချုပ်၊ နည်းပြ (၅) ဦး၊ ကစားသမား (၁၈) ဦး လိုက်ပါသွားခဲ့ကြောင်း သိရပါတယ်။ မြန်မာ ယူ-၁၂ လူငယ်အသင်းဟာ U-12 Junior Soccer World Challenge ပြိုင်ပွဲ အုပ်စု (I) မှာ ဂျပန်လူငယ်အကယ်ဒမီအသင်းများဖြစ်တဲ့ အူရာဝါရက်ဒိုင်းမွန်း၊ လီဘာတာဖူကူအိုကာ၊ ရှိုနန်ဘယ်မားရီအကယ်ဒမီအသင်းတွေနဲ့အတူ ကျရောက်နေတာဖြစ်ပါတယ်။ မြန်မာ ယူ- ၁၂ လူငယ်အသင်းဟာ သြဂုတ် (၂၁) ရက်မှာ လီဘာတာဖူကူအိုကာအသင်းနဲ့ တစ်ပွဲ၊ သြဂုတ် (၂၂) ရက်မှာ အူရာဝါရက်ဒိုင်းမွန်း၊ ရှိုနန်ဘယ်မားရီအကယ်ဒမီအသင်းတွေနဲ့ နှစ်ပွဲ ယှဥ်ပြိုင်ကစားရမှာပါ။
မြန်မာ ယူ- ၁၂ လူငယ်အသင်းဟာ ဂျပန် U-12 Junior Soccer World Challenge ပြိုင်ပွဲဝင်ရန် ပြီးခဲ့တဲ့ဇူလိုင် (၂၅) ရက်ကစပြီး ကစားသမား (၂၃)ဦးနဲ့ လေ့ကျင့်မှုတွေ ပြုလုပ်ခဲ့ကြောင်း သိရပါတယ်။ မြန်မာနိုင်ငံဘောလုံးအဖွဲ့ချုပ် (MFF) ဟာ မြန်မာ ယူ- ၁၂ လူငယ်အသင်းဖွဲ့စည်းရန် လူရွေးချယ်ပွဲများကို ဆင့်ကဲဆင့်ကဲပြုလုပ်ခဲ့ပြီး ပဏာမကစားသမား (၂၃) ဦး ရွေးချယ်ခဲ့ကြောင်း သိရပါတယ်။ ပြိုင်ပွဲကို ဂျပန်နိုင်ငံ၊ ဖူကူဒါမြို့မှာ လာမယ့်သြဂုတ် (၂၁) ရက်ကနေ (၂၄) ရက်အထိ ကျင်းပမှာဖြစ်ပြီး U-12 လူငယ်အသင်းပေါင်း (၄၀)အထိ ပါဝင်ယှဥ်ပြိုင်ကြမှာပါ။ ပြိုင်ပွဲဝင်အသင်း (၄၀)ကို ပထမအဆင့်အနေနဲ့ (၄) သင်း (၁၀)အုပ်စုခွဲ ကျင်းပမှာဖြစ်ပါတယ်။ ဂျပန်ဘောလုံးအဖွဲ့ချုပ် (JFA) ဟာ ဒီပြိုင်ပွဲကို နှစ်စဥ်ကျင်းပလေ့ရှိပြီး မြန်မာ ယူ- ၁၂ လူငယ်အသင်းဟာ ၂၀၂၃ ခုနှစ်ကတည်းက နှစ်စဥ်ဝင်ရောက်ယှဥ်ပြိုင်နေလျက်ရှိပါတယ်။ ပြိုင်ပွဲကို ဂျပန်နိုင်ငံတစ်ဝှမ်း ဘောလုံးအကယ်ဒမီများမှ ယူ- ၁၂ လူငယ်အသင်းအများစု ပါဝင်ယှဥ်ပြိုင်ကြမှာဖြစ်သလို စပိန်နိုင်ငံရဲ့ နာမည်ကြီးကလပ် ဘာစီလိုနာ ယူ- ၁၂ အသင်း၊ ဂျပန်နိုင်ငံမှာ ဖွင့်လှစ်ထားတဲ့ စပိန်ဘာစီလိုနာအကယ်ဒမီ ယူ- ၁၂ အသင်း၊ ထိုင်ဝမ် ယူ- ၁၂ အသင်းတို့လည်း ပါဝင်ယှဥ်ပြိုင်ကြမှာဖြစ်ကြောင်း သိရပါတယ်။
မြန်မာ ယူ- ၁၂ လူငယ်အသင်းကို နည်းပြချုပ်အဖြစ် ဦးကျော်မင်းမင်းနိုင်က တာဝန်ယူကိုင်မှာဖြစ်ပြီး ပဏာမကစားသမား (၂၃) ဦးထဲမှ အပြီးသတ် (၁၈)ဦး ရွေးချယ်ခေါ်ဆောင်သွားခြင်းဖြစ်ကြောင်း သိရပါတယ်။

AFC Challenge League ပြိုင်ပွဲ ဝင်ရောက်ယှဉ်ပြိုင်မယ့် ရှမ်းယူနိုက်တက်အသင်း အုပ်စု (E)မှာ ကျရောက်

ရှမ်းယူနိုက်တက်အသင်းဟာ ယခု ၂၀၂၆-၂၀၂၇ ရာသီ AFC Challenge League ပြိုင်ပွဲကို ဝင်ရောက်ယှဉ်ပြိုင်ရမှာဖြစ်ပြီး အုပ်စု (E)မှာ ကျရောက်ခဲ့ကြောင်း သိရပါတယ်။
အာရှဘောလုံးအဖွဲ့ချုပ် (AFC) အနေနဲ့ ၂၀၂၆-၂၀၂၇ ရာသီ AFC Challenge League ပြိုင်ပွဲအတွက် အုပ်စုမဲခွဲပွဲကို ဒီနေ့ (သြဂုတ် ၂၀ )ပြုလုပ်ခဲ့ပြီး AFC ရုံးစိုက်ရာ မလေးရှားနိုင်ငံ၊ ကွာလာလမ်ပူမြို့မှာ ကျင်းပခဲ့ပါတယ်။
AFC ဟာ ပြိုင်ပွဲအုပ်စုအဆင့်ကို အသင်းပေါင်း (၂၀ )နဲ့ (၄)သင်း၊ (၅) အုပ်စုခွဲကာ ကျင်းပသွားမှာဖြစ်ကြောင်း သိရပါတယ်။
AFC အနေနဲ့ ပြိုင်ပွဲအုပ်စုအဆင့်ကို အနောက်အာရှဇုန် အုပ်စု (၃)ခုနဲ့ အရှေ့ အာရှဇုန် အုပ်စု (၂) ခုခွဲကာ ကျင်းပမှာဖြစ်ပါတယ်။ ပြိုင်ပွဲအုပ်စုအဆင့်ကို ပတ်လည်တစ်ကျော့စနစ်နဲ့သာ ကျင်းပသွားမှာဖြစ်ပါတယ်။
အနောက်အာရှဇုန် အုပ်စု (၃)ခုကနေ အုပ်စုပထမရအသင်း (၃) သင်းနဲ့ အကောင်းဆုံးအုပ်စုဒုတိယရအသင်း၊ ပေါင်း (၄) သင်း၊ အရှေ့အာရှဇုန် အုပ်စု (၂)ခုကနေ အုပ်စုထိပ်ဆုံးရပ်တည်မှုအရ (၂) သင်းစီ၊ ပေါင်း (၄) သင်း၊ စုစုပေါင်း (၈)သင်းမှာ ကွာတားဖိုင်နယ် တက်ရောက်ခွင့်ရမှာဖြစ်ပါတယ်။
ရှမ်းယူနိုက်တက်အသင်းဟာ အုပ်စု (E)မှာ တရုတ်တိုင်ပေကလပ် နယူးတိုင်ပေစီးတီး၊ ခြေစစ်ပွဲအနိုင်ရအသင်း၊ AFC Champion League- Two က ရှုံးနိမ့်အသင်းတို့နဲ့ ကျရောက်နေပါတယ်။

အင်တာမီလန်အသင်းနဲ့ ကာတစ်ဂျုံးစ် ယနေ့ဆေးစစ်မှုပြုလုပ်ဖွယ်ရှိ

စီးရီးအေကလပ် အင်တာမီလန်အသင်းအနေနဲ့ လီဗာပူးလ်ကွင်းလယ်လူ ကာတစ်ဂျုံးစ်ကို ခေါ်ယူရန်သဘောတူညီမှုရယူနိုင်ခဲ့ပြီးနောက် ယနေ့ ဆေးစစ်ဖွယ်ရှိကြောင်း သိရပါတယ်။
အင်တာမီလန်အသင်းဟာ ကွင်းလယ်ပိုင်းအားဖြည့်ရန်အတွက် ကာတစ်ဂျုံးစ် (၂၅ နှစ်)ကို ခေါ်ယူခဲ့ခြင်းဖြစ်ပြီး ပြောင်းရွှေ့ကြေး ယူရိုသန်း (၃၀)+ Add-ons (၅)သန်းအသုံးပြုခဲ့ရတာပါ။
အင်တာမီလန်အသင်းအနေနဲ့ ကာတစ်ဂျုံးစ်ကို ပြန်လည်ရောင်းချခဲ့ပါက လီဗာပူးလ်အသင်းကို (၁၀)ရာခိုင်နှုန်းပေးချေရမယ့်အချက်ကိုလည်း ထည့်သွင်းချုပ်ဆိုသွားမယ်လို့ သိရပါတယ်။
လီဗာပူးလ်အကယ်ဒမီထွက် ကစားသမားဖြစ်တဲ့ ကာတစ်ဂျုံးစ်ဟာ အသင်းနဲ့အတူ ပရီးမီးယားလိဂ် (၁၅၃)ပွဲကစားပြီး (၁၁)ဂိုးသွင်းယူခဲ့ပါတယ်။
အင်တာမီလန်အသင်းဟာ စပါးနောက်ခံလူ စပန့်ကိုလည်း ခေါ်ယူထားပြီး အခုအပြောင်းအရွှေ့မှာ ကာတစ်ဂျုံးစ်အနေနဲ့ အင်တာမီလန်ကိုပြောင်းရွှေ့ခွင့်ရတဲ့ ဒုတိယမြောက်ပရီးမီးယားလိဂ်ကစားသမားဖြစ်လာမှာပါ။

ပေါ်တူဂီနောက်ခံလူ ကန်ဆယ်လိုကို ခေါ်ယူခဲ့ကြောင်း ဘာစီလိုနာအတည်ပြု

စပိန်ထိပ်သီး ဘာစီလိုနာအသင်းဟာ ပေါ်တူဂီနောက်ခံလူ ကန်ဆယ်လိုကို ခေါ်ယူခဲ့ကြောင်း အတည်ပြုခဲ့ပါတယ်။
ဆော်ဒီကလပ် အယ်လ်ဟီလာအသင်းနဲ့လမ်းခွဲခဲ့တဲ့ ကန်ဆယ်လိုကို ဘာစီလိုနာအသင်းအနေနဲ့ ၂၀၂၉ ခုနှစ်အထိ စာချုပ်ချုပ်ဆိုခဲ့တာပါ။
(၃၂)နှစ်အရွယ်ရှိပြီဖြစ်တဲ့ ကန်ဆယ်လိုဟာ ဘာစီလိုနာအသင်းမှာ ၂၀၂၃-၂၄ ရာသီနဲ့ ပြီးခဲ့တဲ့ ၂၀၂၅-၂၆ ရာသီတွေမှာ အငှားကစားခဲ့ဖူးပြီး အခုချိန်မှာတော့ ကက်တလန်ကလပ်နဲ့ အပြီးသတ်စာချုပ် ချုပ်ဆိုနိုင်ခဲ့ပါတယ်။
ဥရောပထိပ်သီးအသင်းတွေဖြစ်တဲ့ အင်တာမီလန်၊ ဂျူဗင်တပ်စ်၊ မန်စီးတီးနဲ့ ဘိုင်ယန်မြူးနစ်အသင်းတွေမှာ ကစားဖူးခဲ့တဲ့ ကန်ဆယ်လိုဟာ ဆုဖလားအောင်မြင်မှုများစွာရယူနိုင်ခဲ့သူပါ။
ကန်ဆယ်လိုဟာ အခုအပြောင်းအရွှေ့မှာ ဘာစီလိုနာအသင်းခေါ်ယူခဲ့တဲ့ (၅)ဦးမြောက်ကစားသမား ဖြစ်လာခဲ့ပါတယ်။

စပါးအသင်းရဲ့ အာဂျင်တီးနားနောက်ခံလူ ရိုမဲရိုး အက်သလက်တီကိုအသင်းသို့ ပြောင်းရွှေ့

စပိန်ကလပ်အက်သလက်တီကိုအသင်းဟာ စပါးအသင်းရဲ့ အာဂျင်တီးနားနောက်ခံလူ ရိုမဲရိုးကို ခေါ်ယူခဲ့ကြောင်း ကြေညာခဲ့ပါတယ်။
အက်သလက်တီကိုအသင်းဟာ ရိုမဲရိုးအတွက် စပါးအသင်းကို ယူရိုသန်း (၄၀)ပေးချေခဲ့ရပြီး (၅)နှစ်စာချုပ်ချုပ်ဆိုခဲ့ပါတယ်။
ရိုမဲရိုးအနေနဲ့ အက်သလက်တီကိုအသင်းမှာ ကျောနံပါတ် (၂၁)ကိုဝတ်ဆင်သွားမှာဖြစ်ပြီး ဆုဖလားတွေအတွက် အကောင်းဆုံးတိုက်ပွဲဝင်သွားမယ်လို့လည်း ဆိုခဲ့ပါတယ်။
(၂၈)နှစ်အရွယ် ရိုမဲရိုးဟာ စပါးအသင်း ၁၇ နှစ်အတွင်း ပထမဆုံးမေဂျာဖလားအဖြစ် ၂၀၂၅ ခုနှစ်မှာ ယူရိုပါလိဂ်ဖလား ဆွတ်ခူးနိုင်ဖို့ ကူညီပေးခဲ့ပါတယ်။
ဒါပေမဲ့ စပါးနည်းပြသစ် ဒီဇယ်ဘီနဲ့ အဆင်မပြေမှုတွေရှိခဲ့တာကြောင့် ရိုမဲရိုးအနေနဲ့ အသင်းပြောင်းဖို့ ဆုံးဖြတ်ခဲ့တာပါ။

တောင်ပံကစားသမား မင်တက်အတွက် လီဗာပူးလ်ရဲ့ ပေါင်သန်း(၅၀)နဲ့ ကမ်းလှမ်းမှုကို ဘရိုက်တန်ငြင်းပယ်

လီဗာပူးလ်အသင်းဟာ ဘရိုက်တန်အသင်းက ဂမ်ဘီယာလက်ရွေးစင် တောင်ပံကစားသမား ယန်ကူဘာမင်တက်ကို ပေါင်သန်း(၅၀)နဲ့ ကမ်းလှမ်းခဲ့ပေမဲ့ ငြင်းပယ်ခံခဲ့ရကြောင်း သိရပါတယ်။
လီဗာပူးလ်အသင်းက ဆာလာနေရာ အစားထိုးဖို့ တိုက်စစ်ကစားသမားသစ် ရှာဖွေနေရာမှာ မင်တက်ကလည်း ပစ်မှတ်ကစားသမားတစ်ဦးဖြစ်တာကြောင့် ဈေးကွက်ပိတ်ဖို့ နီးကပ်လာချိန်မှာ ကမ်းလှမ်းခဲ့ခြင်းဖြစ်ကြောင်း သိရပါတယ်။
ဘရိုက်တန်အသင်းက မင်တက်ရဲ့ ပြောင်းရွှေ့ကြေးကို သတ်မှတ်ထားခြင်းမရှိပေမဲ့ ဒီထက်မြင့်မားတဲ့ ပြောင်းရွှေ့ကြေး ရရှိလိုတာကြောင့် လီဗာပူးလ်ရဲ့ကမ်းလှမ်းမှုကို ငြင်းပယ်ခဲ့ခြင်းဖြစ်ကြောင်း သိရပါတယ်။
ဘရိုက်တန်အသင်းက မင်တက်(၂၂ နှစ်)ကို ၂၀၂၄ နွေရာသီမှာ နယူးကာဆယ်ကနေ ပေါင်သန်း(၃၀)နဲ့ ခေါ်ယူခဲ့ပြီး (၅)နှစ်စာချုပ် ချုပ်ဆိုထားတာပါ။
မင်တက်က ပြီးခဲ့တဲ့နှစ်ရာသီမှာ ဘရိုက်တန်အသင်းအတွက် ပရီးမီးယားလိဂ်(၆၆)ပွဲကစားပြီး (၉)ဂိုးသွင်း၊ ဂိုးဖန်တီးမှု(၈)ကြိမ် ပြုလုပ်နိုင်ခဲ့ကြောင်း သိရပါတယ်။
လက်ရှိအချိန်မှာ မင်တက်က ရိုးမားနဲ့ ယှဉ်ပြိုင်ခဲ့တဲ့ ခြေစမ်းပွဲမှာ ရရှိခဲ့တဲ့ ညာခြေထောက်ဒဏ်ရာကို ခွဲစိတ်ကုသမှုခံယူခဲ့ရတာကြောင့် (၈)ပတ်ဝန်းကျင် အနားယူရဖို့ ရှိနေပေမဲ့ လီဗာပူးလ်အသင်းက ကမ်းလှမ်းခဲ့ခြင်းဖြစ်ကြောင်းလည်း သိရပါတယ်။

ထိုင်းဖိုက်တာ ကိုမာဝတ်တွင် အားနည်းချက်မရှိကြောင်းနဲ့ ဖိုက်တာကောင်းဖြစ်ကြောင်း ကျော်စွာဝင်း ဆို

မြန်မာဖိုက်တာ ကျော်စွာဝင်းက သူနဲ့ ထိုးသတ်မယ့် ထိုင်းဖိုက်တာ ကိုမာဝတ်တွင် အားနည်းချက်မရှိကြောင်းနဲ့ ဖိုက်တာကောင်းတစ်ဦးဖြစ်ကြောင်း ပြောကြားခဲ့ပါတယ်။
ကျော်စွာဝင်းက" သူ့ (ကိုမာဝတ်) ပွဲတွေကို လေ့လာထားပါတယ်။ သူ့မှာ အားနည်းချက်က မရှိပါဘူး။ သူက ဖိုက်တာကောင်းတစ်ယောက်ပါ။ သူ့ရဲ့ လက်သီးထိုးချက်တွေကလည်း ကောင်းပါတယ်။ လက်အိတ်ရော အမှတ်ပေးစနစ်တွေရော ကျွန်တော်နဲ့ အသားကျနေပါပြ" ဆိုပြီး ပြောကြားခဲ့တာ ဖြစ်ပါတယ်။
မြန်မာဖိုက်တာများဖြစ်တဲ့ ကျော်စွာဝင်းနဲ့ စောမင်းမင်းတို့ နှစ်ဦးစလုံးဟာ ONE Friday Fights 167 ပြိုင်ပွဲမှာ အိမ်ရှင်ထိုင်းဖိုက်တာများနဲ့ ထိုးသတ်ရမှာဖြစ်ကြောင်း သိရပါတယ်။
ONE Friday Fights 167 ပြိုင်ပွဲကို ဒီညနေ (သြဂုတ် ၂၁) ထိုင်းနိုင်ငံ၊ ဘန်ကောက်မြို့ရှိ လုမ္မဏီအားကစားရုံမှာ ကျင်းပပြုလုပ်မှာဖြစ်ပါတယ်။
ပြိုင်ပွဲကို ထုံးစံအတိုင်း နှစ်ပိုင်းခွဲကျင်းပမှာဖြစ်ပြီး ပထမပိုင်းဖြစ်တဲ့ The Inner Circle တွင် တွဲဆိုင်း ၅ ဆိုင်း၊ ဒုတိယပိုင်းတွင် တွဲဆိုင်း ၉ ဆိုင်း၊ စုစုပေါင်း တွဲဆိုင်း ၁၄ ဆိုင်း ထည့်သွင်းကျင်းပမှာဖြစ်ပါတယ်။
ONE Championship ပရိုမိုးရှင်းဟာ ယခုနှစ်ဆန်းပိုင်းမှစပြီး ပထမပိုင်းဖြစ်တဲ့ The Inner Circle ကို Paper View (အခပေး) အဖြစ် ထုတ်လွှင့်နေပြီး ဒုတိယပိုင်းကိုသာ အခမဲ့ထုတ်လွှင့်ပေးနေခြင်း ဖြစ်ပါတယ်။
ယခုတစ်ပတ်ကျင်းပမယ့် ONE Friday Fights 167 ပြိုင်ပွဲတွင် မြန်မာဖိုက်တာများဖြစ်တဲ့ ကျော်စွာဝင်းနဲ့ စောမင်းမင်းတို့ နှစ်ဦးစလုံးရဲ့ တွဲဆိုင်းများမှာ Paper View (အခပေး) ဖြင့် ထုတ်လွှင့်မယ့် ပထမပိုင်း The Inner Circle တွင် ပါဝင်နေလျက်ရှိပါတယ်။
ဒါကြောင့် ပြည်တွင်း၊ ပြည်ပမှ မြန်မာပရိသတ်များအနေနဲ့ ONE Championship တွင် လစဉ်ကြေး၊ နှစ်စဉ်ကြေး ပေးသွင်းဝယ်ယူပြီးမှသာကြည့်ရှုခွင့်ရမှာဖြစ်ကြောင်း သိရပါတယ်။
မြန်မာဖိုက်တာ စောမင်းမင်းဟာ ပထမပိုင်း The Inner Circle ၏ ပွဲစဉ် ၃ တွင် ထိုင်းဖိုက်တာ ယော့ဖူးပနဲ့ လည်းကောင်း၊ မြန်မာဖိုက်တာ ကျော်စွာဝင်းဟာ ပွဲစဉ် ၄ တွင် ထိုင်းဖိုက်တာ ကိုမာဝတ်နဲ့ လည်းကောင်း ယှဉ်ပြိုင်ထိုးသတ်ရမှာ ဖြစ်ပါတယ်။
စောမင်းမင်းဟာ မူလက ထိုင်းနာမည်ကြီးဖိုက်တာ စူရီယာလက်နဲ့ ယှဉ်ပြိုင်ထိုးသတ်ရန် စီစဉ်ထားသော်လည်း စူရီယာလက်မှာ မတော်တဆမှုကြောင့် ပြိုင်ပွဲမှ နုတ်ထွက်ခဲ့ရခြင်းဖြစ်ပါတယ်။
စောမင်းမင်းဟာ ONE Championship တွင် ၆ ပွဲထိုးသတ်ထားပြီး ၃ ပွဲနိုင်၊ ၃ ပွဲရှုံးနိမ့်ထားပါတယ်။
စောမင်းမင်းဟာ နောက်ဆုံးနှစ်ပွဲဆက် ရှုံးနိမ့်ထားသောကြောင့် ယခုတစ်ပတ်ပွဲကို အနိုင်ရရှိရန် လိုအပ်မှာဖြစ်ပါတယ်။
ကျော်စွာဝင်းဟာ ONE Championship တွင် ၃ ပွဲ ထိုးသတ်ထားပြီး နှစ်ပွဲနိုင်၊ တစ်ပွဲရှုံးနိမ့်ထားပါတယ်။
ကျော်စွာဝင်းဟာ ဂျပန်ဖိုက်တာ မူဂါကို အလဲထိုး၊ ထိုင်းဖိုက်တာ ဆလေတန်ကို အမှတ်ဖြင့် အနိုင်ရထားခြင်းဖြစ်ပါတယ်။