အဆင့်မြှင့်တင်ပြင်ဆင်မှုများပြုလုပ်နေသည့် ဝဇီရာရုပ်ရှင်ရုံ

နိုင်ငံတကာအဆင့်မီဂုဏ်ပြုခံ ကဇာတ်ရုံအဖြစ်အဆင့်မြှင့်တင်ပြင်ဆင်မှုများ ပြုလုပ်လျက်ရှိသည့် ရန်ကုန်တိုင်း၊ ကျောက်တံတားမြို့နယ်၊ ဗိုလ်ချုပ်အောင်ဆန်းလမ်းမပေါ်ရှိ ဝဇီရာရုပ်ရှင်ရုံအား ပြန်ကြားရေးဝန်ကြီးဌာန ပြည်ထောင်စုဝန်ကြီး ဦးမောင်မောင်အုန်းမှ နိုဝင်ဘာ ၁၇ ရက်နံနက်ပိုင်းက ကြည့်ရှုစစ်ဆေးခဲ့သည်။
ထိုသို့ ကြည့်ရှုစစ်ဆေးပြီးနောက် ဝဇီရာရုပ်ရှင်ရုံအား ၂၀၂၆ ခုနှစ် မတ်လမတိုင်မှီ စံချိန်စံညွှန်းပြည့်ဝစွာပြင်ဆင်ရန်၊ ထိုင်ခုံခင်းကျင်းမှုနှင့် အသံစနစ်၊ မီးစနစ်များကောင်းမွန်စေရန်တို့ကို မှာကြားခဲ့သည်။
ထို့နောက် ပြည်ထောင်စုဝန်ကြီးသည် ဝဇီရာရုပ်ရှင်ရုံရှေ့ မြန်မာ့မီးရထားပိုင်မြေနေရာ၌ ယာဉ်ရပ်နားရန်လျာထားဆောင်ရွက်မည့်နေရာကိုလည်း ကြည့်ရှုစစ်ဆေးခဲ့သည်။

မြိတ်မြို့တွင် တက္ကသိုလ်ကျောင်းသား/ကျောင်းသူများ ကြိုတင်ဆန္ဒမဲပေး

တနင်္သာရီတိုင်း၊ မြိတ်မြို့နယ်အတွင်းနေထိုင်ကာ မဲဆန္ဒနယ်ပြင်ပသို့သွားရောက်၍ကျောင်းတက်မည့် တက္ကသိုလ်ကျောင်းသား/ကျောင်းသူများသည် ယနေ့ နိုဝင်ဘာ ၁၇ ရက်နံနက်ပိုင်းက စုပေါင်းရုံးခန်းမ၌ ကြိုတင်ဆန္ဒမဲပေးခဲ့ကြကြောင်း သိရသည်။
" ဒီနေ့မနက်ပိုင်းကစပြီး မဲဆန္ဒနယ်ပြင်ပကိုသွားပြီး ကျောင်းသွားတက်ကြမယ့် ကျောင်းသား၊ ကျောင်းသူတွေ ဆန္ဒမဲပေးတာကိုဆောင်ရွက်တာပါ။ သက်ဆိုင်ရာ ပါတီကိုယ်စားလှယ်တွေကိုလည်းဖိတ်ပြီး ကြိုတင်မဲပေးခြင်းဆောင်ရွက်ပါတယ်။ ကျောင်းသားတွေ ကြိုတင်ဆန္ဒမဲပေးတာကို နိုဝင်ဘာ ၁၇ ရက်ကနေ ၂၁ ရက်အထိဆောင်ရွက်ပေးသွားမှာဖြစ်ပါတယ်”ဟု မြို့နယ်ရွေးကောက်ပွဲကော်မရှင်အဖွဲ့ခွဲဥက္ကဋ္ဌက ပြောသည်။
တက္ကသိုလ်ကျောင်းသား/ကျောင်းသူများသည် ၎င်းတို့၏ ကျောင်းဝင်ခွင့်အထောက်အထားနှင့် သတ်မှတ်စာရွက်စာတမ်းများပြသ၍ ကြိုတင်ဆန္ဒမဲလက်မှတ်များထုတ်ယူပြီး လျှို့ဝှက်ဆန္ဒပြုခန်းတွင် ၎င်းတို့ကြိုက်နှစ် သက်သည့် ကိုယ်စားလှယ်လောင်းကိုဆန္ဒပြုမဲပေးခဲ့ကြကြောင်း သိရသည်။

ပါတီကို ပိတ်ပင်ထားပါကအကြမ်းဖက်မှုများဖြစ်လာနိုင်--ဟာစီနာ၏သား

အဝါမီလိဂ်ပါတီကို ဆက်လက်ပိတ်ပင်ထားပါက ပါတီထောက်ခံသူများသည် လာမည့်နှစ် ဖေဖော်ဝါရီလတွင် ကျင်းပမည့် နိုင်ငံလုံးဆိုင်ရာရွေးကောက်ပွဲကို တားဆီးကြလိမ့်မည်ဟု ဖြုတ်ချခံခဲ့ရသော ဘင်္ဂလားဒေ့ရှ်ဝန်ကြီးချုပ် ရှိတ်ဟာစီနာ၏ သားဖြစ်သူနှင့် အကြံပေးပုဂ္ဂိုလ်က တနင်္ဂနွေနေ့တွင် သတိပေးခဲ့သည်။ ထို့အပြင် ကြားဖြတ်အစိုးရအနေဖြင့် ယင်းအခြေအနေကို မပြောင်းလဲပါက နိုင်ငံတစ်ဝန်းဆန္ဒပြမှုများသည် အကြမ်းဖက်မှုသို့ အရှိန်မြင့်သွားနိုင်ကြောင်းလည်း ၎င်းက သတိပေးခဲ့သည်။
၂၀၂၄ ခုနှစ်က ကျောင်းသားများဦးဆောင်သော ဆန္ဒပြမှုများအကို ပြင်းထန်စွာ နှိမ်နင်းခဲ့မှုများနှင့် ပတ်သက်၍ လူသားမျိုးနွယ်အပေါ် ကျူးလွန်သော ရာဇဝတ်မှုများဖြင့် အသက် ၇၈ နှစ်အရွယ် ဟာစီနာကို ဒါကာတရားရုံးတစ်ခုက ရုပ်သံမှတဆင့် မျက်ကွယ်စီရင်ချက်မချမီ တစ်ရက်အလိုတွင်ပြုလုပ်သည့် ရိုက်တာသတင်းဌာနနှင့် သီးသန့်အင်တာဗျူးတွင် သားဖြစ်သူ ဆာဂျစ် ဝါဇက်က ယင်းကဲ့သို့ ပြောဆိုခဲ့ခြင်းဖြစ်သည်။ ဟာစီနာကမူ သူ့အပေါ် စွပ်စွဲချက်များကို ငြင်းဆိုခဲ့ပြီး ထိုအမှုသည် နိုင်ငံရေးအရတိုက်ခိုက်မှုဖြစ်သည်ဟု ပြောဆိုခဲ့သည်။
ဟာစီနာသည် ၂၀၂၄ ခုနှစ် သြဂုတ်လတွင် ဘင်္ဂလားဒေ့ရှ်မှ ထွက်ပြေးခဲ့ပြီးနောက်ပိုင်း နူးဒေလီတွင် ပြည်ပြေးအဖြစ် နေထိုင်ခဲ့သည်။ အိန္ဒိယအစိုးရက သူ့ကို အပြည့်အဝအကာအကွယ်ပေးထားကြောင်းနှင့် သူ့ကို နိုင်ငံခေါင်းဆောင်တစ်ဦးသဖွယ် ဆက်ဆံကြောင်း ဝါဇက်က ပြောကြားခဲ့သည်။
ဟာစီနာ၏ ၁၅ နှစ်ကြာ အုပ်ချုပ်မှုအဆုံးသတ်ပြီးကတည်းက ကြားဖြတ်အစိုးရကို ဦးဆောင်လျက်ရှိသော နို့ဘဲလ်ဆုရှင် မိုဟာမက်ယူနွတ်စ်၏ ပြောရေးဆိုခွင့်ရှိသူများကို ဝါဇက်၏ ပြောဆိုချက်များနှင့်ပတ်သက်၍ မှတ်ချက်ပေးရန် တနင်္ဂနွေနေ့ညပိုင်းတွင် တောင်းဆိုခဲ့သော်လည်း တုန့်ပြန်ဖြေကြားခဲ့ခြင်းမရှိပေ။

လေဖြတ်ခြင်းကိုကုသရန် စက်ရုပ်ငယ်များကို တီထွင်ထုတ်လုပ်

ပြည်ထောင်စုနည်းပညာသိပ္ပံ အီးတီအိတ်ချ် ဇူးရစ်မှ သုတေသီများသည် ခန္ဓာကိုယ်အတွင်းရှိ ရောဂါများကို တို-က်ဖျ-က်ရန် စက်ရုပ်ငယ်ကို ဖန်တီးခဲ့ကြပြီးဖြစ်သည်။ မရှိမဖြစ်လိုအပ်သောဆေးဝါးများကိုပို့ လွှတ်ရန် သွေးကြောများမှတစ်ဆင့် အနံနှစ်မီလီမီတာထက်ငယ်သော ကိရိယာကို သိပ္ပံပညာရှင်များက ထိန်းချုပ်နိုင် ပြီဖြစ်သည်။
စက်ရုပ်ငယ်ကို လူသားများ၌မစမ်းသပ်ရသေးသော်လည်း ၎င်းသည် ဝက်များနှင့် သိုးများကို စမ်းသပ်မှုတွင် အောင်မြင်အောင်လုပ်ဆောင်ခဲ့သည်ဟု သုတေသီများက ကြာသပတေးနေ့ထုတ် သိပ္ပံဂျာနယ်တွင် ပြောကြားခဲ့သည်။
လိုအပ်သည့်နေရာ ဆေးဝါးများကိုတိကျစွာပေးပို့ရန် နည်းလမ်းများကို အချိန်ယူ တီထွင်နေခဲ့သည်ဟု အီးတီအိတ်ချ် ဇူးရစ်က သတင်းထုတ်ပြန်ချက်တွင် ဖော်ပြထားသည်။ ယနေ့ခေတ်တွင် လေဖြတ်ခြင်း သို့မဟုတ် အကျိတ်များကဲ့သို့သော ရောဂါများစွာသည် ခန္ဓာကိုယ်အနှံ့ ဆေးအဖုံများစွာပေးရန်လိုအပ်ပြီး ဤသို့ ဆေးပေးခြင်းသည် ဘေးထွက်ဆိုးကျိုးများ ဖြစ်နိုင်ခြေကို တိုးမြင့်စေသည်။
စက်ရုပ်အသစ်ကို ဤပြဿနာကို ဖြေရှင်းရန် ဒီဇိုင်းပုံထုတ်ထားသည်။ ၎င်းရို‌ဘော့ငယ်‌လေးတွင် ဆေးထည့်နိုင်သည့် ဂျယ်ဆေးတောင့်တစ်ခုပါရှိသည်။ သုတေသီများသည် သံလိုက်စက်ကွင်းများကို အသုံးပြု၍ ပြင်ပမှ ထိန်းချုပ်နိုင်ရန် သံအောက်ဆိုဒ်အမှုန်ငယ်များဖြင့် ဤဆေးတောင့်ကို တပ်ဆင်ထားသည်။
"ကျွန်ုပ်တို့၏ သွေးကြောများမှတဆင့် လိုအပ်သောသွေးကို လိုအပ်သော အမြန်နှုန်းဖြင့်စုပ်ယူနိုင်သည်မှာ မယုံနိုင်လောက်အောင်ပင် အံ့သြဖွယ်ကောင်းပါသည်" ဟု အီးတီအိတ်ချ် ဇူးရစ် သုတေသီနှင့် လေ့လာမှု၏ အဓိက စာတမ်းရှင်သုတေသီ ဖာဘီရန် လန်ဒါက ထုတ်ပြန်ချက်တွင် ပြောကြားခဲ့သည်။
ဆေးကို ပို့လိုသောနေရာသို့ရောက်လျှင် ဆေးတောင့်ကို ကြိမ်နှုန်းမြင့်သံလိုက်စက်ကွင်းဖြင့် အပူပေးပြီး ဂျယ်ဆေး တောင့်သည် အရည်ပျော်ကာ ဆေးကိုထုတ်လွှတ်‌ပေးသည်။

အာဆီယံတရားသူကြီးချုပ်များကောင်စီအစည်းဝေး မြန်မာပါဝင်တက်ရောက်

စင်ကာပူကြေညာစာတမ်းကို အာဆီယံနိုင်ငံများမှ တရားသူကြီးချုပ်များနှင့် ကိုယ်စားလှယ်အဖွဲ့ခေါင်းဆောင် အားလုံး ပါဝင်လက်မှတ်ရေးထိုး
စင်ကာပူနိုင်ငံတရားလွှတ်တော်၏ ဖိတ်ကြားချက်အရ နိုဝင်ဘာ (၁၃) ရက်မှ (၁၅) ရက်ထိ ကျင်းပသည့် ၁၂ ကြိမ်မြောက် အာဆီယံတရားသူကြီးချုပ်များ ကောင်စီအစည်းဝေးသို့ ပြည်ထောင်စုတရားသူကြီးချုပ် ဦးသာဌေး ဦးဆောင်သည့် ကိုယ်စားလှယ်အဖွဲ့အနေဖြင့် တက်ရောက်ခဲ့ကြောင်း သိရသည်။
အစည်းဝေးတွင် အာဆီယံတရားရေးပေါ်တယ်လုပ်ငန်းအဖွဲ့၊ တရားမမှုခင်းများဆိုင်ရာလုပ်ငန်းအဖွဲ့၊ မှုခင်းစီမံခန့်ခွဲမျှုနှင့် တရားရုံးနည်းပညာဆိုင်ရာလုပ်ငန်းအဖွဲ့၊ နိုင်ငံဖြတ်ကျော်ဖြစ်ပွားသည့် မိသားစုမှုခင်းဆိုင်ရာ စသည့် ဆောင်ရွက်ပြီးလုပ်ငန်းများနှင့် အဆိုပြုချက်များ အစီရင်ခံများကို ကောင်စီသို့ တင်ပြချက်ရယူချခဲ့ခြင်းလည်း ဖြစ်သည်။
မြန်မာနိုင်ငံအနေဖြင့်လည်း နိုင်ငံတရားစီရင်ရေးနှင့် သက်ဆိုင်သည့်အကြောင်းရာများကို ပါဝင်ဆွေးနွေးခဲ့ကြောင်း သိရသည်။
ထိုနောက် (၁၂) ကြိမ်မြောက် အာဆီယံတရားသူကြီးချုပ်များ ကောင်စီအစည်းဝေးရလဒ်ဖြစ်သည့် စင်ကာပူကြေညာစာတမ်းကို အာဆီယံနိုင်ငံများမှ တရားသူကြီးချုပ်များနှင့် ကိုယ်စားလှယ်အဖွဲ့ခေါင်းဆောင်အားလုံးက ပါဝင်လက်မှတ်ရေးထိုးခဲ့ကြောင်း သိရသည်။
ကောင်စီအစည်းအဝေးနှင့်အတူ ပူးတွဲကျင်းပသည့် ဆွေးနွေးပွဲနှင့် အစည်းဝေးများကိုလည်း မြန်မာနိုင်ငံအနေဖြင့်တက်ရောက်ခဲ့ကြောင်းလည်း သိရသည်။
အပြည်ပြည်ဆိုင်ရာအငြင်းပွားမှုများဆိုင်ရာ ဆွေးနွေးပွဲ၊ လူမွဲခံယူခြင်းဆိုင်ရာ အာဆီယံတရားသူကြီးများ အစည်းအဝေး၊ အာဆီယံဒေသတွင်း နိုင်ငံဖြတ်ကျော် ဥပဒေကျင့်သုံးမှုဆိုင်ရာဆွေးနွေးပွဲနှင့် အသိညဏ်ပစ္စည်းမူပိုင်ခွင့်ဆိုင်ရာ အစည်းဝေးများ၌လည်း ဆွေးနွေးခဲ့ခြင်းဖြစ်သည်။
အာဆီယံတရားသူကြီးချုပ်များကောင်စီအစည်းအဝေးကို ၂၀၁၃ ခုနှစ်မှစ၍ နှစ်စဉ်ကျင်းပနေပြီး အာဆီယံနိုင်ငံများမှ တရားသူကြီးချုပ်များနှင့် တရားစီရင်ရေးဆိုင်ရာအကြီးအကဲများ တက်ရောက်ကြသည်။

ထပ်မံထိန်းသိမ်းနိုင်ခဲ့သည့် တရုတ်နိုင်ငံသားများနှင့် မလေးရှားနိုင်ငံသားတို့ကိုပြန်လည်လွှဲပြောင်းပေးနိုင်ရေးဆောင်ရွက်

အွန်လိုင်းလောင်းကစားမှု၊ အွန်လိုင်းလိမ်လည်မှုအပါ အဝင် ဒုစရိုက်မှုလုပ်ငန်းများတွင်ပါဝင်ဆောင်ရွက်ခဲ့သော တရုတ်နိုင်ငံသား(၂၄)ဦးနှင့် မလေးရှားနိုင်ငံသား (၁)ဦးတို့ကို ထပ်မံထိန်းသိမ်းနိုင်ခဲ့သဖြင့် သက်ဆိုင်ရာနိုင်ငံများထံ ပြန်လည်လွှဲပြောင်းပေးနိုင်ရေးအတွက်ဆောင်ရွက်လျက်ရှိကြောင်း သိရသည်။
ဌာနဆိုင်ရာပူးပေါင်းအဖွဲ့များက ၎င်းတို့၏လိုအပ်သည့် ကိုယ်ရေးအချက်အလက်များနှင့် မှတ်တမ်းများစာရင်းကောက်ယူခြင်းတို့ကိုပြုလုပ်ခဲ့ကြကြောင်း သိရသည်။
ဇန်နဝါရီ ၃၀ ရက်မှ ယနေ့ နိုဝင်ဘာ ၁၇ ရက်အထိ မြန်မာနိုင်ငံအတွင်းသို့ တရားမဝင်ဝင်ရောက်လာသည့် ပြည်ပနိုင်ငံသား(၁၀,၈၄၀)ဦးကိုစစ်ဆေးဖော်ထုတ် ထိန်းသိမ်းနိုင်ခဲ့ကာ (၉,၅၃၆)ဦးကို ထိုင်းနိုင်ငံမှတစ်ဆင့်ပြည်နှင်လွှဲပြောင်းပေးခဲ့ပြီးဖြစ်ကာကျန်ရှိသည့် (၁,၃၀၄)ဦးသည်လည်း ပြန်လည်လွှဲပြောင်းပေးရန် အ သင့်ဖြစ်နေပြီဖြစ်၍ ကောင်းမွန်စွာ ထိန်းသိမ်းစောင့်ရှောက်ထားကြောင်း သိရသည်။

သက်ဆင်ကိုဘတ် ၁၇ ဘီလျံအခွန်ဆောင်ရန်တရားရုံးချုပ်အမိန့်ချ

၂၀၀၆ ခုနှစ်က ရှင်ကော်ပိုရေးရှင်းရှယ်ယာ ရောင်းချခြင်းမှ ဖြစ်ပေါ်လာသော လူပုဂ္ဂိုလ်ဝင်ငွေခွန်၊ ဒဏ်ကြေး၊ ဝန်ဆောင်ကြေးများနှင့်ပတ်သက်၍ ရှည်လျားသော အခွန်အငြင်းပွားမှုတွင် သက်ဆင်ကို ဘတ် ၁၇ ဘီလျံပေးဆောင်စေဟု ထိုင်းတရားရုံးချုပ်က တနင်္လာနေ့တွင် အမိန့်ချလိုက်သည်။
အခွန်ဦးစီးဌာန၏ အခွန်စည်းကြပ်မှုသည် တရားမဝင်ကြောင်း အကြောင်းပြချက်ဖြင့် အမှုကိုပယ်ချကာ သက်ဆင်ဘက်မှရပ်တည်ခဲ့သည့် ဗဟိုအခွန်တရားရုံးနှင့် အထူးအယူခံတရားရုံးများ၏ ယခင်ဆုံးဖြတ်ချက်များကို တရားရုံးချုပ်က ပယ်ဖျက်ခဲ့ခြင်းဖြစ်သည်။ တရားရုံးချုပ်၏ စီရင်ချက်ကြောင့် အခွန်တာဝန်ကို ပြန်လည်အသက်ဝင်စေကာ တရားဥပဒေစိုးမိုးရေးအတွက် လုပ်ဆောင်ချက် များကိုအကောင်အထည်ဖော်ရန် လမ်းခင်းပေးခဲ့သည်။
ထိုအမှုသည် ၂၀၁၇ ခုနှစ်တွင် အခွန် ဦးစီးဌာနက ထုတ်ပြန်ခဲ့သော အခွန်စည်းကြပ်မှုမှ ပေါ်ပေါက်လာခြင်းဖြစ်ပြီး သက်ဆင်၏ ရှင်းကော်ပိုရေးရှင်း ရှယ်ယာများရောင်းချခြင်းမှ အခွန်၊ ဒဏ်ကြေးနှင့် အခကြေးများ ၁၇ ဒဿမ ၆ ဘီလျံပေးဆောင်ရန် ဌာနက တောင်းခံခဲ့သည်။
သက်ဆင်သည် ၂၀၂၃ ခုနှစ်က ကနဦးတရားရင်ဆိုင်မှု၌ အခွန်တရားရုံးနှင့် အယူခံတရားရုံးနှစ်ခုစလုံးတွင် အနိုင်ရခဲ့ပြီး ဌာန၏ လုပ်ဆောင်ချက်များသည် ဥပဒေနှင့်မညီကြောင်း တရားရုံးများက ဆုံးဖြတ်ခဲ့သည်။ သို့သော်လည်း အခွန် ဦးစီးဌာနသည် တရားရုံးချုပ်အထိ အယူခံတက်ခဲ့ပြီး ယခုအခါ ထိုဆုံးဖြတ်ချက်များကို ပြန်လည်ပယ်ဖျက်လိုက်ပြီဖြစ်သည်။
တရားရုံးချုပ်၏ နိုင်ငံရေးရာထူးရှိသူများဆိုင်ရာ ရာဇဝတ်မှုဌာနက ဘတ် ၄၆ ဘီလျံတန်ဖိုးရှိ သက်ဆင်၏ ပိုင်ဆိုင်မှုများကို သိမ်းယူရန် ၂၀၁၀ ခုနှစ်တွင် ဆုံးဖြတ်ခဲ့ပြီး နောက် အခွန်ဦးစီးဌာနက ရာဖြတ်တွက်ချက်ခြင်း ပြုလုပ်ခဲ့သည်။

ယနေ့နံနက်အစောပိုင်းက ရန်ကုန်၊ မန္တလေးနှင့် မွန်ပြည် နယ်တို့၌ Level 1 အဆင့်မီးလောင်မှုအပါအဝင် မီး လောင်မှုများဖြစ်ပွားခဲ့

ရန်ကုန်တိုင်း၊ တာမွေမြို့နယ်၊ မန္တလေးတိုင်း၊ အမရပူရမြို့နယ်၊ မွန်ပြည်နယ်၊ မော်လမြိုင်မြို့တို့တွင် ယနေ့ နိုဝင်ဘာ ၁၈ ရက်နံနက်အစောပိုင်းက မီးလောင်မှုများဖြစ်ပွားခဲ့ကြောင်း မီးသတ်တပ်ဖွဲ့ထံမှ သိရသည်။
ရန်ကုန်တိုင်း၊ တာမွေမြို့နယ်၊ မေတ္တာညွှန့်ရပ်ကွက်၊ သ မာဓိလမ်း၌ နံနက် ၅ နာရီခွဲခန့်ကမီးလောင်မှုဖြစ်ပွား၍ တာမွေမြို့နယ်မီးသတ်စခန်းမှတပ်ဖွဲ့ဝင်များမှငြှိမ်းသတ်ခဲ့ကြသဖြင့် နံနက် ၅ နာရီ ၄၂ မိနစ်တွင် မီးငြိမ်းသွားခဲ့ကြောင်း သိရသည်။
ထို့ပြင် နံနက် ၂ နာရီ ၅ မိနစ်ခန့်ကလည်း မန္တလေးတိုင်း၊ အမရပူရမြို့နယ်၊ ဘုံးအိုးကျေးရွာ၊ အလယ်ရပ်တွင် နေ အိမ်မီးလောင်မှုဖြစ်ပွား၍ မီးသတ်တပ်ဖွဲ့ဝင်များက Level 1 အဆင့်ဖြင့်ငြှိမ်းသတ်ခဲ့ကြရာ နံနက် ၃ နာရီ ၂ မိ နစ်တွင် မီးငြိမ်းသွားခဲ့ကြောင်း သိရသည်။
ထို့အတူ နံနက် ၂ နာရီ ၄၀ မိနစ်ခန့်ကလည်း မွန်ပြည် နယ်၊ မော်လမြိုင်မြို့၊ သီရိမင်္ဂလာ(၁၄)လမ်းတွင် နေ အိမ်မီးလောင်မှုဖြစ်ပွား၍ မော်လမြိုင်မြို့နယ်မီးသတ်စခန်း၊ မော်လမြိုင်နယ်မြေမီးသတ်စခန်း၊ မြိုင်သာယာနယ်မြေမီးသတ်စခန်းတို့မှမီးသတ်တပ်ဖွဲ့ဝင်များနှင့် လူ မှုကူညီရေးအသင်းဝင်များ၊ အရန်မီးသတ်တပ်ဖွဲ့ဝင်များက ပူးပေါင်းငြှိမ်းသတ်ခဲ့ကြသဖြင့် နံနက် ၃ နာရီ ၅ မိနစ်တွင် မီးငြိမ်းသွားခဲ့ကြောင်း သိရသည်။
အဆိုပါ မီးလောင်မှုဖြစ်စဥ်များအား စတင်လောင် ကျွမ်းရသည့်အကြောင်းရင်းနှင့် ပျက်စီးဆုံးရှုံးမှုတန်ဖိုးကို သက်ဆိုင်ရာမီးသတ်တပ်ဖွဲ့တာဝန်ရှိသူများက စစ် ဆေးခဲ့ကြကြောင်း သိရသည်။

ကိုယ်စားလှယ်လောင်းများ မဲဆွယ်စည်းရုံးရေးဆောင်ရွက်ရာတွင် ဥပဒေ၊နည်းဥပဒေနှင့်အညီ ဖြစ်စေရေး သက်ဆိုင်ရာကော်မရှင်အဖွဲ့ခွဲများက စနစ်တကျ ကြီးကြပ်ဆောင်ရွက်ရန် လို

မဲဆွယ်စည်းရုံးရေးကာလအတွင်း နိုင်ငံရေးပါတီများ၊ ပါတီများမှ ကိုယ်စားလှယ်လောင်းများ၊ တစ်သီးပုဂ္ဂလ ကိုယ်စားလှယ်လောင်းများအနေဖြင့် မဲဆွယ်စည်းရုံးရေးဆောင်ရွက်ကြသည့်အချိန်တွင် ဥပဒေ၊ နည်းဥပဒေများ နှင့်အညီဖြစ်စေရေး သက်ဆိုင်ရာကော်မရှင်အဖွဲ့ခွဲများက စနစ်တကျ ကြီးကြပ်ဆောင်ရွက်ရန် လိုအပ်ကြောင်း ပြည်ထောင်စုရွေးကောက်ပွဲကော်မရှင် ဥက္ကဌ ဦးသန်းစိုးက ပြောသည်။
ယမန်နေ့က ကျင်းပသည့် ကော်မရှင်ရုံးနှင့်အဖွဲ့ခွဲ့ရုံးအသီးသီးတွင် တာဝန်ထမ်းဆောင်ကြမည့် ဦးစီးအရာရှိများကို လုပ်ငန်းခွင်အကြိုစွမ်းရည်မြှင့်သင်တန်းဖွင့်ပွဲတွင် ကော်မရှင် ဥက္ကဌ ဦးသန်းစိုးက အထက်ပါအတိုင်း ပြောကြားခဲ့ခြင်းဖြစ်သည်။
ရွေးကောက်ပွဲဆိုင်ရာ ဥပဒေ၊ နည်းဥပ‌ဒေနှင့် လုပ်ထုံးလုပ်နည်းများကို ကျွမ်းကျင်ပိုင်နိုင်ရန် လိုအပ်ကြောင်းလည်း ဦးသန်းစိုးက ပြောကြားခဲ့သည်။
နိုင်ငံအတွက် လွတ်လပ်ပြီး တရားမျှတသည့် ရွေးကောက်ပွဲ၊ မှတ်ကျောက်တင်ခံရသည့်ရွေးကောက်ပွဲများ ဖြစ်စေရန် ဆောင်ရွက်ရမည်ဖြစ်ကြောင်းလည်း ဥက္ကဌက ပြောကြားခဲ့သည်။
လာမည့်ရွေးကောက်ပွဲ အပိုင်း(၁)ကို ဒီဇင်ဘာ(၂၈)ရက်န၌ စတင်ကျင်းပမည်ဖြစ်ပြီး ယခုအချိန်တွင် သက်ဆိုင်ရာလွှတ်တော်ကိုယ်စားလှယ်လောင်းများနှင့် နိုင်ငံရေးပါတီများက မဲဆွယ်စည်းရုံးမှုများ စတင်လုပ်ဆောင်နေပြီလည်း ဖြစ်သည်။

ဝါမျိုးစေ့ တင်သွင်းမှု ပူးပေါင်းဆောင်ရွက်နိုင်ရန် နားလည်မှုစာချွန်လွှာရေးထိုးနိုင်ရေး မြန်မာ - အိန္ဒိယနှစ်နိုင်ငံဆွေးနွေး

ဝါမျိုးစေ့တင်သွင်းမှု ပူးပေါင်းဆောင်ရွက်နိုင်ရန် နားလည်မှုစာချွန်လွှာ (MoU) လက်မှတ်ရေးထိုးနိုင်ရေးအတွက် နိုဝင်ဘာ ၁၂ ရက်ကမြန်မာ - အိန္ဒိယနှစ်နိုင်ငံဆွေးနွေးခဲ့ကြောင်း မြန်မာကုန်သွယ်မှုမြှင့်တင်ရေးအဖွဲ့မှ သိရသည်။
မြန်မာနိုင်ငံသို့ အိန္ဒိယနိုင်ငံမှ အရည်အသွေးမြင့် ဝါမျိုးစေ့တင်သွင်းနိုင်မှုအတွက် ဆက်လက်ပူးပေါင်းဆောင်ရွက်နိုင်ရန် တတိယအကြိမ်ညှိနှိုင်းအစည်းအဝေးကို မြန်မာကုန်သွယ်မှုမြှင့်တင်ရေးအဖွဲ့၊ အစည်းအဝေးခန်းမ၌ virtual စနစ်ဖြင့် ကျင်းပခဲ့သည်။
မြန်မာနိုင်ငံ၏ လိုအပ်ချက်နှင့် ကိုက်ညီသည့် အိန္ဒိယနိုင်ငံမှ Suvin ဝါမျိုး တင်သွင်းနိုင်ရေး ဆောင်ရွက်ရန်၊ မြန်မာနိုင်ငံသို့ ဝါမျိုးစေ့တင်သွင်း၍ မြန်မာ့တောင်သူများ စမ်းသပ်စိုက်ပျိုးရာတွင် နှစ်ဖက်ကုန်ကျမည့်စရိတ်များကို တွက်ချက်၍ ပေးပို့နိုင်ရန်၊ ဝါမျိုးစေ့တင်သွင်းမှု ပူးပေါင်းဆောင်ရွက်နိုင်ရေး နားလည်မှုစာချွန်လွှာ (MoU) လက်မှတ်ရေးထိုးနိုင်ရေးအတွက် MoU (မူကြမ်း)ကို ပြုစု၍ စီးပွားရေးသံမှူးမှတစ်ဆင့် အိန္ဒိယနိုင်ငံဘက်သို့ ပေးပို့နိုင်ရန်၊ မြန်မာနိုင်ငံသို့ အိန္ဒိယနိုင်ငံ၊ FBIC မှ နည်းပညာအဖွဲ့များ လာရောက်၍ ကွင်းဆင်းလေ့လာနိုင်ရန်အတွက် အချိန်ကာလ သတ်မှတ်ပေးနိုင်ရေးဆိုင်ရာ ကိစ္စရပ်များကို ဆွေးနွေးခဲ့ကြကြောင်း သိရသည်။
အစည်းအဝေးသို့ မြန်မာကုန်သွယ်မှုမြှင့်တင်ရေးအဖွဲ့မှ တာဝန်ရှိသူများ၊ အိန္ဒိယနိုင်ငံ၊ ကော်လ်ကတ္တားမြို့ရှိ မြန်မာစီးပွားရေးသံမှူး၊ ပြည်ပဝါမျိုးစေ့တင်ပို့မှုအောင်မြင်ရေးကော်မတီမှ ကိုယ်စားလှယ်နှင့် မြန်မာနိုင်ငံဝါနှင့် ဝါထွက်ပစ္စည်း လုပ်ငန်းရှင်များအသင်းမှ တာဝန်ရှိသူများ စုစုပေါင်း ၁၀ ဦးခန့် တက်ရောက်ခဲ့ကြောင်း သိရသည်။