တညင်းကုန်းဈေးအနီး ယာဉ်ကြောပိတ်ဆို့မှု ဖြေရှင်းရန် လေးလမ်းသွား မီးရထားလမ်းခုံးကျော်တံတား တည်ဆောက်မည်
ရန်ကုန်တိုင်းဒေသကြီး၊ အင်းစိန်မြို့နယ် တညင်းကုန်းဈေးအနီး ရန်ကုန်-ပြည် မီးရထားလမ်းနှင့် ခရေပင်ကားလမ်းဆုံ၌ ဖြစ်ပေါ်နေသည့် ယာဉ်ကြောပိတ်ဆို့မှုများကို ဖြေရှင်းနိုင်ရန် PC Girder နှင့် Steel Box Girder အမျိုးအစား လေးလမ်းသွား မီးရထားလမ်းခုံးကျော်တံတား တည်ဆောက်သွားမည်ဖြစ်ကြောင်း ဆောက်လုပ်ရေးဝန်ကြီးဌာနမှ သိရသည်။
တံတားတည်ဆောက်မည့် ခရေပင်ကားလမ်းပေါ်တွင် Express ယာဉ်များ၊ ကုန်တင်ယာဉ်များ၊ ၆ ဘီးနှင့်အထက် မော်တော်ယာဉ်များအပါအဝင် မော်တော်ယာဉ် ၃,၀၀၀ ကျော် နေ့စဉ်ဖြတ်သန်းသွားလာလျက်ရှိသည်။ ထို့အပြင် ရန်ကုန်-ပြည် မီးရထားလမ်းတွင် မြို့ပတ်ရထားများအပါအဝင် အစုန်၊ အဆန် ရထား ၂၃ စီး နေ့စဉ်ဖြတ်သန်းနေသဖြင့် မီးရထားဖြတ်သန်းချိန်များတွင် ယာဉ်ကြောပိတ်ဆို့မှု မကြာခဏဖြစ်ပေါ်နေခြင်းဖြစ်သည်။
အဆိုပါ လေးလမ်းသွားခုံးကျော်တံတား တည်ဆောက်ပြီးစီးပါက မီးရထားလမ်းနှင့် ကားလမ်းဆုံရာ၌ ဖြစ်ပေါ်နေသည့် ယာဉ်ကြောပိတ်ဆို့မှုကို အဓိကဖြေရှင်းပေးနိုင်မည်ဖြစ်ပြီး ခရေပင်ကားလမ်းတစ်လျှောက် ယာဉ်အသွားအလာ ပိုမိုချောမွေ့လာမည်ဖြစ်သည်။
ဆောက်လုပ်ရေးဝန်ကြီးဌာန ဒုတိယဝန်ကြီး ဦးမျိုးမြင့်သည် တံတားဦးစီးဌာန ညွှန်ကြားရေးမှူးချုပ်နှင့် တာဝန်ရှိသူများနှင့်အတူ ဩဂုတ် ၂၀ ရက်က တံတားတည်ဆောက်မည့်နေရာသို့ သွားရောက်၍ မြေစမ်းသပ်ခြင်းလုပ်ငန်းနှင့် တည်ဆောက်ရေးစီမံချက်များကို ကြည့်ရှုစစ်ဆေးခဲ့သည်။
စစ်ဆေးစဉ် စီမံကိန်းဆောင်ရွက်ရာတွင် လျှပ်စစ်နှင့် ဆက်သွယ်ရေးတိုင်များ ရွှေ့ပြောင်းရေး၊ တညင်းကုန်းဈေးအဝင် လမ်းလွှဲဆောင်ရွက်ရေးတို့အတွက် သက်ဆိုင်ရာဌာနများနှင့် ပူးပေါင်းညှိနှိုင်းရန်နှင့် တံတားတည်ဆောက်နေစဉ် ယာဉ်ကြောပိတ်ဆို့မှု မဖြစ်ပေါ်စေရေး ကြိုတင်စီမံဆောင်ရွက်ထားရန် ဒုတိယဝန်ကြီးက မှာကြားခဲ့သည်။
ထို့ပြင် ဒုတိယဝန်ကြီးနှင့်အဖွဲ့သည် ဧရာဝတီတိုင်းဒေသကြီးအတွင်း ဟင်္သာတ-ဒူးယား-ဒေါင့်ကြီး-ဇလွန်လမ်း၊ ကြိမ်ပင်ဆယ်-စက္ကော့-ဓနုဖြူ-ဇလွန်လမ်းနှင့် Oriental Highway ကုမ္ပဏီက B.O.T စနစ်ဖြင့် ဆောင်ရွက်နေသည့် ရန်ကုန်-ပုသိမ်လမ်း ပြုပြင်ထိန်းသိမ်းရေးလုပ်ငန်းများကိုလည်း ကြည့်ရှုစစ်ဆေးခဲ့ကြောင်း သိရသည်။
