ညောင်တုန်းမြို့နယ်ရှိ ကျေးရွာ(၂)ရွာတွင် လေပြင်းတိုက်ခတ်၍ နေအိမ်အချို့ပျက်စီးမှုများဖြစ်ပေါ်

ဧရာဝတီတိုင်း၊ ညောင်တုန်းမြို့နယ်တွင် ယနေ့ သြဂုတ် ၂၃ ရက်နံနက် ၅ နာရီခန့်မှစတင်ကာ လေပြင်းတိုက် ခတ်မှုများဖြစ်ပေါ်ခဲ့၍ ကျေးရွာ(၂)ရွာရှိ နေအိမ်အချို့ပျက်စီးမှုများဖြစ်ပေါ်ခဲ့ကြောင်း သိရသည်။
ညောင်တုန်းမြို့နယ်အတွင်း လေပြင်းတိုက်ခတ်မှုကြောင့် ဆားမလောက်ကျေးရွာအုပ်စု၊ ဝါးတောကျေးရွာနှင့် ကွင်းကလေးကျေးရွာတို့ရှိ နေအိမ်အချို့ ပြိုကျပျက်စီးခြင်းနှင့် အမိုးလန်ပျက်စီးခြင်းများဖြစ်ပေါ်ခဲ့ကြောင်း သိရသည်။
ထို့ကြောင့် ဆားမလောက်နယ်မြေမီးသတ်စခန်းမှတပ်ဖွဲဝင်များ၊ အရန်မီးသတ်တပ်ဖွဲဝင်များက ပျက်စီးမှုများအားဖယ်ရှားရှင်းလင်းပေးခဲ့ကြပြီးနောက် လိုအပ်သည့်ကူညီမှူများကို ဆက်လက်ပြုလုပ်ပေးလျက်ရှိကြောင်း သိရသည်။

ပြည်တွင်း/ပြည်ပခရီးသွားများ နေ့စဥ် လာရောက်လည် ပတ်နေကြသည့် ကရင်ပြည်နယ်မှ ရသေ့ပျံဂူနှင့် အလဝံအင်း

ကရင်ပြည်နယ်၊ ဘားအံမြို့နယ်၊ ရသေ့ပျံကျေးရွာအနီးရှိ ရသေ့ပျံဂူနှင့် အလဝံအင်း သည် ပြည်တွင်း/ပြည်ပခရီးသွားများ နေ့စဥ် လာရောက်လည်ပတ်လျက်ရှိသော ပြည်နယ်၏စိတ်ဝင်စားဖွယ်ကောင်းသည့် ခရီးစဥ်ဒေသတစ်ခုဖြစ်သည်။
အဆိုပါ ခရီးစဥ်ဒေသသည် မြို့ပြရှုပ်ထွေးမှုများနှင့် ကင်းဝေးသော အေးချမ်းသည့်ပတ်ဝန်းကျင်ဒေသတစ်ခုဖြစ်ကာ အလဝံအင်း အတွင်းခရီးသွားများစိတ်အေးချမ်းသာစွာသွားလာလည်ပတ်နိုင်ရေးအတွက် သဘာဝအခြေခံစက်တပ်ဝါးဖောင်ငယ်များကို စီစဥ်ပေးထားသည်။
ယင်း ခရီးစဥ်ဒေသအား ကရင်ပြည် နယ်ဝန်ကြီးချုပ်ဦးစောမြင့်ဦးက သြဂုတ် ၂၂ ရက်တွင်ကြည့်ရှုစစ်ဆေးပြီး ခရီးစဉ်ဒေသရေရှည်ဖွံ့ဖြိုးတိုးတက်ရေး၊ ခရီးသွားဧည့်သည်များစိတ်အေးချမ်းသာစွာ အင်းရေပြင်ပေါ်တွင် ဝါးဖောင်ဖြင့်အလည်အပတ်သွားရောက်ဓာတ်ပုံရို-က်ကူးနိုင်ရေး၊ ဒေသထွက်ကုန်၊ အစားအစာနှင့် အမှတ်တရပစ္စည်းရောင်းချသော ဈေးဆိုင်များစနစ်တကျဖြစ်စေရေး၊ အလဝံအင်းနှင့် ပတ်ဝန်းကျင်သန့်ရှင်းသာယာလှပစေရေး သက်ဆိုင်ရာဌာနဆိုင်ရာများ၊ ခရီးစဉ်ဒေသစီမံခန့်ခွဲရေးအဖွဲ့များနှင့် ဒေသခံများပူးပေါင်းဆောင်ရွက်ပေးကြရန်မှာကြားခဲ့သည်။
ကရင်ပြည်နယ်အတွင်း၌ ခရီးသွားကဏ္ဍဖွံ့ဖြိုးတိုးတက်ရေး၊ ပြည်တွင်း/ပြည်ပခရီးသွားများ စိတ်အေးချမ်းသာစွာလာရောက်လည်ပတ်နိုင်ရေးတို့အတွက် ခရီးစဥ်ဒေသအသစ်များကို ထပ်မံဖော်ထုတ်လျက်ရှိသည်။

ရန်ကုန်တိုင်းအစိုးရအဖွဲ့ စတုတ္ထအကြိမ်မြောက် မိုးရာသီသစ်ပင်စိုက်ပျိုးပွဲ အရိပ်ရပင်ပေါင်း(၄)သောင်းပင်ခန့်စိုက်ပျိုး

ရန်ကုန်တိုင်းအစိုးရအဖွဲ့၏ ၂၀၂၆ ခုနှစ် မိုးရာသီသစ် ပင်စိုက်ပျိုးပွဲအား ယနေ့ သြဂုတ် ၂၃ ရက်နံနက်ပိုင်းတွင် မင်္ဂလာဒုံမြို့နယ်ရှိ လှော်ကားရေဝေရေလဲဒေသ၌ စတုတ္ထအကြိမ်မြောက်အဖြစ်ပြုလုပ်ခဲ့ကြောင်း သိရသည်။
ရန်ကုန်တိုင်းဝန်ကြီးချုပ်ဦးအောင်နိုင်သူ တက်ရောက်စိုက်ပျိုးပေးခဲ့ပြီးနောက် တက်ရောက်လာကြသူများ၏ စုပေါင်းသစ်ပင်စိုက်ပျိုးနေမှုများကိုကြည့်ရှုအားပေးခဲ့ကြောင်း သိရသည်။
ရန်ကုန်တိုင်းအစိုးရအဖွဲ့၏ ၂၀၂၆ ခုနှစ်၊ မိုးရာသီသစ် ပင်စိုက်ပျိုးပွဲကို ပထမအကြိမ်အဖြစ် ဒဂုံမြို့သစ် (တောင်ပိုင်း)မြို့နယ်၊ အစိုးရနည်းပညာကောလိပ်တွင် အရိပ်ရပင်(၁,၀၀၀)ပင်၊ ဒုတိယအကြိမ်အဖြစ် မင်္ဂလာဒုံမြို့နယ် လှော်ကားရေဝေရေလဲဒေသတွင် အရိပ်ရပင် (၁၈,၉၀၀)ပင်၊ တတိယအကြိမ်အဖြစ် ရဲမွန်တပ်မြို့ ရဲမွန်ကျောင်းဝင်းတွင် အရိပ်ရပင်(၁,၂၂၃)ပင်၊ စတုတ္ထအကြိမ်အဖြစ် မင်္ဂလာဒုံမြို့နယ်၊ လှော်ကားရေဝေရေ လဲဒေသတွင် အရိပ်ရပင်(၃၇,၈၀၀)ပင်ကိုစိုက်ပျိုးခဲ့ပြီးဖြစ်ကြောင်း သိရသည်။
အဆိုပါ ကျင်းပပြီးဖြစ်သည့် မိုးရာသီသစ်ပင်စိုက်ပျိုးပွဲ (၄)ကြိမ်၌ ဧကပေါင်း(၁၁၅)ဧကတွင် အရိပ်ရပင်ပေါင်း (၅၈,၉၂၃)ပင်ကို အောင်မြင်စွာစိုက်ပျိုးခဲ့ပြီးဖြစ်ကြောင်း သိရသည်။

သောင်ရင်းမြစ်ရေ မြဝတီမြို့၏စိုးရိမ်ရေမှတ်အောက် ပြန်လည်ရောက်ရှိလာ ယာယီရေဘေးကယ်ဆယ်ရေးစခန်း(၃)ခုပိတ်သိမ်း

ပြီးခဲ့သည့် ရက်ပိုင်းအတွင်းက ကရင်ပြည်နယ်၊ မြဝတီမြို့တွင် မိုးသည်းထန်စွာရွာသွန်းပြီး သောင်ရင်းမြစ်ရေမြင့်တက်ကာ မြို့၏စိုးရိမ်ရေမှတ်အထက်ကျော်လွန်ရောက်ရှိခဲ့၍ အနိမ့်ပိုင်းရပ်ကွက်များအတွင်းရေဝင်ရောက်သဖြင့် ရေဘေးသင့်သူများကို ယာယီရေဘေးကယ်ဆယ်ရေးစခန်း(၆)ခုတွင် စောင့်ရှောက်ပေးခဲ့ရကြောင်း သိရသည်။
ယနေ့ သြဂုတ် ၂၃ ရက်တွင်မူ သောင်ရင်းမြစ်ရေသည် မြဝတီမြို့၏စိုးရိမ်ရေမှတ်အောက်သို့ပြန်လည်ကျဆင်းလာသည့်အပြင် ရေဝင်ရောက်နေသော အနိမ့်ပိုင်းရပ်ကွက်အချို့တွင်လည်း ရေများပြန်လည်ကျဆင်းလာခဲ့ရာ ယာယီရေဘေးကယ်ရေးစခန်း(၆)ခုအနက် (၃)ခုတွင်နေထိုင်သူများမှာ ၎င်းတို့၏နေအိမ်များသို့ပြန်လည်ပြောင်းရွှေ့နေထိုင်လျက်ရှိကြောင်း သိရသည်။
ထို့ကြောင့် ယာယီရေဘေးကယ်ဆယ်ရေးစခန်း(၃)ခုကိုပိတ်သိမ်းခဲ့ကာ လက်ရှိအချိန်၌ အမှတ်(၄)ရပ်ကွက်၊ တောရဘုန်းကြီးကျောင်း၊ ကြခတ်တောဘုန်းကြီးတော်ကျောင်းနှင့် အမှတ်(၅)ရပ်ကွက် ကိုးနဝင်းကျောင်းတို့ကိုသာဆက်လက်ဖွင့်လှစ်ထားပြီး ရေဘေးသင့်သူ (၁,၆၂၂)ဦးခိုလှုံနေထိုင်လျက်ရှိကြောင်း သိရသည်။

တရုတ်က Chang’e-7 လစူးစမ်းယာဉ် လွှတ်တင်မှုကို တစ်လခန့် ရွှေ့ဆိုင်း

တရုတ်နိုင်ငံသည် Chang’e-7 လ စူးစမ်းရေး အာကာသယာဉ်ကို သယ်ဆောင်သွားမည့် Long March 5 Y14 ဒုံးပျံပစ်လွှတ်မှုကို တစ်လခန့် ရွှေ့ဆိုင်းလိုက်ကြောင်း ထိုင်းနိုင်ငံ နိုင်ငံတော် နက္ခတ္တ ပညာသုတေသနဌာန(NARIT) က ယနေ့ ကြေညာခဲ့သည်။
မူလက သြဂုတ်လ ၂၅ ရက်နေ့တွင် လွှတ်တင်ရန် စီစဉ်ထားခြင်းဖြစ်သည်။
ထိုရွှေ့ဆိုင်းမှုသည် တရုတ်အာကာသယာဉ်တွင် သယ်ဆောင်မည့် ထိုင်းနိုင်ငံ၏ CE-7 MATCH သိပ္ပံကိရိယာနှင့် မသက်ဆိုင်ကြောင်းနှင့် ကိရိယာသည် မစ်ရှင်အတွက် အပြည့်အဝပြင်ဆင်ထားပြီးဖြစ်ကြောင်း NARIT က ပြောကြားခဲ့သည်။
တရားဝင်အတည်ပြုချက်ရရှိသည်နှင့် လွှတ်တင်မည့်ရက်စွဲနှင့် အချိန်အသစ်ကို ကြေညာပေးမည်ဟု NARIT က ဆက်လက်ပြောကြားခဲ့သည်။
Chang’e-7 သည် တရုတ်၏ လစူးစမ်းရေး အစီအစဉ်အတွက် နောက်ထပ် အဓိကမစ်ရှင်တစ်ခုဖြစ်ပြီး လ၏ တောင်ဝင်ရိုးစွန်းဒေသ၊ အထူးသဖြင့် ရေခဲများရှိနိုင်သည့် အစဉ်သဖြင့် အရိပ်ကျနေသော နေရာများကို စူးစမ်းလေ့လာရန် ရည်ရွယ်ကာဒီဇိုင်းပုံထုတ်ထားသည်။
မစ်ရှင်တွင် လ၏ ပတ်ဝန်းကျင်နှင့် အရင်းအမြစ်များကို စူးစမ်းလေ့လာရန် လပတ်ယာဉ်၊ လဆင်းယာဉ်၊ လသွားယာဉ်နှင့် လစူးစမ်းရေးယာဉ်တို့ ပါဝင်သည်။
၎င်းသည် လ၏ ဝေးလံသောဘက်ခြမ်းမှ နမူနာများကို ပြန်လည်ပေးပို့ခဲ့သည့် ပထမဆုံးမစ်ရှင်ဖြစ်သော ၂၀၂၄ ခုနှစ် Chang’e-6 မစ်ရှင်၏ နောက်ဆက်တွဲဖြစ်သည်။ Chang’e-7 သည် ၂၀၃၀ ပြည့်နှစ်မတိုင်မီ လပေါ်သို့ လူလိုက်ပါသောမစ်ရှင် ဆင်းသက်ရန် ရည်ရွယ်ထားသည့် တရုတ်နိုင်ငံ၏ ပိုမိုကျယ်ပြန့်သော အစီအစဉ်၏ တစ်စိတ်တစ်ပိုင်းဖြစ်သည်။
Long March 5 Y14 သည် Chang’e-7 ကို လသို့ စေလွှတ်မည့် အကြီးစားသယ်ဆောင်ရေး ဒုံးပျံဖြစ်သည်။
၎င်း၏ အဓိကအခန်းကဏ္ဍမှာ အာကာသယာဉ်ကို အာကာသအတွင်းသို့ သယ်ဆောင်ပြီး ကမ္ဘာ-လ လွှဲပြောင်းလမ်းကြောင်းပေါ်တွင် ထားရှိရန်ဖြစ်ကာ ထို့နောက်တွင် CE-7 MATCH သိပ္ပံကိရိယာကို သယ်ဆောင်ထားသော Chang’e-7 သည် ၎င်း၏ ကိုယ်ပိုင်တွန်းကန်အားဖြင့် ခရီးဆက်နှင်မည်ဖြစ်သည်။

ပါကစ္စတန်စစ်တပ်အကြီးအကဲ အီရန်သို့ သွားရောက်မည်

ပါကစ္စတန်စစ်တပ်အကြီးအကဲ ဖီးလ်မာရှယ် အာဆင်း မူနီယာ (Asim Munir) သည် တနင်္လာနေ့တွင် အီရန်နိုင်ငံ မြို့တော် တေရန်သို့ သွားရောက်မည်ဖြစ်ကြောင်း အီရန်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ အက်စ်မေးလ် ဘာကွာအီ (Esmaeil Baghaei) က တနင်္ဂနွေနေ့တွင် ပြောကြားခဲ့သည်။
မူနီယာ ဦးဆောင်သည့် ကိုယ်စားလှယ်အဖွဲ့၏ ယခုခရီးစဉ်သည် ပါကစ္စတန်နှင့် အီရန်နိုင်ငံတို့အကြား ပူးပေါင်းဆောင်ရွက်မှု ပိုမိုတိုးမြှင့်ရန်နှင့် ဒေသတွင်း ငြိမ်းချမ်းရေးနှင့် လုံခြုံရေး ခိုင်မာစေရန် ရည်ရွယ်ကြောင်း ဘာကွာအီ၏ ပြောကြားချက်ကို ကိုးကား၍ အီရန်နိုင်ငံပိုင်သတင်းဌာန IRNA က ဖော်ပြသည်။
ခရီးစဉ်အတွင်း မူနီယာသည် အီရန်အစိုးရ အကြီးတန်းတာဝန်ရှိသူများနှင့် တွေ့ဆုံကာ နှစ်နိုင်ငံဆက်ဆံရေး၊ ဒေသတွင်း လုံခြုံရေးနှင့် သက်ဆိုင်ရာကိစ္စရပ်များကို ဆွေးနွေးသွားမည်ဖြစ်ကြောင်း သိရသည်။
ပါကစ္စတန်သည် အီရန်နှင့် အမေရိကန်တို့အကြား တင်းမာမှုများ ဖြစ်ပေါ်နေစဉ်ကာလအတွင်း နှစ်ဖက်စလုံးနှင့် နီးကပ်စွာ ဆက်သွယ်ကာ ကြားဝင်စေ့စပ်ရေး အခန်းကဏ္ဍမှ ပါဝင်ဆောင်ရွက်ခဲ့သည်။

အမေရိကန်ရဲ့ ပိတ်ဆို့အရေးယူမှုတွေဆိုတာဟာ အခါခါကြည့်ဖူးနေတဲ့ ရုပ်ရှင်ကားဟောင်းတစ်ကားလိုပါပဲလို့ အီရန် နိုင်ငံခြားရေးဝန်ကြီးပြောကြား

​အမေရိကန်သမ္မတ ဒေါ်နယ်ထရမ့်ရဲ့ ပိတ်ဆို့အရေးယူမှုအသစ်တွေဆိုတာဟာ ခဏခဏကြည့်ဖူးနေတဲ့ ရုပ်ရှင်ကားဟောင်းတစ်ကားလိုပဲလို့ အီရန်နိုင်ငံခြားရေးဝန်ကြီး အဘတ်စ် အာရက်ချီက ပြောလိုက်ပြီး၊ ဒီဒဏ်တွေကို ဘယ်လိုကြံ့ကြံ့ခံရမလဲဆိုတာ အီရန်က ကောင်းကောင်းသိတယ်လို့လည်း အသေအချုပြောပါတယ်။
​Jamaran သတင်းဌာနနဲ့ အင်တာဗျူးမှာ သူက "ထရမ့်ပြောနေတဲ့ စီးပွားရေးပိတ်ဆို့မှုတွေဆိုတာ ထပ်ခါတလဲလဲ ဖြစ်နေကျ ဇာတ်လမ်းတစ်ခုပါပဲ၊ အားလုံးနဲ့ ရင်းနှီးပြီးသား အမေရိကန်နိုင်ငံရေးရဲ့ ရိုင်းစိုင်းမှုမျိုးပါပဲ။ အနှစ်ချုပ်ပြောရရင်တော့ ဒါဟာ ကျွန်တော်တို့ အခါခါကြည့်ဖူးပြီးသား ရုပ်ရှင်တစ်ကားဖြစ်ပြီး ဒါကို ဘယ်လိုကိုင်တွယ်ဖြေရှင်းရမလဲဆိုတာ ကျွန်တော်တို့ သိပါတယ်" လို့ ပြောခဲ့တာပါ။
​အီရန်ဝန်ကြီးရဲ့ အဆိုအရ အမေရိကန်ရဲ့ အီရန်ဆန့်ကျင်ရေး လမ်းစဉ်သစ်ဟာ အရင်ကြိုးပမ်းမှုတွေလိုပဲ ကျရှုံးဖို့ သေချာနေပါတယ်တဲ့။ သူတို့ ဘယ်လောက်တောင် အကြပ်ရိုက်နေလဲဆိုတာကို ဝါရှင်တန်ရဲ့ လုပ်ရပ်တွေက ပြသနေပြီး၊ လက်ရှိအခြေအနေကနေ ထွက်ပေါက်ရဖို့ တစ်ခုတည်းသော နည်းလမ်းကတော့ "အီရန်ပြည်သူတွေနဲ့ လေးလေးစားစား ဆွေးနွေးတိုင်ပင်တာ" ပဲ ဖြစ်တယ်လို့ သူက မှတ်ချက်ပြုခဲ့ပါတယ်။
​အစောပိုင်းတုန်းကတော့ ထရမ့်က အီရန်အပေါ် "အရင်ကမရှိဖူးတဲ့ အတိုင်းအတာမျိုးနဲ့ စီးပွားရေးစစ်ပွဲဆင်နွှဲပြီး အထီးကျန်ဖြစ်အောင် လုပ်မယ်" လို့ ကြေညာခဲ့ပါသေးတယ်။ အီရန်ကို ထောက်ပံ့ပေးတဲ့ ဘဏ္ဍာရေးအဖွဲ့အစည်းတွေ၊ စီးပွားရေးလုပ်ငန်းတွေ၊ လေဆိပ်တွေ ဒါမှမဟုတ် အစိုးရအေဂျင်စီတွေရှိတဲ့ နိုင်ငံတွေအနေနဲ့ ဝါရှင်တန်ဆီကနေ ပြင်းထန်တဲ့ စီးပွားရေးဆိုင်ရာ အကျိုးဆက်တွေ ရင်ဆိုင်ရလိမ့်မယ်လို့လည်း အမေရိကန်ခေါင်းဆောင်က သတိပေးခဲ့ပါတယ်။
​ဒီလုပ်ရပ်အပြီးမှာတော့ အီရန်နိုင်ငံခြားရေးဝန်ကြီးဌာနက အီရန်အပေါ်ထားရှိတဲ့ အမေရိကန်ရဲ့ စီးပွားရေးမူဝါဒကို "စီးပွားရေးအရ အကြမ်းဖက်မှုနဲ့ လူသားမျိုးနွယ်အပေါ် ကျူးလွန်တဲ့ ရာဇဝတ်မှု" လို့ ပြင်းပြင်းထန်ထန် ဝေဖန်ခဲ့ပါတယ်။ "အမေရိကန်အစိုးရ၊ ပိတ်ဆို့မှုအစီအစဉ်တွေကို ရေးဆွဲခဲ့သူတွေနဲ့ အကောင်အထည်ဖော်နေသူတွေကို ထိုက်တန်တဲ့ ပြစ်ဒဏ်ပေးရမယ်" လို့လည်း အီရန်နိုင်ငံခြားရေးဝန်ကြီးဌာနက ထုတ်ပြန်ခဲ့ပါသေးတယ်။

ရန်ကုန်တိုင်း အိမ်တွင်းစက်မှုလက်မှုလုပ်ငန်းဥပဒေကို ပြင်ဆင်သည့်ဥပဒေကြမ်းကို ရန်ကုန်တိုင်းလွှတ်တော် ၌ဆွေးနွေးမည်

တတိယအကြိမ် ရန်ကုန်တိုင်းဒေသကြီးလွှတ်တော် တတိယပုံမှန်အစည်းအဝေး(သတ္တမနေ့)ကို မနက်ဖြန် သြဂုတ် ၂၄ ရက်နံနက် ၁၀ နာရီတွင်ကျင်းပမည်ဖြစ်ပြီး ရန် ကုန်တိုင်း အိမ်တွင်းစက်မှုလက်မှုလုပ်ငန်းဥပဒေကို ပြင်ဆင်သည့်ဥပဒေကြမ်းအား ဆွေးနွေးသွားမည်ဖြစ်ကြောင်း သိရသည်။
အဆိုပါ ဥပဒေကြမ်းအား လှိုင်မြို့နယ်ကိုယ်စားလှယ်အမှတ်(၂)ဦးစံကျော် ကဆွေးနွေးသွားမည်ဖြစ်ပြီး အ စည်းအဝေးတွင် သာကေတမြို့နယ်ကိုယ်စားလှယ်အ မှတ်(၂)ဦးလှဝင်းမောင်၏ ရန်ကုန်တိုင်းရှိ နိုင်ငံခြားသားများအနက် ဗီဇာစည်းကမ်းချိုးဖောက်နေသော နိုင်ငံခြားသားများနှင့်ပတ်သက်သည့် ကြယ်ပွင့်ပြမေးခွန်းကို မေးမြန်းသွားမည်ဖြစ်ကြောင်း သိရသည်။
ထို့ပြင် ကျောက်တံတားမြို့နယ်ကိုယ်စားလှယ်အမှတ် (၂)ဦးကျော်မင်းထက်၊ သုံးခွမြို့နယ်ကိုယ်စားလှယ်အ မှတ်(၁)ဒေါ်ခင်မြတ်စု၊ တောင်ဥက္ကလာပမြို့နယ် ကိုယ်စားလှယ်အမှတ်(၁)ဦးအောင်ကျော်မိုး၊ မှော်ဘီမြို့နယ်ကိုယ်စားလှယ်အမှတ်(၁)ဦးကြည်မြင့်တို့ကလည်း ကြယ်ပွင့်ပြမေးခွန်းများကိုမေးမြန်းသွားကြမည်ဖြစ်ကြောင်း သိရသည်။
ထို့အတူ မှော်ဘီမြို့နယ်ကိုယ်စားလှယ်အမှတ်(၂)ဦးကျော်လင်းဇော်၊ ကွမ်းခြံကုန်းမြို့နယ်ကိုယ်စားလှယ်အ မှတ်(၁)ဦးတင်လင်း၊ မင်္ဂလာဒုံမြို့နယ်ကိုယ်စားလှယ်အ မှတ်(၁)ဦးမျိုးမင်းနိုင်၊ ဒလမြို့နယ်ကိုယ်စားလှယ်အ မှတ်(၂)ဦးသန်းဦး၊ မင်္ဂလာဒုံမြို့နယ်ကိုယ်စားလှယ်အ မှတ်(၂)ဒေါ်လေးလေးမြင့်၊ မင်္ဂလာတောင်ညွန့်မြို့နယ်ကိုယ်စားလှယ်အမှတ်(၂)ဦးဝေယံပိုင်တို့ကလည်း ကြယ်ပွင့်မေးခွန်းများကိုမေးမြန်းသွားကြမည်ဖြစ်ကြောင်း သိရသည်။

မူးမြစ်ရေကြီးမှုကြောင့်ပျက်စီးခဲ့ရသည့် မန္တလေး-စစ်ကိုင်း-မုံရွာသွားကားလမ်းမကြီးအားပြုပြင်နေ

စစ်ကိုင်းတိုင်းတွင် ပြီးခဲ့သည့်ရက်ပိုင်းအတွင်းက မိုးများအဆက်မပြတ်ရွာသွန်းမှုကြောင့် မူးမြစ်ရေကြီး၍ ပျက်စီးမှုများဖြစ်ပေါ်ခဲ့သော မန္တလေး-စစ်ကိုင်း-မုံရွာသွကားကားလမ်းမကြီးအား ရေပြန်လည်ကျဆင်းသွားချိန်တွင် စစ်ကိုင်းခရိုင်လမ်းဦးစီးဌာန၏ကြီးကြပ်မှုဖြင့် ရွှေတောင်ဟိုက်ဝေးကုမ္ပဏီက ပြန်လည်ပြုပြင်လျက်ရှိ‌ကြောင်း သိရသည်။
ယင်း လမ်းမကြီး၏ မိုင်တိုင်အမှတ် ၂၅/၁ မှ ၂၅/၂ ကြား ဘယ်ဘက်ခြမ်းတွင် (၄၉၈)စတုရန်းပေ၊ ညာ ဘက်ခြမ်းတွင် (၁၅,၈၄၀)စတုရန်းပေနှင့် မိုင်တိုင် ၂၅/၅ မှ ၂၅/၆ ကြား ဘယ်ဘက်ခြမ်းတွင် (၃၈၀)စတုရန်းပေ လမ်းပိုင်းပျက်စီးမှုအားကျောက်အရွယ်စုံဖြင့်ပြန်လည်ဖြည့်ခင်းခဲ့ကြောင်း သိရသည်။
ထို့ပြင် မိုင်တိုင်အမှန် ၂၃/၂ မှ ၂၆/၀ ကြား လမ်းမျက် နှာပြင် အပွန်းခံလွှာ (၁,၀၅၁)ပေ ပျက်စီးခြင်းအား ကြို တင်ရောကတ္တရာဖြင့် လမ်းပေါက်ဖာခြင်းမှာပြီးစီးပြီဖြစ်၍ ကျန်ရှိသော ပြုပြင်ဆောင်ရွက်ရမည်များကိုလည်း အမြန်ဆုံးပြီးစီးရန် ဆက်လက်ဆောင်ရွက်လျက်ရှိကြောင်း သိရသည်။
မူးမြစ်ရေကြီးမှုကြောင့် မန္တလေး-စစ်ကိုင်း-မုံရွာသွားကားလမ်းမကြီးပေါ်ရှိ မိုင်တိုင်အမှတ် ၂၃/၂ မှ ၂၆/၀ ကြားရှိ ညောင်ပင်ဝန်းကျေးရွာဝန်းကျင်၌မြစ်ရေများ ကားလမ်းမကြီးအထက် (၂)ပေခန့်အထိမြင့်တက် တိုက်စားမှုကြောင့် လမ်းမျက်နှာပြင်အပွန်းခံလွှာ (၁၃,၂၀၀)ပေပျက်စီးခဲ့ကြောင်း သိရသည်။

လေးမျက်နှာမြို့နယ်ရေဘေး လာရောက်ကူညီသူများ၊ အလှူရှင်များအခက်အခဲမရှိစေရန် လမ်းညွှန်လက်ကမ်းစာစောင်များဖြန့်ဝေပေး

ဧရာဝတီတိုင်း၊ လေးမျက်နှာမြို့နယ်အပါအဝင် မြို့နယ်အချို့တွင်ဖြစ်ပေါ်နေသာ ရေကြီးရေလျှံမှုဖြစ်စဥ်အား လာရောက်ကူညီပေးသည့် လူမှုကူညီရေးအသင်းများ၊ အလှူရှင်များ အခက်အခဲမရှိစေရန် လမ်းညွှန်လက်ကမ်းစာစောင်များကိုဖြန့်ဝေပေးလျက်ရှိကြောင်း သိရသည်။
ကုန်းလမ်း၊ ရေလမ်းခရီးစဉ်များတွင် အခက်အခဲမရှိစေရန် Information Centre များမှ လမ်းညွှန်မြေပုံများ၊ ဆက်သွယ်ရမည့် ဖုန်းနံပတ်များပါဝင်သည့် လမ်းညွှန်လက်ကမ်းစာစောင်များကိုဖြန့်ဝေပေးလျက်ရှိပြီး သွားလာရေးအခက်အခဲမရှိစေရန်နှင့် လုံခြုံချောမွေ့စွာရောက်ရှိစေရန်တို့အတွက် နယ်မြေကွပ်ကဲရေးအဖွဲ့များကလည်း စက်လှေများ၊ ပရဟိတအဖွဲ့များဖြင့် ကူညီဆောင်ရွက်ပေးလျက်ရှိ‌ကြောင်း သိရသည်။
ထို့ပြင် လေးမျက်နှာဒေသခံများ စက်လှေစီးနှင်းစဉ် အသက်အန္တရာယ်ကင်းရှင်း‌​စေရေးအတွက် Life Jecket များကိုလည်း တာဝန်ရှိသူများကထုတ်ပေးလျက်ရှိကြောင်း သိရသည်။