တရုတ်သို့ မြန်မာ့ဒူးရင်းသီး တင်ပို့နိုင်ရေး GACC တွင် မှတ်ပုံတင်မည်

မြန်မာ့ဒူးရင်းသီးမှာ ပြည်တွင်းစားသုံးမှုအပေါ် အဓိကမှီခိုနေရသော်လည်း ယခုနှစ်အတွင်း ပြည်ပဈေးကွက်သို့ အများအပြား တင်ပို့နိုင်ရန် ကြိုးပမ်းနေ
ကမ္ဘာ့ဒူးရင်းသီး ဝယ်လိုအားအမြင့်ဆုံးရှိသည့် တရုတ်နိုင်ငံသို့ မြန်မာ့ဒူးရင်းသီးများ တင်ပို့နိုင်ရေးအတွက် တရုတ်အကောက်ခွန်အထွေထွေ အုပ်ချုပ်မှုအာဏာပိုင်အဖွဲ့ (GACC) တွင် မှတ်ပုံတင်နိုင်ရေး ဆောင်ရွက်သွားမည်ဖြစ်ကြောင်း စိုက်ပျိုးရေးဦးစီးဌာနမှ သိရသည်။
မေလ ၁၉ ရက်တွင် ကျင်းပပြုလုပ်ခဲ့သည့် “မြန်မာ့ဒူးရင်းသီးပွဲတော် ၂၀၂၆” အခမ်းအနား၌ စိုက်ပျိုးရေးဦးစီးဌာန ညွှန်ကြားရေးမှူးချုပ်က မြန်မာ-တရုတ် ချစ်ကြည်ရေးလမ်းကြောင်းများ ပိုမိုဖွံ့ဖြိုးလာမှုနှင့်အတူ တရုတ်ဒူးရင်းသီးဈေးကွက်တွင် ဝေစုရရှိနိုင်ရေး ရည်မှန်း၍ ဆောင်ရွက်နေကြောင်း ပြောကြားခဲ့သည်။
လက်ရှိတွင် မြန်မာ့ဒူးရင်းသီးဈေးကွက်မှာ ပြည်တွင်းစားသုံးမှုအပေါ် အဓိကမှီခိုနေရသော်လည်း ၂၀၂၆-၂၀၂၇ ဘဏ္ဍာနှစ်အတွင်း ပြည်ပဈေးကွက်သို့ အများအပြား တင်ပို့နိုင်ရန် ကြိုးပမ်းနေကြောင်းလည်း သိရသည်။
အာဆီယံဒေသတွင်းတွင် ထိုင်း၊ မလေးရှားနှင့် ဗီယက်နမ်နိုင်ငံများက ဒူးရင်းသီးစိုက်ပျိုးထုတ်လုပ်မှုနှင့် ဈေးကွက်ဦးဆောင်မှုများ ရရှိထားပြီး မြန်မာနိုင်ငံအနေဖြင့်လည်း စိုက်ပျိုးထုတ်လုပ်မှု တိုးချဲ့ခြင်းနှင့် ဈေးကွက်သစ် ဖော်ဆောင်ခြင်းများကို အရှိန်မြှင့် ဆောင်ရွက်လျက်ရှိကြောင်း သိရသည်။
မြန်မာ့ဒူးရင်းသီးများကို မွန်ပြည်နယ်၊ ကရင်ပြည်နယ်နှင့် တနင်္သာရီဒေသများတွင် အဓိက စိုက်ပျိုးကြပြီး မေ၊ ဇွန်နှင့် ဇူလိုင်လများသည် ဒူးရင်းသီး အများဆုံးထွက်ရှိသည့် ကာလများဖြစ်သည်။
ယခုနှစ်တွင် ဒူးရင်းသီးတစ်ကီလိုလျှင် ကျပ် ၄၀,၀၀၀ အထိ ဈေးနှုန်းရရှိနေပြီး အလုံးကြီးများမှာ တစ်လုံးလျှင် ကျပ်နှစ်သိန်းကျော်အထိ ရောင်းချနိုင်ကြောင်း ဈေးကွက်အတွင်းမှ သိရသည်။

မလေးရှားက နော်ဝေထံမှ လျော်ကြေး ဒေါ်လာသန်း ၂၅၀ ကျော် တောင်း

မလေးရှားတို-က်ခိုက်ရေးသင်္ဘောများအတွက် ရည်ရွယ်ထားသော ရေတပ်တို-က်ခိုက်ရေးဒုံးကျည်စနစ်အတွက် ပို့ကုန် သဘောတူ အတည်ပြုချက်များကို အော်စလိုက ရုတ်တရက် ဖျ-က်သိမ်းခဲ့ပြီးနောက် ရင်းဂစ် ၁ ဘီလျံ(ဒေါ်လာ ၂၅၁ ဒဿမ ၇၆ သန်း) ကျော် လျော်ကြေးပေးရန် နော်ဝေသို့ အကြောင်းကြားစာနို့တစ် ပေးပို့ခဲ့ကြောင်း မလေးရှားကာကွယ်ရေးဝန်ကြီးက အင်္ဂါနေ့တွင် ပြောကြားခဲ့သည်။
အော်စလို၏ ပို့ကုန်ထိန်းချုပ်မှုစည်းမျဉ်း စည်းကမ်းများတွင် အပြောင်းအလဲတစ်ခုကြောင့် မလေးရှားသို့ သီးခြားကာကွယ်ရေးနည်းပညာတင်ပို့မှု လိုင်စင်အချို့ကို ရုပ်သိမ်းခဲ့ကြောင်း နော်ဝေက ပြောကြားခဲ့သည်။ ယင်းဆုံးဖြတ်ချက်သည် မလေးရှားကို အံ့အားသင့်စေခဲ့ပြီး သံတမန်ရေးအငြင်းပွားမှုကို ဖြစ်စေခဲ့ကာ အဆိုပါလုပ်ရပ်သည် တစ်ဖက်သတ်ဆန်သော လက်မခံနိုင်စရာလုပ်ရပ်ဟု ဝန်ကြီးချုပ် အန်ဝါအီဘရာဟင်က မှတ်ချက်ပြုခဲ့သည်။
အစိုးရအနေဖြင့် တို-က်ရို-က်နှင့် သွယ်ဝိုက် ကုန်ကျစရိတ်နှစ်မျိုးစလုံးအတွက် လျော်ကြေးတောင်းခံမည်ဖြစ်ကြောင်း ကာကွယ်ရေးဝန်ကြီး မိုဟာမက် ခါလက်နော်ဒင်က ပြောကြားခဲ့ပြီး မလေးရှားသည် ဒုံးကျည်စနစ်များအတွက် စာချုပ်တန်ဖိုး၏ ၉၅ ရာခိုင်နှုန်း သို့မဟုတ် ဒေါ်လာ ၁၄၆ ဒဿမ ၆၆ သန်းခန့်ကို ပေးချေပြီးဖြစ်ကြောင်း ၎င်းက ဆက်လက်ပြောကြားခဲ့သည်။
ထို့အပြင် မလေးရှားသည် နော်ဝေလုပ်ဒုံးကျည်များ ကိုထားရှိရန်အတွက် သင်္ဘောများပေါ်ရှိ ပစ္စည်းကိရိယာများ ဖြုတ်တပ်ခြင်းနှင့် အစားထိုးခြင်း ကုန်ကျစရိတ်အပြင် ပြန်လည်လေ့ကျင့်ပေးသည့် ဝန်ထမ်းများအတွက် ကုန်ကျစရိတ်များကိုပါ ကာမိစေရန်အတွက် ထပ်တိုးပျ-က်စီးဆုံးရှုံးမှုများကိုလည်း တောင်းဆိုမည်ဖြစ်ကြောင်း ၎င်းက သတင်းထောက်များကို ပြောကြားခဲ့သည်။
နော်ဝေ၏ ဆုံးဖြတ်ချက်သည် နိုင်ငံတကာ ကာကွယ်ရေးမိတ်ဖက်များ၊ အထူးသဖြင့် အနောက်နိုင်ငံများ သို့မဟုတ် နေတိုးနိုင်ငံများအနေဖြင့် ၎င်းတို့၏ ယုံကြည်စိတ်ချရမှုနှင့် ပတ်သက်၍ မေးခွန်းထုတ်စရာများ ဖြစ်ပေါ်စေခဲ့သည်ဟု မိုဟာမက်ခါလက်က ပြောကြားခဲ့သည်။
မိမိတို့နှင့် ဖြစ်ပျက်ခဲ့သည်မှာ ကာကွယ်ရေး အရောင်းအဝယ်ပြဿနာတစ်ခုမျှသာမဟုတ်ဘဲ ၎င်းသည် ပိုမိုကြီးမားသော ပြဿနာတစ်ခုကို ထင်ဟပ်ကြောင်း၊ ဆိုလိုသည်မှာ နိုင်ငံတကာဆက်ဆံရေးတွင် ယုံကြည်မှု ယိုယွင်းလာခြင်းဖြစ်ကြောင်း ၎င်းက ဆက်လက်ပြောကြားခဲ့သည်။
မလေးရှား၏ လျော်ကြေးတောင်းဆိုမှုအပေါ် မှတ်ချက်ပေးရန် တောင်းဆိုချက်ကို နော်ဝေနိုင်ငံခြားရေးဝန်ကြီးဌာနက လတ်တလောတွင် တုန့်ပြန်ဖြေကြားခဲ့ခြင်း မရှိပေ။

မောင်မောင်လွင်ကို မြန်မာ့လက်ရွေးစင်အသင်းနှင့်အတူ နိုင်ငံတကာ ပြိုင်ပွဲများတွင် ကစားခွင့် MFF ပြန်ခွင့်ပြု

လက်ရွေးစင်ကစားသမားအဖြစ်မှ အနားယူပြီးနောက်မြန်မာအသင်းအတွက် ပြန်လည်ကိုယ်စားပြုကစားလိုကြောင်း မောင်မောင်လွင်က ဘောလုံးအဖွဲ့ချုပ်ထံ မေတ္တာရပ်ခံစာတင်ပြမှုကို ခွင့်ပြုခဲ့ကြောင်း သိရသည်။
MFF ထုတ်ပြန်ချက်၌ မောင်မောင်လွင်ကို လက်ရွေးစင်အသင်းတွင် ဆက်လက်ကစားခွင့်ပြုခဲ့ပြီး စည်းကမ်း ထိန်းသိမ်းရေးကော်မတီ၏ ဆုံးဖြတ်ချက်အရ (၆) လကြာ ကွင်းပိတ်ပြစ်ဒ-ဏ်ကို ၂၀၂၆ ခုနှစ်၊ ဇွန်လ (၁)ရက်တွင် ရုတ်သိမ်းပေးမည်ဟု ဆိုသည်။
မောင်မောင်လွင်သည် အသက်(၁၉)နှစ်အောက် အမျိုးသားလက်ရွေးစင်အသင်းမှစတင်၍ မြန်မာ့လက်ရွေးစင် အသင်းအတွက် နိုင်ငံတကာပြိုင်ပွဲများ၊ ကမ္ဘာ့ဖလားခြေစစ်ပွဲများတွင် ကြိုးစားအားထုတ်ခဲ့ခြင်း၊ လက်ရွေးစင်အသင်းခေါ်ယူမှုများတွင် ပျက်ကွက်ခြင်းမရှိဘဲ ပြည်တွင်း/ပြည်ပ နိုင်ငံတ ကာပွဲပေါင်း (၇၆) ပွဲ စွမ်းစွမ်းတမံ ပါဝင်ကစားပေးခဲ့ခြင်း၊ လက်ရှိတွင်လည်း မြန်မာ့လက်ရွေးစင်အသင်း၏ အ သင်းခေါင်းဆောင်အဖြစ် တာဝန်ယူကာ မျိုးဆက်သစ်ကစားသမားများနှင့်အတူ အောင်မြင်မှုရရန် ကြိုးပမ်းနေခြင်းနှင့် ကစားသမားကိုယ်တိုင် အမှားကိုသိရှိပြီး တောင်းပန်ခဲ့ခြင်းတို့ကြောင့် ယခုကဲ့သို့ ပြန်လည်ခွင့်ပြုခဲ့ခြင်းဖြစ်သည်ဟု ဆိုသ ည်။
သို့သော် အလားတူ ဖြစ်စဉ်မျိုး နောက်ထပ်တစ်ကြိမ် ထပ်မံကျူးလွန်ပါက ယခုထက် ပိုမိုပြင်းထန်သော ပြစ်ဒဏ်များဖြင့် အရေးယူခံရမည်ဖြစ်ကြောင်း ပြောင်းလဲသတ်မှတ်လိုက်သည်ဟု ဆိုသည်။
အဆိုပါ ဆုံးဖြတ်ချက်အား မြန်မာနိုင်ငံဘောလုံးအဖွဲ့ချုပ် အယူခံကော်မတီမှ မေလ (၁၅) ရက်စွဲဖြင့် ရန်ကုန်ယူနိုက်တက်အသင်း အမှုဆောင်အရာရှိချုပ်ထံသို့ တရားဝင် အကြောင်းကြားစာ ပေးပို့ထားပြီးဖြစ်သည်ဟုလည်း သိရသည်။

လိုင်စင်မရှိဘဲ Digital Bank အပါအဝင် ငွေရေးကြေးရေးအဖွဲ့အစည်းများထူထောင်လုပ်ကိုင်ပါက အရေးယူမည်

ဗဟိုဘဏ်၏ ဘဏ်လုပ်ငန်းဆောင်ရွက်ရန်လိုင်စင်ထုတ်ပေးထားခြင်းမရှိဘဲ Digital Bank အပါအဝင် ဘဏ်နှင့် ဘဏ်မဟုတ်သော ငွေရေးကြေးရေးအဖွဲ့အစည်းများထူထောင်လုပ်ကိုင်ပါက ပုဒ်မ ၁၇၁ အရအရေးယူမည်ဖြစ်ကြောင်း ဗဟိုဘဏ်ကအသိပေးခဲ့သည်။
ဗဟိုဘဏ်သည် ပြည်ထောင်စုလွှတ်တော်ကပြဌာန်းခဲ့သည့် ဗဟိုဘဏ်ဥပဒေနှင့် ငွေရေးကြေးရေးအဖွဲ့အ စည်းများဥပဒေတို့ပါပြဋ္ဌာန်းချက်များနှင့်အညီဖွဲ့စည်းတည်ထောင်သည့် ဘဏ်နှင့်ဘဏ်မဟုတ်သော ငွေရေးကြေးရေးအဖွဲ့အစည်းများအား ဘဏ်လုပ်ငန်းလုပ်ကိုင်ခွင့်လိုင်စင်နှင့် ဘဏ်မဟုတ်သော ငွေရေးကြေးရေးအဖွဲ့အစည်း လုပ်ကိုင်ခွင့်လက်မှတ်များထုတ်ပေးလျက်ရှိသည်။
ထိုသို့ ထုတ်ပေးပြီးနောက် ယင်း အဖွဲ့အစည်းများအား စည်းမျဉ်းစည်းကမ်းချမှတ်၍ ကြပ်မတ်ကွပ်ကွဲခြင်းနှင့် ကြီးကြပ်စစ်ဆေးခြင်းတို့ကိုဆောင်ရွက်လျက်ရှိပြီး လုပ်ငန်းလုပ်ကိုင်ခွင့်ပြုထားသော ဘဏ်နှင့် ဘဏ်မဟုတ်သောငွေရေးကြေးရေးအဖွဲ့အစည်းများအမည်စာရင်းကို ဗဟိုဘဏ်၏ Website www.cbm.gov.mm တွင် ထုတ်ပြန်ကြေညာထားသည်။
ထို့အတူ ငွေရေးကြေးရေးအဖွဲ့အစည်းများဥပဒေပုဒ်မ ၁၅၈ တွင် မည်သူမျှလိုင်စင်မရှိဘဲ Digital Bank အပါအဝင် ဘဏ်နှင့် ဘဏ်မဟုတ်သော ငွေရေးကြေးရေးအဖွဲ့အစည်းများထူထောင်လုပ်ကိုင်ခြင်းမပြုရဟုတားမြစ်ထားသည်။
လူမှုကွန်ယက်စာမျက်နှာများပေါ်၌ ကြော်ငြာလျက်ရှိသော Digital Bank အပါအဝင်အဖွဲ့အစည်းများသည် ဗဟိုဘဏ်ကဘဏ်လုပ်ငန်းဆောင်ရွက်ရန် လိုင်စင်ထုတ်ပေးထားခြင်းမရှိ၍ မလိုလားအပ်သောဆုံးရှုံးနစ် နာမှုများမရှိစေရေးအတွက် ယင်းအဖွဲ့အစည်းများနှင့်ဆက်သွယ်ဆောင်ရွက်ခြင်းမပြုရန်လည်း ဗဟိုဘဏ်ကအသိပေးခဲ့သည်။

မိုင်းဖုန်း(က)ကျေးရွာအုပ်စုမှ ကျေးရွာများနှင့် နမ့်လွဲ (ရွာသစ်)ကျေးရွာ(၄)ရွာတွင် ၂၄ နာရီ လျှပ်စစ်ဓာတ်အားအသုံးပြုနိုင်ပြီ

ရှမ်းပြည်နယ်၊ တာချီလိတ်မြို့နယ်၊ မိုင်းဖုန်း(က)ကျေး ရွာအုပ်စု၊ ပိန်းညောင်(၁၊ ၂၊ ၃)ကျေးရွာများနှင့် နမ့်လွဲ (ရွာသစ်)ကျေးရွာ(၄)ရွာ၌နေထိုင်သူများ ၂၄ နာရီလုံး လျှပ်စစ်ဓာတ်အားအသုံးပြုနိုင်ပြီဖြစ်ကြောင်း မြို့မီးလင်းရေးဦးဆောင်ကော်မတီ(လျှပ်စစ်ဓာတ်အားဖြန့် ဖြူးရေးလုပ်ငန်း)ထံမှ သိရသည်။
ထိုသို့ အသုံးပြုနိုင်ရန် ၂၂-ကေဗွီ ဓာတ်အားလိုင်းနှင့် ထရန်စဖော်မာများကို ရှမ်းပြည်နယ်အစိုးရအဖွဲ့၏ ၂၀၁၈-၂၀၁၉ ဘဏ္ဍာရေးနှစ်ခွင့်ပြုရန်ပုံငွေဖြင့်ဆောင်ရွက်ခဲ့ရာမှ ယနေ့ မေ ၁၉ ရက်တွင် လျှပ်စစ်ဓာတ်အားစတင်ချိတ်ဆက်ပို့လွှတ်ခဲ့ကြောင်း သိရသည်။
အဆိုပါ ကျေးရွာများတွင်နေထိုင်သူများ လျှပ်စစ်ဓာတ်အားအသုံးပြုခြင်းဖြင့် လူမှုစီးပွားဘဝဖွံ့ဖြိုးတိုးတက်စေရေး၊ ပညာရေး၊ ကျန်းမာရေးနှင့် လူနေမှုအဆင့်အတန်းမြင့်မားလာစေရေး၊ ဒေသတွင်း အသေးစား၊ အလတ်စား စက်မှုလက်မှုနှင့် ကုန်ထုတ်လုပ်မှုလုပ်ငန်းများဖွံ့ဖြိုးတိုးတက်စေရေးနှင့် ဒေသဖွံ့ဖြိုးရေးလုပ်ငန်းများ အရှိန်အဟုန်ဖြင့်ဆောင်ရွက်နိုင်စေရေးတို့အတွက် မြို့မီးလင်းရေးဦးဆောင်ကော်မတီ(လျှပ်စစ်ဓာတ်အားဖြန့်ဖြူးရေးလုပ်ငန်း)ကဆောင်ရွက်ခဲ့ခြင်းဖြစ်ကြောင်း သိရသည်။

ပညာရေးဝန်ကြီးဌာန ပြည်ထောင်စုဝန်ကြီးနှင့် အိန္ဒိယနိုင်ငံသံအမတ်တို့တွေ့ဆုံ

ဆရာ/ဆရာမ(၃၀)ဦးအား အင်္ဂလိပ်စာကျွမ်းကျင်မှုကာလတိုသင်တန်းများကို အိန္ဒိယတက္ကသိုလ်များတွင် တက်ရောက်နိုင်ရေးဆွေးနွေး
ပညာရေးဝန်ကြီးဌာန ပြည်ထောင်စုဝန်ကြီးဒေါက်တာချောချောစိန်နှင့် မြန်မာနိုင်ငံဆိုင်ရာ အိန္ဒိယသမ္မတနိုင်ငံသံအမတ်ကြီး H.E. Mr. Abhay Thakur တို့ ယနေ့ မေ ၁၉ ရက်ကတွေ့ဆုံခဲ့ကြသည်။
တွေ့ဆုံစဉ် အိန္ဒိယနိုင်ငံမှ အင်္ဂလိပ်ဘာသာသင်တန်းဆရာများကို မြန်မာနိုင်ငံ၏ သတ်မှတ်တက္ကသိုလ်များတွင် ရေရှည်ခန့်ထားတာဝန်ပေးအပ်ရေး၊ ဆရာ/ဆရာမ(၃၀) ဦးအား အင်္ဂလိပ်စာကျွမ်းကျင်မှုကာလတိုသင်တန်းများကို အိန္ဒိယတက္ကသိုလ်များတွင်တက်ရောက်နိုင်ရေးကို ဆွေးနွေးခဲ့ကြသည်။
ထို့ပြင် ပညာရေးဒီဂရီကောလိပ်များမှ ဆရာ/ဆရာမများအတွက် ပညာတော်သင်ဆုများချီးမြှင့်ပေးအပ်ရေးတို့ကိုလည်း ဆွေးနွေးခဲ့ကြသည်။

တရုတ်-မြန်မာစီးပွားရေးစင်္ကြန်အကောင်အထည်ဖော်ရေးကို ဒု-သမ္မတဦးညိုစောနှင့် တရုတ်သံအမတ်တို့ဆွေးနွေး

တရုတ်-မြန်မာစီးပွားရေးစင်္ကြန်အကောင်အထည်ဖော်ရေးကို မြန်မာနိုင်ငံ ဒု-သမ္မတဦးညိုစောနှင့် မြန်မာနိုင်ငံဆိုင်ရာ တရုတ်နိုင်ငံသံအမတ်တို့ ယနေ့ မေ ၁၉ ရက်ကတွေ့ဆုံဆွေးနွေးခဲ့ကြသည်။
ထို့ပြင် မြန်မာ-တရုတ်နှစ်နိုင်ငံကြား ရှိရင်းစွဲသံတမန်ဆက်ဆံရေးနှင့် ချစ်ကြည်ရင်းနှီးမှုများပိုမိုတိုးတက်ခိုင်မာစေရေး၊ နှစ်နိုင်ငံပူးပေါင်းဆောင်ရွက်မည့် စီမံ ကိန်းများအပါအဝင် ကုန်သွယ်ရေးနှင့် ရင်းနှီးမြှုပ်နှံမှုကဏ္ဍပိုမိုတိုးမြှင့်ဆောင်ရွက်ရေးတို့ကိုလည်း ဆွေးနွေးခဲ့ကြသည်။
ထို့အတူ နယ်စပ်ဒေသတည်ငြိမ်အေးချမ်းရေး၊ အွန်လိုင်းလောင်းကစား/အွန်လိုင်းလိမ်လည်မှုများတို-က်ဖျ-က်ရေးနှင့် မူးယစ်ဆေးဝါးတားဆီးနှိမ်နင်းရေးလုပ်ငန်းများကို အမျိုးသားရေးတာဝန်တစ်ရပ်အဖြစ်ဆောင်ရွက်လျက်ရှိမှုတို့ကိုလည်း ဆွေးနွေးခဲ့ကြသည်။

ဒေါ်နယ်ထရမ့်ပ် တရုတ်မှအပြန်၌ ဗလာဒီမီယာ ပူတင်ရောက်လာ

အမေရိကန်သမ္မတ ဒေါ်နယ်ထရမ့်ပ်ကို လက်ခံ တွေ့ဆုံခဲ့ပြီး ရက်ပိုင်းအကြာတွင် တရုတ်သမ္မတ ရှီကျင့်ဖျင်သည် နောက်ထပ် အရေးပါသော ခေါင်းဆောင်တစ်ဦးဖြစ်သည့် ရုရှားသမ္မတ ဗလာဒီမီယာ ပူတင်ကို အင်္ဂါနေ့ (မေလ ၁၉ ရက်) တွင် ခရီးဦးကြိုပြုခဲ့သည်။
ပြီးခဲ့သည့် သီတင်းပတ်အတွင်းက ပြုလုပ်ခဲ့သော သမ္မတ ထရမ့်ပ်၏ နိုင်ငံတော်အဆင့် ခရီးစဉ်သည် အင်အားကြီး ကမ္ဘာ့စူပါပါဝါ နှစ်နိုင်ငံအကြား ဆက်ဆံရေးကို ထိန်းညှိရန် ရည်ရွယ်ခဲ့ခြင်းပြီး ယခု သမ္မတ ပူတင်၏ ခရီးစဉ်မှာမူ သမ္မတ ရှီကျင့်ဖျင်ကို "ချစ်ကြည်လှစွာသော မိတ်ဆွေ" ဟု လူသိရှင်ကြား ခေါ်ဝေါ်လေ့ရှိသည့် ကာလရှည် မိတ်ဖက်နိုင်ငံကို ယုံကြည်မှု ပြန်လည်မြှင့်တင်ပေးရန် ရည်ရွယ်ခြင်း ဖြစ်သည်။
ယခု နှစ်ရက်တာ ခရီးစဉ်သည် သမ္မတ ပူတင်အတွက် သမ္မတသက်တမ်းအတွင်း တရုတ်နိုင်ငံသို့ (၂၅) ကြိမ်မြောက် လာရောက်သည့် ခရီးစဉ်လည်း ဖြစ်သည်။
ယူကရိန်းနှင့် ဖြစ်ပွားနေသည့် စစ်ပွဲအတွင်း အနိုင်ရရန် ရုန်းကန်နေရပြီး ပြည်တွင်း၌လည်း အများပြည်သူ၏ မကျေနပ်မှု လက္ခဏာရပ်အချို့နှင့် ရင်ဆိုင်နေရချိန်တွင် တရုတ်နိုင်ငံနှင့် ဆက်ဆံရေး ခိုင်မာမှုကို ပြန်လည်ပြသရန် သမ္မတ ပူတင်အတွက် အလွန်အရေးကြီးသော အချိန်အခါလည်း ဖြစ်သည်။
ရုရှားနှင့် တရုတ် နှစ်နိုင်ငံဆက်ဆံရေးသည် "မည်သည့်အခါကမှ မရှိခဲ့ဖူး‌ သောအဆင့်အတန်းတစ်ခု" သို့ ရောက်ရှိနေပြီဖြစ်ကြောင်း သမ္မတ ပူတင်က အင်္ဂါနေ့တွင် ပြောကြားခဲ့သည်။ ယခု ပြောကြားချက်သည် ၎င်း၏ ပြည်ပခရီးစဉ် မတိုင်မီ ပထမဆုံးအကြိမ် ဗီဒီယိုမှတစ်ဆင့် မိန့်ခွန်းပြောကြားခဲ့ခြင်းဖြစ်ကြောင်း တရုတ်နိုင်ငံပိုင် မီဒီယာများက ဖော်ပြကြသည်။
ထို့အပြင် ၎င်းက "ကျွန်တော်တို့ဟာ လက်တွဲပြီး ဆက်လက် ဆောင်ရွက်သွားမှာဖြစ်သလို၊ ရုရှား-တရုတ် မိတ်ဖက်ဆက်ဆံရေးနဲ့ အိမ်နီးချင်းကောင်း ချစ်ကြည်ရေးကို ပိုမိုနက်ရှိုင်းစေဖို့ အစွမ်းကုန် ကြိုးပမ်းသွားမှာ ဖြစ်ပါတယ်" ဟုလည်း ဖြည့်စွက်ပြောဆိုခဲ့သည်။
သမ္မတ ပူတင်၏ တရားဝင်ခရီးစဉ်အတွင်း ဗုဒ္ဓဟူးနေ့တွင် သမ္မတ ရှီကျင့်ဖျင်က မဟာပြည်သူ့ခန်းမဆောင်ကြီး (Great Hall of the People) ၌ ကြိုဆိုပွဲ အခမ်းအနားဖြင့် ခရီးဦးကြိုပြုမည်ဖြစ်သည်။ နှစ်နိုင်ငံခေါင်းဆောင်များ ဆွေးနွေးပွဲကို လုပ်ဆောင်သွားမည်ဖြစ်သည်။ ယင်းနောက် ညပိုင်းတွင် တရုတ်-ရုရှား ချစ်ကြည်ရေး (၂၅) နှစ်ပြည့် အထိမ်းအမှတ်အဖြစ် ကျင်းပမည့် ဂုဏ်ပြုညစာစားပွဲသို့ ခေါင်းဆောင်နှစ်ဦး စုံညီစွာ တက်ရောက်သွားမည်ဖြစ်ကြောင်း သိရသည်။

ဧရာဝတီတိုင်းတွင် ၁၃၉၀ မဂ္ဂါဝပ် LNG သုံး ဓာတ်အားပေးစက်ရုံစီမံကိန်း စတင်အကောင်အထည်ဖော်

ဧရာဝတီတိုင်းဒေသကြီး၊ ပုသိမ်ခရိုင်၊ ရွှေသောင်ယံမြို့ မီးလင်းဂျိုင်ဒေသတွင် ၁၃၉၀ မဂ္ဂါဝပ် LNG သုံး ဓာတ်အားပေးစက်ရုံစီမံကိန်းနှင့် မီးလင်းဂျိုင်-ရန်ကုန် သဘာဝဓာတ်ငွေ့ပိုက်လိုင်းစီမံကိန်းတို့ကို စတင်အကောင်အထည်ဖော်ဆောင်ရွက်လျက်ရှိကြောင်း သိရသည်။
အဆိုပါ စီမံကိန်းများ၏ ဆောင်ရွက်ပြီးစီးမှုအခြေအနေနှင့် ရှေ့ဆက်ဆောင်ရွက်မည့်အစီအစဉ်များကို မေ ၁၈ ရက် မွန်းလွဲပိုင်းက ဧရာဝတီတိုင်းဒေသကြီးအစိုးရအဖွဲ့ရုံး အစည်းအဝေးခန်းမ(၁)တွင် MEE LIN GIANG ELECTRIC POWER COMPANY LIMITED မှ လာရောက်ရှင်းလင်းတင်ပြခဲ့ကြောင်း သိရသည်။
တင်ပြချက်တွင် မီးလင်းဂျိုင် ၁၃၉၀ မဂ္ဂါဝပ် LNG နှင့် စွန့်ပစ်အပူသုံး ဓာတ်အားပေးစက်ရုံစီမံကိန်း၏ ဆက်စပ်စီမံကိန်းဖြစ်သည့် မီးလင်းဂျိုင်-ရန်ကုန် သဘာဝဓာတ်ငွေ့ပိုက်လိုင်းသစ်စီမံကိန်း၊ သဘာဝဓာတ်ငွေ့စီမံကိန်းဆိုင်ရာ အချက်အလက်များ၊ ပိုက်လိုင်းလမ်းကြောင်းရွေးချယ်အတည်ပြုထားမှုနှင့် စီမံကိန်းအကောင်အထည်ဖော်ဆောင်ရွက်ထားရှိမှုများကို ရှင်းလင်းတင်ပြခဲ့ကြောင်း သိရသည်။
ဧရာဝတီတိုင်းဒေသကြီးအစိုးရအဖွဲ့အနေဖြင့် တိုင်းဒေသကြီးအတွင်း လျှပ်စစ်ဓာတ်အားလုံလောက်စွာရရှိရေး၊ စီးပွားရေးပိုမိုဖွံ့ဖြိုးတိုးတက်ရေးနှင့် ပြည်သူများ၏ လူမှုစီးပွားဘဝတိုးတက်ကောင်းမွန်ရေးတို့အတွက် အထူးအလေးထားဆောင်ရွက်လျက်ရှိကြောင်း သိရသည်။
ဧရာဝတီတိုင်းဒေသကြီးဝန်ကြီးချုပ် ဦးအေးကျော်က ရွှေသောင်ယံမြို့ မီးလင်းဂျိုင်ဒေသတွင် အကောင်အထည်ဖော်မည့် ၁၃၉၀ မဂ္ဂါဝပ် LNG သုံး ဓာတ်အားပေးစက်ရုံစီမံကိန်းသည် ပြီးစီးပါက နိုင်ငံတော်နှင့် တိုင်းဒေသကြီးအတွက် များစွာအကျိုးဖြစ်ထွန်းစေမည့် စီမံကိန်းကြီးတစ်ခုဖြစ်ကြောင်း ပြောကြားခဲ့သည်။
ထို့ပြင် တိုင်းဒေသကြီးအစိုးရအဖွဲ့အနေဖြင့် လိုအပ်သည်များကို လုပ်ထုံးလုပ်နည်းများနှင့်အညီ ကူညီဆောင်ရွက်ပေးသွားမည်ဖြစ်ကြောင်းနှင့် စီမံကိန်းလုပ်ငန်းများကို သတ်မှတ်ကာလအတွင်း အမြန်ဆုံးပြီးစီးနိုင်ရေး အလေးထားဆောင်ရွက်ကြရန် တိုက်တွန်းပြောကြားခဲ့ကြောင်း သိရသည်။

စစ်ဆင်ရေး(၁၅)ရက်အတွင်း KNU/KNLA နှင့် PDF အဖွဲ့များ ယာယီထိန်းချုပ်ထားသည့် မောတောင်မြို့ကို တပ်မတော် ပြန်လည်သိမ်းပိုက်

KNU/KNLA နှင့် PDF အဖွဲ့များ ယာယီထိန်းချုပ်ထားသည့် တနင်္သာရီတိုင်းဒေသကြီး၊ တနင်္သာရီမြို့နယ်အတွင်းရှိ မြန်မာ-ထိုင်းနယ်စပ် ကုန်သွယ်ရေးစခန်းတည်ရှိရာ မောတောင်မြို့ကို တပ်မတော်က မေ ၁၉ ရက်တွင် အလုံးစုံပြန်လည်ထိန်းချုပ်သိမ်းပိုက်ခဲ့ကြောင်း သိရသည်။
တပ်မတော်စစ်ကြောင်းများသည် မောတောင်မြို့အား ပြန်လည်ထိန်းချုပ်နိုင်ရေးနှင့် တနင်္သာရီ-ရေဖြူ-သိန်းခွန်-သဲဖြူ-မောတောင် လမ်းကြောင်း ပြန်လည်ဖွင့်လှစ်နိုင်ရေးအတွက် မေ ၅ ရက်မှစတင်ကာ စစ်ကြောင်းများခွဲ၍ ထိုးစစ်ဆင်တို-က်ခိုက်ခဲ့ကြကြောင်း သိရသည်။
ယင်းနောက် မေ ၉ ရက်တွင် ပွိုင့်(၂၇၁) တောင်ကုန်းမှ စတင်၍ နေရာအချို့ကို အဆင့်ဆင့်ပြန်လည်ထိန်းချုပ်နိုင်ခဲ့ပြီး မေ ၁၉ ရက်တွင် မောတောင်မြို့အား အလုံးစုံပြန်လည်ထိန်းချုပ်နိုင်ခဲ့ကြောင်း သိရသည်။
ထို့ပြင် ဆုတ်ခွာသွားသည့် အဖွဲ့များက အမှတ်(၉)ကျေးရွာတံတားနှင့် အမှတ်(၈)တံတားတို့အား မိုင်းထောင်ဖေ-ာက်ခွဲဖျ-က်ဆီးခဲ့ကြကြောင်းလည်း သိရသည်။
စစ်ဆင်ရေးကာလ (၁၅)ရက်အတွင်း တိုက်ပွဲကြီးနှင့် တိုက်ပွဲငယ် စုစုပေါင်း (၂၀၇)ကြိမ်ဖြစ်ပွားခဲ့ပြီး ရန်သူ့အလောင်း (၂၄)လောင်း၊ လက်နက်မျိုးစုံ (၂၅)လက်၊ ခဲယမ်းနှင့် ဆက်စပ်ပစ္စည်းများကို သိမ်းဆည်းရမိခဲ့ကြောင်း သိရသည်။
လက်ရှိတွင် တပ်မတော်စစ်ကြောင်းများက ယာယီနေရပ်စွန့်ခွာခဲ့ရသည့် ဒေသခံများ မောတောင်မြို့သို့ အန္တရာယ်ကင်းရှင်းစွာ ပြန်လည်နေထိုင်နိုင်ရေးနှင့် အစိုးရအုပ်ချုပ်ရေးယန္တရားများ အမြန်ဆုံးပြန်လည်လည်ပတ်နိုင်ရေးတို့အတွက် ဆောင်ရွက်လျက်ရှိကြောင်း သိရသည်။
ထို့ပြင် မြေမြှုပ်မိုင်းများကို ဦးစားပေးရှင်းလင်းဖော်ထုတ်လျက်ရှိပြီး ပျ-က်စီးသွားသည့် စာသင်ကျောင်းများ၊ ဆေးရုံနှင့် ဆေးခန်းများ၊ ရုံးနှင့်ဌာနအဆောက်အအုံများ၊ ဘာသာရေးဆိုင်ရာအဆောက်အအုံများနှင့် လူနေအိမ်များကို ဒေသခံများနှင့်ပူးပေါင်း၍ အမြန်ဆုံးပြန်လည်ပြုပြင်နိုင်ရေး ဆောင်ရွက်လျက်ရှိကြောင်း သိရသည်။