လီဗာပူးရှယ်ယာကို ဝယ်ယူရန် Amazon ဘီလျှံနာဂျက်ဖ်ဘေးဇို့စ် နီးစပ်နေပြီ ဖြစ်ပြီး ယခုအပတ်အတွင်းတွင် ကြေညာလာဖွယ်ရှိ
=======================

နည်းပညာဘီလျှံနာဂျက်ဖ်ဘေးဇို့စ်ဟာ လီဗာပူးရဲ့ အသေးစားရှယ်ယာအချို့တို့ကို ဝယ်ယူ ရင်းနှီးမြှပ်နှံရန် အနီးစပ်ဆုံးအနေအထားသို့ ရောက်နေပြီ ဖြစ်ပါတယ်။
Amazon တည်ထောင်သူ ပါဝင်တဲ့ ရင်းနှီးမြှပ်နှံရေးအဖွဲ့ဟာ လီဗာပူးရဲ့ ရှယ်ယာအချို့တို့အား ဝယ်ယူရန် ကလပ်ပိုင်ရှင် Fenway Sports Group (FSG) နှင့် ဆွေးနွေးမှုများ ပြုလုပ်နေပါတယ်။
Sky News ရဲ့ ဖော်ပြလာမှုအရ လီဗာပူးရှယ်ယာအချို့အား ရောင်းချတဲ့ ကြေညာချက်အား ယခအပတ်အတွင်းတွင်ပင် ကြေညာလာဖို့ ရှိနေကြောင်း သိရပါတယ်။
ကျူပီအာအသင်းရဲ့ ပူးတွဲပိုင်ရှင်ဟောင်းအာမက်ဘာတီယာဦးဆောင်တဲ့ ရင်းနှီးမြှပ်နှံရေးအဖွဲ့က လီဗာပူးရှယ်ယာများကို ဝယ်ယူရန် ရက်သတ္တပတ်အတန်ကြာ ကြိုးပမ်းလာခဲ့တာလည်း ဖြစ်ပါတယ်။
ဘာတီယာရဲ့ ယောက္ခထီးက အိန္ဒိယသတ္တုလုပ်ငန်းရှင် လက်ရှ်မီးမစ်တယ် ဖြစ်ပြီး ပေါင် ၂၃ ဘီလျှံကြွယ်ဝချမ်းသာသူ ဖြစ်ပါတယ်။
လီဗာပူးရဲ့ ရှယ်ယာများကို ဝယ်ယူရန် ကြိုးပမ်းတဲ့ ရင်းနှီးမြှပ်နှံရေးအဖွဲ့တွင် Facebook အား ပူးတွဲတည်ထောင်သူ အက်ဝတ်ဒိုဆာဗီရန်လည်း ပါဝင်တယ်လို့ သတင်းထွက်ထားပါတယ်။
လီဗာပူးဟာ ရှယ်ယာရောင်းချရေး ပြုလုပ်ပြီးပါက ကလပ်မှာ ကမ္ဘာအနှံမှ ဘီလျှံနာများ ရင်းနှီးမြှပ်နှံလာတဲ့ ကလပ်ဖြစ်လာပါမယ်။
ဘေးဇို့စ်မှာ ပေါင် ၂၁၃ ဘီလီယံ ကြွယ်ဝချမ်းသာက ကမ္ဘာ့တတိယအချမ်းသာဆုံးပုဂ္ဂိုလ်အဖြစ် ရပ်တည်နေသူ ဖြစ်ပါတယ်။ ဆာဗီရန်မှာလည်း ပေါင် ၂၅ ဘီလီယံကြွယ်ဝချမ်းသာကာ ဘရာဇီးတွင် အချမ်းသာဆုံးပုဂ္ဂိုလ် ဖြစ်ပါတယ်။
ယင်းရင်းနှီးမြှပ်နှ့ရေးအဖွဲ့ဟာ အစောပိုင်းတုန်းက လီဗာပူးရဲ့ ရှယ်ယာ ၃၀ ရာခိုင်နှုန်းအား ပေါင် ၁.၃၅ ဘီလီယံဖြင့် ဝယ်ယူရန် ကမ်းလှမ်းခဲ့ကြောင်း သိရပါတယ်။ ၎င်းတို့ဟာ လီဗာပူးကို ပေါင် ၄.၄ ဘီလီယံတန်ဖိုးသတ်မှတ်ကာ ဝယ်ယူရေး ကြိုးပမ်းလာတာပါ။
ဟင်နရီနှင့် Fenway Sports Group (FSG) ဟာ အမေရိကန်သန်းကြွယ်သူဌေး တွမ်ဟစ်ခ်နှင့် ဂျော့ဂျီးလက်တို့ လက်အောက်တွင် ဘဏ္ဍာရေးပြဿနာကြုံနေတဲ့ လီဗာပူးအား ပေါင်သန်း ၃၀၀ ဖြင့် ဝယ်ယူခဲ့တာလည်း ဖြစ်ပါတယ်။

ဖီဖာနှင့် အင်ဖန်တီနိုအား လှည့်စားမှုဖြင့် ယုံကြည်မှုကို ဖျက်ဆီးခဲ့တယ်လို့ ဘောလုံးအဖွဲ့ချုပ်ဥက္ကဌများ စွပ်စွဲလာ
====================

ယူအီးအက်ဖ်အေ၊ ကွန်ကာကပ်ဖ်နှင့် အာရှဘောလုံးအဖွဲ့ချုပ်တို့က ဖီဖာနှင့် ဥက္ကဌဂျီယန်နီအင်ဖန်တီနိုမှာ လှည့်စားမှု ပြုလုပ်ပြီး ယုံကြည်မှုကို အလွဲသုံးစားမှု ပြုလုပ်ခဲ့တယ်လို့ အိတ်ဖွင့်ပေးစာ ပေးပို့ပြီး စွပ်စွဲလာပါတယ်။
ဘောလုံးအဖွဲ့ချုပ်ဥက္ကဌများ၊ အထွေထွေအတွင်းရေးမှူးများက လက်မှတ်ရေးထိုးထားတဲ့ ယင်းအိတ်ဖွင့်ပေးစာထဲတွင် Fifa Forward Enterprise (FFE) အဆိုပြုချက် မှာ ဘောလုံးပွဲရဲ့ သမာဓိနှင့် ယင်းကို ဦးဆောင်ရန် ရွေးကောက်တင်မြှောက်ခြင်းခံထားရတဲ့သူများရဲ့သမာဓိလို့ ဆိုထားပါတယ်။
Fifa Forward Enterprise (FFE) မှာ ဖီဖာက ကြီးမှူးကျင်းပတဲ့ ကမ္ဘာ့ဖလားအပါအဝင် ပြိုင်ပွဲအားလုံးရဲ့ ကော်မာရှယ်ပိုင်းနှင့် လက်မှတ်ရောင်းချမှုပိုင်းကို ဦးဆောင်ကိုင်တွယ်မယ့် ကုမ္ပဏီသစ် ဖြစ်ပြီး ယင်းမှ ရှယ်ယာ ၂၁ ရာခိုင်နှုန်းကို ပုဂ္ဂလိက ရင်းနှီးမြှပ်နှံသူများထံ ရောင်းချသွားပါမယ်။
ဒါပေမယ့် အင်ဖန်တီဟာ ယင်းအစီအစဉ်အပေါ် ဝေဖန်မှုအမြောက်အမြား ကြုံရပြီးနောက် ဖျက်သိမ်းခဲ့ပါတယ်။
ယူအီးအက်ဖ်အေက ဖီဖာက ကျင်းပတဲ့ ပြိုင်ပွဲအားလုံးကို သပိတ်မှောက်လို့ပါ ခြိမ်းခြောက်ခဲ့ပါတယ်။
ယင်းစာထဲတွင် "လှည့်စားမှုကြောင့် ယုံကြည်မှု ပျက်ပြားလာစေတဲ့အခါ လူတစ်ယောက်ယောက်က သူ့အပေါ် အာဏာအပ်နှင်းထားတဲ့ လူအုပ်စုရဲ့အထက်မှာ ရှိတယ်လို့ ကိုယ့်ကိုယ်ကို ထားလာတဲ့အခါ တာဝန်တွေအားလုံး စွန့်လွှတ်လိုက်တာ ဖြစ်ပါတယ်။ ဘောလုံးမှာ ခေါင်းဆောင်ဆိုတာ ပိုင်ဆိုင်တဲ့အရာ မဟုတ်ပါဘူး။ ကိုင်တွယ်လို့ မရသလို တောင်းဆိုလို့လည်း မရပါဘူး။ ဆုပ်ကိုင်ထားတဲ့မယ့် အာဏာလည်း မဟုတ်ပါဘူး။ သူ့ကို ယုံကြည်စွာပေးအပ်တဲ့ ဘောလုံးမိသားစုအတွက် အလုပ်အကျွေးပြုဖို့ပါ"လို့ ဆိုထားပါတယ်။
ယင်းထုတ်ပြန်ချက်တွင် အင်ဖန်တီနိုရဲ့အမည်ကို ထည့်သွင်းဖော်ပြထားခြင်းတော့ မရှိပါဘူး။
ယင်းဘောလုံးအဖွဲ့ချုပ်တို့ဟာ အင်ဖန်တီနိုအား ရာထူးမှ နုတ်ထွက်ရေးအတွက် ဆက်လက် ဖိအားပေးလုပ်ဆောင်လာကြတာလည်း ဖြစ်ပါတယ်။
တဖက်တွင် ဖီဖာက အဖွဲ့အစည်းနှင့် အင်ဖန်တီနိုနှင့်ပတ်သက်ပြီး အခြေအမြစ်မရှိတဲ့ သတင်းများ ဖြန့်ကာ လုပ်ဆောင်နေကြောင်း ဝေဖန်မှုများ ပြုလုပ်ခဲ့ပါတယ်။
ဖီဖာဟာ ကမ္ဘာ့ဖလားအား ရောင်းစားမယ့် အစီအစဉ်အား ဖျက်သိမ်းခဲ့ရပြီးနောက် ဗုဒ္ဓဟူးနေ့တုန်းက မော်ရိုကိုနိုင်ငံ၊ ရာဘက်တွင် ဖီဖာအမှုဆောင်အစည်းအဝေး ပြုလုပ်ခဲ့ပါတယ်။

CR7 ရဲ့ မင်္ဂလာပွဲလို့ အထင်မှားကာ ထောင်ပေါင်းများစွာ ရော်နယ်ဒိုပရိသတ်များ ရောက်လာမှုကြောင့် မင်္ဂလာပွဲတစ်ပွဲ အုတ်အော်သောင်းနင်းဖြစ်ခဲ့
===================

သတို့သမီးနှင့် သတို့သားတို့ဟာ ပေါ်တူဂီနိုင်ငံ၊ မာဒိုင်ရာကျွန်းတွင် ပြုလုပ်တဲ့ လက်ထပ်မင်္ဂလာပွဲကို ခရစ္စတီယာနိုရော်နယ်ဒိုနှင့် ဂျော်ဂျီနာရိုဒရီဂွက်ဇ်တို့ရဲ့ မင်္ဂလာပွဲလို့ ထင်မှတ်ပြီး ပရိသတ် ၂၀၀၀ ခန့် လာရောက် ကြိုဆိုခြင်းနှင့်ကြုံခဲ့ရပါတယ်။
စနေနေ့တွင် ဘီလျှံနာခရစ္စတီယာနိုရော်နယ်ဒိုနှင့် ချစ်သူမော်ဒယ်ဂျော်ဂျီနာတို့ Funchal Cathedral ဘုရားကျောင်းတွင် မင်္ဂလာပွဲ ကျင်းပမယ်လို့ သတင်းများ ထွက်ပေါ်မှုနှင့်အတူ ထောင်ပေါင်းများစွာ ပရိသတ်များ ဘုရားကျောင်းရှေ့တွင် စုပြုံနေခဲ့ပါတယ်။
ဒါပေမယ့် ယင်းမင်္ဂလာပွဲက မာဒိုင်ရာမှာ ကြီးပြင်းလာတဲ့ နီကိုလာကူညာတိုင်ဇီရာနှင့် ဖေဘီယိုရာမို့စ်တို့ရဲ့ မင်္ဂလာပွဲ ဖြစ်နေပါတယ်။
ဒါပေမယ့် ထောင်ပေါင်းများစွာသော ပရိသတ်များဟာ ယင်းမင်္ဂလာပွဲကို ခရစ္စတီယာနိုရော်နယ်ဒိုနှင့် ဂျော်ဂျီနာတို့က အမည်တု ပြောင်းလဲကာ ဘုတ်ကင်တင်ထားတာလို့ ယုံကြည်နေကြပါတယ်။
သတို့သမီးဟာ များပြားလှတဲ့ လူအုပ်ကြီးကို ကျော်ဖြတ်ကာ ဘုရားကျောင်းသို့ သွားခဲ့ရပြီး ပရိသတ်အချို့တို့မှာ ခရစ္စတီယာနိုရော်နယ်ဒိုရဲ့ နာမည်ကျော် ကျောနံပါတ် ၇ ကို ကိုင်ဆောင်ထားကြတာ တွေ့ရပါတယ်။
ပရိသတ်အချို့တို့က "ဂျော်ဂျီနာ မဟုတ်ဘူးဟေ့"လို့ အော်ဟစ်ခဲ့ကြပါတယ်။ ဒါပေမယ့် ပရိသတ်အချို့တို့ကလည်း ဖုန်းထုတ်ပြီး သတို့သမီးနှင့် Selfie ဓာတ်ပုံရိုက်ကူးဖို့ ကြိုးစားခဲ့ကြပါတယ်။
အထက်ပါ ဗီဒီယိုမှာ အွန်လိုင်းတွင် ပျံ့နှံနေပြီး ခရစ္စတီယာနိုရော်နယ်ဒိုကိုယ်တိုင်လည်း ကြည့်ရှုထားတာ တွေ့ရပါတယ်။
အထူးသဖြင့် သောကြာနေ့ညတုန်းက ရော်နယ်ဒိုရဲ့အစ်မ အသက် ၄၈ နှစ်ရှိ ကေတီယာအဗီရိုက မာဒိုင်ရာသို့ ရောက်နေတဲ့အကြောင်းကို “party” ဆိုတဲ့ ခေါင်းစဉ်နှင့် ပို့စ်ထားမှုနှင့်အတူ မောင်ဖြစ်သူ ခရစ္စတီယာနိုရော်နယ်ဒိုရဲ့ မင်္ဂလာပွဲ အမှန်တကယ်ကျင်းပလာမယ်လို့ အားလုံးက ယူဆနေခဲ့ကြတာပါ။
သူမရဲ့အင်စတာဂရမ်စတိုရီမှာလည်း မိခင်ဖြစ်သူ မာရီယာဒိုလိုရေးစ် ဟိုတယ်တစ်ခုရဲ့အခန်းသို့ ရောက်နေတဲ့ ဓာတ်ပုံကိုလည်း တင်ထားပါသေးတယ်။
ခရစ္စတီယာနိုရော်နယ်ဒိုနှင့် ဂျော်ဂျီနာတို့ရဲ့ မင်္ဂလာဧည့်ခံပွဲ ကျင်းပမယ်လို့ သတင်းထွက်နေတဲ့ ကြယ်ငါးပွင့်အဆင့် ရှိ Savoy Palace ဟိုတယ်ကလည်း နှစ်လွှာလုံး ဘုတ်ကင်ပြည့်နေပါတယ်။
ရော်နယ်ဒိုနှင့်ဂျော်ဂျီနာတို့ဟာ ပြီးခဲ့တဲ့နှစ် ဩဂုတ်လတုန်းက စေ့စပ်ခဲ့ကြတာ ဖြစ်ပြီး ကမ္ဘာဖ့လားအပြီးတွင် မင်္ဂလာပွဲ ကျင်းပမယ်လို့ ကြေညာထားပါတယ်။
ရော်နယ်ဒိုဟာ လာမယ့်အပတ်တွင် ဆော်ဒီပရိုလိဂ်စတင်ရမှာ ဖြစ်လို့ စနေနေ့က လက်ထပ်ပွဲ ကျင်းပမယ်လို့ ပရိသတ်များ ယုံကြည်နေခဲ့ကြပါတယ်။
၁၅ ရာစုကတည်းက တည်ရှိလာခဲ့တဲ့ Funchal Cathedral မှ သင်းအုပ်ဆရာ ဖာသားမားကို့စ်ဂွန်ကယ်ဗက်စ်ကလည်း "ဒါက ဒီကနေ့ တစ်ပွဲတည်းသော မင်္ဂလာပွဲပါ။ ခရစ္စတီယာနိုရော်နယ်ဒို ဘုတ်ကင်ယူထားတာ မဟုတ်ပါဘူး"လို့ ဆိုထားပါတယ်။
ဒါ့အပြင် ဂွန်ကယ်ဗက်စ်က ရော်နယ်ဒိုမှာ Funchal Cathedral ကျောင်းတွင် မင်္ဂလာပွဲကျင်းပရန် ဘုတ်ကင်ယူထားခြင်း မရှိကြောင်းလည်း ဆိုထားပါသေးတယ်။

၂၀၂၇ အမျိုးသမီးကမ္ဘာ့ဖလားခြေစစ်ပွဲအောင်မြင်လာတဲ့ အာဖရိကအသင်း ၄ သင်း
====================

အယ်ဂျီးရီးယား၊ မော်ရိုကို၊ ကင်မရွန်းနှင့် မာလဝီတို့ဟာ ဘရာဇီးက အိမ်ရှင်အဖြစ် ကျင်းပလာမယ့် ၂၀၂၇ ခုနှစ် အမျိုးသမီးကမ္ဘာ့ဖလားခြေစစ်ပွဲ အောင်မြင်လာပါတယ်။
အမျိုးသမီးအာဖရိကဖလားပြိုင်ပွဲကို မော်ရိုကိုမှာ ကျင်းပနေတာ ဖြစ်ပြီး ဆီမီးဖိုင်နယ်သို့ တက်ရောက်နိုင်တဲ့အသင်း ၄ သင်းလုံး ကမ္ဘာ့ဖလားခြေစစ်ပွဲ တိုက်ရိုက်အောင်မြင်လာစေခဲ့ပါတယ်။
အယ်ဂျီးရီးယားက ကွာတားဖိုင်နယ်တွင် ၁၀ ယောက်ကျန် အိုင်ဗရီကို့စ်ကို ၂-၁ ဖြင့် အနိုင်ရကာ အာဖရိကဖလားဆီမီးဖိုင်နယ်သို့ တက်ရောက်ပြီး ကမ္ဘာဖ့လားခြေစစ်ပွဲ တိုက်ရိုက်အောင်မြင်လာပါတယ်။
အိမ်ရှင်မော်ရိုကိုအသင်းကလည်း တောင်အာဖရိကကို ၂-၁ ဖြင့် အနိုင်ယူကာ ဆီမီးဖိုင်နယ်သို့ တက်ခဲ့သလို ကင်မရွန်းကလည်း နိုင်ဂျီးရီးယားကို ၁-၀ ဖြင့် အနိုင်ရကာ ဆီမီးဖိုင်နယ်သို့ တက်ခဲ့ပါတယ်။
ကမ္ဘာ့အဆင့် ၁၅၃ နေရာမှာသာ ရပ်တည်နေတဲ့ မာလဝီဟာ ဂါနာကို နောက်က လိုက်ကစားပြီး ၂-၁ ဖြင့် အနိုင်ယူကာ တစ်ကမ္ဘာလုံး အံ့ဩသင့်အောင် လုပ်ပြသွားပါတယ်။
အမျိုးသမီးအာဖရိကဖလားဆီမီးဖိုင်နယ်ပွဲစဉ်များကို ဗုဒ္ဓဟူးနေ့မှာ ကစားလာမှာ ဖြစ်ပါတယ်။ ဆီမီးဖိုင်နယ်တွင် မော်ရိုကိုနှင့် ကင်မရွန်း၊ အယ်ဂျီးရီးယားနှင့် မာလဝီတို့ တွေ့ဆုံနေပါတယ်။
အမျိုးသမီးအာဖရိကဖလားကွာတားဖိုင်နယ်တွင် ရှုံးနိမ့်ခဲ့တဲ့ ဂါနာ၊ အိုင်ဗရီကို့စ်၊ နိုင်ဂျီးရီးယားနှင့် တောင်အာဖရိကတို့အတွက်လည်း ကမ္ဘာ့ဖလားခြေစစ်ပွဲအောင်မြင်နိုင်မယ့် အခွင့်အရေးတစ်ရပ် ကျန်ရှိနေပါသေးတယ်။
ကြာသပတေးနေ့မှာ အိုင်ဗရီကို့စ်နှင့် ဂါနာ၊ နိင်ဂျီးရီးယားနှင့် တောင်အာဖရိကတို့ ရင်ဆိုင်ကစားကြမှာ ဖြစ်ပြီး အနိုင်ရတဲ့ ၂ သင်းက နိုဝင်ဘာလမှ ဒီဇင်ဘာလအထိ ကျင်းပမယ့် အသင်း ၁၀ သင်းပါ intercontinental ပလေးအော့ဖ်ထပ်ကစားရပါမယ်။
intercontinental ပလေးအော့ဖ်မှ အသင်း ၃ သင်းက လာမယ့်နှစ် ဇွန်လ ၂၄ ရက်နေ့မှ ဇူလိုင်လ ၂၅ ရက်နေ့အထိ ကျင်းပမယ့် အမျိုးသမီးကမ္ဘာ့ဖလားခြေစစ်ပွဲအောင်မြင်လာပါမယ်။
လက်ရှိအချိန်တွင် အမျိုးသမီးကမ္ဘာ့ဖလားခြေစစ်ပွဲအောင်မြင်တဲ့ အခြားတိုက်များမှ အသင်းများအဖြစ် အာရှမှ ဩစတြေးလျ၊ တရုတ်၊ ဂျပန်၊ မြောက်ကိုရီးယား၊ ဖီးလစ်ပိုင်၊ တောင်ကိုရီးယားတို့ ရှိနေပြီး ဥရောပမှ ဒိန်းမတ်၊ ပြင်သစ်၊ ဂျာမနီနှင့် စပိန်တို့ ထွက်ပေါ်ထားပါတယ်။
ဒါ့အပြင် သမုဒ္ဒရာပိုင်းဇုန်မှ နယူးဇီလန်၊ တောင်အမေရိကမှ အာဂျင်တီးနား၊ ဘရာဇီး၊(အိမ်ရှင်)၊ ကိုလံဘီယာတို့ ထွက်ပေါ်ထားပါတယ်။

ယူနိုက်တက်တွင် ဖာဂူဆန်ရဲ့နေရာကို ဆက်ခံရန် သဘောတူညီမှု ရရှိခဲ့ကြောင်း မော်ရင်ဟို ဖွင့်ဟလာ
====================

နှစ်ပေါင်းများစွာ ကောဟာလဟသတင်းများ ထွက်ပေါ်ခဲ့ပြီးတဲ့နောက်မှာတော့ ဂျိုဆေးမော်ရင်ဟိုက ၂၀၁၃ ခုနှစ်တွင် ဆာအဲလက်စ်ဖာဂူဆန်ရဲ့ ယူနိုက်တက်နည်းပြရာထူးအား လက်ခံရန် သဘောတူညီခဲ့ကြောင်း ဝန်ခံလာပါတယ်။
ဒါပေမယ့် ပေါ်တူဂီဂန္ထဝင်နည်းပြဟာ ချက်ချင်းပင် စိတ်ပြောင်းကာ အသင်းဟောင်း ချဲလ်ဆီးကို ဒုတိယအကြိမ်မြောက် ကိုင်တွယ်ရန် ဆုံးဖြတ်သွားခဲ့ပါတယ်။
ရီးရဲလ်မက်ဒရစ်အား ဒုတိယအကြိမ်မြောက် ကိုင်တွယ်လာခဲ့တဲ့ မော်ရင်ဟိုက Netflix က ထုတ်လွှင့်တဲ့ သူ့ဘဝအကြောင်း မှတ်တမ်းရုပ်ရှင်တွင် "ရီးရဲလ်မက်ဒရစ်ကနေ ထွက်ခွာလာတော့ ဆာအဲလက်စ် နေရာမှာ အစားထိုးဖို့ မန်ချက်စတာယူနိုက်တက်နဲ့စာချုပ်ချုပ်ဖို့ လုပ်ခဲ့တယ်"လို့ ပြောကြားသွားပါတယ်။
အိုးထရက်ဖို့ဒ်တွင် ၂၆ နှစ်ကြာ တာဝန်ထမ်းဆောင်စဉ်အတွင်း ပရီးမီးယားလိဂ်ဖလား ၁၃ ကြိမ် ဆွတ်ခူးကာ ၂၀၁၃ ခုနှစ်တွင် အနားယူခဲ့တဲ့ ဆာအဲလက်စ်ဖာဂူဆန်ကလည်း "ဟုတ်ပါတယ်။ သူ့ကို ဒီအလုပ်တွင် ကမ်းလှမ်းခဲ့တယ်"လို့ အတည်ပြုသွားပါတယ်။
"သူနဲ့ ထိုင်ပြီး ဆွေးနွေးတယ်။ အခြေအနေကို ရှင်းပြတယ်။ ကျွန်တော် စိုးရိမ်နေခဲ့တယ်ဆိုပေမယ့် သူ လက်ခံခဲ့တယ်။ နောက်တော့ နာရီအနည်းငယ်အတွင်းမှာပဲ အားလုံး ပြောင်းလဲသွားခဲ့တယ်"လို့ ၎င်းက ထပ်လောင်း ပြောကြားသွားပါတယ်။
မော်ရင်ဟိုဟာ ၂၀၀၅ နှင့် ၂၀၀၆ ခုနှစ်တုန်းက ပရီးမီးယားလိဂ်ဖလား ၂ ကြိမ်ဆက် ဆွတ်ခူးခဲ့တဲ့ ချဲလ်ဆီးအား ဒုတိယအကြိမ်ကိုင်တွယ်နိုင်မယ့် အခွင့်အရေးကို မပယ်ချသင့်လို့ ယူဆကာ ယူနိုက်တက်နည်းပြရာထူးအား ရယူလုနီးပါး ဖြစ်ပြီးမှ ငြင်းပယ်ခဲ့တာပါ။
ဆက်လက်ပြီး ယူနိုက်တက်ဂန္ထဝင်နည်းပြဆာအဲလက်စ်က "တစ်ညမှာ သူ ကျွန်တော့်ကို ဖုန်းဆက်လာတယ်။ ပြီးတော့ သူက 'အဲလက်စ်၊ ဒါတော့ ဒါအလုပ်ကို လက်မခံ ဖြစ်တော့ဘူး။ ချဲလ်ဆီးကို ကတိပေးလိုက်ပြီ။ ပြီးတော့ ကတိဖျက်မှာ မဟုတ်ဘူး'လို့ ပြောလာတယ်။ သူပေးလာတဲ့ အကြောင်းပြချက်အပေါ် ကျွန်တော် နားလည်ပေးလို့ ရပါတယ်။ ဒါပေမယ့် ကျွန်တော် စိတ်ပျက်ခဲ့ရတယ်"လို့ ပြောကြားသွားပါတယ်။
ဒါ့အပြင် မော်ရင်ဟိုက မန်ချက်စတာယူနိုက်တက်မှာ မယုံကြည်နိုင်စရာကောင်းလောက်အောင် ဆွဲဆောင်မှု ရှိနေတာကြောင့် ဖာဂူဆန်နေရာကို ဆက်ခံဖို့ ကမ်းလှမ်းမှုအပေါ် အရမ်း ဂုဏ်ယူခဲ့ရပါတယ်။
ပေါ်တို၊ အင်တာမီလန်၊ စပါးစ်နှင့် ရိုမားတို့ကိုလည်း ကိုင်တွယ်ခဲ့ဖူးတဲ့ မော်ရင်ဟိုက "အဓိကအကြောင်းရင်းကတော့ ဘောလုံးကို ချစ်ခြင်းအတွက်ပါ။ နောက်တစ်ခုက ကလပ်တစ်ခုအပေါ်ထားတဲ့ ချစ်ခြင်းအတွက်ပါ။ ဒါက ဘောလုံးအပေါ် ထားတဲ့ ချစ်ခြင်းထက် အရေးကြီးတယ်လို့ ထင်တယ်။ အခြေခံအားဖြင့် ပြောရရင်တော့ ရီးရဲလ်မက်ဒရစ်ကို ကိုင်တွယ်ပြီးတဲ့နောက်မှာတော့ ကျွန်တော်ဟာ ချစ်ခြင်းခံရဖို့ လိုအပ်နေတယ်လို့ ခံစားခဲ့ရတယ်။ ကျွန်တော့်အတွက် ဆာအဲလက်စ်ဖာဂူဆန်ရဲ့နေရာကို ဆက်ခံနိုင်မယ့် အခွင့်အရေး ဆုံးရှုံးရမှုက ကြီးမားတဲ့ ဆုံးရှုံးမှုပါ။ ဒါပေမယ့် နှလုံးသားနဲ့ ဆုံးဖြတ်ခဲ့တာ ဖြစ်လို့ နောင်တမရပါဘူး"လို့ ပြောကြားသွားပါတယ်။
မော်ရင်ဟိုဟာ ၂၀၁၃ ခုနှစ်မှာ စတမ်းဖို့ဒ်ဘရစ်ချ်သို့ ဒုတိယအကြိမ်မြောက် ပြန်ရောက်လာချိန်မှာ ပရီးမီးယားလိဂ်ဖလားနှင့် လိဂ်ဖလားတို့ ထပ်မံ ရယူနိုင်ခဲ့ပါတယ်။

ချဲလ်ဆီးနောက်ခံလူချာလိုဘာအား ကိုမို ခေါ်ယူအားဖြည့်လာ
===================

အီတလီကလပ်ကိုမိုဟာ ချဲလ်ဆီးမှ နောက်ခံလူထရီဗိုချာလိုဘာအား ပေါင်သန်း ၃၀ ကျော်အထိ မြင့်မားတဲ့ ပြောင်းရွှေ့ကြေးဖြင့် ခေါ်ယူလာပါတယ်။
အသက် ၂၇ နှစ်ရှိ အင်္ဂလန်နောက်ခံလူဟာ လာမယ့်ရာသီတွင် ချန်ပီယံလိဂ်ဝင်ခွင့် ရရှိထားတဲ့ ဖာဘရီဂက်စ်ကိုင်တွယ်နေတဲ့ ကိုမိုနှင့် ၅ နှစ်စာချုပ်ချုပ်ဆိုလာပါတယ်။
ချဲလ်ဆီးဟာ ချာလိုဘာအတွက် ပြောင်းရွှေ့ကြေး ပေါင် ၂၅.၇ သန်း ရရှိလာမှာ ဖြစ်ပြီး နောက်ထပ် ပေါင် ၅.၁ သန်းကို ထပ်ဆောင်းအနေဖြင့် ထပ်မံ ရရှိလာပါမယ်။
ချာလိုဘာဟာ အင်္ဂလန်အတွက် ၂ ပွဲကစားထားသူ ဖြစ်ပြီး ကမ္ဘာ့ဖလားပြိုင်ပွဲတွင် တတိယရရှိခဲ့တဲ့အသင်းတွင် နောက်ကျရွေးချယ်ခြင်းခံခဲ့ရသူ ဖြစ်ပါတယ်။
သူဟာ ကလေးဘဝကတည်းက ချဲလ်ဆီးသို့ ရောက်လာခဲ့တာ ဖြစ်ပြီး နှစ်ပေါင်းနှစ်ဆယ်ကျော်အကြာမှာ စွန့်ခွာလာတာလည်း ဖြစ်ပါတယ်။
သူဟာ ချဲလ်ဆီးအတွက် ပြိုင်ပွဲအရပ်ရပ်တွင် ၁၅၁ ပွဲကစားပေးခဲ့ကာ ၂၀၁၈ ခုနှစ် အက်ဖ်အေဖလား၊ ၂၀၂၅ ခုနှစ် ကွန်ဖရင့်လိဂ်ဖလား၊ ၂၀၂၅ ခုနှစ် ကလပ်ကမ္ဘာ့ဖလားအပါအဝင် ဆုဖလား ၅ လုံး ဆွတ်ခူးနိုင်ခဲ့ပါတယ်။
သူဟာ ဟက်ဒါဖီးလ်တောင်း၊ အစ္ဝှစ်ချ်၊ လိုရီယန့်၊ ခရစ္စတယ်ပဲလေ့စ်သို့လည်း အငှားဖြင့် သွားကစားခဲ့ဖူးပါတယ်။

ယနေ့ ရွှေဈေးနဲ့ နိုင်ငံခြားငွေလဲနှုန်းများ
( ၂၀၂၆ - ဩဂုတ် ၁၄ ၊ နံနက် ၁၀ နာရီ)

#ရွှေဈေး
-ကမ္ဘာ့ရွှေဈေး
တအောင်စ ၄၃၂၀ ဒေါ်လာ
ရန်ကုန်တိုင်းရွှေလုပ်ငန်းရှင်များအသင်း (YGEA) ရဲ့ရွှေစျေးကွက် အဖွင့်ဈေးနှုန်း
- အကယ်ဒမီ မီးလင်းရွှေ တကျပ်သား
၇,၀၅၀,၀၀၀ ကျပ်
ပြင်ပ အရောင်းအဝယ်ဖြစ်တဲ့ ရွှေဈေးနှုန်း
-အခေါက်ရွှေ တကျပ်သား (ပြင်ပဈေးကွက်)
ရောင်းဈေး ၁၀,၀၆၀,၀၀၀ ကျပ်
ဝယ်ဈေး ၁၀,၀၂၀,၀၀၀ ကျပ်
-၁၅ ပဲရည် တကျပ်သား
ရောင်းဈေး ၉,၆၆၀,၀၀၀ ကျပ်
ဝယ်ဈေး ၉,၆၂၀,၀၀၀ ကျပ်
* စနစ်သစ်
(၁ိ - ၁၆.၃၂၉၃၂၅ ဂရမ် = ၁၂၀ ရွေး)
-အခေါက်ရွှေ တကျပ်သား (ပြင်ပဈေးကွက်)
ရောင်းဈေး ၉,၉၄၀,၀၀၀ ကျပ်
ဝယ်ဈေး ၉,၉၀၀,၀၀၀ ကျပ်
-၁၅ ပဲရည် တကျပ်သား
ရောင်းဈေး ၉,၅၄၀,၀၀၀ ကျပ်
ဝယ်ဈေး ၉,၅၀၀,၀၀၀ ကျပ်
“လက်ရှိ ရွှေဈေးကွက်အတွင်း ဈေးနှုန်းအတက်အကျ မငြိမ်သေးတဲ့အတွက် ရောင်းမှား၊ ဝယ်မှား မဖြစ်ဖို့ သတိပြုစေလိုပါတယ်။”
(ရွှေဈေးနှုန်းများ အချိန်နှင့်အမျှ ပြောင်းလဲနိုင်သည်။)
#နိုင်ငံခြားငွေလဲလှယ်နှုန်း
-မြန်မာနိုင်ငံတော်ဗဟိုဘဏ် ရည်ညွှန်းငွေလဲနှုန်း
အမေရိကန် တဒေါ်လာ - ၃၆၆၃ ကျပ်
ပြင်ပပေါက်စျေး
-အမေရိကန်ဒေါ်လာ‌
ရောင်းဈေး - ၄၄၂၀ ကျပ်
ဝယ်ဈေး - ၄၃၁၀ ကျပ်
-စင်္ကာပူဒေါ်လာ
ရောင်းဈေး - ၃၄၅၅ ကျပ်
ဝယ်ဈေး - ၃၃၆၅ ကျပ်
-ယူရို
ရောင်းဈေး - ၅၁၀၅ ကျပ်
ဝယ်ဈေး - ၄၉၇၅ ကျပ်
-ထိုင်းဘတ်
ရောင်းဈေး - ၁၃၃.၃၃ ကျပ်
ဝယ်ဈေး - ၁၂၉.၈၇ ကျပ်
-မလေးရှားရင်းဂစ်
ရောင်းဈေး - ၁၀၈၈ ကျပ်
ဝယ်ဈေး - ၁၀၆၄ ကျပ်
-တရုတ်ယွမ်
ရောင်းဈေး - ၆၅၉ ကျပ်
ဝယ်ဈေး - ၆၄၄ ကျပ်
-ဂျပန်ယန်း
ရောင်းဈေး - ၂၇.၇၇ ကျပ်
ဝယ်ဈေး - ၂၇.၀၅ ကျပ်
-အိန္ဒိယရူပီး
ရောင်းဈေး - ၄၆.၃၉ ကျပ်
ဝယ်ဈေး - ၄၅.၁၈ ကျပ်
-ကိုရီးယားဝမ်
ရောင်းဈေး - ၃.၁၄ ကျပ်
ဝယ်ဈေး - ၃.၀၆ ကျပ်
-စတာလင်ပေါင်
ရောင်းဈေး - ၅၉၇၅ ကျပ်
ဝယ်ဈေး - ၅၈၂၀ ကျပ်
-ဩစတြေးလျဒေါ်လာ
ရောင်းဈေး - ၃၁၂၀ ကျပ်
ဝယ်ဈေး - ၃၀၄၀ ကျပ်
-ကနေဒါဒေါ်လာ
ရောင်းဈေး - ၃၁၈၀ ကျပ်
ဝယ်ဈေး - ၃၀၉၅ ကျပ်
-ဟောင်ကောင်ဒေါ်လာ
ရောင်းဈေး - ၅၆၆ ကျပ်
ဝယ်ဈေး - ၅၅၃ ကျပ်
-ယူအေအီး
ရောင်းဈေး - ၁၂၁၀ ကျပ်
ဝယ်ဈေး - ၁၁၈၂ ကျပ်
ငွေလဲနှုန်းများ အချိန်နှင့်အမျှ ပြောင်းလဲနိုင်သည်။
***သတ်မှတ်ဈေးအတိုင်း အရောင်းအဝယ်မလုပ်ပါက အရေးယူခံရနိုင်သည်။

စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီ
*********************************************
🇲🇲 ရည်ညွှန်းလက်လီဈေးနှုန်းများ
💢ရန်ကုန်မြို့
💢မန္တလေးမြို့
💢နေပြည်တော်
💢တိုင်းဒေသကြီး/ ပြည်နယ်မြို့တော်များ

စစ်ဘေးသင့် မြန်မာနိုင်ငံအထက်ပိုင်းတွင် ရေဘေးကြောင့် သေဆုံးသူ ၂၅ ဦးအထိ ရှိလာ
ရေဘေးနှင့် စစ်ဘေး အလူးအလဲခံနေရသည့် မြန်မာနိုင်ငံအထက်ပိုင်းတွင် ရေဘေးကြောင့် သေဆုံးသူ ၂၅ ဦး အထိ ရှိလာပြီဟု အမျိုးသားညီညွတ်ရေးအစိုးရ (NUG)၊ လူသားချင်းစာနာထောက်ထားရေးနှင့် ဘေးအန္တရာယ် ဆိုင်ရာ စီမံခန့်ခွဲရေးဝန်ကြီးဌာနက ထုတ်ပြန်လိုက်သည်။


မြန်မာနိုင်ငံ အထက်ပိုင်းဒေသများတွင် ရက်ဆက် မိုးသည်းထန်စွာ ရွာသွန်းခြင်းနှင့် ဆည်ရေများ ဖောက်ထုတ် လိုက်ခြင်းတို့ကြောင့် တိုင်းနှင့် ပြည်နယ် ၄ ခုရှိ မြို့နယ် ၂၁ ခုတွင် အဆိုးရွားဆုံး ရေကြီးရေလျှံမှုနှင့် ရင်ဆိုင်နေရ ပြီး သေဆုံးသူ ၂၅ ဦးအထိ မြင့်တက်လာကြောင်း NUG က ဆိုသည်။

ဩဂုတ်လ ၁၂ ရက်နေ့ စာရင်းများအရ စစ်ကိုင်း၊ မန္တလေး၊ မကွေးနှင့် ဧရာဝတီတိုင်းတို့တွင် ရေဘေးကြောင့် ပျောက်ဆုံးနေသူ ၈ ဦးရှိပြီး စုစုပေါင်း လူဦးရေ ၄၅၂,၆၆၃ ဦးခန့် ဘေးဒုက္ခကြုံတွေ့နေရသည်။

ထို့ပြင် ရေဘေးကြောင့် သေဆုံးသူ အရေအတွက်လည်း ဆက်တိုက် တိုးလာနေပြီး NUG ၏ ဩဂုတ် ၁၁ ရက် စာရင်းတွင် စစ်ကိုင်းတိုင်းအတွင်း ကျွန်းလှမြို့နယ်တွင် ၈ ဦး၊ ဒီပဲယင်းမြို့နယ်တွင် ၇ ဦး၊ ကောလင်းမြို့နယ် တွင် ၃ ဦး သေဆုံးပြီး ၂ ဦး ပျောက်ဆုံး၊ တန့်ဆည်မြို့နယ်တွင် ၂ ဦး၊ ရွှေဘို၊ ကန့်ဘလူနှင့် ခင်ဦးမြို့နယ်တို့တွင် ၁ ဦးစီ သေဆုံးခဲ့ကြောင်း ဖော်ပြထားသည်။

ယခုအခါ စစ်ကိုင်းတိုင်းသည် အိမ်ထောင်စု ၅၁,၈၅၉ စုမှ လူဦးရေ ၂၂၇,၄၉၁ ဦးဖြင့် ထိခိုက်ဆုံးရှုံးမှု အဆိုးရွားဆုံး ခံစားနေရကာ ရေဘေးသင့် ဒေသများတွင် ရေဘေးအပြင် စစ်ကောင်စီတပ်၏ လေကြောင်းတိုက်ခိုက်မှု အန္တရာယ်ကိုပါ ပူးတွဲစိုးရိမ်နေရကြောင်း မြေပြင်၌ အကူအညီပေးနေသူများနှင့် ဒေသခံများက ပြောသည်။

ရွှေဘိုမြို့ခံတစ်ဦးက “စစ်ရှောင်စခန်းတွေရော ရွာတွေရောပါ ရေမြုပ်ကုန်တာ။ စစ်ရှောင်တဲတွေဆို ရေထဲမျော ပါကုန်လို့ ပြေးစရာ မြေမရှိတော့ဘူး။ လမ်းတံတားတွေလည်း ကျိုး၊ ဖုန်းလိုင်းနဲ့ လျှပ်စစ်မီးတွေလည်း ပြတ် နေတော့ ကူညီရေးအဖွဲ့တွေနဲ့ ချိတ်ဆက်ရတာ အတော်ခက်တယ်။ ဒါ့အပြင် ကျနော်တို့ ဒေသကို ရေဘေးကြား ထဲ စစ်ကောင်စီက လေကြောင်းကပါ ဗုံးကြဲမှာကို စိုးရိမ်နေရတော့ ဒုက္ခက နှစ်ထပ်ကွမ်းဖြစ်နေကြတာ။ ခင်ဦးဘက်ဆိုလည်း လေကြောင်းက ဗုံးကြဲတာတွေ ကြားနေရတာဆိုတော့ဗျာ” ဟု ပြောသည်။

လက်ရှိတွင် စစ်ကိုင်းတိုင်းအတွင်းရှိ မြောင်နှင့် မင်းကင်း၊ မန္တလေးတိုင်းမှ မြင်းခြံနှင့် ညောင်ဦး၊ ပဲခူးတိုင်းမှ တောင်ငူနှင့် မကွေးတိုင်းမှ ဧရာဝတီမြစ်ကမ်းဘေး မြို့နယ်များသို့ မြစ်ရေများ ဆက်လက် စိုးရိမ်ရေမှတ်အထက် ရောက်ရှိနေသဖြင့် ကူညီကယ်ဆယ်ရေးလုပ်ငန်းများကို အရေးပေါ် ဆောင်ရွက်နေရသည်ဟု NUG က ဆိုသည်။

ထို့ပြင် စိုက်ပျိုးမြေဧက ထောင်ပေါင်းများစွာ ရေဝင်ပျက်စီးထားသည့်အပြင် အဓိကအားဖြင့် သက်ကြီးရွယ်အို များ၊ နာတာရှည်ရောဂါသည်များ၊ ကိုယ်ဝန်ဆောင်များနှင့် ကလေးသူငယ်များအတွက် အာဟာရနှင့် ဆေးဝါး စောင့်ရှောက်မှုများ အရေးတကြီး လိုအပ်နေသည်။

ရေဘေး၌ အကူအညီပေးနေသည့် ခင်ဦးဒေသခံ အမျိုးသားတစ်ဦးကလည်း “ငွေကြေးလွှဲရတာ ခက်တာရယ်၊ လမ်းတွေပိတ်ကုန်လို့ ကုန်ပစ္စည်းဝယ်ရတာ ကြန့်ကြာတာတွေက အဓိက အခက်အခဲပါပဲ။ ကလေးတွေနဲ့ သက် ကြီးရွယ်အိုတွေအတွက် အာဟာရနဲ့ ဆေးဝါးတွေက လုံးဝမလုံလောက်တော့တဲ့ အနေအထား ဖြစ်နေတယ်” ဟု လက်ရှိ အခြေအနေကို ပြောပြသည်။

မိုးလေဝသနှင့် ဇလဗေဒ ညွှန်ကြားမှုဦးစီးဌာန၏ ထုတ်ပြန်ချက်များအရ ဘင်္ဂလားပင်လယ်အော် မြောက်ပိုင်းနှင့် ရခိုင်ကမ်းရိုးတန်း၊ မုတ္တမပင်လယ်ကွေ့တို့တွင် မိုးတိမ်တောင်များ စက်ဝိုင်းသဖွယ် ဖြစ်ပေါ်နေသဖြင့် လာမည့် ၃ ရက်အတွင်း ချင်းတောင်တန်းများတွင် မိုးထပ်မံ သည်းထန်စွာ ရွာသွန်းကာ စစ်ကိုင်းတိုင်းအောက်ပိုင်းနှင့် ရခိုင် ပြည်တို့တွင် လျှပ်တစ်ပြက်ရေကြီးခြင်းနှင့် မြေပြိုခြင်းများ ထပ်မံဖြစ်ပေါ်လာနိုင်သည်။

ကရင်ပြည်ရှိ သံလွင်မြစ်ဝအနီး၊ ရခိုင်ပြည်ရှိ ကုလားတန်နှင့် လေးမြို့မြစ်၊ ပဲခူးတိုင်းရှိ စစ်တောင်းမြစ်တို့တွင် လည်း မြစ်ရေများ စိုးရိမ်ဖွယ် မြင့်တက်နေသည့်အတွက် အနီးဝန်းကျင်မှ ပြည်သူများအနေဖြင့် ရေဘေး အန္တရာယ်ကို ကြိုတင်ပြင်ဆင်ထားကြရန် ဒေသအသီးသီးရှိ တာဝန်ရှိသူများက သတိပေးနှိုးဆော်ထားသည်။

တရုတ်နိုင်ငံရှိ ကျွန်ုပ်၏ဘဝမျှဝေခြင်း


တရုတ်နိုင်ငံ ယူနန်ပြည်နယ်၊ ရွှေလီမြို့ကို ကျွန်တော် ရောက်လာတာ သုံးနှစ်ကျော်ပြီ။ မြန်မာနိုင်ငံဘက်က နယ်စပ်ကို ဖြတ်ပြီး ဒီမြို့ကို ပထမဆုံး ဝင်လာတဲ့နေ့ကို အခုထိ မှတ်မိနေသေးတယ်။ အဲဒီအချိန်မှာ ကျွန်တော်က မန္တလေးတိုင်းဘက်က ထုတ်လုပ်မှုလိုင်းအလုပ်သမားတစ်ယောက်ပဲ။ အလုပ်အကိုင် တည်ငြိမ်ဖို့၊ မိသားစုအတွက် ဝင်ငွေကောင်းကောင်း ရဖို့ ရွှေလီကို လာခဲ့တာ ဖြစ်တယ်။

ရွှေလီမြို့ဟာ နယ်စပ်မြို့ဆိုပေမယ့် လှုပ်ရှားမှု အရမ်းများတယ်။ မနက်ခင်း ၆ နာရီလောက်ဆိုရင် လမ်းပေါ်မှာ ဆိုင်ဖွင့်တဲ့သူတွေ၊ အလုပ်သွားတဲ့သူတွေ၊ မော်တော်ဆိုင်ကယ်နဲ့ အစားအသောက်ပို့တဲ့သူတွေကို တွေ့ရတယ်။ ကျွန်တော်တို့ ထုတ်လုပ်မှုလိုင်းအလုပ်သမားတွေက မနက်စာကို လမ်းဘေးဆိုင်မှာ ဝယ်စားပြီး အလုပ်ခွင်ကို သွားကြတယ်။ တရုတ်အစားအစာကို အစပိုင်းမှာ မရင်းနှီးပေမယ့် အခုတော့ 米线 (မီးရှန်း) နဲ့ 包子 (ပေါင်ဇ်) ကို မနက်တိုင်းစားဖြစ်နေပြီ။

ကျွန်တော် အံ့ဩခဲ့တာက ရွှေလီရဲ့ သယ်ယူပို့ဆောင်ရေးစနစ်ပဲ။ မြို့ထဲမှာ ဘတ်စ်ကားတွေ သန့်ရှင်းပြီး အချိန်မှန်တယ်။ Taxi ခေါ်ရင်လည်း မိုဘိုင်းဖုန်းက app နဲ့ ခေါ်လို့ရတယ်။ အလုပ်ပြီး ညနေဘက် အိမ်ပြန်ချိန်မှာ shared electric bike တွေ ငှားစီးရတာ အရမ်းအဆင်ပြေတယ်။ QR code ကို scan လုပ်ပြီး ချက်ချင်းစီးလို့ရတာကို ပထမဆုံးမြင်တုန်းက ကျွန်တော် တကယ်အံ့ဩခဲ့တယ်။

တရုတ်နိုင်ငံမှာ မိုဘိုင်းငွေပေးချေမှုစနစ်က နေ့စဉ်ဘဝထဲမှာ အရမ်းအရေးကြီးတယ်။ WeChat Pay နဲ့ Alipay ကို ကျွန်တော်တို့လည်း အသုံးပြုတတ်လာကြတယ်။ လက်ဖက်ရည်တစ်ခွက်ဝယ်တာကနေ ဆောက်လုပ်ရေးပစ္စည်းဝယ်တာအထိ ဖုန်းတစ်လုံးနဲ့ အကုန်ရှင်းလို့ရတယ်။ ငွေသားကို မကိုင်ရတာကြောင့် လုံခြုံတယ်လို့လည်း ခံစားရတယ်။ မြန်မာနိုင်ငံမှာလည်း အနာဂတ်မှာ ဒီလိုစနစ်တွေ ပိုပြီးကျယ်ပြန့်လာမယ်လို့ မျှော်လင့်မိတယ်။

ကိုယ်အလုပ်လုပ်တဲ့ နေရာမှာ မြန်မာလူမျိုးတွေလည်း ရှိတယ်၊ တရုတ်အလုပ်သမားတွေလည်း ရှိတယ်။ ဘာသာစကားအခက်အခဲ ရှိပေမယ့် အလုပ်လုပ်ရင်းနဲ့ နားလည်လာကြတယ်။ တချို့တရုတ်လုပ်ဖော်ကိုင်ဖက်တွေက မြန်မာစကား နည်းနည်းတတ်လာပြီး “မင်္ဂလာပါ” လို့ နှုတ်ဆက်တတ်ကြတယ်။ ကျွန်တော်တို့လည်း တရုတ်စကား နည်းနည်းနဲ့ ပြန်ပြောကြတယ်။ အဲဒီလို သေးသေးလေးကစပြီး လူချင်းနီးစပ်လာတာကို ခံစားရတယ်။

ရွှေလီမှာ နေထိုင်တဲ့ မြန်မာအများစုက အလုပ်ကြိုးစားကြတယ်။ တချို့က စားသောက်ဆိုင်မှာ အလုပ်လုပ်တယ်၊ တချို့က ဈေးရောင်းတယ်၊ တချို့က ကုန်တင်ကားမောင်းတယ်။ အားလပ်ရက်တွေမှာ မြန်မာဘုန်းကြီးကျောင်းကို သွားပြီး အချင်းချင်း တွေ့ဆုံကြတယ်။ အိမ်လွမ်းစိတ်ကို အဲဒီလိုပဲ ဖြေဖျောက်ကြတာ များတယ်။

တရုတ်နိုင်ငံသားအများစုက ကျွန်တော်တို့အပေါ် ဖော်ရွေကြတယ်လို့ ကျွန်တော် ခံစားရတယ်။ အလုပ်ခွင်မှာ လက်ဖက်ရည်တိုက်တာ၊ အစားအသောက် မျှဝေတာ၊ နေမကောင်းရင် စိုးရိမ်မေးမြန်းတာမျိုးတွေ ကြုံဖူးတယ်။ နယ်စပ်မြို့ဖြစ်တာကြောင့်လည်း မြန်မာလူမျိုးကို အကျွမ်းတဝင် ရှိနေကြပုံရတယ်။

ဒါပေမယ့် နိုင်ငံခြားမှာ အလုပ်လုပ်ရတာက အမြဲလွယ်ကူတာတော့ မဟုတ်ဘူး။ မိသားစုနဲ့ ဝေးရတာ၊ ဘာသာစကားအခက်အခဲ၊ အလုပ်ပင်ပန်းတာတွေ ရှိတယ်။ ဒါပေမယ့် ကျွန်တော် ရွှေလီမှာ နေထိုင်ရင်း နည်းပညာ၊ စည်းကမ်း၊ မြို့ပြစနစ်တွေက လူနေမှုဘဝကို ဘယ်လောက်ပြောင်းလဲပေးနိုင်တယ်ဆိုတာ မြင်လာရတယ်။

တစ်နေ့နေ့မှာ မြန်မာနိုင်ငံလည်း ငြိမ်းချမ်းပြီး အလုပ်အကိုင်ကောင်းတွေ ပိုများလာမယ်လို့ ကျွန်တော် မျှော်လင့်တယ်။ လူငယ်တွေ နိုင်ငံခြားထွက်ပြီး အလုပ်ရှာဖို့ မလိုတော့ဘဲ ကိုယ့်နိုင်ငံထဲမှာပဲ ဘဝတည်ဆောက်နိုင်မယ့် အခြေအနေ ရောက်လာစေချင်တယ်။ ရွှေလီမှာ ကျွန်တော် သင်ယူခဲ့ရတဲ့ အရာတွေ—အလုပ်ကြိုးစားမှု၊ နည်းပညာအသုံးချမှု၊ မြို့ပြစီမံခန့်ခွဲမှု—တွေက တစ်နေ့ မြန်မာနိုင်ငံအတွက်လည်း အကျိုးရှိလာမယ်လို့ ယုံကြည်နေမိတယ်။