အာဆီယံ ကျေးလက်ဒေသဖွံ့ဖြိုးရေးနှင့် ဆင်းရဲမှုပပျောက်ရေးဆိုင်ရာ ဝန်ကြီးအဆင့် အစည်းဝေး မြန်မာပါဝင်တက်ရောက်

ဖွံ့ဖြိုးတိုးတက်ရေးလုပ်ငန်းစဉ်များတွင် ဒေသခံပြည်သူများ၏ ပါဝင်ခွင့်၊ ဆုံးဖြတ်ခွင့်ကို အလေးထားဆောင်ရွက်ရန် ပံ့ပိုးပေးနေ
ထိုင်းနိုင်ငံ ဘန်ကောက်မြို့ ၌ ဒီဇင်ဘာ ၉ ရက်မှ ၁၂ ရက်အထိ ကျင်းပသည့် ၁၄ ကြိမ်‌မြောက် အာဆီယံကျေးလက်ဒေသဖွံ့ဖြိုးရေး နှင့် ဆင်းရဲမှု ပပျောက်ရေးဆိုင်ရာ ဝန်ကြီးအဆင့်အစည်းအဝေးနှင့် ဆက်စပ်အစည်းဝေးများကို သမဝါယမနင့်ကျေးလက်ဖွံဖြိုးရေးဝန်ကြီးဌာန ဒုတိယဝန်ကြီး ဦးသိုက်စိုးဦးဆောင်သည့် ကိုယ်စားလှယ်အဖွဲ့က တက်ရောက်ခဲ့ကြောင်း သိရသည်။
အဆိုပါအခမ်းအနားတွင် ကျေးလက်ဒေသဖွံ့ဖြိုးရေးနှင့် ဆင်းရဲမှုလျှော့ချရေးလုပ်ငန်းစဉ်များတွင် အောင်မြင်စွာ ဆောင်ရွက်နိုင်ခဲ့သော INGOs၊ NGOs နှင့် Private Sectorsများအား ဆုချီးမြှင့်ရာ မြန်မာနိုင်ငံအနေဖြင့် Organization for Building Better Society(BBS) နှင့် Pro Engineering Co.Ltd တို့က (၇)ကြိမ်မြောက် အာဆီယံကျေးလက်ဒေသဖွံ့ဖြိုးရေးနှင့်ဆင်းရဲမှုပပျောက်ရေးဆိုင်ရာ ခေါင်းဆောင်မှုအရည်ချင်းဆုကိုလည်း ရရှိခဲ့ကြောင်း သိရသည်။
ထိုနောက် ဒီဇင်ဘာ(၁၂)ရက်နေ့ အစည်းအဝေးကို ဒုတိယဝန်ကြီးဦးဆောင်သည့် ကိုယ်စားလှယ်အဖွဲ့တက်ရောက်ခဲ့ခြင်းလည်း ဖြစ်သည်။
ကျေးလက်ဒေသဖွံဖြိုးရေးမဟာဗျုဟာသည် ကျေးလက်လူထု အားစွမ်းဆောင်ရည် မြှင့်တင့်ပေးခြင်းဖြင့် တီထွင်ဆန်းသစ်မှုများဆောင်ရွက်ရန် လမ်းညွှန်ပေးကာ အားလုံးပူးပေါင်းပါဝင်သည့် ကျေးလက်ဒေသ အသွင်ကူးပြောင်းရေး အတွက် စီးပွားရေးပြောင်းလဲမှုများကို ဖြစ်ပေါ်စေကြောင်း ဒုတိယဝန်ကြီး ဦးသိုက်စိုးက ဆွေးနွေးပြောကြားခဲ့သည်။
ထိုပြင် ဖွံ့ဖြိုးတိုးတက်ရေးလုပ်ငန်းစဉ်များ၌ ဒေသခံပြည်သူများ၏ ပါဝင်ခွင့်၊ ဆုံးဖြတ်ခွင့်၊ ဦးဆောင်ခွင့်များကို အလေးထားဆောင်ရွက်ရန်၊ ကျေးရွာလူထုကို ၄င်းတို့ကိုယ်တိုင်အရေးပါသော အခြေခံအဆောက်အုံ တည်ဆောက်ရေးလုပ်ငန်းများကို ဖော်ထုတ်သတ်မှတ်ရန်၊ ဦးစားပေးသတ်မှတ်ရန်နှင့် စီမံခန့်ခွဲနိုင်ရန် အခွင့်လမ်းများ ပံပိုးပေးလျက်ရှိကြောင်းလည်း ဒုတိယ၀ဝန်ကြီး ဦးသိုက်စိုးက ပြောသည်။
ထို့နောက် အာဆီယံ အဖွဲ့ဝင်နိုင်ငံများက တက်ရောက်လာသည့် ပြည်ထောင်စုဝန်ကြီးများ၊ ဒုတိယဝန်ကြီးများက အမှာစကားပြောကြားခဲ့ပြီး အစည်းအဝေးအစီရင်ခံစာများနှင့် မှတ်တမ်းတင်ခြင်းများဆောင်ရွက်ခဲ့ကြောင်း သိရသည်။

ဖွံ့ဖြိုးမှုနောက်ကျနေသော ဒေသခံများ၏မျက်နှာကို စာနာထောက်ထားကာ တည်ငြိမ်အေးချမ်းမှုကို အားလုံးကဝိုင်းဝန်းကြိုးပမ်းပေးကြရန် နိုင်ငံတော်ယာယီသမ္မတ တိုက်တွန်း

လက်နက်ကိုင်ပြဿနာများကြောင့် ထိခိုက်ဆုံးရှုံးမှုအများဆုံးသည် ဖွံ့ဖြိုးမှုအားနည်းသော တိုင်းနှင့်ပြည်နယ်များသာဖြစ်
ပြည်ထောင်စုကြီးငြိမ်းချမ်းရေးအတွက် NCA လမ်းကြောင်းအတိုင်းလျှောက်လှမ်းရေးနှင့်ပတ်သက်၍ နိုင်ငံတော် ယာယီသမ္မတ၊ နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ၊ ဗိုလ်ချုပ်မှူးကြီးမင်းအောင်လှိုင်မှ ယနေ့ ဒီဇင်ဘာ ၁၅ ရက်တွင်ကျရောက်သည့် (၅၁) နှစ်မြောက် ရခိုင်ပြည်နယ်နေ့အခမ်းအနားသို့ပေးပို့သည့် သဝဏ်လွှာ၌ ရေးသားပြောဆိုခဲ့ခြင်းဖြစ်သည်။
ရခိုင်ပြည်နယ်သည် လမ်းပန်းဆက်သွယ်ရေးမှအစ အဘက်ဘက်၌အခက်အခဲများစွာရှိ၍ အစိုးရအဆက်ဆက်မှ ရခိုင်ပြည်နယ်ဖွံ့ဖြိုးတိုးတက်ရေးကို ယခုအချိန်အထိအလေးထားဆောင်ရွက်ခဲ့ရာ ယခင်ထက် အဆပေါင်းများစွာပြောင်းလဲတိုးတက်လျက်ရှိသည်ဟု ပြောသည်။
ထိုသို့ ပြောင်းလဲတိုးတက်လာသော်လည်း အကြမ်းဖက်အဖွဲ့များ၏ အကြမ်းဖက်လုပ်ရပ်များကြောင့် တိုင်းရင်းသားများ၏ လူမှုစီးပွားအခြေအနေများကို ပိုမိုဆိုးရွားဆင်းရဲဒုက္ခရောက်ခဲ့ကြရပြီး ၎င်းတို့သည် ပါတီစုံဒီမိုကရေစီလမ်းကြောင်းပေါ်တွင် လျှောက်လှမ်းပြီး ပြည်ထောင်စုကြီးကို အတူတကွတည်ဆောက်ရန်ထက် တသီးတခြားရပ်တည်လိုစိတ်ကိုသာ ရှေ့တန်းတင်လာကြသည်ဟု ပြောသည်။
လက်နက်ကိုင်အကြမ်းဖက်နည်းဖြင့် မိမိတို့လိုလားချက်ကိုတောင်းဆို၍မရနိုင်ဘဲ နိုင်ငံရေးစားပွဲဝိုင်းသို့ရောက်လာပြီး ငြိမ်းချမ်းစွာဖြေရှင်းသောနည်းဖြင့်သာ ပဋိပက္ခများကိုပြေလည်စေမည်ဖြစ်၍ လက်နက်ကိုင်လမ်းစဉ်ကိုစွန့်လွှတ်ကာ လမ်းကြောင်းမှန်ပေါ်ရောက်ရှိကြရေး တိုက်တွန်းလိုသည်ဟု ပြောသည်။
လက်နက်ကိုင်ပြဿနာများကြောင့် ထိခိုက်ဆုံးရှုံးမှုအများဆုံးသည် ဖွံ့ဖြိုးမှုအားနည်းသော တိုင်းနှင့်ပြည်နယ်များသာဖြစ်နေကာ နိုင်ငံ၏ဝေးလံလှသော ကျေးလက်ဒေသများ တည်ငြိမ်အေးချမ်းပါက ဖွံ့ဖြိုးတိုးတက်မှုရှိမည်ဖြစ်၍ အကြမ်းဖက်ဖြစ်စဉ်များကြောင့် ဆင်းရဲဒုက္ခခံစားနေရပြီး ဖွံ့ဖြိုးမှုနောက်ကျနေသော ဒေသခံများ၏မျက်နှာကိုစာနာထောက်ထားကာ တည်ငြိမ်အေးချမ်းမှုကို အားလုံးကဝိုင်းဝန်းကြိုးပမ်းပေးကြရန် တိုက်တွန်းမှာကြားလိုသည်ဟု ပြောသည်။
ပြည်ထောင်စုကြီးငြိမ်းချမ်းရေးအတွက် NCA လမ်းကြောင်းအတိုင်းလျှောက်လှမ်းခြင်းသာ မိမိတို့အားလုံးမျှော်လင့်ထားသည့် အေးချမ်းသာယာသောနိုင်ငံတော်ကြီးကိုတည်ဆောက်နိုင်မည်ဖြစ်၍ ပြည်ထောင်စုစိတ်ဓာတ်အရင်းခံကာ နိုင်ငံရေးနည်းလမ်းအရတွေ့ဆုံဆွေး နွေးအဖြေရှာခြင်းဖြင့်သာအောင်မြင်နိုင်မည်ဖြစ်ရာ နိုင်ငံတော်အနေဖြင့် ဆွေးနွေးမှုများကိုဖိတ်ခေါ်ပြီး ငြိမ်းချမ်းရေးတံခါးကိုအမြဲဖွင့်ကြိုဆိုလျက်ရှိသည်ဟု နိုင်ငံတော်ယာယီသမ္မတက ပြောကြားခဲ့သည်။

မကြာမီကျင်းပပြုလုပ်မည့် ရွေးကောက်ပွဲအောင်မြင်စွာကျင်းပနိုင်ရန် ဒေသလုံခြုံမှုနှင့် တည်ငြိမ်အေးချမ်းမှုရှိရန် အဓိကလိုအပ်

မကြာခင်ကျင်းပပြုလုပ်မည် ပါတီစုံဒီမိုကရေစီအထွေထွေရွေးကောက်ပွဲကို အောင်မြင်စွာကျင်းပရေးတွင် ဒေသလုံခြုံမှုနှင့် တည်ငြိမ်အေးချမ်းမှုရှိရန် အဓိကလိုအပ်လျက်ရှိကြောင်း မြန်မာနိုင်ငံယာယီသမ္မတနိုင်ငံတော် လုံခြုံရေးနှင့် အေးချမ်းသာယာရေးကော်မရှင် ဥက္ကဋ္ဌ ဗိုလ်ချုပ်မှုးကြီးမင်းအောင်လှိုင်က ပြောသည်။
ယနေ့ (ဒီဇင်ဘာ ၁၅ ရက်) ကျရောက်သည့် (၅၁) နှစ်မြောက် ရခိုင်ပြည်နယ်နေ့ အခမ်းအနားသို့ ပေးပို့သည့် သဝဏ်လွှာမှာ မြန်မာနိုင်ငံယာယီသမ္မတနိုင်ငံတော် လုံခြုံရေးနှင့် အေးချမ်းသာယာရေးကော်မရှင် ဥက္ကဋ္ဌ ဗိုလ်ချုပ်မှုးကြီးမင်းအောင်လှိုင်က အထက်ပါအတိုင်း ထည့်သွင်းပြောကြားခဲ့ခြင်းဖြစ်သည်။
မဲဆန္ဒရှင်ပြည်သူများအနေဖြင့် အထွေထွေရွေးကောက်ပွဲလုပ်ငန်းစဉ်များအောင်မြင်ပြီး ပြည်သူများလိုလားတောင့်တသည် ပါတီစုံဒီမိုကရေစီနစ်ကို စည်းကမ်းတကျ အောင်မြင်စွာလျှောက်လှမ်းနိုင်ရေးအတွက် ပြည်သူတစ်ရပ်လုံးက ပူးပေါင်းပါဝင်သည့်နှင့်အမျှ လျင်မြန်စွာအောင်မြင်နိုင်မည်ဖြစ်ကြောင်း ယာယီသမ္မတက ပြောသည်။
ရွေးကောက်ပွဲအပိုင်း (၁) ကို ဒီဇင်ဘာ (၂၈) ရက်နေ့၌ စတင်ကျင်းပမည်ဖြစ်ပြီး ၁၂ ရက်သာလိုအပ်တော့ကြောင်း သိရသည်။
အပိုင်း (၂) ကို ၂၀၂၆ ဇန်နဝါရီ ၁၁ ရက်နေ့မှာ ကျင်းပမည်ဖြစ်ကြောင်းလည်း ပြည်ထောင်စုရွေးကောက်ပွဲကော်မရှင်က အသိပေးထုတ်ပြန်ထားသည်။
အဆိုပါ အပိုင်း (၁) နှင့် (၂) ၏ မြို့နယ် ၂၀၂ မြို့နယ်အတွင်းက စုစုပေါင်း ရပ်ကွက် (၁၆၁) ရပ်ကွက်၊ ကျေးရွာအုပ်စု (၂၇၇၀) စုစုပေါင်း (၂၉၃၁) ခုတွင် ကျင်းပနိုင်ခြင်းမရှိကြောင်း ရွေးကောက်ပွဲကော်မရှင်က အသိပေးထုတ်ပြန်ထားသည်။

မရမ်းကုန်းမြို့နယ်ရှိ အင်ဂျင်ဂိုထောင်တွင် Level 1 အဆင့် မီးလေ-ာင်မှုဖြစ်ပွားခဲ့

မရမ်းကုန်းမြို့နယ်၊ (၁) ရပ်ကွက် နဝဒေးလမ်းရှိ အင်ဂျင်ဂိုထောင်တခု ယနေ့ (ဒီဇင်ဘာ ၁၅) နံနက်ပိုင်းက မီးလေ-ာင်မှုဖြစ်ပွါးခဲ့သည်။
Level 1 အဆင့် မီးလေ-ာင်မှု ဖြစ်ပြီး မီးလေ-ာင်မှုကြောင့် အင်ဂျင်ဂိုထောင်အတွင်း ပျ-က်စီးဆုံးရှုံးမှုများရှိခဲ့သည်ဟု ရောက်ရှိခဲ့သူများထံမှ သိရသည်။

ရခိုင်ပြည်နယ် ဖွံ့ဖြိုးတိုးတက်ရေးအတွက် ထောက်ပံငွေကျပ် (၁၀) ဘီလီယံ ခွင့်ပြုထား

နိုင်ငံတော်အစိုးရအနေဖြင့် ရခိုင်ပြည်နယ် ဖွံ့ဖြိုးတိုးတက်ရေးအတွက် ဆောင်ရွက်နိုင်ရန် ထောက်ပံငွေကျပ် (၁၀) ဘီလီယံကို ခွင့်ပြုထားကြောင်း မြန်မာနိုင်ငံယာယီသမ္မတ နိုင်ငံတော်လုံခြုံရေးနှင့် အေးချမ်းသာယာရေးကော်မရှင် ဥက္ကဌ ဗိုလ်ချုပ်မှုးကြီးမင်းအောင်လှိုင်က ပြောသည်။
ယနေ့ကျရောက်သည့် (၅၁) နှစ်မြောက် ရခိုင်ပြည်နယ်နေ့ အခမ်းအနားသို့ ပေးပို့သည့်သဝဏ်လွှာတွင် မြန်မာနိုင်ငံယာယီသမ္မတ နိုင်ငံတော်လုံခြုံရေးနှင့် အေးချမ်းသာယာရေးကော်မရှင် ဥက္ကဌ ဗိုလ်ချုပ်မှုးကြီးမင်းအောင်လှိုင်က အထက်ပါအတိုင်း ထည့်သွင်းပြောကြားခဲ့ခြင်းဖြစ်သည်။
ရခိုင်ပြည်နယ် ဖွံ့ဖြိုးတိုးတက်ရေးအတွက် စိုက်ပျိုးရေးလုပ်ငန်း၊ မွေးမြူရေးလုပ်ငန်း၊ သမဝါယမနှင့် စက်မှုလက်မှုလုပ်ငန်းများကို ဆောင်ရွက်နိုင်ရန် နိုင်ငံစီးပွားဖွံ့ဖြိုးတိုးတက်ရေး မတည်ရန်ပုံငွေမှ ထောက်ပံငွေကျပ် (၁၀) ဘီလီယံကို ခွင့်ပြုထားခြင်းဖြစ်ကြောင်း ယာယီသမ္မတက ပြောသည်။
အဆိုပါ မတည်ငွေကို တောင်သူဦးကြီးများ၊ မွေးမြူရေးလုပ်ငန်းလုပ်ကိုင်သူများ၊ သမဝါယမအသင်းများနှင့် စက်မှုလက်မှုလုပ်ငန်းဆောင်ရွက်သူများကို ခွဲဝေဆောင်ရွက်ထားပြီး အကောင်အထည်ဖော်ဆောင်ရွက်နေကြောင်း လည်း မြန်မာနိုင်ငံယာယီသမ္မတ နိုင်ငံတော်လုံခြုံရေးနှင့် အေးချမ်းသာယာရေးကော်မရှင် ဥက္ကဌ ဗိုလ်ချုပ်မှုးကြီးမင်းအောင်လှိုင်က ပြောသည်။
ရခိုင်ပြည်နယ်အတွင်း စိုက်ပျိုးရေးနှင့် မွေးမြူရေးကဏ္ဍကို ဖွံ့ဖြိုးတိုးတက်အောင် မြှင့်တင်ပေးခြင်းသည် လူဦးရေအများစုဖြစ်သော ကျေးလက်နေပြည်သူများ၏ လူမှုစီးပွားဘဝတိုးတက်လာစေမည်ဖြစ်ပြီး နိုင်ငံ၏ အဓိကကုန်ထုတ်လုပ်ငန်းများ မြင့်မားလာစေမည်ဖြစ်ကြောင်းလည်း ယာယီသမ္မတက ပြောကြားခဲ့သည်။
ရခိုင်ပြည်နယ်နှင့် ရခိုင်ဒေသတိုင်းရင်းသားပြည်သူများ အပေါ်ထားရှိသည့် နိုင်ငံတော်၏ စေတနာနှင့် တိုင်းရင်းသားညီနောင်အချင်းချင်း မိသားစုစိတ်ဓါတ်၊ စစ်မှန်သည့် မျိုးချစ်စိတ်ဓါတ်နှင့် ပြည်ထောင်စုစိတ်ဓါတ်ကို မြင်တွေ့ရမည်ဖြစ်ကြောင်းလည်း ယာယီသမ္မတက ပြောသည်။

နိုင်ငံသားစိစစ်ရေးကတ် လက်ဝယ်မရှိသူများအား သက်ဆိုင်ရာနှင့် ဆက်သွယ်ဆောင်ရွက်နိုင်ရန် UEC အကြောင်းကြား

ပြည်သူများ မဲပေးခွင့်မဆုံးရှုံးစေရန် နိုင်ငံသားစိစစ်‌ရေးကတ် လက်ဝယ်မရှိသူများအား သက်ဆိုင်ရာ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန၊ မြို့နယ်ဦးစီးမှူးရုံးများနှင့် ဆက်သွယ်ဆောင်ရွက်ရန် မဲဆန္ဒရှင်ပြည်သူများအား နှိုးဆော်အသိပေးနိုင်ရန် နိုင်ငံရေးပါတီများသို့ ပြည်ထောင်စုကော်မရှင်က အကြောင်းကြားထားကြောင်း သိရသည်။
မဲဆန္ဒရှင်ပြည်သူများအနေဖြင့် သက်ဆိုင်ရာလွှတ်တော်ရွေးကောက်ပွဲ နည်းဥပဒေ ၅၃ (က) နှင့် (ခ) အရ ရွေးကောက်ပွဲကျင်းပသည့်ရက်တွင် သက်ဆိုင်ရာမဲရုံ၌ မဲပေးခွင့်ရရှိရေးအတွက် နိုင်ငံသားစိစစ်ရေးကတ်ပြား၊ အမျိုးသားမှတ်ပုံတင်ကတ်ပြား၊ ဧည့်နိုင်ငံသား သို့မဟုတ် နိုင်ငံသားပြုခွင့်ရလက်မှတ်တို့ပါရှိရမည် ဖြစ်သည်။
ထို့ကြောင့် မဲစာရင်းတွင်ပါဝင်ပြီး အကြောင်းအမျိုးမျိုးကြောင့် နိုင်ငံသားစိစစ်ရေးကတ်များ ပျ-က်စီး၊ ပျေ-ာက်ဆုံး၍ လက်ဝယ်မရှိသူများ မဲပေးခွင့်မဆုံးရှုံးစေရေးအတွက် နိုင်ငံသားစိစစ်ရေးကတ်များ အမြန်ရရှိရေးဆောင်ရွက်နိုင်ရန် မဲဆန္ဒရှင်ပြည်သူများသို့ နိုင်ငံရေးပါတီများမှ နှိုးဆော်ပေးအသိပေးနိုင်ရန်နှင့် သက်ဆိုင်ရာ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနသို့ UEC မှ အကြောင်းကြားခဲ့ကြောင်း သိရသည်။

အမေရိကန်သံတမန်နဲ့ ဇီလန်စကီး၊ ဥရောပခေါင်းဆောင်တွေ ဘာလင်မှာတွေ့မယ်

ယူကရိန်းစစ်ပွဲအဆုံးသတ်ရေးအတွက် အဆင့်မြင့်ဆွေးနွေးပွဲ နောက်ဆုံးအကျော့အတွက် ထရန့်ရဲ့ အထူးသံတမန်ဟာ ယူကရိန်းသမ္မတ ဇီလန်စကီး၊ ဥရောပခေါင်းဆောင်တွေနဲ့ တွေ့ဆုံဆွေးနွေးဖို့ ယခုသီတင်းပတ်ကုန်မှာ ဂျာမနီကို သွားရောက်မှာ ဖြစ်ပါတယ်။
ယူကရိန်းနဲ့ ရုရှားအကြား ကြားဝင်စေ့စပ်ဖို့ အိမ်ဖြူတော်ရဲ့ ကြိုးပမ်းမှုတွေကို ဦးဆောင်နေသော အထူးသံတမန် စတိဗ်ဝစ်အော့ဖ်ဟာ အမေရိကန်ပြည်ထောင်စု အဆိုပြုထားတဲ့ ငြိမ်းချမ်းရေးသဘောတူညီချက်ရဲ့ နောက်ဆုံးပြင်ဆင်မှုတွေကို ဘာလင်မှာ ဆွေးနွေးမှာဖြစ်ပါတယ်။
ထရန့်အစိုးရဟာ ခရစ္စမတ်မတိုင်မီ သဘောတူညီချက်တရပ် ထွက်ပေါ်လာစေဖို့ တွန်းအားပေးနေပြီး မကြာသေးမီရက်သတ္တပတ်တွေအတွင်း ယူကရိန်းနဲ့ ရုရှားကိုယ်စားလှယ်တွေ ဆွေးနွေးပွဲများစွာ ကျင်းပခဲ့ပေမယ့် အောင်မြင်မှုရရှိမယ့် လက္ခဏာအနည်းငယ်သာ ရှိနေခဲ့ပါတယ်။
ဥရောပခေါင်းဆောင်တွေကတော့ ဘာလင်ဆွေးနွေးပွဲသို့ တက်၊ မတက်ကို အတည်မပြုရသေးပါဘူး။ ဗြိတိန်ဝန်ကြီးချုပ် ဆာ ကီယာ စတာမာ၊ ပြင်သစ်သမ္မတ အီမန်နျူရယ် မက်ခရွန်နှင့် ဂျာမန်ဝန်ကြီးချုပ် ဖရိုက်ဒရစ် မာ့ဇ်တို့အားလုံးတက်ရာက်မယ်လို့ အစည်းအဝေးအကြောင်း ပထမဆုံးထုတ်ဖော်ရေးသားခဲ့တ‌ဲ့ Wall Street Journal က ဆိုပါတယ်။
ဒီအစည်းအဝေးဟာ ယူကရိန်းက အချက် ၂၀ ပါ ငြိမ်းချမ်းရေးအစီအစဉ်ရဲ့ ပြင်ဆင်ထားတာတွေကို အမေရိကန်ကို ပေးအပ်ပြီးနောက် ရက်အနည်းငယ်အကြာမှာ ထွက်ပေါ်လာတာပါ။ ယူကရိန်းအရှေ့ပိုင်းရှိ နယ်မြေကံကြမ္မာဟာ ဆွေးနွေးပွဲမှာ အခက်ခဲဆုံးအကြောင်းအရာများထဲမှ တခုအဖြစ် ဆက်လက်တည်ရှိနေပါတယ်။
ယူကရိန်းကတော့ တရားမဝင်သိမ်းပိုက်ခံထားရတဲ့ နယ်မြေများကို ရုရှားလက်အပ်ဖို့ ငြင်းဆိုထားပြီး ရုရှားကလည်း ယူကရိန်းတပ်တွေ ရုပ်သိမ်းခြင်းမရှိရင် ဒွန်ဘတ်စ်ဒေသကို အင်အားသုံး သိမ်းပိုက်မယ်လို့ ဆိုထားပါတယ်။

ရုရှားမှာ မိုင်းရှင်းလင်းရေးအတွက် မြောက်ကိုရီးယားတပ်တွေ စေလွှတ်ခဲ့

ရုရှားနိုင်ငံ ကာ့စ်ဒေသမှာ မိုင်းရှင်းလင်းရေးအတွက် ယခုနှစ်အစောပိုင်းမှာ မြောက်ကိုရီးယားတပ်တွေ စေလွှတ်ခဲ့တယ်လို့ မြောက်ကိုရီးယားခေါင်းဆောင် ကင်ဂျုံအန်က ဒီကနေ့မှာ ပြောပါတယ်။
အင်ဂျင်နီယာတပ်ရင်းတခု ပြန်လည်ရောက်ရှိမှုကို ကင်ဂျုံအန်က ချီးကျူးဂုဏ်ပြုစကား ပြောကြားခဲ့ပြီး သြဂုတ်လမှာ စတင်ခဲ့တဲ့ ရက်ပေါင်း ၁၂၀ ကြာ တပ်ဖြန့်ချထားမှုအတွင်း တပ်ရင်းမှ တပ်ဖွဲ့ဝင်ကိုးယောက် သေဆုံးခဲ့သေဆုံးခဲ့တယ်လို့ ကင်ဂျုံအန်က ဆိုပါတယ်။
သေဆုံးသွားတဲ့ တပ်ဖွဲ့ဝင်တွေကို ဂုဏ်ပြုဆုတံဆိပ်တွေ ပေးအပ်ခဲ့ပါတယ်။ "အရာရှိတွေနဲ့ စစ်သားတွေဟာ မယုံနိုင်လောက်အောင် စိတ်ပိုင်းဆိုင်ရာနဲ့ ရုပ်ပိုင်းဆိုင်ရာ ဝန်ထုပ်ဝန်ပိုးများကို နေ့တိုင်းနီးပါး ကျော်လွှားကာ ကြီးမားတဲ့ သူရဲကောင်းစိတ်ဓာတ်ကို ပြသခဲ့ကြတယ်" သူက ပြောပါတယ်။
တပ်ဖွဲ့ဝင်တွေစာ သုံးလအတွင်း မိုင်းတွေထောင်ထားတဲ့ အန္တရာယ်ဇုန်ကြီးတခုကို ဘေးကင်းလုံခြုံတဲ့ ဇုန်အဖြစ်သို့ ပြောင်းလဲပေးနိုင်တဲ့ အံ့ဖွယ်အမှုတခုကို လုပ်ဆောင်နိုင်ခဲ့တယ်လို့ ကင်ဂျုံအန်က ချီးကျူးပြောဆိုပါတယ်။
တောင်ကိုရီးယားနဲ့ အနောက်နိုင်ငံထောက်လှမ်းရေးအေဂျင်စီတွေရဲ့ အဆိုအရ မြောက်ကိုရီးယားဟာ ယူကရိန်းကို လေးနှစ်နီးပါး ကျူးကျော်မှုအတွင်း ရုရှားဘက်ကနေ တိုက်ပွဲဝင်ဖို့ တပ်ဖွဲ့ဝင်ထောင်ပေါင်းများစွာ စေလွှတ်ခဲ့ပါတယ်။
အပြန်အလှန်အားဖြင့် ရုရှားဟာ မြောက်ကိုရီးယားအတွက် ငွေကြေးအကူအညီ၊ စစ်ရေးနည်းပညာ၊ အစားအစာနဲ့ စွမ်းအင်ထောက်ပံ့မှုများ ပေးအပ်နေပြီး နျူကလီးယားနဲ့ ဒုံးကျည်အစီအစဉ်ကြောင့် ပြင်းထန်တဲ့ နိုင်ငံတကာပိတ်ဆို့မှုတွေကို ရှောင်ရှားနိုင်စေခဲ့ကြောင်း လေ့လာသူတွေက ပြောပါတယ်။

ရုပ်ရှင်ပြခန်း ပြုပြင်ရာက SAGAING CINEMA မီးလောင်ပျက်စီး

စစ်ကိုင်းတိုင်း၊ စစ်ကိုင်းမြို့၊ အိုးဘိုရပ်ကွက် အသင်္ခယာစောယွန်းအဝိုင်းနားမှာရှိတဲ့ SAGAINE CINEMA ရုပ်ရှင်ပြခန်းက မျက်နှာ​ကြက်တွေကို ပြုပြင်ရင်း ဒီကနေ့ ဒီဇင်ဘာ ၁၃ ရက်နေ့ ၁၁ နာရီ ၂၀ မိနစ်အချိန်မှာ မီးလောင်မှုဖြစ်ပွားခဲ့တယ်လို့ သိရပါတယ်။
ငလျင်လှုပ်ခတ်ခဲ့မှုကြောင့် ပြိုကျပျက်စီးခဲ့တဲ့ ရုပ်ရှင်ပြခန်းက မျက်နှာကြက်သံပန်းတွေကို ဝရိန်ဆော်ရာကနေ အနီးမှာရှိတဲ့ အသံလုံ ဆိုးပြားပေါ်ကို မီးပွားလွင့်စင်ကျခဲ့လို့ မီးလောင်ကျွမ်းမှုဖြစ်ခဲ့တယ်လို့ စစ်ကိုင်းခရိုင် မီးသတ်တပ်ဖွဲ့ကနေ သိရပါတယ်။
မီးလောင်မှုဖြစ်စဥ်ကြောင့် ရုပ်ရှင်ပြခန်းအတွင်းက ဆိုဖာထိုင်ခုံ(၃၀၀)လုံး ဆုံးရှုံမှုတန်ဖိုး၃,၇၅၀,၀၀၀)ကျပ်ခန့်၊ ရုပ်ရှင်ပြစက်(၁)လုံး (၁၀,၀၀၀,၀၀၀)ကျပ်ခန့်၊ ပိတ်ကား (၁)ချပ် {၂,၀၀၀,၀၀၀ကျပ်ခန့်၊ အဲယာကွန်း (၆)လုံး (၁,၅၀၀,၀၀၀)ကျပ်ခန့်၊ (၈၀x၄၀)ပေ ရုပ်ရှင်ပြခန်းရှိ မျက်နှာကျက်နှင့် အသံလုံဆိုးပြားများ(၅,၉၇၃,၀၀၀ ကျပ်ခန့် စုစု ပေါင်း(၂၃,၂၂၃,၀၀၀)ကျပ်ခန့် မီးလောင် ဆုံးရှုံးခဲ့တယ်လို့ သိရပါတယ်။
မီးလောင်မှု ဖြစ်ခဲ့တဲ့ SAGAING CINEMA ရုပ်ရှင်ပြခန်းကို ခရိုင်မီးသတ်ဦးစီးမှူး လက်ထောက်ညွှန်ကြားရေးမှူး
ဦးထက်အောင်၊ မြို့နယ်မီးသတ်ဦးစီးမှူး ဦးစီးအရာရှိ ဦးဇော်မြင့်ဟန် တို့ ဦးဆောင်ပြီး မီးသတ်တပ်ဖွဲ့ဝင်တွေနဲ့အတူ ဒေသခံပရဟိတအသင်းအဖွဲ့၊ လူမှုကူညီရေး/ကယ်ဆယ်ရေးအသင်းတွေ ပူးပေါင်းပြီး မီးငြှိမ်းသတ်ခဲ့တာကြောင့်နေ့လယ် ၁၂ နာရီ ၈ မိနစ်မှာ မီးငြှိိမ်းသတ်နိုင်ခဲ့တယ်လို့ မြန်မာနိုင်ငံမီးသတ်တပ်ဖွဲ့ကနေ သိရပါတယ်။
အဲ့ဒီရုပ်ရှင်ပြခန်းဟာ နှစ်ထပ်ခွဲအမြင့်ရှိတာဖြစ်ပြီး မြေညီ ထပ်မှာတော့ စားသောက်ဆိုင်တွေနဲ့ စျေးဆိုင်ခန်းတွေရှိပေမယ့် မီးလောင်ကျွမ်းမှုမဖြစ်ခဲ့ဘဲ ရုပ်ရှင်ပြခန်းအတွင်းမှာသာ မီးလောင်ပျက်စီးခဲ့တာဖြစ်ပါတယ်။
မီးလောင်မှုနှင့်ပတ်သက်ပြီး ရုပ်ရှင်ရုံမန်နေဂျာ ဒေါ်ယဉ်ယဉ်ထွေးကို (ပ)၆၀၁/၂၀၂၅ ရာဇသတ်ကြီး ပုဒ်မ၂၈၅ နဲ့ စစ်ကိုင်းမြို့မ ရဲစခန်းမှာ အမှုဖွင့်အရေးယူ ဆောင်ရွက်ထားတယ်လို့ သိရပါတယ်။
မီးလောင်မှုကြောင့် လူနှင့်တိရစ္ဆာန်ထိခိုက်မှု၊ မီးဘေးဒုက္ခ သည်မရှိဘူးလို့လည်း သိရပါတယ်။
ပြီးခဲ့တဲ့ နိုဝင်ဘာလ ၁၃ ရက်နေ့ကလည်း မန္တလေးမြို့၊ မဟာအောင်မြေမြို့နယ်၊ ၈၆၄၂ လမ်းမှာရှိတဲ့ မဟာအောင်မြေ ရုပ်ရှင်ရုံ လည်း မီးလောင်ခဲ့ပါတယ်။

သင်္ကန်းခြုံပြီး "အိုပါ ဂန်းနား စတိုင် " သီချင်းနဲ့ ဟာသလုပ်ခဲ့တဲ့ "အောင်စိုးမင်း ဆိုင်းအဖွဲ့က ငါးယောက်ကို ပုဒ်မနှစ်ခုနဲ့ ဖမ်းဆီး

ဇာတ်စင်ပေါ်မှာ သင်္ကန်းခြုံပြီး "အိုပါ ဂန်းနား စတိုင် " သီချင်းနဲ့ ဟာသလုပ်ကာ သရုပ်ဖော် ကပြခဲ့တဲ့ " အောင်စိုးမင်း” ဂီတပဒေသာ ဆိုင်းအဖွဲ့က ဆိုင်းဆရာအပါအဝင် ငါးယောက်ကို ဖမ်းဆီးပြီး ရာဇသတ်ကြီး ပုဒ်မ၂၉၄/ ၂၉၅-က နဲ့ အမှုဖွင့် အရေးယူ ဆောင်ရွက်မှု ပြုလုပ်နေတယ်လို့ သိရပါတယ်။
ဒီဇင်ဘာ ၆ ရက်နေ့၊ နေပြည်တော် ၊ ဥတ္တရသီရိမြို့နယ် ၊ ဇလောင်းကျေးရွာရှိ အခမ်းအနား ပွဲတခုမှာ ညပိုင်း တီးမှုတ်က ပြဖျော်ဖြေချိန် ကြာနီကန်ဆရာတော် ရဲ့ အနန္တငါးပါး ရှိခိုးမှု နဲ့ ကိုရီးယား ဂန်းနားစတိုင် သီချင်းတီးလုံးကို ပေါင်းစပ်သရုပ်ဖော်ပြီး ဖျော်ဖြေခဲ့တဲ့အတွက် တောင်ညိုနယ်မြေရဲစခန်းက အမှုဖွင့် အရေးယူခဲ့တာဖြစ်တယ်လို့ သိရပါတယ် ။
ဖမ်းဆီးခံခဲ့ ရသူတွေက ဆိုင်းဆရာ စိုးသိန်း (ခ) အောင်စိုးမင်း ၊ လူရွှင်တော်ဖြစ်သူ စိုးမင်းဦး ၊ထက်လင်းဦး (ခ) မျက်ပြူး၊ ကိုဖြိုး (ခ) ဝေဖြိုးထက် နဲ့ နန်းဝတီ တို့ဖြစ်ပြီး ဒီဇင်ဘာ ၁၃ ရက်နေ့က သူတို့ရဲ့ နေအိမ်တွေမှာ ဖမ်းဆီးရမိခဲ့တာ ဖြစ်ကြောင်း သိရပါတယ်။
" ပွဲကျင်းပတာကလည်း ဆရာတော်တပါးရဲ့ ဘွဲ့တံဆိပ်ရတဲ့ ပွဲမှာ ဖျော်ဖြေတာ ။ဆရာတော်ကို တော့ ခွင့်တောင်းတာ ဘာညာရှိတယ် ကြားတယ်။ သေချာတော့ မသိရသေးဘူး ။ ဗဟိုသဘင်ကလည်း ခေါ်ထားတော့ အဲဒီအတွက် အာမခံပေးတယ် ထင်ပါတယ်။ ပုံမှန်ဆို သာသနာညှိုး နွမ်းစေတဲ့ ပုဒ်မနဲ့စွဲရင် အာမခံမရပါဘူး ။ သူတို့က အရပ်ထဲက ကလေးတွေပါ ။ အဆိုတော်တွေ မလာတဲ့ အချိန်မှာ သူတို့က ဝင်ပြီး ဖျော်ဖြေတဲ့ သဘောမျိုးသိရတယ် ။ ရည်ရွယ်ချက်ရှိရှိ လုပ်တာမျိုးတော့ မဟုတ်ဘူး ။ " လို့ မြန်မာနိုင်ငံ သဘင်အစည်းရုံး (ဗဟို) အလုပ်မှုဆောင် အဖွဲ့ဝင် ဖြစ်သူ ဦးကျော်ဦးက ပြောပါတယ်။
​အဆိုပါအဖွဲ့ကို ဒီဇင်ဘာ ၁၅ ရက်နေ့မှာ မြန်မာနိုင်ငံ သဘင် အစည်းရုံး ဗဟိုကို လာရောက် တွေ့ဆုံဖို့ ခေါ်ထားပြီး ဖြစ်စဥ် အခြေအနေကို စုံစမ်းမေးမြန် ဖို့ရှိကြောင်း ဖြစ်စဥ်အပေါ် လိုက်ပြီး သဘင်အစည်းရုံး ဗဟိုကလည်း စည်းကမ်းနဲ့အညီ အရေးယူ တာမျိုးပြု လုပ်သွားမှာ ဖြစ်တယ်လို့ သိရပါတယ်။
လက်ရှိ အမှုဖွင့်ထား တဲ့ ရာဇသတ်ကြီး ပုဒ်မ ၂၉၄ ဟာ အာမခံရှိနိုင်တဲ့ ပုဒ်မဖြစ်ပြီး ထောင်ဒဏ် သုံးလ ဖြစ်စေ ၊ ငွေဒဏ်ဖြစ်စေ ဒဏ်နှစ်ရပ်လုံး ဖြစ်စေ ချမှတ်နိုင်တယ်လို့ ဥပဒေမှာ ပြဌာန်းထားပါတယ်။
သာသနာ ညှိုးနွမ်းစေမှုနဲ့ အမှုဖွင့်ခံရတဲ့ ရာဇသတ်ကြီး ပုဒ်မ ၂၉၅ ( က) ကတော့ အာမခံမရနိုင်တဲ့ ပုဒ်မ ဖြစ်ပြီး ထောင်ဒဏ် နှစ်နှစ် ဖြစ်စေ ၊ ငွေဒဏ်ဖြစ်စေ နှစ်ရပ်လုံးကို ချမှတ်နိုင်တယ် လို့ သိရပါတယ်။
သဘင်အဖွဲ့အစည်းတွေအနေနဲ့ ကပြဖျော်ဖြေ တင်ဆက်တဲ့အခါ ဘာသာရေး၊ ယဉ်ကျေးမှု ကို ထိခိုက်စေမယ့် သရုပ်ပျက် အပြုအမူ၊ အပြောအဆို တွေကို ရှောင်ရှားကြဖို့ မြန်မာနိုင်ငံ သဘင် အစည်းအရုံး (ဗဟို)က နိုဝင်ဘာ ၂၆ ရက်မှာ သတိပေး ထုတ်ပြန် ထားတာ တွေ့ရ ပါတယ် ။
ဒါအပြင် သဘင် အဖွဲ့အစည်းတွေ အနေနဲ့ လှည့်လည်က ပြဖျော်ဖြေတဲ့အခါ မိမိတို့ ဇာတ်ရုံ၊ ဆိုင်း စတဲ့ ဖျော်ဖြေရေး ဧရိယာအတွင်းကို မသက်ဆိုင်သူတွေ ဝင်ရောက် မလာစေရေး အတွက် ဇာတ်အဖွဲ့ တည်ထောင်သူ၊ မန်နေဂျာ၊ အဖွဲ့ရဲ့ တာဝန်ရှိသူ တွေအနေနဲ့ စနစ်တကျ ကြပ်မတ်ဆောင်ရွက်ဖို့ အပါအဝင် စည်းကမ်းပိုင်း အားနည်းချက်ကြောင့် မလိုလားအပ်တဲ့ ပြဿနာတွေ မဖြစ်ပေါ်စေရေး အတွက် အထူး ဂရုပြုဖို့ သတိပေးထားပါတယ် ။
နောက်ပြီး ဇာတ်အဖွဲ့ တည်ထောင်သူ ၊ မန်နေဂျာ၊ အဖွဲ့ ရဲ့ တာဝန်ရှိသူတွေ အနေနဲ့ မိမိတို့ အဖွဲ့ ရဲ့ သဘင် အနုပညာရှင် အပေါ် စည်းကမ်းတကျ ကာကွယ်ထိန်း သိမ်းနိုင်ရေး အလေးထား ဆောင်ရွက်ရန် ၊ ဖျော်ဖြေရေး ပြုလုပ်ရာ နေရာတိုင်းကို တည်ထောင်ခွင့်၊ သဘင် အစည်းအရုံး ဝင်ကတ်၊ လူဦးရေစာရင်း စာချူပ်မိတ္တူတွေ တပါတည်း ယူဆောင်သွားဖို့ပါ အသိပေးထားပါတယ်။