ယူနိုက်တက်ပထမအသင်းအတွက် ကစားခွင့်မရသေးတဲ့ ဆယ်ကျော်သက်ကစားသမားကို ဩစတြေးလျအသင်း ရွေးချယ်လာ
=======================

သူဟာ စီနီယာဘောလုံးပွဲတစ်ပွဲမှ မကစားရသေးပါဘူး။ သူဟာ နွေရာသီကမှ ယူနိုက်တက်သို့ ပြောင်းလာခဲ့တာပါ။ သူဟာ ဩစတြေးလျအသင်း ပထမဆုံးအကြိမ် ကမ္ဘာ့ဖလားခြေစစ်ပွဲ အော်မြင်တဲ့ ၂၀၀၆ ခုနှစ်တုန်းက မွေးတောင် မမွေးသေးပါဘူး။
ဒါပေမယ့် အသက် ၁၈ နှစ်ရှိ ညာနောက်ခံလူဂျိမ်းစ်အိုဗီရီဟာ အမေရိကန်တွင် ဗင်နီဇွဲလား၊ ကိုလံဘီယာတို့နှင့် ကစားမယ့် ဩစတြေးလျအသင်းရဲ့ ခြေစမ်းပွဲစဉ်များအတွက် လူစာရင်းမှာ ရွေးချယ်ခြင်းခံလာရပြီ ဖြစ်ပါတယ်။
စနေနေ့တုန်းက လိဒ်နှင့် ကစားတဲ့ ယူနိုက်တက်ရဲ့ ယူ-၁၈ ပွဲစဉ်မှာ ပါဝင်ကစားခဲ့တဲ့ အိုဗီရီဟာ လာမယ့် နိုင်ငံတကာခြေစမ်းပွဲစဉ်များတွင် ရွေးချယ်ခြင်းခံလာရမှုနှင့်အတူ စီနီယာပွဲတစ်ပွဲမျှ မကစားရသေးခင်မှာဘဲ ကမ္ဘာ့ဖလားပြိုင်ပွဲ ကစားခင့်ရလာဖို့ ရှိနေပါတယ်။
Perth Glory လူကျော်သက်ကစားသမားဟောင်းဟာ ၂၀၂၃ ခုနှစ်တုန်းက ဒီဗွန်သို့ ပြောင်းကာ ဩစတြေးလျမှ ရောက်လာသူ ဖြစ်ပါတယ်။ သူဟာ South West Peninsula League တွင် Newton Abbot Spurs ပထမအသင်းမှာ ကစားစဉ် ခြေစွမ်းပြနိုင်ခဲ့ပြီးနောက် တစ်နှစ်အကြာ ယူနိုက်တက်အကယ်ဒမီသို့ ပြောင်းခွင့်ရခဲ့ပါတယ်။
သူဟာ ဖနောင့်ဒဏ်ရာကြောင့် တိုးတက်မှု နှောင့်နှေးခဲ့ပေမယ့်လည်း ယူနိုက်တက်ယူ-၁၈ နှင့် ယူနိုက်တက်ယူ-၂၁ အသင်းတို့မှာ သူ့ပါရမီပြသထားနိုင်သလို National League Cup ပွဲစဉ်တွေမှာ စီနီယာပြိုင်ဘက်တွေဖြစ်တဲ့ တမ်ဝတ်၊ ရော့ချ်ဒဲလ်တို့နှင့် ပွဲတွေမှာလည်း ပါဝင်ကစားထားပါတယ်။
အိုဗီရီဟာ လျှင်မြန်တဲ့ ညာနောက်ခံလူဖြစ်ရာ ဗဟိုနောက်ခံလူများကို အကာအကွယ်ပေးနိုင်သလို တိုက်စစ်ကိုလည်း ကောင်းကောင်းလိုက်ပါ ကစားနိုင်သူ ဖြစ်ပါတယ်။
သူဟာ ပြီးခဲ့တဲ့လတုန်းက ချီလီတွင် ကျင်းပတဲ့ ယူ-၂၀ ကမ္ဘာ့ဖလားပြိုင်ပွဲတွင် ဩစတြေးလျယူ-၂၀ အသင်းနှင့်အတူ ကစားခဲ့ပါတယ်။ ဩစတြေးလျယူ-၂၀ ဟာ အုပ်စုအဆင့်ကိုတော့ ကျော်ဖြတ်နိုင်ခဲ့ခြင်း မရှိပါဘူး။
ဩစတြေးလျနည်းပြတိုနီပိုပိုဗစ်က "သူ့က စောင့်ကြည့်ခံရဖို့ ထိုက်တန်သူပါ။ လတ်တလောအနာဂတ်နဲ့ ရေရှည်အတွက် စိတ်တံခါးဖွင့်ပေးထားပါတယ်။ ချီလီမှာ သူ့ကို အနီးကပ် စောင့်ကြည့်ခဲ့တယ်။ အထင်ကြီးခဲ့တယ်။ ယူနိုက်တက်နဲ့ ကောင်းမွန်တဲ့ ဆက်သွယ်မှု ရှိပါတယ်။ ဒီတော့ လေ့ကျင့်ရေးကွင်းမှာ သူတွေ လုပ်နေလဲ သိပါတယ်။ သူဟာ ပထမအသင်းမှာလည်း မကြာခဏ ရွေးချယ်ခံနေရတာပါ"လို့ ပြောကြားသွားပါတယ်။
ဩစတြေးလျနည်းပြပိုပိုဗစ်ဟာ လာမယ့်နိုင်ငံတကာခြေစမ်းပွဲများတွင် အိုဗီရီအပါအဝင် လက်ရွေးစင်အသင်းအတွက် ကစားခွင့်မရဖူးသေးတဲ့ ကစားသမား ၇ ဦးကို ရွေးချယ်ထားပါတယ်။
အိုဗီရီဟာ စကော့တလန်ယူ-၁၉ အသင်းမှာလည်း ကစားခဲ့ဖူးရာ စကော့တလန်အတွက်လည်း ကစားခွင့်ရှိသူ ဖြစ်ပါတယ်။

အရေးပါတဲ့အချက်တစ်ခုတွင် ဘက်ပေးနှင့် ယာမဲလ်တို့ထက် သာလွန်လုပ်ပြထားနိုင်တဲ့ ရက်ဖို့ဒ်
========================

မားကပ်စ်ရက်ဖို့ဒ်ဟာ ယခုရာသီတွင် အရေးပါတဲ့နေရာတစ်ခုတွင် ကိုင်လီယန်ဘက်ပေးနှင့် လာမိန်းယာမဲလ်တို့ထက် ပိုမို ကောင်းအောင် လုပ်ပြထားနိုင်ပါတယ်။
ယူနိုက်တက်စတားဟာ ဘာစီလိုနာတွင် အငှားဖြင့် သွားရောက် ကစားစဉ်အတွင်း ခြေစွမ်းပြနိုင်မှုနှင့်အတူ ချီးကျူးခြင်းများ ခံနေရပါတယ်။
သူဟာ စပိန်တွင် အလျှင်အမြန်ပင် အထိုင်ကျကာ ကစားသမားဘဝ အကောင်းဆုံးပုံစံအား ပြန်လည်တွေ့လာတာလည်း ဖြစ်ပါတယ်။
အသက် ၂၈ နှစ်ရှိ ရက်ဖို့ဒ်ဟာ ယူနိုက်တက်တွင် အမိုရမ်လက်အောက်မှာ ရုန်းကန်ခဲ့ရပြီးနောက် ဇန်နဝါရီလတုန်းက ဗီလာသို့ ခြောက်လအငှားဖြင့် သွားရောက် ကစားခဲ့ရသူလည်း ဖြစ်ပါတယ်။
သူဟာ ဗီလာမှာတုန်းကလည်း ခြေစွမ်းပြနိုင်ခဲ့ပါတယ်။ အထူးသဖြင့် ချန်ပီယံလိဂ်မှာပါ။ အခု ဘာစီလိုနာသို့ ရောက်လာချိန်မှာတော့ ပိုမို လုပ်ပြလာနိုင်ပါတယ်။
ယခု သူဟာ လာလီဂါတွင် ၅ ကြိမ်ဖြင့် ဖန်တီးမှု အများဆုံးကစားသမားအဖြစ် ရပ်တည်နေပါတယ်။
သူဟာ စူပါစတားများဖြစ်ကြတဲ့ ကိုင်လီယန်ဘက်ပေး၊ လာမိန်းယာမဲလ်၊ ဗီနီရှပ်စ်ဂျူနီယာတို့ထက် ဖန်တီးမှုပိုင်းမှာ ပိုမို လုပ်ပြထားနိုင်တာလည်း ဖြစ်ပါတယ်။
အင်္ဂလန်စတားဟာ ယခုရာသီတွင် ဟန်ဆီဖလစ်ရဲ့ ဘာစီလိုနာအတွက် ပြိုင်ပွဲအရပ်ရပ်တွင် ၆ ဂိုးသွင်းထားပါတယ်။ သူဟာ ချန်ပီယံလိဂ် ၄ ပွဲတွင်လည်း နယူးကာဆယ်နှင့်ပွဲမှာ သွင်းယူတဲ့ အနိုင်ဂိုးအပါအဝင် ၄ ဂိုးသွင်းထားပါတယ်။

ယူနိုက်တက်တိုက်စစ်မှူးဆက်စ်ကိုရဲ့ ဒဏ်ရာ ပြင်းထန်ခြင်း မရှိ
=======================

ယူနိုက်တက်တိုက်စစ်မှူးဘင်ဂျာမင်ဆက်စ်ကိုဟာ ဆလိုဗေးနီးယားရဲ့ အရေးပါတဲ့ ကမ္ဘာ့ဖလားခြေစစ်ပွဲများကို လွဲချော်လာပါမယ်။ ဒါပေမယ့် ယူနိုက်တက်က တနင်္ဂနွေနေ့တုန်းက စပါးစ်နှင့် နှစ်ဂိုးစီသရေကျတဲ့ပွဲစဉ်မှ ဘင်ဂျာမင်ဆက်စ်ကိုရဲ့ ဒဏ်ရာမှာ ပြင်းထန်မှု မရှိကြောင်း ဆိုလာပါတယ်။
ဒါ့အပြင် ယူနိုက်တက်က အန်ဂိုလာနှင့် ခြေစမ်းပွဲအတွက် အာဂျင်တီးနားအသင်းနှင့် ပူးပေါင်းလာတဲ့ လီဆန်ဒရိုမာတီနက်ဇ်မှာလည်း ယင်းပွဲတွင် ပါဝင်ကစားလာမှာ မဟုတ်ကြောင်းလည်း ဆိုသွားပါတယ်။
ဆက်စ်ကိုဟာ စပါးစ်နှင့်ပွဲစဉ်တွင် လူစားဝင်ရောက်လာပြီးနောက် မိနစ် ၃၀ ကစားပြီးချိန်တွင် မစ်ကိုဗန်ဒီဗန်ရဲ့ ဖျက်ထုတ်မှုကြောင့် ဒဏ်ရာရရှိခဲ့ပါတယ်။
ပေါင် ၇၃.၇ သန်းတန် တိုက်စစ်မှူးဟာ ကွင်းအတွင်းမှ ဂျိုင်းထောက်အကူမပါဘဲ ထွက်ခွာနိုင်ခဲ့တယ်ဆိုပေမယ့် သက်တောင့်သက်သာ ထွက်ခွာနိုင်ခဲ့တာ မဟုတ်ပါဘူး။
ပွဲအပြီးတွင် ယူနိုက်တက်နည်းပြရူဘင်အမိုရမ်က ဆက်စ်ကိုမှာ ဒူးဒဏ်ရာရရှိခဲ့ခြင်းဖြစ်ရာ ဒဏ်ရာကို ခန့်မှန်းရန် ခက်ခဲကြောင်း ပြောကြားသွားပါတယ်။
ဆက်စ်ကို ဒဏ်ရာရရှိလာမှုနှင့်အတူ ယူနိုက်တက်ဟာ ဒီဇင်ဘာလနှောင်းပိုင်းတွင် တိုက်စစ်သမားများဖြစ်ကြတဲ့ ဘရိုင်ယန်အမ်ဘူမို၊ အာမက်ဒီရယ်လိုနှင့် နူဆာမာ့ဇ်ရာဝီတို့ကိုလည်း အာဖရိကဖလားပြိုင်ပွဲအတွက် စေလွှတ်ရမည်ဖြစ်ရာ စိုးရိမ်စရာ ဖြစ်လာပါတယ်။
ဒါပေမယ့် ယူနိုက်တက်ဟာ ဆက်စ်ကိုရဲ့ ဒဏ်ရာကို စစ်ဆေးမှု အပြည့်အစုံ ပြုလုပ်ပြီးနောက် ဒဏ်ရာမှာ ပြင်းထန်မှု မရှိကြောင်း ဆိုလာပါတယ်။ ဒါပေမယ့် ယူနိုက်တက်ဟာ ဆက်စ်ကိုမှာ ဘယ်လောက် အနားယူရမယ်ဆိုတာ အတိအကျ ပြောဆိုသွားခဲ့ခြင်း မရှိပါဘူး။
ဆက်စ်ကိုဟာ ကမ္ဘာ့ဖလားခြေစစ်ပွဲ ပလေးအော့ဖ်မျှော်လင့်ချက်အတွက် ကစားရမယ့် ကိုဆိုဗို၊ ဆွီဒင်တို့နှင့်ပွဲစဉ်များကို လွဲချော်လာပါမယ်။
တဖက်တွင် ဒဏ်ရာကြောင့် ကာလရှည်ကြာ အနားယူလာခဲ့ရတဲ့ မာတီနက်ဇ်မှာလည်း လေ့ကျင့်ခန်းဆင်းလာနိုင်မှုနှင့်အတူ ယူနိုက်တက်အတွက် ပြန်ကစားရန် နီးစပ်နေပြီ ဖြစ်ပါတယ်။
ယူနိုက်တက်ဟာ နိုင်ငံတကာပွဲကြောင့် လိဂ်နားစဉ်အတွင်း မာတီနက်ဇ်ကို အာဂျင်တီးနားအသင်းနှင့် ပူးပေါင်းစေကာ လေ့ကျင့်ခန်းဆင်းစေမှုကြောင့် အကျိုးကျေးဇူးရရှိလာမယ်လို့ ယုံကြည်မှုနှင့်အတူ လက်ရွေးစင်အသင်းနှင့် ပူးပေါင်းစေခဲပါတယ်။

ဗန်ဒိုက်ရဲ့ ဂိုးအား ခွင့်မပြုခဲ့မှုအတွက် ဒိုင်အဖွဲ့ချုပ်ကို ဆက်သွယ်မေးမြန်းလာတဲ့ လီဗာပူး
====================

လီဗာပူးဟာ တနင်္ဂနွေနေ့တုန်းက မန်စီးတီးအား ၃-၀ ဂိုးဖြင့် ရှုံးနိမ့်တဲ့ပွဲစဉ်မှ ဗာဂယ်ဗန်ဒိုက်ရဲ့ ဂိုးကို ခွင့်မပြုမှု ဆုံးဖြတ်ချက်နှင့်ပတ်သက်ပြီး Professional Game Match Officials Limited အား ဆက်သွယ်ကာ ဖြေရှင်းချက်တောင်းဆိုလာပါတယ်။
မန်စီးတီးတို့ ၁-၀ ဂိုးဖြင့် ဦးဆောင်နေချိန်တွင် ဗာဂယ်ဗန်ဒိုက်က ထောင့်ကန်ဘောမှ တဆင့် ခေါင်းတိုက်ချေပဂိုး သွင်းယူခဲ့ပါတယ်။
ဒါပေမယ့် စည်းကြပ်ဒိုင်က ဘောလုံးလမ်းကြောင်းပေါ်တွင် ရှိနေတဲ့ အင်ဒီရောဘတ်ဆင်မှာ လူကျွံနေမှ မန်စီးတီးဂိုးသမားဒွန်နာရမ်မာကို နှောင့်ယှက်တယ်ဆိုပြီး အလံထောင်ထားခဲ့ပါတယ်။
ယင်းကို VAR က စစ်ဆေးမှု ပြုလုပ်ပြီးနောက် ဂိုးအဖြစ် ခွင့်မပြုခဲ့ပါဘူး။ ဒါ့အပြင် အင်ဒီရောဘတ်ဆင်ဟာ ဂိုးဝင်သွားစေရန်အတွက် ခေါင်းငုံ့ရှောင်မှုလည်း ပြုလုပ်ခဲ့ပါသေးတယ်။
ဒါပေမယ့် လီဗာပူးက ယင်းကို လက်ခံခြင်း မရှိပါဘူး။
ယခုအခါ လီဗာပူးဟာ ပွဲချိန် ၃၈ မိနစ် ဗန်ဒိုက် ဂိုးသွင်းယူမှုအား ရုထောင့်မျိုးစုံမှ ရိုက်ကူးထားတဲ့ ဗီဒီယိုမှတ်တမ်းများကို စုစည်းကာ တင်ပြလာပါတယ်။
ဒါ့အပြင် လီဗာပူးက ယင်းပွဲတွင် VAR ဒိုင်လူကြီးအဖြစ် တာဝန်ထမ်းဆောင်ခဲ့တဲ့ မိုက်ကယ်အိုလီဗာက မည်သည့်အချက်ကြောင့် ဂိုးအဖြစ် ခွင့်မပြုခဲ့သလဲဆိုတာကိုလည်း ဖြေရှင်းချက်တောင်းဆိုသွားပါတယ်။

ပွဲအတွင်း တိုက်စစ်မှူးလုပ်ခ်မန်းနှင့် ပြဿနာတက်ပြီး ရက်အနည်းငယ်အကြာတွင် အတ္တလန္တာနည်းပြရာထူးမှ ဂျူရစ် ထုတ်ပယ်ခြင်းခံလာရ
=====================

အတ္တလန္တာဟာ စီးရီးအေအမှတ်ပေးဇယားအလယ်ပိုင်းတွင် ရုန်းကန်နေရတဲ့အပြင် ဥရောပတွင်လည်း စိတ်ပျက်စရာ ကြုံတွေ့နေရပြီးနောက် နည်းပြအိုင်ဗန်ဂျူရစ်ကို ထုတ်ပယ်လာပါတယ်။
ခရိုအေးရှားလူမျိုးနည်းပြဟာ ဇွန်လတုန်းက ရိုးမားကို ကိုင်တွယ်ရန် ထွက်ခွာသွားတဲ့ ဂက်စ်ပါရီနီရဲ့‌နေရာတွင် အစားထိုးခန့်အပ်ခြင်းခံခဲ့ရသူ ဖြစ်ပြီး စီးရီးအေပွဲ ၁၁ ပွဲတွင် ၂ ပွဲတည်းသာ အနိုင်ရရှိအောင် စွမ်းဆောင်နိုင်ခဲ့ပြီးနောက် ထုတ်ပယ်ခြင်းခံလာရပြီ ဖြစ်ပါတယ်။
သူဟာ ပြီးခဲ့တဲ့အပတ်တုန်းက အိမ်ကွင်းတွင် ဆက်စ်ဆူလိုကို ၃-၀ ဂိုးဖြင့် ရှုံးနိမ့်ချိန်မှာတော့ ထုတ်ပယ်ခြင်းခံလာရပြီ ဖြစ်ပါတယ်။ ယင်းရှုံးပွဲကြောင့် အတ္တလန္တာဟာ စီးရီးအေ ၈ ပွဲဆက် နိုင်ပွဲပျောက်ဆုံးခဲ့ပြီး အမှတ်ပေးဇယားအဆင့် ၁၃ နေရာတွင် ရပ်တည်နေရပါတယ်။
ဂျူရစ်လက်ထက်တွင် ယခင်တုန်းက တိုက်စစ်အားကောင်းတဲ့ အတ္တလန္တာမှာ နည်းဗျူဟာပိုင်း ရှုပ်ထွေးပြီး တိုက်စစ်ပိုင်း အားရစရာ မရှိခဲ့ပါတယ်။
ဆောက်သမ်တန်နည်းပြဟောင်းဟာ အတ္တလန္တာကို ၅ လတည်းသာ ကိုင်တွယ်ခွင့် ရရှိခဲ့ကာ မော်ဒန်ခေတ်တွင် အတ္တလန္တာရဲ့ သက်တမ်းအတိုးဆုံးနည်းပြအဖြစ်လည်း မှတ်တမ်းဝင်သွားပါတယ်။
ဂျူရစ်ဟာ ထုတ်ပယ်ခြင်းမခံရမီ ပြီးခဲ့တဲ့အပတ် ကြားရက်တုန်းက မာဆေးနှင့် ချန်ပီယံလိဂ်ပွဲစဉ်တွင် လူစားလဲလှယ်ခြင်းခံရမှုအပေါ် စိတ်ပျက်နေတဲ့ တိုက်စစ်သမားအဒီမိုလာလုပ်ခ်မန်းနှင့် ကွင်းအတွင်း အချင်းများခဲ့သူလည်း ဖြစ်ပါတယ်။
ဂျူရစ်ဟာ လုပ်ခ်မန်းရဲ့ လက်ကို ဆွဲညှစ်ခဲ့ပြီး နည်းပြအဖွဲဝင်များ ဝင်ရောက်တားဆီးခဲ့ရပါတယ်။
ဂျူရစ်ဟာ ပြီးခဲ့တဲ့ရာသီတုန်းက ဆောက်သမ်တန်ကို လေးလကျော်ကိုင်တွယ်စဉ်တုန်းကလည်း ရလဒ်မကောင်းမှုကြောင့် နုတ်ထွက်ခဲ့ရပါတယ်။

ကာကွယ်ဆေးထိုးထားခြင်း မရှိမှုကြောင့် အန်ဂိုလာပြည်ဝင်ခွင့်မရဘဲ အာဂျင်တီးနားအသင်းမှ နုတ်ထွက်လာရတဲ့ ကစားသမား ၃ ဦး
=====================

မန်စီးတီးတိုက်စစ်မှူးဟောင်းဂျူလီယန်အယ်ဗာရက်အပါအဝင် ကစားသမား ၃ ဦးတို့ဟာ ကာကွယ်ဆေးထိုးထားခြင်း မရှိမှုကြောင့် အာဂျင်တီးနားအသင်းမှ နုတ်ထွက်လာရပါတယ်။
ကမ္ဘာ့ဖလားချန်ပီယံ အာဂျင်တီးနားဟာ သောကြာနေ့တွင် အန်ဂိုလာနှင့် ခြေစမ်းပွဲ ကစားရပါမယ်။
ဒါပေမယ့် ကစားသမားအချို့တို့ဟာ ရယ်စရာကောင်းတဲ့ အကြောင်းပြချက်ဖြင့် ယင်းပွဲကို လွဲချော်လာပါမယ်။
အက်သလက်တီကိုစတားများဖြစ်ကြတဲ့ နာဟူရယ်မိုလီနာ၊ ဒီယေဂိုဆီမြွန်နီရဲ့သားဂူလီယာနိုဆီမြွန်နီနှင့် အသင်းရဲ့ ဂိုးသွင်းဘုရင်အယ်ဗာရက်ဇ်တို့ဟာ အန်ဂိုလာနှင့် ခြေစမ်းပွဲအတွက် ရွေးချယ်ခြင်းခံထားရပါတယ်။
ဒါပေမယ့် ယင်းကစားသမားတို့ဟာ အဝါရောင်အဖျားကာကွယ်ဆေးထိုးထားခြင်း မရှိမှုနှင့်အတူ အာဂျင်တီးနားအသင်းမှ နုတ်ထွက်လိုက်ရပါတယ်။
အဝါရောင်အဖျားမှာ ခြင်းများမှ ကူးစက်တဲ့ ဗိုင်းရပ်စ်ကူးစက်ရောဂါတစ်မျိုး ဖြစ်ပြီး အပျော့စားတုပ်ကွေးကဲ့သို့ ရောဂါမျိုး ဖြစ်ပါတယ်။
အချို့မှာ ယင်းအဖျားကြောင့် အသားဝါခြင်း၊ သွေးထွက်ခြင်း၊ ကိုယ်တွင်းအင်္ဂါပျက်စီးခြင်းစတဲ့ ပြင်းထန်သောရောဂါမျိုးလည်း ဖြစ်စေနိုင်ပါတယ်။
ယင်းရောဂါကို အာဖရိကဒေသအချို၊ တောင်အမေရိကနှင့် ကာရေဘီယံတို့တွင် တွေ့ရပါတယ်။ ဒါပေမယ့် ယင်းရောဂါကို ကာကွယ်ဆေးထိုးထားခြင်းဖြင့် ကာကွယ်နိုင်ပါတယ်။
အန်ဂိုလာအသင်းမှာ နိုင်ငံတကာပွဲစဉ်ကာလအတွင်း အာဂျင်တီးနားတို့ ရင်ဆိုင်ကစားမယ့် တစ်ပွဲတည်းသော ပွဲလည်း ဖြစ်ပါတယ်။
ပြီးလျှင် အာဂျင်တီးနားအသင်းဟာ ဥရောပတွင် စခန်းသွင်းလေ့ကျင့်မှု ပြုလုပ်လာပါမယ်။
ဒူးအရွတ်ဒဏ်ရာကြောင့် ကာလရှည်ကြာ အနားယူခဲ့ရတဲ့ ယူနိုက်တက်နောက်ခံလူလီဆန်ဒရိုမာတီနက်ဇ်မှာ ယူနိုက်တက်အတွက် ကစားနိုင်ခြင်း မရှိသေးပေမယ့်လည်း ကြံ့ခိုင်မှု ပိုမိုကောင်းမွန်လာစေရန်အတွက် အာဂျင်တီးနားအသင်းနှင့် ပူးပေါင်းကာ လေ့ကျင့်ခန်းဆင်းလာပါမယ်။

နောက်ဆုံးရရှိလာတဲ့ ဒဏ်ရာကြောင့် တစ်လကြာ နားရမယ့် ချဲလ်ဆီးစတားလာဗီယာ
=======================

ချဲလ်ဆီးအလယ်တန်းကစားသမားရိုမီယိုလာဗီယာဟာ ပေါင်ကြွက်သားဒဏ်ရာကြောင့် အနည်းဆုံး တစ်လကြာ အနားယူလာရပါတော့မယ်။
အသက် ၂၁ နှစ်ရှိ လာဗီယာဟာ စတမ်းဖို့ဒ်ဘရစ်ချ်သို့ ရောက်လာပြီးနောက် ဒဏ်ရာပြဿနာများနှင့် ဆက်တိုက် ကြုံတွေ့လာခဲ့ရသူလည်း ဖြစ်ပါတယ်။
သူဟာ ပြီးခဲ့တဲ့အပတ်တုန်းက ကွာရာဘက်နှင့် ၂ ဂိုးစီသရေကျတဲ့ ချန်ပီယံလိဂ်ပွဲစဉ်တွင် ပွဲထွက်ကစားခဲ့ပေမယ့်လည်း ပွဲအစ ၄ မိနစ်တွင်ပင် ပေါင်အရှေ့ပိုင်း ကြွက်သားဒဏ်ရာရရှိခဲ့ပါတယ်။
သူဟာ ကလပ်ကမ္ဘာ့ဖလားပြိုင်ပွဲတွင် ဒဏ်ရာရရှိပြီးနောက် ယခုရာသီတွင် ချဲလ်ဆီးအတွက် ၄ ပွဲတည်းသာ ပွဲထွက်ကစားထားနိုင်ပါတယ်။
သူဟာ ၂၀၂၃ ခုနှစ် နွေရာသီတွင် ဆောက်သမ်တန်မှ ပေါင် ၅၃ သန်းဖြင့် ပြောင်းလာပြီးနောက် ဒဏ်ရာပြဿနာများနှင့် ဆက်တိုက် ကြုံတွေ့လာရကာ ၂၉ ပွဲတည်းသာ ကစားထားနိုင်ပြီး ၈၈ ပွဲအထိ လွဲချော်ထားပါတယ်။
သူဟာ တံကောက်ကြော၊ ပေါင်နှင့် အခြားအမည်မသိဒဏ်ရာများနှင့် ရုန်းကန်နေရကာ ချဲလ်ဆီးအတွက် တစ်ပွဲမျှ ပွဲချိန်ပြည့်ကစားထားနိုင်ခြင်း မရှိပါဘူး။
ချဲလ်ဆီးဟာ သူ့ကို တစ်ပတ်လျှင် တစ်ပွဲစီသာ ကစားစေပြီး ဒဏ်ရာပြဿနာမှ ဖြည်းဖြည်းခြင်း ရုန်းထွက်လာနိုင်စေရန် ကြိုးပမ်းလုပ်ဆောင်ပေးနေပါတယ်။
ချဲလ်ဆီးအသင်းခေါင်းဆောင်ရီစီဂျိမ်းစ်မှာလည်း လာဗီယာကဲ့သို့ပင် ဒဏ်ရာပြဿနာကြောင့် ဆက်တိုက် ရုန်းကန်လာခဲ့ရသူပါ။
လာဗီယာဟာ နောက်ဆုံး ရရှိလာတဲ့ ဒဏ်ရာကြောင့် ဘန်လေ၊ ဘာစီလိုနာ၊ အာဆင်နယ်၊ လိဒ်၊ ဘုန်းမောက်၊ အတ္တလန္တာတို့နှင့် ပွဲစဉ်များကို လွဲချော်လာပါမယ်။
ချဲလ်ဆီးဟာ စနေနေ့တုန်းက ဝုဗ်ကို ၃-၀ ဂိုးဖြင့် အနိုင်ရရှိပြီးနောက် အမှတ်ပေးဇယားအဆင့် ၃ နေရာမှာ ရပ်တည်နေပါတယ်။

ဘီဘီစီ၏ မှတ်တမ်းရုပ်ရှင်အတွက် ဒေါ်လာ ၁ ဘီလီယံလျော်ကြေးပေးရန် တရားစွဲမည်ဟု သမ္မတထရမ့်၏ ရှေ့နေက ခြိမ်းခြောက်

ဘီဘီစီ သတင်းဌာနသည် ၂၀၂၁ ခုနှစ်၊ ဇန်နဝါရီ ၆ ရက်နေ့က မစ္စတာထရမ့်ပြောကြားခဲ့သော မိန့်ခွန်းကို "မကောင်းသောသဘောဖြင့်၊ ဂုဏ်သိက္ခာညှိုးနွမ်းစေသော" တည်းဖြတ်မှုများ ပြုလုပ်ထားသည်ဟု သမ္မတထရမ့်၏ရှေ့နေကစွပ်စွဲလိုက်ပြီး၊ ယင်းမှတ်တမ်းရုပ်ရှင်အတွက် ဒေါ်လာ ၁ ဘီလီယံ လျော်ကြေးရလိုမှုဖြင့် ဘီဘီစီသတင်းဌာနအား တရားစွဲမည်ဟု တနင်္လာနေ့တွင် ခြိမ်းခြောက်ခဲ့သည်။

အဆိုပါ ဥပဒေကြောင်းအရ ခြိမ်းခြောက်မှုသည် မစ္စတာထရမ့်၏ ရှေ့နေတစ်ဦးဖြစ်သူ အလီဂျန်ဒရို ဘရီတို(Alejandro Brito) က ဘီဘီစီသတင်းဌာနထံ ပေးပို့ခဲ့သော စာမှ ဆင်းသက်လာခြင်းဖြစ်ပြီး ယင်းစာကို The New York Times သတင်းစာက ရရှိခဲ့သည်။ ယင်းစာတွင် မှတ်တမ်းရုပ်ရှင်အား အလုံးစုံ ရုပ်သိမ်းရန်၊ တောင်းပန်ရန်နှင့် "ဖြစ်ပေါ်ခဲ့သော ထိခိုက်နစ်နာမှုများအတွက် သမ္မတထရမ့်အားသင့်လျော်စွာ လျော်ကြေးပေးရန်" ရှေ့နေများက ပြောသည့်အတိုင်း ငွေကြေးပေးချေမှုများ ပြုလုပ်ရန် တောင်းဆိုထားသည်။

အဆိုပါ တောင်းဆိုချက်များကို မလိုက်နာပါက "သမ္မတထရမ့်သည် ၎င်း၏ ဥပဒေအရနှင့် တရားမျှတမှုဆိုင်ရာ အခွင့်အရေးများအားလုံးကို ကျင့်သုံးရန်မှတစ်ပါး အခြားရွေးချယ်စရာမရှိဘဲ၊ အနည်းဆုံး ဒေါ်လာ ၁,၀၀၀,၀၀၀,၀၀၀ (အမေရိကန်ဒေါ်လာ တစ်ဘီလီယံ) အတွက် ဥပဒေကြောင်းအရ အရေးယူမှုများ အပါအဝင် တရားစွဲဆိုမှုများပြုလုပ်သွားမည်" ဟု ယင်းစာတွင် ဖော်ပြထားသည်။

ဘီဘီစီသတင်းဌာနအနေဖြင့် သောကြာနေ့၊ အရှေ့ပိုင်းစံတော်ချိန် ညနေ ၅ နာရီ နောက်ဆုံးထား၍ အရေးယူဆောင်ရွက်ခြင်းမရှိပါက တရားစွဲဆိုမှုကို စတင်မည်ဟု ဆိုသည်။

"ဘီဘီစီကို အသိပေးထားပြီးဖြစ်ပါတယ်" ဟု စာတွင် ဖော်ပြထားပြီး "ကျေးဇူးပြု၍ လိုက်နာဆောင်ရွက်ပါ" ဟုလည်း ထပ်လောင်းပြောကြားခဲ့သည်။

ဘီဘီစီ၏ ညွှန်ချုပ် တင်မ် ဒေဗီ(Tim Davie) နှင့် သတင်းဌာန၏ အမှုဆောင်အရာရှိချုပ် ဒက်ဘိုရာ တားနက်စ်(Deborah Turness) တို့သည် ယင်းမှတ်တမ်းရုပ်ရှင် တည်းဖြတ်မှုနှင့် ပတ်သက်၍ ဖိအားများ တိုးလာပြီးနောက် တနင်္ဂနွေနေ့တွင် ရာထူးမှ နုတ်ထွက်ခဲ့သည်။

ဘီဘီစီသတင်းဌာနကလည်း ဥပဒေကြောင်းအရ အရေးယူရန် ခြိမ်းခြောက်သည့် စာတစ်စောင် လက်ခံရရှိကြောင်းနှင့် "အချိန်နှင့်တပြေးညီ တုံ့ပြန်မည်" ဟု သူတို့၏ ဝက်ဘ်ဆိုက်မှ ပြောကြားခဲ့သည်။

အဆိုပါ "Trump: A Second Chance?" ဟု အမည်ပေးထားသော မှတ်တမ်းရုပ်ရှင်ကို ပြီးခဲ့သည့်နှစ် အမေရိကန်သမ္မတရွေးကောက်ပွဲမတိုင်မီက ထုတ်လွှင့်ခဲ့ပြီးဖြစ်ကာ ဘီဘီစီသတင်းဌာန၏ အွန်လိုင်းပလေယာမှ ဖယ်ရှားပြီးဖြစ်သည်။

ဘီဘီစီသို့ တနင်္လာနေ့က ပေးပို့သော စာတွင် "ဇန်နဝါရီ ၆ ရက်နေ့ မိန့်ခွန်းမှ ဗီဒီယိုဖိုင်များကို မှတ်တမ်းရုပ်ရှင်တွင် မှားယွင်းစွာ ပေါင်းစပ်ခြင်းဖြင့် မစ္စတာထရမ့်သည် သူ၏နောက်လိုက်များအား အကြမ်းဖက်မှုများ ကျူးလွန်ရန် တိုက်တွန်းနေသည်ဟူသော အထင်အမြင်ဖြစ်‌စေရန်ဖန်တီးခဲ့သည်"ဟု သမ္မတထရမ့်၏ရှေ့နေက ပြောကြားခဲ့သည်။ ဘီဘီစီ စံနှုန်းကော်မတီ၏ အတွင်းရေးမှူးဟောင်း မိုက်ကယ် ပရက်စ်ကော့တ်(Michael Prescott) က ရေးသားခဲ့သော ပေါက်ကြားခဲ့သည့် မှတ်စုကို ယင်းစာတွင် ကိုးကားထားပြီး၊ ၎င်းမှတ်စုသည် ဘီဘီစီ၏ အခြားသော အယ်ဒီတာအဖွဲ့ထုတ်ပြန်ချက်များ၏ ကဏ္ဍများစွာနှင့်အတူ မှတ်တမ်းရုပ်ရှင်ကို တည်းဖြတ်ပုံအား အလွန်အမင်း ဝေဖန်ထားခြင်းဖြစ်သည်။

ဘီဘီစီ၏ ဥက္ကဋ္ဌ မစ္စတာ ရှာ(Mr. Shah) က တနင်္လာနေ့တွင် လွှတ်တော်ကော်မတီသို့ ပေးပို့သော စာတွင်မူ ယင်းမှတ်တမ်းရုပ်ရှင် တည်းဖြတ်မှုအတွက် တောင်းပန်ခဲ့သော်လည်း၊ မစ္စတာ ပရက်စ်ကော့တ်၏ မှတ်စုကိုမူ "ပုဂ္ဂိုလ်ရေးအကောင့်မှ ရေးသားထားခြင်း" ဖြစ်ပြီး ထုတ်လွှင့်သူမှ ဆောင်ရွက်ခဲ့သော "ဆွေးနွေးမှုများ၊ ဆုံးဖြတ်ချက်များနှင့် အရေးယူဆောင်ရွက်မှုများ၏ အပြည့်အစုံကို တင်ပြခြင်းမဟုတ်ပါ" ဟု ချေပပြောကြားခဲ့သည်။

နာပိုလီနည်းပြရာထူးမှ နုတ်ထွက်လာနိုင်ကြောင်း အရိပ်အမြွက်ပြောဆိုလာတဲ့ ကွန်တီ
====================

နာပိုလီနည်းပြအန်တိုနီယိုကွန်တီဟာ စီးရီးအေတွင် ဘိုလော့ဂ်နာကို ရှုံးပွဲ ကြုံတွေ့ခဲ့ပြီးတဲ့နောက် အသင်းအပေါ် ဆိုးဆိုးရွားရွား ဝေဖန်မှု ပြုလုပ်လာကာ ရာထူးမှ နုတ်ထွက်လာနိုင်ကြောင်း အရိပ်အမြွက်ပြောကြားလာပါတယ်။

ချဲလ်ဆီးနှင့် စပါးစ်နည်းပြဟောင်းဟာ အသင်းအတွင်း ကစားသမားများအကြား အချိတ်အဆက်မမိမှု၊ တိုက်ပွဲဝင်စိတ် နည်းပါးနေမှုနှင့်အတူ အသင်းကို ကောင်းမွန်အေင် ဦးဆောင်ထားနိုင်ခြင်း မရှိကြောင်း ပြောကြားလာတာလည်း ဖြစ်ပါတယ်။

နာပိုလီဟာ တနင်္ဂနွေနေ့တုန်းက ဘိုလော့ဂ်နာကို စိတ်ပျက်ဖွယ်ရာ ၂-၀ ဂိုးဖြင့် အရေးနိမ့်ခဲ့ပြီး အမှတ်ပေးဇယားထိပ်ဆုံးနေရာကို ဖယ်ပေးခဲ့ရပါတယ်။

ကွန်တီက "အရာရာတိုင်းမှာ စွမ်းအင်ပိုလိုအပ်နေတယ်။ သူတို့(ဘိုလော့ဂ်နာ)က ကျုပ်တို့ထက် ပို အပြုသဘောဆောင်ပြီး ဆန္ဒပြင်းပြမှုကို ပြသနေတာ စိတ်ပျက်စရာပါ။ ဒါက ကျွန်တော်တို့ကို ရောင်ပြန်ဟပ်လာမှာ။ ဒီပွဲက ဒီနှစ်အစကနေ စပြီး ငါးပွဲမြောက် ရှုံးပွဲ ဖြစ်ပါတယ်။ ဒီတော့ ရောင်ပြန်ဟပ်ဖို့ လိုတယ်။ သူတို့ ကြာသပတေးနေ့ ပွဲကစားခဲ့ရတယ်။ အဆိပ်ခပ်ခံထားရသလိုပဲ။ ကျွန်တော်တို့ ဒီပွဲအတွက် အကောင်းဆုံးပြင်ဆင်ထားတာပဲလေ။ အခုဆို သုံးလေးလ ကျော်လာပြီ။ အသင်းအကြားမှာ ဘာအချိတ်အဆက်မှ မရှိဘူး။ အတူ တိုက်ခိုက်လိုစိတ်လည်း မရိကြဘူး။ ဒီအခြေအနေကို ပြောင်းလဲပစ်လာနိုင်မလား မသေချာပါဘူး။ တစ်ဦးတစ်ယောက်ကို မရည်ညွှန်းလိုပါဘူး။ အားလုံးမှာ တာဝန်ယူမှု အပြည့်ရှိပါတယ်။ ကျွန်တော်က ထိပ်ဆုံးက ပါပါတယ်။ နှလှံးအစားထိုးလုပ်ဖို့ ရွေးချယ်စရာမလိုပါဘူး။ ကျွန်တော်တို့ တစ်ယောက်ချင်းစီတိုင်း တိုက်လို ခိုက်လိုစိတ် ပြန်ရှာတွေ့ဖို့ လိုနေတယ်"လို့ ပြောကြားသွားပါတယ်။

ကွန်တီဟာ နည်းပြဘဝအတွင်း အသင်းရဲ့ ခြေစွမ်းဆိုးရွားချိန်တွင် လူသိရှင်ကြား ပြောင်ပြောင်တင်းတင်း ဝေဖန်လေ့ရိသူ ဖြစ်ပါတယ်။

ဆက်လက်ပြီး ၎င်းက "တစ်ညတည်းနဲ့ အပြောင်းအလဲ ဖြစ်လာဖို့ တွေးခဲ့တယ်။ မမေ့နိုင်စရာ လုပ်ခဲ့တယ်။ ဒါပေမယ့် ဆက်လုပ်ရမယ်။ ငါတို့ မှန်မှန်ကန်ကန်လုပ်ခဲ့လား၊ ပြီးခဲ့တဲ့ရာသီတုန်းကလို ကလဲ့စားချေလိုစိတ် ရှိသေးရဲ့လားလို့ ကိုယ့်ကိုယ်ကို မေးခွန်းထုတ်ရမယ်။ ဒီကောင်တွေဆီမှာ စွမ်းအင် နောက်ထပ် ရှာမတွေ့လို့ စိတ်ပျက်ရတယ်။ ကျုပ်ကိုယ်တိုင်ကညံ့လို့ပါ"လို့ ပြောကြားသွားပါတယ်။