ဖိလစ်ပိုင်အလယ်ပိုင်းရှိ ကျောင်းတွင် သေနတ်ပစ်ခတ်မှုဖြစ်ပွား

ဖိလစ်ပိုင်နိုင်ငံအလယ်ပိုင်း တက်ကလိုဘန်မြို့ ရှိ ကျောင်းတစ်ကျောင်းတွင် တနင်္လာနေ့နံနက်ပိုင်းက သေနတ်ပစ်ခတ်မှုတစ်ခု ဖြစ်ပွားခဲ့ရာ လူ ၃ ဦး သေဆုံးပြီး ၅ ဦး ဒဏ်ရာရရှိခဲ့ကြောင်း ရဲတပ်ဖွဲ့က ပြောကြားခဲ့သည်။
အဆိုပါ ပစ်ခတ်မှုသည် ကျောင်းတွင် စာသင်ကြားနေစဉ် ဒေသစံတော်ချိန် နံနက် ၉ နာရီဝန်းကျင်ခန့်တွင် ဖြစ်ပွားခဲ့ခြင်းဖြစ်ကြောင်း ရဲတပ်ဖွဲ့က ပြောကြားခဲ့သည်။ လူမှုကွန်ရက်စာမျက်နှာများပေါ်တွင် ပျံ့နှံ့နေသော ဗီဒီယိုမှတ်တမ်းများအရ စာသင်ခန်းတစ်ခုအတွင်း သေနတ်သံအများအပြား ထွက်ပေါ်နေစဉ် ကျောင်းသားများနှင့် ဆရာ၊ ဆရာမများက ဘေးကင်းရာသို့ ဝပ်ရှောင်ပြီး ခိုလှုံရာရှာဖွေနေကြသည်ကို တွေ့ရသည်။
အရေးပေါ်တုံ့ပြန်ရေးအဖွဲ့များက ဒဏ်ရာရရှိသူများကို အနီးနားရှိ ဆေးရုံများသို့ အပြေးအလွှား ပို့ဆောင်ပေးခဲ့ကြသည်။
ပစ်ခတ်မှုဖြစ်ပွားပြီး မကြာမီအချိန်အတွင်းမှာပင် သံသယရှိသူ တစ်ဦးကို အခင်းဖြစ်ပွားရာနေရာ၌ ဖမ်းဆီးထိန်းသိမ်းနိုင်ခဲ့ကြောင်း ရဲတပ်ဖွဲ့ကသတင်း ထုတ်ပြန်သည်။
အာဏာပိုင်များအနေဖြင့် ပစ်ခတ်မှုဖြစ်ပွားရသည့် အကြောင်းအရင်း ကို ထုတ်ဖော်ပြောကြားခြင်း မရှိသေးဘဲ ပစ်ခတ်မှုနှင့်ပတ်သက်သည့် အခြေအနေအရပ်ရပ်ကို သိရှိနိုင်ရန်အတွက် စုံစမ်းစစ်ဆေးမှုများ ဆက်လက်လုပ်ဆောင်နေကြောင်း ရဲတပ်ဖွဲ့က ပြောကြားခဲ့သည်။

BIMSTEC အတွင်းရေးမှူးချုပ်တာဝန်ကို မြန်မာနိုင်ငံ လွှဲပြောင်းရယူမည်

မြန်မာနိုင်ငံ၏ အနာဂတ်သည် ပိုမိုပွင့်လင်းလာပြီဖြစ်ပြီး BIMSTEC အဖွဲ့အနေဖြင့် မြန်မာနိုင်ငံနှင့် ပူးပေါင်းဆောင်ရွက်မှုများကို ဆက်လက်တိုးမြှင့်ဆောင်ရွက်သွားမည်ဖြစ်ကြောင်း BIMSTEC အတွင်းရေးမှူးချုပ် H.E. Mr. Indra Mani Pandey က ပြောကြားသည်။
နိုင်ငံတော်သမ္မတ ဦးမင်းအောင်လှိုင်ထံ BIMSTEC အတွင်းရေးမှူးချုပ်က ဇွန် ၂၂ ရက် နံနက်ပိုင်းတွင် လာရောက်ဂါရဝပြုတွေ့ဆုံစဉ် အထက်ပါအတိုင်း ပြောကြားခဲ့ခြင်းဖြစ်သည်။
BIMSTEC အတွင်းရေးမှူးချုပ်က မြန်မာနိုင်ငံတွင် လွတ်လပ်ပြီး တရားမျှတသည့် ပါတီစုံဒီမိုကရေစီ အထွေထွေရွေးကောက်ပွဲကို အောင်မြင်စွာ ကျင်းပနိုင်ခဲ့မှုနှင့် နိုင်ငံတော်သမ္မတအဖြစ် ရွေးကောက်တင်မြှောက်ခံရမှုအပေါ် ဝမ်းမြောက်ဂုဏ်ယူကြောင်း ပြောကြားခဲ့သည်။
ထို့ပြင် နိုင်ငံတော်သမ္မတ ဦးဆောင်သည့် အစိုးရအနေဖြင့် မြန်မာနိုင်ငံနှင့် ပြည်သူများ၏ လူမှုစီးပွားဘဝ ဖွံ့ဖြိုးတိုးတက်ရေးနှင့် တည်ငြိမ်အေးချမ်းရေးအတွက် အောင်မြင်စွာ ဆောင်ရွက်နိုင်မည်ဟု ယုံကြည်ကြောင်းလည်း ပြောကြားခဲ့သည်။
နိုင်ငံတော်သမ္မတ၏ ပြည်ပခရီးစဉ်များသည် ဒေသတွင်းဆက်ဆံရေးများကို ပိုမိုခိုင်မာအားကောင်းစေမည်ဟု ယုံကြည်ကြောင်း BIMSTEC အတွင်းရေးမှူးချုပ်က ပြောကြားခဲ့ပြီး လက်ရှိတွင် မြန်မာနိုင်ငံသည် BIMSTEC အဖွဲ့ဝင်နိုင်ငံများအကြား တက်ကြွစွာ ပူးပေါင်းဆောင်ရွက်နေသည့် နိုင်ငံတစ်နိုင်ငံဖြစ်ကြောင်း ပြောကြားခဲ့သည်။
ထို့အပြင် BIMSTEC အဖွဲ့အနေဖြင့် မကြာမီကာလအတွင်း ထိပ်သီးအစည်းအဝေးများနှင့် ဒေသတွင်းလှုပ်ရှားမှုများကို ဆက်လက်ဆောင်ရွက်သွားမည်ဖြစ်ပြီး မြန်မာနိုင်ငံနှင့် ပူးပေါင်းဆောင်ရွက်မှုများကို ပိုမိုမြှင့်တင်သွားမည်ဖြစ်ကြောင်း ပြောကြားခဲ့သည်။
တွေ့ဆုံစဉ် နိုင်ငံတော်သမ္မတ ဦးမင်းအောင်လှိုင်က BIMSTEC သည် အဖွဲ့ဝင်နိုင်ငံများ၏ ပြည်တွင်းရေးနှင့် နိုင်ငံရေးကိစ္စရပ်များတွင် ဝင်ရောက်စွက်ဖက်မှုမရှိဘဲ ပူးပေါင်းဆောင်ရွက်မှုကောင်းမွန်သည့် ဒေသတွင်းအဖွဲ့အစည်းတစ်ခုဖြစ်ကြောင်း ပြောကြားခဲ့သည်။
ထို့ပြင် မြန်မာနိုင်ငံအနေဖြင့် လွတ်လပ်ပြီး တရားမျှတသည့် ပါတီစုံဒီမိုကရေစီ အထွေထွေရွေးကောက်ပွဲတစ်ရပ် ဖြစ်မြောက်စေရေးအတွက် အကောင်းဆုံးကြိုးပမ်းဆောင်ရွက်ခဲ့ကြောင်းလည်း ပြောကြားခဲ့သည်။
နှစ်ဖက်ဆွေးနွေးမှုတွင် မြန်မာနိုင်ငံ၏ BIMSTEC အဖွဲ့အတွင်း ပူးပေါင်းဆောင်ရွက်မှုအခြေအနေများ၊ လာမည့်နှစ်တွင် မြန်မာနိုင်ငံက BIMSTEC အတွင်းရေးမှူးချုပ်တာဝန်လွှဲပြောင်းရယူမည့်ကိစ္စနှင့် တာဝန်ထမ်းဆောင်စဉ် အဖွဲ့အစည်း၏ လုပ်ငန်းများကို ပိုမိုထိရောက်စွာ ဆောင်ရွက်နိုင်ရေးဆိုင်ရာ အခြေအနေများကို ဆွေးနွေးခဲ့ကြသည်။
ထို့အပြင် BIMSTEC အဖွဲ့ဝင်နိုင်ငံများအနက် ကုန်းတွင်းပိတ်နိုင်ငံများဖြစ်သည့် နီပေါနှင့် ဘူတန်နိုင်ငံတို့၏ ဖွံ့ဖြိုးတိုးတက်ရေးအတွက် ပူးပေါင်းကူညီဆောင်ရွက်ရေး၊ အဖွဲ့ဝင်နိုင်ငံများအချင်းချင်းနှင့် ပြည်သူအချင်းချင်း ထိတွေ့ဆက်ဆံမှုများ ပိုမိုကောင်းမွန်လာစေရေးတို့ကိုလည်း ဆွေးနွေးခဲ့ကြကြောင်း သိရသည်။

ဩစတြေးလျတွင် ကြက်ငှက်တုပ်ကွေး ပိုးရှိသည့် တောရိုင်းငှက်တစ်ကောင်ကို ထပ်မံတွေ့ရှိ

ဩစတြေးလျနိုင်ငံ အနောက်ပိုင်းတွင် တွေ့ရှိရသည့် ဒုတိယမြောက် အသိုက်ပြောင်းငှက်တစ်ကောင်၌ အလွန်အန္တရာယ်များသော H5N1 ကြက်ငှက်တုပ်ကွေး ရောဂါပိုး တွေ့ရှိရကြောင်း အာဏာပိုင်များက အတည်ပြုခဲ့သည်။
ဩစတြေးလျ စိုက်ပျိုးရေး၊ ငါးလုပ်ငန်းနှင့် သစ်တောရေးရာဝန်ကြီး ဂျူလီ ကောလင်းစ် က တနင်္လာနေ့တွင် ကင်ဘာရာမြို့၌ သတင်းထောက်များ ကိုပြောကြားရာတွင် ပြီးခဲ့သည့် ကြာသပတေးနေ့က အနောက်ဩစတြေးလျတောင်ပိုင်းရှိ ကမ်းခြေတစ်ခုတွင် နာမကျန်းဖြစ်နေစဉ် တွေ့ရှိခဲ့သည့် မြောက်ပိုင်း ပင်လယ်စင်ရော်ငှက် တစ်ကောင်ကို စစ်ဆေးခဲ့ရာ အဆိုပါ ပြင်းထန်ရောဂါပိုး ရှိနေကြောင်း တွေ့ရှိရသည်ဟု ဆိုသည်။
အဆိုပါ ဒေသတွင်း၌ပင် ဇွန်လ ၁၄ ရက်က နာမကျန်းဖြစ်လျက် တွေ့ရှိခဲ့သည့် ပင်လယ်စင်ရော်ညို တစ်ကောင်သည် H5N1 ရောဂါပိုးဖြင့် သေဆုံးသွားခဲ့ကြောင်း ဝန်ကြီး ကောလင်းက ပြီးခဲ့သည့် စနေနေ့တွင် သတင်းထုတ်ပြန်ခဲ့ပြီးနောက်၊ ယခုအခါ ဒုတိယမြောက် ရောဂါပိုးရှိသောငှက်ကို ထပ်မံတွေ့ရှိရခြင်းဖြစ်ကာ ယင်းသည် ဩစတြေးလျအဓိကကုန်းမြေ ပေါ်တွင် ပထမဆုံး အတည်ပြုနိုင်ခဲ့သည့် ကူးစက်မှုဖြစ်စဉ်များ ဖြစ်လာသည်။
သို့သော် လက်ရှိအချိန်အထိ တောရိုင်းတိရစ္ဆာန်များ အစုလိုက်အပြုံလိုက် သေဆုံးမှုမျိုး မရှိသေးသကဲ့သို့ ဩစတြေးလျ၏ ကြက်ဘဲမွေးမြူရေး လုပ်ငန်းများနှင့် စိုက်ပျိုးရေးကဏ္ဍများအတွင်းသို့လည်း ယခုရောဂါပိုး ကူးစက်ပြန့်ပွားသွားခြင်း မရှိသေးကြောင်း ဝန်ကြီး ကောလင်းက တနင်္လာနေ့တွင် ဖြည့်စွက်ပြောကြားခဲ့သည်။
၎င်းက “အခု သီးခြားတွေ့ရှိရတဲ့ ငှက်နှစ်ကောင်အပြင် အဲဒီ H5 ကြက်ငှက်တုပ်ကွေးဗိုင်းရပ်စ်ဟာ ဩစတြေးလျရဲ့ တောရိုင်းတိရစ္ဆာန်တွေအကြားမှာ အမြစ်တွယ် အခြေချနေထိုင်သွားခြင်း ရှိမရှိကို သိနိုင်ဖို့ ဆက်လက် စစ်ဆေးဖော်ထုတ်နေပါတယ်” ဟု ပြောကြားခဲ့သည်။
ဩစတြေးလျ၏ အကြီးဆုံး ကြက်ဘဲမွေးမြူရေး ထုတ်လုပ်သူများအနက်တစ်ခုဖြစ်သည့် Ingham's ကုမ္ပဏီက ကြက်ငှက်တုပ်ကွေးကြောင့် ဖြစ်လာနိုင်သည့် ဘေးအန္တရာယ်များကို လျှော့ချနိုင်ရန်အတွက် အနောက်ဩစတြေးလျ ရှိ ၎င်းတို့၏ လုပ်ငန်းလည်ပတ်မှုအားလုံးကို အပြီးအပိုင် ပိတ်ဆို့ကန့်သတ်ခြင်း ပြုလုပ်သွားမည်ဖြစ်ကြောင်း တနင်္လာနေ့နံနက်ပိုင်းတွင် ကြေညာခဲ့သည်။
ဩစတြေးလျ ပတ်ဝန်းကျင်ထိန်းသိမ်းရေးဝန်ကြီး မာရေး ဝပ် ကလည်း ယခုတုပ်ကွေးရောဂါပိုး ပြည်တွင်း၌ ကူးစက်ဖြစ်ပွားလာပါက ထိရောက်စွာ တုံ့ပြန်ဆောင်ရွက်နိုင်ရန်အတွက် နိုင်ငံအတွင်း အကောင်းဆုံး ပြင်ဆင်ထားပြီးဖြစ်ကြောင်း တနင်္လာနေ့နံနက်ပိုင်းတွင် ပြောကြားခဲ့သည်။

တရားမဝင်လျှပ်စစ်ဓာတ်အားသုံးစွဲသည့် မှော်ဘီမြို့ နယ်ရှိ ပလပ်စတစ်လုပ်ငန်း၏ လုပ်ငန်းရှင်အား မှော်ဘီမြို့မရဲစခန်းတွင်အမှုဖွင့်ထား

တရားမဝင်လျှပ်စစ်ဓာတ်အားရယူသုံးစွဲသည့် မှော်ဘီမြို့နယ်ရှိ ပလပ်စတစ်လုပ်ငန်း၏ လုပ်ငန်းရှင်အား မှော်ဘီမြို့မရဲစခန်းတွင်အမှုဖွင့်ထားကြောင်း သိရသည်။
မှော်ဘီမြို့နယ်၊ ဘိုးဒေါနကုန်းကျေးရွာရှိ ပလတ်စတစ်လုပ်ငန်းတွင်အသုံးပြုထားသော မီတာမှာ Cover Seal နှင့် Terminal Seal များပြုပြင်ထားပြီး မီတာအတွင်း Control Circuit ခံ၍ လျှပ်စစ်ဓာတ်အားခိုးယူသုံးစွဲထားကြောင်းကိုတာဝန်ရှိသူများက ဇွန် ၁၆ ရက်တွင်စစ်ဆေးတွေ့ရှိခဲ့ရကြောင်း သိရသည်။
ထိုသို့ ခိုးယူသုံးစွဲမှုကြောင့် လျှပ်စစ်ဓာတ်အား(၃၀၁,၄၃၄)ယူနစ် နစ်နာဆုံးရှုံးခဲ့ရသဖြင့် ကျသင့်သည့် ဓာတ်အားခလျော်ကြေးနှင့် ဒဏ်ကြေးငွေတို့ကို ဇွန် ၁၉ ရက်တွင် ရန်ကုန်လျှပ်စစ်ဓာတ်အားပေးရေးကော်ပိုရေးရှင်းသို့ပေးဆောင်စေခဲ့ကြောင်း သိရသည်။
ထို့ပြင် ပလပ်စတစ်လုပ်ငန်း၏ မီတာအားဖြုတ်သိမ်း၍ လျှပ်စစ်ဓာတ်အားကို မသမာသောနည်းဖြင့်ရယူသုံးစွဲထားသည့် လုပ်ငန်းရှင်အား လျှပ်စစ်ဥပဒေနှင့်အညီ ထိရောက်စွာအရေးယူနိုင်ရေးအတွက် မှော်ဘီမြို့မရဲစခန်းတွင်အမှုဖွင့်လှစ်အရေးယူခဲ့ကြောင်း သိရသည်။
လျှပ်စစ်နှင့် စွမ်းအင်ဝန်ကြီးဌာနက ရန်ကုန်တိုင်းအပါ အဝင် တိုင်းနှင့် ပြည်နယ်များ၌ လျှပ်စစ်ဓာတ်အားရယူသုံးစွဲနေမှုများကို Control Center မှတစ်ဆင့်စောင့်ကြည့်စစ်ဆေး၍ သံသယဖြစ်ဖွယ်တွေ့ရှိပါက မြေပြင်သို့သွားရောက်ပြီး တရားမဝင်ဓာတ်အားသုံးစွဲမှုများကို စုံစမ်းဖော်ထုတ်အရေးယူခြင်း၊ ပြည်သူများ၏ တိကျ စွာသတင်းပေးတိုင်ကြားလာမှုများအပေါ် ထိရောက်စွာစစ်ဆေးအရေးယူခြင်းတို့ဖြင့် လျှပ်စစ်ဓာတ်အားယူနစ်ပျောက်ဆုံးမှုလျော့နည်းကျဆင်းစေရေးအတွက်ဆောင်ရွက်လျက်ရှိကြောင်း သိရသည်။

ရထားလက်မှတ်ခ ၅၀ ရာခိုင်နှုန်းလျှော့ပေါ့အပါအဝင် အကျိုးခံစားခွင့်များ ရရှိမည့် သက်ကြီးရွယ်အိုကတ်ပြား ၇၅ ဦးအား ထုတ်ပေး

ရထားလက်မှတ်ခ ၅၀ ရာခိုင်နှုန်း လျှော့ပေါ့ခံစားခွင့်အပါအဝင် အကျိုးခံစားခွင့်များစွာ ပါဝင်သည့် သက်ကြီးရွယ်အို သက်သေခံကတ်ပြားများကို နေပြည်တော်ရှိ ဇမ္ဗူသီရိမြို့နယ်နှင့် ပျဉ်းမနားမြို့နယ်တို့မှ သက်ကြီးပုဂ္ဂိုလ် ၇၅ ဦးအား ဇွန် ၂၂ ရက် နံနက်ပိုင်းတွင် ထုတ်ပေးခဲ့ကြောင်း သိရသည်။
ယင်းသက်သေခံကတ်ပြားများကို လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန ပြည်ထောင်စုဝန်ကြီး ဒေါက်တာစိုးဝင်းက ပေးအပ်ခဲ့ပြီး သက်ကြီးပုဂ္ဂိုလ်များအား အာဟာရဖြည့်စွက်စာများကိုလည်း ထောက်ပံ့ပေးအပ်ခဲ့သည်။
သက်သေခံကတ်ပြားများကို ဇမ္ဗူသီရိမြို့နယ် အောင်ဇမ္ဗူရပ်ကွက်မှ သက်ကြီးပုဂ္ဂိုလ် ၂၅ ဦး၊ ပျဉ်းမနားမြို့နယ် မင်္ဂလာရပ်ကွက်မှ ၂၀ ဦးနှင့် ရွှေချီရပ်ကွက်မှ ၃၀ ဦး စုစုပေါင်း ၇၅ ဦးအား ထုတ်ပေးခဲ့ခြင်းဖြစ်ကြောင်း သိရသည်။
သက်ကြီးရွယ်အို သက်သေခံကတ်ပြား ရရှိသူများသည် မြန်မာ့မီးရထား လက်မှတ်ဝယ်ယူရာတွင် ကျသင့်ငွေ၏ ၅၀ ရာခိုင်နှုန်း လျှော့ပေါ့ခံစားခွင့် ရရှိမည်ဖြစ်သည်။
ထို့ပြင် အစိုးရဌာနနှင့် အစိုးရအဖွဲ့အစည်းများပိုင် ရုပ်ရှင်၊ ဇာတ်သဘင်၊ အငြိမ့်၊ သီဆိုဖျော်ဖြေပွဲ၊ ပြဇာတ်၊ ပန်းချီ၊ ပန်းပု စသည့် နိုင်ငံပိုင်ဖျော်ဖြေရေးဝန်ဆောင်မှုများတွင်လည်း ဝင်ကြေးအနည်းဆုံး ၅၀ ရာခိုင်နှုန်း လျှော့ပေါ့ခံစားခွင့် ရရှိမည်ဖြစ်ကြောင်း သိရသည်။
ထို့အပြင် အမျိုးသားပြတိုက်သို့ ဝင်ရောက်ကြည့်ရှုရာတွင် ဝင်ကြေးကင်းလွတ်ခွင့် ရရှိမည်ဖြစ်ပြီး သက်ကြီးပုဂ္ဂိုလ်များ ကွယ်လွန်ပါက သင်္ဂြိုဟ်စရိတ် ကင်းလွတ်ခွင့်ကိုလည်း ခံစားရရှိနိုင်မည်ဖြစ်ကြောင်း သိရသည်။

မိုးကောင်းမြို့ရှိ ရေဘေးသင့်သူများကို စားရေရိက္ခာများလိုက်လံထောက်ပံ့

ကချင်ပြည်နယ်၊ မိုးကောင်းမြို့နယ်၌ မိုးသည်းထန်စွာရွာသွန်းပြီး နန့်ယင်းချောင်းရေနှင့် နန့်ကောင်းချောင်းရေတို့မြင့်တက်ကာ မိုးကောင်းမြို့ရှိ အနိမ့်ပိုင်းရပ်ကွက်များအတွင်းသို့ ရေဝင်ရောက်မှုများဖြစ်ပေါ်လျက်ရှိကြောင်း သိရသည်။
ဇွန် ၂၀ ရက်မှညပိုင်းမှစတင်၍ အနိမ့်ပိုင်းရပ်ကွက်များအတွင်းသို့ ရေဝင်ရောက်မှုများကြောင့် ယင်း နေအိမ်များ၌နေထိုင်သူများကို ဇွန် ၂၁ ရက်နံနက်ပိုင်းမှစတင်ကာ ရေဘေးလွတ်ကင်းသည့် ယာယီရေဘေးကယ်ဆယ်ရေးစခန်းများသို့ ရွှေ့ပြောင်းပေးခဲ့ရကြောင်း သိရသည်။
ထို့ပြင် ယနေ့ ဇွန် ၂၂ ရက်နံနက်ပိုင်းတွင်လည်း ရေဝင် နေသော နေအိမ်များမှအိမ်ထောင်စုများအား ကချင် ပြည်နယ်မီးသတ်ဦးစီးမှူးဦးဆောင်၍ မီးသတ်တပ်ဖွဲ့ဝင်များ၊ အရန်မီးသတ်တပ်ဖွဲ့ဝင်များ၊ ပေးဆပ်သူပရဟိတအသင်းဝင်များ၊ ရွှေလင်းယုန်ပရဟိတအသင်းဝင်များ၊ ရင်ငြိမ်းပန်းပရဟိတအသင်းဝင်များ၊ ကချင် RC ခရစ်ယာန်အသင်းမှအဖွဲ့ဝင်များနှင့် သက်ဆိုင်ရာအဖွဲ့အစည်းများက စားရေရိက္ခာများလိုက်လံထောက်ပံ့ပေးခဲ့ကြကြောင်း သိရသည်။

ဘားအံမြို့တွင် ကျောင်းသား၊ ကျောင်း သူ (၁၄၀) ဦးအား နိုင်ငံသားစိစစ်ရေးကတ်နှင့် UID ကတ်များ ကွင်းဆင်းဆောင်ရွက်ပေး
​
​လူဝင်မှုကြီးကြပ်ရေးနှင့် ပြည်သူ့အင် အားဝန်ကြီးဌာန၊ ဘားအံမြို့နယ်ဦးစီးမှူးရုံးမှ ယနေ့ ဇွန် (၂၂) ရက်တွင် ဘားအံမြို့၊ အမှတ်(၃)အခြေခံပညာအထက် တန်းကျောင်းသို့ သွားရောက်၍ ကျောင်း သား၊ ကျောင်းသူများအား နိုင်ငံသားစိစစ်ရေးကတ်ပြားနှင့် UID ကတ်များ ကွင်းဆင်းပြုလုပ်ပေးခဲ့ကြောင်း သိရသည်။
​အဆိုပါ ကွင်းဆင်းဆောင်ရွက်မှုတွင် ဘားအံမြို့နယ်ဦးစီးမှူး ဦးသီဟစိုးနှင့် ဝန်ထမ်းများက ကျောင်းသား၊ ကျောင်း သူ စုစုပေါင်း (၁၄၀) ဦးကို လူကိုယ်တိုင် စိစစ်ကာကတ်ပြားများ အခမဲ့ ထုတ်ပေးခဲ့ခြင်း ဖြစ်သည်။
​ယင်းသို့ ကွင်းဆင်းဆောင်ရွက်နေမှုကို ဘားအံခရိုင်ဦးစီးမှူး ဦးဝင်းကိုစိုး၊ ဘားအံခရိုင်ပညာရေးမှူး ဒေါ်သန်းစိုးနှင့် ဘားအံမြို့နယ်အုပ်ချုပ်ရေးမှူး ဦးအောင်ကျော်မိုးတို့က လာရောက်ကြည့်ရှုအားပေးခဲ့ကြပြီး၊ ကျောင်းသား၊ ကျောင်းသူများနှင့် ဆရာ၊ ဆရာမများထံ အသိပညာပေးလက်ကမ်းစာစောင်များကိုလည်း အတူ တကွ ဖြန့်ဝေပေးခဲ့ကြကြောင်း သိရပါသည်။

အပြည်ပြည်ဆိုင်ရာ အိုလံပစ်နေ့ အထိမ်းအမှတ် ရေကူးပြိုင်ပွဲတွင် အားကစားသမား ၂၀၀ ကျော် ယှဉ်ပြိုင်မည်

မြန်မာနိုင်ငံအိုလံပစ်ကော်မတီနှင့် မြန်မာနိုင်ငံရေကူးအဖွဲ့ချုပ်တို့ ပူးပေါင်းကျင်းပမည့် အပြည်ပြည်ဆိုင်ရာ အိုလံပစ်နေ့ အထိမ်းအမှတ် ရေကူးပြိုင်ပွဲတွင် အားကစားသမား ၂၀၀ ကျော် ဝင်ရောက်ယှဉ်ပြိုင်သွားမည်ဖြစ်ကြောင်း သိရသည်။
အဆိုပါ ပြိုင်ပွဲကျင်းပရေးဆိုင်ရာ ညှိနှိုင်းအစည်းအဝေးကို ဇွန် ၂၂ ရက် မွန်းလွဲ ၂ နာရီက ရန်ကုန်မြို့ သင်္ဃန်းကျွန်းမြို့နယ်ရှိ သုဝဏ္ဏ (၄) ထပ်ဆောင် အားကစားသမားစားရိပ်သာ၌ ကျင်းပပြုလုပ်ခဲ့ကြောင်း သိရသည်။
ပြိုင်ပွဲတွင် အမျိုးသားအသင်း ၁၃ သင်းနှင့် အမျိုးသမီးအသင်း ၁၂ သင်းတို့မှ အုပ်ချုပ်သူ၊ နည်းပြနှင့် အားကစားသမား စုစုပေါင်း ၂၁၄ ဦးခန့် ဝင်ရောက်ယှဉ်ပြိုင်ကြမည်ဖြစ်သည်။
ပြိုင်ပွဲတွင် အမျိုးသားနှင့် အမျိုးသမီး အလွတ်ကူး မီတာ ၅၀၊ ၁၀၀၊ ၂၀၀ နှင့် ၄၀၀၊ ပက်လက်ကူး မီတာ ၅၀ နှင့် ၁၀၀၊ ရင်ဘောင်တန်းကူး မီတာ ၅၀ နှင့် ၁၀၀၊ လိပ်ပြာကူး မီတာ ၅၀ နှင့် ၁၀၀၊ တစ်ဦးချင်း လေးမျိုးကူး မီတာ ၂၀၀ နှင့် လွန်းပျံအလွတ်ကူး၊ လွန်းပျံလေးမျိုးကူး ၅၀ x ၄ မီတာ ပြိုင်ပွဲများကို ထည့်သွင်းကျင်းပသွားမည်ဖြစ်ကြောင်း သိရသည်။
ညှိနှိုင်းအစည်းအဝေးတွင် အားကစားနှင့် ကာယပညာဦးစီးဌာန ဒုတိယညွှန်ကြားရေးမှူးချုပ်က ပြိုင်ပွဲစည်းမျဉ်းစည်းကမ်းများနှင့် မကိုက်ညီသည့် အားကစားသမားများကို ခေါ်ဆောင်လာသည့် တိုင်းဒေသကြီးနှင့် ပြည်နယ်အသင်းများအား ထိရောက်စွာ အရေးယူဆောင်ရွက်သွားမည်ဖြစ်ကြောင်း ပြောကြားခဲ့သည်။
အဆိုပါ အပြည်ပြည်ဆိုင်ရာ အိုလံပစ်နေ့ အထိမ်းအမှတ် ရေကူးပြိုင်ပွဲကို မည်သူမဆို လွတ်လပ်စွာ ဝင်ရောက်ယှဉ်ပြိုင်နိုင်ကြောင်း သိရသည်။

ပုသိမ် ငဝန်မြစ်ကမ်းဘေး အပန်းဖြေရင်ပြင်တွင် ပေ ၁၃၀ ခန့် ရှည်လျားသည့် အက်ကွဲကြောင်း ဖြစ်ပေါ်

ဧရာဝတီတိုင်းဒေသကြီး ပုသိမ်မြို့ ကမ်းနားလမ်းရှိ ကျောက်ထီးအနီး ငဝန်မြစ်ကမ်းဘေးတွင် တည်ဆောက်ထားသော အများပြည်သူ အပန်းဖြေအနားယူရာ ပလက်ဖောင်းနှင့် ရင်ပြင်ဧရိယာ၌ ငဝန်မြစ်ရေစီးကြောင့် အလျားပေ ၁၃၀ ခန့် ရှည်လျားသည့် အက်ကွဲကြောင်းတစ်ခု ဖြစ်ပေါ်ခဲ့ကြောင်း သိရသည်။
အဆိုပါ ပလက်ဖောင်းနှင့် ရင်ပြင်ကို ပြည်သူများ အပန်းဖြေအနားယူနိုင်ရန်နှင့် ကျန်းမာရေးအတွက် ကိုယ်လက်လှုပ်ရှား လေ့ကျင့်ခန်းများ ပြုလုပ်နိုင်ရန် ရည်ရွယ်တည်ဆောက်ထားခြင်း ဖြစ်သည်။
အက်ကွဲကြောင်း ဖြစ်ပေါ်နေမှုကြောင့် ပြည်သူများ အန္တရာယ်မဖြစ်စေရေးအတွက် လိုအပ်သည့် လုံခြုံရေးအစီအမံများ ဆောင်ရွက်ထားပြီး သတိပေးဆိုင်းဘုတ်များကိုလည်း စိုက်ထူထားကြောင်း သိရသည်။
ထို့ပြင် တိုင်းဒေသကြီး မြစ်ချောင်းများဖွံ့ဖြိုးတိုးတက်ရေးဦးစီးဌာနက ကမ်းထိန်းနံရံ ထပ်မံပျက်စီးမှု မဖြစ်ပေါ်စေရေးအတွက် လိုအပ်သည့် ပြုပြင်ထိန်းသိမ်းရေးလုပ်ငန်းများကို ဆောင်ရွက်လျက်ရှိကြောင်း သိရသည်။
အဆိုပါ အက်ကွဲကြောင်း ဖြစ်ပေါ်နေမှုနှင့် လုံခြုံရေးဆိုင်ရာ ဆောင်ရွက်ထားရှိမှုများကို ဧရာဝတီတိုင်းဒေသကြီး ဝန်ကြီးချုပ် ဦးအေးကျော်က ဇွန် ၂၂ ရက်တွင် သွားရောက်ကြည့်ရှု စစ်ဆေးခဲ့ကြောင်း သိရသည်။

ရန်ကုန်ရှိ ဘေးတွဲဆိုင်ကယ်များကို လိုင်စင်ပြုလုပ်ပေးမည်မဟုတ်ဟု တိုင်းအစိုးရ ပြော

ရန်ကုန်တိုင်းဒေသကြီးအတွင်း ပြေးဆွဲလျက်ရှိသည့် ဒေသန္တရလုပ် ဘေးတွဲဆိုင်ကယ်များကို တရားဝင်မှတ်ပုံတင် (လိုင်စင်) ပြုလုပ်ပေးမည်မဟုတ်ကြောင်း ရန်ကုန်တိုင်းအစိုးရအဖွဲ့ လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီး ဝင်းတင့်က ပြောကြားသည်။
ဇွန် ၂၂ ရက်က ကျင်းပသည့် တတိယအကြိမ် ရန်ကုန်တိုင်းဒေသကြီးလွှတ်တော် ဒုတိယပုံမှန်အစည်းအဝေး (ဆဋ္ဌမနေ့) တွင် မရမ်းကုန်းမြို့နယ် မဲဆန္ဒနယ်အမှတ် (၁) မှ လွှတ်တော်ကိုယ်စားလှယ် ဦးမင်းသိန်းထွန်း၏ ဘေးတွဲယာဉ်များနှင့် ယာဉ်မောင်းများအား တရားဝင်လိုင်စင်ထုတ်ပေး၍ စနစ်တကျ ပြေးဆွဲခွင့်ပြုရန် အစီအစဉ်ရှိ/မရှိ မေးမြန်းမှုကို ပြန်လည်ဖြေကြားရာတွင် ယင်းကဲ့သို့ ပြောကြားခဲ့ခြင်းဖြစ်သည်။
ဗိုလ်မှူးကြီး ဝင်းတင့်က ဒေသန္တရလုပ် ဘေးတွဲဆိုင်ကယ်များသည် လက်ရှိတည်ဆဲ ဥပဒေများအရ သတ်မှတ်ထားသည့် ယာဉ်အမျိုးအစားတွင် မပါဝင်သဖြင့် တရားဝင်မှတ်ပုံတင် (လိုင်စင်) ပြုလုပ်ပေးမည်မဟုတ်ကြောင်း ပြောကြားခဲ့သည်။
သို့သော် တရားဝင်တင်သွင်းလာသည့် သုံးဘီးဆိုင်ကယ်များကိုမူ သက်ဆိုင်ရာ ဥပဒေ၊ နည်းဥပဒေများနှင့်အညီ မှတ်ပုံတင်ခြင်းနှင့် လုပ်ငန်းလိုင်စင်ဆိုင်ရာ ခွင့်ပြုချက်များကို ဆောင်ရွက်ပေးသွားမည်ဖြစ်ကြောင်း ၎င်းက ဆိုသည်။
ရန်ကုန်တိုင်းဒေသကြီးအတွင်း လက်ရှိတွင် ဒေသန္တရလုပ် ဘေးတွဲဆိုင်ကယ် စီးရေ ၈၀,၀၀၀ ကျော် ပြေးဆွဲလျက်ရှိကြောင်းလည်း ရန်ကုန်တိုင်းအစိုးရအဖွဲ့ လုံခြုံရေးနှင့် နယ်စပ်ရေးရာဝန်ကြီးက လွှတ်တော်တွင် ထည့်သွင်းပြောကြားခဲ့သည်။