နိုင်ငံ​တော်သမ္မတ ဦးမင်းအောင်လှိုင် ကမ္ဘောဒီးယားနိုင်ငံသို့ နိုင်ငံတော်အဆင့်ချစ်ကြည်ရေးခရီးစဥ် သွားရောက်မည်

နိုင်ငံတော်သမ္မတ ဦးမင်းအောင်လှိုင် သည် ကမ္ဘောဒီး ယားနိုင်ငံဘုရင်မင်းမြတ် ပရယ်ဘတ် ဆမ်ဒက် ပရယ် ဘိုရိုနစ် နိုရိုဒွန် သီဟာမိုနီ ၏ဖိတ်ကြားချက်အရ က မ္ဘောဒီးယားနိုင်ငံသို့ နိုင်ငံတော်အဆင့်ချစ်ကြည်ရေးခ ရီးစဉ်(State Visit)အဖြစ် မကြာမှီသွားရောက်မည်ဖြစ် ကြောင်း သိရသည်။
ခရီးစဉ်အတွင်း နိုင်ငံတော်သမ္မတသည် ကမ္ဘောဒီးယားနိုင်ငံ၏ အထက်လွှတ်တော်ဥက္ကဋ္ဌ (ယာယီနိုင်ငံတော် အကြီးအကဲ)နှင့်တွေ့ဆုံ၍ နှစ်နိုင်ငံအကျိုးအတွက် ပူး ပေါင်းဆောင်ရွက်မှုများတိုးမြှင့်ရန် ဆွေးနွေးပွဲတစ်ရပ်ကျင်းပပြုလုပ်သွားမည်ဖြစ်ကြောင်း သိရသည်။
ထို့ပြင် ကမ္ဘောဒီးယားနိုင်ငံဝန်ကြီးချုပ်၊ ကမ္ဘောဒီးယားနိုင်ငံအမျိုးသားလွှတ်တော်ဥက္ကဋ္ဌတို့နှင့်လည်း တွေ့ဆုံဆွေးနွေးမှုများပြုလုပ်သွားမည်ဖြစ်ကြောင်း သိရသည်။
ထို့အတူ နိုင်ငံတော်သမ္မတသည် ကမ္ဘောဒီးယားနိုင်ငံရှိ အထင်ကရနေရာများ၊ ရှေးဟောင်းဘုရားများကိုလည်း လေ့လာဖူးမြော်သွားမည်ဖြစ်ကြောင်း သိရသည်။
ခရီးစဉ်အတွင်း နိုင်ငံတော်သမ္မတသည် မြန်မာ-ကမ္ဘော ဒီးယား နှစ်နိုင်ငံကြား ရှိရင်းစွဲချစ်ကြည်ရင်းနှီးသည့် ဆက်ဆံရေးကို ပိုမိုခိုင်မာလာစေရေး၊ နှစ်နိုင်ငံအစိုးရများကြား၊ လွှတ်တော်များကြားနှင့် ပြည်သူများကြား ပူးပေါင်းဆောင်ရွက်မှုတိုးမြှင့်ရန်၊ စီးပွားရေး၊ ယဉ် ကျေးမှုနှင့် ကဏ္ဍပေါင်းစုံတွင် ပူးပေါင်းဆောင်ရွက်မှုဆိုင်ရာများကို ရင်းနှီးပွင့်လင်းစွာဆွေးနွေးသွားမည်ဖြစ် ကြောင်း သိရသည်၊
ခရီးစဉ်အား နိုင်ငံတော်သမ္မတနှင့်အတူ ပြည်ထောင်စုဝန်ကြီးများ၊ တာဝန်ရှိပုဂ္ဂိုလ်များလိုက်ပါသွားမည်ဖြစ် ကြောင်း သိရသည်။

ရုရှား-မြောက်ကိုရီးယားကြား ပထမဆုံး ကားလမ်းတံတား ဖွင့်လှစ်

ရုရှားနှင့် မြောက်ကိုရီးယားကို ဆက်သွယ်ထားသည့် ပထမဆုံး ကားလမ်းတံတားကို ဖွင့်လှစ်ခဲ့ပြီး နှစ်နိုင်ငံအကြား ကုန်သွယ်ရေးနှင့် သယ်ယူပို့ဆောင်ရေး ချိတ်ဆက်မှု ပိုမိုတိုးမြှင့်နိုင်မည်ဖြစ်သည်။
တူမန်မြစ်ကို ဖြတ်သန်းတည်ဆောက်ထားသည့် အရှည် တစ်ကီလိုမီတာခန့်ရှိ တံတားပေါ်မှ နှစ်နိုင်ငံအလံများ တင်ဆောင်ထားသည့် ထရပ်ကားများ တနင်္လာနေ့တွင် ပထမဆုံး ဖြတ်သန်းခဲ့ကြသည်။ ယခင်က ရုရှားနှင့် မြောက်ကိုရီးယားအကြား လေကြောင်းနှင့် ရထားလမ်းတို့ဖြင့်သာ အဓိကချိတ်ဆက်ထားခဲ့သည်။
တံတားဖွင့်ပွဲတွင် ရုရှားဝန်ကြီးချုပ် မီခေးလ် မီရှူစတင်နှင့် မြောက်ကိုရီးယားဝန်ကြီးချုပ် ပတ်ထေဆောင်းတို့က ဗီဒီယိုလင့်မှတစ်ဆင့် မိန့်ခွန်းပြောကြားခဲ့ကြသည်။
အဆိုပါတံတားသည် တစ်ရက်လျှင် ယာဉ်အစီးရေ ၃၀၀ အထိ ဖြတ်သန်းနိုင်ပြီး ရုရှား၏ ပြည်ထောင်စုလမ်းကွန်ရက်နှင့်လည်း ချိတ်ဆက်သွားမည်ဖြစ်ကြောင်း မီရှူစတင်က ပြောကြားသည်။ နယ်စပ်ဖြတ်ကျော် သယ်ယူပို့ဆောင်ရေးအခြေခံအဆောက်အအုံ တိုးချဲ့ခြင်းက နှစ်နိုင်ငံအကြား ကုန်သွယ်ရေး၊ စီးပွားရေး၊ သိပ္ပံနှင့်နည်းပညာ၊ ယဉ်ကျေးမှုဆိုင်ရာ ပူးပေါင်းဆောင်ရွက်မှုများကို အားကောင်းစေမည်ဟုလည်း ဆိုသည်။
တံတားကို ကုန်စည်ပို့ဆောင်ရေးအတွက် စတင်အသုံးပြုမည်ဖြစ်ပြီး ယခုနှစ်ကုန်ပိုင်းတွင် ဝန်ဆောင်မှုအပြည့်အဝ လည်ပတ်ကာ ခရီးသည်တင်ယာဉ်များပါ ဖြတ်သန်းနိုင်မည်ဖြစ်ကြောင်း ရုရှားအစိုးရက ပြောကြားသည်။
တံတားတည်ဆောက်ရေးကို ၂၀၂၄ ခုနှစ် ရုရှားသမ္မတ ဗလာဒီမာပူတင်၏ မြောက်ကိုရီးယားခရီးစဉ်အတွင်း သဘောတူညီခဲ့ပြီးနောက် ၂၀၂၅ ခုနှစ် ဧပြီလတွင် စတင်တည်ဆောက်ခဲ့ခြင်းဖြစ်သည်။

မိုးတိမ်တောင်များ ဖြစ်ပေါ်နေ၍ မိုးကြိုးပ-စ်ခြင်းနှင့် လေပြင်းတို-က်ခတ်ခြင်းများ ဖြစ်ပေါ်နိုင်ကြောင်း မိုး/ဇလ သတိပေး

နေပြည်တော် အပါအဝင် တိုင်းဒေသကြီးနှင့် ပြည်နယ် အများစုတွင် မိုးတိမ်တောင်များ ဖြစ်ထွန်းလျက်ရှိသဖြင့် မိုးကြိုးပ-စ်ခြင်းနှင့် လေပြင်းတို-က်ခတ်ခြင်း အပါအဝင် မိုးလေဝသဘေးအန္တရာယ်များကို ကြိုတင်သတိပြုရန် မိုးလေဝသနှင့် ဇလဗေဒညွှန်ကြားမှုဦးစီးဌာနက ယနေ့ စက်တင်ဘာ ၈ ရက် ညနေ ၄ နာရီတွင် ထုတ်ပြန် သတိပေးထားသည်။
မိုးတိမ်တောင်များ ရွေ့လျားရာ နယ်မြေတစ်လျှောက်တွင် မိုးရွာသွန်းခြင်းနှင့်အတူ လေပြင်းတို-က်ခတ်ခြင်း၊ မိုးထစ်ချုန်းခြင်း၊ မိုးကြိုးပစ်ခြင်း၊ လျှပ်စီးလက်ခြင်းနှင့် မိုးသီးကြွေခြင်း စသည့် မိုးလေဝသဖြစ်စဉ်များ ဖြစ်ပေါ်နိုင်သဖြင့် ဒေသခံပြည်သူများ ကြိုတင်သတိပြုကြရန် အကြံပြုထားသည်။
စက်တင်ဘာ ၉ ရက် နံနက်ပိုင်းအထိ မကွေးတိုင်းဒေသကြီးနှင့် ကယားပြည်နယ်တို့တွင် နေရာကျဲကျဲ၊ ကျန်တိုင်းဒေသကြီးနှင့် ပြည်နယ်များတွင် နေရာအနှံ့အပြား မိုးထစ်ချုန်းရွာနိုင်ပြီး မိုးရွာရန် ရာနှုန်းပြည့်ဖြစ်ကြောင်း သိရသည်။
ထို့ပြင် နေပြည်တော်၊ ရန်ကုန်၊ မန္တလေး၊ ပဲခူး၊ စစ်ကိုင်းတိုင်းဒေသကြီး အထက်ပိုင်း၊ ဧရာဝတီ၊ တနင်္သာရီတိုင်းဒေသကြီးတို့နှင့် ကချင်၊ ကရင်၊ မွန်နှင့် ရှမ်းပြည်နယ် (မြောက်ပိုင်း) တို့တွင် နေရာကွက်၍ မိုးကြီးနိုင်ကြောင်း မိုးလေဝသနှင့် ဇလဗေဒညွှန်ကြားမှုဦးစီးဌာနမှ ခန့်မှန်းထုတ်ပြန်ထားသည်။

ငဝန်တာကျိုး၍ ရေစီးကျော် ဝင်ရောက်သည့်နေရာအား Sheet Pile ရို-က်၍ ကာရံခြင်းလုပ်ငန်းများကို အပြီးသတ် ဆောင်ရွက်

တာတမံပိတ်ဆို့ကာရံခြင်းလုပ်ငန်းများ ပိုမိုမြန်ဆန်ပြီးစီးပါက ရေဘေးသင့်ပြည်သူများ နေရပ်ပြန်နိုင်ခြင်း၊ ကျောင်းများ ပြန်လည်ဖွင့်လှစ်ခြင်းနှင့်စိုက်ပျိုးသီးနှံများ အချိန်မီပြန်လည်စိုက်ပျိုးနိုင်မည်
လေးမျက်နှာ၊ စက်တင်ဘာ ၈
ဧရာဝတီတိုင်းဒေသကြီး၊ လေးမျက်နှာမြို့နယ်၊ ငဝန်မြစ်ရေတိုက်စားမှုကြောင့် ငဝန်တာ၏ အောက်ခံမြစ်ကျိုးအင်း သဲကြောမှ ထူးပေါက်၍ တာတမံနိမ့်ကျသည့် နေရာတွင် Sheet Pile များ ရို-က်၍ ကာရံတားစီးခြင်းလုပ်ငန်းများကို အပြီးသတ်ဆောင်ရွက်ပြီးစီးခဲ့ကြောင်း ဆောက်လုပ်ရေးဝန်ကြီးဌာနမှ သိရသည်။
အဆိုပါ လုပ်ငန်းစဉ်တွင် ရေစီးကျော်ဝင်ရောက်မှုကို အမြန်ဆုံး ထိန်းချုပ်နိုင်ရန် ဆောက်လုပ်ရေးဝန်ကြီးဌာနမှ အင်ဂျင်နီယာနှင့် ဝန်ထမ်း ၂၃၄ ဦးတို့က Sheet Pile ၂၈၂ ချောင်းကို အသုံးပြုကာ ရေအနက် ၁၇ မီတာအထိ စက်ယန္တရားကြီးများဖြင့် နေ့ညမပြတ် အားဖြည့်ဆောင်ရွက်ခဲ့ကြခြင်းဖြစ်သည်။
ငဝန်တာ၏ အောက်ခံမြစ်ကျိုးအင်း သဲကြောမှ ထူးပေါက်၍ တာတမံနိမ့်ကျသည့် နေရာတွင် Sheet Pile များ ရို-က်၍ ကာရံတားစီးခြင်းလုပ်ငန်းများကို ဆောက်လုပ်ရေးဝန်ကြီးဌာန၊ ဒုတိယဝန်ကြီး ဦးမျိုးမြင့် နှင့်တာဝန်ရှိသူများက ကွင်းဆင်းစစ်ဆေးခဲ့ကြောင်းနှင့် လုပ်ငန်းများ စနစ်တကျ ဆောင်ရွက်နိုင်ရေးနှင့် ဆောလျင်စွာ ပြီးစီးရေးတို့ကို စီမံဆောင်ရွက်ပေးခြင်းတို့ကို ဆောင်ရွက်ခဲ့ကြောင်း သိရသည်။
ဒုတိယဝန်ကြီးနှင့်အဖွဲ့သည် ရေစီးကျော်ဝင်ရောက်သည့် နေရာတွင် Sheet Pile များ ရိုက်၍ ကာရံတားစီးခြင်းလုပ်ငန်း ဆောင်ရွက်နေမှုများအား လှည့်လည်ကြည့်ရှုကြပြီး ကာရံခြင်းလုပ်ငန်းတွင် အပြီးသတ်ရိုက်သွင်းမည့် Sheet Pile အား အမွေးနံ့သာများ ပက်ဖြန်းပေးပြီး ရိုက်သွင်းခဲ့သည်။
ရေစီးကျော်ဝင်ရောက်မှုကို တားစီးနိုင်သော်လည်း အပြင်ရေနှင့် အတွင်းရေ ကွာခြား ချက်များလာသည်နှင့်အညီ ကာရံထားသည့် Sheet Pile များ ခိုင်ခန့်မှု အားနည်းလာနိုင်သဖြင့် Sheet Pile များနောက်တွင် ချုပ်တန်းများ၊ ဒေါက်တန်းများ၊ ကျားကန်ခြင်းများကို ဆက်လက် ဆောင်ရွက်လျက်ရှိသည်။
ရေစီးကျော်ဝင်ရောက်မှုအား အလုံးစုံပိတ်နိုင်ရန်အတွက် သဲအိတ်များ ချခြင်း၊ Sheet Pile များ၏ အောက်ခြေတွင် Scour မဖြစ်စေရန် Jumbo bag သဲအိတ်များချခြင်း၊ Inclination ထောက်များဆောင်ရွက်ခြင်း၊ Sheet Pile များအား ထောက်ထားသော H Beam များ၏ ဝရိန်သားများအား နေ့/ည မပြတ်စောင့်ကြည့် စစ်ဆေးခြင်းနှင့် အားနည်းသော အပိုင်းအား ပြန်လည်အားဖြည့်ဆောင်ရွက်ခြင်း၊ ရေလမ်းကြောင်းအား အဟန့်အတားဖြစ်စေရန် Concrete Sinker တုံးများချပေးခြင်းတို့ကို ဆက်လက်ဆောင်ရွက်လျက်ရှိကြောင်း သိရသည်။
တာတမံပိတ်ဆို့ကာရံခြင်းလုပ်ငန်းများ ပိုမိုမြန်ဆန်ပြီးစီးပါက ရေဝင်ရောက်ခဲ့သည့် လေးမျက်နှာမြို့နယ်၊ ရေကြည်မြို့နယ်၊ ကျောင်းကုန်းမြို့နယ်၊ ငါးသိုင်းချောင်းမြို့၊ ကျုံပျော်မြို့နယ်၊ ဟင်္သာတမြို့နယ်များတွင် နေထိုင်ကြသည့် ပြည်သူများ မိမိနေထိုင်ရာဒေသများသို့ ဆောလျင်စွာ ပြန်လည်ဝင်ရောက်ခြင်း၊ ကျောင်းများပြန်လည်ဖွင့်လှစ်နိုင်ခြင်းနှင့်လယ်ယာစိုက်ပျိုးရေးလုပ်ငန်းများ ပြန်လည်ဆောင်ရွက်နိုင်မည်ဖြစ်သည်။
လက်ရှိတွင် တာတမံ ရေရှည်ခိုင်ခံ့စေရေးအတွက် အင်ဂျင်နီယာများနှင့် ဝန်ထမ်း ၂၀၀ ကျော်ဖြင့် နောက်ဆက်တွဲ ကြံ့ခိုင်ရေးလုပ်ငန်းများကို ဆက်လက် ဆောင်ရွက်လျက်ရှိသည်။

ရှေးဟောင်းအမွေအနှစ်များ ထိန်းသိမ်းရန် ထိုင်း CRMA အဖွဲ့က နည်းပညာမြင့် Drone နှစ်စင်း လှူဒါန်း

ထိုင်းနိုင်ငံ Cultural Relationship of Mainland Southeast Asia (CRMA) Research Center မှ Thermo Drone နှင့် Mavic-2 Zoom Drone တို့ကို ရှေးဟောင်းသုတေသနနှင့် အမျိုးသားပြတိုက်ဦးစီးဌာနသို့ လွှဲပြောင်းလှူဒါန်းသည့် အခမ်းအနားကို စက်တင်ဘာ ၇ ရက်က နေပြည်တော်ရှိ အမျိုးသားပြတိုက်၌ ကျင်းပခဲ့ကြောင်း သိရသည်။
အခမ်းအနားသို့ ရှေးဟောင်းသုတေသနနှင့် အမျိုးသားပြတိုက်ဦးစီးဌာန ညွှန်ကြားရေးမှူးချုပ် ဒေါက်တာကျော်ဦးလွင်၊ ထိုင်းနိုင်ငံ CRMA အဖွဲ့မှ ညွှန်ကြားရေးမှူး Dr. Surat နှင့် တာဝန်ရှိသူများ တက်ရောက်ခဲ့ကြသည်။
ညွှန်ကြားရေးမှူးချုပ် ဒေါက်တာကျော်ဦးလွင်က လက်ခံရရှိသည့် နည်းပညာမြင့် Drone များသည် မြန်မာနိုင်ငံရှိ ရှေးဟောင်းအဆောက်အအုံများနှင့် ရှေးဟောင်းနေရာများကို ကာကွယ်ထိန်းသိမ်းခြင်း၊ စောင့်ကြည့်လေ့လာခြင်းနှင့် သုတေသနလုပ်ငန်းများတွင် များစွာအထောက်အကူပြုမည်ဖြစ်ကြောင်း မိန့်ခွန်းပြောကြားခဲ့သည်။
ထို့ပြင် CRMA Research မှ Director Dr. Surat က Drone များ လှူဒါန်းရခြင်း ရည်ရွယ်ချက်များကို ရှင်းလင်းပြောကြားခဲ့ပြီး LIDAR Scanner နည်းပညာအသုံးပြု၍ ရှေးဟောင်းသုတေသနလုပ်ငန်းများ ဆောင်ရွက်ထားရှိမှုနှင့် နည်းပညာဆိုင်ရာ အချက်အလက်များကို တင်ပြခဲ့သည်။
ယင်းနောက် CRMA အဖွဲ့က နည်းပညာမြင့် Drone များကို လွှဲပြောင်းအပ်နှံရာ ဌာနဘက်မှ ဂုဏ်ပြုမှတ်တမ်းလွှာ ပြန်လည်ပေးအပ်ခဲ့သည်။ အဆိုပါ Drone များကို အသုံးချခြင်းဖြင့် မြန်မာနိုင်ငံ၏ ရှေးဟောင်းအမွေအနှစ် အခြေအနေများကို ပိုမိုတိကျစွာ လေ့လာကာကွယ်သွားနိုင်မည်ဖြစ်ကြောင်း သိရသည်။

မလေးရှားတွင် ကျင်းပမည့် PIEC 2026 အပြည်ပြည်ဆိုင်ရာ Esports ပြိုင်ပွဲသို့ မြန်မာနိုင်ငံ ပါဝင်ယှဉ်ပြိုင်ရန် ဖိတ်ကြားခံရ

မလေးရှားနိုင်ငံ၌ ကျင်းပမည့် Perak International Esports Championship (PIEC) 2026 အပြည်ပြည်ဆိုင်ရာ Esports ပြိုင်ပွဲတွင် မြန်မာနိုင်ငံမှ ဝင်ရောက်ယှဉ်ပြိုင်ရန် ဖိတ်ကြားထားကြောင်း မြန်မာအီလက်ထရောနစ် အားကစားအဖွဲ့ချုပ် (MESF) မှ သိရသည်။
PIEC 2026 ပြိုင်ပွဲကို Malaysia Esports Federation ၏ ဦးဆောင်မှုဖြင့် စက်တင်ဘာ ၁၈ ရက်မှ ၂၀ ရက်အထိ မလေးရှားနိုင်ငံ၊ Perak ပြည်နယ်၊ အီပိုမြို့တွင် ကျင်းပမည်ဖြစ်ပြီး နိုင်ငံတကာမှ Esports အားကစားသမားများ ပါဝင်ယှဉ်ပြိုင်ကြမည်ဖြစ်သည်။
အဆိုပါ ပြိုင်ပွဲတွင် eFootball (Mobile) နည်းပြိုင်ပွဲ၌ မြန်မာနိုင်ငံကိုယ်စားပြု ယှဉ်ပြိုင်ခွင့် ရရှိမည်ဖြစ်ကာ စုစုပေါင်း ဆုကြေးငွေ အမေရိကန်ဒေါ်လာ ၅,၀၀၀ ခန့် ချီးမြှင့်မည် ဖြစ်သည်။
မြန်မာနိုင်ငံကိုယ်စားပြု ဝင်ရောက်ယှဉ်ပြိုင်မည့် eFootball (Mobile) အားကစားသမားအား ရွေးချယ်ရန်အတွက် MESF က စက်တင်ဘာ ၁၂ ရက်နှင့် ၁၃ ရက်တို့တွင် Myanmar National Qualifier ပြိုင်ပွဲကို ကျင်းပသွားမည်ဖြစ်သည်။
eFootball အားကစားကို စိတ်ဝင်စားသည့် လူငယ်များအနေဖြင့် National Qualifier ပြိုင်ပွဲတွင် စာရင်းပေးသွင်း၍ ပါဝင်ယှဉ်ပြိုင်နိုင်ကြောင်း သိရသည်။

ကျေးလက်ဒေသအစွန်အဖျားနေ တိုင်းရင်းသားများ စာတတ်မြောက်လာစေရေး တိုင်းနှင့် ပြည်နယ်အစိုးရ အဖွဲ့များက အလေးအနက်ထားဆောင်ရွက်ရန် နိုင်ငံ တော်သမ္မတ ဦးမင်းအောင်လှိုင် မှာကြား

မြန်မာနိုင်ငံတစ်ဝှမ်းရှိ ကျေးလက်ဒေသအစွန်အဖျားတွင်နေထိုင်သည့် တိုင်းရင်းသားများစာတတ်မြောက်လာစေရေးနှင့်ပတ်သက်၍ နိုင်ငံတော်သမ္မတ ဦးမင်းအောင်လှိုင်က ယနေ့ စက်တင်ဘာ ၈ ရက်နံနက်ပိုင်းတွင် Naypyitaw State Academy ၌ကျင်းပသည့် ၂၀၂၆ ခုနှစ်၊ နိုင်ငံတကာစာတတ်မြောက်ရေးနေ့အခမ်း အနားတွင် အထက်ပါအတိုင်းပြောကြားခဲ့ခြင်းဖြစ် သည်။
တိုင်းနှင့် ပြည်နယ်အစွန်အဖျားများရှိ တိုင်းရင်းသားပြည်သူများ၏ အရေး၊ အဖတ်၊ အတွက်အချက်များတတ်မြောက်လာစေရန်အတွက် တိုင်းနှင့်ပြည်နယ်များရှိ တိုင်းရင်းသားစာပေနှင့် အသင်းအဖွဲ့များ၊ နယ်စပ် ရေးရာဝန်ကြီးဌာနနှင့် တိုင်းရင်းသားလူမျိုးများရေးရာဝန်ကြီးဌာနတို့မှ တာဝန်ရှိသူများက ပညာရေးဝန်ကြီး ဌာနနှင့်ပူးပေါင်းပြီး တိုင်းနှင့် ပြည်နယ်အစိုးရအဖွဲ့များက အလေးအနက်ထားဆောင်ရွက်ရမည်ဟု ပြော သည်။
" တစ်ဆက်တည်းမှာ စာတတ် ပေတတ်၊ အတတ်ပညာ ရှင်အဖြစ်နဲ့သာကျေနပ်ရောင့်ရဲမနေကြဘဲ ဘဝအတွက် ပိုမိုပြည့်စုံဖို့၊ ဗဟုသုတကြွယ်ဝဖို့၊ အသိပညာပြည့်ဝဖို့အတွက် စာတတ်သူတိုင်း စာဖတ်ကြဖို့ကိုလည်း စီမံဆောင်ရွက်ပေးကြဖို့လိုပါတယ်"ဟု နိုင်ငံတော်သမ္မတက ပြောသည်။
ထို့ကြောင့် နိုင်ငံတော်အနေဖြင့် စာကြည့်တိုက်များဖွံ့ ဖြိုးတိုးတက်ရေးနှင့် စာဖတ်ရှိန်မြှင့်တင်ရေးကိုအားပေး ဆောင်ရွက်ပေးနေကာ ပညာဆိုသည်မှာ ရှာဖွေလေ့လာ ၍ မကုန်နိုင်သဖြင့် စာတတ်သူတိုင်း စာဖတ်ကြရေးနှင့် အစဉ်လေ့လာသင်ယူနေသည့် လူ့အဖွဲ့အစည်းအဖြစ် ရှင်သန်ရပ်တည်နိုင်ရေးတို့ကို ဝိုင်းဝန်းကြိုးပမ်းဆောင် ရွက်ရမည်ဟု နိုင်ငံတော်သမ္မတက တိုက်တွန်းမှာကြားခဲ့သည်။

စာတတ်မြောက်ခြင်းသည် လူသားအရင်းအမြစ်ဖွံ့ဖြိုးတိုးတက်ရန်အတွက် မရှိမဖြစ်လိုအပ်သည့် အဓိကမောင်းနှင်အားဖြစ်ဟု နိုင်ငံတော်သမ္မတ ဦးမင်းအောင်လှိုင်ပြော

စာတတ်မြောက်အောင်သင်ကြားရန်လိုအပ်မှုနှင့်ပတ် သက်၍ နိုင်ငံတော်သမ္မတ ဦးမင်းအောင်လှိုင်က ယနေ့ စက်တင်ဘာ ၈ ရက်နံနက်ပိုင်းတွင် Naypyitaw State Academy ၌ကျင်းပသည့် ၂၀၂၆ ခုနှစ်၊ နိုင်ငံတကာစာ တတ်မြောက်ရေးနေ့အခမ်းအနားတွင် အထက်ပါအတိုင်းပြောကြားခဲ့ခြင်းဖြစ်သည်။
" စာတတ်မြောက်ခြင်းဆိုတာ လူသားတိုင်းရဲ့မွေးရာပါအခြေခံရပိုင်ခွင့်တစ်ခုဖြစ်သလို လူသားအရင်းအမြစ် ဖွံ့ဖြိုးတိုးတက်ဖို့အတွက် မရှိမဖြစ်လိုအပ်တဲ့ အဓိကမောင်းနှင်အားလည်းဖြစ်ပါတယ်"ဟု နိုင်ငံတော်သမ္မတက ပြောသည်။
ထို့ပြင် လူသားတစ်ယောက်အနေဖြင့် စာတတ်မြောက်မှသာ လေ့လာသင်ယူတတ်မြောက်ထားသည့် အတတ် ပညာများနှင့် ဘဝကိုရှင်သန်ဖြတ်သန်းနိုင်မည်ဖြစ်ပြီး အသိပညာ၊ ဗဟုသုတများ ဆက်လက်ဆည်းပူးကာ မှန်ကန်သည့်ကိုယ်ပိုင်ဆုံးဖြတ်ချက်များဖြင့် လူ့အဖွဲ့အစည်းတွင် အပြည့်အဝပါဝင်နိုင်မည်ဟု ပြောသည်။
ထို့အတူ နိုင်ငံတော်အနေဖြင့် "နိုင်ငံတော်ဖွံ့ဖြိုးဖို့ ပ ညာရေးကိုအားပေးစို့"ဆောင်ပုဒ်နှင့်အညီ ပညာရေးက ဏ္ဍကို အထူးအလေးထားမြှင့်တင်ဆောင်ရွက်ပေးလျက်ရှိကာ ပညာရေးဝန်ကြီးဌာနအနေဖြင့်လည်း ဆက်စပ်ဝန်ကြီးဌာနများ၊ နေပြည်တော်ကောင်စီ၊ တိုင်း၊ ပြည်နယ်အစိုးရအဖွဲ့များနှင့်ပူးပေါင်းပြီး လူတိုင်းစာ တတ်မြောက်စေရန်အတွက် အခြေခံစာတတ်မြောက်ရေးလုပ်ငန်းများကိုအောင်မြင်စွာအကောင်အထည် ဖော်ဆောင်ရွက်နေသည်ဟု ပြောသည်။
ထို့ကြောင့် အခြေခံစာတတ်မြောက်ရေးလုပ်ငန်းများကို ဆက်လက်၍ လည်း အရှိန်အဟုန်ဖြင့်ဆောင်ရွက်ကြရမည်ဟုလည်း နိုင်ငံတော်သမ္မတက တိုက်တွန်းမှာကြားခဲ့သည်။

မိုင်းပျဉ်းမြို့နယ်အတွင်း ဧရိယာ ၆၁,၀၀၈ ဧကရှိ သုဝဏ္ဏသျှံတောင် ကြိုးပြင်ကာကွယ်တော သတ်မှတ်

ရှမ်းပြည်နယ်၊ ကျိုင်းတုံခရိုင်၊ မိုင်းပျဉ်းမြို့နယ်အတွင်း ကျရောက်နေသည့် ဧရိယာအကျယ်အဝန်း ၆၁,၀၀၈ ဧကရှိ နယ်မြေကို “သုဝဏ္ဏသျှံတောင် ကြိုးပြင်ကာကွယ်တော” အဖြစ် သတ်မှတ်လိုက်ကြောင်း သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာနထံမှ သိရသည်။
အဆိုပါ ကြိုးပြင်ကာကွယ်တောကို ၂၀၁၈ ခုနှစ် သစ်တောဥပဒေပုဒ်မ ၆၊ ပုဒ်မခွဲ (င) အရ အပ်နှင်းထားသည့် လုပ်ပိုင်ခွင့်များကို ကျင့်သုံး၍ ၂၀၂၆ ခုနှစ်၊ စက်တင်ဘာ ၁ ရက်မှစတင်ကာ အတည်ပြု သတ်မှတ်ခဲ့ခြင်းဖြစ်သည်။
ကြိုးပြင်ကာကွယ်တော သတ်မှတ်ခြင်းဖြင့် ဒေသအတွင်း သစ်တောဖုံးလွှမ်းနေသည့် နယ်မြေများကို ဥပဒေနှင့်အညီ ပိုမိုထိရောက်စွာ ကာကွယ်ထိန်းသိမ်းနိုင်မည်ဖြစ်ပြီး သဘာဝဂေဟစနစ်များနှင့် ရေထွက်ဒေသများကို ရေရှည်တည်တံ့စေကာ ရာသီဥတုပြောင်းလဲမှု၏ သက်ရောက်မှုများကို လျှော့ချနိုင်မည်ဖြစ်သည်။
သုဝဏ္ဏသျှံတောင် ကြိုးပြင်ကာကွယ်တောအတွင်း ကျွန်း၊ ထင်းရှူး၊ အင်ကြင်း၊ သစ်အယ်၊ သစ်ချ၊ သစ်ယား (လောက်ယား) နှင့် တောင်တမာ စသည့် အဖိုးတန်သစ်ပင်မျိုးစိတ်များအပြင် မျောက်၊ တောဝက်၊ ဂျီ၊ ဆတ်၊ ယုန်၊ တောကြက်၊ ခါနှင့် ငုံး စသည့် တောရိုင်းတိရစ္ဆာန်များ၏ သဘာဝနေထိုင်ကျက်စားရာ နယ်မြေများကို ပါဝင် ထိန်းသိမ်းနိုင်မည်ဖြစ်သည်။
ထို့ပြင် ရေထွက်စိမ့်စမ်းများ ပိုမိုကောင်းမွန်လာမည်ဖြစ်၍ ဒေသခံပြည်သူများ၏ လယ်ယာစိုက်ပျိုးရေးနှင့် ဥယျာဉ်ခြံမြေလုပ်ငန်းများ ဖွံ့ဖြိုးတိုးတက်စေကာ ကျေးရွာသုံးရေ အရင်းအမြစ်များနှင့် လူမှုစီးပွားဘဝကို များစွာ အထောက်အကူပြုနိုင်မည်ဖြစ်ကြောင်း သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာနက ထုတ်ပြန်ထားသည်။

မြိတ်မြို့နယ်မဲဆန္ဒနယ်၏ လွှတ်တော်ကိုယ်စားလှယ်အမှတ် (၁)အဖြစ် ဦးခိုင်ဦးအစား ဦးဝင်းကြူအား ပြည်ထောင်စုရွေးကောက်ပွဲကော်မရှင် အတည်ပြု


တနင်္သာရီတိုင်းဒေသကြီးလွှတ်တော်၊ မြိတ်မြို့နယ် မဲဆန္ဒနယ်၏ ရွေးကောက်ပွဲ ကန့်ကွက်လွှာ အယူခံမှုအပေါ် ပြည်ထောင်စုရွေးကောက်ပွဲကော်မရှင်က ကြားနာစစ်ဆေးပြီးနောက် လွှတ်တော်ကိုယ်စားလှယ်အဖြစ် ဦးခိုင်ဦး အစား ဦးဝင်းကြူအား အတည်ပြု ဆုံးဖြတ်ခဲ့ကြောင်း စက်တင်ဘာ ၇ ရက် ရက်စွဲဖြင့် ထုတ်ပြန်ထားသည်။
တနင်္သာရီတိုင်းဒေသကြီးလွှတ်တော် (မဲအများဆုံးရသူအနိုင်ယူစနစ်)၊ မြိတ်မြို့နယ် မဲဆန္ဒနယ်အတွက် ရွေးကောက်တင်မြှောက်ခံထားရသော ကိုယ်စားလှယ်အမှတ် (၁) ဦးခိုင်ဦး၏ ရွေးကောက်တင်မြှောက်ခံရခြင်းကို ယင်းမဲဆန္ဒနယ်၌ ယှဉ်ပြိုင်အရွေးခံသူ ဦးဝင်းကြူက ရွေးကောက်ပွဲ ကန့်ကွက်လွှာ တင်သွင်းခဲ့ကြောင်း သိရသည်။
ထိုကြောင့် ပြည်ထောင်စုရွေးကောက်ပွဲကော်မရှင်က တိုင်းဒေသကြီးလွှတ်တော် သို့မဟုတ် ပြည်နယ်လွှတ်တော်ရွေးကောက်ပွဲဥပဒေ ပုဒ်မ ၆၉ အရ ရွေးကောက်ပွဲခုံအဖွဲ့ဖြင့်လည်းကောင်း၊ ပုဒ်မ ၇၅ အရ ရွေးကောက်ပွဲ ကန့်ကွက်လွှာအယူခံအဖွဲ့ဖြင့်လည်းကောင်း ကြားနာစစ်ဆေး၍ ဆုံးဖြတ်ချက်ချမှတ်ခဲ့ကြောင်းကို စက်တင်ဘာ ၇ ရက်နေ့ရက်စွဲဖြင့် အသိပေးထုတ်ပြန်ထားသည်။
ရွေးကောက်ပွဲကန့်ကွက်လွှာ အယူခံမှုအမှတ် (၁/၂၀၂၆) ဆုံးဖြတ်ချက်တွင် တနင်္သာရီတိုင်းဒေသကြီးလွှတ်တော် (မဲအများဆုံးရသူ အနိုင်ယူစနစ်)၊ မြိတ်မြို့နယ်မဲဆန္ဒနယ်အတွက် ဦးခိုင်ဦးအား လွှတ်တော်ကိုယ်စားလှယ်အမှတ် (၁) အဖြစ် ရွေးကောက်တင်မြှောက်ခြင်းသည် ဥပဒေအရ ပျက်ပြယ်ကြောင်းနှင့် ယင်းမဲဆန္ဒနယ်၏ တိုင်းဒေသကြီးလွှတ်တော်ကိုယ်စားလှယ်အမှတ် (၁) အဖြစ် ဥပဒေနှင့်အညီ ရွေးကောက်တင်မြှောက်ခံရသူမှာ ဦးဝင်းကြူ ဖြစ်ကြောင်း တိုင်းဒေသကြီးလွှတ်တော် သို့မဟုတ် ပြည်နယ်လွှတ်တော်ရွေးကောက်ပွဲ ဥပဒေ ပုဒ်မ ၇၅(က) အရ ဆုံးဖြတ်ခဲ့ကြောင်း ထုတ်ပြန်ချက်တွင် အသိပေးထားသည်။
ထိုကြောင့် ပြည်သူ့ပါတီမှ ဦးခိုင်ဦး [၆/မအရ(နိုင်) ၀၉၈၁၇၄ ] သည် ယခုကြေညာသည့်နေ့မှစ၍ လွှတ်တော်ကိုယ်စားလှယ်အဖြစ် ဆက်လက်ရပ်တည်ခွင့်မရှိတော့ကြောင်းနှင့် တနင်္သာရီတိုင်းဒေသကြီးလွှတ်တော် (မဲအများဆုံးရသူ အနိုင်ယူစနစ်)၊ မြိတ်မြို့နယ်မဲဆန္ဒနယ်၏ လွှတ်တော်ကိုယ်စားလှယ်အမှတ် (၁) မှာ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီမှ ဦးဝင်းကြူ ဖြစ်ကြောင်းကို ပြည်ထောင်စုရွေးကောက်ပွဲ ကော်မရှင်က အသိပေးထုတ်ပြန်ထားသည်။