ခြေကျင်းဝတ်ကျိုးဒဏ်ရာကို ခွဲစိတ်ကုသခံမှုခံယူရပြီး ကမ္ဘာ့ဖလားပလေးအော့ဖ်ပွဲစဉ်များကိုပါ လွဲချော်လာဖို့ ရှိနေတဲ့ စပါးစ်ရဲ့ ဘင်ဒါးဗီးစ်
====================

စပါးစ်နောက်ခံလူဘင်ဒါးဗီးစ်ဟာ ခြေကျင်းဝတ်ကျိုးဒဏ်ရာကို ခွဲစိတ်ကုသမှုခံယူလာရပြီး ဝေးလ်ရဲ့ ကမ္ဘာ့ဖလားပလေးအော့ဖ်ပွဲစဉ်များကိုပါ လွဲချော်လာဖို့ ရှိနေပါတယ်။
အသက် ၃၂ နှစ်ရှိ နောက်ခံလူဟာ စနေနေ့တုန်းက ဝက်စ်ဟမ်းအား ၂-၁ ဖြင့် ရှုံးနိမ့်တဲ့ ပွဲစဉ်ရဲ့ ၁၉ မိနစ်တွင် ခြေကျင်းဝတ်ကျိုးဒဏ်ရာရရှိပြီးနောက် အောက်ဆီဂျင်ဖြင့် အသက်ရှူခဲ့ရပြီး လူနာတင်ထမ်းစင်ဖြင့် ကွင်းမှ ထွက်ခဲ့ရပါတယ်။
သူဟာ တနင်္လာနေ့တုန်းက ခွဲစိတ်ကုသမှုခံယူခဲ့ရကြောင်း စပါးစ်က အတည်ပြု ကြေညာသွားပါတယ်။ ဒါပေမယ့် စပါးစ်ဟာ ဘင်ဒါးဗီးစ်မှာ ဒဏ်ရာကြောင့် ဘယ်လောက် အနားယူရမယ်ဆိုတာ ကြေညာသွားခြင်း မရှိပါဘူး။
ဝေးလ်ဟာ မတ်လ ၂၆ ရက်နေ့တွင် ကာဒစ်ဖ်စီးတီးကွင်းတွင် ကမ္ဘာ့ဖလားပလေးအော့ဖ်ဆီမီးဖိုင်နယ်အဖြစ် ဘော့စနီးယားနှင့် ရင်ဆိုင်ကစားရမှာ ဖြစ်ပြီး အနိုင်ရရှိပါက ပလေးအော့ဖ်ဗိုလ်လုပွဲအဖြစ် မတ်လ ၃၁ ရက်နေ့တွင် မြောက်အိုင်ယာလန်(သို့မဟုတ်) အီတလီနှင့် ရင်ဆိုင်ကစားရပါမယ်။
ဒါးဗီးစ် ဒဏ်ရာရရှိလာမှုနှင့်အတူ ပရီးမီးယားလိဂ် ၂၂ ပွဲတွင် ၇ ပွဲတည်းသာ အနိုင်ရရှိနေတဲ့ သောမတ်စ်ဖရန့်ရဲ့ စပါးစ်အတွက် ဒဏ်ရာပြဿနာ ပိုမိုကြုံလာရပါတယ်။
စပါးစ်ဟာ ရလဒ်ဆိုးရွားမှုကြောင့် ပရိသတ်များရဲ့ ထုတ်ပယ်ရန် တောင်းဆိုခြင်းခံနေရတဲ့ သောမတ်စ်ဖရန့်နှင့် တနင်္လာနေ့တုန်းက တွေ့ဆုံဆွေးနွေးမှုများ ပြုလုပ်ခဲ့ပြီး အနာဂတ်အတွက် အာမခံချက်ပေးခဲ့ပါတယ်။
သောမတ်စ်ဖရန့်ဟာ ယနေ့ည ဒေါ့မွန်နှင့် ချန်ပီယံလိဂ်ပွဲစဉ်ကို ကိုင်တွယ်လာပါဦးမယ်။

အပျော်တမ်း ဘောလုံးပွဲတွင် ပြိုင်ဘက်ကစားသမားကို တံတောင်ဖြင့် အသားလွတ် တိုက်ခိုက်ခဲ့သူ အာမခံဖြင့် လွတ်မြောက်လာ
===================

ဝေးလ်မြောက်ပိုင်း အပျော်တမ်းဘောလုံးပွဲတစ်ပွဲတွင် ပြိုင်ဘက်ကစားသမားအား အသားလွတ် တံတောင်ဖြင့် တိုက်ခိုက်ခဲ့သူဟာ ဖမ်းဆီးခံခဲ့ရပြီးနောက် အာမခံဖြင့် ပြန်လည်လွတ်မြောက်လာခဲ့ပါတယ်။
အသက် ၃၅ နှစ်အရွယ်ရှိ လူတစ်ဦးဟာ ဇန်နဝါရီလ ၁၇ ရက်နေ့တုန်းက Trearddur Bay နှင့် Porthmadog တို့ကစားတဲ့ Ardal North West League ပွဲစဉ်တွင် ပြိုင်ဘက်ကစားသမားတစ်ဦးအား တိုက်ခိုက်မှု ပြုလုပ်ခဲ့တာလည်း ဖြစ်ပါတယ်။
Gwynedd ရှိ Y Traeth (The Beach) ကွင်းတွင် ဖြစ်ပျက်ခဲ့တဲ့ ယင်းအဖြစ်အပျက် ဗီဒီယိုဖိုင်မှာ ဆိုရှယ်မီဒီယာတွင် ပျံ့နှံ့နေပါတယ်။
ဝေးလ်မြောက်ပိုင်းရဲတပ်ဖွဲ့ဟာ တိုက်ခိုက်ခံရသူနှင့် ဆက်သွယ်နိုင်ခဲ့သလို မျက်မြင်သက်သေများထံမှ အထောက်အထားများလည်း ရယူနေပါတယ်။
လက်ရှိအချိန်တွင် Trearddur Bay က ယင်းအဖြစ်အပျက်အတွက် တောင်းပန်မှု ပြုလုပ်ထားပြီး ကစားသမားကိုလည်း တနင်္ဂနွေနေ့တုန်းက အရေးပေါ် ကော်မတီတွေ့ဆုံပွဲအပြီးတွင် အသင်းမှ ထုတ်ပယ်ခဲ့ပါတယ်။
တဖက်တွင် ဝေးလ်ဘောလုံးအဖွဲ့ချုပ်ကလည်း အထက်ပါ အဖြစ်အပျက်အား စုံစမ်းစစ်ဆေးမှု ပြုလုပ်နေပါတယ်။
Trearddur Bay က ၎င်းတို့ ကစားသမား ဒန်နီဘရော့ခ်ဝဲလ်မှာ ယင်းတိုက်ခိုက်မှုကြောင့် ခေါင်းမူးဝေမှု ဖြစ်ခဲ့ပေမယ့်လည်း ယခုအခါ နေအိမ်တွင် သက်သာ ကောင်းမွန်လာပြီ ဖြစ်ကြောင်း ဆိုထားပါတယ်။

ကြီးမားတဲ့ အပြောင်းအလဲ အရွှေ့တစ်ခုဖြင့် ပရိသတ်များအား ပွဲများကို IMAX စတိုင် ဒီဂျစ်တယ်တစ်ရာသီစာ လက်မှတ် ရောင်းချလာဖို့ ရှိနေတဲ့ ယူနိုက်တက်
==================

ယူနိုက်တက်အပါအဝင် ကလပ်အမြောက်အမြားတို့ဟာ ပွဲသို့ လာရောက်နိုင်ခြင်း မရှိတဲ့ တစ်ကမ္ဘာလုံးမှ ပရိသတ်များအား IMAX စတိုင်အတွေ့အကြုံမျိုးဖြင့် ကြည့်ရှုနိုင်ရေး လုပ်ဆောင်ရန် အလေးအနက်ထား စဉ်းစားနေကြပါတယ်။
ယူနိုက်တက်ဟာ တစ်ကမ္ဘာလုံးမှ ပရိသတ်များအား ဒီဂျစ်တယ်တစ်ရာသီစာ လက်မှတ်များ ရောင်းချရန်အထိပါ ဆွေးနွေးမှုများ ပြုလုပ်နေပါတယ်။
ဘောလုံးပရိသတ်များအနေဖြင့် အိုးထရက်ဖို့ဒ်မှ တိုက်ရိုက်ထုတ်လွှင့်မှုများအား အခကြေးငွေပေးပြီး ကိုယ်တိုင် တက်ရောက်ကြည့်ရှုရသလို ခံစားမှုဖြင့် ကြည့်ရှုလာနိုင်မှာလည်း ဖြစ်ပါတယ်။
ယင်းသို့ အိုးထရက်ဖို့ဒ်မှ တိုက်ရိုက်ထုတ်လွှင့်ရာတွင် ပုံမှန် ရုပ်သံမှ ထုတ်လွှင့်တဲ့ မြင်ကွင်းမျိုးမဟုတ်ဘဲ ကိုယ်တိုင် ကွင်းထဲသို့ သွားရောက် ကြည့်ရှုရသလိုမျိုး ကွင်းရှိ ပရိသတ်များရဲ့အသံများလည်း ကြားရမှာ ဖြစ်သလို ရှုထောင့်မျိုးစုံမှ ကြည်ရှုနိုင်ပါမယ်။
ယင်းသို့ တိုက်ရိုက်ထုတ်လွှင့်မှုအား လုပ်ဆောင်နေတာ ယူနိုက်တက်ကလပ်တစ်ခုတည်း မဟုတ်ပါဘူး။
ဒါပေမယ့် ခိုင်မာတဲ့ သတင်းရစ်မြစ်အရ ယူနိုက်တက်ဟာ အယ်လ်အေအခြေစိုက် ပေါင်သန်း ၇၀ ရင်းနှီးတည်ထောင်ထားတဲ့ နည်းပညာကုမ္ပဏီ Cosm နှင့် ပူးပေါင်း အလုပ်လုပ်ကာ ထုတ်လွှင့်ပြသနိုင်ရေး ဆွေးနွေးနေပါတယ်။
Hollywood Park ရှိ Cosm Los Angeles စင်တာဘက်က ဘောလုံးပရိသတ်များအား ကိုယ်တိုင်ကွင်းထဲသို့ သွားရောက်ကြည့်ရှုရသလိုမျိုး ခံစားရအောင် လုပ်ဆောင်ပေးနိုင်မှုအပေါ် ယူနိုက်တက်ဘက်က အကြီးအကျယ် အားရနေပါတယ်။
Cosm Los Angeles ဟာ အားကစားပွဲများကို ၁၈၀ ဒီဂရီ LED Screen ဖြင့် ထုတ်လွှင့်ပြက ပရိသတ်များအား ကြီးမားတဲ့ အတွေ့အကြုံ ပိုင်ဆိုင်ခွင့်ပေးနေတာလည်း ဖြစ်ပါတယ်။
Cosm က ၂၀၂၄ ခုနှစ်နွေရာသီတုန်းက အာဆင်နယ်နှင့် ယူနိုက်တက်တို့ ရာသီကြိုခြေစမ်းပွဲကစားရာ SoFi Stadium အခြေစိုက်တဲ့ ကုမ္ပဏီ ဖြစ်ပါတယ်။
၎င်းတို့ စနစ်က ဖလင်စနစ်တစ်ခုဖြစ်တဲ့ IMAX ကို အခြေပြုတာ ဖြစ်ပြီး အရည်အသွေးမြင့်အရုပ်နှင့် အသံကို ခံစားနိုင်စေပါတယ်။
လာမယ့် နွေရာသီတွင် ရုံတင်လာမယ့် ကမ္ဘာကျော်ဒါရိုက်တာခရစ္စတိုဖာနိုလန် ရိုက်ကူးထားတဲ့ The Odyssey မှာ IMAX ကင်မရာများ အသုံးပြုကာ ရိုက်ကူးထားတဲ့ တစ်ခုတည်းသော ရုပ်ရှင် ဖြစ်ပါတယ်။

ဟန်ဂေရီအလယ်တန်းကစားသမားအဲလက်စ်တော့သ်ကို ပေါင် ၁၀.၄ သန်းဖြင့် ဘုန်းမောက် ခေါ်ယူလာ
====================

ဘုန်းမောက်ဟာ ဖီရန်ဗာရို့စ်မှ ဟန်ဂေရီအလယ်တန်းကစားသမားအဲလက်စ်တော့သ်အား ပေါင် ၁၀.၄ သန်းဖြင့် ခေါ်ယူလာပါတယ်။
အသက် ၂၀ နှစ်ရှိ ကွင်းလယ်ခံစစ်ကစားသမားဟာ ဘုန်းမောက်သို့ ၅ နှစ်ခွဲစာချုပ်ဖြင့် ပြောင်းလာတာ ဖြစ်ပြီး စာချုပ်အတွင်းတွင် ဖီရန်ဗာရို့စ်အနေဖြင့် အပိုဆုကြေး ပေါင် ၂.၅ သန်းထပ်မံ ရရှိမယ့် အချက်အပြင် နောင်တွင် ရောင်းချလာပါက ပြောင်းရွှေ့ကြေးရဲ့ ၁၀ ရာခိုင်နှုန်းအား အကျိုးခံစားခွင့် ရရှိမယ့်အချက်ကိုလည်း ထည့်သွင်းချုပ်ဆိုထားပါတယ်။
ဟန်ဂေရီအတွက် ၉ ပွဲကစားထားတဲ့ အဲလက်စ်သော့သ်ကို ဘင်ဖီကာ၊ ဂါလာတာစာရေးနှင့် လာဇီယိုတို့ကလည်း စိတ်ဝင်စားခဲ့ပေမယ့် ဘုန်းမောက်က လက်ဦးမှု ရယူနိုင်ခဲ့ပါတယ်။
သော့သ်က "ဘုန်းမောက်က စိတ်ဝင်စားကြောင်း ပထမဆုံးအကြိမ် သိလိုက်ရချိန်မှာ အရမ်းစိတ်လှုပ်ရှားခဲ့ရတယ်။ ကမ္ဘာ့အကောင်းဆုံးနဲ့ အတောင့်တင်းဆုံးလိဂ်ဖြစ်တဲ့ ပရီးမီးယားလိဂ်က ကလပ်ကောင်းတစ်ခုလို့ ပျော်တယ်။ ကလပ်တစ်ခုလုံးနဲ့ တည်ဆောက်ပုံက အရမ်းကောင်းပါတယ်"လို့ ပြောကြားသွားပါတယ်။
အဲလက်စ်သော့သ်ဟာ ကစားသမားဘဝတစ်ခုလုံးအား ဟန်ဂေရီတွင်သာ ကျင်လည်ဖူးသူ ဖြစ်ပြီး ၂၀၂၃-၂၄ ရာသီတုန်းက ဆိုရိုကာတွင် အငှားဖြင့် သွားကစားခဲ့ဖူးပါတယ်။
သူဟာ ၂၀၂၄ ခုနှစ် ဒီဇင်ဘာတွင် ဖီရန်ဗာရို့စ်အတွက် ပထမဆုံးပွဲ ကစားခွင့်ရခဲ့ပြီးနောက် လိဂ်ပွဲ ၅၂ ပွဲကစားထားရာတွင် ၄ ဂိုးသွင်းထားနိုင်ပါတယ်။
ဘုန်းမောက်ဟာ ယခုဆောင်းရာသီတွင် ဂိုးသမားဖရေဇာဖော်စတာနှင့် နောက်ခံလူအဒီဆိုလန်ကီတို့ကိုလည်း ခေါ်ယူအားဖြည်ထားပါတယ်။

ဆာလက်ရဲ့ အနာဂတ်မှာ ကလပ်နှင့် နည်းပြရဲ့ ဆုံးဖြတ်ချက်အပေါ်တွင်သာ မူတည်ကြောင်း ဆိုဘိုဆလိုင်း ပြောကြားလာ
====================

ဒိုမိနစ်ခ်ဆိုဘိုဆလိုင်းက အာဖရိကဖလားပြိုင်ပွဲရောက်နေစဉ်အတွင်း မိုဟာမက်ဆာလက်နှင့် နေ့စဉ် စကားပြောဖြစ်ကြောင်း ပြောကြားလာပေမယ့်လည်း အီဂျစ်စူပါစတားရဲ့ လီဗာပူးအနာဂတ်နှင့်ပတ်သက်ပြီး ပြောကြားရန် ငြင်းဆိုလာပါတယ်။
မိုဟာမက်ဆာလက်ဟာ စနေနေ့တုန်းက အီဂျစ်ရဲ့ အာဖရိကဖလားတတိယနေရာလုပွဲ ကစားပြီးနောက် လီဗာပူးအသင်းနှင့် ပြန်လည်ပူးပေါင်းနေပြီ ဖြစ်ပြီး ဗုဒ္ဓဟူးနေ့ မာဆေးတွင် ကစားမယ့် ချန်ပီယံလိဂ်ပွဲစဉ်တွင် ပါဝင်ရန် မသေချာသေးပါဘူး။
တဖက်တွင် ဆာလက်ဟာ အာဖရိကဖလားပြိုင်ပွဲအတွက် အီဂျစ်နှင့် မပူးပေါင်းမီ ကလပ်မှာ ၎င်းအား အပြစ်ပုံချနေကြောင်းနှင့် နည်းပြဆလော့နှင့် ဆက်ဆံရေး မရှိကြောင်း ပြောကြားခဲ့မှုနှင့်အတူ အနာဂတ် မရေမရာ ဖြစ်နေသူလည်း ဖြစ်ပါတယ်။
ဆိုဘိုဆလိုင်းက "ဒါက(အပြောင်းအရွှေ့ကိစ္စ)က သူနဲ့ကျွန်တော့်အကြားအရာပါ။ သူ ပြန်လာမယ်။ ပြီးရင် ကျွန်တော်တို့ ဆက်ချီတက်မယ်။ နည်းပြနဲ့ ကလပ်ကပဲ ဆုံးဖြတ်လာမှာပါ"လို့ ပြောကြားသွားပါတယ်။
ဒီဇင်ဘာလ ၁၅ ရက်နေ့တုန်းက လီဗာပူးမှ ထွက်ခွာကာ အီဂျစ်အသင်းနှင့် ပူးပေါင်းပြီးနောက်ပိုင်း ဆာလက်နှင့် အဆက်အသွယ်ရှိသလား မေးမြန်းလာမှုကို ဆိုဘိုဆလိုင်းက "ရှိပါတယ်။ အရိုးသားဆုံးပြောရရင်‌ နေ့တိုင်းနီးပါးပါပဲ။ အရာရာတိုင်းနဲ့ပတ်သက်ပြီး ပြောဖြစ်ကြတယ်။ ကျွန်တော်တို့ အများကြီး ပြောဖြစ်တယ်"လို့ ပြောကြားသွားပါတယ်။
ပြီးခဲ့တဲ့အပတ်တုန်းက ဆလော့က အသင်းနှင့် ဆာလက် ပြန်လည်ပူးပေါင်းလာမှာ ဖြစ်လို့ ပျော်ရွှင်ကြောင်း ပြောကြားသွားပါတယ်။
ဆာလက်ဟာ စနေနေ့တုန်းက ဘန်လေနှင့် ပွဲစဉ်တွင် ကန်ချက် ၃၂ ကြိမ်အထိ ပြုလုပ်ခဲ့ပြီး ဂိုးပေါက်တည့်မှု ၁၁ ကြိမ်ရှိခဲ့ပေမယ့်လည်း ၁ ဂိုးတည်းသာ ရခဲ့သလို ဆိုဘိုဆလိုင်းမှာလည်း ပင်နယ်တီ မဝင်ခဲ့ပါဘူး။

အရက်အရမ်းကြိုက်တယ်လို့ ပြောဆိုမှုအား အရက်သောက်တဲ့ပုံစံဖြင့် အောင်ပွဲခံကာ တုံ့ပြန်လာတဲ့ ဘယ်လင်ဂမ်
=====================

ဂျူ့ဘယ်လင်ဂမ်ဟာ မိုနာကိုနှင့် ချန်ပီယံလိဂ်ပွဲစဉ်တွင် ဂိုးသွင်းယူပြီးနောက် အရက်သောက်တဲ့ပုံစံဖြင့် အောင်ပွဲခံကာ အရက်အရမ်းကြိုက်တယ်လို့ စွပ်စွဲပြောဆိုနေမှုများအား တုံ့ပြန်လာပါတယ်။
ဘယ်လင်ဂမ်ဟာ မိုနာကိုအား ၆-၁ ဖြင့် အနိုင်ရတဲ့ ချန်ပီယံလိဂ်နိုင်ပွဲတွင် ရီးရဲလ်မက်ဒရစ်ရဲ့ အပိတ်ကို သွင်းခဲ့တာပါ။ ယင်းဂိုးက အင်္ဂလန်ကွင်းလယ်ကစားသမားအတွက် ၂၀၂၆ ခုနှစ်တွင် ပထမဆုံးသွင်းယူတဲ့ ဂိုးလည်း ဖြစ်ပါတယ်။
လီဗန်တေးနှင့်ပွဲမတိုင်မီ စပိန် YouTube ထုတ်လွှင့်သူ AuronPlay က ဘယ်လင်ဂမ်မှာ အရက်အလွန်ကြိုက်သူ ဖြစ်ကြောင်း ပြောဆိုခဲပါတယ်။ ယင်းချန်နယ်မှာ subscriber ၂၆ သန်းကျော် ပိုင်ဆိုင်ထားတဲ့ ချန်နယ်လည်း ဖြစ်ပါတယ်။
၎င်းက ဘယ်လင်ဂမ်မှာ အရက်အလွန်ကြိုက်သူ ဖြစ်ပြီး စပိန်ရှိ နိုက်ကလပ်တိုင်းသို့ သွားရောက်ခဲ့သူ ဖြစ်ကြောင်း ပြောဆိုခဲပါတယ်။
ဘယ်လင်ဂမ်ဟာ ယင်းအဖြစ်အပျက်ကြောင့် လီဗန်တေးအား ၂-၀ ဂိုးဖြင့် အနိုင်ရတဲ့ပွဲအပြီးတွင် ရီးရဲလ်မက်ဒရစ်ပရိသတ်များရဲ့ လှောင်ပြောင်မှုများနှင့် ရင်ဆိုင်ခဲ့ရပါတယ်။
မိုနာကိုနှင့်ပွဲတွင် ဂိုးသွင်းယူပြီးချိန်မှာတော့ ဘယ်လင်ဂမ်က "အခုခေတ်က ကင်မရာတစ်လုံးရှိတာနဲ့ ထင်ရာမြင်ရာ ပြောနိုင်တဲ့ ခေတ်ပါ။ တစ်ကမ္ဘာလုံးက သက်သေအထောက်အထားမရှိဘဲ ယုံကြတာပဲ။ ဒါကို ငိုယို ငြီးတွားနေမလား၊ ပျော်ပျော်နေပြီးတော့ဘဲ ကျော်ဖြတ်မလား နှစ်လမ်းပဲ ရှိတယ်။ ဒါက(အောင်ပွဲခံမှု)ပရိသတ်တွေနဲ့ ထင်သလို ပြောနေကြတဲ့သူတွေကို အပျော်သဘောနဲ့ လုပ်ပြတာပါ။ ကျွန်တော့်အတွက် အမှတ်တရားကို သိထားပြီးသားပါ။ ကျွန်တော့်ကိုယ်ပိုင်ဘဝမှာ ဘာဖြစ်နေတယ်ဆိုတာ သိပါတယ်။ ပွဲမှာ ဘာတွေ လုပ်ပေးနေတယ်၊ အသင်းကို ဘာတွေ ပေးနေတယ်ဆိုတာ သိပါတယ်။ အပြင်က ဆူညံသံတွေကို ဂရုမစိုက်ပါဘူး။ ဒါပေမယ့် အခုလို(အောင်ပွဲခံတာ)လုပ်တာ နည်းနည်းပျော်ရတယ်"လို့ ပြောကြားသွားပါတယ်။

မာဆေးနှင့်ပွဲတွင် ဆာလက် ပွဲထွက်လာမယ်လို့ ဆလော့ အရိပ်အမြွက်ပြောကြားလာ
====================

အန်းဆလော့က ယနေ့ည မာဆေးနှင့် ရင်ဆိုင်ကစားရမယ့် ချန်ပီယံလိဂ်ပွဲစဉ်တွင် မိုဟာမက်ဆာလက်မှာ ပွဲထွက်လူစာရင်းတွင် ပါဝင်လာမှာ ဖြစ်ကြောင်း ပြောကြားလာခဲ့ပြီး ၎င်းတို့အကြား ဆက်ဆံရေးမှာ ယခင်အတိုင်းပုံမှန် ရှိနေကြောင်း ပြောကြားသွားပါတယ်။
ဆာလက်ဟာ လီဗာပူးအတွက် နောက်ဆုံးပွဲကစားခွင့်ရခဲ့တာ နိုဝင်ဘာလတုန်းက ပီအက်စ်ဗွီအား အိမ်ကွင်းတွင် ၄-၁ ဖြင့် ရှုံးနိမ့်တဲ့ပွဲမှာ ဖြစ်ပါတယ်။ သူဟာ ဒီဇင်ဘာလ ၁၅ ရက်နေ့တွင် အီဂျစ်အသင်းနှင့် ပူးပေါင်းကာ အာဖရိကဖလားပြိုင်ပွဲပါဝင်ကစားခဲ့ပြီး အဆင့် ၄ ချိတ်အောင် ၄ ဂိုးသွင်းကာ ကူညီပေးခဲ့ပါတယ်။
ဆာလက်ဟာ အီဂျစ်အသင်းနှင့် မပူးပေါင်းမီ ၃ ပွဲဆက် အရန်ခုံတွင် ထိုင်ခဲ့ရပြီးနောက် လိဒ်နှင့်ပွဲအပြီးတွင် ကလပ်မှာ အသင်းရဲ့ ရလဒ်ဆိုးရွားမှုများအတွက် သူ့အပေါ် အပြစ်ပုံချရန် ကြိုးပမ်းနေပြီး နည်းပြအန်းဆလော့နှင့် ဆက်ဆံရေး မရှိကြောင်း ပြောဆိုခဲ့ဖူးပါတယ်။
ဒီဇင်ဘာလအဖြစ်အပျက်က ရိုက်ခတ်လာမလားလို့ မေးမြန်းလာချိန်တွင် ဆလော့က "မိုကို မကစားဖို့ ဆုံးဖြတ်ခဲ့တဲ့ ဒီရာသီ အခိုက်အတန့်ပါ။ အဲဒီပွဲ(အင်တာ)မှာ သူ့ကို မခေါ်ဆောင်ဖို့ ဆုံးဖြတ်ခဲ့တဲ့ အခိုက်အတန့်ရှိခဲ့တယ်။ အခြားပွဲအားလုံးမှာ သူ လူစာရင်းမှာ ပါတယ်။ ဘရိုက်တန်နဲ့ပွဲမှာဆို သူက ပထမဆုံးလူစားဝင်ကစားခဲ့ရတယ်။ အဲဒီအခိုက်အတန့်ကာလတုန်းက ကျွန်တော့်အတွက် ဘာပြဿနာမှ မရှိပါဘူး။ အခု ပထမဆုံးအကြိမ်အဖြစ် သူ အသင်းမှာ ပြန်ပါဝင်လာနိုင်ပြီ။ ဒီကနေ့ လေ့ကျင့်ခန်းဆင်းထားတော့ သူ ပါဝင်လာမယ်။ မနက်ဖြန် လူစာရင်းမှာ ပါမယ်။ ပြဿနာ ရှိနေသေးလားဆိုတာ လူစာရင်းထွက်ရင် ကြည့်ကြတာပေါ့"လို့ ပြောကြားသွားပါတယ်။
လီဗာပူးဟာ ဆာလက် အာဖရိကဖလားပြိုင်ပွဲ သွားကစားစဉ်ကာလအတွင်း ရှုံးပွဲ မရှိခဲ့ပါဘူး။ ဒါပေမယ့် ဆလော့က လီဗာပူးရဲ့ ချန်ပီယံလိဂ်စံချိန်တင်ဂိုးသွင်းရှင် ပြန်လည်ပါဝင်လာနိုင်မှုအပေါ် ပျော်ရကြောင်း ဆိုသွားပါတယ်။
ဆာလက်နှင့် ဆက်ဆံရေးအပေါ်တွင်လည်း ဆလော့က "အရင်တုန်းကလိုပဲ ပုံမှန်ပါပဲ။ အင်တာမီလန်နဲ့ပွဲတုန်းကတော့ ချွင်းချက်ပေါ့။ ဒီကနေ့ သူနဲ့ စကားပြောဖြစ်တယ်။ ဒီရာသီပရီးမီးယားလိဂ်မှာ မိနစ်တစ်ရာကျော် ကစားထားတဲ့ တောင်ပံသမားနှစ်ဦးတည်းပဲ ရှိလို့ သူ ပြန်လာလို့ ပျော်တယ်။ အဲဒီနှစ်ယောက်က မိုနဲ့ ကိုဒီ(ဂတ်ပို)ပါ။ ဂျီရီမီဖရမ်းပေါင်နဲ့ ဖလိုရီယန်ဝါ့ဇ်တို့လည်း ဒီနေရာတွေမှာ ကစားနိုင်ပါတယ်။ ဒါပေမယ့် တကယ်လို့ ဖလိုရီယန်ကို သူ့စိတ်ကြိုက်နေရာကို မေးရင် ဘယ်နဲ့ ညာတောင်ပံနေရာတွေကို ပြောလာမှာ မဟုတ်ပါဘူး။ ဂျီရီမီလည်း ဒီအတိုင်းပါ။ ဒါပေမယ့် သူက ညာခြမ်းမှာ လုပ်ပြထားပြီးသားပါ။ ချန်ပီယံလိဂ်မှာ လီဗာပူးအတွက် မို ၄၅ ဂိုးသွင်းထားတာ မြင်ခဲ့ရတယ်။ နောက်အများဆုံးသွင်းထားသူက ၅ ဂိုးနဲ့ ဗာဂယ်ဗန်ဒိုက်ပါ။ ဒီတော့ သူ ပြန်ပါလာတာ ကောင်းပါတယ်။ အထူးသဖြင့် နောက်ထပ် ၄၅ ဂိုးသွင်းပြီး ဒီအဆင့်မျိုး ထပ်ပြန်နိုင်ရင်ပေါ့"လို့ ပြောကြားသွားပါတယ်။
တဖက်တွင် လီဗာပူးဗဟိုနောက်ခံလူအီဘရာဟမ်ကိုနာတေးမှာ မိသားစု ပြဿနာကြောင့် မာဆေးနှင့် ရင်ဆိုင်ရမယ့် လီဗာပူးရဲ့ လူစာရင်း ၂၀ ဦးစာရင်းမှာ မပါဝင်နိုင်ခဲ့ပါဘူး။

ဘိုဒို/ဂလမ့် အရှက်တကွဲ ရှုံးပွဲအတွက် အာလင်းဟာလန်း လူသိရှင်ကြား တောင်းပန်လာ
==================

အာလင်းဟာလန်းဟာ အသင်းငယ်လေး ဘိုဒို/ဂလမ့်အား ချန်ပီယံလိဂ်တွင် ရှုံးနိမ့်မှုအတွက် လူသိရှင်ကြား တောင်းပန်လာပါတယ်။
အသက် ၂၅ နှစ်ရှိ နော်ဝေတိုက်စစ်မှူးဟာ မိခင်နိုင်ငံသို့ တကျော့ပြန်လာချိန်တွင် ခါးသီးမှုနှင့် ကြုံခဲ့ရပြီး မေ့ပစ်ချင်ခဲ့တဲ့ ညတစ်ညကြုံခဲ့ရပါတယ်။
မန်စီးတီးဟာ ဘိုဒို/ဂလမ့်အား ၃-၁ ဖြင့် ရှုံးနိမ့်လာမှုနှင့်အတူ ချန်ပီယံလိဂ်ရှုံးထွက်အဆင့်သို့ တိုက်ရိုက်တက်ရောက်ရေး မရေမရာ ဖြစ်လာခဲ့ပါတယ်။
ချန်ပီယံလိဂ်သမိုင်းတွင် တုန်လှုပ်စရာ မထင်မှတ်တဲ့ ရလဒ်ကြုံခဲ့ရပြီးနောက် မန်စီးတီးနည်းပြဂွါဒီယိုလာက အရာအားလုံး မှားယွင်းနေတယ်လို့ ခံစားရကြောင်း ဝန်ခံပြောဆိုသွားပါတယ်။
မန်စီးတီးဟာ မန်ချက်စတာဒါဘီပွဲတွင် ယူနိုက်တက်အား ၂-၀ ဂိုးဖြင့် ရှုံးနိမ့်ပြီးနောက် ရက်အနည်းငယ်အကြာ -9C ရာသီဥတုအောက်တွင် ကစားရတဲ့ပွဲမှာ အရှက်တကွဲ ရှုံးပွဲကြုံခဲ့ရတာလည်း ဖြစ်ပါတယ်။
နောက်ဆုံး ၈ ပွဲတွင် ၁ ဂိုးတည်းသာ သွင်းနိုင်ကာ ဂိုးပေါက်ပျောက်နေတဲ့ ဟာလန်းက "ဂိုးမသွင်းနိုင်ခဲ့လို့ အပြည့်အဝ တာဝန်ယူပါတယ်။ ခရီးသွားပြီး လာကြည့်ကြတဲ့ မန်စီးတီးပရိသတ်တစ်ယောက်ချင်းစီတိုင်းကို တောင်းပန်ပါတယ်။ အဆုံးမတော့ ဒါက ရှက်စရာပါ။ အဖြေမရှိတော့ ဘာပြောရမှန်းတောင် မသိတော့ပါဘူး။ တောင်းပန်ပါတယ်လို့ပဲ ပြောနိုင်ပါတယ်။ သူတို့ အနိုင်နဲ့ ထိုက်တန်ပါတယ်။ ကျွန်တော်တို့ ညံ့ခဲ့တယ်။ သူတို့ အိမ်ကွင်းမှာ ကစားတာ အရမ်းကောင်းတယ်။ သူတို့ ပထမဂိုးမရခင်အထိ ကျွန်တော်တို့ ကစားတာ ကောင်းသေးတယ်။ ဒါပေမယ့် နောက်တော့ သူတို့ နောက်ထပ် ဂိုးသွင်းလာတယ်။ ပြီးရင် ဂျန်(ပက်တာဂူဂီ)က ဒီနှစ်ရဲ့အကောင်းဆုံးဂိုးကို သွင်းလာတယ်။ အကောင်းဆုံးတော့ လုပ်ခဲ့တာပဲ။ ဒါပေမယ့် တခုခု လိုအပ်နေခဲ့တယ်။ စီနီယာကစားသမားတွေမှာ အပြည့်အဝ တာဝန်ရှိပါတယ်။ ဘယ်လို ခံစားရတယ် ဘာညာကိုတော့ မပြောလိုဘူး။ ကွင်းထဲမှာ အကောင်းဆုံးလုပ်ခဲ့တယ်။ ပွဲတွေ အများကြီးကစားခဲ့ရတော့ ကွင်းထဲမှာ မစွမ်းဆောင်ပြနိုင်ခဲ့ဘူး။ အကောင်းဆုံးတော့ ကြိုးစားတာပဲ။ နောက်ပွဲအတွက် အသင့်ဖြစ်နေဖို့ ကြိုးစားမယ်။ လေးရက်ပဲ အချိန်ရတယ်။ ပြန်အားဖြည့်လာဖို့ ကြိုးစားရမယ်"လို့ ပြောကြားသွားပါတယ်။
ဂွါဒီယိုလာရဲ့ မန်စီးတီးဟာ ချန်ပီယံလိဂ်ရှုံးထွက်အဆင့်သို့ တိုက်ရိုက်တက်ရောက်ရေးအတွက် လာမယ့်အပတ် ဗုဒ္ဓဟူးနေ့ ဂါလာတာစာရေးနှင့်ပွဲတွင် အနိုင်ရရှိရေး ကြိုးပမ်းသွားရပါမယ်။
တဖက်တွင် အသင်းငယ်လေး ဘိုဒို/ဂလမ့်မှာ နောက်ဆုံးပွဲ ဖြစ်တဲ့ အက်သလက်တီကိုနှင့်ပွဲတွင် အနိုင်ရရှိလာပါက ပလေးအော့ဖ်ကစားခွင့် ရလာနိုင်ပါသေးတယ်။
မန်စီးတီးဟာ လာမယ့် စနေနေ့မှာ အီတီဟတ်ကွင်းမှာ ဝုဗ်ကို ဧည့်ခံကစားရပါမယ်။

ခရစ္စတီယာနိုရော်နယ်ဒိုရဲ့ ကြေးရုပ်ထုအား မီးရှို့ ဖျက်ဆီးသူအား ရဲတပ်ဖွဲ့ အပူတပြင်း ရှာဖွေနေ
=======================

ရဲတပ်ဖွဲ့ဟာ ခရစ္စတီယာနိုရော်နယ်ဒိုရဲ့ မွေးရပ်မြေ မာဒိုင်ရာကျွန်းမှ ကြေးရုပ်ထုအား မီးရှို့ဖျက်ဆီးခဲ့သူအား အပူတပြင်း လိုက်လံရှာဖွေနေပါတယ်။
လူငယ်တစ်ဦးဟာ ယူနိုက်တက်နှင့် ရီးရဲလ်မက်ဒရစ်ဂန္ထဝင်ကစားသမားရဲ့ ကြေးရုပ်ထုကို မီးလောင်စေတဲ့ အရည်ပက်လောင်းပြီးနောက် မီးခြစ်ဖြင့် မီးရှို့ခဲ့တာ ဖြစ်ပါတယ်။
ယင်းလူငယ်ဟာ ကြေးရုပ်ထု မီးလောင်လာချိန်တွင် နောက်ဆုတ်ပြီး စပီကာမှ ဖွင့်ထားတဲ့ ရက်သီချင်းဖြင့် ကနေခဲ့တာ ဖြစ်ပြီး ယင်းဗီဒီယိုဖိုင်မှာ အွန်လိုင်းတွင် ပျံ့နှံ့နေပါတယ်။
ယင်းလူငယ်က သူ့အကောင့်ကို zaino.tcc.filipe အမည်ဖြင့် ဖွင့်လှစ်ထားတာ ဖြစ်ပြီး ယင်းမီးရှို့တဲ့ ဗီဒီယိဖိုင်အား အင်စတာဂရမ်တွင် တင်ခဲ့ပါတယ်။ ယင်းဗီီဒယိုဖိုင်တွင် “This is God’s last warning @cristiano.” လို့ ရေးသားကာ သတိပေးထားပါသေးတယ်။
ခရစ္စတီယာနိုရော်နယ်ဒိုရဲ့ ရုပ်ထု ဘယ်လောက် ပျက်စီးသွားလဲဆိုတာကိုတော့ အတိအကျ မသိရသေးပါဘူး။ ခရစ္စတီယာနိုရော်နယ်ဒိုကြေးရုပ်ထုဟာ ယခင်တုန်းကလည်း မက်ဆီပရိသတ်များရဲ့ ဖျက်ဆီးခြင်းခံခဲ့ရဖူးပါတယ်။
ကြေးရုပ်ထုဟာ မီးရှို့ခံရပေမယ့် မီးက အလျင်အမြန် ငြိမ်းသပ်သွားတာလည်း တွေ့ရပါတယ်။
လက်ရှိအချိန်တွင် ရဲတပ်ဖွဲ့က ခရစ္စတီယာနိုရော်နယ်ဒိုကြေးရုပ်ထုအား မီးရှို့သူအား အပူတပြင်း ရှာဖွေနေကြောင်း ကြေညာထားပါတယ်။
ခရစ္စတီယာနိုရော်နယ်ဒိုရဲ့ ကြေးရုပ်ထုဟာ ၂၀၁၆ ခုနှစ်တုန်းက မက်ဆီပရိသတ်များရဲ့ ဖျက်ဆီးမှုများနှင့် ကြုံရပြီးနောက် CR7 Museum အနီးသို့ ရွှေ့ဆိုင်းထားတဲ့ ရုပ်ထု ဖြစ်ပါတယ်။

ယနေ့ ရွှေဈေးနဲ့ နိုင်ငံခြားငွေလဲနှုန်းများ
( ၂၀၂၆ - ဇန်နဝါရီ ၂၁ ၊ နံနက် ၁၀ နာရီ)

#ရွှေဈေး
-ကမ္ဘာ့ရွှေဈေး
တအောင်စ ၄၈၃၄ ဒေါ်လာ
ရန်ကုန်တိုင်းရွှေလုပ်ငန်းရှင်များအသင်း (YGEA) ရဲ့ရွှေစျေးကွက် အဖွင့်ဈေးနှုန်း
- အကယ်ဒမီ မီးလင်းရွှေ တကျပ်သား
၆၀၀၀၀၀၀ ကျပ်
ပြင်ပ အရောင်းအဝယ်ဖြစ်တဲ့ ရွှေဈေးနှုန်း
-အခေါက်ရွှေ တကျပ်သား (ပြင်ပဈေးကွက်)
ရောင်းဈေး ၁၀,၂၂၀,၀၀၀ ကျပ်
ဝယ်ဈေး ၁၀,၁၈၀,၀၀၀ ကျပ်
-၁၅ ပဲရည် တကျပ်သား
ရောင်းဈေး ၉,၈၂၀,၀၀၀ ကျပ်
ဝယ်ဈေး ၉,၇၈၀,၀၀၀ ကျပ်
* စနစ်သစ်
(၁ိ - ၁၆.၃၂၉၃၂၅ ဂရမ် = ၁၂၀ ရွေး)
-အခေါက်ရွှေ တကျပ်သား (ပြင်ပဈေးကွက်)
ရောင်းဈေး ၁၀,၁၀၀,၀၀၀ ကျပ်
ဝယ်ဈေး ၁၀,၀၆၀,၀၀၀ ကျပ်
-၁၅ ပဲရည် တကျပ်သား
ရောင်းဈေး ၉,၇၀၀,၀၀၀ ကျပ်
ဝယ်ဈေး ၉,၆၆၀,၀၀၀ ကျပ်
“လက်ရှိ ရွှေဈေးကွက်အတွင်း ဈေးနှုန်းအတက်အကျ မငြိမ်သေးတဲ့အတွက် ရောင်းမှား၊ ဝယ်မှား မဖြစ်ဖို့ သတိပြုစေလိုပါတယ်။”
(ရွှေဈေးနှုန်းများ အချိန်နှင့်အမျှ ပြောင်းလဲနိုင်သည်။)
#နိုင်ငံခြားငွေလဲလှယ်နှုန်း
-မြန်မာနိုင်ငံတော်ဗဟိုဘဏ် ရည်ညွှန်းငွေလဲနှုန်း
အမေရိကန် တဒေါ်လာ - ၃၆၅၅ ကျပ်
ပြင်ပပေါက်စျေး
-အမေရိကန်ဒေါ်လာ‌
ရောင်းဈေး - ၄၀၅၀ ကျပ်
ဝယ်ဈေး - ၃၉၄၅ ကျပ်
-စင်္ကာပူဒေါ်လာ
ရောင်းဈေး - ၃၁၅၂ ကျပ်
ဝယ်ဈေး - ၃၀၇၂ ကျပ်
-ယူရို
ရောင်းဈေး - ၄၇၄၅ ကျပ်
ဝယ်ဈေး - ၄၆၂၀ ကျပ်
-ထိုင်းဘတ်
ရောင်းဈေး - ၁၃၀.၇၂ ကျပ်
ဝယ်ဈေး - ၁၂၇.၃၉ ကျပ်
-မလေးရှားရင်းဂစ်
ရောင်းဈေး - ၉၉၇ ကျပ်
ဝယ်ဈေး - ၉၇၁ ကျပ်
-တရုတ်ယွမ်
ရောင်းဈေး - ၅၈၁ ကျပ်
ဝယ်ဈေး - ၅၆၆ ကျပ်
-ဂျပန်ယန်း
ရောင်းဈေး - ၂၅.၆၆ ကျပ်
ဝယ်ဈေး - ၂၅.၀၁ ကျပ်
-အိန္ဒိယရူပီး
ရောင်းဈေး - ၄၄.၃၉ ကျပ်
ဝယ်ဈေး - ၄၃.၂၆ ကျပ်
-ကိုရီးယားဝမ်
ရောင်းဈေး - ၂.၇၅ ကျပ်
ဝယ်ဈေး - ၂.၆၈ ကျပ်
-စတာလင်ပေါင်
ရောင်းဈေး - ၅၄၄၅ ကျပ်
ဝယ်ဈေး - ၅၃၀၅ ကျပ်
-ဩစတြေးလျဒေါ်လာ
ရောင်းဈေး - ၂၇၂၆ ကျပ်
ဝယ်ဈေး - ၂၆၅၆ ကျပ်
-ကနေဒါဒေါ်လာ
ရောင်းဈေး - ၂၉၂၆ ကျပ်
ဝယ်ဈေး - ၂၈၅၁ ကျပ်
-ဟောင်ကောင်ဒေါ်လာ
ရောင်းဈေး - ၅၁၉ ကျပ်
ဝယ်ဈေး - ၅၀၆ ကျပ်
-ယူအေအီး
ရောင်းဈေး - ၁၁၀၂ ကျပ်
ဝယ်ဈေး - ၁၀၇၄ ကျပ်
ငွေလဲနှုန်းများ အချိန်နှင့်အမျှ ပြောင်းလဲနိုင်သည်။
***သတ်မှတ်ဈေးအတိုင်း အရောင်းအဝယ်မလုပ်ပါက အရေးယူခံရနိုင်သည်။