ရန်ကုန်တိုင်းအတွင်း G3G Application ဖြင့် စားသုံးဆီဝယ်ယူနိုင်ပြီ

ရန်ကုန်တိုင်းအတွင်းရှိ မှတ်ပုံတင်ကိုင်ဆောင်ထားသူတိုင်း G3G Application ကိုအသုံးပြု၍ စားသုံးဆီများအား Door-to-Door စနစ်ဖြင့်အလွယ်တကူဝယ်ယူနိုင်ပြီဖြစ်ကြောင်း သိရသည်။

အဆိုပါ G3G Application ဖြင့် ရန်ကုန်တိုင်းအတွင်းရှိမြို့နယ်များသို့စားသုံးဆီတရားဝင်ဖြန့်ဖြူးရေးအတွက် မတ် ၁၆ ရက်နံနက်ပိုင်းက UMFCCI ၌မိတ်ဆက်ရာ G3G Application ၏ Head Of IT ဦးစွမ်းထက်အောင်က G3G Application အကြောင်းအားရှင်းလင်းပြောကြားခဲ့ကြောင်း သိရသည်။

G3G Application ကို မှတ်ပုံတင်ကိုင်ဆောင်ထားသူမည်သူမဆိုအသုံးပြုနိုင်ပြီး Digital နည်းပညာအသုံးပြု၍ မြန်မာ MSME ထုတ်ကုန်များကို Local နှင့် Global အသုံးပြုသူများနှင့်ချိတ်ဆက်ပေးခြင်းဖြင့် စီး ပွားရေးတိုးတက်မှုကိုအားပေးမြှင့်တင်ရန်တီထွင်ထုတ် လုပ်ထားခြင်းဖြစ်ကြောင်း သိရသည်။

ယူအက်စ်စစ်အခြေစိုက်စခန်းများအသုံးပြုမှုရပ်ရန်အီရန်ကတောင်းဆို

တေရန်၊ မတ်လ ၁၇ ရက်

အနောက်အာရှရှိ အမေရိကန်စစ်အခြေစိုက်စခန်းများကို အသုံးပြု၍ အိမ်နီးချင်းနိုင်ငံများနှင့် အီရန်၏ ဆက်ဆံရေးကို ပျက်ပြားအောင် လုပ်ဆောင်နေမှုများကို ရပ်တန့်ရန် အီရန်သမ္မတ မာဆူး ပီဇက်ရှ်ကီယန် က တနင်္လာနေ့တွင် တောင်းဆိုလိုက်ကြောင်း သိရသည်။

သမ္မတသည် အမေရိက၊ အစ္စရေးတို့နှင့် ဖြစ်ပွားနေသော စစ်ပွဲအပေါ် အီရန်၏ ရပ်တည်ချက်ကို လူမှုကွန်ရက် အိတ်စ် (ယခင် တွစ်တာ) တွင် ရေးသားဖော်ပြရာ၌ ယခုကဲ့သို့ ထည့်သွင်းပြောကြားခဲ့ခြင်းဖြစ်သည်။

အီရန်အနေဖြင့် ဤ “ရက်စက်ကြမ်းကြုတ်သော” စစ်ပွဲကို စတင်ခဲ့ခြင်းမဟုတ်ကြောင်းနှင့် ကျူးကျော်မှုကို ကာကွယ်ခြင်းသည် နိုင်ငံတစ်နိုင်ငံ၏ ကိုယ်ပိုင်အခွင့်အရေးဖြစ်ကြောင်း ပီဇက်ရှ်ကီယန်က ပြောကြားလိုက်သည်။

အီရန်အပေါ် အမေရိကနှင့် အစ္စရေးတို့၏ ရန်စကျူးကျော်မှုများ က ဆက်ရှိနေသရွေ့ ငြိမ်းချမ်းရေးနှင့် တည်ငြိမ်ရေးကို ရရှိနိုင်မည်မဟုတ်ကြောင်းနှင့် အီရန်သည် ဗိုလ်ကျ အနိုင်ကျင့်မှုများကို အလျှော့ပေးမည်မဟုတ်ကြောင်း ၎င်းက ဖြည့်စွက်ပြောကြားခဲ့သည်။

ထို့ပြင် နိုင်ငံတကာအသိုင်းအဝိုင်းများအနေဖြင့် ဤကျူးကျော်မှုများကို ရှုတ်ချရန်နှင့် ပတ်သက်ဆက်နွှယ်နေသူများကို နိုင်ငံတကာဥပဒေကို လိုက်နာရန် တိုက်တွန်းပေးဖို့ ကိုလည်း ပီဇက်ရှ်ကီယန်က တောင်းဆိုခဲ့ပသည်။

မှားယွင်းသောသတင်းအချက်အလက်များနှင့် နယ်ချဲ့ဝါဒကို အခြေခံသည့် စစ်ပွဲများသည် ၂၁ ရာစုတွင် “အလယ်ခေတ်” ဆန်သော လုပ်ရပ်များဖြစ်ကြောင်း ဝေဖန်ခဲ့ပြီး၊ အီရန်အပေါ် နောက်ထပ်တိုက်ခိုက်မှုများ မလုပ်ဆောင်တော့ဟု အာမခံချက်မရှိဘဲ တိုက်ပွဲများရပ်တန့်ရန် တောင်းဆိုနေခြင်းမှာ အဓိပ္ပာယ်မရှိကြောင်း ၎င်းက ဆိုသည်။
ဖေဖော်ဝါရီလ ၂၈ ရက် နေ့တွင် အမေရိက နှင့် အစ္စရေးတို့သည် အီရန်နိုင်ငံ မြို့တော် တေရန်နှင့် အခြားမြို့များကို ပူးတွဲဝင်ရောက်စီးနင်းခဲ့ရာ နိုင်ငံ၏အဆင့်မြင့်ခေါင်းဆောင်ကြီး အလီခါမေနီ အပါအဝင် ထိပ်တန်းအရာရှိကြီးများ၊ စစ်ဘက်ဆိုင်ရာဝန်ထမ်းများနှင့် အရပ်သားများ သေဆုံးခဲ့ရသည်။ အဆိုပါလုပ်ရပ်ကို တုံ့ပြန်သည့်အနေဖြင့် အီရန်က ဒေသတွင်းရှိ အစ္စရေးနှင့် အမေရိက ၏ ပိုင်ဆိုင်မှုများ၊ အခြေစိုက်စခန်းများကို ဒုံးကျည်နှင့် ဒရုန်းများဖြင့် ပြန်လည်တိုက်ခိုက်ခဲ့သည်။

Ref: ရှင်းဟွာ

မနက်ဖြန် မတ် ၁၈ ရက်မှစတင်၍ အချိန်ပိုင်းဖြင့် လျှပ်စစ်ဓာတ်အားပြန်လည်ဖြန့်ဖြူးမည်

ပူပြင်းသည်ရာသီရောက်ရှိလာချိန်၌ လျှပ်စစ်ဓာတ်အားသုံးစွဲမှုမြင့်တက်လာသဖြင့် ထိန်းညှိခြင်းများပြုလုပ်နိုင်ရန် မနက်ဖြန် မတ် ၁၈ ရက်မှစတင်၍ ဓာတ်အားထုတ် လုပ်နိုင်မှုနှင့်ချိန်ညှိကာ အချို့နေရာ၊ အချိန်များတွင် ဝန်အားမျှတခွဲဝေဖြန့်ဖြူးသွားမည်ဖြစ်ကြောင်း လျှပ် စစ်စွမ်းအားဝန်ကြီးဌာနထံမှ သိရသည်။

နွေရာသီဖြစ်သည့် မတ်လမှ ဇွန်လအထိ စဥ်ဆက်မပြတ်မျှတစွာ ဓာတ်အားဖြန့်ဖြူးပေးနိုင်ရန်နှင့် လက်ရှိအချိန်တွင် ရာသီဥတုပူပြင်းမှုကြောင့် ဝန်အားသုံးစွဲမှုမြင့်တက်လာခြင်းကို ထိန်းသိမ်းနိုင်ရန်အတွက်ဆောင်ရွက်ရခြင်းဖြစ်ကြောင်း သိရသည်။

ထို့သို့ ခွဲဝေဖြန့်ဖြူးမည်ဖြစ်သော်လည်း သဘာဝဓာတ် ငွေ့ရည် LNG သုံး ဓာတ်အားပေးစက်ရုံများမှထုတ်လုပ်သည့် လျှပ်စစ်ဓာတ်အားကိုတိုက်ရိုက်လိုင်းဖြင့် ဓာတ်အားပေးသည့် ဓာတ်အားလိုင်းများကိုမူ ဝန်အားမျှတခွဲဝေဖြန့်ဖြူးခြင်းမပြုလုပ်ဘဲ စဥ်ဆက်မပြန်ဆက် လက်ဖြန့်ဖြူးပေးသွားမည်ဖြစ်ကြောင်း သိရသည်။

ထို့ကြောင့် လျှပ်စစ်ဓာတ်အားထြတ်လုပ်လျော့နည်းခြင်းအရ ဝန်အားမျှတခွဲဝေဖြန့်ဖြူးရခြင်းကို နားလည်ခွင့်လွှတ်ပေးရန်နှင့် လျှပ်စစ်ဓာတ်အားကိုစနစ်တကျချွေတာသုံးစွဲပေးကြပါရန် လျှပ်စစ်စွမ်းအားဝန်ကြီးဌာနက မေတ္တာရပ်ခံခဲ့ကြောင်း သိရသည်။

ဘဂ္ဂဒက်မြို့ရှိ အမေရိကန်သံရုံး ဒရုန်းများ၊ ဒုံးများဖြင့် အပ-စ်ခံရကြောင်း လုံခြုံရေးသတင်းရင်းမြစ်များ ပြောကြား

အင်္ဂါနေ့ အစောပိုင်းက ဘဂ္ဂဒက်မြို့ပတ်ဝန်းကျင် နေရာအသီးသီးမှနေ၍ အမေရိကန်သံရုံးသို့ ဒုံးများနှင့် အနည်းဆုံး ဒရုန်း ၅ စင်းဖြင့် ပ-စ်ခတ်တို-က်ခိုက်ခဲ့ကြောင်း အီရတ်လုံခြုံရေးသတင်းရင်းမြစ်များက ပြောကြားခဲ့သည်။ ဤတို-က်ခိုက်မှုသည် အမေရိကန်-အစ္စရေးနှင့် အီရန်တို့အကြား စစ်ပွဲစတင်ကတည်းက အပြင်းထန်ဆုံး တို-က်ခိုက်မှုဖြစ်ကြောင်း ဖော်ပြထားသည်။

ဒရုန်းအနည်းဆုံး ၃ စင်းသည် သံရုံးဘက်သို့ ဦးတည်ပျံသန်းလာသည်ကို Reuters သတင်းထောက်တစ်ဦးက မြင်တွေ့ခဲ့ရသည်။ C-RAM လေကြောင်းရန်ကာကွယ်ရေးစနစ်က ၎င်းတို့အနက် ၂ စင်းကို ပ-စ်ချနိုင်ခဲ့သော်လည်း တတိယတစ်စင်းမှာ သံရုန်းဝင်းအတွင်းသို့ ကျရောက်ပေ-ါက်ကွဲခဲ့ပြီး မီးခိုးများနှင့် မီးတောက်များ ထွက်ပေါ်လာသည်ကိုတွေ့ရကြောင်း ၎င်းသတင်းထောက်က ဆိုသည်။

အီရတ်မြို့တော်တွင် ပေ-ါက်ကွဲသံတစ်ခု ကြားခဲ့ရကြောင်း အခြား Reuters သတင်းထောက်တစ်ဦးကလည်း ပြောသည်။

မှတ်ချက်ပေးရန် Reuters က ဖုန်းဖြင့် ဆက်သွယ်မေးမြန်းရာတွင် အမေရိကန်သံရုံး၏ လက်ကိုင်ဖုန်းများ ပိတ်ထားကြခြင်းကို ကြုံရသည်။

ဖေဖော်ဝါရီလ ၂၈ ရက်နေ့က စတင်ခဲ့သော စစ်ပွဲကို လက်တုံ့ပြန်သည့်အနေဖြင့် အီရန်ကျောထောက်နောက်ခံပြု ပြည်သူ့စစ်များသည် အီရတ်ရှိ အမေရိကန်အကျိုးစီးပွားများကို တို-က်ခိုက်လျက်ရှိသည်။

စိုက်ရာဌာနများနှင့် အမေရိကန်သံရုံးအပါအဝင် သံတမန်ရုံးများရှိရာ ဘဂ္ဂဒက်မြို့၏ လုံခြုံရေးတင်းကျပ်ထားသော Green Zone ကို ပိတ်ဆို့ထားသည်။

တတိယအကြိမ် အမျိုးသားလွှတ်တော် အစည်းအဝေး စတင် ၊ သဘာပတိအဖြစ် ဒေါ်ဒွဲဘူက တာဝန်ယူပြီး လွှတ်တော် ဥက္ကဋ္ဌ နှင့် ဒုဥက္ကဋ္ဌများ ရွေးချယ်မည်
‎
တတိယအကြိမ် အမျိုးသားလွှတ်တော် ပထမပုံမှန်အစည်းအဝေးကို မတ်လ (၁၈) ရက်၊ နံနက် (၁၀) နာရီတွင် နေပြည်တော်ရှိ အမျိုးသားလွှတ်တော် အဆောက်အအုံ၌ စတင် ကျင်းပနေပြီဖြစ်သည်။

‌‎တတိယအကြိမ် အမျိုးသားလွှတ်တော် ပထမ ပုံမှန်အစည်းအဝေး ပထမနေ့တွင် သဘာပတိအဖြစ် ဒေါ်ဒွဲဘူက တာဝန်ယူကာ အမျိုးသားလွှတ်တော်ဥက္ကဋ္ဌနဲ့ ဒုတိယ ဥက္ကဋ္ဌ တို့ကို ရွေးချယ်တင်မြှောက်ကာ သဘာပတိက လွှတ်တော် ဥက္ကဋ္ဌကို တာဝန်လွှဲအပ်ကာပြီး လွှတ်တော်ဥက္ကဋ္ဌက နှုတ်ခွန်းဆက်စကားပြောကြားခဲ့သည်။

‎တတိယအကြိမ် အမျိုးသားလွှတ်တော်တွင် လွှတ်တော် ဥက္ကဋ္ဌ အဖြစ် ဦးအောင်လင်း‌ဒွေး နှင့် ဒုတိယဥက္ကဋ္ဌအဖြစ် Jeng Phang နော်တောင်တို့ နာမည်ထွက်နေပြီး မကြာမီတွင် ရွေးချယ်တင်မြှောက်ကြတော့မည်ဖြစ်သည်။

ဦးအောင်လင်းဒွေး အမျိုးသားလွှတ်တော် ဥက္ကဋ္ဌ ဖြစ်လာ

ယနေ့ မတ်လ (၁၈) ရက်၊ နံနက် (၁၀) နာရီတွင် ကျင်းပသည့် တတိယအကြိမ် အမျိုးသားလွှတ်တော် ပထမပုံမှန်အစည်းအဝေး ပထမနေ့တွင် မန္တလေးတိုင်းဒေသကြီး အမျိုးသားလွှတ်တော် မဲဆန္ဒနယ် အမှတ် (၁၁) မှ အမျိုးသားလွှတ် တော်လွှတ်တော် ကိုယ်စားလှယ် ဦးအောင်လင်းဒွေးကို အမျိုးသားလွှတ်တော် ဥက္ကဋ္ဌအဖြစ် ရွေးချယ်တင်မြောက်လိုက်ပြီဖြစ်သည်။

သဘာပတိ၏ ခွင့်ပြုချက်အရ လွှတ်တော် ဥက္ကဋ္ဌလောင်း အမည်စာရင်းတင်သွင်းခြင်း ဆောင်ရွက်ရာတွင် အမည်စာရင်းတင်သွင်းလွှာ (၁) စောင်သာ ထုတ်ယူပြီး ဦးအောင်လင်းဒွေးကို ဥက္ကဋ္ဌလောင်းအမည်စာရင်းတင်သွင်းခဲ့သည့် အတွက် သဘာပတိက အတည်ပြု၍ ရွေးချယ်တင်မြှောက်ခဲ့ခြင်း ဖြစ်သည်။

အမျိုးသားလွှတ်တော် ဒုတိယ ဥက္ကဋ္ဌ Jeng Phang နော်တောင် ဖြစ်လာ

ယနေ့ မတ်လ (၁၈) ရက်၊ နံနက် (၁၀) နာရီတွင် ကျင်းပသည့် တတိယအကြိမ် အမျိုးသားလွှတ်တော် ပထမပုံမှန်အစည်းအဝေး ပထမနေ့တွင် မန္တလေးတိုင်းဒေသကြီး အမျိုးသားလွှတ်တော် မဲဆန္ဒနယ် အမှတ် (၁၁) မှ အမျိုးသားလွှတ် တော်လွှတ်တော် ကိုယ်စားလှယ် ဦးအောင်လင်းဒွေးကို အမျိုးသားလွှတ်တော် ဥက္ကဋ္ဌအဖြစ် ရွေးချယ်တင်မြှောက်ခဲ့ပြီး ကချင်ပြည်နယ် အမျိုးသားလွှတ်တော် မဲဆန္ဒနယ် အမှတ် (၂) မှ အမျိုးသားလွှတ်တော်ကိုယ်စားလှယ် Jeng Phang နော်တောင်အား ဒုတိယ ဥက္ကဋ္ဌ အဖြစ် ရွေးချယ်တင်မြှောက်လိုက်ပြီဖြစ်သည်။

အမျိုးသားလွှတ်တော် ဥက္ကဋ္ဌ နှင့် ဒုတိယ ဥက္ကဋ္ဌ တို့သည် အမျိုးသားလွှတ်တော် သဘာပတိရှေ့မောက်တွင် ကတိသစ္စာပြု လက်မှတ်ရေးထိုးကြပြီး ဥက္ကဋ္ဌ ဦးအောင်လင်းဒွေးက နှုတ်ခွန်းဆက်စကားပြောကြားကာ တတိယအကြိမ်အမျိုး သားလွှတ်တော် ပထမပုံမှန်အစည်းအဝေး ပထမနေ့ကို ရပ်နားသွားမည်ဖြစ်သည်။

မြန်မာနိုင်ငံအနေဖြင့် ကမ္ဘာ့နိုင်ငံပေါင်း ၁၂၇ နိုင်ငံနှင့် သံတမန် အဆက်အသွယ်ထူထောင်ထားပြီး ပြည်ပနိုင်ငံများ၌ သံရုံးနှင့် ကောင်စစ်ဝန်ချုပ်ရုံး ၅၂ ရုံး ဖွင့်လှစ်ကာ လုပ်ငန်းများ ဆောင်ရွက်လျက်ရှိ

မြန်မာ့သံတမန်ရေးရာ သမိုင်းကြောင်းသည် နှစ်ပေါင်း ၂၀၀၀ ကျော် သက်တမ်းရှိခဲ့ပြီး ခေတ်အဆက်ဆက်တွင် လွတ်လပ်၍ တက်ကြွပြီး ဘက်မလိုက်သော နိုင်ငံခြားရေးမူဝါဒကို အစဉ်တစိုက်ကျင့်သုံးခဲ့ကြောင်း၊ လက်ရှိတွင် ကမ္ဘာ့နိုင်ငံပေါင်း ၁၂၇ နိုင်ငံနှင့် သံတမန် အဆက်အသွယ်ထူထောင်ထားပြီး ပြည်ပနိုင်ငံများ၌ သံရုံးနှင့် ကောင်စစ်ဝန်ချုပ်ရုံး ၅၂ ရုံး ဖွင့်လှစ်ကာ လုပ်ငန်းများ အကောင်အထည်ဖော်ဆောင်ရွက်လျက်ရှိကြောင်း နိုင်ငံခြားရေးဝန်ကြီဂဌာန ပြည်ထောင်စုဝန်ကြီး ဦးသန်းဆွေက ပြောသည်။

ယမန်နေ့က ကျင်းပသည့် နိုင်ငံခြားရေးဝန်ကြီးဌာန၏ (၇၉)နှစ်မြောက် နှစ်ပတ်လည်နေ့တွင် အရုဏ်ဆွမ်းဆက်ကပ်လှူဒါန်းသည့် အထိမ်းအမှတ်အခမ်းအနားတွင် ပြည်ထောင်စုဝန်ကြီး ဦးသန်းဆွေက အထက်ပါအတိုင်း ပြောကြားခဲ့ခြင်း ဖြစ်သည်။

နိုင်ငံတော်အစိုးရအနေဖြင့် ထိတွေ့ဆက်ဆံရေးနှင့် သဟဇာတဖြစ်ရေးကို အလေးထားသည့် သံတမန်နည်းလမ်း (Engagement and Harmony Oriented Diplomacy) ကို ကျင့်သုံးလျက်ရှိရာ ပြီးခဲ့သည့် ငါးနှစ်တာအတွင်း နိုင်ငံတကာနှင့် ဒေသတွင်းပူးပေါင်းဆောင်ရွက်မှုများတွင် တက်ကြွစွာပါဝင်နိုင်ခဲ့ကြောင်း၊ နိုင်ငံတော်၏ ပုံရိပ်နှင့် ဂုဏ်သိက္ခာကို မြှင့်တင်ရန် အလေးထားဆောင်ရွက်လျက်ရှိရာတွင် ICJ ၌ ခိုင်မာစွာ ခုခံချေပခြင်းများလည်း လုပ်ဆောင်နိုင်ခဲ့ကြောင်း ပြည်ထောင်စုဝန်ကြီးက ပြောကြားခဲ့သည်။

အွန်လိုင်းလိမ်လည်မှုများအား Zero Tolerance Policy ဖြင့် နှိမ်နင်းခြင်းတို့တွင် သက်ဆိုင်ရာဝန်ကြီး ဌာနများနှင့်အတူ ထိထိရောက်ရောက် ပူးပေါင်းဆောင်ရွက်နိုင်ခဲ့ကြောင်း၊ ပါတီစုံဒီမိုကရေစီအထွေထွေရွေးကောက်ပွဲတွင် နိုင်ငံတကာ စောင့်ကြည့်လေ့လာသူများကို ဖိတ်ခေါ်၍ နိုင်ငံတော်အပေါ် ယုံကြည်မှုနှင့် လေးစားမှုရရှိအောင် ဆောင်ရွက်နိုင်ခဲ့ကြောင်း လည်း ပြည်ထောင်စုဝန်ကြီး ဦးသန်းဆွေက ပြောကြားခဲ့ကြောင်း သိရသည်။

OWIC ကိုင်ဆောင်ထားသူများအနေဖြင့် ပြည်ပနိုင်ငံသို့ ထွက်ခွာမည်ဆိုပါက သတ်မှတ်စည်ကမ်းများနှင့်အညီ ခွင့်ပြုချက်ရယူပြီးမှသာ ပြည်ပသို့ ပြန်လည်ထွက်ခွာရန် ထပ်မံအသိပေး

ပြည်ပအလုပ်အကိုင် အလုပ်သမား သက်သေခံကတ်ပြား (OWIC) လက်ဝယ်ကိုင်ဆောင်ထားသူများအနေဖြင့် ပြည်ပနိုင်ငံများသို့ ထွက်ခွာမည်ဆိုပါက ၂၀၂၆ ခုနှစ် ဇန်နဝါရီ ၁၄ ရက်က စတင်ပြီး သတ်မှတ်စည်းကမ်းများနှင့် အညီ အလုပ်သမား ညွှန်ကြားရေးဦးစီးဌာန၏ ခွင့်ပြုချက်ရယူပြီးမှသာ ပြည်ပကို ပြန်လည်ထွက်ခွာရန် လိုအပ်ကြောင်း အလုပ်သမားဝန်ကြီးဌာနက ထပ်မံအသိပေးကြေညာထားကြောင်း သိရသည်။

PJ နိုင်ငံကူးလက်မှတ်ဖြင့် ပြည်ပသို့ ထွက်ခွာမည့်သူများအတွက် ကျွမ်းကျင်မြန်မာလုပ်သားများ စေလွှတ်နိုင်ရေး နှင့် ပတ်သက်ပြီး လုပ်ဆောင်ရမည့် လုပ်ငန်းအစီစဉ်များကိုလည်း ၂၀၂၅ ခုနှစ် မတ်လအတွင်းက ထုတ်ပြန်ထားပြီး ပြည်ပထွက်ခွာခွင့်နှင့် ပတ်သက်၍ အလုပ်သမားညွှန်ကြားရေးဦးစီးဌာနသို့ အနည်းဆုံး ရုံးပိတ်ရက်မပါ ၅ ရက် ကြိုတင်လျှောက်ထားရမည်ဖြစ်ကြောင်းလည်း သိရသည်။

အလုပ်သမားညွှန်ကြားရေးဦးစီးဌာနအဖြေင့် OWIC ပြုလုပ်ခွင့်နှင့် ပြည်ပထွက်ခွာခွင့်များကို စိစစ်ခွင့်ပြုပေးနေကြောင်း သိရသည်။

သို့သော် အပြည်ပြည်ဆိုင်လေဆိပ်များကပေးပို့သည့် စာရင်းများအရ မိမိအစီအစဉ်ဖြင့် ခွင့်ပြန် OWIC လက်ဝယ်ရှိပြီးသူများသည် အလုပ်သမားညွှန်ကြားရေးဦးစီးဌာနသို့ တင်ပြခြင်းမရှိဘဲ ပြည်ပသို့ ထွက်ခွာနေသည့်ကို တွေ့ရှိရခြင်းကြောင့် ခွင့်ပြုချက်ရယူပြီးမှသာ ပြန်လည်ထွက်ခွာရန် ထပ်မံအသိပေးကြေညာထားကြောင်း သိရသည်။

ကာဇက်စတန်နိုင်ငံ၏ ပြည်လုံးကျွတ်ဆန္ဒခံယူပွဲကို ပြည်ထောင်စုရွေးကောက်ပွဲကော်မရှင်အဖွဲ့ သွားရောက်လေ့လာ

ကာဇက်စတန်နိုင်ငံ ဗဟိုရွေးကောက်ပွဲကော်မရှင်ဥက္ကဋ္ဌ၏ ဖိတ်ကြားချက်အရ မတ်လ ၁၅ ရက်က
ကျင်းပပြုလုပ်ခဲ့သည့် ပြည်လုံးကျွတ်ဆန္ဒခံယူပွဲ လေ့လာရေးအစီအစဉ်သို့ ပြည်ထောင်စုရွေးကောက်ပွဲ ကော်မရှင်အဖွဲ့က သွားရောက်လေ့လာခဲ့ကြောင်း သိရသည်။

ပြည်ထောင်စုရွေးကောက်ပွဲကော်မရှင်အဖွဲ့ဝင် ဦးသန်းထွတ်သိန်းနှင့် ဦးခင်မောင်ကြီးတို့သည် သွားရောက်လေ့လာပြီးနောက် ယမန်နေ့က ရန်ကုန်မြို့သို့ ပြန်လည်ရောက်ရှိလာပြီးဖြစ်ကြောင်း သိရသည်။

လေ့လာရေးခရီးစဉ်အတွင်း ကိုယ်စားလှယ်အဖွဲ့သည် မတ် ၁၄ ရက်တွင် ဗဟိုဆန္ဒခံယူပွဲကော်မရှင် (The Central Referendum Commission of the Republic of Kazakhstan – CRCRK) ၌ ကျင်းပပြုလုပ်သော ပြည်လုံးကျွတ်ဆန္ဒခံယူပွဲ ကျင်းပခြင်းဆိုင်ရာ ရှင်းလင်းပွဲအခမ်းအနားသို့ တက်ရောက်ခြင်း၊ မတ် ၁၅ ရက်တွင် မဲရုံများ စတင်ဖွင့်လှစ်မှုအခြေအနေနှင့် မဲဆန္ဒရှင်ပြည်သူများ၏ မဲပေးမှုလုပ်ငန်းစဉ်များကို လေ့လာခြင်းများ လုပ်ဆောင်ခဲ့ခြင်း ဖြစ်သည်။

မဲရုံပိတ်ခြင်းနှင့် မဲရေတွက်မှုလုပ်ငန်းစဉ်များကို လေ့လာစောင့်ကြည့်ခြင်းတို့ကို ဆောင်ရွက်ကြပြီး မတ် ၁၆ ရက်တွင် ပြည်လုံးကျွတ်ဆန္ဒခံယူပွဲ၏ ကနဦးရလဒ်များ ထုတ်ပြန်ခြင်းဆိုင်ရာ ရှင်းလင်းပွဲအခမ်းအနားသို့ တက်ရောက်လေ့လာခဲ့ခြင်းလည်း ဖြစ်သည်။

ထို့ပြင် လေ့လာရေးခရီးစဉ်သို့ တက်ရောက်လာသည့် နိုင်ငံတကာရွေးကောက်ပွဲကော်မရှင်၊ အဖွဲ့အစည်းအသီးသီးတို့မှ တာဝန်ရှိသူများနှင့်တွေ့ဆုံပြီး ရွေးကောက်ပွဲဆိုင်ရာ အတွေ့အကြုံများကို ရင်းနှီးပွင့်လင်းစွာ အမြင်ချင်းဖလှယ် ဆွေးနွေးခဲ့ကြကြောင်း သိရသည်။