ကရင်ပြည်နယ်သို့ ခရီးသွား ပိုမိုဝင်ရောက်ရန် စီမံချက် ဆောင်ရွက်နေ
----------------------------

ကရင်ပြည်နယ်ကို ပြည်တွင်းပြည်ပခရီးသွားတွေ ပိုမိုဝင်ရောက်လာစေဖို့ စီမံချက်ဆွဲပြီး ဆောင်ရွက်နေတယ်လို့ ကရင်ပြည်နယ်ဒေသဆိုင်ရာ ခရီးသွားလုပ်ငန်းကော်မတီ ဒုတိယဥက္ကဋ္ဌ စီးပွားရေးရာဝန်ကြီး ဦးစောခင်မောင်မြင့် က ပြောပါတယ်။
ကရင်ပြည်နယ်မှာ လှပတဲ့ ရေ၊ မြေ၊ တော၊ တောင်ရှုခင်းတွေအပြင် သဘာဝလှိုဏ်ဂူတွေ၊ ရေတံခွန်တွေ၊ လည် ပတ်စရာ ပေါများတဲ့အပြင် ကရင်တိုင်းရင်းသားတွေရဲ့ ရိုးရာယဉ်ကျေးမှုတွေ၊ ရာသီအလိုက် ပြုလုပ်တဲ့ ကရင်ရိုးရာ ပွဲ တော် တွေကြောင့် ပြည်တွင်း ခရီးသွား သာမက ပြည်ပခရီးသွားတွေကိုပါ ဆွဲဆောင်နိုင်တဲ့ ဒေသတစ်ခု ဖြစ် တယ် လို့ သိရပါတယ်။
ခရီးသွားတွေ ပိုမိုဝင်ရောက်နိုင်စေဖို့ ဒေသခံတွေ ကိုယ်တိုင်ပါဝင်တဲ့ ခရီးစဉ်ဒေသ စီမံခန့်ခွဲရေးအဖွဲ့တွေက ကဏ္ဍ အလိုက်လုပ်ဆောင်နေတယ်လို့ စီးပွားရေးရာဝန်ကြီး ဦးစောခင်မောင်မြင့်က ပြောပါတယ်။ ကရင်ပြည်နယ် အတွင်းခရီးစဉ်ဒေသတွေအဖြစ် ဆဒ္ဒန်ဂူ၊ ကော့ဂွန်းဂူ၊ ရသေ့ပျံဂူ၊ ကော့ကသောင်ဂူ၊ လွန်းည ရေပြာအိုင်၊ ဇွဲကပင် တောင်၊ ကျောက်ကလပ်၊ တောင်ဝိုင်း၊ ကျုံထော်ရေတံခွန်၊ ဖောင်တော်ဦးစေတီ၊ ပဒုမ္မာ လှိုဏ်ဂူ၊ ဘုရင့်ညီ နောင်ဂူ၊ လင်းနို့ဂူ၊ နောင်ခလိုင်၊ ဣစ္ဆာသယဂူတွေကို လာရောက်လည်ပတ်ကြတာ ဖြစ်တယ်လို့ သိရပါတယ်။
ပြီးခဲ့တဲ့ သီတင်းကျွတ်ရုံးပိတ်ရက်မှာဆိုရင် လာရောက်လည်ပတ်သူတွေများတဲ့အတွက် တည်းခိုရိပ်သာနဲ့ ဟိုတယ် တွေ အခက်အခဲဖြစ်ရတယ်လို့ ဆိုပါတယ်။ အဲဒီအခက်အခဲတွေပြေလည်စေဖို့လည်း ဟိုတယ်အသစ်တွေ တည် ဆောက်နိုင်ဖို့ လုပ်ထုံးလုပ်နည်းတွေနဲ့အညီ ခွင့်ပြုပေးခဲ့တယ်လို့ သိရပါတယ်။ ကရင်ပြည်နယ်ကို ၂၀၂၅ခုနှစ်၊ အောက်တိုဘာလအထိ ပြည်တွင်းခရီးသွား ငါးသိန်းကျော်နဲ့ ပြည်ပခရီးသွား လေးရာကျော် ဝင်ရောက်ခဲ့တာ ဖြစ်တယ်လို့ သိရပါတယ်။

နေပြည်တော်တွင်တွေ့ရှိသည့် ရှေးဟောင်းလှေကြီးနှစ်စင်းအား တူးဖော်ပြီးစီး
-------------------------------

နေပြည်တော်ပြည်ထောင်စုနယ်မြေ၊ လယ်ဝေးမြို့နယ်၊ ပတ္တာကျေးရွာ၊ ရုံးပင်ချောင်းအတွင်းမှာ တွေ့ရတဲ့ ရှေးဟောင်းလှေကြီးနှစ်စင်းကို တူးဖော်ရရှိခဲ့ပြီဖြစ်တယ်လို့ ပတ္တာကျေးရွာအုပ်ချုပ်ရေးမှူး ဦးစိုးမြင့်ရဲ့ ပြောကြားချက်အရ သိရပါတယ်။
အဲဒီရှေးဟောင်းလှေကြီးနှစ်စင်းကို ပတ္တာကျေးရွာမှာနေထိုင်တဲ့ ဒေါ်တင်မင်းက ပြီးခဲ့တဲ့ နိုဝင်ဘာ၁၁ရက်ကတည်းက စတင်တွေ့ရှိခဲ့တာဖြစ်ပြီး ကျေးရွာတာဝန်ရှိသူတွေကို အသိပေးခဲ့ကာ နိုဝင်ဘာ၁၅ရက်မှာတစ်စင်း၊ နိုဝင်ဘာ၁၆ရက်မှာ တစ်စင်း တူးဖော်ရရှိခဲ့တာလို့ ဆိုပါတယ်။
လှေကြီးနှစ်စင်းကို စတင်တွေ့ရှိခဲ့ပုံကတော့ လှည်းနဲ့ထင်းတိုက်ရင်းကနေ ရှာဖွေတွေ့ရှိခဲ့တာဖြစ်တယ်လို့ ဒေါ်တင်မင်းက ပြောပါတယ်။
ရှေးဟောင်းလှေကြီးတွေဟာ အရှည်ပေ ၅၀ကျော်ရှိပြီး တစ်စင်းက လုံးပတ်၈ပေ ၉လက်မနဲ့ နောက်တစ်စင်းက လုံးပတ်၉ပေကျော်ရှိတယ်လို့ သိရပါတယ်။
အခုရှာဖွေတွေ့ရှိခဲ့တဲ့ လှေကြီးနှစ်စင်းကို ပတ္တာကျေးရွာက သစ္စာမောင်ဘုရားဝင်းထဲကိုသယ်ဆောင်
ပြီး ထိန်းသိမ်းထားမှာဖြစ်တယ်လို့ ပတ္တာကျေးရွာအုပ်ချုပ်ရေးမှူး ဦးစိုးမြင့်က ပြောပါတယ်။
အဲဒီလှေကြီးနှစ်စင်းရဲ့ သမိုင်းကိုတော့ လေ့လာနေဆဲဖြစ်တယ်လို့လည်း ဦးစိုးမြင့်ရဲ့ ပြောကြားချက်အရ သိရပါတယ်။

ဗိုလ်တစ်ထောင် ဆိပ်ကမ်းတွင် သေဆုံးအမျိုးသားရုပ်အလောင်းတွေ့ရှိ
-------------------------------------------------

ရန်ကုန်တိုင်းဒေသကြီး၊ ဗိုလ်တစ်ထောင်မြို့နယ်ရှိ ဗိုလ်တစ်ထောင်ဆိပ်ကမ်းမှာ နိုဝင်ဘာ ၁၇ရက် မနက်ပိုင်းက သေဆုံးနေတဲ့ အမျိုးသားတစ်ဦးရဲ့ ရုပ်အလောင်း တွေ့ရှိခဲ့တယ်လို့ ကိုပူတူးနှင့်ဘော်ဒါများ လူမှုကူညီရေးအသင်းမှ တာဝန်ရှိသူတစ်ယောက်က One News ကိုပြောပါတယ်၊၊
အမျိုးသားတစ်ယောက် သေဆုံးနေကြောင်း ဖုန်းဆက် အကြောင်းကြားလာတဲ့အတွက် သွားရောက်ကူညီခဲ့တာဖြစ်ပြီး သေဆုံးတဲ့အကြောင်းရင်းကိုတော့ မသိရ​သေးဘူးလို့ ဆိုပါတယ်၊၊
သေဆုံးသူဟာ ခန့်မှန်း အသက် ၄၀ ဝန်းကျင်အရွယ်အမျိုးသားတစ်ယောက်ဖြစ်ပြီး သေဆုံး​နေခဲ့တာ
နှစ်ရက်လောက်ရှိပြီဖြစ်တယ်လို့ သိရပါတယ်၊၊
သေဆုံးရုပ်အလောင်းကို ကိုပူတူးနှင့်ဘော်ဒါများလူမှုကူညီရေးအသင်းမှယာဉ်နဲ့ ရန်ကုန်ပြည်သူ့ဆေးရုံကြီးကို ကူညီပို့ဆောင်ပေးခဲ့တယ်လို့ သိရပါတယ်၊၊

ပြင်ဦးလွင် ပန်းပွဲတော် ကျင်းပမည်
------------------------

ပြင်ဦးလွင်မြို့ အမျိုးသားကန်တော်ကြီးဥယျာဉ်ရဲ့ (၁၈) ကြိမ်မြောက် ပန်းပွဲတော်ကို လာမယ့် ဒီဇင်ဘာ ၆ ရက်နေ့ကစပြီး ကျင်းပသွားမှာဖြစ်တယ်လို့ အမျိုးသားကန်တော်ကြီးဥယျာဉ်ကနေ သိရပါတယ်။
ပန်းပွဲတော်ကို “IMMERSIVE FLOWERS FESTIVAL “အမည်နဲ့ ၂၀၂၅ ခုနှစ် ဒီဇင်ဘာလ ၆ရက်ကနေ ၂၀၂၆ ခုနှစ် ဇန်နဝါရီ ၄ ရက်အထိ ရက် ၃၀ တိုင်တိုင် ကျင်းပသွားမှာဖြစ်တယ်လို့ ဆိုပါတယ်၊၊
နှစ်စဉ်ကျင်းပနေတဲ့ ပန်းပွဲတော်ကို အခုနှစ်မှာလည်း အရင်နှစ်တွေနဲ့မတူ​အောင် ပန်းပြကွက်ပုံစံအမျိုးမျိုးကို ဖော်ထုတ်ပြသဖို့ ကြိုးစားပြင်ဆင်ထားတယ်လို့ သိရပါတယ်။
ဒါ့အပြင် ပွဲတော်ကာလအတွင်း နိုင်ငံကျော် တေးသံရှင်တွေရဲ့ ဖျော်ဖြေရေးအစီအစဉ်တွေ၊ ဈေးရောင်းပွဲတော်၊ ဒေသထွက်ကုန်ပြခန်းတွေ၊ ဆိုင်ခန်းတွေနဲ့ ရောင်းချပေးတဲ့ အစီအစဉ်တွေကိုလည်း ထည့်သွင်းပေးထားတယ်လို့ သိရပါတယ်။

မြန်မာ့ကျောက်မျက်ရတနာပြပွဲ ဖွင့်ပွဲအခမ်းအနား ကျင်းပ
-------------------------------------------

အကြိမ်(၆၀)မြောက် မြန်မာ့ကျောက်မျက်ရတနာပြပွဲ ဖွင့်ပွဲအခမ်းအနားကို နိုဝင်ဘာ ၁၇ ရက် မနက်ပိုင်းက နေပြည်တော်ရှိ မဏိရတနာကျောက်စိမ်းခန်းမမှာ ကျင်းပခဲ့တယ်လို့ သိရပါတယ်၊၊
မြန်မာ့ကျောက်မျက်ရတနာပြပွဲကို နိုဝင်ဘာ ၁၇ ရက်ကနေ ၂၆ ရက်အထိ (၁၀) ရက်တိုင်တိုင် ကျင်းပ
ပြုလုပ်သွားမှာဖြစ်ပါတယ်၊၊
ပြပွဲ ဖွင့်ပွဲအခမ်းအနားကို​တော့ နိုင်ငံတော် ယာယီသမ္မတ နိုင်ငံတော်လုံခြုံရေးနှင့် အေးချမ်းသာယာရေး ကော်မရှင်ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်၊ ကော်မရှင်အဖွဲ့ဝင် နိုင်ငံတော်ဝန်ကြီးချုပ် ဦးညိုစော၊ ကော်မရှင်အတွင်းရေးမှူး တွဲဖက်အမှုဆောင်ချုပ် ဗိုလ်ချုပ်ကြီး ရဲဝင်းဦးနဲ့ ကော်မရှင်အဖွဲ့ဝင်တွေ၊ သက်ဆိုင်ရာတာဝန်ရှိသူတွေ တက်ရောက်ခဲ့ကြတယ်လို့ သိရပါတယ်၊၊
ဒါ့အပြင် မြန်မာနိုင်ငံကျောက်မျက်လုပ်ငန်းရှင်များ အသင်းမှ တာဝန်ရှိသူတွေ၊ ဖိတ်ကြားထားသူတွေ၊ ပြည်တွင်း၊ ပြည်ပမှ ကျောက်မျက်လုပ်ငန်းရှင်တွေလည်း တက်ရောက်ခဲ့ကြတယ်လို့ သိရပါတယ်။
ပြပွဲဖွင့်ပွဲအခမ်းအနားမှာ နိုင်ငံတော်ယာယီသမ္မတ နိုင်ငံတော်လုံခြုံရေးနှင့်အေးချမ်းသာယာရေး ကော်မရှင်ဥက္ကဋ္ဌနဲ့ အဖွဲ့ဝင်တွေက ပုဂ္ဂလိက ကျောက်မျက်ရတနာ အချောထည် အရောင်းပြခန်းတွေ ဖွင့်လှစ်ရောင်းချနေမှုကို လိုက်လံကြည့်ရှု အားပေးပြီး၊ ခန်းမအပြင်ဘက်မှာ ခင်းကျင်းပြသထားတဲ့ ကျောက်စိမ်းရိုင်းအတွဲတွေကို လိုက်လံကြည့်ရှု စစ်ဆေးခဲ့တယ်လို့ သိရပါတယ်။
အကြိမ်(၆၀)မြောက် မြန်မာ့ကျောက်မျက်ရတနာပြပွဲမှာ ကျောက်စိမ်းရိုင်းအတွဲ ၅၀၆၄ တွဲ၊ ကျောက်စိမ်း အချောထည်အတွဲ ၂၁ တွဲ၊ ကျောက်မျက်ရိုင်းအတွဲ ၁၃ တွဲ၊ ကျောက်မျက်လက်ဝတ်ရတနာအတွဲ ၁၄၇ တွဲ၊ ပုလဲအတွဲ ၄၈၉ တွဲတို့ကို ပြည်တွင်း၊ ပြည်ပ ရတနာကုန်သည်တွေကို အိတ်ဖွင့်ဈေးပြိုင်တင်ဒါစနစ်နဲ့ ရောင်းချသွားမှာဖြစ်ပြီး အမေရိကန်ဒေါ်လာ၊ ယူရိုငွေ၊ ယွမ်ငွေ၊ ထိုင်းဘတ်ငွေနဲ့ မြန်မာနိုင်ငံတော်ဗဟိုဘဏ်က လက်ခံတဲ့ နိုင်ငံခြားငွေတွေနဲ့ ရောင်းချ ပေးသွားမှာဖြစ်တယ်လို့ သိရပါတယ်၊၊

အမေရိကန်လုပ် F-35 ကိုယ်ပျောက်တိုက်လေယာဉ်တွေ ဆော်ဒီကို ရောင်းမယ်

အမေရိကန်ပြည်ထောင်စုဟာ ဆော်ဒီအာရေဗျကို F-35 ကိုယ်ပျောက်တိုက်လေယာဉ်တွေ ရောင်းချပေးသွားမယ်လို့ အမေရိကန်သမ္မတ ဒေါ်နယ်ထရန့်က ထုတ်ဖော်ပြောဆိုလိုက်ပါတယ်။
ဆော်ဒီအာရေဗျဟာ မဟာမိတ်နိုင်ငံကောင်းဖြစ်ပြီူ တိုက်လေယာဉ်များ ရောင်းချပေးမယ်လို့ ဆော်ဒီအိမ်ရှေ့မင်းသား မိုဟာမက်ဘင်ဆယ်လ်မန် အိမ်ဖြူတော် မလာရောက်မီ တရက်အလိုမှာ ထရန့်ကဆိုပါတယ်။
F-35 တိုက်လေယာဉ်တွေကို ဥရောပနေတိုးမဟာမိတ်နိုင်ငံတွေ၊ အစ္စရေးအပါအဝင် အနီးကပ်ဆုံး မဟာမိတ်များကိုသာ အမေရိကန်ပြည်ထောင်စုက ရောင်းချထားပါတယ်။ ဆော်ဒီအာရေဗျဟာ အရှေ့အလယ်ပိုင်းမှာ အစ္စရေးသာပိုင်ဆိုင်တဲ့ F-35 တိုက်လေယာဉ်တွေ ဝယ်ယူဖို့ အချိန်ကြာမြင့်စွာကတည်းက ကြိုးပမ်းနေခဲ့ပါတယ်။
အစ္စရေးတာဝန်ရှိသူတွေကတော့ ဆော်ဒီအာရေဗျကို F-35 တိုက်လေယာဉ်တွေ အမေရိကန်ပြည်ထောင်စုက ရောင်းချမှာနဲ့ပတ်သက်ပြီး စိုးရိမ်ပူပန်ကြောင်း ထုတ်ဖော်ပြောဆိုလာပါတယ်။
ဆော်ဒီအိမ်ရှေ့မင်းသား မိုဟာမက်ဘင်ဆယ်လ်မန်ရဲ့ အိမ်ဖြူတော်ခရီးစဉ်အတွင်း အရပ်ဘက်နျူကလီးယား ပူးပေါင်းဆောင်ရွက်မှု မူဘောင်တခုအတွက် သဘောတူညီချက်တရပ်ကို လက်မှတ်ရေးထိုးမယ်လို့ သတင်းရင်းမြစ်တွေက ပြောပါတယ်။
ဒါပေမာ့် သဘောတူညီချက်ဟာ လက်နက်ပြန့်ပွားမှုကို တားဆီးရေးအတွက် တင်းကြပ်တဲ့ စည်းမျဉ်းတွေနဲ့ ကိုက်ညီရမှာဖြစ်ပြီး ကွန်ဂရက်က သဘောတူညီချက်အပြည့်အစုံကို စစ်ဆေးရမှာဖြစ်ပါတယ်။
ဆော်ဒီအာရေဗျကတော့ နျူကလီးယားလက်နက်တွေ ထုတ်လုပ်မှာမဟုတ်ကြောင်း ထုတ်ဖော်ပြောကြားထားပေမယ့် နျူကလီးယားအင်အားကြီးနိုင်ငံဖြစ်တဲ့ ပါကစ္စတန်နဲ့ ကာကွယ်ရေးမိတ်ဖက်အဖြစ် မကြာသေးမီက လက်မှတ်ရေးထိုးခဲ့ပါတယ်။

ဖိလစ်ပိုင်မှာ အဂတိလိုက်စားမှု တိုက်ဖျက်ရေး လူသိန်းချီဆန္ဒပြ

ဖိလစ်ပိုင်နိုင်ငံမှာ ရေကြီးရေလျှံမှု လျှော့ချရေး စီမံကိန်းတွေမှာ အဂတိလိုက်စားမှုစွပ်စွဲချက်တွေကို တာဝန်ယူ တာဝန်ခံဖို့ တောင်းဆိုမှု ဒုတိယနေ့အဖြစ် လူ နှစ်သိန်းကျော်ဟာ ဆန္ဒပြခဲ့ကြပါတယ်။
တနင်္ဂနွေနေ့က စတင်ခဲ့တဲ့ ဆန္ဒပြပွဲတွေအတွင်း လူခြောက်သိန်းကျော် တက်ရောက်ခဲ့ကြပြီး အင်္ဂါနေ့မနက်အထိ ဆန္ဒပြသူတွေဟာ ယာယီတဲတွေမှာ ရှိနေကြဆဲဖြစ်ပါတယ်။ ဒီဆန္ဒပြပွဲကို အဖွဲ့ဝင် နှစ် သန်းရှိတဲ့ Iglesia Ni Cristo ဘုရားကျောင်းမှ စီစဉ်တာဖြစ်ပါယ်။
"မကောင်းမှု လုပ်ရပ်များကို ဖော်ထုတ်ပါ"၊ "ပွင့်လင်းမြင်သာမှုနှင့် ဒီမိုကရေစီအတွက် ဆန္ဒပြပွဲ" ဆိုတဲ့ ဆိုင်းဘုတ်တွေကို ဆန္ဒပြသူတွေက ကိုင်ဆောင်ဆန္ဒပြခဲ့ကြပါတယ်။ နှစ်ရက်တာ ဆန္ဒပြပွဲတွေဟာ အများအားဖြင့် ငြိမ်းချမ်းစွာပြုလုပ်ခဲ့ပေမယ့် အဓိကအခြေခံအဆောက်အအုံ စီမံကိန်းတွေမှာ မသမာမှုတွေကို အရေးယူမှုနဲ့ပတ်သက်ပြီး ထိရောက်မှုမရှိဘူးလို့ ဆန္ဒပြသူတွေက ဝေဖန်ပါတယ်။
"ဒီပုံမှန်မဟုတ်တဲ့ကိစ္စမှာ ပါဝင်ပတ်သက်သူတွေကို ဖုံးကွယ်မထားဘဲ အစိုးရအနေနဲ့ စစ်မှန်ပြီး ရိုးသားတဲ့ စုံစမ်းစစ်ဆေးမှုတစ်ခု လုပ်ဆောင်ဖို့ ကျွန်တော်တို့ တောင်းဆိုနေပါတယ်" ဟု ဆန္ဒပြသူတယောက်က ပြောပါတယ်။
ချို့ယွင်းချက်ရှိတဲ့ စီမံကိန်းတွေအတွက် တာဝန်ရှိသူတွေကို ခရစ္စမတ်မတိုင်ခင် ထောင်ဒဏ်ချမှတ်မယ်လို့ သမ္မတ ဖာဒီနန်မားကို့စ် ဂျူနီယာက ကတိပြုခဲ့ပါတယ်။ ရေကြီးရေလျှံမှု ထိန်းချုပ်ရေး စီမံကိန်းတွေရဲ့ စာရင်းတခုမှာ တွေ့ရှိခဲ့တဲ့ မသမာမှုတွေကို သြဂုတ်လက ထုတ်ဖော်ပြောဆိုခဲ့ပြီးနောက်ပိုင်း အရှုပ်တော်ပုံဟာ ပိုမိုကျယ်ပြန့်လာခဲ့ပါတယ်။
စံနှုန်းမမီတဲ့ ဒါမှမဟုတ် တချို့ကိစ္စတွေမှာ ရေကြီးရေလျှံမှု ထိန်းချုပ်ရေး ကြိုးပမ်းမှုတွေကနေတစ်ဆင့် ချမ်းသာကြွယ်ဝလာတယ်လို့ စွပ်စွဲခံထားရတဲ့ အများပြည်သူ့လုပ်ငန်း အရာရှိတွေ၊ အဓိက ဆောက်လုပ်ရေးကုမ္ပဏီတွေရဲ့ အမှုဆောင်အရာရှိတွေနဲ့ ဥပဒေပြုအမတ်တွေကို မသမာမှုပြုတယ်လို့ စွပ်စွဲထားပါတယ်။
သမ္မတဟာ ရေကြီးရေလျှံမှု ထိန်းချုပ်ရေးကို အဓိကထားတဲ့ စီမံကိန်းတွေမှာ စွပ်စွဲခံရတဲ့ အဂတိလိုက်စားမှုကို စုံစမ်းစစ်ဆေးဖို့ ကော်မတီတရပ် ဖွဲ့စည်းခဲ့ပါတယ်။
"လုပ်ငန်းစဉ်စတင်ကတည်းက ရက်ပေါင်း ၁၀၀ နီးပါး ကုန်ဆုံးသွားပေမယ့် ဘယ်သူမှ ထောင်ချခံရတာ မရှိပါဘူး" လို့ ဆန္ဒပြအမျိုးသမီးတယောက်က ဆိုပါတယ်။ "သက်သေအထောက်အထားတွေ အများကြီးရှိပါတယ်။" လို့လည်း သူက ထောက်ပြပြောဆိုခဲ့ပါတယ်။

မက္ကဆီကို အစိုးရဆန့်ကျင်ရေးဆန္ဒပြပွဲ လူ ၁၂၀ ကျော် ဒဏ်ရာရ

မက္ကဆီကိုနိုင်ငံမှာ အစိုးရဆန့်ကျင်ရေးဆန္ဒပြပွဲတွေအတွင်း ပဋိပက္ခတွေကြောင့် အနည်းဆုံး လူ ၁၂၀ ကျော် ဒဏ်ရာရရှိခဲ့ပြီး ဒဏ်ရာရသူတွေထဲမှာ ၁၀၀ ကတော့ ရဲတွေဖြစ်တယ်လို့ တာဝန်ရှိသူတွေက ပြောပါတယ်။
နိုင်ငံတွင်းမှာ အကြမ်းဖက်ရာဇဝတ်မှုတွေထူပြောလာမှုနဲ့ သမ္မတ ကလော်ဒီယာရှိန်းဘောင်းရဲ့ အစိုးရကို ဆန့်ကျင်ဆန္ဒပြဖို့ မက္ကဆီကိုမြို့တော်မှာ ဆန္ဒပြသူထောင်ပေါင်းများစွာ ချီတက်ခဲ့ကြပါတယ်။
အခြားမြို့တွေမှာလည်း ပြုလုပ်ခဲ့တဲ့ ဆန္ဒပြပွဲတွေကို အစိုးရကို ဆန့်ကျင်တဲ့ လက်ယာယိမ်းနိုင်ငံရေးသမားတွေက ရန်ပုံငွေ ထောက်ပံ့တယ်လို့ သမ္မတက စွပ်စွဲထားပါတယ်။
ဆန္ဒပြပွဲတွေကို လူငယ်အဖွဲ့တွေက စီစဉ်ခဲ့ပြီး မူးယစ်ဂိုဏ်းတွေကို ပြင်းထန်စွာအရေးယူဖို့ တောင်းဆိုခဲ့တဲ့ အူရူအာပန်မြို့တော်ဝန် ကားလို့စ် မန်ဇို ရက်သတ္တပတ်အနည်းငယ်က လုပ်ကြံသတ်ဖြတ်မှုအပါအဝင် လူသိများတဲ့ သတ်ဖြတ်မှုတွေကို ဆန့်ကျင်တဲ့ နိုင်ငံသားတွေရဲ့ ထောက်ခံမှုကို ရရှိခဲ့ပါတယ်။
ဆန္ဒပြပွဲတွေအတွင်း အာဏာပိုင်တွေဟာ လုယက်မှုနဲ့ ကိုယ်ထိလက်ရောက်ကျူးလွန်မှုအပါအဝင် ရာဇဝတ်မှုတွေ အတွက် လူ ၂၀ ကို ဖမ်းဆီးခဲ့ကြောင်း မက္ကဆီကိုစီးတီး လုံခြုံရေးအကြီးအကဲ ပါဘလို ဗက်ဇ်ကွက်ဇ်က သတင်းထောက်တွေကို ပြောပါတယ်။
ဆန္ဒပြသူတွေကတော့ ကျွန်ုပ်တို့အားလုံး ကားလို့စ် မန်ဇိုဖြစ်တယ်ဆိုတဲ့ စားသားတွေရေးထိုးထားတဲ့ ဆိုင်းဘုတ်တွေ ကိုင်ဆိုင်ဆန္ဒပြခဲ့ကြပါတယ်။ ကားလို့စ်မန်ဇိုဟာ မူးယစ်ဆေးဝါးရောင်းဝယ်မှုဂိုဏ်းများတွေနဲ့ ရာဇဝတ်ဂိုဏ်းတွေရဲ့ အကြမ်းဖက်မှုတွေကို ဝေဖန်ပြောဆိုလေ့ရှိသူဖြစ်ပါတယ်။

ပြည်သူ့ပါတီမှ ဦးလွင်မြင့်ကို ကိုယ်စားလှယ်လောင်း အရည်အချင်း ပျက်ယွင်းခြင်း ရှိ၊ မရှိ စိစစ်ပြီး အရေးယူမယ်လို့ UEC ပြော

ပြည်သူ့ပါတီမှ လွှတ်တော် ကိုယ်စားလှယ်လောင်း ဦးလွင်မြင့်ကို ကိုယ်စားလှယ်လောင်း အရည်အချင်း ပျက်ယွင်းခြင်း ရှိ၊ မရှိ စိစစ်ပြီး အရေးယူမယ်လို့ ပြည်ထောင်စု ရွေးကောက်ပွဲကော်မရှင် (UEC) က အသိပေး ထုတ်ပြန်ထားပါတယ်။
ဦးလွင်မြင့်ဟာ လာမယ့် ဒီဇင်ဘာလ ၂၈ ရက်နေ့မှာ ကျင်းပမယ့် ရွေးကောက်ပွဲမှာ သင်္ဃန်းကျွန်းမြို့နယ် ပြည်သူ့လွှတ်တော် ကိုယ်စားလှယ် နေရာအတွက် ဝင်ရောက် ယှဥ်ပြိုင်မှာဖြစ်ပါတယ်။
အဲဒီ ရွေးကောက်ပွဲအတွက် ဦးလွင်မြင့်အနေနဲ့ ပြည်သူ့ပါတီရဲ့ TikTok လူမှုကွန်ရက်ကနေ တဆင့် မဲဆွယ်စည်းရုံးရေး လုပ်ဆောင်ခဲ့တာမှာ “အရေးတော်ပုံ” ၊ “တော်လှန်ရေး” ဆိုတဲ့ စကားလုံးတွေကို ပြောဆို သုံးနှုန်းခဲ့တယ်လို့ သိရပါတယ်။
မဲဆွယ် စည်းရုံးရေးအတွက် ဦးလွင်မြင့် ပြောဆိုခဲ့တာက “ကျွန်တော်တို့ ပြည်သူ့ပါတီ ဆိုတာဟာ ၁၉၈၈ ဒီမိုကရေ အရေးတော်ပုံမှာ ဦးဆောင်ပါဝင်ခဲ့ကြတဲ့ ကျောင်းသားခေါင်းဆောင်တွေ စုစည်းထားတဲ့ ပါတီတခုဖြစ်တယ်။ ၈၈ ကျောင်းသားခေါင်းဆောင်၊ အဲဒီခေတ်ကာလက ဗကသ ဥက္ကဋ္ဌတဦးဖြစ်တဲ့ ကိုကိုကြီး ဦးဆောင်တဲ့ ပါတီဖြစ်တယ်။ ဒါကြောင့်မို့လို့ ခေတ်အဆက်ဆက်မှာ တော်လှန်ရေးကို အစဉ်တစိုက် လုပ်လာတဲ့ ပါတီတခုဖြစ်တယ်” လို့ ထည့်သွင်း ပြောဆိုခဲ့ပါတယ်။
ဒါအပြင် ဦးလွင်မြင့်က အဲဒီ မဲဆွယ်စည်းရုံးရေး ရုပ်/သံမှာ ၎င်းတို့မိသားစုဟာလည်း နိုင်ငံရေးမျိုးဆက် သုံးဆက်တိုင်တိုင် နိုင်ငံရေးအကျဉ်းသား ဖြစ်ခဲ့ပြီး ၎င်းရဲ့ဖခင်ဟာ ကိုကိုးကျွန်းပြန်ဖြစ်ကာ တပါတီ အာဏာရှင်စနစ်ဖြစ်တဲ့ မြန်မာ့ဆိုရှယ်လစ် လမ်းစဉ် ပါတီကို ဆန့်ကျင်ခဲ့တာကြောင့် ထောင်အကြိမ်ကြိမ် ကျခဲ့သူ ဖြစ်တယ်လို့ ဆက်လက် ပြောဆိုခဲ့ပါတယ်။
ဒါအပြင် ၎င်းကိုယ်တိုင်ကလည်း ၈၈ မျိုးဆက် ကျောင်းသား ခေါင်းဆောင်တွေနဲ့အတူ အင်းစိန်ထောင်၊ သရက် အကျဉ်းထောင်တွေမှာ အကျဉ်းကျခံခဲ့ရသလို၊ ၎င်းရဲ့ သားဖြစ်သူကလည်း ၂၀၂၁ အရေးတော်ပုံမှာ ထောင်ကျခဲ့သူဖြစ်ကာ ပြီးခဲ့တဲ့ လပိုင်းကမှ ပြန်လည် လွတ်မြောက်လာတာ ဖြစ်တယ်လို့ ဆိုပါတယ်။
ဒါအပြင် အဲဒီ ရုပ်/သံမှာ “ဒါကြောင့်မို့လို့ ကျွန်တော်တို့ဟာ ပြည်သူအတွက်ကို ထောင်ပဲကျကျ၊ တန်းပဲကျကျဆိုတဲ့ နိုင်ငံရေး အကျဥ်းသားဟောင်း တဦး ဖြစ်တယ်ဆိုတဲ့အကြောင်း၊ ကျွန်တော်တို့ဟာ ယုံယုံကြည်ကြည်ပဲ ပြည်သူတွေအတွက် အာမခံချက် ပေးနိုင်ပါတယ်” လို့ ဆက်လက် ပြောဆိုခဲ့ပါတယ်။
ဒီလို ပြောဆိုခဲ့မှုတွေနဲ့ ပတ်သက်လို့ ကိုယ်စားလှယ်လောင်း အရည်အချင်းနဲ့ ပျက်ယွင်းမှု ရှိ၊ မရှိ Myanmar National Post သတင်းဌာနရဲ့ မေးမြန်းချက်အပေါ် UEC က အကြောင်းအရာ မှန်ကန်ပါက တရားစွဲ အဖွဲ့အစည်းတွေက သက်ဆိုင်ရာဥပဒေနဲ့ အရေးယူ ဆောင်ရွက်ရမှာ ဖြစ်တယ်လို့ ပြန်လည် ဖြေကြားထားပါတယ်။
အဲဒီလို အရေးယူ ဆောင်ရွက်ပြီးပါက ပြည်ထောင်စု ရွေးကောက်ပွဲ ကော်မရှင်ကလည်း လွှတ်တော် ကိုယ်စားလှယ်လောင်းနဲ့ သက်ဆိုင်တဲ့ လွှတ်တော် ရွေးကောက်ပွဲ ဥပဒေ ပြဋ္ဌာန်းချက်တွေနဲ့ ဆက်လက်အရေးယူ ဆောင်ရွက်ရမှာ ဖြစ်တယ်လို့ UEC က ဖြေကြားထားပါတယ်။
ဒီဖြစ်စဉ်နဲ့ ပတ်သက်လို့ ပြည်သူ့ပါတီဥက္ကဋ္ဌ ဦးကိုကိုကြီးကို VOM က ဆက်သွယ် မေးမြန်းရာမှာ “ကျွန်တော်တို့ ဒီကိစ္စ ဂဃနဏ မသိသေးဘူး။ ခုချိန်ထိ တရားစွဲတာလည်း မရှိသေးသလို ဖြစ်စဉ် အသေးစိတ် မသိရသေးတဲ့အတွက် ပြောဖို့ စောပါသေးတယ်” လို့ ပြောပါတယ်။
ဒါအပြင် ကာယကံရှင်ဖြစ်တဲ့ ပြည်သူ့ပါတီရဲ့ သင်္ဃန်းကျွန်းမြို့နယ် ပြည်သူ့လွှတ်တော် ကိုယ်စားလှယ်လောင်း ဦးလွင်မြင့်ကိုလည်း VOM က ဆက်လက် မေးမြန်းနိုင်ဖို့ ဖုန်းအကြိမ်ကြိမ် ခေါ်ဆိုခဲ့ပေမယ့် ဖုန်းအဝင်သာရှိပြီး လက်ခံဖြေကြားခြင်း မရှိခဲ့ပါဘူး။
လာမယ့် ဒီဇင်ဘာ ၂၈ ရက်နေ့မှာ ကျင်းပပြုလုပ်မယ့် ရွေးကောက်ပွဲမှာ ဦးကိုကိုကြီး ဦးဆောင်တဲ့ ပြည်သူ့ပါတီက ကိုယ်စားလှယ်လောင်း ၅၁၂ ယောက် ဝင်ရောက် ယှဉ်ပြိုင်မှာ ဖြစ်တယ်လို့ သိရပါတယ်။

ဘင်္ဂလား‌ဒေ့ရှ် ဝန်ကြီးချုပ်ဟောင်း ရှိတ်ဟာစီနာကို တရားရုံးက သေဒဏ်ချ

ဘင်္ဂလားဒေ့ရှ် ဝန်ကြီးချုပ်ဟောင်း ရှိတ်ဟာစီနာဟာ လူသားမျိုးနွယ်အပေါ် ကျူးလွန်တဲ့ ရာဇဝတ်မှုတွေကြောင့် အပြစ်ရှိကြောင်း တရားရုံးက ဆုံးဖြတ်ခံရပြီး သေဒဏ်ချမှတ်လိုက်ပါတယ်။
ပြစ်ဒဏ်ကို ဖမ်းဆီးခံရတဲ့နေ့ကစပြီး အကျိုးသက်ရောက်မယ်လို့ ဘင်္ဂလား‌ဒေ့ရှ် ရှေ့နေချုပ်က ပြောပါတယ်။ သူမကို တရားရုံးက မျက်ကွယ်ပြစ်ဒဏ်ချမှတ်ခဲ့တာပါ။ သေဒဏ်စီရင်ချက် ချမှတ်တာဟာ ဘင်္ဂလား‌ဒေ့ရှ် ကြားဖြတ်အစိုးရက သူမရဲ့ အဝါမီလိဂ်ပါတီကို နိုင်ငံရေးအင်အားစုတခုအဖြစ်မှ ပယ်ဖျက်ဖို့ နည်းလမ်းဖြစ်တယ်လို့ ဝန်ကြီးချုပ်ဟောင်း ရှိတ်ဟာစီနာက ပြောပါတယ်။
လူပေါင်း ၁၄၀၀ အထိ သေဆုံးခဲ့ပြီး အများစုမှာ လုံခြုံရေးတပ်ဖွဲ့တွေရဲ့ သေနတ်ပစ်ခတ်မှုကြောင့် သေဆုံးခဲ့ရတဲ့ ပြီးခဲ့တဲ့ နှစ်က ကျောင်းသားတွေ ဦးဆောင်တဲ့ ဆန္ဒပြပွဲများကို အကြမ်းဖက်နှိမ်နင်းဖို့ ရှိတ်ဟာစီနာက အမိန့်ပေးခဲ့တယ်လို့ ဆိုပါတယ်။
တရားရုံး၏ ဆုံးဖြတ်ချက်ကို ဟာစီနာကတော့ ဘက်လိုက်မှုနဲ့ နိုင်ငံရေးအရ ခြေထိုးတွေရှိတယ်လို့ စီရင်ချက်ချပြီးနောက် ပြောပါတယ်။ သူမဟာ ရာထူးကနေ ဖြုတ်ချခံရပြီးနောက်ပိုင်း အိန္ဒိယနိုင်ငံမှာ ပြည်ပြေးဘဝနေထိုင်နေပါတယ်။
သက်သေအထောက်အထားတွေကို တရားမျှတစွာ ချိန်ဆစစ်ဆေးနိုင်တဲ့ သင့်လျော်နဲ့ တရားရုံးမှာ မိမိအပေါ် စွပ်စွဲသူတွေနဲ့ တရားရင်ဆိုင်ဖို့ ကြောက်ရွံ့မှာမဟုတ်ကြောင်းနဲ့ သည်ဟိဂ်ရှိ နိုင်ငံတကာ ရာဇဝတ်ခုံရုံးမှာ ဒီစွပ်စွဲချက်တွေကို တင်သွင်းဖို့ ကြားဖြတ်အစိုးရကို စိန်ခေါ်တယ်လို့ ရှိတ်ဟာစီနာက ပြောပါတယ်။
တရားရုံးရဲ့ လက်ရှိ ဆုံးဖြတ်ချက်ဟာ ဟာစီနာကို လွှဲပြောင်းပေးဖို့ အိန္ဒိယအပေါ် ဖိအားပေးခံရဖွယ်ရှိပေမယ့် ပြန်လည်လွှဲပြောင်းရေးကတော့ ဖြစ်လာဖွယ်မရှိပေ။ တရားရုံးက စီရင်ချက်ချက်မယ့် ဒီကနေ့မှာတော့ တုံ့ပြန်မှုတွေ ရှိလာမှာကို စိုးရိမ်ပူပန်မှုတွေကြောင့် လုံခြုံရေး တိုးမြှင့်ထားပြီး ယနေ့နံက်မှာတော့ ဆန္ဒပြပွဲတချို့ ဖြစ်ပွားခဲ့ပါသေးတယ်။