နောင်ချို၊ ကျောက်မဲ၊ သီပေါနှင့် လားရှိုးမြို့တို့တွင် စက်သုံးဆီခွဲတမ်း မရရှိမှုအပေါ် လွှတ်တော်တွင် မေးမြန်း
နယ်မြေအခြေအနေကြောင့် လက်ရှိမပို့ဆောင်နိုင်သေးသော်လည်း အခြေအနေပေးသည်နှင့် ခွဲတမ်းပြန်လည်ပို့ဆောင်မည်ဟု ဝန်ကြီးဌာန ဖြေကြား
ရှမ်းပြည်နယ်(မြောက်ပိုင်း)ရှိ နောင်ချို၊ ကျောက်မဲ၊ သီပေါနှင့် လားရှိုးမြို့တို့တွင် အစိုးရစက်သုံးဆီခွဲတမ်း မရရှိသည့်အခြေအနေနှင့် စပ်လျဉ်း၍ စက်သုံးဆီခွဲဝေဖြန့်ဖြူးရေး အစီအစဉ်များကို သိရှိလိုကြောင်း နောင်ချိုမဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဦးကျော်မြင့်နိုင်က ယမန်နေ့က ကျင်းပသည့် တတိယအကြိမ် ပြည်သူ့လွှတ်တော် ဒုတိယပုံမှန်အစည်းအဝေး (၁၄) ရက်မြောက်နေ့တွင် မေးမြန်းခဲ့သည်။
ဦးကျော်မြင့်နိုင်က လားရှိုး၊ ကျောက်မဲ၊ သီပေါနှင့် နောင်ချိုမြို့များသည် စစ်ဘေးဒဏ်သင့်ခဲ့ရပြီး ပြန်လည်ထူထောင်ရေးလုပ်ငန်းများ ဆောင်ရွက်နေသည့် ဒေသများဖြစ်ကြောင်း၊ ဒေသခံများ၏ တင်ပြချက်များအရ စက်သုံးဆီဈေးနှုန်းများမှာ အစိုးရရည်ညွှန်းဈေးထက် မြင့်မားစွာ ရောင်းချနေကြောင်း၊ အစိုးရစက်သုံးဆီခွဲတမ်း မရရှိသည့်အတွက် စားဝတ်နေရေး၊ ကုန်ဈေးနှုန်းနှင့် လယ်ယာစိုက်ပျိုးရေးလုပ်ငန်းများအပေါ် ထိခိုက်မှုများ ဖြစ်ပေါ်နေကြောင်း ဆွေးနွေးတင်ပြခဲ့သည်။
အဆိုပါမေးခွန်းနှင့်ပတ်သက်၍ လျှပ်စစ်နှင့်စွမ်းအင်ဝန်ကြီးဌာန ဒုတိယဝန်ကြီး ဦးကျော်နိုင်ဝင်းက ဒေတာအချက်အလက်များကို စုစည်း၍ စာဖြင့်အသေးစိတ် ပြန်လည်ဖြေကြားသွားမည်ဖြစ်ကြောင်း၊ လက်ရှိတွင် နယ်မြေလုံခြုံရေးအခြေအနေကြောင့် စက်သုံးဆီ ပို့ဆောင်နိုင်ခြင်းမရှိသေးကြောင်း၊ သို့သော် အခြေအနေပေးသည်နှင့် ချက်ချင်းပို့ဆောင်နိုင်ရန် အဆင့်သင့်ပြင်ဆင်ထားကြောင်းနှင့် ရှမ်းပြည်နယ်အစိုးရအဖွဲ့နှင့်လည်း အဆက်မပြတ် ညှိနှိုင်းဆောင်ရွက်လျက်ရှိကြောင်း ဖြေကြားခဲ့သည်။
ဒုတိယဝန်ကြီးက ရှမ်းပြည်နယ်(မြောက်ပိုင်း)တွင် ယခင်က စက်သုံးဆီအရောင်းဆိုင် စုစုပေါင်း ၂၅၃ ဆိုင် ဖွင့်လှစ်ရောင်းချခွင့်ပြုထားခဲ့ပြီး နယ်မြေအခြေအနေ တည်ငြိမ်စဉ်က တစ်ရက်လျှင် 92 RON ဓာတ်ဆီ လီတာခြောက်သိန်းခန့်၊ 95 RON ဓာတ်ဆီ လီတာငါးသောင်းငါးထောင်ခန့်၊ ဒီဇယ် လီတာသုံးသိန်းခန့်နှင့် ပရီမီယမ်ဒီဇယ် လီတာငါးသိန်းခန့် ဖြန့်ဖြူးရောင်းချပေးနိုင်ခဲ့ကြောင်းလည်း ပြောကြားခဲ့သည်။
ထို့ပြင် နယ်မြေအခြေအနေ တည်ငြိမ်လာပြီး စက်သုံးဆီသယ်ယူပို့ဆောင်ရေး လမ်းကြောင်းများ အဆင်ပြေချောမွေ့လာသည်နှင့် လားရှိုး၊ မိုင်းရယ်၊ တန့်ယန်း၊ သီပေါ၊ ကျောက်မဲနှင့် နောင်ချိုမြို့နယ်တို့ရှိ စက်သုံးဆီအရောင်းဆိုင် (၈၆) ဆိုင်သို့ အစိုးရစက်သုံးဆီခွဲတမ်းများ ပြန်လည်ခွင့်ပြုပေးနိုင်ရေး စီမံဆောင်ရွက်လျက်ရှိကြောင်း ဖြေကြားခဲ့သည်။
