ဖိအားများအောက် ကျရောက်နေတဲ့ အာဘီလိုအာနေရာတွင် စီးရီးအေဝါရင့်နည်းပြနှင့် အစားထိုးရန် ရီးရဲလ်မက်ဒရစ်စဉ်းစားနေ
===================

ရီးရဲလ်မက်ဒရစ်ဟာ နွေရာသီတွင် စီးရီးအေဝါရင့်နည်းပြအား နည်းပြသစ်အဖြစ် ခန့်အပ်ရန် စီစဉ်လာမှုနှင့်အတူ နည်းပြအယ်ဗာရိုအာဘီလိုအာတွက် ဖိအားများ ပိုမို ကျရောက်လာပါတယ်။

ရီးရဲလ်မက်ဒရစ်ဟာ ဇာဗီးအလွန်ဆိုနှင့် လမ်းခွဲလိုက်ပြီးနောက် ယာယီနည်းပြအာဘီလိုအာလက်ထက်တွင် ရုန်းကန်နေရပါတယ်။

ရီးရဲလ်မက်ဒရစ်ဥက္ကဌဖလော်ရင်တီနိုပီရက်ဇ်ဟာ အာဘီလိုအာအပေါ်တွင် အပြည့်အဝ ယုံကြည်မှု မရှိမှုနှင့်အတူ အေစီမီလန်နည်းပြမက်ဆီမိုအယ်လီဂရီအား ခန့်အပ်ရေး အလေးအနက်ထား စဉ်းစားလာနေပါတယ်။

Corriere dello Sport က ရီးရဲလ်မက်ဒရစ်ဟာ ၂၀၂၆-၂၇ ရာသီတွင် အယ်လီဂရီအား နည်းပြသစ်အဖြစ် ခန့်အပ်ရန် အလေးအနက်ထား စဉ်းစားနေကြောင်း ဖော်ပြလာပါတယ်။

ဝါရင့်နည်းပြဟာ အေစီမီလန်နှင့် ၂၀၂၇ ခုနှစ်အထိ စာချုပ်ချုပ်ဆိုထားပေမယ့်လည်း ရီးရဲလ်မက်ဒရစ်ကဲ့သို့ ထိပ်သီးကလပ်ရဲ့ ကမ်းလှမ်းခြင်းသာ ခံလာရပါက ငြင်းပယ်လာဖို့ မရှိပါဘူး။

ရီးရဲလ်မက်ဒရစ်ရဲ့ တာဝန်ရှိသူများက အယ်လီဂရီရဲ့ လက်တွေ့ကျတဲ့ ဗျူဟာပိုင်း ချဉ်းကပ်ပုံက လက်ရှိ အာဘီလိုအာလက်အောက်တွင် ဆက်တိုက် အကောင်းဆုံးပုံစံ ရရှိရန် ရုန်းကန်ရမှု၊ ခံစစ်ပိုင်း ယိုယွင်းမှု၊ နည်းဗျူဟာပိုင်း တည်တန့်မှု မရှိခြင်းတို့အား ဖြေရှင်းနိုင်မယ်လို့ ယုံကြည်နေပါတယ်။

အယ်လီဂရီဟာ ရီးရဲလ်မက်ဒရစ်နည်းပြရာထူးအတွက် ပထမဆုံးအကြိမ် ဆက်သွယ်ခြင်းခံလာရတာ မဟုတ်ပါဘူး။ အယ်လီဂရီဟာ ၂၀၁၉ နှင့် ၂၀၂၁ ခုနှစ်တွေတုန်းက ရီးရဲလ်မက်ဒရစ်ရဲ့ ဆက်သွယ်ခြင်းခံခဲ့ရပေမယ့်လည်း ဂျူဗင်တပ်ကိုပင် ဆက်လက် ကိုင်တွယ်ရန် ဆုံးဖြတ်ခဲ့သူ ဖြစ်ပါတယ်။

ရီးရဲလ်မက်ဒရစ်ဟာ တနင်္လာနေ့တုန်းက ဂီတာဖေးကို ရှုံးနိမ့်ပြီးနောက် ရာသီသိမ်းရန် ၁၀ ပွဲတည်းသာ ကစားရန် လိုတော့တဲ့အချိန်တွင် ထိပ်ဆုံးမှ ဘာစီလိုနာနှင့် ၄ မှတ် ကွာဟနေပါတယ်။

ဒါ့အပြင် ရီးရဲလ်မက်ဒရစ်ဟာ မာစတန်တူအိုနို အနီကတ်ပြခံထားရတဲ့အပြင် ဒိန်းဟူဆင်နှင့် ကာရီရက်စ်တို့မှာလည်း အဝါကတ် ၅ ကတ်စီ ပြသခြင်းခံထားရမှုကြောင့် ဆဲလ်တာဗီဂိုနှင့်ပွဲအား လွဲမည်ဖြစ်ရာ ပိုမို အခက်ကြုံလာတော့မှာလည်း ဖြစ်ပါတယ်။