ချန်ပီယံလိဂ်မောင်းအောင်ကာ ဘဝအပြောင်းအလဲဖြစ်သွားစေမယ့် ငွေကြေး ရရှိသွားတဲ့သူတစ်ဦး ထွက်ပေါ်လာ
======================
ကံအရမ်းကောင်းတဲ့ ပရိသတ်တစ်ဦးဟာ ချန်ပီယံလိဂ် လိဂ်အဆင့် နောက်ဆုံးပွဲစဉ်များအား မောင်းလောင်းရာမှ ဘဝအပြောင်းအလဲ ဖြစ်သွားစေနိုင်တဲ့ ငွေကြေး ရရှိသွားခဲ့ပါတယ်။
ဗုဒ္ဓဟူးနေ့ညတုန်းက ချန်ပီယံလိဂ်လိဂ်အဆင့် နောက်ဆုံးပွဲစဉ်များအားလုံး တစ်ပြိုင်တည်း ကစားသွားခဲ့ပါတယ်။
ပရီးမီးယားလိဂ်ကလပ်များဖြစ်ကြတဲ့ အာဆင်နယ်၊ လီဗာပူး၊ စပါးစ်၊ ချဲလ်ဆီး၊ မန်စီးတီးတို့ နိုင်ပွဲကိုယ်စီ ရရှိကာ ချန်ပီယံလိဂ် ၁၆ သင်း ရှုံးထွက်အဆင့်သို့ တိုက်ရိုက် တက်ရောက်သွားခဲ့ကြပါတယ်။
တဖက်တွင် နယူးကာဆယ်မှာလည်း လက်ရှိချန်ပီယံ ပီအက်စ်ဂျီကို အဝေးကွင်းတွင် တစ်ဂိုးစီသရေကစားပြီး ပလေးအော့ဖ်အဆင့်မှ ထပ်မံ ကြိုးစားနိုင်ခွင့် ရသွားပါတယ်။
ချန်ပီယံလိဂ် လိဂ်အဆင့် နောက်ဆုံးပွဲ ၁၈ ပွဲလုံးကို တပြိုင်တည်း ကစားသွားခဲ့ပြီး တစ်ကမ္ဘာလုံးမှ ပရိသတ်များဟာ ချန်ပီယံလိဂ်မှာ ကံကောင်းခြင်းတွေ ရှာဖွေခဲ့ကြပါတယ်။
ကံအရမ်းကောင်းတဲ့ ပရိသတ်တစ်ဦးကတော့ ၇ ပွဲမောင်းအား ပေါင် ၇၇၅ လောင်းပြီး ပေါင် ၁၅၀၈၂.၆၉ ရရှိသွားပါတယ်။
သူဟာ လီဗာပူး-ကွာရာဘတ်၊ ဘင်ဖီကာ-ရီးရဲလ်မက်ဒရစ်၊ ကလပ်ဘရုဂျက်-မာဆေးနှင့် အက်သလက်တီကို-ဘိုဒို/ဂလမ့်ပွဲစဉ်တို့အား ၃ ဂိုးဂိုးပေါ် ရွေးချယ်ပြီး စပါးစ်က ဖရန့်ဖတ်ကို အနိုင်ရမယ်၊ ဘီလ်ဘာအို-စပို့တင်းပွဲနှင့် နပိုလီ-ချဲလ်ဆီးပွဲတို့တွင် နှစ်သင်းလုံး ဂိုးသွင်းမယ်ဆိုပြီး ရွေးချယ်သွားခဲ့ပါတယ်။
အံ့ဩသင့်စရာကောင်းစွာပဲ သူ့ရွေးချယ်မှုအားလုံး မှန်ကန်သွားပါတယ်။

ချန်ပီယံလိဂ်မှ ထွက်ခဲ့ရပြီးနောက် ထုတ်ပယ်ခံရမယ့်အရေးနှင့် ရင်ဆိုင်နေရတဲ့ ယူနိုက်တက်ပစ်မှတ်နည်းပြ
====================
ရောဘတ်တိုဒီဇာဘီဟာ ချန်ပီယံလိဂ်မှ ထွက်ခဲ့ရပြီးနောက် ထုတ်ပယ်ခြင်းမခံရမီ ရာထူးမှ နုတ်ထွက်ခွင့်ရန် တောင်းဆိုခြင်းခံလာရကြောင်း သိရပါတယ်။
အသက် ၄၆ နှစ်ရှိ ဘရိုက်တန်နည်းပြဟောင်းရောဘတ်တိုဒီဇာဘီဟာ ၂၀၂၄ ခုနှစ်တုန်းက အဲရစ်တန်ဟက် ထုတ်ပယ်ခြင်းမခံရမီကတည်းက ယူနိုက်တက်နည်းပြရာထူးအတွက် သတင်းထွက်လာခဲ့သူ ဖြစ်ပါတယ်။
သူဟာ ရူဘင်အမိုရမ် ထုတ်ပယ်ခံလာရချိန်တွင် မိုက်ကယ်ကာရစ်အား ရာသီအကုန်အထိ ခန့်အပ်ထားပေမယ့်လည်း နွေရာသီတွင် ယူနိုက်တက်အမြဲတမ်းနည်ပြအဖြစ် ခန့်အပ်ခြင်းခံရရန် ရေပန်းစားနေပါတယ်။
ဒါပေမယ့် ရောဘတ်တိုဒီဇာဘီဟာ မကြာမီကာလအတွင်းတွင် အလုပ်လက်မဲ့ ဖြစ်ပြီး ယူနိုက်တက်အား ကိုင်တွယ်ရန် ပိုမိုအခြေအနေကောင်းလာမယ့် အခြေအနေမှာ ရှိနေပါတယ်။
Foot Mercato က အီတလီလူမျိုးနည်းပြဟာ ဗုဒ္ဓဟူးနေ့ညတုန်းက ချန်ပီယံလိဂ်မှ ထွက်ခဲ့ရပြီးနောက် ရာထူးမှ နုတ်ထွက်ရန် တောင်းဆိုခြင်းခံခဲ့ကြောင်း သိရပါတယ်။ ဒါ့အပြင် ယင်းသတင်းဌာနကပင် ရောဘတ်တိုဒီဇာဘီမှာ မနုတ်ထွက်ပါက ထုတ်ပယ်ခြင်းခံရနိုင်တဲ့ အန္တရာယ်တွင် ရှိနေကြောင်း ဖော်ပြသွားပါတယ်။
မာဆေးဟာ ကလပ်ဘရုဂျက်အား ၃-၀ ဂိုးဖြင့် အံ့ဩသင့်ဖွယ်ရှုံးနိမ့်ကာ ပလေးအော့ဖ်နေရာနှင့် လွဲခဲ့တာလည်း ဖြစ်ပါတယ်။
ရောဘတ်တိုဒီဇာဘီဟာ မနက်ဖြန် စနေနေ့တွင် ပဲရစ်အက်ဖ်စီနှင့် ရင်ဆိုင်ကစားရမှာ ဖြစ်ပေမယ့်လည်း ကြာသပတေးနေ့က အသင်းကို လေ့ကျင့်ခန်းပင် ပြုလုပ်ခြင်း မရှိကြောင်း သိရပါတယ်။
ဒီဇာဘီဟာ ၂၀၁၈ ခုနှစ်မှ ၂၀၂၁ ခုနှစ်အတွင်းတွင် ဆက်စ်ဆူလိုအား အောင်မြင်စွာ ကိုင်တွယ်ပြီးနောက် ရှက်တာဒိုးနက်စ်အား တစ်နှစ်ကိုင်တွယ်ခဲ့ကာ ဘရိုက်တန်အား ကလပ်သမိုင်းတွင် ပထမဆုံးအကြိမ်အဖြစ် အဆင့် ၆ နေရာမှာ ရပ်တည်ကာ ဥရောပဝင်ခွင့်ရအောင် စွမ်းဆောင်ပေးခဲ့သူ ဖြစ်ပါတယ်။
သူဟာ ဘရိုက်တန်ကို နှစ်နှစ်ခန့်သာ ကိုင်တွယ်ပြီး စာချုပ်ဖျက်သိမ်းကာ ၂၀၂၄ ခုနှစ်တွင် မာဆေးအား ကိုင်တွယ်ခဲ့ပါတယ်။
တကယ်လို့များ ရောဘတ်တိုဒီဇာဘီသာ ထုတ်ပယ်ခြင်းခံလာရပါက ယူနိုက်တက်အနေဖြင့် သူ့အား ခန့်အပ်လာချိန်တွင် နစ်နာကြေးပေးလာရမှာ မဟုတ်ပါဘူး။
ရောဘတ်တိုဒီဇာဘီရဲ့ အခြေအနေကို စောင့်ကြည့်နေတာ ယူနိုက်တက်တစ်သင်းတည်း မဟုတ်ပါဘူး။ စပါးစ်ဟာလည်း လိဂ်တွင် အခြေအနေမကောင်းမှုကြောင့် သောမတ်စ်ဖရန့်အား ထုတ်ပယ်လာပါက ရောဘတ်တိုဒီဇာဘီအား ခန့်အပ်ရန် လျာထားပါသေးတယ်။

ချန်ပီယံလိဂ်ရှုံးထွက်ပလေးအော့ဖ်အဆင့်တွင် ဘင်ဖီကာနှင့် ရီးရဲလ်မက်ဒရစ် ထပ်မံ ဆုံတွေ့
===================
ဘင်ဖီကာဟာ ချန်ပီယံလိဂ်လိဂ်အဆင့် နောက်ဆုံးပွဲစဉ်တွင် ဆုံတွေ့ပြီးနောက် သုံးပတ်အကြာ ပလေးအော့ဖ်တွင် ရီးရဲလ်မက်ဒရစ်နှင့် ထပ်မံ ရင်ဆိုင်လာရပါမယ်။
ဗုဒ္ဓဟူးနေ့တုန်းက မော်ရင်ဟိုရဲ့ဘင်ဖီကာဟာ အချိန်ပို ၉၈ မိနစ်တွင် ဂိုးသမားအန်တိုလီထရူဘင်ရဲ့ ခေါင်းတိုက်ဂိုးဖြင့် စပိန်ထိပ်သီး ရီးရဲလ်မက်ဒရစ်အား ၄-၂ ဖြင့် အနိုင်ရရှိကာ ချန်ပီယံလိဂ် ၁၆ သင်း ရှုံးထွက်အဆင့်သို့ တက်ရေး ပလေးအော့ဖ်ကစားခွင့်ရလာခဲ့တာလည်း ဖြစ်ပါတယ်။
နယူးကာဆယ်အသင်းမှာလည်း ချန်ပီယံလိဂ်အမှတ်ပေးဇယားတွင် အဆင့် ၁၂ နေရာမှာသာ ရပ်တည်ရပြီးနောက် ပလေးအော့ဖ်တွင် ကွာရာဘတ်နှင့် ရင်ဆိုင်လာရပါမယ်။
လက်ရှိချန်ပီယံ ပီအက်စ်ဂျီမှာလည်း လီဂူး ၁ ပြိုင်ဘက် မိုနာကိုနှင့် ရင်ဆိုင်ကစားရပါမယ်။
ချန်ပီယံလိဂ် လိဂ်အဆင့်တွင် အဆင့် ၉ မှ ၂၄ အတွင်း ရပ်တည်တဲ့အသင်းများမှာ ၁၆ သင်းရှုံးထွက်အဆင့်သို့ တက်ရောက်ရေး နှစ်ကျော့ကစားရမှာ ဖြစ်ပါတယ်။ ပလေးအော့ဖ်ပထမအကျော့ပွဲစဉ်ကို ဖေဖော်ဝါရီလ ၁၇ နှင့် ၁၈ ရက်တို့တွင် ကစားလာမှာ ဖြစ်ပြီး ဒုတိယအကျော့ကို နောက်တစ်ပတ်တွင် ကစားလာပါမယ်။
ဒါ့အပြင် အင်တာမီလန်မှာ ဘိုဒို/ဂလမ့်နှင့်လည်းကောင်း၊ ဂျူဗင်တပ်မှာ ဂါလာတာစာရေးနှင့်လည်းကောင်း၊ အက်သလက်တီကိုမက်ဒရစ်မှာ ကလပ်ဘရုဂျက်နှင့်လည်းကောင်း၊ ဒေါ့မွန်မှာ အတ္တလန္တာနှင့်လည်းကောင်း၊ အိုလံပီယာကို့စ်မှာ လေဗာကူဆင်နှင့်လည်းကောင်း ရင်ဆိုင်ကစားရပါမယ်။
ချန်ပီယံလိဂ်ဗိုလ်လုပွဲအား မေလ ၃၀ ရက်နေ့တွင် ဟန်ဂေရီနိုင်ငံ ဘူဒါပတ်စ်ရှိ Puskas Arena တွင် ကစားလာပါမယ်။

ယူရိုပါလိဂ်ရှုံးထွက် ပလေးအော့ဖ်တွင် ဆဲလ်တစ်နှင့် စတုဂတ်၊ ဖောရက်စ်နှင့် ဖီနာဘာချီတို့ ဆုံတွေ့
======================
ဆဲလ်တစ်ဟာ ယူရိုပါလိဂ်ရှုံးထွက် ပလေးအော့ဖ်အဆင့်တွင် စတုဂတ်နှင့်ရင်ဆိုင် ကစားလာရမှာ ဖြစ်ပြီး နော်တင်ဟမ်ဖောရက်စ်မှာလည်း ယူရိုပါလိဂ် ၁၆ သင်း ရှုံးထွက်အဆင့်သို့ တက်ရောက်ရေးအတွက် ဖီနာဘာချီနှင့် ရင်ဆိုင်ကစားရပါမယ်။
မာတင်အိုနေးလ်ကိုင်တွယ်နေတဲ့ ဆဲလ်တစ်ဟာ တပည့်ဟောင်းရော်ဘီကိန်းကိုင်တွယ်နေတဲ့ ဟန်ဂေရီကလပ် ဖီရန်ဗာရို့စ်နှင့်ရင်ဆိုင်ရနိုင်တဲ့ အခြေအနေတွင် ရှိခဲ့ပေမယ့်လည်း ဘွန်ဒက်စ်လီဂါကလပ်နှင့် ဆုံတွေ့လာတာလည်း ဖြစ်ပါတယ်။
ပထမအကျော့ကို ဆဲလ်တစ်ပါ့ခ်တွင် ကစားလာမှာ ဖြစ်ပြီး အနိုင်ရတဲအသင်းက ၁၆ သင်းအဆင့်တွင် ပေါ်တို (သို့မဟုတ်) ဘရာဂါနှင့် ရင်ဆိုင်ရပါမယ်။
နော်တင်ဟမ်ဖောရက်စ်မှာ ဖီနာဘာချီအား ကျော်ဖြတ်လာနိုင်ပါက ၁၆ သင်း ရှုံးထွက်အဆင့်တွင် မက်ဂျီလန်း (သို့မဟုတ်) ဘက်တစ်နှင့် ရင်ဆိုင်ရပါမယ်။
ဒါ့အပြင် အခြားယူရိုပါလိဂ်ရှုံးထွက်ပလေးအော့ဖ်ပွဲစဉ်များအဖြစ် ပါနာသီနိုင်ကို့စ်နှင့် ဗစ်တိုရီးယားပါဇန်၊ လူဒိုဂိုရက်နှင့် ဖီရန်ဗာရို့စ်၊ ဂျီအန်ကေဒိုင်နမိုနှင့် ဂျန့်၊ PAOK နှင့် ဆဲလ်တာ၊ ဘရန်းနှင့် ဘိုလော့ဂ်နာ၊ လိုင်လီနှင့် ရက်စတားဘဲလ်ဂရိတ်တို့ တွေ့ဆုံနေပါတယ်။
ယူရိုပါလိဂ် ၁၆ သင်းရှုံးထွက်ပလေးအော့ဖ်ပွဲစဉ်များကို ဖေဖော်ဝါရီလ ၁၉ ရက်နှင့် ဖေဖော်ဝါရီလ ၂၆ ရက်နေ့တို့တွင် ကစားရပါမယ်။

အပြောင်းအရွှေ့ဈေးကွက်နောက်ဆုံးနေ့တွင် ကစားသမားဝယ်ယူအားဖြည့်လာနိုင်ကြောင်း ကာရစ် ပြောကြားလာ
====================
မိုက်ကယ်ကာရစ်က တနင်္လာနေ့ အပြောင်းအရွှေ့ဈေးကွက် မပိတ်မီ ယူနိုက်တက်မှာ ကစားသမားဝယ်ယူအားဖြည့်လာနိုင်ကြောင်း ပြောကြားလာပါတယ်။
ပြီးခဲ့တဲ့လတုန်းက ယူနိုက်တက်နည်းပြဟောင်းရူဘင်အမိုရမ်က ယခုအပြောင်းအရွှေ့ဈေးကွက်အတွင်းတွင် ကစားသမားခေါ်ယူလာနိုင်ကြောင်း ပြောကြားခဲ့ဖူးပါတယ်။
ဒါပေမယ့် ယူနိုက်တက်ဟာ အသင်းရဲ့ ကာလရှည်ကြာ ပစ်မှတ်တစ်ဦးဖြစ်တဲ့ အန်တိုနီဆီမန်ယိုအား ပေါင် ၆၅ သန်းဖြင့် ခေါ်ယူရန် ငြင်းဆိုခဲ့ပါတယ်။ ယင်းအချက်ကြောင့်ပင် အမိုရမ်နှင့် ယူနိုက်တက်တာဝန်ရှိသူများအကြား အက်ကွဲကြောင်း ပေါ်ကာ ထုတ်ပယ်ခြင်းခံခဲ့ရပါတယ်။
ယူနိုက်တက်ဟာ ကွင်းလယ်ကို အဓိကအားဖြည့်လာရန် စီစဉ်နေတာ ဖြစ်ပြီး ပစ်မှတ်ထဲတွင် ဆော်ဒီကလပ် Al Hilal တွင် ကစားနေတဲ့ ပေါ်တူဂီကွင်းလယ်ကစားသမားရူဘင်နီဗက်စ်လည်း ပါဝင်ပါတယ်။
ယခုအခါ မိုက်ကယ်ကာရစ်က ဒဏ်ရာကြောင့် ရက်သတ္တပတ်အတန်ကြာ အနားယူရမယ့် ပက်ထရစ်ဒေါ်ဂူးနေရာတွင် အစားထိုးရန် ကစားသမား ခေါ်ယူလာနိုင်ကြောင်း ပြောကြားလာပါတယ်။
ကာရစ်က "မခေါ်ဘူးလို့ ဘယ်တော့မှ မပြောပါဘူး။ အများကြီး ဖြစ်လာနိုင်တယ်။ အခြေအနေတွေ ရုတ်ချည်း ပြောင်းသွားနိုင်တယ်။ တခါတလေ ကျွန်တော်တို့ ထိန်းချုပ်မှုအောက်မှာ ရှိတယ်။ တခါတလေ မရှိဘူး။ ကျွန်တော်ကတော့ စိတ်အေးလက်အေးပါ။ အသင်းလိုက်အနေနဲ့ ဘာလုပ်နိုင်တယ်ဆိုတာ ပြသထားပြီးလည်း ဖြစ်ပါတယ်"လို့ ပြောကြားသွားပါတယ်။
လွန်ခဲ့တဲ့ ၁၈ လတုန်းက ဘိုလော့ဂ်နာမှ ပေါင် ၃၆.၅ သန်းဖြင့် ရောက်လာတဲ့ ဇတ်ဇီးမှာ ရိုးမားအပါအဝင် အီတလီကလပ်များရဲ့ စိတ်ဝင်စားခြင်းခံနေရပါတယ်။
သူဟာ ဒဏ်ရာမှ ပြန်လည်ကောင်းမွန်လာပြီ ဖြစ်ပြီး ဖူလ်ဟမ်နှင့်ပွဲတွင် ပါဝင်လာပါမယ်။
မိုက်ကယ်ကာရစ်ဟာ ယူနိုက်တက်ယာယီနည်းပြအဖြစ် လက်ကျန် ၁၇ ပွဲအား ကိုင်တွယ်ရန် ခန့်အပ်ခြင်းခံခဲ့ရတာ ဖြစ်ပါတယ်။
သူဟာ ပထမဆုံးနှစ်ပွဲတွင် မန်စီးတီး၊ အာဆင်နယ်တို့အား အနိုင်ယူထားပြီး ဖြစ်ပါတယ်။
ဒါပေမယ့် ယူနိုက်တက်ဟာ ချန်ပီယံဆုအတွက် တိုက်ပွဲဝင်နေတဲ့အသင်းများကို အနိုင်ကစားနိုင်စွမ်း ရှိပေမယ့် အသင်းငယ်များနှင့်ပွဲများတွင် အမှတ်ဆုံးရှုံးရတဲ့အသင်းအဖြစ် တင်စားခံနေရတဲ့အသင်း ဖြစ်ပါတယ်။
တဖက်တွင် ဖူလ်ဟမ်မှာလည်း နောက်ဆုံး ၈ ပွဲတွင် ရမှတ် ၁၇ မှတ်အထိ ရယူထားနိုင်ပါတယ်။
ဖူလ်ဟမ်ပွဲနှင့်ပတ်သက်ပြီး ကာရစ်က "မာကို(ဆေးလ်ဗား)က ဖူလ်ဟမ်ကို အသင်းကောင်းတစ်သင်း ဖြစ်အောင် တည်ဆောက်ထားတယ်။ အိမ်ကွင်း ဖြစ်နေလို့ ကျွန်တော်တို့ ရေပန်းစားတာပါ။ တကယ်တော့ ဘာအာမခံချက်မှ မရှိပါဘူး"လို့ ပြောကြားသွားပါတယ်။

ရာသီဥတုကြောင့် ယနေ့ည လိဒ်နှင့်ပွဲအတွက် ပြင်ဆင်မှုအပေါ် ကြီးမားတဲ့ ထိုးနှက်ချက် ကြုံလာရတဲ့ အာဆင်နယ်
======================
အာဆင်နယ်ရဲ့ စနေနေ့ည လိဒ်နှင့်ပွဲစဉ်အတွက် ပြင်ဆင်မှုမှာ ရာသီဥတုကြောင့် ကြီးမားတဲ့ ထိုးနှက်ချက် ကြုံလာရပါတယ်။
မီခေးလ်အာတီတာရဲ့ အာဆင်နယ်ဟာ ပရီးမီးယားလိဂ် ၃ ပွဲဆက် နိုင်ပွဲပျောက်မှုအား လိဒ်နှင့်ပွဲတွင် အဆုံးသတ်ရန် စိတ်အားထက်သန်နေခဲ့ပါတယ်။
အာဆင်နယ်ဟာ ပြီးခဲ့တဲ့အပတ်တုန်းက အမ်းမရိတ်တွင် ယူနိုက်တက်အား ၃-၂ ဖြင့် ရှုံးနိမ့်ပြီးနောက် ဒုတိယနေရာမှ မန်စီးတီးကို ၄ မှတ်တည်းသာ ဖြတ်ကာ ဇယားထိပ်မှာ ဦးဆောင်ထားနိုင်ပါတယ်။
ဒါပေမယ့် အာဆင်နယ်ဟာ ရာသီဥတုဆိုးရွားမှုကြောင့် ခရီးစဉ် အပြောင်းအလဲ ပြုလုပ်ခဲ့ရကာ ပွဲအတွက် ပြင်ဆင်မှုအား များစွာရိုက်ခတ်မှု ကြုံလာရပါတယ်။
အာဆင်နယ်ဟာ အစောပိုင်းတုန်းက မြောက်ပိုင်းသို့ လေယာဉ်ဖြင့် သွားရန် စီစဉ်ထားခဲ့တာပါ။
ဒါပေမယ့် ယော့ခ်ရှိုင်းယားတွင် မြူများ ဆိုးရွားစွာ ကျဆင်းနေမုနှင့်အတူ အာဆင်နယ်ဟာ နောက်ဆုံးအချိန်ကျမှ အပြောင်းအလဲ ပြုလုပ်ခဲ့ရပါတယ်။
အာဆင်နယ်ဟာ သောကြာနေ့တုန်းက နေ့လည်ပိုင်းတွင် လိဒ်သို့ လေယာဉ်ဖြင့် သွားရန် စီစဉ်ထားခဲ့တာပါ။
ယင်းအစီအစဉ်အရ လန်ဒန်မှ လိဒ်-ဘရက်ဖို့ဒ်သို့ တိုက်ရိုက်လေယာဉ်စီးနင်းသွားမှာလည်း ဖြစ်ပါတယ်။
ဒါပေမယ့် အာဆင်နယ်ဟာ ရာသီဥတုဆိုးရွားနေမှုကြောင့် လေယာဉ်ခရီးစဉ်ကို ဖျက်သိမ်းပြီး ဘတ်စ်ကားဖြင့် ခရီးသွားခဲ့ရပါတယ်။
အာဆင်နယ်ဟာ မိုင်ပေါင်း ၁၈၀ ကို သုံးနာရီကျော်ကြာ ခရီးနှင်ခဲ့ရပါတယ်။ ယင်းအချိန်မှာ ယာဉ်ကြောပိတ်မှုကြောင့် နာမည်ဆိုးဖြင့် ကျော်ကြားတဲ့ M1 လမ်းတွင် ယာဉ်ကြောမပိတ်ဆို့လျှင် ကြာမြင့်မယ့်အချိန် ဖြစ်ပါတယ်။ ယာဉ်ကြောပိတ်ပါက ထိုထက် ကြာနိုင်ပါသေးတယ်။
အာဆင်နယ်ဟာ ခရီးစဉ် အပြောင်းအလဲ ပြုလုပ်ခဲ့ရပေမယ့်လည်း မက်စ်ဒေါ်မန်း က လွဲပြီးကျန်ကစားသမားအားလုံးဖြင့် လိဒ်ကို ရင်ဆိုင်လာပါမယ်။
ဒဏ်ရာကြောင့် နားနေရတဲ့ ကိုင်ဟာဗတ်ဇ်နှင့် ရီကာဒိုကာလာဖီအိုရီတို့မှာ ကိုင်ရက်နိုင်ပွဲတွင် ပါဝင်ကစားပြီးနောက် လိဒ်နှင့်ပွဲတွင် ပါဝင်လာကြမှာ ဖြစ်ပါတယ်။

ပိုင်ရှင်အား သပိတ်မှောက်ဆန္ဒပြတဲ့အနေဖြင့် ပွဲလာမကြည့်ဘဲ လာဇီယိုပရိသတ်များ ဆန္ဒပြ
=====================
လာဇီယိုပရိသတ်များဟာ အသင်းပိုင်ရှင်ကလော်ဒီယိုလိုတီတိုအား ဆန္ဒပြတဲ့အနေဖြင့် ပွဲအား လာမကြည့်ဘဲ ဆန္ဒပြသပိတ်မှောက်ခဲ့ကြပါတယ်။
အီတလီထိပ်သီးကလပ်ဟာ သောကြာနေ့ညတုန်းက ဂျီနိုအာကို ဧည့်ခံကစားခဲ့ရပြီး အချိန်ပို ၁၀ မိနစ် ပင်နယ်တီဂိုးကြောင့် ၃-၂ ဖြင့် အနိုင်ရရှိခဲ့ပါတယ်။
ယင်းနိုင်ပွဲကြောင့် ဆာရီ ဦးဆောင်နေတဲ့ လာဇီယိုဟာ အမှတ်ပေးဇယားအဆင့် ၈ နေရာသို့ တက်လှမ်းလာနိုင်ခဲ့ပါတယ်။ ဒါပေမယ့် ၎င်းတို့ဟာ အမှတ်ပေးဇယားထိပ်ဆုံးမှ အင်တာမီလန်နှင့် ရမှတ် ၂၀ အထိ ကွာဟနေတုန်း ဖြစ်သလို ချန်ပီယံလိဂ်ဝင်ခွင့်နှင့် ရမှတ် ၁၁ မှတ်ကွာဟနေတုန်းပါ။
ဒါပေမယ့် မနေ့ညကပွဲတွင် လာဇီယိုပရိသတ်များဟာ ယခုဇန်နဝါရီအပြောင်းအရွှေ့ဈေးကွက်တွင် ကစားသမား ဝယ်ယူအားဖြည့်မှု မပြုလုပ်မှုအပေါ် သပိတ်မှောက်တဲ့အနေဖြင့် ယင်းပွဲအား လာမကြည့်ဘဲ ဆန္ဒပြသပိတ်မှောက်ခဲကြပါတယ်။
မနေ့ညက ဂျီနိုအာနှင့်ပွဲစဉ်တွင် အိုလံပီကိုကွင်းတစ်ခုလုံးနီးပါး ပရိသတ်မပါဘဲ ကစားခဲ့ရတာလည်း ဖြစ်ပါတယ်။
လာဇီယိုဟာ နွေရာသီတုန်းက ဘဏ္ဍာရေးပြဿနာကြောင့် ကစားသမားခေါ်ယူခွင့် ပိတ်ပင်ခြင်းခံခဲ့ရပေမယ့်လည်း ယခုဇန်နဝါရီတွင် ဗာလင်တင်ကက်စတယ်လာနို့စ်နှင့် မာတီယိုဂွန်ဒိုဇီတိုအား ပေါင် ၂၅ သန်းဖြင့် ဝက်စ်ဟမ်း၊ ဖီနာဘာချီသို့ ရောင်းချထားပါတယ်။
၎င်းတို့ဟာ အေဂျက်စ်မှ အလယ်တန်းကစားသမားကန်နိတ်တေလာ၊ တိုက်စစ်သမားအက်ဒရီယန်ပါဇီဘိုရက်၊ ဂိုးသမားအက်ဝတ်ဒိုမော့တာနှင့် ကွင်းလယ်ဖန်တီးရှင်ဒါနီရယ်မာလ်ဒီနီတို့ကို ခေါ်ယူထားပါတယ်။

ဖောရက်စ်နှင့်ပွဲတွင် အသင်း ပြောင်းမယ်လို့ သတင်းထွက်နေတဲ့ ပဲလေ့စ်တိုက်စစ်မှူးမာတီတာ ပါဝင်လာမည်မဟုတ်
===================
ခရစ္စတယ်ပဲလေ့စ်နည်းပြအိုလီဗာဂလက်စ်နာက တိုက်စစ်မှူးဂျိန်းစ်ဖီးလစ်ပီမာတီတာမှာ အသင်းပြောင်းမယ်လို့ သတင်းထွက်နေမှုနှင့်အတူ နော်တင်ဟမ်ဖောရက်စ်နှင့်ပွဲတွင် ပါဝင်လာမည်မဟုတ်ကြောင်း အတည်ပြုလာပါတယ်။
အေစီမီလန်က ပြင်သစ်တိုက်စစ်မှူးအား ခေါ်ယူရန် စိတ်ဝင်စားနေပြီး ပဲလေ့စ်ဘက်က ပြောင်းရွှေ့ကြေး ပေါင်သန်း ၄၀ အလိုရှိနေပါတယ်။ ဒါ့အပြင် ဖောရက်စ်ဟာ မာတီတာအား ခေါ်ယူရန် ဖောရက်စ်ဘက်က ပေါင် ၃၅ သန်းဖြင့် ကမ်းလှမ်းမှုကို ပယ်ချခဲ့ပြီးလည်း ဖြစ်ပါတယ်။
ယခုအခါ ဂလက်စ်နာက မာတီတာမှာ တနင်္ဂနွေနေ့တွင် ဖောရက်စ်အား အဝေးကွင်းသို့ သွားရောက် ရင်ဆိုင်ရမယ့်ပွဲတွင် ပါဝင်လာမှာ မဟုတ်ကြောင်း အတည်ပြုလာပါတယ်။
ဂလက်စ်နာက "အခုက အပြောင်းအရွှေ့နဲ့ ဘာမှ မဆိုင်ပါဘူး။ သူက ပွဲကစားဖို့ သင့်တော်တဲ့အနေအထားမှာ မရှိပါဘူး။ သူ့ကို ကစားစေဖို့ အကြောင်း မရှိပါဘူး။ အသင်းကို ကာကွယ်ရမယ်။ သူ့ကို ကာကွယ်ရပါမယ်။ နော်တင်ဟမ်သို့ သူ လိုက်ပါလာမှာ မဟုတ်ပါဘူး"လို့ ပြောကြားသွားပါတယ်။
အသက် ၂၈ နှစ်ရှိ မာတီတာဟာ ယခုရာသီတွင် ၈ ဂိုးသွင်းကာ ပဲလေ့စ်အတွက် ပွဲအများဆုံးကစားထားသူအဖြစ် ရပ်တည်နေသူ ဖြစ်ပါတယ်။
ပရီးမီးယားလိဂ်အမှတ်ပေးဇယားအဆင့် ၁၅ နေရာတွင် ရပ်တည်နေတဲ့ အသင်းခေါင်းဆောင်မာ့ခ်ဂူဟီအား မန်စီးတီးသို့ ပေါင်သန်း ၂၀ ဖြင့် ရောင်းချထားကာ အစားထိုးနိုင်မယ့် ကစားသမား ရှာဖွေနေတုန်း ဖြစ်ပါတယ်။

မန်စီးတီးတောင်ပံကစားသမားအော်စတာဘော့ဘ်ကို ပေါင် ၂၇ သန်းဖြင့် ဖူလ်ဟမ် ခေါ်ယူလာ
====================
ဖူလ်ဟမ်ဟာ မန်စီးတီးမှ နော်ဝေတောင်ပံကစားသမားအော်စကာဘော့ဘ်ကို ပြောင်းရွှေ့ကြေး ပေါင် ၂၇ သန်းဖြင့် ခေါ်ယူအားဖြည့်လာပါတယ်။
အသက် ၂၂ နှစ်ရှိ ဘော့ဘ်ဟာ မန်စီးတီးနှင့် ငါးနှစ်ခွဲစာချုပ်ချုပ်ဆိုလာတာ ဖြစ်ပြီး ကျောနံပါတ် ၁၄ ကို ဝတ်ဆင်လာပါမယ်။
သူဟာ ဖူလ်ဟမ်သို့ မပြောင်းမီ နော်ဝေကစားဖော် ဖူလ်ဟမ်ကွင်းလယ်ကစားသမားဆန်ဒါဘာဂီရဲ့ အကြံဉာဏ် ရယူပြီးနောက် Craven Cottage သို့ ပြောင်းခဲ့တာလည်း ဖြစ်ပါတယ်။
ဘော့ဘ်က "ဒီကို ရောက်လာခွင့်ရလို့ ဝမ်းသာတယ်။ အားလုံး တွေ့ဆုံခဲ့ရတဲ့ နေ့ကောင်းလေး ဖြစ်ခဲ့တယ်။ အရမ်းစိတ်လှုပ်ရှားရတယ်။ ကျွန်တော့် သူငယ်ချင်းကောင်း ဆန်ဒါနဲ့ စကားပြောခဲ့တယ်။ ပြီးတော့ မန်နေဂျာနဲ့ ပြောတယ်။ သူက ကလပ်ရဲ့ စနစ်ကို ပြောပြတယ်။ ကစားသမားတွေက ဘယ်လို၊ ကလပ်က ဘယ်လို ဆိုတာ ပြောပြပါတယ်။ သူ ပြောတာ အရမ်းကောင်းတော့ ဆုံးဖြတ်ချက်ချရတာ လွယ်ပါတယ်"လို့ ပြောကြားသွားပါတယ်။
ဘော့ဘ်ဟာ မန်စီးတီးအကယ်ဒမီထွက်တစ်ဦး ဖြစ်ပြီး မန်စီးတီးအတွက် ၄၇ ပွဲကစားခဲ့ရာမှာ ၃ ဂိုးသွင်းကာ ၄ ကြိမ် ဖန်တီးမှု ပြုလုပ်ပေးနိုင်ခဲ့ပါတယ်။
အတွင်းသတင်းရင်းမြစ်အရ မန်စီးတီးဟာ ဖူလ်ဟမ်ဘက်က ဘော့ဘ်ကို ရောင်းချလာချိန်တွင် ပြောင်းရွှေ့ကြေးရဲ့ ၂၀ ရာခိုင်နှုန်းကို ထပ်မံ ရရှိဦးမယ့်အချက်ကိုလည်း အရောင်းစာချုပ်မှာ ထည့်သွင်းထားပါတယ်။
ဘော့ဘ်ဟာ ဇန်နဝါရီတွင် ဘုန်းမောက်မှ အန်တိုနီဆီမန်ယို ရောက်လာပြီးနောက် ကစားခွင့် အကန့်အသတ်ဖြင့်သာ ရရှိလာနိုင်မှုနှင့်အတူ အသင်းပြောင်းလာတာလည်း ဖြစ်ပါတယ်။

ဗီလာတိုက်စစ်မှူးဂူးစ်ဆန်းအား ပဲလေ့စ် အငှားဖြင့် ခေါ်ယူလာ
===================
ခရစ္စတယ်ပဲလေ့စ်ဟာ အက်စတွန်ဗီလာတိုက်စစ်မှူးအီဗန့်ဂူးစ်ဆန်းအား ရာသီအကုန်တွင် အပြီးသတ် ခေါ်ယူနိုင်မယ့် အချက်ဖြင့် အငှားဖြင့် ခေါ်ယူလာပါတယ်။
အိုင်ဗရီကို့စ်လက်ရွေးစင်တိုက်စစ်မှူးဟာ နွေရာသီတုန်းက နိုက်စ်မှ ဗီလာသို့ ပေါင် ၂၆ သန်းဖြင့် ပြောင်းလာခဲ့သူ ဖြစ်ပြီး ပြိုင်ပွဲအရပ်ရပ် ၂၁ ပွဲကစားထားရာမှာ ၂ ဂိုးသွင်းထားပါတယ်။
ဂူးစ်ဆန်းဟာ ဆောင်းရာသီတွင် တမ်မီအေဘရာဟမ် ရောက်လာမှုနှင့်အတူ တတိယဦးစားပေးတိုက်စစ်မှူး ဖြစ်လာမှုနှင့်အတူ ပဲလေ့စ်သို့ ပြောင်းရန် ဆုံးဖြတ်လာတာလည်း ဖြစ်ပါတယ်။
ပဲလေ့စ်ဟာ ယခုဆောင်းရာသီတွင် အသင်းခေါင်းဆောင်မာ့ခ်ဂူဟီအား မန်စီးတီးသို့ ပေါင်သန်း ၂၀ ဖြင့် ရောင်းချထားသလို တိုက်စစ်မှူးမာတီတာမှာလည်း အသင်းပြောင်းရန် ကြိုးပမ်းနေမှုနှင့်အတူ ဂူးစ်ဆန်းအား ခေါ်ယူလာတာပါ။
ဒါ့အပြင် ခရစ္စတယ်ပဲလေ့စ်ဟာ အပြောင်းအရွှေ့ဈေးကွက် မပိတ်မီ ခံစစ်ကို အားဖြည့်နိုင်ရေးအတွက် အချိန်ပြည့် အလုပ်လုပ်နေပါတယ်။
ဂူးစ်ဆန်းဟာ ၂၀၂၄-၂၅ ရာသီတုန်းက နိုက်စ်အတွက် လီဂူး ၁ တွင် ၁၂ ဂိုးသွင်းယူကာ ဥရောပဝင်ခွင့်ရရှိအောင် ကူညီပြီးနောက် နိုက်စ်တစ်နှစ်တာအကောင်းဆုံးကစားသမားဆုကို ရရှိခဲ့သူ ဖြစ်ပါတယ်။