ဒု-သမ္မတဦးညိုစော ဥက္ကဋ္ဌအဖြစ်တာဝန်ယူမည့် နိုင်ငံခြားသုံးငွေကြီးကြပ်မှုကော်မတီဖွဲ့စည်း

ဒု-သမ္မတဦးညိုစော ဥက္ကဋ္ဌအဖြစ်တာဝန်ယူကာ ဒု-ဥက္ကဋ္ဌ(၁)ဦး၊ အတွင်းရေးမှူး(၁)ဦးနှင့် အဖွဲ့ဝင်(၃)ဦးတို့ပါဝင်သည့် နိုင်ငံခြားသုံးငွေကြီးကြပ်မှုကော်မတီဖွဲ့စည်းခဲ့ကြောင်း နိုင်ငံတော်သမ္မတရုံးမှ အမိန့်အမှတ် ၄၅ / ၂၀၂၆ ဖြင့် ဧပြီ ၂၁ ရက်ကထုတ်ပြန်ခဲ့သည်။
ကော်မတီအား နိုင်ငံတော်၏ စီးပွားရေးဖွံ့ဖြိုးတိုးတက် မှုအတွက် နိုင်ငံခြားငွေလဲလှယ်နှုန်းတည်ငြိမ်စေရေးနှင့် နိုင်ငံခြားငွေအားထိရောက်စွာအသုံးပြုနိုင်ရေးတို့အတွက် လိုအပ်သည့်လုပ်ငန်းတာဝန်များကို အကောင်အထည်ဖော်ဆောင်ရွက်နိုင်ရန်ဖွဲ့စည်းခဲ့ခြင်းဖြစ်သည်။
ကော်မတီသည် နိုင်ငံအတွင်းရှိ ရင်းနှီးမြှုပ်နှံမှုလုပ်ငန်းများ၊ ကုန်ထုတ်လုပ်မှုလုပ်ငန်းများက လိုအပ်သည့် စက်ပစ္စည်းများ၊ လုပ်ငန်းသုံးယာဉ်ယန္တရားများ၊ ကုန်ထုတ်လုပ်မှုအတွက်လိုအပ်သည့် အသုံးအဆောင်များနှင့် ကုန်ကြမ်းပစ္စည်းများတင်သွင်းရာ၌ လိုအပ်သည့် နိုင်ငံခြားသုံးငွေအားစိစစ်ခွင့်ပြုခြင်း၊ ပြည်သူများ စားဝတ်နေရေးအတွက်လိုအပ်သည့် စက်သုံးဆီ၊ ဆေးဝါး၊ စားသုံးဆီ၊ ဓာတ်မြေဩဇာ၊ ပိုးသတ်ဆေး၊ ပြည်တွင်း၌ ဝယ်ယူရရှိနိုင်ခြင်းမရှိသည့် တည်ဆောက်ရေးလုပ်ငန်းသုံးပစ္စည်းများဝယ်ယူတင်သွင်းရာတွင် လိုအပ်သည့် နိုင်ငံခြားသုံးငွေအားစိစစ်ခွင့်ပြုခြင်းတို့ကို ဆောင်ရွက်ရမည်ဖြစ်သည်။
ထို့ပြင် နိုင်ငံသားများ လူမှုရေးကိစ္စဖြင့် ပြည်ပသို့သွား ရောက်ဆေးကုသခြင်း၊ ပညာရေးအတွက်သွားရောက်ခြင်းနှင့် ဘာသာရေးအတွက်သွားရောက်ခြင်းတို့အတွက်လိုအပ်သည့် နိုင်ငံခြားသုံးငွေအားစိစစ်ခွင့်ပြုခြင်း၊ အထွေထွေဆိုင်ရာပစ္စည်းများ ပြည်ပမှတင်သွင်းခြင်း၊ ပြည်ပသို့ ချေးငွေနှင့် အတိုးများပြန်လည်ပေး ဆပ်ခြင်း၊ ဝန်ဆောင်ခများပေးချေခြင်း၊ ရင်းနှီးမြှုပ်နှံမှုလုပ်ငန်းများမှ အမြတ်ငွေများပြန်လည်လွှဲပို့ခြင်းတို့တွင်အသုံးပြုရန်လိုအပ်သည့် နိုင်ငံခြားသုံးငွေအား စိစစ်ခွင့်ပြုခြင်း၊ လူမှုအသုံးအဆောင် ဇိမ်ခံပစ္စည်းများတင်သွင်းမှုအတွက် မဖြစ်မနေတင်သွင်းရန်လိုအပ်မှုအပေါ် နိုင်ငံခြားသုံးငွေစိစစ်ခွင့်ပြုခြင်းတို့ကိုလည်း ဆောင်ရွက်ရမည်ဖြစ်သည်။
ထို့အတူ နိုင်ငံအတွင်းရှိ ပြည်တွင်းပြည်ပ ရင်းနှီးမြှုပ်နှံမှုလုပ်ငန်းများ၊ ကုန်ထုတ်လုပ်ငန်းများ၊ ပို့ကုန်/သွင်း ကုန်လုပ်ငန်းများနှင့် ပညာရေး၊ ကျန်းမာရေးအပါအဝင် ဝန်ဆောင်မှုလုပ်ငန်းများအတွက် နိုင်ငံခြားသုံးငွေလည်ပတ်မှုတို့အား ကြီးကြပ်ကွပ်ကဲခြင်းတို့ကိုလည်း ဆောင်ရွက်ရမည်ဖြစ်သည့်အပြင် အခြားပေးအပ်သောတာဝန်များကိုလည်းထမ်းဆောင်ရမည်ဖြစ်သည်။

မြန်မာ-ထိုင်းနှစ်နိုင်ငံ နိုင်ငံခြားရေးဝန်ကြီးများတွေ့ဆုံ

နှစ်နိုင်ငံလုံးတွင် အစိုးရသစ်များဖွဲ့စည်းခဲ့ပြီး အရေး ကြီးသည့်အကူးအပြောင်းကာလဖြစ်၍ ပူးပေါင်းဆောင်ရွက်မှုများပိုမိုမြှင့်တင်ရန်ဆွေးနွေး
နိုင်ငံခြားရေးဝန်ကြီးဌာန ပြည်ထောင်စုဝန်ကြီး ဦးတင်မောင်ဆွေနှင့် မြန်မာနိုင်ငံသို့အလုပ်သဘောခရီးစဉ်ရောက်ရှိနေသည့် ထိုင်းနိုင်ငံ ဒု-ဝန်ကြီးချုပ်နှင့် နိုင်ငံခြားရေးဝန်ကြီး H.E. Mr. Sihasak Phuangketkaew တို့ ဧပြီ ၂၂ ရက်ကတွေ့ဆုံခဲ့ကြသည်။
တွေ့ဆုံစဥ် ပြည်ထောင်စုဝန်ကြီးက မြန်မာအစိုးရ၏ ကြိုးပမ်းဆောင်ရွက်မှုများကို ထိုင်းနိုင်ငံက ထောက်ခံ ပံ့ပိုးပေးခြင်းအတွက်ကျေးဇူးတင်ကာ နှစ်နိုင်ငံနယ်စပ်ဒေသများ၌ တည်ငြိမ်အေးချမ်းမှုသည် မြန်မာနိုင်ငံ၏ ငြိမ်းချမ်းရေးလုပ်ငန်းစဉ်များကို အထောက်အကူပြုစေမည့်အပြင် နှစ်နိုင်ငံနယ်စပ်နေပြည်သူများ၏ သာယာဝပြောရေးအတွက် အထူးအရေးကြီးရာ နယ်စပ်ဒေသရှိ စိန်ခေါ်မှုများကိုဖြေရှင်းရာ၌ နှစ်နိုင်ငံ ပူးပေါင်း‌ ဆောင်ရွက်ရန်လိုအပ်သည်ဟု ပြောကြားသည်။
ထို့ပြင် မြန်မာနိုင်ငံ၏ ငြိမ်းချမ်းရေးလုပ်ငန်းစဉ်ကို ထိုင်းနိုင်ငံကပံ့ပိုးပေးရန်ဆန္ဒရှိမှုကို ကြိုဆိုကာ မြန်မာနိုင်ငံအနေဖြင့် ငြိမ်းချမ်းရေးလုပ်ငန်းစဉ်တွင် တစ်နိုင်ငံလုံးပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA)မူဘောင်ကိုအခြေခံ၍ ဆက်လက်ဆောင်ရွက်သွားမည်ဟု အလေးပေးပြောကြားခဲ့သည်။
ထို့အတူ ထိုင်းနိုင်ငံ ဒု-ဝန်ကြီးချုပ်နှင့် နိုင်ငံခြားရေးဝန် ကြီးကလည်း ထိုင်းနိုင်ငံအနေဖြင့် နိုင်ငံတော်သမ္မတ ဦးမင်းအောင်လှိုင် ဦးဆောင်သည့် အစိုးရသစ်တစ်ရပ်ဖွဲ့စည်းနိုင်မှုကိုဝမ်းမြောက်ကာ နှစ်ဆန်းတစ်ရက်နေ့တွင် အကျဉ်းသားများလွှတ်ပေးခဲ့ခြင်းကိုကြိုဆိုသည်ဟု ပြောသည်။
မြန်မာနိုင်ငံအနေဖြင့် ငြိမ်းချမ်းရေးဆွေးနွေးမှုများပြုလုပ်နိုင်ရန် လက်နက်ကိုင်အဖွဲ့ များအားဖိတ်ခေါ်ခဲ့ခြင်းကိုလည်းကြိုဆိုကာ မြန်မာအစိုးရ၏ ငြိမ်းချမ်းရေးနှင့် အမျိုးသားပြန်လည်သင့်မြတ်ရေးကြိုးပမ်းမှုများကို အသိအမှတ်ပြုပြီး ထိုင်းနိုင်ငံအနေဖြင့်ပါဝင်ပံ့ပိုးပေးလိုကာ မြန်မာနိုင်ငံအနေဖြင့် အာဆီယံနှင့် ပုံမှန်ဆက်ဆံရေးပြန်လည်ရရှိရေးကို ထောက်ခံပံ့ပိုးပေးရန်အသင့်ရှိပြီး နှစ်နိုင်ငံကြား အပြန်အလှန်အကျိုးဖြစ်ထွန်းစေမည့် ကဏ္ဍများတွင် ပူးပေါင်းဆောင်ရွက်မှုများတိုးမြှင့်သွားမည်ဖြစ်ကာ ထိုင်းနိုင်ငံအနေဖြင့် မြန်မာနိုင်ငံကို စိုက်ပျိုးရေး၊ ကျန်းမာရေး၊ ပညာရေးနှင့် အသေးစား၊ အလတ်စား စီးပွားရေးလုပ်ငန်းများဆိုင်ရာ ဖွံ့ဖြိုးမှုအကူအညီများပေးအပ်သွားမည်ဟုလည်း ပြောကြားခဲ့သည်။
ထို့နောက် ၎င်းတို့နှစ်ဦးသည် နှစ်နိုင်ငံလုံးတွင် အစိုးရသစ်များအသီးသီးဖွဲ့စည်းခဲ့ပြီး အရေးကြီးသည့်အကူး အပြောင်းကာလဖြစ်၍ နှစ်နိုင်ငံကြား ရှိရင်းစွဲချစ်ကြည်ရင်းနှီးမှုနှင့် ပူးပေါင်းဆောင်ရွက်မှုများ ပိုမိုမြှင့်တင်ရေး ၊ ဒေသတွင်းနှင့် နိုင်ငံတကာမျက်နှာစာများတွင် ပိုမိုနီးကပ်စွာ ပူးပေါင်းဆောင်ရွက်ရေးတို့ကို ဆွေးနွေးခဲ့ကြသည်။
ထို့ပြင် မြန်မာ-ထိုင်းနှစ်နိုင်ငံ နယ်စပ်ဒေသတည်ငြိမ်ရေး၊ တရားဥပဒေစိုးမိုးရေး၊ တရားမဝင်ကုန်သွယ်မှုနှင့် နယ်စပ်ဖြတ်ကျော်မှုခင်းများတားဆီးနှိမ်နင်းရေးနှင့် သဘာဝပတ်ဝန်းကျင် ထိန်းသိမ်းမှုတို့တွင်ပူးပေါင်းဆောင်ရွက်ရေး၊ နှစ်နိုင်ငံကြားရှိ ပူးပေါင်းဆောင်ရွက်ရေးယန္တရားများဖြစ်သည့် ပူးပေါင်းဆောင်ရွက်ရေးဆိုင်ရာပူးတွဲကော်မရှင်(JC) နှင့် ကုန်သွယ်ရေးပူးတွဲကော်မရှင်(JTC)တို့ပြန်လည်စတင်နိုင်ရေး၊ စွမ်းအင်ကဏ္ဍအပါအဝင် ကဏ္ဍအသီးသီး၌ ရင်းနှီးမြှုပ်နှံမှုတိုးမြှင့်ရေးတို့ကိုလည်း ဆွေးနွေးခဲ့ကြသည်။
ထိုင်းနိုင်ငံ ဒု-ဝန်ကြီးချုပ်နှင့် နိုင်ငံခြားရေးဝန်ကြီး ဦးဆောင်သောကိုယ်စားလှယ်အဖွဲ့သည် ဧပြီ ၂၂ ရက် ညနေပိုင်းက ထိုင်းနိုင်ငံသို့ အထူးလေယာဉ်ဖြင့် ပြန် လည်ထွက်ခွာရာ နိုင်ငံခြားရေးဝန်ကြီးဌာန ဒု-ဝန်ကြီးနှင့် တာဝန်ရှိသူများက နေပြည်တော်လေဆိပ်သို့ပို့ဆောင်ခဲ့ကြသည်။

မန္တလေးငလျင်ကြီးဒ-ဏ်ကြောင့် ပျ-က်စီးမှုများဖြစ်ပေါ်ခဲ့သည့် ဝဏ္ဏသိဒ္ဓိအားကစားကွင်းရှိ အားကစားကွင်း/အားကစားရုံအချို့ ပြန်လည်ပြင်ဆင်ပြီးဖြစ်

မန္တလေးငလျင်ကြီးဒ-ဏ်ကြောင့် ပျ-က်စီးမှုများဖြစ်ပေါ်ခဲ့သည့် ဝဏ္ဏသိဒ္ဓိအားကစားကွင်းရှိ အားကစားကွင်း/အားကစားရုံအချို့ပြန်လည်ပြင်ဆင်ပြီးဖြစ်၍ အားကစားရေးရာဝန်ကြီးဌာန ပြည်ထောင်စုဝန်ကြီးဦးရဲမြင့်ထွန်းမှ ဧပြီ ၂၁ ရက်က ကြည့်ရှုစစ်ဆေးခဲ့သည်။
ဝဏ္ဏသိဒ္ဓိအားကစားကွင်း VIP မှန်ဧည့်ခန်းမမျက်နှာကျက်နှင့် အခန်းပတ်လည်မျက်နှာစာမှန်များတပ်ဆင်ပြီးစီးမှု၊ Synthetic ပြေးလမ်းခင်းကျင်းပြီးစီးမှု၊ ဘောလုံးကွင်းမြက်ခင်းပြင်နှင့် ရေဖြန်းစနစ်တပ်ဆင်ထားရှိမှုတို့အားကြည့်ရှုစစ်ဆေးခဲ့သည်။
ထို့ပြင် ဝဏ္ဏသိဒ္ဓိအားကစားရုံ (A)၊ (နှင့် (C)၊ ဝဏ္ဏသိဒ္ဓိရေကူးကန်အတွင်းရှိ ပြိုင်ပွဲကန်၊ ဒိုင်ဗင်ကန်၊ လေ့ကျင့်ရေးရေကူးကန်၊ ဖူဆယ်အားကစားရုံ၊ လက်ဝှေ့အားကစားရုံ၊ ဘိလိယက်နှင့်စနူကာအားကစားရုံ၊ မြားပစ်အားကစားကွင်း၊ ဘိုးလင်းအားကစားခန်းမတို့အား ပြန်လည်ပြုပြင်နေမှုများနှင့် ပြင်ဆင်ဆောင်ရွက်ပြီးစီးမှုတို့ကိုလည်း ကြည့်ရှုစစ်ဆေးခဲ့သည်။
ထိုသို့ ကြည့်ရှုစစ်ဆေးပြီးနောက် အားကစားကွင်း/အားကစားရုံများသည် နိုင်ငံ၏ အားကစားအဆင့်အတန်းကိုဖော်ပြနေသည့်ပြယုဂ်တစ်ခုဖြစ်၍ ရေရှည်တည်တံ့ပြီး ပြည်သူများကိုယ်လက်လှုပ်ရှားလေ့ကျင့်ခန်းများ လာရောက်လေ့ကျင့်ကစားနိုင်စေရန်နှင့် မျိုးဆက်သစ် အားကစားသမားများ ပိုမိုမွေးထုတ်ပေးနိုင်စေရေးတို့အတွက် စနစ်တကျစီမံဆောင်ရွက်ရန် ပြည်ထောင်စုဝန်ကြီးက မှာကြားခဲ့သည်။

ဥ​ရောပတွင် မြန်မာ့​ရေထွက်ကုန်ပြသ

စပိန်နိုင်ငံ၊ ဘာစီလိုနာမြို့တွင် ကျင်းပပြုလုပ်​နေသည့် Seafood Expo Global ပြပွဲတွင် မြန်မာနိုင်ငံမှ မေယု ​ရေထွက်ကုန် လုပ်ငန်းကလည်း ပါဝင်ပြသ​နေသည်။
၁၉၉၀ ခုနှစ်မှစတင်ခဲ့​သော ​မေယုရေထွက်ပစ္စည်း ထုတ်လုပ်၊တင်ပို့သည့်ကုမ္မဏီသည် စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနမှ ချီးမြှင့်သော အကောင်းဆုံး ပို့ကုန်တင်ပို့မှု (ပြည်ပကုန်သွယ်မှု) ပထမဆု (၇ နှစ်ဆက်တိုက်) ရရှိထားသည်။
မြန်မာနိုင်ငံ၏ အကြီးမားဆုံးသော အအေးခန်းသိုလှောင်ရုံများထဲမှ တစ်ခုဖြစ်သည့် တန်ချိန် ၄,၀၀၀ ဆံ့ အအေးခန်းစနစ်ဖြင့် နိုင်ငံတကာဈေးကွက်များအတွက် အရည်အသွေးကို စနစ်တကျ ထိန်းသိမ်းပြီး တင်ပို့လျက်ရှိ​နေသည့်ကုမ္မဏီလည်းဖြစ်သည်။
၄င်းတို့၏ လုပ်ငန်းစဉ်များသည် ဥရောပစံချိန်စံညွှန်း (EU Standards) နှင့် HACCP လက်မှတ်များ ရရှိထားသည်။
ပြပွဲသည်ဧပြီလ ၂၁ ရက်မှ ၂၃ ရက်အထိစပိန်နိုင်ငံ၊ ဘာစီလိုနာမြို့၊ Fira Barcelona Gran Via တွင်ကျင်းပ​နေခြင်းဖြစ်ပြီး မြန်မာ့​ရေထွက်ကုန်များကို ကြည့်ရှု့​လေ့လာနိုင်မည်ဖြစ်သည်။

ရန်ကုန်တိုင်းအား လျှပ်စစ်ဓာတ်အား ၁၈ နာရီမှ နာရီ ၂၀ အထိတိုးမြှင့်ဖြန့်ဖြူးပေးမည်

လျှပ်စစ်စွမ်းအားဝန်ကြီးဌာနမှ ယနေ့ ဧပြီ ၂၂ ရက်နေ့လည် ၃ နာရီမှစတင်၍ ရန်ကုန်တိုင်းအပါအဝင် တိုင်းနှင့် ပြည်နယ်အသီးသီး၌ လျှပ်စစ်ဓာတ်အားများကို အချိန်တိုးမြှင့်ဖြန့်ဖြူးပေးခဲ့ကြောင်း သိရသည်။
ရန်ကုန်တိုင်းအတွင်း ၁၆ နာရီမှ ၁၈ နာရီဓာတ်အားဖြန့် ဖြူးနေရာမှ ၁၈ နာရီမှ နာရီ ၂၀ အထိ၊ မန္တလေးတိုင်းအတွင်း ၁၄ နာရီမှ ၁၆ နာရီအစား ၁၆ နာရီမှ ၁၈ နာရီအထိ၊ အခြား တိုင်းနှင့် ပြည်နယ်များ၌ ၁၂ နာရီခန့် ဓာတ်အားဖြန့်ဖြူးနေရာမှ အနည်းဆုံး ၁၄ နာရီအထိတိုးမြှင့်ဖြန့်ဖြူးပေးလျက်ရှိကြောင်း သိရသည်။
လျှပ်စစ်စွမ်းအားဝန်ကြီးဌာနမှ လျှပ်စစ်ဓာတ်အား ထုတ်လုပ်မှုစနစ်များကိုတွက်ချက်ပြီးနောက် ရေအားလျှပ်စစ်ဓာတ်အားပေးစက်ရုံ၊ သဘာဝဓာတ်ငွေ့သုံးဓာတ်အားပေးစက်ရုံ၊ ကျောက်မီးသွေးသုံးဓာတ်အားပေးစက်ရုံ၊ နေရောင်ခြည်စွမ်းအင်သုံးဓာတ်အားပေးစက်ရုံတို့မှ လက်ရှိဓာတ်အားထုတ်လုပ်နေမှုအပြင် ပိုမိုရရှိလာသောသဘာဝဓာတ်ငွေ့ဖြင့် ထိရောက်မှုရှိသော ဓာတ်အားထုတ်လုပ်ဖြန့်ဖြူးပေးနိုင်မည့် အစီအမံများကိုချမှတ်ဆောင်ရွက်ခဲ့ကြောင်း သိရသည်။

ပြည်သူနှင့်တပ်မတော်သည် ခွဲခြားမရ၍ ချစ်ချစ်ခင်ခင်နှင့် စည်းစည်းလုံးလုံးရှိနေစေရန်လုပ်ဆောင်ရမည်

ပြည်သူနှင့်တပ်မတော်သည် ခွဲခြားမရ၍ ချစ်ချစ်ခင်ခင်နှင့် စည်းစည်းလုံးလုံးရှိနေစေရန်လုပ်ဆောင်ရမည်ဟု တပ်မတော်ကာကွယ်ရေးဦးစီးချုပ် ဗိုလ်ချုပ်ကြီးရဲဝင်းဦးက ယနေ့ ဧပြီ ၂၂ ရက်နံနက်ပိုင်းတွင် မကွေးတပ်နယ်ရှိအရာရှိ၊ စစ်သည်၊ မိသားစုများအားတွေ့ဆုံ၍ အမှာစကားပြောကြားရာ၌ ထည့်သွင်းပြောကြားခဲ့ခြင်းဖြစ်သည်။
ပြည်သူနှင့်တပ်မတော်ဆိုသည်မှာ ခွဲခြား၍မရဘဲ ပြည်သူနှင့်တပ်မတော် ချစ်ချစ်ခင်ခင်နှင့် စည်းစည်းလုံးလုံးရှိနေစေရန်လုပ်ဆောင်ရမည်ဖြစ်ပြီး မြန်မာနိုင်ငံ၌ တပ်မတော်သည် နိုင်ငံတော်ကာကွယ်ရေးအတွက်(၂၄)နာရီတာဝန်ရှိပြီး ပြည်သူ့အကျိုးစီးပွားကို ဖော်ဆောင်ပေးရမည်ဟု ပြောသည်။
" တပ်မတော်ဟာ ပြည်သူကပေါက်ဖွားလာတာဖြစ်တဲ့အတွက် ပြည်သူ့အကျိုးကို ဖော်ဆောင်ပေးဖို့တာဝန်ရှိတာကို မိမိတို့အမြဲတမ်းခံယူထားရမယ့် နဂိုကတည်းကရှိပြီးသားဖြစ်ရမယ့်စိတ်ဓာတ်ဖြစ်ပါတယ်"ဟု ဗိုလ်ချုပ်ကြီးရဲဝင်းဦးက ပြောသည်။
ထို့နောက် ဗိုလ်ချုပ်ကြီးရဲဝင်းဦးက တပ်နယ်မှ အရာရှိ၊ စစ်သည်၊ မိသားစုများအတွက် စားသောက်ဖွယ်ရာပစ္စည်းများ၊ ၎င်း၏ဇနီးက တပ်နယ်ရှိ မိခင်နှင့်ကလေးစောင်ရှောက်ရေးအသင်းအတွက် ချီးမြှင့်ငွေများကိုပေးအပ်ခဲ့ကြပြီးနောက် နယ်မြေခံတပ်ရင်းအတွင်း လက်ရှိအခြေခံပညာမူလတန်းကျောင်းအား အခြေခံပညာအ လယ်တန်းကျောင်းအဆင့်တိုးချဲ့ဆောက်လုပ်မည့်နေရာ၊ နယ်မြေခံလေတပ်စခန်းဌာနချုပ်အတွင်း မီတာ (၄၀၀)ရာဘာပြေးလမ်းပါ ဘောလုံးကွင်းနှင့် (၁,၅၅၆) ဦးဆံ့ပွဲကြည့်ဆောင် ဆောက်လုပ်နေမှုတို့ကိုကြည့်ရှုစစ်ဆေးခဲ့သည်။
ထို့ပြင် ဗိုလ်ချုပ်ကြီးရဲဝင်းဦးနှင့် ဇနီးတို့က နယ်မြေခံ တပ်မတော်ဆေးရုံတွင်ဆေးကုသမှုခံယူလျက်ရှိသည့် အရာရှိ၊ စစ်သည်များ၊ ရဲတပ်ဖွဲ့ဝင်များ၊ ပြည်သူ့စစ်(ဌာနေ)တပ်ဖွဲ့ဝင်များကြည့်ရှု၍ အားပေးစကားပြောကြားပြီး စားသောက်ဖွယ်ရာများနှင့် ဂုဏ်ပြုချီးမြှင့်ငွေများ၊ ဆေးရုံအတွက် အလှူငွေများကိုထောက်ပံ့ပေးအပ်လှူဒါန်းခဲ့သည်။

ဧပြီ ၂၄ ရက်မှစ၍ ရန်ကုန်-မာန်အောင် -ကျောက်ဖြူအပါဝင် လမ်းပန်းဆက်သွယ်မှုခက်ခဲသည့်မြို့များသို့ လေယာဉ်ခရီးစဉ်များတိုးချဲ့ပျံသန်းပြေးဆွဲမည်

ရန်ကုန်မြို့မှ ရခိုင်ပြည်နယ်၊ မာန်အောင်မြို့၊ကျောက်ဖြူမြို့ သို့ လေကြောင်း ခရီးစဉ် ပြေးဆွဲပေးမည် ဖြစ်ကာ ထားဝယ်မြို့၊ ဘုတ်ပြင်းမြို့နှင့် ကော့သောင်းမြို့များသို့လည်း လေကြောင်း ပြေးဆွဲပေးမည် ဖြစ်ကြောင်း သိရသည်။
နိုင်ငံတော် သမ္မတ၏ လမ်းညွှန်ချက်အရ ပို့ဆောင်ရေးဝန်ကြီးဌာန၊ မြန်မာအမျိုးသားလေကြောင်းအနေဖြင့် လမ်းပန်းဆက်သွယ်ရေး ခက်ခဲသည့် မြို့များမှ ပြည်သူများ ခရီးသွားလာမှု လွယ်ကူစေရန် ဆောင်ရွက်ခြင်းလည်း ဖြစ်သည်။
ထိုသို့ပြေးဆွဲပေးရာတွင် ရခိုင်ပြည်နယ်ရှိိ ယင်းမြို့များကို ရက်သတ္တပတ်လျှင် သုံးရက် ပြေးဆွဲပေးမည် ဖြစ်သည်။
“ဧပြီ ၂၄ ရက်နေ့ က စပြေးဆွဲပေးမယ်၊ လက်မှတ်ဈေးနှုန်းကတော့ တစ်စောင်ကို ၆၃၀,၀၀၀ ကျပ် ကျသင့်ပါမယ်” ဟု ရခိုင်ပြည်နယ်၊ မာန်အောင်မြို့ကိုလေကြောင်း လက်မှတ်ရောင်းချသည့်ကိုယ်စားလှယ်တစ်ဦးက ပြောသည်။
ထို့အတူ လေယာဉ်လက်မှတ်အရောင်းဌာနများက သာ တိုက်ရိုက်ဝယ်ယူကြရန်လည်း သူက တိုက်တွန်းထားသည်။
လေယာဉ်ဆင်းသက်နိုင်ရန် မာန်အောင်လေယာဉ်ကွင်း စစ်ဆေးရေးအဖွဲ့သည်လည်း စစ်ဆေးမှုပြီးမြောက်ခဲ့သည့်အတွက် ပို့ဆောင်ရေးဝန်ကြီးဌာနနှင့် မြန်မာ့အမျိုးသားလေကြောင်းကတာဝန်ရှိသူများ ကလေကြောင်းပျံသန်းပြေးဆွဲမှုကိုစီစဉ်ထားခြင်းလည်း ဖြစ်သည်။
ထို့အတူ တနင်္ဿာရီတိုင်း မြိတ်လေဆိပ်ကို အခြေပြုကာ ပြေးဆွဲပေးမည့် လေကြောင်းခရီးစဉ်သည်လည်း ရက်သတ္တပတ်လျှင် ၆ ရက်ဖြင့် ပြေးဆွဲပေးမည် ဖြစ်ကြောင်း သိရသည်။

ပြည်သူ့အသံကို အလေးထားပြီး ကျေးလက်စီးပွား မြှင့်တင်ရန် ပဲခူးတိုင်းဝန်ကြီးချုပ် လမ်းညွှန်
​
​ပဲခူးတိုင်းဒေသကြီးအတွင်းရှိ ပြည်သူလူ ထု၏ အသံကို အလေးထားဖြည့်ဆည်းပေးရန်နှင့် ကျေးလက်စီးပွားရေး ဖွံ့ဖြိုးတိုးတက်စေရန်အတွက် နိုင်ငံတော်သမ္မတ၏ လမ်းညွှန်ချက်များကို အလေး ထား အကောင်အထည်ဖော်ရန် ပဲခူးတိုင်းဒေသကြီး ဝန်ကြီးချုပ် ဦးမျိုးဆွေဝင်းက တိုက်တွန်းပြောကြားသည်။
ယမန်နေ့ ​ဧပြီလ (၂၁) ရက်က ပဲခူးတိုင်းဒေသကြီးအစိုးရအဖွဲ့ရုံး၊ တော်ဝင်ဟံသာ အစည်းအဝေးခန်းမ၌ ကျင်းပသည့် တိုင်းဒေသကြီးအဆင့် လုပ်ငန်းညှိနှိုင်းအစည်းအဝေးတွင် ဝန်ကြီးချုပ်က ထိုသို့ ထည့်သွင်းပြောကြားခဲ့ခြင်း ဖြစ်သည်။
​တိုင်းဒေသကြီးအတွင်း လူဦးရေ၏ ၇၅ ရာခိုင်နှုန်းသည် ကျေးလက်တွင် နေထိုင်သူများဖြစ်၍ စိုက်ပျိုးရေးနှင့် မွေးမြူရေးကိုအဓိကပံ့ပိုးပေးရမည်ဖြစ်ကြောင်း ဝန်ကြီးချုပ်က ဆိုသည်။
ထို့အပြင် သီးနှံများဈေးကွက်ရရှိရေး ချိတ်ဆက်ဆောင်ရွက်ရန်နှင့် ပန်းတိုင်အထွက်နှုန်းရရှိအောင် နည်းလမ်းစုံဖြင့် ကူညီရန်၊ ​ဆီထွက်သီးနှံတိုးချဲ့စိုက်ပျိုးပြီး သဘာဝမြေဩဇာကို ဈေးကွက်အ တွင်း ကျယ်ကျယ်ပြန့်ပြန့် သုံးစွဲနိုင်ရေး ဆောင်ရွက်ရန်၊ အထွက်နှုန်းနည်းသည့် သဲဆန်ကုန်းကြောမြေများတွင် စပါးမျိုးပြောင်းလဲခြင်းနှင့် မြေယာပြုပြင်ခြင်းများ ပြုလုပ်ရန်၊​ ဝါးစိုက်ခင်းများ တည် ထောင်ခြင်းနှင့် ဝါးအခြေခံစက်မှုလုပ်ငန်းများကိုအားပေးရန် လမ်းညွှန်မှာကြားသည်။
အလားတူ လျှပ်စစ်မီးလိုအပ်ချက်အ တွက် Solar System နှင့် စပါးခွံ့သုံး လျှပ် စစ်ထုတ်လုပ်ရေး (Gasifier) လုပ်ငန်းများကို အခွင့်အလမ်းကောင်းများ ဖန်တီးပေးသွားမည်ဖြစ်ပြီး၊ ​​တိရစ္ဆာန်ကောင်ရေ တိုးချဲ့မွေးမြူရန်၊ မွေးမြူရေးသမားအသစ်များ ဖော်ထုတ်ရန်နှင့် တိရစ္ဆာန်အစာကို ဒေသထွက်ကုန်ကြမ်းများဖြင့် ကိုယ် တိုင်ထုတ်လုပ်နိုင်ရေး စီစဉ်ပေးသွားမည်ဖြစ်ကြောင်း သိရသည်။
ထို့အပြင် MSME ကဏ္ဍနှင့် လယ်သုံးစက်ကိရိယာထုတ်လုပ်မှုကိုလည်း အား ပပေးကူညီသွားရန်မှာကြားခဲ့ကာ ​လက်ရှိတွင် ပူပြင်းသည့် ရာသီဥတုကြောင့် ဖြစ်ပေါ်လာနိုင်သည့် လေပြင်းတိုက်ခတ်ခြင်းနှင့် မီးဘေးအန္တရာယ်များကို ပြည်သူများ အထူးဂရုပြု နေထိုင်ကြရန် ဝန်ကြီးချုပ်က အထူးသတိပေးလမ်းညွှန်ခဲ့သည်။
​အဆိုပါ အစည်းအဝေးသို့ တိုင်းဒေသကြီးအဆင့် ဌာနဆိုင်ရာများ၊ ခရိုင်/မြို့ နယ် အုပ်ချုပ်ရေးမှူးများ တက်ရောက်ခဲ့ကြပြီး ၂၀၂၅-၂၀၂၆ ဘဏ္ဍာနှစ် လုပ်ငန်းဆောင်ရွက်ပြီးစီးမှုနှင့် ရှေ့ဆက်လုပ် ဆောင်မည့်စီမံချက်များကိုရှင်းလင်းတင် ပြခဲ့ကြကြောင်း သိရသည်။

နိုင်ငံတော်သမ္မတရုံးဝန်ကြီးဌာန ပြည်ထောင်စုဝန်ကြီးဦးတင်အောင်စန်းအား အမျိုးသားလုံခြုံရေးဆိုင်ရာ အကြံပေးပုဂ္ဂိုလ်အဖြစ်ခန့်အပ်တာဝန်ပေး

နိုင်ငံတော်သမ္မတရုံးဝန်ကြီးဌာန ပြည်ထောင်စုဝန်ကြီးဦးတင်အောင်စန်းအား အမျိုးသားလုံခြုံရေးဆိုင်ရာ အကြံပေးပုဂ္ဂိုလ်အဖြစ်ခန့်အပ်တာဝန်ပေးခဲ့ကြောင်း သိရသည်။
နိုင်ငံတော်သမ္မတနှင့် နိုင်ငံတော်သမ္မတရုံးတို့အား အ မျိုးသားလုံခြုံရေးဆိုင်ရာများကို ဘက်ပေါင်းစုံမှလေ့လာသုံးသပ်အကြံပြုနိုင်ရန်အတွက်ခန်အပ်တာဝန်ပေးခဲ့ခြင်းဖြစ်ကြောင်း သိရသည်။
ထိုသို့ ခန့်အပ်တာဝန်ပေးခြင်းကို နိုင်ငံတော်သမ္မတရုံးမှ အမိန့်အမှတ် ၄၇ / ၂ဝ၂၆ ဖြင့် ယနေ့ ဧပြီ ၂၂ ရက်ကထုတ်ပြန်ခဲ့ခြင်းဖြစ်ကြောင်း သိရသည်။

နိုင်ငံတော်သမ္မတ ဦးမင်းအောင်လှိုင်နှင့် ထိုင်းနိုင်ငံ၊ ဒု -ဝန်ကြီးချုပ်နှင့် နိုင်ငံခြားရေးဝန်ကြီးတို့တွေ့ဆုံ

မြန်မာနိုင်ငံ၏ ငြိမ်းချမ်းရေးလုပ်ငန်းစဉ်များတွင် ထိုင်းနိုင်ငံမှ ပါဝင်ကူညီဆောင်ရွက်ပေးသွားမည်ကိုဆွေးနွေး
နိုင်ငံတော်သမ္မတ ဦးမင်းအောင်လှိုင်
နှင့် ထိုင်းနိုင်ငံ၊ ဒု -ဝန်ကြီးချုပ်နှင့် နိုင်ငံခြားရေးဝန်ကြီး H.E. Mr. Sihasak Phuangketkaew တို့ ယနေ့ ဧပြီ ၂၂ ရက်နံ နက်ပိုင်းတွင် နိုင်ငံတော်သမ္မတ၏ ဧည့်ဆောင်တော်၌ တွေ့ဆုံခဲ့ကြသည်။
တွေ့ဆုံစဥ် မြန်မာ-ထိုင်းနှစ်နိုင်ငံသည် အိမ်နီးချင်းကောင်းနိုင်ငံများဖြစ်သည်နှင့်အညီ သံတမန်ဆက်ဆံမှုများရှည်ကြာကောင်းမွန်လျက်ရှိမှုနှင့် ချစ်ကြည်ရင်းနှီးမှုနှင့် ပူးပေါင်းဆောင်ရွက်မှုများ ပိုမိုတိုးမြှင့်ဆောင်ရွက်ရေးတို့ကို ဆွေးနွေးခဲ့ကြသည်။
နယ်စပ်ဒေသတည်ငြိမ်အေးချမ်းရေး၊ မူးယစ်ဆေးဝါးတားဆီးနှိမ်နင်းရေးနှင့် အွန်လိုင်းလိမ်လည်လောင်းကစားမှုများပပျောက်ရေး၊ နယ်စပ်ဖြတ်ကျော်မီးခိုးမြူငွေ့များလျှော့ချနိုင်ရေးတို့အတွက် ပူးပေါင်းဆောင်ရွက်ရန်၊ နယ်စပ်ဒေသကုန်သွယ်မှုများမြှင့်တင်နိုင်ရေးအတွက် ကုန်သွယ်မှုလမ်းကြောင်းများပြန်လည်ဖွင့်လှစ်ဆောင်ရွက်လျက်ရှိမှုတို့ကိုလည်း ဆွေးနွေးခဲ့ကြသည်။
မြန်မာနိုင်ငံတွင် ရွေးကောက်ပွဲကိုအောင်မြင်စွာကျင်းပပြီးနောက် ပြည်သူများကရွေးချယ်သည့် အစိုးရအဖွဲ့မှ နိုင်ငံတော်အား ဒီမိုကရေစီလမ်းကြောင်းပေါ်၌ ခိုင်ခိုင်မာမာဆက်လက်လျှောက်လှမ်းလျက်ရှိမှု၊ နိုင်ငံတော်အစိုးရအနေဖြင့် ပြည်တွင်း ငြိမ်းချမ်းရေးရရှိရန် ငြိမ်း ချမ်းရေးဆွေးနွေးပွဲများပြုလုပ်နိုင်ရေးအတွက်ဖိတ်ခေါ်ထားရှိမှု၊ မြန်မာနိုင်ငံ၏ ငြိမ်းချမ်းရေးလုပ်ငန်းစဉ်များတွင် ထိုင်းနိုင်ငံမှပါဝင်ကူညီဆောင်ရွက်ပေးသွားမည်တို့ကိုလည်း ဆွေးနွေးခဲ့ကြသည်။
မြန်မာနိုင်ငံအနေဖြင့် အာဆီယံဘုံသဘောတူညီချက် (၅)ရပ်ပါ အချက်များတွင်ပါဝင်သည့် လူသားချင်းစာ နာထောက်ထားမှုဆိုင်ရာများ၊ ပြည်တွင်းငြိမ်းချမ်းရေး ကြိုးပမ်းဆောင်ရွက်မှုများနှင့် အခြားအချက်များကို အကောင်းဆုံးပူးပေါင်းဆောင်ရွက်လျက်ရှိမှု၊ နှစ်နိုင်ငံကြား စိုက်ပျိုးရေး၊ မွေးမြူရေး၊ ရင်နှီးမြှုပ်နှံမှု၊ လျှပ် စစ်နှင့်စွမ်းအင်ကဏ္ဍနှင့် ကုန်ထုတ်လုပ်မှုလုပ်ငန်းများနှင့် ဘက်ပေါင်းစုံပူးပေါင်းဆောင်ရွက်မှုများဆက်လက်တိုးမြှင့်ဆောင်ရွက်သွားမည်တို့ကိုလည်း ဆွေး နွေးခဲ့ကြသည်။