ကိုကိုးကျွန်းမှ ဝင်ပြိုင်သည့် ဝန်ကြီးချုပ် ဦးညိုစော အနိုင်ရ

ယမန်နေ့က ကျင်းပပြီးစီးခဲ့သည့် ရွေးကောက်ပွဲ အပိုင်း ၂ ၌ ရန်ကုန်တိုင်း၊ ကိုကိုးကျွန်း မဲဆန္ဒနယ်မှ ရွေးကောက်ပွဲ ဝင်ပြိုင်သည့် ဝန်ကြီးချုပ် ဦးညိုစော အနိုင်ရသည်ဟု ရွေးကောက်ပွဲကော်မရှင်နှင့် နီးစပ်သူများထံမှ သိရသည်။
ပြည်သူ့လွှတ်တော်အမတ်နေရာအတွက် ဦးညိုစော ဝင်ရောက်ယှဉ်ပြိုင်ခဲ့ခြင်းဖြစ်ကာ သူနှင့်အတူ တိုင်းဒေသကြီး ကိုယ်စားလှယ်လောင်း ဦးအောင်နိုင်သူ (ရဲမှူးချုပ်ဟောင်း) လည်း အနိုင်ရရှိခဲ့သည်ဟု သိရသည်။
၂၀၂၅ခုနှစ် ပါတီစုံဒီမိုကရေစီအထွေထွေရွေးကောက်ပွဲအပိုင်း (၁) ကို ဒီဇင်ဘာ ၂၈ ရက်က မြို့နယ် ၁၀၂ မြို့နယ်တွင်ကျင်းပခဲ့ပြီးဖြစ်ကာ အပိုင်း (၂) ကို ယမန်နေ့ ဇန်နဝါရီ ၁၁ ရက်က မြို့နယ် ၁၀၀တွင် ကျင်းပခဲ့ပြီး ဖြစ်သည်။
ဆက်လက်၍ အပိုင်း (၃) ကိုလည်း ဇန်နဝါရီ ၂၅ ရက်၌ မြို့နယ် ၆၃ မြို့နယ်တွင် ဆက်လက်ကျင်းပမည် ဖြစ်ကြောင်း ပြည်ထောင်စုရွေးကောက်ပွဲကော်မရှင်က ကြေညာထားသည်။

တပ်မတော် ဘောလုံးအကယ်ဒမီ ချန်ပီယံဆု ဆွတ်ခူး

လူငယ်မျိုးဆက်သစ်များအတွက် မြန်မာဘောလုံး အကယ်ဒမီများ ပြိုင်ပွဲတွင် တပ်မတော်ဘောလုံးအကယ်ဒမီ ချန်ပီယံဆု ဆွတ်ခူးရရှိခဲ့သည်။
ဗိုလ်လုပွဲအဖြစ် မြန်မာဘောလုံးအကယ်ဒမီ (မန္တလေး) ယူ - ၁၅ နှင့် တပ်မတော်အကယ်ဒမီအသင်းတို့ ယမန်နေ့ညနေပိုင်းက ယှဉ်ပြိုင်ကစားရာ တပ်မတော် အကယ်ဒမီအသင်းက (၃) ဂိုး (၁) ဂိုးဖြင့် အနိုင်ရပြီး ချန်ပီယံဆုဖလား ဆွတ်ခူးရရှိခဲ့ခြင်းဖြစ်သည်။
ထို့ကြောင့် မြန်မာဘောလုံးအကယ်ဒမီ (မန္တလေး) ယူ-၁၅ အသင်းက ဒုတိယရရှိခဲ့သည်။
အလားတူ တတိယနေရာလုပွဲအတွက် အမျိုးသားဘောလုံးအကယ်ဒမီ (ရန်ကုန်) ယူ-၁၅ အသင်းနှင့် ISPE (Mawla myine) အသင်းတို့ ယှဉ်ပြိုင်ကစားကြရာ အမျိုးသား ဘောလုံးအကယ်ဒမီ (ရန်ကုန်) ယူ-၁၅ အသင်းက (၅) ဂိုး (၃) ဂိုးဖြင့် အနိုင်ရခဲ့သည်။
Myanmar Football Academies Tour- nament 2025 -26 ပြိုင်ပွဲကို ဇန်နဝါရီ (၃) ရက်မှ (၁၁) ရက်အထိ ကျင်းပခဲ့ခြင်းဖြစ်ပြီး၊ အဆိုပါ ပြိုင်ပွဲသည် လူငယ်မျိုးဆက်သစ်များ ပေါ်ထွက်လာရေးအတွက် ရည်ရွယ်ကျင်းပပြုလုပ်ခြင်းဖြစ်သည်ဟု အဖွဲ့ချုပ်က ထုတ်ပြန်ထားသည်။

ကြည့်မြင်တိုင်တွင် တစ်သီးပုဂ္ဂလ ဝင်ပြိုင်သည့် ဇောတိက ဦးခင်လှိုင် အနိုင်ရ

ရွေးကောက်ပွဲ အပိုင်း (၂) တွင် ကြည့်မြင်တိုင်မြို့နယ်၏ ပြည်သူ့လွှတ်တော် မဲဆန္ဒနယ်မှ ဝင်ပြိုင်သည့် ဇောတိကဦးခင်လှိုင် အနိုင်ရရှိခဲ့သည်ဟု သိရသည်။
ဇောတိက ဦးခင်လှိုင်သည် ပြိုင်ဘက် ကိုယ်စားလှယ်လောင်းများကို မဲတစ်သောင်းနီးပါး အသာဖြင့် အနိုင်ရရှိခြင်း ဖြစ်သည်ဟုလည်း သူနှင့် နီးစပ်သူများကဆိုသည်။
၂၀၂၅ ခုနှစ် ပါတီစုံဒီမိုကရေစီအထွေထွေရွေးကောက်ပွဲအပိုင်း (၁) ကို ဒီဇင်ဘာ ၂၈ ရက်က မြို့နယ် ၁၀၂ မြို့နယ်မှာကျင်းပခဲ့ပြီး ဖြစ်ကာ အပိုင်း (၂) ကို ယမန်နေ့ ဇန်နဝါရီ ၁၁ ရက်၌ မြို့နယ် ၁၀၀ တွင် ကျင်းပခဲ့ပြီး ဖြစ်သည်။
ဆက်လက်၍ အပိုင်း (၃) ကိုလည်း ဇန်နဝါရီ ၂၅ ရက်၌ မြို့နယ် ၆၃ မြို့နယ်တွင် ဆက်လက်ကျင်းပမည်ဖြစ်ကြောင်း ပြည်ထောင်စုရွေးကောက်ပွဲကော်မရှင်က ကြေညာထားသည်။

နိုင်ငံတော်၏ အချုပ်အခြာအာဏာနှင့် ဂုဏ်သိက္ခာကိုကာကွယ်ရန် အမှန်တရားဘက်မှရပ်တည်ဆောင်ရွက်နေသည့် ကိုယ်စားလှယ်အဖွဲ့၏ ကြိုးပမ်းမှုများကိုအပြည့်အဝထောက်ခံအားပေး

အပြည်ပြည်ဆိုင်ရာတရားရုံး(ICJ)တွင် နိုင်ငံတော်၏ အချုပ်အခြာအာဏာနှင့် ဂုဏ်သိက္ခာကိုကာကွယ်ရန် အမှန်တရားဘက်မှရပ်တည်ဆောင်ရွက်နေသည့် ကိုယ် စားလှယ်အဖွဲ့၏ ကြိုးပမ်းမှုများကိုအပြည့်အဝထောက် ခံအားပေးသည်ဟု မြန်မာ့ပုံရိပ်ဖော်ညွှန်းရေးအဖွဲ့မှ ယ နေ့ ဇန်နဝါရီ ၁၂ ရက်က ထုတ်ပြန်အသိပေးခဲ့သည်။
မြန်မာနိုင်ငံသည် အိမ်နီးချင်းနိုင်ငံများနှင့် ချစ်ကြည်ရင်းနှီးစွာ အတူတကွယှဉ်တွဲနေထိုင်သည့် ခိုင်မာသော အစဉ်အလာကောင်းများကို အစဉ်တစိုက်ထိန်းသိမ်းခဲ့သည့်နိုင်ငံဖြစ်ကာ လက်ရှိတွင် ICJ ၌ ရင်ဆိုင်နေရသောအမှုကိစ္စသည် မြန်မာနိုင်ငံကိုကိုယ်စားပြုသည့်အပြင် မြန်မာပြည်သူအားလုံး၏ အကျိုးစီးပွားနှင့် တိုက်ရိုက်သက်ဆိုင်သည့် ကိစ္စရပ်တစ်ခုဖြစ်သည်ဟု ထုတ်ပြန်ချက်၌ရေးသားဖော်ပြခဲ့သည်။
ထို့ကြောင့် ဂမ်ဘီယာနိုင်ငံမှ စွဲဆိုထားသောအမှုတွင် နိုင်ငံတော်သမ္မတရုံးဝန်ကြီးဌာန(၂) ပြည်ထောင်စုဝန် ကြီးဦးကိုကိုလှိုင်နှင့် ဥပဒေရေးရာဝန်ကြီးဌာန ပြည် ထောင်စုဝန်ကြီးနှင့် ပြည်ထောင်စုရှေ့နေချုပ် ဒေါက် တာသီတာဦးတို့ဦးဆောင်သည့် မြန်မာကိုယ်စားလှယ်အဖွဲ့သည် တရားမျှတမှုနှင့် အမှန်တရားကိုလက်ကိုင် ထား၍ မြန်မာနိုင်ငံအတွက် အစွမ်းကုန်လျှောက်လဲ ချက်ပေးသွားမည်ဖြစ်၍ ကိုယ်စားလှယ်အဖွဲ့၏ တင်ပြချက်များသည် ငြိမ်းချမ်းရေး၊ တည်ငြိမ်ရေးနှင့် အမှန် တရားကို မြတ်နိုးတန်ဖိုးထားသည့် မြန်မာပြည်သူပြည် သားများ၏ ဆန္ဒသဘောထားများနှင့် တစ်ထပ်တည်း ကျလျက်ရှိသည်ဟု ထုတ်ပြန်ချက်၌ရေးသားထားသည်။
ထိုသို့ လျှောက်လဲချက်များအား ICJ ၏ တရားသူကြီးများအနေဖြင့် မွန်မြတ်လှသော တရားစီရင်ရေးဆိုင်ရာ ကျင့်ဝတ်သိက္ခာကိုထိန်းသိမ်းကာ မည်သည့်အစွဲအ လမ်းမျှမပါဘဲ အခြေအနေမှန်နှင့် အဖြစ်မှန်များကို ဘက်လိုက်မှုကင်းစွာဖြင့် ဝေဖန်ဆန်းစစ်သုံးသပ်နိုင်လိမ့်မည်ကို မျှော်လင့်ယုံကြည်သည်ဟုလည်း ထုတ်ပြန်ချက်၌ရေးသားထားသည်။
ထို့ပြင် နိုင်ငံတကာဥပဒေနှင့် မြေပြင်တွင် အမှန်တ ကယ်ဖြစ်ပျက်နေသည့် အခြေအနေများအပေါ်အပြန် အလှန်လေးစားလိုက်နာမှုရှိသော အဖြေတစ်ခုထွက်ပေါ်လာရေးအတွက် အဖြစ်မှန်များကိုမျှတစွာသုံးသပ်ဆုံးဖြတ်ရန်အလွန်အရေးကြီးသည်ဟုလည်း မြန်မာ့ပုံရိပ်ဖော်ညွှန်းရေးအဖွဲ့က ထုတ်ပြန်ခဲ့သည်။
မြန်မာနိုင်ငံသည် ရွေးကောက်ပွဲအပြီးတွင် သမိုင်းစာ မျက်နှာအသစ်ကူးပြောင်းကာ နိုင်ငံတော်သစ်တည် ဆောက်ရေးလုပ်ငန်းစဉ်များကို စတင်ဖော်ဆောင်တော့မည်ဖြစ်၍ အောင်မြင်စွာတည်ဆောက်နိုင်ရန်အတွက် နိုင်ငံတကာအသိုက်အဝန်း၏ အပြုသဘောဆောင်သော အားပေးကူညီမှုများနှင့် ပူးပေါင်းဆောင်ရွက်မှုများသည် အထူးလိုအပ်လျက်ရှိသည်ဟုလည်း ရေး သားဖော်ပြခဲ့သည်။

ICJ တွင် နိုင်ငံနှင့်ပြည်သူအတွက် တစ်ဖွဲ့လုံးမှ ကိုယ်စွမ်းဥာဏ်စွမ်းရှိသမျှ ကြိုးစားကာကွယ်သွားမည်ဟု ပြည်ထောင်စု ဝန်ကြီးဦးကိုကိုလှိုင်ပြော

ရခိုင်ပြည်နယ် (မြောက်ပိုင်း) တွင်ဖြစ်ပွားခဲ့သော ဘင်္ဂါလီလူမျိုးများအရေးနှင့်ပတ်သက်၍ နယ်သာလန်နိုင်ငံ၊ သည်ဟိတ်မြို့ရှိ အပြည်ပြည်ဆိုင်ရာတရားရုံး (ICJ) ၌ တန်ပြန်လျှောက်လဲချက်များပေးရန်ရောက်ရှိနေသည့် နိုင်ငံတော်သမ္မတရုံးဝန်ကြီးဌာန (၂) ပြည်ထောင်စုဝန်ကြီးဦးကိုကိုလှိုင်မှ ယနေ့ ဇန်နဝါရီ ၁၂ ရက်က အထက်ပါအတိုင်းပြောကြားခဲ့ခြင်းဖြစ်သည်။
မြန်မာနိုင်ငံကိုယ်စားပြုသည့် ICJ တရားရင်ဆိုင်ရေးအဖွဲ့နှင့်ပတ်သက်၍ ကောလဟာလသတင်းများထွက်ပေါ်လျက်ရှိသည့်အပြင် သတင်းမှားများ၊ လုပ်ကြံသတင်းများထုတ်လွှင့်လျက်ရှိသော်လည်း မိမိတို့အဖွဲ့သည် တာဝန်များကိုကျေပွန်စွာထမ်းဆောင်လျက်ရှိပြီး ယခုဖြစ်စဥ်သည် ၂၀၁၆-၂၀၁၇ ခုနှစ်က ရခိုင်ပြည်နယ်မြောက်ပိုင်းအရေးကိစ္စနှင့်ပတ်သက်ကာ လူမျိုးတုန်းစေမှုကျူးလွန်သည်ဟုဆိုကာ အာဖရိကတိုက်၏ အစွန်အဖျား ဂမ်ဘီယာနိုင်ငံမှ ICJ တွင် စွဲဆိုခဲ့ခြင်းဖြစ်သည်ဟု ပြောသည်။
ထိုသို့ စွဲဆိုခဲ့သဖြင့် ရုံးတော်ရှေ့တွင် အပြန်အလှန်နှုတ်ဖြင့်လျှောက်လဲကြမည်ဖြစ်ကာ မိမိတို့သည် နိုင်ငံချစ်စိတ်ဖြင့်အလုပ်လုပ်နေကြခြင်းဖြစ်ပြီး ယနေ့ ဇန်နဝါရီ ၁၂ ရက်သည် တရားရုံး၌ အမှုစစ်ဆေးသော ပထမရုံးချိန်းဖြစ်ကာ ဂမ်ဘီယာနိုင်ငံမှ လျှောက်လဲတင်ပြမည်ဖြစ်ပြီး ဇန်နဝါရီ ၁၆ ရက်မှစတင်ကာ မြန်မာနိုင်ငံဘက်မှ လျှောက်လဲသွားမည်ဖြစ်ပြီး နောက်ပိုင်းတွင်လည်း နှစ်ဖက်သက်သေများအား တရားရုံးရှေ့တင်သွင်းစစ် ဆေးသွားမည်ဟု ပြောသည်။
" ဒီအမှုကိုရင်ဆိုင်ရာမှာ အစထဲက သက်တောင့်သက်သာနဲ့ရင်ဆိုင်ခဲ့ရတာမဟုတ်ပါဘူး။ ပထမဆုံး ကိုဗစ် -၁၉ ကပ်ရောဂါကြီးနဲ့ရင်ဆိုင်နေရတဲ့ကြားက နိုင်ငံတကာချစ်ကြည်ရေးအထူးအဖွဲ့တွေနဲ့ ခက်ခက်ခဲခဲဆက်သွယ်ဆောင်ရွက်ခဲ့ရတာပါ။ နောက်ပိုင်းမှာလည်း ရခိုင်ပြည်နယ်မြောက်ပိုင်းမှာ ဒီအမှုတွေနဲ့ရင်ဆိုင်ခဲ့ရသလိုဘဲ ၂၀၂၃ ခုနှစ်မှာဖြစ်ပွားခဲ့တဲ့ ဆိုင်ကလုန်းမိုခါကြောင့်ဘဲ ဒီဒေသမှာတော်တော်လေးထိခိုက်ခံစားခဲ့ရပါတယ်။ အဲဒီနောက်ပိုင်းမှာဆိုရင်လည်း အစိုးရအဖွဲ့ရုံးစိုက်တဲ့ နေပြည်တော်မှာ ရေကြီးတာတွေ၊ ငလျင်ဘေးဒ-ဏ်ခံ စားခဲ့ရတာတွေရှိခဲ့ပါတယ်"ဟု ပြည်ထောင်စုဝန်ကြီးဦးကိုကိုလှိုင်က ပြောသည်။
ထိုသို့ အခက်အခဲများနှင့် အကြပ်အတည်းများကြားကပင် မိမိတို့အနေဖြင့် စည်းလုံးညီညွတ်စွာဖြင့်ကြိုးစားခဲ့ကြကာ မြန်မာပြည်သူလူထုတစ်ရပ်လုံး၏ သောင်းသောင်းဖြဖြထောက်ခံအားပေးမှုများကိုလည်း မိမိတို့တစ်ဖွဲ့လုံးမှ အထူးတန်ဖိုးထားကျေးဇူးတင်ပြီး ကိုယ်စွမ်းဥာဏ်စွမ်းရှိသမျှ နိုင်ငံနှင့် ပြည်သူများအတွက်ကြိုးစားကာကွယ်သွားမည်ဟု ပြည်ထောင်စုဝန်ကြီးဦးကိုကိုလှိုင်က ပြောကြားခဲ့သည်။

" 73rd Bangkok Gems & Jewelry Fair BGJF 2026” သို့ မြန်မာနိုင်ငံမှ ပါဝင်ပြသမည်

ထိုင်းနိုင်ငံတွင် ကျင်းပပြုလုပ်မည့် " 73rd Bangkok Gems & Jewelry Fair BGJF 2026” သို့ မြန်မာနိုင်ငံမှ ပါဝင်ပြသမည်ဖြစ်ကြောင်း မြန်မာကုန်သွယ်မှုမြှင့်တင်ရေးအဖွဲ့မှ သိရသည်။
အဆိုပါ ပြပွဲကို ထိုင်းနိုင်ငံ၊ ဘန်ကောက်မြို့တွင် အပြည်ပြည်ဆိုင်ရာကုန်သွယ်မှုမြှင့်တင်ရေးဦးစီးဌာန (DITP) မှကြီးမှူး၍ Queen Sirikit National Convention Center (QSNCC) ၌ ၂၀၂၆ ခုနှစ်၊ ဖေဖော်ဝါရီလ ၂၂ ရက်မှ ၂၆ ရက်အထိ ကျင်းပပြုလုပ်မည်ဖြစ်သည်။
ပြပွဲတွင် မြန်မာနိုင်ငံ ကျောက်မျက်ရတနာလုပ်ငန်းရှင်များအနေဖြင့် DITP မှ ထောက်ပံ့သော ပြခန်း (၄) ခန်းနှင့် မိမိအစီအစဉ်ဖြင့် ပြခန်း (၃) ခန်း ပါဝင်ပြသမည်ဖြစ်သည်။
အဆိုပါပြပွဲကို နှစ်စဉ် ဖေဖော်ဝါရီလနှင့် စက်တင်ဘာလတို့တွင် ထိုင်းနိုင်ငံ၌ ကျင်းပလျက်ရှိပြီး မြန်မာနိုင်ငံမှ ကျောက်စိမ်း၊ ပတ္တမြား၊ နီလာ၊ ပုလဲ စသည့် ကျောက်မျက် ရတနာပစ္စည်းများ ပါဝင်ပြသရောင်းချခြင်းဖြင့် မြန်မာ့ကျောက်မျက်ရတနာများကို နိုင်ငံတကာ ဝယ်ယူသူများထံ မိတ်ဆက်မြှင့်တင်ပေးလျက်ရှိကြောင်း သိရသည်။

ဒိုက်ဦးမြို့နှင့် ဝန်းသိုမြို့တို့၌ ငလျင်လှုပ်ခတ်မှုများဖြစ်ပေါ်

ဒိုက်ဦးမြို့နှင့် ဝန်းသိုမြို့တို့၌ ယနေ့ ဇန်နဝါရီ ၁၂ ရက်က ငလျင်လှုပ်ခတ်မှုများဖြစ်ပေါ်ခဲ့ကြောင်း မိုးလေဝသနှင့် ဇလဗေဒညွှန်ကြားမှုဦးစီးဌာနထံမှ သိရသည်။
ယနေ့ ဇန်နဝါရီ ၁၂ ရက်ည ၇ နာရီ ၅၆ မိနစ် ၁၄ စက်က္ကန့်က ဒိုက်ဦးမြို့၏ အနောက်မြောက်ဘက် (၁၃) မိုင်ခန့်အကွာ အနက် (၁၁) ကီလိုမီတာကိုဗဟိုပြု၍ အင်အားရစ် (ခ်) တာစကေး (၃ ဒသမ ၆) အဆင့်ရှိ အင်အားအနည်းငယ်ရှိသော ငလျင်တစ်ခုလှုပ်ခတ်ခဲ့ကြောင်း သိရသည်။
ထို့ပြင် ဝန်းသိုမြို့၏ မြောက်-အနောက်မြောက်ဘက် (၁၀) မိုင်ခန့်အကွာ အနက် (၁၅) ကီလိုမီတာကိုဗဟိုပြု၍ အင်အားရစ် (ခ်) တာစကေး (၄ ဒသမ ၀) အဆင့်ရှိ အင်အားအနည်းငယ်ရှိသောငလျင်သည် ယနေ့ ဇန်နဝါရီ ၁၂ ရက်နံနက် ၂ နာရီ ၄၅ မိနစ် ၄၈ စက္ကန့်ကလှုပ်ခတ်ခဲ့ကြောင်း သိရသည်။

မွန်ပြည်နယ်မှ လွတ်တော် (၃) ရပ်အတွက် ကိုယ်စားလှယ် (၄၅) ဦး ထွက်ပေါ်

မွန်ပြည်နယ်၌ ရွေးကောက်ပွဲအပိုင်း (၁) နှင့် (၂) အပြီးတွင် လွှတ်တော် (၃) ရပ်အတွက် ကိုယ်စားလှယ် (၄၅) ဦး ထွက်ပေါ်ခဲ့ကြောင်း ပြည်နယ် ရွေးကောက်ပွဲကော်မရှင်အဖွဲ့ခွဲထံက သိရသည်။
အဆိုပါ လွတ်တော်ကိုယ်စားလှယ်များအနက် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီက (၂၁) ဦးနှင့် မွန်ညီညွတ်ရေးပါတီက (၁၇) ဦး အများဆုံးပါဝင်ခဲ့သည်။
အလားတူ တိုင်းရင်းသားစည်းလုံးညီ ညွတ်ရေးပါတီက (၂) ဦး၊ ပအိုးဝ်အမျိုးသားဖွံ့ဖြိုးတိုက်တက်ရေးပါတီ (၁) ဦး၊ ပြည်သူ့ပါတီမှ (၁) ၊ ပြည်သူ့ရှေ့ဆောင်ပါတီမှ (၁) ဦး၊ အမျိုးသားအကျိုးစီးပွားတိုးတက်ရေးပါတီမှ (၂) ဦးတို့ ရွေးကောက်ခံရပြီး ရှမ်းနှင့်တိုင်းရင်းသားများ ဒီမိုကရက်တစ်ပါတီက တစ်ဦးမှ ရွေးချယ်ခံရခြင်းမရှိပေ။
ထို့ကြောင့် နိုင်ငံရေးပါတီအားလုံးမှ ထွက်ပေါ်လာသည့် ပြ ည်သူ့လွှတ်တော်အတွက် (၁၀) ဦး၊ အမျိုးသားလွှတ်တော်အတွက် (၁၂) ဦး၊ ပြည်နယ်လွှတ်တော်အတွက် (၂၀) ဦး၊ တိုင်းရင်းသားကိုယ် စားလှယ်များဖြစ်သည့် ဗမာ၊ ကရင်နှင့် ပအိုးဝ် (၁) ဦးစီ ရွေးကောက်ခံထားကြောင်း သိရသည်။

ရွေးကောက်ပွဲ အပိုင်း(၃)ကို တိုင်းနှင့်ပြည်နယ် (၉) ခု က မြို့နယ် (၆၃)မြို့နယ်တွင် ကျင်းပမည်

လာမည့်ရွေးကောက်ပွဲ အပိုင်း(၃)ကို ဇန်နဝါရီ(၂၅)ရက်၌ ဆက်လက်ကျင်းပမည်ဖြစ်ပြီး တိုင်းနှင့်ပြည်နယ် (၉)ခုက စုစုပေါင်းမြို့နယ်(၆၃)မြို့နယ်တွင် ကျင်းပမည်ဖြစ်ကြောင်း သိရသည်။
အပိုင်း (၃) တွင် ကချင်ပြည်နယ်မှ ၅ မြို့နယ်၊ ကရင်ပြည်နယ်မှ ၂ မြို့နယ် ၊ စစ်ကိုင်းတိုင်းဒေသကြီးမှ ၂ မြို့နယ် ၊ တနင်္သာရီတိုင်းဒေသကြီးမှ ၃ မြို့နယ် ၊ ပဲခူးတိုင်းဒေသကြီးမှ ၈ မြို့နယ် ၊ မန္တလေးတိုင်းဒေသကြီးမှ ၈ မြို့နယ် ၊ ရန်ကုန်တိုင်းဒေသကြီးမှ ၁၇ မြို့နယ် ၊ ရှမ်းပြည်နယ်မှ ၉ မြို့နယ် ၊ ဧရာဝတီတိုင်းဒေသကြီးမှ ၉ မြို့နယ် တို့၌ ကျင်းပမည်ဖြစ်ကြောင်း သိရသည်။
ရွေးကောက်ပွဲ အပိုင်း(၁) ကို ၂၀၂၅ ခုနှစ် ဒီဇင်ဘာ(၂၈)ရက်နေ့၌ ကျင်းပခဲ့ပြီးဖြစ်ပြီး အပိုင်း(၂)ကို လည်း ၂၀၂၆ ခုနှစ် ဇန်နဝါရီ(၁၁)ရက်နေ့ ၌ ကျင်းပခဲ့ပြီးဖြစ်သည်။
ရွေးကောက်ပွဲကို အပိုင်း(၃)ပိုင်းဖြင့် ကျင်းပနေခြင်းဖြစ်ပြီး ရွေးကောက်ပွဲပြီးဆုံးပြီးနောက် မတ်လတွင် လွှတ်တော်ခေါ်ယူမည်ဖြစ်ပြီး ဧပြီလတွင် အစိုးရသစ် တာဝန်များထမ်းဆောင်မည်ဖြစ်ကြောင်းလည်း သိရသည်။

OWIC ကိုင်ဆောင်ထားသူများ ဇန်နဝါရီ ၁၄ ရက်မှစတင်၍ ခွင့်ပြုချက်ရယူပြီးမှသာပြည်ပသို့ပြန်လည်ထွက်ခွာရမည်

OWIC ကိုင်ဆောင်ထားသူများအနေဖြင့် ပြည်ပနိုင်ငံများသို့ထွက်ခွာပါက ဇန်နဝါရီ ၁၄ ရက်မှစတင်ကာ သတ်မှတ်စည်းကမ်းများနှင့်အညီ အလုပ်သမားဝန်ကြီးဌာန၊ အလုပ်သမားညွှန်ကြားရေးဦးစီးဌာန၏ ခွင့်ပြုချက်ရယူပြီးမှသာပြည်ပသို့ပြန်လည်ထွက်ခွာရမည်ဟု အသိပေးခဲ့သည်။
အလုပ်သမားညွှန်ကြားရေးဦးစီးဌာနမှ အေဂျင်စီအစီ အစဉ်၊ မိမိအစီအစဉ်၊ ကျွမ်းကျင်/ခွင့်ပြန်တို့ဖြင့်ဖြစ်စေ OWIC ပြုလုပ်ခွင့်များနှင့် ပြည်ပထွက်ခွာခွင့်များကို စိစစ်ခွင့်ပြုပေးလျက်ရှိသော်လည်း အပြည်ပြည်ဆိုင်ရာလေဆိပ်များမှပေးပို့သည့်စာရင်းများအရ မိမိအစီအစဉ်ဖြင့် ခွင့်ပြန် OWIC လက်ဝယ်ရှိပြီးသူများသည် အလုပ်သမားညွှန်ကြားရေးဦးစီးဌာနသို့ တင်ပြခြင်းမရှိဘဲ ပြည်ပသို့ထွက်ခွာနေခြင်းအား စိစစ်တွေ့ရှိရသည်ဟု အသိပေးခဲ့သည်။
ခွင့်ပြန် OWIC လက်ဝယ်ရှိပြီးသူများ ပြည်ပပြန်လည်ထွက်ခွာခွင့်နှင့်ပတ်သက်၍ အလုပ်သမားညွှန်ကြားရေးဦးစီးဌာနသို့ အနည်းဆုံး ရုံးပိတ်ရက်(မပါ) ၅ ရက်ကြိုတင်လျှောက်ထားရမည်ဆိုသော သတ်မှတ်ချက်အား အလုပ်သမားညွှန်ကြားရေးဦးစီးဌာနမှ အသိပေးထုတ်ပြန်ခဲ့ပြီးဖြစ်သည်။