AI နည်းပညာသုံးမျက်လှည့်ပြကွက်အစီအစဉ်များထည့်သွင်းကျင်းပသည့် Shopping in China 2026 Guangxi “33 Consumption Festival"တွင် မြန်မာသံရုံးပါဝင်ပြသ

နန်နင်းမြို့တွင် ကွမ်ရှီးကျွမ့်ကိုယ်ပိုင်အုပ်ချုပ်ခွင့်ရဒေသ၊ စီးပွားရေးရာဦးစီးဌာနမှဦးစီး၍ AI နည်းပညာသုံးမျက်လှည့်ပြကွက်အစီအစဉ်များထည့်သွင်းထားသော Shopping in China 2026 Guangxi “33 Consumption Festival"ဖွင့်ပွဲကို ဧပြီ ၁၇ ရက်ကကျင်းပရာ နန်နင်းမြို့၊ မြန်မာကောင်စစ်ဝန်ချုပ်ရုံးမှ ကောင်စစ်ဝန်ချုပ်ဒေါ်ခိုင်ဆုလင်းတက်ရောက်ခဲ့သည်။
ကွမ်ရှီးဒေသ၏ အမှတ်တံဆိပ်များ၊ ဒေသထွက်ကုန်များနှင့် စားသုံးသူများအတွက်အထူးခံစားခွင့်များ၊ AI နည်းပညာသုံး နွေဦးအားလပ်ရက်နှင့် ကွမ်ရှီးတွင်ပျော်ရွှင်ဖွယ်ဈေးဝယ်ခြင်း၊ ကမ္ဘာနှင့်ချိတ်ဆက်မည့် စမတ်နည်းပညာများ၊ အွန်လိုင်းဈေးဝယ်ပလက်ဖောင်းမှ အထူးဈေးရောင်းအစီအစဉ်များပါဝင်သော ပွဲတော်ကိုဖွင့်လှစ်ခဲ့သည်။
ထို့အတူ ပွဲတော်၌ အာဆီယံအဆင့်မြင့်ထုတ်ကုန်များရွေးချယ်မှုအစီအစဉ်များ၊ AI နည်းပညာသုံးမျက်လှည့် ပြကွက်အစီအစဉ်၊ စတိုးဆိုင်ပေါင်းထောင်ချီနှင့် ကုန်ပ စ္စည်းပေါင်းသန်းချီပါဝင်မည့် အစီအစဉ်များ၊ နယ်စပ်ဖြတ်ကျော်ငွေပေးချေမှုစနစ်များလည်းပါဝင်သည်။
ဈေးပွဲတော်၌ မြန်မာနိုင်ငံအပါအဝင် အာဆီယံနိုင်ငံများ၏ ထွက်ကုန်ပစ္စည်းများခင်းကျင်းပြသထားသည်။

ပုသိမ်မြို့တွင် နေအိမ်မီးလေ-ာင်မှုဖြစ် (၁၀)မိနစ်ကျော်ကြာငြှိမ်းသ-တ်ခဲ့ရကာ ပျ-က်စီးမှုများဖြစ်ပေါ်ခဲ့

ဧရာဝတီတိုင်း၊ ပုသိမ်မြို့ရှိ နေအိမ်တစ်လုံးတွင် ယနေ့ ဧပြီ ၁၉ ရက်နံနက် ၂ နာရီ ၁၅ မိနစ်ခန့်က မီးလေ-ာင်မှုဖြစ်ပွားခဲ့ကြောင်း မီးသ-တ်တပ်ဖွဲ့ထံမှ သိရသည်။
ပုသိမ်မြို့၊ အမှတ်(၁၄)ရပ်ကွက်၊ ဉမ္မာဒန္တီ(၂)လမ်းရှိ နေ အိမ်တစ်လုံးတွင်မီးလေ-ာင်မှုဖြစ်ပွား၍ မီးသ-တ်တပ်ဖွဲ့ဝင်များ၊ အရန်မီးသ-တ်တပ်ဖွဲ့ဝင်များနှင့် လူမှုကူညီရေးအသင်းဝင်များက ငြှိမ်းသတ်ခဲ့ကြရာ နံနက် ၂ နာရီ ၂၈ မိနစ်၌မီးငြိမ်းသွားခဲ့ကြောင်း သိရသည်။
ထို့နောက် သက်ဆိုင်ရာမီးသ-တ်တပ်ဖွဲ့တာဝန်ရှိသူများက စတင်လောင်ကျွမ်းရသည့်အကြောင်းရင်းနှင့် ပျ-က်စီးဆုံးရှုံးမှုတန်ဖိုးကို စစ်ဆေးလျက်ရှိကြောင်း သိရသည်။

ကြို့ပင်ကောက်မြို့မှာ မိုးရွာ လေပြင်းတိုက်လို့ အိမ်ရာနဲ့ချီ ပျက်စီးခဲ့ ၊ နယ်မြေအခြေအနေအရ သွပ်အိမ်ဆောက်ပစ္စည်း ဝယ်ယူဖို့အခက်ကြုံနေ

ပဲခူးတိုင်းအနောက်ပိုင်း ၊ ကြို့ပင်ကောက်မြို့နယ်မှာ နှစ်ဆန်းတရက်နေ့ ၊ ဧပြီလ ၁၇ ရက်နေ့ ညနေပိုင်းက မိုးရွာပြီး လေပြင်းတိုက်ခိုက်မှုကြောင့် အိမ်ခြေရာနဲ့ချီ ထိခိုက်ပျက်စီးမှုရှိခဲ့တယ်လို့ ဒေသခံတွေဆီက စုံစမ်းသိရှိရပါတယ်။
ညနေ ၃ နာရီကျော်လောက်မှာ လေပြင်းတိုက်ပြီး မိုးရွာသွန်းခဲ့တာဖြစ်ကြောင်း ၊ အဲဒီဖြစ်စဥ်ကြောင့် ကြို့ပင်ကောက်မြို့ပေါ် ရှိ နေအိမ်အချို့ ထိခိုက်ပျက်စီးမှု ရှိခဲ့သလို ချောင်းဂွရွာ ၊ မြို့ကိုင်းရွာနဲ့ ကွက်သစ်ရွာတွေဘက်မှာလည်း အိမ်ရာနဲ့ချီပြီး ပျက်စီးမှု ရှိခဲ့တယ်လို့ သိရပါတယ် ။
လူနေအိမ်တွေမှာ အမိုးလန် ပျက်စီးသွားတာ၊ အိမ်တခုလုံးပြိုကျပျက်စီးတာ ၊ အိမ်တခြမ်းပျက်စီးတာတွေ ဖြစ်ပွားခဲ့သလို သစ်ပင်တွေလည်း လဲကျမှုရှိခဲ့တယ်လို့ သိရပါတယ် ။
" ရွာမှာ အိမ်ခြေ ၈၀ လောက်ရှိတယ်။အဲဒီထဲမှာ ကောင်းတာက ၁၀ အိမ်လောက်ပဲကျန်တော့တယ်။ကျန်တဲ့အိမ်တွေက သွပ်မိုးတွေလန်သွားတယ်။တချိူ့ဆိုအိမ်ကငုတ်တုပ်ကနေ လဲပြီးပြိုကျသွားတယ်။ ၃ နာရီခွဲလောက်မှာ လေစတိုက်ပြီး မိုးသီးတွေပါကြွေလာတယ်။ လေရောမိုးရော တအားပါတယ်။ ၄ နာရီမထိုးခင်လောက်မှာ ပြိုကုန်တာ။ မြို့ကိုင်းနဲ့ ကွက်သစ်မှာလည်း အိမ်တွေပျက်စီးတယ်။ များတာကတော့ ချောင်းဂွက ပိုများတာ ။ ပျက်စီးတာအတွက် သွပ်ဘာညာဝယ်ရမှာပေါ့။ " လို့ ချောင်းဂွ ဒေသခံက ပြောပါတယ်။
အဆိုပါ မြို့ကိုင်း ၊ ကွက်သစ်နဲ့ ချောင်းဂွ ရွာတွေဘက်မှာ PDF တွေ ဝင်ထွက်သွားလာမှု ရှိတဲ့အခြေအနေတွေကြောင့် သက်ဆိုင်ရာမြို့နယ်အာဏာပိုင်တွေက ကုန်ပစ္စည်း သယ်ယူပို့ဆောင်ရေးကို အကန့်အသတ်နဲ့သာ ခွင့်ပြုထားတဲ့ အခြေအနေရှိတယ်လို့ သိရပါတယ်။
ဒါကြောင့် သဘာဝဘေးအန္တရာယ်ခံစားခဲ့ရတဲ့ ပြည်သူတွေအနေနဲ့ ထိခိုက်ပျက်စီးသွားတဲ့ နေအိမ်အတွက် လိုအပ်တဲ့ သွပ် နဲ့အခြား အိမ်ဆောက်ပစ္စည်းတွေ ဝယ်ယူဖို့ အခက်တွေ့နေကြရတယ်လို့ သိရပါတယ်။
" လိုအပ်တဲ့ သွပ်တွေဝယ်ဖို့ ဘယ်လိုလုပ်ရမလဲဆိုပြီး ပြောနေကြတာ ။ သယ်ယူပို့ဆောင်ရေးကန့်သတ်ခံရတော့ ကြားထဲက ပြည်သူတွေ ဒုက္ခရောက်ရတာပေါ့လေ ။ဒီဘက်က အမဲရောင်နယ်မြေလို ဖြစ်နေတော့ သယ်ယူပို့ဆောင်ရေးကန့်သတ်ခံရတာပေါ့။ ဆန်တွေလည်း အကန့်သတ်နဲ့သယ်ရတာ ။" လို့ သူက ထပ်ပြောပါတယ်။
ကြို့ပင်ကောက်မြို့ပေါ်မှာတော့ ဆင်ခြေဖုံးရပ်ကွက်တွေက နေအိမ်တွေ ထိခိုက်ပျက်စီးမှုများပြီး သစ်ပင်လဲကျမှုတွေရှိခဲ့ကြောင်း ၊ ရန်ကုန် - ပြည်လမ်း လမ်းမှာလည်း သစ်ပင်လဲကျမှုရှိခဲ့တဲ့အတွက် မီးသတ်ဌာနက ရှင်းလင်းရေးပြုလုပ်ခဲ့တယ်လို့ သိရပါတယ်။
" မြို့ပေါ်ရပ်ကွက်တွေမှာတော့ သစ်ပင်လဲတာတွေ ၊ဓါတ်တိုင်လဲတာတွေ ၊နေအိမ်အချို့အမိုးလန်ပျက်စီးတာတွေရှိပါတယ်။ ဆင်ခြေဖုံးရပ်ကွက်ကအိမ်တွေများပါတယ်။ မြို့ကိုင်း ၊ချောင်းဂွ၊ ကွက်သစ်ရွာဘက်ကတော့ နယ်မြေအခြေအနေအရ သွားလို့မပြေတော့ ကူညီနိုင်ဖို့ ခက်ပါတယ်။ " လို့ ကြို့ပင်ကောက် ဒေသခံက ပြောပါတယ်။
ကနဦးသိရှိရ တဲ့ သတင်းအချက်အလက်တွေအရတော့ အဆိုပါ လေပြင်းတိုက်ခိုက်မှုအတွင်းမှာ ထိခိုက်ဒဏ်ရာရရှိသူ မရှိဘူးလို့ သိရပါတယ်။
ကြို့ပင်ကောက်မြို့နယ်နဲ့ ကပ်လျက်မှာရှိတဲ့ ဇီးကုန်းမြို့မှာလည်း မိုးရွာ လေပြင်းတိုက်ပြီး မိုးသီးကြွေ လျှပ်စီးလက် မိုးကြိုးပစ်မှုတွေဖြစ်ပွားပြီး သစ်ပင်လဲကျတာ ၊နေအိမ်တချို့ထိခိုက်မှုရှိခဲ့တယ်လို့ သိရပါတယ် ။

ထိုင်းမှာ မြန်မာလုပ်သား ၆၀၀ ကျော် အကြောင်းပြချက်မရှိ ကြိုတင်အသိမပေးဘဲ အလုပ်ရပ်နားခံရလို့ ဒုက္ခရောက်နေ

ထိုင်းနိုင်ငံ ၊ ပါကျင်ဘူလီခရိုင်၊ကဘင်ဘူလီမြို့နယ်မှာရှိတဲ့ Haier အဲယားကွန်းစက်ရုံက မြန်မာလုပ်သား ၆၂၂ ယောက်ကို ကြိုတင်အသိပေးတာမျိုးမရှိဘဲ အလုပ်ကနေ ရပ်နားလိုက်တာကြောင့် အလုပ်သမားတွေ ဒုက္ခရောက်နေရတယ်လို့ မြန်မာလုပ်သားတွေဆီက သိရပါတယ်။
မြန်မာလုပ်သားတွေကို ဧပြီ ၁၆ ရက်နေ့ကစပြီး အလုပ်ဆင်းစရာမလိုကြောင်း အလုပ်ကနေရပ်နားလိုက်ပြီလို့ အသိပေးခဲ့တာဖြစ်ကြောင်း ၊ အလုပ်ရပ်နားရတဲ့ အကြောင်းအရင်းကိုတော့ ပြောဆိုခြင်းမရှိသလို နစ်နာကြေးလည်း မပေးဘူးလို့ သိရပါတယ်။
အလုပ်ရပ်နားခံလိုက်ရတဲ့ မြန်မာလုပ်သားတွေထဲမှာ အလုပ်စတင်လုပ်ကိုင်ကတည်းက လက်ရှိအလုပ်နားခံရတဲ့အထိ လုပ်ခလစာ မရရှိခဲ့သူတွေလည်းပါဝင်နေတယ်လို့ သိရ ပါတယ်။
" အလုပ်စဝင်တဲ့ ဒီဇင်ဘာလကနေ အခုဧပြီလအထိ လုပ်ခလစာတကျပ်မှမရသေးဘူး ။ဘန်ကောက်ဘဏ်အကောင့်မရှိလို့ဆိုပြီး မပေးတာ ။ ကိုယ့်လုပ်ခလစာဆိုတော့ လိုချင်တာပေါ့။ ကြားထဲမှာ သူတို့မပေးလို့ အိမ်ကတောင်းသုံး၊သူငယ်ချင်းစီက အကူညီတောင်းရတယ်။ ဘာကြောင့်အလုပ် အလုပ်နားတယ်ဆိုတာ မပြောဘူး ။ အလုပ်ရပ်နားခံလိုက်ရပြီဆိုတော့ အလုပ်သစ်ထပ်ရှာရမှာသေချာသွားပြီ ။ အဲဒီတော့ တလလောက်တော့ ဒီတိုင်းထိုင်နေရာမှာ ။ လုပ်ခလစာရော နစ်နာကြေးရောလိုချင်ပါတယ်။ " လို့ မြန်မာလုပ်သားတယောက်က ပြောပါတယ်။
မြန်မာလုပ်သားတွေအနေနဲ့ အဲဒီ Haier စက်ရုံမှာ အလုပ်ရရှိဖို့အတွက် ပွဲစားကို စမတ်ကြေး ဘတ် ၅၅၀၀ ကနေ ၁၀၀၀၀ ကျော်အထိ ပေးခဲ့ရတယ်လို့ သိရပါတယ်။
" သူတို့က ကြိုတင် အကြောင်းမကြားဘဲ အလုပ်ထဲကို သွင်းပေးတဲ့ပွဲစား အဖွဲ့အစည်းကလေး ဖွဲ့လောက်ရှိတယ်။အလုပ်ဝင်တာနှစ်လကျော်ကျော်ရှိပြီ။ လစာမရသေးဘူး။ အခုအလုပ်နားခံရတယ်။သူတို့က နစ်နာကြေး ပေးလေ့မရှိဘူးပြောတယ် မပေးဘူးပေါ့။ လုပ်ခ လစာတွေကိုတော့ ၂၅ ရက်နေ့ပေးမယ်ပြောတယ်။ လစာမရတော့ အိမ်ကနေပြန်တောင်းသုံးနေရတယ်။စမတ်ကြေးကလည်း အစားစားပေးရတယ်။နောက်ထပ်အလုပ်ထပ်ရှာရရင် စမတ်ခ ၆၀၀၀ လောက်ထပ်ကုန်အုံးမယ်။" လို့ အလုပ်ရပ်နားခံရတဲ့အထဲက နောက်ထပ် မြန်မာလုပ်သားတယောက်က ပြောပြပါတယ်။
အလုပ်ရပ်နားခံလိုက်ရတဲ့ မြန်မာလုပ်သား ၆၀၀ ကျော်က အဲဒီစက်ရုံမှာ အလုပ်လုပ်ကိုင်တဲ့သက်တမ်း နှစ်လကနေ တနှစ်အတွင်းရှိ MOU / PJ / CI ရှိတဲ့ လုပ်သားတွေ အများဆုံးဖြစ်ကြောင်းသိရပါတယ်။
ကြိုတင်အသိပေးခြင်းမရှိဘဲ ရုတ်တရက် အလုပ်ကနေ ရပ်နားခံလိုက်ရတာကြောင့် Visa သက်တမ်း ၊ Work Permit သက်တမ်းကုန်သူတွေ အပါအဝင် အလုပ်သမားတွေအားလုံးမှာ အလုပ်သစ်ထပ်ရှာဖို့အတွက် အခက်အခဲတွေနဲ့ ရင်ဆိုင်နေကြရတယ်လို့ သိရပါတယ်။
" အမှန်ဆိုတလလောက်ကြိုတင်ပြောရမှာ။ အလုပ်ရှင်ဘက်ကဖြစ်ဖြစ် အလုပ်သမားဘက်ဖြစ် ဘာအကြောင်းကြောင့် ဖြစ်ဖြစ် တလကြိုတင်အကြောင်းကြားပြီး မှလုပ်သင့်တာ။ခုဖြစ်တာက သင်္ကြန်မတိုင်ခင် ၁၀ ရက်နေ့က အလုပ်ဆင်းပြီး ပြန်လာတယ်။ အဲဒီနောက် line group ကနေ ၁၆ ရက်နေ့ကစပြီး စာရင်းပါ လူတွေ အလုပ်ဆင်းခွင့်မရှိကြောင်း အသိပေးခဲ့တာ။ ကျွန်တော်တို့ကပိုပြီး ဒုက္ခရောက်တယ်။သက်တမ်းက ၆ လပိုင်း ၁၆ ရက်နေ့ဆိုရင် Visa ရော Work Permit ရော သက်တမ်းတိုးရမှာဆိုတော့အလုပ်သစ်ရှာဖို့က မလွယ်တော့ဘူး ။ သက်တမ်းတိုးပြီးမှရတော့မှာ။ သက်တမ်းမတိုးခင်ကြားကာလ ဘာမှလုပ်မရဘဲ ဒီတိုင်းထိုင်စားနေရမှာ ။" လို့ လုပ်သက် ခုနှစ်လရှိပြီး အလုပ်ကရပ်နားခံရတဲ့ မြန်မာလုပ်သားတယောက်က ပြောပါတယ်။
အလုပ်သမားတွေကို ကြိုတင်အသိပေးတာမျိုးမရှိဘဲ အလုပ်ကနေရပ်နားလိုက်တဲ့ကိစ္စနဲ့ပတ်သက်ပြီး အလုပ်သမားတွေက လုပ်ခလစာရရှိရေး ၊ နစ်နာကြေးရရှိရေးအတွက် ထိုင်းနိုင်ငံရောက် မြန်မာလုပ်သားတွေကို ကူညီပေးနေတဲ့ WAG အလုပ်သမားမဟာမိတ်အဖွဲ့ထံ အကူအညီတောင်းခံထားကြောင်းသိရပါတယ်။

မြဝတီနယ်စပ်ကုန်သွယ်ရေး ပြန်လည်စတင်တော့မှာဖြစ်လို့ နယ်စပ်ပို့ကုန်လိုင်စင်တွေ ချထားပေးနေ

ထိုင်း - မြန်မာနယ်စပ်မြို့ဖြစ်တဲ့ မြဝတီကနေ နယ်စပ်ကုန်သွယ်ရေး ပြန်လည်စတင်တော့မှာဖြစ်တာကြောင့် ပို့ကုန်ပစ္စည်း ခြောက်မျိုးကို နယ်စပ်ပို့ကုန်လိုင်စင် လျှောက်ခွင့်ပြုလိုက်ပြီ ဖြစ်တယ်လို့ ကုန်သည်တွေဆီကသိရပါတယ် ။
ပြောင်းဆံ ၊ ငရုတ်အစို/အခြောက် ၊ ကွမ်းသီးအစို/အခြောက် ၊ ကြက်သွန်နီ ၊ ပဲမျိုးစုံ နဲ့ သီဟိုဆံ တို့ကို ပို့ကုန်လိုင်စင်ချထားပေးလိုက်တာ ဖြစ်ပြီး လိုင်စင်ကို Myanmar Trade Net 2.0 စနစ်မှာ လျှောက်ထားရမှာဖြစ်တယ်လို့ သိရပါတယ်။
" အမှတ် ၂ တံတားပြန်ဖွင့်တော့မှာမို့လို့ ခုလို ပို့ကုန်လိုင်စင် တွေပြန်ချပေးတဲ့သဘောပါ ။ တံတားပြန်ဖွင့်မှ လိုင်စင်လျှောက် ထလုပ်လို့ ကုန်သွယ်ရေး ထလုပ်လို့မှမရတာ ။ ပို့ကုန်လိုင်စင်တွေ ချထားပေးပြီးမှ တံတားဖွင့်တာနဲ့ ကုန်စည်တွေ ချက်ခြင်းပို့နိုင်မှာ အဲဒီသဘောပါ ။ အခုတချို့လည်း လိုင်စင်လျှောက်နေကြပြီ ။ လိုင်စင်တွေချပေးနေတယ်။ ဝက်ဆိုက်ဘ်ကနေပဲ လျှောက်ရတာဆိုတော့ အချက်အလက်ပြည့်စုံမှန်ကန်ရင် လိုင်စင်ချပေးနေတယ် ။ မြဝတီနယ်စပ်ကုန်သွယ်ရေးပြန်ပွင့်တာနဲ့ ကုန်ပစ္စည်းတွေလည်း အထိုက်အလျောက် စျေးတက်လာမှာပါ ။ " လို့ နယ်စပ် ငရုတ်ကုန်သည် တယောက်က ပြောပါတယ်။
မြဝတီ နယ်စပ်ပို့ကုန်လိုင်စင် အတွက် လက်ရှိမှာ လိုင်စင် လျှောက်ထားသူတွေရှိသလို လမ်းကြောင်းအခြေအနေ အဆင်ပြေမှုရှိမရှိအပေါ် စောင့်ကြည့်ပြီး မဲဆောက်မှာ ကုန်ပစ္စည်းထားဖို့ ဂိုဒေါင်ငှားရမ်းဖို့ ကြိုတင်စီစဥ်တဲ့သူတွေလည်း ရှိနေတယ်လို့ သိရပါတယ်။
" လိုင်စင်လျှောက်ခွင့်တော့ ပေးပြီ။ လျှောက်ကြည့်မှာပေါ့။ကျွန်တော်တို့လည်း စမ်းသွားကြည့်မှာပေါ့။ ဒါပေမယ့် မြဝတီလမ်းကြောင်းကမသွားတာ ကြာတော့လေ။ တယောက်နှစ်ယောက်ကတော့ စမ်းထွက်ကြည့်မှ ရမှာပေါ့။အားလုံးက စိတ်မချသေးဘူးဖြစ်နေတော့လေ။ လမ်းမှာပစ်ခတ်ခံရမှာကြောက်တာကို။ အဲဒါကြောင့်ခဏစောင့်ကြည့်နေကြတာ။ တချို့ကုန်သည်တွေလည်း မဲဆောက်မှာ ဂိုဒေါင်တွေ ငှားဖို့စီစဥ်နေကြတယ်။အရင်က ဧပြီ ၂၈ လောက် ထွက်ရမယ်ကြားတယ်။အခုထပ်ကြားရတာကတော့ မေ ၁၁ လောက်မှထွက်ရမယ်လို့ ကြားရပြန် တယ်။တံတားဖွင့်မယ့်ရက်တော့ မသိသေးဘူး။ " လို့ ပြောင်းကုန်သည်တယောက်က ပြောပါတယ်။
မြဝတီနယ်စပ်ကုန်သွယ်ရေးကို ထိုင်း - မြန်မာနယ်စပ် နှစ်နိုင်ငံကုန်သွယ်ရေးလမ်းကြောင်းဖြစ်တဲ့ အမှတ် ၂ ချစ်ကြည်ရေးတံတား ကနေ အဓိက ကုန်သွယ်ရတာ ဖြစ်ပါတယ်။
လက်ရှိမှာ အမှတ်၂ချစ်ကြည်ရေးတံတား ပိတ်ထားဆဲ ဖြစ်ပေမယ့် မကြာခင်မှာ ပြန်လည်ဖွင့်လှစ်တော့မှာဖြစ်တာကြောင့် နယ်စပ်ပို့ကုန်လိုင်စင်တွေကို ပြန်လည် လျှောက်ထားခွင့် ပြုလိုက်တာ ဖြစ်တယ်လို့ သိရပါတယ်။
နယ်စပ်ပို့ကုန်လိုင်စင်တွေကို လျှောက်ထားခွင့်ပြုလိုက်ပေမယ့် သွင်းကုန်လိုင်စင် အသစ်လျှောက်ထားခြင်းကို ခွင့်မပြုသေးဘဲ အမှတ် ၂ တံတားပိတ်သွားလို့ လုပ်ငန်းစဉ်တွေ ရပ်တန့် ကျန်ခဲ့ရတဲ့ ကုန်စည်တွေကိုတော့ စနစ်တကျ ပြန်လည် စိစစ်ဆောင်ရွက်ပေးနိုင်ဖို့အတွက် မြဝတီနယ်စပ်ကုန်သွယ်ရေး ကုန်သည်များအသင်းက စာရင်းကောက်ခံနေတယ်လို့ သိရပါတယ်။
ဒါကြောင့် သွင်းကုန်လုပ်ငန်းရှင်တွေအနေနဲ့ သွင်းကုန်လိုင်စင်လျှောက်ထားစဉ်အတွင်း ထိုင်း Free Zone မှာ ရှိတဲ့ ကုန်ပစ္စည်းစာရင်း၊ သွင်းကုန်လိုင်စင်ရရှိပြီး တင်သွင်းရန်ကျန်ရှိတဲ့ ကုန်ပစ္စည်းစာရင်း၊ သွင်းကုန်လိုင်စင်နဲ့ တင်သွင်းထားပြီး အကောက်ခွန်ဂျူတီမဆောင်ရသေးတဲ့ ကုန်ပစ္စည်း များစာရင်း ၊ သွင်းကုန်လိုင်စင်ရရှိပြီး အကောက်ခွန်ဂျူတီဆောင်ထားတဲ့ ကုန်ပစ္စည်းများစာရင်း ကို တင်ပြနိုင်တယ်လို့ သိရပါတယ် ။
သွင်းကုန်လုပ်ငန်းရှင်တွေအနေနဲ့ အဆိုပါ စာရင်းတွေကို ဧပြီ ၂၀ ရက်နေ့နောက်ဆုံးထားပြီး မြဝတီနယ်စပ်ကုန်သွယ်ရေး ကုန်သည်များအသင်းဆီ တင်ပြရမှာ ဖြစ်တယ်လို့သိရပါတယ် ။
မြဝတီ-မဲဆောက် အမှတ် (၂) ချစ်ကြည်ရေးတံတားကိုတော့ ၂၀၂၅ ခုနှစ် ဩဂုတ်လ ၁၈ ရက်နေ့ကတည်းက ပိတ်ထားခဲ့တာ ဒီကနေ့အထိဆိုရင် ၈ လကျော်ကြာရှိပြီဖြစ်ပါတယ်။
မြဝတီ - ကော့ကရိတ် အာရှလမ်းမကြီးကတော့ ၂၀၂၃ ခုနှစ်မှာ PDF တွေထိန်းချုပ်ပြီးကတည်းက ပိတ်ထားခဲ့ပြီး ဒီလ ဧပြီ ၂ ရက်မှာမှ ပြန်လည်ဖွင့်လှစ် နိုင်ခဲ့တာဖြစ်ပါတယ်။
မြဝတီ - ကော့ကရိတ် အာရှလမ်းဖွင့်ပြီးနောက်မှာ ဒေသတွင်း ကုန်စည်စီးဆင်းမှု နဲ့ သွားလာ​ရေးအဆင်ပြေခဲ့ပြီး မကြာခင် အမှတ် ၂ တံတားပြန်ဖွင့်ပါက နယ်စပ်ကုန်သွယ်ရေး ပြန်လည်အသက်ဝင်လာမှာ ဖြစ်တယ်လို့ သိရပါတယ်။
ထိုင်း - မြန်မာ နယ်စပ်ကုန်သွယ်ရေးကဏ္ဍမှာ မြဝတီ နယ်စပ်ကုန်သွယ်ရေးကနေ အဓိက ကုန်သွယ်မှု အများဆုံး ပြုလုပ်နိုင်တာ ဖြစ်တယ်လို့ သိရပါတယ်။

ရန်ကုန် - မော်လမြိုင်လမ်းမှာ express ကားနဲ့ light truck တိုက်မိပြီး ဘုန်းကြီး ၇ ပါး အပါအဝင် ၁၁ ယောက်သေဆုံး ၊ ရှစ်ယောက်ဒဏ်ရာပြင်းထန်

သထုံမြို့နယ်၊ ရန်ကုန် - မော်လမြိုင်လမ်း ၊ မိုင်တိုင်အမှတ် (၁၀၄/၅) အနီးမှာ ဒီကနေ့ ဧပြီ ၁၈ ရက်နေ့ ညနေ ၄ နာရီကျော်လောက်က ခရီးသည်တင် မန္တလာ Express ကားနဲ့ ဘုန်းကြီးတွေလိုက်ပါလာတဲ့ light truck တို့ မျက်နှာချင်းဆိုင်တိုက်မိပြီး ဘုန်းကြီး ၊ ကိုရင် ၊ လူ အပါအဝင် ၁၁ ယောက်သေဆုံးခဲ့တယ်လို့ သိရပါတယ် ။
သေဆုံးတဲ့အထဲမှာ ဘုန်းကြီး ခုနှစ်ပါး ၊ ကိုရင် တပါး နဲ့ အမျိုးသားသုံးယောက်တို့ ဖြစ်ကြောင်း ကနဦး သိရပြီး ထိခိုက်ဒဏ်ရာရသူတွေကတော့ အမျိုးသားသုံးယောက်နဲ့ ဘုန်းကြီး ငါးပါးစုစုပေါင်း ရှစ်ယောက် ဖြစ်တယ်လို့ သိရပါတယ်။
လက်ရှိမှာ ထိခိုက်ဒဏ်ရာရရှိသူထဲက သံဃာတပါးကို ရန်ကုန်ဆေးရုံကြီးကိုပို့ဆောင်နေပြီး ကျန်ဒဏ်ရာရရှိသူတွေကိုတော့ သထုံဆေးရုံကြီးမှာ ကုသမှုပေးနေတယ်လို့ သိရပါတယ်။
" လောလောဆယ် သေဆုံးသူက သံဃာ ၇ ပါး ၊ ကိုရင် တပါး ၊ အမျိုးသားသုံးယောက်ပါ ။ သံဃာ နှစ်ပါးက သထုံဆေးရုံကြီးရောက်မှ ထပ်ဆုံးလို့ ၁၁ ယောက်ဖြစ်သွားတာပါ။ ထိခိုက်ဒဏ်ရာ ရတဲ့အထဲမှာ လက်ကျိုး ခြေထောက်ကျိုး ခေါင်းကွဲတာ တွေပါတယ် ။ သထုံဆေးရုံကြီးမှာ ကုသမှုခံယူနေရတယ်။ ယာဥ်တိုက်မှုက ဘုန်းကြီးတွေလိုက်ပါလာတဲ့ကားက တက္ကစီကို ကျော်တက်လိုက်တာမှာ express ကားနဲ့တိုက်မိတာ ပါ။ " လို့ မြေပြင်ကူညီကယ်ဆယ်ရေး သွားခဲ့တဲ့ အဖြူရောင်နှလုံးသား လူမှုကယ်ဆယ်ရေးအဖွဲ့ ရဲ့ တာဝန်ရှိသူကပြောပါတယ်။
ယာဥ်တိုက်မှုအတွင်း သေဆုံးခဲ့သူတွေနဲ့ ထိခိုက်ဒဏ်ရာရ ရှိသူတွေဟာ ဘုန်းကြီးကားပေါ်လိုက်ပါလာသူတွေဖြစ်ကြောင်းသိရှိရပြီး ပျံလွန်တော်မူတဲ့ ဘုန်းကြီးတွေကတော့ သထုံမြို့နယ်၊ ပေါ်တော်မူ ရွှေဟင်္သာညီနောင်ကျောင်းက ဖြစ်တယ်လို့ ကနဦး သိရပါတယ် ။
အဆိုပါ ယာဥ်တိုက်မှုကိုတော့ သထုံမြို့နယ်အခြေစိုက် လူမှုကူညီရေးအသင်းတွေနဲ့အတူ နယ်မြေခံမီးသတ်တပ်ဖွဲ့ဝင်တွေ ပူးပေါင်းပြီး ကယ်ဆယ်ရေးလုပ်ခဲ့တာ ဖြစ်တယ်လို့သိရပါတယ်။

မြဝတီမြို့နယ် တောင်ဘက်ခြမ်းမှာ တိုက်ပွဲအပြင်းအထန် ဖြစ်ပွားနေ

ကရင်ပြည်နယ်၊ မြဝတီမြို့နယ် တောင်ဘက်ခြမ်းမှာ အစိုးရတပ်နဲ့ ကရင်အမျိုးသားလွတ်မြောက်ရေးတပ်မတော် (KNLA) ပူးပေါင်းတပ်တွေကြား တိုက်ပွဲ အပြင်းအထန် ဖြစ်ပွားနေတယ်လို့ ဒေသခံတွေက ပြောပါတယ်။
မြဝတီမြို့တောင်ပိုင်းရှိ မြဝတီ - ဝေါလေလမ်းပိုင်း၊ ဖလူးကျေးရွာနဲ့ မင်းလက်ပံကျေးရွာတွေ အနီးမှာ ပြီးခဲ့တဲ့ ဧပြီ ၁၃ ရက်၊ သင်္ကြန်ကာလမှစတင်ကာ တိုက်ပွဲတွေ အပြင်းအထန် ဖြစ်ပွားနေတာဖြစ်ပြီး အစိုးရတပ်က ဝေါလေဗျူဟာကုန်းနဲ့ ဖလူးစခန်းတွေကို ပြန်လည် ရယူနိုင်ဖို့အတွက် အင်အား အများအပြားနဲ့ ထိုးစစ်ဆင် တိုက်ခိုက်နေတာ ဖြစ်တယ်လို့ သိရပါတယ်။
“တိုက်ပွဲက မနေ့က မင်းလက်ပံမှာလည်း အပြင်းအထန်ဖြစ်တယ်။ ဖလူးဘက်မှာလည်း မနက်ပိုင်း အပြင်းအထန် ဖြစ်တယ်။ လေကြောင်း တိုက်ခိုက်တာက သင်္ကြန်ကာလအတွင်းမှာတောင် မနားတမ်း ဖြစ်ခဲ့တာ” လို့ ဒေသတွင်း သတင်းရင်းမြစ် တယောက်က ပြောပါတယ်။
လက်ရှိမှာ အစိုးတပ်ဟာ မင်းလက်ပံနဲ့ ဖလူးရွာကို သိမ်းပိုက်နိုင်ဖို့အတွက် ထိုးစစ်ဆင် တိုက်ခိုက်နေတာဖြစ်ပြီး တိုက်ပွဲအတွင်း လေကြောင်းကနေ‌ လေယာဉ်၊ ဒရုန်းတွေနဲ့ တိုက်ခိုက်မှုအပြင် လက်နက်ကြီး ပစ်ခတ်မှုတွေ နေ့စဉ်နဲ့အမျှ ပြုလုပ်နေတာ ဖြစ်တယ်လို့ သိရပါတယ်။
မနေ့ ဧပြီ ၁၈ ရက်ကလည်း ထိုင်း - မြန်မာ နယ်စပ်အနီးရှိ မင်းလက်ပံကျေးရွာမှာ ဒရုန်း ကျရောက်မှုကြောင့် နေအိမ် အလုံး ၃၀ ကျော် မီးလောင်ပျက်စီးခဲ့တယ်လို့ ‌ဒေသခံတွေက ပြောပါတယ်။
“အစိုးရစစ်ကြောင်းက ကျေးရွာထဲ ဝင်မရလို့ မနေ့၊ နေ့လယ် ၁ နာရီလောက်မှာ မင်းလက်ပံ၊ အုန်းတောရွာထိပ်ပိုင်းကို တိုက်ခိုက်ခဲ့တာလို့ သိရတယ်။ အုန်းတောမှာဖြစ်တာက ဒရုန်းကျတာ။ အိမ်တွေ တအိမ်ပြီးတအိမ် မီးကူးပြီး လောင်ကုန်တာ၊ မီးပြင်းတာ အနားတောင်မကပ်နိုင်ဘူး” လို့ ဒေသခံတယောက်က ပြောပါတယ်။
မင်းလက်ပံရွာထိပ်မှာ ကရင်အမျိုးသားအစည်းအရုံး (KNU) တပ်မဟာ (၆) လက်အောက်ခံ ကရင်အမျိုးသား လွတ်မြောက်ရေးတပ်မတော် (KNLA) တပ်ဖွဲ့တွေ အထိုင်ချဘတပ်စွဲထားတာ ဖြစ်တယ်လို့ သူက ပြောပါတယ်။
အစိုးရတပ်ဟာ ဒရုန်းနဲ့ တိုက်ခိုက်မှု မပြုလုပ်ခင် မနေ့ မနက် ၁၀ နာရီလောက်မှာလည်း အုန်းတောရွာရဲ့ နှစ်ရွာကျော်ကို လေကြောင်းတိုက်ခိုက်မှု ပြုလုပ်ခဲ့သေးတယ်လို့ သိရပါတယ်။
ဒါအပြင် ပြီးခဲ့တဲ့ ဧပြီ ၁၃ ရက်ကနေ ၁၆ ရက်အတွင်း မင်းလက်ပံကျေးရွာအနီးမှာ အစိုးရတပ်နဲ့ KNU ပူးပေါင်းတပ်တွေ တိုက်ပွဲဖြစ်ပွားခဲ့ပြီး အစိုးရတပ်ဘက်က လက်နက်ကြီး၊ ဒရုန်း တိုက်ခိုက်မှုကြောင့် နေအိမ် အလုံး ၃၀ နီးပါး မီးလောင်ပျက်စီးခဲ့တယ်လို့ သိရပါတယ်။
တိုက်ပွဲတွေကြောင့် မင်းလက်ပံ၊ ဖလူး အပါအဝင် အနီးအနား ကျေးရွာတွေနဲ့ ဝေါလေဘက်မှ ဒေသခံတွေဟာ သောင်ရင်းမြစ် ကမ်းအစပ်တွေနဲ့ ထိုင်းနိုင်ငံဘက်ခြမ်းကို စစ်ဘေး တိမ်းရှောင်နေကြရတယ်လို့ သိရပါတယ်။
မြဝတီမြို့နယ်မှာ မင်းလက်ပံ၊ ဖလူးကျေးရွာအပြင် ရသေ့ဂူနဲ့ ဝေါလေဗျူဟာကုန်းတို့မှာလည်း ပြီးခဲ့တဲ့ မတ်လအတွင်းကစပြီး အစိုးရတပ်နဲ့ ဒေသတွင်း လက်နက်ကိုင်တပ်တွေကြား တိုက်ပွဲတွေ ပြင်းထန်နေခဲ့တာ ဖြစ်တယ်လို့ သိရပါတယ်။

ကော့ကရိတ်မြို့တွင် ဧပြီ ၁၈ ရက်မှစ၍ လျှပ်စစ်မီးပြန်လည်ရရှိ

ကရင်ပြည်နယ်၊ ကော့ကရိတ်မြို့တွင် နိုင်ငံရေးအခြေ အနေများကြောင့် လျှပ်စစ်ဓာတ်အားပြတ်တောက်မှုများဖြစ်ပေါ်ခဲ့ရာမှ ပြန်လည်တည်ငြိမ်လာချိန်၌ ကော့ကရိတ်မြို့အားပြန်လည်ထူထောင်ရေးလုပ်ငန်းများဆောင်ရွက်ချိန်တွင် လျှပ်စစ်မီးပြန်လည်ရရှိရေးအတွက်လည်းဆောင်ရွက်ခဲ့ကြကြောင်း သိရသည်။
ထို့ကြောင့် မတ် ၂၆ ရက်မှစကာ ကော့ကရိတ်မြို့၌ လျှပ်စစ်မီးသွယ်တန်းရရှိခဲ့ပြီး ယမန်နေ့ ဧပြီ ၁၈ ရက်က တပ်ရင်း၊ တပ်ဖွဲ့၊ ဌာန၊ အဖွဲ့(၃၉)ဖွဲ့နှင့် နေအိမ်(၂၁၀) အိမ် လျှပ်စစ်ဓာတ်အားရရှိခဲ့ကြောင်း သိရသည်။
ထို့ပြင် ကျန်ရှိသည့်နေရာများ၌ လျှပ်စစ်ဓာတ်အားပြန်လည်ရရှိရေးအတွက် ယနေ့ ဧပြီ ၁၉ ရက်တွင်လည်း လျှပ်စစ်မီးရရှိရေးလုပ်ငန်းများကို ဆက်လက်ဆောင်ရွက်လျက်ရှိကြောင်း သိရသည်။

တရုတ်နိုင်ငံတွင် စွန့်ပစ်အမှိုက်မျိုးစုံမှ နှစ်စဉ်လျှပ်စစ် ဓာတ်အားယူနစ်သန်းပေါင်း(၁,၂၀၀)ကျော်ခန့် ထုတ်လုပ်သည့်စက်ရုံအား လျှပ်စစ်နှင့် စွမ်းအင်ဝန်ကြီးဌာန ပြည်ထောင်စုဝန်ကြီး ဦးကိုကိုလွင်လေ့လာ

တရုတ်နိုင်ငံမှ နည်းပညာဆိုင်ရာအဖွဲ့များ မြန်မာနိုင်ငံသို့စေလွှတ်၍ ကွင်းဆင်းလေ့လာခြင်းများဆောင်ရွက်ပေးရန်ဆွေးနွေး
လျှပ်စစ်နှင့် စွမ်းအင်ဝန်ကြီးဌာန ပြည်ထောင်စုဝန်ကြီးဦးကိုကိုလွင်သည် ဧပြီ ၁၈ ရက်က တရုတ်နိုင်ငံ၊ ကွမ်ကျိုးမြို့ရှိ စွန့်ပစ်အမှိုက်မျိုးစုံမှ လျှပ်စစ်ဓာတ်အား ထုတ်လုပ်သည့် GRANDTOP Fushan Circular Economic Industrial Park အား ကြည့်ရှုလေ့လာခဲ့သည်။
ကုမ္ပဏီတာဝန်ရှိသူများက Industrial Park အတွင်း စွန့်ပစ်အမှိုက်မျိုးစုံမှ လျှပ်စစ်ဓာတ်အားထုတ်လုပ်နိုင်ရန် အမှိုက်များအမျိုးအစားခွဲခြား၍ သိမ်းဆည်းခြင်း၊ သယ်ယူပို့ဆောင်ခြင်းဆောင်ရွက်သည့်လုပ်ငန်းစဉ်များ၊ အမှိုက်မှလျှပ်စစ်ဓာတ်အားထုတ်လုပ်ခြင်းအ တွက်ဆောင်ရွက်လျက်ရှိသည့် လုပ်ငန်းစဉ်အဆင့်ဆင့်၊ စက်ရုံမှထွက်ရှိလာသည့် လျှပ်စစ်ဓာတ်အားများကို ဓာတ်အားဖြန့်ဖြူးရေးလိုင်းများမှတစ်ဆင့် National Grid သို့ ဖြန့်ဖြူးခြင်းလုပ်ငန်းစဉ်များကို ရှင်းလင်းတင်ပြခဲ့သည်။
ထို့ပြင် စက်ရုံ၏ Control Room မှ စံသတ်မှတ်ချက်များနှင့် ကိုက်ညီမှု ရှိ/မရှိ စောင့်ကြည့်ထိန်းကျောင်းခြင်းဆောင်ရွက်နေမှုတို့ကိုလည်း ရှင်းလင်းတင်ပြခဲ့ကြသည်။
ထို့နောက် ပြည်ထောင်စုဝန်ကြီးက သိရှိလိုသည်များကို ပြန်လည်မေးမြန်းဆွေးနွေးပြီး စက်ရုံသို့စေလွှတ်၍ လေ့လာသင်ကြားပေးနိုင်ရန်နှင့် တရုတ်နိုင်ငံမှ နည်းပညာဆိုင်ရာအဖွဲ့များ မြန်မာနိုင်ငံသို့စေလွှတ်၍ ကွင်းဆင်းလေ့လာခြင်းများဆောင်ရွက်ပေးနိုင်ရန် ဆွေးနွေးပြောကြားခဲ့သည်။
အဆိုပါ GRANDTOP Fushan Circular Economic Industrial Park ရှိ Guangzhou Waste to Energy Power Plant သည် တရုတ်နိုင်ငံတွင် အမှိုက်မှ လျှပ်စစ်ဓာတ်အားထုတ်လုပ်သည့် အကြီးဆုံးစက်ရုံဖြစ်ပြီး စက်စွမ်းအားမှာ နေ့စဉ် အမှိုက်တန်(၉,၃၀၀)၊ နှစ်စဉ်အမှိုက်တန်(၃ ဒသမ ၁)သန်းတို့မှ နှစ်စဉ်လျှပ်စစ်ဓာတ်အား ယူနစ်သန်းပေါင်း(၁,၂၀၀)ကျော်ခန့်ထုတ်လုပ်၍ National Grid သို့ ဖြန့်ဖြူးရောင်းချပေးလျက်ရှိသည်။

မြစ်ကြီးနားမြို့ရှိ လျှပ်စစ်ဌာနနှင့် ရပ်ကွက်အုပ်ချုပ်ရေးမှူးရုံးများတွင် လျှပ်စစ်မီးအားသွင်းခြင်းဝန်ဆောင် မှုလုပ်ငန်းများဆောင်ရွက်ပေးနေ

ကချင်ပြည်နယ်၊ မြစ်ကြီးနားမြို့ရှိ လျှပ်စစ်ဌာနနှင့် ရပ် ကွက်အုပ်ချုပ်ရေးမှူးရုံးများတွင် လျှပ်စစ်မီးအားသွင်းခြင်းဝန်ဆောင်မှုလုပ်ငန်းများကို နေ့စဥ် ဆောင်ရွက်ပေးလျက်ရှိကြောင်း သိရသည်။
မြစ်ကြီးနားမြို့၊ ရန်ကြီးအောင်ရပ်ကွက်ရှိ မီးစက်ဝင်း၊ မြို့သစ်ရပ်ကွက်ရှိ ဘူးဂါးလျှပ်စစ်ဓာတ်အားဖြန့်ဖြူးရေးလုပ်ငန်းပိုင် အရေးပေါ်မီးပျက်တိုင်ကြားရန်ဌာန၊ ပြည်နယ်လျှပ်စစ်အင်ဂျင်နီယာရုံးဝင်းအတွင်းတို့၌ လျှပ်စစ်မီးအားသွင်းခြင်းဝန်ဆောင်မှုလုပ်ငန်းများကိုဆောင်ရွက်ပေးလျက်ရှိခြင်းဖြစ်ကြောင်း သိရသည်။
ထိုသို့ ဝန်ဆောင်မှုပေးနေသည့်နေရာများအား ကချင် ပြည်နယ်ဝန်ကြီးချုပ်ဦးခက်ထိန်နန်မှ ဧပြီ ၁၈ ရက်ည နေပိုင်းကသွားရောက်၍ နေ့စဉ် လျှပ်စစ်မီးဖြင့် အသုံး ပြုသည့် EV ဆိုင်ကယ်၊ ဖုန်း၊ Power Bank များ၊ အားသွင်းမီးသီး/မီးလုံးများအားဖြည့်သွင်းနိုင်ရန် ပလပ်ခုံများပြုလုပ်ထားမှု၊ လျှပ်စစ်မီးအားသွင်းသုံးစွဲနိုင်ရေး မီးစက်ဖြင့် အားသွင်းပလပ်ခုံများပြုလုပ်၍ ဝန်ဆောင် မှုပေးနေမှု၊ လျှပ်စစ်ဓာတ်အားဖြည့်သွင်းနေမှုတို့ကိုကြည့်ရှုစစ်ဆေးခဲ့ကြောင်း သိရသည်။
ထို့ပြင် မြေမြင့်ရပ်ကွက်၊ ရမ်ပူရပ်ကွက်၊ အောင်နန်းရပ် ကွက်တို့ရှိ ရပ်ကွက်အုပ်ချုပ်ရေးမှူးရုံးများတွင်လည်း မီးစက်များအသုံးပြု၍ လျှပ်စစ်အားသွင်းနိုင်ရေးစီစဉ်ပေးထားမှုကို ပြည်နယ်ဝန်ကြီးချုပ်ကကြည့်ရှုစစ်ဆေးပြီး ရပ်ကွက်အုပ်ချုပ်ရေးမှူးရုံးများအတွက် (၈ ပေ×၄ ပေ)ဆိုလာပြားနှင့် 1800W ရှိ Power Station တစ်စုံစီ(စုစုပေါင်း ၁၈ စုံ)ကိုထောက်ပံ့ပေးအပ်ခဲ့ကြောင်း သိရသည်။
ကချင်ပြည်နယ်အစိုးရအဖွဲ့မှ ပြည်နယ်အတွင်း အဓိကလျှပ်စစ်မီးဖြန့်ဝေပေးနေသည့် ချီဖွေငယ်ရေအားလျှပ် စစ်စက်ရုံပြုပြင်ထိန်းသိမ်းခြင်းလုပ်ငန်းများဆောင် ရွက်နေသည့် ရက်သတ္တပတ်နှစ်ပတ်တာကာလအတွင်း ပြည်သူများ လျှပ်စစ်မီးနှင့် ရေအခက်အခဲဖြစ်ပေါ်မှု လျော့နည်းစေရေးအတွက် လုပ်ငန်းစီမံချက်ဖြင့်ဆောင် ရွက်ပေးလျက်ရှိကြောင်း သိရသည်။