ဖလမ်းမြို့နယ်တွင် ၂၀၂၆-၂၀၂၇ ပညာသင်နှစ်အ တွက် Placement Test စာမေးပွဲအား ကျောင်းသား/သူ(၂၀၅)ဦးဝင်ရောက်ဖြေဆို

ချင်းပြည်နယ်၊ ဖလမ်းမြို့နယ်တွင် ၂၀၂၆-၂၀၂၇ ပ ညာသင်နှစ်အတွက် Placement Test စာမေးပွဲကို ယနေ့ ဩဂုတ် ၉ ရက်က အ.ထ.က(၂)၌ ကျင်းပရာ ကျောင်းသား/သူ(၂၀၅)ဦးဝင်ရောက်ဖြေဆိုခဲ့ကြကြောင်း သိရသည်။
မူလတန်းအဆင့် အဆင့်(၂)ဖြေဆိုသူ(၂၁)ဦး၊ အလယ်တန်းအဆင့် အဆင့်(၁)ဖြေဆိုသူ(၇)ဦး၊ အလယ်တန်းအဆင့် အဆင့်(၂)ဖြေဆိုသူ(၁၀)ဦး၊ အလယ်တန်းအဆင့် အဆင့်(၃)ဖြေဆိုသူ(၁၆၇)ဦးရှိကြောင်း သိရသည်။
အဆိုပါ Placement Test စာမေးပွဲအား မူလတန်းအဆင့် ကျောင်းမနေဖူးသည့်ကလေးများအတွက် အဆင့် (၁)စာမေးပွဲ၊ G-3 အောင်မြင်ပြီးသည့် ကျောင်းသား/သူ များအတွက် အဆင့်(၂)စာမေးပွဲ၊ G-5 အောင်မြင်သည့်ကျောင်းသား/သူများအတွက် အဆင့်(၁)စာမေးပွဲ၊ G-6 အောင်မြင်သည့် ကျောင်းသား/သူများအတွက် အဆင့် (၂)စာမေးပွဲနှင့် G-7၊ G-8 အောင်မြင်သူများနှင့် G-9 တက်ရောက်သည့် ကျောင်းသား/သူများအတွက် အ ဆင့်(၃)စာမေးပွဲအဖြစ်ကျင်းပခဲ့ကြောင်း သိရသည်။

မုဒုံမြို့နယ်တွင် နိုင်ငံတကာအဆင့်မီအပြည်ပြည်ဆိုင်ရာလေယာဉ်ကွင်းသစ်တည်ဆောက်မည်

မွန်ပြည်နယ်၊ မုဒုံမြို့နယ်အတွင်းရှိ မြေဧက ၃,၂၈၅ ကျော်တွင် နိုင်ငံတကာအဆင့်မီအပြည်ပြည်ဆိုင်ရာလေယာဉ်ကွင်းသစ်တည်ဆောက်မည်ဖြစ်ကြောင်း
ပြည်ထဲရေးဝန်ကြီးဌာနက အမိန့်ကြော်ငြာစာ ထုတ်ပြန်ကြေညာထားကြောင်း သိရသည်။
ပြည်ထဲရေးဝန်ကြီးဌာန၏ အမိန့်ကြော်ငြာစာ (၄၂၇/၂၀၂၆) ကို ၁၃၈၈ ခုနှစ်၊ ကဆုန်လပြည့်ကျော် ၁၄ ရက်၊ ၂၀၂၆ ခုနှစ် မေလ ၁၄ ရက်တွင် ထုတ်ပြန်ခဲ့ခြင်းဖြစ်သည်။
၁၈၉၄ ခုနှစ်၊ မြေသိမ်းအက်ဥပဒေ ပုဒ်မ ၄၊ ပုဒ်မခွဲ (၁) အရ မြေဧက ၃,၂၈၅ ဒသမ ၃၁ ကို အများပြည်သူအကျိုးငှာ လေကြောင်းပို့ဆောင်ရေးညွှန်ကြားမှုဦးစီးဌာနမှ နိုင်ငံတကာအဆင့်မီ အပြည်ပြည်ဆိုင်ရာ လေယာဉ်ကွင်းအသစ် တည်ဆောက်ရေးစီမံကိန်းတွင် ပင်မလေယာဉ်ကွင်းနှင့် လေယာဉ်ကွင်းအဝင်လမ်းမြေအဖြစ် အသုံးပြုရန် ပို့ဆောင်ရေးဝန်ကြီးဌာနက အလိုရှိခြင်းဖြစ်ကြောင်း အမိန့်ကြော်ငြာစာတွင် ဖော်ပြထားသည်။
အဆိုပါမြေများမှာ မုဒုံမြို့နယ်ရှိ တော်ကူးကျေးရွာအုပ်စု၊ ကျိုက်ရွဲကျေးရွာအုပ်စု၊ ညောင်ကုန်းကျေးရွာအုပ်စု၊ ဘဲရမ်းကျေးရွာအုပ်စုနှင့် ဝက်တဲကျေးရွာအုပ်စုတို့မှ မြေများဖြစ်ပြီး စုစုပေါင်း ကျေးရွာအုပ်စု ၅ ခု၊ ကွင်းပေါင်း ၁၄ ကွင်းနှင့် ဦးပိုင်ပေါင်း ၄၉၁ ခု ပါဝင်ကြောင်း သိရသည်။
အဆိုပါ စီမံကိန်းအကောင်အထည်ဖော်ပြီးစီးပါက မွန်ပြည်နယ်အတွင်း အပြည်ပြည်ဆိုင်ရာလေကြောင်းဆက်သွယ်ရေးနှင့် လေကြောင်းပို့ဆောင်ရေးကဏ္ဍ ဖွံ့ဖြိုးတိုးတက်လာနိုင်မည်ဖြစ်ပြီး ဒေသတွင်း သယ်ယူပို့ဆောင်ရေးနှင့် စီးပွားရေးလုပ်ငန်းများလည်း တိုးတက်လာမည်ဖြစ်ကြောင်း သိရသည်။

ဒုဋ္ဌဝတီတံတားအသစ်ကို မြန်မာနိုင်ငံတွင် ပထမဦးဆုံးအဖြစ် ငလျင်ဒ-ဏ်ခံ EradiQuake Bearing တပ်ဆင်၍ ၂၀၂၆ နှစ်ကုန်မတိုင်မီ အပြီးဆောက်မည်

ရန်ကုန်-မန္တလေး အမြန်လမ်းမကြီး မိုင်တိုင်အမှတ် (၃၅၈/၁) ရှိ ဒုဋ္ဌဝတီတံတားအသစ်ကို မြန်မာနိုင်ငံတွင် ပထမဦးဆုံးအဖြစ် ငလျင်ဒ-ဏ်ခံ EradiQuake Bearing တပ်ဆင်ကာ ၂၀၂၆ ခုနှစ် နှစ်ကုန်မတိုင်မီ အပြီးတည်ဆောက်သွားမည်ဖြစ်ကြောင်း ဆောက်လုပ်ရေးဝန်ကြီးဌာနမှ သိရသည်။
ဆောက်လုပ်ရေးဝန်ကြီးဌာန ဒုတိယဝန်ကြီးနှင့် အဖွဲ့သည် အဆိုပါ ဒုဋ္ဌဝတီတံတားအသစ် တည်ဆောက်ရေးလုပ်ငန်းခွင်သို့ ယနေ့ (ဩဂုတ် ၉ ရက်)နံနက်ပိုင်းက သွားရောက်ကြည့်ရှုစစ်ဆေးခဲ့သည်။
ယင်းသို့စစ်ဆေးစဉ် ဒုတိယဝန်ကြီးက အဆိုပါတံတားအား Steel Box Girder နှင့် ကြိုတင်အားဖြည့် ကွန်ကရစ်ရက်မ အမျိုးအစားဖြင့် တည်ဆောက်နေခြင်းဖြစ်ပြီး Myanmar National Building Code 2025 ပါ ငလျင်ဒ-ဏ်ခံစံနှုန်းများအတိုင်း တွက်ချက်ထားကြောင်း ပြောကြားခဲ့သည်။
ထို့ပြင် ပင်မတံတားတွင် EradiQuake Bearing နှင့် ချဉ်းကပ်တံတားတွင် High Damping Rubber Bearing (HDR များကို အသုံးပြုထားကာ အပြန်လမ်းဘက်မှ ၂ လမ်းသွားတံတားကို ၂၀၂၆ နှစ်ကုန်မတိုင်မီ အပြီးဆောက်လုပ်ရန် ညွှန်ကြားခဲ့သည်။
ထို့အပြင် ဒုတိယဝန်ကြီးနှင့်အဖွဲ့သည် ရန်ကုန်-မန္တလေး အမြန်လမ်းမကြီးပေါ်ရှိ စကားအင်းတိုးလ်ဂိတ်၌ လမ်းအသုံးပြုခ ကောက်ခံမှုများနှင့် တံတားဦး အပြည်ပြည်ဆိုင်ရာ လေဆိပ်အဝင်လမ်းပေါ်ရှိ ၈၀ ပေ တံတားအမှတ် (၃/၅) တည်ဆောက်ရေးလုပ်ငန်းခွင်တို့ကိုပါ သွားရောက်ကြည့်ရှုစစ်ဆေးခဲ့ကြောင်း သိရသည်။

ဧရာဝတီအက်ဖ်စီ ၃-၀ ဖြင့် ရှမ်းယူနိုက်တက်ကို အနိုင်ယူပြီး ရာသီဝက်ကို Clean Sheet ဖြင့် အဆုံးသတ်

မြန်မာအမျိုးသမီးလိဂ် ၂၀၂၆-၂၀၂၇ ရာသီပွဲစဉ် (၉) ရာသီဝက်နောက်ဆုံးပွဲစဉ်အဖြစ် ဧရာဝတီအက်ဖ်စီနှင့် ရှမ်းယူနိုက်တက်အက်ဖ်စီတို့ ယနေ့ညနေပိုင်းက သုဝဏ္ဏအားကစားကွင်း၌ ယှဉ်ပြိုင်ကစားခဲ့ရာ လက်ရှိချန်ပီယံ ဧရာဝတီအက်ဖ်စီက ရှမ်းယူနိုက်တက်အက်ဖ်စီကို ၃-၀ ဂိုးဖြင့် ပြတ်ပြတ်သားသား အနိုင်ရရှိခဲ့သည်။
ဧရာဝတီအက်ဖ်စီအတွက် အနိုင်ဂိုးများကို မေထက်လူနှင့် နန်းခိုင်ဇင်မြင့်တို့က တစ်ဂိုးစီ သွင်းယူခဲ့ပြီး ကျန်တစ်ဂိုးမှာ ရှမ်းယူနိုက်တက် ကစားသမား ခိုင်သဇင်၏ ကိုယ့်ဂိုးကိုယ် သွင်းမိမှုမှ ရရှိခဲ့ခြင်းဖြစ်သည်။
ဧရာဝတီအက်ဖ်စီသည် တိုက်စစ်နှင့် ခံစစ်ပိုင်း၌ ထိရောက်စွာ ကစားနိုင်ခဲ့ပြီး ရှမ်းယူနိုက်တက်ကို ဂိုးမပေးရဘဲ အနိုင်ရရှိခဲ့သည့်အတွက် ရာသီဝက်နောက်ဆုံးပွဲစဉ်ကို Clean Sheet နိုင်ပွဲဖြင့် အဆုံးသတ်နိုင်ခဲ့သည်။
ရှမ်းယူနိုက်တက်အက်ဖ်စီအနေဖြင့် ယခင်ပွဲစဉ်များတွင် ရလဒ်ကောင်းများ ရရှိထားသော်လည်း ဧရာဝတီအက်ဖ်စီနှင့်တွေ့ဆုံသည့် ရာသီဝက်နောက်ဆုံးပွဲတွင် ၃-၀ ဂိုးဖြင့် ရှုံးနိမ့်ခဲ့သည်။
ယင်းနိုင်ပွဲကြောင့် ဧရာဝတီအက်ဖ်စီ သည် လက်ရှိချန်ပီယံဆုကို ကာကွယ်ရန် အမှတ်ပေးဇယားထိပ်ပိုင်းတွင် ဆက်လက်ဖိအားပေးနိုင်မည့် အခြေအနေကို ရရှိထားသည်။
မြန်မာအမျိုးသမီးလိဂ် ၂၀၂၆-၂၀၂၇ ရာသီ၏ ရာသီဝက်ပွဲစဉ်များအပြီးတွင် အသင်းများအနေဖြင့် ဒုတိယအကျော့ပွဲစဉ်များအတွက် ဆက်လက်ပြင်ဆင်သွားရမည်ဖြစ်သည်။

အဲမွီနှင့် သန့်ဇင်တို့ ၅ ချီပြည့် ထိုးသတ်ပြီး ပူးတွဲသရေဖြင့် ပွဲပြီးဆုံး

(၁၁) ကြိမ်မြောက် မြန်မာ့ရိုးရာလက်ဝှေ့ကမ္ဘာ့ချန်ပီယံပြိုင်ပွဲကြီး(11th Myanmar Lethwei World Championship- MLWC 11) ၏ စတုတ္ထတွဲဆိုင်းအဖြစ် ယှဉ်ပြိုင်ခဲ့သည့် ၆၀ ကီလိုတန်း လက်ဝှေ့ပွဲတွင် အဲမွီ (အဲကညော) နှင့် သန့်ဇင် (Python Taw Win Ayar) တို့ ပူးတွဲသရေ ရရှိခဲ့သည်။
အဆိုပါပွဲစဉ်တွင် အဲမွီ (အဲကညော) ကို အနီရောင်ထောင့်မှ ကိုယ်စားပြုကာ သန့်ဇင် (Python Taw Win Ayar) က အပြာရောင်ထောင့်မှ ပါဝင်ယှဉ်ပြိုင်ခဲ့ကြသည်။
နှစ်ဦးစလုံး အပြန်အလှန် ထိုးသတ်ယှဉ် ပြိုင်ခဲ့ကြပြီး သတ်မှတ်ထားသည့် ၅ ချီပြည့်သည်အထိ ဆက်လက်ထိုးသတ်ခဲ့သော်လည်း အနိုင်အရှုံးခွဲခြားနိုင်ခြင်းမရှိသဖြင့် ပူးတွဲသရေ ရလဒ်ဖြင့် ပွဲပြီးဆုံးခဲ့ခြင်းဖြစ်သည်။
ယင်းပွဲသည် MLWC 11 ပြိုင်ပွဲ၏ စတုတ္ထတွဲဆိုင်း ၆၀ ကီလိုတန်း ပွဲစဉ်တစ်ပွဲဖြစ် သည်။

ဧရာဝတီတိုင်းမှ တက္ကသိုလ်များကို နိုင်ငံတော်သမ္မတ ဦးမင်းအောင်လှိုင် စစ်ဆေး

အရေအတွက်များများသင်ကြားပေးခြင်းထက် အရည်အသွေးပြည့်ဝသည့် သင်တန်းဆင်းများပေါ်ထွက်ရေးကိုအလေးထားဆောင်ရွက်ရန် နိုင်ငံတော်သမ္မတက မှာကြားခဲ့
နိုင်ငံတော်သမ္မတ ဦးမင်းအောင်လှိုင်သည် ယနေ့ သြဂုတ် ၉ ရက်နံနက်ပိုင်းက ဧရာဝတီတိုင်း၊ ဟင်္သာတမြို့၊ မအူပင်မြို့နှင့် ပုသိမ်မြို့တို့ရှိ တက္ကသိုလ်များအားကြည့်ရှုစစ်ဆေးခဲ့ကြောင်း သိရသည်။
ဟင်္သာတတက္ကသိုလ်အားကြည့်ရှုစစ်ဆေးစဥ် တက္က သိုလ်၏ ဥပဓိရုပ်ကောင်းမွန်စေရေးနှင့် ကျောင်းပရိဝုဏ်သန့်ရှင်းသာယာလှပမှုရှိစေရေးစဉ်ဆက်မပြတ် ဆောင်ရွက်ရန်၊ ကျောင်းဝန်းအတွင်းရှိ သစ်ပင်ကြီးများအား အောက်ခြေရှင်းအလင်းဖွင့်ခြင်းလုပ်ငန်းများ ဆောင်ရွက်ရန်မှာကြားခဲ့ကြောင်း သိရသည်။
ထို့ပြင် မအူပင်မြို့ရှိ စိုက်ပျိုးရေးနှင့် မွေးမြူရေးတက္ကသိုလ်(မအူပင်)ကိုကြည့်ရှုစစ်ဆေးစဥ် စိုက်ပျိုးရေး၊ မွေးမြူရေးဆိုင်ရာများနှင့်ပတ်သက်၍ မဟာဘွဲ့သင် တန်းများသင်ကြားပေးနိုင်ရေးအတွက် စနစ်တကျစီမံပြီးမှသာဆောင်ရွက်ရန် မှာကြားသည်။
အရည်အချင်းနှင့် ထူးချွန်ထက်မြက်သည့် သင်တန်း ဆင်းပညာရှင်များထွက်ပေါ်လာစေရေး၊ နိုင်ငံတော်အတွက်အကျိုးပြုမည့် စိုက်ပျိုးမွေးမြူရေးဆိုင်ရာ ပညာရှင်များထွက်ပေါ်လာစေရေး စနစ်တကျသင်ကြားလေ့ ကျင့်ပေးရန်၊ အရေအတွက်များများ သင်ကြားပေးခြင်းထက် အရည်အသွေးပြည့်ဝသည့် သင်တန်းဆင်းများ ပေါ်ထွက်ရေးကို အလေးထားဆောင်ရွက်ရန်မှာကြားခဲ့ကြောင်း သိရသည်။
တက္ကသိုလ်အတွင်း အခြေခံအဆောက်အဦ လိုအပ်ချက်များနှင့်ပတ်သက်၍ နှစ်အလိုက်စနစ်တကျလျာ ထား၍ တည်ဆောက်ရေးလုပ်ငန်းများကို နှစ်စဉ်ဖြည့်ဆည်းဆောင်ရွက်ရန်မှာကြားပြီနောက် တက္ကသိုလ်ပရိဝုဏ်နှင့် ကျောင်းဆောင်သစ်တည်ဆောက်နေမှုများအား မော်တော်ယာဉ်များအား ကြည့်ရှုစစ်ဆေးခဲ့ကြောင်း သိရသည်။
နိုင်ငံတော်သမ္မတသည် ဩဂုတ် ၈ ရက်ကလည်း နည်းပညာတက္ကသိုလ်(ပုသိမ်)နှင့် ပုသိမ်တက္ကသိုလ်တို့ကိုလည်းကြည့်ရှုစစ်ဆေးပြီး တက္ကသိုလ်အဆင့်နှင့်လျော်ညီသည့် သန့်ရှင်းသာယာလှပမှုများဖြစ်စေရေးဆောင် ရွက်ရန်၊ တက္ကသိုလ်အတွင်းအုံ့ဆိုင်းလျက်ရှိသည့် သစ်ပင်ကြီးများအား အလင်းဖွင့်ခုတ်ထွင်ရှင်းလင်းရန်မှာ ကြားခဲ့ကြောင်း သိရသည်။

တာတမံနိမ့်ကျမှုကြောင့် ရေတိုက်စားမှုကာကွယ်ခြင်းနှင့် ရေနက်ရေစီးကြောင်းပိတ်ဆို့နိုင်ရေးလုပ်ငန်းဆောင်ရွက်နေမှုအား နိုင်ငံတော်သမ္မတ ဦးမင်းအောင်လှိုင် ကြည့်ရှုစစ်ဆေး

ဧရာဝတီတိုင်း၊ လေးမျက်နှာမြို့နယ်တွင် မိုးသည်းထန်စွာရွာသွန်းမှုများကြောင့် ငဝန်မြစ်ရေကာတာ၏ အောက်ခံမြစ်ကျိုးအင်းသဲကြောမှထူးပေါက်၍ ရေဖြတ်သန်းစီးဆင်းမှုကြောင့် တာတမံနိမ့်ကျမှုဖြစ်ပွားခဲ့ကြောင်း သိရသည်။
ထိုသို့ ဖြစ်ပွားမှုကြောင့် လေးမျက်နှာမြို့ပေါ်ရပ်ကွက်များနှင့် ပတ်ဝန်းကျင်ကျေးရွာများ၊ ဟင်္သာတမြို့နယ်၊ ရေ ကြည်မြို့နယ်နှင့် ကျုံပျော်မြို့နယ်တို့ရှိ ကျေးရွာများ၌ရေဝင်ရောက်မှုနှင့် ရေကြီးရေလျှံမှုများဖြစ်ပွားခဲ့သဖြင့် ကူညီကယ်ဆယ်ရေးလုပ်ငန်းများကို နိုင်ငံတော်အစိုးရ၊ တပ်မတော်နှင့် လုံခြုံရေးအဖွဲ့ဝင်များ၊ ဌာနဆိုင်ရာတာဝန်ရှိသူများ၊ လူမှုရေးအသင်းအဖွဲ့များ၊ စေတ နာရှင်များစုပေါင်းဆောင်ရွက်ပေးလျက်ရှိကာ ရေဘေးသင့်သူများကို ယာယီရေဘေးရှောင်နေရာများသို့ပို့ ဆောင်နေရာချထားပေးလျက်ရှိကြောင်း သိရသည်။
အဆိုပါ ဆောင်ရွက်ပေးနေမှုများကို နိုင်ငံတော်သမ္မတ ဦးမင်းအောင်လှိုင်က သြဂုတ် ၉ ရက်နံနက်ပိုင်းတွင် ငဝန်မြစ်ရေကာတာ တမံနိမ့်ကျမှုကြောင့် ရေကျော်စီးဝင်၍ ရေဘေးသင့်ခဲ့ရသည့်ဒေသများရှိ ကျေးရွာများ၊ လူနေအဆောက်အဦများအတွင်း ရေဝင်ရောက်နေမှုနှင့် ယာယီရေဘေးရှောင်နေရာများသို့ ပြောင်းရွှေ့ပေးထားမှု၊ စိုက်ပျိုးမြေများတွင် ရေဝင်ရောက်သဖြင့် ထိခိုက်ပျက်စီးနေမှုတို့ကိုကြည့်ရှုစစ်ဆေးခဲ့ကြောင်း သိရသည်။
ထိုသို့ ကြည့်ရှုစစ်ဆေးပြီးနောက် ရေဘေးသင့်သူများ၏ လတ်တလောစားဝတ်နေရေးနှင့် ပြန်လည်ထူထောင်ရေးကိုအလေးထားဆောင်ရွက်ရန်၊ အလားတူ သဘာဝဘေးအန္တရာယ်များထပ်မံကြုံတွေ့လာပါက ထိခိုက်ဆုံးရှုံးမှုအနည်းဆုံးဖြစ်စေရေးအတွက် ကြိုတင်ကာကွယ်ရေးလုပ်ငန်းများကို စနစ်တကျဆောင်ရွက်ထားရန်မှာကြားခဲ့ကြောင်း သိရသည်။
ထို့နောက် နိုင်ငံတော်သမ္မတသည် ငဝန်မြစ်ရေကာတာ တာမိုင်(၂၅/၃)တွင် တာတမံနိမ့်ကျမှုဖြစ်ပေါ်ခဲ့သည့်နေရာ၌ တမံရေတိုက်စားမှုကာကွယ်ခြင်းနှင့် ရေနက်ရေစီးကြောင်းပိတ်ဆို့နိုင်ရေးအ တွက် ရေတိုက်စားမှုလျော့ကျစေရန် ကမ်းပြိုကာကွယ်ရေးသုံးပိတ်စအိတ် Geo Bag များချခြင်း၊ Geo Bag ဖြင့် ရေလွှဲရေကာပြုလုပ်ခြင်း၊ တာတမံရေထိမျက်နှာပြင်လျှောစောက်အား Geo Texile အစများ၊ Geo Bagများဖြင့်ကာကွယ်ခြင်းပြုလုပ်နေမှုတို့ကိုကြည့်ရှုစစ်ဆေးခဲ့ကြောင်း သိရသည်။
ထို့ပြင် ရေနက်ရေစီးလမ်းကြောင်းအား ဆက်လက်ပိတ်ဆို့နိုင်ရေးအတွက် သဲအပြည့်ဖြည့်ထားသော Geo Bag အိတ်ကြီးများနှင့် သဲအိတ်များကို နိုင်လွန်ပိုက်ကြိုးဖြင့်စုစည်းထုပ်ပိုး၍ ရေယာဉ်များ၊ သဲစုပ်သင်္ဘောများဖြင့်ချခြင်း၊ ရေစီးလမ်းကြောင်းတားဆီးနိုင်ရေး Steel Sheep Pile ရိုက်နေခြင်းတို့ကိုကြည့်ရှုစစ်ဆေးပြီးနောက် လုပ်ငန်းဆောင်ရွက်မှုများအမြန်ဆုံးပြီးစီးမှုရှိစေရေး စနစ်တကျဆောင် ရွက်ရန်၊ ကူညီထောက်ပံ့ရေးလုပ်ငန်းများကို မြန်မြန်ဆန်ဆန်နှင့် ထိထိရောက်ရောက်ဆောင်ရွက်ရန်မှာကြားခဲ့ကြောင်း သိရသည်။

ငဝန်ရေကာတာ တာတမံနိမ့်ကျမှုကြောင့် ဟင်္သာတမြို့ နယ်ရှိ ကျေးရွာ(၂၈)ရွာအတွင်းရေဝင်နေ ရေဘေးယာ ယီကယ်ဆယ်ရေးစခန်းများဖွင့်လှစ်ထားရ

ဧရာဝတီတိုင်း၊ လေးမျက်နှာမြို့နယ်ရှိ ငဝန်ရေကာတာ တာတမံနိမ့်ကျမှုကြောင့် ဟင်္သာတမြို့နယ်မှ ကျေးရွာ (၂၈)ရွာအတွင်းသို့ရေဝင်ရောက်မှုများဖြစ်ပေါ်လျက်ရှိရာ ရေဘေးယာယီကယ်ဆယ်ရေးစခန်းများဖွင့်လှစ်ထားရကြောင်း သိရသည်။
ရေဝင်ရောက်မှုများကြောင့် ရေဘေးယာယီကယ်ဆယ်ရေးစခန်းများကို လဟာပကျေးရွာ၊ ကညင်ငူကျေးရွာ၊ အုပ်ပုံကျေးရွာ၊ ထိန်ကုန်းကျော်ကျေးရွာတို့တွင်ဖွင့်လှစ်ထားပြီး ရေဘေးသင့်သူ(၂,၁၄၁)ဦးကိုပြောင်းရွေ့နေထိုင်လျက်ရှိကြောင်း သိရသည်။
ထို့ပြင် ကျေးရွာအုပ်စု (၁၄)စုမှ မိုးစပါးစိုက်ဧက (၁၂,၆၃၂)အတွင်းသို့လည်း ရေဝင်ရောက်မှုများဖြစ်ပေါ်လျက်ရှိကြောင်း သိရသည်။

ကျိုက်ထိုမြို့နယ်၌ လျှပ်စစ်ဓာတ်အား စနစ်တကျဖြန့်ဖြူးနိုင်ရေး ထရန်စဖော်မာနှင့် ဓာတ်အားလိုင်းများ တိုးချဲ့တည်ဆောက်

မွန်ပြည်နယ်၊ ကျိုက်ထိုမြို့နယ်အတွင်း လျှပ်စစ်ဓာတ်အား စနစ်တကျ ဖြန့်ဖြူးပေးနိုင်ရေးအတွက် ပြည်နယ်ရန်ပုံငွေဖြင့် ထရန်စဖော်မာနှင့် ဓာတ်အားလိုင်းများ တိုးချဲ့တည်ဆောက်လျက်ရှိကြောင်း သိရသည်။
မွန်ပြည်နယ် လျှပ်စစ်၊ စွမ်းအင်၊ စက်မှုနှင့် လမ်းပန်းဆက်သွယ်ရေးဝန်ကြီး ဦးဇေယျာဦးနှင့် တာဝန်ရှိသူများသည် အဆိုပါ လျှပ်စစ်ဓာတ်အား ဖြန့်ဖြူးရေးလုပ်ငန်းများ ဆောင်ရွက်နေမှုကို ယမန်နေ့က သွားရောက်ကြည့်ရှုစစ်ဆေးခဲ့သည်။
ကျိုက်ထိုမြိုနယ်အတွင်း ပြည်နယ်ရန်ပုံငွေဖြင့် အကောင်အထည်ဖော် ဆောင်ရွက်လျက်ရှိသည့် လျှပ်စစ်ဓာတ်အားဖြန့်ဖြူးရေးလုပ်ငန်းများဖြစ်သည့် စည်ပင်ရေကန်အနီးရှိ ၁၁ ကေဗွီလိုင်း ပေ ၉၀၀ အား ၁၀ မီတာ ကွန်ကရစ်တိုင် SAC 120mm² ဖြင့် အသစ်တည်ဆောက်ခြင်း၊ ၁၁/၀.၄ ကေဗွီ ၂၀၀ ကေဗွီအေ ထရန်စဖော်မာတစ်လုံး အသစ်တည်ဆောက်ခြင်းနှင့် ၄၀၀ ဗို ဓာတ်အားလိုင်း ပေ ၅၀၀ အား ၉ မီတာ ကွန်ကရစ်တိုင် Insulated Cable၊ ၄၀၀ ဗို လိုင်း ပေ ၆၀၀ အား ၁၁ ကေဗွီလိုင်းသစ်အောက်သို ပြောင်းရွှေ့ခြင်းလုပ်ငန်းများ လုပ်ဆောင်နေခြင်း ဖြစ်သည်။
ထိုပြင် ကော့စံနိုင်ရပ်ကွက် ဘောဂဇာအပိုင်းတွင် ၁၁ ကေဗွီလိုင်း ပေ ၁၇၀၀ အား ၁၀ မီတာ ကွန်ကရစ်တိုင် SAC 120mm² ဖြင့် အသစ်တည်ဆောက်ခြင်း၊ ၄၀၀ ဗို လိုင်း ပေ ၁၇၀၀ အား ၁၁ ကေဗွီ လိုင်းသစ်အောက်သို ပြောင်းရွှေ့ခြင်း၊ ၁၁/၀.၄ ကေဗွီ ၂၀၀ ကေဗွီအေ ထရန်စဖော်မာတစ်လုံး တည်ဆောက်ခြင်းနှင့် Panel ထုတ်ခြင်းလုပ်ငန်း ဆောင်ရွက်ပြီးစီးမှု အခြေအနေကို ကြည့်ရှုစစ်ဆေးခဲ့ကြောင်း သိရသည်။
ထိုနောက် သထုံမြိုမြိုတွင်း ဒေါ့ရပ်ကျေးရွာမှ စည်ပင်တိုးဂိတ်အနီးအထိ ကွန်ကရစ်တိုင်များ မီးကြိုးများ လဲလှယ်အစားထိုးတည်ဆောက်ခြင်းနှင့် ကော့ထင်းကျေးရွာတွင် ၁၁ ကေဗွီလိုင်း ပေ ၅၀၀ အား ၁၀ မီတာ ကွန်ကရစ်တိုင်ဖြင့် အသစ်တည်ဆောက်ခြင်း၊ ၁၁/၀.၄ ကေဗွီ ၂၀၀ ကေဗွီအေ ထရန်စဖော်မာတစ်လုံး တည်ဆောက်ခြင်းနှင့် ၄၀၀ ဗိုလိုင်း (၀.၅) မိုင်အား ၉ မီတာ ကွန်ကရစ်တိုင် Insulated Cable ဖြင့် တည်ဆောက်ခြင်း လုပ်ငန်းများလည်း ဆောင်ရွက်နေ‌ကြောင်း သိရသည်။

မိုးကုတ်မြို့နယ်၌ မိုးသည်းထန်စွာ ရွာသွန်းမှုကြောင့် မြေသားအိကျ၍ မြေပြိုကျမှုများ ဖြစ်ပေါ်၊
ဆည်တော်ကြီး ရေလှောင်တမံ ပိုလျှံရေ လွှဲထုတ်မှုကြောင့် မန္တလေး-သပိတ်ကျင်း-မိုးကုတ် ကားလမ်းမကြီးပေါ်သို့ ရေကျော်စီးဆင်းမှုများ ဖြစ်ပေါ်ခဲ့

မန္တလေးတိုင်းဒေသကြီး၊ မိုးကုတ်မြို့နယ်၌ ဩဂုတ် ၅ ရက်မှ ၈ ရက်အထိ မိုးသည်းထန်စွာ ဆက်တိုက်ရွာသွန်းခဲ့မှုကြောင့် ကျပ်ပြင်ရပ်ကွက် (အနောက်ဘက်ပန်းမရပ်)၊ ရွှံ့ပန်းရပ်ကွက်၊ ကျောက်ဆင်ကျေးရွာနှင့် ဘော်မားကျေးရွာတို့တွင် မြေသားအိကျ၍ မြေပြိုကျမှုများ ဖြစ်ပေါ်ခဲ့ကြောင်း သိရသည်။
အဆိုပါ မြေပြိုမှုများကြောင့် လူနေအိမ်များနှင့် အုတ်တံတိုင်းများ ပြိုကျပျက်စီးခဲ့သည့်အပြင် ကတ္တရာလမ်းများ နိမ့်ဝင်ပျက်စီးခဲ့သဖြင့် လမ်းများ ယာယီပိတ်ထားခဲ့ရသည်။
လက်ရှိတွင် တာဝန်ရှိသူများနှင့် ဒေသခံများ ပူးပေါင်း၍ ကူညီကယ်ဆယ်ရေး၊ ကျန်းမာရေးစောင့်ရှောက်ရေးနှင့် Loader ယာဉ်များဖြင့် လမ်းကြောင်းများ ပြန်လည်ပွင့်လင်းရေးအတွက် အချိန်နှင့်တစ်ပြေးညီ ဆောင်ရွက်ပေးလျက်ရှိသည်။
ထို့ပြင် မန္တလေးတိုင်းဒေသကြီးအတွင်း မိုးသည်းထန်စွာ ရွာသွန်းမှုကြောင့် မတ္တရာမြို့နယ်ရှိ ဆည်တော်ကြီး ရေလှောင်တမံအတွင်း ရေဝင်ရောက်မှု များပြားကာ စိုးရိမ်ရေမှတ်ထက် ကျော်လွန်လာခဲ့ကြောင်း သိရသည်။
သို့ဖြစ်ပါ၍ ရေလှောင်တမံအနီးရှိ ကျေးရွာများနှင့် တံငါတံတား (ကျောက်စရစ်ကုန်းတံတား) ထိခိုက်မှု မရှိစေရေးအတွက် ဩဂုတ် ၇ ရက်တွင် ပိုလျှံရေများကို ရေပိုလွှဲတံခါးကြီး ၇ ခုမှ ပျမ်းမျှ ၂ ပေခန့်စီ ဖွင့်ဖောက်၍ ရေထိန်းညှိ လျှော့ချခဲ့သည်။ ထိုသို့ လွှဲထုတ်မှုကြောင့် မတ္တရာမြို့နယ် တံငါတောင်ကျေးရွာအနီး မန္တလေး-သပိတ်ကျင်း-မိုးကုတ် ကားလမ်းမကြီးပေါ်သို့ ရေကျော်စီးဆင်းမှုများ ဖြစ်ပေါ်ခဲ့သည်။
အဆိုပါ ရေကျော်စီးဆင်းမှုကြောင့် ထိခိုက်မှုရှိခဲ့သည့် မတ္တရာမြို့နယ်၊ အထက်တောင်ကိုင်းကျေးရွာရှိ ပြည်သူများအား လုံခြုံရေးတပ်ဖွဲ့ဝင်များ၊ ဌာနဆိုင်ရာများနှင့် လူမှုရေးအသင်းအဖွဲ့များ ပူးပေါင်း၍ ရေဘေးလွတ်ရာသို့ ရွှေ့ပြောင်းပေးခြင်း၊ စားသောက်ဖွယ်ရာများ ဝေငှပေးခြင်းနှင့် ကျန်းမာရေးစောင့်ရှောက်မှုများ အချိန်နှင့်တစ်ပြေးညီ ကူညီဆောင်ရွက်ပေးလျက်ရှိကြောင်း သိရသည်။