ပုဇွန်တောင်မြို့နယ်မှာ ဂျိုးဖြူရေ မရတာ တပတ် ရှိနေလို့ မြို့နယ်အတွင်းနေထိုင်သူတွေ ​ခက်ခဲ​နေ

ရန်ကုန်၊ နိုဝင်ဘာ ၄

ရန်ကုန်မြို့တော် စည်ပင်သာယာကော်မတီက ဖြန့်ဖြူးတဲ့ ရေကိုအသုံးပြုနေရတဲ့ ပုဇွန်တောင် မြို့နယ်မှာ ဂျိုးဖြူရေ မရတာဟာ ရက်သတ္တပတ် ခုနှစ်ရက်ခန့်ရှိနေတာကြောင့် ရေအခက်ခဲကြုံနေရတယ်လို့ မြို့နယ်တွင်း နေထိုင်သူ​တွေက ဆိုပါတယ်။

ပုဇွန်တောင်မြို့နယ် ၂ ရပ်ကွက်မှာ နေထိုင်သူတဦးက ၅၆ လမ်းမှာ ‌‌ရေမရတာ ခုနှစ်ရက်ခန့်ရှိနေပြီး ရေဒုက္ခ အရမ်းရောက်နေတယ်လို့ဆိုပါတယ်။ ဒါအပြင် ရေဖျက်မယ်ဆိုတာ စည်ပင်က ကြိုတင် အကြောင်းကြားတာ မရှိတဲ့အတွက် ရေလည်း ကြိုတင် မစုဆောင်းထားနိုင်လိုက်ဖူးလို့ ဆိုပါတယ်။

ညဘက် မီးလာတဲ့အချိန်အတိုင်း ရေတင်ပေမယ့် ရေတစက်မှ မရရှိတဲ့အပြင် နေခင်းဘက် မီးစက်တွေ ရေတင်ပေမယ့်လည်း ရေမရရှိတာ ခုနှစ်ရက်ခန့်ရှိပြီးဖြစ်ကြောင်း ပုဇွန်တောင်မြို့နယ် ၅၃ လမ်းတွင်နေ ထိုင်သူ အမျိုးသမီးတဦးကဆိုပါတယ်။

ဂျိုးဖြူရေ ရယူနေတဲ့ အခြားမြို့နယ်တွေကိုစုံစမ်းမေးမြန်းတဲ့အခါ အခြားမြို့နယ်တွေကတော့ရေပုံ မှန်ရရှိနေပြီး Down Town မြို့နယ်တွေဖြစ်တဲ့ ပုဇွန်တောင်မြို့နယ်တခုတည်းသာ ရေ မလာတာကြာမြင့် နေခြင်းဖြစ်ပါတယ်။

“ရန်ကုန်မြို့မှာက မီးနဲ့ ရေက အရေးကြီးတယ်။ တိုက်ခန်းတွေနဲ့ နေကြတော့ ရေတရက် ဖျက် ရင် တရက် ဒုက္ခရောက်တယ်။ အခုရေကို ဘောက်ဆာကားတွေနဲ့ ဝယ်သုံးနေရတာ အဆင်မပြေဘူး။ ဒါတောင် နွေမရောက်သေးဘူး။ အခုက လူစီးကားမဝယ်ဘဲ ရေကားဝယ်ရမလို ဖြစ်နေတယ်။ “လို့ ပုဇွန်တောင်မြို့နယ်မှာ နေထိုင်သူတဦးကပြောပါတယ်။

ပုဇွန်တောင်မြို့နယ် ရေပြတ်ရခြင်းမှာ ဂျိုးဖြူရေပြတ်လတ်ခြင်းကြောင့် မဟုတ်ဘဲ လျှပ်စစ်မီးအချိန် နဲ့ ပေးရာကနေ အဓိကဖြန့်ဖြူးပေးတဲ့ ရေပေးဝေရေးနေရာက လျှပ်စစ်မီး လာချိန်တွင် ရေပင့်အားနဲ့ ‌ရေပေးဝေနေပေမယ့် မြို့နယ်အတွင်းရှိ ရပ်ကွက်အချို့တွင် လျှပ်စစ်မီး မလာလို့ ရေမတင်လိုက်နိုင်တာလွဲ ချော်မှုတွေရှိနေတယ် လက်ရှိတော့ ပြည်သူတွေအဆင်ပြေဖို့ အချိန်နဲ့ ရေပေးဖို့ လုပ်ထားပါတယ်။ မီးလာတဲ့အချိန် ရေပေးဖို့ လုပ် ထားပါတယ်။ ရေမရှိလို့ မဟုတ်ပါဘူး။ မီးအခက်ခဲလို အခုလိုလုပ်ရတာပါ။ “လို့ မြို့နယ်ရေပေးဝေရေးဌာနက တာဝန်ရှိသူတဦးကပြောပြပါတယ်။

ရန်ကုန်မြို့တော်စည်ပင်သာယာရးကော်မတီက ရေရယူဖြန့်ဖြူးပေးနေတဲ့ ပင်မရေအရင်းမြစ် ၄ ခုရှိပြီး ယင်းတို့မှာ ဂျိုးဖြူရေလှောင်ကန် ၊ ဖူးကြီးရေလှောင်ကန် ၊ ငမိုးရိပ် ရေလှောင်ကန် ၊ လှော်ကားရေလှောင်ကန်​တွေ ဖြစ်ပါတယ်။

အဲဒီ ကန်ကြီးလေးခုကနေ ရန်ကုန်မြို့နယ် ‌၂၆ မြို့နယ်ကိုရေပေးဝေလျှက်ရှိပါတယ်။ ပုဇွန်တောင်မြို့နယ်ကတော့ ငမိုးရိပ်ရေလှောင်ကန်က ရေပေးဝေတဲ့ မြို့နယ်ထဲမှာပါဝင်ပါတယ်။

ငမိုးရိပ်ရေလှောင်ကန်က ဒဂုံမြို့သစ် မြောက်ပိုင်း ၊တောင်ပိုင်း ၊ အရှေ့ပိုင်း နဲ့ ဆိပ်ကမ်း မြို့နယ် ၊ မြောက်ဉက္ကလာပ၊ တောင်ဥက္ကလာပ ၊ သင်္ဃန်းကျွန်း ၊ သာကေတ ၊ ဒေါ်ပုံ ၊ ပုဇွန်တောင်နဲ ဗိုလ်တ ထောင်မြို့နယ်တို့ကို ရေ‌‌ပေးဝေနေခြင်းဖြစ်ပါတယ်။

ငမိုးရိပ်ရေလှောင်ကန်မှ ရေရယူနေတဲ့ ကျန်မြို့နယ်တွေကို VOM သတင်းဌာနက မေးမြန်းရာမှာတော့ ရေပုံမှန် ရရှိကြတယ်လို့ ဆိုပါတယ်။

Credit - VOM

ရန်ကုန်မြို့က စွန့်ပစ်အမှိုက်တွေကို လျှပ်စစ်ထုတ်ယူမယ့် စီမံကိန်းသုံးခုမှာ ရင်းနှီးမြုပ်ဖို့ တရုတ်ကုမ္မဏီတွေ စိတ်ဝင်စား

ရန်ကုန်၊ နိုဝင်ဘာ ၄

ရန်ကုန် အမှိုက်ပုံကြီးနှစ်ခုက နေစဉ်ထွက်ရှိတဲ့ အမှိုက်တန်ချိန် ၂၅၀၀ ကနေ လျှပ်စစ်ဓါတ်အား ထုတ် လုပ်တဲ့ စီမံကိန်း သုံးခုမှာ လာရောက်ရင်းနှီးမြုပ်နှံဖို့ ဖိတ်ခေါ်ပြီးနောက်လလာရောက်စုံးစမ်းတဲ့ လုပ်ငန်းရှင်တွေထဲမှာ တရုတ်-မြန်မာဖက်စပ် ကုမ္မဏီတွေ ပိုများကြောင်း ရန်ကုန်မြို့တော်စည်ပင် သာယာရေးကော်မတီက စုံးစမ်းသိရှိရပါတယ်။

လာရောက်စုံးစမ်းမေးမြန်းတဲ့ကုမ္မဏီနဲ့ လေ့လာသူတွေကို ရန်ကုန်မြို့တော်စည်ပင်က အမှိုက် အများဆုံး ထွက်ရှိတဲ့ အမှိုက်ကန်နှစ်ခုကို မျက်မြင်ကိုယ်တွေ့ လေ့လာဖို့ စီစဉ်ဆောင်ရွက်မှုတွေပြုလုပ်ပေး နေ တယ်လို့ သိရပါတယ်။

အဆိုပါစီမံကိန်း သုံးခုကို အကောင်ထည်ဖော်နိုင်ရန် ရန်ကုန်မြို့တော်စည်ပင်သာယာရေးကော်မတီက နိုဝင်ဘာ၂ ရက်နေ့တွင်တင်ဒါခေါ်ယူခဲ့ပါတယ်။ တင်ဒါခေါ်ယူပြီး တရက်အကြာမှာ စုံစမ်းမေးမြန်းမှု တွေ ရှိလာခြင်းဖြစ်ပါတယ်။

“လောလောဆယ်တော့ စုံစမ်းမေးမြန်းတဲ့ အဆင့်ပဲရှိပါသေးတယ်။ လုပ်ချင်တဲ့သူတွေများလို့လည်း ကျွန်တော်တို့က တင်ဒါခေါ်တာပါ။ တင်ဒါခေါ်တာလည်း မကြာသေးတော့ တင်ဒါတင်တာတော့မရှိ သေးဘူးပေါ့။ တင်ဒါခေါ်တာလည်း မကြာသေးတော့ အများကြီးပြောလို့ မရသေးပါဘူး။ လုပ်ငန်းစဉ်တွေက ကြာအုန်းမှာကိုး။” လို့ အမည်မဖော်လိုသူ ရန်ကုန်မြို့တော်စည်ပင်သာယာရေးကော်မတီ တာဝန်ရှိသူတဦးကပြောပါတယ်။

ထိန်ပင် အမှိုက်ပုံနဲ့ ထားဝယ်ချောင် စွန့်ပစ်အမှိုက်ပုံက လျှပ်စစ်ဓါတ်အားကို နည်းပညာသုံးခု သုံးပြီး ထုတ်လုပ်ရန် ရန်ကုန်မြို့တော်စည်ပင်သာယာရေးကော်မတီက တင်ဒါခေါ်ယူခဲ့ပါတယ်။ လျှပ်စစ် ဓါတ်အား ထုတ်ယူမယ့် နည်းပညာသုံးခုအနက် တခုက စွန့်ပစ်အမှိုက်ကနေ မီသိန်း ဓါတ်ငွေ့ကို ထုတ်ယူပြီး ဂျန်နရေတာတွေနဲ့ မောင်းနှင်း လျှပ်စစ်ဓါတ်အား ထုတ်ယူမယ့် လုပ်ငန်းတခုဖြစ်ပါတယ်။

ကျန် နှစ်ခုအနက် တခုက အမှိုက်ကထွက်ရှိတဲ့ မီသိန်း ဓါတ်ငွေ့ကို ထုတ်ယူပြီး ၉၀ ရာခိုင်နှုန်း သန့်စင်တဲ့ CNG အစားထိုး ဓါတ်ငွေ့ထုတ်ယူခြင်း လုပ်ငန်းနဲ့ စွန့်ပစ်အမှိုက်မီးရှို့စက်ရုံတည်ဆောက်ပြီး လျှပ်စစ်ဓါတ်အား ထုတ်ယူတဲ့ လုပ်ငန်းတို့ ဖြစ်ပါတယ်။

လုပ်ငန်းရှင်တွေ တင်ဒါလျှောက်ထားလို့ပါက ဒီဇင်ဘာ ၃၁ ရက်နောက်ဆုံးထား လျှောက်ထားကြ ရန် နိုင်ငံပိုင်သတင်းစာကတဆင့် ထုတ်ပြန်ကြေငြာထားပါတယ်။ လျှောက်ထားသူတွေအနေနဲ့ နိုဝင်ဘာ ၂ ရက် တွင် ထုတ်ပြန်တဲ့ ထုတ်ပြန်ချက်အတိုင်း လိုက်နာ လုပ်ဆောင်ကြရန် ရန်ကုန်မြို့တော်စည်ပင်သာယာရေးကော်မတီက နှိုးဆော်ထားပါတယ်။

“အခုမှ တင်ဒါခေါ်တဲ့ အဆင့်ဆိုတော့ လုပ်ငန်းအကောင်ထည်ဖော်ဖို့က ကြာအုန်းမှာပါ။ လုပ်ခွင့်ရရင် တောင် ဝန်ကြီးဌာန ခုနှစ်ခု ၊ ရှစ်ခုမှာ လိုအပ်တဲ့ စာရွက်စာတမ်းတွေ လုပ်ဖို့ လိုသေးတယ်။ ဖြစ်မြှောက်နိုင်စွမ်းတွေ ၊ သဘာ၀ပတ်၀န်းကျင်ကို ထိခိုက်မှု ရှိ မရှိ လေ့လာရဦးမယ်” လို့ ရန်ကုန်မြို့တော်စည်ပင် သာယာကော်မတီက တာဝန်ရှိသူကပြောပါတယ်။

တင်ဒါခေါ်ယူထားတဲ့ သတ်မှတ်ချက်တွင် စက်ရုံတည်ဆောက်မယ့် ကုမ္မဏီအနေနဲ့ အသုံးပြုမယ့်မြေ နေရာ အကျယ်အဝန်းကို အစိုးရက လုပ်ပိုင်ခွင့်ပေးဖို့ ရည်ရွယ်ထားတာဖြစ်ပါတယ်။

ရန်ကုန်မြို့တွင် အခုကောင်ထည်ဖော်မယ့် အမှိုက်က လျှပ်စစ်ဓါတ်အားထုတ်ယူတဲ့ စီမံကိန်းဟာ အခုနဲ ဆိုရင် သုံးခုမြှောက်ရှိလာမှာ ဖြစ်ပါတယ်။ ပထမတစ်ခုကတော့ လှော်ကားစက်ရုံ ဖြစ်ပြီး ဂျပန် ကုမ္မဏီ နဲ့ ရန်ကုန်မြို့တော်စည်ပင် သာယာရေးကော်မတီတို့ အကျိုးတူပူးပေါင်းဆောင်ရွက်နေတဲ့ စက်ရုံ ဖြစ် ပါတယ်။

အမှိုက်က လျှပ်စစ်ဓါတ်အားထုတ်ယူတဲ့ လှော်ကားစက်ရုံက အမှိုက်တန်ချိန် ၆၀ ကို အသုံးပြုပြီး နေစဉ် လျှပ်စစ်ဓါတ်အား ၇၆၀ ကီလိုဝပ်ထုတ်ယူနေဆဲဖြစ်ပါတယ်။ အခုအသုံးပြုမယ့် အမှိုက်တန်ချိန်က ၂၅၀၀ ရှိတဲ့အတွက် ပထမ စက်ရုံထက် လျှပ်စစ်ဓါတ်အား ထုတ်ယူနိုင်မယ့်အနေအထားရှိနေတယ်လို့ ကျွမ်းကျင်သူတွေက ခန့်မှန်းထားပါတယ်။

ရန်ကုန်မြို့အပါအဝင် မြန်မာတစ်နိုင်ငံလုံးရဲ့ လျှပ်စစ်လိုအပ်ချက်ဟာ တနှစ်ထက် တစ်နှစ်များပြားနေပြီး သက်ဆိုင်ရာ တိုင်းဒေသကြီး နဲ့ ပြည်နယ် အစိုးရအဖွဲ့တွေဟာ လျှပ်စစ်ဓါတ်အားထုတ်ယူဖို့တင်ဒါ ခေါ်ယူပြီး လုံးပန်းနေကြပါတယ်။ အစိုးရအနေနဲ့လည်း နိုင်ငံအဆင့်အနေနဲ့ မြန်မာနိုင်ငံရဲ့ စွမ်းအင်နဲ့လျှပ် စစ်လုပ်ငန်းတွေမှာ ရင်းနှီးမြုပ်နှံရန် ပြည်ပက လုပ်ငန်းရှင်တွေကို ဖိတ်ခေါ်နေပါတယ်။

Credit - VOM

နည်းပြနူနိုအက်စ်ပီရီတိုဆန်တိုအား ဝက်စ်ဟမ်း ထုတ်ပယ်လာ

နိုဝင်ဘာ ၄

ဝက်စ်ဟမ်းဟာ စိတ်ပျက်စရာ ချန်ပီယံရှစ်ရာသီအစ ရလဒ်နှင့် ကြုံတွေ့ရပြီးနောက် နည်းပြနိူနိုအက်စ်ပီရီတိုဆန်တိုအား ရာထူးမှ ထုတ်ပယ်လာပါတယ်။

အသက် ၅၂ နှစ်ရှိ ပေါ်တူဂီလူမျိုးနည်းပြဟာ ၂၀၂၅ ခုနှစ် စက်တင်ဘာလတွင် ဝက်စ်ဟမ်းကို စတင်ကိုင်တွယ်လာတာ ဖြစ်ပြီး ပရီးမီးယားလိဂ်မှ ချန်ပီယံရှစ်သို့ တန်းဆင်းလာရပေမယ့်လည်း ဆက်လက် ကိုင်တွယ်လာခဲ့ပါတယ်။

ဝက်စ်ဟမ်းဟာ ချန်ပီယံရှစ်မှ ပရီးမီးယားလိဂ်သို့ တိုက်ရိုက်တက်ရောက်ခွင့် ရရှိရေး ရေပန်းစားနေခဲ့ပေမယ့်လည်း ချန်ပီယံရှစ်အမှတ်ပေးဇယား အဆင့် ၈ နေရာမှာ ရပ်တည်ကာ ထိပ်ဆုံးမှ မစ်ဒယ်ဘရော့နှင့် ရမှတ် ၆ မှတ်ကွာဟနေပါတယ်။

ဝက်စ်ဟမ်းဟာ နောက်ဆုံး ၆ ပွဲတွင် ၂ ပွဲတည်းသာ အနိုင်ရထားသလို ၂ ပွဲဆက် ရှုံးနိမ့်ကာ အဆင့် ၂ နေရာမှ အဆင့် ၈ သို့ ဆင်းခဲ့ရပါတယ်။

လက်ထောက်နည်းပြရူအီပီဒရိုဆေးလ်ဗားနှင့် ဂိုးနည်းပြရူအီဘာဘိုဆာတို့မှာလည်း ဝက်စ်ဟမ်းမှ ထွက်ခွာသွားခဲ့ကြပါတယ်။

မတ်နိုဘယ်၊ စတိဗ်ပေါ့၊ ဂျီရတ်ပရန်ဒါဗီလီတို့က ဗုဒ္ဧူဟူးနေ့တွင် ကာဒစ်ဖ်စီးတီးအား အဝေးကွင်းသို့ သွားရောက် ရင်ဆိုင်ကစားရမယ့် ပွဲစဉ်အား ယာယီအဖြစ် ကြီးကြပ်လာကြပါမယ်။

ဝက်စ်ဟမ်းဟာ ၂၀၂၄ ခုနှစ် မေလတွင် ဒေးဗစ်မိုယက်စ် ထွက်ခွာသွားပြီးနောက် ၄ ဦးမြောက် အမြဲတမ်းနည်းပြအား ရှာဖွေလာရပြီ ဖြစ်ပါတယ်။

ယူကရိန်းကလပ်များကို ထောက်ခံအားပေးမှု နည်းပါးမှုအတွက် ဖီဖာဥက္ကဌကို ရှက်တာဒိုးနက်စ်ဝေဖန်လာ

နိုဝင်ဘာ ၄

ရှက်တာဒိုးနက်စ်အားကစားဒါရိုက်တာဒါရီဂျိုဆာနာဟာ စစ်ပွဲကာလအတွင်း ယူကရိန်းဘောလုံးလောကအပေါ် ဖီဖာရဲ့ ဆက်ဆံမှုနှင့်ပတ်သက်ပြီး ဖီဖာဥက္ကဌဂျီယန်နီအင်ဖန်တီနိုအား အပြင်းအထန် ဝေဖန်တိုက်ခိုက်မှု ပြုလုပ်လာပါတယ်။

ခရိုအေးရှားအသင်းခေါင်းဆောင်ဟောင်းဟာ ဖီဖာခေါင်းဆောင်အား ပြည်တွင်းကလပ်အသင်းများအား အကာအကွယ်ပေးရန် ပျက်ကွက်မှု ပြုလုပ်တယ်လို့ စွပ်စွဲသွားပြီး နိုင်ငံတွင်းသို့ ကိုယ်တိုင်လာရောက် လည်ပတ်ရန် စိန်ခေါ်သွားပါတယ်။

ရုရှားဟာ ၂၀၂၂ ခုနှစ် ဖေဖော်ဝါရီလတွင် ယူကရိန်းအား ကျူးကျော်စစ်ဆင်နွဲပြီးနောက် ယူအီးအက်ဖ်အေနှင့် ဖီဖာက ကျင်းပတဲ့ ပြိုင်ပွဲအားလုံး ပိတ်ပင်ခြင်းခံခဲ့ရပါတယ်။

ဒါပေမယ့် ဖီဖာဟာ ပြီးခဲ့တဲ့လတုန်းက အဇာဘိုင်ဂျန်တွင် ကျင်းပတဲ့ ယူ-၁၅ ကမ္ဘာ့ဖလားပြိုင်ပွဲကို ရုရှားအသင်းအား ဝင်ရောက်ယှဉ်ပြိုင်ခွင့်ပေးခဲ့ပါတယ်။

ယင်းဆုံးဖြတ်ချက်ကြောင့် ခရိုအေးရှားအတွက် ၁၃၄ ပွဲကစားပေးခဲ့တဲ့ လက်ရွေးစင်အား အကြီးအကျယ် ဒေါသထွက်လာစေတာလည်း ဖြစ်ပါတယ်။

ဆာနာက "ဖီဖာက စီးပွားရေးလုပ်တယ်။ ဥက္ကဌစီဖီရန်(ယူအီးအက်ဖ်အေ)နဲ့ အင်ဖန်တီနို(ဖီဖာ)တို့ကို နှိုင်းယှဉ်ကြည့်လိုက်ပါ။ သူတို့နှစ်ဦးဟာ ကွဲပြားတဲ့လူတွေ ဖြစ်ပါတယ်။ ဘောလုံးကို သဘောကျတဲ့သူက မစ္စတာစီဖီရန်ပါ။ သူက ကလပ်အားလုံးကို ကာကွယ်ပေးတယ်။ သူက ဘောလုံးကို သူဌေးတွေဆီ မရောင်းစားလိုပါဘူး။ ဘောလုံးက လူတိုင်းအတွက်ပါ။ သူဌေးအတွက်ချည်း သက်သက် မဟုတ်ပါဘူး။ တဖက်မှာ ဖီဖာက စီးပွားရေး လုပ်တယ်။ ကမ္ဘာဖ့လားမှာ မြင်ခဲ့ရတယ်။ ကံဆိုးစွာပဲ သူတို့ဟာ စစ်ပွဲအတွင်း ယူကရိန်းက ဘယ်ကလပ်တစ်ခုမှ အကာအကွယ်မပေးခဲ့ဘူး။ သူတို့ အလုပ်က ဘာလဲ။ ကလပ်တွေကို ကာကွယ်ဖို့ ကစားသမားတွေကို ကာကွယ်ဖို့ မဟုတ်ဘူးလား။ ဒါပေမယ့် သူတို့ ဘာမှ မလုပ်ဘူး။ ဒါပြီးသွားရင်တော့ စိတ်ပြောင်းသွားလိမ့်မယ်။ အခုအချိန်အထိတော့ သူကိုရော ဖီဖာအဖွဲ့အစည်းတစ်ခုလုံးပါ ကျွန်တော့်ဘက်က လေးစားမှု မရှိပါဘူး"လို့ ပြောကြားသွားပါတယ်။

ဖီဖာက ရုရှား ယူ-၁၅ ကို ကမ္ဘာ့ဖလားတွင် ပါဝင်ယှဉ်ပြိုင်ခွင့်ပေးလာပေမယ့်လည်း ဆာနာက ယူအီးအက်ဖ်အေမှာမူ ရုရှားကလပ်များအား ဥရောပပြိုင်ပွဲများတွင် ပါဝင်ခွင့်ပေးလာဖို့ မရှိသေးကြောင်း ဆိုသွားပါတယ်။

ပြိုင်ဘက်ဂိုးသမားရဲ့ ဒူးနှင့်တိုက်မိခဲ့တဲ့ တီနီရိုက်ဖ်တိုက်စစ်မှူးမီဂွယ် သေဆုံး

နိုဝင်ဘာ ၄

တီနီရိုက်ဖ်တိုက်စစ်မှူးဂျီးဆပ်စ်ဒီမီဂွယ်ဟာ စပိန်ဒုတိယတန်းလိဂ်ပွဲစဉ်အတွင်း ဒဏ်ရာပြင်းထန်စွာ ရရှိပြီးနောက် အသက် ၃၀ နှစ်အရွယ်တွင်ပင် သေဆုံးသွားပါတယ်။

တီနီရိုက်ဖ်တိုက်စစ်မှူးဟာ တနင်္လာနေ့တုန်းက အန်ဒိုရာနှင့် ဒုတိယတန်းပွဲစဉ်ရဲ့ ပွဲချိန် ၉၇ မိနစ်တွင် ပြိုင်ဘက်ဂိုးသမားဂျီးဆပ်စ်အိုဝိုနိုနှင့် ပြင်းထန်စွာ ထိခိုက်မိပြီးနောက် ခေါင်းနှင့် ရင်ဘတ်ဒဏ်ရာပြင်းထန်စွာ ရရှိကာ မေ့မျောသွားခဲ့ပါတယ်။

သူ့ကို ဆေးရုံသို့ အမြန်ပို့ဆောင်ပြီး အခြေအနေ တည်ငြိမ်သွားပြီလို့ ကြေညာခဲ့ပေမယ့်လည်း အင်္ဂါနေ့နံနက်ပိုင်းမှာတော့ ကျန်းမာရေးအခြေအနေ ဆိုးရွားလာခဲ့ကာ ကွယ်လွန်သွားရှာခဲ့ပါတယ်။

ဘာစီလိုနာနောက်ခံလူဟောင်းဂါရတ်ပီကေးပူးတွဲပိုင်ဆိုင်တဲ့ အန်ဒိုရာနှင့် တီနီရိုက်ဖ်တို့က ယင်းသတင်းဆိုးအတွက် အကြီးအကျယ် ဝမ်းနည်းကြေကွဲရကြောင်း ကြေညာချက်ထုတ်ပြန်ထားပါတယ်။

တီနီရှိုက်ဖ်နှင့် အန်ဒိုရာတို့ ၂ ဂိုးစီသရေကျတဲ့ ပွဲစဉ်ရဲ့ နာကျင်အချိန်ပို ၉၇ မိနစ်တွင် ယင်းမတော်တဆမှု ဖြစ်ခဲ့တာပါ။

အိုဝိုနိုက Long Ball အား ရှင်းထုတ်ရေး ကွင်းလယ်ဗဟိုသို့ ပြေးတက်ကာ ဖျက်ထုတ်စဉ် ဒူးဖြင့် ဒီမီဂွယ်နှင့်တိုက်မိခဲ့တာလည်း ဖြစ်ပါတယ်။

အိုဝိုနိုဟာ ချက်ချင်းပင် တိုက်ရိုက်အနီကတ်ပြသခြင်းခံခဲ့ရပြီး ဒီမီဂွယ်မှာ ကွင်းမြက်ခင်းတွင် မှောက်လျက်လဲနေခဲ့ကာ ဒိုင်လူကြီးက ချက်ချင်းပင် ပွဲကို ရပ်ဆိုင်းလိုက်ပါတယ်။

သူ့ကို ပက်လက်လှန်လိုက်ချိန်တွင် သတိမေ့နေကြောင်း သိရပြီးနောက် ချက်ချင်းပင် ဆေးဘက်ဆိုင်ရာအကူအညီ ရယူခဲ့ရပါတယ်။ သူ့ကို ချက်ချင်းပင် အရေးပေါ် ယာဉ်ဖြင့် ဆေးရုံသို့ ခေါ်ဆောင်သွားခဲ့ရပါတယ်။

အထက်ပါ အဖြစ်အပျက်ကြောင့် နှစ်သင်းလုံးမှ ကစားသမားတို့ အကြီးအကျယ် တုန်လှုပ်ခဲ့ပါတယ်။

စပိန်သတင်းစာ Marca ရဲ့ ဖော်ပြမှုအရ ဒီမီဂွယ်မှာ အရေးပေါ် သူနာပြုယာဉ်တွင်ပင် နှလုံးရပ်မှု ဖြစ်ကာ ဆေးဘက်ဆိုင်ရာအကူများက ကုသမှု ပြုလုပ်ကာ ဆေးရုံသို့ ခေါ်ဆောင်ခဲ့ရပါတယ်။

တနင်္လာနေ့ညမှာတော့ တီနီရိုက်ဖ်က ဒီမီဂွယ်ရဲ့ အခြေအနေမှာ စိုးရိမ်စရာရှိပေမယ့် တည်ငြိမ်သွားပြီလို့ ကြေညာခဲ့ပေမယ့်လည်း အင်္ဂါနေ့ နံနက်မှာတော့ မီဂွယ်ရဲ့အ‌ခြေအနေ ဆိုးရွားလာကာ သေဆုံးသွားခဲ့ပါတော့တယ်။

လာအိုနှင့် မြန်မာ့တပ်မတော်နှစ်ရပ်ကြား နယ်စပ်လုံခြုံရေး၊ မူးယစ်ဆေးဝါးနှင့် အွန်လိုင်းလိမ်လည်မှုတိုက်ဖျက်ရေး ပူးပေါင်းဆောင်ရွက်ရန် ဆွေးနွေး

နိုဝင်ဘာ ၄

လာအိုပြည်သူ့ဒီမိုကရက်တစ်သမ္မတနိုင်ငံသို့ ချစ်ကြည်ရေးခရီး ရောက်ရှိနေသည့် တပ်မတော်ကာကွယ်ရေးဦးစီးချုပ် ဗိုလ်ချုပ်ကြီး ရဲဝင်းဦးနှင့် လာအိုအမျိုးသားကာကွယ်ရေးဝန်ကြီးဌာန ဒုတိယဝန်ကြီး၊ စစ်ဦးစီးဌာနအကြီးအကဲ ဒုတိယဗိုလ်ချုပ်ကြီး Saichay Kommasith တို့သည် နိုဝင်ဘာ ၃ ရက်တွင် တွေ့ဆုံခဲ့ကြပြီး နှစ်နိုင်ငံနယ်စပ်ဒေသ တည်ငြိမ်ရေး၊ မူးယစ်ဆေးဝါးနှင့် အွန်လိုင်းလိမ်လည်မှုတိုက်ဖျက်ရေးဆိုင်ရာ ကိစ္စရပ်များကို အဓိကထား ဆွေးနွေးခဲ့ကြသည်။

တွေ့ဆုံပွဲတွင် နှစ်နိုင်ငံတပ်မတော်အကြား ချစ်ကြည်ရင်းနှီးမှုနှင့် ပူးပေါင်းဆောင်ရွက်မှု ပိုမိုတိုးတက်ခိုင်မာစေရေး၊ အဆင့်လိုက် ချစ်ကြည်ရေးခရီးစဉ်များ အပြန်အလှန်လည်ပတ်ရေး၊ နယ်စပ်ဒေသကုန်သွယ်မှု တိုးမြှင့်ရေးနှင့် နှစ်နိုင်ငံနယ်စပ်ဒေသ တည်ငြိမ်အေးချမ်းရေးအတွက် ပူးပေါင်းဆောင်ရွက်မှု မြှင့်တင်ရေးတို့ကို ဆွေးနွေးခဲ့ကြသည်။

ထို့ပြင် နှစ်နိုင်ငံတပ်မတော်များအကြား လေ့ကျင့်ရေးကဏ္ဍ ပူးပေါင်းဆောင်ရွက်မှု၊ အားကစားနှင့် ယဉ်ကျေးမှုအဖွဲ့များ အပြန်အလှန်စေလွှတ်ရေးတို့အပြင် အွန်လိုင်းလောင်းကစားမှုနှင့် အွန်လိုင်းလိမ်လည်မှုများ တိုက်ဖျက်ရေးဆိုင်ရာ အခြေအနေများကိုလည်း အမြင်ချင်းဖလှယ်ခဲ့ကြသည်။

ဆွေးနွေးပွဲတွင် မြန်မာနိုင်ငံအနေဖြင့် အွန်လိုင်းလောင်းကစားမှုနှင့် အွန်လိုင်းလိမ်လည်မှုများ အမြစ်ပြတ်ချေမှုန်းရေး၊ ဒေသတွင်း၌ ယင်းလုပ်ငန်းများ ကင်းစင်ပပျောက်ရေးနှင့် အနာဂတ်တွင် ထပ်မံပေါ်ပေါက်လာခြင်းမရှိစေရေး ရည်ရွယ်၍ အွန်လိုင်းလိမ်လည်မှုတိုက်ဖျက်ရေးစစ်ဆင်ရေးများ ဆက်လက်ဆောင်ရွက်လျက်ရှိကြောင်း ရှင်းလင်းခဲ့ပြောကြားသည်။

ထို့အပြင် အဆိုပါလုပ်ငန်းများနှင့် ဆက်စပ်အသုံးပြုခဲ့သည့် အဆောက်အအုံ ၁,၀၅၃ လုံးကို ယနေ့အထိ ဖြိုချဖျက်ဆီးခဲ့ပြီးဖြစ်ကြောင်း အသိပေးဆွေးနွေးခဲ့သည်။

မူးယစ်ဆေးဝါး တားဆီးကာကွယ်နှိမ်နင်းရေးနှင့်ပတ်သက်၍လည်း တိုင်းရင်းသားလက်နက်ကိုင်အဖွဲ့အချို့သည် မူးယစ်ဆေးဝါးထုတ်လုပ်ခြင်း၊ ရောင်းဝယ်ဖြန့်ဖြူးခြင်းမှ ရရှိသည့်ဝင်ငွေများဖြင့် လက်နက်ခဲယမ်းများ ဝယ်ယူဖြည့်တင်းကာ အင်အားတည်ဆောက်နေမှုများရှိကြောင်း ဆွေးနွေးခဲ့ကြသည်။

ယင်းကဲ့သို့သော အခြေအနေများကြောင့် နှစ်နိုင်ငံနယ်စပ်ဒေသများတွင် အဆိုပါအဖွဲ့များ ခိုအောင်းနေထိုင်မှုမရှိစေရေး ပူးပေါင်းဆောင်ရွက်ရန်နှင့် ဒေသဆိုင်ရာ နယ်ခြားကော်မတီ (RBC)၊ ပူးတွဲနယ်ခြားလုံခြုံရေးကော်မတီ (JBSC) အစည်းအဝေးများ ဆက်လက်ကျင်းပနိုင်ရေးတို့ကိုလည်း ဆွေးနွေးခဲ့ကြသည်။

ထို့အတူ မြန်မာနိုင်ငံအတွင်း ငြိမ်းချမ်းရေးရရှိရေးနှင့် နိုင်ငံဖွံ့ဖြိုးတိုးတက်ရေးအတွက် နိုင်ငံတော်အစိုးရက ကြိုးပမ်းဆောင်ရွက်နေမှုများကိုလည်း ရှင်းလင်းဆွေးနွေးခဲ့ကြောင်း သိရသည်။

တွေ့ဆုံပွဲအပြီးတွင် နှစ်နိုင်ငံတပ်မတော်အကြီးအကဲများသည် အမှတ်တရလက်ဆောင်ပစ္စည်းများ အပြန်အလှန်ပေးအပ်ခဲ့ကြသည်။

ယင်းမတိုင်မီ ဗိုလ်ချုပ်ကြီး ရဲဝင်းဦးနှင့် မြန်မာ့တပ်မတော်ကိုယ်စားလှယ်အဖွဲ့အား လာအိုအမျိုးသားကာကွယ်ရေးဝန်ကြီးဌာန ဒုတိယဝန်ကြီးနှင့် စစ်ဦးစီးဌာနအကြီးအကဲက ဂုဏ်ပြုတပ်ဖွဲ့ဖြင့် ကြိုဆိုခဲ့ပြီး ဂုဏ်ပြုတပ်ဖွဲ့အား စစ်ဆေးခဲ့ကြသည်။

ထို့ပြင် တပ်မတော်ကာကွယ်ရေးဦးစီးချုပ်သည် လာအိုနိုင်ငံရှိ အညတရသူရဲကောင်းစစ်သည်ဗိမာန်သို့ သွားရောက်ကာ လာအိုပြည်သူ့တပ်မတော်၏ စစ်တီးဝိုင်းအဖွဲ့ တီးမှုတ်မှုနှင့်အတူ ဂုဏ်ပြုပန်းခွေချ အလေးပြုခဲ့ကြောင်း သိရသည်။

တရုတ်-မြန်မာ စီးပွားရေးစင်္ကြံစီမံကိန်းများ အရှိန်မြှင့်တင်ရန်နှင့် တရုတ်ရင်းနှီးမြှုပ်နှံမှုများ တိုးမြှင့်လာရန် Wang Yi နှင့် ပြည်ထောင်စုဝန်ကြီး ဦးအောင်ကျော်ဟိုး ဆွေးနွေး

နိုဝင်ဘာ ၄

တရုတ်နိုင်ငံအနေဖြင့် မြန်မာနိုင်ငံ၏ နိုင်ငံရေးရင်ကြားစေ့ရေး၊ တည်ငြိမ်ရေးနှင့် စီးပွားရေးဖွံ့ဖြိုးတိုးတက်ရေးတို့ကို ထောက်ခံအားပေးသွားမည်ဖြစ်ကြောင်း တရုတ်ကွန်မြူနစ်ပါတီ ဗဟိုကော်မတီ နိုင်ငံရေးရာဗျူရိုအဖွဲ့ဝင်၊ တရုတ်နိုင်ငံခြားရေးဝန်ကြီး Mr. Wang Yi က မြန်မာနိုင်ငံ အမျိုးသားစီမံကိန်း၊ ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန ပြည်ထောင်စုဝန်ကြီး ဦးအောင်ကျော်ဟိုးနှင့် တွေ့ဆုံစဉ် ပြောကြားခဲ့သည်ဟု သိရသည်။

အဆိုပါ မြန်မာနိုင်ငံ အမျိုးသားစီမံကိန်း၊ ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန ပြည်ထောင်စုဝန်ကြီး ဦးအောင်ကျော်ဟိုးသည် (၁၁) ကြိမ်မြောက် လန်ချန်း-မဲခေါင် ပူးပေါင်းဆောင်ရွက်ရေး နိုင်ငံခြားရေးဝန်ကြီးများအစည်းအဝေး တက်ရောက်ရန် တရုတ်နိုင်ငံသို့ ရောက်ရှိနေခြင်းဖြစ်ပြီး နိုဝင်ဘာ ၃ ရက်တွင် ပေကျင်းမြို့၌ နိုင်ငံခြားရေးဝန်ကြီး Mr. Wang Yi နှင့် တွေ့ဆုံခဲ့ခြင်းဖြစ်သည်။

တွေ့ဆုံစဉ် Mr. Wang Yi က တရုတ်-မြန်မာနှစ်နိုင်ငံသည် အခက်အခဲများကို အတူတကွ ရင်ဆိုင်ဖြေရှင်းခဲ့သည့် ဆွေမျိုးပေါက်ဖော်နိုင်ငံများဖြစ်ကြောင်း၊ ယခုနှစ် ဇွန်လတွင် တရုတ်သမ္မတ ရှီကျင့်ဖျင်နှင့် မြန်မာနိုင်ငံသမ္မတ ဦးမင်းအောင်လှိုင်တို့ တွေ့ဆုံဆွေးနွေးခဲ့ပြီး နှစ်နိုင်ငံအေးအတူပူအမျှ အသိုက်အဝန်းတည်ဆောက်ရေးကို အရှိန်မြှင့်တင်ရန် သဘောတူညီခဲ့ကြောင်း ပြောကြားခဲ့သည်။

ထို့ပြင် မြန်မာနိုင်ငံ၏ နိုင်ငံရေးရင်ကြားစေ့ရေး၊ အစိုးရသစ်လက်ထက် တည်ငြိမ်ရေး၊ စီးပွားရေးဖွံ့ဖြိုးတိုးတက်ရေးနှင့် ပြည်သူများ၏ လူနေမှုဘဝမြှင့်တင်ရေးတို့ကို တရုတ်နိုင်ငံက ထောက်ခံအားပေးကြောင်း၊ တရုတ်-မြန်မာ စီးပွားရေးစင်္ကြံ၏ အဓိကစီမံကိန်းများကို တည်ငြိမ်စွာ အကောင်အထည်ဖော်ရန်နှင့် စွမ်းအင်၊ သဘာဝအရင်းအမြစ်ကဏ္ဍများတွင် ပူးပေါင်းဆောင်ရွက်မှု မြှင့်တင်ရန် လိုအပ်ကြောင်း ပြောကြားခဲ့သည်။

အလားတူ အွန်လိုင်းလောင်းကစားနှင့် အွန်လိုင်းလိမ်လည်မှုများ တိုက်ဖျက်ရေးကို အရှိန်မြှင့်တင်ရန်၊ မြဝတီမြို့နယ်အတွင်း ယခင်ကဲ့သို့ ရှုပ်ထွေးသည့်ဖြစ်ရပ်များ ပြန်လည်မဖြစ်ပွားစေရန် တားဆီးရေးနှင့် မြန်မာနိုင်ငံအတွင်းရှိ တရုတ်နိုင်ငံသားများ၊ အဖွဲ့အစည်းများနှင့် စီမံကိန်းများ၏ လုံခြုံရေးအတွက် ထိရောက်သည့် အစီအမံများ ဆောင်ရွက်ပေးရန်လည်း တိုက်တွန်းပြောကြားခဲ့သည်။

ပြည်ထောင်စုဝန်ကြီး ဦးအောင်ကျော်ဟိုးကလည်း မြန်မာနိုင်ငံအနေဖြင့် ငြိမ်းချမ်းစွာ အတူယှဉ်တွဲနေထိုင်ရေး အခြေခံမူကြီး (၅) ရပ်ကို ဆက်လက်ကိုင်စွဲပြီး မြန်မာ-တရုတ် ရိုးရာချစ်ကြည်ရေးကို မြှင့်တင်သွားမည်ဖြစ်ကြောင်း၊ တရုတ်တစ်နိုင်ငံတည်းမူဝါဒကိုလည်း အစဉ်တစိုက် လိုက်နာသွားမည်ဖြစ်ကြောင်း ပြောကြားခဲ့သည်။

ထို့အပြင် သမ္မတ ဦးမင်းအောင်လှိုင်၏ မကြာသေးမီက တရုတ်နိုင်ငံခရီးစဉ်သည် နှစ်နိုင်ငံဆက်ဆံရေး ဖွံ့ဖြိုးတိုးတက်မှုကို အားကောင်းစေခဲ့ကြောင်း၊ ငလျင်ဘေးအလွန် ပြန်လည်ထူထောင်ရေးလုပ်ငန်းများအတွက် တရုတ်နိုင်ငံ၏ အကူအညီများအပေါ် ကျေးဇူးတင်ရှိကြောင်း ပြောကြားခဲ့သည်။

မြန်မာနိုင်ငံအနေဖြင့် တရုတ်နိုင်ငံနှင့် ပူးပေါင်းကာ မြန်မာ-တရုတ် စီးပွားရေးစင်္ကြံစီမံကိန်းများကို အရှိန်မြှင့်တင်အကောင်အထည်ဖော်သွားမည်ဖြစ်သကဲ့သို့ အွန်လိုင်းလိမ်လည်မှုများကိုလည်း တရုတ်နိုင်ငံနှင့် ဒေသတွင်းနိုင်ငံများနှင့်အတူ အရှိန်မြှင့်တိုက်ဖျက်သွားမည်ဖြစ်ကြောင်း ၎င်းက ဆိုသည်။ 

ထို့ပြင် တရုတ်ကုမ္ပဏီများ မြန်မာနိုင်ငံတွင် လာရောက်ရင်းနှီးမြှုပ်နှံကြရန် ကြိုဆိုကြောင်းနှင့် ယခုအကြိမ် လန်ချန်း-မဲခေါင် ပူးပေါင်းဆောင်ရွက်ရေး နိုင်ငံခြားရေးဝန်ကြီးများအစည်းအဝေး အောင်မြင်စွာကျင်းပနိုင်ရေးအတွက် တရုတ်နိုင်ငံနှင့် ပူးပေါင်းဆောင်ရွက်သွားမည်ဖြစ်ကြောင်း ပြောကြားခဲ့သည်ဟု သိရသည်။

ပဲခူးတိုင်းနှင့် ကရင်ပြည်နယ်မှာ အကြမ်းဖက်လက်ချက်ကြောင့် ကလေးငယ်တစ်ဦးအပါအဝင် ၂ ဦး ဒဏ်ရာရပြီး မန္တလေးတိုင်းမှာ စည်ပင်ဒုဦးစီးမှူး အမျိုးသမီး ၂ ဦး ဖမ်းဆီးခံရ

နိုဝင်ဘာ ၄

ပဲခူးတိုင်းဒေသကြီး၊ ထန်းတပင်မြို့နယ်နှင့် ကရင်ပြည်နယ်၊ ဖာပွန်မြို့နယ်တို့မှာ အကြမ်းဖက်သမားများ၏ လက်ချက်ကြောင့် ကလေးငယ်တစ်ဦးအပါအဝင် ၂ ဦး ဒဏ်ရာရပြီး မန္တလေးတိုင်းဒေသကြီး၊ မလှိုင်-မန္တလေးကားလမ်းမှာလည်း စည်ပင်ဒုဦးစီးမှူး အမျိုးသမီး ၂ ဦး အကြမ်းဖက်သမားများ၏ ဖမ်းဆီးခြင်းခံခဲ့ရကြောင်း သိရသည်။

ဖြစ်စဉ်များမှာ ပဲခူးတိုင်းဒေသကြီး၊ ထန်းတပင်မြို့နယ်၊ ပဲ့သောင်းကျေးရွာတွင် အသက် ၃၃ နှစ်အရွယ် ကိုအောင်အောင်သည် နိုဝင်ဘာ ၁ ရက် မွန်းလွဲ ၁ နာရီက နေအိမ်၌ ရှိနေစဉ် KNU နှင့် PDF ပူးပေါင်းအဖွဲ့၏ ပစ်ခတ်မှုကြောင့် ကျည်ထိမှန်ဒဏ်ရာရရှိခဲ့သဖြင့် ဇရပ်ကြီးတိုက်နယ်ဆေးရုံသို့ ပို့ဆောင်ကုသထားရသည်။

အလားတူ နိုဝင်ဘာ ၂ ရက် ညနေ ၆ နာရီ ၁၀ မိနစ်တွင် ကရင်ပြည်နယ်၊ ဖာပွန်မြို့နယ်၊ ကမမောင်းမြို့၊ အမှတ် (၂) ရပ်ကွက်အတွင်းသို့ အမည်မသိအဖွဲ့တစ်ဖွဲ့က ပစ်ခတ်လိုက်သည့် ရှော့တိုက်ဒုံးတစ်လုံး ကျရောက်ပေါက်ကွဲခဲ့ရာ ရပ်ကွက်အတွင်းနေထိုင်သည့် အသက် ၁ နှစ် ၁၁ လအရွယ် မောင်စောကျော်ကို့လွဲတွင် ပေါက်ကွဲစထိမှန်ဒဏ်ရာများ ရရှိခဲ့သဖြင့် ဒဏ်ရာရကလေးငယ်အား ကမမောင်းတိုက်နယ်ဆေးရုံသို့ ပို့ဆောင်ကုသထားကြောင်း သိရသည်။

ထို့ပြင် မန္တလေးတိုင်းဒေသကြီး၊ အောင်မြေသာစံမြို့နယ်၊ မင်းတဲအီကင်းရပ်ကွက်နေ မန္တလေးတိုင်းဒေသကြီး စည်ပင်သာယာရေးကော်မတီမှ ဒုဦးစီးမှူး ဒေါ်ခင်သီတာချို (၄၄ နှစ်) နှင့် ဒေါ်ဇင်နီလာအောင် (၃၄ နှစ်) တို့သည် နိုဝင်ဘာ ၂ ရက် နံနက် ၇ နာရီ ၄၅ မိနစ်က မလှိုင်မြို့မှ မန္တလေးမြို့သို့ ခရီးသည်တင်ယာဉ်ဖြင့် လိုက်ပါလာစဉ် မလှိုင်-မန္တလေးကားလမ်းရှိ လိပ်ခွဲလမ်းဆုံအနီးအရောက်၌ PDF အမည်ခံအဖွဲ့က အကြမ်းဖက်ခြိမ်းခြောက်ကာ ဖမ်းဆီးခေါ်ဆောင်သွားခဲ့ကြောင်းလည်း သိရသည်။

#centralnewsnaypyitaw

ထိုင်းနိုင်ငံတွင် မိသားစုတိုင်း ၇၂ နာရီစာ အရေးပေါ်ပစ္စည်းအိတ်များ ပြင်ဆင်ထားရန် DDPM တိုက်တွန်း

နိုဝင်ဘာ ၄

ထိုင်းနိုင်ငံတွင် သဘာဝဘေးအန္တရာယ်နှင့် အခြားအရေးပေါ်အခြေအနေများ ဖြစ်ပွားလာပါက မိသားစုများအနေဖြင့် အနည်းဆုံး ၇၂ နာရီကြာ ကိုယ်တိုင်ရပ်တည်နိုင်ရေးအတွက် အရေးပေါ်ပစ္စည်းအိတ်များ ကြိုတင်ပြင်ဆင်ထားကြရန် ထိုင်းဘေးအန္တရာယ်ဆိုင်ရာ စီမံခန့်ခွဲမှုနှင့် လျှော့ချရေးဦးစီးဌာန (DDPM) က နိုဝင်ဘာ ၂ ရက်တွင် တိုက်တွန်းထုတ်ပြန်ခဲ့သည်။

DDPM ညွှန်ကြားရေးမှူးချုပ် Nirat Pongsitthaworn က ယင်းလှုပ်ရှားမှုသည် ပြည်သူများအကြား ထိတ်လန့်မှုဖြစ်စေရန်မဟုတ်ဘဲ အရေးပေါ်အခြေအနေများအတွက် ကြိုတင်ပြင်ဆင်မှုရှိစေရန်နှင့် ဘေးအန္တရာယ်ထိခိုက်မှုများ လျှော့ချနိုင်ရန် ရည်ရွယ်ခြင်းဖြစ်ကြောင်း ပြောကြားသည်။

အရှေ့အလယ်ပိုင်းဒေသ ပဋိပက္ခများကြောင့် နိုင်ငံအချို့တွင် ပြည်သူများအား သုံးရက်စာ အစားအစာ၊ ဆေးဝါးနှင့် အခြားမရှိမဖြစ်လိုအပ်သည့် ပစ္စည်းများ ကြိုတင်သိုလှောင်ထားရန် အကြံပြုထားသော်လည်း ထိုင်းနိုင်ငံအနေဖြင့် ယင်းပဋိပက္ခအတွက် သီးသန့်ပြင်ဆင်ရန် ညွှန်ကြားထားခြင်းမဟုတ်ကြောင်း ၎င်းက ရှင်းလင်းခဲ့သည်။

သို့သော် ၇၂ နာရီကြာ အရေးပေါ်ပစ္စည်းများ ပြင်ဆင်ထားခြင်းသည် နိုင်ငံတကာတွင် လက်ခံကျင့်သုံးသည့် အခြေခံကြိုတင်ပြင်ဆင်မှုတစ်ရပ်ဖြစ်ပြီး ဘေးအန္တရာယ်ကျရောက်ပြီးနောက် အစိုးရအဖွဲ့အစည်းများက ကယ်ဆယ်ရေးနှင့် အကူအညီပေးရေးလုပ်ငန်းများ စုစည်းဆောင်ရွက်နေစဉ် ပထမသုံးရက်အတွင်း မိသားစုများအနေဖြင့် ကိုယ်တိုင်ရပ်တည်နိုင်ရန် အရေးကြီးကြောင်း ၎င်းက ပြောကြားသည်။

DDPM က အရေးပေါ်အိတ်များတွင် ရှေးဦးသူနာပြုစုရေးပစ္စည်းများ၊ အခြေခံဆေးဝါးများ၊ ပုံမှန်သောက်သုံးရသည့် ကိုယ်ပိုင်ဆေးဝါးများနှင့် ဆေးမှတ်တမ်းများ။ တစ်ဦးလျှင် တစ်ရက် ရေသုံးလီတာနှုန်းဖြင့် သုံးရက်စာရေ၊ အသင့်စားသုံးနိုင်သော အစားအစာများနှင့် စွမ်းအင်ဖြည့်မုန့်များ။ မိုဘိုင်းဖုန်း၊ ပါဝါဘဏ်၊ ဓာတ်မီး၊ အပိုဘက်ထရီ၊ ရေဒီယို၊ ခရာ၊ ဖယောင်းတိုင်၊ မီးခြစ်၊ ခေါက်ဓား၊ ကတ်ကြေး၊ ကြိုးနှင့် တိပ်။ မှတ်ပုံတင်၊ အိမ်ထောင်စုစာရင်း၊ ကျန်းမာရေးအာမခံကတ်၊ ယာဉ်မောင်းလိုင်စင်၊ ဘဏ်စာအုပ်နှင့် ပိုင်ဆိုင်မှုဆိုင်ရာစာချုပ်များကို မိတ္တူနှင့်တကွ ရေမဝင်သောအိတ်ဖြင့် သိမ်းဆည်းထားရန်၊ ငွေသားနှင့် အပိုသော့များလည်း ထည့်သွင်းထားရန်။ တစ်ရှူး၊ သွားတိုက်တံ၊ သွားတိုက်ဆေး၊ ရေချိုးသန့်စင်ရေးပစ္စည်းများနှင့် အမှိုက်အိတ်များ။ အပိုအဝတ်အထည်၊ မိုးကာအင်္ကျီ၊ ဦးထုပ်၊ စောင်နှင့် အိပ်အိတ်များ စသည့် ပစ္စည်းအမျိုးအစား ခြောက်မျိုးကို မရှိမဖြစ် ထည့်သွင်းပြင်ဆင်ထားရန် လမ်းညွှန်ထားခြင်းဖြစ်သည်။

အရေးပေါ်အိတ်တစ်လုံးစီကို မိသားစုတိုင်းတွင် အသင့်ထားရှိခြင်းဖြင့် သဘာဝဘေးအန္တရာယ်၊ ဆိုက်ဘာတိုက်ခိုက်မှု သို့မဟုတ် နိုင်ငံတကာပဋိပက္ခများကြောင့် ဘေးလွတ်ရာသို့ ရွှေ့ပြောင်းရသည့်အခါ အချိန်မီယူဆောင်သွားနိုင်မည်ဖြစ်ကြောင်း Nirat က ပြောကြားသည်။

ထို့ပြင် အရေးပေါ်အိတ်များအတွက် ပေါ့ပါးပြီး ရေစိုခံနိုင်သည့် အိတ်များကို ရွေးချယ်ကာ အလွယ်တကူယူဆောင်နိုင်သည့် နေရာတွင် ထားရှိရန်နှင့် အတွင်းရှိပစ္စည်းများ အသုံးပြုနိုင်သည့် အခြေအနေရှိ၊ မရှိ၊ သက်တမ်းကုန်ဆုံးမှုရှိ၊ မရှိ ပုံမှန်စစ်ဆေးရန်လည်း ၎င်းက အကြံပြုထားသည်။

#centralnewsnaypyitaw

မလေးရှား တာရန်ဂါနူပြည်နယ် စစ်ဆင်ရေးအတွင်း မြန်မာ ၁၀ ဦးအပါအဝင် နိုင်ငံခြားသား ၁၈ ဦး ဖမ်းဆီးခံရ

နိုဝင်ဘာ ၄

မလေးရှားနိုင်ငံ တာရန်ဂါနူပြည်နယ်အတွင်း တရားမဝင်ရွှေ့ပြောင်းလုပ်သားများကို ရှာဖွေဖမ်းဆီးသည့် စစ်ဆင်ရေးတစ်ရပ် ဆောင်ရွက်ခဲ့ရာ မြန်မာနိုင်ငံသား ၁၀ ဦးအပါအဝင် နိုင်ငံခြားသား ၁၈ ဦး ဖမ်းဆီးခံခဲ့ရကြောင်း မလေးရှားလူဝင်မှုကြီးကြပ်ရေးဌာနက ထုတ်ပြန်သည်။

အဆိုပါစစ်ဆင်ရေးကို အောက်တိုဘာ ၂၈ ရက်တွင် တာရန်ဂါနူပြည်နယ်ရှိ မာရန်း၊ ဒုံဂွန်း၊ ခမာမန်နှင့် ကွာလာနေးရပ်စ်မြို့နယ်တို့၌ ဆောင်ရွက်ခဲ့ခြင်းဖြစ်ပြီး ဆောက်လုပ်ရေးလုပ်ငန်းခွင်များ၊ ဆောက်လုပ်ဆဲနေအိမ်များ၊ စားသောက်ဆိုင်များ၊ နေအိမ်များနှင့် မော်တော်ယာဉ်ပြုပြင်ရေးလုပ်ငန်းများအပါအဝင် နေရာ ၁၁ ခုကို ဝင်ရောက်စစ်ဆေးခဲ့ကြောင်း သိရသည်။

စစ်ဆေးမှုအတွင်း အသက် ၁၅ နှစ်မှ ၅၀ နှစ်အရွယ် အမျိုးသား ၁၆ ဦး၊ အမျိုးသမီးတစ်ဦးနှင့် အရွယ်မရောက်သေးသည့် ယောက်ျားလေးတစ်ဦး စုစုပေါင်း ၁၈ ဦးကို ဖမ်းဆီးခဲ့ခြင်းဖြစ်သည်။ ဖမ်းဆီးခံရသူများအနက် မြန်မာနိုင်ငံသား ၁၀ ဦး၊ အင်ဒိုနီးရှားနိုင်ငံသား ခြောက်ဦးနှင့် ကမ္ဘောဒီးယားနိုင်ငံသား နှစ်ဦး ပါဝင်သည်။

၎င်းတို့အနက် ၁၁ ဦးကို တရားဝင်ခွင့်ပြုချက်ဆိုင်ရာ စာရွက်စာတမ်းမရှိခြင်းနှင့် လူဝင်မှုကြီးကြပ်ရေးဥပဒေ ချိုးဖောက်ခြင်းတို့ဖြင့်လည်းကောင်း၊ ငါးဦးကို ပြည်ဝင်ခွင့်သက်တမ်းကျော်လွန် နေထိုင်ခြင်းဖြင့်လည်းကောင်း အရေးယူခဲ့ပြီး ကျန်သူများကို ပတ်စ်ပို့ဆိုင်ရာ သတ်မှတ်ချက်များ ချိုးဖောက်မှုဖြင့် အရေးယူခဲ့ကြောင်း မလေးရှားလူဝင်မှုကြီးကြပ်ရေးဌာန၏ ထုတ်ပြန်ချက်အရ သိရသည်။

#centralnewsnaypyitaw