နိုင်ငံတော်သမ္မတ ဦးမင်းအောင်လှိုင်မှ မဟာရာရှ်ထရာပြည်နယ် ဧည့်သည်တော်မှတ်တမ်းစာအုပ်တွင် လက်မှတ်ရေးထိုးကာ ဘင်ခရာအဖွဲ့အား ဆု‌တော်ငွေချီးမြင့်

အိန္ဒိယနိုင်ငံ၊ မွမ်ဘိုင်းမြို့သို့ရောက်ရှိနေသည့် နိုင်ငံတော်သမ္မတ ဦးမင်းအောင်လှိုင်အား မဟာရာ့ရှ်ထရာပြည်နယ်အုပ်ချုပ်ရေးမှူး Shri. Jishnu Dev Varma က ယနေ့ ဇွန် ၂ ရက်တွင် Maharashtra Lok Bhavan Mumbai (Governor's House)၌ ဂုဏ်ပြုညစာစားပွဲဖြင့် တည်ခင်းဧည့်ခံခဲ့ပြီးနောက် နိုင်ငံတော်သမ္မတသည် ဧည့်သည်တော်မှတ်တမ်းစာအုပ်တွင် လက်မှတ်ရေးထိုးကာ ဘင်ခရာအဖွဲ့အား ဆု‌တော်ငွေချီးမြင့်ခဲ့သည်။

နိုင်ငံတော်သမ္မတ ဦးမင်းအောင်လှိုင်နှင့် မဟာရာရှ်ထရာပြည်နယ်အုပ်ချုပ်ရေးမှူးတွေ့ဆုံ

မြန်မာအဆင့်မြင့်ကိုယ်စားလှယ်အဖွဲ့အနေဖြင့် မြန်မာ- အိန္ဒိယနှစ်နိုင်ငံကြား ကုန်သွယ်မှုနှင့် ရင်းနှီးမြှုပ်နှံမှုများ ပိုမိုတိုးတက်စေရေးကြိုးပမ်းဆောင်ရွက်လျက်ရှိမှုကိုဆွေးနွေး
အိန္ဒိယနိုင်ငံ၊ မွန်ဘိုင်းမြို့၌ တရားဝင်ခရီးစဉ်ရောက်ရှိနေသည့် နိုင်ငံတော်သမ္မတ ဦးမင်းအောင်လှိုင်နှင့် မဟာရာရှ်ထရာပြည်နယ်အုပ်ချုပ်ရေးမှူး Shri. Jishnu Dev Verma တို့ ဇွန် ၂ ရက်ကတွေ့ဆုံခဲ့ကြသည်။
တွေ့ဆုံစဥ် မြန်မာအဆင့်မြင့်ကိုယ်စားလှယ်အဖွဲ့အနေ ဖြင့် မြန်မာ-အိန္ဒိယနှစ်နိုင်ငံကြား ကုန်သွယ်မှုနှင့် ရင်းနှီး မြှုပ်နှံမှုများပိုမိုတိုးတက်စေရေးကြိုးပမ်းဆောင်ရွက်လျက်ရှိမှု၊ နှစ်နိုင်ငံအိမ်နီးချင်းကောင်းနိုင်ငံများဖြစ် သည်နှင့်အညီ သမိုင်းကြောင်းတစ်လျှောက်ကောင်းမွန်သည့် ဆက်ဆံရေးများရှိခဲ့မှုနှင့် ချစ်ကြည်ရင်းနှီးမှုနှင့် ပူးပေါင်းဆောင်ရွက်မှုများ တိုးတက်ကောင်းမွန်လျက်ရှိမှုတို့ကို ဆွေးနွေးခဲ့ကြသည်။
ထို့ပြင် နှစ်နိုင်ငံပြည်သူများ အချင်းချင်းအပြန်အလှန် ကူးလူးဆက်ဆံမှုများရှိမှု၊ မြန်မာနိုင်ငံ၌ သဘာဝဘေး အန္တရာယ်များကျရောက်ချိန်တွင် အိန္ဒိယနိုင်ငံအနေဖြင့် အိမ်နီးချင်းကောင်းပီသစွာ ကူညီမှုများပေးခဲ့မှုအပေါ် မြန်မာနိုင်ငံအစိုးရနှင့် ပြည်သူများအနေက ကျေးဇူး တင်ရှိမှုနှင့် နှစ်နိုင်ငံကြား ကဏ္ဍပေါင်းစုံတွင်ပူးပေါင်းဆောင်ရွက်မှုများတိုးမြှင့်ဆောင်ရွက်လျက်ရှိမှုတို့ကိုလည်း ဆွေးနွေးခဲ့ကြသည်။
ထို့နောက် နိုင်ငံတော်သမ္မတနှင့်အဖွဲ့ဝင်များအား မဟာရာရှ်ထရာပြည်နယ်အုပ်ချုပ်ရေးမှူးက ဂုဏ်ပြုညစာစားပွဲဖြင့်တည်ခင်းဧည့်ခံရာ ပြည်နယ်ဂုဏ်ပြုတီးဝိုင်းအဖွဲ့က နှစ်နိုင်ငံနိုင်ငံတော်သီချင်းများကိုဂုဏ်ပြုတီး မှုတ်ပြီး ဂုဏ်ပြုညစာမသုံးဆောင်မီနှင့်သုံးဆောင်နေစဉ်အတွင်း မဟာရာရှ်ထရာ ပြည်နယ်ဂုဏ်ပြုတီးဝိုင်းအဖွဲ့ကနှစ်နိုင်ငံ တေးသီးချင်းများဖြင့်တီးမှုတ်ဖျော်ဖြေခဲ့ကြသည်။
ဂုဏ်ပြုညစာသုံးဆောင်အပြီးတွင် နိုင်ငံတော်သမ္မတ သည် Maharashtra Lok Bhavan Mumbai (Governor's House)၏ ဧည့်သည်တော်မှတ်တမ်းတင် လက်မှတ်ရေးထိုးပြီး မဟာရာရှ်ထရာပြည်နယ် ဂုဏ်ပြုတီးဝိုင်းအဖွဲ့၏ ဖျော်ဖြေတီးမှုတ်မှုအားကြည့်ရှုအားပေးကာ နိုင်ငံတော်သမ္မတနှင့် ပြည်နယ်အုပ်ချုပ်ရေးမှူးတို့က ချီးမြှင့်ငွေများပေးအပ်ပြီးနှုတ်ဆက်ခဲ့ကြသည်။

ကားစျေးနှုန်းမြင့်တက်မှုနှင့် အခွန်စံနှုန်းကွာဟမှုအပေါ် ထိန်းကြပ်မည့်အစီအစဥ်ရှိမရှိ လွှတ်တော်တွင် မေးခွန်းထုတ်

လက်ရှိ မြန်မာနိုင်ငံ မော်တော်ကားရောင်းဝယ်ရေးဈေးကွက်အတွင်း မော်တော်ကားများကို ပြည်တွင်းအခွန်ဦးစီးဌာနက သတ်မှတ်ထားသော စည်းကြပ်ခွန် စံနှုန်းတန်ဖိုးများထက် အဆမတန်မြင့်မားသော ဈေးနှုန်းများဖြင့် ရောင်းဝယ်နေခြင်းများအပေါ် သက်ဆိုင်ရာဝန်ကြီးဌာနအနေဖြင့် စီမံကြပ်မတ်ဆောင်ရွက်ရန် အစီအစဉ်ရှိ၊ မရှိကို တာချီလိတ်မဲဆန္ဒနယ်မှ ဦးကျော်ငြိမ်းအောင်က တတိယအကြိမ်ပြည်သူ့လွှတ်တော် ဒုတိယပုံမှန်အစည်းအဝေးပထမနေ့တွင် မေးမြန်းခဲ့သည်။
ဦးကျော်ငြိမ်းအောင်က ပြည်တွင်းအခွန်ဦးစီးဌာန၏ ၂၀၂၄ ခုနှစ် ဇန်နဝါရီ ၁ ရက်ထုတ် မော်တော်ကားစည်းကြပ်ခွန်စာရင်းဇယားအရ Toyota Mark II Saloon 2000 CC 2004 မော်ဒယ်ကားတစ်စီးကို ကျပ်သိန်း ၄၀၀ ဖြင့် အခွန်စည်းကြပ်ထားသော်လည်း လက်ရှိပြင်ပဈေးကွက်တွင် အဆိုပါကားအမျိုးအစားမှာ ကျပ်သိန်း ၉၀၀ ကျော်အထိ ပေါက်ဈေးရှိနေကြောင်း ထောက်ပြပြောကြားခဲ့သည်။
ထိုသို့ ကားဈေးနှုန်းများ မြင့်တက်နေခြင်းကြောင့် ပြည်သူများအနေဖြင့် အိမ်သုံးနှင့် လုပ်ငန်းသုံး မော်တော်ယာဉ်များ ဝယ်ယူအသုံးပြုရာတွင် အခက်အခဲများ ကြုံတွေ့နေရသလို၊ နယ်စပ်ဒေသများမှ မြို့ကြီးများအထိ လိုင်စင်မဲ့ကားများကို ဥပဒေနှင့်မညီဘဲ ရွေးချယ်အသုံးပြုနေသူများလည်း ရှိလာကြောင်း ၎င်းက ဆိုသည်။
အဆိုပါမေးခွန်းနှင့်ပတ်သက်၍ ဘဏ္ဍာရေးနှင့် အခွန်ဝန်ကြီးဌာန ဒုတိယဝန်ကြီး ဦးဟန်ဝင်းအောင်က ပြန်လည်ဖြေကြားရာတွင် ပြည်တွင်းအခွန်များဦးစီးဌာနအနေဖြင့် မော်တော်ယာဉ်ဝယ်ယူရောင်းချမှုများအပေါ် အခွန်စည်းကြပ်ရာတွင် တပြေးညီဖြစ်စေရန် နှစ်စဉ်စံနှုန်းတန်ဖိုးများကို ကြိုတင်သတ်မှတ်ဆောင်ရွက်ထားကြောင်း ပြောကြားခဲ့သည်။
ယင်းစံနှုန်းတန်ဖိုးများမှာ အခွန်ထမ်းပြည်သူများ ဝန်ထုပ်ဝန်ပိုးမဖြစ်စေရန်နှင့် မိမိဆန္ဒအလျောက် အခွန်ပေးဆောင်နိုင်စေရန် ရည်ရွယ်သတ်မှတ်ထားခြင်းဖြစ်ပြီး၊ မော်တော်ယာဉ်ဈေးနှုန်း အတက်အကျအခြေအနေများကြောင့် ပြင်ပပေါက်ဈေးနှုန်းနှင့် စံနှုန်းတန်ဖိုးများအကြား ကွာဟမှုများ ရှိနိုင်ကြောင်း ၎င်းက ဆိုသည်။
ထို့ပြင် မော်တော်ယာဉ်စံနှုန်းတန်ဖိုးများကို ခြောက်လတစ်ကြိမ် ပြန်လည်သုံးသပ်သွားမည်ဖြစ်ပြီး၊ ပြည်သူများ ပိုမိုလွယ်ကူစွာ အခွန်ပေးဆောင်နိုင်စေရန်နှင့် ပွင့်လင်းမြင်သာမှုရှိစေရန် BAPS စနစ်ကို အွန်လိုင်းမှတစ်ဆင့် အသုံးပြုနိုင်ရေး စီစဉ်ဆောင်ရွက်နေကြောင်းလည်း ဒုတိယဝန်ကြီးက ပြောကြားခဲ့သည်။

ဂျာမန်နိုင်ငံအနေဖြင့် မြန်မာနိုင်ငံအတွက် ၂၀၂၆ ခုနှစ်အတွင်း ရန်ပုံငွေ အမေရိကန်ဒေါ်လာ ၁၀ သန်း ပံ့ပိုးကူညီထား

ဂျာမန်နိုင်ငံခြားရေးဝန်ကြီးဌာန၏ လူသားချင်းစာနာထောက်ထားမှုဆိုင်ရာ ညွှန်ကြားရေးမှူး ဒေါက်တာ အီနာ ဟွိုက်စ်ဂန် (Dr. Ina Heusgen) သည် ပြီးခဲ့သည့် မေလတွင် မြန်မာနိုင်ငံသို့ ရောက်ရှိလာပြီး ဒေသခံပြည်သူများ၏ အရေးပေါ်လိုအပ်ချက်များကို မြေပြင်အထိ ကွင်းဆင်းကြည့်ရှု ခဲ့ကြောင်း သိရသည်။
ယခု ၂၀၂၆ ခုနှစ်အတွင်း၌ မြန်မာနိုင်ငံအတွက် လူသားချင်းစာနာထောက်ထားမှုဆိုင်ရာ ရန်ပုံငွေ (Myanmar Humanitarian Fund) တစ်ခုတည်းကိုပင် ဂျာမနီနိုင်ငံ၏ ထည့်ဝင်ပံ့ပိုးမှုသည် အမေရိကန်ဒေါ်လာ ၁၀ သန်းအထိ ရှိခဲ့ပြီဖြစ်ကာ နောင်တွင်လည်း ဆက်လက်ကူညီပံ့ပိုးပေးသွားမည်ဖြစ်ကြောင်း မြန်မာနိုင်ငံဆိုင်ရာ ဂျာမနီသံရုံး က အသိပေးထုတ်ပြန်ထားသည်။
ထို့အပြင် မြေပြင်တွင် မနားမနေ ကြိုးပမ်းအားထုတ်နေကြသော လူသားချင်းစာနာထောက်ထားမှုဆိုင်ရာ လုပ်သားများအားလုံးကိုလည်း အထူးလေးစား ကျေးဇူးတင်ရှိကြောင်း ဖော်ပြထားသည်။
ဂျာမနီနိုင်ငံအနေဖြင့် ကုလသမဂ္ဂနှင့် လူသားချင်းစာနာထောက်ထားမှုဆိုင်ရာ အဖွဲ့အစည်းများမှတဆင့် ဒုက္ခသည်စခန်းများနှင့် ဘုန်းတော်ကြီးကျောင်းများရှိ ပြည်သူများ၏ လူနေမှုဘဝ မြှင့်တင်ရေးအတွက် ပံ့ပိုးကူညီလျက်ရှိသည်။
ဂျာမနီနိုင်ငံ၏ လူသားချင်းစာနာမှု အကူအညီများသည် ရခိုင်ပြည်နယ်တစ်ခုတည်းတင်မကဘဲ နိုင်ငံတဝှမ်းလုံးသို့ ပျံ့နှံ့ပံ့ပိုးပေးနေခြင်းဖြစ်ပြီး လွန်ခဲ့သည့်နှစ်က လှုပ်ခတ်ခဲ့သော ငလျင်ဒဏ်ကြောင့် ထိခိုက်ခံစားခဲ့ရသည့် ဒေသများလည်း ပါဝင်ကြောင်း သိရသည်။

ကျိုင်းတောင်း ရေအားလျှပ်စစ်ဓါတ်အားပေးစက်ရုံရှိ စက်များကို အလှည့်ကျမောင်းနှင်ပြီး ပြုပြင်ထိန်းသိမ်းဆောင်ရွက်နေ

ရှမ်းပြည်နည်တောင်ပိုင်း မိုးနဲမြို့နယ် နမ့်တိမ်ချောင်းပေါ်တွင် တည်ဆောက်ထားသည့် ကျိုင်းတောင်းရေအားလျှပ်စစ်ဓာတ်အားပေးစက်ရုံက စက်သုံးလုံးကို အလှည့်ကျမောင်းနှင်ပြီး ပြုပြင်ဆောင်ရွက်ခြင်းများ လုပ်ဆောင်နေကြောင်း သိရသည်။
၂၀၂၆ ခုနှစ် နွေရာသီကာလတွင် ရေဝင်ရောက်မှု အခြေအနေမှာ ဓာတ်အားပေးစက်ရုံ၏ ဓါတ်အားပေးစက် နှစ်လုံးသာ မောင်းနှင်နိုင်သည့် ရေပမာဏရှိသဖြင့် တပ်ဆင်ထားသည့် စက်သုံးလုံးအနက် နှစ်လုံးကို အလှည့်ကျမောင်းနှင်ပြီး ကျန်တစ်လုံးကို ရပ်တန့်ထားခြင်းဖြစ်ကြောင်း သိရသည်။
လာမည့်မိုးရာသီ ရေဝင်များပြားလာမည့်ကာလတွင် စက်သုံးလုံးကို စက်စွမ်းအားပြည့်မောင်းနှင်နိုင်ရန် နှင့် ဓါတ်အားပိုမိုထုတ်လုပ်နိုင်ရန် ရည်ရွယ်ပြီး သုံးလုံးအနက် အမှတ်(၁)စက်ကို မေ ၁၈ ရက်မှ ၂၈ ရက်အထိ ပြုပြင်ခြင်းလုပ်ငန်း ဆောင်ရွက်ခဲ့ပြီး အမှတ် ၂ ကို မေ ၂၉ ရက်မှ ဇွန်(၇) ရက်အထိ ဆက်လက်ဆောင်ရွက်မည်ဖြစ်ကြောင်း လျှပ်စစ်နှင့်စွမ်းအင်ဝန်ကြီးဌာနက အသိပေးထားသည်။
အဆိုပါ ပြုပြင်ဆောင်ရွက်နေစဉ် ကျန်စက်နှစ်လုံးကို မောင်းနှင်လည်ပတ်၍ ဓာတ်အားထုတ်လုပ်ပေးလျက်ရှိသပြီး ပြည့်မီအောင်မောင်းနင်နိုင်သဖြင့် ဓာတ်အားစနစ်သို့ ထုတ်လုပ်ပို့လွှတ်မှုကို ထိခိုက်မှုမရှိကြောင်း သိရသည်။
ကျိုင်းတောင်းရေအားလျှပ်စစ်ဓါတ်အားပေးစက်ရုံ တွင် ၁၈ မဂ္ဂါဝပ် ထွက်ရှိသည့် ဓာတ်အားပေးစက် သုံးလုံးဖြင့် စုစုပေါင်း တပ်ဆင်အင်အား ၅၄ မဂ္ဂါဝပ်ရှိကြောင်း သိရသည်။

လန့်စ်နည်းပြဆေ့ချ်ကို ခန့်အပ်ရေး ပဲလေ့စ် ဆွေးနွေးလာမည်
====================

လန့်စ်နည်းပြပီယာရီဆေ့ချ်ဟာ ယခုအပတ်အစောပိုင်းအတွင်းတွင် ခရစ္စတယ်ပဲလေ့စ်နည်းပြရာထူးအတွက် ဆွေးနွေးလာပါမယ်။
ခရစ္စတယ်ပဲလေ့စ်ဟာ အသင်းကို အက်ဖ်အေဖလားနှင့် ကွန်ဖရင့်လိဂ်ဖလားတို့ ရယူပေးပြီးနောက် ထွက်ခွာသွားတဲ့ အိုလီဗာဂလပ်စ်နာနေရာတွင် အစားထိုးရန် နည်းပြသစ် ရှာဖွေနေပြီး ဦးစားပေးနည်းပြအန်ဒိုနီအီရာအိုလာမှာ လီဗာပူးနည်းပြရာထူးအတွက် ဆွေးနွေးလာမှုနှင့်အတူ လက်လျှော့လိုက်ရပြီ ဖြစ်ပါတယ်။
ဒါကြောင့်လည်း ကွန်ဖရင့်လိဂ်ချန်ပီယံဟာ ဒုတိယဦးစားပေးဖြစ်တဲ့ လန့်စ်နည်းပြဆေ့ချ်နှင့် ဆွေးနွေးလာပါမယ်။
တဖက်တွင် ပဲလေ့စ်ဥက္ကဌ‌စတိဗ်ပါရစ်ရှ်ဟာ နည်းပြသစ်ခန့်အပ်ရေးအား အလျှင်စလို ဆုံးဖြတ်လိုခြင်း မရှိဘဲ အသေအချာ စဉ်းစားဆုံးဖြတ်လာပါမယ်။
ဆေ့ချ်ဟာ ဥရောပရဲ့အတောက်ပဆုံးလူငယ်နည်းပြများထဲမှ တစ်ဦး ဖြစ်ပါတယ်။
ဆေ့ချ်ကလည်း ပဲလေ့စ်နည်းပြရာထူးအတွက် တံခါးဖွင့်ထားပြီး ယခုအပတ်အတွင်းတွင် ဆွေးနွေးမှု ပြုလုပ်လာပါမယ်။
အသက် ၄၂ နှစ်ရှိ ဆေ့ချ်ဟာ ပြီးခဲ့တဲ့နှစ် ဇွန်လတုန်းက လန့်စ်ကို ကိုင်တွယ်ပြီးနောက် လီဂူး ၁ တွင် ဒုတိယနေရာမှာ ရပ်တည်နိုင်အောင် စွမ်းဆောင်ခဲ့တဲ့အပြင် ကလပ်ရဲ့ သက်တမ်း ၁၂၀ အတွင်း ပထမဆုံးဆုဖလားအဖြစ် Coupe de France ရယူပေးထားပါတယ်။
ခရစ္စတယ်ပဲလေ့စ်ရဲ့ နည်းပြရာထူးအတွက် လျာထားစာရင်းတွင် ကိုဗင်ထရီနည်းပြဖရန့်လမ်းပတ်၊ အစ္စဝှစ်ချ်နည်းပြကီရန်မက်ကန်နာ၊ ဖရန့်ဖတ်နည်းပြဟောင်းဒီနိုတော့ပ်မိုလ်လာ၊ စပါးစ်နည်းပြဟောင်းသောမတ်စ်ဖရန့်၊ ဘန်လေနှင့် ဖောရက်စ်နည်းပြဟောင်းရှောင်ဒိုက်ချီတို့လည်း ပါဝင်နေပါတယ်။

ပရီးမီးယားလိဂ်တွင် ၂၄ ရာသီ ကျင်လည်ပြီးနောက် ကစားသမားဘဝမှ အနားယူလာတဲ့ ပရီးမီးယားလိဂ်ရဲ့ပွဲအများဆုံးကစားသူစံချိန်ရှင်
====================

အင်္ဂလန်လက်ရွေးစင်ကစားသမားဂျိမ်းစ်မီလ်နာဟာ ပရီးမီးယားလိဂ်တွင် ၂၄ နှစ်ကြာ ကျင်လည်ပြီးနောက် ကစားသမားဘဝမှ အနားယူလာပါတယ်။
အသက် ၄၀ နှစ်ရှိ စွယ်စုံရ ကစားသမားဟာ ဘရိုက်တန်တွင် သုံးရာသီကြာ ကစားပြီးနောက် ယခုနွေရာသီတွင် စာချုပ်သက်တမ်းကုန်ဆုံးလာသူလည်း ဖြစ်ပါတယ်။
မီလ်နာဟာ ပရီးမီးယားလိဂ်ကလပ် ၆ ခုတွင် ကစားခဲ့ကာ ဖေဖော်ဝါရီလတုန်းက ပရီးမီးယားလိဂ်သမိုင်းတွင် ပွဲအများဆုံးကစားထားသူစံချိန်အား ရေးထိုးခဲ့ပါတယ်။
သူဟာ လိဒ်တွင် ကစားသမားဘဝ စတင်ပြီးနောက် မန်စီးတီးနှင့်အတူ ပရီးမီးယားလိဂ်ဖလား ၂ ကြိမ်၊ လီဗာပူးနှင့်အတူ ပရီးမီးယားလိဂ်ဖလား ၁ ကြိမ်ဆွတ်ခူးခဲ့သလို ၂၀၁၉ ခုနစ် ချန်ပီယံလိဂ်ဖလားလည်း ဆွတ်ခူးခဲ့ပါတယ်။
သူဟာ ၂၀၀၉ ခုနှစ်တုန်းက ဗီလာတွင် ကစားစဉ် အင်္ဂလန်အသင်းအတွက် ပထမဆုံးပွဲ ကစားခွင့်ရပြီးနောက် ၆၁ ပွဲကစားပေးခဲ့ပါတယ်။
သူဟာ ၂၀၀၆ ခုနှစ် နိုဝင်ဘာလတုန်းက အသက် ၁၆ နှစ်အရွယ်တွင် လိဒ်နှင့်အတူ ပွဲကစားခွင့် ရရှိခဲ့ကာ ထိုစဉ်က ပရီးမီးယားလိဂ်သမိုင်းတွင် ဒုတိယအသက်အငယ်ဆုံးပွဲကစားသူစံချိန်အား ရေးထိုးခဲ့ပါတယ်။ နောက်ပိုင်းတွင် မက်စ်ဒေါ်မန်းနှင့် ဂျိမ်းစ်ဗူဂန်တို့က မီလ်နာကို ကျော်တက်သွားခဲ့ကြပါတယ်။

ပရီးမီးယားလိဂ်ရဲ့ ၂၀၂၅-၂၆ ရာသီ အကောင်းဆုံးအပြောင်းအရွှေ့ဆုကို မန်ယူဂိုးသမား လမ်းမန်းစ် ရရှိ

မန်ယူအသင်းရဲ့ ဂိုးသမား လမ်းမန်းစ်ဟာ ပရီးမီးယားလိဂ်ရဲ့ ၂၀၂၅-၂၆ ရာသီ အကောင်းဆုံးအပြောင်းအရွှေ့ဆု Transfer of the Season ကို ရရှိခဲ့ကြောင်း သိရပါတယ်။
အသက် ၂၃ နှစ်သာရှိသေးတဲ့ ဘယ်လ်ဂျီယံလက်ရွေးစင်ဂိုးသမား လမ်းမန်းစ်ဟာ ၂၀၂၅ နွေရာသီအပြောင်းအရွှေ့နောက်ဆုံးနေ့မှာ အန့်ဝပ်ကနေ မန်ယူအသင်းကို ပေါင် ၁၈.၁ သန်းနဲ့ ရောက်ရှိခဲ့တာပါ။
လမ်းမန်းစ်ဟာ နည်းပြအပြောင်းအလဲတွေနဲ့ မန်ယူအသင်း မတည်မငြိမ်ဖြစ်ခဲ့တဲ့ရာသီမှာ စွမ်းဆောင်ရည်ကောင်း ပြသနိုင်ခဲ့ပြီး ပရီးမီးယားလိဂ် ၃၂ ပွဲမှာ ၂၈ ပွဲ ရှုံးပွဲမရှိအောင် ကူညီပေးနိုင်ခဲ့ပါတယ်။
ဂိုးပေါက်ကာကွယ်မှု ၇၉ ကြိမ်ပြုလုပ်ခဲ့ပြီး Clean Sheet ၈ ပွဲလည်း ရရှိခဲ့တာကြောင့် သူ့ကို ခေါ်ယူခဲ့ခြင်းက မန်ယူအသင်းအတွက် အကျိုးဖြစ်ထွန်းမှု များပြားခဲ့ပါတယ်။
ဒါကြောင့် ပရိသတ်တွေရဲ့ ဆန္ဒမဲအများဆုံးရရှိပြီး အကောင်းဆုံးအပြောင်းအရွှေ့ဆု ရရှိခဲ့ခြင်း ဖြစ်ပါတယ်။

ကမ္ဘာ့ဖလားပြိုင်ပွဲနဲ့ ဆာလီဘာ လွဲချော်ရဖွယ်ရှိနေ

အာဆင်နယ်အသင်းက ပြင်သစ်လက်ရွေးစင်နောက်ခံလူ ဆာလီဘာဟာ ကမ္ဘာ့ဖလားပြိုင်ပွဲနဲ့ လွဲချော်ရဖွယ် ရှိနေပါတယ်။
၎င်းဟာ ပြီးခဲ့တဲ့ရက်သတ္တပတ်အနည်းငယ်ကတည်းက ကျောဒဏ်ရာ ခံစားနေရတာဖြစ်တယ်။
ဆာလီဘာ(၂၅ နှစ်)က တနင်္လာနေ့မှာ ဒဏ်ရာကို စစ်ဆေးမှုတွေ ပြုလုပ်ခဲ့တယ်လို့ သိရပါတယ်။
၎င်းအနေနဲ့ ကမ္ဘာ့ဖလားပြိုင်ပွဲကို လွဲချော်ရရင် သူ့အတွက် ကြီးမားတဲ့ ဆုံးရှုံးမှုဖြစ်ပြီး ရေပန်းအစားဆုံး ပြင်သစ်အသင်းအတွက်လည်း
နစ်နာစေနိုင်ပါတယ်။
ဆာလီဘာဟာ ယခုရာသီမှာ အာဆင်နယ်အသင်းအတွက် ပြိုင်ပွဲစုံ ၆၃ ပွဲ ကစားပေးခဲ့ပါတယ်။
ပြင်သစ်အသင်းမှာ အခြားနောက်ခံလူတွေအဖြစ် ဒစ်ဂ်နေး၊ ဂူစတို၊ လူးကပ်စ်ဟာနန်ဒက်ဇ်၊ သီယိုဟာနန်ဒက်ဇ်၊ ကိုနာတေ၊ ခွန်ဒဲ၊
လာခရော့နဲ့ အူပါမယ်ကာနိုတို့ကိုလည်း ရွေးချယ်ထားပါတယ်။
ပြင်သစ်အသင်းဟာ အုပ်စု I မှာ ဆီနီဂေါ၊ အီရတ်၊ နော်ဝေအသင်းတွေနဲ့ အတူကျရောက်နေပါတယ်။

(၃) နိုင်ငံဖိတ်ခေါ်ဖလားပြိုင်ပွဲအတွက် မြန်မာအမျိုးသမီးအသင်း အပြီးသတ်ကစားသမားစာရင်း ထုတ်ပြန်

မြန်မာ့လက်ရွေးစင်အသင်းနည်းပြချုပ်ဖြစ်သူ ဂျပန်နိုင်ငံသား မစ်ဆူအိုကာတိုဟာ (၃) နိုင်ငံဖိတ်ခေါ်ဖလားပြိုင်ပွဲအတွက် အပြီးသတ်ကစားသမား (၂၅) ဦးစာရင်းကို ဒီကနေ့ညနေပိုင်းမှာ ထုတ်ပြန်ခဲ့
ပါတယ်။
နည်းပြချုပ်ကာတိုရဲ့ အပြီးသတ်ကစားသမား (၂၅) ဦးစာရင်းမှာ ပထမဆုံး လက်ရွေးစင်ကစားသမားအဖြစ် ရွေးချယ်ခံခဲ့ရတဲ့ မျက်နှာသစ်ကစားသမားတချို့လည်း ပါဝင်လာတာကို မြင်တွေ့ရပါတယ်။
ဒါ့အပြင် ခင်မာလာထွန်း၊ နော်ထက်ထက်ဝေ၊ ဖြူဖြူဝင်း၊ မေထက်လူ၊ စန်းသော်သော်၊ မြတ်နိုးခင်တို့လို ဝါရင့်ကစားသမားတွေလည်း ပြန်လည်ပါဝင်လာတာကို တွေ့ရပါတယ်။
မြန်မာအမျိုးသမီးအသင်းဟာ (၃) နိုင်ငံဖိတ်ခေါ်ဖလားပြိုင်ပွဲအဖြစ် မနက်ဖြန် (ဇွန် ၃) ညနေ (၅) နာရီမှာ ဥဇဘက်ကစ္စတန်အမျိုးသမီးအသင်းနဲ့ ယှဥ်ပြိုင်ကစားမှာဖြစ်ပါတယ်။