မဲခေါင်မြစ်ရေ စိုးရိမ်ရေမှတ်ရောက်ခါနီးဖြစ်နေပြီး ထိုင်း-လာအို နယ်စပ်ဈေးကို ရေလွှမ်း

​သြဂုတ်လ ၁၂ ရက်နေ့မှာ မဲခေါင်မြစ်ရေဟာ ကမ်းကို‌ကျော်ကာ လျှံတက်လာပြီးတော့ နခွန်ဖနုံ (Nakhon Phanom) မြို့မှာရှိတဲ့ ထိုင်း-လာအို နယ်စပ်ဈေးကို ရေဝင်သွားပါတယ်။ ရေမှတ်က ၁၁.၉၈ မီတာအထိ ရောက်နေပြီး စိုးရိမ်ရေမှတ်ရောက်ဖို့ ၂ စင်တီမီတာပဲ လိုပါတော့တယ်။
​ဗုဒ္ဓဟူးနေ့ မနက် ၆ နာရီ ရေတိုင်းတာရေး တာဝန်ရှိသူတွေရဲ့ မှတ်တမ်းတွေအရဆိုရင် မနေ့ကထက် ရေက ၁၅ စင်တီမီတာ ပိုတက်လာတယ်လို့ သိရပါတယ်။ နေ့လယ်ပိုင်းလောက်ဆိုရင် စိုးရိမ်ရေမှတ်ကို ရောက်သွားနိုင်တယ်လို့လည်း အာဏာပိုင်တွေက သတိပေးထားပါတယ်။
​မဲခေါင်မြစ်ရေတွေ မြို့ထဲကို ပြန်မဝင်လာအောင် နခွန်ဖနုံ စည်ပင်သာယာရေး အာဏာပိုင်တွေက အဓိက ရေစုပ်စက်ရုံတွေမှာရှိတဲ့ ရေတံခါး (၄) ခုစလုံးကို ပိတ်ထားဖို့ ညွှန်ကြားထားပါတယ်။
​ဘွန်ကန် (Bueng Kan) ခရိုင်နဲ့ လာအိုဘက်ခြမ်းကနေ စီးဆင်းလာတဲ့ ရေတွေကြောင့် နခွန်ဖနုံမြို့နဲ့ ၂၈ ကီလိုမီတာလောက်ဝေးတဲ့ မောင်း (Muang) မြို့နယ်၊ ဘန်ကလန်း (Ban Klang) ကျေးရွာအုပ်စုက မြစ်ကမ်းဘေး စိုက်ပျိုးရေးခြံတွေလည်း ရေမြုပ်သွားပါတယ်။
​ငှက်ပျော၊ ဝါး နဲ့ အုန်းမွှေး စိုက်ခင်း ဧက ၄၀ (၁၀၀ ရိုင်) ကျော် ရေမြုပ်သွားပြီး ရေအနက် ၁ မီတာလောက်အထိ ရှိနေပါတယ်။ ၃ ကီလိုမီတာကျော် ရှည်တဲ့ ကွန်ကရစ်လမ်းတစ်ခုလည်း ရေအောက်ရောက်သွားပါတယ်။
​ယာယီ နယ်စပ်ကုန်သွယ်ရေးဇုန်နဲ့ ဒေသထွက် ကုန်ပစ္စည်းရောင်းတဲ့ အဆောက်အဦးတွေကတော့ ပိုပြီး ထိခိုက်နစ်နာကြပါတယ်။ ဈေးသည်တွေဟာ ပစ္စည်းတွေ အချိန်မီ မရွှေ့နိုင်လိုက်တာကြောင့် အမှိုက်ပုံး ၅ ပုံး၊ ၆ ပုံးလောက် ရေထဲမျောပါသွားပြီး ရေခဲပုံး၊ စားပွဲ၊ ကုလားထိုင်တွေလည်း ရေပေါ်မှာ မျောနေကြပါတယ်။ တချို့ကတော့ ကိုယ့်ပစ္စည်းတွေကို ကြိုးတွေနဲ့ ချည်ပြီး ထိန်းထားရပါတယ်။
​အသက် ၅၉ နှစ်အရွယ် ဒေါ်ဒေါင်စဝမ် (Daosawan) ကတော့ သူ့မှာ ဝါးရုံ ၂၀၀ ကျော်ရှိတဲ့ ဝါးစိုက်ခင်း ၃ ခု (ရိုင် ၃၀ ကျော်) ရှိတယ်လို့ ဆိုပါတယ်။ မဲခေါင်မြစ်ရေ ရုတ်တရက် တက်လာတာကြောင့် သြဂုတ်လ ၉ ရက်နေ့ကတည်းက သူ့ရဲ့ စိုက်ခင်း ၂ ခုက ရေ ၁ မီတာလောက်အထိ နစ်မြုပ်သွားခဲ့တာပါ။ ပုံမှန်ဆိုရင် သူက မြို့ပေါ်က ဈေးတွေကို မျှစ်တွေ ခုတ်ရောင်းလေ့ရှိပြီး တစ်နေ့ကို အနည်းဆုံး ကီလို ၅၀ လောက် အော်ဒါရလေ့ရှိတယ်လို့ ဆိုပါတယ်။
​ဗုဒ္ဓဟူးနေ့မှာတော့ ဖောက်သည်တစ်ယောက်က ကီလို ၂,၀၀၀ အော်ဒါမှာထားပါတယ်။ ဒါပေမဲ့ ရေမမြုပ်ဘဲ ကျန်နေတာက ဝါးရုံ ၅၀ လောက်ရှိတဲ့ စိုက်ခင်းတစ်ခုပဲ ကျန်တော့တာဆိုတော့ အော်ဒါကိုမီပါ့မလားလို့ သူက စိုးရိမ်နေပါတယ်။ တော်တော်လေး အရှုံးပေါ်နိုင်ပြီး ရေမြုပ်သွားတဲ့ စိုက်ခင်းနှစ်ခုကနေ ဝါးတွေခုတ်ဖို့ လှေကိုပဲ အသုံးပြုရနိုင်တယ်လို့လည်း သူက ပြောပါတယ်။

အာဆီယံအတွင်းရေးမှူးချုပ်နှင့်အာဆီယံဆိုင်ရာမြန်မာသံရုံးတာဝန်ခံတို့ တွေ့ဆုံ

အာဆီယံ အတွင်းရေးမှူးချုပ် ဒေါက်တာ ကောင်းကင်ဟွန်း သည် အာဆီယံဆိုင်ရာ ပြည်ထောင်စုသမ္မတ မြန်မာနိုင်ငံတော် အမြဲတမ်းကိုယ်စားလှယ်ရုံးယာယီတာဝန်ခံ ဦး မန်ဟောက်ထန် နှင့် ယနေ့နံနက်ပိုင်းက ဂျကာတာမြို့၌ မနက်စာ သုံးဆောင်ရင်း တွေ့ဆုံဆွေးနွေးခဲ့ကြောင်း သိရသည်။
၎င်းတို့သည် အာဆီယံ အသိုက်အဝန်း တည်ဆောက်ရေး လုပ်ငန်းစဉ်များကို တိုးမြှင့်ဆောင်ရွက်ရန်၊ ဒေသတွင်း ပေါင်းစည်းညီညွတ်မှုကို ပိုမိုနက်ရှိုင်းစေရန်နှင့် ဒေသတွင်းမှသည် ကမ္ဘာ့စိန်ခေါ်မှုများကို ဖြေရှင်းဆောင်ရွက်ရန် အပါအဝင် အာဆီယံ၏ လက်ရှိ ကြိုးပမ်းအားထုတ်မှုများနှင့် ပတ်သက်၍ အမြင်ချင်းဖလှယ် ဆွေးနွေးခဲ့ကြကြောင်း သိရသည်။

ကမာရွတ်တွင် ဘဏ်ရှေ့ရပ်ထားသည့် ကားပေါ်မှ ငွေကျပ် သိန်း ၆၀၀ ခိုးယူသူကို သက်သေခံပစ္စည်းများနှင့်အတူ ရက်ပိုင်းအတွင်း ဖမ်းဆီးရမိ

ရန်ကုန်တိုင်းဒေသကြီး၊ ကမာရွတ်မြို့နယ်ရှိ MAB ဘဏ်ရှေ့တွင် ရပ်တန့်ထားသော မော်တော်ယာဉ်ပေါ်မှ ငွေကျပ် သိန်း ၆၀၀ ခိုးယူသွားသူအား သက်သေခံ ရွှေထည်နှင့် ငွေကျပ် သိန်း ၃၄၀ နှင့်အတူ ဖမ်းဆီးရမိခဲ့ကြောင်း ရဲတပ်ဖွဲ့သတင်းများအရ သိရသည်။
ဖြစ်စဉ်မှာ လှိုင်မြို့နယ်နေ အသက် ၅၂ နှစ်အရွယ် အမျိုးသမီးတစ်ဦးသည် ဩဂုတ်လ ၅ ရက် နေ့လယ် ၁၂ နာရီ ၁၅ မိနစ်ခန့်တွင် YGN 8F/2F----- NISSAN MARCH အမျိုးအစား မော်တော်ယာဉ်ဖြင့် ကမာရွတ်မြို့နယ်၊ (၁) ရပ်ကွက်၊ အင်းစိန်လမ်းမပေါ်ရှိ MAB ဘဏ်အနီး သို့ ရောက်ရှိလာခဲ့ပြီး ကားကို လော့ချ၍ ဘဏ်အတွင်းသို့ ၆ မိနစ်ခန့် ငွေအပ်နှံရန် သွားရောက်စုံစမ်းခဲ့သည်။
ထို့နောက် ကားဆီသို့ ပြန်လည်ထွက်ခွာလာပြီး စစ်ဆေးရာ ကားနောက်ခန်းတွင် ထားရှိသည့် ငွေကျပ် သိန်း ၆၀၀ ပျောက်ဆုံးနေသည်ကို တွေ့ရှိရသဖြင့် ကမာရွတ်မြို့မရဲစခန်း၌ တိုင်တန်းခဲ့ရာ ရဲစခန်းက (ပ) ၁၅၂/၂၀၂၆၊ ရာဇသတ်ကြီးပုဒ်မ - ၃၇၉ ဖြင့် အမှုဖွင့်လှစ်ကာ တရားခံအား စုံစမ်းဖော်ထုတ်ခဲ့သည်။
လုံခြုံရေးတပ်ဖွဲ့ဝင်များက အခင်းဖြစ်နေရာအား စစ်ဆေးခြင်းနှင့် သတင်းရယူစုံစမ်းခြင်းများ ဆောင်ရွက်ခဲ့ရာ ခိုးမှုကျူးလွန်သူ ဧရာဝတီတိုင်းဒေသကြီး၊ ဟင်္သာတမြို့နယ်၊ အုန်းကုန်းကျေးရွာနေ ဇော်လတ် (ခ) အောင်ဇော်လတ် (၃၈) နှစ် အား ဩဂုတ်လ ၉ ရက် ညပိုင်းတွင် ၎င်း၏ နေအိမ်အနီး၌ ခိုးယူရာမှရရှိသည့် ငွေကျပ် ၁၄၀ သိန်းနှင့်အတူ စတင်ဖမ်းဆီးရမိခဲ့သည်။
ဖမ်းဆီးရမိသူ တရားခံ ဇော်လတ်အား စစ်ဆေးမေးမြန်းရာ ၎င်းသည် ဩဂုတ်လ ၅ ရက် မနက်ပိုင်းတွင် ယာဉ်ပိုင်ရှင် အမျိုးသမီး ကားပေါ်မှဆင်း၍ လော့ချစဉ် ဝဲဘက်အနောက်တံခါး လက်ကိုင်ကွင်းအား လော့ချမရအောင် မတင်ထားခဲ့ကြောင်း၊ ထို့နောက် ယာဉ်ပိုင်ရှင် ဘဏ်အတွင်းဝင်သွားချိန်တွင် နောက်ခန်းရှိ ငွေကျပ် သိန်း ၆၀၀ ကို ခိုးယူခဲ့ခြင်းဖြစ်ကြောင်း ထွက်ဆိုခဲ့သည်။
ဆက်လက်၍ သက်သေခံပစ္စည်းများ သိမ်းဆည်းရမိရေး ဆောင်ရွက်ခဲ့ရာ ဩဂုတ်လ ၁၁ ရက် နေ့လယ်ပိုင်းတွင် ခိုးရာပါငွေများအနက်မှ ဝယ်ယူထားသည့် ရွှေလက်စွပ် ၂ ကွင်းနှင့် ငွေကျပ် သိန်း ၁၀၀ ကို ဆိမ့်ကြီးခနောင်တိုမြို့နယ်၊ ဆိမ့်ကြီးအရှေ့ရပ်ကွက်ရှိ နေအိမ်မှလည်းကောင်း၊ နောက်ထပ် ငွေကျပ် သိန်း ၁၀၀ ကို အမှတ် (၅) ရပ်ကွက်ရှိ နေအိမ်မှလည်းကောင်း အသီးသီး သိမ်းဆည်းရမိခဲ့သည်။
လက်ရှိတွင် ငွေကျပ် သိန်း ၆၀၀ ခိုးယူသူ တရားခံ ဇော်လတ် (ခ) အောင်ဇော်လတ်အား သက်သေခံ ရွှေလက်စွပ် ၂ ကွင်း၊ ငွေကျပ် သိန်း ၃၄၀ တို့နှင့်အတူ ဖမ်းဆီးရမိထားပြီး ဥပဒေနှင့်အညီ ထိရောက်စွာ အရေးယူနိုင်ရေး ဆက်လက်ဆောင်ရွက်လျက်ရှိကြောင်း သိရသည်။

ရေပြန်လည်ကျဆင်းလာပါက စာသင် ကျောင်းများ၊ ဆေးရုံနှင့် ဌာနဆိုင်ရာရုံးများကိုအမြန်ဆုံးဖွင့်လှစ်မည်

ရေပြန်လည်ကျဆင်းလာပါက စာသင် ကျောင်းများ၊ ဆေးရုံနှင့် ဌာနဆိုင်ရာရုံးများကိုအမြန်ဆုံးဖွင့်လှစ်မည်ဟု ဧရာဝ တီတိုင်းဝန်ကြီးချုပ်ဦးအေးကျော်က သြဂုတ် ၁၁ ရက်နံနက်ပိုင်းတွင်ပြုလုပ်သည့် ရေဘေးသင့်ဒေသများပြန်လည် ထူထောင်ရေးလုပ်ငန်းများဆွေးနွေးပွဲ၌ ပြောကြားခဲ့ခြင်းဖြစ်သည်။
လေးမျက်နှာမြို့နယ်ရှိ ရေဘေးသင့်သူများအတွက် ပြန်လည်ထူထောင်ရေးလုပ်ငန်းများဆောင်ရွက်နိုင်ရန် ဝိုင်း ဝန်းပံ့ပိုးကူညီကြရမည်ဖြစ်ပြီး ရေပြန်လည်ကျဆင်းပါက ပြန်လည်စိုက်ပျိုး ရေးလုပ်ငန်းများကို ဦးစားပေးအနေ ဖြင့်ဆောင်ရွက်ရမည်ဟု ပြောသည်။
ထို့ကြောင့် လိုအပ်သော စက်ယန္တရားများ၊ မျိုးစေ့နှင့် သွင်းအားစုများကို အသင့်စုဆောင်းပြင်ဆင်ထားရမည်ဖြစ်သည့်အပြင် စာသင်ကျောင်းများ၊ ဆေးရုံနှင့် ဌာနဆိုင်ရာရုံးများကိုလည်း အမြန်ဆုံးဖွင့်လှစ်ရမည်ဟု ပြောသည်။
ထို့ပြင် ဌာနဆိုင်ရာများအနေဖြင့် မိမိတို့ဌာန၏ မူလတာဝန်များအပြင် ရေ ဘေးသင့်ဒေသပြန်လည်ထူထောင်ရေးလုပ်ငန်းများတွင်လည်း တက်ညီလက် ညီပူးပေါင်းပါဝင်ဆောင်ရွက်ကြရမည်ဟု ပြောကြားခဲ့သည်။

တတိယအကြိမ်ပဲခူးတိုင်းဒေသကြီးလွှတ်တော် အထူးအစည်းအဝေး(၁/၂၀၂၆) ပထမနေ့အား သြဂုတ် ၁၃ ရက်တွင်ကျင်းပမည်

အထူးအစည်းအဝေး၌ အဆိုပြုတင်ပြခြင်း(၂)ခုပြု လုပ်မည်
တတိယအကြိမ်ပဲခူးတိုင်းဒေသကြီးလွှတ်တော် အထူးအစည်းအဝေး (၁/၂၀၂၆) ပထမနေ့အား မနက်ဖြန် သြဂုတ် ၁၃ ရက်တွင်ကျင်းပမည်ဖြစ်ကြောင်း အစည်းအဝေးအစီအစဥ်အရ သိရသည်။
အစည်းအဝေးတွင် တိုင်းဒေသကြီးလွှတ်တော်ဥက္ကဋ္ဌက အဖွင့်အမှာစ ကားပြောကြားပြီးနောက် ပဲခူးတိုင်းဒေသကြီး၏ ၂၀၂၆-၂၀၂၇ ဘဏ္ဍာ ရေးနှစ်အတွက် ဖြည့်စွက်ခွင့်ပြုငွေတောင်းခံခြင်းနှင့် ပြုပြင်ပြီးခန့်မှန်းခြေငွေစာရင်းလျာထားချက်တို့နှင့်ပတ် သက်၍ တိုင်းအစိုးရအဖွဲ့ စီမံကိန်း၊ စီးပွားရေးနှင့် ဘဏ္ဍာရေးဝန်ကြီးဌာန ဝန်ကြီးက တိုင်းဒေသကြီးလွှတ်တော်သို့တင်သွင်းသွားမည်ဖြစ်ကြောင်း သိရသည်။
ထို့ပြင် တိုင်းဒေသကြီးလွှတ်တော်ဥက္ကဋ္ဌက ပဲခူးတိုင်းဒေသကြီးလွှတ် တော် ဥပဒေကြမ်းနှင့် ပြည်သူ့ငွေစာ ရင်းပူးပေါင်းကော်မတီတွင်ပါဝင်သင့်သည့် အဖွဲ့ဝင်ဦးရေ၊ အဖွဲ့ဝင်များ၏ အမည်စာရင်း၊ ဥက္ကဋ္ဌနှင့် အတွင်းရေး မှူးတို့၏အမည်စာရင်းတို့ကို တိုင်းဒေ သကြီးလွှတ်တော်သို့အဆိုပြုတင်ပြမည်ဖြစ်ကြောင်း သိရသည်။
ထို့အတူ တိုင်းဒေသကြီးလွှတ်တော် ဒု-ဥက္ကဋ္ဌက ပဲခူး တိုင်းဒေသကြီးလွှတ် တော် ဥပဒေကြမ်းနှင့် ပြည်သူ့ငွေ စာ ရင်းပူးပေါင်းကော်မတီ၏ တာဝန်၊ လုပ်ပိုင်ခွင့်၊ ရပိုင်ခွင့်၊ သက်တမ်းတို့ကို တိုင်းဒေသကြီးလွှတ်တော်သို့ အဆိုပြုတင်ပြမည်ဖြစ်ကြောင်း သိရသည်။
ထို့ပြင် တိုင်းဒေသကြီးလွှတ်တော်ဥက္ကဋ္ဌက ပဲခူးတိုင်းဒေသကြီးလွှတ် တော် ဥပဒေကြမ်းနှင့် ပြည်သူ့ငွေစာ ရင်းပူးပေါင်းကော်မတီတွင်ပါဝင်သင့်သည့် အဖွဲ့ဝင်ဦးရေ၊ အဖွဲ့ဝင်များ၏ အမည် စာရင်း၊ ဥက္ကဋ္ဌ၊ အတွင်းရေး မှူးတို့၏ အမည်စာရင်းနှင့် ပူးပေါင်းကော်မတီ၏တာဝန်၊ လုပ်ပိုင်ခွင့်၊ ရ ပိုင်ခွင့်၊ သက်တမ်းတို့ကို တိုင်းဒေသကြီးလွှတ်တော်၏ အဆုံးအဖြတ်ရယူပြီး အတည်ပြုကြောင်းကြေညာမည်ဖြစ်ကြောင်း သိရသည်။
ထို့အတူ တိုင်းဒေသကြီးစာရင်းစစ် ချုပ်၏ လုပ်ငန်းဆောင်ရွက်မှုအစီ ရင်ခံစာအား တိုင်းဒေသကြီးလွှတ် တော်သို့တင်ပြမည်ဖြစ်ကြောင်း သိရသည်။

ငဝန်တာတမံပြုပြင်ရာ၌ ​Sheet Pile ရိုက်ရမည့် သံချောင်း(၂၈၆)ချောင်းအနက် ယ​နေ့ သြဂုတ် ၁၂ ရက်အထိ (၇၂)ချောင်းရိုက်သွင်းပြီးဖြစ်

ဧရာဝတီတိုင်း၊ လေးမျက်နှာမြို့နယ်ရှိ ငဝန်တာတမံနိမ့်ကျ၍ ရေကျော်စီးဝင်ခဲ့သည့်နေရာအား ​ဆောက်လုပ်​ရေးဝန် ကြီးဌာနမှစီမံကြီးကြပ်၍ Sheet Pile ရိုက်၍ ကာရံခြင်းလုပ်ငန်းများအား အ ချိန်တိုအတွင်းပြီးစီးနိုင်​ရေးအတွက်အ ရှိန်အဟုန်ဖြင့်ဆောင်ရွက်လျက်ရှိကြောင်း သိရသည်။
ထိုသို့ Sheet Pile ရိုက်ရာတွင် ရိုက်ရမည့် သံချောင်းအရေအတွက်(၂၈၆) ချောင်းအနက် ယနေ့ သြဂုတ် ၁၂ ရက်အထိ သံချောင်း(၇၂)ချောင်းကိုရိုက်သွင်းပြီးဖြစ်ကာ Sheet Pile ဆက်ခြင်းလုပ်ငန်းများကိုဆက်လက်​ဆောင် ရွက်​လျက်ရှိကြောင်း သိရသည်။
အဆိုပါ လုပ်ငန်းများကို လူအင်အား၊ စက်ယာဉ်/ယန္တ ရားများဖြင့် ​နေ့ညမပြတ်အရှိန်အဟုန်ဖြင့်ဆောင်ရွက်လျက်ရှိကြောင်း သိရသည်။

စိန်ခေါ်မှုများကိုဖြေရှင်းရာ၌ မျိုးဆက်သစ်လူငယ်များ၏ အရည်အချင်းများမှာအဓိကမောင်းနှင်အားများအဖြစ်ပါဝင်နေသည်ဟု နိုင်ငံတော်သမ္မတ ဦးမင်းအောင် လှိုင် ပြော

စိန်ခေါ်မှုများကိုဖြေရှင်းရာ၌ လူငယ်များအရေးကြီးသည့်အခန်းကဏ္ဍမှပါဝင်နေခြင်းနှင့်ပတ်သက်၍ နိုင်ငံတော်သမ္မတ ဦးမင်းအောင်လှိုင် ကအထက်ပါအတိုင်းပြောကြားခဲ့ခြင်းဖြစ်သည်။
ယနေ့ သြဂုတ် ၁၂ ရက်နံနက်ပိုင်းက နေပြည်တော်ရှိ MICC-1 ၌ "နောက်ခံမတူငြား၊ ရည်မှန်းတူထား၊ လူငယ်အား"ဆောင်ပုဒ်နှင့်အညီကျင်းပသည့် ၂၀၂၆ ခုနှစ်၊ အပြည်ပြည်ဆိုင်ရာလူငယ်များနေ့အခမ်းအနားတွင် နိုင်ငံတော်သမ္မတက ပြောကြားခဲ့ခြင်းဖြစ်သည်။
ယနေ့ကမ္ဘာကြီး၌ ရုပ်ပိုင်းဆိုင်ရာပြောင်းလဲမှုများ၊ ဒီဂျစ်တယ်နှင့် ဉာဏ်ရည်တုနည်းပညာများဖွံ့ဖြိုးတိုး တက်လာခြင်းနှင့်အတူ ရာသီဥတုဖောက်ပြန်ပြောင်းလဲမှုများ၊ သဘာဝဘေးအန္တရာယ်ရိုက်ခတ်မှုများ၊ လူမှုစီးပွားစိန်ခေါ်မှုများသည် နိုင်ငံတစ်နိုင်ငံချင်းစီ၏ နယ်နိမိတ်များကိုကျော်လွန်ပြီး ကမ္ဘာလုံးဆိုင်ရာဘုံအရေးကိစ္စများအဖြစ်ပေါ်ပေါက်လျက်ရှိသည်ဟု ပြောသည်။
" အဲ့ဒီ စိန်ခေါ်မှုတွေကို ဖြေရှင်းဆောင်ရွက်ရာမှာ မျိုးဆက်သစ်လူငယ်တွေရဲ့ တက်ကြွတဲ့ ပေါင်းစည်းအား၊ အခက်အခဲကိုအခွင့်အရေးအဖြစ်အသွင်ပြောင်းလဲနိုင်မှုအရည်အသွေးနဲ့ ဆန်းသစ်တီထွင်ဖန်တီးနိုင်မှုတွေက အဓိကမောင်းနှင်အားတွေအဖြစ်ပါဝင်နေပါတယ်"ဟု နိုင်ငံတော်သမ္မတက ပြောသည်။
ထို့ကြောင့် အနာဂတ်အတွက်အရေးပါသည့် စွမ်းအားစုများဖြစ်သော လူငယ်များ၏ ရည်မှန်းချက်နှင့် အခွင့်အလမ်းများကို ပိုမိုဖော်ဆောင်ပေးနိုင်ရန်နှင့် လူငယ်များ ကြုံတွေ့နေရသည့် အခက်အခဲများကို ကျော်လွှားနိုင်ရန်အတွက် ထိရောက်သည့်ပံ့ပိုးကူညီမှုများနှင့် ရင်းနှီးမြှုပ် နှံမှုများကို စနစ်တကျချဉ်းကပ်ဆောင်ရွက်ရန် အလွန်အရေးကြီးသည်ဟု နိုင်ငံတော်သမ္မတက ပြောကြားခဲ့သည်။

မျိုးဆက်သစ်လူငယ်များ၏ပေါင်းစည်းအားသည် ငြိမ်းချမ်းရေးနှင့် ဖွံ့ဖြိုးမှုပန်းတိုင်ကိုရောက်ရှိရန် အထောက်အပံ့များစွာရရှိနိုင်ဟု နိုင်ငံတော်သမ္မတ ဦးမင်းအောင်လှိုင် ပြော

ငြိမ်းချမ်းရေးတည်ဆောက်မှုလုပ်ငန်းစဥ်တွင် လူငယ်များ၏ပေါင်းစည်းအားအရေးကြီးခြင်းနှင့်ပတ်သက်၍ နိုင်ငံတော်သမ္မတ ဦးမင်းအောင်လှိုင်က ယနေ့ သြဂုတ် ၁၂ ရက်နံနက်ပိုင်းတွင် နေပြည်တော်ရှိ MICC-1 ၌ "နောက်ခံမတူငြား၊ ရည်မှန်းတူထား၊ လူငယ်အား" ဆောင်ပုဒ်နှင့်အညီကျင်းပသည့် ၂၀၂၆ ခုနှစ်၊ အပြည်ပြည်ဆိုင်ရာလူငယ်များနေ့အခမ်းအနား၌ အထက်ပါအတိုင်းပြောကြားခဲ့ခြင်းဖြစ်သည်။
" ငြိမ်းချမ်းရေးတည်ဆောက်မှုလုပ် ငန်းစဉ်တွေမှာ မျိုးဆက်သစ်လူငယ်တွေရဲ့ ရင့်ကျက်တဲ့အတွေးအခေါ်၊ မှန်ကန်တဲ့လုပ်ရပ်စတဲ့ပေါင်းစည်းအားတွေနဲ့ဆောင်ရွက်ကြမယ်ဆိုရင် အား လုံးလိုချင်တဲ့ ငြိမ်းချမ်းရေးနဲ့ဖွံ့ဖြိုးမှုပန်းတိုင်ကိုရောက်ရှိဖို့ အထောက်အပံ့တွေများစွာရရှိနိုင်မှာဖြစ်ပါတယ်"ဟု နိုင်ငံတော်သမ္မတက ပြောသည်။
ထို့ပြင် ဖွံ့ဖြိုးတိုးတက်နေသည့်ခေတ်တွင်ပြောင်းလဲမှုများနှင့်အတူ တည်ငြိမ်အေးချမ်းပြီး သဟဇာတဖြစ်သည့် လူ့အဖွဲ့အစည်းတစ်ရပ်ကိုတည်ဆောက်နိုင်မှသာ စဉ်ဆက်မပြတ်ဖွံ့ဖြိုးတိုးတက်သည့် အနာဂတ်အသီးအပွင့်များကိုဖော်ဆောင်နိုင်မည်ဟု ပြောသည်။
ထို့အတူ အားလုံးရင်ဆိုင်နေကြရသည့် စိန်ခေါ်မှုများကို အတူတကွဖြေရှင်းဆောင်ရွက်ရာတွင် လူငယ်များ၏ အရည်အချင်းနှင့် အရင်းအမြစ်များကို စုစည်းစွမ်းအားအဖြစ်အသုံးပြုကြရန်လည်း နိုင်ငံတော်သမ္မတက အလေးနက်ထားတိုက်တွန်းပြောကြားခဲ့သည်။
" လူငယ်တွေအနေနဲ့ နိုင်ငံတကာအသိုက်အဝန်းအတွင်းမှာ တက်တက်ကြွကြွပူးပေါင်းပါဝင်ကြဖို့လိုအပ်ပါတယ်။ မြန်မာလူငယ်တွေကို နိုင်ငံတော်ရဲ့အ ပြုသဘောဆောင်တဲ့ ကိုယ်စားလှယ်တွေအဖြစ် ကမ္ဘာ့အသိုက်အဝန်းနဲ့ရင် ပေါင်တန်းဆောင်ရွက်နိုင်စေဖို့အတွက် နိုင်ငံတော်က စဉ်ဆက်မပြတ်အားပေးဖြည့်ဆည်းဆောင်ရွက်ပေးနေပါတယ်" ဟုနိုင်ငံတော်သမ္မတက ပြောသည်။
ထို့ကြောင့် နိုင်ငံတစ်လွှားမှ လူငယ်များအားလုံး အသိပညာ၊ အတတ်ပညာများနှင့် ပြည့်ဝနေရုံသာမက ခေတ် မီနည်းပညာတတ်ကျွမ်းမှုများနှင့် ပြည့် စုံအောင်ကြိုးစားရန်၊ မိမိတို့၏ အဖိုး တန်ထက်မြက်လှသည့် စွမ်းရည်များကို နိုင်ငံတော်တည်ဆောက်ရေးလုပ်ငန်းစဉ်များတွင် တာဝန်ယူမှု၊ တာဝန်ခံမှုအပြည့်ဖြင့် တက်ကြွစွာပါဝင်ဆောင်ရွက်ရန်၊ နိုင်ငံတော်၏အနာဂတ်ဖွံ့ဖြိုးတိုးတက်မှုလုပ်ငန်းတတာဝန်ယူနိုင်သည့်ဝန်များကို လက်ဆင့်ကမ်းပခုံးပြောင်းကာ နိုင်ငံတော်က အားကိုးအားထားပြုနိုင်သော နိုင်ငံ့ရတနာ လူချွန်၊ လူကောင်းများဖြစ်လာအောင် ကြိုးစားလေ့ကျင့်ပျိုးထောင်ရန် နိုင်ငံတော်သမ္မတက တိုက်တွန်းပြောကြားခဲ့သည်။

သစ်ကိုင်းကျိုးကျမှုကြောင့် အဝေးပြေးခရီးသည်တင်ကားပေါ် ဓာတ်ကြိုးပြုတ်ကျပြီး (၁)ဦး‌ေ-သဆုံး၊ (၂)ဦးဒ-ဏ်ရာရခဲ့မှု ပြင်ဦးလွင်မြို့တွင်ဖြစ်ပွား

မန္တလေးတိုင်း၊ ပြင်ဦးလွင်မြို့တွင် သြဂုတ် ၁၂ ရက်ည ၁၀ နာရီခွဲကျော်ခန့်က သစ်ကိုင်းကျိုးကျမှုကြောင့် အဝေးပြေးခရီးသည်တင်ကားပေါ် ဓာတ်ကြိုးပြုတ်ကျရာမှ ‌ေ-သဆုံး၊ ဒ-ဏ်ရာရမှုများဖြစ်ပွားခဲ့ကြောင်း သိရသည်။
ပြင်ဦးလွင်မြို့နယ်၊ ရပ်ကွက်ကြီး(၃)၊ အောင်ဇေယျလမ်း၌ တောင်တမာ ပင်၏သစ်ကိုင်းကျိုးကျမှုကြောင့် ရပ်တန့်ထားသည့် အဝေးပြေးခရီးသည်တင်ကားပေါ်သို့ ဓာတ်ကြိုးပြုတ်ကျကာ ကားပေါ်ရှိ အမျိုးသား(၃)ဦးဓာတ်လိုက်မှုဖြစ်ပွားခဲ့ကြောင်း သိရသည်။
ဖြစ်စဥ်ကြောင့် အမျိုးသား(၁)ဦးမှာ အခင်းဖြစ်နေရာ၌ ‌ေ-သဆုံးသွားခဲ့ပြီး အမျိုးသား(၂)ဦးတွင်လည်း ထိခိုက်ဒ-ဏ်ရာများ(စိုးရိမ်ရနှင့် မစိုးရိမ်ရ)များရရှိခဲ့ကြသဖြင့် သန္တိသုခလူမှုကူညီရေးအသင်းက ပြင်ဦးလွင်မြို့နယ်ပြည်သူ့ဆေးရုံကြီးသို့ပို့ဆောင်ပေးခဲ့ကြကြောင်း သိရသည်။

အင်ဒို၌ကူးတို့သင်္ဘောမီးလောင်၊ တစ်ဦး‌ေ-သ၊ ၁၇၂ ဦးကယ်တင်ထားနိုင်

အင်ဒိုနီးရှားနိုင်ငံ ဘာလီ ခရီးသွားကျွန်းမှ ထွက်ခွာလာသော ကူးတို့သင်္ဘောတစ်စင်းသည် လွမ်ဘော့ခ်ကမ်းလွန်ရေပြင်တွင် မီးလောင်ခဲ့သည်။ဗုဒ္ဓဟူးနေ့တွင် လူ ၁၇၂ ဦးကို ကယ်တင်ထားနိုင်ကြောင်း အာဏာပိုင်များက ပြောကြားခဲ့ပြီး ပျောက်ဆုံးနေဆဲဖြစ်သည့် အခြားခရီးသည်များကို ဆက်လက်ရှာဖွေနေဆဲဖြစ်သည်။
KM Putri Yasmin ကူးတို့သင်္ဘောသည် ဘာလီရှိ ပါဒန်ဘိုင်ဆိပ်ကမ်းမှ အနောက် နူဆာ တန်ဂါရာပြည်နယ် လွမ်ဘော့ရှိ လမ်ဘားဆိပ်ကမ်းသို့ ခုတ်မောင်းနေခြင်းဖြစ်ကြောင်း ဒေသခံကယ်ဆယ်ရေးအေဂျင်စီအကြီးအကဲ မူဟာမက် ဟာရီယာဒီက ပြောကြားခဲ့သည်။
ဗုဒ္ဓဟူးနေ့ နံနက် ၄း၃၉ နာရီခန့်က လွမ်ဘော့ခ်ရေလက်ကြားတွင် အဆိုပါဖြစ်ရပ်ဖြစ်ပွားခဲ့ခြင်းဟု ဟာရီယာဒီက ရိုက်တာကို ပြောကြားခဲ့သည်။
ဖြစ်စဉ်အတွင်း အင်ဒိုနီးရှားလူမျိုးတစ်ဦး သေဆုံးကြောင်း ဗုဒ္ဒဟူးနေ့ မွန်းလွဲပိုင်းတွင် အတည်ပြုခဲ့ပြီး လူ ၁၇၂ ဦးကို ဘာလီနှင့် လွမ်ဘော့ခ်ဆိပ်ကမ်းများသို့ ပို့ဆောင်ပေးခဲ့ကြောင်း ဟာရီယာဒီက ပြောကြားခဲ့သည်။
“အသက်ရှင်လွတ်မြောက်ခဲ့သူများအနက်တစ်ဦးသည် သြစတြေးလျလူမျိုးဖြစ်ပြီး ကျန်သူများမှာ အင်ဒိုနီးရှားများဖြစ်သည်။ ဘေးလွတ်ရာကို ရွှေ့ပြောင်းဖို့နဲ့ အခင်းဖြစ်နေရာအနီးက အခြားရေယာဉ်တွေနဲ့ ပူးပေါင်းဆောင်ရွက်ဖို့အတွက် လှေတစ်ချို့လွှတ်ပေးထားပါတယ်” ဟု ဟာရီယာဒီက ပြောဆိုခဲ့ပြီး လုပ်ငန်းစဉ်ကို ကိုင်တွယ်ရန် ဝန်ထမ်း ၂၀၀ ကျော်စေလွှတ်ထားကြောင်း ထပ်လောင်း ပြောကြားခဲ့သည်။
ကူးတို့သင်္ဘောမီးလောင်ရသည့် အကြောင်းရင်း သည် လူပြည့်ကျပ်စွာ တင်ဆောင်ခြင်းကြောင့်လား၊ မတော်တဆဖြစ်ရသည်လားဟူသည့်အကြောင်းရင်းကို မူရှင်းရှင်းလင်းလင်း မသိရသေးပေ။
ကူးတို့သင်္ဘော၏ ခရီးစဉ်တွင် စာရင်း အရ ခရီးသည် ၁၁၄ ဦးနှင့် သင်္ဘောအမှုထမ်း ၁၇ ဦး သာရှိကြောင်း ဘာလီရှိ ပါဒန်ဘိုင်ဆိပ်ကမ်း အရာရှိ ဟာရီ ဝီယန်တိုက ယနေ့အစောပိုင်းတွင် ပြောကြားခဲ့သည်။
မာဒူရာကျွန်းတွင် KM Mutiara 2 အမည်ရ သင်္ဘောတစ်စင်း မီးလောင်ကာ လူ ငါးဦး သေဆုံးခဲ့ပြီး တစ်လပင်မပြည့်မီပင် ယခုဖြစ်ရပ်ဖြစ်ပွားခဲ့သည်။ အဆိုပါသင်္ဘောသည်လည်း ၎င်း၏ ခရီးစဉ်တွင် စာရင်းပါ ခရီးသည် အရေအတွက် ထက် ပို၍ လူတင်ဆောင်ထားခဲ့ခြင်းဖြစ်သည်။