ဖလမ်းမြို့တွင် MPT ဖုန်းလိုင်း ပြန်လည်ရရှိ၊ SIM Card များ ပြန်လည်အသုံးပြုနိုင်ရေး ဝန်ဆောင်မှုပေးနေ


ဖလမ်းမြို့တွင် မြန်မာ့ဆက်သွယ်ရေးလုပ်ငန်း (MPT) ၏ Mobile ဖုန်းလိုင်းများ ပြန်လည်ရရှိလာပြီဖြစ်သဖြင့် ယနေ့မှစတင်ကာ ပြည်သူများ၏ MPT Mobile SIM Card များ ပြန်လည်အသုံးပြုနိုင်ရေးအတွက် လိုအပ်သည့် ဝန်ဆောင်မှုများ ဆောင်ရွက်ပေးလျက်ရှိကြောင်း သိရသည်။

အကြမ်းဖက်ဖြစ်စဉ်များကြောင့် ဖလမ်းမြို့၌ တယ်လီဖုန်းဆက်သွယ်ရေးလိုင်းများ ပြတ်တောက်ခဲ့ပြီး ယခင်က MEC-CDMA ဖုန်းလိုင်းကိုသာ အသုံးပြုခဲ့ရကြောင်း သိရသည်။

ယခုအခါ MPT Mobile ဖုန်းလိုင်းများ ပြန်လည်ရရှိလာသဖြင့် ပြည်နယ် MPT ဝန်ထမ်းများက ဖလမ်းမြို့ အထွေထွေအုပ်ချုပ်ရေးဦးစီးဌာန၌ အခြေပြု၍ ပြည်သူများအတွက် ဆက်သွယ်ရေးဝန်ဆောင်မှုများ ဆောင်ရွက်ပေးလျက်ရှိသည်။

ထိုသို့ ဆောင်ရွက်ပေးရာတွင် ပျောက်ဆုံးသွားသည့် SIM Card များနှင့် ပျက်စီးသွားသည့် SIM Card များအတွက် ပြန်လည်လျှောက်ထားနိုင်ရေး ဆောင်ရွက်ပေးခြင်း၊ SIM Card များ မှတ်ပုံတင်ပေးခြင်းနှင့် SIM Card အသစ်များ ရောင်းချပေးခြင်းတို့ ပါဝင်ကြောင်း သိရသည်။

အဆိုပါ ဆက်သွယ်ရေးဝန်ဆောင်မှုများ ပြန်လည်ဆောင်ရွက်ပေးနေမှုကို လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန ဒုတိယဝန်ကြီး ဒေါက်တာသန့်ဇော်လွင်က ပြည်နယ်သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီး၊ ချင်းပြည်နယ်အတွင်း ပြန်လည်ထူထောင်ရေးနှင့် ပြန်လည်တည်ဆောက်ရေးကော်မတီဝင်များနှင့်အတူ သွားရောက်ကြည့်ရှုအားပေးခဲ့ကြောင်း သိရသည်။

ရန်ကုန်-မန္တလေး အမြန်လမ်းတွင် Toll Pass RFID အလိုအလျောက် လမ်းအသုံးပြုခ ကောက်ခံမှု ယနေ့စတင်

ရန်ကုန်၊ စက်တင်ဘာ ၁၇

ရန်ကုန်-မန္တလေး အမြန်လမ်းမကြီးတွင် ကြိုတင်ငွေပေးသွင်း၍ အလိုအလျောက် လမ်းအသုံးပြုခ ကောက်ခံသည့် Toll Pass RFID စနစ်ကို ယနေ့မှစတင်၍ ပိတ်ရက်မရှိ စတင်အသုံးပြုနိုင်ပြီဖြစ်ကြောင်း သိရသည်။

အဆိုပါစနစ်ကို ရန်ကုန်-မန္တလေး အမြန်လမ်းမကြီး၏ အမှတ် (၃) တိုးဂိတ် (၀ မိုင် ၇ ဖာလုံ)၊ စီလမ်းဆုံ တိုးဂိတ် (၂၀၁ မိုင် ၃ ဖာလုံ) နှင့် စကားအင်း တိုးဂိတ် (၃၅၂ မိုင် ၄ ဖာလုံ) တို့တွင် ကနဦး ဝန်ဆောင်မှု ပေးလျက်ရှိသည်။
ယာဉ်ပိုင်ရှင်များအနေဖြင့် စမတ်ဖုန်း၊ တပ်ဆင်မည့်ယာဉ်နှင့် ကညန ယာဉ်မှတ်ပုံတင် (ဝှီးတက်) တို့ယူဆောင်၍ ဖော်ပြပါ တိုးဂိတ်များရှိ Toll Pass Counter များတွင် သွားရောက်လျှောက်ထားနိုင်သည်။

တပ်ဆင်ခအဖြစ် RFID စတစ်ကာနှင့် တစ်နှစ်စာ ဝန်ဆောင်ခ ကျပ် ၂၀,၀၀၀ ကျသင့်မည်ဖြစ်ပြီး ကြိုတင်ငွေဖြည့်သွင်းမှုအတွက် အနည်းဆုံး ကျပ် ၅,၀၀၀ တန်ဖိုးရှိ ၅,၀၀၀ TPU မှစတင်၍ ဖြည့်သွင်းရမည်ဖြစ်သည်။

စတင်ရောင်းချသည့်နေ့တွင် ငွေသားဖြင့်သာ လက်ခံမည်ဖြစ်ပြီး မကြာမီ MMQR၊ KBZ Pay၊ AYA Pay နှင့် Wave Pay စသည့် အွန်လိုင်း ငွေပေးချေမှုစနစ်များနှင့် ချိတ်ဆက်သွားမည်ဖြစ်သည်။

Toll Pass စနစ် တပ်ဆင်ထားသည့် ယာဉ်များသည် တိုးဂိတ်များရှိ သီးသန့်ယာဉ်ကြောမှ အများဆုံး မိုင် ၂၀ (တစ်နာရီလျှင် ၂၀ ကီလိုမီတာ) နှုန်းဖြင့် မောင်းနှင်ရမည်ဖြစ်ကာ မောင်းတံ အလိုအလျောက်ပွင့်သွားမည်ဖြစ်သဖြင့် တန်းစီစောင့်ဆိုင်းရန်မလိုဘဲ တိုက်ရိုက် ဖြတ်သန်းနိုင်မည်ဖြစ်သည်။

ယင်းစနစ်သည် ဖုန်း အပလီကေးရှင်းမှတစ်ဆင့် လက်ကျန်ငွေ၊ ဖြတ်သန်းမှုမှတ်တမ်း စစ်ဆေးနိုင်ခြင်းနှင့် အွန်လိုင်းမှ ငွေဖြည့်သွင်းနိုင်ခြင်းတို့ကြောင့် ပိုမိုလွယ်ကူ လုံခြုံသည့် စနစ်ဖြစ်ကြောင်း သိရသည်။

ဘရူနိုင်းနိုင်ငံဆိုင်ရာ မြန်မာသံအမတ်ကြီး အာဆီယံနိုင်ငံများမှ သံအမတ်ကြီးများနှင့် သီးခြားစီမိတ်ဆက်တွေ့ဆုံ၊ သံရုံးများအကြား ပူးပေါင်းဆောင်ရွက်ရေး ဆွေးနွေး

ဘရူနိုင်းနိုင်ငံဆိုင်ရာ မြန်မာသံအမတ်ကြီး ဦးစိုးသက်နောင်သည် စက်တင်ဘာ ၈ ရက်မှ ၁၆ ရက်အတွင်း ဘရူနိုင်းနိုင်ငံဆိုင်ရာ အာဆီယံအဖွဲ့ဝင်နိုင်ငံများမှ သံအမတ်ကြီးများနှင့် သီးခြားစီ မိတ်ဆက်တွေ့ဆုံခဲ့ကြောင်း သိရသည်။

ထိုသို့တွေ့ဆုံရာတွင် စင်ကာပူသံအမတ်ကြီး Yip Wei Kiat၊ မလေးရှားသံအမတ်ကြီး Datuk Mohd Aini Atan၊ တီမောလက်စ်တေသံအမတ်ကြီး Abel Guterres နှင့် လာအိုသံအမတ်ကြီး Heuankeo Sangsomsak တို့နှင့် သီးခြားစီ မိတ်ဆက်တွေ့ဆုံခဲ့ခြင်းဖြစ်သည်။

တွေ့ဆုံမှုများအတွင်း အာဆီယံအဖွဲ့ဝင်နိုင်ငံများ၏ သံရုံးများအကြား ပူးပေါင်းဆောင်ရွက်မှု ပိုမိုမြှင့်တင်ရေးနှင့် သက်ဆိုင်ရာ နှစ်နိုင်ငံဆက်ဆံရေးဆိုင်ရာ ကိစ္စရပ်များကို အမြင်ချင်းဖလှယ် ဆွေးနွေးခဲ့ကြကြောင်း သိရသည်။

မြန်မာတက်ရှ်ဘောအသင်း အာရှအားကစားပြိုင်ပွဲတွင် အမျိုးအစား (၃) မျိုး ဝင်ရောက်ယှဥ်ပြိုင်မယ်

မြန်မာတက်ရှ်ဘောအသင်းဟာ ၂၀၂၆ အာရှအားကစားပြိုင်ပွဲတွင် အမျိုးအစား (Event) ၃ မျိုး ဝင်ရောက်ယှဥ်ပြိုင်သွားမှာ ဖြစ်ကြောင်း သိရပါတယ်။

မြန်မာတက်ရှ်ဘောအသင်းဟာ ၂၀၂၆ အာရှအားကစားပြိုင်ပွဲတွင် အမျိုးသားတစ်ဦးချင်း (Men Single)၊ အမျိုးသမီးတစ်ဦးချင်း (Women Single) နဲ့ အမျိုးသမီးနှစ်ယောက်တွဲ (Women Double) အမျိုးအစားတို့မှာ ဝင်ရောက်ယှဥ်ပြိုင်သွားမှာ ဖြစ်ကြောင်း သိရပါတယ်။

မြန်မာတက်ရှ်ဘောအသင်းဟာ အမျိုးသားတစ်ဦးချင်း (Men Single) တွင် စောဖရိုက်ဒေး၊ အမျိုးသမီးတစ်ဦးချင်း (Women Single) တွင် ခင်နှင်းဝေ၊ အမျိုးသမီးနှစ်ယောက်တွဲ (Women Double) တွင် ဆုမွန်အောင်နဲ့ ဖြူဖြူသန်းတို့ ဝင်ရောက်ယှဥ်ပြိုင်ကြမှာ ဖြစ်ကြောင်း သိရပါတယ်။

မြန်မာတက်ရှ်ဘောအသင်းဟာ ၂၀၂၆ အာရှအားကစားပြိုင်ပွဲဝင်ရန် စက်တင်ဘာ ၁၅ ရက်က ရန်ကုန်မြို့မှ ထွက်ခွာသွားခဲ့ကြောင်း သိရပါတယ်။

၂၀၂၆ အာရှအားကစားပြိုင်ပွဲရဲ့ တက်ရှ်ဘောအားကစားနည်းကို စက်တင်ဘာ (၁၇) ရက်ကနေ (၂၀) ရက်အထိ ကျင်းပပြုလုပ်သွားမှာဖြစ်ပြီး အမျိုးအစား (Event) ၅ မျိုး ထည့်သွင်းကျင်းပမှာ ဖြစ်ကြောင်း သိရပါတယ်။

အကြိမ် (၂၀) မြောက် ၂၀၂၆ အာရှအားကစားပြိုင်ပွဲကို စက်တင်ဘာ ၁၉ ရက်ကနေ အောက်တိုဘာ ၄ ရက်အထိ ဂျပန်နိုင်ငံ၊ နာဂိုယာနဲ့ အီချီမြို့တွေမှာ ကျင်းပပြုလုပ်သွားမှာဖြစ်ပါတယ်။

အကြိမ် (၂၀) မြောက် ၂၀၂၆ အာရှအားကစားပြိုင်ပွဲ ဖွင့်ပွဲအခမ်းအနားက စက်တင်ဘာ ၁၉ မှ စတင်မှာ ဖြစ်သော်လည်း တချို့သောအားကစားနည်းတွေက ဖွင့်ပွဲအခမ်းအနားမတိုင်မီ စောပြီး ကျင်းပနေတာဖြစ်ပါတယ်။

မြန်မာတက်ရှ်ဘောအသင်းဟာ ပြီးခဲ့တဲ့ ၂၀၂၅ ထိုင်းဆီးဂိမ်းစ်ပြိုင်ပွဲမှာ ငွေတံဆိပ် ၂ ခု၊ ကြေးတံဆိပ် ၂ ခု ဆွတ်ခူးရရှိခဲ့ပါတယ်။

မန်ယူအသင်း ဒီရာသီမှာ ဘာဆုဖလားမှ မရနိုင်ဘူးလို့ ရုဒ်ဂူးလစ် သုံးသပ်ပြောကြား

ဘောလုံးသုံးသပ်သူအဖြစ် ဆောင်ရွက်နေတဲ့ နယ်သာလန်ဂန္ထဝင် ရုဒ်ဂူးလစ်က မန်ယူအသင်းအနေနဲ့ ဒီရာသီမှာ ဘာဆုဖလားမှ မရနိုင်ဘူးလို့ သုံးသပ်ပြောကြားခဲ့ပါတယ်။

ရုဒ်ဂူးလစ်က ချယ်လ်ဆီးအသင်းမှာ ကစားသမား+နည်းပြအဖြစ် ဆောင်ရွက်ခဲ့ဖူးသလို၊ နယူးကာဆယ်အသင်းကို ကိုင်တွယ်ခဲ့ဖူးသူလည်း ဖြစ်ပါတယ်။

ရုဒ်ဂူးလစ်(၆၄ နှစ်)က မန်ယူအသင်းဟာ ပရီးမီးယားလိဂ်ထိပ်သီးပြိုင်ဘက်တွေနဲ့ နှိုင်းယှဉ်ရင် ကစားသမားအင်အား တောင့်တင်းမှုမရှိတာကြောင့် ဆုဖလားတွေအတွက် ပြိုင်ဆိုင်နိုင်စွမ်းမရှိသေးကြောင်း သုံးသပ်ခဲ့တာပါ။

''ယူနိုက်တက်လား။ သူတို့ ဒီနှစ် ပြိုင်ဆိုင်နိုင်စွမ်း မရှိသေးပါဘူး။ သူတို့မှာ အရည်အသွေးပိုင်း အားနည်းချက်အနည်းငယ် ရှိနေသေးတယ်လို့ ကျွန်တော် ထင်ပါတယ်။ သူတို့ ပွဲတစ်ပွဲကို ထိန်းချုပ်နိုင်စွမ်းမရှိသေးတာ ကျွန်တော်တို့ မြင်တွေ့ရပါတယ်။ သူတို့မှာ ပရီးမီးယားလိဂ်ရဲ့ အကောင်းဆုံးကစားသမားတွေ ထပ်ရှိမလာပါဘူး။ ထိပ်တန်းကစားသမားတွေက လီဗာပူးလ်၊ ချယ်လ်ဆီး၊ အာဆင်နယ်နဲ့ မန်စီးတီးအသင်းတွေဆီ ရောက်သွားကြပါတယ်။ ဒီရာသီမှာ ချန်ပီယံဆုကို စိန်ခေါ်နိုင်တဲ့အသင်းတွေက အရည်အသွေးပိုမြင့်ပြီး ပိုတောင့်တင်းလာကြပါတယ်'' လို့ ရုဒ်ဂူးလစ်က ပြောကြားခဲ့ပါတယ်။

မန်ယူအသင်းဟာ ဒီရာသီ ပရီးမီးယားလိဂ်ပွဲစဉ်(၄)ပွဲ ယှဉ်ပြိုင်ကစားအပြီးမှာ (၄)မှတ်သာရရှိထားပြီး အဆင့်(၁၃)နေရာ ရောက်ရှိနေပါတယ်။

၂၀၂၇-၂၈ ရာသီ ချန်ပီယံလိဂ်ဗိုလ်လုပွဲကို ဘိုင်ယန်မြူးနစ်ကွင်း၊ ၂၀၂၈-၂၉ ရာသီ ချန်ပီယံလိဂ်ဗိုလ်လုပွဲကို ဘာစီလိုနာကွင်းမှာ ကျင်းပမယ်

ဥရောပဘောလုံးအဖွဲ့ချုပ်(UEFA)က ၂၀၂၇-၂၈ ရာသီ ချန်ပီယံလိဂ်ဗိုလ်လုပွဲကို ဘိုင်ယန်မြူးနစ်အသင်းရဲ့ Munich Football Arena ကွင်း၊ ၂၀၂၈-၂၉ ရာသီ ချန်ပီယံလိဂ်ဗိုလ်လုပွဲကို ဘာစီလိုနာအသင်းရဲ့ Camp Nou ကွင်းမှာ ကျင်းပမှာဖြစ်ကြောင်း အတည်ပြုကြေညာခဲ့ပါတယ်။

လက်ရှိ ၂၀၂၆-၂၇ ရာသီ ချန်ပီယံလိဂ်ပြိုင်ပွဲရဲ့ ဗိုလ်လုပွဲကိုတော့ အက်သလက်တီကိုအသင်းရဲ့ Estadio Metropolitano ကွင်းမှာ ကျင်းပသွားမှာပါ။

Munich Football Arena ကွင်းက ၂၀၂၄-၂၅ ရာသီ ချန်ပီယံလိဂ်ဗိုလ်လုပွဲကို လက်ခံကျင်းပခဲ့တာကြောင့် (၃)နှစ်အကြာမှာပဲ တစ်ကျော့ပြန်ကျင်းပခွင့်ရရှိတာဖြစ်ပြီး Camp Nou ကွင်းကတော့ ၁၉၉၈-၉၉ ရာသီ နောက်ပိုင်း ပထမဆုံးအကြိမ် ပြန်လည်ကျင်းပခွင့် ရရှိခဲ့တာပါ။

UEFA က ယူရိုပါလိဂ်နဲ့ ကွန်းဖရန့်လိဂ်ပြိုင်ပွဲတွေရဲ့ ရှေ့လာမယ့်နှစ်ရာသီ ဗိုလ်လုပွဲကျင်းပမယ့် ကွင်းတွေကိုလည်း အတည်ပြုကြေညာခဲ့ပါတယ်။

ယူရိုပါလိဂ်ပြိုင်ပွဲရဲ့ ၂၀၂၇-၂၈ ရာသီ ဗိုလ်လုပွဲကို ရိုမေးနီးယားနိုင်ငံက National Arena ကွင်း၊ ၂၀၂၈-၂၉ ရာသီ ဗိုလ်လုပွဲကို ဆားဘီးယားနိုင်ငံက National Stadium Serbia ကွင်းတွေမှာ ကျင်းပမှာပါ။
ကွန်းဖရန့်လိဂ်ပြိုင်ပွဲရဲ့ ၂၀၂၇-၂၈ ရာသီ ဗိုလ်လုပွဲကို ဂျူဗင်တပ်စ်အသင်းရဲ့ Juventus Stadium ကွင်း၊ ၂၀၂၈-၂၉ ရာသီ ဗိုလ်လုပွဲကို ဟန်ဂေရီနိုင်ငံက Puskás Aréna ကွင်းမှာ ကျင်းပသွားမှာဖြစ်ကြောင်း သိရပါတယ်။

ယနေ့ ရွှေဈေးနဲ့ နိုင်ငံခြားငွေလဲနှုန်းများ

( ၂၀၂၆ - စက်တင်ဘာ ၁၇ ၊ နံနက် ၁၀ နာရီ)

#ရွှေဈေး

-ကမ္ဘာ့ရွှေဈေး
တအောင်စ ၄၂၈၅ ဒေါ်လာ

ရန်ကုန်တိုင်းရွှေလုပ်ငန်းရှင်များအသင်း (YGEA) ရဲ့ရွှေစျေးကွက် အဖွင့်ဈေးနှုန်း

- အကယ်ဒမီ မီးလင်းရွှေ တကျပ်သား
၇,၁၅၀,၀၀၀ ကျပ်

ပြင်ပ အရောင်းအဝယ်ဖြစ်တဲ့ ရွှေဈေးနှုန်း

-အခေါက်ရွှေ တကျပ်သား (ပြင်ပဈေးကွက်)
ရောင်းဈေး ၁၀,၀၅၀,၀၀၀ ကျပ်
ဝယ်ဈေး ၁၀,၀၁၀,၀၀၀ ကျပ်

-၁၅ ပဲရည် တကျပ်သား
ရောင်းဈေး ၉,၆၅၀,၀၀၀ ကျပ်
ဝယ်ဈေး ၉,၆၁၀,၀၀၀ ကျပ်

* စနစ်သစ်
(၁ိ - ၁၆.၃၂၉၃၂၅ ဂရမ် = ၁၂၀ ရွေး)

-အခေါက်ရွှေ တကျပ်သား (ပြင်ပဈေးကွက်)
ရောင်းဈေး ၉,၉၃၀,၀၀၀ ကျပ်
ဝယ်ဈေး ၉,၈၉၀,၀၀၀ ကျပ်

-၁၅ ပဲရည် တကျပ်သား
ရောင်းဈေး ၉,၅၃၀,၀၀၀ ကျပ်
ဝယ်ဈေး ၉,၄၉၀,၀၀၀ ကျပ်

“လက်ရှိ ရွှေဈေးကွက်အတွင်း ဈေးနှုန်းအတက်အကျ မငြိမ်သေးတဲ့အတွက် ရောင်းမှား၊ ဝယ်မှား မဖြစ်ဖို့ သတိပြုစေလိုပါတယ်။”

(ရွှေဈေးနှုန်းများ အချိန်နှင့်အမျှ ပြောင်းလဲနိုင်သည်။)

#နိုင်ငံခြားငွေလဲလှယ်နှုန်း

-မြန်မာနိုင်ငံတော်ဗဟိုဘဏ် ရည်ညွှန်းငွေလဲနှုန်း
အမေရိကန် တဒေါ်လာ - ၃၆၆၃ ကျပ်

ပြင်ပပေါက်စျေး

-အမေရိကန်ဒေါ်လာ‌
ရောင်းဈေး - ၄၃၉၀ ကျပ်
ဝယ်ဈေး - ၄၂၉၀ ကျပ်

-စင်္ကာပူဒေါ်လာ
ရောင်းဈေး - ၃၄၃၀ ကျပ်
ဝယ်ဈေး - ၃၃၄၇ ကျပ်

-ယူရို
ရောင်းဈေး - ၅၀၃၆ ကျပ်
ဝယ်ဈေး - ၄၉၁၄ ကျပ်

-ထိုင်းဘတ်
ရောင်းဈေး - ၁၃၁.၅၃ ကျပ်
ဝယ်ဈေး - ၁၂၈.၃၆ ကျပ်

-မလေးရှားရင်းဂစ်
ရောင်းဈေး - ၁၀၇၃ ကျပ်
ဝယ်ဈေး - ၁၀၄၈ ကျပ်

-တရုတ်ယွမ်
ရောင်းဈေး - ၆၅၅ ကျပ်
ဝယ်ဈေး - ၆၃၉ ကျပ်

-ဂျပန်ယန်း
ရောင်းဈေး - ၂၈.၁၄ ကျပ်
ဝယ်ဈေး - ၂၇.၄၆ ကျပ်

-အိန္ဒိယရူပီး
ရောင်းဈေး - ၄၆.၀၉ ကျပ်
ဝယ်ဈေး - ၄၄.၉ ကျပ်

-ကိုရီးယားဝမ်
ရောင်းဈေး - ၃.၂ ကျပ်
ဝယ်ဈေး - ၃.၁၂ ကျပ်

-စတာလင်ပေါင်
ရောင်းဈေး - ၅၈၇၅ ကျပ်
ဝယ်ဈေး - ၅၇၃၃ ကျပ်

-ဩစတြေးလျဒေါ်လာ
ရောင်းဈေး - ၃၁၁၄ ကျပ်
ဝယ်ဈေး - ၃၀၃၉ ကျပ်

-ကနေဒါဒေါ်လာ
ရောင်းဈေး - ၃၁၆၀ ကျပ်
ဝယ်ဈေး - ၃၀၈၀ ကျပ်

-ဟောင်ကောင်ဒေါ်လာ
ရောင်းဈေး - ၅၆၀ ကျပ်
ဝယ်ဈေး - ၅၄၆ ကျပ်

-ယူအေအီး
ရောင်းဈေး - ၁၁၉၆ ကျပ်
ဝယ်ဈေး - ၁၁၆၇ ကျပ်

ငွေလဲနှုန်းများ အချိန်နှင့်အမျှ ပြောင်းလဲနိုင်သည်။

***သတ်မှတ်ဈေးအတိုင်း အရောင်းအဝယ်မလုပ်ပါက အရေးယူခံရနိုင်သည်။

စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီ
***********************************

🇲🇲 ရည်ညွှန်းလက်လီဈေးနှုန်းများ
💢ရန်ကုန်မြို့
💢မန္တလေးမြို့
💢နေပြည်တော်
💢တိုင်းဒေသကြီး/ ပြည်နယ်မြို့တော်များ