စစ်ကိုင်းမြို့ရှိ ဧရာဝတီမြစ်အတွင်း ညစ်ညမ်းပစ္စည်းများစွန့်ပစ်မှုမရှိစေရေးစစ်ဆေး

စစ်ကိုင်းတိုင်း၊ စစ်ကိုင်းမြို့ရှိ ဧရာဝတီမြစ်အတွင်းသို့ ညစ်ညမ်းပစ္စည်းများစွန့်ပစ်မှုမရှိစေရေးအတွက် ခရိုင်/မြို့နယ်တာဝန်ရှိသူများ၊ မီးသတ်တပ်ဖွဲ့ဝင်များနှင့် တာဝန်ရှိသူများက ယနေ့ ဇူလိုင် ၁၃ ရက်နံနက်ပိုင်းတွင် ဧရာဝတီမြစ်ကြောင်းတစ်လျှောက်၌ မော်တော်ဘုတ်များဖြင့် လိုက်လံစစ်ဆေးခဲ့ကြသည်။
သန့်စင်ခန်းများဆောက်လုပ်၍ ဧရာဝတီမြစ်အတွင်း အညစ်အကြေးများ၊ အမှိုက်သရိုက်များနှင့် ညစ်ညမ်းစေသည့်ပစ္စည်းများစွန့်ပစ်မှုမရှိစေရေးအတွက်ကြည့်ရှုစစ်ဆေးခဲ့ကြခြင်းဖြစ်သည်။
ထို့ပြင် ဧရာဝတီမြစ်အတွင်း မြစ်ရေမြင့်တက်လာပါက ရေဝင်ရောက်နိုင်သည့် ရပ်ကွက်များ၊ စစ်ကိုင်းမင်းကွန်းလမ်းတွင် မြေထိန်းနံရံတည်ဆောက်နေမှုတို့ကိုလည်းကြည့်ရှုစစ်ဆေးခဲ့ကြသည်။

မြန်မာနိုင်ငံ သမ္မတ ဦးမင်းအောင်လှိုင် ဩဂုတ်လထဲမှာ ထိုင်းနိုင်ငံကို သွားမယ်

မြန်မာနိုင်ငံ သမ္မတ ဦးမင်းအောင်လှိုင်ဟာ လာမယ့် ဩဂုတ်လဆန်းပိုင်းမှာ ထိုင်းနိုင်ငံကို တရားဝင်ခရီးစဉ် သွားဖို့ရှိတယ်လို့ အာဆီယံသတင်းရင်းမြစ်တွေက တနင်္လာနေ့မှာ ပြောကြားကြကြောင်း Bangkok Post သတင်းစာက ရေးသားဖော်ပြထားပါတယ်။
ဒီခရီးစဉ်ဟာ ပြီးခဲ့တဲ့ ဧပြီလမှာ မြန်မာနိုင်ငံ သမ္မတအဖြစ် တာဝန်ယူပြီးတဲ့နောက်ပိုင်း၊ ဦးမင်းအောင်လှိုင် အနေနဲ့ အာဆီယံအဖွဲ့ဝင်နိုင်ငံတစ်ခုဆီ ဒုတိယအကြိမ်မြောက် သွားတဲ့ ခရီးစဉ် ဖြစ်လာမှာပါ။ သူဟာ သမ္မတအဖြစ် တာဝန်ယူပြီးတဲ့နောက် အာဆီယံအဖွဲ့ဝင် မဟာမိတ်နိုင်ငံတစ်ခုဆီ ပထမဆုံးအကြိမ် တရားဝင်ခရီးစဉ်အဖြစ် ဒီလအစောပိုင်းတုန်းက လာအိုနိုင်ငံကို သွားခဲ့ပါသေးတယ်။
သတင်းရင်းမြစ်တွေဘက်ကတော့ မြန်မာနိုင်ငံ သမ္မတ ဦးမင်းအောင်လှိုင်ရဲ့ ထိုင်းနိုင်ငံခရီးစဉ် အသေးစိတ် အစီအစဉ်ကို တိတိကျကျ ထုတ်မပြောသေးပါဘူးလို့ Bangkok Post သတင်းစာက ဆိုထားပါတယ်။ ထိုင်းနိုင်ငံဟာ အာဆီယံအဖွဲ့ကြီးနဲ့ မြန်မာနိုင်ငံ ပြန်ပြီး အပြည့်အဝ ပူးပေါင်းဆောင်ရွက်နိုင်အောင် ကြိုးပမ်းပေးနေတဲ့ အဓိက အာဆီယံအဖွဲ့ဝင်နိုင်ငံတစ်နိုင်ငံလည်း ဖြစ်ပါတယ်။

ဒီရေမြင့်တက်မှုနှင့် မိုးဆက်တိုက်ရွာသွန်းမှုကြောင့် ငမိုးရိပ်ချောင်းရေတိုးလာ

ယခုရက်ပိုင်းအတွင်း ရန်ကုန်မြစ်၌ ဒီရေမြင့်တက်နေခြင်းနှင့် မိုးအဆက်မပြတ်ရွာသွန်းနေခြင်းတို့ကြောင့် ငမိုးရိပ်ချောင်းအတွင်း ရေမြင့်တက်လာကြောင်း ငမိုးရိပ်တမံထိန်းသိမ်းရေးဌာနထံမှ သိရသည်။
သို့သော် ငမိုးရိပ်တမံအထက်ပိုင်းရှိ ရေလှောင်တမံများတွင် မိုးရေများကို သိုလှောင်ထိန်းသိမ်းထားနိုင်သဖြင့် လက်ရှိအခြေအနေအရ ရေကြီးမှုဆိုးဆိုးရွားရွား ဖြစ်ပေါ်နိုင်ခြေ မရှိသေးကြောင်း ဆို သည်။
ယနေ့ ဇူလိုင် ၁၃ ရက် တိုင်းတာချက်များအရ ငမိုးရိပ်ရေလှောင်တမံ၏ ရေပြည့်မှတ်မှာ ၁၀၇ ပေဖြစ်ပြီး လက်ရှိရေမှတ်မှာ ၉၆ ဒသမ ၉၀ ပေရှိကာ မိုးရေချိန် ၀ ဒသမ ၄၉ လက်မ ရွာသွန်းခဲ့ကြောင်း အသ်ပေးထားသည်။
အခြားရေလှောင်တမံများအနေဖြင့် မဟူရာတမံ၏ ရေမှတ် ၁၉၈ ဒသမ ၈၀ ပေ၊ ပေါင်းလင်းတမံ၏ ရေမှတ် ၁၆၈ ဒသမ ၉၀ ပေ၊ လဂွမ်းပြင်တမံ၏ ရေ မှတ် ၇၁ ဒသမ ၉၀ ပေ၊ ကလီထော်တမံ ၏ ရေမှတ် ၁၂၅ ဒသမ ၆၀ ပေနှင့် တောင်လုံးမြောင်တမံ၏ ရေမှတ် ၆၉ ဒသမ ၂၀ ပေ အသီးသီးရှိကြောင်း သိရသည်။
ရေလှောင်ပမာဏအနေဖြင့် ငမိုးရိပ်တမံတွင် ဧကပေ ၁၈၀,၀၀၀ ဆံ့ပြီး လက်ရှိ ဧကပေ ၈၇,၃၇၅၊ မဟူရာတမံတွင် ဧကပေ ၂၆,၄၇၀၊ ပေါင်းလင်းတမံတွင် ဧကပေ ၄၅,၉၀၂၊ လဂွမ်းပြင်တမံတွင် ဧကပေ ၈၆,၀၁၅၊ ကလီထော်တမံတွင် ဧကပေ ၁၄,၅၄၀ နှင့် တောင်လုံးမြောင်တမံတွင် ဧကပေ ၂၂၇ သိုလှောင်ထားကြောင်း ထုတ်ပြန်ထားသည်။
လက်ရှိတွင် ရေကြီးမှုအန္တရာယ် မပြင်း ထန်နိုင်သေးသော်လည်း ငမိုးရိပ်ချောင်းကမ်းဘေးတွင် နေထိုင်သူများနှင့် သွားလာသူများအနေဖြင့် ရေအခြေအနေကို စောင့်ကြည့်ကာ လိုအပ်သောသတိပြုမှုများ ပြုလုပ်ထားရန် နှိုးဆော်တိုက်တွန်းထားသည်။

အစ္စရေးနိုင်ငံလုံးဆိုင်ရာရွေးကောက်ပွဲ အောက်တိုဘာလတွင် ကျင်းပမည်

အစ္စရေးနိုင်ငံလုံးဆိုင်ရာ ရွေးကောက်ပွဲများကို အောက်တိုဘာလ ၂၇ ရက်တွင် ကျင်းပသွားမည်ဖြစ်သည်။ အဆိုပါရက်သည် ဥပဒေအရခွင့်ပြုထားသည့် နောက်ဆုံးရက်စွဲဖြစ်သည်။ ဂါဇာစစ်ပွဲပေါ်ပေါက်ပြီးနောက် ဝန်ကြီးချုပ် ဘင်ဂျမင် နေတန်ယာဟု၏ ခေါင်းဆောင်မှုအပေါ် ဆန္ဒခံယူပွဲအဖြစ် ကျယ်ကျယ်ပြန့်ပြန့်ရှုမြင်ကြသည့် ရွေးကောက်ပွဲဖြစ်သည်။
အစ္စရေးပါလီမန်ဖြစ်သော နက်ဆက်က တနင်္ဂနွေနေ့တွင် ရွေးကောက်ပွဲရက်စွဲကို ကြေညာခဲ့သည်။ နက်ဆက်သည် လက်ရှိလွှတ်တော်သက်တမ်း၏ နောက်ဆုံးအစည်းအဝေးကို သောကြာနေ့တွင် ကျင်းပရန် စီစဉ်ထားပြီး နေတန်ယာဟု၏ လက်ယာစွန်းညွန့်ပေါင်းအစိုးရသည် နှစ်ပေါင်း ၅၀ အတွင်း အစိုးရသက်တမ်းလေးနှစ်ကို အပြည့်အဝထမ်းဆောင်နိုင်သည့် ပထမဆုံးအစိုးရဖြစ်လာမည်ဖြစ်သည်။
အစ္စရေး၏ သက်တော်ရှည်ဝန်ကြီးချုပ် နေတန်ယာဟုသည် လာမည့်ရွေးကောက်ပွဲများတွင် ဝင်ရောက်ယှဉ်ပြိုင်မည်ဟု ဇွန်လတွင် အတည်ပြုခဲ့သည်။ အသက် ၇၆ နှစ်အရွယ် ဝန်ကြီးချုပ်သည် အစ္စရေးသမိုင်းတွင် အသေအပျောက်အများဆုံးဖြစ်ခဲ့သည့် ၂၀၂၃ အောက်တိုဘာလ ၇ ရက် နေ့က ဟားမတ်စ်ဦးဆောင်သော တိုက်ခိုက်မှုများပေါ်ပေါက်ပြီးနောက်ပိုင်း ဝေဖန်မှုများနှင့် ရင်ဆိုင်နေရသည်။
အစ္စရေးစစ်တပ်၏ စစ်ဦးစီး အရာရှိချုပ်ဟောင်း ဂါဒီ အီဆန်ကော့သည် နေတန်ယာဟု၏ အဓိကပြိုင်ဘက်အဖြစ် ထွက်ပေါ်လာခဲ့သည်။ အစ္စရေးသတင်းဌာန ချန်နယ်-၁၃ က ကြာသပတေးနေ့တွင် ထုတ်ပြန်ခဲ့သော စစ်တမ်းတစ်ခုအရ အီဆန်ကော့၏ ယာရှားပါတီသည် နေတန်ယာဟု၏ လီကွတ်ပါတီထက် ထောက်ခံမှု အနည်းငယ်သာလွန်နေသည်။
နေတန်ယာဟု၏ စစ်အစိုးရတွင် ယခင်ကတာဝန်ထမ်းဆောင်ခဲ့သော အီဆန်ကော့သည် အစိုးရအနေဖြင့် ဂါဇာတွင် ၎င်း၏ ရည်မှန်းချက်များကို လုံးဝပျက်ကွက်ခဲ့သည်ဟု ပြောကြားပြီးနောက် ၂၀၂၄ ခုနှစ် ဇွန်လတွင် ရာထူးမှနုတ်ထွက်သွားခဲ့သည်။ သူ၏ သားသည် ၂၀၂၃ ခုနှစ် ဒီဇင်ဘာလတွင် အစ္စရေး၏ ဂါဇာစစ်ပွဲအစပိုင်းကာလအတွင်း သေဆုံးခဲ့သည်။
သောကြာနေ့ လွှတ်တော်ရပ်နားချိန်မတိုင်မီတွင် အစိုးရက ဥပဒေများစွာကို အတည်ပြုရန် ကြိုးပမ်းနေသည်။ ဥပဒေပြုမှုများသည် သူ၏ ရွေးကောက်ပွဲအလားအလာကို အားကောင်းစေလိမ့်မည်ဟု နေတန်ယာဟုက မျှော်လင့်ထားသည်။

ချောင်းသာ-ပုသိမ်လမ်းတွင် တောင်ကျရေ ၄ ပေ ကျော်လွန်နေ၍ ယာဉ်များ သတိပြုဖြတ်သန်းရန် အသိပေး

ဧရာဝတီတိုင်းဒေသကြီး၊ ချောင်းသာမြို့ ကံကြီးကျေးရွာအုပ်စုရှိ ခြောက်ကောင်ကျေးရွာအနီး ပုသိမ်-ချောင်းသာ ကားလမ်းမကြီး မိုင်တိုင်အမှတ် (၂၅) မိုင် (၄) ဖာလုံမှ (၂၆) မိုင်အထိတွင် ဇူလိုင် ၁၃ ရက်က မိုးသည်းထန်စွာ ရွာသွန်းမှုကြောင့် တောင်ကျရေ ၄ ပေကျော်ခန့် လမ်းပေါ်သို့ ကျော်လွန်စီးဆင်းနေကြောင်း ဒေသခံသတင်းရင်းမြစ်များထံမှ သိရသည်။
အဆိုပါ လမ်းပိုင်းကို ဖြတ်သန်းအသုံးပြုမည့် ကားနှင့် ဆိုင်ကယ်များအနေဖြင့် အထူးသတိပြု မောင်းနှင်ကြရန်နှင့် ရေ စီးသန်သောနေရာများကို မဖြတ်သန်းမီ အခြေအနေကို စစ်ဆေးကာ လိုအပ်ပါက ယာယီရှောင်ကွင်းရန် သက်ဆိုင်ရာက အ သိပေးနှိုးဆော်ထားသည်။
ဒေသခံများနှင့် ခရီးသွားပြည်သူများအ နေဖြင့် မိုးလေဝသအခြေအနေများကို အနီးကပ်စောင့်ကြည့်ပြီး ဘေးကင်းလုံခြုံရေးကို ဦးစားပေး ဆောင်ရွက်ကြရန်လည်း တိုက်တွန်းထားသည်။

လောင်းကစား SMS ပေးပို့သည့် သံသယဖုန်းနံပါတ် ၃၉၀,၉၇၈ ခု ပိတ်သိမ်းအရေးယူ

တရားဝင်ခွင့်ပြုထားသည့် ဆက်သွယ်ရေးအော်ပရေတာများ၏ ကွန်ရက်များကို အသုံးပြု၍ လောင်းကစားဂိမ်းများ ကြော်ငြာခြင်းနှင့် ဖိတ်ခေါ်ခြင်းဆိုင်ရာ SMS စာတိုများ ပေးပို့နေမှုများအား တားဆီးနိုင်ရေးအတွက် ဆက်သွယ်ရေးညွှန်ကြားမှုဦးစီးဌာနက စနစ်တကျ စောင့်ကြည့်ထိန်းချုပ်၍ အရေးယူဆောင်ရွက်လျက်ရှိကြောင်း သိရသည်။
ပြည်ထောင်စုအစိုးရ သတင်းထုတ်ပြန်ရေးအဖွဲ့မှတစ်ဆင့် မေးမြန်းလာသည့် လောင်းကစားဂိမ်းများက ဖုန်းနံပါတ်အမျိုးမျိုးအသုံးပြု၍ SMS ပေးပို့နေမှုများကို မည်သို့တားဆီးဆောင်ရွက်နေသည်နှင့်ပတ်သက်၍ ပို့ဆောင်ရေးနှင့် ဆက်သွယ်ရေးညွှန်ကြားမှုဦးစီးဌာနက ပြန်လည်ဖြေကြားခဲ့ခြင်းဖြစ်သည်။
ထိုကဲ့သို့ ပြန်လည်ဖြေကြားရာတွင် ဖုန်းနံပါတ်တစ်ခုတည်းမှ တူညီသောစာသားများကို ဖုန်းနံပါတ် ၆၀ ခုသို့ အချိန်တစ်နာရီအတွင်း ဖြန့်ဝေပေးပို့ခြင်း သို့မဟုတ် ၂၄ နာရီအတွင်း ဖုန်းနံပါတ် ၁,၀၀၀ ခုသို့ ဖြန့်ဝေပေးပို့ခြင်းတို့ကို ပုံမှန်မဟုတ်သော SMS ပေးပို့မှုအဖြစ် သတ်မှတ်ထားကြောင်း ဖော်ပြထားသည်။
အဆိုပါ ပုံမှန်မဟုတ်သော SMS ပေးပို့မှုများကို သက်ဆိုင်ရာ ဆက်သွယ်ရေးအော်ပရေတာများ၏ SMS Firewall စနစ်တွင် Automatic Blocking Direction နည်းလမ်းဖြင့် အလိုအလျောက်ပိတ်သိမ်းကာ တားဆီးဆောင်ရွက်လျက်ရှိကြောင်း သိရသည်။
ထိုသို့ စောင့်ကြည့်ထိန်းချုပ်၍ အရေးယူဆောင်ရွက်မှုများအရ ၂၀၂၆ ခုနှစ် ဇွန်လ ၃၀ ရက်အထိ လောင်းကစားနှင့် ဆက်စပ်၍ သံသယဖြစ်ဖွယ် SMS များ ပေးပို့နေသည့် ဖုန်းနံပါတ် စုစုပေါင်း ၃၉၀,၉၇၈ ခုကို အပြီးတိုင်ပိတ်သိမ်းထားကြောင်း သိရသည်။
ထို့အပြင် လောင်းကစား SMS များ ပေးပို့နေသည့် ဖုန်းနံပါတ်များကို တွေ့ရှိပါက ဆက်သွယ်ရေးညွှန်ကြားမှုဦးစီးဌာန၏ complaint@ptd.gov.mm သို့ ဆက်သွယ်တိုင်ကြားနိုင်ကြောင်း အသိပေးထားသည်။

မင်းလှ-မင်းဘူးရထားလမ်းပိုင်းတွင် ရထားခရီးစဉ်များပြန်လည်ပြေးဆွဲနိုင်ရေးပြန်လည်သုံးသပ်ရန် နိုင်ငံတော်သမ္မတ ဦးမင်းအောင်လှိုင် မှာကြား

မကွေးတိုင်း၊ မင်းဘူးမြို့နယ်ရှိ မင်းလှ-မင်းဘူးရထားလမ်းပိုင်းတွင် ရထားခရီးစဉ်များပြန်လည်ပြေးဆွဲနိုင်ရေးပြန်လည်သုံးသပ်ရန် နိုင်ငံတော်သမ္မတ ဦးမင်းအောင်လှိုင် ကမှာကြားသည်။
နိုင်ငံတော်သမ္မတက ယနေ့ ဇူလိုင် ၁၃ ရက်တွင် မင်းဘူးမြို့နယ်၊ မြန်မာ့မီးရထားဘူတာရှိ မင်းလှ-မင်းဘူး ရ ထားလမ်းပိုင်းအားကြည့်ရှုစစ်ဆေးစဥ် တာဝန်ရှိသူများအား မှာကြားခဲ့ခြင်းဖြစ်သည်။
ဒေသခံများ ခရီးသွားလာမှုနှင့် ကုန်စည်ပို့ဆောင်မှုများ ပိုမိုအဆင်ပြေစေရေးအတွက် ရထားခရီးစဉ်များကိုပြန် လည်ပြေးဆွဲနိုင်ရေး ပြန်လည်သုံးသပ်ဆောင်ရွက်ရန် မှာကြားခဲ့သည်။
ထို့နောက် နိုင်ငံတော်သမ္မတသည် မင်းဘူးမြို့၊ ကမ်းနားလမ်းပြန်လည်ထိန်းသိမ်းဖောက်လုပ်မည့်နေရာ၌ ကမ်း နားလမ်းတစ်လျှောက်လိုအပ်သည့် မြစ်ကမ်းပါးထိန်းနံရံများနှင့် တံတားများပြန်လည်ပြုပြင်တည်ဆောက်ထိန်းသိမ်းရန်၊ ကမ်းနားလမ်းကိုစနစ်တကျပြန်လည် ဖောက်လုပ်ရန်နှင့် ကမ်းနားလူနေရပ်ကွက်များစနစ်တ ကျဖြစ်စေရေး Town Plan ဖြင့်စနစ်တကျသုံးသပ်ဆောင်ရွက်ရန် မှာကြားခဲ့သည်။

မင်းဘူးမြို့၌ကျင်းပသည့် နိုင်ငံတော်အဆင့်သစ်ပင်စိုက်ပျိုးပွဲ ပျိုးပင်ပေါင်း(၃,၀၀၀)စိုက်ပျိုး
နိုင်ငံတော်သမ္မတ ဦးမင်းအောင်လှိုင်က တမာပျိုးပင်ကိုဦးဆောင်စိုက်ပျိုးပေး

မကွေးတိုင်း၊ မင်းဘူးမြို့၊ မြန်မာ့မီးရထားဘူတာနှင့် မီးရထားကွန်ကရစ်စက်ရုံဝန်းအတွင်း၌ ၂၀၂၆ ခုနှစ်၊ မိုးရာသီ နိုင်ငံတော်အဆင့်သစ်ပင်စိုက်ပျိုးပွဲကို ယနေ့ ဇူ လိုင် ၁၃ ရက်နံနက်ပိုင်းကကျင်းပရာ နိုင်ငံတော်သမ္မတ ဦးမင်းအောင်လှိုင် တက်ရောက်ခဲ့ကြောင်း သိရသည်။
ထိုသို့ တက်ရောက်ပြီးနောက် နိုင်ငံတော်သမ္မတက မြန်မာနိုင်ငံအလယ်ပိုင်း အပူပိုင်းဒေသ(၁၃)ခရိုင်သည် ပူပြင်းခြောက်သွေ့ပြီး သစ်တောသစ်ပင်ကျဲပါးကာ မကွေးတိုင်း၏ သစ်တောဖုံးလွှမ်းမှုသည်(၁၁ ဒဿမ ၅၁) ရာခိုင်နှုန်းသာရှိပြီး မင်းဘူးခရိုင်၏ သစ်တောဖုံးလွှမ်းမှုသည်(၁၅ ဒဿမ ၆၁)ရာခိုင်နှုန်းသာရှိသည်ဟုပြောကြားခဲ့ကြောင်း သိရသည်။
အပူပိုင်းဒေသစိမ်းလန်းစိုပြည်ရေးလုပ်ငန်းများကို နိုင်ငံတော်အဆင့်အရှိန်အဟုန်မြှင့်တင်ပြီး အလေးထား ဆောင်ရွက်ခြင်းကြောင့် စိမ်းလန်းစိုပြည်ရေးလုပ်ငန်းများ၏ အကျိုးရလဒ်ကို ဒေသခံများကပထမဦးဆုံးခံစားကြရမည်ဟုပြောကြားခဲ့ကြောင်း သိရသည်။
ယခုနှစ်ကုန်ပိုင်းတွင် အလွန်အားကောင်းသည့် အယ်လ်နီညိုအဆင့်ရောက်ရှိလာနိုင်သည်ဟုခန့်မှန်းထားပြီး ၂၀၂၆ ခုနှစ်နှင့် ၂၀၂၇ ခုနှစ်တို့သည် ကမ္ဘာ့သမိုင်း တစ်လျှောက် အပူဆုံးနှစ်ဖြစ်လာနိုင်သည်ဟုခန့်မှန်းထား၍ ရာသီဥတုပြောင်းလဲမှုနှင့် အယ်လ်နီညိုဖြစ်စဉ်တို့ကြောင့် မိုးခေါင်ရေရှားခြင်း၊ ပူပြင်းခြောက်သွေ့ခြင်း၊ တောမီးလေ-ာင်ကျွမ်းခြင်းများဖြစ်ပေါ်လာနိုင်ပြီး စိုက်ပျိုးရေး၊ မွေးမြူရေး၊ ကျန်းမာရေး၊ စီးပွားရေးစသည့် ကဏ္ဍအသီးသီးအပေါ် ဆိုးကျိုးသက်ရောက်မှုများရှိလာနိုင်သဖြင့် အဘက်ဘက်ကကြိုတင်ပြင်ဆင်ထားကြရန်လည်း နိုင်ငံတော်သမ္မတက မှာကြားခဲ့ကြောင်း သိရသည်။
ထို့နောက် နိုင်ငံတော်သမ္မတက တမာပျိုးပင်အားဦး ဆောင်စိုက်ပျိုးပေးပြီး တက်ရောက်လာကြသူများ၏ ပျိုးပင်များစိုက်ပျိုးနေမှုကိုကြည့်ရှုအားပေးခဲ့ကြောင်း သိရသည်။
ယနေ့ ကျင်းပသည့် ၂၀၂၆ ခုနှစ်၊ မိုးရာသီ နိုင်ငံတော်အဆင့် သစ်ပင်စိုက်ပျိုးပွဲတွင် ခရေ၊ ယင်းမာ၊ ပိတောက်၊ မဲဇလီ၊ တမာ၊ သင်္ဘော၊ ကုက္ကို နှင့် ဖျောက်ဆိပ်စသည့် သစ်မျိုး(၈)မျိုး၏ ပျိုးပင်(၃,၀၀၀)ပင်ကို စိုက်ပျိုးခဲ့ကြကြောင်း သိရသည်။

ခန္တီးမြို့နယ်၌ မိုးအဆက်မပြတ်ရွာသွန်းမှုကြောင့် မြို့ပေါ်ရပ်ကွက်နှင့် ကျေးရွာအချို့ရှိ အနိမ့်ပိုင်းရပ်ကွက်များတွင် ချင်းတွင်းမြစ်ရေဝင်ရောက်

စစ်ကိုင်းတိုင်း၊ ခန္တီးမြို့နယ်၌ မိုးအဆက်မပြတ်ရွာသွန်းမှုကြောင့် ချင်းတွင်းမြစ်ရေမြင့်တက်ပြီး မြို့ပေါ်ရပ် ကွက်နှင့် ကျေးရွာအချို့ရှိ အနိမ့်ပိုင်းရပ်ကွက်များတွင် ချင်းတွင်းမြစ်ရေဝင်ရောက်လျက်ရှိကြောင်း သိရသည်။
လက်ရှိအချိန်၌ ချင်းတွင်းမြစ်ရေသည် ခန္တီးမြို့၏ စိုး ရိမ်ရေမှတ်ဖြစ်သော (၁,၃၆၀)စင်တီမီတာအောက် (၁,၂၆၀)စင်တီမီတာသို့ရောက်ရှိနေသဖြင့် မြို့ပေါ်ရပ် ကွက်‌မြေနိမ့်ပိုင်းရှိနေအိမ်အချို့နှင့် ဆင်သေကျေးရွာရှိ နေအိမ်အချို့အတွင်းသို့ ရေဝင်ရောက်မှုများဖြစ်ပေါ်လျက်ရှိကြောင်း သိရသည်။
ထိုသို့ ရေဝင်ရောက်နေမှုများနှင့် ပေါမိုင်းရပ်ကွက် အောင်သာနှင့် သာစည်ရပ်ရှိ ချင်းတွင်းမြစ်ရေထိန်းတံ ခါးအခြေအနေတို့အား တာဝန်ရှိသူများက ယနေ့ ဇူလိုင် ၁၃ ရက်တွင်ကြည့်ရှုစစ်ဆေးခဲ့ကြကြောင်း သိရသည်။

ရက္ကန်းစက်များအဆင့်မြှင့်တင်နိုင်ရေး နိုင်ငံတော်မှရင်းနှီးမတည်ငွေများထုတ်ချေးပေးသွားမည်ဟု နိုင်ငံတော်သမ္မတ ဦးမင်းအောင်လှိုင် ပြော

ပြည်နယ်များအလိုက် ချည်ထည်ထုတ်လုပ်နေသည့် ရက္ကန်းစက်များအဆင့်မြှင့်တင်နိုင်ရေးအတွက် နိုင်ငံ တော်မှ ရင်းနှီးမတည်ငွေများထုတ်ချေးပေးသွားမည်ဟု နိုင်ငံတော်သမ္မတ ဦးမင်းအောင်လှိုင် ကပြောသည်။
နိုင်ငံတော်သမ္မတက ယနေ့ ဇူလိုင် ၁၃ ရက်တွင် မကွေးမြို့၌ ပြည်တွင်းဝါစိုက်ပျိုးမှုဖွံ့ဖြိုးတိုးတက်စေရေးနှင့် ဝါကိုအခြေခံသည့် စက်မှုကုန်ထုတ်လုပ်ငန်းများတိုးမြင့်လာစေရန်၊ ဝါစိုက်ပျိုးထုတ်လုပ်သည်မှ အထည်အလိပ်ထုတ်လုပ်သည်အထိ ကွင်းဆက်တစ်လျှောက်အဆင့်ဆင့်တိုးတက်စေရန်ရည်ရွယ်ကျင်းပသည့် "ဝါစိုက်ပျိုးမှုမှသည် အထည်အလိပ်စက်မှုလုပ်ငန်းဆီသို့" ဆွေးနွေးပွဲ၌ ပြောကြားခဲ့ခြင်းဖြစ်သည်။
ဝါထုတ်လုပ်မှုအတွက် ယခင်နိုင်ငံတော်ပိုင် ချည်မျှင်နှင့်အထည်စက်ရုံများ ပြန်လည်လည်ပတ်နိုင်ရေးနှင့် ရက္ကန်းစက်များအဆင့်မြှင့်တင်နိုင်ရေး၊ ခေတ်မီရက္ကန်းစက်များအသုံးပြုနိုင်ရေးတို့ကိုဆောင်ရွက်သွားမည်ဖြစ်ကာ ပြည်တွင်းမှထွက်ရှိသည့် ဝါများဖြင့် တန်ဖိုးမြှင့်ထုတ်ကုန်ပစ္စည်းများကိုထုတ်လုပ်ရာ၌ ပြည်တွင်းလိုအပ်ချက်နှင့် ပြည်ပဈေးကွက်လိုအပ်ချက်ကို စနစ်တကျတွက်ချက်ဆောင်ရွက်ရမည်ဟု ပြောသည်။
" ဝါနဲ့ပတ်သက်တဲ့ ထုတ်လုပ်မှုတွေဆောင်ရွက်ရာမှာ ပြည်တွင်းလိုအပ်ချက်နဲ့ ပြည်ပဈေးကွက်တွေကို စနစ်တကျသုတေသနပြုလုပ်ရပါမယ်။ အိမ်နီးချင်းနိုင်ငံတွေနဲ့ ဒေသတွင်းနိုင်ငံတွေမှာ ဝါလိုအပ်ချက်တွေရှိတာကြောင့် အမျိုးအစားကောင်းတဲ့ ချည်မျှင်ရှည်ဝါတွေ တင်ပို့ရောင်းချနိုင်ရင် နိုင်ငံခြားဝင်ငွေတွေရရှိပြီး နိုင်ငံ့စီးပွားကိုမြှင့်တင်နိုင်မှာဖြစ်ပါတယ်"ဟု နိုင်ငံတော်သမ္မ တက ပြောသည်။
ဝါထုတ်လုပ်မှုတိုးတက်လာစေရေး ပြည်တွင်း၌ ဝါ ကြိတ်စက်များထုတ်လုပ်ရန် တပ်မတော်ကိုတာဝန်ပေးခဲ့ရာ ယခုအခါအရည်အသွေးမီသည့် ဝါကြိတ်စက်ကို ထုတ်လုပ်နိုင်ပြီဖြစ်ကာ ၂/၈၀ ချည်များထုတ်လုပ်နိုင်ရေးအတွက် စက်မှုဝန်ကြီးဌာနနှင့် တပ်မတော် ချည် မျှင်နှင့်အထည်စက်ရုံတို့တွင်ဆောင်ရွက်ခဲ့ကာ နိုင်ငံ တော်၏ ဝါထုတ်လုပ်မှုတိုးတက်စေရေးအတွက် စု ပေါင်းသမဝါယမစနစ်ဖြင့်ဆောင်ရွက်ရမည်ဖြစ်ပြီး ဝါ ကြိတ်စက်၊ ချည်မျှင်စက်နှင့် ရက္ကန်းစက်များတိုးတက်စေရေးအတွက် နိုင်ငံတော်မှကူညီပေးသွားမည်ဟု နိုင် ငံတော်သမ္မတက ပြောကြားခဲ့သည်။