MFF Futsal League(1) ၂၀၂၅-၂၆ ရာသီမှာ ကစားခဲ့တဲ့ Gold Dream FC အသင်းရဲ့ ကစားသမားနှစ်ဦး ဆယ်ရက်ကြာ ပျောက်ဆုံးလျှက်ရှိ

MFF Futsal League(1) ၂၀၂၅-၂၆ ရာသီမှာ ကစားခဲ့တဲ့ Gold Dream FC အသင်းရဲ့ ကစားသမားနှစ်ဦး ဆယ်ရက်ကြာ ပျောက်ဆုံးလျှက်ရှိကြောင်း အသင်းရဲ့ Facebook Page မှာ ထုတ်ပြန်ထားပါတယ်။
Gold Dream FC အသင်းရဲ့ တာဝန်ရှိသူတစ်ဦးက "အသင်းက ကစားသမားနှစ်ယောက် ပျောက်ဆုံးနေတာ ဆယ်ရက်ရှိပါပြီ။တာဝန်ရှိသူတွေနဲ့ အကုန် အတတ်နိုင်ဆုံး လိုက်ရှာဖွေနေပါတယ်"လို့ Eleven Media ကို ပြောကြားခဲ့ပါတယ်။
Gold Dream FC အသင်းရဲ့ ထုတ်ပြန်မှုမှာ "ကျွန်တော်တို့ Gold Dream FC အသင်းမှ MFF Futsal League(1) ၂၀၂၅-၂၆ ရာသီတွင် ကစားလျက်ရှိသော ကျောနံ​ပါတ်(၁၇) သီဟအောင်(၂၁ နှစ်)နှင့် လက်ရှိကျင်းပလျက်ရှိသော MFF U19 Youth Futsal League ၂၀၂၆ တွင် ကစားနေသည့် ကျောနံပါတ်(၁၁) စွမ်းထက်ကျော်(၁၈ နှစ်)တို့ နှစ်ဦးမှာ ပျောက်ဆုံး​​နေပြီး ယခုထိတိုင် အဆက်အသွယ်မရရှိသေးပါ။ ၁၉.၈.၂၀၂၆ (ဗုဒ္ဓဟူးနေ့) နေ့လည် (၃)နာရီတွင် စွမ်းထက်ကျော်(၁၈ နှစ်)သည် Royal Noka FC အသင်းနဲ့ ယှဥ်ပြိုင်ကစားပြီး သုဝဏ္ဏဘောလုံးကွင်းမှ သီဟအောင်(၂၁ နှစ်)နှင့်အတူပြန်ကာ မြောက်ဒဂုံ (၅၀)ကွေ့ရောက်သည်အထိ အဆက်အသွယ်ရရှိခဲ့ပါသည်။ ထိုနောက်ပိုင်းမှစ၍ ကစားသမားနှစ်ဦးလုံးနှင့် ယနေ့အချိန်အထိ အဆက်အသွယ်မရတော့သည်မှာ (၁၀)ရက်တိုင်တိုင်ရှိနေပါသည်"လို့ ဖော်ပြထားပါတယ်။
အသင်းဘက်ကနေ အစွမ်းကုန်​ကြိုးစားရှာဖွေလျက်ရှိပြီး သက်ဆိုင်ရာရဲစခန်းမှာလည်း လူပျောက်အမှုဖွင့်တိုင်ကြားသလို၊ MFF ရဲ့ တာဝန်ရှိလူကြီးတွေအနေနဲ့ လိုအပ်ချက်များကို ကူညီဆောင်ရွက်ပေးနေကြောင်း သိရပါတယ်။
ကစားသမားနှစ်ဦးကို ဘယ်လိုနေရာမျိုးမှာမဆို တွေ့ရှိသူ (ဒါမှမဟုတ်) အဲဒီကစားသမားတွေနဲ့ ပတ်သက်တဲ့သတင်းအချက်အလက်များ ကြားသိခဲ့ပါက အသင်းကို အမြန်ဆုံးဆက်သွယ်အကြောင်းကြားပေးပါရန် မေတ္တာရပ်ခံအပ်ပါ ကြောင်း ထုတ်ပြန်မှုမှာဖော်ပြထားပါတယ်။