အိုင်စီစီသို့ မလွှဲရန် ဖိလစ်ပိုင်ရဲချုပ်ဟောင်းက သမ္မတကို တောင်းဆို
ဖိလစ်ပိုင်သမ္မတဟောင်း ရိုဒရီဂို ဒူတာတေး၏ မူးယစ်ဆေးဝါးတိုက်ဖျက်ရေးစစ်ပွဲတွင် ရဲချုပ်ဖြစ်ခဲ့သူက သူ့ကို နိုင်ငံတကာတရားရုံးသို့ မလွှဲရန် သမ္မတ ဖာဒီနန်မားကို့စ် ဂျူနီယာကို တောင်းဆိုခဲ့ပြီး သူ့အနေဖြင့် ပြည်တွင်း၌မူ တရားရင်ဆိုင်ရန် အသင့်ရှိကြောင်း ပြောကြားခဲ့သည်။
ဖမ်းဆီးခံရမည့်အရေး စိုးရိမ်မှုကြောင့် ၎င်း၏ လွှတ်တော်ရုံးတွင် ဒုတိယမြောက်နေ့အဖြစ် အကာအကွယ်ယူနေထိုင်ခဲ့သော အထက်လွှတ်တော်အမတ် ရော်နယ် ဒယ်လာရိုဆာက သူသည် နိုင်ငံကို သစ္စာရှိရှိ တာဝန်ထမ်းဆောင်ခဲ့ကြောင်း ပြောကြားခဲ့သည်။
လူသားမျိုးနွယ်အပေါ် ကျူးလွန်သော ရာဇဝတ်မှုများဆိုင်ရာ သံသယဖြင့် ရဲချုပ်ဟောင်း ဒယ်လာရိုဆာကို အိုင်စီစီက တနင်္လာနေ့တွင် ဖမ်းဝရမ်းထုတ်ခဲ့ရာ အဆိုပါဖြစ်ရပ်သည် ပြီးခဲ့သည့်နှစ်က ဖမ်းဆီးခံရကာ သယ်ဟိဂ်တွင် တရားရင်ဆိုင်ရန် စောင့်ဆိုင်းနေရသည့် အသက် ၈၁ နှစ်အရွယ် ဒူတာတေးကို စွမ်စွဲထားသည့် အမှုမျိုးပင်ဖြစ်သည်။
နိုဝင်ဘာလနောက်ပိုင်းတွင် ပထမဆုံးအကြိမ်အဖြစ် လူမြင်ကွင်းတွင် ပြန်ပေါ်လာသော “ဘာတို” သို့မဟုတ် “ရော့ခ်” ဟု လူသိများသော ဒယ်လာရိုဆာသည် ဥပဒေစိုးမိုးရေးအေးဂျင့်များ အဆောက်အအုံအတွင်း ဝင်ရောက်လာချိန်မှစ၍ အထက်လွှတ်တော်၏ အကာအကွယ်အောက်တွင် ရှိနေခဲ့သည်။ ဥပဒေမဲ့ သတ်ဖြတ်မှုများတွင် ပါဝင်ပတ်သက်ခြင်းမရှိကြောင်း ၎င်းက ငြင်းဆိုခဲ့သည်။
သမ္မတ မားကို့စ်ထံ မည်သို့သတင်းစကားပါးချင်ပါသနည်းဟု မေးမြန်းချိန်တွင် “တိုင်းပြည်ရဲ့ ဖခင်တစ်ယောက်အနေနဲ့ ဖိလစ်ပိုင်လူမျိုးအားလုံးကို ဂရုစိုက်မယ်လို့ မျှော်လင့်ပါတယ်။ ပြည်သူတွေကို ဂရုစိုက်ဖို့က အစိုးရရဲ့ အလုပ်ပါ” ဟု ဒယ်လာရိုဆာက သတင်းထောက်များကို ဖြေကြားခဲ့သည်။
“ကျွန်တော်လုပ်ခဲ့တာတွေအားလုံးက ကျွန်တော့်နိုင်ငံအတွက်ပါ။ ကိုယ့်ကိုယ်ကို ချမ်းသာအောင်မလုပ်ခဲ့ပါဘူး၊ သစ္စာရှိရှိအလုပ်လုပ်ခဲ့တယ်” ဟု မျက်ရည်များဝဲလျက် သူက ပြောကြားခဲ့သည်။
