ချင်းမိုင်မှာ တော်ဝင်ထိုင်းလေတပ်‌ လေယာဉ်ပျက်ကျ၊ လူနှစ်ဦး သေဆုံး

ထိုင်းဘုရင့်လေတပ်မတော်(အာရ်တီအေအက်ဖ်) ၏ AT-6 TH အမျိုးအစားလေယာဉ်တစ်စင်းသည် ကြာသပတေးနေ့နံနက်ပိုင်းက ချင်းမိုင်ပြည်နယ်တွင် ပျက်ကျခဲ့သောကြောင့် လေယာဉ်မှူးနှစ်ဦး သေဆုံးခဲ့သည်။
တိုက်လေယာဉ်ငယ်သည် ချွမ်ထောင်ခရိုင် ဟွေးမြောင်ဖန်ဆိုင်းရွာရှိ တောထဲတွင် လေ့ကျင့်ပျံသန်းနေစဉ် ပျက်ကျခဲ့ခြင်းဖြစ်ကြောင်း လေတပ်၏ ပြောဆိုချက်ကို ကိုးကား၍ ဒေသခံမီဒီယာများက ဖော်ပြခဲ့သည်။
ကျယ်လောင်သည့် ပေါက်ကွဲသံနှစ်ခုကို ကြားခဲ့ပြီးနောက် လေယာဉ်သည် ပေါက်ကွဲမီးလောင်သွားခဲ့သည်ဟု ဒေသခံများက ပြောဆိုကြောင်း အမ်မရင်တီဗွီက ဖော်ပြခဲ့သည်။
ထိုင်းလေတပ်တွင် တိုက်ခိုက် ရေးမစ်ရှင်များအပါအဝင် ရည်ရွယ်ချက်အမျိုးမျိုးအတွက် AT-6 TH လေယာဉ်ရှစ်စီးရှိသည်။ အဆိုပါလေယာဉ်အုပ်စုသည် မြောက်ပိုင်းပြည်နယ်ရှိ အမှတ် ၄၁ လေတပ်ရင်းတွင် အခြေစိုက်သည်။

အမြန်လမ်းရှိနေရာ(၈)ခု၌ လမ်းပြင်ဆင်ထိန်းသိမ်းနေ ၍ ယင်း နေရာများတွင်အရှိန်လျှော့မောင်းနှင်ကြရန်မေတ္တာရပ်ခံ

ရန်ကုန်-မန္တလေးအမြန်လမ်းမကြီး၏ နေရာ(၈)ခု၌ လမ်းပြင်ဆင်ထိန်းသိမ်းနေ၍ အမြန်လမ်းအသုံးပြုသူ များအနေဖြင့် ယင်း နေရာများတွင်အရှိန်လျှော့မောင်းနှင်ကြရန် အမြန်လမ်းမကြီးထိန်း/ပြင်အဖွဲ့က မေတ္တာ ရပ်ခံထားကြောင်း သိရသည်။
အမြန်လမ်းမကြီး၏ မိုင်တိုင်အမှတ် ၃၂/၆ နှင့် ၃၂/၇ အတွင်း လသာကုန်း Under Pass(မန္တလေးမှရန်ကုန် အပြန်လမ်း)၌ ကွန်ကရစ်လမ်းခင်းခြင်း၊ မိုင်တိုင်အ မှတ် ၁၄၅/၀ နှင့် ၁၄၅/၃ အတွင်း ခပေါင်းတံတား(မန္တ လေးမှ ရန်ကုန် အပြန်လမ်း)တွင် အတက်/အဆင်းလမ်း ပြုပြင်ခြင်း၊ မိုင်တိုင်အမှန် ၁၆၅/၁ နှင့် ၁၆၅/၃ အတွင်း ဆွာချောင်းတံတား (မန္တလေးမှ ရန်ကုန် အပြန်လမ်း) တွင် တံတားအသစ်တည်ဆောက်ခြင်းလုပ်ငန်းများဆောင်ရွက်လျက်ရှိကြောင်း သိရသည်။
ထို့ပြင် မိုင်တိုင်အမှတ် ၁၈၈/၂ နှင့် ၁၈၈/၃ ကြား(မန္တ လေးမှ ရန်ကုန် အပြန်လမ်း)တွင် ရေပြွန်တူးဖော်ပြုပြင်ခြင်း၊ မိုင်တိုင်အမှတ် ၁၉၀/၁ နှင့် ၁၉၀/၃ အတွင်း(မန္တ လေးမှ ရန်ကုန် အပြန်လမ်း)တွင် မှောက်ခုံချောင်းတံ တား အတက်/အဆင်းလမ်းနှင့် တံတားပြုပြင်ခြင်း၊ မိုင် တိုင်အမှတ် ၃၄၁/၅ နှင့် ၃၄၁/၆အတွင်း (မန္တလေးမှရန်ကုန် အပြန်လမ်း)တွင် ကွန်ကရစ်လမ်းခင်းခြင်းလုပ် ငန်းများကိုလည်းဆောင်ရွက်လျက်ရှိကြောင်း သိရသည်။
ထို့အတူ မိုင်တိုင်အမှတ် ၃၄၅/၇ နှင့် ၃၄၆/၃ အတွင်း (ရန်ကုန်မှမန္တလေး အသွားလမ်း)တွင် သမင်လွှဲရိုးတံတား အတက်/အဆင်းလမ်းပြုပြင်ခြင်းနှင့် မိုင်တိုင်အ မှတ် ၃၄၇/၅ နှင့် ၃၄၇/၆အတွင်း(ရန်ကုန်မှမန္တလေး/ မ န္တလေးမှ ရန်ကုန် အသွားလမ်း/အပြန်လမ်း)၌ ကွန်က ရစ်လမ်းခင်းခြင်းလုပ်ငန်းများဆောင်ရွက်လျက်ရှိကြောင်း သိရသည်။
ထို့ကြောင့် အမြန်လမ်းမကြီးအားအသုံးပြုသွားလာနေကြသော ယာဉ်မောင်းများအနေဖြင့် ယင်း မိုင်တိုင်များအနီးချဉ်းကပ်ချိန်တွင် သတိပြု၍အရှိန်လျှော့မောင်းနှင်ကြရန် အမြန်လမ်းမကြီးထိန်း/ပြင်အဖွဲ့က မေတ္တာ ရပ်ခံထားကြောင်း သိရသည်။

ရန်ကုန်တိုင်းဝန်ကြီးချုပ်နှင့် ထိုင်းသံအမတ်ကြီးတို့တွေ့ဆုံ
နှစ်နိုင်ငံဖွံ့ဖြိုးတိုးတက်ရေးကိစ္စများကိုဆွေးနွေး

ရန်ကုန်တိုင်းဝန်ကြီးချုပ်ဦးစိုးသိန်းနှင့် တာဝန်ပြီးဆုံး၍ ပြန်လည်ထွက်ခွာမည့် မြန်မာနိုင်ငံဆိုင်ရာ ထိုင်းနိုင်ငံသံ အမတ်ကြီး H.E. Mr Mongkol Visitstump တို့ ဇန်နဝါရီ ၂၈ ရက်က တွေ့ဆုံခဲ့ကြသည်။
တွေ့ဆုံစဉ် မြန်မာနိုင်ငံနှင့် ထိုင်းနိုင်ငံကြား ကုန်သွယ်မှုနှင့် ရင်းနှီးမြှုပ်နှံမှုများ၊ ချစ်ကြည်ရင်းနှီးမှုနှင့် ဒေသဖွံ့ ဖြိုးရေးတိုးတက်ရေးတို့ကို ဆွေးနွေးခဲ့ကြသည်။
ထို့နောက် ထိုင်းနိုင်ငံသံအမတ်ကြီး H.E. Mr Mongkol Visitstump နှင့်တာဝန်ရှိသူများက ရန်ကုန်တိုင်းဝန်ကြီး ချုပ်ဦးစိုးသိန်းနှင့် တိုင်းအစိုးရအဖွဲ့ဝင်များအား ရင်း ရင်းနှီးနှီးနှုတ်ဆက်ခဲ့သည်။

ကျားဖြန့်များကကုမ္ပဏီအမည်ပေါက်အကောင့်များကိုပြောင်သုံးလာ
ဘန်ကောက် ဇန်နဝါရီ ၂၉
အွန်လိုင်းလိမ်လည်မှု တိုက်ဖျက်ရေးစင်တာ (အေစီအက်စ်စီ) သည် ကောစင်တာဂိုဏ်းများက ကျင့်သုံးနေသည့် လုပ်ငန်းဆောင်ရွက်မှု ပုံစံသစ်တစ်ခုကို ဖော်ထုတ်နိုင်ခဲ့ပြီး၊ ၎င်းတို့သည် ပစ်မှတ်ထားခံရသူများကို လိမ်လည်ရန်၊ စစ်ဆေးမှုများကို ရှောင်လွှဲရန်နှင့် ပိုမိုများပြားသော ငွေကြေးများကို ခဝါချရန်အတွက် တစ်ဦးချင်းစီအမည်ပေါက် အကောင့်များအစား ကုမ္ပဏီအမည်ပေါက်အကောင့်များကို ပြောင်းလဲအသုံးပြုလာကြကြောင်း ရဲတပ်ဖွဲ့က ပြောကြားခဲ့သည်။
နည်းပညာရာဇဝတ်မှုနှိမ်နင်းရေးစင်တာ ဒုတိယညွှန်ကြားရေးမှူး လက်ထောက်ရဲချုပ် ရဲဒုတိယဗိုလ်ချုပ်ကြီး ဂျီရာဘော့ ဘူရီဒက် က ပြောကြားရာတွင်၊ ပြီးခဲ့သည့်နှစ် အနှောင်းပိုင်းကတည်းက ကောစင်တာဂိုဏ်းများသည် စာရွက်စာတမ်းအတုများကို အသုံးပြု၍ စီးပွားရေးဖွံ့ဖြိုးတိုးတက်မှုဦးစီးဌာန (ဒီဘီဒီ) တွင် ကုမ္ပဏီ သို့မဟုတ် အစုစပ်လုပ်ငန်းများ တည်ထောင်ရန်အတွက် လူစားထိုးအမည်ခံများကို ငှားရမ်းကာ ၎င်းတို့၏ နည်းဗျူဟာများကို ပြောင်းလဲလာကြောင်း စုံစမ်းစစ်ဆေးမှုများအရ တွေ့ရှိရသည်ဟု ဆိုသည်။
အဆိုပါ အဖွဲ့အစည်းများကို အသုံးပြု၍ တရားဝင်အဖွဲ့အစည်းအမည်ဖြင့် ဘဏ်စာရင်းများဖွင့်လှစ်ကာ လိမ်လည်ခံရသူများက လွှဲပြောင်းပေးသည့် ငွေကြေးများကို လက်ခံရန် တစ်ဦးချင်းအကောင့်များဖောက်၍ အသုံးပြုကြခြင်းဖြစ်သည်။
ကော်ပိုရိတ်အမည်ပေါက်အကောင့်များကို အထူးသဖြင့် ရင်းနှီးမြှုပ်နှံမှုဆိုင်ရာ လိမ်လည်မှုများတွင် လိမ်လည်သူများက ပိုမိုနှစ်သက်လာကြခြင်းမှာ ပစ်မှတ်ထားခံရသူများသည် ကော်ပိုရိတ်အကောင့်များကို တစ်ဦးချင်းအကောင့်များထက် ပိုမိုယုံကြည်စိတ်ချရသည်ဟု ရှုမြင်ကြသောကြောင့်ဖြစ်ကြောင်း ရဲဒုတိယဗိုလ်ချုပ်ကြီး ဂျီရာဘော့ က ပြောကြားခဲ့သည်။
ဤကဲ့သို့ တရားဝင်သည်ဟု ထင်မြင်စေခြင်းကြောင့် ဆုံးရှုံးမှုပမာဏများစွာ မြင့်တက်လာခဲ့သည်။ ကော်ပိုရိတ်အကောင့်များသည် ငွေလွှဲပြောင်းမှုပမာဏ ကန့်သတ်ချက်ပိုမိုများပြားခြင်း၊ ငွေမလွှဲမီ မျက်နှာဖြင့် အတည်ပြုရန် အမြဲတမ်းမလိုအပ်ခြင်းနှင့် ငွေကြေးများကို ပိုမိုမြန်ဆန်စွာ ရွှေ့ပြောင်းနိုင်ခြင်းတို့ကြောင့် နစ်နာသူများက ၎င်းတို့လိမ်လည်ခံရမှန်း သိရှိချိန်တွင် ပိုင်ဆိုင်မှုများကို ခြေရာခံရန်နှင့် အကောင့်ပိတ်ချရန် ခက်ခဲစေသည်။
ဤ အန္တရာယ်ကို တုံ့ပြန် ဖြေရှင်းရန်အတွက် အေစီအက်စ်စီ သည် ပြီးခဲ့သည့်နှစ် အနှောင်းပိုင်းမှ ယခုနှစ်အစောပိုင်းအထိ အမည်ခံစီစဉ်မှုများနှင့် ကော်ပိုရိတ်အကောင့်များကို ပိုမိုတင်းကျပ်သော ကာကွယ်ရေးနှင့် အရေးယူဆောင်ရွက်မှုများ ပြုလုပ်ရန် ဒီဘီဒီ နှင့် နီးကပ်စွာ ပူးပေါင်းဆောင်ရွက်ခဲ့သည်။
အဆိုပါ အစီအမံများထဲတွင် ကုမ္ပဏီမှတ်ပုံတင်ခြင်းနှင့် စစ်ဆေးခြင်းလုပ်ငန်းစဉ်များကို တင်းကျပ်ရန်အတွက် ဒီဘီဒီ က စည်းမျဉ်းသစ် ၆ ခုကို ထုတ်ပြန်ခဲ့သည်။
အဓိက အစီအမံများတွင် လျှောက်ထားသူများသည် မှတ်ပုံတင်အရာရှိများရှေ့၌ လူကိုယ်တိုင် လာရောက်ပြသရန်၊ ၃ လစာ ဘဏ်စာရင်းရှင်းတမ်းများ တင်ပြရန်၊ စစ်မှန်သော စီးပွားရေးလုပ်ငန်းလိပ်စာ အထောက်အထား ပြသရန်၊ ကုမ္ပဏီအများအပြားတွင် လိပ်စာတစ်ခုတည်းကို ထပ်ခါတလဲလဲ အသုံးပြုခြင်းကို ထိန်းချုပ်ရန်နှင့် လက်မှတ်အမှန်ဖြစ်ကြောင်း အတည်ပြုပေးသူများအတွက် စနစ်သစ်တစ်ခု မိတ်ဆက်ရန်တို့ ပါဝင်ကြောင်း သိရပသည်။

မိုးမိတ်ကို ဌာနဆိုင်ရာ ဝန်ထမ်းတွေ မဝင်ရောက်နိုင်သေး

အစိုးရတပ်နဲ့ ကချင်တိုင်းရင်းသား လက်နက်ကိုင်အဖွဲ့ (KIA) တို့ကြား စစ်ရေး တင်းမာနေတဲ့ ရှမ်းပြည်မြောက်ပိုင်း မိုးမိတ်မြို့ကို အစိုးရဌာနဆိုင်ရာ အဖွဲ့ တွေ မဝင်ရောက်နိုင်သေးဘူးလို့ ဌာနဆိုင်ရာအဖွဲ့တချို့ထံကနေ သိရပါတယ်။
ပြီးခဲ့တဲ့နှစ် နိုဝင်ဘာလကုန်ပိုင်းမှာ မိုးကုတ်နဲ့ မိုးမိတ်မြို့တွေကို အစိုးရတပ်က TNLA တပ်ဖွဲ့ထံကနေ ပြန်လည်လွှဲပြောင်းယူခဲ့ပြီး KIA၊ PDF အပါအဝင် NUG လက်အောက်ခံတပ်ဖွဲ့တွေနဲ့ တိုက်ပွဲတွေ ဆက်ဖြစ်နေပါတယ်။
အခုလ ၂၁ ရက်နေ့မှာတော့ မိုးကုတ်မြို့ကို အစိုးရဌာနဆိုင်ရာ ဝန်ထမ်းတွေ ပြန်လည်ဝင်ရောက်နိုင်ခဲ့ပြီး အုပ်ချုပ်ရေးလုပ်ငန်းတွေ စတင်နေပြီဖြစ်ပေမယ့် မိုးမိတ်မြို့ကိုတော့ အစိုးရဝန်ထမ်းတွေ မရောက်နိုင်သေးပါဘူး။
“တပ်ကတော့ မိုးမိတ်ကို ရောက်နေပြီပေါ့နော်။ မြို့ထဲရပ်ကွက်တွေနဲ့ မြို့ပြင် နေရာတွေကို နယ်မြေရှင်းနေတာပေါ့။ ဌာနဆိုင်ရာဝန်ထမ်းတွေ ကတော့ မဝင်နိုင်သေးပါဘူး။ မိုးကုတ်နဲ့ မိုးမိတ်ကြားမှာကို တိုက်ပွဲတွေ ဖြစ်နေတာ။ သွားဖို့ မလွယ်သေးဘူး” လို့ မိုးမိတ်မြို့ ဌာနဆိုင်ရာဝန်ထမ်းတယောက်က ပြောပါတယ်။
မိုးမိတ်မြို့ ဝန်ထမ်းတွေအားလုံး ရှမ်းပြည်တောင်ပိုင်း တောင်ကြီးမှာပဲ ခြေစိုက် ထား ရတယ်လို့ သိရပါတယ်။
မိုးကုတ်မှာတော့ အစိုးရအုပ်ချုပ်ရေးစနစ် လည်ပတ်ဖို့ စတင်နေပြီး ဆေးရုံနဲ့ စာသင်ကျောင်းတွေ ပြန်ဖွင့်ဖို့ ပြင်ဆင်နေတယ်လို့ သိရပါတယ်။
“ဆေးရုံတော့ သန့်ရှင်းရေးတွေ လုပ်နေပြီ။ ပြန်ဖွင့်မယ်ထင်တယ်။ မြို့ခံတွေ ကတော့ သိပ်ပြန်မလာရဲကြသေးဘူး” လို့ မိုးကုတ်မြို့ခံတယောက် က ပြောပါတယ်။
ကျောက်အရောင်းအဝယ်လုပ်တဲ့ မိုးကုတ်ကျောက်ဝိုင်းနေရာမှာတော့ လူစည်ကားနေတယ်လို့ မြို့ခံတွေက ပြောပါတယ်။
မိုးကုတ်မြို့ပေါ်မှာ အစိုးရအုပ်ချုပ်ရေး လည်ပတ်နေပြီဖြစ်ပေမယ့် မြို့ပတ် လည်မှာတော့ အစိုးရတပ်နဲ့ NUG လက်အောက်ခံတပ်တွေကြား တိုက်ပွဲတွေ ဆက်ဖြစ်နေတယ်လို့ မြို့ခံတွေက ပြောပါတယ်။
မြို့ပေါ်က အစိုးရဌာနဆိုင်ရာရုံးတွေ မကြာခဏ ဒရုန်းတွေ၊ ရှော့တိုက်ဒုံးတွေနဲ့ ပစ်ခတ်ခံနေရပြီး မြို့ခံတချို့ သေဆုံးတာတွေရှိတယ်လို့ မိုးကုတ်မြို့ခံတွေက ပြောပါတယ်။
အခုလ ၂၂ ရက်နေ့ကလည်း မိုးကုတ်မြို့ အရှေ့ပိုင်း စုပေါင်းရုံးနားကို ရှော့တိုက်ဒုံးတွေ ကျလို့ အမျိုးသား သုံးယောက် သေဆုံးခဲ့ပြီး တယောက် ဒဏ်ရာရခဲ့တယ်လို့ မိုးကုတ်မြို့ခံတွေထံကနေ သိရပါတယ်။
၁၀၂၇ တိုက်ပွဲကာလမှာ မိုးကုတ်နဲ့ မိုးမိတ်ကို TNLA တပ်ဖွဲ့က သိမ်းပိုက်ခဲ့ပြီး တရုတ်အစိုးရရဲ့ ညှိနှိုင်းပေးမှုနဲ့ အစိုးရစစ်တပ်ရဲ့ ထိုးစစ်တွေကြောင့် TNLA က မိုးကုတ်နဲ့ မိုးမိတ်မြို့ကို အစိုးရတပ်ဖွဲ့တွေထံကို ၂၀၂၅ နိုဝင်ဘာမှာ ပြန်လွှဲပေးခဲ့တာ ဖြစ်ပါတယ်။

ထိုင်းကို တရားမဝင် ဝင်ရောက်ဖို့ကြိုးစားတဲ့ မြန်မာလုပ်သား ၁၀၀ ကျော် ဖမ်းဆီးခံရပြန်

ထိုင်းနိုင်ငံမှာ အလုပ်လုပ်ကိုင်ဖို့အတွက် နယ်စပ်ကနေ ထိုင်းနိုင်ငံထဲကို တရားမဝင် ဝင်ရောက်ခဲ့တဲ့ မြန်မာနိုင်ငံသား ၁၁၂ ယောက်ကို ဒီကနေ့ ဇန်နဝါရီ ၂၉ ရက်နေ့ မနက်ပိုင်းမှာ ထိုင်းအာဏာပိုင်တွေက ဖမ်းဆီးလိုက်တယ်လို့ သိရပါတယ် ။
မြန်မာလုပ်သားတွေကို ကားသုံးစီးနဲ့ တင်ဆောင်လာတာဖြစ်ပြီး ထိုင်း-မြန်မာ နယ်စပ် ၊ ကန်ချနဘူရီခရိုင် ၊ သောင်ဖာမြို့နယ်မှာ ဒီကနေ့ မနက် ၂ နာရီလောက်က ဖမ်းဆီးရမိခဲ့တာ ဖြစ်တယ်လို့ သိရပါတယ် ။
" ပစ်ကပ်ကားသုံးစီးနဲ့ တင်လာတာလို့ သိရတယ် ။ ဖမ်းမိတဲ့အထဲ ကလေးတွေလည်း ပါတာတွေ့ရတယ်။ တချို့က မိသားစုလိုက်တွေ အကုန်လာကြတာ ။ ခုလိုဖမ်းမိသွားတော့ ငွေလည်းကုန် လူတွေလည်းဖမ်းခံရ ။အကုန်ဒုက္ခရောက်တာပေါ့။ သူတို့တွေ တရားမဝင် ဝင်ရောက်မှုနဲ့ အမှုဖွင့်ခံရမှာ ။ ခုရက်တွေ ဒီမှာတောင် အဖမ်းဆီးကြမ်းနေတာကို ပွဲစားစကားကို ယုံပြီး တက်လာနေကြတာ ။ အုပ်စုလိုက်တွေလာရင် မိတာများပါတယ် ။ မလာကြပါနဲ့ ။ ဖြစ်ရင်ဘယ်သူမှ မကယ်နိုင်ဘူး ။ " လို့ မြန်မာလုပ်သားအရေး ကူညီဆောင်ရွက်ပေးနေသူ တယောက်က ပြောပါတယ်။
အဆိုပါ ဖမ်းဆီးရမိခဲတဲ့ မြန်မာလုပ်သားတွေဟာ ထိုင်းနိုင်ငံ နဲ့ မလေးရှားနိုင်ငံကို သွားရောက်အလုပ်လုပ်ကိုင်ကြမှာ ဖြစ်ပြီး ထိုင်းကို တရားမဝင်လမ်းကြောင်းကနေ ဝင်ရောက်ခွင့်ရရှိဖို့အတွက် ပွဲစားကို ဘတ် ၂၀၀၀၀ မှ ၃၀၀၀၀ အထိ ပေးဆောင်ခဲ့ရတယ်လို့ သိရပါတယ်။
ဇန်နဝါရီလ၂၂ ရက် နေ့ကလည်း ထိုင်းကို နယ်စပ်ကနေ တရားမဝင် ဝင်ရောက်လာတဲ့ မြန်မာနိုင်ငံသား ၁၂ ယောက်ကို ထိုင်းအာဏာပိုင်တွေက ဖမ်းဆီးမှုရှိခဲ့တယ်လို့ သိရပါတယ်။
လက်ရှိမှာ ထိုင်းအာဏာပိုင်တွေက နယ်စပ်လမ်းကြောင်းကနေ ထိုင်းကို တရားမဝင် ဝင်ရောက်ဖို့ကြိုးစားတဲ့ မြန်မာနိုင်ငံသားတွေကို ဖမ်းဆီးမှုတွေပြုလုပ်နေသလို ထိုင်းနိုင်ငံတွင်းမှာ ရောက်ရှိပြီး အလုပ်လုပ်ကိုင်နေတဲ့ မြန်မာလုပ်သားတွေထဲက အထောက်အထားမပြည့်စုံတဲ့ တရားမဝင်လုပ်သားတွေကိုပါ ရှာဖွေဖမ်းဆီးမှုတွေ ဆက်တိုက် ပြုလုပ်နေတယ်လို့ သိရပါတယ်။
ပြီးခဲ့တဲ့ ဇန်နဝါရီ ၁၁ ရက်နေ့က ထိုင်းနိုင်ငံ ၊စမွတ်ပရာကန်မြို့မှာ ဖြစ်ပွားခဲ့တဲ့ ထိုင်းနိုင်ငံသားတွေနဲ့ မြန်မာရွှေ့ပြောင်းလုပ်သားတွေ ပဋိပက္ခ အခြေအနေ အပြီး နောက်ပိုင်းမှာ ထိုင်းအစိုးရက ရွှေ့ပြောင်း အလုပ်သမားတွေကို အရှိန်မြှင့် စစ်ဆေးဖမ်းဆီးမှုတွေ လုပ်ဆောင်လာတာ ဖြစ်သလို နယ်စပ်ဖြတ်ကျော် ဝင်ရောက်မှုတွေကိုပါ တင်းကျပ်စွာ စစ်ဆေးနေတာ ဖြစ်တယ်လို့ သိရပါတယ်။
ဇန်နဝါရီ ၂၈ ရက်နေ့က ၊ ထိုင်းနိုင်ငံ ၊ ချွန်ဘူရီခရိုင်ထဲက တရုတ်ပိုင် ဆောက်လုပ်ရေးလုပ်ငန်းခွင်ကို ထိုင်းအာဏာပိုင်တွေ ဝင်ရောက်ပြီး စစ်ဆေးခဲ့ရာ မြန်မာလုပ်သား ၂၇ ယောက်မှာ အလုပ်လုပ်ကိုင်ခွင့် မရှိဘဲ ဥပဒေချိုးဖောက် အလုပ်လုပ်ကိုင်နေတယ်ဆိုပြီး ဖမ်းဆီးခံခဲ့ရတယ်လို့ သိရပါတယ်။
" အဖမ်းဆီးကြမ်းနေလို့ အလုပ်နဲ့ အိမ်ပဲ ။ဘယ်နေရာမှ မသွားရဲဘူး ။ အရင်လူစည်တဲ့ နေရာတွေတောင် ခြောက်ကပ်နေတယ် ။ အခုက အလုပ်ဆိုက်တွေ နေတဲ့ အခန်းတွေထိကို ဝင်ဖမ်းနေတာ ။ " လို့ ထိုင်းရောက် မြန်မာလုပ်သားက ပြောပါတယ်။
မြန်မာလုပ်သားတွေအနေနဲ့ ထိုင်းနိုင်ငံကို နယ်စပ် ဝင်‌ပေါက်တွေဖြစ်‌တဲ့ မြဝတီ - မဲ‌ဆောက်လမ်း‌ကြောင်း၊ ဘုရားသုံးဆူ - ကန်ချဘူရီလမ်း‌ကြောင်း၊ ‌မော‌တောင် နယ်စပ်လမ်း‌ကြောင်းနဲ့ တာချီလိတ် - မယ်ဆိုင် အစရှိတဲ့ နယ်စပ်ဝင်‌ပေါက် လမ်း‌ကြောင်းတွေကတဆင့် တရားမဝင် ဝင်ရောက်နေကြတာဖြစ်ပြီး ထိုင်းနိုင်ငံအတွင်း ‌နေ့စဉ်လိုလို အဖမ်းအဆီး ခံ‌နေရတယ်လို့ သိရပါတယ်။
ဒီနှစ် ၂၀၂၆ ခုနှစ် ၊ ဇန်နဝါရီလ မှာတင် ထိုင်းကို နယ်စပ်ကနေ တရားမဝင် ဝင်ရောက်ဖို့ကြိုးစားခဲ့တဲ့ မြန်မာနိုင်ငံသား အယောက် ၅၀၀ ထက်မနည်း ဖမ်းဆီးခံခဲ့ရတယ်လို့ သိရပါတယ်။

ကျောက်ဖြူ ဓညဝတီရေတပ်ဌာနချုပ်အနီး တိုက်ပွဲပြင်းထန်နေ

ရခိုင်ပြည်နယ်၊ ကျောက်ဖြူမြို့နယ် အခြေစိုက် ဓည၀တီ ရေတပ်ဌာနချုပ်အနီးမှာ တိုက်ပွဲ ပြင်းထန်နေပြီး အစိုးရတပ်က ကြည်းကြောင်း၊ ရေကြောင်း၊ လေကြောင်းတွေ အသုံးပြုကာ AA တပ်တွေကို တန်ပြန် ထိုးစစ်ဆင် တိုက်ခိုက်နေတယ်လို့ စစ်ရေး သတင်းရင်းမြစ်တွေက ပြောပါတယ်။
လက်ရှိမှာ ဓညဝတီရေတပ် ဌာနချုပ်နဲ့ ၄ မိုင်ခန့်အကွာက ‎ဇင်ချောင်း၊ သိုင်းချောင်း၊ ကြတ္တိန်၊ ကုလာဘာ၊ ဦးကင်း အစရှိတဲ့ နေရာတွေမှာ တိုက်ပွဲတွေ ဖြစ်ပွားနေပြီး အစိုးရတပ်က စစ်ကြောင်းတွေခွဲကာ ထိုးစစ်ဆင်နေသလို စက်တပ်လေထီး (ပါရာမော်တာ) တွေကိုပါ အသုံးပြု တိုက်ခိုက်နေတာ ဖြစ်တယ်လို့ သိရပါတယ်။
“လက်ရှိ တိုက်ပွဲဖြစ်နေတဲ့ ရွာတွေက ရေတပ်ဌာနချုပ်ကိုသွားတဲ့ လမ်းမှာရှိနေတာ။ AA တပ်တွေ ကျောက်ဖြူမြို့ထဲ ဝင်မယ်ဆိုတဲ့ သတင်းကြောင့် အစိုးရတပ်က မြို့နားထိ တပ်ဆုတ် နေရာယူထားတယ်။ စက်သေနတ် ပစ်ခတ်သံတွေ၊ လက်နက်ကြီးသံတွေကတော့ နေ့တိုင်း ကြားနေရတာ” လို့ စစ်ရေးသတင်းရင်းမြစ်က ပြောပါတယ်။
လက်ရှိ ကျောက်ဖြူမြို့နယ်ထဲမှာ အစိုးရတပ်က အင်အားတိုးမြှင့်ပြီး လုံခြုံရေး တင်းကျပ်ထားသလို စစ်ကူအင်အား အမြောက်အမြားကိုလည်း မကြာခဏ ပို့ဆောင်တာတွေ ရှိနေတယ်လို့ ဆိုပါတယ်။
“ထိုးစစ်ဆင်နေတာကတော့ နှစ်ဖက်စလုံးလို့ပဲ ပြောရမယ်။ ဦးကင်းနဲ့ ကုလာဘာတောင်ဘက်က AA တပ်စွဲထားတဲ့ နေရာတွေကို အစိုးရတပ်က စစ်ကြောင်းတွေလွှတ်ပြီး တိုက်ခိုက်နေတယ်။ အဲဒီနေရာတွေမှာတော့ တိုက်ပွဲက နေ့တိုင်းဖြစ်နေတာ။ အဲဒီနေရာက‌နေ AA ရှေ့တိုးမလာနိုင်အောင် အစိုးရတပ်က နေဗီပစ်ကူတွေနဲ့ရော၊ လေကြောင်း၊ ဒရုန်း၊ စက်တပ်လေထီးတွေပါ ဆက်တိုက်သုံးပြီး တိုက်ခိုက်နေတယ်” လို့ သူက ပြောပါတယ်။
လက်ရှိမှာ အစိုးရတပ်က မင်းတပ်တောင်နဲ့ သိုင်းချောင်း ပတ်ဝန်းကျင်ကို ထိုးစစ်ဆင်နေသလို AA ဘက်ကလည်း ဓညဝတီ ရေတပ်ဌာနချုပ်အနီးကို တိုက်ခိုက်နေတာ ဖြစ်တယ်လို့ သိရပါတယ်။
ကျောက်ဖြူမြို့နယ်မှာ မြို့နဲ့အနီးတဝိုက်ကို အစိုးရတပ်က ထိန်းချုပ်ထားပြီး လူမရှိတော့တဲ့ ကျေးရွာပေါင်း ၂၀ ကျော်မှာ နေရာယူ တပ်စွဲထားသလို တောင်ကုန်းတချို့မှာ ဗျူဟာကုန်းအသစ် အနေနဲ့ တပ်စွဲထားကာ လက်နက်ကြီးတွေ တပ်ဆင်ထားတယ်လို့ သိရပါတယ်။
ကျောက်ဖြူမြို့နယ်မှာ တရုတ်နိုင်ငံပိုင် CITIC Group ကုမ္ပဏီနဲ့ မြန်မာအစိုးရ အကောင်အထည်ဖော် ဆောင်ရွက်နေတဲ့ အထူးစီးပွားရေးဇုန်နဲ့ ရေနက်ဆိပ်ကမ်း စီမံကိန်းတွေ တည်ရှိနေတယ်လို့ သိရပါတယ်။

အရေးပေါ် အခြေအနေ ဒေသများကို ဆက်လက်ထားရှိ

တောင်သူတွေ စပါးရာသီမှာ အရှုံးပေါ်ခဲ့သလို မတ်ပဲရာသီမှာလည်း အရှုံးနဲ့ဆက်ရင်ဆိုင်ရဖွယ်ရှိ

နေပြည်တော် ဇေယျာသီရိမြို့နယ် တဝိုက်ကကျေးရွာ​တွေမှာရှိတဲ့ တောင်သူတွေအနေနဲ့ ပြီးခဲ့တဲ့ စပါးစိုက်ရာသီမှာအရှုံးပေါ်ခဲ့တဲ့အပြင် အခုလက်ရှိစိုက်ပျိုးထားတဲ့ မတ်ပဲပင်တွေသေဆုံးမှုတွေရှိနေတာကြောင့် အရှုံးနဲ့ ဆက်ပြီးရင်ဆိုင်ရဖို့ အခြေအနေဖြစ်ပေါ်နေတယ်လို့
​တောင်သူ​တွေက​ပြောပါတယ်။
ရန်ကုန်မန္တ​လေးလမ်းဘေးဝဲယာမှာ စိုက်ပျိုးထားတဲ့ မတ်ပဲပင်​တွေသေနေတဲ့အတွက် အဲ့ဒီမတ်ပဲခင်းတွေထဲမှာ လုပ်ကိုင်နေကြတဲ့ တောင်သူတွေကို မေးမြန်းခဲ့တာကနေ သိရတာပါ။
"စပါးရှုံးရတဲ့အကြောင်းက လွန်ခဲ့တဲ့တစ်ရာသီကျော်လောက်စပါး ၁၀၀ ကို ၂၀ သိန်း ၂၂ သိန်းအထိ ရောင်းရပါတယ် ပြီးခဲ့တဲ့နှစ်နွေရာသီတုန်းက ၁၅ သိန်းမိုးရာသီကျတော့ ၁၀ သိန်း စျေးပဲပေါက်တဲ့အတွက် ကိုယ့်အတွက်မကျန်တော့ရှုံးတာပဲပေါ့ဗျာ"လို့ တောင်သူ တယောက်ကပြောပါတယ်။
အခုလက်ရှိ မတ်ပဲစိုက်ပျိုးထားတဲ့ အဲ့ဒီမြို့နယ်ထဲက အခင်းတွေရဲ့အခြေအနေတွေကတော့ တစ်ချို့အခင်းတွေဆို အခင်းလိုက် မတ်ပဲပင်တွေသေနေတာတွေ့ရတဲ့အပြင် တချို့အခင်းတွေမှာတော့ ကွက်တိကွက်ကြား မတ်ပဲ​ပင်တွေသေနေတာကို တွေ့ရှိခဲ့ရတာဖြစ်ပါတယ်။
"မတ်ပဲ တစ်ဧကအတွက် ထွန်ယက်ခက အနည်းဆုံးနှစ်ကြိမ်ပေါ့ တကြိမ်ကို ခုနှစ်သောင်းခွဲ မျိုးစေ့က တတင်းကို တသိန်း ၊ပိုးမကျအောင် ဆေးဖြန်းတဲ့ ဆေးဖိုးတွေနဲ့ဆို တဧကအတွက်တွက်ကြည့်ပေါ့ဗျာ ကျွန်တော်ဆို ငါးဧကစိုက်ထားတာ အများကြီးဆုံးရှုံးရမှာပါ" လို့ အိုင်စောက်ကျေးရွာက မတ်ပဲ​တောင်သူတယောက်ကပြောပါတယ်။
အဲ့ဒီလို တောင်သူတွေကြုံနေရတဲ့အခြေအနေကြောင့်ဇေယျာသီရိမြို့နယ် စိုက်ပျိုးရေး ဦးစီးဌာနမှူးကို ဖုန်းနဲ့ဆက်သွယ်မေးမြန်းခဲ့ပါတယ်။
"မတ်ပဲစိုက်ချိန်နောက်ကျရင်လည်းဖြစ်ထွန်းမှုနည်းပါးတဲ့အပြင် ပြီးခဲ့တဲ့နှစ်က ရာဂီမုန်တိုင်းကြောင့် နုံးတင်သွားတဲ့အတွက် အပေါ်မြေနဲ့အောက်မြေမဆက်မိဘူးပေါ့။ နုံးထုကရိုးရိုးမြေလိုမဟုတ်ပဲ ကျစ်နေတော့ ရေဖြန်းပေးရင်တော့မဆိုးဘူး ခုကအစိုဓာတ်မမြဲတော့တာပေါ့။ နောက်ပြီး မတ်ပဲစိုက်တဲ့နှစ်တွေများလာတော့ အပင်ခြောက်တွေကျန်တယ်လေ အဲ့ဒီကရောဂါတွေအခံရှိတာလည်း ပါပါတယ်" လို့ ဇေယျာသီရိ စိုက်ပျိုးရေးဌာန ဦးစီးမှူးက ဆိုတဲ့အပြင် "တောင်သူတွေကသီးနှံစျေးကောင်းရင်တော့ ကြိုးစားပမ်းစားလုပ်တယ်ပေါ့ဗျာ စပါးမှာရှုံးထားလိုက်တော့ မတ်ပဲကို ဆေးခုနှစ်ကြိမ်လောက်ဖြန်းရမှာကို သုံးကြိမ်လောက်ပဲဖြန်းတော့တယ် ပြောရရင်သီးနှံပေါ်မှာသူတို့ဂရုစိုက်မှုနည်းသွားလို့ပေါ့ဗျာ" လို့ ဦးစီးမှူးက ဖြေကြားပါတယ်။
ဇေယျာသီရိမြို့နယ်ထဲကကျေးရွာ ၁၃ ရွာမှာ ပြီးခဲ့တဲ့၂၀၂၄-၂၂၅ ကမတ်ပဲ ၁၀၃၆၉ ဧက စိုက်ပျိုးခဲ့တာမှာ စိုက်ဧကအတိုင်းရိတ်သိမ်းနိုင်ခဲ့တယ်လို့ သိရပြီးတော့ အထွက်နှုန်း ၂၂.၈၀ ရှိတယ်လို့သိရပြီးမတ်ပဲတင်းရေက ၂၃၆၄၄၇ တင်း ထွက်ရှိခဲ့ပြီး အခု ၂၀၂၅-၂၀၂၆ မှာစိုက်ပျိုးဧက ၉၀၂၀ ဧကစိုက်ပျိုးထားတယ်လို့ သိခဲ့ရပါတယ်။

နေပြည်တော်မှာ အမျိုးသမီးတယောက်ကို အဓမ္မပြုကျင့်ပြီး သတ်ဖြတ် ၊ပစ္စည်းလုယက်ခဲ့ တဲ့ တရားခံနှစ်ယောက်ကို သေဒဏ်အပြင် ထောင်နှစ် ၇၀ ချ

နေပြည်တော် ၊ ဥတ္တရသီရိမြို့နယ်မှာ ဖြစ်ပွားခဲ့တဲ့ အမျိုးသမီးတယောက်ကို အဓမ္မပြုကျင့်ပြီး သတ်ဖြတ်ကာ ပစ္စည်းလုယက်တဲ့ တရားခံ နှစ် ယောက်ကို မသေမချင်းကြိုးကွင်းစွပ်သတ်ရန် သေဒဏ်အပြင် ထောင်နှစ် ၇၀ ပါ ကျခံဖို့ အမိန့်ချမှတ်လိုက်တယ်လို့ သိရပါတယ်။
လူသတ် ၊ အဓမ္မကျင့်ကာ ပစ္စည်းလုယက်ခဲ့တဲ့ တရားခံနှစ်ယောက်ဟာ သိန်းဇော် (ခ) ကိုသိန်း နဲ့
သောင်းဝင်းအောင် (ခ) ချစ်ဖူးတို့ဖြစ်ပြီး
ရာဇသတ်ကြီးပုဒ်မ ၃၀၂ (၁) (ဂ) အရ မသေမချင်း လည်ပင်းကြိုးကွင်းစွပ်ပြီး သတ်စေရန် (သေဒဏ်)၊ ရာဇသတ်ကြီးပုဒ်မ ၃၉၄ အရ ထောင်ဒဏ်နှစ် (၂၀)(နှစ်နှစ်ဆယ်)၊ ရာဇသတ်ကြီးပုဒ်မ ၃၇၆ (၁) အရ ထောင်ဒဏ်နှစ် (၂၀) ၊ ရာဇသတ်ကြီးပုဒ်မ ၃၇၇ အရ ထောင်ဒဏ်နှစ် (၂၀) ၊ ရာဇသတ်ကြီးပုဒ်မ ၃၁၆ အရ ထောင်ဒဏ် (၁၀)နှစ်စီ အသီးသီးကျခံစေဖို့ ဥတ္တရသီရိမြို့နယ်တရားရုံးက အမိန့်ချမှတ်လိုက်တာ ဖြစ်ပါတယ်။
ဒါအပြင် လုယက်ရရှိခဲ့တဲ့ ပစ္စည်းတွေ ဖျောက်ဖျက်ရာမှာ ပါဝင်ကျူးလွန်ခဲ့တဲ့ တရားခံအောင်ကိုဦး (ခ) ဘယ်ကြီး၊ နန်းရွှေစင် (ခ) ကုလားမ၊ အောင်ဇော် (ခ) ကိုဇော် တို့သုံး​ယောက်ကိုလည်း ရာဇသတ်ကြီးပုဒ်မ ၄၁၄ အရ ထောင်ဒဏ် (၃) နှစ် ၊ ရာဇသတ်ကြီးပုဒ်မ ၂၀၂ အရ ထောင်ဒဏ်ခြောက်လစီ အသီးသီးကျခံစေဖို့ ဇန်နဝါရီ ၂၈ ရက်နေ့က အမိန့် ချမှတ်ခဲ့တယ်လို့ သိရပါတယ်။
" ဒီလိုလူတွေကို ခုလို ကြီးလေးတဲ့ ပြစ်ဒဏ်တွေ ချမှတ်တာ အတော်လေးကောင်းပါတယ်။ ဒီလိုကောင်တွေက ပြန်လွတ်လာဖို့ ကောင်းတဲ့ အထဲလည်းမပါဘူး ။ ကျွနတော်တို့ကတော့ ခုလို အမိန့်ချပေးတဲ့ တရားသူကြီး ကျေးဇူးတင်တယ်။ ဒါမှ နောက်လူတွေလည်း ကြောက်ရကောင်းမှန်းသိပြီး ဆင်ခြင်နိုင်မှာ ။ " လို့ နေပြည်တော်ကောင်စီနယ်မြေ ဒေသခံက တ​ယောက်က ပြောပါတယ်။
လူသတ် ၊ အဓမ္မကျင့် ၊ ပစ္စည်းလုယက်ခဲ့တဲ့ တရားခံနှစ်ယောက် နဲ့ အမှုဖျောက်ဖျက်ဖို့ ပူးပေါင်းကျူးလွန်သူတွေကိုတော့ စက်တင်ဘာ ၁ ရက်နေ့နဲ့ ၂ ရက်မှာ ဖမ်းဆီးရမိခဲ့တာ ဖြစ်ပြီး ဖမ်းဆီးပြီး ငါးလ အကြာမှာ ကြီးလေးတဲ့ ပြစ်ဒဏ်တွေကို အမိန့်ချမှတ်ခဲ့တာ ဖြစ်တယ်လို့သိရပါတယ်။
အဆိုပါ လူသတ် ၊ အဓမ္မကျင့် ၊ ပစ္စည်းလုယက်ခဲ့တဲ့ ဖြစ်စဥ်ကတော့ ၂၀၂၅ ခုနှစ် သြဂုတ် ၃၀ ရက်နေ့က ဖြစ်ပွားခဲ့တာဖြစ်ပါတယ်။
​ဖြစ်စဥ်ကတော့ ဥတ္တရသီရိမြို့နယ်၊ မောင်းရမ်းအုပ်စု၊ မောင်းရမ်းကျေးရွာမှာ နေထိုင်တဲ့ အသက် ၂၃ နှစ်အရွယ် မအိအိငြိမ်းဟာ နေအိမ်ကနေ ယောက္ခမဖြစ်သူနေအိမ်ကို တယောက်ထဲ ဆိုင်ကယ်နဲ့ သွားရောက်ရာမှ အဓမ္မကျင့် သတ်ဖြတ်ခံရပြီး ပစ္စည်းလုယက်ကာ အလောင်းကို ဇလောင်းအုပ်စု၊ ငန်းစပ်ကျေးရွာ၊ V 4 လမ်း၊ ရွှေနံ့သာသားသတ်ရုံ၊ မျက်စောင်းထိုးကားလမ်း အရှေ့ဘက်ခြမ်း ခြုံတောအတွင်းမှာ တွေ့ရှိခဲ့ရတာ ဖြစ်တယ်လို့ သိရပါတယ်။
တရားခံတွေဟာ အခင်းဖြစ်တဲ့ နေ့က အရက်သေစာသောက်စားနေချိန် မအိအိငြိမ်းမောင်းနှင်လာတဲ့ ဆိုင်ကယ်ကို တွေ့ရှိပြီး တားဆီးကာ အဓမ္မဝိုင်းဝန်းပြုကျင့်ခဲ့ကြတာ ဖြစ်ကြောင်း ၊ အဲဒီနောက် မအိအိငြိမ်းမှ ရုန်းကန်ထွက်ပြေးခဲ့တဲ့အတွက် သစ်သားတုတ်နဲ့ လည်ပင်း၊ ဦးခေါင်းကို ရှစ်ချက်ခန့်ရိုက်နှက်ခဲ့ရာမှ သေဆုံးသွားခဲ့တာ ဖြစ်တယ်လို့ သိရပါတယ်။
အဲဒီနောက်မှာ တရားခံတွေက မအိအိငြိမ်းဝတ်ဆင်ထားတဲ့ ရွှေလက်စွပ်တကွင်း၊ ရွှေနားကပ် တရံနဲ့ ဆိုင်ကယ်တို့ကို ယူဆောင်ကာ ရောင်းချဖျောက်ဖျက်ခဲ့တာ ဖြစ်တယ်လို့ သိရပါတယ်။