အင်္ဂလန်လက်ရွေးစင်ဟောင်းတစ်ဦး အသက် ၃၅ နှစ်အရွယ်တွင် ကွယ်လွန်
====================
အင်္ဂလန်အမျိုးသမီးလူငယ်အသင်းလက်ရွေးစင်ဟောင်းအေမီကားလ်ဟာ အသက် ၃၅ နှစ်အရွယ်မှာပဲ ကွယ်လွန်သွားခဲ့ရှာပါတယ်။

အင်္ဂလန်ယူ-၁၇ နှင့် ယူ-၁၉ အသင်းတို့တွင် ဂိုးသမားအဖြစ် ကစားခဲ့တဲ့ အေမီကားလ်ဟာ ဒုတိယအကြိမ်မြောက် ဦးနှောက်အကြိတ်တွေ့ရှိပြီးနောက် ကွယ်လွန်သွားခဲ့တာလည်း ဖြစ်ပါတယ်။

သူမဟာ ၂၀၁၅ ခုနှစ်တုန်းက ဦးနှောက်အကြိတ် ပထမဆုံးအကြိမ် တွေ့ရှိခဲ့တာ ဖြစ်ပြီး ၂၀၂၄ ခုနှစ်တုန်းက ဒဗ္ဗလင်မာရာသွန်တွင် ဝင်ရောက်ပြေးကာ ရန်ပုံငွေ ပေါင် ၂၀၀၀ အထိ ရရှိအောင် စွမ်းဆောင်ခဲ့ပါတယ်။

ဟတ်ဖို့ဒ်ရှိုင်းယားဖွား ကားလ်ဟာ အာဆင်နယ်၊ ချဲလ်ဆီး၊ ရီးဒင်းတို့တွင် ကစားပြီးနောက် အမေရိကန်တွင် ဘောလုံးစကောလားရှစ်ယူခဲ့သူ ဖြစ်ပါတယ်။

သူမဟာ နော်ဝေကလပ် IL Sandviken တွင် ပရော်ဖက်ရှင်နယ်ကစားသမားအဖြစ် ကစားစဉ် ဦးနှောက်အကြိတ် တွေ့ခဲ့တာ ဖြစ်ပါတယ်။ နောက်ပိုင်းတွင် သူမဟာ Milton Keynes တွင် နည်းပြအဖြစ် တာဝန်ထမ်းဆောင်ခဲ့ပါတယ်။

အလန်ရှီးယားနှင့် ရွိုင်ကိန်းတို့ရဲ့ ဝေဖန်မှုခံရတဲ့ အန်တိုနီဂေါ်ဒွန်အား အက်ဒီဟောင်းကာကွယ်ပြောကြားလာ
====================
နယူးကာဆယ်နည်းပြအက်ဒီဟောင်းဟာ ဘောလုံးဝေဖန်ရေးသမားများရဲ့ ဝေဖန်မှုများခံခဲ့ရတဲ့ အန်တိုနီဂေါ်ဒွန်အား ဘာစီလိုနာနှင့်ပွဲတွင် ပွဲထွက်ကစားသမားအဖြစ် အသုံးမပြုခဲ့ရန် မိမိကိုယ်တိုင် ဆုံးဖြတ်ခဲ့ခြင်း ဖြစ်ကြောင်း ပြောဆိုလာပါတယ်။

အန်တိုနီဂေါ်ဒွန်ဟာ ဝိန်းရွန်းနီ၊ အလန်ရှီးယား၊ ရွိုင်ကိန်းတို့ရဲ့ ဝေဖန်မှုများ ခံခဲ့ရပြီးနောက် အင်္ဂါနေ့တုန်းက ဘာစီလိုနာနှင့် သရေကျတဲ့ နယူးကာဆယ်ရဲ့ ချန်ပီယံလိဂ် ၁၆ သင်း ရှုံးထွက်အဆင့်ပွဲစဉ်တွင် ပွဲထွက်ကစားလာခဲ့ခြင်း မရှိပါဘူး။

အလန်ရှီးယားဟာ ဘာစီလိုနာနှင့်ပွဲမတိုင်မီ အန်တိုနီဂေါ်ဒွန် လေ့ကျင့်ခန်းဆင်းနိုင်ခြင်း မရှိကြောင်း သိရပြီးနောက် အင်္ဂလန်စတားမှာ ပွဲကို မလွဲ လွဲအောင် တမင်လုပ်ဆောင်လာခြင်းဖြစ်ကြောင်း ဝေဖန်ခဲ့ပါတယ်။ ဂေါ်ဒွန်ဟာ ပွဲနေ့ နံနက်ပိုင်း အပေါ့စား လေ့ကျင့်ခန်းအစီအစဉ်တွင်လည်း မပါဝင်နိုင်ခဲ့ပါဘူး။

ယခုအခါ အက်ဒီဟောင်းက "ရှင်းရှင်းလင်းလင်း ဖြစ်အောင် လုပ်စရာ ရှိတယ်။ သူ့မှာ ဘာစီလိုနာနဲ့ပွဲမှာ ကစားနိုင်တဲ့ အခြေအနေ အပြည့်အစုံရှိတယ်။ ဝေဖန်မှုတွေ အများကြီး ရှိနေတာ သိပါတယ်။ သူ့ကို ပွဲထွက်ကစားသမားအဖြစ် မသုံးဖို့ ကျွန်တော်ပဲ ဆုံးဖြတ်ခဲ့တာပါ။ အဲဒီနေ့ မနက်တုန်းက သူ နေမကောင်း ဖြစ်နေလို့ပါ။ လေ့ကျင့်ခန်းတောင် မဆင်းနိုင်ခဲ့ဘူး။ သူ ကစားဖို့ ပြင်ဆင်ခဲ့တယ်။ ဆေးအဖွဲ့ဆီက အကြံဉာဏ် ရယူပြီးတဲ့နောက် ပွဲကစားဖို့ ကြံ့ခိုင်မှု ရှိတယ်လို့ မထင်မှတ်ခဲ့ပါဘူး"လို့ ပြောကြားသွားပါတယ်။

ဂေါ်ဒွန်ဟာ လက်ရှိအချိန်တွင် နယူးကာဆယ်နှင့်အတူ လေ့ကျင့်ခန်းပြန်ဆင်းနေပြီ ဖြစ်ပြီး စနေနေ့ စတမ်းဖို့ဒ်ဘရစ်ချ်တွင် ချဲလ်ဆီးနှင့် ကစားရမယ့်ပွဲတွင် ပွဲထွက်လာပါတယ်။

ဒါ့အပြင် အက်ဒီဟောင်းက အန်တိုနီဂေါ်ဒွန်မှာ အင်္ဂလန်လက်ရွေးစင်ကစားသမားတစ်ဦးဖြစ်နေမှုနှင့်အတူ ဖိအားများစွာ ခံစားနေရကြောင်းလည်း ဆိုသွားပါတယ်။

၂၀၂၁ ခုနှစ်နောက်ပိုင်း ပထမဆုံး ပရီးမီးယားလိဂ်တစ်လတာအကောင်းဆုံးနည်းပြဆုကို ဂွါဒီယိုလာ ဆွတ်ခူးလာ
====================
မန်စီးတီးနည်းပြပက်ဂွါဒီယိုလာဟာ လေးနှစ်ကြာ ဝေးကွာလာခဲ့တဲ့ ပရီးမီးယားလိဂ်တစ်လတာအကောင်းဆုံးနည်းပြဆုအား ဖေဖော်ဝါရီလအတွက် ဆွတ်ခူးလာခဲ့ပါတယ်။

မန်စီးတီးဟာ ပြီးခဲ့တဲ့ရာသီများအတွင်း ဆုဖလားများ အောင်မြင်မှုများ ရရှိလာခဲ့ပေမယ့်လည်း ဂွါဒီယိုလာကတော့ ၂၀၂၁ ခုနှစ် ဒီဇင်ဘာလနောက်ပိုင်းတွင် ပရီးမီးယားလိဂ်တစ်လတာအကောင်းဆုံးနည်းပြဆုအား ဆွတ်ခူးလာခဲ့ခြင်း မရှိပါဘူး။

ဒါပေမယ့် ဂွါဒီယိုလာဟာ လေးနှစ်အတွင်း ပထမဆုံးအကြိမ်အဖြစ် ဖေဖော်ဝါရီလအတွက် တစ်လတာအကောင်းဆုံးနည်းပြဆုအား ဆွတ်ခူးလာပါတယ်။

ဂွါဒီယိုလာဟာ ပရီးမီးယားလိဂ်တစ်လတာအကောင်းဆုံးနည်းပြဆုအား လေးနှစ်တိုင် ဝေးကွာလာခဲ့ပေမယ့်လည်း ယခုအခါ ၁၂ ကြိမ်မြောက် ဆွတ်ခူးလာပြီလည်း ဖြစ်ပါတယ်။

သူဟာ ပရီးမီးယားလိဂ်တစ်လတာအကောင်းဆုံးနည်းပြဆုအား ဆာအဲလက်စ်ဖာဂူဆန်၊ အာစင်ဝင်းဂါးတို့နောက် တတိယအများဆုံးဆွတ်ခူးထားသူ အဖြစ် ရပ်တည်နေသူ ဖြစ်ပါတယ်။

ဂွါဒီယိုလာဟာ ဖေဖော်ဝါရီလအစောပိုင်းတွင် စပါးစ်နှင့် သရေကျခဲ့ပေမယ့်လည်း လီဗာပူး၊ ဖူလ်ဟမ်၊ နယူးကာဆယ်၊ လိဒ်တို့အား အနိုင်ရရှိအောင် စွမ်းဆောင်ပေးနိုင်ခဲ့ပါတယ်။

သူဟာ ကိတ်အင်ဒရူး(ဘရန့်ဖို့ဒ်)၊ မိုက်ကယ်ကာရစ်(ယူနိုက်တက်)၊ အန်းဆလော့(လီဗာပူး)တို့အား ကျော်ဖြတ်ကာ ဆွတ်ခူးလာခဲ့တာပါ။

ဒါ့အပြင် မန်စီးတီးစတားအန်တိုနီဆီမန်ယိုကလည်း ဖေဖော်ဝါရီလအတွက် တစ်လတာအကောင်းဆုံးကစားသမားဆုအား ဆွတ်ခူးသွားခဲ့ပါတယ်။

စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီ
********************************
🇲🇲 ရည်ညွှန်းလက်လီဈေးနှုန်းများ
💢ရန်ကုန်မြို့
💢မန္တလေးမြို့
💢နေပြည်တော်
💢တိုင်းဒေသကြီး/ ပြည်နယ်မြို့တော်များ

ပီအက်စ်ဂျီနှင့်ပွဲမတိုင်မီ ၈ နာရီအလိုခန့်ကတည်းက လူစာရင်းပေါက်ကြားခဲ့ပြီးနောက် စပိုင်အား ရေဆုံးမြေဆုံးရှာဖွေမယ်လို့ ရိုဆင်နီယာကြုံးဝါးလာ
=====================
လီယန်ရိုဆင်နီယာက ပီအက်စ်ဂျီနှင့်ပွဲမတိုင်မီ ၈ နာရီအလိုကတည်းက အသင်းရဲ့ ပွဲထွက်လူစာရင်း ပေါက်ကြားလာခဲ့ပြီးနောက် အသင်းအတွင်း ရှိနေတဲ့ စပိုင်ကို အဆုံးထိတိုင် ရှာဖွေသွားမယ်လို့ ကြုံးဝါးလာပါတယ်။

ရိုဆင်နီယာရဲ့ ပွဲထွက်လူစာရင်းမှာ ပွဲမတိုင်မီ ၈ နာရီအလိုကတည်းက ပေါက်ကြားလာခဲ့တာ ဖြစ်ပြီး ပြင်သစ်ဂျာနယ်လစ်တစ်ဦးက ဖွင့်ချလာခဲ့တာလည်း ဖြစ်ပါတယ်။ ပေါက်ကြားခဲ့တဲ့အတိုင်း ချဲလ်ဆီးဟာ ချန်ပီယံလိဂ် ၁၆ သင်း ရှုံးထွက်အဆင့် ပထမအကျော့ပွဲစဉ်တွင် ရောဘတ်ဆန်းချက်ဇ်အစား ဖီးလစ်ဂျော်ဂျင်ဆင်အား ပွဲထွက်ဂိုးသမားအဖြစ် အသုံးပြုခဲ့တာ တွေ့ရပါတယ်။

ဒါပေမယ့် ရန်ဂိုးသမားဂျော်ဂျင်ဆင်ဟာ ယင်းပွဲတွင် အမှားပြုလုပ်ကာ လက်ဆောင်ဂိုးပေးခဲ့ပြီး ချဲလ်ဆီးတို့ ၅-၂ ဖြင့် ရှုံးနိမ့်ကာ ပြိုင်ပွဲမှ ထွက်ခွာရရန် သေချာသလောက် အခြေအနေသို့ ရောက်သွားပါတယ်။

ရိုဆင်နီယာက "ဒါနဲ့(လူစာရင်းပေါက်ကြားမှု)ပတ်သက်ပြီး မစိုးရိမ်ပါဘူး။ တကယ်လို့ ရှိနေတယ်ဆိုရင် (စပိုင်) အဆုံးထိ ရှာဖွေပါမယ်။ ဒါမျိုးတွေက အခု ဖြစ်နေတယ်။ ဖြစ်နေတာလည်း ကြာပါပြီ။ ကျွန်တော်တို့ ပြိုင်ဘက်နဲပတ်သက်ပြီးတော့လည်း ကျွန်တော်တို့ သတင်းအချက်အလက် ရတာပဲ။ ပွဲမတိုင်ခင်ထက် ပွဲပြီး ရလဒ်အပေါ် ပိုပြီးတော့ အာရုံစိုက်ပါတယ်"လို့ ပြောကြားသွားပါတယ်။

ချဲလ်ဆီးဟာ စနေနေ့တွင် နယူးကာဆယ်နှင့် ရင်ဆိုင်ပြီးနောက် လာမယ့် အပတ် အင်္ဂါနေ့တွင် စတမ်းဖို့ဒ်ဘရစ်ချ်မှာ ပီအက်စ်ဂျီအား ဧည့်ခံကစားရပါမယ်။

ပီအက်စ်ဂျီမှာ ယခုအပတ်ကြားရက် ပွဲအား ရွှေ့ဆိုင်းထားနိုင်မှုနှင့်အတူ လာမယ့် စတမ်းဖို့ဒ်ဘရစ်ချ်ပွဲစဉ်အတွက် နားချိန်နှင့် ပြင်ဆင်ချိန် အပြည့်အဝ ရရှိထားပါတယ်။

ဗီလာတွင် နိုင်ပွဲ ၁၀၀ အမြန်ဆုံးရယူသူအဖြစ် သမိုင်းမှတ်တိုင်စိုက်ထူလာတဲ့ ယူရိုပါလိဂ်စပါယ်ရှယ်လစ်အူနိုင်းအမ်မရီ
=====================
အူနိုင်းအမ်မရီဟာ ယူရိုလိဂ် ၁၆ သင်းရှုံးထွက်အဆင့် ပထမအကျော့တွင် လိုင်လီအား အနိုင်ရရှိပြီးနောက် ဗီလာသမိုင်းတွင် နိုင်ပွဲ ၁၀၀ အမြန်ဆုံးရရှိတဲ့ နည်းပြ ၃ ဦးစာရင်းတွင် ပါဝင်လာပါတယ်။

စပိန်လူမျိုးနည်းပြဟာ ယူရိုလိဂ် ၄ ကြိမ်ဆွတ်ခူးထားသူ ဖြစ်ပြီး ဗီလာနှင့်အတူ ၅ ကြိမ်မြောက် ဆွတ်ခူးရန် ရည်မှန်းနေသူလည်း ဖြစ်ပါတယ်။

၂၀၂၂ ခုနှစ်အောက်တိုဘာလတွင် အသက် ၅၄ နှစ်ရှိ အမ်မရီဟာ နိုင်ပွဲ ရာခိုင်နှုန်း ၅၅.၂ ဖြင့် အနိုင်ရာခိုင်နှန်းအများဆုံးနည်းပြအဖြစ် ဗီလာတွင် မှတ်တမ်းရေးထိုးထားသလို သူ ဗီလာတွင် တာဝန်ထမ်းဆောင်စဉ်အတွင်း သူ့ထက် ရလဒ်ကောင်း ရရှိတဲ့ ပရီးမီးယားလိဂ်နည်းပြ ၂ ဦးတည်းသာ ရှိပါတယ်။

ယင်းနည်းပြတွေကတော့ ပက်ဂွါဒီယိုလာ(၁၃၇ ပွဲ)နှင့် မီခေးလ်အာတီတာ (၁၁၈ ပွဲ)တို့ ဖြစ်ပါတယ်။

အူနိုင်းအမ်မရီဟာ လိုင်လီအား ၁-၀ ဂိုးဖြင့် အနိုင်ရတဲ့ပွဲတွင် ဗီလာကို ၁၈၁ ပွဲမြောက်ပွဲအဖြစ် ကိုင်တွယ်လာတာ ဖြစ်ပြီး ပွဲရာနှုန်းအမြန်ဆုံး ရရှိသူအဖြစ် ဗီလာသမိုင်းတွင် မှတ်တိုင်စိုက်ထူလာတာပါ။

သူ့မတိုင်ခင် ဗီလာသမိုင်းတွင် အမြန်ဆုံးရာပြည့်နိုင်ပွဲ ရရှိတဲ့ နည်းပြအဖြစ် ရွန်ဆောင်းဒါးက ၁၉၇၇-၇၈ ရာသီတွင် စတုတ္ထမြောက်ရာသီကိုင်တွယ်ပြီး မှတ်တမ်းရေးထိုးခဲ့တာပါ။

ဆောင်းဒါးဟာ ဗီလာကို ဒုတိယတန်းမှ တန်းတက်အောင် စွမ်းဆောင်ခဲ့သလို ၁၉၈၀-၈၁ ရာသီမှာ ၇၁ နှစ်အတွင်း ပထမဆုံးအဆင့်မြင့်တန်းဖလားအဖြစ် ၁၉၈၀-၈၁ ရာသီမှာ ရယူပေးခဲ့သလို လိဂ်ဖလားလည်း ၂ ကြိမ် ရယူပေးခဲ့ပါတယ်။

ဒါ့အပြင် သူဟာ ၁၉၈၁-၈၁ ရာသီမှာ ဥရောပဖလားလည်း ရယူပေးနိုင်ခဲ့ပါတယ်။

ဗီလာသမိုင်းတွင် နောက်ထပ် နိုင်ပွဲ ရာပြည့်အမြန်ဆုံး ရယူနိုင်ခဲ့တဲ့ နည်းပြအဖြစ် မှတ်တမ်းရေးထိုးထားသူက ဂျိုးမာစာ ဖြစ်ပါတယ်။ သူဟာ ဗီလာကို ၁၉၅၈ မှ ၁၉၆၄ ခုနှစ်တွေအတွင်း ကိုင်တွယ်စဉ်အတွင်း နိုင်ပွဲ ၁၀၀ ရယူနိုင်ဖို့ လေးနှစ်ခွဲ အချိန်ယူခဲ့ရပါတယ်။

ဒါ့အပြင် ဂျော့ရမ်ဆေး(၁၈၈၄-၁၉၂၆)မှာ ဗီလာတွင် နိုင်ပွဲ ၁၀၀ ရရှိရေး ပွဲ ၁၉၀ ကိုင်တွယ်ခဲ့ရသလို ဒဗလျူဂျေစမစ်(၁၉၂၆-၃၄)မှာလည်း နိုင်ပွဲ ၁၀၀ ရယူဖို့ ၂၀၅ ပွဲအထိ ကိုင်တွယ်ခဲ့ရပါတယ်။

ဒါပေမယ့် အူနိုင်းအမ်မရီကတော့ ဗီလာတွင် နိုင်ပွဲ ရာပြည့် ရယူနိုင်ရန်အတွက် ၃ နှစ်နှင့် ၄ လတည်းသာ အချိန်ယူခဲ့ရပါတယ်။

အီရန်အသင်းမှာ ကမ္ဘာ့ဖလားပြိုင်ပွဲတွင် ပါဝင်ရန် မသင့်လျော်ကြောင်း ဒေါ်နယ်ထရမ့် ပြောကြားလာ
=======================
အမေရိကန်သမ္မတဒေါ်နယ်ထရမ့်က အီရန်လက်ရွေးစင်အသင်းအား ၂၀၂၆ ကမ္ဘာ့ဖလားပြိုင်ပွဲက ကြိုဆိုကြောင်း၊ သို့ရာတွင် ၎င်းတို့မှာ ကိုယ့်အသက်နှင့် လုံခြုံရေးအတွက် ကမ္ဘာ့ဖလားပြိုင်ပွဲတွင် ပါဝင်သင့်တော်တယ်လို့ မယုံကြည်ကြောင်း ပြောကြားလာပါတယ်။

အီရန်အားကစားနှင့် လူငယ်ရေးရာဝန်ကြီးအာမက်ဒွန်ယာမာလီက အီရန်အသင်းမှာ အမေရိကန်၊ ကနေဒါ၊ မက္ကဆီကိုတို့က ပူးတွဲအိမ်ရှင်အဖြစ် ကျင်းပမယ့် ကမ္ဘာ့ဖလားပြိုင်ပွဲတွင် ပါဝင်လာမည်မဟုတ်ကြောင်း ပြောကြားထားပါတယ်။

အီရန်ဟာ ဇွန်လ ၁၅ ရက်နေ့နှင့် ၂၁ ရက်နေ့တို့တွင် အယ်လ်အေတွင် နယူးဇီလန်၊ ဘယ်လ်ဂျီယံတို့နှင့် ကစားရမှာ ဖြစ်ပြီး ဇွန်လ ၂၆ ရက်နေ့တွင် ဆက်တယ်တွင် အီဂျစ်နှင့် ကစားရပါမယ်။

ဒါပေမယ့် အီရန်အသင်းရဲ့ ကမ္ဘာ့ဖလားပါဝင်ယှဉ်ပြိုင်ရေးမှာ အမေရိကန်နှင့် အစ္စရေးတို့ရဲ့ ပူးပေါင်းစစ်ဆင်နွဲမှုဖြင့် နိုင်ငံခေါင်းဆောင်ခါမေနီ သေဆုံးသွားပြီးနောက် မရေမရာ ဖြစ်လာနေပါတယ်။

အီရန်ကလည်း ခါမေနီအား လုပ်ကြံသတ်ဖြတ်မှုကို အမေရိကန်စစ်တပ်အခြေစိုက်ရာ ဘာရိန်း၊ ကူဝိတ်၊ ကာတာ၊ ယူအေအီးတို့အား ဒုံးကျည်များ၊ ဒရုန်းများဖြင့် တိုက်ခိုက်ကာ တုံ့ပြန်မှုများပြုလုပ်နေပါတယ်။

ဒေါ်နယ်ထရမ့်က "အီရန်လက်ရွေးစင်ဘောလုံးအသင်းကို ကမ္ဘာ့ဖလားက ကြိုဆိုပါတယ်။ ဒါပေမယ့် ကျွန်တော်ကတော့ သူတို့ရဲ့ အသက်နဲ့ လုံခြုံရေးအတွက် ပါဝင်သင့်တယ်လို့ မထင်ပါဘူး"လို့ ပြောကြားသွားပါတယ်။

ယခုအခါအပတ်အစောပိုင်းတုန်းက ဖီဖာဥက္ကဌဂျီယန်နီအင်ဖန်တီနိုက ထရမ့်က အီရန်အသင်းကို ကြိုဆိုသွားမယ်လို့ သူ့ကို ပြောကြားထားကြောင်း ပြောကြားခဲ့ပါတယ်။

တဖက်တွင် တကယ်လို့များ အီရန်သာ ၄ ကြိမ်ဆက် ကမ္ဘာ့ဖလားပြိုင်ပွဲ မယှဉ်ပြိင်ဘဲ နတ်ထွက်လာပါက ဖီဖာအနေဖြင့် အစားထိုးယှဉ်ပြိုင်ခွင့်ပေးရမယ့်အသင်းကို ရွေးချယ်ရပါမယ်။

ဘောကောက်လူငယ်အား တွန်းခဲ့တဲ့ နီတိုရဲ့ ဖြစ်ရပ်ကို ယူအီးအက်ဖ်အေစုံစမ်းစစ်ဆေးလာ
====================
ယူအီးအက်ဖ်အေဟာ ပီအက်စ်ဂျီအား ရှုံးနိမ့်တဲ့ ပွဲစဉ်တွင် ဘောကောက်လူငယ်အား တွန်းခဲ့တဲ့ ချဲလ်ဆီးစတားပီဒရိုနီတိုရဲ့ လုပ်ရပ်ကို စုံစမ်းစစ်ဆေးမှုများ ပြုလုပ်နေပါတယ်။

အသက် ၂၆ နှစ်ရှိ ပေါ်တူဂီလက်ရွေးစင်ဟာ Parc des Princes တွင် ပီအက်စ်ဂျီအား ၅-၂ ဖြင့် ရှုံးနိမ့်တဲ့ပွဲစဉ်ရဲ့ အချိန်ပိုတွင် လူငယ်လေးအား တွန်းခဲ့တာ ဖြစ်ပြီး လူငယ်လေးမှာ ထိုင်ခုံပေါ်သို့ လဲကျသွားခဲ့ပါတယ်။

ယင်းဖြစ်ရပ်ကြောင့် နှစ်ဖက်ကစားသမားများအကြား ရုန်းရင်းဆန်ခတ် ဖြစ်ခဲ့ပါတယ်။

ယခုအခါ ယူအီးအက်ဖ်အေက နီတိုအား အားကစားသမားမပီသတဲ့ အပြုအမူအတွက် စုံစမ်းစစ်ဆေးမှုများ ပြုလုပ်နေပြီ ဖြစ်ပါတယ်။

နီတိုဟာ အဆိုပါပွဲအပြီးတွင် ဘောကောက်လူငယ်လေးထံသို့ သွားရောက်ပြီး တောင်းပန်ခဲ့သလို အင်္ကျီလက်ဆောင်လည်း ပေးခဲ့ပါသေးတယ်။

ဒါ့အပြင် ပေါ်တူဂီစတားဟာ ပွဲအပြီး သတင်းစာရှင်းလင်းပွဲသို့လည်း တက်ရောက်ကာ ယင်းဖြစ်ရပ်အတွက် လူသိရှင်ကြား တောင်းပန်မှုလည်း ပြုလုပ်ခဲ့ပါတယ်။