ကမ္ဘာ့ဖလားပြိုင်ပွဲအပြီးတွင် ဂျာမနီအသင်းကို ဂျာဂင်ကလော့ပ် ကိုင်တွယ်လာနိုင်
=====================
ဂျာဂင်ကလော့ပ်ဟာ နွေရာသီတွင် ဂျာမနီအသင်းနည်းပြရာထူးအား ရယူလာနိုင်ကြောင်း သတင်းထွက်ပေါ်နေပါတယ်။

ဂျာဂင်ကလော့ပ်ဟာ ရက်ဘူးလ်တွင် တစ်ကမ္ဘာလုံးဆိုင်ရာဘောလုံးအကြီးအကဲ အဖြစ် တာဝန်ထမ်းဆောင်နေသူလည်း ဖြစ်ပါတယ်။

အသက် ၅၈ နှစ်ရှိ ကလော့ပ်ဟာ ၂၀၂၄ ခုနှစ်တွင် လီဗာပူးမှ ထွက်ခွာပြီးနောက် ပြီးခဲ့တဲ့နှစ် ဇန်နဝါရီလမှ စတင်ကာ ရက်ဘူးလ်တွင် ဘောလုံးအကြီးအကဲအဖြစ် တာဝန်ထမ်းဆောင်လာတာပါ။

ဒါပေမယ့် ယနေ့တွင် Bild ရဲ့ ဖော်ပြလာမှုအရ ကလော့ပ်ဟာ ယင်းရာထူးမှာ သူနှင့် သင့်တော်တဲ့အလုပ်တစ်ခုလို့ ယူဆလာခြင်း မရှိမှုနှင့်အတူ ဘောလုံးကွင်းထဲသို့ ပြန်လည် ဝင်ရောက်ကာ ကစားသမားများအား စီမံခန့်ခွဲရေး လုပ်ဆောင်လာလိုနေကြောင်း သိရပါတယ်။

ကလော့ပ်ဟာ ယခင်တုန်းက ဂျာမနီအသင်းနည်းပြရာထူးအတွက် ကမ်းလှမ်းမှုအား ငြင်းဆိုခဲ့ဖူးပေမယ့်လည်း ယခုတစ်ကြိမ်တွင် ကမ်းလှမ်းလာပါက လက်ခံရန် အသင့်ရှိနေတယ်လို့ ယုံကြည်ရပါတယ်။

ဂျာမနီဘောလုံးအဖွဲ့ချုပ်ဟာ လက်ရှိ နည်းပြဂျူလီယန်နာဂျယ်မန်းအား ၂၀၂၈ ခုနှစ်အထိ စာချုပ်ချုပ်ဆိုထားပေမယ့်လည်း ၂၀၂၆ ကမ္ဘာ့ဖလားပြိုင်ပွဲရလဒ်အပေါ် မူတည်ပြီး အနာဂတ်အလှည့်အပြောင်း ဖြစ်လာနိုင်ပါတယ်။

အသက် ၃၈ နှစ်ရှိ နာဂျယ်မန်းဟာ ဂျာမနီအသင်းကို ၂၀၂၃ ခုနှစ်ကတည်းက ကိုင်တွယ်လာတာ ဖြစ်ပြီး ယူရို ၂၀၂၄ ပြိုင်ပွဲတွင် ကွာတားဖိုင်နယ်သို့ ပို့ဆောင်ပေးနိုင်ခဲ့ပါတယ်။

ကလော့ပ်ဟာ ရက်ဘူးလ်နှင့် ၂၀၂၉ ခုနှစ်အထိ စာချုပ်ချုပ်ဆိုထားပေမယ့်လည်း လက်ရှိအနေအထားအရ သက်တမ်းမကုန်မီ ထွက်ခွာလာနိုင်ခြေ ရှိနေပြီ ဖြစ်ပါတယ်။

ကလော့ပ်ဟာ ကလပ်နည်းပြလောကမှ ထွက်ခွာရတဲ့ အဓိကအကြောင်းရင်းက မိသားစုနှင့် အချိန်ပိုမို ကုန်ဆုံးနိုင်ရန် ဖြစ်ပါတယ်။

ဒါပေမယ့် တကယ်တမ်းတွင် သူဟာ လက်ရှိ အလုပ်မှာ သူ့ရဲ့အကျွမ်းကျင်ဆုံးအလုပ်ဖြစ်မနေမှုနှင့်အတူ သင့်လျော်ကိုက်ညီတဲ့ အလုပ်တစ်ခုလို့ ယူဆနေခြင်း မရှိပါဘူး။

ကလော့ပ်ကို ခန့်အပ်ရေး စိတ်ဝင်စားနေတာ ဂျာမနီတစ်သင်းတည်း မဟုတ်ပါဘူး။ ရီးရဲလ်မက်ဒရစ်ကလည်း နွေရာသီတွင် နည်းပြသစ် ခန့်အပ်ရေး ရှာဖွေနေပြီး ကလော့ပ်မှာ လျာထားစာရင်းတွင် ထိပ်ဆုံးမှ ပါဝင်နေပါတယ်။

၂ ပွဲတည်းသာ ကိုင်တွယ်ပြီးနောက် ဆွီဒင်နှင့် ၄ နှစ်စာချုပ်သက်တမ်းတိုး ချုပ်ဆိုလာတဲ့ ဂရေဟမ်ပေါ်တာ
====================
ဂရေဟမ်ပေါ်တာဟာ ဆွီဒင်အား ကိုင်တွယ်စဉ်အတွင်း နိုင်ပွဲ ရရှိအောင် စွမ်းဆောင်နိုင်ခြင်း မရှိသေးပေမယ့်လည်း ဆွီဒင်အသင်းကို ၂၀၃၀ ခုနှစ်အထိ ကိုင်တွယ်မယ့် စာချုပ်အား သက်တမ်းတိုးချုပ်ဆိုလာပါတယ်။

ချဲလ်ဆီးနည်းပြဟောင်းဟာ ဝက်စ်ဟမ်းရဲ့ ထုတ်ပယ်ခြင်းခံရပြီးနောက် အောက်တိုဘာလတုန်းက ဆွီဒင်နည်းပြအဖြစ် ကာလတိုစာချုပ်ဖြင့် ခန့်အပ်ခြင်းခံခဲ့ရပါတယ်။

ဂရေဟမ်ပေါ်တာဟာ ဆွီဒင်ကို ၂ ပွဲတည်းသာ ကိုင်တွယ်ရသေးပြီး ဆွစ်ဇာလန်ကို ၄-၁ ဖြင့် ရှုံးနိမ့်ခဲ့သလို ဆလိုဗေးနီးယားနှင့် ၁ ဂိုးစီသရေကျခဲ့ပါတယ်။

ယခု ဆွီဒင်ဘောလုံးအဖွဲ့ချုပ်ဟာ ယူကရိန်းနှင့် ကစားမယ့် ကမ္ဘာ့ဖလားပလေးအော့ဖ်ပွဲမတိုင်မီ သုံးပတ်သာ လိုတော့တဲ့အချိန်တွင် ဂရေဟမ်ပေါ်တာကို နှစ်ရှည်စာချုပ်ချုပ်ဆိုလာပါတယ်။

ဂရေဟမ်ပေါ်တာရဲ့ ဆွီဒင်ဟာ ကမ္ဘာ့ဖလားပလေးအော့ဖ်အဖြစ် ယူကရိန်းနှင့် ရင်ဆိုင်ရမှာ ဖြစ်ပြီး အနိုင်ရရှိပါက ကမ္ဘာ့ဖလားခြေစစ်ပွဲအောင်မြင်ရေး နောက်ဆုံးပွဲအဖြစ် ပိုလန် (သို့မဟုတ်) အယ်ဘေးနီးယားနှင့် ရင်ဆိုင်ကစားရပါမယ်။

ဆွီဒင်ဟာ ကမ္ဘာ့ဖလားခြေစစ်ပွဲအုပ်စုအဆင့်တွင် အမှတ်ပေးဇယားကြမ်းခင်းတွင် ရပ်တည်ခဲ့ပေမယ့်လည်း နေးရှင်းလိဂ်ရလဒ်ကြောင့် ပလေးအော့ဖ်နေရာတစ်နေရာ ရရှိခဲ့တာလည်း ဖြစ်ပါတယ်။

ပေါ်တာာဟ ယခုရာသီအစတုန်းက ရလဒ်ဆိုးရွားမှုကြောင့် စက်တင်ဘာလနှောင်းပိုင်းတွင် ဝက်စ်ဟမ်းမှ ထုတ်ပယ်ခြင်းခံခဲ့ရပါတယ်။

သူဟာ ၂၀၂၅-၂၆ ရာသီတွင် ဝက်စ်ဟမ်းအား ၆ ပွဲကိုင်တွယ်ရာတွင် ၅ ပွဲ ရှုံးနိမ့်ပြီးနောက် ထုတ်ပယ်ခံခဲ့ရပါတယ်။ သူဟာ ဝက်စ်ဟမ်းသို့ ဇန်နဝါရီလတွင် ရောက်လာပြီးနောက် ၂၃ ပွဲ ကိုင်တွယ်ခဲ့ရာတွင် ၆ ပွဲတည်းသာ နိုင်ပွဲ ရရှိအောင် စွမ်းဆောင်နိုင်ခဲ့ပါတယ်။

ဒါပေမယ့် ပေါ်တာဟာ ဆွီဒင်ကလပ် Ostersund ကို လေးရာသီကြာ ကိုင်တွယ်စဉ်အတွင်း လိဂ် ၃ ခု တန်းတက်နိုင်အောင် စွမ်းဆောင်ခဲ့တဲ့အပြင် ရှုံးထွက်ဖလားလည်း ရယူပေးခဲ့ဖူးပါတယ်။

သူဟာ ဘရိုက်တန်၊ ဆွမ်စီးတို့တွင် အောင်မြင်မှုများ ရခဲ့ပေမယ့်လည်း ချဲလ်ဆီး၊ ဝက်စ်ဟမ်းတို့မှာတော့ အောင်မြင်မှုများ မရယူနိုင်ခဲ့ပါဘူး။

အလီရှာလေမန်းနှင့် ၄ နှစ်ကြာ လက်တွဲကာ လမ်းခွဲပြီးနောက် အာဆင်နယ်ဂန္ထဝင်ရဲ့ အသက် ၁၉ နှစ်အရွယ် သမီးနှင့် တွဲနေတဲ့ ဒေါက်ကလပ်လူးဝစ်ဇ်
=================
အက်စတွန်ဗီလာအလယ်တန်းကစားသမားဒေါက်ကလပ်လူးဝစ်ဇ်ဟာ ဆွဲဆောင်မှုအရှိဆုံးဘောလုံးမယ် အလီရှာလေမန်းနှင့် လမ်းခွဲလိုက်ပြီးနောက် ဆယ်ကျော်သက် ဘရာဇီးမော်ဒယ်နှင့် Influencer နှင့် လက်တွဲလာပါတယ်။

အသက် ၂၇ နှစ်ရှိ လက်စတာစတားလေမန်းဟာ ဒေါက်ကလပ်လူးဝစ်ဇ်နှင့် လမ်းခွဲလိုက်ပြီးနောက် ဇန်နဝါရီလတုန်းက ဆီမီပရိုဘောလုံးသမားဖြစ်တဲ့အပြင် Love Island စတားမွန်တဲလ်မက္ကင်ဇီနှင့် လက်တွဲလာကြောင်း ကြေညာခဲ့ပါတယ်။

ယခုအခါ ဒေါက်ကလပ်လူးဝစ်ဇ်ကလည်း အသက် ၁၉ နှစ်အရွယ် လန်ဒန်အခြေစိုက် အလှမယ်ဒူဒါဂက်စ်ပါနှင့် လက်တွဲလိုက်ပြီ ဖြစ်ပါတယ်။

ဒူဒါက အာဆင်နယ်ဂန္ထဝင်ကစားသမားဟောင်းအီဒူးရဲ့ သမီး ဖြစ်ပါတယ်။ အီဒူးဟာ ဘရာဇီးလက်ရွေးစင်အသင်းတွင် ကစားခဲ့သလို အာဆင်နယ်၊ ကိုရင်သီယန်၊ ဗလင်စီယာတို့တွင် ကစားခဲ့ပါတယ်။

သူဟာ အာဆင်နယ်တွင် အားကစားဒါရိုက်တာအဖြစ် ဆောင်ရွက်ခဲ့သလို နော်တင်ဟမ်ဖောရက်စ်တွင်လည်း တစ်ကမ္ဘာလုံးဆိုင်ရာဘောလုံးအကြီးအကဲအဖြစ် ဆောင်ရွက်ခဲ့သူပါ။

လူးဝစ်ဇ်ရဲ့ ချစ်သူသစ်က လူးဝစ်ဇ်နှင့် တွဲရိုက်ထားတဲ့ ဓာတ်ပုံကို ဆိုရှယ်မီဒီယာတွင် 'You are my greatest certainty' ရေးသားကာ ပို့စ်တင်ပြီး ကြေညာလာပါတယ်။

လက်ရှိအချိန်တွင် သူတို့နှစ်ဦး ချစ်ကြိုက်လာတာ ဘယ်လောက် ကြာမြင့်ပြီလဲဆိုတာ မသိရသေးပါဘူး။

လူးဝစ်ဇ်ဟာ ယခုရာသီတွင် ဂျူဗင်တပ်မှ နော်တင်ဟမ်ဖောရက်စ်သို့ အငှားဖြင့် လာရောက်ကစားနေစဉ်အတွင်း ဒူဒါနှင့် တွေ့ဆုံ ချစ်ကြိုက်လာတာလို့ ယုံကြည်ရပါတယ်။

ဒူဒါဟာ ဖခင်ဖြစ်သူ နော်တင်ဟမ်ဖောရက်စ်မှ ထုတ်ပယ်ခြင်းခံခဲ့ရပေမယ့်လည်း လန်ဒန်တွင်ပင် အထိုင်ချနေထိုင်နေသူ ဖြစ်ပါတယ်။

တဖက်တွင် ဘရာဇီးကလပ်ကိုရင်သီယန်ဟာ အီဒူးအား အားကစားဒါရိုက်တာအဖြစ် ခန့်အပ်ရေး ဆွေးနွေးနေကြောင်းလည်း သတင်းထွက်နေပါတယ်။

အာဂျင်တီးနားနှင့် စပိန်တို့ ကစားမယ့် Finalissima ပွဲစဉ်အား ဘာနေဗျူးကွင်းတွင် ကစားလာမည်
===================
ယူရိုချန်ပီယံ စပိန်နှင့် တောင်အမေရိကချန်ပီယံ အာဂျင်တီးနားတို့ ကစားမယ့် Finalissima ပွဲစဉ်အား လုံခြုံရေးအရ အရှေ့အလယ်ပိုင်း နိုင်ငံ ကာတာတွင် ကစားရေးအား ဖျက်သိမ်းကာ စပိန်နိုင်ငံ၊ မက်ဒရစ်ရှိ ဘာနေဗျူးကွင်းတွင် ကစားရန် စီစဉ်လာပါတယ်။

အဆိုပါပွဲစဉ်ကို မတ်လ ၂၇ ရက်နေ့တွင် ကစားရန် စီစဉ်ထားတာ ဖြစ်ပြီး အိမ်ရှင်အဖြစ် ကျင်းပမယ့် ကာတာနိုင်ငံမှာ အီရန်ရဲ့ တိုက်ခိုက်ခြင်းခံနေရမှုနှင့်အတူ ယခုကဲ့သို့ ကွင်းပြောင်းလဲ ကစားရန် ဆုံးဖြတ်လာတာလည်း ဖြစ်ပါတယ်။

စပိန်ဘောလုံးအဖွဲ့ချုပ်က Finalissima ပွဲစဉ်အား ရီးရဲလ်မက်ဒရစ်ရဲ့ ဘာနေဗျူးကွင်းတွင် ကစားရေးအဆိုပြုခဲ့ရာ အာဂျင်တီးနားဘောလုံးအဖွဲ့ချုပ်ကမူ ယင်းအစီအစဉ်ကို လက်ခံခြင်း မရှိသေးကြောင်း သိရပါတယ်။

ဥရောပနှင့် တောင်အမေရိကဘုရင်တို့ကစားမယ့် Finalissima ပွဲစဉ်ကို ဒိုဟာတွင် ကစားရန် စီစဉ်ထားခဲ့တာပါ။

ဒါပေမယ့် အီရန်က အမေရိကန်ရဲ့ မဟာမိတ်အရှေ့အလယ်ပိုင်းနိုင်ငံများအား ဒုံးကျည်များ၊ ဒရုန်းများနှင့် တိုက်ခိုက်နေမှုကြောင့် လံ့ခြုံရေးစိုးရိမ်စရာ ရှိနေခဲ့ပါတယ်။

ဒါကြောင့်လည်း စပိန်ဘောလုံးအဖွဲ့ချုပ်ဟာ ရီးရဲလ်မက်ဒရစ်အသင်းနှင့် မြို့တော်အာဏာပိုင်များထံမှ ဘာနေဗျူးကွင်းအား အသုံးပြုရေး ခွင့်ပြုချက်ရေးရပြီးနောက် ဘာနေဗျူးကွင်းတွင် ကစားရန် စီစဉ်လာပါတယ်။

ဒါပေမယ့် အာဂျင်တီးနားဘက်က ဘာနေဗျူးကွင်းမှာ စပိန်အသင်းရဲ့ အိမ်ကွင်းဖြစ်နေမှုနှင့်အတူ ၎င်းတို့အတွက် မျှတခြင်းမရှိဟု ယုံကြည်ကာ ယင်းကွင်းတွင် ကစားရေးအပေါ် လက်ခံခြင်း မရှိသေးကြောင်း သိရပါတယ်။

တဖက်တွင် အာဂျင်တီးနားနှင့် စပိန်တို့ဟာ ဘာနေဗျူးကွင်းတွင် ကစားရေး အဆင်မပြေဖြစ်လာပါက လန်ဒန်၊ လစ္စဘွန်း၊ ရောမတို့တွင် ကစားရန်လည်း လျာထားကြောင်းလည်း သိရပါတယ်။

ဒါ့အပြင် အာဂျင်တီးနားဘက်ကလည်း Finalissima ပွဲစဉ်ကို ဗျူနိုအေရိပ်စ်ရှိ Monumental ကွင်းတွင် ကစားရန်လည်း အဆိုပြုရန် တန်ပြန်စီစဉ်ထားကြောင်း သိရပါတယ်။

လာမယ့် Finalissima ပွဲစဉ်မှာ စပိန်ပါရမီရှင်လာမိန်းယာမဲလ်နှင့် ဘာစီလိုနာဂန္ထဝင်လီယွန်နယ်မက်ဆီတို့ ပထမဆုံးအကြိမ် ထိပ်တိုက်ရင်ဆိုင်ရမယ့်ပွဲ ဖြစ်လာပါမယ်။

ချဲလ်ဆီးနှင့် ခြောက်နှစ်စာချုပ်သစ်ချုပ်ဆိုလာတဲ့ အသင်းခေါင်းဆောင်ရီစီဂျိမ်းစ်
=================
ချဲလ်ဆီးအသင်းခေါင်းဆောင်ရီစီဂျိမ်းစ်ဟာ စတမ်းဖို့ဒ်ဘရစ်ချ်တွင် အသက် ၃၂ နှစ်အထိ ရှိနေမယ့် ၂၀၃၂ ခုနှစ်အထိ ၆ နှစ်စာချုပ်သစ်အား ချုပ်ဆိုလာပါတယ်။

အသက် ၂၆ နှစ်ရှိ အင်္ဂလန်လက်ရွေးစင်ညာနောက်ခံလူရဲ့ ယခင်စာချုပ်မှာ ၂၀၂၈ ခုနှစ်တွင် ကုန်ဆုံးမှာ ဖြစ်ပြီး လုပ်ခနှင့်ပတ်သက်ပြီး သဘောတူညီမှု ရရှိပြီးနောက် စာချုပ်သစ်ချုပ်ဆိုလာတာလည်း ဖြစ်ပါတယ်။

ချဲလ်ဆီးနှင့် ရီစီဂျိမ်းစ်တို့ဟာ စာချုပ်သစ်ချုပ်ဆိုရေး ဆွေးနွေးလာခဲ့တာ ကြာမြင့်ပြီ ဖြစ်ပြီး ပြီးခဲ့တဲ့အပတ်ကတည်းက သဘောတူညီမှု ရခဲ့တာလည်း ဖြစ်ပါတယ်။

ချဲလ်ဆီးဟာ အန်တိုနီရူဒီဂါနှင့် ခရစ္စတင်ဆင်တို့အား ရီးရဲလ်မက်ဒရစ်၊ ဘာစီလိုနာသို့ အလွတ်ပြောင်းရွှေ့ကြေးဖြင့် လက်လွတ်ခဲ့ရပြီးနောက် မည်သည့်ကစားသမားကိုမျှ စာချုပ်သက်တမ်း ၂ နှစ်မကျန်မီခင်မှာ စာချုပ်သစ်ချုပ်ဆိုလာခဲ့တာလည်း ဖြစ်ပါတယ်။

ရီစီဂျိမ်းစ်ဟာ ချဲလ်ဆီးအကယ်ဒမီထွက်တစ်ဦးဖြစ်ပြီး ကလပ်အတွက် ၂၂၅ ပွဲကစားထားသူလည်း ဖြစ်ပါတယ်။

ရီစီဂျိမ်းစ်ဟာ ချဲလ်ဆီးနှင့်အတူ ၂၀၂၁ ခုနှစ် ချန်ပီယံလိဂ်ဖလား အပါအဝင် ဆုဖလားများစွာ ဆွတ်ခူးထားသူလည်း ဖြစ်ပါတယ်။

သူဟာ ယခင်ပိုင်ရှင် ရိုမန်အေဘရာမိုဗစ်ချ်လက်ထက်အပြင် လက်ရှိ ပိုင်ရှင်သစ်လက်အောက်တို့တွင်လည်း ကျင်လည်ဖူးတဲ့ တစ်ဦးတည်းသော ချဲလ်ဆီးကစားသမားလည်း ဖြစ်ပါတယ်။

ဝက်စ်ဟမ်းနှင့်ပွဲတွင် အမှတ်ဆုံးရှုံးပါက ပရီးမီးယားလိဂ်ဖလားမျှော်လင့်ချက် မရှိတော့ကြောင်း ဂွါဒီယိုလာဖွင့်ဟလာ
======================
ပက်ဂွါဒီယိုလာက ယနေ့ည ဝက်စ်ဟမ်းနှင့်ပွဲစဉ်တွင် အမှတ်ဆုံးရှုံးရပါက မန်စီးတီးမှာ ပရီးမီးယားလိဂ်ဖလားမျှော်လင့်ချက် မရှိတော့ကြောင်း ဝန်ခံ ပြောကြားလာပါတယ်။

မန်စီးတီးဟာ ထိပ်ဆုံးမှ အာဆင်နယ်နှင့် ရမှတ် ၇ မှတ်ကွာဟက ပရီးမီးယားလိဂ်အမှတ်ပေးဇယားအဆင့် ၂ နေရာတွင် ရပ်တည်နေပါတယ်။ ဒါပေမယ့် မန်စီးတီးဟာ အာဆင်နယ်ထက် တစ်ပွဲလျှော့ကစားထားပြီး ဧပြီလ ၁၉ ရက်နေ့တွင် အီတီဟတ်ကွင်းမှာ အာဆင်နယ်အား ဧည့်ခံကစားရန် ကျန်ပါသေးတယ်။

ဒါပေမယ့် ဂွါဒီယိုလာက "အခု ဝက်စ်ဟမ်းပွဲပါ။ ပရီးမီးယားလိဂ်က ယှဉ်ပြိုင်ရအခက်ခဲဆုံးအမှတ်ပေးဖလားပါ။ ကျွန်တော်တို့ ယှဉ်ပြိုင်နေတုန်းပါ။ ဒါပေမယ့် အမှတ်ဆုံးရှုံးရရင်တော့ ပြီးပြီဆိုတာလည်း သိထားပါတယ်"လို့ ပြောကြားသွားပါတယ်။

ဝက်စ်ဟမ်းမှာလည်း အမှတ်ပေးဇယားအဆင့် ၁၇ နေရာတွင် ရပ်တည်ကာ တန်းမဆင်းရရေး တိုက်ပွဲဝင်နေပါတယ်။

ဝက်စ်ဟမ်းဟာ နောက်ပိုင်းပွဲစဉ်များတွင် ရလဒ်ပိုင်းတိုးတက်လာပြီးနောက် နောက်ဆုံး ၅ ပွဲတွင် ၁ ပွဲတည်းသာ ရှုံးနိမ့်ထားပါတယ်။

ဆက်လက်ပြီး ဂွါဒီယိုလာက "နောက်ဆုံး ၁၀ ပွဲ ရောက်လာတဲ့အခါ တွေ့ဆုံရတဲ့အသင်းတိုင်းက တန်းမဆင်းရရေး၊ ယူရိုပါလိဂ်၊ ကွန်ဖရင့်လိဂ်၊ ချန်ပီယံလိဂ်၊ ချန်ပီယံဖြစ်ဖို့ စသဖြင့် တစ်ခုခုအတွက် တိုက်ပွဲဝင်နေကြတဲ့အသင်းတွေ ဖြစ်ပါတယ်။ ပုံမှန်ပါပဲ။ ပွဲတိုင်းက ဒီလိုပါ။ အခု ဒုတိယအခွင့်အရေးဆိုတာ မရှိတော့ပါဘူး"လို့ ပြောကြားသွားပါတယ်။

တဖက်တွင် မန်စီးတီးဟာ ချန်ပီယံလိဂ် ၁၆ သင်း ရှုံးထွက်အဆင့် ပထမအကျော့တွင် ဘာနေဗျူးကွင်းမှာ ရီးရဲလ်မက်ဒရစ်အား ၃-၀ ဖြင့် အရေးနိမ့်ထားပါတယ်။ မန်စီးတီးဟာ လာမယ့် အင်္ဂါနေ့တွင် အီတီဟတ်ကွင်းမှာ ဒုတိယအကျော့အဖြစ် ရီးရဲလ်မက်ဒရစ်အား ဧည့်ခံကစားရပါမယ်။

ငိုမလား တိုက်ပွဲဝင်မလားလို့ စပါးစ်ကစားသမားများကို ယာယီနည်းပြအိုင်ဂေါ်ကျူဒေါ် ရွေးချယ်ခိုင်းလာ
====================
စပါးစ်ယာယီနည်းပြအိုင်ဂေါ်ကျူဒေါ်က စပါးစ်ကစားသမားများအနေဖြင့် ငိုမလား တိုက်ပွဲဝင်မလားလို့ ရွေးချယ်ခိုင်းလာပါတယ်။

အသက် ၄၇ နှစ်ရှိ ခရိုအေးရှားလူမျိုးနည်းပြကိုင်တွယ်နေတဲ့ စပါးစ်ဟာ နောက်ဆုံး ၄ ပွဲဆက် ရှုံးနိမ့်ထားပါတယ်။

စပါးစ်ဟာ တန်းဆင်းဇုန်နှင့် ရမှတ် ၁ မှတ်အကွာတွင် ရပ်တည်နေတာ ဖြစ်ပြီး တနင်္ဂနွေနေ့တွင် လက်ရှိ ချန်ပီယံ လီဗာပူးအား အဝေးကွင်းသို့ သွားရောက် ကစားရပါမယ်။

စပါးစ်ဟာ ရလဒ်ဆိုးရွားနေချိန်တွင် လက်ရှိ ချန်ပီယံအား ရင်ဆိုင်ရမှုနှင့်အတူ ၁၉၇၇ ခုနှစ်နောက်ပိုင်း ပထမဆုံးအကြိမ်အဖြစ် တန်းဆင်းရနိုင်တဲ့ အခြေအနေနှင့် ကြုံနေရပါတယ်။

ကျူဒေါ်က "လွယ်ကူတဲ့ အခြေအနေမဟုတ်ပါဘူး။ လွယ်ကူတဲ့ အခိုက်အတန့်မဟုတ်ပါဘူး။ အပြောင်းအလဲတွေ ဖြစ်လာဖို့ ကြီးမားတဲ့ စိန်ခေါ်မှု ကြုံနေရတယ်။ ဘဝမှာ ကြုံရတဲ့အရာတွေလိုပဲ ဒီအခြေအနေမှာ ရွေးချယ်စရာ ရှိလာတယ်။ ငိုနေမလား၊ တိုက်ပွဲဝင်မလား။ ရှုံးနိမ့်သူ ဖြစ်လာနိုင်သလို အပြောင်းအလဲတွေ ဖြစ်လာအောင် လုပ်နိုင်သူလည်း ဖြစ်လာနိုင်တယ်။ ဒါက ကစားသမားတွေကို ကျွန်တော် ပြောထားတဲ့ မက်ဆေ့ချ်ပါ။ ရေဗူးက တစ်ဝက်မရှိ သိုမ့ဟုတ် တစ်ဝက်အပြည့်ရှိနေတယ်။ အပြည့်မဟုတ်ပါဘူး။ မရှိတာတွေလည်း ရှိနေတယ်။ ဒါပေမယ့် ခက်ခဲတဲ့ အခိုက်အတန့်ဆိုတာ အမြဲတမ်း ဖြစ်နေတာ မဟုတ်ပါဘူး။ ကျော်လွန်လာမှာပါ။ ကစားသမားတွေလည်း သတ္တိရှိရှိ အခွင့်အရေးကို အပိုင်အနိုင်ရယူပြီး အလှည့်အပြောင်းဖြစ်အောင် လုပ်လာမယ်လို့ ယုံကြည်တယ်။ သူတို့ဟာ ဒါတွေ ကျော်လွန်လာချိန်မှာ ပိုကောင်းတဲ့လူ ပိုကောင်းတဲ့ ကစားသမားတွေ ဖြစ်လာမှာပါ"လို့ ပြောကြားသွားပါတယ်။

စပါးစ်ဟာ ပြိုင်ပွဲအရပ်ရပ် နောက်ဆုံး ၆ ပွဲဆက် ရှုံးပွဲ ကြုံထားပြီး ပရီးမီးယားလိဂ်တွင် ဒီဇင်ဘာလ ၂၈ ရက်နေ့ နောက်ပိုင်း နိုင်ပွဲ မရထားသေးပါဘူး။

ရိုက်စ်ကို စာချုပ်သစ်ချုပ်ဆိုရေး အာဆင်နယ် ဆွေးနွေးလာ
====================
အာဆင်နယ်ဟာ ဒီကလန်ရိုက်စ်အား စာချုပ်သစ်ချုပ်ဆိုရေး ဆွေးနွေးလာပါတယ်။

ရိုက်စ်ဟာ အာဆင်နယ်နှင့် ၂ နှစ်စာချုပ်သက်တမ်းကျန်နေသေးသူ ဖြစ်ပြီး ၁၂ လသက်တမ်းတိုးနိုင်မယ့်အချက် ပါဝင်ပါတယ်။

ဒါပေမယ့် အာဆင်နယ်ဟာ ဒီကလန်ရိုက်စ်အား အသင်းရဲ့ ရေရှည်စီမံကိန်းတွင် အရေးပါတဲ့ သူအဖြစ် ထည့်သွင်းထားရာ အသင်းတွင် ကာလရှည်ကြာ ရှိစေလိုနေပါတယ်။

ဒီကလန်ရိုက်စ်ဟာ အာဆင်နယ်နှင့် စာချုပ်သစ်ချုပ်ဆိုလာပါက ကလပ်ရဲ့ လုပ်ခအများဆုံးရ ကစားသမားများထဲမှ တစ်ဦးဖြစ်လာပါမယ်။

ဘူကာယိုဆာကာဟာ မကြာသေးမီတုန်းက အာဆင်နယ်နှင့် စာချုပ်သစ်ချုပ်ဆိုလိုက်ပြီးနောက် တစ်ပတ်လုပ်ခ ပေါင် ၃ သိန်းအထိ ရရှိလာပါတယ်။ ဒီကလန်ရိုက်စ်ဟာ လက်ရှိအချိန်တွင် တစ်ပတ်လုပ်ခ ပေါင် ၂၄၀၀၀၀ သာ ရနေတာဖြစ်ပြီး စာချုပ်သစ်ချုပ်ဆိုလာပါက ဆာကာကဲ့သို့ ပေါင် ၃ သိန်းအထိ ရရှိလာမယ်လို့ ယုံကြည်ရပါတယ်။

လက်ရှိအချိန်တွင် ဒီကလန်ရိုက်စ်နှင့် အာဆင်နယ်အကြား စာချုပ်သစ်ကိစ္စဆွေးနွေးမှုမှာ အစောပိုင်းအဆင့်တွင်သာ ရှိနေသေးပြီး များစွာ ဆွေးနွေးမှုများ ပြုလုပ်ရပါဦးမယ်။

ရိုက်စ်ဟာ ၂၀၂၃ ခုနှစ်တွင် ဝက်စ်ဟမ်းမှ ပေါင် ၁၀၃ သန်းဖြင့် ပြောင်းလာပြီးနောက် အာဆင်နယ်အတွက် ပရီးမီးယားလိဂ်ပွဲ ၁၀၂ ပွဲ ကစားထားကာ ဥရောပရဲ့အကောင်းဆုံးကွင်းလယ်ကစားသမားများထဲမှ တစ်ဦးအဖြစ် ခြေစွမ်းပြနေသူလည်း ဖြစ်ပါတယ်။

အာဆင်နယ်ဟာ ရိုက်စ်မတိုင်မီ ဆာကာ၊ ဆာလီဘာ၊ ဂါဘရီရယ်၊ မိုင်လက်စ်လီဝစ်စကယ်လီ၊ နသန်နဝမ်နရီတို့အား စာချုပ်သစ်ချုပ်ဆိုထားပြီး ဖြစ်ပါတယ်။

ဒါ့အပြင် အာဆင်နယ်ဟာ ဒေးဗစ်ရာယာနှင့် လီယန်ဒရိုထရိုဆတ်တို့ကိုလည်း လုပ်ခတိုးမြှင့်ကာ စာချုပ်သစ်ချုပ်ဆိုထားပါတယ်။

တရုတ်နိုင်ငံက စမ်းသပ်ဂြိုဟ်တုအသစ် နှစ်စင်း လွှတ်တင်

စီချန်း၊ မတ်လ ၁၃ ရက်

တရုတ်နိုင်ငံသည် စီချန်းဂြိုဟ်တုလွှတ်တင်ရေးစင်တာမှတစ်ဆင့် စမ်းသပ်ဂြိုဟ်တုအသစ် နှစ်စင်းကို သောကြာနေ့တွင် အာကာသသို့ လွှတ်တင်ခဲ့ကြောင်း သိရသည်။

စီယမ်-၃၀ ၀၃နှင့် ၀၄ ဟု အမည်ပေးထားသော အဆိုပါ စမ်းသပ်ဂြိုဟ်တုများကို ပေကျင်းစံတော်ချိန် နံနက် ၀၆၃၃ နာရီတွင် လောင်းမတ်-၂ဒီ သယ်ဆောင်ရေးဒုံးပျံဖြင့် လွှတ်တင်ခဲ့ခြင်းဖြစ်ပြီး သတ်မှတ်ထားသော ပတ်လမ်းအတွင်းသို့ အောင်မြင်စွာ ရောက်ရှိသွားခဲ့သည်။

အဆိုပါ ဂြိုဟ်တုများကို အဓိကအားဖြင့် ကမ္ဘာမြေလေ့လာရေး နည်းပညာများ ကို လက်တွေ့စမ်းသပ် စစ်ဆေးရန်အတွက် အသုံးပြုသွားမည် ဖြစ်သည်။

ယခုအကြိမ် လွှတ်တင်မှုသည် လောင်းမတ် ဒုံးပျံစီးရီးများ၏ ၆၃၂ ကြိမ်မြောက် ပျံသန်းမှုမစ်ရှင်လည်း ဖြစ်ကြောင်း သိရသည်။

Ref: ရှင်ဟွာ

ရုရှားရေငုပ်သင်္ဘောက ကီလိုမီတာ၃၀၀ အကွာရှိ မြေပြင်ပစ်မှတ်ကို ထိမှန်ခဲ့

မော်စကို၊ မတ် ၁၂

နျူကလီးယားစွမ်းအင်သုံး ရေငုပ်သင်္ဘော ကာဇန်သည် စီစဉ်ထားသော တို-က်ခို-က်ရေးလေ့ကျင့်မှုအတွင်း အိုနစ်စ် ခရုဇ်ဒုံးကျည်ကို အသုံးပြု၍ ကီလိုမီတာ ၃၀၀ အကွာအဝေးရှိ မြေပြင်ပစ်မှတ်ကို အောင်မြင်စွာ ပ-စ်ခ-တ်နိုင်ခဲ့ကြောင်း ရုရှားမြောက်ပိုင်းရေတပ်က ကြာသပတေးနေ့တွင် ပြောကြားခဲ့သည်။

ကာဇန် သည် ကီလိုမီတာ ၃၀၀ အကွာတွင်ရှိသော ရန်သူသဏ္ဌာန်သင်္ဘောတစ်စင်းကို ပုံဖော်ကာ ပင်လယ်ရေအောက်ပစ်မှတ်တွင် နစ်မြုပ်နေသည့်အနေအထားမှ အိုနစ်စ် ခရုဇ်ဒုံးကျည်တစ်စင်းကို ပစ်လွှတ်ခဲ့ကြောင်း ရေယာဉ်စုက ၎င်း၏ဝက်ဘ်ဆိုက်တွင် ဖော်ပြခဲ့သည်။

ဒုံးကျည်၏ ထိပ်ဖူးသည် ရေကြောင်းပစ်မှတ်ကို အောင်မြင်စွာ ထိမှန်ကြောင်း ကို အတည်ပြုခဲ့ကြောင်း အဆိုပါ ရေတပ်က ပြောကြားခဲ့သည်။

လွှတ်တင်မှုကို ဘာရင့်စ် ပင်လယ် တွင်ပြုလုပ်ခဲ့ခြင်း ဖြစ်သည်။ မြေပြင်သင်္ဘောများနှင့် ရေတပ်လေကြောင်းပို့ဆောင်ရေးတပ်ဖွဲ့များသည် လေ့ကျင့်ရေးဧရိယာကို လုံခြုံစေရန်နှင့် ပစ်ခတ်မှုဆိုင်ရာ ပံ့ပိုးကူညီမှုများတွင် ပါဝင်ခဲ့ကြသည်။

ကာဇန် သည် စတုတ္တမျိုးဆက် နျူကလီးယားစွမ်းအင်သုံး ရေငုပ်သင်္ဘောများ၏ မွမ်းမံထားသော ဗားရှင်းဖြစ်ပြီး အသံပိုင်းဆိုင်ရာ သင်္ကေတများကို လျှော့ချထားသည်။ သင်္ဘောများတွင် ကုန်းတွင်း၊ ပင်လယ်နှင့် ရေအောက်ရှိ ပစ်မှတ်များကို ပစ်ခတ်နိုင်သည့် တာဝေးပစ် တိကျသော ဒုံးကျည်လက်နက်များ တပ်ဆင်ထားသည်။

ကာဇန် ကို ၂၀၀၉ ခုနှစ်တွင် ရုရှားနိုင်ငံ စီဗာရိုဒဗင့်စ်ခ် မြို့ရှိ ဆက်ဗ်မတ်ရှ် သင်္ဘောကျင်းတွင် ချထားခဲ့ပြီး ၂၀၂၁ ခုနှစ်တွင် ရုရှားရေတပ်သို့ တရားဝင် တာဝန်ပေးအပ်ခဲ့သည်။

Ref: ရှင်းဟွာ