စနေနေ့ နယူးကာဆယ်နှင့် အဝေးကွင်းပွဲစဉ်တွင် အက်စ်တီဗာအို မပါဝင်ဘဲ ရင်ဆိုင်ရမယ့် ချဲလ်ဆီး
======================

ချဲလ်ဆီးဟာ စနေနေ့ နယူးကာဆယ်အား အဝေးကွင်းသို့ သွားရောက် ရင်ဆိုင်ကစားရမယ့်ပွဲစဉ်တွင် တောင်ပံကစားသမားအက်စ်တီဗာအိုဝီလီယံ မပါဝင်ဘဲ ရင်ဆိုင်ရပါမယ်။
အသက် ၁၈ နှစ်ရှိ ဘရာဇီးတောင်ပံကစားသမားဟာ အင်္ဂါနေ့ညတုန်းက ကာဒစ်ဖ်ကို ၃-၁ ဂိုးဖြင့် အနိုင်ရတဲ့ပွဲတွင် ပါဝင်လာမယ်လို့ ယူဆထားရပေမယ့်လည်း ကြွက်သားဒဏ်ရာကြောင့် လူစာရင်းမှာပင် မပါဝင်နိုင်ခဲ့ပါဘူး။
ယခုအခါ ချဲလ်ဆီးနည်းပြအန်ဇိုမာရက်စ်ကာက အက်စ်တီဗာအိုမှာ စနေနေ့ နယူးကာဆယ်နှင့် အဝေးကွင်းပွဲစဉ်ကိုလည်း လွဲချော်လာမှာ ဖြစ်ကြောင်း အတည်ပြုလာပြီ ဖြစ်ပါတယ်။
မာရက်စ်ကာက "သူ့မှာ ပြဿနာလေး ရှိနေတယ်။ ကြွက်သားပြဿနာပါ။ နယူးကာဆယ်နဲ့ပွဲမှာလည်း ပါလာမှာ မဟုတ်ပါဘူး"လို့ ပြောကြားသွားပါတယ်။
ချဲလ်ဆီးဟာ ယခုရာသီတွင် ကိုးလ်ပါလ်မာမှာ ပေါင်ခြံဒဏ်ရာရရှိနေမှုကြောင့် အထူးသတိထား အသုံးပြုနေရပါတယ်။ မာရက်စ်ကာရဲ့ အဓိကဗဟိုနောက်ခံလူလီဗီကိုလ်ဝဲလ်မှာလည်း ကလပ်ကမ္ဘာ့ဖလားအပြီး ရာသီကြိုလေ့ကျင့်ခန်းအစီအစဉ်တွင် ဒူးအရွတ်ဒဏ်ရာရရှိကာ အနားယူနေရပါတယ်။
ဒါ့အပြင် နွေရာသီတွင် ခေါ်ယူထားတဲ့ တိုက်စစ်မှူးလီယမ်ဒီလက်ပ်မှာလည်း ဒဏ်ရာကြောင့် ၆ ပွဲတည်းသာ ပွဲထွက်ကစားထားနိုင်ပါတယ်။
မွိုက်စ်ကိုင်စီဒို၊ အန်ဇိုဖာနန်ဒက်ဇ်နှင့် ဂျိုအာပီဒရိုတို့မှာလည်း ကြွက်သားပြဿနာများနှင့် ကြုံခဲ့ရပါတယ်။

ကမ္ဘာ့ဖလားပြိုင်ပွဲဝင် အာဖရိကနှစ်နိုင်ငံမှ ပရိသတ်များအား အမေရိကန်ပြည်ဝင်ခွင့်ပိတ်ပင်လာတဲ့ ဒေါ်နယ်ထရမ့်
========================

အမေရိကန်သမ္မတဒေါ်နယ်ထရမ့်ဟာ ၂၀၂၆ ကမ္ဘာ့ဖလားပြိုင်ပွဲဝင် အာဖရိကနိုင်ငံ ၂ နိုင်ငံမှ ပရိသတ်များအား ပြည်ဝင်ခွင့် ပိတ်ပင်မယ့် စာရင်းထဲတွင် ထည့်သွင်းလာပါတယ်။
ထရမ့်အစိုးရဟာ အမေရိကန်နိုင်ငံသို့ ပြည်ဝင်ခွင့်ပိတ်ပင်တဲ့ စာရင်းတွင် ၂၀၂၆ ကမ္ဘာ့ဖလားခြေစစ်ပွဲအောင် အာဖရိကနိုင်ငံများဖြစ်ကြတဲ့ ဆီနီဂေါနှင့် အိုင်ဗရီကို့စ် နိုင်ငံသားတို့အား ဗီဇာပေးမှု ရပ်ဆိုင်းလိုက်တာလည်း ဖြစ်ပါတယ်။
ထရမ့်အစိုးရဟာ ယင်းနိုင်ငံသားများအား အလုပ်ကိစ္စ (သို့မဟုတ်) လည်ပတ်သွားလာရေး ကာလတိုဗီဇာပေးမှုပါ ရပ်ဆိုင်းလာမှုနှင့်အတူ ကမ္ဘာ့ဖလားလာကြည့်ခွင့် ပိတ်ပင်ခံလာရဖို့ ရှိပါတယ်။
ဆီနီဂေါမှာ ကမ္ဘာ့ဖလားအုပ်စ (I) တွင် ပြင်သစ်၊ နော်ဝေ၊ ပလေးအော့ဖ်အနိုင်ရသူ(ဘိုလီဗီးယား၊ အီရတ်၊ ဆူရီနိမ်း)တို့နှင့် ရင်ဆိုင်ရပါမယ်။
ဆီနီဂေါဟာ ပြင်သစ်၊ နော်ဝေတို့နှင့် ပွဲစဉ်အား MetLife stadium တွင် ကစားလာရမှာ ဖြစ်ပြီး အုပ်စုနောက်ဆုံးပွဲအား ကနေဒါတွင် ကစားရပါမယ်။
အိုင်ဗရီကို့စ်မှာ အုပ်စု (F) တွင် ဂျာမနီ၊ အီကွေဒေါ၊ ကူရာကာအိုတို့နှင့် တစ်အုပ်စုတည်းကျရောက်နေပါတယ်။ အိုင်ဗရီကို့စ်မှာလည်း ကူရာကာအို၊ အီကွေဒေါပွဲတို့ကို အမေရိကန်တွင် ကစားရမှာ ဖြစ်ပြီး ကျန် ဂျာမနီနှင့်ပွဲအား ကနေဒါတွင် သွားကစားရပါမယ်။
ယခုအခါမှာတော့ အိုင်ဗရီကို့စ်နှင့် ဆီနီဂေါတို့မှ ထောင်ပေါင်းများစွာ ဘောလုံးပရိသတ်များမှာ ကမ္ဘာ့ဖလားပြိုင်ပွဲအား တက်ရောက်အားပေးရေး မျှော်လင့်ချက် အဆုံးသတ်သွားပြီ ဖြစ်ပါတယ်။

ယာဉ်မတော်တဆမှုကြောင့် မက်ကယ်ဖီးလ်တိုက်စစ်မှူးအီသန်မက်လော့ဒ် သေဆုံး
======================

မက်ကယ်ဖီးလ်တိုက်စစ်မှူးအီသန်မက်လော့ဒ်ဟာ အင်္ဂါနေ့ ပွဲတစ်ပွဲကစားပြီး အပြန် M1 အမြန်လမ်းတွင် ဖြစ်ပွားခဲ့တဲ့ ယာဉ်မတော်တဆမှုကြောင့် သေဆုံးသွားခဲ့ပါတယ်။
အသက် ၂၁ နှစ်ရှိ မက်လော့ဒ်ဟာ မြောက်ပိုင်းနေးရှင်းလိဂ်ပွဲစဉ်အဖြစ် ဘက်ဖို့ဒ်တောင်းနှင့်ပွဲစဉ်တွင် အရန်ခုံတွင် ထိုင်နေခဲ့ရပြီးနောက် အပြန်တွင် ယာဉ်မတော်ဆမှုတွင် သေဆုံးသွားခဲ့တာလည်း ဖြစ်ပါတယ်။
မက်လော့ဒ်စီးလာတဲ့ အဖြူရောင်မာစီးဒီးစ်ကားဟာ နော့သမ်တန်အနီးတွင် အတားအဆီးတစ်ခုကို တိုက်မိခဲ့တာလည်း ဖြစ်ပါတယ်။
မက်လော့ဒ်ဟာ အသက် ၇ နှစ်အရွယ်တွင် ဝုဗ်အကယ်ဒမီသို့ ရောက်လာပြီးနောက် ယူ-၂၁ အသင်းနှင့်အတူ EFL Trophy ဆုဖလားဆွတ်ခူးခဲ့ပေမယ့်လည်း စီနီယာအသင်းအတွက် တစ်ပွဲမျှ ကစားခွင့်မရခဲ့ပါဘူး။
ဘာမင်ဂမ်ဖွားကစားသမားဟာ တောင်ပိုင်းလိဂ်ကလပ် Alvechurch ၊ Rushall Olympic နှင့် Stourbridge တို့တွင် အငှားဖြင့် သွားကစားပြီးနောက် ဝုဗ်မှ ထွက်ခွာခဲ့သူ ဖြစ်ပါတယ်။
သူဟာ ဇူလိုင်လတုန်းက မက်ကယ်ဖီးလ်တွင် စမ်းသပ်လေ့ကျင့်ခန်းဆင်းမှု အောင်မြင်ပြီးနောက် အပြီးသတ်ပြောင်းခဲ့ပါတယ်။
သဟာ မက်ကယ်ဖီးလ်အတွက် ၅ ပွဲကစားပေးခဲ့ကာ ၂ ဂိုးသွင်းပေးခဲ့ပါတယ်။

ဘီဘီစီရဲ တစ်သက်တာထူးချွန်ဆု ချီးမြှင့်ခြင်းခံလာရမယ့် သီယာရီဟင်နရီ
=======================

အာဆင်နယ်နှင့် ပြင်သစ်တိုက်စစ်မှူးသီယာရီဟင်နရီဟာ ကြာသပတေးနေ့ BBC Sports Personality of the Year ဆုပေးပွဲအခမ်းအနားတွင် Lifetime Achievement award ချီးမြှင့်ခံလာရပါမယ်။
အသက် ၄၈ နှစ်ရှိ ဟင်နရီဟာ ၂၀၁၄ ခုနှစ်တုန်းက ကစားသမားဘဝမှ အနားယူခဲ့သူ ဖြစ်ပြီး ပရီးမီးယားလိဂ်သမိုင်းတွင် အကောင်းဆုံးကစားသမားများထဲမှ တစ်ဦးအဖြစ် သတ်မှတ်ခံထားရသူလည်း ဖြစ်ပါတယ်။
ဟင်နရီဟာ အာဆင်နယ်တွင် ကစားတဲ့ နှစ်ကြိမ်တွင် ၃၇၇ ပွဲကစားကာ ၂၂၈ ပွဲ ကစားခဲ့သူ ဖြစ်ပြီး ၂၀၀၅ ခုနှစ်တွင် ကလပ်သမိုင်းတင် အာဆင်နယ်သမိုင်းတွင် ဂိုးအများဆုံးသွင်းယူသူအဖြစ် ရပ်တည်ခဲ့ပါတယ်။
သူဟာ အာဆင်နယ်နှင့်အတူ အက်ဖ်အေဖလား ၃ ကြိမ်၊ ပရီးမီးယားလိဂ်ဖလား ၂ ကြိမ် ဆွတ်ခူးနိုင်ခဲ့သလို ပရီးမီးယားလိဂ်ရွှေဖိနပ်ဆုကိုလည်း ၄ ကြိမ်တိုင်တိုင် ဆွတ်ခူးခဲ့ကာ PFA တစ်နှစ်တာအကောင်းဆုံးအသင်းတွင် ၆ ကြိမ်တိုင်တိုင် ရွေးချယ်ခြင်းခံခဲ့ရပါတယ်။
သူဟာ ပရီးမီးယားလိဂ်တစ်ရာသီတည်းတွင် ဖန်တီးမှုအများဆုံးအဖြစ် အကြိမ် ၂၀ ဖြင့် ကီဗင်ဒီဘရိုင်းနှင့်အတူ ပူးတွဲ မှတ်တမ်းရေးထိုးထားသူလည်း ဖြစ်ပါတယ်။
ယခင်တုန်းက Lifetime Achievement award ကို ဘောလုံးလောကမှ ပီလီ၊ ဘော်လ်ဘီချာလ်တန်၊ ဆာဒေးဗစ်ဘက်ဟမ်းတို့လည်း ဆွတ်ခူးခဲ့ဖူးပါတယ်။

အင်တာမိုင်ယာမီနှင် တစ်နှစ်စာချုပ်ချုပ်ဆိုလာတဲ့ လူးဝစ်ဆွာရက်ဇ်
=================

အင်တာမိုင်ယာမီတိုက်စစ်မှူးလူးဝစ်ဆွာရက်ဇ်ဟာ အသင်းတွင် ၂၀၂၆ မေဂျာလိဂ်ရာသီအထိ ရှိနေမယ့် တစ်နှစ်စာချုပ်ချုပ်ဆိုလာပါတယ်။
ဆွာရက်ဇ်ဟာ ၂၀၂၅ ခုနှစ်တွင် အင်တာမိုင်ယာမီအတွက် ပြိုင်ပွဲအရပ်ရပ် ပွဲ ၅၀ ကစားခဲ့ရာမှာ ၁၇ ဂိုးသွင်းပြီး ၇ ကြိမ်ဖန်တီးကာ ကလပ်သမိုင်းတွင် ပထမဆုံးမေဂျာလိဂ်ဖလား ရရှိအောင် အဓိကနေရာမှ ကူညီပေးခဲ့သူလည်း ဖြစ်ပါတယ်။
လာမယ့်လတွင် အသက် ၃၉ နှစ်ပြည့်မယ့် ဥရုဂွေးတိုက်စစ်မှူးဟာ ၂၀၂၄ ခုနှစ်တွင် ကစားဖော်ဟောင်းနှင့် သူငယ်ချင်းဖြစ်သူ လီယွ့န်နယ်မက်ဆီရှိရာ အင်တာမိုင်ယာမီသို့ ရောက်လာတာ ဖြစ်ပြီး ယခုလအကုန်တွင် စာချုပ်သက်တမ်းကုန်ဆုံးမယ့်သူလည်း ဖြစ်ပါတယ်။
ဆွာရက်ဇ်ဟာ အင်တာမိုင်ယာမီတွင် ကစားတဲ့ ပထမဆုံးရာသီတွင် Supporters'Shield ဖလားရအောင်လည်း ကူညီခဲ့သူ ဖြစ်ပြီး ယခုအခါ လာမယ့်ရာသီအထိ ဆက်ရှိနေတော့မှာ ဖြစ်ပါတယ်။
ဆွာရက်ဇ်ဟာ ဩဂုတ်လတုန်းက လိဂ်ဖလားဗိုလ်လုပွဲ ရှုံးပွဲအပြီးတွင် ဆက်တယ်ဆောင်းဒါးနည်းပြအဖွဲ့ဝင်တစ်ဦးကို တံတွေးဖြင့် ထွေးခဲ့မှုကြောင့် ၉ ပွဲပယ်ခံခဲ့ရဖူးသူ ဖြစ်ပါတယ်။
သူဟာ လီဗာပူးတွင် ကစားစဉ်တုန်းကလည်း ယူနိုက်တက်နောက်ခံလူပက်ထရစ်အီဗရာကို လူမျိုးရေးခွဲခြားမှုကြောင့် ၈ ပွဲပယ်ခံရဖူးပါတယ်။ ဒါ့အပြင် သူဟာ အေဂျက်စ်၊ ဥရုဂွေးနှင့် လီဗာပူးတို့တွင် ကစားစဉ်အတွင်း ပြိုင်ဘက်ကစားသမားကို ကိုက်မှုကြောင့် ပွဲပယ်ခံခဲ့ရဖူးပါသေးတယ်။
ဒေးဗစ်ဘက်ဟမ်းပူးတွဲပိုင်ဆိုင်တဲ့ အင်တာမိုင်ယာမီဟာ မကြာသေးမီတုန်းက စပါးစ်နှင့် ယူနိုက်တက်နောက်ခံလူဟောင်းဆာဂျီယိုရီဂူလွန်အား အလွတ်ပြောင်းရွှေ့ကြေးဖြင့် ခေါ်ယူကာ ရာသီသစ်အတွက် ပြင်ဆင်နေပါတယ်။

ခါရာဘောင်ဖလားဆီမီးဖိုင်နယ်တွင် လက်ရှိ ချန်ပီယံ နယူးကာဆယ်နှင့် မန်စီးတီး၊ ချဲလ်ဆီးနှင့် ပဲလေ့စ်(သို့) အာဆင်နယ် တွေ့ဆုံလာ
========================

ခါရာဘောင်ဖလားဆီမီးဖိုင်နယ်တွင် လန်ဒန်ပြိုင်ဘက်တို့ ရင်ဆိုင်တွေ့လာတော့မှာလည်း ဖြစ်ပါတယ်။
ချဲလ်ဆီး၊ မန်စီးတီးနှင့် နယူးကာဆယ်တို့ ဆီမီးဖိုင်နယ်သို့ တက်ရောက်ထားပြီး ဖြစ်ကာ ကျန် ကွာတားဖိုင်နယ်ပွဲစဉ်အဖြစ် ဒီဇင်ဘာလ ၂၃ ရက်နေ့တွင် ပဲလေ့စ်နှင့် အာဆင်နယ်တို့ ရင်ဆိုင်ကစားရပါမယ်။
ချဲလ်ဆီးဟာ ခါရာဘောင်ဖလားဆီမီးဖိုင်နယ်တွင် အာဆင်နယ် သို့မဟုတ် ခရစ္စတယ်ပဲလေ့စ်နှင့် ရင်ဆိုင်ရမှာ ဖြစ်လို့ ဗိုလ်လုပွဲတက်ရောက်ရေး လန်ဒန်ဒါဘီပွဲ ကစားလာရမှာလည်း ဖြစ်ပါတယ်။
တဖက်တွင် လက်ရှိ ချန်ပီယံ နယူးကာဆယ်မှာ မန်စီးတီးနှင့် ရင်ဆိုင်ကစားရပါမယ်။
ချဲလ်ဆီးဟာ အင်္ဂါနေ့တုန်းက ကာဒစ်ဖ်ကို ၃-၁ ဖြင့် အနိုင်ယူကာ ဆီမီးဖိုင်နယ်သို့ တက်လာတာ ဖြစ်ပြီး မန်စီးတီးမှာလည်း မနေ့ညတုန်းက ဘရန့်ဖို့ဒ်ကို ၂-၀ ဖြင့် အနိုင်ယူကာ ဆီမီးသို့ တက်လာခဲ့တာ ဖြစ်ပါတယ်။
လက်ရှိ ချန်ပီယံ နယူးကာဆယ်မှာလည်း စိန့်ဂျိမ်းစ်ပါ့ခ်တွင် ဖူလ်ဟမ်ကို ၂-၁ ဖြင့် အနိုင်ယူကာ နှစ်ပေါင်း ၇၀ အတွင်း ပထမဆုံးဆွတ်ခူးနိုင်တဲ့ ဆုဖလားအား ကာကွယ်နိုင်ရေး မျှော်လင့်ချက် ရှိလာခဲပါတယ်။
ခါရာဘောင်ဖလားဆီမီးဖိုင်နယ်ပွဲစဉ်များကို နှစ်ကျော့ကစားပြီး ဆုံးဖြတ်လာပါမယ်။
ချဲလ်ဆီးဟာ ပထမအကျော့အား အိမ်ကွင်းမှာ ကစားရမှာ ဖြစ်ပြီး နယူးကာဆယ်ကလည်း ပထမအကျော့အား စိန့်ဂျိမ်းစ်ပါ့ခ်မှာ ကစားလာရပါမယ်။

၄၈ နာရီတွင် ၂ ပွဲ ကစားမယ့် လာမယ့် ပွဲ ၂ ပွဲတွင် ကွဲပြားတဲ့အသင်း ၂ သင်းကို အသုံးပြုလာမယ့် ခရစ္စတယ်ပဲလေ့စ်
=====================

ခရစ္စတယ်ပဲလေ့စ်နည်းပြအိုလီဗာဂလပ်စ်နာက ကစားသမားများရဲ့ ကျန်းမာရေးကို အကာအကွယ်ပေးတဲ့အနေဖြင့် လာမယ့် ပွဲ ၂ ပွဲတွင် ကွဲပြားတဲ့ ပွဲထွက်လူစာရင်းဖြင့် ခင်းကျင်းကစားလာမယ်လို့ အတည်ပြုသွားပါတယ်။
ခရစ္စတယ်ပဲလေ့စ်ဟာ ယနေ့ ကြာသပတေးနေ့တွင် ကွန်ဖရင့်လိဂ်ပွဲစဉ်အဖြစ် ဖင်လန်ကလပ် KuPS နှင့် ရင်ဆိုင်ကစားရမှာ ဖြစ်ပြီး ၄၈ နာရီအကြာ စနေနေ့တွင် လိဒ်နှင့် ပရီးမီးယားလိဂ်ပွဲ ထပ်မံ ကစားရပါမယ်။
လိဒ်ပွဲကို အစောပိုင်းတုန်းက တနင်္ဂနွေနေ့တွင် ကစားရမှာ ဖြစ်ပေမယ့်လည်း ဒီဇင်ဘာလ ၂၃ ရက်နေ့ အင်္ဂါနေ့တွင် အာဆင်နယ်နှင့် ခါရာဘောင်ဖလားကွာတားဖိုင်နယ်ပွဲအတွက် ပြင်ဆင်ချိန် တစ်ရက်ပိုရလာစေရန်အတွက် စနေနေ့သို့ ရွှေ့ဆိုင်းထားတာ ဖြစ်ပါတယ်။
ဂျပန်အလယ်တန်းကစားသမားဒိုင်ချီကာမာဒါမှာ တံကောက်ကြောဒဏ်ရာကြောင့် ၁၀ ပတ်ကြာ အနားယူရမယ်လို့လည်း အတည်ပြုသွားတဲ့ ဂလပ်စ်နာက တစ်သင်းတည်းဖြင့် သုံးရက်အတွင်း ၂ ပွဲကစားရန် မဖြစ်နိုင်ကြောင်း ဆိုသွားပါတယ်။
ပဲလေ့စ်ဟာ ပရီးမီးယားလိဂ်တွင် အဆင့် ၅ နေရာမှာ ရပ်တည်နေပြီး ကွန်ဖရင့်လိဂ်တွင် အဆင့် ၉ နေရာမှာ ရပ်တည်နေပါတယ်။ ပဲလေ့စ်အနေဖြင့် ကွန်ဖရင့်လိဂ်တွင် ထိပ်ဆုံး ၈ သင်းစာရင်းဝင်မှသာ ၁၆ သင်းရှုံးထွက်အဆင့်သို့ တိုက်ရိုက်တက်ရောက်ရပါမယ်။
ဂလပ်စ်နာက "ဝဲလ်(ဟုချ်)နဲ့ စကားပြောခဲ့တယ်။ သူက လွန်ခဲ့တဲ့နှစ်အနည်းငယ်တုန်းက ဒါမျိုး ကြုံခဲ့ဖူးတယ်။ ဘောက်ဆင်ဒေး(ဒီဇင်ဘာလ ၂၆ ရက်)မှာ ကစားပြီးတဲ့နောက် ၂၈ ရက်(ဒီဇင်ဘာ)မှာ ထပ်ကစားခဲ့ရတယ်။ တခါတလေ ဒီလိုပွဲတွေလည်း ရှိတယ်။ သူ ကစားခဲ့ရတယ်။ ဒါပေမယ့် အခု ပွဲတွေရဲ့ ပြင်းထန်မှုက မြင့်တက်နေတယ်လို့ ထင်တယ်။ တစ်ကြိမ်တော့ လုပ်ကောင်းလုပ်နိုင်လိမ့်မယ်။ ဒါပေမယ့် အခု ကစားမယ့်ပွဲက ဒီရာသီ ၂၇ ပွဲမြောက်ပွဲ ဖြစ်ပါတယ်။ ဒီတော့ အနာဂတ်နဲ့ပတ်သက်ပြီး တွေးရမယ်။ ကျွန်တော်တို့ ၁၈၊ ၂၀၊ ၂၃ နဲ့ ၂၈ ရက်(ဒီဇင်ဘာ)တွေမှာ ကစားရမယ်။ ပြီးရင် ဇန်နဝါရီမှာ ၁၊ ၄၊ ၇ နဲ့ ၁၀ ရက်တွေမှာ ကစားရမယ်။ ဒီတော့ တစ်သင်းတည်းနဲ့ ကစားရင်း တာဝန်မဲ့တာ ဖြစ်သွားလိမ့်မယ်။ လုံးဝကွဲပြားတဲ့ အသင်းနှစ်သင်းနဲ့ ကစားသွားပါမယ်။ ဒါပေမယ့် ဖြစ်နိုင်ရင်တော့ မိနစ်အနည်းငယ်မျှဝေ ကစားပါမယ်။ ကျုပ်က ပထမဆုံးမိနစ်ကနေ ပွဲအပြီးအထိ အကောင်းဆုံးအသင်းနဲ့ပဲ ကစားချင်တာပါ။ ဒါပေမယ့် ကျုပ်တို့ကို ဒီလိုလုပ်ဖို့ တောင်းဆိုလာလို့ ဒီလို လုပ်ရပါမယ်"လို့ ပြောကြားသွားပါတယ်။

၂၀၂၆ ကမ္ဘာ့ဖလားဆုကြေးကို ၅၀ ရာခိုင်နှုန်းတိုးမြှင့်ပေးလာမယ့် ဖီဖာ
====================

ဖီဖာက လာမယ့် ၂၀၂၆ ကမ္ဘာ့ဖလားပြိုင်ပွဲတွင် ပါဝင်တဲ့အသင်းများအား ၅၀ ရာခိုင်နှုန်း တိုးမြှင့်ပေးအပ်လာမယ်လို့ ကြေညာလာပါတယ်။
ဖီဖာဟာ ၂၀၂၆ ကမ္ဘာ့ဖလားပြိုင်ပွဲအတွက် လက်မှတ်ဈေးနှုန်းအား အဆမတန် မြင့်မားစွာ သတ်မှတ်မှုကြောင့် အပြင်းအထန် ဝေဖန်ခြင်းခံရပြီးနောက် ယခုကဲ့သို့ ဆုကြေးကို တိုးမြှင့်ပေးအပ်လာမယ်လို့ ကြေညာလာတာလည်း ဖြစ်ပါတယ်။
ဖီဖာဟာ ကမ္ဘာ့ဖလားပြိုင်ပွဲတွင် ဆုကြေး စံချိန်တင် ဒေါ်လာ ၇၂၇ သန်းပေးအပ်သွားမှာ ဖြစ်ပါတယ်။
ကမ္ဘာ့ဖလားချန်ပီယံအသင်းက ဒေါ်လာသန်း ၅၀ အထိ ရရှိလာမှာ ဖြစ်ပြီး ဒုတိယ ရရှိတဲ့အသင်းက ဒေါ်လာ ၃၃ သန်း ရရှိလာပါမယ်။ ဒါ့အပြင် ဖီဖာဟာ ကမ္ဘာ့ဖလားပြိုင်ပွဲရောက် အသင်းတိုင်းအား ဒေါ်လာ ၉ သန်းပေးလာပါမယ်။
ဒါ့အပြင် ဖီဖာဟာ ပြိုင်ပွဲဝင် အသင်းတိုင်းအတွက် ပြင်ဆင်စရိတ် ဒေါ်လာ ၁.၅ သန်းပေးလာမှာ ဖြစ်ပြီး အသင်းတိုင်းဟာ အနည်းဆုံး ဒေါ်လာ ၁၀.၅ သန်း ရရှိလာပါမယ်။
ဖီဖာဟာ လက်မှတ်ဈေးနှုန်းမြင့်မားစွာ သတ်မှတ်မှုကြောင့် အပြင်းအထန် ဝေဖန်ခြင်းခံရပြီးနောက် ဈေးနှုန်းသက်သာတဲ့ ဒေါ်လာ ၆၀ တန် လက်မှတ် ရောင်းချလာမယ်လို့ ကြေညာပြီးနောက် ယခုကဲ့သို့ ဆုကြေးတိုးမြှင့်ပေးအပ်လာမယ်လို့ ကြေညာလာတာလည်း ဖြစ်ပါတယ်။
ဖီဖာဟာ ဒေါ်လာ ၆၀ တန် တန်ဖိုးသင့်လက်မှတ်အား ပွဲတိုင်းတွင် တစ်သင်းလျှင် ၁၀ ရာခိုင်နှုန်းစီ (စောင်ရေရ ၄၀၀ ခန့်) ရောင်းချသွားမှာလည်း ဖြစ်ပါတယ်။

ယနေ့ ရွှေဈေးနဲ့ နိုင်ငံခြားငွေလဲနှုန်းများ
(ဒီဇင်ဘာ - ၁၈ ရက်၊ နံနက် ၁၀ နာရီ)

#ရွှေဈေး
-ကမ္ဘာ့ရွှေဈေး
တအောင်စ ၄၃၃၅ ဒေါ်လာ
ရန်ကုန်တိုင်းရွှေလုပ်ငန်းရှင်များအသင်း (YGEA) ရဲ့ရွှေစျေးကွက် အဖွင့်ဈေးနှုန်း
- အကယ်ဒမီ မီးလင်းရွှေ တကျပ်သား
၅၉၉၀၀၀၀ ကျပ်
ပြင်ပ အရောင်းအဝယ်ဖြစ်တဲ့ ရွှေဈေးနှုန်း
-အခေါက်ရွှေ တကျပ်သား (ပြင်ပဈေးကွက်)
ရောင်းဈေး ၉၀၂၀၀၀၀ ကျပ်
ဝယ်ဈေး ၈၉၈၀၀၀၀ ကျပ်
-၁၅ ပဲရည် တကျပ်သား
ရောင်းဈေး ၈၆၂၀၀၀၀ ကျပ်
ဝယ်ဈေး ၈၅၈၀၀၀၀ ကျပ်
* စနစ်သစ်
(၁ိ - ၁၆.၃၂၉၃၂၅ ဂရမ် = ၁၂၀ ရွေး)
-အခေါက်ရွှေ တကျပ်သား (ပြင်ပဈေးကွက်)
ရောင်းဈေး ၈၉၀၀၀၀၀ ကျပ်
ဝယ်ဈေး ၈၈၆၀၀၀၀ ကျပ်
-၁၅ ပဲရည် တကျပ်သား
ရောင်းဈေး ၈၅၀၀၀၀၀ ကျပ်
ဝယ်ဈေး ၈၄၆၀၀၀၀ ကျပ်
“လက်ရှိ ရွှေဈေးကွက်အတွင်း ဈေးနှုန်းအတက်အကျ မငြိမ်သေးတဲ့အတွက် ရောင်းမှား၊ ဝယ်မှား မဖြစ်ဖို့ သတိပြုစေလိုပါတယ်။”
(ရွှေဈေးနှုန်းများ အချိန်နှင့်အမျှ ပြောင်းလဲနိုင်သည်။)
#နိုင်ငံခြားငွေလဲလှယ်နှုန်း
-မြန်မာနိုင်ငံတော်ဗဟိုဘဏ် ရည်ညွှန်းငွေလဲနှုန်း
အမေရိကန် တဒေါ်လာ - ၃၆၅၄ ကျပ်
ပြင်ပပေါက်စျေး
-အမေရိကန်ဒေါ်လာ‌
ရောင်းဈေး - ၄၀၁၀ ကျပ်
ဝယ်ဈေး - ၃၉၁၀ ကျပ်
-စင်္ကာပူဒေါ်လာ
ရောင်းဈေး - ၃၁၀၅ ကျပ်
ဝယ်ဈေး - ၃၀၂၅ ကျပ်
-ယူရို
ရောင်းဈေး - ၄၇၁၀ ကျပ်
ဝယ်ဈေး - ၄၅၉၅ ကျပ်
-ထိုင်းဘတ်
ရောင်းဈေး - ၁၂၇.၃၉ ကျပ်
ဝယ်ဈေး - ၁၂၄.၂၂ ကျပ်
-မလေးရှားရင်းဂစ်
ရောင်းဈေး - ၉၈၁ ကျပ်
ဝယ်ဈေး - ၉၅၆ ကျပ်
-တရုတ်ယွမ်
ရောင်းဈေး - ၅၇၀ ကျပ်
ဝယ်ဈေး - ၅၅၆ ကျပ်
-ဂျပန်ယန်း
ရောင်းဈေး - ၂၅.၇၆ ကျပ်
ဝယ်ဈေး - ၂၅.၁၂ ကျပ်
-အိန္ဒိယရူပီး
ရောင်းဈေး - ၄၄.၃၇ ကျပ်
ဝယ်ဈေး - ၄၃.၂၇ ကျပ်
-ကိုရီးယားဝမ်
ရောင်းဈေး - ၂.၇၁ ကျပ်
ဝယ်ဈေး - ၂.၆၅ ကျပ်
-စတာလင်ပေါင်
ရောင်းဈေး - ၅၃၆၅ ကျပ်
ဝယ်ဈေး - ၅၂၃၀ ကျပ်
-ဩစတြေးလျဒေါ်လာ
ရောင်းဈေး - ၂၆၄၃ ကျပ်
ဝယ်ဈေး - ၂၅၇၈ ကျပ်
-ကနေဒါဒေါ်လာ
ရောင်းဈေး - ၂၉၀၈ ကျပ်
ဝယ်ဈေး - ၂၈၃၆ ကျပ်
-ဟောင်ကောင်ဒေါ်လာ
ရောင်းဈေး - ၅၁၆ ကျပ်
ဝယ်ဈေး - ၅၀၃ ကျပ်
-ယူအေအီး
ရောင်းဈေး - ၁၀၉၂ ကျပ်
ဝယ်ဈေး - ၁၀၆၅ ကျပ်
ငွေလဲနှုန်းများ အချိန်နှင့်အမျှ ပြောင်းလဲနိုင်သည်။
***သတ်မှတ်ဈေးအတိုင်း အရောင်းအဝယ်မလုပ်ပါက အရေးယူခံရနိုင်သည်။

စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီ
*************************************************
🇲🇲 ရည်ညွှန်းလက်လီဈေးနှုန်းများ
💢ရန်ကုန်မြို့
💢မန္တလေးမြို့
💢နေပြည်တော်
💢တိုင်းဒေသကြီး/ ပြည်နယ်မြို့တော်များ