နိုင်ငံနှင့် ကစားဖော်များရဲ့မိသားစုအတွက် အလွန်အမင်းစိုးရိမ်နေကြောင်း အီရန်နိုင်ငံတော်သီချင်း ဆိုရန် ငြင်းကာ သပိတ်မှောက်ခဲ့တဲ့ အီရန်တိုက်စစ်မှူးဖွင့်ဟလာ
================
အီရန်တိုက်စစ်မှူးဆာရာဒီဒါက အရှေ့အလယ်ပိုင်းတွင် ဖြစ်ပျက်နေတဲ့ ပဋိပက္ခနှင့်ပတ်သက်ပြီး အီရန်အနေဖြင့် သတ္တိရှိရှိ ရှင်သန်နေရမည်ဖြစ်ကြောင်း အားပေးတိုက်တွန်းလာပါတယ်။

အီရန်အမျိုးသမီးအသင်းဟာ ဩစတြေးလျတွင် ကျင်းပနေတဲ့ အာရှဖလားပြိုင်ပွဲ ဝင်ရောက် ယှဉ်ပြိုင်နေပြီး ကြာသပတေးနေ့တွင် အိမ်ရှင် ဩစတြေးလျနှင့် ရင်ဆိုင် ကစားရပါမယ်။

အီရန်ဟာ ပြီးခဲ့တဲ့အပတ်တုန်းက နိုင်ငံအဓိပတိခါမီနီကို အမေရိကန်-အစ္စရေးတို့က ပူးပေါင်းစစ်ဆင်ရေး ပြုလုပ်ကာ လုပ်ကြံခဲ့ပြီးနောက် အရှေ့အလယ်ပိုင်းနိုင်ငံများ တုံ့ပြန်တိုက်ခိုက်မှုများ ပြုလုပ်နေပါတယ်။

တဖက်တွင် အီရန်တွင် အင်တာနက် ပြတ်တောက်မှုများ ဖြစ်ပျက်နေကာ ဩစတြေးလျရောက် အီရန်ကစားသမားများမှာ မိသားစုဝင်များနှင့် ဆက်သွယ်ရန် ခက်ခဲနေပြီး အကြီးအကျယ် စိုးရိမ်နေကြရပါတယ်။

ဒီဒါက "အီရန်မှာ ဖြစ်ပျက်နေတာတွေအတွက် အရမ်း စိုးရိမ်ရသလို စိတ်မကောင်းလည်း ဖြစ်ရတယ်။ ကျွန်မတို့ မိသားစုတွေက အီရန်မှာပါ။ ကျွန်မတို့ နိုင်ငံအတွက် သတင်းကောင်း ကြုံလာဖို့ မျှော်လင့်ပါတယ်။ ကွန်မတို့ရဲ့ နိုင်ငံ သန်သန်မာမာနဲ့ ရှင်သန်ဖို့ မျှော်လင့်တယ်"လို့ ပြောကြားသွားပါတယ်။

အီရန်ကစားသမားများနှင့် နည်းပြဂျာဖာရီတို့ဟာ အီရန်ရဲ့ နိုင်ငံရေးနှင့်ပတ်သက်ပြီး မှတ်ချက်ပြု ပြောကြားရန် ငြင်းဆိုထားကြပါတယ်။

ဒါပေမယ့် အီရန်အသင်းဟာ တနင်္လာနေ့တုန်းက တောင်ကိုရီးယားကို ၃-၀ ဂိုးဖြင့် ရှုံးနိမ့်တဲ့ပွဲမတိုင်မီ နိုင်ငံတော်သီချင်းသီဆိုတဲ့ အစီအစဉ်တွင် နှုတ်ဆိတ်နေကာ သပိတ်မှောက်ခဲ့ကြပါတယ်။

အီရန်ပရိသတ်အချို့တို့မှာ တောင်ကိုရီးယားပွဲစဉ်အတွင်းတွင် အီရန်အလံကို လွှင့်ခဲ့ကြပါတယ်။

အမေရိကန်-အီရန်ပဋိပက္ခကြောင့် ဘန်ကာထဲတွင် ဝင်ပုန်းနေရတဲ့ ပရီးမီးယားလိဂ်စတား
===================
နယူးကာဆယ်စတားဖေဘီယန်ရှားဟာ အရှေ့အလယ်ပိုင်းပဋိပက္ခကြားထဲသို့ ရောက်နေပြီး အသက်အန္တရာယ်အလွန်စိုးရိမ်နေရမှုနှင့်အတူ ဘန်ကာထဲတွင် ဝင်ပုန်းအောင်းနေထိုင်နေရပါတယ်။

အသက် ၃၄ နှစ်ရှိ ဆွစ်ဇာလန်နောက်ခံလူဟာ ဇန်နဝါရီလတုန်းက ခြေကျင်းဝတ်ဒဏ်ရာရရှိပြီးနောက် အရှေ့အလယ်ပိုင်းသို့ သွားရောက်ကာ ပြန်လည်ထူထောင်ရေး လုပ်ဆောင်နေသူ ဖြစ်ပါတယ်။

ရှားဟာ ပြီးခဲ့တဲ့အပတ်မှ စတင်ကာ နယူးကာဆယ်ရဲ့ ခွင့်ပြုချက်ဖြင့် အရှေ့အလယ်ပိုင်းသို့ လာရောက်ကာ ပူနွေးရာသီ လေ့ကျင့်ခန်းပြုလုပ်ကာ ပြန်လည်ထူထောင်ရေး လာရောက်လုပ်ဆောင်နေတာပါ။

ဒါပေမယ့် သူ ရောက်လာပြီး မကြာမီမှာပင် အမေရိကန်နှင့် အစ္စရေးတို့ရဲ့ တိုက်ခိုက်မှုအား အီရန်က ဒရုန်းဖြင့် တုံ့ပြန် တိုက်ခိုက်မှု ပြုလုပ်နေပါတယ်။

ရှားဟာ လက်ရှိအချိန်တွင် အသက်အန္တရာယ်စိုးရိမ်စရာ မရှိပေမယ့်လည်း သူ့ရဲ့ တုန်လှုပ်စရာအခြေအနေအား အင်စတာဂရမ်တွင် ပို့စ်တင်ကာ အသိပေးလာပါတယ်။

ရှားက "အရှေ့အလယ်ပိုင်းမှာ ဖြစ်ပျက်နေတာကို ကိုယ်တိုင် ကိုယ်ကျ မြင်တွေ့ရတဲ့ ကြောက်စရာအကောင်းဆုံးနေ့ရက်တွေကို ဖြတ်သန်းနေရပါတယ်။ ပြန်လည်ထူထောင်ရေးအစီအစဉ်ရဲ့အစိတ်အပိုင်းအဖြစ် ဒီကို ရောက်နေတာပါ။ လုံခြုံစိတ်ချရတဲ့နေရာ ရှာတွေ့လို့ ဝမ်းသာရတယ်။ ဒါပေမယ့် ကြုံတွေ့ရတာ၊ ဖြစ်နေတာတွေက တကယ်ပဲ ကြောက်စရာကောင်းလှပါတယ်။ ရိုက်ခတ်တဲ့ ဧရိယာက လူတွေအားလုံး လိုအပ်တဲ့ အကူအညီ ရလာဖို့ မျှော်လင့်တယ်"လို့ ပြောကြားသွားပါတယ်။

ဖေဘီယန်ရှား တင်လာတဲ့ ဓာတ်ပုံတွင် မြေအောက်ထပ်တွင် လူများ ကြုံသလို နေထိုင်နေရတာ တွေ့ရပါတယ်။

အရှေ့အလယ်ပိုင်းတွင် ဖြစ်ပျက်နေတဲ့ ပဋိပက္ခကြောင့် ဒူဘိုင်း၊ ဒိုဟာလေဆိပ်များ ပိတ်ထားရပါတယ်။

ပြီးခဲ့တဲ့ ၄၈ နာရီအတွင်းတွင် လေကြောင်းလိုင်းအချို့ ပြန်လည် အသက်ဝင်လာကာ ဗြိတိန်နိုင်ငံသားတို့ ဗြိတိန်သို့ ပြန်လာနိုင်ခဲ့ကြပါတယ်။

တဖက်တွင် ဖေဘီယန်ရှားကတော့ အရှေ့အလယ်ပိုင်းမှ ထွက်ခွာရေး မရေမရာ ဖြစ်နေပါတယ်။

၂၀၁၈ ခုနှစ်တွင် ဒီပို့တီဗိုမှ ရောက်လာတဲ့ ဖေဘီယန်ရှားဟာ လာမယ့် ဇွန်လတွင် နယူးကာဆယ်နှင့် စာချုပ်သက်တမ်းကုန်ဆုံးမယ့်သူ ဖြစ်ပါတယ်။

သူဟာ ခြေကျင်းဝတ်ဒဏ်ရာကြောင့် အနားယူနေရပြီး လာမယ့် ဧပြီလတွင်မှ ပြန်လည် ကစားလာနိုင်မယ့် အခြေအနေတွင် ရှိနေပါတယ်။

လီဗာပူးနှင့် ချန်ပီယံလိဂ် ၁၆ သင်း ဒုတိယအကျော့ပွဲစဉ်အား ဂါလာတာစာရေးပရိသတ်များ ပိတ်ပင်ခံရ
====================
ဂါလာတာစာရေးပရိသတ်များဟာ ဂျူဗင်တပ်နှင့် ချန်ပီယံလိဂ်ပလေးအော့ဖ်ပွဲစဉ်မှ အဖြစ်အပျက်ကြောင့် ယခုလနှောင်းပိုင်းတွင် လီဗာပူးအား အဝေးကွင်းသို့ သွားရောက် ကစားရမယ့်ပွဲအား ပွဲကြည့်ခွင့် ပိတ်ပင်ခြင်းခံခဲ့ရပါတယ်။

ဂါလာတာစာရေးပရိသတ်များဟာ ဖေဖော်ဝါရီလ ၂၅ ရက်‌နေ့ တူရင်တွင် ကစားတဲ့ ၁၆ သင်း ရှုံးထွက်အဆင့် ဒုတိယအကျော့ပွဲစဉ်တွင် အရာဝတ္ထုပစ္စည်းများဖြင့် ပစ်ပေါက်ခဲ့သလို မီးရှူးများ ပစ်လွှတ်ခဲ့ကြပါတယ်။

ဂါလာတာစာရေးဟာ တူရင်တွင် ၃-၂ ဖြင့် ရှုံးနိမ့်ခဲ့ပေမယ့်လည်း နှစ်ကျော့ပေါင်းရလဒ် ၇-၅ ဖြင့် အနိုင်ရရှိကာ ချန်ပီယံလိဂ် ၁၆ သင်း ရှုံးထွက်အဆင့်သို့ တက်ရောက်နိုင်ခဲ့ပါတယ်။

ယခုအခါ ယူအီးအက်ဖ်အေက ဂါလာတာစာရေးပရိသတ်များအား မတ်လ ၁၈ ရက်နေ့ အန်ဖီးလ်သို့ သွားရောက် ကစားရမယ့်ပွဲစဉ်တွင် လက်မှတ်ဝယ်ယူခွင့် ပိတ်ပင်မှု ပြုလုပ်လာတဲ့အပြင် ယူရို ၄၀၀၀၀ လည်း ဒဏ်ရိုက်လာပါတယ်။

ဂါလာတာစာရေးက ယူအီးအက်ဖ်အေရဲ့ ဆုံးဖြတ်ချက်ကို အယူခံဝင်မယ်လို့ ကြေညာထားပါတယ်။

ချန်ပီယံလိဂ်ဝင်ခွင့် မရရှိပါက ပေါင်သန်း ၁၂၀ အထိ နစ်နာလာမယ့် လီဗာပူး
===================
လီဗာပူးဟာ ယခုရာသီတွင် ပရီးမီးယားလိဂ်အမှတ်ပေးဇယားထိပ်ဆုံး ၅ သင်းစာရင်းဝင်ခြင်း မရှိဘဲ ချန်ပီယံလိဂ်ဝင်ခွင့် မရရှိလာပါက ပေါင်သန်း ၁၂၀ အထိ နစ်နာဆုံးရှုံးလာဖို့ ရှိနေပါတယ်။

လက်ရှိ ပရီးမီးယားလိဂ်ချန်ပီယံ လီဗာပူးဟာ Molineux တွင် ဝုဗ်အား ၂-၁ ဖြင့် ရှုံးနိမ့်ခဲ့ပြီး ချဲလ်ဆီးက ဗီလာကို အဝေးကွင်းတွင် ၄-၁ ဖြင့် အနိုင်ရရှိသွားပြီးနောက် ဂိုးကွာခြားချက်ဖြင့် အဆင့် ၆ နေရာသို့ ဆင်းပေးလာရပါတယ်။

တကယ်လို့များ လီဗာပူးဟာ ယခုရာသီ ထိပ်ဆုံး ၅ သင်းစာရင်း မဝင်ဘဲ ချန်ပီယံလိဂ်ဝင်ခွင့် မရရှိလာပါက အားကစားတွင်သာမက ဘဏ္ဍာရေးပိုင်းတွင်လည်း များစွာ ရိုက်ခတ်လာပါမယ်။

ဘောလုံးဘဏ္ဍာရေးဆိုင်ရာကျွမ်းကျင်သူ ကီရန်မက်ဂွိုင်းယားက လီဗာပူးမှာ ချန်ပီယံလိဂ်ဝင်ခွင့် မရရှိပါက ပေါင်သန်း ၁၂၀ အထိ နစ်နာလာနိုင်ကြောင်း သုံးသပ်သွားပါတယ်။

လီဗာပူးဟာ ၂၀၂၄-၂၅ ရာသီတုန်းက ချန်ပီယံလိဂ် ၁၆ သင်း ရှုံးထွက်အဆင့်သို့ တက်ရောက်နိုင်ခဲ့ပြီးနောက် ယူရို ၉၈.၁ သန်း ရရှိခဲ့ပါတယ်။

လီဗာပူးဟာ ၂၀၂၃-၂၄ ရာသီတုန်းက ယူရိုပါလိဂ်သာ ဝင်ခွင့် ရပြီးနောက် ကွာတားဖိုင်နယ်အထိ တက်ခဲ့ပေမယ့်လည်း ယူရို ၂၆.၈ သန်းသာ ရရှိခဲ့ပါတယ်။

စပါးစ်မှာလည်း ပြီးခဲ့တဲ့ရာသီတုန်းက ယူရိုပါလိဂ်ဖလား ဆွတ်ခူးနိုင်ခဲ့ပေမယ့်လည်း ယူရို ၄၁.၄ သန်းတည်းသာ ရခဲ့ပါတယ်။

လီဗာပူးဟာ ပြီးခဲ့တဲ့နွေရာသီတုန်းက ကစားသမားခေါ်ယူအားဖြည့်ရန် ပေါင်သန်း ၄၅၀ အထိ အသုံးပြုခဲ့ပြီး အပြောင်းအရွှေ့ဈေးကွက်တွင် ကလပ်တစ်ခုရဲ့ စံချိန်တင်အသုံးစရိတ်ဖြစ်ပါတယ်။

လီဗာပူးဟာ ပြီးခဲ့တဲ့အပတ်တုန်းက ၂၀၂၅ ခုနှစ် မေလအထိ တစ်နှစ်တာ ဘဏ္ဍာရေးရှင်းတမ်း ကြေညာခဲ့ရာ ဝင်ငွေ ပေါင် ၇၀၃ သန်း ရရှိခဲ့ပြီး ပေါင် ၈ သန်း အမြတ် ရရှိခဲ့ပါတယ်။

ပထမဆုံး ရှုံးပွဲကြုံပြီးနောက် ဆာအဲလက်စ်ဖာဂူဆန်ကဲ့သို့ ကာရစ် အကြောင်းပြချက် ပေးလာ
===================
မိုက်ကယ်ကာရစ်ဟာ ဗုဒ္ဓဟူးနေ့တုန်းက စိန့်ဂျိမ်းစ်ပါ့ခ်တွင် ပထမဆုံး ယူနိုက်တက်ရှုံးပွဲ ကြုံရပြီးနောက် ဆရာဟောင်း ဆာအဲလက်စ်ဖာဂူဆန်ကဲ့သို့ အကြောင်းပြချက် ပေးလာပါတယ်။

မိုက်ကယ်ကာရစ်ဟာ ဇန်နဝါရီလတွင် ယူနိုက်တက်ယာယီနည်းပြအဖြစ် ခန့်အပ်ခြင်းခံရပြီးနောက် ပထမဆုံး ၇ ပွဲတွင် ၆ ပွဲနိုင်၊ ၁ ပွဲ သရေရလဒ် ရရှိခဲ့ပါတယ်။

ဒါပေမယ့် ယူနိုက်တက်ဟာ ဗုဒ္ဓဟူးနေ့ညတုန်းက စိန့်ဂျိမ်းစ်ပါ့ခ်ပွဲစဉ်မှာတော့ ၁၀ ယောက်ကျန် နယူးကာဆယ်ကို ၂-၁ ဖြင့် အရေးနိမ့်ခဲ့ပါတယ်။

ဒါပေမယ့် မိုက်ကယ်ကာရစ်ဟာ ပထမဆုံးရှုံးပွဲ ကြုံရမှုအတွက် ကစားသမားများကို အပြစ်ဖို့လာခြင်း မရှိပါဘူး။

လွန်ခဲ့တဲ့ တစ်နှစ်တုန်းက ဘရိုက်တန်ကို ရှုံးနိမ့်ပြီးချိန်မှာတော့ နည်းပြဟောင်းရူဘင်အမိုရမ်က "ဒီအသင်းက မန်ချက်စတာယူနိုက်တက်သမိုင်းမှာ အဆိုးရွားဆုံးအသင်း ဖြစ်နိုင်ပါတယ်"လို့ ကစားသမားများကို အပြစ်ဖို့ ခဲ့ပါတယ်။

ဒါပေမယ့် မိုက်ကယ်ကာရစ်ကတော့ ဆရာဟောင်းဆာအဲလက်စ်ဖာဂူဆန်ကဲ့သို့ "အသင်းတိုင်း ရှုံးတာပါပဲ။ ဒါက ပွဲရဲ့ အစိတ်အပိုင်းပါ။ ဒါက ရေတွက်နေရမယ့်အရာပါ။ ကျွန်တော်တို့ စိတ်ပျက်ရတယ်။ နာကျင်ရတယ်။ အကောင်းဆုံးပုံစံနဲ့ ရောက်လာတယ်။ စီစဉ်ထားသလို မဖြစ်လာတော့ စိတ်ပျက်ရတယ်။ နှစ်လမ်းသွား မရှိပါဘူး"လို့ ပြောကြားသွားပါတယ်။

ယူနိုက်တက်ဟာ နယူးကာဆယ်ကို ရှုံးနိမ့်ခဲ့ပေမယ့်လည်း အမှတ်ပေးဇယားအဆင့် ၃ နေရာမှာ ဆက်လက် ရပ်တည်နေဆဲ ဖြစ်ပါတယ်။

ကာရစ်ဦးဆောင်တဲ့ ယူနိုက်တက်ဟာ လာမယ့် မတ်လ ၁၅ ရက်နေ့တွင် အိုးထရက်ဖို့ဒ်ကွင်းတွင် ချန်ပီယံလိဂ်ဝင်ခွင့်အတွက် အလွန်အရေးပါတဲ့ပွဲအဖြစ် အဆင့် ၄ နေရာမှ ဗီလာကို ဧည့်ခံကစားရပါမယ်။

စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီ
*************************************

🇲🇲 ရည်ညွှန်းလက်လီဈေးနှုန်းများ
💢ရန်ကုန်မြို့
💢မန္တလေးမြို့
💢နေပြည်တော်
💢တိုင်းဒေသကြီး/ ပြည်နယ်မြို့တော်များ

Tattoo ideas only