တတိယအကြိမ် မြန်မာ-ရုရှား ပူးတွဲအကြမ်းဖက်မှုတိုက်ဖျက်ရေးကော်မတီအစည်းအဝေး သ​ဘောတူညီချက်များကို အတည်ပြုလက်မှတ်​ရေးထိုး

တတိယအကြိမ် မြန်မာ-ရုရှား ပူးတွဲအကြမ်းဖက်မှုတိုက်ဖျက်ရေးကော်မတီ အစည်းအဝေး ဒုတိယနေ့ကို ယနေ့(ဒီဇင်ဘာ ၁၀ ရက်)နံနက်ပိုင်းတွင် နေပြည်တော်ရှိ Jasmine ဟိုတယ်၌ ဆက်လက် ကျင်းပခဲ့ပြီး အစည်းအ​ဝေးသ​ဘောတူညီချက်များကို အတည်ပြုလက်မှတ်​ရေးထိုးခဲ့​ကြောင်းာသိရသည်။
အဆိုပါ အစည်းအဝေးသို့ ကာကွယ်ရေးဦးစီးချုပ်ရုံး(ကြည်း)မှ ဒုတိယဗိုလ်ချုပ်ကြီး သန်းထိုက် နှင့် ကော်မတီဝင်မြန်မာ့တပ်မတော်မှအရာရှိကြီးများ၊ ရုရှားဖက်ဒရေးရှင်းနိုင်ငံမှ ရုရှားတပ်မတော်ကြည်းတပ်ဖွဲ့၏ ငြိမ်းချမ်းရေးထိန်းသိမ်းမှုဆိုင်ရာ ဒုတိယကြည်းတပ် ဦးစီးချုပ် Colonel General Aleksandr Anatolyevich Matovnikov နှင့်ကော်မတီဝင် ရုရှား တပ်မတော်မှအရာရှိကြီးများ တက်ရောက်ကြခဲ့​ကြောင်း သိရသည်။
ယင်းအစည်းအဝေးတွင် မြန်မာ-ရုရှား အကြမ်းဖက်မှုတိုက်ဖျက်ရေးပူးပေါင်းဆောင်ရွက်မှု ဆိုင်ရာကိစ္စရပ်များနှင့်ပတ်သက်၍ နှစ်ဖက်နိုင်ငံမှ ကော်မတီဝင်များက အမြင်ချင်းဖလှယ်ဆွေးနွေးခဲ့​ကြောင်း သိရသည်။
ထို့နောက် မြန်မာ-ရုရှား ပူးတွဲအကြမ်းဖက်မှု တိုက်ဖျက်ရေးကော်မတီပူးတွဲဥက္ကဋ္ဌများက ဆွေးနွေးချက်များအပေါ် ပြန်လည်သုံးသပ်ဆွေးနွေး ပေးခဲ့ပြီး နိဂုံးချုပ်အမှာစကားများ အသီးသီးပြောကြားကာ ကော်မတီ ပူးတွဲဥက္ကဋ္ဌများ ဖြစ်သည့် ကာကွယ်ရေးဦးစီးချုပ်ရုံး(ကြည်း)မှ ဒုတိယဗိုလ်ချုပ်ကြီး သန်းထိုက်နှင့် ရုရှားတပ်မတော်ကြည်းတပ်ဖွဲ့၏ ငြိမ်းချမ်းရေးထိန်းသိမ်းမှုဆိုင်ရာ ဒုတိယကြည်းတပ်ဦးစီးချုပ် Colonel General Aleksandr Anatolyevich Matovnikov တို့သည် အစည်းအ​ဝေး သဘောတူညီချက်များအား အတည်ပြုလက်မှတ်ရေးထိုးကြပြီး အထိမ်းအမှတ်လက်ဆောင် ပစ္စည်းများ အပြန်အလှန်လဲလှယ်ခဲ့​ကြောင်း သိရသည်။

လက်ဖက်ယဉ်ကျေးမှုအား UNESCO ၏ လူသားမျိုးနွယ်ဆိုင်ရာကိုယ်စားပြု ဒြပ်မဲ့ယဉ်ကျေးမှုအမွေအနှစ်စာရင်း တင်သွင်းနိုင်ရေး ဆောင်ရွက်နေ

လက်ဖက်ယဉ်ကျေးမှုအား UNESCO ၏ လူသားမျိုးနွယ်ဆိုင်ရာကိုယ်စားပြု ဒြပ်မဲ့ယဉ်ကျေးမှုအမွေအနှစ်စာရင်း တင်သွင်းနိုင်ရေး ဆောင်ရွက်နေကြောင်း သိရသည်။
ဒီဇင်ဘာ ၁၀ ရက်က လက်ဖက်ယဉ်ကျေးမှုအား UNESCO ၏ လူသားမျိုးနွယ်ဆိုင်ရာကိုယ်စားပြု ဒြပ်မဲ့ယဉ်ကျေးမှုအမွေအနှစ်စာရင်း တင်သွင်းနိုင်ရေးနှင့်ပတ်သက်၍ ညှိနှိုင်းအစည်းအဝေးကို သာသနာရေးနှင့်ယဉ်ကျေးမှုဝန်ကြီးဌာန လောကနတ်အစည်းအဝေးခန်းမ၌ ကျင်းပခဲ့သည်။

ရှမ်းပြည်နယ် လွိုင်လင်မြို့နယ်တွင် နှစ်ရက်အတွင်း ဘိန်းခင်းဧကပေါင်း ၁၁၅ ဧကအား ဖျက်ဆီးရှင်းလင်း

ရှမ်းပြည်နယ် လွိုင်လင်မြို့နယ်တွင် နှစ်ရက်အတွင်း ဘိန်းခင်းဧကပေါင်း ၁၁၅ ဧကအား ဖျက်ဆီးရှင်းလင်းခဲ့ကြောင်း သိရသည်။
မြန်မာနိုင်ငံဖြင့် မူးယစ်ဆေးဝါးတိုက်ဖျက်ရေးလုပ်ငန်းစဉ်များကို ကုလသမဂ္ဂအပါအဝင် အိမ်နီးချင်းနိုင်ငံများ၊ အာဆီယံအဖွဲ့ဝင်နိုင်ငံများ၊ မဲခေါင်ဒေသတွင်းနိုင်ငံများ၊ ဘင်းမ်စတက်အဖွဲ့ဝင်နိုင်ငံများ၊ နိုင်ငံတကာမူးယစ်ဆေးဝါးထိန်းချုပ်ရေးဆိုင်ရာ အဖွဲ့အစည်းများနှင့် ပူးပေါင်း၍ ပိုမိုတိုးမြှင့်ဆောင်ရွက်လျက်ရှိသည့်အပြင် မူးယစ်ဆေးဝါးတိုက်ဖျက်ရေး လုပ်ငန်းစဉ်များတွင် တစ်ခုအပါအဝင်ဖြစ်သည့် ဘိန်းခင်းများ ဖျက်ဆီးမှုကိုလည်း ဆောင်ရွက်လျက်ရှိကြောင်း သိရသည်။
ထိုသို့ ဆောင်ရွက်လျက်ရှိရာ တပ်မတော်သားများ၊ မြန်မာနိုင်ငံရဲတပ်ဖွဲ့၊ အထွေထွေအုပ်ချုပ်ရေးဦးစီးဌာန၊ သစ်တောဦးစီးဌာန၊ လယ်ယာမြေစီမံခန့်ခွဲရေးနှင့် စာရင်းအင်းဦးစီးဌာနတို့အပါအဝင် ဆက်စပ်ဦးစီးဌာနများ ပါဝင်သော ပူးပေါင်းအဖွဲ့များ၊ နယ်မြေခံပြည်သူ့စစ်အဖွဲ့ဝင်များနှင့် ဒေသခံတိုင်းရင်းသားပြည်သူများပါဝင်သော ပူးပေါင်းအဖွဲ့သည် ဒီဇင်ဘာ ၉ ရက်နှင့် ၁၀ ရက်တို့တွင် ရှမ်းပြည်နယ် (တောင်ပိုင်း) လွိုင်လင်မြို့နယ် ဆင်ခြေဖုံးကျေးရွာအုပ်စု လုံအောင်ကျေးရွာ၏ အနောက်တောင်ဘက် နှစ်မိုင်ခန့်အကွာရှိ အမြင့်နှစ်ပေခွဲ သီးပွင့်ဆဲဘိန်းခင်း ၃၅ ဧကကိုလည်းကောင်း၊ စံဖူးကျေးရွာ၏ အနောက်တောင်ဘက် နှစ်မိုင်ခန့်အကွာရှိ အမြင့်သုံးပေခွဲသီးပွင့်ဆဲ ဘိန်းခင်း ၂၅ ဧကအားလည်းကောင်း၊ တောင်နောက်ကျေးရွာ အုပ်စုတောင်နောက်ကျေးရွာ၏ အနောက်တောင်ဘက်သုံးမိုင်ခန့်အကွာရှိ အမြင့်သုံးပေ သီးပွင့်ဆဲဘိန်းခင်း ဧက ၃၀ နှင့် ကျေးရွာ၏ အနောက်ဘက်သုံးမိုင် လေးဖာလုံခန့်အကွာရှိ အမြင့်သုံးပေ သီးပွင့်ဆဲ ဘိန်းခင်း ၂၅ ဧကအားလည်းကောင်း စုစုပေါင်းဘိန်းခင်း ၁၁၅ ဧကတို့အား သွားရောက်ဖျက်ဆီးခဲ့ကြောင်းနှင့် ဘိန်းခင်းဖျက်ဆီးမှုများကို ဆက်လက်ဆောင်ရွက်သွားမည်ဖြစ်ကြောင်း သိရသည်။

ရွှေထည်နှင့် ငွေကျပ်သိန်း ၁၀၀၀လုယက်သူများကို ဖမ်းဆီးရမိ

ရန်ကုန်မြို့ လသာမြို့နယ် မဟာဗန္ဓုလလမ်းပေါ်ရှိရွှေဆိုင်တစ်ဆိုင်မှ ရွှေထည်ပစ္စည်းများနှင့် ငွေကျပ်သိန်း၁၀၀၀ လုယက်သွားသူများကို ဖမ်းဆီးရမိခဲ့ကြောင်း သိရသည်။
ဒီဇင်ဘာ ၅ ရက် နံနက်ပိုင်းက လသာမြို့နယ်မဟာဗန္ဓုလလမ်းပေါ်ရှိ ရွှေဇင်ရွှေဆိုင်တွင်ဆိုင်ဖွင့်ရန် ပစ္စည်းချနေစဉ် maskတပ်ထားသော လူနှစ်ဦး ရောက်လာကာ သေနတ်ပြ ခြိမ်းခြောက်ပြီး ရွှေထုပ်နှင့် ငွေများကို လုယက်သွားသည့်လက်ဖက်ရည်ဆိုင်ပိုင်ရှင်နှင့် အဖျော်ဆရာကို ဒီဇင်ဘာ ၉ ရက်က ဖမ်းဆီးရမိခဲ့ကြောင်း သိရသည်။
ရဲတပ်ဖွဲ့ဝင်များက အခင်းဖြစ်ပွားရာနေရာမှတစ်ဆင့် CCTV များကို လိုက်လံစစ်ဆေးရာမှ လုယက်မှု
ကျူးလွန်သူများဖြစ်သော သာကေတမြို့နယ် အမှတ်(၈)ရပ်ကွက်မှ ...လက်ဖက်ရည်ဆိုင်ပိုင်ရှင် အောင်ကိုဇင်နှင့် အဖျော်ဆရာစိုးကို၊ သက်သေခံပစ္စည်းများကို လက်ခံသိမ်းဆည်းပေးထားသော မသင်းမိုးကြူတို့ကိုအဆိုပါ လက်ဖက်ရည်ဆိုင်၌ လည်းကောင်း၊ ဒဂုံမြို့သစ်(အရှေ့ပိုင်း)မြို့နယ်နေ စည်ပင်ရေစက် မောင်းဦးသန်းထွန်းဆိုသူအား လည်းကောင်း ဖမ်းဆီးရမိခဲ့ကြောင်း သိရသည်။
၎င်းတို့အား စစ်ဆေးရာလုယက်မှုကျူးလွန်ကြောင်း ဝန်ခံထွက်ဆိုသဖြင့် သက်သေခံပစ္စည်းငွေနှင့် ရွှေထည်များ၊ ပြစ်မှုကျူးလွန်ရာ တွင် အသုံးပြုခဲ့သည့် လုပ်သေနတ်နှင့် ကျည်များကို သက်သေများရှေ့တွင် သိမ်းဆည်းပြီး ပြစ်မှုဆိုင်ရာဥပဒေအရ တရားစွဲဆိုရန် ဆောင်ရွက်လျက်ရှိကြောင်း သိရသည်။
ပြီးခဲ့သည့် ဒီဇင်ဘာ ၈ ရက်ကလည်း တာမွေမြို့နယ် တာမွေကြီး(က/ဂ)ရပ်ကွက် (၁၅၅) လမ်းရှိ
တိုက်ခန်းတစ်ခန်း ဖောက်ထွင်းခံရပြီးငွေသားကျပ် ၁၆ သိန်းနှင့် စက်ဘီး၊လက်ပ်တော့နှင့် နားကပ် စသည့်ပစ္စည်းများ ပျောက်ဆုံးမှု ဖြစ်ပွားခဲ့ကြောင်း သိရသည်။

ထိုင်းနိုင်ငံတွင် တရားမဝင် အခြေအနေရှိနေသည့် မြန်မာ၊လာအို၊ ဗီယက်နမ်နိုင်ငံသားများအတွက် ဘတ်တရားဝင်ဖွင့်

ထိုင်းနိုင်ငံတွင် တရားမဝင် အခြေအနေရှိနေသည့် မြန်မာ၊ လာအို၊ ဗီယက်နမ်နိုင်ငံသားများအားနေထိုင်အလုပ်လုပ်ခွင့်ပြုမည့် ဘတ်ခေါ် ပန်းရောင်ကတ် (Work Permit )ပေးခြင်းအစီအစဉ်ကို ဝန်ကြီးချုပ်က လက်မှတ်ရေးထိုး အတည်ပြုပြီးဖြစ်ကြောင်း ပြည်ထဲရေးဝန်ကြီးဌာနကထုတ်ပြန်ထားသည်။
မြန်မာ၊ လာအို၊ ဗီယက်နမ် နိုင်ငံသားများ၏ အလုပ်ရှင် သို့မဟုတ် အလုပ်ရှင်မှ အခွင့်အာဏာ အပ်နှင်းခြင်းခံရသော အကျိုးဆောင်ကုမ္ပဏီများသည်ဥပဒေနှင့်အညီ အလုပ်လုပ်ခွင့်လျှောက်လွှာအား တင်ပြရမည် ဖြစ်ကြောင်းသိရသည်။
ယခုနှစ် နိုဝင်ဘာ ၁၁ ရက်တွင် ကျင်းပသော အစိုးရအဖွဲ့၏ ဆုံးဖြတ်ချက်အရဖြစ်ပြီး လျှောက်လွှာ တင်သွင်းခြင်းအတွက် အခကြေးငွေများ ပေးသွင်းခြင်းကို www.ework-permit.doe.go.th တွင် ဒီဇင်ဘာ ၁၂ ရက်မှ ၂၆ ရက်အထိသတ်မှတ်ရက်အတွင်း ဆောင်ရွက်နိုင်ကြောင်း သိရသည်။
ထိုင်းနိုင်ငံတွင်၂၀၂၆ ခုနှစ် ဖေဖော်ဝါရီ ၁၃ ရက်နှင့် မတ် ၃၁ ရက်များတွင် အလုပ်လုပ်ခွင့် သက်တမ်း ကုန်မည့် မြန်မာ၊ လာအို၊ ဗီယက်နမ်ရွှေ့ပြောင်းအလုပ်သမား လူဟောင်းများအား တစ်နှစ်သက်တမ်း ထပ်တိုးပေးမည်ဟု အလုပ်သမားဝန်ကြီးဌာနက ဒီဇင်ဘာ ၃ ရက်တွင် ထုတ်ပြန်ထားသည်။

ထိုင်း နခွန်ပထုံခရိုင်ရှိ ပိတ်စဆေးဆိုးပန်းရိုက်စက်ရုံတွင် လုပ်ကိုင်နေသည့် မြန်မာအလုပ်သမား ၃၈ ဦး ကြိုတင်အသိပေးခြင်းမရှိဘဲ အလုပ်ထုတ်ခံရ

ထိုင်းနိုင်ငံ နခွန်ပထုံခရိုင်အုန်းယိုင်နယ်မြေရှိ ပိတ်စဆေးဆိုးပန်းရိုက်စက်ရုံတွင် အလုပ်လုပ်ကိုင်နေသော မြန်မာအလုပ်သမား ၃၈ ဦးအား စက်ရုံက ကြိုတင်အသိပေးခြင်းမရှိဘဲ အလုပ်ထုတ်ခဲ့သဖြင့် အခက်အခဲများ ဖြစ်ပေါ်နေကြောင်း သိရသည်။
အလုပ်ထုတ်ခံရသော မြန်မာအလုပ်သမား ၃၈ ဦးသည် အနည်းဆုံး လုပ်သက် သုံးလမှ အများဆုံးလုပ်သက် နှစ် ၂၀ ကျော်ရှိပြီး စက်ရုံပိုင်ရှင်က ၎င်းတို့ကို ကြိုတင်အသိပေးအကြောင်းကြားခြင်းမရှိဘဲ အလုပ်ထုတ်ခဲ့ခြင်းဖြစ်ကြောင်း သိရသည်။
မြန်မာအလုပ်သမားများ နစ်နာခဲ့ရမှုနှင့်ပတ်သက်ပြီး ထိုင်းရောက်မြန်မာလုပ်သားအရေး ကူညီဆောင်ပေးနေသည့် M.H.A.C မဟာမိတ်အဖွဲ့က ထိုက်သင့်သော ခံစားခွင့်များရရှိရန် လိုက်ပါကူညီဆောင်ရွက်ပေးလျက်ရှိကြောင်း သိရသည်။
စက်ရုံပိုင်ရှင်ဖြစ်သူက အလုပ်သမားများအား နစ်နာကြေး ၇၀ ရာခိုင်နှုန်းပေးချေမည်ဟုပြောဆိုကာ ၎င်းအားအလုပ်သမားကာကွယ် စောင့်ရှောက်ရုံး (စဝတ်ဒီကန်) တွင် တိုင်ကြားခြင်းမပြုရန် လာရောက်ညှိနှိုင်းခဲ့ကြောင်းသိရသည်။
သို့သော် မြန်မာအလုပ်သမားများက နစ်နာကြေး အပြည့်အဝ မပေးချေသည့် စက်ရုံပိုင်ရှင်ကို သက်ဆိုင်ရာ နယ်မြေ အလုပ်သမားကာကွယ်စောင့်ရှောက်ရေးရုံးတွင် တိုင်ကြားထားပြီး ထိုင်းဥပဒေနှင့်အညီ ဆက်လက် ဆောင်ရွက်သွားမည်ဖြစ်ကြောင်း သိရသည်။

တောင်ကိုရီးယား လေကြောင်းရန်ကာကွယ်ရေးဇုန်သို့ ရုရှားနှင့် တရုတ်စစ်လေယာဉ်များ ပျံသန်းခဲ့ဟုဆို

ရုရှားစစ်လေယာဉ် ခုနစ်စင်းနှင့်တရုတ်စစ်လေယာဉ် နှစ်စင်းတို့သည်တောင်ကိုရီးယား လေကြောင်းရန်ကာကွယ်ရေးစိစစ်ဇုန်ထဲသို့ ဝင်ရောက်ခဲ့ရာ တိုက်လေယာဉ်များ စေလွှတ်ခဲ့ရကြောင်း တောင်ကိုရီးယား စစ်ဘက်ကပြောသည်။
ရုရှားနှင့်တရုတ် စစ်လေယာဉ်များသည် ဒီဇင်ဘာ ၉ ရက် ဒေသ စံတော်ချိန် နံနက် ၁၀ နာရီခန့် တွင် ကိုရီးယားလေကြောင်းရန် ကာကွယ်ရေးစိစစ်ဇုန်သို့ ဝင်ရောက် ပျံသန်းခဲ့ခြင်းဖြစ်ကြောင်းတောင်ကိုရီးယား ပူးတွဲစစ်ဦးစီးချုပ်များအဖွဲ့က ထုတ်ပြန်သည်။
သို့သော်လေယာဉ်တစ်စင်းမျှ တောင်ကိုရီးယားလေပိုင်နက်ကို ကျူးကျော်ဝင်ရောက်ခြင်းမရှိကြောင်း ရုရှားနှင့် တရုတ်တို့ကဆိုသည်။ တောင်ကိုရီးယားကမူ အရေးပေါ်အခြေအနေများ ပေါ်လာချိန်တွင်နည်းဗျူဟာမြောက် အုပ်ချုပ်ရေးအစီအမံများ ဖော်ဆောင်ရေးအတွက် တိုက်လေယာဉ်များ စေလွှတ်ခဲ့သည်ဆို၏။
ယွန်ဟတ်သတင်းဌာန၏ အဆိုအရလေယာဉ်များသည် လေကြောင်းရန်ကာကွယ်ရေးစိစစ်ဇုန်အတွင်း တစ်နာရီကြာ ဝင်ထွက်သွား လာပျံသန်းခဲ့ကြောင်းဖော်ပြထားသည်။
တရုတ်ကာကွယ်ရေး ဝန်ကြီးဌာန၏ နောက်ပိုင်းထုတ်ပြန်ချက် တစ်ခုတွင်မူ နှစ်စဉ်ပူးပေါင်းဆောင်ရွက် မှုအစီအစဉ်အဖြစ် ရုရှားလေတပ်နှင့် လေ့ကျင့်မှုများပြုလုပ်ခဲ့သည်ဆိုသည်။ လေ့ကျင့်မှုများကို
အရှေ့တရုတ်ပင်လယ်နှင့် အနောက်ပစိဖိတ်သမုဒ္ဒရာဒေသတို့တွင် ပြုလုပ်ခဲ့ပြီးယင်း မှာ (၁၀) ကြိမ်မြောက် ပူးတွဲမဟာဗျူဟာမြောက် လေကြောင်းကင်းလှည့်လေ့ကျင့်မှုဟု ပြောသည်။
၂၀၁၉ ခုနှစ်မှစပြီး တရုတ်နှင့် ရုရှားတို့သည် ပူးတွဲလေ့ကျင့်မှုများအတွင်း ကြိုတင်အသိပေးခြင်း
မရှိဘဲ တောင်ကိုရီးယားလေကြောင်းရန်ကာကွယ်ရေးစိစစ်ဇုန်ထဲကို စစ်လေယာဉ်များ ဝင်ရောက် ပျံသန်းလေ့ရှိသည်။

အမေရိကန်လုံခြုံရေးအာမခံချက်ပေးပါက ရွေးကောက်ပွဲကျင်းပမည်ဟု ဇီလန်စကီးပြောကြား

အမေရိကန်ပြည်ထောင်စုနှင့် အခြားမဟာမိတ်များက ရွေးကောက်ပွဲလုံခြုံရေးအတွက် အာမခံ ချက်ပေးနိုင်မည်ဆိုလျှင် သုံးလအတွင်း ရွေးကောက်ပွဲများ ကျင်းပနိုင်ရန် မိမိပြင်ဆင်ထားကြောင်း ယူကရိန်းသမ္မတဇီလန်စကီးက ဒီဇင်ဘာ ၉ ရက်တွင်ထုတ်ဖော်ပြောကြားလိုက်သည်။
ရုရှားနှင့် စစ်မက်စတင်ဖြစ်ပွားခဲ့ပြီးနောက်ပိုင်း ကြေညာပြဋ္ဌာန်းထားသော စစ်အုပ်ချုပ်ရေးဥပဒေအရ စစ်ပွဲကာလအတွင်း ရွေးကောက်ပွဲများကျင်းပမှုကို ပိတ်ပင်ထားသည်။
သို့ရာတွင် ၂၀၂၄ ခုနှစ်အတွင်း သမ္မတရာထူးသက်တမ်း ကုန်ဆုံးခဲ့ပြီဖြစ်သော ယူကရိန်းသမ္မတ ဇီလန်စကီးမှာ ရွေးကောက်ပွဲများ ကျင်းပပေးရေးအတွက် အမေရိကန်သမ္မတဒေါ် နယ်ထရန့်၏
ဖိအားပေးမှုနှင့် ထပ်မံရင်ဆိုင်နေရသည်။
မိမိအနေဖြင့် ရွေးကောက်ပွဲများ ကျင်းပပေးရန် အသင့်ရှိကြောင်း၊ အမေရိကန်ပြည်ထောင်စုနှင့် ဥရောပမဟာမိတ်များက လုံခြုံရေးအာမခံချက်ပေးမည်ဆိုလျှင် နောင်ရက်ပေါင်း ၆၀ မှ ၉၀
အတွင်း ယူကရိန်းအနေဖြင့် ရွေးကောက်ပွဲ ကျင်းပပေးနိုင်ကြောင်း ယူကရိန်းသမ္မတ ဇီလန်စကီးက
သတင်းထောက်များနှင့် တွေ့ဆုံစဉ် ထုတ်ဖော်ပြောကြားခဲ့သည်။
ယူကရိန်း အစိုးရအနေဖြင့် စစ်ပွဲကိုအကြောင်းပြ၍ ရွေးကောက်ပွဲကို ရှောင်ရှားနေပုံရကြောင်း အမေရိကန်သမ္မတဒေါ်နယ်ထရန့်ကပေါ်လစ်တီကို မဂ္ဂဇင်းနှင့် ပြုလုပ်ခဲ့သော တွေ့ဆုံမေးမြန်းခန်း၌ ပြောကြားခဲ့ပြီးနောက် ယူကရိန်းသမ္မတဇီလန်စကီး၏ တုံ့ပြန်မှုပေါ်ထွက်လာခဲ့ခြင်းဖြစ်သည်။
ရုရှားနိုင်ငံက လေကြောင်းတိုက်ခိုက်မှုအကြိမ်ကြိမ်ပြုလုပ်နေချိန်၊ ယူကရိန်းပြည်သူ သန်း
ပေါင်းများစွာ စစ်ပြေးဒုက္ခသည်ဘ၀ ရောက်နေချိန်တွင် ရွေးကောက်ပွဲကျင်းပရေးကို ယူကရိန်းအစိုးရက ငြင်းပယ်ထားသည်။

နိုင်ဂျီးရီးယားစစ်ဘက်တာဝန်ရှိသူ ၁၁ ဦး ဘာကီနာဖာဆိုတွင် ခေတ္တဖမ်းဆီးခံရ

နိုင်ဂျီးရီးယားစစ်ဘက်အရာရှိ ၁၁ ဦးနှင့် ၎င်းတို့၏လေယာဉ်သည် ဘာကီနာဖာဆိုနိုင်ငံအတွင်း အရေးပေါ်ဆင်းသက်ပြီးနောက်ခေတ္တထိန်းသိမ်းခံခဲ့ရကြောင်း ဘာကီနာဖာဆိုလုံခြုံရေးသတင်းရင်းမြစ် များက ဒီဇင်ဘာ ၉ရက်တွင် ပြောကြားခဲ့သည်။
နိုင်ဂျီးရီးယား လေတပ်၏ စီ- ၁၃၀အမျိုးအစားလေယာဉ်သည် ဒီဇင်ဘာ ၈ ရက်တွင် ဘာကီနာဖာဆို၏ လေပိုင်နက်ထဲသို့ခွင့်ပြုချက်မရှိဘဲ ဝင်ရောက်ခဲ့ကြောင်း ဘာကီနာဖာဆို တာဝန်ရှိသူများက ပြောကြားထားသည်။
ဘာကီနာဖာဆို၊ မာလီနှင့် နိုင်ဂျာစစ်အစိုးရများ၏ ပူးတွဲကြေညာချက်တစ်စောင်တွင် ၎င်းတို့၏ လျင်မြန်သောစုံစမ်းစစ်ဆေးမှုအရ နိုင်ဂျီးရီးယားလေယာဉ်သည်အဖွဲ့ဝင်နိုင်ငံများ၏ လေပိုင်နက်နှင့် အချုပ်အခြာအာဏာကို ချိုးဖောက်ခြင်းဖြစ်ကြောင်းအတည်ပြုထားသည်။
လေယာဉ်အမှုထမ်းနှစ်ဦးနှင့် လိုက်ပါသူကိုးဦးစလုံးသည် နိုင်ဂျီးရီးယားစစ်ဘက်အရာရှိများဖြစ်ကြပြီး နောက်ပိုင်းတွင်လေယာဉ်ကို ဆက်လက်ပျံသန်းခွင့်ပေးခဲ့သည်။
သို့သော် နိုင်ဂျီးရီးယားလေတပ်ကမူနည်းပညာပိုင်းဆိုင်ရာ ပြဿနာကြောင့်ပေါ်တူဂီသို့ ဦးတည်နေသော အဆိုပါလေယာဉ်သည် ဘေးကင်းရေး လုပ်ထုံးလုပ်နည်းများနှင့်အညီ ဘာကီနာဖာဆိုသို့ ဆင်းသက်ခဲ့ရကြောင်း ပြောသည်။
ကြေညာချက်တွင် လေယာဉ်အမှုထမ်းများ ဘေးကင်းပြီး အိမ်ရှင်အာဏာပိုင်များထံမှ နွေးထွေးစွာ ဆက်ဆံမှုရရှိခဲ့ကြောင်း ပြောကြားထားပြီး ၎င်းတို့ကို ဖမ်းဆီးခဲ့ခြင်း ရှိ၊ မရှိ ကိုမဖော်ပြခဲ့ပေ။

သတင်းအရင်းအမြစ် ထုတ်ပြောရေးဆိုင်ရာဥပဒေ ဗီယက်နမ်လွှတ်တော် အတည်ပြု

သတင်းအရင်းအမြစ် ထုတ်ပြောရေးဆိုင်ရာဥပဒေနှင့် နိုင်ငံတော် လျှို့ဝှက်ချက် ဥပဒေများပြောင်းလဲပြင်ဆင်ရေး အစီအစဉ်ကို ဗီယက်နမ်လွှတ်တော်က ဒီဇင်ဘာ ၁၀ ရက်တွင် အတည်ပြုခဲ့ကြောင်း သိရသည်။
ဗီယက်နမ်အစိုးရ၏ သတင်းမီဒီယာဥပဒေများနှင့် နိုင်ငံတော်လျှို့ဝှက်ချက်ဥပဒေများ ထပ်မံ တင်းကျပ်မည့် အစီအစဉ်ကြောင့် ဗီယက်နမ်သတင်းသမားများအနေဖြင့် သတင်းလွတ်လပ်စွာရယူခွင့် ပိုမိုခက်ခဲ ကျပ်တည်းလာနိုင်ကြောင်းသတင်းလွတ်လပ်ခွင့် တက်ကြွလှုပ်ရှားသူများက
ဝေဖန်ထားသည်။
နယ်စည်းမခြား သတင်းထောက်များအဖွဲ့၏ကမ္ဘာ့မီဒီယာလွတ်လပ်ခွင့် အညွှန်းကိန်းတွင် နိုင်ငံ
ပေါင်း ၁၈၀ အနက် ဗီယက်နမ်နိုင်ငံမှာ အဆင့် ၁၇၃နေရာတွင် ရပ်တည်နေသော နိုင်ငံဖြစ်သည်။
ဗီယက်နမ်လွှတ်တော်က ဒီဇင်ဘာ ၁၀ ရက်တွင် အတည်ပြုခဲ့သော သတင်းအရင်းအမြစ်ထုတ်
ပြောရေးဆိုင်ရာ ဥပဒေသစ်အရ မည်သည့်အမှုအခင်းမျိုးတွင်မဆို သက်ဆိုင်ရာတာဝန်ရှိသူများက
မေတ္တာရပ်ခံပါက သတင်းသမားများအနေဖြင့်၎င်းတို့ သတင်းရယူရာ သတင်းအရင်းအမြစ်များကို
ဖွင့်ပြောရမည်ဖြစ်သည်။
လာမည့်နှစ် ဇူလိုင်လတွင် စတင်အာဏာသက်ဝင်မည့် အထက်ပါဥပဒေ၌ သတင်းအရင်း
အမြစ်များ ဖွင့်ပြောရေးအတွက် အမိန့်ထုတ်ပြန်ခွင့်ကို ပြည်သူ့လုံခြုံရေးဝန်ကြီးဌာနနှင့် ရဲတပ်ဖွဲ့
တို့ကို အပ်နှင်းထားသည်။
လက်ရှိ မီဒီယာဥပဒေများအရ အမှုအခင်းကြီးများကို စုံစမ်းစစ်ဆေးရာတွင်သာ သတင်းအရင်း
အမြစ်များ ထုတ်ပြောရေးကို တရားသူကြီးများကတောင်းဆိုနိုင်သည်။