စားအုန်းဆီ အခြေခံလက်ကားရည်ညွှန်းဈေး ထပ်မံကျဆင်း၊ တစ်ပိဿာ ၇,၃၅၄ ကျပ် သတ်မှတ်
ယခုတစ်ပတ် ဇွန်လ ၅ ရက်မှ ၁၁ ရက်အထိ အကျုံးဝင်မည့် ရန်ကုန်အထိုင် စားအုန်းဆီ အခြေခံလက်ကားရည်ညွှန်းဈေးနှုန်းကို တစ်ပိဿာလျှင် ၇,၃၅၄ ကျပ် သတ်မှတ်ထားကြောင်း စားအုန်းဆီတင်သွင်း၊ သိုလှောင်၊ ဖြန့်ဖြူးခြင်းလုပ်ငန်း ကြီးကြပ်ရေးကော်မတီက ဇွန် ၅ ရက်တွင် ထုတ်ပြန်ကြေညာသည်။
အဆိုပါဈေးနှုန်းမှာ ယခင်တစ်ပတ်က သတ်မှတ်ထားသည့် တစ်ပိဿာ ၇,၃၈၇ ကျပ်နှင့် နှိုင်းယှဉ်ပါက ၃၃ ကျပ် လျော့ကျလာခြင်းဖြစ်သည်။
၂၀၂၆ ခုနှစ်အတွင်း စားအုန်းဆီ အခြေခံလက်ကားရည်ညွှန်းဈေးနှုန်းများမှာ ဇန်နဝါရီလတွင် တစ်ပိဿာလျှင် ကျပ် ၆,၄၀၀ ဝန်းကျင်၊ ဖေဖော်ဝါရီလတွင် ကျပ် ၆,၆၀၀ ဝန်းကျင်၊ မတ်လတွင် ကျပ် ၆,၆၄၀ ဝန်းကျင် ရှိခဲ့ပြီး ဧပြီလအတွင်း ကျပ် ၇,၂၈၅ အထိ မြင့်တက်ခဲ့သည်။ ထို့နောက် မေလအစပိုင်းတွင် ကျပ် ၇,၄၀၀ ကျော်အထိ ရောက်ရှိခဲ့သော်လည်း မေလ နောက်ဆုံးပတ်မှစတင်၍ ဈေးနှုန်းအနည်းငယ် ပြန်လည်ကျဆင်းလာခဲ့ခြင်းဖြစ်သည်။
စားအုန်းဆီတင်သွင်းရာတွင် တင်ပို့သည့် နိုင်ငံများ၏ ဈေးနှုန်းအတက်အကျပေါ် မူတည်၍ ပြည်တွင်းဈေးကွက်အတွင်း သင့်တင့်မျှတသော ဈေးနှုန်းများ ဖြစ်ပေါ်စေရေးအတွက် သက်ဆိုင်ရာအဖွဲ့အစည်းများက ထိန်းကျောင်းဆောင်ရွက်လျက်ရှိကြောင်း သိရသည်။
စားအုန်းဆီ အခြေခံလက်ကားရည်ညွှန်းဈေးနှုန်းများကို အပတ်စဉ် သောကြာနေ့တိုင်း ထုတ်ပြန်သွားမည်ဖြစ်ပြီး စားသုံးသူများအနေဖြင့် စားသုံးသူရေးရာဦးစီးဌာန၏ ဝက်ဘ်ဆိုက်တွင် ဝင်ရောက်ကြည့်ရှုနိုင်ကြောင်း ထုတ်ပြန်ချက်တွင် ဖော်ပြထားသည်။
ထို့ပြင် စားအုန်းဆီများကို ထုတ်ပြန်ထားသည့် ရည်ညွှန်းဈေးနှုန်းထက် ပိုမိုမြှင့်တင်ရောင်းချခြင်း၊ ဈေးကစားရန် ရည်ရွယ်၍ သိုလှောင်ခြင်းနှင့် အခြားမသမာသည့် လုပ်ဆောင်မှုများ ပြုလုပ်ပါက အရေးကြီးကုန်စည်နှင့် ဝန်ဆောင်မှုဥပဒေအရ အရေးယူဆောင်ရွက်သွားမည်ဖြစ်ကြောင်း စားသုံးသူရေးရာဦးစီးဌာနက သတိပေးထားသည်။
