ယခုပညာသင်နှစ်တွင်ကျောင်းအပ်နှံသည့် ကျောင်း သား/သူဦးရေ ၅ ဒသမ ၈ သန်းနီးပါးရှိ၊
ယခင်နှစ်ထက် ကျောင်းအပ်နှံသူ သုံးသိန်းကျော်ပိုမိုများပြား

ယခု ၂၀၂၆-၂၀၂၇ ပညာသင်နှစ်တွင် တစ်နိုင်ငံလုံးအ တိုင်းအတာဖြင့် ကျောင်းအပ်နှံသည့် ကျောင်းသား/သူ (၅,၇၉၈,၇၂၅) ဦးရှိကြောင်း ပညာရေးဝန်ကြီးဌာန၊ အခြေခံပညာဦးစီးဌာနထံမှ သိရသည်။
ကချင်ပြည်နယ်တွင် (၁၉၁,၃၀၇) ဦး၊ ကယားပြည်နယ်တွင် (၁၁,၈၉၂) ဦး၊ ကရင်ပြည်နယ်တွင် (၂၁၈,၅၆၀) ဦး၊ ချင်းပြည်နယ်တွင် (၂၃,၀၁၀) ဦး၊ စစ်ကိုင်းတိုင်းတွင် (၂၂၅,၃၇၄) ဦး၊ တနင်္သာရီတိုင်းတွင် (၂၀၅,၈၉၀) ဦး၊ ပဲခူးတိုင်း (အရှေ့) တွင် (၄၇၈,၆၉၀) ဦး၊ ပဲခူးတိုင်း (အနောက်) တွင် (၂၆၃,၄၀၃) ဦး၊ မကွေးတိုင်းတွင် (၄၁၆,၆၉၁) ဦး ရှိကြောင်း သိရသည်။
ထို့ပြင် မန္တလေးတိုင်းတွင် (၇၈၄,၃၅၈) ဦး၊ မွန်ပြည်နယ်တွင် (၃၃၇,၃၂၈) ဦး၊ ရခိုင်ပြည်နယ်တွင် (၂၄,၃၈၁) ဦး၊ ရန်ကုန်တိုင်းတွင် (၉၄၉,၄၄၁) ဦး၊ ရှမ်းပြည်နယ် (တောင်ပိုင်း) တွင် (၃၂၇,၀၈၉) ဦး၊ ရှမ်းပြည်နယ်(မြောက်ပိုင်း) တွင် (၁၁၇,၅၆၁) ဦး၊ ရှမ်းပြည်နယ် (အရှေ့ပိုင်း) တွင် (၈၆,၇၀၇) ဦး၊ ဧရာဝတီတိုင်းတွင် (၉၅၀,၁၈၁) ဦး၊ နေပြည်တော်တွင် (၁၈၆,၈၆၂) ဦး ရှိခဲ့ကြောင်း သိရသည်။
ထို့နောက် တစ်နိုင်ငံလုံးအတိုင်းအတာဖြင့် ၂၀၂၆- ၂၀၂၇ ပညာသင်နှစ်တွင် ကျောင်းအပ်နှံသည့် ကျောင်း သား/သူ (၅,၇၉၈,၇၂၅) ဦး ရှိခဲ့ရာ ယမန်နှစ် ၂၀၂၅- ၂၀၂၆ ပညာသင်နှစ်က (၅,၄၇၁,၃၁၆) ဦး သာရှိခဲ့၍ ယခုပညာသင်နှစ်တွင် ကျောင်းအပ်နှံသူ ၃၂၇၄၀၉ ဦး ပိုမိုများပြားခဲ့ကြောင်း သိရသည်။
အဆိုပါ ကျောင်းအပ်နှံသည့် ကျောင်းသား/သူများအား နိုင်ငံတော်အစိုးရမှာ ကျောင်းသုံးဖတ်စာအုပ်များ၊ စာရေးကိရိယာများ၊ ကျောင်းဝတ်စုံများကို အခမဲ့ထောက်ပံ့ပေးခဲ့သည့်နည်းတူ ကျောင်းအပ်နှံရာတွင်လည်း အခမဲ့အပ်နှံခွင့်ပြုပေးခဲ့ကြောင်း သိရသည်။

နိုင်ငံတော်သမ္မတ ဦးမင်းအောင်လှိုင် မွမ်ဘိုင်းမြို့သို့ရောက်ရှိ

အိန္ဒိယနိုင်ငံသို့ တရားဝင်ခရီးစဥ်ရောက်ရှိနေသော နိုင်ငံတော်သမ္မတ ဦးမင်းအောင်လှိုင်သည် ယနေ့ ဇွန် ၂ ရက်နံနက်ပိုင်းက နယူးဒေလီမြို့မှတစ်ဆင့် မွမ်ဘိုင်းမြို့သို့ ဆက်လက်ထွက်ခွာခဲ့သည်။
မွမ်ဘိုင်းမြို့၊ Chhatrapati Shivaji Maharaj International Airport သို့ရောက်ရှိလာသော နိုင်ငံတော်သမ္မတအား မဟာရာ့ရှ်ထရာပြည်နယ်မှတာဝန်ရှိသူများ၊ ကော်လ်ကတ္တားမြို့၊ မြန်မာကောင်စစ်ဝန်ချုပ်နှင့် ဝန်ထမ်းများက ဂုဏ်ပြုကြိုဆိုခဲ့ကြသည်။

မင်းဘူး (စကု) မြို့နယ်ရှိ အခြေခံပညာစာသင်ကျောင်း (၁၅၈) ကျောင်းတွင် ပထမဆုံးနေ့၌ ကျောင်းသား/သူ (၁၅,၀၀၀) ဦး ခန့်စတင်တက်ရောက်

မကွေးတိုင်း၊ မင်းဘူး (စကု) မြို့နယ်ရှိ အခြေခံပညာစာသင်ကျောင်း (၁၅၈) ကျောင်းတွင် ၂၀၂၆-၂၀၂၇ ပညာသင်နှစ်အတွက် ပထမဆုံးစတင်ဖွင့်လှစ်သည့် ဇွန် ၁ ရက်၌ ကျောင်းသား/သူ (၁၅,၀၀၀) ဦးခန့် စတင်တက်ရောက်လျက်ရှိကြောင်း သိရသည်။
မြို့နယ်အတွင်း၌ အခြေခံပညာကျောင်း (၁၄၉) ကျောင်း၊ ဘုန်းတော်ကြီးသင်ပညာရေးကျောင်း (၆) ကျောင်းနှင့် ကိုယ်ပိုင်ကျောင်း (၃) ကျောင်းတွင် ဇွန် ၁ ရက်အထိ ကျောင်းသား/သူ (၂၈,၁၅၉) ဦး အပ်နှံခဲ့ကြပြီး ပထမဆုံးကျောင်းဖွင့်သည့်နေ့တွင် ကျောင်းသား/သူ (၁၄,၀၇၃) ဦး စတင်တက်ရောက်ခဲ့ကြောင်း သိရသည်။

နိုင်ငံတော်သမ္မတ ဦးမင်းအောင်လှိုင်ထံ Reserve Bank of India ၏ ဥက္ကဋ္ဌက လာရောက်ဂါရဝပြုတွေ့ဆုံ

အိန္ဒိယနိုင်ငံသို့ တရားဝင်ခရီးစဥ်ရောက်ရှိနေသည့် နိုင်ငံတော်သမ္မတ ဦးမင်းအောင်လှိုင်ထံ Reserve Bank of India ၏ ဥက္ကဋ္ဌ (Governor) H.E. Shri. Sanjay က ယနေ့ ဇွန် ၂ ရက်နံနက်ပိုင်းက လာရောက်ဂါရဝပြုတွေ့ဆုံပြီး နှစ်နိုင်ငံ ဘဏ်ကိစ္စများနှင့်ပတ်သက်၍ ဆွေးနွေးခဲ့ကြသည်။

သီပေါမြို့နယ်တွင် လျှပ်စစ်မီးမရသည်မှာ သုံးနှစ် နီးပါးရှိပြီဖြစ်၊ မည်သည့်အချိန် မီးရနိုင်မည်လည်း သီပေါကိုယ်စားလှယ် မေးခွန်းထုတ်

သီပေါမြိုနယ်တွင် လျှပ်စစ်မီး မည်သည့်အချိန်မှာ ရရှိနိုင်မည့် အခြေအနေနှင့်ပတ်သက်ပြီး
သီပေါမြို့နယ် ပြည်သူလွှတ်တော်ကိုယ်စားလှယ် ဦးကောင်းထက်စံက ယနေ့ တတိယအကြိမ် ပြည်သူ့လွှတ်တော် ဒုတိယပုံမှန်အစည်းဝေး ပထမနေ့တွင် မေးခွန်းမေးမြန်းခဲ့ခြင်း ဖြစ်သည်။
“၂၀၂၃ ကစပြီး နယ်မြေမတည်ငြိမ်မှုနဲ့ ပြည်တွင်း ပဋိပက္ခဖြစ်ပွားခဲ့တယ်။ လျှပ်စစ်ဓါတ်အားလည်း ပြတ်တောက်ခဲ့ရပါတယ်၊ လျှပ်စစ်မီးမရရှိတာဟာ သုံးနှစ်နီးပါး ရှိပြီးဖြစ်ပါတယ်။ မီးမရတော့တာကြောင့် ဒေသတွင်းမှာ ကျန်းမာရေး၊ ပညာရေး ဆက်သွယ်ရေးတွေမှာ အင်မတန် ခက်ခဲခဲ့တယ်” ဟု မေးခွန်းမေးမြန်းစဉ် ပြည်သူလွှတ်တော်ကိုယ်စားလှယ် ဦးကောင်းထက်စံက ထည့်သွင်းပြောကြားခဲ့ခြင်းဖြစ်သည်။
ထိုပြင် လျှပ်စစ်မီးမရရှိခြင်းကြောင့် သီပေါမြို့နယ်တွင် ဖုန်းပြောနိုင်ရန် တစ်ရက်ကို ကျပ်ငွေ သိန်း ၁၁၀ ခန့် ဆီဖိုးကုန်ကျနေကြောင်းလည်း ပြောကြားခဲ့သည်။
“ဆိုလာစနစ်ကို အစားထိုးသုံးစွဲနေရတယ်။ တချို့က ဓာတ်ဆီသုံးပြီး မီးစက်တွေ အသုံးပြုနေရတယ်၊ ဆီ ခွဲတမ်းကမရတော့ တစ်လီတာကို ကျပ် ၁၂၀၀၀ ကနေ ၂၅၀၀၀ အထိ ပေါက်နေပါတယ်။ ကျွန်တော်ကိုယ်တိုင် တစ်လီတာ ၁၂၀၀၀ ပေးပြီး နေပြည်တော်ကို လာခဲ့ရတယ်။ ဒေသလိုအပ်ချက်ကို တင်ပြခြင်းဖြစ်ပါတယ်’’ ဟုလည်း ပြည်သူလွှတ်တော်ကိုယ်စားလှယ် ဦးကောင်းထက်စံက ဆက်လက်ပြောကြားခဲ့သည်။
ထိုကြောင့် သီပေါမြို့နယ်အတွက် လျှပ်စစ်မီးကိစ္စက အလွန်အရေးကြီးပြီး မည်သည့်အချိန်တွင် မည်သို့ပေးမည်ကို သိရှိလိုကြောင်း မေးမြန်းခဲ့ခြင်းဖြစ်ကြောင်း သိရသည်။
သီပေါမြို့ကို ဓါတ်အားပြန်လည်ပေးနိုင်ရေး ကူညီစောင့်ရွက်ပေးရန် ဝန်ကြီးဌာနက အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေး ကော်မတီ ကို ၂၀၂၆ မတ်လ ၂၀ ရက်နေ့က တင်ပြထားကြောင်း၊ ညှိနှိုင်းမှုများ ဆောင်ရွက်ပြီးစီးပါက သီပေါမြို့နယ် ၁၁ ရပ်ကွက် ဓါတ်အားဖြန့်ဖြူးပေးနိုင်မည်ဖြစ်ကြောင်း၊ ကျေးရွာများကို ဖြန့်ဖြူးနိုင်ရန် ကျေးရွာများတွင်ရှိသည့် ဓါတ်အားလိုင်းနှင့် ထရန်စဖော်မာ ပျက်ဆီးခြင်းကို လတ်တလောမှာ စစ်ဆေးနိုင်ခြင်းမရှိသေးကြောင်း၊ နယ်မြေအခြေအနေအရ ဆက်လက်ဆောင်ရွက်မည်ဖြစ်ကြောင်း လျှပ်စစ်နှင့်စွမ်းအင်ဝန်ကြီးဌာန ဒုတိယဝန်ကြီး ဦးအေးကျော် က ပြန်လည်ဖြေကြားခဲ့ကြောင်း သိရသည်။

ဂုတ်ထိပ် တံတားကြီး၏ ရှုခင်းကြည့်ရထားခရီးစဉ်အား ခရီးသွားများ ပိုမိုသိရှိနိုင်ရန် ဆောင်ရွက်စေလိုကြောင်း ဒုဝန်ကြီး ပြော

ဂုတ်ထိပ် တံတားကြီး၏ ရှုခင်းကြည့်ရထားခရီးစဉ်အား ခရီးသွားများ ပိုမိုသိရှိနိုင်ရန်၊ ဧည့်သည်များပိုမိုလာရောက်လည်ပတ်နိုင်ရန် ဖြစ်နိုင်သမျှ ဘက်ပေါင်းစုံ/နည်းလမ်း ပေါင်းစုံဖြင့်ကြော်ငြာပေးရန် လိုအပ်ကြောင်း ဟိုတယ်၊
ခရီးသွားလာရေးနှင့် ယဉ်ကျေးမှုဝန်ကြီးဌာနဒုတိယဝန်ကြီး ဦးဖြိုးဇော်စိုး က ပြောသည်။
ဒုတိယဝန်ကြီးသည် ပြင်ဦးလွင်မြို့ရှိ ခရီးသွားဆွဲဆောင်ရာနေရာများသို့ သွားရောက်ကြည့်ရှုစစ်ဆေးစဉ် ပြောကြားခြင်း ဖြစ်သည်။
ထို့အပြင် ခရီးစဉ်တစ်လျှောက်ပတ်ဝန်းကျင် သန့်ရှင်းသာယာလှပရေး၊ စိမ်းလန်းစိုပြေရေးနှင့် အမှိုက်ကင်းစင် နေရာတစ်ခုဖြစ်အောင်ဆောင်ရွက်ကြပြီး ရထားလမ်းကြံ့ခိုင်မှုရှိမရှိ အစဉ်အမြဲစစ်ဆေးခြင်း၊ ဘေးအန္တရာယ်ကင်းရှင်းအောင်ဆောင်ရွက်ရေးတို့ကို တာဝန်ရှိသူများအား လမ်းညွှန်မှာကြားခဲ့သည်။
နှစ်ပေါင်း (၁၂၀) ကျော် သက်တမ်းရှိပြီဖြစ်သော သမိုင်းဝင် ဂုတ်ထိပ်တံတားကြီးသည် ရှမ်းပြည်နယ်မြောက်ပိုင်း နောင်ချိုနှင့် ကျောက်မဲကြား၊ မန္တလေး-လားရှိး ရထားလမ်းပေါ်ရှိနောင်ချိုဘူတာအလွန် ခုနစ်မိုင်ခန့် အကွာတွင် တည်ရှိသည်။
ဂုတ်ထိပ်တံတားကြီးသည် အခြားရထားလမ်းများတွင် အသုံးပြုသော တံတားများကဲ့သို မြစ်ချောင်းများကိုဖြတ်ကျော်တည်ဆောက်ထားခြင်းမျိုးမဟုတ်ဘဲ မီးရထားမိုင်တိုင်အမှတ် (၄၆၃/၀-၉) တွင်ရှိသော ကျောက်ဂူကြီးအပေါ်သိုဖြတ်၍ တောင်ထိပ် ၂ ခုကို ဆက်သွယ်တည်ဆောက်ထားခြင်းလည်း ဖြစ်သည်။
ဂုတ်ထိပ်တံတားကြီးကို လန်ဒန်မြိုရှိ Sir A.M.R Rendel & Co., ကုမ္ပဏီက ပုံစံရေးဆွဲခဲ့ပြီး အမေရိကန် ပြည်ထောင်စု Pennsylvania & Maryland Bridge and Construction Co., ကုမ္ပဏီက တာဝန်ယူ တည်ဆောက်ခဲ့သည်။
တည်ဆောက်မှုများကို ၁၈၉၉ ခုနှစ်အတွင်း စတင်ခဲ့ကာ ၁၉ဝဝ ပြည့်နှစ်တွင် ပြီးစီးခဲ့ပြီး တံတားကြီးကို ၁၂၀ ပေ ခန်းဖွင့် (၁၀) ခု၊ ၆၀ ပေ ခန်းဖွင့် (၇) ခု၊ ၄၀ ပေ ခန်းဖွင့် (၁၆) ခုနှင့် သံမဏိတိုင် (၁၆) တိုင်တို့ဖြင့် တည်ဆောက်ထားသည်။
အမြင့်ဆုံးတိုင်မှာ ၃၂၀ ပေ မြင့်ပြီး အနိမ့်ဆုံးတိုင်မှာ ၄၅ ပေ မြင့်ပြီး တံတားအရှည်သည် ၂၂၆၀ ပေရှိ၍ သံမဏိပေါင်များ အသုံးပြုထားသော Steel Trestle Bridge ဖြစ်ကာ အဆိုပါတံတားကို တည်ဆောက်ရန် သံမဏိတန်ချိန် ၄,၃၁၁ တန်နှင့် သံမှို ၁ သန်းကို သုံးစွဲထားကြောင်းလည်း သိရသည်

ဂန့်ဂေါမြို့နယ်၌ လေပြင်းအန္တရာယ်ကြိုတင်ကာကွယ်ရေးအသိပညာပေး

မကွေးတိုင်း၊ ဂန့်ဂေါမြို့နယ်၌ လေပြင်းဘေးအန္တရာယ်ကြိုတင်ကာကွယ်ရေးအတွက် အသိပညာပေးခြင်းနှင့် လက်ကမ်းစာစောင်ဖြန့်ဝေခြင်းတို့ကို ယနေ့ ဇွန် ၂ ရက်နံနက်ပိုင်းကပြုလုပ်ခဲ့ကြောင်း သိရသည်။
ခရိုင်ဘေးအန္တရာယ်ဆိုင်ရာစီမံခန့်ခွဲမှုဦးစီးဌာန၊ မြို့နယ်ထွေအုပ်နှင့် မြို့နယ်မီးသတ်တပ်ဖွဲ့ဝင်များက ဂန့်ဂေါမြို့၊ စည်ပင်သာယာရပ်ကွက်နှင့် မြို့မရပ်ကွက်တို့ရှိ လူစည်ကားရာလမ်းဆုံနေရာများတွင် အသိပညာပေးခြင်းများပြုလုပ်ခဲ့ကြောင်း သိရသည်။
နွေကြိုကာလ၊ နွေကာလနှင့် မိုးကြိုကာလများတွင်ဖြစ်ပေါ်နိုင်သည့် လေပြင်းဘေးအတွက်ကြိုတင်ပြင်ဆင်ရမည့်အချက်များ၊ လေပြင်းတိုက်ခတ်နေစဉ်သတိပြုလိုက်နာရမည့်အချက်များ၊ လေပြင်းတိုက်ခတ်စဉ် မိုးသီးကြွေခြင်း၊ မိုးထစ်ချုန်းခြင်းဖြစ်ပေါ်ပါက သတိပြုလိုက်နာရမည့်အချက်များ၊ လေပြင်းတိုက်ခတ်ပြီးနောက်ဆောင်ရွက်ရမည့်အချက်များနှင့် သဘာဝဘေး အန္တရာယ်ကြုံတွေ့ပါက ဆက်သွယ်ရမည့်ဖုန်းနံပတ်များကိုအသိပညာပေးခဲ့ကာ လေပြင်းဘေးအသိပညာပေးလက်ကမ်းစာစောင်(၂၀၀)ကိုလည အခမဲ့ဖြန့်ဝေပေးခဲ့ကြကြောင်း သိရသည်။

ထောက်ကြန့်တွင် ယာဉ်မောင်းလိုင်စင်စစ်ဆေးရေးရုံးခွဲသစ် ဇွန်လ ၈ ရက်၌ စတင်ဖွင့်လှစ်မည်

ရန်ကုန်မြို့၊ ထောက်ကြန့်တွင် ယာဉ်မောင်းလိုင်စင်စစ်ဆေးရေးရုံးခွဲတစ်ခုကို လာမည့် ဇွန်လ ၈ ရက်နေ့မှ စတင်ကာ တိုးချဲ့ဖွင့်လှစ်ပေးသွားမည်ဖြစ်သည်။
ရန်ကုန်တိုင်းဒေသကြီးအတွင်း ယာဉ်မောင်းလိုင်စင် ဖြေဆိုလိုသူများအတွက် ဝန်ဆောင်မှုများ ပိုမိုမြန်ဆန်ချောမွေ့စေရန် ရည်ရွယ်၍ ထိုသို့ စီစဉ်ခဲ့ခြင်း ဖြစ်သည်။
လက်ရှိတွင် ရန်ကုန်တိုင်းဒေသကြီးရုံးခွဲ (ရွာသာကြီး) ၌ Online Booking စနစ်ဖြင့် ယာဉ်မောင်းလိုင်စင် စစ်ဆေးထုတ်ပေးခြင်းလုပ်ငန်းများကို ဆောင်ရွက်ပေးလျက်ရှိသော်လည်း ယခုအခါ လာရောက်ဖြေဆိုသူ ဦးရေ အဆမတန် များပြားလာသည်ဟုလည်း ဆိုသည်။
ထို့ကြောင့် ပြည်သူများ အချိန်ကုန်သက်သာစေရန် ယခုကဲ့သို့ ရုံးခွဲသစ်ကို တိုးချဲ့ဖွင့်လှစ်ပေးရခြင်းဖြစ်ကြောင်း ထုတ်ပြန်ချက်တွင် ဖော်ပြထားသည်။
ထို့အတွက် ယာဉ်မောင်းလိုင်စင် ဖြေဆိုလိုသည့် မိဘပြည်သူများအနေဖြင့် မိမိတို့နှင့် နီးစပ်ရာရုံးကို ရွေးချယ်ကာ ကုန်းလမ်းပို့ဆောင်ရေးညွှန်ကြားမှုဦးစီးဌာန၏ တရားဝင်ဝက်ဘ်ဆိုက်ဖြစ်သော www.rtad.gov.mm တွင် Online Booking ရက်ချိန်း ကြိုတင်ရယူ၍ လွယ်ကူလျင်မြန်စွာ သွားရောက်ဖြေဆိုနိုင်ပြီဖြစ်ကြောင်း အသိပေးကြေညာထားသည်။

ဂျဝါဟာလာနေရူးဆိပ်ကမ်းကို နိုင်ငံတော်သမ္မတ ဦးမင်းအောင်လှိုင် ကြည့်ရှုလေ့လာ

နိုင်ငံတော်သမ္မတ ဦးမင်ူအောင်လှိုင်သည် ယနေ့ ဇွန် ၂ ရက်မွန်းလွဲပိုင်းက အိန္ဒိယနိုင်ငံ၊ မွမ်ဘိုင်းမြို့ရှိ ဂျဝါဟာ လာနေရူးဆိပ်ကမ်း၌ လုပ်ငန်းဆောင်ရွက်နေမှုများကိုကြည့်ရှုလေ့လာခဲ့သည်။

အကြားအာရုံချို့ယွင်းအားနည်းသည့် ကလေးများအား လည်း ကျောင်းအပ်လက်ခံဆောင်ရွက်ပေးလျက်ရှိ

နားမကြားသော ကလေးများကျောင်း (ရန်ကုန်) တွင် အကြားအာရုံချို့ယွင်းအားနည်းသည့် ကလေးများအား လည်း ကျောင်းအပ်လက်ခံဆောင်ရွက်ပေးလျက်ရှိသည်။
နားမကြားသော ကလေးများကျောင်း (ရန်ကုန်)သည်လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန၊ လူမှုဝန်ထမ်းဦးစီးဌာန လက်အောက်၌ ရှိသည်။
၂၀၂၆-၂၀၂၇ ပညာသင်နှစ်အတွက် အကြားအာရုံချို့ယွင်းအားနည်းသည့် ကျောင်းသား/သူလေးများအား ကျောင်းအပ်လက်ခံခြင်းများ ဆောင်ရွက်ပေးလျက်ရှိနေခြင်းလည်း ဖြစ်သည်။
ထိုကဲ့သို့ အကြားအာရုံချို့ယွင်းအားနည်းသည့် ကျောင်းသား/သူလေးများအား ကျောင်းအပ်လက်ခံခြင်းများ ဆောင်ရွက်ပေးရာတွင် လာ‌ရောက်အပ်နှံကြသည့် ကျောင်းသား/သူများအနေဖြင့် အကြားအာရုံချို့ယွင်းအားနည်းသူ ဖြစ်ရမည်ဖြစ်ပြီး အသက်အားဖြင့် အသက် (၆) နှစ်မှ (၁၈) နှစ်အတွင်းရှိသူဖြစ်ရမည်ဖြစ်သည်။
ထို့အတူ အကြားအာရုံချို့ယွင်းအားနည်းမှုမှလွဲ၍ ကျန်းမာရေးကောင်းမွန်သူဖြစ်ရမည်ဖြစ်ကြောင်း၊ စာပေနှင့် အသက်မွေးဝမ်းကျောင်းပညာများကို သင်ယူလိုစိတ်ရှိသူ ဖြစ်ရမည်ဖြစ်သည်။
အိမ်ထောင်မရှိဖူးသူ (လူပျို/အပျို) ဖြစ်ရမည်ဖြစ်ကာ ကျား/မ၊ လူမျိုးနှင့် ကိုးကွယ်ရာဘာသာမရွေး လျှောက်ထားနိုင်သည်ဖြစ်ပြီး ကျောင်းအပ်နှံပါက မိဘ (သို့မဟုတ်) အုပ်ထိန်းသူကိုယ်တိုင် လာရောက်အပ်နှံရမည်ဖြစ်သည်။
ကျောင်းအပ်နှံရာတွင်လည်း မိဘ (သို့မဟုတ်) အုပ်ထိန်းသူများအနေဖြင့် ကလေး၏ ပတ်စ်ပို့ဓာတ်ပုံ (၄) ပုံ ၊ မွေးစာရင်းမူရင်းနှင့် မိတ္တူ၊ မိဘနှစ်ဦးမှတ်ပုံတင်မူရင်းနှင့် မိတ္တူ၊ အိမ်ထောင်စုဇယား မူရင်းနှင့် မိတ္တူ၊ သက်ဆိုင်ရာရပ်ကွက်အုပ်ချုပ်ရေးမှူး၏ ရပ်ကွက်တွင်နေထိုင်ကြောင်းထောက်ခံချက်၊ သက်ဆိုင်ရာမြို့နယ်ကျန်းမာရေးဌာန၏ ကူးစက်ရောဂါကင်းရှင်းကြောင်း ထောက်ခံချက်နှင့် အကြားအာရုံချို့ယွင်းမှုတိုင်းတာစစ်ဆေးပြီးသည့် နားကြားနှုန်း (Audiograph d စာရွက်စာတမ်းတို့ လိုအပ်မည်ဖြစ်ကြောင်း သိရသည်။
ကျောင်းအပ်နှံမည့်သူများအနေဖြင့် လှူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန၊ လူမှုဝန်ထမ်းဦးစီးဌာန၊ နားမကြားသောကလေးများကျောင်း၊ အမှတ်-၃၄၊ F, G၊ အိုးစု (၃) လမ်း၊ မေတ္တာညွန့်ရပ်ကွက်၊ တာမွေမြို့နယ်၊ ရန်ကုန်မြို့သို့လည်းကောင်း တိုက်ရိုက်ဖြစ်စေ၊ တိုင်းဒေသကြီး/ပြည်နယ်များရှိ လူမှုဝန်ထမ်းရုံးများမှတစ်ဆင့်ဖြစ်စေ စုံစမ်းမေးမြန်းနိုင်သည်။
ထို့အပြင် စာပေပညာနှင့် အသက်မွေးဝမ်းကျောင်းပညာရပ်တက်ရောက်ခွင့်ရရှိပါက သွားလာရေးခက်ခဲသောဒေသများမှ နားမကြားသော ကျောင်းသား/သူများအတွက် စားသောက်နေထိုင်ရေးကို နိုင်ငံတော်က တာဝန်ယူမည်ဖြစ်ပြီး ကျောင်းဝင်ကြေးနှင့် ကျောင်းလခပေးရန်မလိုအပ်ကြောင်း သိရသည်။