ဝေဖန်သံတွေ ဆူညံလာတဲ့ EV ကားဂယက်နဲ့ ပြည်တွင်းကားဈေးကွက် အရောင်းအဝယ်အေးနေပြန်
စက်တင်ဘာ ၂ - ၂ဝ၂၅
KKO(VOM)
အခုတလောမှာ ပြည်တွင်းကားဈေးကွက်အတွင်းမှာ EV ကားနဲ့ ပတ်သက်လို့ ဝေဖန်သံအချို့စီစီညံညံပြန်လည်ထွက်ပေါ်လာပေမယ့် လက်ရှိမှာတော့ EV ကားတွေအပါအဝင် ပြည်တွင်းကားဈေးကွက်ဟာ အရောင်းအဝယ်အေးနေတယ်လို့ကားလောကအသိုင်း အဝိုင်းနဲ့ နီးစပ်သူတွေထံကနေ သိရပါတယ်။
လက်ရှိမှာတော့ပြည်တွင်းကားဈေးကွက်မှာ ဝယ်လက်ပါးနေလို့ တချို့အမြင့်ပိုင်းကားတွေကိုတောင်ဈေးလျော့ရောင်းလာကြပြီးအရောင်းအဝယ်ကလည်းပုံမှန်အနေအထားမှာပဲရှိနေတယ်လို့ ကားလောကသားတွေက ပြောပါတယ်။
"ကားတွေက အခုတလောအရောင်းအဝယ်အေးနေတယ်လို့ပဲပြောရမယ်၊ ဈေးကွက်မှာလည်းဈေးတန်းကအေးနေတယ်။ သိပ်ပြီးထူးခြားတာမျိုးမရှိဘူး။ အခုကဘာဖြစ်လဲဆိုတော့ ရွေးကောက်ပွဲကရှိနေပြန်တယ်။ နောက်ပြည် တွင်းမှာထုတ်တဲ့ SKD/CKD တရုတ်ကားတွေဝင်လာတယ်။ အဲတော့ဈေးကွက်မှာရှိနေတဲ့ တချို့ကားတွေ ဈေးတန်းနည်းနည်းဆင်းတယ်။ နောက် EV ကလည်း ဈေးကွက်မှာ နေရာရဖို့အတင်းတိုးလာတယ်။ လူတွေကလည်း ဘာဖြစ်လဲဆိုတော့ ရွေးကောက်ပွဲအပြီး ကားနဲ့ပတ်သက်တဲ့ ပေါ်လစီတွေပြောင်းလာမလားဆိုပြီး စောင့်ကြည့်နေတာတွေရှိတယ်။ အဲဒီတော့ကားဈေးကွက်ကနည်းနည်းအရောင်းထိုင်းတဲ့သဘောရှိတယ်"လို့ ပြည်တွင်းက ဝါရင့်ကားဝယ်ရောင်းတယောက်က VOM ကို ပြောပြပါတယ်။
ဒါအပြင် EV ကားတွေနဲ့ ပတ်သက်ပြီးဝေဖန်သံတွေပြန်လည်ထွက်ပေါ်လာမှုနဲ့ ရောင်းအားကျဆင်းနေတဲ့အပေါ်မှာလည်း ကားဈေးကွက်ကျွမ်းကျင်သူတွေက အခုလိုဆက်ပြီးသုံးသပ်ပြောပြပါတယ်။
"EV ကားနဲ့ ပတ်သက်လို့ အခုအသံတွေလည်း တော်တော်လေးပြန်ထွက်လာတာရှိတယ်။ အဓိက က EV ကားက ဘယ်လိုလဲဆိုတော့ သူရဲ့အာမခံနဲ့ Battery ကိစ္စက အတော်လေးစကားပြောလာတယ်။ ဦးတို့လေ့လာရသလောက် သိရသလောက်ဆိုရင် ကားရဲ့တန်ဖိုးက Battery တန်ဖိုးတဝက်ပါပဲ။ ဥပမာ - ကားက သိန်း ၉ဝဝ တန်ရင် Battery ကသိန်း ၄၅၀ ပါပဲ။ ပြီးတော့ EV က ကီလို ၁ သိန်းခွဲအထိပဲမောင်းရမယ်ပြောတယ်။ပြီးရင် Battery လဲရမယ်ဆိုတော့ EV ကိုဝယ်ဖို့ လူတွေကတွန့်လာကြတယ်။ တက္ကစီအုံနာတွေဆို ဂျပန်ကားနဲ့ EV Taxi ဆို ဘာကိုစိတ်ဝင်စားလဲဆိုရင်ဂျပန်ကားပဲစိတ်ဝင်စားကြတယ်။ ရေရှည်၊ရေတို နောက်ပြင်ဆင်ရမှုအပိုင်း ဒါတွေကိုစဉ်းစားလာကြတယ်။ ရေရှည်သွားလို့ရမယ့်ဟာပေါ့။ EV က မကောင်းဘူးဆိုရင် Battery တခုလုံးဖြုတ်လဲပဲ၊ ဂျပန်ကားကျ လက်ပူတိုက်လို့ရတယ်။ အဲဒီတော့ EV တွေက ဈေးကွက်မှာထင်သလောက်မရောင်းရဘူးဖြစ်နေတယ်"လို့
ကားဈေးကွက်ကျွမ်းကျင်သူတယောက်က ဆက်ပြီး ပြောပြပါတယ်။
အဲဒါအပြင် ယခုနှစ်ဆန်းပိုင်းမှာ ပြည်တွင်းထုတ် SKD၊ CKD ကားတွေကို အခွန်လျှော့ပေါ့ကောက်ခံသွားမယ်ဆိုတဲ့ကိစ္စရပ်နဲ့ Without ကားဖမ်းဆီးအရေးယူမှုကိစ္စရပ်တွေကြောင့်လည်းပြည်တွင်းကားဈေးကွက်မှာ လှုပ်ခတ်မှုတွေဖြစ်ပေါ်ခဲ့တယ်လို့လည်းကားလောကသားတွေက ပြောပါတယ်။
"လက်ရှိအချိန်အထိတော့ ကားပေါ်လစီကပြောင်း လဲမှုမရှိဘူး။ အရင်သွားမြဲတိုင်းပဲသွားနေတယ်။ပြောတာနဲ့တူတူပါပဲ။ ဈေးကွက်မှာကအပြောင်း အလဲသိပ်မရှိပါဘူး"လို့ ကားလောကသားတယောက်က ထပ်လောင်း ပြောပြပါတယ်။
ပြည်တွင်းဂျပန်ကားဈေးကွက်အရောင်း အဝယ်အခြေအနေနဲ့ ပတ်သက်လို့ ကားဝယ်ရောင်းလောကသားတယောက်က သူရဲ့အမြင်ကို အခုလို ဆက်ပြီးသုံးသပ် ပြောပြပါတယ်။
"ဂျပန်ကားက ကားကောင်းရင် Showroom ကယူတာပဲလေဝယ်တာပါပဲ။ ကားကောင်းရင် ကားမာရင်ရောင်းရတာပါပဲ။ အယ်ဖတ်ဆို ၂ဝဝဝ/၂ဝဝ၁ မော်ဒယ်ဆို သိန်းတထောင်လောက်ဈေးရှိနေသေးတယ်။ နောက်တခါတရုတ်ကားပေါ့၊တရုတ်ကားတွေကသိန်း ၂ဝဝဝ လောက်ဈေးပေါက်နေတယ်။အခုက ပြည်တွင်းမှာ SKD တွေလည်းထုတ်လာတယ်။ အခုက ကားလောကစကားနဲ့ပြောရရင်ဘာလေး ဘာပေါ့၊ စက်တင်ဘာ၊အောက်တိုဘာ၊နိုဝင်ဘာ၊ဒီဇင်ဘာ ဘာလေးဘာအဲဒီလတွေကပုံမှန်လည်းအရောင်းအေးတဲ့ဈေး ကွက်အေးတဲ့လတွေပါ"လို့ ပြည်တွင်းက ဝါရင့်ကားဝယ်ရောင်းတယောက်က VOM ကို ပြောပါတယ်။
ဒါအပြင် ပြည်တွင်းထုတ် SKD၊ CKD တရုတ်ကားတွေဟာလည်း ဈေးကွက်ကိုဝင်ရောက်လာခဲ့ပြီး ဈေးကွက်မှာယှဉ်ပြိုင်မှုက ကြီးမားနေတယ်လို့လည်း ကားလောကသားတွေက ပြောပါတယ်။
"အခုက EV ကား၊ တရုတ်ကား၊ ကိုရီးယားကား၊ဂျပန်တပတ်ရစ်ကား ဒါတွေအားလုံးကဈေးကွက်မှာ အားပြိုင်မှုကောင်းနေတယ်"လို့ ကားလောကသားတယောက်က ထပ်ပြီး ပြောပြခဲ့ပါတယ်။
ဒါအပြင် အမိန့်နဲ့ မူဝါဒသစ်တွေ မထွက်ပေါ်သရွေ့ ပြည်တွင်းကားဈေးကွက်က သိပ်ထူးခြားမှု၊ပြောင်း လဲမှုမရှိဘဲတည်ငြိမ်မယ်လို့ ကားဈေးကွက် ကျွမ်းကျင်သူတွေက သုံးသပ်ထားကြပါတယ်။
အဲဒါအပြင် ယခုနှစ်ပိုင်းအတွင်းဖြစ်ပေါ်ခဲ့တဲ့ကားဈေးကွက်အခြေအနေတွေအရကားဈေးတွေဟာ ယခုနှစ်စပိုင်း လေးလတဖြတ်မှာ ဈေးငြိမ်ပြီး ဒုတိယလေးလတဖြတ်မှာဈေးအမြင့်ဆုံးထိ တက်ကာ တတိယလေးလ တဖြတ်ဖြစ်တဲ့လက်ရှိကာလမှာ ဈေးကွက်ပြန်ငြိမ်သွားတယ်လို့လည်း ဆိုပါတယ်။
ပုံစာ - ရန်ကုန်မြို့က ကားဝယ်ရောင်းတန်းတနေရာ။
