ဒဏ်ရာပြဿနာများ ကြုံရပြီးနောက် ပွဲမတိုင်မီ အစီအစဉ်များကို အပြောင်းအလဲ ပြုလုပ်လာမယ့် အာတီတာ

ဖေဖော်ဝါရီ ၂၀

မီခေးလ်အာတီတာက ယခုရာသီ ပွဲမတိုင်မီ သွေးပူလေ့ကျင့်ခန်းအစီအစဉ် ဒဏ်ရာရရှိမှု ၄ ကြိမ်တိုင်တိုင် ကြုံခဲ့ရပြီးနောက် အာဆင်နယ်ရဲ့ ပွဲမတိုင်မီ အစီအစဉ်များကို အပြောင်းအလဲ ပြုလုပ်ရန် စဉ်းစားနေကြောင်း ပြောကြားလာပါတယ်။

ရီကာဒိုကာလာဖီအိုရီဟာ တနင်္ဂနွေနေ့တုန်းက ဝီဂန်အား ၄-၀ ဂိုးဖြင့် အနိုင်ရတဲ့ အက်ဖ်အေဖလားပွဲစဉ်မတိုင်မီ သွေးပူလေ့ကျင့်ခန်းအစီအစဉ်တွင် နာကျင်မှု ပြဿနာကြုံလာရပြီးနောက် ယခုရာသီ ဒုတိယအကြိမ်မြောက် လူစာရင်းမှ နုတ်ထွက်ခဲ့ရပါတယ်။

ဒါ့အပြင် ဘူကာယိုဆာကာနှင့် ဝီလီယမ်ဆာလီဘာတို့မှာလည်း ယခုရာသီတွင် သွေးပူလေ့ကျင့်ခန်းအစီအစဉ်တွင် ဒဏ်ရာရရှိခဲ့ကြဖူးပါတယ်။

တဖက်တွင် အာတီတာဟာ အသင်းအတွင်း ဒဏ်ရာပြဿနာများ ကြုံနေရမှုနှင့်အတူ ယနေ့ည ဝုဗ်နှင့်ပွဲစဉ်မတိုင်မီ သွေးပူလေ့ကျင့်ခန်းအစီအစဉ်အား ချဉ်းကပ်ရာတွင် အပြောင်းအလဲ ပြုလုပ်ရန် စဉ်းစားနေပါတယ်။

၎င်းက "သူတို့က အရမ်းကွဲပြားတယ်။ လီဗာပူးနဲ့ပွဲမှာ ဆာဘီဘာ ခြေကျင်းဝတ်ထိပြီး ပထမအကြိမ် ဖြစ်သွားတယ်။ နောက်တော့ ရီကာဒို ဒီအတိုင်းပဲ သွေးပူလေ့ကျင့်ခန်းအစီအစဉ်မှာ မတော်တဆ ၂ ကြိမ် ဖြစ်ပြန်တယ်။ ရာသီဝက် အနားယူပြီးတဲ့နောက် ဆာကာ ထပ်ဖြစ်ပြန်တယ်။ ကိုင်ရတ်နဲ့ပွဲမှာ မကစားနိုင်ခဲ့ဘူး။ အခုဆို ဒီရာသီမှာ ဒီလို ဖြစ်တာ ၄ ကြိမ်ရှိပြီ။ ဒီတော့ အပြောင်းအလဲ လုပ်ဖို့ ကြည့်နေပါတယ်။ ဖြစ်တဲ့အချိန်က တကယ်ကို ကျဉ်းထဲ ကြပ်ထဲမှာပါ။ ဘူကာယိုနေရာမှာ ရစ်ကီကို အစားထိုးရတော့ ပွဲအစီအစဉ်တွေ ပြောင်းလဲရတယ်၊ နေရာတွင် ပြောင်းရတယ်၊ အများကြီး ကွဲပြားသွားတယ်။ ၂ မိနစ်အတွင်း အပြောင်းအလဲ လုပ်ရတာပါ။ တကယ်ဖြစ်လာရင် ချက်ချင်း အပြောင်းအလဲ လုပ်ရလို့ ပိုကောင်းတဲ့ နည်းပြဖြစ်လာစေပါတယ်။ ပွဲမတိုင်ခင် တစ်ခုခု ဖြစ်ရင် အပြောင်းအလဲ လုပ်ရတာ အများကြီးပါ။ ပွဲအတွင်းမှာလည်း အများကြီးပါ"လို့ ပြောကြားသွားပါတယ်။

အာဆင်နယ်ရဲ့ မာတင်အိုဒီဂတ်၊ ကိုင်ဟာဗတ်ဇ်၊ မီခေးလ်မီရီနိုတို့မှာ ဒဏ်ရာကြောင့် ဝုဗ်ပွဲကို လွဲချော်လာကြမှာ ဖြစ်ပေမယ့် ဘင်ဝှိုက်နှင့် ကာလာဖီအိုရီတို့မှာ ပါဝင်လာနိုင်ဖို့ ရှိပါတယ်။

အာဆင်နယ်ရဲ့ လုပ်ခအများဆုံးရ ကစားသမားဖြစ်လာတဲ့ ဘူကာယိုဆာကာ

ဖေဖော်ဝါရီ ၂၀

ဘူကာယိုဆာကာဟာ အာဆင်နယ်နှင့် ၅ နှစ်စာချုပ်သစ်ချုပ်ဆိုလိုက်ပြီးနောက် ကလပ်ရဲ့ လုပ်ခအများဆုံးရ ကစားသမားဖြစ်လာပါတယ်။

အင်္ဂလန်လက်ရွေးစင်ညာတောင်ပံကစားသမားဟာ အာဆင်နယ်တွင် ၂၀၃၁ ခုနှစ်အထိ ရှိနေမယ့် စာချုပ်သစ်အား ချုပ်ဆိုလာတာလည်း ဖြစ်ပါတယ်။

ဆာကာဟာ စာချုပ်သစ်ကြောင့် တစ်ပတ်လုပ်ခ ပေါင် ၃၀၀၀၀၀ အထိ တိုးမြှင့် ရရှိလာမှာ ဖြစ်ပြီး စာချုပ်တန်ဖိုးမှာ စုစုပေါင်း ပေါင် ၇၈ သန်း ရှိပါတယ်။

အသက် ၂၄ နှစ်ရှိ ဆာကာရဲ့ ယခင်စာချုပ်မှာ ၂၀၂၇ ခုနှစ်တွင် ကုန်ဆုံးလာမှာ ဖြစ်ပြီး လအတန်ကြာ စာချုပ်သစ်ချုပ်ဆိုရေး ဆွေးနွေးမှုများ ပြုလုပ်ပြီးနောက် ယခုအခါ စာချုပ်သစ်ချုပ်ဆိုလာပြီ ဖြစ်ပါတယ်။

ဆာကာဟာ အာဆင်နယ်အကယ်ဒမီထွက်တစ်ဦးဖြစ်ပြီး ၂၉၆ ပွဲကစားထားရာမှာ ၇၇ ဂိုးသွင်းကာ ၇၈ ကြိမ် ဖန်တီးမှု ပြုလုပ်ထားပါတယ်။

အာဆင်နယ်ဟာ ဆာကာမတိုင်မီ ဝီလီယမ်ဆာလီဘာ၊ ဂါဘရီရယ်၊ အီသန်နဝမ်နရီ၊ မိုင်လက်စ်လီဝစ်စကယ်လီတို့အား စာချုပ်သစ်ချုပ်ဆိုထားပြီးဖြစ်သလို မက်စ်ဒေါ်ဆင်ကိုလည်း စကော့လားရှစ်စာချုပ်ချုပ်ဆိုရန် သဘောတူညီမှု ရရှိထားပြီး ဖြစ်ပါတယ်။

အာဆင်နယ်ဟာ ပရီးမီးယားလိဂ်ကို ဦးဆောင်နေသလို ခါရာဘောင်ဖလားဗိုလ်လုပွဲသို့လည်း တက်ရောက်ထားကာ ချန်ပီယံလိဂ်၊ အက်ဖ်အေဖလားတို့မှာလည်း ရှုံးထွက်အဆင့်သို့ တက်ထားပါတယ်။

လူမျိုးရေးခွဲခြားခံရတယ်လို့ ဆိုခဲ့တဲ့ ဗီနီရှပ်စ်ကို မော်ရင်ဟို ဝေဖန်ပြောဆိုလာ

ဖေဖော်ဝါရီ ၂၀

ဟိုဆေးမော်ရင်ဟိုက ဘင်ဖီကာနှင့် ရီးရဲလ်မက်ဒရစ်တို့ရဲ့ ချန်ပီယံလိဂ်ပလေးအော့ဖ်ပထမအကျော့ပွဲစဉ်တွင် လူမျိုးရေးခွဲခြားခံခဲ့ရတယ်လို့ စွပ်စွဲခဲ့တဲ့ ဗီနီရှပ်စ်အား ဝေဖန်ပြောဆိုမှု ပြုလုပ်လာပါတယ်။

ပေါ်တူဂီတွင် ကစားတဲ့ ချန်ပီယံလိဂ်ပလေးအော့ဖ်ပွဲစဉ်တွင် ဗီနီရှပ်စ်ဟာ ရီးရဲလ်မက်ဒရစ်အတွက် အံ့ဩစရာကောင်းတဲ့ အနိုင်ဂိုးသွင်းယူပြီးနောက် လူမျိုးရေးခွဲခြားဆက်ဆံခြင်းခံခဲ့ရတာလည်း ဖြစ်ပါတယ်။

ဘရာဇီးစူပါစတားဟာ ဂိုးသွင်းအောင်ပွဲခံမှုအတွက် နှစ်ဖက်ကစားသမားများအကြား ရုန်းရင်းဆန်ခတ်ဖြစ်ကာ အဝါကတ်ပြသခြင်းခံခဲ့ရပါတယ်။

ယင်းနောက် ဗီနီရှပ်စ်ဟာ ဘင်ဖီကာတောင်ပံကစားသမားဂျီယန်လူကာပရက်တီယန်နီနှင့် အချင်းများခဲ့ပါတယ်။ သူဟာ ဗီနီရှပ်စ်နှင့် စကားပြောနေစဉ် အင်္ကျီကို ပါးစပ်ထဲ ထည့်ထားတာ တွေ့ရပါတယ်။

ယင်းနောက် ဗီနီရှပ်စ်ဟာ ဒိုင်လူကြီးထံသို့ သွားရောက်ပြီး လူမျိုးရေးခွဲခြားဆက်ဆံခြင်းခံရကြောင်း တိုင်ကြားခဲ့ပါတယ်။

ဗီနီရှပ်စ်နှင့် ရီးရဲလ်မက်ဒရစ်ကစားသမားများဟာ ပွဲဆက်ကစားရန် ငြင်းဆိုပြီး ကွင်းအတွင်းမှ ထွက်ခွာသွားမှုနှင့်အတူ ပွဲကို ၁၀ မိနစ်ခန့်ရပ်ဆိုင်းခဲ့ရပါတယ်။

ယင်းနောက် ပွဲပြန်ဆက်ကစားခဲ့ပြီး ရီးရဲလ်မက်ဒရစ်က ၁-၀ ဂိုးဖြင့် အနိုင်ရခဲ့ပါတယ်။

ယင်းပွဲရဲ့ ပွဲနှောင်းပိုင်းတွင် အနီကတ်ပြထုတ်ပယ်ခြင်းခံခဲ့ရတဲ့ မော်ရင်ဟိုက ပရက်တီယန်နီက ဗီနီရှပ်စ်ကို လူမျိုးရေးခွဲခြားပြောဆိုခဲ့ခြင်း မရှိကြောင်း ငြင်းဆိုခဲ့ကြောင်း ငြင်းဆိုလာပါတယ်။

မော်ရင်ဟိုက "ပွဲရဲ့ ရူးချင်စရာအချိန်ပါ။ အံ့ဩစရာကောင်းတဲ့ဂိုးပါ။ ဒီပါရမီတွေနဲ့ လှပတဲ့အရာတွေ လုပ်နိုင်တယ်။ ဒါပေမယ့် အရမ်းကောင်းတဲ့ဂိုးသွင်းနိုင်လို့ ပျော်ရုံတင်မကပါဘူး။ ဒီလိုဂိုးတစ်ဂိုး သွင်းနိုင်တဲ့အချိန်မှာ ပြိုင်ဘက်ကို တလေးတစားနဲ့ အောင်ပွဲခံရမယ်။ သူက ပရိသတ်ကို ရည်ရွယ်တာ။ ဂျီယန်လူကာပရက်တီနီနှင့် ဗီနီရှပ်စ်အကြား အပြန်အလှန်ပြောဆိုကြတယ်။ ကျုပ်က ဘက်မလိုက်ပဲ ပြောလိုတယ်။ ကွဲပြားတဲ့အရာနှစ်ခု တွေ့ရတယ်။ ဒါနဲ့ပတ်သက်ပြီး မပြောလိုဘူး။ ဒါပေမယ့် ဗီနီရှပ်စ်ကို ပြောပြခဲ့တာကိုတော့ ပြောလိုတယ်။ 'မင်း ဒီလိုဂိုးတစ်ဂိုး သွင်းပြီးချိန်မှာ အောင်ပွဲခံပြီး ပြန်လာရုံပဲ'လို့ ပြောခဲ့တယ်။ သူက လူမျိုးရေးခွဲခြားခံရတယ်လို့ စွပ်စွဲလာတော့ ကျုပ်ကလည်း သူ့ကို ဒီကလပ်သမိုင်းမှာ အကြီးမားဆုံးပုဂ္ဂိုလ်ဖြစ်တဲ့ အူစီဘီယိုကလည်း လူမည်းပဲလို့ ပြောခဲ့တယ်။ နောက်ဆုံး ဒီကလပ်လည်း ခွဲခြားဆက်ဆံခံရတာပါပဲ။ သူ့စိတ်ထဲမှာ ဘင်ဖီကာနဲ့ပတ်သက်ပြီး တခုခု ရှိနေတယ်။ သူတို့(ဗီနီရှပ်စ်နဲ့ ပရက်တီနီ) ပြောတာက ကွဲနေတယ်။ ဘယ်သူပြောတာကိုမှ မယုံပါဘူး။ လွတ်လွတ်လပ်လပ် တွေးချင်တယ်။ ဗီနီရှပ်စ်ကစားတဲ့ ကွင်းတိုင်းမှာ တခုခုအမှားတော့ ဖြစ်နေတတ်တယ်။ တခုမဟုတ် တခု ဖြစ်တာပဲ"လို့ ပြောကြားသွားပါတယ်။

တဖက်တွင် ဗီနီရှပ်စ်အား ဝေဖန်ပြောဆိုခဲ့တဲ့ မော်ရင်ဟိုကို ဘောလုံးဝေဖန်ရေးသမားဝိန်းရွန်းနီက အပြင်းအထန်ဝေဖန်မှု ပြုလုပ်ထားပါတယ်။

ရွန်းနီက "ဗီနီရှပ်စ်နဲ့ ပတ်သက်ပြီး သူ ပြောသွားတာ မမျှတဘူး"လို့ ဆိုသွားပါတယ်။

မော်ရင်ဟိုဟာ ပထမအကျော့အနီကတ်ကြောင့် ဘာနေဗျူးကွင်းတွင် ကစားရမယ့် ဒုတိယအကျော့ပွဲစဉ်အား ကြီးကြပ်ခွင့် ရလာတော့မှာ မဟုတ်ပါဘူး။

တဖက်တွင် ပရက်တီနီက ၎င်းမှာ လူမျိုးရေးခွဲခြားသူ မဟုတ်ကြောင်းနှင့် ဗီနီရှပ်စ်ကို လူမျိုးရေးခွဲခြားဆက်ဆံရန် အချိန်မရှိကြောင်း၊ ဗီနီရှပ်စ်မှာ နားကြားမှားခြင်းသာ ဖြစ်နိုင်ကြောင်း ဆိုသွားပါတယ်။

နှစ်လကြာ ကလပ်လက်မဲ့ ဖြစ်ပြီးနောက် ဘရာဇီးအသင်းငယ်လေးသို့ ပြောင်းရန် နီးစပ်နေပြီဖြစ်တဲ့ ဂျက်စီလင်ဂတ်

ဖေဖော်ဝါရီ ၂၀

ဂျက်စီလင်ဂတ်ဟာ ဇန်နဝါရီလတုန်းက အက်ဖ်စီဆိုးလ်မှ ထွက်ခွာလာပြီးနောက် ဘရာဇီးကလပ် ရီမိုသို့ ပြောင်းရွှေ့ကစားရန် နီးစပ်နေပြီ ဖြစ်ပါတယ်။

အင်္ဂလန်နှင့် ယူနိုက်တက်တိုက်စစ်သမားဟာ ငါးလကြာ အသင်းလက်မဲ့ ဖြစ်ပြီးနောက် ၂၀၂၄ ခုနှစ်တွင် ကိုရီးယားကလပ်သို့ ပြောင်းရွှေ့ကစားခဲ့တာလည်း ဖြစ်ပါတယ်။

ယခုအခါ အသက် ၃၃ နှစ်ရှိ လင်ဂတ်ဟာ ပြီးခဲ့တဲ့ရာသီများအတွင်းတွင် ပထမတန်း၊ ဒုတိယတန်းနှင့် တတိယတန်းတို့အကြား လှည့်လည်သွားလာ နေရတဲ့ ရီမိုသို့ ပြောင်းရန် အနီးစပ်ဆုံးအနေအထားသို့ ရောက်နေကြောင်း သိရပါတယ်။

လင်ဂတ်ဟာ ယူနိုက်တက်အကယ်ဒမီထွက်တစ်ဦးဖြစ်ပြီး ၂၃၂ ပွဲ ကစားခွင့်ရခဲ့သူလည်း ဖြစ်ပါတယ်။

သူဟာ ယူနိုက်တက်ပထမအသင်းတွင် ကစားခွင့်မရမီ လက်စတာ၊ ဒါဘီ၊ ဘာမင်ဂမ်နှင့် ဘရိုက်တန်သို့ အငှားဖြင့် သွားကစားခဲ့ရပါသေးတယ်။

အလယ်တန်းတိုက်စစ်သမားဟာ ၂၀၂၁ ခုနှစ်တုန်းက ယူနိုက်တက်ကစားသမားဘဝ အဆုံးသတ်လုနီးပါးအချိန်တွင် ဝက်စ်ဟမ်းသို့ အငှားဖြင့် သွားကစားခဲ့ရပါတယ်။

သူဟာ ၂၀၂၂ ခုနှစ်တွင် ကစားသမားဘဝစတင်ရာ ယူနိုက်တက်ကို စွန့်ခွာပြီး နော်တင်ဟမ်ဖောရက်စ်သို့ ပြောင်းကစားခဲ့ပေမယ့် တစ်ရာသီသာ ကစားခဲ့ရကာ ထွက်ခွာခဲ့ရပါတယ်။

သူဟာ အက်ဖ်စီဆိုးလ်အတွက် ၆၇ ပွဲကစားခဲ့ရာမှာ ၁၉ ဂိုးသွင်းပေးနိုင်ခဲ့ပါတယ်။

ယခုအခါ သူဟာ ရီမိုသို့ ပြောင်းကာ ကစားသမားဘဝ စာမျက်နှာသစ် ဖွင့်လှစ်လာတော့မှာလည်း ဖြစ်ပါတယ်။

သူဟာ ဆောက်ဂိတ် ဦးဆောင်စဉ်တုန်းက အင်္ဂလန်အသင်းတွင် ၅ နှစ်ကြာ ကစားခွင့်ရခဲ့ကာ ၃၂ ပွဲကစားပြီး ၆ ဂိုးသွင်းပေးနိုင်ခဲ့ပါတယ်။

သူဟာ ၂၀၁၈ ကမ္ဘာ့ဖလားဆီမီးဖိုင်နယ်ရောက် အင်္ဂလန်အသင်းတွင် ပါဝင်ခဲ့ပေမယ့်လည်း ယူရို ၂၀၂၀ တွင် ပါဝင်ခွင့်မရခဲ့ဘဲ လက်ရွေးစင်အသင်းမှာ ရွေးချယ်ခြင်းမခံရတာ ငါးနှစ်ရှိလာပြီလည်း ဖြစ်ပါတယ်။

ရမှတ် ၆ မှတ်အလျှော့ခံရမှုအား လက်စတာ အယူခံဝင်လာ

ဖေဖော်ဝါရီ ၂၀

လက်စတာဟာ EFL ရဲ့ဘဏ္ဍာရေးစည်းမျဉ်းချိုးဖောက်မှုအတွက် ရမှတ် ၆ မှတ်အလျှော့ခံရမှုအား အယူခံလာပါတယ်။

လက်စတာဟာ ယခုလအစောပိုင်းတုန်းက ဘဏ္ဍာရေးစည်းမျဉ်းချိုးဖောက်မှုအတွက် ရမှတ် ၆ မှတ်အလျှော့ခံခဲ့ရတာဖြစ်ပြီး ရမှတ်အလျှော့ခံရမှုကြောင့် တန်းဆင်းဇုန်အပြင်ဘက်တွင် ဂိုးကွာခြားချက်ဖြင့် ရပ်တည်လာရပါတယ်။

လက်စတာဟာ ၂၀၂၃-၂၄ ရာသီအထိ သုံးရာသီကာလအတွင်း အမြတ်နှင့် ရေရှည်တည်တန့်ရေး စည်းမျဉ်းကို ချိုးဖောက်မှုအတွက် ရမှတ် ၆ အမှတ်အလျှော့ခံရတာလည်း ဖြစ်ပါတယ်။

ယခုအခါ လက်စတာဘက်က ရမှတ်အလျှော့ခံရမှုကို အယူခံဝင်လာပြီ ဖြစ်ပြီး လွတ်လပ်တဲ့ ကော်မရှင်အဖွဲ့ ဖွဲ့စည်းကာ စစ်ဆေးကြားနာမှု ပြုလုပ်လာတော့မှာလည်း ဖြစ်ပါတယ်။

မတ်လလကုန်ပိုင်းတွင် အီဆက်ခ် ပြန်ကစားလာနိုင်ဖွယ်ရှိနေ

ဖေဖော်ဝါရီ ၂၀

လီဗာပူးနည်းပြအန်းဆလော့က တိုက်စစ်မှူးအလက်ဇန္ဒားအီဆက်ခ်မှာ မတ်လနှောင်းပိုင်းတွင် လီဗာပူးအတွက် ပြန်လည်ကစားလာနိုင်ဖို့ ရှိနေကြောင်း ပြောကြားလာပါတယ်။

အီဆက်ခ်ဟာ ဒီဇင်ဘာလကတည်းက ခြေကျင်းဝတ်ဒဏ်ရာခွဲစိတ်ကုသမှု ပြုလုပ်ခဲ့ရပြီးနောက် အနားယူလာခဲ့ရသူ ဖြစ်ပါတယ်။

သူဟာ နွေရာသီ အပြောင်းအရွှေ့ဈေးကွက်နောက်ဆုံးနေ့တွင် နယူးကာဆယ်မှ လီဗာပူးသို့ ဗြိတိန်စံချိန်တင်ပြောင်းရွှေ့ကြေး ပေါင် ၁၂၅ သန်းပြောင်းလာခဲ့ပေမယ့်လည်း နွေရာသီ ရာသီကြိုလေ့ကျင့်ခန်းမဆင်းမှုနှင့်အတူ ပွဲကစားရေး စောင့်ဆိုင်းခဲ့ရကာ လီဗာပူးအတွက် ပြိုင်ပွဲအရပ်ရပ် ၁၆ ပွဲတည်းသာ ကစားထားရပါသေးတယ်။

ဆလော့က "အဲလက်စ် ကွင်းထဲ ရောက်နေပါပြီ။ ဘောလုံးဖိနပ်တော့ မစီးနိုင်သေးဘူး။ ဒါပေမယ့် ဒီအပတ်မှာ အပြေးဖိနပ်စစီးနိုင်ပြီ။ အခြားကစားသမားတိုင်းလိုပဲ လာမယ့်အပတ်မှာ ဘောလုံးနဲ့ စအလုပ်လုပ်မယ်။ ပြီးရင် နောက်တစ်ဆင့် အုပ်စုနဲ့အတူ လေ့ကျင့်မယ်။ ပြီးတော့ အသင့်ဖြစ်ဖို့ ခဏလေ့ကျင့်မယ်။ မတ်လနှောင်းပိုင်း သို့မဟုတ် ဧပြီလအစောပိုင်းဆိုရင် အုပ်စုနဲ့အတူ ပြန်ကစားနိုင်ဖို့‌ မျှော်လင့်ရတယ်။ ပွဲထွက်ကစားဖို့ အဆင့်သင်ဖြစ်ပြီလို့ ပြောလိုတာ မဟုတ်ပါဘူး"လို့ ပြောကြားသွားပါတယ်။

ဒါ့အပြင် လီဗာပူးနည်းပြအန်းဆလော့က ညာနောက်ခံလူဂျီရီမီဖရမ်းပေါင်မှာ လာမယ့်အပတ် အန်ဖီးလ်တွင် ဝက်စ်ဟမ်းအား ဧည့်ခံကစားရမယ့်ပွဲစဉ်တွင် ပြန်လည်ကစားလာနိုင်ဖို့ ရှိနေကြောင်း အတည်ပြုသွားပါတယ်။

၂၀၂၆ ကမ္ဘာ့ဖလားမတိုင်မီ ဘရာဇီးနှင့် စာချုပ်သစ်ချုပ်ဆိုရန် စီစဉ်နေကြောင်း အန်ဆယ်လော့တီ အတည်ပြုလာ

ဖေဖော်ဝါရီ ၂၀

ကာလိုအန်ဆယ်လော့တီက ၂၀၂၆ ကမ္ဘာ့ဖလားပြိုင်ပွဲမတိုင်မီ ဘရာဇီးနှင့်စာချုပ်သစ်ချုပ်ဆိုရန် ရည်ရွယ်ထားကြောင်း ထုတ်ဖော်ပြောကြားလာပါတယ်။

အီတလီလူမျိုးဂန္ထဝင်နည်းပြရဲ့ လက်ရှိ ဘရာဇီးနှင့် စာချုပ်မှာ ၂၀၂၆ ကမ္ဘာ့ဖလားပြိုင်ပွဲအပြီးတွင် ကုန်ဆုံးလာမှာ ဖြစ်ပြီး ၂၀၃၀ ကမ္ဘာ့ဖလားပြိုင်ပွဲအထိ စာချုပ်သစ်ချုပ်ဆိုရန် ရည်ရွယ်ထားတာပါ။

အသက် ၆၆ နှစ်ရှိ အန်ဆယ်လော့တီဟာ ၂၀၂၅ ခုနှစ် မေလတွင် ရီးရဲလ်မက်ဒရစ်အား ဒုတိယအကြိမ်မြောက် ကိုင်တွယ်ကာ ထွက်ခွာလာပြီးနောက် နည်းပြဘဝ ပထမဆုံးလက်ရွေးစင်အသင်းအဖြစ် ဘရာဇီးအား ကိုင်တွယ်ခဲ့တာလည်း ဖြစ်ပါတယ်။

ကမ္ဘာ့ဖလား ၅ ကြိမ် ချန်ပီယံ ဘရာဇီးဟာ လက်ရှိ ကမ္ဘာ့အဆင့်တွင် ယူရိုချန်ပီယံ စပိန်၊ အာဂျင်တီးနား၊ ပြင်သစ်၊ အင်္ဂလန်တို့အောက် အဆင့် ၅ နေရာမှာ ရပ်တည်နေပါတယ်။

ဒါပေမယ့် အန်ဆယ်လော့တီဟာ လာမယ့် ကမ္ဘာ့ဖလား ၂ ကြိမ်တွင် ၂၄ နှစ်ကြာ စောင့်ဆိုင်းလာတဲ့ ကမ္ဘာ့ဖလားအား ဆွတ်ခူးနိုင်ရေး ကြိုးပမ်းလိုနေပါတယ်။

အန်ဆယ်လော့တီက "ဘရာဇီးနဲ့ လေးနှစ်စာချုပ်သစ်ချုပ်ဆိုလာမယ်လို့ ယုံကြည်တယ်။ ဒါက အလုပ်သစ်ပါ။ ကျုပ် အရမ်းသဘောကျတယ်"လို့ ပြောကြားသွားပါတယ်။

တကယ်လို့များ အန်ဆယ်လော့တီသာ ဘရာဇီးနှင့် လေးနှစ်စာချုပ်သစ်ချုပ်ဆိုလာပါက ၎င်းအား ခန့်အပ်ရန် စိတ်ဝင်စားနေတဲ့ ယူနိုက်တက်နှင့် ရီးရဲလ်မက်ဒရစ်တို့အတွက် ကြီးမားတဲ့ ထိုးနှက်ချက်ဖြစ်လာပါမယ်။

ရွှေ့ပြောင်းနေထိုင်သူများနှင့်ပတ်သက်ပြီး အငြင်းပွားဖွယ် ပြောဆိုခဲ့တဲ့ ဆာဂျမ်ရက်ကလစ်ဖ်အား စဉ်းစားပြီးမှ စကားပြောဆိုရန် ယူနိုက်တက်ဂန္ထဝင်သတိပေးလာ

ဖေဖော်ဝါရီ ၂၀

ဗီအင်ဒါဆင်က ဗြိတိန်ကို ရွှေ့ပြောင်းနေထိုင်သူများက ကိုလိုနီပြုထားကြောင်း ပြောဆိုခဲ့တဲ့ ယူနိုက်တက်ပူးတွဲပိုင်ရှင်ဆာဂျမ်ရက်ကလစ်ဖ်အနေဖြင့် စကားမပြောမီ စဉ်းစားရန် ပြောဆိုလာပါတယ်။

အင်္ဂလန်လက်ရွေးစင်အသင်းတွင် ပထမဆုံးကစားခွင့်ရတဲ့ လူမည်းကစားသမားဖြစ်တဲ့ အင်ဒါဆင်ဟာ ပြီးခဲ့တဲ့အပတ်တုန်းက ယူနိုက်တက်ပူးတွဲပိုင်ရှင်ရဲ့ ပြောဆိုမှုကြောင့် အံ့ဩခဲ့ရပါတယ်။

တဖက်တွင် အက်ဖ်အေဟာ ဆာဂျမ်ရက်ကလစ်ဖ်ရဲ့ ပြောဆိုမှုကြောင့် နိုင်ငံအတွင်း အငြင်းပွားစရာ ဖြစ်လာတဲ့ အခြေအနေအပေါ်တွင် စုံစမ်းစစ်ဆေးမှုများ ပြုလုပ်နေပါတယ်။

ဂျာမေကာမိဘများမှ မွေးဖွားလာတဲ့ အသက် ၆၉ နှစ်ရှိ ယူနိုက်တက်နောက်ခံလူအင်ဒါဆင်က "မန်ချက်စတာယူနိုက်တက်လို ကလပ်တစ်ခုရဲ့ ပိုင်ရှင်ရဲ့ ထုတ်ပြန်ကြေညာချက်ကြောင့် အံ့ဩသင့်ရတယ်။ အဲဒီလို ပြောပြီးတဲ့နောက် ရက်အနည်းငယ်အကြာမှာ တောင်းပန်ခဲ့တယ်။ ဒါပေမယ့် လူတွေ ဒီလို ပြောဆိုလာတဲ့အခါ စိတ်တိုကြရတယ်။ ကျွန်တော့်မိဘတွေက ၅၀ ခုနှစ်တွေတုန်းက ဂျာမေကာက ဝင်းဒရပ်စ်မျိုးဆက်နဲ့အတူ ရောက်လာတာပါ။ ဒီနိုင်ငံကို ကိုယ်စားပြုခွင့်ရတဲ့ ပထမဆုံးလူမည်းအဖြစ် ကံကောင်းစွာ ဖြစ်ခွင့်ရခဲ့တယ်။ ကျွန်တော်တို့ လုပ်ဆောင်မှုတွေအတွက် လေးစားမှုတွေလည်း ရခဲ့တယ်။ ဒါပေမယ့် အရေးကြီးတာက လူတွေအနေနဲ့ မပြောခင် စဉ်းစားစေချင်ပါတယ်"လို့ ပြောကြားသွားပါတယ်။

ရက်ကလစ်ဖ်ဟာ လွန်ခဲ့တဲ့ နှစ်နှစ်တုန်းက ယူနိုက်တက်ရဲ့ အသေးစားရှယ်ယာများကို ပေါင် ၁.၂၅ ဘီလီယံဖြင့် ဝယ်ယူခဲ့သူပါ။

လက်ရှိ ယူနိုက်တက်အသင်းတွင် နိုင်ငံခြားသား ကစားသမား ၁၇ ဦးအထိ ရှိနေပါတယ်။

အငှားယာဉ်စီးနင်းခ စင်ကာပူဒေါ်လာ ၂၄ ဒေါ်လာပေးရန် ငြင်းဆန်သည့်အပြင် အသက် ၇၃ နှစ်အရွယ် အငှားယာဉ်မောင်းကို ရဲစခန်းရှေ့ပါးရိုက်ခဲ့သည့် အရက်မူးနေသော စင်ကာပူအမျိုးသမီး ထောင်ချခံရ

သက်တံ့
ဖေဖော်ဝါရီ ၂၀

အငှားယာဉ်စီးနင်းခ ပေးဆောင်ရန် ငြင်းဆန်သည့်အပြင် အသက် ၇၃ နှစ်အရွယ် အငှားယာဉ်မောင်းအဘိုးအိုကို ရဲစခန်းရှေ့၌ ပါးရိုက်ခဲ့သည့် မူးယစ်နေသော အမျိုးသမီးတစ်ဦးအား စင်ကာပူတရားရုံးက ကြာသပတေးနေ့ (ဖေဖော်ဝါရီ ၁၉ ရက်)တွင် ထောင်ဒဏ် ၂ ပတ် ချမှတ်လိုက်သည်။

အသက် ၃၆ နှစ်အရွယ်ရှိ စင်ကာပူနိုင်ငံသူ ရှာလနီ ဒီဗာရာဂျန် (Shalini Devarajan) သည် တစ်ပါးသူကို တမင်သက်သက် နာကျင်စေမှုဖြင့် ပြစ်ဒဏ်ချမှတ်ခံရခြင်း ဖြစ်သည်။

ဖြစ်စဉ်မှာ ၂၀၂၅ ခုနှစ်၊ နိုဝင်ဘာလ ၁၁ ရက်နေ့၊ မွန်းလွဲ ၃ နာရီခန့်တွင် ဖြစ်ပွားခဲ့ခြင်းဖြစ်သည်။ ရှာလနီသည် အငှားယာဉ်ပေါ်သို့ တစ်ဦးတည်း စီးနင်းခဲ့ပြီး ယီရွှန်း (Yishun) လမ်းရှိ အိမ်ရာဝန်းတစ်ခုသို့ ပို့ဆောင်ပေးရန် ခိုင်းစေခဲ့သည်။

ယာဉ်မောင်းဖြစ်သူက ခရီးသည်အမျိုးသမီးထံမှ အရက်နံ့များ ရနေသည်ကို သတိပြုမိသော်လည်း အိပ်ပျော်နေသည့် သူမကို သတ်မှတ်ထားသောနေရာသို့ ရောက်အောင် ပို့ဆောင်ပေးခဲ့သည်။

သတ်မှတ်နေရာသို့ ရောက်ရှိသောအခါ ယာဉ်မောင်းက သူမကို နှိုး၍ ယာဉ်ခ စင်ကာပူဒေါ်လာ ၂၄ ဒေါ်လာ ကျသင့်ကြောင်း ပြောကြားခဲ့သည်။ သို့သော် ရှာလနီက သူမတွင် လက်ငင်းငွေသားမရှိသလို အွန်လိုင်းမှ ငွေပေးချေရန် နည်းလမ်းလည်း မရှိကြောင်း ငြင်းဆိုခဲ့သည်။ သူမက ပိုက်ဆံယူရန် အပေါ်ထပ်ရှိ သူမ၏ အခန်းသို့ သွားမည်ဟု ပြောသော်လည်း သူမ၏ ဖုန်းကို အပေါင်အဖြစ် ထားခဲ့ရန် ယာဉ်မောင်း၏ တောင်းဆိုမှုကို ငြင်းဆန်ခဲ့သည်။ ယာဉ်မောင်းက သူမနောက်သို့ အခန်းအထိ လိုက်ယူမည်ဟု ပြောဆိုသော်လည်း သူမက ထပ်မံ ငြင်းဆန်ခဲ့သည်။ ထို့နောက် ရှာလနီက သူမကို ရဲစခန်းသို့သာ ပို့ရန် ယာဉ်မောင်းကို စိန်ခေါ်ခဲ့သည်။

ရဲစခန်းသို့ သွားရာလမ်းတစ်လျှောက်တွင် ရှာလနီသည် ယာဉ်မောင်းကို ဆဲဆိုခြင်း၊ ယာဉ်မောင်းနှင့် ကားကို ဓာတ်ပုံရိုက်ယူခြင်းများ ပြုလုပ်ခဲ့သော်လည်း ယာဉ်မောင်းကမူ တစ်ခွန်းမျှ ပြန်လည်ပြောဆိုခြင်း မရှိခဲ့ပေ။ ညနေ ၄ နာရီ ၂၀ မိနစ်ခန့်တွင် ယီရွှန်းရဲစခန်းရှေ့သို့ ရောက်ရှိချိန်၌ ရှာလနီသည် ကားပေါ်မှ ဆင်းဆင်းချင်း ယာဉ်မောင်းအဘိုးအို၏ ဘယ်ဘက်ပါးကို တစ်ချက် ရိုက်ခဲ့သည်။ ထိုလုပ်ရပ်ကြောင့် ယာဉ်မောင်းမှာ နာကျင်မှုဝေဒနာ ခံစားခဲ့ရပြီး ဆေးရုံတွင် ဆေးကုသမှု ခံယူခဲ့ရကာ ဆေးခွင့်တစ်ရက် ယူခဲ့ရသည်။

တရားခွင်တွင် အစိုးရရှေ့နေက ယာဉ်မောင်းသည် ရန်စမှုများကို အတတ်နိုင်ဆုံး သည်းခံပြီး ပရော်ဖက်ရှင်နယ်ဆန်စွာ လုပ်ငန်းတာဝန် ထမ်းဆောင်ခဲ့ကြောင်း၊ ယာဉ်မောင်းများသည် ကာကွယ်စောင့်ရှောက်ပေးသင့်သည့် ထိခိုက်လွယ်သော လူတန်းစားဖြစ်ကြောင်း လျှောက်လဲခဲ့သည်။

ရှာလနီက သူမ၏ အိတ်ကပ်ထဲတွင် ဒေါ်လာ ၅၀ တန် တစ်ရွက် ရှိနေသည်ကို ထိုစဉ်က မသိခဲ့ကြောင်း၊ သူမတွင် မိသားစု အထောက်အပံ့မရှိဘဲ ငွေကြေးအခက်အခဲ ဖြစ်နေကြောင်း လျှော့ပေါ့သက်ညှာခွင့် တောင်းခဲ့သည်။

သို့သော်လည်း ယာဉ်မောင်းအတွက် ဆေးဖိုး စင်ကာပူဒေါ်လာ ၁၇၂ ဒေါ်လာကိုပင် ပေးလျော်နိုင်ခြင်း မရှိသည့်အပြင် ယခင်က ပေးလျော်ရန် ကတိပေးခဲ့သော်လည်း ပျက်ကွက်ခဲ့သည့်အတွက် တရားသူကြီးက သူမကို ထောင်ဒဏ် ၂ ပတ် ပြစ်ဒဏ် ချမှတ်ခဲ့ခြင်း ဖြစ်သည်။

Ref: CNA

ပုဂ္ဂလိကရုပ်ရှင်ရုံငယ်များ (Private Cinema) လိုင်စင်မရှိဘဲ ဖွင့်လှစ်ပြသခြင်းနှင့် ဆင်ဆာမဲ့ဇာတ်ကားများ ဆက်လက်ပြသပါက တည်ဆဲဥပဒေများနှင့်အညီ အရေးယူမည်

ဖေဖော်ဝါရီ ၂၀
Written by Linn Eain

ပုဂ္ဂလိကရုပ်ရှင်ရုံငယ်များ (Private Cinema) လိုင်စင်မရှိဘဲ ဖွင့်လှစ်ပြသခြင်းနှင့် ဆင်ဆာမဲ့ဇာတ်ကားများ ဆက်လက်ပြသပါက တည်ဆဲဥပဒေများနှင့်အညီ အရေးယူဆောင်ရွက်သွားမည်ဖြစ်ကြောင်း ဗီဒီယိုလုပ်ငန်းစိစစ်ကြီးကြပ်ရေးဗဟိုကော်မတီက ဖေဖော်ဝါရီ ၂၀ ရက်တွင် အသိပေးကြေညာချက် ထုတ်ပြန်လိုက်သည်။

အဆိုပါ ထုတ်ပြန်မှုတွင် အချို့သော စီးပွားရေးလုပ်ငန်းရှင်များသည် ပရိုဂျက်တာ/ TV အသုံးပြု ပုဂ္ဂလိကရုပ်ရှင်ရုံငယ်များကို ဟိုတယ်/ တည်းခိုခန်းများကဲ့သို့ အခန်းကန့်ပြီး ဖွင့်လှစ်လာကြ၍ မလိုလားအပ်သော လူမှုရေးရှုပ်ထွေးမှုများ ဖြစ်ပေါ်လာနိုင်ကြောင်း စိစစ်တွေ့ရှိရသဖြင့် ပြသခွင့်လိုင်စင်များ ထုတ်ပေးမှုများရှိပါက ချက်ချင်းရုပ်သိမ်းသွားရန်နှင့် တရားမဝင်ပြသနေမှုများအား ရုပ်မြင်သံကြားနှင့်ဗီဒီယိုဥပဒေအရ အရေးယူဆောင်ရွက်သွားရန် ဗီဒီယိုလုပ်ငန်းစိစစ်ကြီးကြပ်ရေး ဗဟိုကော်မတီအနေဖြင့် တိုင်းဒေသကြီး/ ပြည်နယ် ဗီဒီယို လုပ်ငန်းစိစစ်ကြီးကြပ်ရေးကော်မတီများသို့ အကြောင်းကြားထားကြောင်း သိရသည်။

သို့သော် ရန်ကုန်တိုင်းဒေသကြီး စမ်းချောင်းမြို့နယ်ရှိ RIO Private Cinema ၊ နေပြည်တော် ပျဉ်းမနားမြို့နယ်ရှိ The Vibe Mini Cinema အပါအဝင် အချို့သော Private Cinema များသည် ဆင်ဆာမဲ့ ရုပ်ရှင်ဇာတ်ကားများကို အသုံးပြု၍ မလျော်ကန်စွာ တရားမဝင် ဆက်လက်ဖွင့်လှစ်လျက်ရှိကြောင်း စိစစ်တွေ့ရှိရကြောင်း ဗီဒီယိုလုပ်ငန်းစိစစ်ကြီးကြပ်ရေးဗဟိုကော်မတီ၏ ထုတ်ပြန်မှုအရ သိရသည်။

ထို့ကြောင့် လုပ်ငန်းလိုင်စင်မရှိဘဲ ရုပ်ရှင်ရုံဖွင့်လှစ်ပြသခြင်း၊ ဆင်ဆာမဲ့ဇာတ်ကားများ ပြသခြင်းများ ဆက်လက်ပြုလုပ်ပါက တည်ဆဲဥပဒေများနှင့်အညီ အရေးယူဆောင်ရွက်သွားမည်ဖြစ်ကြောင်း သိရသည်။