မြန်မာနိုင်ငံတွင် အီးစီးကရက် (e-cigarettes) များ အသုံးပြုခြင်းနှင့် ရောင်းချခြင်းကို တရားဝင်ပိတ်ပင်

သက်တံ့
ဖေဖော်ဝါရီ ၂၀

မြန်မာနိုင်ငံတွင် အီးစီးကရက် (e-cigarettes)၊ အီး-ရှီရှား(e-shisha) နှင့် Vape စက်စသည့် ၎င်းတို့နှင့် ဆက်စပ်သည့် ပစ္စည်းကိရိယာများအားလုံးကို တင်သွင်းခြင်း၊ ရောင်းချခြင်းနှင့် အသုံးပြုခြင်းတို့ကို ပိတ်ပင်လိုက်ကြောင်း ကျန်းမာရေးဝန်ကြီးဌာန၏ ထုတ်ပြန်ချက်ကို ကိုးကား၍ ဆင်ဟွာ (Xinhua) သတင်းဌာနက ယနေ့တွင် ဖော်ပြခဲ့သည်။

ဤပိတ်ပင်တားမြစ်ချက်ကို ပြည်ထောင်စုအစိုးရအဖွဲ့၏ လုပ်ပိုင်ခွင့်ဖြင့် ကျန်းမာရေးဝန်ကြီးဌာနက ဖေဖော်ဝါရီလ ၁၈ ရက် နေ့တွင် ထုတ်ပြန်ခဲ့ခြင်းဖြစ်သည်။ အဆိုပါ တားမြစ်ချက်အရ အီးစီးကရက် (e-cigarettes)၊ အီး-ရှစ်ရှာ (e-shisha) နှင့် ၎င်းတို့နှင့် ဆက်စပ်သည့် ပစ္စည်းကိရိယာများအားလုံးကို တင်သွင်းခြင်းနှင့် တင်ပို့ခြင်း၊ ရောင်းချခြင်းနှင့် ဖြန့်ဖြူးခြင်း၊ လက်ဝယ်ထားရှိခြင်း၊ သိုလှောင်ခြင်းနှင့် သယ်ဆောင်ခြင်း၊ အသုံးပြုခြင်းနှင့် သုံးစွဲခြင်းများ လုံး၀မလုပ်ဆောင်ရန် ကန့်သတ်ထားသည်။

ထို့အပြင် ဤပိတ်ပင်မှုကို ကျူးလွန်ဖောက်ဖျက်သူများအား အရေးကြီးကုန်စည်နှင့် ဝန်ဆောင်မှုဥပဒေ အရ အရေးယူ ဆောင်ရွက်သွားမည်ဖြစ်ကြောင်း ဝန်ကြီးဌာနက ပြောကြားခဲ့သည်။

"အီးစီးကရက်ဟာ မြန်မာနိုင်ငံမှာတင်မကဘဲ တခြားနိုင်ငံတွေက လူငယ်တွေကြားမှာပါ အလွန်ခေတ်စားလာပါတယ်။ လူအများစုက အီးစီးကရက်ဟာ သာမန်စီးကရက်ထက် အန္တရာယ်နည်းတယ်လို့ ထင်နေကြပေမယ့် ဒါဟာ လုံးဝမှားယွင်းတဲ့ အယူအဆပါ။ အီးစီးကရက်ဟာ အဆုတ်ကို တိုက်ရိုက်ပျက်စီးစေနိုင်သလို၊ စွဲလမ်းစေတဲ့ နီကိုတင်း (nicotine)၊ လေးလံတဲ့ သတ္တုဓာတ်တွေနဲ့ တခြားအဆိပ်သင့်စေတဲ့ ဓာတ်ပစ္စည်းတွေ ပါဝင်ပါတယ်" ဟု ပြည်သူ့ကျန်းမာရေးဦးစီးဌာန၊ ဒုတိယညွှန်ကြားရေးမှူးချုပ် ဒေါက်တာကျော်ကံကောင်းက ပြောကြားခဲ့သည်။

ယခုကဲ့သို့ ပိတ်ပင်ရခြင်းမှာ အထူးသဖြင့် လူငယ်များအကြား ပြည်သူ့ကျန်းမာရေးကို ကာကွယ်ရန်အတွက်ဖြစ်ကြောင်း ၎င်းက ဆက်လက်ပြောကြားခဲ့သည်။

Ref , Bernama & Xinhua

တောင်ဒဂုံမှာ အသက် ငါးနှစ်အရွယ် ကလေးငယ်နှစ်ဦး ပျောက်ဆုံးနေ

ဖေဖော်ဝါရီ ၂၀
Written by Thiri

အသက် ငါးနှစ်ကျော်အရွယ် ကလေးငယ်နှစ်ဦး ခြံဝန်းတစ်ခုထဲမှာ အတူကစားနေစဉ် ပျောက်ဆုံးခဲ့တဲ့ဖြစ်စဉ် မနေ့က ‌ဒဂုံ‌မြို့သစ်‌ တောင်ပိုင်းမြို့နယ်၊ ယောက်ကော်ပန်းခြံအနီးက ကားပစ္စည်း အဟောင်း အရောင်း လဲလှယ် ပြုပြင်တဲ့ ဆိုင်ခြံဝန်းထဲမှာ ဖြစ်ပွားခဲ့တယ်လို့ မိသားစုနဲ့ နီးစပ်သူက MT News ကို ပြောပါတယ်။

ပျောက်ဆုံးခဲ့တာက မနေ့က ဖေဖော်ဝါရီလ ၁၉ ရက်နေ့ ညနေ ၄ နာရီ မိနစ် ၃၀ အချိန်ခန့်ကလို့ သိရပြီး ပျောက်ဆုံးကလေးငယ်တွေက ယောက်ျားလေးတစ်ဦး၊ မိန်းကလေး တစ်ဦး အရွယ်တူ အတန်းကျောင်းအတူတူ ၊ အိမ်နီးနားခြင်း ကစားဖော်တွေလို့လည်း သိရပါတယ်။

‌ပျောက်ဆုံးခဲ့တဲ့ကလေးငယ်ယောက်ျားလေးရဲ့ နာမည်က အောင်ပြည့်စုံလို့ သိရပြီး ပျောက်ဆုံးချိန် ဝတ်ထားတဲ့ အဝတ်အစားက အနီရောင် အင်္ကျီကို ဝတ်ဆင်ထားကာ အသားအရောင် ညိုတယ်လို့ သိရပါတယ်။ အဆိုပါ ကလေးငယ်နဲ့အတူခဲ့တဲ့ ပျောက်ဆုံးခဲ့တဲ့ ကောင်မလေးက သဲသဲတုန်လို့ သိရပြီး ဝတ်ဆင်ထားတဲ့ အဝတ်အစားက အမဲရောင် စပို့ရှပ်နဲ့ အသားဖြူတယ်လို့ သိရပါတယ်။

မိသားစုနဲ့ ရပ်ကွက်နေသူ‌တွေ လိုက်လံရှာဖွေနေ‌ပေမယ့်လည်း MT News က ဆက်သွယ်တဲ့ ဒီနေ့ ဖေဖော်ဝါရီ ၂၀ ရက်နေ့ နေ့လယ်ပိုင်း အချိန်အထိ မတွေ့ရှိသေးဘူးလို့လည်း သိရပါတယ်။

ပျောက်ဆုံးကလေး နှစ်ဦးနဲ့ နီးစပ်သူ အမျိုးသမီးက "ကောင်မလေးရဲ့ အဖေက ကျွန်မတို့ ဆိုင်က အလုပ်သမားပါ။ ကျွန်မတို့က ကားပစ္စည်း ‌ဆိုင်ပါ။ ကလေးရဲ့ အဖေနဲ့ အမေက ကွဲနေတာ။ က‌လေးကလည်း ကျွန်မတို့လက်ပေါ်တင် ကြီးလာတာပါ။ သူ့အဖေနဲ့ အမေကွဲတော့ ကလေးက အဖေနဲ့ ကျန်ခဲ့တယ်။ အဖေလုပ်သူက အလုပ်လာရင် ကလေးကို တစ်ယောက်တည်း ထားခဲ့ဖို့ အဆင်မပြေတော့ ဆိုင်ကို ခေါ်လာတယ်။ ကျွန်မတို့လည်း ဝိုင်းကြည့်ပေး ထိန်းပေးနဲ့ နေလာတာ သုံးနှစ်တောင်ကျော်ပြီ။ ကျောင်းလည်းထားပေးထားပါတယ်။ မနေ့က ကျွန်မတို့ ဥပုသ်လ အစပထမရက်မို့ အိမ်မှာ စီစဉ်စရာလေးတွေရှိတော့ နေ့လယ်ကတည်းက စောပြန်လာတာမှာ ဆိုင်ဘက်မှာ ကလေးပျောက်တယ် ဖြစ်တာပဲ" လို့ MT News က ဆက်သွယ်မေးမြန်းတာကို ပြန်လည်ဖြေကြားပါတယ်။

သဲသဲတုန်နဲ့ အတူ ပျောက်ဆုံးနေတဲ့ အောင်ပြည့်စုံကလည်း အဆိုပါကားပစ္စည်းဆိုင် အနီးနေထိုင်ကြတဲ့ စည်ပင်လုပ်သားမိသားစုရဲ့ သားငယ်လို့ သိရှိရပြီး ဆော့ဖော်ဆော့ဖက်တွေလို့ ဆိုပါတယ်။ ပျောက်ဆုံးနေတဲ့ ကလေးနှစ်ဦးကို မနေ့က ည ၁၂ နာရီကျော်အထိ ရှာဖွေနေသလို ဒီနေ့ မနက်မှာလည်း ဆက်လက်ရှာဖွေနေပြီး ရပ်မိရပ်ဖ‌တွေနဲ့အတူ ရဲစခန်းမှာ အမှုဖွင့်လှစ်ထားတယ်လို့လည်း သိရပါတယ်။

မိသားစုဝင်‌တွေအလွန်စိုးရိမ်ပူပန်လျက်ရှိတာမို့ ပျောက်ဆုံးကလေးနှစ်ဦးကို တွေ့ရှိပါက 09252574562 နဲ့ 09977731898 စတဲ့ဖုန်းနံပါတ်တွေဆီ ဆက်သွယ်ပေးပါရန်လည်း မေတ္တာရပ်ခံထားပါတယ်။

ကိုလံဘီယာသမ္မတနှင့် ဗင်နီဇွဲလားယာယီသမ္မတ တွေ့ဆုံမည်

ကာရာကက်စ်၊ ဖေဖော်ဝါရီ ၂၀

ဗင်နီဇွဲလားယာယီသမ္မတ ဒယ်လ်စီ ရိုဒရီဂွက်ဇ် (Delcy Rodriguez) က ကိုလံဘီယာသမ္မတ ဂူစတာဗို ပက်ထရို (Gustavo Petro) နှင့် လုံခြုံရေးဆိုင်ရာ ကိစ္စရပ်များအပြင် စီးပွားရေးနှင့် စွမ်းအင်ဆိုင်ရာ ကိစ္စရပ်များကို ဆွေးနွေး ရန် မကြာမီတွေ့ဆုံရန် သဘောတူညီခဲ့ကြောင်း ပြောကြားခဲ့သည်ဟု အယ်ဂျာဇီးယားမှ ဖော်ပြခဲ့သည်။

“ကျမတို့ ပြည်သူတွေရဲ့ သာယာဝပြောရေးအတွက် နားလည်မှုရှိတဲ့ ဆက်ဆံရေးနဲ့ အပြန်အလှန် အကျိုးဖြစ်ထွန်း မှုတွေကို ဆက်လက် မြှင့်တင်သွားမှာ ဖြစ်ပါတယ်”ဟု ရိုဒရီဂွက်ဇ်က ဖေဖော်ဝါရီ ၁၈ ရက်တွင် ၎င်း၏ Instagram မှတဆင့် ပြောကြားခဲ့သည်။

ဗင်နီဇွဲလားနှင့် နယ်နိမိတ်ချင်း ထိစပ်နေသည့် ကိုလံဘီယာနိုင်ငံ မြောက်ဘက်စွန်းရှိ လာဂွာဂျီရာ (La Guajira) ဒေသတွင် ပြောကြားသည့် မိန့်ခွန်းအတွင်း ကိုလံဘီယာသမ္မတ ပက်ထရိုက စွမ်းအင်ကဏ္ဍ ပူးပေါင်းဆောင်ရွက် မှုနှင့် အခြေခံ အဆောက်အအုံ စီမံကိန်းများကို ဆွေးနွေးရန် နှစ်နိုင်ငံ နယ်စပ်မြို့ဖြစ်သော ကူကူတာ (Cucuta) ၌ တွေ့ဆုံရန် ရိုဒရီဂွက်ဇ်ကို ဖိတ်ကြားထားသည်ဟု ဆိုသည်။

တွေ့ဆုံမည့် အချိန် အတိအကျနှင့် ပတ်သက်ပြီး ၎င်းက အသေးစိတ် ထုတ်ဖော်ပြောဆိုခြင်း မရှိပေ။

ကိုလံဘီယာနှင့် ဗင်နီဇွဲလားနိုင်ငံတို့သည် ကီလိုမီတာ ၂၂၀၀ (မိုင် ၁၃၇၀) ကျော် ရှည်လျားသည့် နယ်နိမိတ်ချင်း ထိစပ်နေပြီး ထိုနယ်စပ်သည် နှစ်နိုင်ငံကြား မကြာခဏ ဆိုသကဲ့သို့ ထိလွယ်ရှလွယ်ရှိသည့် ဆက်ဆံရေးတွင် အဓိကအခန်းကဏ္ဍမှ ပါဝင်နေသည်။

မကြာသေးမီ နှစ်များအတွင်း ကိုလံဘီယာနိုင်ငံအတွင်းသို့ ဗင်နီဇွဲလား ရွှေ့ပြောင်း နေထိုင်သူများနှင့် ဒုက္ခသည် ၃ သန်းနီးပါး ရောက်ရှိလာမှုနှင့်အတူ နှစ်နိုင်ငံ ဆက်ဆံရေးမှာ ပိုမိုရှုပ်ထွေးလာခဲ့သည်။

ယခုကြေညာချက်သည် ဗင်နီဇွဲလား ခေါင်းဆောင်ဟောင်း နီကိုလပ်စ် မာဒူရို (Nicolas Maduro)ရာထူးမှ ဖယ်ရှား ခံရပြီးနောက် ဗင်နီဇွဲလား အစိုးရသစ်အတွက် အိမ်နီးချင်း နိုင်ငံများနှင့် ဆက်ဆံရေးများကို ထိန်းညှိဆောင်ရွက် နေချိန်တွင် ထွက်ပေါ်လာခြင်းဖြစ်သည်။

ဇန်နဝါရီ ၃ ရက်က အမေရိကန်သည် ဗင်နီဇွဲလားကို ဝင်ရောက် တိုက်ခိုက်ခဲ့ပြီး မာဒူရိုနှင့် ၎င်း၏ဇနီး စီလီယာ ဖလောရက်စ် ( Cilia Flores )တို့ကို ဖမ်းဆီးခေါ်ဆောင်သွားခဲ့သည်။

ထို့နောက် ရက်အနည်းငယ်အကြာတွင် ဗင်နီဇွဲလား တရားရုံးချုပ်က ရိုဒရီဂွက်ဇ်ကို ယာယီသမ္မတအဖြစ် ခန့်အပ်ခဲ့ သည်။

ရိုဒရီဂွက်ဇ်သည် ဗင်နီဇွဲလားစစ်တပ်၊ အာဏာရပါတီနှင့် အမေရိကန်အစိုးရတို့၏ ထောက်ခံမှုဖြင့် ဇန်နဝါရီ ၅ ရက် နေ့တွင် ယာယီသမ္မတအဖြစ် ကျမ်းသစ္စာဆိုခဲ့သည်။

သို့သော် နိုင်ငံတကာ အဖွဲ့အစည်းများနှင့် ဗင်နီဇွဲလား အတိုက်အခံများကမူ ရွေးကောက်ပွဲဖြင့် ရရှိထားသည့် အာဏာ မဟုတ်ခြင်းကြောင့် ရိုဒရီဂွက်ဇ်၏ တရားဝင်မှုကို မေးခွန်းထုတ်နေကြသည်။


Source: အယ်ဂျာဇီးယား

ပုံ - ဗင်နီဇွဲလားယာယီသမ္မတ ဒယ်လ်စီ ရိုဒရီဂွက်ဇ်နဲ့ ကိုလံဘီယာသမ္မတ ဂူစတာဗို ပက်ထရိုကို တွေ့ရစဉ်

RCSS ဥက္ကဋ္ဌအဖြစ် ဗိုလ်ချုပ်ကြီးယွက်စစ်ကို ဆက်ခန့်

ဖေဖော်ဝါရီ ၂၀

ရှမ်းပြည်ပြန်လည်ထူထောင်ရေးကောင်စီ(RCSS/SSA)ဥက္ကဋ္ဌအဖြစ် ဗိုလ်ချုပ်ကြီးယွက်စစ်ကို ဆက်လက် တင်မြှောက်ခဲ့ကြောင်း ၂၀၂၆ ခုနှစ်၊ ဖေဖော်ဝါရီ ၂၀ ရက်တွင် RCSS က ထုတ်ပြန်ခဲ့သည်။

RCSS/SSA ၏ (၂၆)ကြိမ်မြောက် နှစ်ပတ်လည် အစည်းအဝေးကို ၂၀၂၆ ခုနှစ်၊ ဖေဖော်ဝါရီ ၁၆-၁၇ ရက်များတွင် လည်းကောင်း၊ စတုတ္ထအကြိမ်မြောက် ကောင်စီကွန်ဂရက်အား ၂၀၂၆ ခုနှစ်၊ ဖေဖော်ဝါရီ ၁၈ ရက်တွင်လည်း‌ ကောင်း လွယ်တိုင်းလျဲန်း၌ ကျင်းပခဲ့သည်။

ထို့နောက် ဗိုလ်ချုပ်ကြီးယွက်စစ်အား ဥက္ကဋ္ဌအဖြစ် ပြန်လည် ရွေးချယ်တင်မြှောက်ခဲ့ပြီး အကြံပေးအဖွဲ့ဝင် ၂ ဦးကိုလည်း ခန့်အပ်ခဲ့သည်။

ထို့ပြင် ပေါ်လစီကြီးကြပ်ရေးကော်မတီ၊ ဗဟိုအလုပ်အမှုဆောင်ကော်မတီ၊ ဌာနအသီးသီး ဌာနမှူးများအား ရွေးချယ် အတည်ပြုခြင်းများကိုလည်း လုပ်ဆောင်ခဲ့ကြောင်း၊ လာမည့် ၄ နှစ်တာ ရှေ့လုပ်ငန်းစဉ်များကိုလည်း ချမှတ်နိုင်ခဲ့ကြောင်း RCSS/SSA က ထုတ်ပြန်ခဲ့သည်။

RCSS/SSA က “မိမိတို့ အဖွဲ့အစည်းသည် ငြိမ်းချမ်းရေးလုပ်ငန်းစဉ်အပေါ် ရပ်တည်၍ နိုင်ငံရေး ပြဿနာများအား ဆွေးနွေးခြင်း နည်းလမ်းဖြင့် အခြား အဖွဲ့အစည်းများ၊ အဖက်ဖက်တို့နှင့် တွေ့ဆုံညှိနှိုင်းဖြေရှင်းသွားမည်။ စစ်ဘေး ဒဏ်ခံ ပြည်သူများ နေထိုင်ရန် အိမ်ရာများကို မိမိတို့ အဖွဲ့အစည်းမှ ကူညီဆောက်လုပ်ပေးမည်။ အဖွဲ့အစည်း၏ ပေါ်လစီနှင့်အညီ မူးယစ်ဆေးဝါး တိုက်ဖျက်ရေး လုပ်ငန်းများအား ဆက်လက် ဆောင်ရွက်သွားမည်”ဟု ပြော သည်။

ဗိုလ်ချုပ်ကြီးယွက်စစ်သည် RCSS/SSA ဥက္ကဋ္ဌအဖြစ် ၂၀၁၄ ခုနှစ်၊ ဖေဖော်ဝါရီ ၃ ရက်ကတည်းက တာဝန်ယူခဲ့ရာ ယနေ့ ၂၀၂၆ ခုနှစ်၊ ဖေဖော်ဝါရီ ၁၈ ရက်တွင် ထပ်မံ တင်မြှောက်ခံခဲ့ရသည်။

လက်ရှိတွင် RCSS/SSA သည် တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ်(NCA) လက်မှတ် ထိုးထားသလို ပြည်နယ်အဆင့်/ပြည်ထောင်စုအဆင့် ပဏာမ အပစ်အခတ်ရပ်စဲရေးစာချုပ်(Bilateral)လည်း ထိုးထားသည်။

Amino Acid Chelate Fertilizer Market Projected to Reach USD 1.5 Billion by 2032, Fueled by Increasing Demand for Sustainable Agricultural Practices

The global Amino Acid Chelate Fertilizer market is experiencing robust growth as farmers and agricultural professionals seek innovative, environmentally friendly alternatives to traditional fertilizers. These fertilizers, known for their superior nutrient absorption and environmental sustainability, are gaining traction in the agriculture and agri-products sector. According to Market Intelo’s latest market research, the amino acid chelate fertilizer market was valued at USD 720 million in 2023 and is projected to reach USD 1.5 billion by 2032, growing at a CAGR of 8.5% during the forecast period.

Read More -> https://marketintelo.com/repor....t/amino-acid-chelate

လိုင်စင်စည်းကမ်းချက်များ လိုက်နာရန်ပျက်ကွက်သည့် ပုဂ္ဂလိက ကျန်းမာရေးလုပ်ငန်းများကို အရေးယူဆောင်ရွက်နေကြောင်း ကျန်းမာရေးဝန်ကြီး ပြောကြား

◾️ ပုဂ္ဂလိက ကျန်းမာရေးလုပ်ငန်းအတွက် လုပ်ထုံးလုပ်နည်းများနှင့်အညီ ရှိရမည့်အင်္ဂါရပ်များ၊ အချက်အလက်များ ပြည့်စုံစွာတင်ပြလာပါက ကြန့်ကြာမှုမရှိဘဲ လိုင်စင်ခွင့်ပြုထုတ်ပေးနေ

ဖေဖော်ဝါရီ ၂၀
Written by Nyein Kyaw

လိုင်စင်စည်းကမ်းချက်များကို လိုက်နာရန်ပျက်ကွက်သည့် ပုဂ္ဂလိကကျန်းမာရေး လုပ်ငန်းများကို ပုဂ္ဂလိကကျန်းမာရေးလုပ်ငန်းဆိုင်ရာ ဥပဒေ၊ နည်းဥပဒေများနှင့်အညီ အရေးယူဆောင်ရွက်နေကြောင်း ဆောင်ရွက်နေကြောင်း ကျန်းမာရေးဝန်ကြီးဌာန ပြည်ထောင်စုဝန်ကြီး ပါမောက္ခဒေါက်တာသက်ခိုင်ဝင်းက ယမန်နေ့က ကျင်းပသည့် ပုဂ္ဂလိကကျန်းမာရေးလုပ်ငန်းဆိုင်ရာ ဗဟိုအဖွဲ့အစည်းအဝေး (၁/၂၀၂၆) တွင် ပြောကြားသည်။

ကျန်းမာရေးဝန်ကြီးဌာနအနေဖြင့် ပြည်သူများ၏ ကျန်းမာရေးစောင့်ရှောက်မှုကို ပြည်သူ့ဆေးရုံများတွင် ဆောင်ရွက်ပေးလျက်ရှိသကဲ့သို့ ပုဂ္ဂလိကဆေးရုံ၊ ဆေးခန်းများတွင်လည်း ဟန်ချက်ညီညီ ဝန်ဆောင်မှုပေးရန် လိုအပ်သည့်အတွက် စနစ်တကျဖွံ့ဖြိုးတိုးတက်ရန် ကြိုးပမ်းဆောင်ရွက်လျက်ရှိကြောင်း ပြည်ထောင်စုဝန်ကြီးက ပြောကြားသည်။

ပုဂ္ဂလိက ကျန်းမာရေးလုပ်ငန်းဆိုင်ရာ ဥပဒေ၊ နည်းဥပဒေများ၊ လုပ်ထုံးလုပ်နည်းများနှင့်အညီ ရှိရမည့်အင်္ဂါရပ်များ၊ အချက်အလက်များ ပြည့်စုံစွာတင်ပြလာပါက ကြန့်ကြာမှုမရှိဘဲ လိုင်စင်ခွင့်ပြုထုတ်ပေးလျက်ရှိကြောင်း ပြည်ထောင်စုဝန်ကြီးက ပြောကြားသည်။

ဆေးရုံဖွဲ့စည်းပုံများ ဆေးရုံအင်္ဂါရပ်နှင့် ညီညွတ်စွာ တည်ထောင်ဖွင့်လှစ်ရန်ရည်ရွယ်၍ ကြိုတင်ထောက်ခံချက်တင်ပြရန် အလေးထား ဆောင်ရွက်လျက်ရှိပြီး အတည်ပြုထားသော ဗိသုကာပုံစံအတိုင်း တည်ဆောက်ရန် ထိန်းကျောင်းကြီးကြပ်လျက်ရှိကြောင်း ပြည်ထောင်စုဝန်ကြီးက ပြောကြားသည်။

ထို့အတူ လိုင်စင်စည်းကမ်းချက်များကို လိုက်နာရန်ပျက်ကွက်သည့် ပုဂ္ဂလိကကျန်းမာရေး လုပ်ငန်းများကိုလည်း ပုဂ္ဂလိကကျန်းမာရေးလုပ်ငန်းဆိုင်ရာ ဥပဒေ၊ နည်းဥပဒေများနှင့်အညီ အရေးယူ ဆောင်ရွက်လျက်ရှိကြောင်း ပြည်ထောင်စုဝန်ကြီးက ပြောကြားသည်။

ပြည်သူများ လုံခြုံစိတ်ချရသည့် ပုဂ္ဂလိကကျန်းမာရေးစောင့်ရှောက်မှုရရှိစေရန်ရည်ရွယ်၍ ပုဂ္ဂလိကကုသမှု အထောက်အကူပြု သင်တန်းကျောင်းလုပ်ငန်းများနှင့် ပုဂ္ဂလိက ပြင်ပလူနာခွဲစိတ်ကုသရေးလုပ်ငန်းများကို ဥပဒေနှင့်အညီ စိစစ်ကြပ်မတ်နိုင်ရန် ပုဂ္ဂလိကကျန်းမာရေးလုပ်ငန်းဆိုင်ရာ ဥပဒေကို ပြင်ဆင်သည့်ဥပဒေ(၂၀၂၆ခုနှစ်)ကို ပြဋ္ဌာန်းခဲ့ကြောင်း ပြည်ထောင်စုဝန်ကြီးက ပြောကြားသည်။

အဆိုပါ ပြင်ဆင်သည့်ဥပဒေအရ လိုင်စင်မရှိဘဲ ပုဂ္ဂလိကဆိုင်ရာ ဆေးရုံ၊ ကုသမှုအထောက်အကူပြုသင်တန်းကျောင်းနှင့် ပြင်ပလူနာခွဲစိတ်ကုသရေးလုပ်ငန်းများ လုပ်ကိုင်သူများသည် ထောင်ဒဏ် ၅ နှစ်အထိ ချမှတ်ခံရနိုင်ပြီး ခြားပုဂ္ဂလိကကျန်းမာရေးလုပ်ငန်း တစ်ရပ်ရပ်ကိုလည်း လိုင်စင်မရှိဘဲ လုပ်ကိုင်သူများသည် ထောင်ဒဏ် ၁ နှစ်အထိ ချမှတ်နိုင်ကြောင်း သိရသည်။

MMQR စတင်ခဲ့သည့် တစ်နှစ်အတွင်း အသုံးပြုသူ ကုန်သည်ပေါင်း ၄၂၀,၀၀၀ ကျော်နှင့် လူဦးရေ ၂၄ သန်းကျော်ရှိနေပြီး ငွေပမာဏအားဖြင့် ကျပ် ၁၂ ထရီလျံကျော်အထိရှိ

ဖေဖော်ဝါရီ ၂၀
Written by Nyein Kyaw

ငွေသားကိုင်တွယ်သုံးစွဲမှု လျှော့ချစေရန် ဗဟိုဘဏ်မှ ဆောင်ရွက်ခဲ့သည့် မြန်မာကြူအာကုတ် MMQR စတင်ခဲ့သည့် တစ်နှစ်အတွင်း အသုံးပြုသူ ကုန်သည်ပေါင်း ၄၂၀,၀၀၀ ကျော်နှင့် လူဦးရေ ၂၄ သန်းကျော်ရှိနေပြီး ငွေပမာဏအားဖြင့် ကျပ် ၁၂ ထရီလျံကျော်အထိရှိကြောင်း မြန်မာနိုင်ငံတော်ဗဟိုဘဏ်မှ သိရသည်။

ဘဏ်လုပ်ငန်းဝန်ဆောင်မှု အသုံးပြုနိုင်ခြင်း မရှိသေးသူများသာမက ရှိပြီးသားသူများကိုပါ ငွေရေးကြေးရေးစနစ်တွင် ပိုမိုပါဝင်လာနိုင်ပြီး ငွေကြေးဝန်ဆောင်မှုများကို ရယူနိုင်ရန်နှင့် ငွေသားကိုင်တွယ်သုံးစွဲမှုအား လျှော့ချနိုင်ရေးအတွက် ဗဟိုဘဏ်အနေဖြင့် မြန်မာကြူအာကုတ် MMQR ကို ဆောင်ရွက်နိုင်ခဲ့ခြင်းဖြစ်သည်။

MMQR စတင်ပေါ်ပေါက်ခဲ့သည့် ၂၀၂၅ ခုနှစ်၊ ဖေဖော်ဝါရီလ ၂၈ ရက်မှ ၂၀၂၆ ခုနှစ်၊ ဇန်နဝါရီလကုန်အထိ MMQR အသုံးပြုမှုအနေဖြင့် Transaction သန်း ၃၀ ကျော်၊ ငွေပမာဏအားဖြင့် MMK ၁၂ ဒသမ ၇ ထရီလျံကျော်၊ MMQR အသုံးပြုသည့် ကုန်သည်ပေါင်း ၄၂၀,၀၀၀ ဦးကျော်နှင့် အသုံးပြုသူလူဦးရေ ၂၄ သန်းကျော်ရှိနေပြီဖြစ်ကြောင်း ဖော်ပြထားသည်။

ဗဟိုဘဏ်၏ MMQR ကို အသုံးပြုခြင်းဖြင့် အသုံးပြုသူများအနေဖြင့် မိမိကြိုက်နှစ်သက်ရာ Mobile Wallet တစ်ခုကိုသာ အသုံးပြုပြီး ငွေပေးချေနိုင်မည်ဖြစ်သလို ကုန်သည်များအနေဖြင့်လည်း QR မျိုးစုံထားစရာမလိုဘဲ တစ်မျိုးတည်းဖြင့် Mobile Wallet အမျိုးမျိုးကို လက်ခံနိုင်ခြင်းဖြစ်သည်။

ဝတ်စုံဒီဇိုင်းအပြောင်းအလဲ ပြုလုပ်လာမှုကြောင့် နယူးကာဆယ်ပရိသတ်များ အကြီးအကျယ်ပေါက်ကွဲ

ဖေဖော်ဝါရီ ၂၀

နယူးကာဆယ်ဟာ လာမယ့် ရာသီ အိမ်ကွင်းဝတ်စုံတွင် အဖြူရောင်နှင့် အနက်ရောင်အစင်းလိုင်းကို အပြောင်းအလဲ ပြုလုပ်အသုံးပြုရန် စီစဉ်နေပါတယ်။

ပေါက်ကြားလာတဲ့ ၂၀၂၂၆-၂၇ ရာသီ နယူးကာဆယ်အိမ်ကွင်းဝတ်စုံတွင် အဖြူရောင်နှင့် အနက်ရောင်အစင်းလိုင်း ပါဝင်နေဆဲ ဖြစ်ပေမယ့် ကွဲပြားတဲ့ ဒီဇိုင်းအသုံးပြုလာပါမယ်။

ယခုရာသီ အိမ်ကွင်းဝတ်စုံတွင် အနက်ရောင်နှင့် အဖြူရောင် ဒေါင်လိုက်အစင်းကြီးများကို အသုံးပြုထားပေမယ့်လည်း လာမယ့်ရာသီဝတ်စုံမှာတော့ အစင်းလိုင်းငယ်များကိုလည်း အသုံးပြုလာမှာ ဖြစ်ပါတယ်။

နယူးကာဆယ်ဟာ ၁၉၉၀ ခုနှစ်တုန်းကလည်း ယင်းသို့ အိမ်ကွင်းဝတ်စုံဒီဇိုင်း အပြောင်းအလဲ ပြုလုပ် အသုံးပြုရန် ကြိုးပမ်းခဲ့ဖူးပြီး ပြိုင်ဘက်ပရိသတ်များက “The Barcodes” ဆိုပြီး လှောင်ပြောင်မှု ပြုလုပ်ခဲ့ကြပါတယ်။

ယခုလည်း နယူးကာဆယ်ပရိသတ်များဟာ ယင်းသို့ ဝတ်စုံအား အပြောင်းအလဲ ပြုလုပ်လာမှုနှင့်အတူ ပြိုင်ဘက်ပရိသတ်များရဲ့ လှောင်ပြောင်ခြင်းခံလာရမှာ စိုးရိမ်နေကြပါတယ်။

ပရိသတ်တစ်ဦးက "မြင်ဖူးသမျှ ဝတ်စုံတွေထဲမှာ အဆိုးဆုံးပဲ"လို့ ပြောကြားသွားပါတယ်။

အခြားတစ်ဦးကလည်း "ဒါက နယူးကာဆယ်ဝတ်စုံ မဟုတ်ဘူး။ အရမ်းအရမ်း ဆိုးလွန်းတယ်"လို့ ဆိုသွားပါတယ်။

အခြားတစ်ဦးကလည်း "ရှက်ဖို့ကောင်းလိုက်တဲ့ အင်္ကျီ။ အဆိုးဆုံးဝတ်စုံပါ"လို့ ဆိုသွားပါတယ်။

နယူးကာဆယ်ဟာ ၂၀၂၄ ခုနှစ်တုန်းက Adidas နှင့် တစ်နှစ်လျှင် ပေါင်သန်း ၃၀ တန်ဖိုးရှိ အင်္ကျီစပွန်ဆာစာချုပ်ချုပ်ဆိုခဲ့တာ ဖြစ်ပါတယ်။

နယူးကာဆယ်ဟာ လာမယ့်ရာသီဝတ်စုံသစ်အား လာမယ့် နှစ်လအကြာတွင် ကြေညာလာဖို့ ရှိနေပါတယ်။

ဗီနီရှပ်စ်အား လူမျိုးခွဲခြားမှု ပြုလုပ်တယ်လို့ စွပ်စွဲခံနေရတဲ့ ဘင်ဖီကာစတားပရက်စ်တီယန်နီကို ပေါ်တူဂီအာဏာပိုင်များ စုံစမ်းစစ်ဆေးလာ

ဖေဖော်ဝါရီ ၂၀

ပေါ်တူဂီအစိုးရဟာ ဗီနီရှပ်စ်ဂျူနီယာကို လူမျိုးရေးခွဲခြားမှု ပြုလုပ်ခဲ့တယ်လို့ စွပ်စွဲခံနေရတဲ့ ဘင်ဖီကာတောင်ပံကစားသမားဂျီယန်လူကာပရက်စ်တီယန်နီအား စုံစမ်းစစ်ဆေးမှု ပြုလုပ်လာပါတယ်။

အသက် ၂၀ နှစ်ရှိ အာဂျင်တီးနားညာတောင်ပံကစားသမားဟာ ကြားရက် ချန်ပီယံလိဂ်ပွဲစဉ်အတွင်းတွင် ဗီနီရှပ်စ်ဂျူနီယာအား လူမျိုးရေးခွဲခြားမှု ပြုလုပ်ခဲ့ကြောင်း စွပ်စွဲခံထားရပါတယ်။

ဖေဖော်ဝါရီလ ၁၇ ရက်နေ့တုန်းက လစ္စဘွန်းတွင် ကစားတဲ့ ချန်ပီယံလိဂ်ပလေးအော့ဖ်ပထမအကျော့ပွဲစဉ်တွင် ဗီနီရှပ်စ်က လူမျိုးရေးခွဲခြားမှု ခံခဲ့ရကြောင်း ဒိုင်လူကြီးကို အသိပေးပြီးနောက် ပွဲကို ၁၀ မိနစ်ခန့် ရပ်ဆိုင်းခဲ့ရပါတယ်။

ပရက်စ်တီယန်နီဘက်က လူမျိုးရေးခွဲခြားမှု ပြုလုပ်ခဲ့ခြင်း မရှိကြောင်း ငြင်းဆိုထားပေမယ့်လည်း ယူအီးအက်ဖ်အေဘက်က အမှုအား စုံစမ်းစစ်ဆေးမှုများ ပြုလုပ်နေသလို ရီးရဲလ်မက်ဒရစ်ကလည်း သက်သေအထောက်အထားများ ပေးပို့ထားပါတယ်။

ယခုအခါ ပေါ်တူဂီအာဏာပိုင်အဖွဲ့ Authority for the Prevention and Fight against Violence in Sport (APCVD) ကလည်း လူမျိုးရေးခွဲခြားမှု တိုက်ဖျက်ရေး အစီအစဉ်တစ်ရပ်အနေဖြင့် ဗီနီရှပ်စ်အား လူမျိုးရေးခွဲခြားမှု ပြုလုပ်ခဲ့တယ်လို့ စွပ်စွဲခံထားရတဲ့ ပရက်စ်တီယန်နီရဲ့ အဖြစ်အပျက်ကို စုံစမ်းစစ်ဆေးလာပါတယ်။

လိုင်စင်မဲ့နှင့် ဆင်ဆာမဲ့ဇာတ်ကားများပြသည့် Private Cinema များကို အရေးယူမည်

ဖေဖော်ဝါရီ ၂၀

Private Cinema အနေဖြင့် လုပ်ငန်းလိုင်စင်မရှိဘဲ ရုပ်ရှင်ရုံဖွင့်လှစ်ပြသခြင်း၊ ဆင်ဆာမဲ့ဇာတ်ကားများ ပြသခြင်း များ ဆက်လက်ပြုလုပ်ပါက တည်ဆဲဥပဒေများနှင့်အညီ အရေးယူဆောင်ရွက်သွားမည်ကြောင်း ဗီဒီယိုလုပ်ငန်း စိစစ်ကြီးကြပ်ရေးဗဟိုကော်မတီက ယမန်နေ့ (ဖေဖော်ဝါရီ ၁၉ ရက်) တွင် ထုတ်ပြန်ကြေညာထားသည်။

အချို့သော စီးပွားရေးလုပ်ငန်းရှင်များသည် ပရိုဂျက်တာ/ TV အသုံးပြုပုဂ္ဂလိက ရုပ်ရှင်ရုံငယ်များကို ဟိုတယ်/ တည်းခိုခန်းများကဲ့သို့ အခန်းကန့်ပြီး ဖွင့်လှစ်လာကြ၍ မလိုလားအပ်သော လူမှုရေးရှုပ်ထွေးမှုများဖြစ်ပေါ်လာနိုင် ကြောင်း စိစစ်တွေ့ရှိရကြောင်း သိရသည်။

ထို့ကြောင့် ပြသခွင့်လိုင်စင်များ ထုတ်ပေးမှုများရှိပါက ချက်ချင်းရုပ်သိမ်းသွားရန်နှင့် တရားမဝင် ပြသနေမှုများအား ရုပ်မြင်သံကြားနှင့်ဗီဒီယိုဥပဒေအရ အရေးယူဆောင်ရွက်သွားရန် တိုင်းဒေသကြီး/ပြည်နယ်ဗီဒီယိုလုပ်ငန်း စိစစ် ကြီးကြပ်ရေးကော်မတီများသို့ အကြောင်းကြားထားကြောင် ထုတ်ပြန်ချက်အရ သိရသည်။

သို့ရာတွင် ရန်ကုန်တိုင်းဒေသကြီး၊ စမ်းချောင်းမြို့နယ်ရှိ RIO Private Cinema၊ နေပြည်တော်၊ ပျဉ်းမနားမြို့နယ်ရှိ The Vibe Mini Cinema အပါအဝင် အချို့သော Private Cinema များသည် ဆင်ဆာမဲ့ရုပ်ရှင်ဇာတ်ကားများကို အသုံးပြု၍ မလျော်ကန်စွာ တရားမဝင်ဆက် လက်ဖွင့်လှစ်လျက်ရှိကြောင်း စိစစ်တွေ့ရှိရကြောင်းလည်း ထုတ်ပြန်ချက်အရ သိရသည်။

ထို့ကြောင့် လုပ်ငန်းလိုင်စင်မရှိဘဲ ရုပ်ရှင်ရုံဖွင့်လှစ်ပြသခြင်း၊ ဆင်ဆာမဲ့ဇာတ်ကားများပြသခြင်းများ ဆက်လက် ပြုလုပ်ပါက တည်ဆဲဥပဒေများ နှင့်အညီ အရေးယူဆောင်ရွက်သွားမည်ဖြစ်ပါကြောင်း ဗီဒီယိုလုပ်ငန်း စိစစ် ကြီးကြပ်ရေးဗဟိုကော်မတီ အသိပေးကြေညာထားသည်။