နှစ် ၁၀၀ သက်တမ်းအထက်ရှိ အဆောက်အအုံ ၃၈၂ လုံးကို ကိုလိုနီခေတ်ရှေးဟောင်း အဆောက်အအုံဖြစ် သတ်မှတ်ထား

မြန်မာနိုင်ငံတွင် နှစ်၁၀၀ သက်တမ်းအထက်ရှိ အဆောက်အအုံပေါင်း ၃၈၂ လုံးကို ကိုလိုနီခေတ် ရှေးဟောင်းအဆောက်အုံများအဖြစ် အမိန့်ကြော်ငြာစာ ထုတ်ပြန်သတ်မှတ်ခဲ့ပြီး ဖြစ်ကြောင်း ဟိုတယ်၊ခရီးသွားလာရေးနှင့် ယဉ်ကျေးမှုဝန်ကြီးဌာနမှ သိရသည်။
ယမန်နေ့က မန္တလေးတိုင်းဒေသကြီး ပြင်ဦးလွင်ခရိုင်ရှိ ကိုလိုနီခေတ်ရှေးဟောင်း အဆောက်အအုံ ငါးခုကို ကမ္မည်းကြေးပြားတပ်ဆပ်ပြီးနောက် စုစုပေါင်း ၃၈၂ လုံးအထိရှိလာခဲ့ခြင်းလည်း ဖြစ်သည်။
သန့်ရှင်းသူအပေါင်းခရစ်ယာန် ဘုရားကျောင်း၊ နန်းမြိုင်၊ ဂန္ဓာမာမြိုင်၊ ယုဇနမြိုင်နှင့် ရွှေနုလုံးတော် ကာသိုလိပ်ဘုရားရှိခိုးကျောင်းတို့ကို သတ်မှတ်ခဲ့ခြင်းလည်းဖြစ်ပြီး အဆိုပါ အခမ်းအနားကို ဟိုတယ်၊ ခရီးသွားလာရေးနှင့် ယဉ်ကျေးမှုဝန်ကြီးဌာန ဒုတိယဝန်ကြီး ဦးအေးထွန်းလည်း တက်ရောက်ခဲ့ကြောင်း သိရသည်။
“မန္တလေးတိုင်းအတွက် ကိုလိုနီခေတ်ရှေးဟောင်း အဆောက်အအုံ ၁၁၅ လုံးကို သတ်မှတ်ခဲ့ပြီးဖြစ်ကြောင်း” လည်း ဒုတိယဝန်ကြီး ဦးအေးထွန်း ကပြောကြားခဲ့သည်။
ကိုလိုနီခေတ်ရှေးဟောင်း အဆောက်အအုံ သတ်မှတ်သည့်အခါ သမိုင်းတန်ဖိုး ဗိသုကာလက်ရာနှင့် အနုလက်ရာတည်ရှိမှုအခြေအနေ မူလလက်ရာ ကျန်ရှိခြင်း ရှိမရှိ အဆောက်အုံတည်နေရာနှင့် ပတ်ဝန်းကျင်အနေထားတို့ကို ကြည့်ရှုပြီး ဆောင်ရွက်ခြင်းဖြစ်ကြောင်း သိရသည်၊

ဇွဲကပင်တောင်သို့ တောင်တက်သူများအနေဖြင့် စည်းကမ်းရှိစွာ အမှိုက်စွန့်ပစ်ရန် လိုအပ်နေ

မိုးရာသီကာလရောက်သည်နှင့် ခရီးသွားများအကြား ကရင်ပြည်နယ်၊ ဘားအံမြို့ရှိ ဇွဲကပင်တောင်ကို တောင်တက်ရောက်သူများပြားလာကြောင်း သိရသည်။
ထိုသို့များပြားလာသည်နှင့်အမျှ ကြုံတွေ့လာရသည်မှာလည်း အမှိုက်များ၊ ပလတ်စတစ်ဘူးများကို စနစ်တကျ စွန့်ပစ်ခြင်းမရှိဘဲ စည်းကမ်းမဲ့စွာ စွန့်ပစ်နေခြင်းဖြစ်သည်။
“ရေသန့်ဘူးခွံတွေ၊ အချိုရည်ဘူးတွေ၊ ပလတ်စတစ်အိတ်တွေ၊ စားပြီးသား အမှိုက်တွေ ဒီတခေါက်သွားခဲ့တာ ပုံနေတာတွေ့ခဲ့ပါတယ်၊ မြင်သလောက်တော့ ကောက်ခဲ့တယ်” ဟု တောင်တက်သူတစ်ဦးက ရေးသားမျှဝေထားသည်။
မိုးရာသီ၌ ကရင်ပြည်နယ်၊ ဘားအံဒေသသည် ခရီးသွားများအကြား လာရောက်လည်ပတ်မှု များပြားသည့် ဒေသတခုဖြစ်သည်။
သို့သော် စွန့်ပစ်အမှိုက်ပြဿနာနှင့် ပက်သက်၍ နှစ်စဉ် ဖြေရှင်းနေရဆဲ ဖြစ်သည်။
ခရီးသွားများ၊ အထူးသဖြင့် ဇွဲကပင်တောင်တက်သူများအနေဖြင့် အမှိုက်များ၊ စွန့်ပစ်ပစ္စည်းများကြောင့် ပတ်ဝန်းကျင်ထိခိုက်စေမည်ကို သတိပြုစေလိုကြောင်း ခရီးသွားများက ဆိုသည်။

မြန်မာ-ရုရှားနှစ်နိုင်ငံ နိုင်ငံခြားရေးဝန်ကြီးဌာနများကြား သတင်းနှင့် မီဒီယာကဏ္ဍပူးပေါင်းဆောင်ရွက်မည်

မြန်မာ-ရုရှား နှစ်နိုင်ငံ နိုင်ငံခြားရေးဝန်ကြီးဌာနများကြား သတင်းနှင့် မီဒီယာကဏ္ဍပူးပေါင်းဆောင်ရွက်ရေးအတွက်ဆွေးနွေးပွဲကို မေ ၂၈ ရက်က နိုင်ငံခြားရေးဝန်ကြီးဌာန၊ မဲခေါင်-လန်ချန်း အဆောက်အဦ၌ ကျင်းပခဲ့သည်။
ဆွေးနွေးပွဲတွင် မြန်မာနိုင်ငံနှင့် ရုရှားနိုင်ငံတို့၏ ပုံရိပ်ကို နိုင်ငံတကာသို့မှန်ကန်စွာထင်ဟပ်တင်ပြနိုင်ရေး၊ နိုင်ငံခြားရေးဝန်ကြီးဌာနအချင်းချင်းကြားသာမက မီဒီယာကဏ္ဍအချင်းချင်းကြားတွင်ပါ ပူးပေါင်းဆောင်ရွက်မှု မြှင့်တင်ရေး၊ ပြည်သူ့သံခင်းတမန်ခင်းနှင့် အများပြည်သူဆိုင်ရာ သတင်းမီဒီယာတင်ဆက်မှုကဏ္ဍတွင် နှစ်နိုင်ငံပူးပေါင်းဆောင်ရွက်ရေးတို့ကို ဆွေးနွေးခဲ့ကြသည်။
ထို့ပြင် နောက်ဆုံးပေါ် နည်းပညာများအသုံးပြု၍ ဖန်တီးဖြန့်ဝေနေသော သတင်းတု၊ သတင်းမှားများတို-က်ဖျ-က်ရေးကိုလည်းအလေးထားဆွေးနွေးခဲ့ကြသည်။
အဆိုပါ ဆွေးနွေးပွဲကို နိုင်ငံခြားရေးဝန်ကြီးဌာန၊ ပြည်ထောင်စုဝန်ကြီးရုံး၊ ပြည်တွင်း/ပြည်ပဆက်ဆံရေးနှင့် သတင်းပြန်ကြားရေးဌာနခွဲ၊ ပြန်ကြားရေးဝန်ကြီးဌာန၊ မီဒီယာဖွံ့ဖြိုးတိုးတက်ရေးဦးစီးဌာနနှင့် ရုရှားနိုင်ငံခြားရေးဝန်ကြီးဌာန၊ Information and Press Department မှတာဝန်ရှိသူများတက်ရောက်ခဲ့ကြသည်။
ရုရှားကိုယ်စားလှယ်အဖွဲ့သည် မေ ၂၉ ရက်တွင် မြန်မာသတင်းမီဒီယာကောင်စီမှတာဝန်ရှိသူများ၊ မီဒီယာကဏ္ဍမှကိုယ်စားလှယ်များနှင့်လည်း တွေ့ဆုံဆွေးနွေးခဲ့သည်။

တတိယအကြိမ် ပြည်သူ့လွှတ်တော် ဒုတိယပုံမှန်အစည်းအဝေး ပထမနေ့ ကျင်းပလျက်ရှိ

တတိယအကြိမ် ပြည်သူ့လွှတ်တော် ဒုတိယပုံမှန်အစည်းအဝေး ပထမနေ့ကို ယနေ့ (ဇွန် ၂ရက်) ၌ ကျင်းပနေပြီ ဖြစ်သည်။
လက်ရှိကျင်းပနေသည့် ပြည်သူလွှတ်တော်အစည်းအဝေးကို တက်ရောက်ခွင့်ရှိသူ (၃၅၁) ဦး၌ (၃၅၀) ဦး တက်ရောက်လျက်ရှိသည်။
ယနေ့ အစည်းအဝေး၌ပင် ကြယ်ပွင့်ပြမေးခွန်း (၆) ခု မေးမြန်းရန်ရှိသည်ဟု သိရပြီး နိုင်ငံတကာဆက်ဆံရေး ကော်မတီဖွဲ့စည်းနိုင်ရေး လွှတ်တော်၏ အတည်ပြုချက်ရယူသွားရန် ရှိကြောင်းလည်း သိရသည်။
တတိယအကြိမ်လွှတ်တော်များ၏ ဒုတိယပုံမှန် အစည်းအဝေးအတွက် လွှတ်တော် ကိုယ်စားလှယ်များအနေဖြင့် မေ ၃၀ ရက်ထက် မစော၊ ၃၁ ရက်ထက် နောက်မကျစေဘဲ နေပြည်တော်ကို လာရောက်ရခြင်းဖြစ်ပြီး ယခုအချိန်တွင် စတင်ကျင်းပနေပြီ ဖြစ်သည်။

မနက်ဖြန် ဇွန် ၃ ရက်တွင် ထိုင်းနိုင်ငံတစ်ဝန်းလုံးရှိ CI စခန်းများအားလုံး (၁)ရက်ပိတ်မည်

မနက်ဖြန် ဇွန် ၃ ရက်သည် ထိုင်းဘုရင်မင်းမြတ်၏ မိဖုရားခေါင်ကြီးမွေးနေ့ဖြစ်၍ ထိုင်းနိုင်ငံ၏ အများပြည်သူရုံးပိတ်ရက်ဖြစ်ရာ ထိုင်းနိုင်ငံတစ်ဝန်းလုံးတွင်ဖွင့်လှစ်ထားသော CI စခန်းများအားလုံးကို (၁) ရက်ပိတ်မည်ဟု ထိုင်းနိုင်ငံဆိုင်ရာ မြန်မာအလုပ်သမားသံအရာရှိရုံးက အသိပေးခဲ့သည်။
ထို့ကြောင့် ယင်း ရုံးပိတ်ရက်အတွင်း CI စခန်းများ၏ ဝန်ဆောင်မှုအားလုံးကိုယာယီရပ်နားထားမည်ဖြစ်ကာ ဇွန် ၄ ရက်မှစတင်၍ လုပ်ငန်းများကိုပုံမှန်အတိုင်းပြန်လည်ဖွင့်လှစ်ဆောင်ရွက်ပေးသွားမည်ဖြစ်သည်။

ပဲခူးတိုင်းရှိ သံဃနာယကအဖွဲ့ဆရာတော်ကြီးများနှင့် စာသင်တိုက်များကို ပိဋကတ်သုံးပုံ အဋ္ဌကထာကွန်ပျူတာစာမူကျမ်းစာအုပ်များလှူဒါန်း

ပဲခူးတိုင်းရှိ သံဃနာယကအဖွဲ့ဆရာတော်ကြီးများနှင့် စာသင်တိုက်များသို့ ပိဋကတ်သုံးပုံ အဋ္ဌကထာကွန်ပျူတာစာမူကျမ်းစာအုပ်များကို ဇွန် ၁ ရက်နံနက်ပိုင်းက ပဲခူးမြို့၊ ဗုဒ္ဓအသံဓမ္မဗိမာန်တော်ကြီး၌ ဆက်ကပ်လှူဒါန်းခဲ့သည်။
ကြွရောက်တော်မူလာကြသည့် ဆရာတော်ကြီးတို့အား ပိဋကတ်သုံးပုံအဋ္ဌကထာကွန်ပျူတာစာမူကျမ်းစာအုပ်များနှင့် လှူဖွယ်ဝတ္တုပစ္စည်းများကို သာသနာရေးဝန်ကြီးဌာန ပြည်ထောင်စုဝန်ကြီးဦးတင်ဦးလွင်၊ ပဲခူးတိုင်းဝန်ကြီးချုပ်ဦးမျိုးဆွေဝင်းနှင့် ဇနီး၊ တိုင်းဒေသကြီးလွှတ်တော်ဥက္ကဋ္ဌနှင့်ဇနီး၊ တိုင်းဒေသကြီးတရားလွှတ်တော်တရားသူကြီးချုပ်တို့က ဆက်ကပ်လှူဒါန်းခဲ့ကြသည်။

မော်လိုက်မြို့နယ်၌ အခြေခံပညာကျောင်း (၁၄) ကျောင်းဖွင့်လှစ် ကျောင်းသား/သူ (၂၀၂၄) ဦး တက်ရောက်

စစ်ကိုင်းတိုင်း၊ မော်လိုက်မြို့နယ်၌ ၂၀၂၆-၂၀၂၇ ပ ညာသင်နှစ်တွင် အခြေခံပညာစာသင်ကျောင်း (၁၄) ကျောင်းကို ဇွန် ၁ ရက်မှစတင်၍ ဖွင့်လှစ်သင်ကြားပေးလျက်ရှိကြောင်း သိရသည်။
အခြေခံပညာမူလတန်း၊ မူလတန်း (ခွဲ)၊ အလယ်တန်းနှင့် အထက်တန်းကျောင်း (၁၃) ကျောင်း၊ ဘုန်းတော်ကြီးသင်ပညာရေးကျောင်း (၁) ကျောင်း (စုစုပေါင်း ၁၄ ကျောင်း) ကို ဖွင့်လှစ်ခဲ့ရာ ကျောင်းသား/သူပေါင်း (၂,၀၂၄) ဦး တက်ရောက်၍ ပညာသင်ကြားလျက်ရှိကြောင်း သိရသည်။

နိုင်ငံတော်သမ္မတ ဦးမင်းအောင်လှိုင် မွမ်ဘိုင်းမြို့သို့ရောက်ရှိ

အိန္ဒိယနိုင်ငံသို့ တရားဝင်ခရီးစဥ်ရောက်ရှိနေသော နိုင်ငံတော်သမ္မတ ဦးမင်းအောင်လှိုင်သည် ယနေ့ ဇွန် ၂ ရက်နံနက်ပိုင်းက နယူးဒေလီမြို့မှတစ်ဆင့် မွမ်ဘိုင်းမြို့သို့ ဆက်လက်ထွက်ခွာခဲ့သည်။
မွမ်ဘိုင်းမြို့၊ Chhatrapati Shivaji Maharaj International Airport သို့ရောက်ရှိလာသော နိုင်ငံတော်သမ္မတအား မဟာရာ့ရှ်ထရာပြည်နယ်မှတာဝန်ရှိသူများ၊ ကော်လ်ကတ္တားမြို့၊ မြန်မာကောင်စစ်ဝန်ချုပ်နှင့် ဝန်ထမ်းများက ဂုဏ်ပြုကြိုဆိုခဲ့ကြသည်။

စစ်ရှောင်တွေအတွက် အမိုးအကာနဲ့ ကလေးတွေပညာသင်ဖို့ သင်ထောက်ကူပစ္စည်း ၊မိုးကာတွေအရေးပေါ်လိုအပ်နေ

စစ်ဘေးရှောင်ပြည်သူတွေအတွက် အမိုးအကာနဲ့ စစ်ရှောင်ကလေးငယ်တွေအတွက် စာသင်ကြားပေးနိုင်ဖို့ အကူအညီ အထောက်အပံ့တွေ အရေးတကြီး လိုအပ်နေတယ်လို့ စစ်ရှောင်​တွေကို ကူညီနေသူတွေဆီက စုံစမ်းသိရှိ ရပါတယ်။
မိုးရာသီရောက်ရှိလာပြီဖြစ်တာကြောင့် တောထဲမှာ နေထိုင်နေကြရတဲ့ စစ်ဘေးရှောင်ပြည်သူတွေအတွက် အမိုးအကာ ၊ စောင်ခြင်ထောင် စတဲ့ အကူအညီအထောက်အပံ့တွေ လိုအပ်ချက်ပိုများလာတယ်လို့ သိရပါတယ်။
လက်ရှိ ပဲခူးတိုင်း ၊ မကွေးတိုင်း ၊ စစ်ကိုင်းတိုင်း ၊ တနင်္သာရီ တိုင်း၊ ကရင်ပြည်နယ် ၊ ချင်းပြည်နယ် ၊ ကယား ၊ ကချင် ၊ရခိုင် စတဲ့ ဒေသတွေမှာ တိုက်ပွဲတွေ ဖြစ်ပွားမှုရှိနေပြီး စစ်ဘေးရှောင်ပြည်သူကလည်း သိန်းနဲ့ချီရှိနေသေးတာကြောင့် အဆိုပါ စစ်ရှောင်တွေအတွက် အမိုးအကာတွေ လိုအပ်နေတာ ဖြစ်တယ်လို့ သိရပါတယ် ။
စစ်ရှောင်ပြည်သူ သိန်းနဲ့ချီရှိနေပေမယ့် ခုနောက်ပိုင်းမှာ စစ်ရှောင်တွေအတွက် အကူအညီအထောက်အပံ့ရရှိမှုက နည်းလာတာကြောင့်လည်း အကူအညီလိုအပ်ချက်က ပိုများလာတာ ဖြစ်တယ်လို့ သိရပါတယ် ။
" ခုနောက်ပိုင်း အကူအညီတွေက နည်းလာတယ်။လစဥ်ကူညီနေတာတွေတောင် တော်တော်နည်းလာတယ်။ အဲဒီတော့ စစ်ရှောင်တွေကို ကူညီနိုင်ဖို့ ကမ်ပိန်းတွေ ၊ မဲဖောက်တာတွေ လုပ်လာရတယ်။ အဲဒါတွေမှာတောင် မျှော်မှန်းတဲ့ Target မပြည့်မီဘူး ။ ကူညီတဲ့သူတွေလည်း အချိန်ကြာလာတော့ ပန်းလာတဲ့သဘောရှိတယ် ။ မိုးရာသီဖြစ်တော့ အဓိက မိုးကာလိုအပ်ချက်များတယ်။ ပြီးရင် စောင် ၊ ခြင်ထောင် ၊ ဆန် ၊ဆီ လိုအပ်ချက်လည်းရှိတယ်။ " လို့ ပဲခူးတိုင်းထဲက စစ်ရှောင်တွေကို ကူညီနေသူ တယောက် ကပြောပါတယ်။
ဒါကြောင့် စစ်ရှောင်ပြည်သူတွေအတွက် အမိုးအကာ ၊ ဆန် ၊ ဆီ တွေ လှူဒါန်းပေးကြဖို့ အကူအညီတောင်းခံမှုတွေရှိနေ ​ပါတယ်။
အလားတူ အခြေခံပညာစာသင်ကျောင်းတွေလည်း.ဖွင့်လှစ်ပြီဖြစ်တာကြောင့် စစ်ရှောင်စခန်းက ကလေးငယ်တွေ ပညာသင်ကြားနိုင်ဖို့အတွက် ကျောင်းသုံးစာအုပ် ၊ ခဲတံ ၊ ဘောပင် အပါအဝင် သင်ထောက်ကူပစ္စည်း ၊ စာသင်ကြားနိုင်ဖို့ အဆောက်အဦနဲ့ အမိုးအကာ စတဲ့ အကူအညီတွေ လိုအပ်နေတယ်လို့ သိရပါတယ်။
" အခက်အခဲတွေက မသေးဘူး ။ သင်ထောက်ကူပစ္စည်းတွေ ၊ ကလေးတွေ စာသင်နိင်ဖို့ ကျောင်းဆောင်တွေ လိုအပ်နေတယ်။ ရှိတဲ့ကျောင်းဆောင်ဆိုရင်လည်း ပြန်ပြင်ဖို့လိုတာရှိတယ်။ အမိုးအကာတွေလိုတယ်။အလှူရှင်အားနဲ့ မှ အဆင်ပြေမှာပါ ။ လိုအပ်ချက်ကများတယ်။ စစ်ရှောင်တွေကလည်း နေရပ်မပြန်နိုင်တော့ ရောက်တဲ့နေရာမှာ စာသင်နိင်ဖို့အရေးကြီးပါတယ်။ကလေးတွေ စာသင်ကြားနိုင်ဖို့ ကူညီပေးကြပါလို့ ပြောချင်ပါတယ်။ကလေးတယောက်ကျောင်းစရိတ်က တနှစ်ဆိုရင် သိန်းဂဏန်းရှိတယ်။တခါတည်း လှူစရာမလိုပါဘူး ။ နည်းနည်းစီလှူလည်းရပါတယ်။ ကူညီပေးကြပါ။ " ကယားပြည်နယ် ဘက်မှာ စစ်ရှောင်ကူညီနေသူ တယောက်က ပြောပါတယ်။
လက်ရှိဖြစ်နေတဲ့ စစ်ရေးအခြေအနေတွေကြောင့် တောတောင်တွေထဲနဲ့ စစ်ရှောင်စခန်းတွေမှာ စစ်ရှောင်နေရတဲ့ ကျောင်းနေ အရွယ်ကလေးအများစုဟာ အစိုးရကျောင်းကိုတက်ရောက်ဖို့ခက်ခဲတဲ့ အခြေအနေတွေရှိနေတယ်လို့ သိရပါတယ်။

တရုတ်နိုင်ငံရှိ ကျွန်ုပ်၏ဘဝမျှဝေခြင်း


တရုတ်နိုင်ငံ ယူနန်ပြည်နယ်၊ ရွှေလီမြို့ကို ကျွန်တော် ရောက်လာတာ သုံးနှစ်ကျော်ပြီ။ မြန်မာနိုင်ငံဘက်က နယ်စပ်ကို ဖြတ်ပြီး ဒီမြို့ကို ပထမဆုံး ဝင်လာတဲ့နေ့ကို အခုထိ မှတ်မိနေသေးတယ်။ အဲဒီအချိန်မှာ ကျွန်တော်က မန္တလေးတိုင်းဘက်က ထုတ်လုပ်မှုလိုင်းအလုပ်သမားတစ်ယောက်ပဲ။ အလုပ်အကိုင် တည်ငြိမ်ဖို့၊ မိသားစုအတွက် ဝင်ငွေကောင်းကောင်း ရဖို့ ရွှေလီကို လာခဲ့တာ ဖြစ်တယ်။

ရွှေလီမြို့ဟာ နယ်စပ်မြို့ဆိုပေမယ့် လှုပ်ရှားမှု အရမ်းများတယ်။ မနက်ခင်း ၆ နာရီလောက်ဆိုရင် လမ်းပေါ်မှာ ဆိုင်ဖွင့်တဲ့သူတွေ၊ အလုပ်သွားတဲ့သူတွေ၊ မော်တော်ဆိုင်ကယ်နဲ့ အစားအသောက်ပို့တဲ့သူတွေကို တွေ့ရတယ်။ ကျွန်တော်တို့ ထုတ်လုပ်မှုလိုင်းအလုပ်သမားတွေက မနက်စာကို လမ်းဘေးဆိုင်မှာ ဝယ်စားပြီး အလုပ်ခွင်ကို သွားကြတယ်။ တရုတ်အစားအစာကို အစပိုင်းမှာ မရင်းနှီးပေမယ့် အခုတော့ 米线 (မီးရှန်း) နဲ့ 包子 (ပေါင်ဇ်) ကို မနက်တိုင်းစားဖြစ်နေပြီ။

ကျွန်တော် အံ့ဩခဲ့တာက ရွှေလီရဲ့ သယ်ယူပို့ဆောင်ရေးစနစ်ပဲ။ မြို့ထဲမှာ ဘတ်စ်ကားတွေ သန့်ရှင်းပြီး အချိန်မှန်တယ်။ Taxi ခေါ်ရင်လည်း မိုဘိုင်းဖုန်းက app နဲ့ ခေါ်လို့ရတယ်။ အလုပ်ပြီး ညနေဘက် အိမ်ပြန်ချိန်မှာ shared electric bike တွေ ငှားစီးရတာ အရမ်းအဆင်ပြေတယ်။ QR code ကို scan လုပ်ပြီး ချက်ချင်းစီးလို့ရတာကို ပထမဆုံးမြင်တုန်းက ကျွန်တော် တကယ်အံ့ဩခဲ့တယ်။

တရုတ်နိုင်ငံမှာ မိုဘိုင်းငွေပေးချေမှုစနစ်က နေ့စဉ်ဘဝထဲမှာ အရမ်းအရေးကြီးတယ်။ WeChat Pay နဲ့ Alipay ကို ကျွန်တော်တို့လည်း အသုံးပြုတတ်လာကြတယ်။ လက်ဖက်ရည်တစ်ခွက်ဝယ်တာကနေ ဆောက်လုပ်ရေးပစ္စည်းဝယ်တာအထိ ဖုန်းတစ်လုံးနဲ့ အကုန်ရှင်းလို့ရတယ်။ ငွေသားကို မကိုင်ရတာကြောင့် လုံခြုံတယ်လို့လည်း ခံစားရတယ်။ မြန်မာနိုင်ငံမှာလည်း အနာဂတ်မှာ ဒီလိုစနစ်တွေ ပိုပြီးကျယ်ပြန့်လာမယ်လို့ မျှော်လင့်မိတယ်။

ကိုယ်အလုပ်လုပ်တဲ့ နေရာမှာ မြန်မာလူမျိုးတွေလည်း ရှိတယ်၊ တရုတ်အလုပ်သမားတွေလည်း ရှိတယ်။ ဘာသာစကားအခက်အခဲ ရှိပေမယ့် အလုပ်လုပ်ရင်းနဲ့ နားလည်လာကြတယ်။ တချို့တရုတ်လုပ်ဖော်ကိုင်ဖက်တွေက မြန်မာစကား နည်းနည်းတတ်လာပြီး “မင်္ဂလာပါ” လို့ နှုတ်ဆက်တတ်ကြတယ်။ ကျွန်တော်တို့လည်း တရုတ်စကား နည်းနည်းနဲ့ ပြန်ပြောကြတယ်။ အဲဒီလို သေးသေးလေးကစပြီး လူချင်းနီးစပ်လာတာကို ခံစားရတယ်။

ရွှေလီမှာ နေထိုင်တဲ့ မြန်မာအများစုက အလုပ်ကြိုးစားကြတယ်။ တချို့က စားသောက်ဆိုင်မှာ အလုပ်လုပ်တယ်၊ တချို့က ဈေးရောင်းတယ်၊ တချို့က ကုန်တင်ကားမောင်းတယ်။ အားလပ်ရက်တွေမှာ မြန်မာဘုန်းကြီးကျောင်းကို သွားပြီး အချင်းချင်း တွေ့ဆုံကြတယ်။ အိမ်လွမ်းစိတ်ကို အဲဒီလိုပဲ ဖြေဖျောက်ကြတာ များတယ်။

တရုတ်နိုင်ငံသားအများစုက ကျွန်တော်တို့အပေါ် ဖော်ရွေကြတယ်လို့ ကျွန်တော် ခံစားရတယ်။ အလုပ်ခွင်မှာ လက်ဖက်ရည်တိုက်တာ၊ အစားအသောက် မျှဝေတာ၊ နေမကောင်းရင် စိုးရိမ်မေးမြန်းတာမျိုးတွေ ကြုံဖူးတယ်။ နယ်စပ်မြို့ဖြစ်တာကြောင့်လည်း မြန်မာလူမျိုးကို အကျွမ်းတဝင် ရှိနေကြပုံရတယ်။

ဒါပေမယ့် နိုင်ငံခြားမှာ အလုပ်လုပ်ရတာက အမြဲလွယ်ကူတာတော့ မဟုတ်ဘူး။ မိသားစုနဲ့ ဝေးရတာ၊ ဘာသာစကားအခက်အခဲ၊ အလုပ်ပင်ပန်းတာတွေ ရှိတယ်။ ဒါပေမယ့် ကျွန်တော် ရွှေလီမှာ နေထိုင်ရင်း နည်းပညာ၊ စည်းကမ်း၊ မြို့ပြစနစ်တွေက လူနေမှုဘဝကို ဘယ်လောက်ပြောင်းလဲပေးနိုင်တယ်ဆိုတာ မြင်လာရတယ်။

တစ်နေ့နေ့မှာ မြန်မာနိုင်ငံလည်း ငြိမ်းချမ်းပြီး အလုပ်အကိုင်ကောင်းတွေ ပိုများလာမယ်လို့ ကျွန်တော် မျှော်လင့်တယ်။ လူငယ်တွေ နိုင်ငံခြားထွက်ပြီး အလုပ်ရှာဖို့ မလိုတော့ဘဲ ကိုယ့်နိုင်ငံထဲမှာပဲ ဘဝတည်ဆောက်နိုင်မယ့် အခြေအနေ ရောက်လာစေချင်တယ်။ ရွှေလီမှာ ကျွန်တော် သင်ယူခဲ့ရတဲ့ အရာတွေ—အလုပ်ကြိုးစားမှု၊ နည်းပညာအသုံးချမှု၊ မြို့ပြစီမံခန့်ခွဲမှု—တွေက တစ်နေ့ မြန်မာနိုင်ငံအတွက်လည်း အကျိုးရှိလာမယ်လို့ ယုံကြည်နေမိတယ်။