သင်္ဃန်းကျွန်းတွင် ယနေ့နံနက်ပိုင်းက တိုက်ခန်းမီးလောင်မှု​ဖြစ်ပွား၍ အမျိုးသားကြီးတစ်ဦး သေဆုံး

ဖေဖော်ဝါရီ ၂၂
Written by KL

ရန်ကုန်တိုင်းဒေသကြီး၊ သင်္ဃန်းကျွန်းမြို့နယ်၊ ငမိုးရိပ်ရပ်ကွက်၊ ငမိုးရိပ်(၁၀)လမ်း အပိုင်း(၂)ရှိ နှစ်ခန်းတွဲ၊ ခြောက်ထပ်၏ ပထမထပ်တွင် ယနေ့ ဖေဖော်ဝါရီလ ၂၂ ရက် နံနက် ၅ နာရီ ၂၅ မိနစ်ခန်ံ့က မီးလောင်မှုဖြစ်ပွားခဲ့ရာမှ အမျိုးသားကြီးတစ်ဦး သေဆုံးခဲ့ကြောင်း မီးငြှိမ်းသတ်သူများထံမှ သိရသည်။

နှစ်ခန်းတွဲ၊ ခြောက်ထပ်တိုက်ရှိ အလျား ၁၀ ပေ၊အနံ ၅၈ ပေရှိ ပထမထပ်တွင် စက်ဘီးပစ္စည်းအဟောင်းများထားရှိရာအခန်း၌ အဲယားကွန်းဖွင့်ထားစဥ် Safeguard အပူလွန်ကဲကာ မီးပွားထွက်ရာမှ အောက်တွင်ရှိသော ခန်းစီးလိုက်ကာပေါ် မီးပွားကျ၍ မီးစတင်လောင်ကျွမ်းခြင်းဖြစ်ကြောင်း စစ်​ဆေးသူများထံမှသိရသည်။

၁၇ မိနစ်ကြာလောင်ကျွမ်းသော မီးလောင်မှုကြောင့် အသက် ၅၃ နှစ်အရွယ် ဦးမျိုးမင်းထွန်းမှာ မီးခိုးမွှန်၍ သေဆုံးခဲ့ပြီး အသက် ၅၀ အရွယ် အမျိုးသားကြီးတစ်ဦးတွင်လည်း မီးခိုးမွန်ကာ သတိလစ်နေ (မစိုးရိမ်ရ)သဖြင့် အေးချမ်းဖြူစင် မေတ္တာရှင် လူမှုကူညီရေးအသင်းယာဥ်ဖြင့် သင်္ဃန်းကျွန်းစံပြဆေးရုံသို့ ပို့ဆောင်ထားရကြောင်း သိရသည်။

မီး​လာင်မှု​ကြောင့် အဲယားကွန်း၊ ဆောင်းဘောက်စ်၊စက်ဘီးအဟောင်းပစ္စည်း၊ တာယာများ၊ တံခါးနှစ်ချပ်လည်း မီးလောင်ဆုံးရှုံးခဲ့ကြောင်း သိရသည်။

မီးလောင်မှုကို မီးငြှိမ်းသတ်ယာဥ် ​ခြောက်စီး၊ ရေသယ်ယာဥ် တစ်စီး၊ သန္ဓေအရန်မီးသတ်တပ်ဖွဲ့ဝင် ၆၀ ခန့်ဖြင့် ငြှိမ်းသတ်ခဲ့ရာ နံနက် ၅နာရီ ၄၂ မိနစ်တွင် မီးငြိမ်းခဲ့ကြောင်း သိရသည်။

မီးလောင်မှုကြောင့် သေဆုံးခဲ့သော အမျိုးသားကြီးကို ရွှေဥက္ကလာလူမှုကူညီရေးအသင်းယာဥ်ဖြင့် စံပြဆေးရုံသို့ ပို့အပ်ထားကြောင်း သိရသည်။

အမျိုးသားတစ်ဦးသေဆုံးခဲ့သော တိုက်ခန်းမီးလောင်မှုကြောင့် သေဆုံးသူ ဦးမျိုးမင်းထွန်းကို ရာဇသတ်ကြီးဥပဒေပုဒ်မ ၃၀၄-က ၊ ၂၈၅ဖြင့် သင်္ဃန်းကျွန်းမြို့မရဲစခန်းက အမှုဖွင့်ထားကြောင်း သိရသည်။

#သင်္ဃန်းကျွန်း #မီးလောင် #သေဆုံး #ဒဏ်ရာရ #သတိလစ် #mt #mtnews #myanamrtransparency

တောင်ကိုရီးယားကမ်းလွန်မှာ အမေရိကန်နဲ့တရုတ်တိုက်လေယာဉ်တို့ကြား ထိပ်တိုက်တွေ့ဆုံမှုဖြစ်ပွား

ဖေဖော်ဝါရီ ၂၂

ယခုသီတင်းပတ်အတွင်း အမေရိကန်နဲ့တရုတ်တို့ရဲ့ တိုက်လေယာဉ်တွေဟာ တောင်ကိုရီးယားကမ်းရိုးတန်းအနီးမှာ ထိပ်တိုက်တွေ့ဆုံမှုတွေဖြစ်ပွားခဲ့တယ်လို့ သိရပါတယ်။ ဆိုးလ်မြို့တောင်ဘက် (၆ဝ) ကီလိုမီတာအကွာမှာရှိတဲ့ Pyeongtaek မြို့ အိုဆန်လေတပ်စခန်းကနေ ပျံတက်လာတဲ့ F-16 တိုက်လေယာဉ်(၁ဝ)စီးခန့်ဟာ ပင်လယ်ဝါမှာ ရှိတဲ့ နိုင်ငံတကာရေပြင်ပေါ်မှာ ပျံသန်းမှုတွေလုပ်ဆောင်ခဲ့တာဖြစ်တယ်လို့ Korea Herald သတင်းစာက ရေးသားဖော်ပြခဲ့ပါတယ်။

အမေရိကန်ရဲ့ F-16 တိုက်လေယာဉ်တွေဟာ တောင်ကိုရီးယားနဲ့ တရုတ်တို့ရဲ့ လေကြောင်းရန် ကာကွယ်ရေးဇုန် တွေကြားမှာရှိတဲ့ လေပိုင်နက်မှာ ပျံသန်းမှုတွေလုပ်ဆောင်ခဲ့တာဖြစ်တယ်လို့လည်း သိရပါတယ်။ အမေရိကန်ရဲ့ F-16 တိုက်လေယာဉ်တွေက တရုတ်ကမ်းရိုးတန်းသို့ ချဉ်းကပ်လာချိန်မှာ တရုတ်ကလည်း ၎င်းရဲ့ကိုယ်ပိုင်ဂျက် လေယာဉ်တွေကို အဲဒီဒေသတွေကို စေလွှတ်ခဲ့တယ်လို့လည်း သိရပါတယ်။

ဒါပေမယ့်လည်း တိုက်လေယာဉ်ဘယ်နှစ်စီးစေလွှတ်ခဲ့တယ်ဆိုတာကိုတော့ တရုတ်အစိုးရဘက်က ထုတ်ပြန်ပြော ဆိုခဲ့တာမျိုး မရှိခဲ့ဘူးလို့လည်း သိရပါတယ်။ အဲဒီဖြစ်ရပ်အတွင်း အမေရိကန်နဲ့တရုတ်တို့ရဲ့ တိုက်လေယာဉ်တွေဟာ ဝေဟင်မှာ ထိပ်တိုက်တွေဆုံမှုတွေဖြစ်ပွားခဲ့ပေမယ့်လည်း ဘယ်ဖက်ကမှ လေပိုင်နက်ချိုးဖောက်တာမျိုးမရှိခဲ့တာ ကြောင့် အခြေအနေတွေက အရမ်းကြီးမဆိုးရွားခဲ့ဘူးလို့လည်း Korea Herald သတင်းစာက ရေးသားဖော်ပြခဲ့ပါ တယ်။

အီရန်ကျောထောက်နောက်ခံပြု လက်နက်ကိုင်အဖွဲ့တွေကို တိုက်ခိုက်ဖို့ အစ္စရေးပြင်ဆင်နေ

ဖေဖော်ဝါရီ ၂၂

အရှေ့အလယ်ပိုင်းဒေသတစ်ဝှမ်းမှာရှိတဲ့ အီရန်ကျောထောက်နောက်ခံပြု လက်နက်ကိုင်အဖွဲ့တွေအပေါ် ကြီးမား တဲ့ ကြိုတင်တိုက်ခိုက်မှုတွေ စတင်ဖို့ အစ္စရေးစစ်တပ်က ပြင်ဆင်နေတယ်လို့ ဆော်ဒီနေ့စဉ်သတင်းစာ Asharq Al-Awsat က ရေးသားဖော်ပြခဲ့ပါတယ်။

အလားအလာရှိတဲ့ ဒေသတွင်းပဋိပက္ခတွေမှာ အီရန်ကို ထောက်ခံတာမျိုးတွေ မလုပ်ပေးနိုင်စေဖို့အတွက် အစ္စရေးက ဒီလိုမျိုးတိုက်ခိုက်မှုတွေကိုလုပ်ဆောင်ဖို့ ပြင်ဆင်နေတာဖြစ်တယ်လို့လည်း Asharq Al-Awsat သတင်းစာက ရေးသားဖော်ပြခဲ့ပါတယ်။

လက်ဘနွန်က ဟစ်ဘိုလာလက်နက်ကိုင်အဖွဲ့၊ ယီမင်က ဟူသီလက်နက်ကိုင်အဖွဲ့နဲ့ အီရတ်မှာရှိတဲ့ လက်နက်ကိုင် အဖွဲ့တွေရဲ့အစ္စရေးကိုဆန့်ကျင်တဲ့တိုက်ခိုက်မှုမှန်သမျှက ကြီးမားတဲ့လက်တုံ့ပြန်မှုတွေကို ရင်ဆိုင်ရလိမ့်မယ်ဆို တာကို သတိပေးဖို့ ကြားဝင်စေ့စပ်ပေးသူတွေကို အစ္စရေးက ပြောကြားခဲ့တယ်လို့လည်း သိရပါတယ်။

ဒါ့ပြင် အီရန်ဟာ အစ္စရေးနဲ့ဒေသတွင်းမှာရှိတဲ့ ပစ်မှတ်တွေအပေါ် တိုက်ခိုက်နိုင်စွမ်းတွေကို မြှင့်တင်ဖို့အတွက် (၂၀၂၅)ခုနှစ်မှာ အမေရိကန်ဒေါ်လာ(၁)ဘီလျံအပါအဝင် သိသာထင်ရှားတဲ့အရင်းအမြစ်တွေကို ခွဲဝေချထားပေးခဲ့ တယ်လို့လည်း အစ္စရေးသတင်းရင်းမြစ်တွေက ပြောကြားခဲ့ပါတယ်။ အလားအလာရှိတဲ့ထိပ်တိုက်ရင်ဆိုင်မှုတွေမှာ လက်ဘနွန်က ဟစ်ဘိုလာလက်နက်ကိုင်အဖွဲ့နဲ့ ယီမင်အခြေစိုက်ဟူသီလက်နက်ကိုင်အဖွဲ့တို့က ပါဝင်ဖို့ အလားအလာ များနေတယ်လို့လည်း အစ္စရေးသတင်းရင်းမြစ်တွေက အကြံပြုပြောဆိုခဲ့ပါတယ်။

ယနေ့ ရွှေဈေးနဲ့ နိုင်ငံခြားငွေလဲနှုန်းများ
ဖေဖော်ဝါရီ ၂၂

#ရွှေဈေး

-ကမ္ဘာ့ရွှေဈေး
တအောင်စ ၅၁၀၃ ဒေါ်လာ

ရန်ကုန်တိုင်းရွှေလုပ်ငန်းရှင်များအသင်း (YGEA) ရဲ့ရွှေစျေးကွက် အဖွင့်ဈေးနှုန်း

- အကယ်ဒမီ မီးလင်းရွှေ တကျပ်သား
၆,၉၀၀,၀၀၀ ကျပ်

ပြင်ပ အရောင်းအဝယ်ဖြစ်တဲ့ ရွှေဈေးနှုန်း

-အခေါက်ရွှေ တကျပ်သား (ပြင်ပဈေးကွက်)
ရောင်းဈေး ၁၀,၅၁၀,၀၀၀ ကျပ်
ဝယ်ဈေး ၁၀,၄၇၀,၀၀၀ ကျပ်

-၁၅ ပဲရည် တကျပ်သား
ရောင်းဈေး ၁၀,၁၁၀,၀၀၀ ကျပ်
ဝယ်ဈေး ၁၀,၀၇၀,၀၀၀ ကျပ်

* စနစ်သစ်
(၁ိ - ၁၆.၃၂၉၃၂၅ ဂရမ် = ၁၂၀ ရွေး)

-အခေါက်ရွှေ တကျပ်သား (ပြင်ပဈေးကွက်)
ရောင်းဈေး ၁၀,၃၉၀,၀၀၀ ကျပ်
ဝယ်ဈေး ၁၀,၃၅၀,၀၀၀ ကျပ်

-၁၅ ပဲရည် တကျပ်သား
ရောင်းဈေး ၉,၉၉၀,၀၀၀ ကျပ်
ဝယ်ဈေး ၉,၉၅၀,၀၀၀ ကျပ်

“လက်ရှိ ရွှေဈေးကွက်အတွင်း ဈေးနှုန်းအတက်အကျ မငြိမ်သေးတဲ့အတွက် ရောင်းမှား၊ ဝယ်မှား မဖြစ်ဖို့ သတိပြုစေလိုပါတယ်။”

(ရွှေဈေးနှုန်းများ အချိန်နှင့်အမျှ ပြောင်းလဲနိုင်သည်။)

#နိုင်ငံခြားငွေလဲလှယ်နှုန်း

-မြန်မာနိုင်ငံတော်ဗဟိုဘဏ် ရည်ညွှန်းငွေလဲနှုန်း
အမေရိကန် တဒေါ်လာ - ၃၆၅၇ ကျပ်

ပြင်ပပေါက်စျေး

-အမေရိကန်ဒေါ်လာ‌
ရောင်းဈေး - ၃၉၈၀ ကျပ်
ဝယ်ဈေး - ၃၈၈၀ ကျပ်

-စင်္ကာပူဒေါ်လာ
ရောင်းဈေး - ၃၁၄၀ ကျပ်
ဝယ်ဈေး - ၃၀၆၀ ကျပ်

-ယူရို
ရောင်းဈေး - ၄၆၉၀ ကျပ်
ဝယ်ဈေး - ၄၅၇၀ ကျပ်

-ထိုင်းဘတ်
ရောင်းဈေး - ၁၂၈.၂၁ ကျပ်
ဝယ်ဈေး - ၁၂၅ ကျပ်

-မလေးရှားရင်းဂစ်
ရောင်းဈေး - ၁၀၁၉ ကျပ်
ဝယ်ဈေး - ၉၉၃ ကျပ်

-တရုတ်ယွမ်
ရောင်းဈေး - ၅၇၆ ကျပ်
ဝယ်ဈေး - ၅၆၂ ကျပ်

-ဂျပန်ယန်း
ရောင်းဈေး - ၂၅.၆၅ ကျပ်
ဝယ်ဈေး - ၂၅.၀၁ ကျပ်

-အိန္ဒိယရူပီး
ရောင်းဈေး - ၄၃.၈၅ ကျပ်
ဝယ်ဈေး - ၄၂.၇၅ ကျပ်

-ကိုရီးယားဝမ်
ရောင်းဈေး - ၂.၇၅ ကျပ်
ဝယ်ဈေး - ၂.၆၈ ကျပ်

-စတာလင်ပေါင်
ရောင်းဈေး - ၅၃၆၅ ကျပ်
ဝယ်ဈေး - ၅၂၃၀ ကျပ်

-ဩစတြေးလျဒေါ်လာ
ရောင်းဈေး - ၂၈၁၉ ကျပ်
ဝယ်ဈေး - ၂၇၄၉ ကျပ်

-ကနေဒါဒေါ်လာ
ရောင်းဈေး - ၂၉၀၈ ကျပ်
ဝယ်ဈေး - ၂၈၃၅ ကျပ်

-ဟောင်ကောင်ဒေါ်လာ
ရောင်းဈေး - ၅၀၉ ကျပ်
ဝယ်ဈေး - ၄၉၆ ကျပ်

-ယူအေအီး
ရောင်းဈေး - ၁၀၈၃ ကျပ်
ဝယ်ဈေး - ၁၀၅၆ ကျပ်

ငွေလဲနှုန်းများ အချိန်နှင့်အမျှ ပြောင်းလဲနိုင်သည်။

***သတ်မှတ်ဈေးအတိုင်း အရောင်းအဝယ်မလုပ်ပါက အရေးယူခံရနိုင်သည်။

ဒီနေ့မနက်အစောပိုင်းက ရန်ကုန်ကမြို့နယ်သုံးခုမှာ မီးလောင်မှု ဖြစ်ပြီး မီးခိုးမွှန်လို့ တယောက်သေ ၊တယောက်သတိလစ်

ဖေဖော်ဝါရီ ၂၂
GG (VOM )

ဒီကနေ့ ဖေဖော်ဝါရီ ၂၂ ရက်နေ့ မနက်အစောပိုင်းက ရန်ကုန်က မြို့နယ်သုံးခုမှာ နေအိမ်နဲ့ ဘုန်းကြီးကျောင်း မီးလောင်မှုဖြစ်ပွားပြီး အမျိုးသားတယောက် သေဆုံးခဲ့တယ်လို့ သိရပါတယ်။

သင်္ဃန်းကျွန်းမြို့နယ် ၊ တောင်ဒဂုံမြို့နယ် နဲ့ လှည်းကူးမြို့နယ်တို့ရှိ နေအိမ်နဲ့ ဘုန်းကြီးကျောင်းမှာ မီးလောင်ခဲ့တာဖြစ်ပြီး လူသေဆုံးမှုကတော့ သင်္ဃန်းကျွန်းမြို့နယ် တိုက်ခန်းမီးလောင်းမှုမှာ ဖြစ်ပွားခဲ့တာ ဖြစ်တယ်လို့ သိရပါတယ် ။

သင်္ဃန်းကျွန်းမြို့နယ် ၊ ငမိုးရိပ်ရပ်ကွက် ၊ ငမိုးရိပ်(၁၀)လမ်း၊ အပိုင်း(၂) တိုက်ခန်း ပထမထပ်မှာ ဒီကနေ့ မနက်အစော ၅ နာရီခွဲလောက်က မီးလောင်မှုကြောင့် ပိုင်ရှင်အမျိုးသားသေဆုံးကာ နောက်ထပ်အမျိုးသားတယောက်လည်း မီးခိုးမွှန်ပြီး ဆေးကုသမှုခံယူခဲ့ရတယ်လို့ သိရပါတယ်။

" စက်ဘီးတွေထားတဲ့ တိုက်ခန်းမီးလောင်တာပါ ။ အဲဒီတိုက်ခန်းမှာမှ နေတဲ့ အခန်းပိုင်ရှင်သေဆုံးပါတယ်။မီးလောင်ဒဏ်ရာနဲ့ မီးခိုးမွှန်ပြီး ဆုံးတာပါ။ နောက်တယောက်ကကျတော့ မီးလောင်တဲ့အခန်းရဲ့ အပေါ်ထပ်အခန်းကပါ ။မီးခိုးမွှန်ပြီး သတိလစ်လို့ ဆေးရုံပို့ခဲ့တယ်။ " လို့ မြေပြင်ကူညီရေး လုပ်ဆောင်ခဲ့တဲ့ လူမှုကူညီရေးအဖွဲ့ဝင်တယောက်က ပြောပါတယ်။

မီးလောင်မှုအတွင်း သေဆုံးအမျိုးသားကတော့ အသက် ၄၀ ဝန်းကျင်အရွယ်ဖြစ်ပြီး မီးခိုးမွှန်ပြီး သတိလစ်မေ့မြောခဲ့သူက အသက် ၅၀ ဝန်းကျင် အရွယ်ဖြစ်ကြောင်း ၊ နှစ်​ယောက်လုံးကို စံပြဆေးရုံကို ပို့ဆောင်ခဲ့တယ်လို့ သိရပါတယ်။

လှည်းကူမြို့နယ်၊ မြို့မရပ်ကွက်၊ နှင်းဆီလမ်းမှာက မနက်အစော ၁ နာရီ ခွဲကျော်လောက်မှာ နေအိမ်မီးလောင်မှုဖြစ်ပွားခဲ့တာဖြစ် ကြောင်းသိရပါတယ်။

တောင်ဒဂုံမြို့နယ်မှာတော့ မနက်အစော ၁ နာရီ ၁၅ မိနစ်လောက်မှာ ၁၆ရပ်ကွက်၊ အမှတ်(၂)လမ်းမဘေးရှိ ဘုန်ကြီးကျောင်းမှာ မီးလောင်ခဲ့တာဖြစ်တယ်လို့ သိရပါတယ်။

မီးခိုးမွှန်ပါက စက္ကန့်ပိုင်းအတွင်းမှာ အောက်စီဂျင်ပြတ်လပ်ပြီး မူးမေ့လဲကျကာ အသက်ဆုံးရှုံးနိုင်တာကြောင့် တကယ်လို့ မီးလောင်မှုနဲ ကြုံတွေ့ရပါက အဝတ်စကို ရေစိမ်ပြီး ရေစိုနေတဲ့ အဝတ်စကို နှာခေါင်းစည်းပြီး ထွက်ပေါက်ကို အမြန်ဆုံးရှာကာ အပြင်ကို ထွက်နိုင်ဖို့လိုအပ်တယ်လို့ လူမှုကူညီရေး အဖွဲ့ဝင်တွေက အကြံပြုပြောဆိုထားပါတယ်။

ဓာတ်ပုံ - အေးမြဖြူစင်လူမှုကူညီရေးအသင်း

၂၀၂၅ ခုနှစ်တွင် ဂိုး ၈၀ သွင်းခဲ့တဲ့ ဘရာဇီးပါရမီရှင်အား ခေါ်ယူနိုင်ရေး ဥရောပကလပ်ကြီးများနှင့်အပြိုင် ယူနိုက်တက် ကြိုးပမ်းနေ

ဖေဖော်ဝါရီ ၂၂

ယူနိုက်တက်ဟာ ၂၀၂၅ ခုနှစ်တွင် ဂိုး ၈၀ အထိ သွင်းယူနိုင်ခဲ့တဲ့ ဘရာဇီးပါရမီရှင်ကစားသမားအား ခေါ်ယူနိုင်ရေး အခြေအနေကောင်းနေကြောင်း သိရပါတယ်။

အက်သလက်တီကိုမီနိုင်းရိုးတွင် ကစားနေတဲ့ အသက် ၁၆ နှစ်ရှိ ဂါဘရီရယ်ဗီနီနိုဟာ လူငယ်အသင်းများတွင် ခြေစွမ်းပြကစားပြီးနောက် ဘရာဇီးရဲ့အလားအလာအကောင်းဆုံးပါရမီရှင်များထဲမှ တစ်ဦးအဖြစ် နာမည်ကြီးနေသူလည်း ဖြစ်ပါတယ်။

သူဟာ ခြေစွမ်းပြကစားနိုင်မှုနှင့်အတူ ဥရောပထိပ်သီးကလပ်များအပြင် ပရီးမီးယားလိဂ်ကလပ်အမြောက်အမြားတို့ရဲ့ ဆက်သွယ်ခြင်းလည်း ခံနေရပါတယ်။

သူဟာ အသက် ၁၆ နှစ်သာ ရှိနေသေးတာကြောင့် ဖီဖာစည်းမျဉ်းအရ ဥရောပသို့ ပြောင်းရွှေ့ရေး နောက်ထပ် ၂ နှစ်စောင့်ဆိုင်းရပါဦးမယ်။

ဒါပေမယ့်လည်း ဘရာဇီးရဲ့အလားအလာအကောင်းဆုံးတိုက်စစ်သမားကို ကမ္ဘာတလွှားထိပ်သီးကလပ်များက ခေါ်ယူရေး အပြိုင် ကြိုးပမ်းနေကြပါတယ်။

ယင်းအထဲတွင် ချဲလ်ဆီး၊ အာဆင်နယ်၊ မန်စီးတီးတို့လည်း ပါဝင်နေပေမယ့် ယူနိုက်တက်က ဂါဘရီရယ်အား ခေါ်ယူနိုင်ရေး အခြေအနေအကောင်းဆုံး ဖြစ်နေပါတယ်။

ဥရောပကလပ်များဟာ ပြီးခဲ့တဲ့နှစ်များအတွင်းတွင် ဘရာဇီးကလပ်များမှ ပါရမီရှင်များကို အကြိုစာချုပ်ချုပ်ဆိုပြီး အသက် ၁၈ နှစ်ပြည့်ချိန်တွင် ခေါ်ယူဖူးပါတယ်။

ရီးရဲလ်မက်ဒရစ်ဟာ ဗီနီရှပ်စ်၊ ရိုဒရီဂို၊ အန်းဒရစ်တို့အား ခေါ်ယူဖူးသလို ချဲလ်ဆီးကလည်း အက်စ်တီဗာအိုအား ပါးမီးရပ်စ်မှ ခေါ်ယူဖူးပါတယ်။

ဒါကြောင့်လည်း ယူနိုက်တက်ဟာ ဂါဘရီရယ်ကို အကြိုစာချုပ်ဖြင့် ခေါ်ယူပြီး အသက် ၁၈ နစ်ပြည့်ချိန်တွင်မှ အသင်းနှင့် ပူးပေါင်းနိုင်ရေး လုပ်ဆောင်နေပါတယ်။

ဖိအားမခံနိုင်ပါက အခြားကလပ်တစ်ခုသို့ သွားကစားရန် အာဆင်နယ်စတားများကို အာတီတာ ပြောကြားလာ

ဖေဖော်ဝါရီ ၂၂

အာဆင်နယ်နည်းပြမီခေးလ်အာတီတာက ကစားသမားများအနေဖြင့် ဆူညံသံကို ကိုင်တွယ်နိုင်ခြင်း မရှိပါက အခြားကလပ်တစ်ခုတွင် သွားကစားကြရန် ပြောကြားလာပါတယ်။

အာဆင်နယ်ဟာ ပရီးမီးယားလိဂ်အမှတ်ပေးဇယားအား ၂ မှတ်ဖြတ်ကာ ဦးဆောင်ထားနိုင်ပြီး ၂၀၀၃-၀၄ ရာသီနောက်ပိုင်း ပထမဆုံးအမှတ်ပေးဖလား ဆွတ်ခူးရေး တိုက်ပွဲဝင်နေပါတယ်။

အာဆင်နယ်ဟာ နောက်ဆုံး ပရီးမီးယားလိဂ် ၇ ပွဲတွင် ၂ ပွဲတည်းသာ အနိုင်ရရှိပြီးနောက် မန်စီးတီးအား ၂ မှတ်တည်းသာ ဖြတ်လာနိုင်တာ ဖြစ်ပါတယ်။

၎င်းတို့ဟာ ယနေ့ညတွင် အမှတ်ပေးဇယားအဆင့် ၁၆ နေရာမှ မြောက်လန်ဒန်ပြိုင်ဘက် စပါးစ်အား အဝေးကွင်းသို့ သွားရောက် ကစားရပါမယ်။

အာဆင်နယ်ဟာ နောက်ဆုံး ပရီးမီးယားလိဂ် ၃ ရာသီဆက် ချန်ပီယံဖြစ်ရေး အခြေအနေကောင်းခဲ့ပေမယ့် ရာသီနှောင်းပိုင်းတွင် ရလဒ်မကောင်းမှုကြောင့် လီဗာပူး၊ မန်စီးတီးတို့အား ချန်ပီယံဆုကို လက်လွှတ်ခဲ့ရပါတယ်။

အာတီတာက "သူတို့(ကစားသမားတွေ)ကို ဆူညံသံရဲ့အစိတ်အပိုင်းဖြစ်ချင်လား မဖြစ်ဘူးလားဆိုတာ မေးနိုင်တယ်။ မဖြစ်ချင်ဘူးဆိုရင်တော့ သွားတော့။ အခြားကလပ်တစ်ခုမှာပဲ သွားကစားချေ။ လူတိုင်းက အမှတ်ပေးဖလားအတွက် ကျွန်တော်တို့ကို တိုက်ပွဲဝင်ဖို့ ၁၀ နှစ်၊ ၁၅ နှစ်လောက် တောင်းဆိုလာကြတယ်။ အခု ကျွန်တော်တို့ အဲဒီနေရာမှာ ရှိနေတယ်။ ဒီတော့ ဆူညံသံနဲ့ မကြုံချင်ဘူးလား။ ဆူညံသံက ဒါရဲ့အစိတ်အပိုင်းတစ်ရပ်ပါ။ ကျည်ဆန်တွေက ဒါတွေရဲ့အစိတ်အပိုင်းတစ်ရပ်ပါ။ ဒါကို မှန်ကန်တဲ့ နည်းလမ်းနဲ့ ကိုင်တွယ်ရမယ်။ ကိုယ်ရည်မှန်းထားတာ ဖြစ်အောင် လုပ်ရမယ်"လို့ ပြောကြားသွားပါတယ်။

ဗီနီရှပ်စ်ဂျူနီယာကြုံရပြီး ရက်အနည်းငယ်အကြာတွင် လူမျိုးရေးခွဲခြားဆက်ဆံခံလာရတဲ့ ဖိုဖာနာနှင့် မီဘရီ

ဖေဖော်ဝါရီ ၂၂

ဝက်စ်လေဖိုဖာနာနှင့် ဟန်နီဘယ်မီဘရီတို့ဟာ ချဲလ်ဆီးနှင့် ဘန်လေတို့ တစ်ဂိုးစီသရေကျပြီးနောက် အွန်လိုင်းတွင် လူမျိုးရေးခွဲခြားဆက်ဆံခြင်းခံလာရပါတယ်။

အသက် ၂၅ နှစ်ရှိ ချဲလ်ဆီးနောက်ခံလူဖိုဖာနာဟာ စနေနေ့ညပွဲစဉ်တွင် ဂျိမ်းစ်ဝတ်ပရောက်စ်ကို ပြစ်ဒဏ်ကျူးလွန်မှုကြောင့် နှစ်ဝါတစ်နီဖြင့် ထုတ်ပယ်ခြင်းခံရပြီးနောက် ဆိုရှယ်မီဒီယာတွင် မျောက်ပုံ Emoji များ ပေးပို့ခံလာရတာဖြစ်ပါတယ်။

အဆိုပါပွဲစဉ်တွင် ချဲလ်ဆီးဟာ တစ်ယောက်အလျှော့ဖြင့် ကစားရပြီးနောက် ပရောက်စ်ရဲ့ အလွတ်တည်ကန်ဘောမှ တဆင့် ဖလမ်းမင်းရဲ့ ခေါင်းတိုက်ဂိုးကြောင့် ချေပဂိုးပေးခဲ့ရပါတယ်။

ချဲလ်ဆီးပရိသတ်များဟာ ဘန်လေနှင့်သရေကျပြီးနောက် အနီကတ်ပြထုတ်ပယ်ခြင်းခံရတဲ့ ဖိုဖာနာအား ပစ်မှတ်ထားလာကြတာလည်း ဖြစ်ပါတယ်။

ပရိသတ်တစ်ဦးက “piece of s***” လို့ ရေးသားသွားသလို “You made us draw with Burnley.” လည်း ဆိုသွားပါတယ်။

ဖိုဖာနာက "၂၀၂၆ ရောက်နေပြီ။ ဘာမှ မပြောင်းလဲဘူး။ အရင်အတိုင်းပဲ။ ဒီလူတွေဟာ ဘယ်တုန်းကမှ အရေးယူမခံရဘူး။ လူမျိုးရေးခွဲခြားမှုနဲ့ပတ်သက်ပြီး ကျွန်တော်တို့ တိုက်ဖျက်ရေးအစီအစဉ်ကြီးတွေ လုပ်ခဲ့ကြတယ်။ ဘာမှ မထူးခြားလာဘူး"လို့ ဆိုသွားပါတယ်။

ချဲလ်ဆီးကလည်း ဖိုဖာနာအား လူမျိုးရေးခွဲခြားမှတဲ့ လုပ်ရပ်အပေါ် ရှုတ်ချကြောင်း ကြေညာသွားသလို သက်ဆိုင်ရာအဖွဲ့အစည်းများနှင့် ပူးပေါင်းကာ အရေးယူနိုင်ရေး ကြိုးစားသွားမည်ဖြစ်ကြောင်း ထုတ်ပြန်သွားပါတယ်။

တဖက်တွင် ယူနိုက်တက်အလယ်တန်းကစားသမားဟောင်းမီဘရီမှာလည်း အင်စတာဂရမ်တွင် လူမျိုးရေးခွဲခြားမှုခံခဲ့ရပါတယ်။

ဘန်လေစတားက "ကျေးဇူးပြုပြီး ကိုယ့်ကိုယ်ကိုရေ သားသမီးတွေကိုပါ ပညာပေးပါ"လို့ ရေးသားသွားပါတယ်။

ဖိုဖာနာနှင့် မီဘရီတို့ဟာ ကြားရက်တုန်းက ချန်ပီယံလိဂ်ပလေးအော့ဖ်ပွဲစဉ်တွင် ဗီနီရှပ်စ်ဂျူနီယာ လူမျိုးရေးခွဲခြားမှုခံရပြီးနောက် ရက်အနည်းငယ်အကြာတွင် အထက်ပါအဖြစ်အပျက် ကြုံတွေ့လာတာလည်း ဖြစ်ပါတယ်။

ICE ရဲ့ ပစ်ခတ်မှုများကြောင့် အမေရိကန်ခရီးစဉ်ကို ဖျက်သိမ်းလာတဲ့ ဝါဒါဘရီမင်

ဖေဖော်ဝါရီ ၂၂

ဂျာမန်ကလပ် ဝါဒါဘရီမင်ဟာ Immigration and Customs Enforcement (ICE) အရာရှိများရဲ့ ပစ်ခတ်မှုကြောင့် လူ ၂ ဦးသေဆုံးခဲ့ရပြီးနောက် အမေရိကန်ခရီးစဉ်ကို ဖျက်သိမ်းလာပါတယ်။

ဘွန်ဒက်စ်လီဂါကလပ်ဟာ မေလတွင် မန်နီဆိုတာ၊ ဒီထရွိုက်သို့ သွားရောက်ကာ ခြေစမ်းပွဲများ ကစားရန် စီစဉ်ထားတာပါ။

ဒါပေမယ့် ပြီးခဲ့တဲ့လတုန်းက Immigration and Customs Enforcement (ICE) က Operation Metro Surge အစီအစဉ်အတွင်း အမေရိကန်နိုင်ငံသားများဖြစ်ကြတဲ့ အဲလက်စ်ပရက်တီ၊ ရီနီဂုဒ်တို့ သေဆုံးခဲ့ပြီးနောက် အမေရိကန်နိုင်ငံတလွှား ဆန္ဒပြသပိတ်မှောက်မှုများ ဖြစ်ပါတယ်။

ဒါကြောင့်လည်း ဝါဒါဘရီမင်ဟာ အားကစား၊ စီးပွားရေး၊ နိုင်ငံရေး အကြောင်းပြချက်များဖြင့် ခြေစမ်းပွဲများ ကစားမယ့် အစီအစဉ်အား ဖျက်သိမ်းလာခဲ့ပြီ ဖြစ်ပါတယ်။

ဒါ့အပြင် ဝါဒါဘရီမင်က ဘွန်ဒက်စ်လီဂါတွင် တန်းမဆင်းရရေး တိုက်ပွဲဝင်နေမှုကလည်း အမေရိကန်ခရီးစဉ်ကို ဖျက်ခဲ့ရတဲ့အကြောင်းရင်းများထဲမှ တစ်ခုဖြစ်ကြောင်းလည်း ဆိုသွားပါတယ်။

ဝါဒါဘရီမင်ဟာ နောက်ဆုံး ဘွန်ဒက်စ်လီဂါ ၁၂ ပွဲတွင် ၁ ပွဲတည်းသာ အနိုင်ရရှိကာ အမှတ်ပေးဇယားအဆင့် ၁၆ နေရာတွင် ရပ်တည်နေပါတယ်။

လီဗာပူးကို ကိုင်တွယ်ရန် သင့်တော်တဲ့ နည်းပြမဟုတ်လို့ ပြောဆိုခဲ့တဲ့ ဝိန်းရွန်းနီအား အန်းဆလော့ တုံ့ပြန်လာ

ဖေဖော်ဝါရီ ၂၂

လီဗာပူးနည်းပြအန်းဆလော့ဟာ ၎င်းအား လီဗာပူးနည်းပြအဖြစ် ကိုင်တွယ်ရန် သင့်တော်တဲ့ နည်းပြမဟုတ်ဘူးလို့ ပြောဆိုခဲ့တဲ့ ဝိန်းရွန်းနီအား တုံ့ပြန်ပြောဆိုလာပါတယ်။

ယူနိုက်တက်နှင့် အင်္ဂလန်စတားဟောင်းဝိန်းရွန်းနီဟာ ပထမဆုံးရာသီတွင် ပရီးမီးယားလိဂ်ဖလား ဆွတ်ခူးနိုင်ခဲ့ပေမယ့် ယခုရာသီတွင် ရုန်းကန်ရပြီးနောက် အန်းဆလော့အား အပြင်းအထန် ဝေဖန်မှု ပြုလုပ်ခဲ့ပါတယ်။

ရွန်းနီက ဆလော့မှာ ယခင်နည်းပြဂျာဂင်ကလော့ပ်ကဲ့သို့ ဆွဲဆောင်မှုမျိုး မရှိကြောင်း ပြောဆိုခဲ့ပါတယ်။ ကလော့ပ်မှာ လီဗာပူးနှင့်အတူ ချန်ပီယံလိဂ်၊ အက်ဖ်အေ၊ ပရီးမီးယားလိဂ်နှင့် လိဂ်ဖလားတို့ ရယူခဲ့သူ ဖြစ်ပါတယ်။

ဒါ့အပြင် ရွန်းနီက လီဗာပူးအနေဖြင့် ယခုရာသီတွင် ချန်ပီယံလိဂ်ဝင်ခွင့် မရရှိပါက အန်းဆလော့အား ထုတ်ပယ်သင့်ကြောင်းလည်း ပြောကြားသွားပါသေးတယ်။

ယခုအခါ အန်းဆလော့က "တစ်ယောက်နဲ့ တစ်ယောက် နှိုင်းယှဉ်ပြောဆိုတာက လူတိုင်း လုပ်ခွင့်ရှိတဲ့အရာပါ။ ဒါပေမယ့် ဒီလို တစ်ယောက်နဲ့ တစ်ယောက် ခိုင်းနှိုင်းပြောဆိုတာက မှန်ကန်တဲ့လုပ်ရပ်လား။ ကျုပ်တို့အားလုံး ကွဲပြားကြတယ်။ ဂျာဂင်နဲ့ ကျွန်တော့်အကြား တူညီတာက နှစ်ဦးလုံး အမှတ်ပေးဖလား ရထားတယ်။ ဒါက သိပ်မဆိုးဘူးမဟုတ်လား။ နည်းပြတစ်ယောက်မှာ အနိုင်ပိုရလေလေ စိတ်အားထက်သန်မှု များလာလေလေပါ။ ဝိန်းရွန်းနီနဲ့ ခင်ဗျား သဘောထားတိုက်ဆိုင်သလား မဆိုင်သလား မသိပါဘူး။ ဒါပေမယ့် ပျမ်းမျှ ပြောရရင် လူတွေက ကျုပ်က ပြီးခဲ့တဲ့ရာသီတုန်းက ဒီရာသီထက် ပိုပြီးတော့ အရည်အချင်းရှိတယ်လို့ ပြောကြမှာပါ။ ဒါပေမယ့် သူတစ်ဦးတည်းကပဲ ဒီလိုအမြင်မျိုး ရှိတာလည်း ဖြစ်ကောင်းဖြစ်နိုင်တယ်။ ကျုပ် မသိပါဘူး။ ဒါနဲ့ပတ်သက်ပြီး ပထမဆုံးအကြိမ် ကြားဖူးတာပါ။ ဒါပေမယ့် ဂျာဂင်မှာ အရည်အချင်းတွေ ရှိတယ်လို့ ပြောတာကတော့ မျှတတယ်လို့ ထင်တယ်"လို့ ပြောကြားသွားပါတယ်။

လီဗာပူးဟာ ယခုရာသီတွင် ရုန်းကန်နေရတယ်ဆိုပေမယ့်လည်း နောက်ဆုံး ပရီးမီးယားလိဂ်ပွဲ ၁၄ ပွဲတွင် ၂ ပွဲတည်းသာ ရှုံးနိမ့်ထားပြီး ချန်ပီယံလိဂ်ဝင်ခွင့် ရရန် အခြေအနေကောင်းနေတုန်း ဖြစ်ပါတယ်။