ကယားပြည်နယ်သည် ပြန်လည်အေးချမ်းသာယာပြီး ဖွံ့ဖြိုးတိုးတက်သည့် လမ်းကြောင်းပေါ် အချိန်တိုတို အတွင်း ပြန်လည်ရောက်ရှိနေပြီဖြစ်

ကယားပြည်နယ်တွင် လက်နက်ကိုင်အကြမ်းဖက် အဖျက်မှောင့်လုပ်ငန်းများ ပေါ်ပေါက်ခဲ့ပြီး တည်ငြိမ်အေးချမ်းမှုပျက်ပြားကာ ပြည်သူများ ဆင်းရဲဒုက္ခမျိုးစုံ ကြုံတွေ့ခဲ့ရကြောင်း နိုင်ငံတော် ယာယီသမ္မတ နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင် ကပြောသည်။
အခက်ခဲများကို ကြံ့ကြံ့ခံရင်း ဒေသပြန်လည်အေးချမ်းတည်ငြိမ်ရေးနှင့် ပြန်လည်ထူထောင်ရေးလုပ်ငန်းများကို ပြန်လည်လုပ်ဆောင်ခဲ့ပြီး ပညာရေးကဏ္ဍ၊ကျန်းမားရေးကဏ္ဍအပါအဝင် ကဏ္ဍအသီးသီဂကို စနစ်တကျ ပြန်လည်တည်ဆောက်ထူထောင်ပေးပြီး ဒေသခံပြည်သူများ ၏ နေ့စဉ်ဘဝအဆင်ပြေစေရေးအတွက် ဆောင်ရွက်ပေးလျက်ရှိကြောင်းလည်း ယာယီသမ္မတက ပြောသည်။
ယနေ့ကျရောက်သည့် (၇၄) နှစ်မြောက် ကယားပြည်နယ်နေ့ အခမ်းနားကို ပေးပို့သည့် သဝဏ်လွှာတွင် ယာယီသမ္မတက အထက်ပါအတိုင်း ထည့်သွင်းပြောကြားခဲ့ခြင်းဖြစ်သည်။
လက်ရှိကယားပြည်နယ်သည် ပြန်လည်အေးချမ်းသာယာပြီး ဖွံ့ဖြိုးတိုးတက်သည့် လမ်းကြောင်းပေါ်သို့ အချိန်တိုတိုအတွင်း ပြန်လည်ရောက်ရှိနေပြီး ဆက်လက်၍လည်း တိုးတက်အောင်မြင်မှုများ ရှိစေရန် နိုင်ငံတော်မှ ကြိုးစားဆောင်ရွက်ပေးသွားမည်ဖြစ်ကြောင်း လည်း ယာယီသမ္မတက ပြောသည်။
မိမိတို့ ဒေသတည်ငြိမ်အေးချမ်းမှု ပျက်ပြားအောင် ဖွံ့ဖြိုးတိုးတက်မှု နှေးကွေးနှောင့်နှေးအောင် မိမိတို့ဒေသခံ တိုင်းရင်းသားလက်နက်ကိုင်အဖွဲ့များက လုပ်ဆောင်မှုများသည့် အရုပ်ဆိုးအကျည်းတန်ကြောင်းလည်း ယာယီသမ္မတက ပြောသည်။
တစ်နိုင်ငံလုံးသာယာအေးချမ်းစေရေးအတွက် အားသွန်ခွန်စိုက် အတူတကွကြိုးစား ဆောင်ရွက်သွားရန် နှင့် ကယားပြည်နယ်တွင်းရှိ တိုင်းရင်းသားအားလုံးကလည်း စိတ်တူကိုယ်တူ အတွေးအကြုံတူစွာဖြင့် ပြည်နယ်အေးချမ်းသာယာရေးကနေ နိုင်ငံအကျိုးကို ဘက်ပေါင်းစုံမှ ဝိုင်ဝန်းဆောင်ရွက်သွားရန် လည်း ယာယီသမ္မတက သဝဏ်လွှာက တဆင့် တိုက်တွန်းပြောကြားထားသည်။

ပဲနွယ်ကုန်းမြို့ အနီးတဝိုက်က ရွာတွေမှာ တိုက်ပွဲဖြစ်ပွားပြီး ရွာလေးရွာထက်မနည်း စစ်ရှောင်နေရ

ပဲခူးတိုင်း ၊ ပဲနွယ်ကုန်းမြို့နယ်ထဲက ကျေးရွာဘက်တွေမှာ တိုက်ပွဲတွေ ပြင်းထန်ဖြစ်ပွားနေပြီး ရွာလေးရွာထက်မနည်း နေရပ်စွန့်ခွာ စစ်ဘေးရှောင်နေကြရတယ်လို့ စုံစမ်းသိရှိပါတယ်။
ပဲနွယ်ကုန်းမြို့နယ်ထဲက ကြိမ်ခါးကုန်းရွာ ၊ သင်နှီးခေါင်းရွာ ၊ သရက်အုပ်ရွာ နဲ့ အင်ကုန်းရွာ ၊ ဆေးရိုးခင်ရွာ တွေဘက်မှာ တိုက်ပွဲတွေ ဖြစ်ပွားနေတာဖြစ်ကြောင်း ၊ တိုက်ပွဲကြောင့် အဲဒီကျေးရွာတွေက ဒေသခံတွေဟာ ရွာလုံးကျွတ်နီးပါး စစ်ရှောင်နေကြရတာ ဖြစ်တယ်လို့ သိရပါတယ်။
အခု တိုက်ပွဲဖြစ်နေတဲ့ ကျေးရွာတွေဟာ ပဲနွယ်ကုန်းမြို့နဲ့ တမိုင်အကွာအဝေးလောက်သာ ဝေးတယ်လို့ သိရပါတယ်။
" ပစ်ခတ်သံတွေ လက်နက်ကြီးသံတွေ ဒီတိုင်းကြားနေရတယ်။ အရင်ရက်က ဖြစ်တာ ကြိမ်ခါးကုန်းဘက်တွေမှာ ဖြစ်တာ ။အခုညကစပြီး သဲဖြူရွာတောင်ဘက် ဆေးရိုးခင် ရွာမှာ ဖြစ်နေတာ ။ ကျွန်တော်တို့နဲ့ နီးတော့ ဒီတိုင်းကြားနေရတယ်။ တိုက်ပွဲဖြစ်တဲ့ဘက်က ရွာတွေကတော့ အကုန်စစ်ရှောင်နေရတယ်။ မြို့ပေါ်လည်း လာကြတယ်။ နီးစပ်ရာလည်း သွားကြတယ်။ ညကဆေးရိုးခင်ဘက်က လက်နက်ကြီး ပစ်ခတ်မှုက အုန်းနှဲရိုးရွာထဲတောင် ကျတယ်။ " လို့ ဒေသခံက ပြောပါတယ် ။
ညက ဆေးရိုးခင်ရွာမှာ ဖြစ်ပွားခဲ့တဲ့ တိုက်ပွဲအတွင်းမှာ အုန်းနှဲရိုးရွာရှိ နေအိမ်အချို့ ထိခိုက်ပျက်စီးမှု ရှိခဲ့သလို လူနှစ်ယောက်လည်း ထိခိုက်ဒဏ်ရာရရှိ ခဲ့တယ်လို့ သိရပါတယ်။
ဒါအပြင် ကြိမ်ခါးကုန်း ၊ သင်နှီးကောင်း ၊သရက်အုပ်ရွာ ၊အင်ကုန်းရွာ ဘက်မှာ ဖြစ်ပွားတဲ့ တိုက်ပွဲအကြားမှာလည်း ကြိမ်ခါးကုန်း နဲ့ သင်နှီးကောင်း ရွာနှစ်ရွာရှိ အိမ်ခြေတော်တော်များများ မီးလောင် ပျက်စီးမှု ရှိထားတယ်လို့ သိရပါတယ်။
" ခုဖြစ်တဲ့နေရာက မြို့နဲ့ သိပ်မဝေးပေမယ့် သွားလာလို့မရပါဘူး ။ လမ်းပိုင်း အကုန်ပိတ်ထားတယ်။အဲဒီတော့ ထိခိုက် သေဆုံးတို့ ၊ အိမ်ပျက်စီးက အတိကျ မသိနိုင်ဘူး ။ အိမ်တွေ ပျက်စီးမှုရှိတယ် ၊ များတယ် ဆိုတာလောက်ပဲသိရတယ်။ " လို့ သူကထပ်ပြောပါတယ်။
ဆေးရိုးခင်ရွာမှာက ဇန်နဝါရီ ၁၃ ရက်နေ့ညပိုင်းကမှ တိုက်ပွဲ စတင်ဖြစ်ပွားတာ ဖြစ်ပြီး ကြိမ်ခါးကုန်း ၊အင်ကုန်း ၊သရက်အုပ်ရွာ ၊ သင်နှီးကောင်း ရွာတွေဘက်မှာတော့ ဇန်နဝါရီ ၁၁ ရက်နေ့ မနက်
ပိုင်းကတည်းက စပြီး ဒေသတွင်းလက်နက်ကိုင်အဖွဲ့နဲ့ အစိုးရတပ်အကြား တိုက်ပွဲဖြစ်ပွား နေတာဖြစ်တယ်လို့ သိရပါတယ်။
အဆိုပါ တိုက်ပွဲအတွင်းမှာ အပြန်အလှန် လက်နက်ကြီး လက်နက်ငယ် ပစ်ခတ်မှုအပြင် လေ
ကြောင်းတိုက်ခိုက်မှုတွေလည်း ဆက်တိုက်ဆိုသလို ရှိခဲ့တယ်လို့ သိရှိရပါတယ်။
ပဲနွယ်ကုန်းမြို့ အနီးတဝိုက်ရှိ ကျေးရွာဘက်မှာ တိုက်ပွဲတွေ ဖြစ်ပွားနေပေမယ့် ​မြို့ပေါ်မှာတော့ အခြေအနေ အေးဆေးဆဲ ဖြစ်ပြီး သွားလာလှုပ်ရှားမှု ရှိနေဆဲ ဖြစ်တယ်လို့သိရပါတယ် ။
အလားတူ ဇန်နဝါရီ ၁၁ ရက်နေ့ မနက်အစောပိုင်းကလည်း ဖြူးမြို့နယ် ၊ ရန်ကုန်-မန္တလေး လမ်းဟောင်းပေါ်ရှိ ဆားဂွန်းရွာစစ်ဆေးရေးဂိတ်ကို ဒေသတွင်းလက်နက်ကိုင်အဖွဲ့က ဝင်ရောက်တိုက်ခိုက်ခဲ့တဲ့အတွက် အစိုးရတပ်နဲ့ တိုက်ပွဲဖြစ်ပွားခဲ့ပါတယ်။
ဇန်နဝါရီ ၉ ရက်၊ မနက် အစောပိုင်းကလည်း ပဲခူးတိုင်း ၊ ကျောက်တံခါးမြို့နယ် ၊ ရန်ကုန် - မန္တလေး လမ်းဟောင်းပေါ်ရှိ တောကျွဲအင်းမြို့ (ခ) အောင်မြင်မြို့ကို ဒေသတွင်း လက်နက်ကိုင်တပ်တွေက ဝင်ရောက်တိုက်ခိုက်မှု ရှိခဲ့ပါတယ်။
ဇန်နဝါရီ ၇ ရက်နေ့ကလည်း ပဲခူးတိုင်း အနောက်ပိုင်း ၊ မင်းလှမြို့နယ် နဲ့ လက်ပံတန်း မြို့နယ်အကြား ၊ ရန်ကုန် - ပြည် ကားလမ်းမပေါ်မှာ အစိုးရတပ်နဲ့ ဒေသတွင်း လက်နက်တပ်ဖွဲ့ တွေအကြား တိုက်ပွဲ ဖြစ်ပွားမှု ရှိခဲ့ပါတယ်။

ရွှေဈေး ကျပ်သိန်း ၁၀၀ နီးပါးအထိ အတက်ကြမ်းလာလို့ ဆိုင်တချို့ အခေါက်ရွှေ အရောင်းပိတ်

မြန်မာ့ရွှေဈေး တကျပ်သား ကျပ် သိန်း ၁၀၀ နီးပါးအထိ ထပ်မံ စံချိန်ချိုး မြင့်တက်လာပြီးတဲ့နောက် ဒီကနေ့ ဇန်နဝါရီ ၁၄ ရက်၊ နေ့လယ်ပိုင်းမှာ အခေါက်ရွှေ ရောင်းချတဲ့ ရွှေဆိုင်တချို့ အရောင်း ပိတ်လိုက်ပြီ ဖြစ်တယ်လို့ ဈေးကွက်အတွင်းက စုံစမ်းသိရှိပါတယ်။
ကမ္ဘာ့ရွှေ‌ဈေး စံချိန်တင် မြင့်တက်နေမှုနဲ့အတူ အခေါက်ရွှေဈေးဟာ ဒီကနေ့ ဇန်နဝါရီ ၁၄ ရက်၊ နေ့လယ်ပိုင်းမှာ တကျပ်သား ကိုးဆယ့်ကိုးသိန်း နှစ်သောင်း ဝန်းကျင်ကို ရောက်ရှိနေတာဖြစ်ပြီး သုံးရက်အတွင်း ကျပ် သုံးသိန်းကျော် မြင့်တက်လာခဲ့တာ ဖြစ်ပါတယ်။
“ကမ္ဘာ့ရွှေလည်း အတော်လေးကို အတက်ကြမ်းတယ်။ ပြည်တွင်းရွှေလည်း ဈေးအရမ်းတက်တော့ တချို့ အခေါက်ရောင်းတဲ့ ဆိုင်တွေလည်း အရောင်းပိတ်ကြတယ်။ ဆိုင်တိုင်းတော့ မဟုတ်ဘူးပေါ့။ အရောင်း ပိတ်ကြပေမယ့် အဝယ်ကိုတော့ လက်ခံ ဝယ်ပေးတယ်။ အခေါက်ပဲ သီးသန့်ပိတ်ကြတာ။ ၁၅ ပဲရည်တွေတော့ မပိတ်ဘူး။ ဈေးတွေ မငြိမ်တော့ အရောင်းအဝယ် အခြေအနေကလည်း တော်တော်လေး ပါးနေပါတယ်” လို့ ရွှေလုပ်ငန်းရှင် တယောက်က ပြောပါတယ်။
လက်ရှိမှာ အခေါက်ရွှေကို အောင်သမာဓိ၊ အကယ်ဒမီ၊ မြန်မာချမ်းသာနဲ့ ရွှေဘုံသာ အောက်လမ်းရှိ ရွှေအခေါက် ရောင်းဝယ်ရေး အစရှိတဲ့ ရွှေဆိုင်ပေါင်း ခြောက်ဆိုင် ဝန်းကျင်လောက်မှာသာ အရောင်းအဝယ် ပြုလုပ်နေတာ ဖြစ်တယ်လို့ သူက ပြောပါတယ်။
ကမ္ဘာ့ရွှေဈေးဟာ ဒီကနေ့ ဇန်နဝါရီ ၁၄ ရက်၊ မွန်းလွဲပိုင်းမှာ တအောင်စ ဒေါ်လာ ၄၆၃၄ ဝန်းကျင်ကို ရောက်ရှိနေတာဖြစ်ပြီး သုံးရက်အတွင်း တအောင်စ ဒေါ်လာ ၆၀ နီးပါး ဈေးမြင့်တက်ခဲ့တာကို တွေ့ရပါတယ်။
“ကမ္ဘာ့ဈေးက လတ်တလော အခြေအနေအရ ၄၇၀၀ ဈေးတန်းအထိ ဆက်သွားနိုင်တယ်။ အမေရိကန်နဲ့ အီရန်အရေးကလည်း ပိုပြီးတင်းမာလာနေတယ်။ ထရမ့်ကလည်း အသင့်ဖြစ်နေပြီလို့ ဆိုထားတယ်။ ဒါကြောင့် ကမ္ဘာ့ရွှေဈေးက ကျဖို့လမ်း မမြင်သေးဘူး။ တဆက်တည်း ဒီဘက်မှာလည်း မြန်မာ့ရွှေဈေးက ဂဏန်းသုံးလုံးကို အချိန်မရွေး ရောက်လာနိုင်သလို အဲဒီကနေလည်း ဆက်ကျော်သွားနိုင်ခြေ ရှိနေတယ်” လို့ ရွှေဈေးကွက် လေ့လာ စောင့်ကြည့်သူတယောက်က သုံးသပ် ပြောဆိုပါတယ်။
လက်ရှိ ကမ္ဘာတဝန်းက စစ်ရေး အခြေအနေတွေကြောင့်အပြင် အမေရိန်ကန်ရဲ့ ဘဏ်အတိုးနှုန်း လျှော့ချမှု‌တွေကြောင့်လည်း ကမ္ဘာ့ရွှေစျေးက အတက်ဘက်မှာ ရှိနေနိုင်သေးတယ်လို့ ဆိုပါတယ်။
လက်ရှိမှာ ရွှေဈေးနှုန်းတွေ မြင့်တက်နေသလို နိုင်ငံခြား ငွေလဲဈေးကွက်မှာလည်း အမေရိကန်ဒေါ်လာဈေးတွေ တဖြည်းဖြည်းချင်း မြင့်တက်လာနေတာကို တွေ့ရပြီး ဒီကနေ့ ဇန်နဝါရီ ၁၄ ရက်၊ နေ့လယ်ပိုင်းမှာ တဒေါ်လာ ပြင်ပပေါက်ဈေး ၄၁၄၀ ကျပ် ဝန်းကျင်မှာ ရောက်ရှိနေကာ သုံးရက်အတွင်း ဒေါ်လာ ၁၃၀ ကျပ် ဝန်းကျင် မြင့်တက်လာတာ ဖြစ်ပါတယ်။
မြန်မာ့ရွှေဈေးဟာ ၂၀၂၁ ခုနှစ်၊ ဇန်နဝါရီလ ၂၉ ရက်နေ့က အခေါက်ရွှေ တကျပ်သား ဆယ့်သုံးသိန်း နှစ်သောင်းဝန်းကျင်သာ ရှိခဲ့တာဖြစ်ပြီး ငါးနှစ်အတွင်း ခုနစ်ဆကျော်အထိ မြင့်တက်လာခဲ့တာ ဖြစ်ပါတယ်။

ICJ ကိစ္စ ကိုယ်စားလှယ်အဖွဲ့များနှင့် တစ်သားတည်းရပ်တည်ဟုဆို
------------------

နယ်သာလန်နိုင်ငံ ၊ သည်ဟိတ်ဂ်မြို့ရှိ အပြည်ပြည်ဆိုင်ရာတရားရုံး (ICJ)မှာ မြန်မာနိုင်ငံရဲ့ အမှန်တရားနဲ့တရား မျှတမှုအတွက် ရင်ဆိုင်ဖြေရှင်းနေတဲ့ မြန်မာကိုယ်စားလှယ်အဖွဲ့နဲ့ တစ်သားတည်း ရပ်တည်ကြောင်း မြန်မာနိုင်ငံ သတင်းမီဒီယာကောင်စီက သဘောထားထုတ်ပြန်ပါတယ်။
ပြည်ထောင်စုသမ္မတ မြန်မာနိုင်ငံတော် နိုင်ငံတော်သမ္မတရုံးဝန်ကြီးဌာန(၂) ပြည်ထောင်စုဝန်ကြီးဦးကိုကိုလှိုင်၊ ဥပဒေရေးရာဝန်ကြီးဌာနနဲ့ ပြည်ထောင်စုရှေ့နေချုပ် ဒေါက်တာသီတာဦးတို့ ဦးဆောင်တဲ့ မြန်မာကိုယ်စား လှယ်အဖွဲ့ဟာ(ICJ )မှာ မြန်မာနိုင်ငံအတွက် တရားမျှတမှုနဲ့ အမှန်တရားအတွက် အစွမ်းကုန်ဆောင်ရွက်နေ ကြပါတယ်။
ICJ အမှုအခင်းဟာ မြန်မာနိုင်ငံအတွက် သွေးရိုးသားရိုးအမှုအခင်းတစ်ခုမဟုတ်ဘဲ နိုင်ငံတော်ရဲ့ ဂုဏ်သိက္ခာ ၊ အချုပ်အခြာအာဏာနဲ့ အမျိုးသားအကျိုးစီးပွားတို့နဲ့ သက်ဆိုင်တဲ့ နိုင်ငံအရေးဖြစ်ပါတယ်။ မြန်မာနိုင်ငံက မကျူးလွန်တဲ့အမှုတစ်ခုကို နိုင်ငံတကာအထင်အမြင်လွဲမှားအောင်၊ မတရားစွပ်စွဲခံရအောင်၊ မြေပြင်နဲ့ကွဲလွဲတဲ့ သတင်းအချက်အလက်အမှားတွေနဲ့ စွပ်စွဲနေတာသာဖြစ်တယ်လို့ ဆိုပါတယ်။
ICJ က ဂုဏ်သရေရှိတရားသူကြီးတွေအနေနဲ့ မွန်မြတ်တဲ့တရားစီရင်ရေးကျင့်ဝတ်သိက္ခာကို ထိန်းသိမ်းကာ အမှန်ကို အမှန်အတိုင်း ဘက်လိုက်မှုကင်းစွာနဲ့ သုံးသပ်ဆုံးဖြတ်နိုင်မယ်လို့ မျှော်လင့်ကြောင်းနဲ့ အခုအမှုကိစ္စဟာ မြန်မာနိုင်ငံရဲ့ ဂုဏ်သိက္ခာ၊ အချုပ်အခြာအာဏာ၊ အကျိုးစီးပွားနဲ့သက်ဆိုင်တဲ့ကိစ္စဖြစ်တာကြောင့် မြန်မာ တစ်မျိုးသားလုံးရဲ့ အရေးကိစ္စဖြစ်တဲ့အတွက် မြန်မာကိုယ်စားလှယ်အဖွဲ့နဲ့ တစ်သားတည်း ရပ်တည်တယ်လို့ ထုတ်ပြန်ချက်မှာ ဖော်ပြထားပါတယ်။

မြန်မာမှ သီရိလင်္ကာသို့ ဆန်တန်ချိန် ၅၀၀ လှူဒါန်း
-------------------

မြန်မာနိုင်ငံအနေနဲ့ သီရိလင်္ကာနိုင်ငံမှာရှိတဲ့ မုန်တိုင်းဒဏ်သင့်ပြည်သူတွေအတွက် ဆန်တန်ချိန် ၅၀၀ ပေးပို့လှူ ဒါန်းခဲ့တယ်လို့ ရန်ကုန်တိုင်းဒေသကြီးအစိုးရအဖွဲ့ကနေ သိရပါတယ်။
သီရိလင်္ကာနိုင်ငံကို ဆန်တန်ချိန် ၅၀၀ လှူဒါန်းတဲ့အခမ်းအနားကို ဇန်နဝါရီ ၁၃ ရက်က အလုံမြို့နယ်၊ ရန်ကုန် ဆိပ်ကမ်း Asia World Port Terminal ရှိ အစည်းအဝေးခန်းမမှာ ပြုလုပ်ခဲ့တာပါ။
အခမ်းအနားမှာ ရန်ကုန်တိုင်းဒေသကြီးဝန်ကြီးချုပ်ပေးအပ်တဲ့ ဆန်တန်ချိန် ၅၀၀ ပေးပို့လှူဒါန်းမဲ့ စာရွက်စာတမ်း တွေကို မြန်မာနိုင်ငံဆိုင်ရာ သီရိလင်္ကာနိုင်ငံသံအမတ်ကြီးက လက်ခံရယူခဲ့ပါတယ်။
အဲဒီနောက် သီရိလင်္ကာနိုင်ငံကို သယ်ယူပို့ဆောင်မဲ့ ကွန်တိန်နာတွေကို လှည့်လည်စစ်ဆေးခဲ့ပြီး မြန်မာနိုင်ငံဆန် စပါးအသင်းချုပ်ကလည်း သင်္ဘောတင်ပို့မဲ့ အစီအစဉ်တွေကို ရှင်းလင်းတင်ပြခဲ့တယ်လို့ သိရပါတယ်။

ပြည်ပသံရုံးတစ်ရုံးမှ ပုဂ္ဂိုလ်တချို့နှင့်လျှို့ဝှက်စွာတွေ့ဆုံခဲ့သည့် PPPပါတီဥက္ကဋ္ဌ ဒေါက်တာသက်သက်ခိုင်နှင့် CECအဖွဲ့ဝင် ဒေါ်ထက်ထက်လှိုင်တို့ကို အရေးယူမည်ဟု ထုတ်ပြန်
------------------------------------------

ပြည်သူ့ရှေ့ဆောင်ပါတီ(PPP)ဥက္ကဋ္ဌ ဒေါက်တာသက်သက်ခိုင်နဲ့ ဗဟိုအလုပ်အမှုဆောင်အဖွဲ့ဝင် ဒေါ်ထက်ထက်လှိုင်တို့ကို ပြည်ပသံရုံးတစ်ရုံးမှ ပုဂ္ဂိုလ်တချို့နဲ့ လျှို့ဝှက်စွာတွေ့ဆုံခဲ့မှု‌နဲ့ပတ်သက်ပြီး အရေးယူသွားမယ်လို့ ပြည်ထောင်စုရွေးကောက်ပွဲကော်မရှင်က ဇန်နဝါရီ၁၄ရက်မှာထုတ်ပြန်ပါတယ်။
နိုင်ငံရေးပါတီတွေအနေနဲ့ နိုင်ငံခြားတိုင်းပြည်တစ်ခုခုရဲ့ အဖွဲ့အစည်း သို့မဟုတ် လူပုဂ္ဂိုလ်တွေနဲ့ တွေ့ဆုံဖို့ရှိရင် ပြည်ထောင်စုရွေးကောက်ပွဲကော်မရှင်ကို ကြိုတင်တင်ပြပြီး ခွင့်ပြုချက်ရရှိမှသာ တွေ့ဆုံဖို့နဲ့ သင့်လျော်တဲ့အစီအမံနဲ့ စိစစ်ခွင့်ပြုပေးမဲ့အကြောင်း ပြည်ထောင်စုရွေးကောက်ပွဲကော်မရှင် ၂၀၂၂ခုနှစ် ဩဂုတ် ၂၃ရက် ရက်စွဲပါစာနဲ့ နိုင်ငံရေးပါတီအားလုံးကို အကြောင်းကြားပြီး ဖြစ်တယ်လို့ ဆိုပါတယ်။
ပြည်သူ့ရှေ့ဆောင်ပါတီအနေနဲ့ သံရုံးတွေ/အဖွဲ့အစည်းတွေနဲ့ လျှို့ဝှက်စွာတွေ့ဆုံနေတယ်လို့ သိရတဲ့အတွက် ပြည်ထောင်စုရွေးကောက်ပွဲကော်မရှင်ကို တင်ပြခွင့်ပြုချက်ယူပြီးမှသာ တွေ့ဆုံဖို့နဲ့ ခွင့်ပြုချက်မရဘဲတွေ့ဆုံရင် နိုင်ငံရေးပါတီများမှတ်ပုံတင်ခြင်းဥပဒေပုဒ်မ၁၂နဲ့အညီ ဆောင်ရွက်သွားမှာဖြစ်ကြောင်း ၂၀၂၅ခုနှစ် ဒီဇင်ဘာ၂၂ရက် ရက်စွဲပါစာနဲ့ ပြည်သူ့ရှေ့ဆောင်ပါတီဥက္ကဋ္ဌကို လိပ်မူပြီး သတိပေးအကြောင်းကြားခဲ့တယ်လို့ ဖော်ပြထားပါတယ်။
ဒေါက်တာသက်သက်ခိုင်နဲ့ ဒေါ်ထက်ထက်လှိုင်တို့ဟာ ပြည်ထောင်စုရွေးကောက်ပွဲကော်မရှင်ကို ခွင့်ပြုချက်တင်ပြခြင်းမရှိဘဲ ၂၀၂၅ခုနှစ် ဒီဇင်ဘာ၁၈ရက် မွန်းလွဲ၂နာရီကနေ ၃နာရီခန့်အထိ ဗဟန်းမြို့နယ်၊ နတ်မောက်လမ်းက စားသောက်ဆိုင်တစ်ဆိုင်မှာ ပြည်ပသံရုံးတစ်ရုံးမှ ပုဂ္ဂိုလ်တချို့နဲ့ Maskတပ်ဆင်ပြီး တရားမဝင်လျှို့ဝှက်စွာ တွေ့ဆုံခဲ့ကြောင်း သတင်းပို့တိုင်ကြားမှုရှိခဲ့တယ်လို့ ဆိုပါတယ်။
အဲဒီအကြောင်းအရာနဲ့ပတ်သက်ပြီး စုံစမ်းစစ်ဆေးမှုတွေ ပြုလုပ်ခဲ့ရာမှာ မှန်ကန်ကြောင်း တွေ့ရှိရပြီး ဒေါက်တာသက်သက်ခိုင်နဲ့ ဒေါ်ထက်ထက်လှိုင်တို့ကလည်း မှန်ကန်ကြောင်း ဝန်ခံထွက်ဆိုခဲ့တယ်လို့ ထုတ်ပြန်ချက်မှာဖော်ပြထားပါတယ်။
အဲဒါကြောင့် ဒေါက်တာသက်သက်ခိုင်နဲ့ ဒေါ်ထက်ထက်လှိုင်တို့ကို ဥပဒေအရ အရေးယူဆောင်ရွက်သွားမယ်လို့ ထုတ်ပြန်ထားပါတယ်။
အဲဒီကိစ္စနဲ့ပတ်သက်ပြီး ဇန်နဝါရီ၁၃ရက် ညနေပိုင်းက သက်ဆိုင်ရာရဲ့ ခေါ်ယူမေးမြန်းမှုကိုခံရတဲ့ ဒေါက်တာသက်သက်ခိုင်နဲ့ ဒေါ်ထက်ထက်လှိုင်တို့ဟာ ဇန်နဝါရီ၁၄ရက် ညပိုင်းမှာ နေအိမ်ကိုပြန်လည်ရောက်ရှိကြပြီဖြစ်တယ်လို့ ပြည်သူ့ရှေ့ဆောင်ပါတီ ဒုတိယဥက္ကဋ္ဌ (၂) ဦးစောဟန်အေးက One Newsကို ပြောကြားထားပါတယ်။

မန္တလေးတွင် အိမ်၇လုံးခန့်မီးလောင်
--------------------

မန္တလေးတိုင်းဒေသကြီး၊ ချမ်းအေးသာစံမြို့နယ်၊ ၈၂လမ်း၊ ၃၄လမ်းနဲ့ ၃၅လမ်းကြားမှာ ဇန်နဝါရီ၁၄ရက်၊ ည‌နေ ၅နာရီခွဲဝန်းကျင်က မီးလောင်မှုဖြစ်ပွားခဲ့တယ်လို့ မြန်မာနိုင်ငံမီးသတ်တပ်ဖွဲ့က ထုတ်ပြန်ပါတယ်။
လျှပ်စစ်ထမင်းပေါင်းအိုး တည်ထားရာကနေတစ်ဆင့် မီးလောင်တာဖြစ်ပြီး အိမ်၇လုံးခန့် မီးလောင်ဆုံးရှုံးသွားတယ်လို့ ဒေသခံတချို့ရဲ့ ကနဦးပြောကြားချက်အရ သိရပါတယ်။
အဲဒီမီးလောင်မှုကို Level 1ယာဉ်အုပ်စုနဲ့ ငြှိမ်းသတ်ခဲ့ရပြီး ဒေသခံလူမှုကူညီရေးအသင်းအဖွဲ့တွေကလည်း ဝိုင်းဝန်းကူညီငြှိမ်းသတ်ခဲ့ကာ ညနေ၅နာရီ၄၈မိနစ်မှာ မီးငြိမ်းသွားတယ်လို့ သိရပါတယ်။

အစိုးရကျောင်းများကို မဖြစ်မနေ အဆင့်မြှင့်တင်ပေးသွားရမည်ဟု ယာယီသမ္မတပြော
----------------------------------------------------------------------

နိုင်ငံ့ဝန်ထမ်းမိသားစုတွေနဲ့ သာမန်ဝင်ငွေရှိသူအများစုဟာ ၎င်းတို့ရဲ့သားသမီးတွေကို အစိုးရကျောင်းတွေမှာ ပညာသင်ကြားစေကြတဲ့အတွက် အစိုးရကျောင်းတွေကို မဖြစ်မနေ အဆင့်မြှင့်တင်ပေးသွားရမှာဖြစ်တယ်လို့ နိုင်ငံတော်ယာယီသမ္မတ နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောပါတယ်။
ဇန်နဝါရီ၁၄ရက်က ပြုလုပ်တဲ့ ပညာရေးကဏ္ဍနဲ့ ကျန်းမာရေးကဏ္ဍမြှင့်တင်နိုင်ရေး ညှိနှိုင်းအစည်းအဝေးမှာ ဗိုလ်ချုပ်မှူးကြီးမင်းအောင်လှိုင်က အခုလိုပြောကြားလိုက်တာပါ။
ပညာရေးနဲ့ပတ်သက်ပြီး စံချိန်မီတဲ့ကျောင်းတွေ ဖြစ်စေရေးနဲ့ အရည်အချင်းရှိတဲ့ ဆရာ၊ ဆရာမတွေဖြစ်စေရေး အလေးထားဆောင်ရွက်သွားရမယ်လို့လည်း ဆိုပါတယ်။
ဒါ့အပြင် အခြေခံပညာအဆင့်နဲ့ပတ်သက်ပြီး သင်ကြားရေးဆရာ၊ ဆရာမတွေ များစွာလိုအပ်တာကို သိရှိရပြီး သင်ကြားရေးဆရာ၊ ဆရာမတွေကို ဘွဲ့လွန်ဘွဲ့တွေပေးအပ်နိုင်ရေးအတွက် ဆရာအတတ်သင်ကျောင်းတွေနဲ့ ပညာရေးဒီဂရီကောလိပ်တွေကို တက္ကသိုလ်အဖြစ် အဆင့်မြှင့်တင် ဆောင်ရွက်ဖို့လိုတယ်လို့ ဗိုလ်ချုပ်မှူးကြီးမင်းအောင်လှိုင်ကပြောပါတယ်။

မန္တလေး-သပိတ်ကျင်း-မိုးကုတ် စစ်ဗျူဟာ အရေးကြီးနေရာများအား တပ်မတော် ပြန်လည်သိမ်းပိုက်
-----------------------------------------

တပ်မတော်စစ်ကြောင်းတွေက မန္တလေး-သပိတ်ကျင်း-မိုးကုတ် ဆက်သွယ်ရေးလမ်းကြောင်းပေါ်ရှိ စစ်ဗျူဟာ အရေးကြီးနေရာတွေနဲ့ နယ်မြေခံတပ်ရင်းကို ပြန်လည်သိမ်းပိုက်ရရှိခဲ့တယ်လို့ အမျိုးသား ကာကွယ်ရေးနှင့် လုံခြုံရေးကောင်စီ သတင်းထုတ်ပြန်ရေးအဖွဲ့က ဇန်နဝါရီ ၁၄ ရက်မှာ ထုတ်ပြန်ပါတယ်။
သပိတ်ကျင်း-မိုးကုတ် ဆက်သွယ်ရေး လမ်းကြောင်းကို အမြန်ဆုံးပြန်လည်ဖွင့်လှစ်နိုင်ရေး အကြမ်းဖက်သောင်းကျန်းသူတွေ ယာယီစိုးမိုးထားတဲ့ နယ်မြေခံ တပ်ရင်းဌာနချုပ်နဲ့ အဲဒီ ဒေသတစ်ဝိုက်ကို ပြန်လည်သိမ်းပိုက်ရရှိရေးအတွက် ဒေသခံပြည်သူတွေနဲ့ အလင်းဝင်ရောက်လာတဲ့ PDF အဖွဲ့ဝင်တွေရဲ့ သတင်းပေးပို့မှုကို စနစ်တကျ ပေါင်းစပ်သုံးသပ်ပြီး နယ်မြေလုံခြုံရေးလုပ်ငန်းတွေကို စစ်ကြောင်းတွေခွဲပြီး ဟန်ချက်ညီစွာ အရှိန်အဟုန်နဲ့ ဆက်လက်ချီတက်ခဲ့ရာ ဇန်နဝါရီ ၁၁ ရက်မှာ ညောင်ပင်သာကျေးရွာ၊ ဇန်နဝါရီ ၁၂ ရက်မှာ ပိုးဇာနွယ်ကျေးရွာ၊ ဇန်နဝါရီ ၁၃ ရက်မှာ ကျောက်လှည်းဘီးကျေးရွာ ၊ ဇန်နဝါရီ ၁၄ ရက်မှာ အဲဒီလမ်းကြောင်းပေါ်ရှိ နယ်မြေခံ တပ်ရင်းဌာနချုပ်နဲ့ စိန်ကုန်းကျေးရွာတစ်ဝိုက်ကို တပ်မတော် စစ်ကြောင်းတွေက အပြည့်အဝ ပြန်လည်သိမ်းပိုက်ထိန်းချုပ်နိုင်ခဲ့တာလို့ ဆိုပါတယ်။
အဲဒီ ဒေသကို ပြန်လည်တိုက်ခိုက်သိမ်းပိုက်ရရှိရေးအတွက် အသက်ကို ပဓာနမထားဘဲ ရွပ်ရွပ်ချွံချွံ တိုက်ခိုက်ချေမှုန်းခဲ့ရာ အကြမ်းဖက် သောင်းကျန်းသူတွေနဲ့ တိုက်ပွဲကြီး/ငယ် ၃၇ ကြိမ် ဖြစ်ပွားခဲ့ပြီး ရန်သူ့အလောင်း ၁၅ လောင်း၊ လက်နက် မျိုးစုံ ၃၄ လက်၊ ခဲယမ်းနဲ့ ဆက်စပ်ပစ္စည်းတွေ သိမ်းပိုက်ရရှိခဲ့ပြီး တပ်မတော်က အရာရှိ၊ စစ်သည်တချို့ ကျဆုံး၊ ဒဏ်ရာတွေရရှိခဲ့တယ်လို့ ထုတ်ပြန်ချက်အရ သိရပါတယ်။
တပ်မတော်စစ်ကြောင်းတွေအနေနဲ့ အဲဒီ ဒေသတွေအတွင်း လိုအပ်တဲ့ နယ်မြေစိုးမိုးရေးလုပ်ငန်းတွေ ဆောင်ရွက်ပြီး စိန်ကုန်းကျေးရွာနဲ့ မိုးကုတ်မြို့အကြား လမ်းပိုင်းမှာ ခိုအောင်းနေတဲ့ အကြမ်းဖက် သောင်းကျန်းသူတွေကို ဆက်လက် တိုက်ခိုက် ချေမှုန်းရှင်းလင်းသွားမှာ ဖြစ်သလို မိုးကုတ်-သပိတ်ကျင်း-မန္တလေးမြို့တွေကို ဆက်သွယ်ထားတဲ့ လမ်းကြောင်း
တွေ အမြန်ဆုံးပြန်လည်ဖွင့်လှစ်နိုင်ရေး အရှိန်အဟုန်မြှင့် ဆက်လက်ဆောင်ရွက်သွားမှာ ဖြစ်တယ်လို့ ထုတ်ပြန်ထားပါတယ်။

သူနာပြုများအား Gradeများအလိုက် ခံစားခွင့်များ တိုးမြှင့်ပေးသွားရန်လိုအပ်ဟု ယာယီသမ္မတပြော
---------------------------------------------

သူနာပြုတွေကို ထမ်းဆောင်ရတဲ့ တာဝန်တွေအလိုက် Gradeတွေခွဲပြီး Gradeတွေအလိုက် ခံစားခွင့်တွေကို တိုးမြှင့်ပေးသွားဖို့လိုအပ်တယ်လို့ နိုင်ငံတော်ယာယီသမ္မတ နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ‌‌ပြောပါတယ်။
ဇန်နဝါရီ၁၄ရက်က ပြုလုပ်တဲ့ ပညာရေးကဏ္ဍနဲ့ ကျန်းမာရေးကဏ္ဍမြှင့်တင်နိုင်ရေး ညှိနှိုင်းအစည်းအဝေးမှာ ဗိုလ်ချုပ်မှူးကြီးမင်းအောင်လှိုင်က အခုလိုပြောကြားလိုက်တာပါ။
အဲဒီလိုဆောင်ရွက်နိုင်မယ်ဆိုရင် ပြည်သူ့ကျန်းမာရေးကဏ္ဍမြှင့်တင်မှုအတွက် များစွာအထောက်အကူပြုနိုင်မှာဖြစ်တယ်လို့ ဆိုပါတယ်။
ဒါ့အပြင် ကျန်းမာရေးကဏ္ဍမြှင့်တင်မှုကို အထောက်အကူပြုနိုင်ဖို့အတွက်သူနာပြုကျောင်းတွေကို တိုင်းဒေသကြီးနဲ့ပြည်နယ်အလိုက် အဆင့်မြှင့်တင်ဖွင့်လှစ်ပေးသွားဖို့ လိုအပ်တယ်လို့လည်း ဗိုလ်ချုပ်မှူးကြီးမင်းအောင်လှိုင်က ပြောကြားခဲ့ပါတယ်။