လန်ဒန်ဘားတစ်ခုတွင် ပရိသတ်တစ်ဦးကို ခေါင်းဖြင့် ဆောင့်တိုက်မှုကြောင့် အိုင်ဗန်တိုနေး ဖမ်းဆီးခံရ
===================

အင်္ဂလန်တိုက်စစ်မှူးအိုင်ဗန်တိုနေးဟာ လန်ဒန်ရှိ ဘားတစ်ခုတွင် ပရိသတ်တစ်ဦးကို ခေါင်းဖြင့် ဆောင့်တိုက်မှုကြောင့် ဖမ်းဆီးခံခဲ့ရပါတယ်။
ဒီဇင်ဘာလ ၆ ရက်နေ့ အစောပိုင်းတုန်းက လန်ဒန်ဘားတစ်ခုတွင် ဖြစ်ပျက်ခဲ့တာ ဖြစ်ပြီး အင်္ဂလန်တိုက်စစ်မှူးဟာ ယင်းတိုက်ခိုက်မှုကြောင့် ရဲတပ်ဖွဲ့ရဲ့ လက်ထိပ်ခတ် ဖမ်းဆီးခေါ်ဆောင်သွားခြင်းခံခဲ့ရပါတယ်။
အသက် ၂၉ နှစ်ရှိ ဘရန့်ဖို့ဒ်တိုက်စစ်မှူးဟာ သူ့ကို ဖက်ကာ Selfie ရိုက်ကူးရန် ကြိုးပမ်းတဲ့ ပရိသတ်တစ်ဦးကို ခေါင်းဖြင့် ဆောင့်တိုက်ခဲ့တာလည်း ဖြစ်ပါတယ်။
ယင်းပရိသတ်ဟာ အိုင်ဗန်တိုနေးရဲ့ တိုက်ခိုက်မှုကြောင့် ဆေးရုံတက်ခဲ့ရပေမယ့် အသက်အန္တရာယ်တော့ စိုးရိမ်စရာ မရှိပါဘူး။
အထက်ပါအဖြစ်အပျက်ကို မြင်တွေ့လိုက်တဲ့ မျက်မြင်သက်သေတစ်ဦးက "သူက သူငယ်ချင်းအုပ်စုနဲ့အတူ ဖြတ်သွားတာ။ အဲဒီမှာ တစ်ဦးက သူ့ကို မှတ်မိပြီး လည်ပင်းဖက် ဓာတ်ပုံရိုက်ဖို့ ကြိုးစားတယ်။ တိုနီက ထွက်သွားဆိုပြီး တစ်ဦးကို ခေါင်းတိုက်ချလိုက်တယ်"လို့ The Sun သို့ ပြောကြားသွားပါတယ်။
ယင်းမျက်မြင်သက်သေရဲ့ ပြောကြားမှုအရ ယင်းပရိသတ်မှာ အိုင်ဗန်တိုနေးရဲ့ ခေါင်းဖြင့် ဆောင့်မှုကြောင့် နှာခေါင်းမှ သွေးထွက်သွားကြောင်း သိရပါတယ်။
ဒါ့အပြင် ယင်းမျက်မြင်သက်သေက အိုင်ဗန်တိုနေးမှာ ယင်းအချိန်တွင် တန်ဖိုးကြီး လည်ဆွဲနှင့် နာရီဝတ်ဆင်ထားရာ လည်ဆွဲကို လုရန် ကြိုးပမ်းတယ်လို့ ယူဆပြီး တိုက်ခိုက်ခြင်းလည်း ဖြစ်နိုင်ကြောင်း ဆိုသွားပါတယ်။
အခင်းဖြစ်ပွားပြီး မကြာမီမှာ ချက်ချင်းဆိုသလို ရဲတပ်ဖွဲ့ဝင်များ ရောက်ချလာကာ အိုင်ဗန်တိုနေးအား လက်ထပ်ခတ်ကာ ရဲစခန်းသို့ ခေါ်ဆောင်သွားပါတယ်။
ဒါပေမယ့် အိုင်ဗန်တိုနေးဟာ ရဲစခန်းတွင် စစ်ဆေးမေးမြန်းမှု ခံယူပြီးနောက် အာမခံဖြင့် ပြန်လည်လွတ်မြောက်လာခဲ့ပါတယ်။
အိုင်ဗန်တိုနေးဟာ ဆော်ဒီကလပ် Al Ahli တွင် ကစားနေတာ ဖြစ်ပြီး ဘယ်လို အကြောင်းကြောင်းကြောင့် လန်ဒန်သို့ ရောက်ရှိနေတယ်ဆိုတာ မသိပါဘူး။

ရီးရဲလ်မက်ဒရစ်နည်းပြဘဝကို ကယ်တင်ရန် တစ်ပွဲတည်းသာ အခွင့်အရေးရရှိလာတဲ့ အလွန်ဆို
=====================

ဇာဘီအလွန်ဆိုဟာ ရီးရဲလ်မက်ဒရစ်နည်းပြရာထူးအား ကယ်တင်ရန် တစ်ပွဲတည်းသာ အခွင့်အရေးပေးခြင်းခံလာရပါတယ်။
အလွန်ဆိုဟာ ဆဲလ်တာဗီဂိုအား ၂-၀ ဂိုးဖြင့် ရှုံးနိမ့်တဲ့ပွဲစဉ်တွင် အသင်းရဲ့ ဆိုးရွားလှတဲ့ ခြေစွမ်းကြောင့် အနာဂတ်မရေမရာ ဖြစ်လာတာလည်း ဖြစ်ပါတယ်။
စပိန်မီဒီယာများရဲ့ဖော်ပြမှုအရ ရီးရဲလ်မက်ဒရစ်စီနီယာအရာရှိများဟာ ဆဲလ်တာဗီဂိုနှင့်ပွဲအပြီး တစ်နာရီအကြာတွင်ပင် အရေးပေါ် အစည်းအဝေး ပြုလုပ်ခဲ့ပြီး လာမယ့်ပွဲရလဒ်အပေါ် မူတည်ပြီး အလွန်ဆိုရဲ့အနာဂတ်ကို ဆုံးဖြတ်လာကြောင်း သိရပါတယ်။
ရီးရဲလ်မက်ဒရစ်ဟာ နောက်ဆုံးလာလီဂါပွဲ ၅ ပွဲတွင် ၁ ပွဲတည်းသာ အနိုင်ရရှိထားပြီး ထိပ်ဆုံးမှ ဘာစီလိုနာနှင့် ရမှတ် ၅ မှတ်အထိ ကွာဟနေပါတယ်။
ရီးရဲလ်မက်ဒရစ်တာဝန်ရှိသူများဟာ တွေဆုံဆွေးနွေးမှု ပြုလုပ်ပြီးနောက် လာမယ့် မန်စီးတီးနှင့်ပွဲတွင် ရလဒ်ကောင်း မရရှိလာပါက အလွန်ဆိုကို ထုတ်ပယ်ရန် ဆုံးဖြတ်လာကြပြီလည်း ဖြစ်ပါတယ်။
ရီးရဲလ်မက်ဒရစ်ဟာ အလွန်ဆိုကို ထုတ်ပယ်ပြီးပါက နည်းပြဟောင်းဇီဒန်း (သို့မဟုတ်) လီဗာပူးနည်းပြဟောင်းဂျာဂင်ကလော့ပ်အား ခန့်အပ်ရန်ပါ စဉ်းစားထားကြပြီးလည်း ဖြစ်ပါတယ်။
အလွန်ဆိုဟာ ယခုရာသီ ရီးရဲလ်မက်ဒရစ်အသင်းအဝတ်အစားလဲခန်းကို ထိန်းချုပ်ထားနိုင်ခြင်း မရှိဘဲ ကစားသမားအချို့ရဲ့ ဆန့်ကျင်ခြင်းခံနေရသူလည်း ဖြစ်ပါတယ်။
အလွန်ဆိုကို ဆန့်ကျင်ကြသူများစာရင်တွင် ဗီနီရှပ်စ်ဂျူနီယာ၊ ရိုဒရီဂို၊ ဗယ်ဗာဒီ၊ ကာမာဗန်ဂါ၊ ဖာလန်းမန်ဒီတို့ မပါဝင်နေပါတယ်။
ယခုအခါ ရီးရဲလ်မက်ဒရစ်တာဝန်ရှိသူများဟာ ဗုဒ္ဓဟူးနေ့ည မန်စီးတီးနှင့်ပွဲတွင် နိုင်ပွဲ ရရှိလာခြင်း မရှိပါက အလွန်ဆိုကို ထုတ်ပယ်လာကြတော့မှာလည်း ဖြစ်ပါတယ်။

ဆရာဝန်ရဲ့ အကြံပေးမှုအား ငြင်းပယ်ကာ ဆန်းတို့စ်အား တန်းမဆင်းရအောင် ကယ်တင်ခဲ့ပြီးနောက် ခွဲစိတ်ကုသမှု ခံယူရတော့မယ့် နေမာ
==================

နေမာဟာ ဒူးဒဏ်ရာဖြင့် ဆန်းတို့စ်အသင်း တန်းမဆင်းရရေးအတွက် အရဲစွန့်ကစားကာ ကယ်တင်ခဲ့ပေမယ့်လည်း ယခုအခါ ဒဏ်ရာကို ခွဲစိတ်ကုသမှု ပြုလုပ်ရတော့မှာ ဖြစ်လို့ ကမ္ဘာ့ဖလားနေရာ လက်လွှတ်လာရဖို့ ရှိနေပြီ ဖြစ်ပါတယ်။
အသက် ၃၃ နှစ်ရှိ နေမာဟာ ၇၉ ဂိုးဖြင့် ဘရာဇီးသမိုင်းတွင် ဂိုးအများဆုံးသွင်းယူသူအဖြစ် ပီလီရဲ့ စံချိန်ကို ရိုက်ချိုးကာ စံချိန်သစ်ရေးထိုးထားသူ ဖြစ်ပါတယ်။ ဒါပေမယ့် သူဟာ လာမယ့် ၂၀၂၆ ကမ္ဘာ့ဖလားပြိုင်ပွဲအား လွဲချော်ရတော့မယ့် အခြေအနေနှင့် ကြုံနေပါတယ်။
နေမာဟာ ဒဏ်ရာပြဿနာရှိနေပေမယ့်လည်း တနင်္ဂနွေနေ့တုန်းက ခရူဇီယိုအား ၃-၀ ဂိုးဖြင့် အနိုင်ရတဲ့ပွဲတွင် ပွဲချိန်ပြည့် ကစားကာ တန်းမဆင်းရေး ကူညီပေးခဲ့ပါတယ်။
သူဟာ ဆရာဝန်များက ပွဲမကစားရန် အကြံပေးခဲ့ကြပေမယ့်လည်း ငြင်းပယ်ကာ ပါဝင်ကစားခဲ့တာလည်း ဖြစ်ပါတယ်။ ယခုအခါမှာတော့ သူဟာ ဒဏ်ရာကို ခွဲစိတ်ကုသမှုခံယူရတော့မှာလည်း ဖြစ်ပါတယ်။
ယင်းပွဲအပြီးတွင် နေမာဟာ ဒူးထောက်ချခဲ့ပြီး တစ်ကွင်းလုံးကလည်း သူ့အမည်ကို သံပြိုင်အော်ဟစ်ဂုဏ်ပြုခဲ့ကြပါတယ်။
ဆန်းတို့ဟာ ၂၀၂၃ ခုနှစ်တွင် ကလပ်သမိုင်းတွင် ပထမဆုံးအကြိမ် တန်းဆင်းခဲ့ရပြီးနောက် ချက်ချင်းတန်းပြန်တက်လာနိုင်ခဲ့တာပါ။
ဆန်းတို့စ်ဟာ နေမာ ပြန် ရောက်လာပေမယ့်လည်း တန်းမဆင်းရရေး ထပ်မံ တိုက်ပွဲဝင်ခဲ့ရပါတယ်။
ဒါပေမယ့် ဆန်းတိုစ်ဟာ နေမာရဲ့ ခြေစွမ်းပြမှုနှင့်အတူ နောက်ဆုံးလိဂ်ပွဲစဉ်များတွင် ရလဒ်ကောင်း ရရှိပြီး တန်းဆင်းရမယ့်အရေးမှ လွတ်မြောက်ခဲ့ပါတယ်။ နေမာဟာ ဆန်းတို့စ်ရဲ့ ရာသီသိမ်းပွဲ ၅ ပွဲဆက် ရှုံးပွဲမရှိမှတ်တမ်း ရရှိအောင် ၅ ဂိုးသွင်းပြီး ၁ ဂိုးသွင်းကာ ကူညီခဲ့ပါတယ်။
ဒါပေမယ့် နေမာဟာ ဆန်းတို့စ်အသင်း တန်းမဆင်းရရေး အတွက် ဒဏ်ရာရှိနေတဲ့ကြားမှ ပွဲကစားမှုနှင့်အတူ ဒဏ်ရာကို ခွဲစိတ်ကုသမှု ခံယူလာရတော့မှာလည်း ဖြစ်ပါတယ်။
တဖက်တွင် ဘရာဇီးနည်းပြအန်ဆယ်လော့တီက နေမာအနေဖြင့် ၂၀၂၆ ရာသီသစ်တွင် အကောင်းဆုံးကစားနိုင်ပါက ရွေးချယ်ခွင့် ရှိနေဆဲ ဖြစ်ကြောင်း ပြောကြားထားပါတယ်။

မူးယစ်ဆေးရောင်းဝယ်တဲ့အကြောင်းကို ရက်ပ်သီချင်းသီဆိုကာ ဗီဒီယိုများ တင်ခဲ့ပြီးနောက် ထောင်ဒဏ်ချမှတ်ခံလာရတဲ့ ဝက်စ်ဟမ်းအကယ်ဒမီကစားသမားဟောင်း
===================

ပရီးမီးယားလိဂ်ကလပ်လူငယ်ကစားသမားဟောင်းတစ်ဦးဟာ အင်စတာဂရမ်တွင် မူးယစ်ဆေးဝါးရောင်းဝယ်တဲ့အကြောင်းကို ရက်ပ်သီချင်းလုပ်ကာ သီဆိုပြီး ဗီဒီယိုများ တင်ခဲ့ပြီးတဲ့နောက် ထောင်ဒဏ်ချမှတ်ခံလာရပါတယ်။
အသက် ၂၃ နှစ်ရှိ သီယာရီနီဗားစ်ဟာ ဝက်စ်ဟမ်းအကယ်ဒမီထွက်တစ်ဦး ဖြစ်ပြီး ရီးဒင်း၊ နယူးပေါ့ကောင်တီ၊ ဘရက်ဖို့ဒ်စီးတီးတို့တွင်လည်း ကစားခဲ့သူ ဖြစ်ပါတယ်။
သူဟာ ပြီးခဲ့တဲ့နှစ် ဇန်နဝါရီလတုန်းက မော်ဒိုဗာစူပါလိဂ်ကလပ် Sheriff Tiraspol သို့ ပြောင်းကစားခဲ့ပြီး ယင်းမှ တဆင့် ခရိုအေးရှားကလပ် NK Varaždin သို့ ပြောင်းခဲ့ပါတယ်။
ဒါပေမယ့် နီဗားစ်ဟာ အေအဆင့်မူးယစ်ဆေးဝါးရောင်းချမှုဖြင့် ထောင်ဒဏ် ၃ နှစ်ချမှတ်ခြင်းခံလာရမှုနှင့်အတူ ဘောလုံးကစားသမားဘဝ အဆုံးသတ်လာပြီလည်း ဖြစ်ပါတယ်။
ဒါ့အပြင် သူနှင့်အပေါင်းပါ အသက် ၅၀ နှစ်ရှိ အယ်လန်ဘာရက်စ်မှာလည်း မူးယစ်ဆေးဝါးရောင်းချမှုအပြင် ရှော့ဂန်းလက်ဝယ်ပိုင်ဆိုင်မှုအတွက် ထောင်ဒဏ် ၁၀ နှစ် ချမှတ်ခြင်းခံလာရပါတယ်။
Lincoln Crown Court တွင် ကြားနာစစ်ဆေးမှုအရ နီဗားစ်မှာ မူးယစ်ဆေးရောင်းချရန်အတွက် ဒေါ်ရင်တန်မှ ရီးဒင်းဧရိယာသို့ ပုံမှန်ခရီးသွားသူ ဖြစ်ကြောင်း သိရပါတယ်။
တဖက်တွင် နီဗားစ်မှာ မူးယစ်ဆေးဝါးရောင်းချတဲ့အကြောင်းကိုလည်း ရက်ပ်စာသားလုပ်ဆိုကာ အင်စတာဂရမ်တွင် ဗီဒီယိုများ တင်ပါတယ်။
ရဲတပ်ဖွဲ့ဝင်များဟာ အယ်လန်ဘားရက်စ်ရဲ့ လိပ်စာကို ရရှိပြီးနောက် စီးနင်းရှာဖွေရာ ကျည်ဆန်နှစ်ထောင့်ထိုးထားတဲ့ ရှော့ဂါထည့်ထားတဲ့ အိပ်တစ်လုံးကို သိမ်းဆည်း ရရှိခဲ့ပါတယ်။
ဒါ့အပြင် ရဲတပ်ဖွဲ့ဟာ ပေါင် ၅၈၆၀ တန်ဖိုးရှိ ငွေသားနှင့် လက်နက်များ တွေ့ရှိခဲ့သလို ကိုကင်း ၄၀ ဂရမ်လည်း ဖမ်းဆီးရမိခဲ့ပါတယ်။
ရဲတပ်ဖွဲ့ဟာ ဘာရက်စ်ရဲ့ အိပ်ခန်းအတွင်းတွင် မောင်းချဓား၊ ဘေ့စ်ဘောတုတ်၊ နံပါတ်တုတ်တို့ကိုလည်း တွေ့ရသလို နေအိမ် ကားဂိုထောင်တွင် စိုက်ပျိုးထားတဲ့ ဆေးခြောက်ပင်ကိုလည်း တွေ့ရပါတယ်။
ရဲတပ်ဖွဲ့များရဲ့ ခန္ဓာကိုယ်တွင် တပ်ဆင်ထားတဲ့ ကင်မရာဖြင့် ရိုက်ကူးမှတ်တမ်းတင်ထားတဲ့ ဗီဒီယိုအရ ဘားရက်စ်ဟာ ဩဂုတ်လ ၆ ရက်နေ့တုန်းက နေအိမ်သို့ ကားမောင်းလာစဉ် ဖမ်းဆီးခဲ့တာဖြစ်ကြောင်း တွေ့ရပါတယ်။
ရဲတပ်ဖွဲ့ဟာ ဘားရက်စ်ရဲ့ဖုန်းမှ တဆင့် နီဗားစ် ဆက်သွယ်ကာ မူးယစ်ဆေးဝါးရောင်းချထားကြောင်း သက်သေအထောက်အထားအခိုင်အလုံဖြင့် တွေ့ရှိခဲ့ပါတယ်။
နီဗားစ်ဟာ ၂၀၂၁ ခုနှစ်တွင် ဝက်စ်ဟမ်းအကယ်ဒမီနှင့် စာချုပ်ချုပ်ဆိုခဲ့ပေမယ့်လည်း သုံးနှစ်အကြာတွင် ထွက်ခွာခဲ့သူ ဖြစ်ပါတယ်။

ပြိင်ဘက်အသင်းကစားသမားကို လျို့ဝှက်ဆေးကုသမှုကြောင့် အသင်းဆရာဝန်ကို ထုတ်ပယ်မှုအတွက် ဝေဖန်ခံနေရတဲ့ ဘွန်ဒက်စ်လီဂါကလပ်
======================

ဂျာမန်ကလပ် ဖရန့်ဖတ်ဟာ ပြိုင်ဘက်အသင်းကစားသမားအား လျို့ဝှက် ဆေးကုသမှု ပြုလုပ်မှုအတွက် အသင်းဆရာဝန်ကို ထုတ်ပယ်လာပါတယ်။
အထက်ပါ မတော်တဆမှုမှာ နိုဝင်ဘာလတုန်းကဟိုင်ဒန်ဟိမ်းနှင့် တစ်ဂိုးစီသရေကျတဲ့ပွဲမတိုင်မီ ဖရန့်ဖတ်အသင်းဟိုတယ်တွင် ဖြစ်ပျက်ခဲ့တာ ဖြစ်ပါတယ်။
အသင်းရဲ့ ဆေးအဖွဲ့ခေါင်းဆောင်ဖေဘီယန်ပလာချယ်ဟာ ကလပ်ရဲ့ ခွင့်ပြုချက်တစုံတရာ ရယူခြင်း မရှိဘဲ ဩစတြီးယားကစားသမားမားသီးယပ်စ်ဟွန်ဆစ်ခ်အား ဆေးကုသခဲ့တာပါ။
ဟိုင်ဒန်ဟိမ်းတောင်ပံကစားသမားကို ဟိုတယ်ကော်ရစ်ဒါမှ ဖြတ်လျှောက်သွားကြောင်း ဖရန့်ဖတ်ကစားသမားများ တွေ့ရှိခဲ့ပါတယ်။
ယခုကဲ့သို့ ပြိုင်ဘက်ကစားသမားကို ဆေးကုသမှုပြုလုပ်ပေးမှုအတွက် ဖရန့်ဖတ်ရဲ့ ဆုံးဖြတ်ချက်ကို ပရိသတ်များက ဝေဖန်လျက်ရှိပါတယ်။ ပရိသတ်များက ဆရာဝန်တစ်ဦးဖြစ်ရာ ဆေးကုသမှုပြုလုပ်မှုက အပြစ်ရှိတယ်လို့ မယုံကြည်နေကြတာလည်း ဖြစ်ပါတယ်။
ပရိသတ်တစ်ဦးက "ပြဿနာလို့ မမြင်ဘူး။ ဆရာဝန်က ဆရာဝန်ပဲလေ။ သူတို့က လူတွေကို ကူညီဖို့ ကတိသစ္စာပြုထားကြတာ။ ပြဿနာလို့ မမြင်ပါဘူး"လို့ ဆိုသွားပါတယ်။
အခြားတစ်ဦးကလည်း "ဒါက သူ့မလုပ်ပဲလေ။ အခြားကလပ်က ကစားသမားတစ်ဦး၊ ပြိုင်ဘက်တစ်ဦးဆိုရင်တောင် ဒါက ကျန်းမာရေးကိစ္စ ဖြစ်တယ်"လို့ ဆိုသွားပါတယ်။
ပလာချယ်ဟာ ယူနီယံဘာလင်တွင် ၂ နှစ်ခန့် တာဝန်ထမ်းဆောင်ပြီးနောက် ၂၀၂၂ ခုနှစ်တွင် ဖရန့်ဖတ်သို့ ရောက်လာသူ ဖြစ်ပါတယ်။
ဖရန့်ဖတ်ဟာ ပလာချယ်ကို ထုတ်ပယ်ပြီးနောက် ယာယီအသင်းဆရာဝန်ခေါင်းဆောင်အဖြစ် ဆီဘာစတီယန်ရှနိုက်ဒါအား ခန့်အပ်ထားပါတယ်
ဩစတြီးယားအသင်းအတွက် တစ်ပွဲကစားခွင့်ရထားတဲ့ ဟွန်ဆစ်ခ်ဟာ ဟမ်းစတက်အတွက် ပွဲတစ်ရာကျော်ကစားပြီးနောက် ဟိုင်ဒန်ဟိမ်းသို့ ပြောင်းလာသူ ဖြစ်ပါတယ်။

ဆုဖလား ၂ လုံး ရရှိအောင် စွမ်းဆောင်ပေးနိုင်ခဲ့ပေမယ့် ကလပ်အတွင်း အရှုပ်တော်ပုံကြောင့် တောင်ကိုရီးယားကလပ်မှ ချဲလ်ဆီးဂန္ထဝင်နုတ်ထွက်လာ
====================

ဂပ်စ်ပိုယက်ဟာ တောင်ကိုရီးယားကလပ် Jeonbuk Hyundai Motors အား တစ်နှစ်ကြာ ကိုင်တွယ်စဉ်အတွင်း ဆုဖလား ၂ လုံး ရရှိအောင် စွမ်းဆောင်ကာ ထိပ်သီးဖြစ်အောင် ဦးဆောင်နိုင်ခဲ့ပေမယ့်လည်း ရာထူးမှ နုတ်ထွက်လာပါတယ်။
အသက် ၅၈ နှစ်ရှိ ဥရုဂွေးလူမျိုးနည်းပြဟာ Jeonbuk Hyundai Motors အား ကိုင်တွယ်တဲ့ ပထမဆုံးရာသီတွင် ၂၀၂၅ ခုနှစ် ကေလိဂ်ဖလားအပြင် ကိုရီးယားရှုံးထွက်ဖလားတို့ ရရှိအောင် စွမ်းဆောင်ပေးနိုင်ခဲ့ပါတယ်။
Jeonbuk Hyundai Motors ဟာ ဂပ်စ်ပိုယက် မရောက်မီတုန်းက ကေလိဂ်တွင် အဆင့် ၁၀ နေရာမှာသာ ရပ်တည်နေခဲ့တဲ့အသင်းပါ။
ယခု ဂပ်စ်ပိုယက်ဟာ ကလပ်အား ဆုဖလားများ ရရှိအောင် ဦးဆောင်ခဲ့ပေမယ့် နုတ်ထွက်လာပါတယ်။
ဂပ်စ်ပိုယက်ဟာ သူနှင့် ကာလရှည်ကြာ လက်တွဲလာတဲ့ လက်ထောက်နည်းပြမူရီစီယိုတာရစ်ကိုမှာ ပြီးခဲ့တဲ့လတုန်းက ဒိုင်လူကြီးအား လူမျိုးရေးခွဲခြားဆက်ဆံမှုအတွက် ၅ ပွဲပယ်အပြင် ပြင်းထန်တဲ့ ဒဏ်ရိုက်ခြင်းခံရကာ နုတ်ထွက်သွားခဲ့ပြီးနောက် ယခုကဲ့သို့ နုတ်ထွက်လာတာပါ။
ပါယက်ဟာ လက်ထောက်နည်းပြနုတ်ထွက်သွားပြီးနောက် ဒီဇင်ဘာလ ၁ ရက်နေ့တုန်းက K League Awards ဆုပေးပွဲတွင် "ငါ့ နည်းပြအဖွဲ့ဝင်ကို ထိလာတာ ငါ့ကို လာထိတာနဲ့အတူတူပဲ"လို့ ပြောဆိုခဲ့သူလည်း ဖြစ်ပါတယ်။
ပါယက်ဟာ တောင်ကိုရီးယားကလပ်မှ နုတ်ထွက်လာမှုနှင့်အတူ မကြာမီ ဗြိတိန်သို့ ပြန်လာမယ်လို့ ယူဆရပါတယ်။
ပါယက်ဟာ ၁၉၉၇ ခုနှစ်တွင် ဇာရာဂိုဇာမှ အလွတ်ပြောင်းရွှေ့ကြေးဖြင့် ရောက်လာပြီးနောက် ၄ နှစ်ကြာ ကစားစဉ်အတွင်း ၁၄၅ ပွဲတွင် ၄၅ ဂိုးသွင်းပေးခဲ့ပါတယ်။
သူဟာ ချဲလ်ဆီးတွင် ကစားစဉ်အတွင်း ယူအီးအက်ဖ်အေရှုံးထွက်ဗိုလ်များဖလား၊ ယူအီးအက်ဖ်အေစူပါဖလားနှင့် အက်ဖ်အေဖလားတို့ ရရှိခဲ့ပါတယ်။
သူဟာ လန်ဒန်ပြိုင်ဘက် စပါးစ်သို့ ပြောင်းကစားသွားပြီးနောက် ပရိသတ်များရဲ့ ဒေါသထွက်ခြင်းခံခဲ့ရပါတယ်။ သူဟာ စပါးစ်အတွက် သုံးရာသီကစားစဉ်အတွင်း ၈၂ ပွဲကစားကာ ၁၈ ဂိုးသွင်းခဲ့ပါတယ်။
သူဟာ ဘရိုက်တန်၊ ဆန်းဒါးလန်းတို့ကိုလည်း ကိုင်တွယ်ဖူးသလို ဂရိလက်ရွေးစင်အသင်းကိုလည်း ကိုင်တွယ်ဖူးပါတယ်။

လီဗာပူးနှင့် လူသိရှင်ကြားပြဿနာတက်ပြီး ရက်အနည်းငယ်အကြာတွင် ဘီဘီစီရဲ့ ဂုဏ်သိက္ခာကြီးမားတဲ့ ဆုအတွက် ဆန်ကာတင်စာရင်းတွင် ဆာလက် ပါဝင်လာ
=====================

မိုဟာမက်ဆာလက်ဟာ လီဗာပူးနှင့် လူသိရှင်ကြား ပြဿနာတက်ပြီး ရက်အနည်းငယ်အကြာတွင်ပင် ဘီဘီစီရဲ့ ဂုဏ်သိက္ခာကြီးမားတဲ့ ဆုအတွက် ဆန်ကာတင်စာရင်းတွင် ပါဝင်လာပါတယ်။
အသက် ၃၃ နှစ်ရှိ အီဂျစ်စူပါစတားဟာ လိဒ်နှင့် ၃ ဂိုးစီသရေကျတဲ့ပွဲတွင် လီဗာပူးကစားသမားဘဝတစ်လျှောက် ပထမဆုံးအကြိမ်အဖြစ် ၃ ပွဲဆက် အရန်ခုံမှာ ထိုင်နေခဲ့ရပြီးနောက် ကလပ်နှင့် နည်းပြအန်းဆလော့တို့အား အပြင်းထန်ဝေဖန်ခဲ့ပါတယ်။
ဆာလက်ဟာ ယင်းအဖြစ်အပျက်ကြောင့် ယနေ့ည အင်တာမီလန်နှင့် ကစားမယ့် လီဗာပူးရဲ့ လူစာရင်းမှလည်း ချန်လှပ်ခြင်းခံခဲ့ရပါတယ်။
ဒါပေမယ့် တနင်္လာနေ့ Sky Sports ရဲ့ အစီအစဉ်တွင် လီဗာပူးကစားသမားဟောင်းဂျေမီကာရေဂါက ဆာလက်မှာ ကလပ်နှင့် အန်းဆလော့တို့ အကြီးအကျယ် ပြဿနာတက်အောင်အတွက် ချိန်သားကိုက် လုပ်ဆောင်ခဲ့ခြင်းဖြစ်ကြောင်း ဝေဖန်ခဲ့ပါတယ်။
မိုဟာမက်ဆာလက်ဟာ အန်ဖီးလ်တွင် ဆိုးရွားတဲ့အခြေအနေဖြင့် ကြုံနေရပေမယ့်လည်း ယခုလတွင် ချီးမြှင့်လာမယ့် ဂုဏ်သိက္ခာကြီးမားတဲ့ ဆုအတွက် ဆန်ကာတင်စာရင်းတွင် ပါဝင်လာပါတယ်။
မိုဟာမက်ဆာလက်ဟာ လာမယ့် ဒီဇင်ဘာလ ၁၈ ရက်နေ့တွင် ချီးမြှင့်မယ့် The BBC Sports Personality of the Year ဆုအတွက် ဆန်ကာတင်စာရင်းတွင် ပါဝင်လာတာပါ။
ယင်းဆုက ဗြိတိန်အားကစားလောကမှ အကောင်းဆုံးအားကစားသမားကို ချီးမြှင့်တဲ့ ဆုလည်း ဖြစ်ပါတယ်။
ဆာလက်နှင့်အတူ The BBC Sports Personality of the Year ဆုအတွက် ဆန်ကာတင်အားကစားသမား ၆ ဦးစာရင်းတွင် လက်ဝှေ့သမားတီရင့်ခရောဖို့ဒ်၊ ဘော့စ်ဘောစတားရှိုဟိုင်းအွန်တာနီတို့လည်း ပါဝင်နေပါတယ်။
ဆာလက်ဟာ ပြီးခဲ့တဲ့ ရာသီတုန်းက ပရီးမီးယားလိဂ် ၃၈ ပွဲတွင် ဂိုးနှင့် ဖန်တီးမှု ၄၇ ကြိမ်အထိ ပြုလုပ်ကာ အန်းဆလော့လက်ထက် ပထမဆုံးပရီးမီးယားလိဂ်ဖလား ရရှိအောင် အဓိကနေရာမှ ကူညီခဲ့သူလည်း ဖြစ်ပါတယ်။
ဒါပေမယ့် သူဟာ ယခုရာသီတွင် လီဗာပူးအတွက် ပြိုင်ပွဲအရပ်ရပ် ၁၈ ပွဲကစားထားရာမှာ ၅ ဂိုးတည်းသာ သွင်းထားနိုင်ပါတယ်။

ရီးရဲလ်မက်ဒရစ်အသင်းအတွင်း စည်းလုံးနေကြောင်း အလွန်ဆိုပြောကြားလာ
====================

ဖိအားများအောက်သို့ ကျရောက်နေတဲ့ ရီးရဲလ်မက်ဒရစ်နည်းပြဇာဘီအလွန်ဆိုက အသင်းအဝတ်အစားလဲခန်းမှ ဘုတ်အဖွဲ့အထိ အသင်းအတွင်း စည်းလုံးမှု ရှိကြောင်း ပြောကြားလာပါတယ်။
လေဗာကူဆင်နည်းပြဟောင်းဟာ နွေရာသီတုန်းက ကာလိုအန်ဆယ်လော့တီနေရာတွင် ၃ နှစ်စာချုပ်ဖြင့် ခန့်အပ်ခြင်းခံခဲ့ရသူ ဖြစ်ပြီး ရီးရဲလ်မက်ဒရစ်အား ကိုင်တွယ်ပြီး ခြောက်လအကြာတွင်ပင် ဖိအားများအောက်သို့ ကျရောက်နေပြီ ဖြစ်ပါတယ်။
အလွန်ဆိုဟာ တနင်္ဂနွေနေ့တုန်းက ဘာနေဗျူးကွင်းတွင် ဆဲလ်တာဗီဂိုအား ၂-၀ ဂိုးဖြင့် ရှုံးနိမ့်ကာ နောက်ဆုံး လာလီဂါ ၅ ပွဲတွင် နိုင်ပွဲ ၁ ပွဲတည်းသာ ရရှိထားပြီး ထိပ်ဆုံးမှ ဘာစီလိုနာနှင့် ရမှတ် ၄ မှတ်ကွာဟနေပြီးနောက် ဖိအားများအောက်သို့ ကျရောက်နေပါတယ်။
အလွန်ဆိုဦးဆောင်တဲ့ ရီးရဲလ်မက်ဒရစ်ဟာ ယနေ့ ဗုဒ္ဓဟူးနေ့ညတွင် ဘာနေဗျူးကွင်းတွင် မန်စီးတီးကို ဧည့်ခံကစားရမှာ ဖြစ်ပြီး ယင်းပွဲ အနိုင်မရလျှင် ထုတ်ပယ်ခြင်းခံရမယ်လို့ သတင်းထွက်နေပါတယ်။
အလွန်ဆိုက "ကျွန်တော်တို့အားလုံး တစ်လှေတည်းစီးတွေပါ။ အပြုသဘောဆောင်တာတွေရော အပြုသဘော မဆောင်တာတွေရော ကျော်ဖြတ်ရမယ်။ လာမယ့်ပွဲက အခွင့်အရေးတစ်ခုလို့ ယုံကြည်ရမယ်။ အားလုံးအတွက် စိတ်လှုပ်ရှားစရာကောင်းတဲ့ ပွဲကြုံရမယ်။ ဘာနေဗျူးကွင်းမှာ ခံစားရမယ့် စွမ်းအင်ကို ကျွန်တော်တို ခံစားရမှာပါ။ ခံစားချက်က မနက်ဖြန်ပွဲမှာ အရေးကြီးပါတယ်"လို့ ပြောကြားသွားပါတယ်။
စပိန်မီဒီယာများရဲ့ ဖော်ပြမှုအရ အလွန်ဆိုဟာ ယနေ့ည ဘာနေဗျူးကွင်းပွဲစဉ်တွင် မန်စီးတီးအား အနိုင်မရပါက ရာထူးမှ ထုတ်ပယ်ခြင်းခံရမယ်လို့ သတင်းထွက်နေပါတယ်၊

ဖာဘရီဂက်စ်၊ ဆာလက်တို့ရဲ့ ပရီးမီးယားလိဂ်စံချိန်ကို လိုက်မီလာတဲ့ ဘရူနိုဖာနန်ဒက်စ်
=====================

ယူနိုက်တက်အသင်းခေါင်းဆောင်ဘရူနိုဖာနန်ဒက်စ်ဟာ ဝုဗ်နှင့်ပွဲစဉ်တွင် ၂ ဂိုးသွင်းကာ ၁ ကြိမ်ဖန်တီးမှု ပြုလုပ်နိုင်ခဲ့ပြီးနောက် လီဗာပူးစူပါစတားမိုဟာမက်ဆာလက်၊ ချဲလ်ဆီးကွင်းလယ်ကစားသမားဟောင်းဆက်စ်ဖာဘရီဂက်စ်တို့ရဲ့ စံချိန်ကို လိုက်မီလာပါတယ်။
နောက်ဆုံး ၉ ပွဲတွင် ရှုံးပွဲ ၁ ပွဲတည်းသာ ကြုံခဲ့တဲ့ ယူနိုက်တက်ဟာ ယခုအပတ်အစောပိုင်းတုန်းက Molieneux တွင် ဝုဗ်အား ရင်ဆိုင်ခဲ့ရာမှာ ၁-၄ ဖြင့် အနိုင်ရခဲ့ပါတယ်။
အဆိုပါပွဲစဉ်တွင် ပေါ်တူဂီကွင်းလယ်ကစားသမားဘရူနိုဖာနန်ဒက်စ်ဟာ ကိုယ်တိုင် ၂ ဂိုးသွင်းခဲ့သလို ဖန်တီးမှုလည်း ပြုလုပ်နိုင်ခဲ့ပါတယ်။
သူဟာ အဝေးကွင်းတွင် ကစားဖော် ဂိုးသွင်းနိုင်အောင် ဖန်တီးမှု ပြုလုပ်နိုင်ခဲ့ပြီးနောက် ပရီးမီးယားလိဂ်သမိုင်းတွင် အဝေးကွင်း ၅ ပွဲဆက် ဖန်တီးမှု ပြုလုပ်နိုင်တဲ့ ၅ ဦးမြောက် ကစားသမားဖြစ်လာပါတယ်။
ပေါ်တူဂီလက်ရွေးစင်ကစားသမားဟာ အန်ဖီးလ်တွင် လီဗာပူးအား ၂-၁ ဖြင့် အနိုင်ရတဲ့ပွဲတွင် မက်ဂွိုင်းယား ဂိုးသွင်းနိုင်အောင် ဖန်တီးမှု ပြုလုပ်နိုင်ခဲ့ပြီးနောက် နော်တင်ဟမ်ဖောရက်စ်၊ စပါးစ်၊ ခရစ္စတယ်ပဲလေ့စ်၊ ဝုဗ်တို့နှင့်ပွဲစဉ်များတွင် ပရီးမီးယားလိဂ်အဝေးကွင်း ၅ ပွဲဆက် ဖန်တီးမှု ပြုလုပ်နိုင်ခဲ့တာလည်း ဖြစ်ပါတယ်။
ဘရူနိုဖာနန်ဒက်စ်မတိုင်မီ ပရီးမီးယားလိဂ်အဝေးကွင်း ၅ ပွဲဆက် ဖန်တီးမှု ပြုလုပ်နိုင်သူများအဖြစ် ဆာလက် (၂၀၂၃)၊ ဂီရတ်ဒူလိုဖူ(၂၀၁၅)၊ ဖာဘရီဂက်စ်(၂၀၀၃)၊ မူဇီအစ်ဇက်(၂၀၀၃)တိုသာ ရှိထားခဲ့တာပါ။
တဖက်တွင် ဘရူနိုဖာနန်ဒက်စ်ဟာ ယခုရာသီ ဖန်တီးမှု ၆ ကြိမ်ဖြင့် ဥရောပထိပ်သီး ၅ ခုတွင် ဖန်တီးမှုအများဆံး တတိယကစားသမားအဖြစ် ရပ်တည်နေပါတယ်။ ဖာနန်ဒက်စ်ထက် ဖန်တီးမှု အများဆုံးကစားသမားများဖြစ် မိုက်ကယ်အိုလစ်(၈ ကြိမ်)၊ လာမိန်းယာမဲလ်(၇ ကြိမ်)တို့က ရပ်တည်နေပါတယ်။
ဒါ့အပြင် ယူနိုက်တက်အသင်းခေါင်းဆောင်ဟာ တစ်ပွဲတည်းတွင် ဂိုးနှင့် ဖန်တီးမှု ပြုလုပ်နိုင်တဲ့ပွဲ ၁၆ ကြိမ်မြောက်ပွဲ ရရှိလာတာလည်း ဖြစ်ပါတယ်။ ပရီးမီးယားလိဂ်တွင် တစ်ပွဲတည်းတွင် ဂိုးနှင့် ဖန်တီးမှု ပြုလုပ်နိုင်သူအများဆုံးအဖြစ် မိုဟာမက်ဆာလက်က ၂၇ ကြိမ်ဖြင့် ရပ်တည်နေပြီး ကီဗင်ဒီဘရိုင်းက ၁၇ ကြိမ်ဖြင့် ဒုတိယနေရာမှာ ရပ်တည်နေပါတယ်။

ယူနိုက်တက်ပိုင်ရှင်များရဲ့ ပရီးမီးယားလိဂ်ချန်ပီယံအိပ်မက်ကို ဆက်စ်ကိုရဲ့ အေးဂျင့်ဖွင့်ဟလာ
=====================

ဘင်ဂျာမင်ဆက်စ်ကိုရဲ့အေးဂျင့်က ယူနိုက်တက်မှာ ၂၀၂၇-၂၈ ရာသီတွင် ပရီးမီးယားလိဂ်ချန်ပီယံဆုအတွက် စိန်ခေါ်နိုင်ရန် ပစ်မှတ်ထားနေကြောင်း ဖွင့်ဟလာပါတယ်။
ဒါ့အပြင် အေးဂျင့်က ဆလိုဗေးနီးယားတိုက်စစ်မှူးမှာ နိုဝင်ဘာအစောပိုင်းတုန်းက ရရှိခဲ့တဲ့ ဒဏ်ရာမှ ပြန်လည်ကစားလာနိုင်မယ့်ကာလကိုလည်း ခန့်မှန်းပြောဆိုသွားပါတယ်။
ဆက်စ်ကိုဟာ နွေရာသီတုန်းက လိုက်ဇစ်မှ ပေါင် ၇၃.၆၂ သန်းဖြင့် ပြောင်းလာခဲ့တာ ဖြစ်ပြီး စပါးစ်နှင့် ၂ ဂိုးစီသရေကျတဲ့ပွဲတွင် ဒဏ်ရာရရှိပြီးနောက် တစ်လကြာ အနားယူလာခဲ့ရသူလည်း ဖြစ်ပါတယ်။
ယူနိုက်တက်ဟာ တနင်္လာနေ့တုန်းက ဝုဗ်ကို အဝေးကွင်းတွင် ၄-၁ ဖြင့် အနိုင်ရရှိပြီးနောက် အမှတ်ပေးဇယားအဆင့် ၆ နေရာသို့ တက်လှမ်းလာပါတယ်။
ယူနိုက်တက်ဟာ ယခုရာသီ နံပါတ်တစ်ပစ်မှတ်အဖြစ် ထိပ်ဆုံး ၆ သင်းစာရင်းဝင်ရေးသာ ဖြစ်ပေမယ့်လည်း ချန်ပီယံလိဂ်ဝင်ခွင့်အဆင့် ၅ နေရာမှာ ချဲလ်ဆီးနှင့် တစ်မှတ်တည်းသာ ကွာဟနေမှုနှင့်အတူ ချန်ပီယံလိဂ်ဝင်ခွင့်ပါ ပစ်မှတ်ထားနိုင်တဲ့အနေအထားမှာ ရှိပါတယ်။
ယူနိုက်တက်ပူးတွဲပိုင်ရှင် ဆာဂျမ်ရက်ကလစ်ဖ်က ကလပ် သက်တမ်း နှစ် ၁၅၀ ပြည့်မယ့် ၂၀၂၈ ခုနှစ်တွင် အမှတ်ပေးဖလား ဆွတ်ခူးရန် ပစ်မှတ်ထားနေတာပါ။
ဆက်စ်ကိုရဲ့ အေးဂျင့်အယ်ဗစ်ဘာဆာနိုဗစ်က အမိုရမ်မှာ ယူနိုက်တက်အား ပရီးမီးယားလိဂ်ဖလားအား စိန်ခေါ်နိုင်ရေး လုပ်ဆောင်နိုင်မယ်လို့ ဆိုသွားပါတယ်။
ဘာဆာနိုဗစ်က "သူက အရာရာတိုင်းနဲ့ပတ်သက်ပြီး ရိုးသားတော့ အဓိကလူဖြစ်လာမှာပါ(အမိုရမ်)။ ရည်မှန်းချက်ကောင်းကောင်းနဲ့ လုပ်နေတယ်။ ပရော်ဖက်ရှင်နယ်လည်း ပီသတယ်။ အရမ်းတော်တဲ့လူ၊ အရမ်းတော်တဲ့နည်းပြပါ။ သူ့ကိုယ်ပိုင်အမြင်အပေါ် ယုံကြည်ပါတယ်။ ယူနိုက်တက်ကို ထိပ်တန်းအဆင့်သို့ ဘယ်လို ပို့ရမလဲ သူ သိပါတယ်။ ဒါပေမယ့် အချိန်လိုပါတယ်။ ဒါပေမယ့် ကလပ်ကြီးတစ်ခုမှာက ရှင်းပြရခက်တယ်။ ဘယ်သူမှ ယူနိုက်တက်မှာ အချိန်မပေးချင်ဘူး။ အားလုံးက ရလဒ်ပဲ ချက်ချင်းလိုချင်တယ်။ ဒါပေမယ့် ကျွန်တော်ကတော့ ရူဘင်ကို အချိန်ပေးသင့်တယ်လို့ ထင်တယ်။ တိုးတက်မှုလည်း မြင်နေရပြီလေ"လို့ ပြောကြားသွားပါတယ်။
ဒါ့အပြင် ဘာဆာနိုဗစ်က ဆက်စ်ကိုမှာ ပြန်လည်ထူထောင်ရေး လေ့ကျင့်ခန်းများ ပြုလုပ်နေပြီ ဖြစ်ပြီး မကြာမီပြန်လည် ကစားလာနိုင်တော့မှာ ဖြစ်ကြောင်းလည်း ဆိုသွားပါတယ်။
၎င်းက "ဘင်ဂျာမင် အားလုံးကောင်းတယ်။ ပြန်လည်ထူထောင်ရေးကိုလည်း အစီအစဉ်အတိုင်းပဲ လုပ်နေတယ်။ သူကလည်း အမြန်ဆုံး ပြန်ကစားချင်နေတယ်။ သူ ပွဲတွေအများကြီး လွဲထားတယ်။ စိတ်မရှည်နိုင်အောင် ဖြစ်နေတယ်။ အမြန်ဆုံး ပြန်ကစားလာဖိ့ မျှော်လင့်နေပါတယ်။ ဘယ်အချိန်ပြန်ကစားမလဲ ပြောဖို့တော့ ပြောရခက်တယ်။ ဆေးအဖွဲ့နဲ့ နည်းပြကပဲ ဆုံးဖြတ်လာမှာပါ"လို့ ပြောကြားသွားပါတယ်။