ကမ္ဘာ့ကျန်းမာရေးအဖွဲ့ (WHO) မှ အမေရိကန်ပြည်ထောင်စု နုတ်ထွက်

ကမ္ဘာ့ကျန်းမာရေးအဖွဲ့ (WHO) မှ နုတ်ထွက်ခြင်းသည် အမေရိကန်ပြည်ထောင်စုနှင့် ကမ္ဘာတစ်ဝန်းရှိ ပြည်သူ့ကျန်းမာရေးကို ထိခိုက်စေနိုင်ကြောင်း တစ်နှစ်ကြာ သတိပေးမှုများ ရှိခဲ့သော်လည်း၊ အမေရိကန်ပြည်ထောင်စုသည် ကြာသပတေးနေ့တွင် ထိုအဖွဲ့အစည်းမှ တရားဝင် နုတ်ထွက်ခဲ့သည်။ ကုလသမဂ္ဂ၏ ကျန်းမာရေးဆိုင်ရာ အေဂျင်စီဖြစ်သော WHO သည် COVID-19 ကပ်ရောဂါကို စီမံခန့်ခွဲရာတွင် မအောင်မြင်ခဲ့ခြင်းကြောင့် ယခုကဲ့သို့ ဆုံးဖြတ်ရခြင်းဖြစ်ကြောင်း အမေရိကန်က ပြောကြားခဲ့သည်။
သမ္မတ ဒေါ်နယ်ထရမ့်သည် ၂၀၂၅ ခုနှစ်တွင် သူ၏ သမ္မတသက်တမ်း ပထမဆုံးနေ့၌ပင် အုပ်ချုပ်မှုအာဏာဖြင့် အမိန့်ထုတ်ပြန်ကာ အမေရိကန်ပြည်ထောင်စုအနေဖြင့် အဆိုပါအဖွဲ့အစည်းမှ နုတ်ထွက်မည်ဖြစ်ကြောင်း အကြောင်းကြားစာ ပေးပို့ခဲ့ခြင်းဖြစ်သည်။
အမေရိကန် ကျန်းမာရေးနှင့် နိုင်ငံခြားရေးဌာနတို့၏ သတင်းထုတ်ပြန်ချက်အရ၊ အမေရိကန်ပြည်ထောင်စုသည် နုတ်ထွက်ခြင်းလုပ်ငန်းစဉ်များ အကောင်အထည်ဖော်ရန်အတွက်သာ WHO နှင့် အကန့်အသတ်ဖြင့် ဆက်လက်ဆောင်ရွက်သွားမည် ဖြစ်သည်။
"ကျွန်တော်တို့အနေနဲ့ လေ့လာသူ(Observer) အဖြစ်လည်း ပါဝင်ဖို့ အစီအစဉ်မရှိသလို၊ ပြန်လည်ပူးပေါင်းဖို့ အစီအစဉ်လည်း မရှိပါဘူး" ဟု အမေရိကန်အဆင့်မြင့် ကျန်းမာရေးအရာရှိတစ်ဦးက ပြောကြားခဲ့သည်။ အမေရိကန်ပြည်ထောင်စုအနေဖြင့် ရောဂါစောင့်ကြည့်ခြင်းနှင့် အခြားသော ပြည်သူ့ကျန်းမာရေး ဦးစားပေးလုပ်ငန်းများတွင် နိုင်ငံတကာအဖွဲ့အစည်းတစ်ခုမှတစ်ဆင့် လုပ်ဆောင်မည့်အစား အခြားနိုင်ငံများနှင့် တိုက်ရိုက်ပူးပေါင်း ဆောင်ရွက်သွားရန် စီစဉ်ထားကြောင်း သူကပြောသည်။

ဝန်ကြီးဌာန(၃)ခုအတွက် ဒု-ဝန်ကြီးများခန့်အပ်တာဝန်ပေး

အမျိုးသားကာကွယ်ရေးနှင့်လုံခြုံရေးကောင်စီရုံးမှ အမိန့်အမှတ် ၂/၂၀၂၆ ဖြင့် ဝန်ကြီးဌာန(၃)ခုအတွက် ဒု- ဝန်ကြီးများကိုခန့်အပ်တာဝန်ပေးခဲ့ကြောင်း ယနေ့ ဇန်နဝါရီ ၂၃ ရက်ကထုတ်ပြန်ခဲ့သည်။
ပို့ဆောင်ရေးနှင့် ဆက်သွယ်ရေးဝန်ကြီးဌာန ဒု-ဝန်ကြီးအဖြစ် ဦးသက်ဝင်းအောင်၊ ပြည်ထဲရေးဝန်ကြီးဌာန ဒု- ဝန်ကြီးအဖြစ်ဗိုလ်ချုပ်မင်းသူ၊ စက်မှုဝန်ကြီးဌာန ဒု-ဝန် ကြီးအဖြစ်ဦးသွင်အောင်တို့ကို ခန့်အပ်တာဝန်ပေးခဲ့ခြင်းဖြစ်သည်။
၎င်းတို့အား အမျိုးသားကာကွယ်ရေးနှင့်လုံခြုံရေးကောင်စီမှ ဖွဲ့စည်းပုံအခြေခံဥပဒေပုဒ်မ ၄၂၇၊ ပုဒ်မခွဲ (ခ)အရ ခန့်အပ်တာဝန်ပေးခဲ့ခြင်းဖြစ်သည်။

ကမ္ဘောဒီးယားနိုင်ငံရှိ အွန်လိုင်းလိ-မ်လည်လေ-ာင်းကစားမှုများတွင်ပါဝင်ခဲ့သည့် မြန်မာနိုင်ငံသား(၁၃၆)ဦးကို ပထမအကြိမ်ပြန်လည်ခေါ်ဆောင်

ကမ္ဘောဒီးယားနိုင်ငံအတွင်း အွန်လိုင်းလိ-မ်လည်လေ-ာင်းကစားမှုများတွင်ပါဝင်ခဲ့သည့် မြန်မာနိုင်ငံသား(၆၇၅) ဦးသည် ၎င်းတို့အစီအစဉ်၊ ကမ္ဘောဒီးယားနိုင်ငံ ရဲတပ်ဖွဲ့နှင့် ဌာနဆိုင်ရာများကလွှဲပြောင်းပေးအပ်မှုတို့အရ ယနေ့ ဇန်နဝါရီ ၂၃ ရက်တွင် ကမ္ဘောဒီးယားနိုင်ငံဆိုင်ရာ မြန်မာသံရုံးသို့ရောက်ရှိခဲ့ကြောင်း သိရသည်။
ထို့ကြောင့် မြန်မာသံရုံးတာဝန်ရှိသူများမှ ရောက်ရှိလာသောမြန်မာနိုင်ငံသားများအနက် (၁၃၆)ဦးအား ပထမအသုတ်အဖြစ် မြန်မာ့လေကြောင်းလိုင်း(MAI)ဖြင့်ပြန်လည်ပို့ဆောင်ပေးခဲ့ရာ ယနေ့ ဇန်နဝါရီ ၂၃ ရက်နံနက်အစောပိုင်းတွင် မန္တလေးမြို့ရှိအပြည်ပြည်ဆိုင်ရာလေဆိပ်သို့ပြန်လည်ရောက်ရှိခဲ့ကြောင်း သိရသည်။
ပြန်လည်ရောက်ရှိလာသည့် မြန်မာနိုင်ငံသားများအား တာဝန်ရှိသူများက လိုအပ်သည့်ကိုယ်ရေးအချက်အလက်များနှင့် မှတ်တမ်းများစာရင်းကောက်ယူခြင်း၊ စစ်ဆေးခြင်းများပြုလုပ်ပြီး လုပ်ထုံးလုပ်နည်းများနှင့်အညီ ဆက်လက်ဆောင်ရွက်သွားမည်ဖြစ်ကြောင်း သိရသည်။
ထို့ပြင် ကမ္ဘောဒီးယားနိုင်ငံတွင်ကျန်ရှိသည့် မြန်မာနိုင်ငံသားများကိုလည်း အမြန်ဆုံးပြန်လည်ခေါ်ဆောင်နိုင်ရေးအတွက် ဆက်လက်ဆောင်ရွက်လျက်ရှိကြောင်း သိရသည်။

ရွေးကောက်ပွဲအပိုင်း(၃)အတွက် နိုင်ငံတကာရွေး ကောက်ပွဲစောင့်ကြည့်လေ့လာသူများရောက်ရှိနေ

လာမည့် ဇန်နဝါရီ ၂၅ ရက်တွင်ကျင်းပမည့် ရေကောက်ပွဲအပိုင်း(၃)အား စောင့်ကြည့်လေ့လာမှုများပြုလုပ်မည့် နိုင်ငံတကာရွေးကောက်ပွဲစောင့်ကြည့်လေ့လာသူများ ရန်ကုန်မြို့သို့ လေကြောင်းခရီးဖြင့်ရောက်ရှိလာခဲ့ကြပြီဖြစ်ကြောင်း သိရသည်။
အိန္ဒိယနိုင်ငံမှကိုယ်စားလှယ်အဖွဲ့သည် ဇန်နဝါရီ ၁၉ ရက်မွန်းလွဲပိုင်း၊ ဘယ်လာရုစ်နိုင်ငံ ဘယ်လာရုစ်ပါတီမှ Ms. Vohila N. Chamadanova ဦးဆောင်သော ကိုယ် စားလှယ်အဖွဲ့သည် ဇန်နဝါရီ ၂၁ ရက်ညပိုင်းတို့ကရောက်ရှိလာခဲ့ကြကြောင်း သိရသည်။
ထို့ပြင် အင်ဒိုနီးရှားနိုင်ငံရွေးကောက်ပွဲကော်မရှင်အဖွဲ့ဝင် Ms. Yusti Erina ဦးဆောင်သောကိုယ်စားလှယ်အဖွဲ့နှင့် နီပေါနိုင်ငံ ရွေးကောက်ပွဲကော်မရှင်အဖွဲ့ဝင် Dr. Janaki Kumari Tuladhar ဦးဆောင်သောကိုယ်စား လှယ်အဖွဲ့တို့သည် ယနေ့ ဇန်နဝါရီ ၂၃ ရက်နံနက်ပိုင်းတို့ကရောက်ရှိလာခဲ့ကြခြင်းဖြစ်ကြောင်း သိရသည်။
ထို့အတူ ကမ္ဘောဒီးယားနိုင်ငံ ရွေးကောက်ပွဲကော်မရှင်အဖွဲ့ဝင် Mr. Yich Samethy ဦးဆောင်သောကိုယ်စား လှယ်အဖွဲ့၊ နီကာရာဂွါနိုင်ငံမှ Mr. Mario Jose Armengol Campos ဦးဆောင်သောကိုယ်စားလှယ်အဖွဲ့၊ International Conference of Asian Political Parties (ICAPP) ဒု-ဥက္ကဋ္ဌ Dr. Chheng Kimlong ဦးဆောင်သောကိုယ်စားလှယ်အဖွဲ့တို့သည်လည်း ယ နေ့ ဇန်နဝါရီ ၂၃ ရက်ညပိုင်းတွင်ရောက်ရှိလာခဲ့ကြကြောင်း သိရသည်။

အာဆီယံ မသန်စွမ်းအားကစားပြိုင်ပွဲ၌ မြန်မာက ရွှေတံဆိပ်(၁၁)ခုထိ ဆွတ်ခူးထား

ထိုင်းနိုင်ငံကအိမ်ရှင်အဖြစ်ကျင်းပနေသည့် ၁၃ ကြိမ်မြောက် အာဆီယံမသန်စွမ်းအားကစားပြိုင်ပွဲ ၌ ဇန်နဝါရီ ၂၃ ရက်နေ့ထိ မြန်မာက ရွှေတံဆိပ်(၁၁)ခု ၊ငွေတံဆိပ်(၁၀)ခု နှင့် ကြေးတံဆိပ်(၁၄)ခု ဆွတ်ခူးထားနိုင်ကြောင်း သိရသည်။
နိုင်ငံအလိုက် အဆင့်(၆)တွင်ရပ်တည်နေပြီး စုစုပေါင်းဆုတံဆိပ်(၃၅)ခုကို ဆွတ်ခူးထားနိုင်ခြင်းလည်းဖြစ်သည်။
ရေကူးပြိုင်ပွဲ၊ ဘော်လီဘောပြိုင်ပွဲ ၊ပြေးခုန်ပစ်ပြိုင်ပွဲ ၊သံလုံးပစ်ပြိုင်ပွဲ အပြေးပြိုင်ပွဲ ၊ စစ်တုရင်၊ ပြိုင်ပွဲများတွင် ဆုတံဆိပ်များ ဆုခူးထားနိုင်ခြင်းဖြစ်ကြောင်းလည်း သိရသည်။
အာဆီယံ မသန်စွမ်း အားကစားပြိုင်ပွဲ၌ အားကစားနည်း (၁၉)မျိုးပါဝင်ပြီး မြန်မာနိုင်ငံမှ အားကစားနည်း (၁၁) နည်းတွင် ဝင်ရောက်ယှဉ်ပြိုင်လျက်ရှိကြောင်း သိရသည်။
လက်ရှိ၌ မြန်မာနိုင်ငံအနေဖြင့် ရေကူးအားကစားနည်း၊ သံလုံးပစ်အားကစားနည်း၊ သံပြားအဝိုင်းပစ် အားကစားနည်းတို့မှ ရွှေတံဆိပ်ရရှိထားသည်။
မြန်မာနိုင်ငံအနေဖြင့် အာဆီယံမသန်စွမ်း အားကစားပြိုင်ပွဲကို အုပ်ချုပ်နည်းပြ အပါအဝင် စုစုပေါင်း (၁၄၅) ဦး ဖြင့် ယှဉ်ပြိုင်လျက်လည်းရှိပြီး ဇန်နဝါရီ (၂၆)ရက်နေ့ထိ ယှဉ်ပြိုင်ရမည်လည်း ဖြစ်သည်။

တနင်္သာရီတိုင်းတွင် သက်ကြီးရွယ်အိုနှင့် နာမကျန်းသူများအတွက် ကြိုတင်ဆန္ဒမဲ အိမ်တိုင်ရာရောက်ကောက်ခံပေး

တနင်္သာရီတိုင်း သရက်ချောင်းမြို့နယ်၌ ရွေးကောက်ပွဲ အပိုင်း(၃) အတွက် သက်ကြီးရွယ်အိုများနှင့် နာမကျန်းဖြစ်နေသူများကို ကြိုတင်ဆန္ဒမဲ အိမ်တိုင်ရာရောက်ကောက်ခံခြင်းများ လုပ်ဆောင်ခဲ့ကြောင်း သိ-ရသည်။
အကြောင်းအမျိုးမျိုးကြောင့် ရပ်ကွက်၊ကျေးရွာကော်မရှင် အဖွဲ့ခွဲရုံးများသို့ ကြိုတင်ဆန္ဒမဲလာရောက်မပေးနိုင်သူများထံ သွားရောက်ပြီး ကြိုတင်ဆန္ဒမဲများ အိမ်တိုင်ရာရောက်ကောက်ခံခြင်းကို ယမန်နေ့က ဆောင်ရွက်ပေးခဲ့ခြင်းဖြစ်ကြောင်း သိရသည်။
သက်ဆိုင်ရာ ရပ်ကွက်ကျေးရွာ ရွေးကောက်ပွဲကော်မရှင်အဖွဲ့ခွဲ့ အဖွဲ့ဝင်များ မဲရုံအဖွဲ့ဝင်များ မဲရုံစောင့်ကြည့်ရေးအဖွဲ့ဝင်များ ကိုယ်စားလှယ်များနှင့် တာဝန်ရှိသူများက ပါဝင်ခဲ့ကြောင်း သိရသည်။
သက်ကြီးဘိုးဘွားမဲဆန္ဒရှင်များနှင့် နာမကျန်းဖြစ်သည်များ အတွက် ကျန်းမာရေးနှင့်အညီ လုံခြုံဘေးကင်းစွာမဲပေးနိုင်မည် အခွင့်အရေးများရရှိရန် ကြိုတင်ဆန္ဒမဲကောက်ခံခြင်းကို အိမ်တိုင်ရာရောက်ဆောင်ရွက်ပေးခဲ့ခြင်းဖြစ်ကြောင်း သိရသည်။

ရုရှား၊ ယူကရိန်းနဲ့ အမေရိကန်တို့ အဘူဒါဘီမှာ သုံးပွင့်ဆိုင်‌ဆွေးနွေးကြမယ်

ယူကရိန်းကို ရုရှားက ကျူးကျော်တိုက်ခိုက်ပြီးနောက် လေးနှစ်နှစ်ပါးအကြာမှာ ပထမဆုံးအကြိမ်အဖြစ် ရုရှား၊ ယူကရိန်းနဲ့ အမေရိကန်တို့ သုံးပွင့်ဆိုင် ဆွေးနွေးကြမယ်လို့ တာဝန်ရှိသူတွေက ပြောပါတယ်။
သမ္မတ ဗလာဒီမာပူတင်နဲ့ အမေရိကန်သံတမန်မှာတွေ့ဆုံပြီးနောက် မော်စကိုမှာ တွေ့ဆုံပြီးနောက် အခုလိုဆွေးနွေးပွဲ ထွက်ပေါ်လာတာပါ။ ပူတင်နဲ့တွေ့ဆုံမှုမှာ အမေရိကန်သံတမန် စတိဝစ်အော့ဖ်နဲ့ ထရန့်ရဲ့ သားမက်ဖြစ်သူ ကုရှ်နာတို့လည်း တက်ရောက်ခဲ့ကြပါတယ်။
ဒီတွေ့ဆုံဆွေးနွေးမှုဟာ အသုံးဝင်တဲ့ ဆွေးနွေးမှုလို့ ရုရှားက ဆိုသော်ပေမယ့် နယ်မြေပြဿနာတွေကို မဖြေရှင်းရမချင်း ရေရှည်ငြိမ်းချမ်းရေးသဘောတူညီချက်ကို ရရှိနိုင်မှာမဟုတ်ဘူးလို့ ပြောပါတယ်။ ယူကရိန်းသမ္မတ ဇီလန်စကီးကတော့ ရုရှားအပေါ် အရေးယူပိတ်ဆို့မှုတွေ အားနည်းတဲ့ အတွက် ဥရောပမဟာမိတ်တွေကို ကမ္ဘာ့စီးပွားရေးဖိုရမ်မှာ ဝေဖန်ခဲ့ပါတယ်။
အဘူဒါဘီ ဆွေးနွေးပွဲတွေ မတိုင်ခင် ယူကရိန်းအရှေ့ပိုင်း နယ်မြေတွေရဲ့ အနာဂတ်အခြေအနေဟာ မဖြေရှင်းရသေးတဲ့ ပြဿနာတခုအဖြစ် ရှိနေသေးကြောင်း ထရန့်ကို ရှင်းရှင်းလင်းလင်း ပြောကြားခဲ့တယ်လို့ ဒါးဗို့စ်မှာ ထရန့်နဲ့ တွေ့ဆုံပြီးနောက် ဇီလန်စကီးကပြောပါတယ်။
ဒေါ်နယ်ထရန့်ကတော့ ပူတင်နဲ့ ဇီလန်စကီးတို့ နှစ်ယောက်စလုံးဟာ ယူကရိန်းစစ်ပွဲနဲ့ပတ်သက်ပြီး သဘောတူညီချက်တခု ရရှိဖို့ လိုလားနေတယ်ဆိုတာ ယုံကြည်ကြောင်းနဲ့ ဒီအတွက် နည်းလမ်းတွေ ရှာဖွေနေကြောင်း ဒေါ်နယ်ထရန့်က ပြောပါတယ်။
အဘူဒါဘီ ဆွေးနွေးပွဲအတွက် ဒေါ်နယ်ထရန့်က သူ့ရဲ့ သံတမန် စတိဗ်ဝစ်အော့ဖ်နဲ့ သားမက်ဖြစ်သူ ကုရှ်နာတို့ကို စေလွှတ်မှာဖြစ်ပြီး ယူကရိန်းကတော့ ယူကရိန်းအမျိုးသားလုံခြုံရေးနှင့်ကာကွယ်ရေးကောင်စီအကြီးအကဲ ရပ်စတမ်ယူမီရောဗ်ကို ကိုယ်စားလှယ်အဖွဲ့ကို ဦးဆောင်စေမှာဖြစ်ကာ ရုရှားကမူ စစ်ထောက်လှမ်းရေးအေဂျင်စီ ညွှန်ကြားရေးမှူး ဗိုလ်ချုပ်ကြီး အိုင်ဂေါ်ကိုစတီကော့ဗ်က ဦးဆောင်မှာဖြစ်ပါတယ်။

ရန်ကုန် အိမ်ခြံမြေဈေးကွက် ရောင်း၊ ဝယ်၊ ငှား ဈေးနှုန်းတွေ မြင့်တက်လာ

လက်ရှိ ရန်ကုန် အိမ်ခြံမြေဈေးကွက်အတွင်း မြေကွက်၊ လုံးချင်း အရောင်းအဝယ်နဲ့ အငှား ဈေးနှုန်းတွေ မြင့်တက်လာတယ်လို့ အိမ်ခြံမြေ အကျိုးဆောင် အသိုင်းအဝိုင်းက သိရှိရပါတယ်။
ဒေါ်လာဈေးနှုန်း မတည်ငြိမ်မှုနဲ့ ရွှေဈေးနှုန်း အဆမတန် မြင့်တက်နေမှုတွေကြောင့် ငွေကိုင်ထားသူတွေဟာ အိမ်ခြံမြေဘက်ကို ပြောင်းလဲ ရင်းနှီးမြှုပ်နှံမှုတွေ ပြုလုပ်လာတဲ့အတွက် အဝယ်လိုက်နေပြီး ဈေးနှုန်းတွေ မြင့်တက်လာတာ ဖြစ်တယ်လို့ သိရပါတယ်။
အခုရက်ပိုင်းထဲ ရန်ကုန်အိမ်ခြံမြေဈေးကွက် ပြန်လှုပ်လာတဲ့ သဘောပေါ့။ အဓိက ကတော့ ရွှေဈေး အရမ်းတက်နေတော့ ရွှေမဝယ်ဘဲ မြေကိုင်ထားချင်ကြတဲ့သူတွေ များလာတယ်။ ဒါကြောင့်ပဲ အိမ်ခြံမြေဈေးတွေ ထိုးတက်လာတာ။ အရောင်းအဝယ် အများဆုံး ဖြစ်နေတာကတော့ ဒဂုံ လေးမြို့နယ်မှာ အဝယ်ပိုဖြစ်နေတယ် လို့ အိမ်ခြံမြေ အကျိုးဆောင် တယောက်က ပြောပါတယ်
ဒဂုံမြို့သစ် (မြောက်ပိုင်း) မြို့နယ်မှာ ပေ ၂၀၆၀ တကွက်ကို ကျပ် သိန်း ၄၅၀၀ ကနေ သိန်း တသောင်းသုံးထောင့် ငါးရာအထိ ရှိနေပြီး ပေ ၄၀၆၀ တကွက်ကို ကျပ်သိန်း ၇၈၀၀ ကနေ သိန်း တသောင်းနှစ်ထောင်ဝန်းကျင် ရှိနေတယ်လို့ သူက ပြောပါတယ်။
ဒဂုံမြို့သစ် (အရှေ့ပိုင်း) မြို့နယ်မှာတော့ ပေ ၂၀၆၀ တကွက်ကို သိန်း ၅၀၀၀ မှ သိန်း တသောင်းအထိ ပေါက်ဈေးရှိနေပြီး ပေ ၄၀၆၀ တကွက် ဆိုရင်တော့ ငွေကျပ် သိန်း တသောင်းအထက်မှာ ရှိနေတယ်လို့ ဆိုပါတယ်။
ဒဂုံမြို့သစ် (တောင်ပိုင်း) မြို့နယ်မှာတော့ ပေ ၂၀၆၀ ကို ကျပ်သိန်း ၆၇၀ ကနေ ၁၂၀၀ ဝန်းကျင်ဈေး ရှိနေသလို ပေ ၄၀၆၀ ကို ကျပ်သိန်း ၂၇၅၀ ၊ ၃၀၀၀ ၊ ၅၅၀၀ ၊ ၇၀၀၀ ကနေ တသောင်း နှစ်ထောင်ဝန်းကျင်ဈေးအထိ ရှိနေတယ်လို့ သိရပါတယ်။
ဒဂုံမြို့သစ် (ဆိပ်ကမ်း) မြို့နယ်မှာတော့ ပေ ၂၀၆၀ ကို ကျပ်သိန်း ၅၅၀ ၊ ၆၅၀၊ ၁၂၀၀ ဝန်းကျင်၊ ပေ ၃၀၆၀ ကို ကျပ်သိန်း ၁၀၀၀ ဝန်းကျင်၊ ပေ ၃၉၆၀ ကျပ်သိန်း ၃၅၀၀ ဝန်းကျင် ပေါက်ဈေးရှိနေတယ်လို့ သိရပါတယ်။
ရန်ကုန် အိမ်ခြံမြေ ဈေးကွက်အတွင်း ဒဂုံမြို့သစ် လေးမြို့နယ်က အရောင်းအဝယ် အများဆုံးနဲ့ ရပ်တည်နေသလို ကျန်မြို့နယ်တွေမှာလည်း တိုက်ခန်း အရောင်းအဝယ်တွေ ရှိနေတယ်လို့ သိရပါတယ်။
တိုက်ခန်း အရောင်းအဝယ်တွေကတော့ နေရာဒေသ၊ အထပ်အမြင့်နဲ့ အခန်းအကျယ်အဝန်း အမျိုးအစားပေါ် မူတည်ကာ ကျပ် သိန်း ၂၇၀ ၊ ၄၀၀ ၊ ၆၅၀ ကနေ ကျပ် သိန်း ၂၀၀၀ ၊ သုံးသောင်းခွဲကနေ လေးသောင်းဝန်းကျင် စသဖြင့် ပေါက်ဈေး ရှိနေတယ်လို့ သိရပါတယ်။
ဒါအပြင် အငှားဈေးကွက်မှာလည်း ကျပ် တသိန်းခွဲ၊ သုံးသိန်းကြားမှာ အငှားလိုက်နေပြီး ဈေးတွေကတော့ နေရာဒေသ၊ လချုပ်၊ စပေါ် ကွာဟမှုအလိုက် ကျပ် တသိန်းခွဲကနေ ၁၀ သိန်း၊ ၁၈ သိန်းဝန်းကျင်အထိ ဈေးအမျိုးမျိုး ရှိနေတယ်လို့ သိရပါတယ်။
အိမ်ငှားခတွေလည်း ဆက်တိုက် ဈေးတက်နေတယ်။ အရင်နှစ်တွေထက် ၅၀ ရာခိုင်နှုန်းကျော်လောက် ဈေးတက်လာတာ။ ဆင်ခြေဖုံး ရပ်ကွက်တွေမှာတောင် အိမ်ငှားခက တလကို အနည်းဆုံး တသိန်းခွဲအထက်မှာပဲ ရှိတော့တယ်။ တသိန်းအောက် အိမ်ငှားခက မရှိသလောက် ရှားသွားပြီ။ လိုင်းခန်းတွဲတွေ ဆိုရင်တောင် တသိန်းနှစ်သောင်း၊ တသိန်းရှစ်သောင်းဝန်းကျင် ဖြစ်နေပြီ လို့ ဒဂုံမြောက်ပိုင်းမြို့နယ်မှ အိမ်ခြံမြေအကျိုးဆောင် တယောက်က ပြောပါတယ်။
လက်ရှိမှာ သိန်း ၁၀၀၀ ဝန်းကျင်ကနေ သိန်း ၅၀၀၀ ဝန်းကျင်ရှိ အိမ်ခြံမြေနဲ့ တိုက်ခန်းတွေ အရောင်းအဝယ် ပိုဖြစ်နေတယ်လို့ သိရပြီး ပွင့်လင်းရာသီလည်း ရောက်ရှိလာပြီ ဖြစ်တာကြောင့် အိမ်ခြံမြေဈေးကွက်ဟာ ဈေးနှုန်းအမြင့်ပိုင်းနဲ့ အရောင်းအဝယ် ကောင်းမွန်နေနိုင်တယ်လို့ ဆိုပါတယ်။

ရွေး​ကောက်ပွဲ တတိယပိုင်းအတွက် မန္တလေးတိုင်းဒေသကြီး ရွေးကောက်ပွဲကော်မရှင်အဖွဲ့ခွဲရဲ့ စီစဥ်ထားမှုများ

ပါတီစုံဒီမိုကရေစီအထွေထွေရွေးကောက်ပွဲ တတိယပိုင်းကို ၂၀၂၆ ခုနှစ်၊ ဇန်နဝါရီလ (၂၅)ရက် တနိုင်ငံလုံး ကျင်းပမည့် မြို့နယ် (၆၃)မြို့နယ် မန္တလေးတိုင်းဒေသကြီးတွင် (၈)မြို့နယ်ကျင်းပမှာဖြစ်ပြီး မဲပေးပိုင်ခွင့်ရှိသူ မဲဆန္ဒရှင် ပေါင်း (၆)သိန်းကျော်ရှိတယ်လို့ သိရပါတယ်။
ပါဝင်ယှဉ်ပြိုင်ကြမယ့် နိုင်ငံရေးပါတီ ၉ ပါတီ ၊တစ်သီးပုဂ္ဂလ ၃ ဦး၊ နိုင်ငံရေးပါတီတွေက ကိုယ်စားလှယ်လောင်း ၅၃၆ ဦး၊ ရှမ်းတိုင်း ရင်းသားကိုယ်စားလှယ်လောင်း ၄ ဦး တို့ ဝင်ယောက်ယှဥ်ပြိုင်မှာဖြစ်ပါတယ်။
မဲစာရင်းနံပါတ်ရှာရလွယ်​အောင် တက်ပလက်​တွေနဲ့ စီစဥ်ထားသလို မဲ​ပေးစက်​တွေ ချွတ်ယွင်းမှုမရှိ​အောင် ၊အချိန်ကြန့်ကြာမှုမရှိ​အောင် စီမံထား​တယ်လို့လည်း မန္တ​လေးတိုင်း ​ရွေး​ကောက်ပွဲ​ကော်မရှင်က​နေ သိရပါတယ်။
မဲဆန္ဒရှင်များ မနက် ၆နာရီက​နေ ည​နေ ၄နာရီထိ မဲရုံ ပရဝုဏ်ထဲ​ရောက်သူမှန်သမျှ မဲ​ပေးခွင့်ရ​ရှိမှာ ဖြစ်တယ်လို့လည်းသိရပါတယ်။
မဲရုံထဲကို မှတ်ပုံတင်ကလွဲရင် ဖုန်း၊တခြားလျှပ်စစ်ပစ္စည်း​တွေနဲ့ တားမြစ်ထားတာ​တွေ ယူခွင့်မရှိဘဲ ပါလာခဲ့ရင် ဂိတ်ဝမှာ စနစ်တကျ အပ်နှံဖို့ စီစဥ်ထားတယ်လို့ သိရ​ပါတယ်။
​ရွေး​ကောက်ပွဲ ပထမပိုင်း ၂၀၂၅ ခုနှစ်၊ ဒီဇင်ဘာလ (၂၈)ရက် တစ်နိုင်ငံလုံးကျင်းပတဲ့ မြို့နယ်(၁၀၂) မြို့နယ်၊ မန္တလေးတိုင်းဒေသကြီးတွင် (၈)မြို့နယ်ကျင်းပခဲ့ပြီး မဲပေးမှု အခြေအနေမှာ ဆန္ဒမဲပေးပိုင်ခွင့်ရှိသူပေါင်း (၁၃)သိန်းကျော်၊ မဲလာရောက်ပေးသူ (၈)သိန်းကျော်ရှိ၍ မဲပေးမှု % မှာ ၆၂ % ကျော်ရှိပါတယ်။
ဒုတိယပိုင်း - ၂၀၂၆ ခုနှစ်၊ ဇန်နဝါရီလ (၁၁)ရက် တစ်နိုင်ငံလုံး ကျင်းပသည့် မြို့နယ်(၁၀ဝ)မြို့နယ်၊ မန္တလေးတိုင်းဒေသကြီးတွင် (၉)မြို့နယ်ကျင်းပခဲ့ပြီး မဲပေးပိုင်ခွင့်ရှိသူပေါင်း (၁၀) သိန်းကျော်တွင် မဲလာရောက်ပေးသူ (၇)သိန်းနီးပါးရှိ၍ မဲပေးမှု % မှာ
၆၄% ကျော် ရှိပါတယ်။
အပိုင်း(၁)၊ အပိုင်း(၂) ရွေးကောက်ခံ ကိုယ်စားလှယ်များတွေကိုလည်း ပြည်ထောင်စုရွေးကောက်ပွဲကော်မရှင် က အပိုင်းလိုက်လွှတ်တော်အလိုက် ကြေညာထားပါတယ်။
ပါတီစုံ ဒီမိုကရေစီ အထွေထွေရွေးကောက်ပွဲ အပိုင်း(၁)နဲ့အပိုင်း(၂)မှာ ရပ်ကွက်/ကျေးရွာအုပ်စုကော်မရှင်အဖွဲ့ခွဲတွေနဲ့ မဲရုံအဖွဲ့တွေရဲ့ လုပ်ငန်းဆောင်ရွက်မှု လိုအပ်ချက်တွေကိုအပိုင်း(၃)မှာ မဖြစ်ပွားစေရေးနဲ့ မဲဆန္ဒရှင်တွေ သက်တောင့်သက်သာ အေးချမ်းစွာ မဲပေးနိုင်ဖို့ ကော်မရှင်အဖွဲ့ခွဲအဆင့်ဆင့်မှ စီစဉ်ပေးထားတယ်လို့ သိရပါတယ်။

အမေရိကန်နိုင်ငံသား သန်း ၁၆၀ ကျော် ကြမ်းတမ်းတဲ့ နှင်းမုန်တိုင်းနဲ့ ရင်ဆိုင်ရဖွယ်ရှိ

အမေရိကန်နိုင်ငံသား ၁၆၀ သန်းကျော်ဟာ သောကြာနေ့မှစပြီး ထူးခြားကြမ်းတမ်းနဲ့ ဆောင်းရာသီမုန်တိုင်းနဲ့ ရင်ဆိုင်ရဖွယ်ရှိပြီး ဆီးနှင်းမထူထပ်စွာကျဆင်းတာ ဆီးနှင်းခဲတွေရွာချတာတွေ ဖြစ်ပေါ်နိုင်ကြောင်း မိုးလေဝသဌာနက သတိပေးထားပါတယ်
မုန်တိုင်းဟာ အမေရိကန်ပြည်ထောင်စုရဲ့ နေရာအများစုကို ဖြတ်သန်းတိုက်ခတ်မယ်လို့ မျှော်လင့်ရပြီး လွင်ပြင်အမြင့်တွေနဲ့ ရော့ကီးတောင်တန်းတွေကနေ အရှေ့ဘက်သို့ ဦးတည်သွားကာ အလွန်အန္တရာယ်များတဲ့ အခြေအနေတွေကို ဖြစ်ပေါ်စေလိမ့်မယ်လို့ မိုးလေဝသဌာနက ပြောပါတယ်။
အာတိတ်ဒေသ လေအေးတွေကြောင့် သုညအောက် အပူချိန်ကျဆင်းမှာဖြစ်ပြီး အသက်အန္တရာယ်ရှိတဲ့ ခန္ဓာကိုယ်အပူချိန်ကျဆင်းတာနဲ့ အရေပြားပေါ်အေးခဲ ထိုခိုက်တာတွေ ဖြစ်နိုင်တယ်လို့ သတိပေးထားပါတယ်။
အဓိကမြို့ကြီးများစွာရှိ လေဆိပ်အာဏာပိုင်တွေအပါအဝင် အမေရိကန်သယ်ယူပို့ဆောင်ရေး အရာရှိတွေကတော့ အားလပ်ရက်ခရီးစဉ်တွေ အနှောင့်အယှက်ဖြစ်စေတာ ၊ ဖျက်သိမ်းတာနဲ့ နှောင့်နှေးတာတွေဖြစ်နိုင်တယ်လို့ ပြောပါတယ်။
ဆောင်းရာသီမုန်တိုင်းဟာ အမေရိကန်တဝန်းကို ဖြည်းဖြည်းချင်းရွေ့လျားမယ်လို့ ခန့်မှန်းထားပြီး မန်ဖစ်၊ နက်ရှ်ဗီးလ်၊ ဝါရှင်တန်ဒီစီ၊ ဘာလ်တီမိုး၊ ဖီလာဒဲလ်ဖီးယားနဲ့ နယူးယောက်အပါအဝင် မြို့တွေမှာ ဆီးနှင်းတွေ ဖုံးလွှမ်းနေပါတယ်။
တောင်ပိုင်းရော့ကီးတောင်တန်းတွေနဲ့ လွင်ပြင်တွေမှတဆင့် အလယ်အတ္တလန္တိတ်သို့ နှင်းများထူထပ်စွာကျရောက်မယ်လို့ ခန့်မှန်းထားပြီး အရှေ့မြောက်ဘက်အထိ ရောက်ရှိနိုင်ပါတယ်။ နှင်းတပေကျော် ကျဆင်းနိုင်တဲ့ ဒေသတွေဟာ ကော်လိုရာဒိုကနေ အနောက်ဗာဂျီးနီးယား၊ ဘော်စတွန်အထိ ကျယ်ပြန့်နိုင်ပါတယ်။
နယူးယောက်မြို့ အပါအဝင် နယူးဂျာစီ အရှေ့မြောက်ပိုင်းနဲ့ နယူးယောက် အရှေ့တောင် အစိတ်အပိုင်းတွေမှာ တနင်္ဂနွေနေ့ အစောပိုင်းကစပြီး တနင်္လာနေ့အထိ နှင်း ၁၀ လက်မကနေ ၁၄ လက်မအထိ ကျဆင်းနိုင်တယ်လို့ မိုးလေဝသဌာနက သတိပေးထားပါတယ်။
ဘော်စတွန် အပါအဝင် နယူးအင်္ဂလန်ရဲ့ တောင်ပိုင်း အများစုမှာ တနင်္ဂနွေနေ့ကနေ တနင်္လာနေ့အထိ နှင်း ၁၂ လက်မကနေ ၁၇ လက်မအထိ ကျဆင်းနိုင်ပြီး တနာရီ မိုင် ၃၀ အထိ လေအေးတွေတိုက်ခတ်နိုင်တယ်လို့ ပြောပါတယ်။
အဲဒီမှာရှိတဲ့ လေအေးတွေရဲ့ အပူချိန်ဟာ သောကြာနေ့ကနေ စနေနေ့အထိ အနုတ် ၁၅ ဒီဂရီဖာရင်ဟိုက် အထိ ရောက်ရှိနိုင်ပါတယ်။ အမေရိကန် အရှေ့တောင်ပိုင်းရဲ့ ပိုမိုကျယ်ပြန့်တဲ့ ဧရိယာမှာလည်း ရေခဲမှတ်အောက် အပူချိန်တွေ ကျဆင်းနိုင်တယ်လို့ ခန့်မှန်းထားပါတယ်။