အာဖဂန်နစ္စတန်တွင် ငလျင်ကြောင့် လူပေါင်း ၈၀၀ ကျော်သေဆုံး
−−−−−−−−−−−−−−−−−−−−−−−−−−
အာဖဂန်နစ္စတန်နိုင်ငံတွင် ဩဂုတ် ၃၁ ရက် ညသန်းကောင်ယံ အချိန်မတိုင်မီ အင်အား ၆.၀ ရစ်ခ်ျတာစကေးရှိ ငလျင်လှုပ်ခတ်မှုကြောင့် နိုင်ငံအရှေ့ပိုင်းရှိ ကျေးရွာများတွင် နေအိမ်များ ပြိုလဲကာ လူပေါင်း ၈၀၀ ကျော် သေဆုံးခဲ့သည်။
ငလျင်ဒဏ်ခံခဲ့ရသူများသည် အမိုးအကာများမရှိဘဲ ဟင်းလင်းပြင်တွင် နေခဲ့ကြရပြီး ကယ်ဆယ်ရေးသမားများက စက်တင်ဘာ ၁ ရက်တွင် အပျက်အစီးများအောက်၌ ပိတ်မိနေသူများကို ရှာဖွေကယ်ဆယ်ခဲ့ကြရသည်။
ကယ်ဆယ်ရေးသမားများသည် တောင်စောင်းများပေါ်တွင် ဆောက်ထားသည့် ရွှံ့နှင့်ကျောက်တုံးများဖြင့် ပြုလုပ်ထားသော အိမ်များ၏ အပျက်အစီးများအောက်တွင် ပိတ်မိနေသူများကို ကယ်ဆယ်ရန် ညအချိန်အထိ ရှာဖွေခဲ့ကြသည်။
သေဆုံးသူများတွင် ကလေးငယ်များပါဝင်ခဲ့ကာ ဒဏ်ရာရရှိသူများကို တာလီဘန်အစိုးရက ရဟတ်ယာဉ်များဖြင့် ဆေးရုံများသို့ ပို့ဆောင်ပေးခဲ့သည်။
အဆိုပါ ငလျင်ကြောင့် ပါကစ္စတန်နှင့် နယ်နိမိတ်ချင်းထိစပ်နေသည့် အာဖဂန်အရှေ့မြောက်ပိုင်း ကူနာပြည်နယ်တွင် ပျက်စီးဆုံးရှုံးမှု အဆိုးရွားဆုံးဖြစ်ခဲ့သည်။
"အခန်းတွေနဲ့ နံရံတွေ ပြိုကျကုန်တယ် ကလေးအချို့ သေဆုံးပြီး တခြားသူတွေ ဒဏ်ရာရခဲ့တယ်" ဟု ခြေထောက်ကျိုးသွားသည့် အစ်ကိုနှင့်အတူ နူရ်ဂယ်မှ ဂျာလာလာဘတ်သို့ ပြောင်းရွှေ့ခဲ့ရသည့် အသက် ၂၂ နှစ်အရွယ် ဇဖာခန်း ဂူဂျာက ပြောသည်။
အာဖဂန်နစ္စတန်သည် ကမ္ဘာပေါ်တွင် အဆင်းရဲဆုံးနိုင်ငံများထဲမှ တစ်ခုဖြစ်ပြီး နှစ်ရှည်လများ လူသားချင်းစာနာထောက်ထားမှုဆိုင်ရာ အကျပ်အတည်းများနှင့် ရင်ဆိုင်နေရသည်။
မကြာသေးမီနှစ်များအတွင်း အိမ်နီးချင်း ပါကစ္စတန်နှင့် အီရန်တို့နိုင်ငံများရောက် အာဖဂန်လူမျိုးများကို ယင်းတို့နေရပ်ပြန်သွားရန် ဖိအားပေးခဲ့ခြင်းကြောင့် အာဖဂန်လူမျိုး သန်းပေါင်းများစွာ ပြန်လည်ဝင်ရောက်လာခဲ့ရသည်။
အမေရိကန်ဘူမိဗေဒတိုင်းတာရေးအဖွဲ့ (USGS) ၏ ထုတ်ပြန်ချက်အရ ငလျင်ဗဟိုချက်သည် အာဖဂန်နစ္စတန် အရှေ့ပိုင်း ဂျာလာလာဘတ်မှမြို့မှ ၂၇ ကီလိုမီတာ (၁၇ မိုင်) ခန့်အကွာရှိ မြေ မျက်နှာပြင်အောက် ၈ ကီလိုမီတာတွင် လှုပ်ခတ်ခဲ့ခြင်းဖြစ်သည်။
ငလျင်ဗဟိုချက်အနီးရှိ ကူနာပြည်နယ်တစ်ခုတည်းတွင်ပင် လူ ၈၀၀ ခန့် သေဆုံးပြီး ၂,၅၀၀ ဒဏ်ရာရရှိခဲ့သည်ဟု တာလီဘန်အစိုးရ၏ ပြောရေးဆိုခွင့်ရှိသူ ဇာဘီဟူလာ မူဂျာဟစ်က ပြောသည်။
“လူအများအပြားဟာ သူတို့ရဲ့ အိမ်ခေါင်မိုးအပျက်အစီးတွေအောက်မှာ ပိတ်မိနေပါတယ်” ဟု အရှေ့ပိုင်းကူနာပြည်နယ်ရှိ ဘေးအန္တရာယ်စီမံခန့်ခွဲရေးဌာန အကြီးအကဲ အီဆာနူလာ အီဆန်က စက်တင်ဘာ၁ ရက် နေ့လယ်တွင် AFP သို့ ပြောသည်။ သေဆုံးသူဦးရေ ထပ်မံတိုးလာနိုင်ကြောင်းလည်း သူကသတိပေးခဲ့သည်။
အိမ်နီးချင်း နန်ဂါဟာပြည်နယ်တွင် လူ ၁၂ ဦး သေဆုံးပြီး ၂၅၅ ဦး ဒဏ်ရာရရှိခဲ့ကာ လာ့ဂ်မန်ပြည်နယ်တွင်လည်း ၅၈ ဦး ဒဏ်ရာရရှိခဲ့သည်။
ကူနာပြည်နယ်ရှိ အချို့သော အဆိုးရွားဆုံး ထိခိုက်ခံရသည့် ကျေးရွာများသည် လမ်းပိတ်ဆို့မှုများကြောင့် သွားလာ၍မရသေးကြောင်း ကုလသမဂ္ဂ ရွှေ့ပြောင်းနေထိုင်ရေးအေဂျင်စီက AFP သို့ ပြောသည်။
ကုလသမဂ္ဂ အတွင်းရေးမှူးချုပ် အန်တိုနီယို ဂူတာရက်စ်က ကုလသမဂ္ဂအနေဖြင့် အာဖဂန် အာဏာပိုင်များနှင့် ပူးပေါင်း၍ လိုအပ်ချက်များကို လျင်မြန်စွာ အကဲဖြတ်ရန်၊ အရေးပေါ် အကူအညီများ ပေးအပ်ရန်နှင့် နောက်ထပ်အကူအညီများ ပံ့ပိုးပေးနိုင်ရန် အသင့်ရှိကြောင်း စက်တင်ဘာ ၁ ရက်တွင် ထုတ်ပြန်ခဲ့သည်။
ကုလသမဂ္ဂ၏ ကမ္ဘာလုံးဆိုင်ရာ အရေးပေါ်တုံ့ပြန်မှု ရန်ပုံငွေမှ ကနဦးအဖြစ် ဒေါ်လာ ၅ သန်း ထုတ်ပေးလိုက်ကြောင်းလည်း ၎င်းက ဆိုသည်။
