အိပ်ရာဘေးတွင် ခြင်ဆေးခွေ ထွန်းထားခဲ့ရာမှ နေအိမ်မီးလောင်မှု ဖြစ်ပွား

ရန်ကုန်တိုင်း ဒေသကြီးသင်္ဃန်းကျွန်းမြို့နယ် ရန်ကုန်သစ်ရပ်ကွက် စန္ဒကူးလမ်း အကွက်(၃၀)တွင် မီးလောင်မှု ဖြစ်ပွားခဲ့ကြောင်းသိရသည်။
ဒီဇင်ဘာ ၁၈ ရက် ည ၇ နာရီ၅ မိနစ်ခန့်က သင်္ဃန်းကျွန်းမြို့နယ်ရန်ကုန်သစ်ရပ်ကွက် အကွက်အမှတ် (၃၀) စန္ဒကူးလမ်းနေ အိမ်ငှား ဦး....၏ RC နှစ်ထပ်လူနေအိမ်တွင် မီးလောင်မှုဖြစ်ပွားခဲ့သည်။
မီးလောင်မှု အကြောင်းရင်းမှာနေအိမ်ထပ်ခိုးတွင် အိပ်ရာဘေး၌ခြင်ဆေးခွေထွန်းထားရာခဲ့ရာမှ ခြင် ဆေးခွေမီး အိပ်ရာပေါ်လဲကျ၍မီးစတင်လောင်ကျွမ်းခဲ့သည်။
မီးလောင်မှုအား မီးငြှိမ်းသတ်ယာဉ် ခုနစ်စီး၊ ရေသယ်ယာဉ် ငါးစီး၊အထောက်ကူပြု ၁၉၁ တစ်စီးတို့ ဖြင့်အရှေ့ပိုင်းခရိုင် မီးသတ်ဦးစီးမှူးလက်ထောက် ညွှန်ကြားရေးမှူးဦးကိုကိုကြီး ကွပ်ကဲမှုဖြင့် ငြှိမ်းသတ်ခဲ့ရာ ည ၇ နာရီ မိနစ်၂၀ တွင် မီးထိန်း၍ ည ၇ နာရီ ၂၄ မိနစ်တွင် မီးငြိမ်းသွားကြောင်း သိရသည်။

ကမ္ဘောဒီးယားနယ်စပ်ရှိ ပွိုင်ပက်ကာစီနိုမြို့ကိုထိုင်းလေတပ်စစ်လေယာဉ်များက ဗုံးကြဲတိုက်ခိုက်

ထိုင်းရေတပ်မှ ဂျက်တိုက်လေယာဉ်များသည်ကမ္ဘောဒီးယားနိုင်ငံမှ ကာစီနိုလုပ်ငန်း မြို့တစ်မြို့ ဖြစ်သည့် ပွိုင်ပက်မြို့ကို ဒီဇင်ဘာ ၁၈ ရက်တွင် ဗုံးကြဲတိုက်ခိုက်ခဲ့ကြောင်း သိရသည်။
ကမ္ဘောဒီးယား ပြည်ထဲရေးဝန်ကြီးဌာန၏သတင်းထုတ်ပြန်ချက်အရ ထိုင်းလေတပ်စစ်လေယာဉ်များ သည် ပွိုင်ပက်မြို့တော် တစ်နေရာကို ဗုံးသုံးလုံးကြဲချခဲ့ရာ အဆောက်အအုံနှစ်လုံးပျက်စီးခဲ့ရပြီး အရပ်သားနှစ်ဦး ဒဏ်ရာရရှိခဲ့ကြောင်းသိရသည်။
ထိုင်းနှင့် ကမ္ဘောဒီးယားနယ်စပ်အနီး တည်ရှိသော ပွိုင်ပက်မြို့သည် ကာစီနိုလောင်းကစားလုပ်ငန်း များဖြင့် စည်ကားသောမြို့ဖြစ်ပြီး ထိုင်းနိုင်ငံသား လောင်းကစားဝါသနာရှင်များ အရောက်အပေါက် များသည့် မြို့လည်းဖြစ်သည်။
ထိုင်းနှင့် ကမ္ဘောဒီးယားတို့အကြား ဒီဇင်ဘာ၈ ရက်တွင် စတင်ခဲ့သော နယ်စပ်တိုက်ပွဲများသည် ဒီဇင်ဘာ ၁၈ ရက်အထိ ဆက်လက်ဖြစ်ပွားနေဆဲဖြစ်သည်။
တစ်ချိန်တည်းမှာပင် ကမ္ဘာ့အင်အားကြီးနိုင်ငံများကလည်း နယ်စပ်တိုက်ပွဲများ ရပ်ဆိုင်းရေးအတွက် ထိုင်းနှင့် ကမ္ဘောဒီးယားတို့ကို ဖိအားပေးလျက်ရှိသည်။
လက်ရှိအချိန်တွင် နှစ်နိုင်ငံနယ်စပ်တိုက်ပွဲများကြောင့် ထိုင်းနိုင်ငံဘက်ခြမ်း၌ အနည်းဆုံး ၂၁ဦး သေဆုံးခဲ့ရပြီး ကမ္ဘောဒီးယားဘက်ခြမ်းတွင်၁၈ ဦး သေဆုံးခဲ့ရသည်။
ထိုင်းနှင့် ကမ္ဘောဒီးယားတို့သည် ယခုနှစ်ဇူလိုင်လကလည်း နှစ်နိုင်ငံ ပိုင်ဆိုင်ခွင့်အငြင်းပွား နယ်စပ် တစ်လျှောက်၌ ငါးရက်ကြာ တိုက်ပွဲများဖြစ်ပွားခဲ့ရာ သမ္မတဒေါ်နယ်ထရန့်၏ ကြားဝင်မှုဖြင့် အပစ်အခတ်ရပ်စဲရေး သဘောတူညီချက် ရယူခဲ့ရဖူးသည်။

ဆီးရီးယားရှိ အိုင်အက်စ်ပစ်မှတ်တွေကို အမေရိကန်စစ်တပ် လေကြောင်းအကြီးအကျယ် တိုက်ခိုက်

ဆီးရီးယားနိုင်ငံရှိ အမေရိကန်တပ်ဖွဲ့တွေ သေဆုံးစေခဲ့တဲ့ တိုက်ခိုက်မှုကို လက်တုံ့ပြန်တဲ့အနေနဲ့ အမေရိကန်စစ်တပ်ဟာ ဆီးရီးယားရှိ အိုင်အက်စ်အဖွဲ့ပစ်မှတ်တွေကို လေကြောင်း တိုက်ခိုက်မှု အကြီးအကျယ် ပြုလုပ်ခဲ့တယ်လို့ ထုတ်ပြန်လိုက်ပါတယ်။
တိုက်လေယာဉ်တွေ၊ တိုက်ခိုက်ရေးရဟတ်ယာဉ်တွေ ၊ လက်နက်ကြီးတွေနဲ့အတူ ဆီးရီးယားအလယ်ပိုင်း နေရာအများအပြားရှိ ပစ်မှတ် ၇၀ ကျော်ကို တိုက်ခိုက်ခဲ့တယ်လို့ ထုတ်ပြန်ချက်မှာ‌ ဖော်ပြထားပြီး ဂျော်ဒန်နိုင်ငံမှ လေယာဉ်တွေလည်း ပါဝင်ခဲ့တယ်လို့ ဆိုပါတယ်။
အိုင်အက်စ်အဖွဲ့ရဲ့ အခြေခံအဆောက်အအုံတွေနဲ့ လက်နက်နေရာထားရှိရာနေရာတွေကို ပစ်မှတ်ထားပြီး တိကျစွာပစ်ခတ်နိုင်တဲ့ လက်နက်ခဲယမ်း ၁၀၀ ကျော်ကို အသုံးပြုခဲ့တယ်လို့ ပြောပါတယ်။
ပါလ်မိုင်ရာမြို့မှာ ဒီဇင်ဘာ ၁၃ ရက်နေ့က အမေရိကန်စစ်သားနှစ်ယောက်နဲ့ အမေရိကန်အရပ်သား စကားပြန်တယောက် သေဆုံးခဲ့တဲ့ အိုင်အက်စ်တို့ရဲ့ ချုံခိုတိုက်ခိုက်မှုအပြီးမှာ အိုင်အက်စ်တို့ရဲ့ အမာခံနေရာတွေကို အပြင်းအထန် လက်တုံ့ပြန်တိုက်ခိုက်မယ်လို့ သတိပေးခဲ့ပါတယ်။
Operation Hawkeye Strike လို့အမည်ပေးထားတဲ့ ဒီစစ်ဆင်ရေးကို သောကြာနေ့ အရှေ့ပိုင်းစံတော်ချိန် ညနေ ၄ နာရီမှာ စတင်ခဲ့တယ်လို့ အမေရိကန်စစ်တပ်က ပြောပါတယ်။ "ဒေသတဝန်းရှိ အမေရိကန်တွေနဲ့ မိတ်ဖက်တွေကို အန္တရာယ်ပြုဖို့ ကြိုးပမ်းနေတဲ့ အကြမ်းဖက်သမားတွေကို အဆက်မပြတ် လိုက်လံရှာဖွေသွားမယ်" လို့ စစ်တပ်တာဝန်ရှိသူက ပြောပါတယ်။
အမေရိကန်ကာကွယ်ရေးဝန်ကြီး ပီးဟက်ဆက်သ်ကတော့ ဒီစစ်ဆင်ရေးဟာ စစ်ပွဲတခုရဲ့အစမဟုတ်ဘဲ လက်တုံ့ပြန်တိုက်ခိုက်မှုဖြစ်တယ်လို့ ဆိုပါတယ်။ ဒီစစ်ဆင်ရေးကို ဆီးရီးယားအစိုးရက အပြည့်အ၀ ထောက်ခံခဲ့တယ်လို့ သမ္မတ ဒေါ်နယ်ထရန့်က ပြောပါတယ်။
အမေရိကန်စစ်တပ်ဟာ ရက်ကာနဲ့ ဒီယာအဇ်ဇောမြို့တွေအနီးက IS ရဲ့ တည်နေရာတွေကို ပစ်မှတ်ထားခဲ့တယ်လို့ ဗြိတိန်အခြေစိုက် ဆီးရီးယားလူ့အခွင့်အရေးစောင့်ကြည့်ရေးအဖွဲ့ (OBHR) က ပြောပါတယ်။
တိုက်ခိုက်မှုအတွင် ထင်ရှားတဲ့ အိုင်အက်စ် ခေါင်းဆောင်တယောက်နဲ့ တိုက်ခိုက်ရေးသမားအများအပြား သေဆုံးခဲ့တယ်လို့ ဆိုပါတယ်။ အိုင်အက်စ်အဖွဲ့ကတော့ ဒီကိစ္စအပေါ် မှတ်ချက်ပေးတာမျိုးမရှိသေးပါဘူး။

ထိုင်ဝမ်မှာ မီးခိုးဗုံးဖောက်ခွဲပြီး ဓါးကိုင်တိုက်ခိုက်လို့ သုံးယောက်သေ ကိုးယောက်ဒဏ်ရာရ

ထိုင်ဝမ်မြို့တော် တိုင်ပေမှာ ဓားကိုင်ဆောင်ထားသူတယောက်ရဲ့ တိုက်ခိုက်မှုကြောင့် လူသုံးယောက်ထက်မနည်း သေဆုံးပြီး ကိုးယောက်ဒဏ်ရာရရှိခဲ့ပါတယ်။
အသက် ၂၇ နှစ်အရွယ် သံသယရှိသူဟာ တိုင်ပေရဲ့ အဓိက မြေအောက်ရထားဘူတာရုံမှာ မီးခိုးဗုံးတွေ ဖောက်ခွဲပြီးနောက် အခြားဘူတာရုံတခုသို့ ထွက်ပြေးကာ လမ်းတလျှောက်ရှိ လူတွေကို ဓားနဲ့ထိုးခဲ့တယ်လို့ ထိုင်ဝမ်ဝန်ကြီးချုပ် ချိုဂျန်တိုင်က ပြောပါတယ်။
ချန်ဝမ်လို့အမည်ရတဲ့ အဲဒီသံသယရှိသူဟာ အထပ်မြင့်အဆောက်အအုံတခုမှ ပြုတ်ကျပြီးနောက် သေဆုံးသွားတယ်လို့ ဝန်ကြီးချုပ်က ပြောပါတယ်။ တိုက်ခိုက်မှုရဲ့ ရည်ရွယ်ချက်ကိုတော့ ရှင်းရှင်းလင်းလင်း မသိရသေးပါဘူး။
အကြမ်းဖက်မှု ဖြစ်ပွားမှုနှုန်း နည်းပါးတဲ့ ထိုင်ဝမ်မှာ ဒီလိုတိုက်ခိုက်မှုမျိုးက ရှားရှားပါးပါးဖြစ်ပါတယ်။ အလားတူဖြစ်ရပ်တခု တိုင်ပေမှာ နောက်ဆုံးဖြစ်ပွားခဲ့တာကတော့ လွန်ခဲ့တဲ့ ဆယ်စုနှစ်တခုကျော် ၂၀၁၄ ခုနှစ်ဖြစ်ပါတယ်။
တိုက်ခိုက်မှုဟာ ညနေခင်း အလုပ်ဆင်းချိန် ဒေသစံတော်ချိန် ညနေ ၅ နာရီ ၂၀ မိနစ်မှာ ဖြစ်ပွားခဲ့တာပါ။ လူမှုကွန်ရက်မှာ မျှဝေထားတဲ့ ဗီဒီယိုမှာတော့ ဘေ့စ်ဘောဦးထုပ်နဲ့ အနက်ရောင်အဝတ်အစားတွေ ဝတ်ဆင်ထားတဲ့ လူတယောက်ဟာ လူစည်ကားတဲ့ လမ်းမပေါ်မှာ မီးခိုးဗုံးတွေ ပစ်ပေါက်နေချိန် လူတွေ ထိတ်လန့်တကြား ထွက်ပြေးနေပါတယ်။
သံသယရှိသူဟာ မြေအောက်ဈေးဝယ်စင်တာမှတဆင့် မီတာ ၈၀၀ ခန့်အကွာရှိ အနီးရှိ ဇောင်ရှန် ဘူတာရုံကို ထွက်ပြေးသွားခဲ့ပါတယ်။ အဲဒီနောက် ဘူတာရုံအပြင်ဘက်ရှိ လမ်းပေါ်ကို ပြန်ပြေးကာ မီးခိုးဗုံးတွေကို ထပ်မံဖောက်ခွဲကာ လူတွေကို ဓားဖြင့်ထိုးခဲ့တယ်လို့ ဆိုပါတယ်။
သူဟာ အနီးရှိ စာအုပ်ဆိုင်နဲ့ ကုန်တိုက်တခုထဲကို ဝင်သွားခဲ့ပြီး ရဲတွေက သူ့ကိုဝိုင်းထားပြီးနောက် အဆောက်အအုံမှ ပြုတ်ကျခဲ့ကာ ဆေးရုံရောက်ပြီ မကြာမီ သေဆုံးသွားခဲ့တယ်လို့ တာဝန်ရှိသူတွေက ပြောပါတယ်။

ဖရူဆို၊ ဘောလခဲနဲ့ မိုးဗြဲမြို့နယ်တွေမှာ တိုက်ပွဲတွေ ဆက်လက်ပြင်းထန်

ကယားပြည်နယ်က ဖရူဆို၊ ဘောလခဲနဲ့ ရှမ်းပြည်နယ် (တောင်ပိုင်း) က မိုးဗြဲမြို့နယ်တွေမှာ အစိုးရတပ်ရဲ့ ထိုးစစ်ကြောင့် တိုက်ပွဲတွေ ပြင်းထန်နေတယ်လို့ စစ်ရေး သတင်းရင်းမြစ်တွေက ပြောပါတယ်။
လက်ရှိမှာ အစိုးရတပ်ဟာ အဲဒီမြို့တွေမှာ နေ့စဉ်နီးပါး နယ်မြေရှင်းလင်းရေး လုပ်ဆောင်နေသလို လေကြောင်း၊ လက်နက်ကြီး၊ ဒရုန်းတွေ အသုံးပြုကာ တိုက်ခိုက်မှုတွေလည်း ပြုလုပ်နေတယ်လို့ သိရပါတယ်။
“ရွေးကောက်ပွဲ ပထမပိုင်းက နီးလာပြီ။ အဲဒီလို နီးလာတာနဲ့အမျှ အစိုးရတပ်က မဲရုံရှိရာနေရာနဲ့ အနည်းဆုံး ၅ မိုင်ပတ်လည် နေရာတွေကို နယ်မြေရှင်းလင်းတာတွေ ပြုလုပ်လာနေတာကို တွေ့ရပါတယ်။ ဒီ ကယားပြည်မှာလည်း မြေပြင်ကင်း၊ စစ်ကြောင်းထိုးတာ အပါဝင် ဒရုန်းနဲ့ ကင်းထောက်တာ၊ လက်နက်ကြီးတွေ နေရာအနှံ့ကို ခပ်စိတ်စိတ် ပစ်ခတ်တာတွေ လုပ်နေတာတွေ့ရတယ်” လို့ စစ်ရေး သတင်းရင်းမြစ် တယောက်က သုံးသပ် ပြောဆိုပါတယ်။
ဒါကြောင့် မဲရုံနဲ့နီးစပ်ရာ နယ်မြေတွေက ဒေသခံ ပြည်သူတွေအနေနဲ့ ဝေဟင်နဲ့ မြေပြင်ကို အရင်ကထက် ပိုမိုပြင်ဆင် သတိထားကြ‌စေလိုတယ်လို့ သူက ပြောပါတယ်။
လက်ရှိမှာ အစိုးရတပ်ဟာ ရွေးကောက်ပွဲ နီးကပ်လာတာနဲ့အမျှ နယ်မြေရရှိဖို့အတွက် ရှမ်း - ကယားနယ်စပ် အပါအဝင် ကယားပြည်နယ် အတွင်းကို အင်အား အလုံးအရင်းနဲ့ နယ်မြေရှင်းလင်းရေး လုပ်ဆောင်နေပြီး ဒေသတွင်း လက်နက်ကိုင် တပ်တွေနဲ့ တိုက်ပွဲတွေ ဖြစ်ပွားလျက်ရှိတယ်လို့ သိရပါတယ်။
မနေ့ ဒီဇင်ဘာ ၁၈ ရက်၊ မနက်ပိုင်းကလည်း ရှမ်း - ကယားပြည်နယ်အစပ်က မိုးဗြဲမြို့ အနောက်ခြမ်း ကျေးရွာတွေမှာ လက်နက်ကြီး ကျရောက်မှုတွေ ဖြစ်ပွားခဲ့ပြီး လူထိခိုက်မှုတော့ မရှိခဲ့ဘူးလို့ ဒေသခံတွေက ပြောပါတယ်။
ဒါအပြင် ဘောလခဲမြို့က အစိုးရတပ်ရဲ့ ကာကင်းနေရာတွေမှာလည်း တိုက်ပွဲတွေ ဖြစ်ပွားနေတယ်လို့ သိရပြီး စစ်ရေးအခြေအနေ တင်းမာနေဆဲဖြစ်ကာ အစိုးရတပ်က အဲဒီဒေသမှာ စစ်ကြောင်း လေးကြောင်းအထိ အသုံးပြုထားတယ်လို့ သိရပါတယ်။
အဲဒီ စစ်ကြောင်းတွေဟာ တပ်ဖွဲ့စည်းပုံအပြည့်နဲ့ အင်အား အများအပြား ပါဝင်နေတယ်လို့ သိရပြီး ဘော်လခဲမြို့တဝိုက်နဲ့ ဖရူဆို - ဘောလခဲ လမ်းပိုင်းကို နယ်မြေအသာစီး ရယူဖို့ ကြိုးစားနေတာ ဖြစ်တယ်လို့ သိရပါတယ်။
လက်ရှိ ကယားပြည်နယ်ရဲ့ စစ်ရေး အခြေအနေတွေနဲ့ ပတ်သက်လို့ ကရင်နီပြည် တပ်မတော်က ဒီကနေ့ ဒီဇင်ဘာ ၁၉ ရက်နေ့ ရက်စွဲနဲ့ ကြေညာချက်တစောင် ထုတ်ပြန်လာတာကို တွေ့ရပြီး အဲဒီ ကြေညာချက်မှာ အခု ၂၀၂၅ ခုနှစ်၊ ဒီဇင်ဘာလ ၁၉ ရက်နေ့မှ လာမယ့် ၂၀၂၆ ခုနှစ်၊ ဇန်နဝါရီလ ၅ ရက်နေ့အထိကို အရေးကြီးကာလအဖြစ် သတ်မှတ်လိုက်တယ်လို့ ‌အသိပေး ဖော်ပြထားပါတယ်။
ကရင်နီပြည်သူလူထု၊ တပ်ပေါင်းစုံတပ်ဖွဲ့ဝင်တွေ၊ ကရင်နီ လူမှုအဖွဲ့အစည်းတွေ သိစေရန်ဆိုပြီး ထုတ်ပြန်ထားတဲ့ အဲဒီအသိပေးချက်မှာ ခရစ္စမတ်ချိန်ခါ နှစ်သစ်ကူးကာလ ဖြစ်နေချိန်မှာ လူစုလူဝေးနဲ့ ဝတ်ပြု ဆုတောင်းခြင်း၊ နေထိုင်သွားလာခြင်းနဲ့ ပျော်ပွဲရွှင်ပွဲတွေ မပြုလုပ်ကြဖို့၊ သတိကြီးစွာ နေထိုင်သွားလာကြဖို့ သတိပေးထားပါတယ်။
ဒီအသိပေးချက်နဲ့ ပတ်သက်လို့ စစ်ရေး လေ့လာစောင့်ကြည့်သူတွေကလည်း ဒီးမော့ဆို (အရှေ့ခြမ်းနဲ့ အနောက်ခြမ်း)၊ လွိုင်ကော် (အရှေ့ခြမ်း)၊ ဖရူဆို၊ ဘောလခဲ၊ ဖားဆောင်း၊ မော်ချီး စတဲ့ ဒေသတွေအနေနဲ့ အခု ဒီဇင်ဘာ လကုန်အထိ လေကြောင်းအန္တရာယ် သတိပြုကြဖို့ အသိပေး ပြောကြားထားပါတယ်။
အစိုးရ တာဝန်ရှိသူတွေအနေနဲ့ ကယားပြည်နယ် အတွင်းက လွိုင်ကော်၊ ဘောလခဲ၊ ဒီးမော့ဆိုနဲ့ ဖရူဆိုမြို့တို့မှာ ရွေးကောက်ပွဲ ကျင်းပမှာဖြစ်တယ်လို့ ကြေညာထားပြီး ရွေးကောက်ပွဲ အပိုင်း (၁) မှာတော့ လွိုင်ကော်နဲ့ ဘောလခဲမြို့ကို ထည့်သွင်းထားတာ ဖြစ်ပါတယ်။

အမေရိကန် DV ဗီဇာကံစမ်းမဲ အစီအစဉ် ရပ်ပြီ

အမေရိကန်ပြည်ထောင်စု ဘရောင်းတက္ကသိုလ်မှာ လူသေဆုံးစေတဲ့ ပစ်ခတ်မှုကျူးလွန်ခဲ့တဲ့ အမျိုးသားဟာ လွန်ခဲ့တဲ့ ရှစ်နှစ်က DV ကံစမ်းမဲ့အစီအစဉ်နဲ့ နိုင်ငံအတွင်းကို ဝင်ရောက်လာသူဖြစ်ကြောင်း စိစစ်တွေ့ရှိပြီးနောက် DV အစီအစဉ်ကို ရပ်ဆိုင်းဖို့ သမ္မတ ဒေါ်နယ်ထရန့်က အမိန့်ထုတ်လိုက်ပါတယ်။
ဘရောင်းတက္ကသိုလ်ပစ်ခတ်မှုမှာ တက္ကသိုလ်ကျောင်းသားနဲ့ ပါမောက္ခတယောက်တို့ သေဆုံးခဲ့ပါတယ်။ ပစ်ခတ်မှုကျူးလွန်သူလို့ စွပ်စွဲခံထားရပြီး ယခုကွယ်လွန်သွားပြီဖြစ်တဲ့ အသက် ၄၈ နှစ်အရွယ် နီဗက်စ် ဗလန်တေးဟာ ပေါ်တူဂီနိုင်ငံသားဖြစ်ပြီး မိုင်ယာမီမှာ နောက်ဆုံးနေထိုင်ခဲ့ကာ လွန်ခဲ့တဲ့ ရှစ်နှစ် ၂၀၁၇ ခုနှစ်က DV အစီအစဉ်ကတဆင့် Green Card ရပြီး ရောက်ရှိနေထိုင်နေတာပါ။
"ဒီရက်စက်ကြမ်းကြုတ်တဲ့လူကို ကျွန်မတို့နိုင်ငံမှာ ဘယ်တော့မှ ခွင့်မပြုသင့်ဘူး" လို့ အမိမြေလုံခြုံရေးဝန်ကြီး ခရစ္စတင်းနိုအမ်က ပြောပါတယ်။ "သမ္မတ ထရန့်ရဲ့ ညွှန်ကြားချက်အရ ဒီလိုအဖြစ်မျိုးတွေကနေ အမေရိကန်တွေ နောက်ထပ်ထိခိုက်မှုမရှိစေဖို့ DV1 အစီအစဉ်ကို ရပ်ဆိုင်းရေး USCIS ကို ချက်ချင်းညွှန်ကြားနေပါတယ်" လို့ သူကဆိုပါတယ်။
၁၉၉၀ ပြည့်လွန်နှစ်တွေက စတင်ခဲ့တဲ့ အစီအစဉ်ဟာ အမေရိကန်သို့ ရွှေ့ပြောင်းနေထိုင်မှုနှုန်း နည်းပါးတဲ့ နိုင်ငံတွေမှ လူတွေအတွက် တနှစ်ကို ဗီဇာ ငါးသောင်း ပေးအပ်ပြီး ကျပန်းရွေးချယ်တဲ့စနစ်ဖြစ်ပါတယ်။ နှစ်စဉ် လူသန်းပေါင်းများစွာဟာ အစီအစဉ်မှတစ်ဆင့် ဗီဇာလျှောက်ထားရရှိနေကြပါတယ်။
DV အတွက် အရည်အချင်းပြည့်မီဖို့အတွက် လျှောက်ထားတွေဟာ အနည်းဆုံး အထက်တန်းပညာရေး သို့မဟုတ် နယ်ပယ်တခုမှာ အလုပ်အတွေ့အကြုံ နှစ်နှစ်ရှိရမှာဖြစ်ကာ ဗီဇာမရရှိမီ စိစစ်တာနဲ့ အင်တာဗျူးတခု ခံယူဖို့လည်း လိုအပ်ပါတယ်။
ဒီအစီအစဉ်ကို လွှတ်တော်ကနေ ဖန်တီးခဲ့တာဖြစ်ပြီး လက်ရှိမှာတော့ အမိမြေလုံခြုံရေးဝန်ကြီးဟာ ဘယ်ဥပဒေယန္တရားအောက်ကတဆင့် ခေတ္တရပ်ဆိုင်းဖို့ အမိန့်ပေးနိုင်တယ်ဆိုတာကို ရှင်းရှင်းလင်းလင်း မသိရသေးပါဘူး။
DV ကံစမ်းမဲစနစ်က ထုတ်ပေးတဲ့ ဗီဇာအများစုကို နိုင်ငံခြားရေးဌာနမှ ကြီးကြပ်ပေမယ့် အမေရိကန်ပြည်ထောင်စုမှာ ရှိနှင့်ပြီးဖြစ်တဲ့ လျှောက်ထားသူတွေအတွက် DHS ရဲ့ အစိတ်အပိုင်းတခုဖြစ်သည့် အမေရိကန်နိုင်ငံသားနဲ လူဝင်မှုကြီးကြပ်ရေးဌာနမှ စီမံဆောင်ရွက်ပါတယ်။
သမ္မတ ထရန့်ကလည်း ဒီအစီအစဉ်ကို ကြာရှည်စွာ ဝေဖန်သူတယောက်ဖြစ်ပြီး ကျပန်းရွေးချယ်တာကြောင့် လုံခြုံရေးအန္တရာယ်တွေ ဖြစ်စေနိုင်ပြီး အလုပ်အကိုင်အခြေပြုဗီဇာများကဲ့သို့ လုံလောက်တဲ့ အရည်အချင်းကို အခြေခံထားဘူးလို့ စောဒကတက်ထားပါတယ်။
ထရန့်ရဲ့ ပထမအကြိမ် သမ္မတသက်တမ်းအစောပိုင်းမှာ DV ရရှိထားသူတတယောက်ဟာ နယူးယောက်မြို့မှာ ထရပ်ကားနဲ့ ဝင်တိုက်တိုက်ခိုက်မှုတခုမှာ လူရှစ်ယောက် သေဆုံးခဲ့ပြီးနောက် ဒီအစီအစဉ်ကို အဆုံးသတ်ဖို့ တွန်းအားပေးခဲ့ပါတယ်။
ထရန့်အစိုးရဟာ ၂၀၂၀ ခုနှစ်မှာ ကိုဗစ်ကပ်ရောဂါနဲ့ စီပွားရေးဆိုင်ရာသက်ရောက်မှုတွေကို ကိုးကားပြီး ဒီအစီအစဉ်ကို ရပ်ဆိုင်းလိုက်ပေမယ့် သမ္မတဂျိုးဘိုင်ဒင်လက်ထက် ၂၀၂၁ ခုနှစ်မှာ ပြန်လည်ခွင့်ပြုခဲ့ပါတယ်။

စစ်ကိုင်း မြို့နယ်ငါးခုမှာ ယခုလအတွင်း လေကြောင်းတိုက်ခိုက်မှုကြောင့် လူ ၅၀ ကျော် သေပြီး ၁၀၀ ကျော် ဒဏ်ရာရ

စစ်ကိုင်းတိုင်းထဲက မြို့နယ်တွေမှာ ယခု ဒီဇင်ဘာလ အတွင်း လေကြောင်း တိုက်ခိုက်မှုတွေ ခပ်စိပ်စိပ် ဖြစ်ပွားလာနေပြီး လေကြောင်း တိုက်ခိုက် မှုကြောင့် သေဆုံးသူ ၅၀ ကျော် ရှိခဲ့ပြီး နဲ့ ထိခိုက်ဒဏ်ရာ ရရှိသူ ၁၀၀ ကျော်အထိ ရှိခဲ့တယ်လို့ သိရပါတယ်။
ဒီဇင်ဘာ ၁ ရက်ကနေ ဒီဇင်ဘာ ၁၉ ရက်နေ့ အထိ မြို့နယ် ငါးခုမှာ ဖြစ်ပွားခဲ့တဲ့ လေကြောင်း တိုက်ခိုက်မှုတွေ အတွင်း သေဆုံး နဲ့ ထိခိုက် ဒဏ်ရာ ရရှိခဲ့တဲ့ အရေအတွက် ဖြစ်ပါတယ်။
လေကြောင်း တိုက်ခိုက်မှုတွေက ဒီပဲယင်းမြို့နယ် ၊ ရွှေဘိုမြို့နယ် ၊ ဝက်လက်မြို့နယ် ၊ ခင်ဦးမြို့နယ် ၊ ယင်းမာပင် မြို့နယ် တွေမှာ အများဆုံး ဖြစ်ပွားခဲ့တာ ဖြစ်ပြီး သေဆုံးမှု အများဆုံးနဲ့ ထိခိုက်ဒဏ်ရာ ရရှိမှုအများဆုံးက ဒီပဲယင်း နဲ့ ဝက်လက်မြို့နယ် တို့ ဖြစ်တယ်လို့ VOM က စုံစမ်းသိရှိရတဲ့ အချက်အလက် တွေအရ သိရပါတယ်။
ဒီကနေ့ ဒီဇင်ဘာ ၁၉ ရက်နေ့ ၊ ဝက်လက်မြို့နယ် ထုံးဘိုရွာ တောင်ဘက် သန်းကုန်းတောတိုက် အနီးကို လေကြောင်း တိုက်ခိုက်ခံရ ပြီး သုံးယောက် ထိခိုက်ဒဏ်ရာရရှိ ခဲ့တယ်လို့ သိရပါတယ်။
အလားတူ ဒီဇင်ဘာ ၁ ရက်နေ့ ကနေ ၁၈ ရက်အတွင်းမှာလည်း ဝက်လက်မြို့နယ် ထဲက ဆည်တော ရွာ ၊ နတ်မှော်ဦးရွာ ၊ ထုံးဘိုရွာ တောင်ဘက် သန်းကုန်းတောတိုက် ၊ ယင်းမာရွာ တို့မှာ လေကြောင်း တိုက်ခိုက်ခံရ မှုကြောင့် လူ ၁၅ ယောက် သေဆုံး ခဲ့ကာ ၃၀ ထက်မနည်း ထိခိုက် ဒဏ်ရာရရှိ ခဲ့တယ်လို့ သိရပါတယ်။
ဒီဇင်ဘာ ၁၈ ရက်နေ့ကလည်း မန္တလေး - မြစ်ကြီးနား လမ်းပေါ် ၊ ခင်ဦးမြို့နယ် မြေနီသျှို လမ်းဆုံရှိ စက်သုံးဆီ သိုလှောင်ရုံနဲ့ ဆီရောင်းချတဲ့ နေရာကို လေကြောင်း တိုက်ခိုက်ခံရပြီး သေဆုံးသူ တယောက် နဲ့ ထိခိုက်ဒဏ်ရာ ရရှိ ခြောက်ယောက် သူတွေ ရှိခဲ့တယ်လို့ သိရပါတယ်။
" မနေ့က ဖြတ်လာတော့ အဲဒီဘက်မှာ လေကြောင်း ကြဲသွားတာ တွေ့ရတယ်။ ဆီဆိုင်ကြဲ သွားတယ် သိရတယ်။ သေတာလည်း ရှိတယ် ။ ခေါင်းပြတ် ခြေပြတ်တွေလို့ ပြောကြတယ် ။ ဘယ်ရွေ့ ဘယ်လောက် သေတယ်ဆိုတာ တော့ သေချာမသိဘူး ။ " လို့ ခင်ဦးလမ်းဆုံ အနီးကနေ ဖြတ်သန်း မောင်းနှင်လာခဲ့တဲ့ ကားသမား တယောက်က ပြောပါတယ် ။
အလားတူ ဒီဇင်ဘာ ၁၇ ရက်မှာလည်း ခင်ဦးမြို့နယ် ၊ကဘွတ်ကျေးရွာမှာ လေကြောင်း တိုက်ခိုက်ခံရပြီး လေးယောက် ​သေဆုံးမှု ရှိခဲ့သလို ဒီဇင်ဘာ ၄ ရက်ကလည်း ခင်ဦးမြို့နယ် ၊ငါးတင်းကြီးရွာမှာ လေကြောင်း တိုက်ခိုက်ခံခဲ ရပြီး တယောက်သေဆုံးကာ လေးယောက် ထိခိုက်ဒဏ်ရာရ ရရှိခဲ့တယ်လို့ သိရပါတယ်။
ဒီပဲယင်း မြို့နယ် ၊ မရကန် ရွာမှာက ဒီဇင်ဘာ ၅ ရက်နေ့မှာ လေကြောင်း တိုက်ခိုက်ခံရ မှုကြောင့် သေဆုံးသူ ၂၀ ထက်မနည်း ရှိခဲ့ပြီး ထိခိုက် ဒဏ်ရာရရှိသူ အယောက် ၃၀ လောက်အထိ ရှိခဲ့တယ်လို့ သိရပါတယ်။
ရွှေဘိုမြို့နယ်မှာ လည်း ဒီဇင်ဘာ ၅ ရက် နဲ့ ၁၆ ရက်တို့မှာ လေကြောင်းတိုက်ခိုက်ခံရပြီး လူခုနှစ်ယောက် သေဆုံးကာ ၁၁ ယောက် ထိခိုက် ဒဏ်ရာ ရရှိခဲ့တယ်လို့ သိရပါတယ်။
ယင်းမာပင် မြို့နယ် ၊ ဇီးတောရွာမှာက ဒီဇင်ဘာ ၁၅ ရက်နေ့မှာ လေကြောင်း တိုက်ခိုက်ခံရပြီး ငါးယောက် သေဆုံးကာ ထိခိုက်ဒဏ်ရာ ရရှိသူ ၂၀ ကျော်အထိ ရှိခဲ့တယ်လို့ သိရပါတယ် ။
အဆိုပါ လေကြောင်း တိုက်ခိုက်မှု တွေအတွင်း လူသေဆုံး မှုအပြင် နေအိမ် အဆောက်အဦ တွေ ၊ ကား ၊ တိရိစ္ဆာန် စတဲ့ ပစ္စည်း ထိခိုက် ပျက်စီးဆုံးရှုံးမှု၊ မီးလောင် ပျက်စီးမှုတွေ ရှိခဲ့တယ် လို့သိရပါတယ်။
စစ်ကိုင်းတိုင်းထဲက နေရာ အများစုမှာ ဒေသတွင်း လက်နက်ကိုင် အဖွဲ့နဲ့ အစိုးရတပ်တွေ အကြား တိုက်ပွဲတွေ ဖြစ်ပွားမှု ရှိနေဆဲ ဖြစ် တယ်လို့ သိရပါတယ် ။

ယူကရိန်းအတွက် ဒေါ်လာ ၁၀၅ ဘီလီယံချေးငွေ ဥရောပခေါင်းဆောင်တွေ အတည်ပြု

ဥရောပသမဂ္ဂခေါင်းဆောင်တွေဟာ ယူကရိန်းရဲ့ စစ်ရေးလိုအပ်ချက်တွေအတွက် ဒေါ်လာ ၁၀၅ ဘီလီယံ ချေးငွေပေးဖို့ သဘောတူလိုက်ကြပါတယ်။
ဒီသဘောတူညီချက်အရ မိမိတို့အနေနဲ့ စစ်ပွဲမှာ ခံနိုင်ရည်ကို အမှန်တကယ် အားကောင်းစေလာမယ်လို့ ယူကရိန်းသမ္မတ ဇီလန်စကီးက ပြောကြားခဲ့ပြီး ရုရှားပိုင်ဆိုင်မှုတွေကို ထိန်းသိမ်းထာတာကို ဆက်လက်ထားရှိဖို့ တိုက်တွန်းခဲ့ပါတယ်။
ဇီလန်စကီးက ရုရှားပိုင်ဆိုင်မှုထဲက ယူရို ၂၀၀ ဘီလီယံကို အသုံးပြုဖို့ တောင်းဆိုခဲ့ပေမယ့် ငွေသားအများစုကို သိမ်းဆည်းထားတဲ့ ဘယ်လ်ဂျီယံနိုင်ငံက တာဝန်ယူမှုဆိုင်ရာတွေမှာ အခြားနိုင်ငံတွေကိုပါ တောင်းဆိုခဲ့ပြီးနောက် ဒီကိစ္စ အထမမြောက်ခဲ့ပါဘူး။
ဥရောပခေါင်းဆောင်တွေဟာ နောက်နှစ်နှစ်အတွင်း ယူကရိန်းရဲ့ စစ်ရေးနဲ့ စီးပွားရေးလိုအပ်ချက်တွေကို ဖြည့်ဆည်းပေမယ်လို့ ဆိုထားပြီး လက်ရှိ သဘောတူညီချက်ဟာ ဘရပ်ဆဲလ်မှာ ကျင်းပတဲ့ ထိပ်သီးအစည်းအဝေးမှာ တရက်ကျော်ကြာ ဆွေးနွေးမှုတွေ ပြုလုပ်ပြီးနောက် ထွက်ပေါ်လာတာပါ။
ယူကရိန်းဟာ နောက်နှစ်နှစ်အတွင်း ယူရို ၁၃၅ ဘီလီယံ ထပ်မံလိုအပ်ကြောင်း ဥရောပခေါင်းဆောင်တွေက ခန့်မှန်းထားပါတယ်။ တချိန်တည်းမှာပင် အမေရိကန်နဲ့ ရုရှားအရာရှိတွေဟာ ငြိမ်းချမ်းရေးအစီအစဉ်နဲ့ ပတ်သက်ပြီး နောက်ထပ်ဆွေးနွေးပွဲတွေအတွက် ယခုသီတင်းပတ်ကုန်အတွင်း မိုင်ယာမီမှာ တွေ့ဆုံဖို့ စီစဉ်ထားပါတယ်။
ဒါအပြင် ယူကရိန်းနဲ့ အမေရိကန်ကိုယ်စားလှယ်အဖွဲ့တွေဟာလည်း သီးခြားဆွေးနွေးပွဲများ ကျင်းပဖို့ မျှော်လင့်ရပါတယ်။ သမ္မတ‌ဒေါ်နယ်ထရန့် အဆိုပြုတဲ့ ယူကရိန်းငြိမ်းချမ်းရေး အစီအစဉ်နဲ့ပတ်သက်ပြီး ယူကရိန်း လုံခြုံရေးအာမခံချက်နဲ့ နယ်မြေပိုင်ဆိုင်မှုကိစ္စတွေမှာ သဘောထား ကွဲလွဲနေဆဲဖြစ်ပါတယ်။

ဒီဇင်ဘာပိတ်ရက် ခရီးသွားမှုများလို့ ရန်ကုန်အထွက် ဇီးရိုးမိုင်မှာ ကားတွေ အချိန်ကြာမြင့်စွာ ပိတ်မိ

ဒီဇင်ဘာ ပိတ်ရက်မှာ ခရီးထွက်သူ အလွန်များတာ ကြောင့် ရန်ကုန်မြို့ အထွက်က ဇီးရိုးမိုင် ( 0 Mile) မှာ ကားတွေ အချိန်ကြာမြင့်စွာ ပိတ်မိမှု ဖြစ်ပွားနေတယ်လို့ သိရပါတယ်။
ကျောင်းသားတွေရဲ့ ဒီဇင်ဘာ ပိတ်ရည်ရှည် စတင်တဲ့ ဒီနေ့ ဒီဇင်ဘာ ၁၉ ရက် ၊ မနက်အစောပိုင်းက စပြီး ခရီးထွက် သူများပြားတဲ့အတွက် ဇီးရိုးမိုင် မှာ ကားတွေ အချိန် ကြာမြင့် စွာစောင့်ဆိုင်း နေရတာဖြစ်ကြောင်း ၊ ဇီးရိုးမိုင် ဂိတ်ကို ဖြတ်သန်းရဖို့အတွက် အချိန် ၃ နာရီလောက်အထိ စောင့်ဆိုင်း ခဲ့ရတယ်လို့ ခရီးထွက်သူ တ​ယောက်က ပြောပါတယ်။
" ကျွန်တော်တို့ ထွက်တာ ၄ နာရီလောက်ပါ ။ အဲဒီလောက်ကတည်းက ဇီးရိုးမိုင်မှာ ကားတန်းရှည် ပိတ်နေပြီ ။ ကားတစီးနဲ့ တစီး ကြာတယ်။ ကျွန်တော်တို့တော့ ၃ နာရီလောက် စောင့်လိုက်ရပြီးမှ ဖြတ်ခဲ့ရတယ်။ အဝင် ၊ အထွက် အကုန်ကို ကားပိတ်နေတာပါ ။ ပထမတော့ ငွေဆောင်သွားဖို့ စီစဉ်ထားခဲ့တာ မသွားဖြစ်တော့ဘဲ ပုဂံကို သွားဖို့ ခရီးထွက်လာတာ " လို့ ခရီးသွား ပြည်သူ တယောက်က ပြောပါတယ်။
ရန်ကုန် အပြင် အခြား မြို့နယ်တွေ ကလည်း အားလပ်ရက်မှာ မိသားစုလိုက် ဖြစ်စေ ၊ သူငယ်ချင်း အဖွဲ့လိုက် ဖြစ်စေ ခရီးထွက်မှု အခြေအနေက အရင်နှစ်တွေ ကထက် ပိုပြီး များလာတယ် လို့ သိရပါတယ် ။
၂၀၂၄ ခုနှစ်က စပြီး ပြည်တွင်း ခရီးသွားမှုနူန်း မြင့်လာတာ တာဖြစ်ပြီး လက်ရှိ ၂၀၂၅ ခုနှစ် အတွင်းမှာတော့ ပြည်တွင်း ခရီးသွားနူန်း ပိုပြီး မြင့်တက်လာ ခဲ့တယ်လို့ ခရီးသွားလုပ်ငန်းရှင် တယောက်က ပြောပါ တယ်။
" ပြည်တွင်း ခရီးသွားနူန်းက ခုနှစ်ထဲမှာ ပိုပြီး မြင့်တက်လာတာ တွေ့ရတယ်။ လူတွေလည်း မွန်းကြပ်လာတော့ ထွက်ပေါက် အနေနဲ့ ပိုပြီး သွားကြတယ် ထင်ပါတယ်။ နောက်ပြီး အခုသွားကြတဲ့ နေရာအများစုကလည်း အေးချမ်းတဲ့ နေရာတွေ ဆိုတော့ ပိုပြီးသွား လာကြတဲ့ သဘောပါ ။ နယ်မြေအေးချမ်းလို့သာ ခရီးသွား တာပေါ့လေ ။ မအေးချမ်းပဲ ပစ်ခတ်နေရင် ဘယ်သူက ကိုယ့်အသက် ရင်းပြီး သွားမလဲ ။ ပြည်တွင်း ခရီးစဥ်တွေက လူတန်းစား မရွေး ကိုယ်ကြိုက်တာ ရွေးချယ် သွားလို့ရတယ်။ ပြည်ပ ခရီးစဥ် ကြတော့ လူတိုင်း မသွားနိုင် ကြဘူး ။ " လို့ တယ် ။
ဒီဇင်ဘာ ပိတ်ရက်မှာ ခရီးသွားသူ အများစုဟာ ပုဂံ ၊ ချောင်းသာ ၊ ငွေဆောင် ၊ ကျိုက်ထီးရိုး ဘုရားအပါအဝင် မွန်ပြည်နယ်တွင်း ခရီးစဥ် ၊ ကလော ဒေသ ခရီးစဥ်တို့ကို သွားရောက် မှုပိုပြီး များတယ်လို့ သိရပါတယ်။
ဒီဇင်ဘာ ပိတ်ရက် ရှည်ကတော့ ဒီဇင်ဘာ ၁၉ ရက်ကနေ ၂၈ ရက်နေ့ အထိ ဖြစ်ကြောင်း ၊ ပိတ်ရည်စတင်တဲ့ ဒီကနေ့ကစပြီး ခရီးထွက်ကြ သူ တွေရှိသလို ကျန်တဲ့ ပိတ်ရက် ကာလအတွင်း ခရီးထွက်ဖို့ အတွက် လုပ်နေသူတွေ လည်း အများအပြား ရှိနေတယ်လို့ သိရပါတယ်။
" ကျိုက်ထီးရိုးကို မနက်ဖြန် သွားဖို့ လုပ်နေပါတယ်။ ။ ကားအပြတ်ငှားပြီး မိတ်ဆွေတွေ စုငှားသွား မှာပါ ။ ခရီးက ၅ ညအိပ် ၆ ရက်ကြာမှာပါ ။ ခရီးမထွက်ရတာ လည်းကြာပြီဆို တော့ ခုလို စီစဥ်ဖြစ်တာပါ ။ ကျိုက်ထီးရိုး ၊ ကျိုက္ခမီ ၊စက်စဲကမ်းခြေ အကုန်ပါတယ်။ အဲဒီဘက်က နယ်မြေလည်း အေးချမ်းလို့ သွား ဖြစ်တာပါ ။ " လို့ ခရီးသွားဖို့ စီစဥ်နေတဲ့ အစိုးရ ဝန်ထမ်းတယောက်က ပြောပါတယ်။
ဒီဇင်ဘာ ပိတ်ရက်မှာ ခရီးသွားမှုနူန်း များတဲ့ ပုဂံ ၊ ချောင်းသာ ၊ငွေဆောင် ၊ ကျိုက်ထီးရိုးဘုရား ၊ ကလော စတဲ့ဒေသတွေမှာ ဟိုတယ် နဲ့ တည်းခိုခန်း အားလုံးနီးပါးမှာ အခန်းတွေ ငှားရမ်းမှု ရှိ နေ တယ်လို့ သိရပါတယ် ။

Photo TZO