ဘယ်လင်ဂမ်ရဲ့ ဒဏ်ရာအဖြေကို ရီးရဲလ်နှင့် အင်္ဂလန်စောင့်ဆိုင်းနေ
===================
ရီးရဲလ်မက်ဒရစ်ဟာ တနင်္ဂနွေနေ့ညတုန်းက ဗယ်လီကာနိုအား ၂-၁ ဖြင့် အနိုင်ရတဲ့ပွဲစဉ်တွင် တံကောက်ကြောဒဏ်ရာရရှိခဲ့တဲ့ ဂျူ့ဘယ်လင်ဂမ်ရဲ့ ဒဏ်ရာစစ်ဆေးမှု အဖြေအား စောင့်ဆိုင်းနေတုန်း ဖြစ်ပါတယ်။
အသက် ၂၂ နှစ်ရှိ အင်္ဂလန်ကွင်းလယ်ကစားသမားဟာ ဘာနေဗျူးပွဲစဉ်ရဲ့ ပွဲအစ ၁၀ မိနစ်မှာပင် ဒဏ်ရာရရှိကာ ဘရာဟမ်ဒီယာ့ဇ်နှင့် လူစားလဲလှယ်မှု ပြုလုပ်ခဲ့ရပါတယ်။
အင်္ဂလန်ဟာ မတ်လ ၂၇ ရက်နေ့နှင့် မတ်လ ၃၁ ရက်နေ့တို့တွင် ဥရုဂွေး၊ ဂျပန်တို့နှင့် ခြေစမ်းပွဲကစားလာပါမယ်။
ဗယ်လီကာနိုအား အနိုင်ရတဲ့ပွဲအပြီးတွင် ရီးရဲလ်မက်ဒရစ်နည်းပြအာဘီလိုအာက ဘယ်လင်ဂမ်မှာ တံကောက်ကြောဒဏ်ရာရရှိသွားကြောင်း အတည်ပြုသွားပြီး ဒဏ်ရာစစ်ဆေးမှု အဖြေကို စောင့်ဆိုင်းနေရဆဲ ဖြစ်ကြောင်း ဆိုသွားပါတယ်။
အာဘီလိုအာက "ဒါက ကြီးမားတဲ့ ဆုံးရှုံးမှုပါ။ ဒါပေမယ့် ကျွန်တော်တို့က လူအင်အားတောင့်တင်းတယ်။ လွန်ခဲ့တဲ့တစ်နှစ်ကျော်တုန်းက ဥရောပချန်ပီယံဖြစ်ခဲ့တဲ့ ကစားသမား ၁၇ ဦး ရှိနေသေးတာကို မမေ့ပါနဲ့။ ကျွန်တော်တို့ ဒီအခြေအနေကို ကျော်ဖြတ်သွားမှာပါ"လို့ ပြောကြားသွားပါတယ်။
ဂျူ့ဘယ်လင်ဂမ်ဟာ လာမယ့် အင်္ဂလန်ရဲ့ ဥရုဂွေး၊ ဂျပန်တို့နှင့် ခြေစမ်းပွဲများကို လွဲချော်လာပါက ကမ္ဘာ့ဖလားပြိုင်ပွဲတွင် အင်္ဂလန်အသင်းပွဲထွက်လူစာရင်းတွင် ပါဝင်ရန် ခက်ခဲလာပါမယ်။
တူချယ်ဟာ ၄-၂-၃-၁ ကစားကွက်ကို အသုံးပြုနေတာ ဖြစ်ပြီး ပြီးခဲ့တဲ့လများအတွင်းမှာ ဗီလာရဲ့ မော်ဂန်ရိုဂျာအား အဓိကကွင်းလယ်ဖန်တီးရှင်အဖြစ် အသုံးပြုလာခဲ့တာပါ။
ယခုကဲ့သို့ ဘယ်လင်ဂမ် ဒဏ်ရာရရှိလာမှုက PFA တစ်နှစ်တာအကောင်းဆုံးလူငယ်ကစားသမားဆုရှင်ရိုဂျာအတွက် အင်္ဂလန်တွင် ပွဲထွက်ကစားသမားနေရာ ရရှိရေး ပိုမိုအခြေအနေကောင်းလာပါတယ်။
ရိုဂျာဟာ စက်တင်ဘာလ၊ အောက်တိုဘာလများတုန်းက ဘယ်လင်ဂမ် မပါဝင်နိုင်စဉ် အင်္ဂလန်အသင်းတွင် အရေးပါတဲ့သူအဖြစ် ကစားခဲ့သူလည်း ဖြစ်ပါတယ်။

ဂျက်ကက်ကို ပေါင်သန်း ၆၀ ဖြင့် ခေါ်ယူရန် လီဗာပူး သဘောတူညီမှု ရရှိ
======================
လီဗာပူးဟာ ဆောင်းရာသီအပြောင်းအရွှေ့ဈေးကွက် နောက်ဆုံးနေ့တွင် ရန်းနက်စ်နောက်ခံလူဂျီရီမီဂျက်ကက်ကို ပေါင်သန်း ၆၀ ဖြင့် ခေါ်ယူရန် သဘောတူညီမှု ရရှိသွားခဲ့ပါတယ်။
အသက် ၂၀ နှစ်ရှိ ဗဟိုနောက်ခံလူဟာ ယခု ဇန်နဝါရီ အပြောင်းအရွှေ့ဈေးကွက်တွင် အန်ဖီးလ်သို့ ရောက်လာဦးမှာ မဟုတ်သေးဘဲ နွေရာသီတွင်မှ ရောက်လာပါမယ်။
လီဗာပူးဟာ ဂျက်ကက်အတွက် ရန်းနက်စ်ကို ပေါင် ၅၅ သန်းပေးလာရမှာ ဖြစ်ပြီး ကျန် ပေါင် ၅ သန်းကို အောင်မြင်မှုအပေါ် မူတည်ပြီး ထပ်မံ ပေးလာရပါမယ်။
လီဗာပူးဟာ ပြင်သစ်ယူ-၂၁ လက်ရွေးစင်နှင့် ပုဂ္ဂိုလ်ရေးဆိုင်ရာ သဘောတူညီမှု ရရှိရေး လုပ်ဆောင်ရဦးမှာ ဖြစ်ပေမယ့် ယင်းမှာ ပြဿနာတစ်ရပ် ဖြစ်လာမယ့် အခြေအနေမှာ မရှိပါဘူး။
လီဗာပူးဟာ ယခုရာသီအကုန်တွင် ပြင်သစ်ဗဟိုနောက်ခံလူအီဘရာဟမ်ကိုနာတေး စာချုပ်သက်တမ်းကုန်ဆုံးလာမှုနှင့်အတူ နွေရာသီတွင် ဗဟိုခံစစ်အား မဖြစ်မနေ အားဖြည့်ရန် လိုအပ်နေပါတယ်။
ဂျက်ကက်ဟာ ရန်းနက်စ်အကယ်ဒမီထွက်တစ်ဦး ဖြစ်ပြီး ယခုရာသီတွင် ၁၈ ပွဲကစားထားကာ ဥရောပထိပ်သီးကလပ်များရဲ့ ပစ်မှတ်ထားခြင်းခံနေရသူလည်း ဖြစ်ပါတယ်။

ဆန်းဒါးလန်းမှ ဒတ်ချ်နောက်ခံလူဂီယာထရူဒါကို အငှားဖြင့် ခေါ်ယူရန် လီဗာပူးဆွေးနွေးနေ
==================
လီဗာပူးဟာ ဆန်းဒါးလန်းရဲ့ ဒတ်ချ်နောက်ခံလူလပ်ရှာရယ်ဂီယာထရူဒါကို အငှားဖြင့် ခေါ်ယူရန် ဆွေးနွေးနေပါတယ်။
ဂီယာထရူဒါဟာ ရက်ဘူးလ်လိုက်ဇစ်မှ ဆန်းဒါးလန်းသို့ အငှားဖြင့် လာရောက် ကစားနေသူလည်း ဖြစ်ပါတယ်။
ဒတ်ချ်လက်ရွေးစင်ကစားသမားဟာ ညာနောက်ခံလူ၊ ဗဟိုနောက်ခံလူနေရာတို့အပြင် ကွင်းလယ်ခံစစ်ကစားသမားတို့လည်း ကစားနိုင်ကာ စွယ်စုံရ ကစားသမားတစ်ဦးလည်း ဖြစ်ပါတယ်။
ဆလော့ဟာ ဒူးဒဏ်ရာကြောင့် ကော်နာဘရက်ဒလေကို ရာသီအကုန်အထိ ဆုံးရှုံးထားရမှု၊ ဂျီရီမီဖရမ်းပေါင်မှာလည်း လတ်တလောတွင် အနားယူနေရမှု၊ ကိုနာတေးမှာလည်း ရာသီအကုန်တွင် စာချုပ်သက်တမ်းကုန်ဆုံးမယ့်အခြေအနေတို့ကြောင့် ခံစစ်ကို အားဖြည့်ရန် လိုအပ်နေပါတယ်။
လက်ရှိအချိန်တွင် လီဗာပူး၊ ဆန်းဒါးလန်းနှင့် လိုက်ဇစ်တို့အကြား ဂီယာထရူဒါရဲ့ အပြောင်းအရွှေ့နှင့်ပတ်သက်ပြီး သုံးပွင့်ဆိုင် ဆွေးနွေးနေတုန်း ဖြစ်ပါတယ်။
ဆန်းဒါးလန်းဟာ ဂီယာထရူဒါကို အငှားဖြင့် ခေါ်ယူစဉ်တုန်းက အပြီးသတ် ခေါ်ယူမယ့်အချက်အား ထည့်သွင်းထားခြင်းမရှိရာ လိုက်ဇစ်ရဲ့ ဆုံးဖြတ်ချက်မှာ အရေးပါတဲ့ အခန်းကဏ္ဍမှ ပါဝင်နေပါတယ်။

မန်စီးတီးလက်ထောက်နည်းပြရာထူးအား ရယူရန် ကလော့ပ်က တိုက်တွန်းခဲ့ခြင်း ဖြစ်ကြောင်း လင်ဒါဖွင့်ဟလာ
===================
ပက်လင်ဒါက လီဗာပူးနည်းပြဟောင်းဂျာဂင်ကလော့ပ်ရဲ့ တိုက်တွန်းမှုဖြင့် ပက်ဂွါဒီယိုလာရဲ့ မန်စီးတီးလက်ထောက်နည်းပြရာထူးကို ရယူခဲ့ခြင်းဖြစ်ကြောင်း ဖွင့်ဟ ပြောကြားလာပါတယ်။
အသက် ၄၃ နှစ်ရှိ လင်ဒါဟာ နွေရာသီတုန်းက ဂျူအန်မာလီလို နုတ်ထွက်သွားပြီးနောက် ဂွါဒီယိုလာရဲ့ ညာလက်ရုံးရာထူးကို ရယူလာတာလည်း ဖြစ်ပါတယ်။
လင်ဒါဟာ အန်ဖီးလ်တွင် ကလော့ပ်လက်အောက်မှာ ၆ နှစ်တိုင်တိုင် တာဝန်ထမ်းဆောင်ခဲ့သူ ဖြစ်ပြီး ရက်ဘူးလ်ဆဲလ်ဘတ်တွင်လည်း ကာလတို နည်းပြချုပ်အဖြစ် တာဝန်ထမ်းဆောင်ခဲ့ဖူးပါတယ်။
မန်စီးတီးက ၂၀၁-၁၉ နှင့် ၂၀၂၁-၂၂ ရာသီတို့တွင် လီဗာပူးအား တစ်မှတ်အသာဖြင့် ချန်ပီယံဖြစ်ခဲ့ကာ ပြင်းထန်တဲ့ ပြိုင်ဆိုင်မှု ရှိပေမယ့်လည်း ကလော့ပ်ဟာ လင်ဒါအား ဂွါဒီယိုလာရဲ့ လက်အောက်တွင် တာဝန်ထမ်းဆောင်ရန် တိုက်တွန်းမှု ပြုလုပ်ခဲ့တာလည်း ဖြစ်ပါတယ်။
လင်ဒါက "ဂျင်ဂင်နဲ့ စကားပြောတော့ သူက 'မင်းသာ မလုပ်ရင် ငါ လက်ထောက်နည်းပြသွားလုပ်လိုက်မယ်'လို့ ရှင်းရှင်းလင်းလင်းပဲ ပြောတယ်။ လီဗာပူးက ဆယ်နှစ်တာကို ထားရစ်ခဲ့လို့ မရပါဘူး။ ဒါပေမယ့် ပြီးခဲ့တဲ့ ဆယ်နှစ်တိုင်တိုင် အရမ်းအောင်မြင်မှုရလာတဲ့ ဒီကလပ်ရဲ့ ဆွဲဆောင်မှုကို မငြင်းနိုင်ပါဘူး။ နည်းပြတစ်ဦးရဲ့ ဘောလုံးကို အဓိပ္ပါယ်ဖွင့်ဆိုမှုအပေါ် မငြင်းနိုင်ပါဘူး"လို့ ပြောကြားသွားပါတယ်။
လင်ဒါဟာ ၂၀၁၄ ခုနှစ်တွင် လီဗာပူးသို့ ဘရန်ဒန်ရော်ဂျာလက်အောက်တွင် ကစားသမားဖွံ့ဖြိုးတိုးတက်ရေးနည်းပြအဖြစ် ရောက်လာတာ ဖြစ်ပြီး ၂၀၁၈ ခုနှစ်တွင် နယ်သာလန်ကလပ် နီမီဂျန်အား ကိုင်တွယ်ရန် ထွက်ခွာသွားခဲ့ပါတယ်။
ဒါပေမယ့် သူဟာ ရာသီအကုန်တွင် ထုတ်ပယ်ခြင်းခံရပြီးနောက် ၂၀၁၉ ခုနှစ်တွင် ကလော့ပ်ရဲ့ လက်ထောက်အဖြစ် တာဝန်ထမ်းဆောင်ရန် အန်ဖီးလ်သို့ တကျော့ပြန် ရောက်လာခဲ့ပါတယ်။
သူဟာ လီဗာပူးမှ ထွက်ခွာပြီးနောက် ရက်ဘူးလ်ဆဲလ်ဘတ်အား ကိုင်တွယ်ခဲ့ပေမယ့်လည်း ၂၉ ပွဲတည်းသာ ကိုင်တွယ်ခဲ့ရကာ ထုတ်ပယ်ခြင်းခံရပြီးနောက် ဂွါဒီယိုလာရဲ့ လက်ထောက်အဖြစ် တာဝန်ထမ်းဆောင်ရန် အီတီဟတ်သို့ ရောက်လာခဲ့ပါတယ်။
ဆက်လက်ပြီး လင်ဒါက "ပက်က အရမ်းတော်တယ်။ သူက ဘောလုံးအပေါ် ချစ်မြတ်နိုးတယ်။ ပွဲအပေါ် နားလည်မှုက အခြားဂြိုလ်က လူတစ်ယောက်လိုပဲ။ ပက်ရဲ့ ဖုန်းခေါ်ဆိုမှု ရတုန်းက အရမ်းစိတ်လှုပ်ရှားခဲ့ရတယ်။ ခက်ခက်ခဲခဲ ဆုံးဖြတ်ခဲ့ရတာ မဟုတ်ပါဘူး"လို့ ပြောကြားသွားပါတယ်။
မန်စီးတီးဟာ ယနေ့ညတွင် စပါးစ်ကို အဝေးကွင်းတွင် ရင်ဆိုင်ကစားရပါမယ်။

ယူနိုက်တက်အမြဲတမ်းနည်းပြအဖြစ် ခန့်အပ်ခြင်းခံရပါက ကစားဖော်ဟောင်းရက်ဖို့ဒ်ကို ပြန်လည်ခေါ်ဆောင်သွားမယ့် မိုက်ကယ်ကာရစ်
====================
မိုက်ကယ်ကာရစ်ဟာ ယူနိုက်တက်အမြဲတမ်းနည်းပြအဖြစ် ခန်အပ်ခြင်းခံရပါက ကစားဖော်ဟောင်းမားကပ်စ်ရက်ဖို့ဒ်အား အိုးထရက်ဖို့ဒ်သို့ ပြန်လည်ခေါ်ဆောင်နိုင်ရေး ကြိုးပမ်းလာမှာ ဖြစ်ကြောင်း သိရပါတယ်။
ယာယီနည်းပြမိုက်ကယ်ကာရစ်ဟာ ၂၀၁၈ ခုနှစ်တုန်းက ကစားသမားဘဝမှ အနားမယူမီ ရက်ဖို့ဒ်နှင့် တွဲကစားခဲ့သူ ဖြစ်ပါတယ်။
၎င်းတို့နှစ်ဦးဟာ ယူနိုက်တက်တွင် ၄၈ ပွဲ တွဲကစားခဲ့ကြပါတယ်။
အသက် ၂၈ နှစ်ရှိ မားကပ်စ်ရက်ဖို့ဒ်ဟာ ဘာစီလိုနာသို့ အငှားဖြင့် သွားရောက်ကစားနေပြီး ၁၀ ဂိုးသွင်းကာ ခြေစွမ်းပြကစားနိုင်ပြီးနောက် စပိန်တွင်ပင် ဆက်နေမယ်လို့ ယူဆခြင်းခံထားရပါတယ်။
ဒါပေမယ့် ကာရစ်ဟာ ယူနိုက်တက်အမြဲတမ်းနည်းပြအဖြစ် ခန့်အပ်ခြင်းခံရပါက ရက်ဖို့ဒ်အား ပြန်လည်ခေါ်ဆောင်နိုင်ရေး အစွမ်းကုန် ကြိုးပမ်းရန် ဆုံးဖြတ်ထားပါတယ်။
ရက်ဖို့ဒ်ဟာ ယူနိုက်တက်နှင့် ၂၀၂၈ ခုနစ်အထိ စာချုပ်ချုပ်ဆိုထားပေမယ့်လည်း ဘာစီလိုနာအနေဖြင့် ပေါင် ၂၆ သန်းတည်းဖြင့် အပြီးသတ်ခေါ်ယူနိုင်မယ့်အချက်အား အငှားစာချုပ်မှာ ထည့်သွင်းထားပါတယ်။
သူဟာ ဘာစီလိုနာတွင် အခြေကျနေပြီး ပြိုင်ပွဲအရပ်ရပ် ၃၂ ပွဲကစားထားရာမှာ ၁၀ ဂိုးသွင်းထားတဲ့အပြင် ၁၂ ကြိမ် ဖန်တီးမှု ပြုလုပ်ထားနိုင်ပါတယ်။
ဘာစီလိုနာဟာ ချန်ပီယံလိဂ်တွင် ၁၆ သင်း ရှုံးထွက်အဆင့်သို့ တိုက်ရိုက်တက်ရောက်ထားသလို လာလီဂါတွင်လည်း ရီးရဲလ်မက်ဒရစ်အား ၄ မှတ်ဖြတ်ကာ ထိပ်ဆုံးမှာ ရပ်တည်နေပါတယ်။

အောင်ပွဲခံမှုအတွက် အဝါကတ်ပြသမှုအပေါ် ဒေးဗစ်မိုယက်စ် ဆန့်ကျင်လာ
===================
အဲဗာတန်နည်းပြဒေးဗစ်မိုယက်စ်ဟာ ဘရိုက်တန်နှင့် သရေကျတဲ့ပွဲတွင် ပွဲပြီးခါနီးမှာ ချေပဂိုး ရရှိပြီးနောက် ကွင်းဘေးနားတွင် ပြေးလွှားအောင်ပွဲခံမှုအတွက် အဝါကတ်ပြသခြင်းခံရမှုအပေါ် ဆန့်ကျင်မှု ပြုလုပ်လာပါတယ်။
Amex Stadium တွင် တစ်ဂိုးစီသရေကျတဲ့ပွဲစဉ်တွင် လူစားဝင်ရောက်လာတဲ့ ဘီတိုက သူ့ အသက် ၂၇ နှစ်ပြည့်‌မွေးနေ့တွင် ၉၇ မိနစ်မှာ ချေပဂိုးသွင်းယူခဲ့ပါတယ်။
အသက် ၆၃ နှစ်ရှိ ဒေးဗစ်မိုယက်စ်ဟာ အချိန်ပို ချေပဂိုး ရရှိပြီးနောက် ခံစားချက်ကို မထိန်းထားနိုင်ဘဲ ကွင်းဘေးစည်းတွင် ပြေးလွှား အောင်ပွဲခံခဲ့ကာ ဒိုင်လူကြီးခရစ်ကာဗာနစ်ချ်ရဲ့ အဝါကတ်ပြသခြင်းခံခဲ့ရပါတယ်။
ဒေးဗစ်မိုယက်စ်ဟာ သူ့ရဲ့ အဝါကတ်ပြသမှုအား ၁၉၈၂-၈၃ ရာသီတုန်းက မန်စီးတီးကို အနိုင်ရတဲ့ ရာသီသိမ်းပွဲတွင် လူတန်အား ပရီးမီးယားလိဂ်တွင် တင်ကျန်အောင် ရာသီသိမ်းပွဲတွင် စွမ်းဆောင်နိုင်ခဲ့ပြီးနောက် နည်းပြဒေးဗစ်ပလိတ်မှာ အောင်ပွဲခံခဲ့ပေမယ့် အဝါကတ်ပြသမခံရမှုနှင့် နှိုင်းယှဉ်ပြောကြားလာပါတယ်။
မိုယက်စ်က "ပလိတ်တီလို့ မခေါ်ဝေါ်လာဖို့ မျှော်လင့်တယ်။ ပလိတ်က အဝါကတ် ပြသမခံခဲ့ရတော့ ကွဲပြားတယ်။ သူတို့က ဒါကျတော့ အိုကေတယ်လို့ ထင်ကြတယ်။ လူတိုင်း အောင်ပွဲခံတာကို မြင်ရင် ပျော်ကြတယ်။ အပြီးသတ်လုပ်လိုက်တာ။ မန်နေဂျာတွေက နည်းစနစ်ဧရိယာကို ကျော်ပြီး အောင်ပွဲခံလို့ မရဘူး။ ဒူးထောက်အောင်ပွဲခံလို့ မရဘူး။ မီဒီယာတွေကို ပြောတာပဲ လုပ်လို့ ရတယ်"လို့ ပြောကြားသွားပါတယ်။
‌
နောက်ထပ် အောင်ပွဲခံမလားလို့ မေးမြန်းလာချိန်တွင် မိုယက်စ်က "သေချာပေါက် လုပ်ဦးမယ်။ တကယ်လို့ အရိုးအဆစ်တွေသာ ကောင်းနေရင် ဒူးထောက်အောင်ပွဲခံတာတောင် လုပ်လိုက်ချင်သေးတယ်။ ဒီလိုလုပ်ရင်လည်း အဝါကတ်ပဲ အပြခံရမှာ ဖြစ်လို့ စိတ်လွတ်ကိုယ်လွတ်လုပ်လိုက်တာ အကောင်းဆုံးပဲ"လို့ ပြောကြားသွားပါတယ်။
ယခုရာသီအစောပိုင်းတုန်းက ချဲလ်ဆီးနည်းပြဟောင်းအန်ဇိုမာရက်စ်ကာမှာလည်း လီဗာပူးအား နောက်ကျဂိုးဖြင့် အနိုင်ရတဲ့ပွဲတွင် ကစားသမားများရှိရာသို့ ပြေးလွှားအောင်ပွဲခံမှုကြောင့် နှစ်ဝါတစ်နီဖြင့် အထုတ်ခံရကာ ပွဲပယ်ခံခဲ့ရပါတယ်။
ပဲလေ့စ်နည်းပြအိုလီဗာဂလက်စ်နာမှာလည်း ပြီးခဲ့တဲ့ရာသီတုန်းက ဗီလာကို ၃-၀ ဂိုးဖြင့် အနိုင်ရတဲ့ပွဲစဉ်မှ အောင်ပွဲခံမှုအတွက် ဗိုလ်လုပွဲတွင် ပွဲပယ်ခံရမည်ကို စိုးရိမ်ခဲ့ရပါတယ်။
ပရီးမီးယားလိဂ်နည်းပြများဟာ ပြီးခဲ့တဲ့နှစ်များအတွင်းတွင် နည်းစနစ်ဧရိယာကို ကျော်လွန်ကာ အောင်ပွဲခံခဲ့ကြတာ ဖြစ်ပြီး လတ်တလောစည်းမျဉ်းအရ အဝါကတ်ပြသခြင်းခံရပါမယ်။
ဟိုဆေးမော်ရင်ဟိုဟာ ၂၀၀၃-၀၄ ရာသီတုန်းက ပေါ်တိုက ယူနိုက်တက်အား အနိုင်ရတဲ့ချန်ပီယံလိဂ်ပွဲတွင် ကော့စတင်ညာ ဂိုးသွင်းပြီးနောက် အိုးထရက်ဖို့ဒ်ကွင်းဘေးတွင် ပြေးလွှားအောင်ပွဲခံ့ခဲ့ဖူးပါတယ်။

ဥရောပထိပ်သီးလိဂ်ကြီး ၅ ခုတွင် ဒုတိယဂိုးအများဆုံးသွင်းထားတဲ့ ဆယ်ကျော်သက် ကစားသမားအဖြစ် ရပ်တည်နေတဲ့ ဘုန်းမောက်ရဲ့ ဘက်ပေးလက်သစ်ခရူပီ
==================
ဘုန်းမောက်ဆယ်ကျော်သက်ကစားသမားအီလီဂျူနီယာခရူပီဟာ စနေနေ့ညတုန်းက ဝုဗ်အား ၂-၀ ဂိုးဖြင့် အနိုင်ရတဲ့ပွဲစဉ်တွင် ဦးဆောင်ဂိုး သွင်းယူခဲ့ပြီးနောက် ယခုရာသီ ပရီးမီးယားလိဂ်သွင်းဂိုး ၈ ဂိုးအထိ ရှိလာခဲ့ပြီ ဖြစ်ပါတယ်။
ဆယ်ကျော်သက်ကစားသမားဟာ ဝုဗ်နှင့်ပွဲစဉ်တွင် ပွဲချိန် ၃၃ မိနစ်မှာ အေမိုင်းအက်တလီရဲ့ မပေးလိုက်မှုကနေ ဧရိယာအစပ်မှ တချက်ထိန်းပြီး လှပစွာ ကန်သွင်းခဲ့တာလည်း ဖြစ်ပါတယ်။
ဒီဂိုးကြောင့် ခရူပီဟာ ယခုရာသီ ပရီးမီးယားလိဂ်သွင်းဂိုး ၈ ဂိုးအထိ ရှိလာခဲ့ပြီး ဥရောပထိပ်တန်းလိဂ်ကြီး ၅ ခုတွင် လာမိန်းယာမဲလ်ပြီးလျှင် ဒုတိယဂိုးအများဆုံး သွင်းယူထားသူအဖြစ် ရပ်တည်နေပါတယ်။
ပြင်သစ်ပါရမီရှင်ဟာ ၁၉၉၈-၉၉ ရာသီတုန်းက အာဆင်နယ်အတွက် ၁၃ ဂိုးသွင်းခဲ့တဲ့ နီကိုလပ်စ်အနဲလ်ကာရဲ့ ပရီးမီးယားလိဂ်တစ်ရာသီတဉ်းတွင် ဂိုးအများဆုံးသွင်းယူတဲ့ ဆယ်ကျော်သက်ကစားသမားစံချိန်ကို လိုက်မီနိုင်မယ့် အခွင့်အရေး ပိုင်ဆိုင်ထားသူလည်း ဖြစ်ပါတယ်။
ဒါ့အပြင် လာမယ့် ဇွန်လတွင်မှ အသက် ၂၀ နှစ်ပြည့်မယ့် ခရူပီဟာ နောက်ထပ် ၂ ဂိုးသွင်းနိုင်ပါက ပရီးမီးယားလိဂ်သမိုင်းတွင် ၁၀ ဂိုးသွင်းနိုင်တဲ့ ၁၀ ဦးမြောက် ဆယ်ကျော်သက်ကစားသမားအဖြစ်လည်း သမိုင်းမှတ်တိုင် စိုက်ထူလာနိုင်ပါမယ်။
ဘုန်းမောက်ဟာ မန်စီးတီးထံသို့ အန်တိုနီဆီမန်ယိုအား ရောင်းချလိုက်ရချိန်တွင် ခရူပီ အကောင်းဆုံးပုံစံဖြင့် ခြေစွမ်းပြလာမှုနှင့်အတူ စိတ်သက်သာရာ ရစရာ ဖြစ်နေပါတယ်။
တဖက်တွင် ခရူပီဟာ ပရီးမီးယားလိဂ်ပွဲ ၁၀ ပွဲတည်းသာ ပွဲထွက်ကစားခွင့်ရပြီး ၈ ဂိုးသွင်းထားနိုင်မှုနှင့်အတူ တချိန်တွင် ထွန်းတောက်လာမယ့် ကြယ်ပွင့်အဖြစ် ပြသနေတာလည်း ဖြစ်ပါတယ်။

ဖခင်ကွန်လွန်ပြီး ပထမဆုံးဝင်ကစားတဲ့ပွဲမှာ ဂိုးသွင်းပြီးနောက် မျက်ရည်ကျခဲ့တဲ့ ကိုနာတေး
=================
အီဘရာဟမ်ကိုနာတေးဟာ ဖခင်ဖြစ်သူ ကွယ်လွန်ပြီး လီဗာပူးအတွက် ပထမဆုံးပြန်ကစားတဲ့ပွဲတွင် ဂိုးသွင်းယူပြီးနောက် မျက်ရည်ကျခဲ့ပါတယ်။
အသက် ၂၅ နှစ်ရှိ လီဗာပူးနောက်ခံလူဟာ ဖခင်ဖြစ်သူရဲ့ နာရေးကြောင့် လီဗာပူးရဲ့ ဘုန်းမောက်၊ ကွာရာဘတ်တို့နှင့်ပွဲစဉ်များအား လွဲချော်ခဲ့သူလည်း ဖြစ်ပါတယ်။
သူဟာ စနေနေ့ညတုန်းက နယူးကာဆယ်အား ၄-၁ ဖြင့် အနိုင်ရတဲ့ပွဲမှာတော့ ပြန်လည် ကစားလာနိုင်ခဲ့ပြီး လီဗာပူးရဲ့ စတုတ္ထဂိုးအား သွင်းယူခဲ့ပါတယ်။
သူဟာ ဇန်နဝါရီလအစောပိုင်းတုန်းက မာဆေးနှင့်ပွဲမတိုင်မီ ကိုယ်ရေးကိုယ်တာကြောင့်ဟု ဆိုကာ လီဗာပူးလူစာရင်းမှ နုတ်ထွက်ခဲ့ပါတယ်။
နောက်ပိုင်းမှာတော့ ပြင်သစ်နောက်ခံလူက ဖခင်ဖြစ်သူရဲ့ နာရေးကြောင့် အိမ်ပြန်ခဲ့ရကြောင်း ကြေညာခဲ့ပါတယ်။
သူဟာ ဖခင်ဖြစ်သူရဲ့ နာရေးကြောင့် လီဗာပူးရဲ့ ပွဲ ၃ ပွဲအား လွဲချော်ခဲ့ပြီးနောက် နယူးကာဆယ်နှင့်ပွဲမှာတော့ ပွဲထွက်လူစာရင်းမှာ ပြန်လည် ပါဝင်ခဲ့ပါတယ်။
သူဟာ နယူးကာဆယ်နှင့်ပွဲတွင် လီဗာပူးအတွက် ခံစစ်တံတိုင်းကောင်းတစ်ခု ဖြစ်ခဲ့သလို ပွဲပြီးခါနီးတွင် အသင်းရဲ့ စတုတ္ထဂိုးကိုလည်း သွင်းယူခဲ့ပါတယ်။
ကိုနာတေးဟာ ဂိုးသွင်းယူပြီးနောက် ခံစားချက်ကို မထိန်းချုပ်နိုင်ဘဲ မျက်ရည်ကျခဲ့ကာ အသင်းခေါင်းဆောင်ဗာဂယ်ဗန်ဒိုက်က နှစ်သိမ့်မှု ပြုလုပ်ပေးခဲ့ပါတယ်။
ပွဲအပြီးတွင် ကိုနာတေးက "အခု ဘယ်လို ခံစားနေရတယ်ဆိုတာ ပြောပြဖို့ စကားလုံး မရှိပါဘူး။ ကျွန်တော်နဲ့ ကျွန်တော့်မိသားစုအတွက် နောက်ဆုံးနှစ်ပတ်တာကာလက အခက်ခဲဆုံးကာလပါ။ ဒါပေမယ့် ဒါက ဘဝရဲ့အစိတ်အပိုင်းဖြစ်ပါတယ်"လို့ ပြောကြားသွားပါတယ်။
လီဗာပူးနည်းပြအန်းဆလော့ဘက်က ကိုနာတေးအား လိုအပ်သလောက် အချိန်ယူရန် ခွင့်ပြုထားခဲ့ပေမယ့်လည်း ကာယကံရှင်ကိုယ်တိုင်က အသင်းကို ကူညီလိုမှုနှင့်အတူ ပြန်ကစားလာတာပါ။
ကိုနာတေးက "မန်နေဂျာက အလျှင်မလို့ဖို့ ပြောခဲ့တယ်။ ဒါပေမယ့် ကျွန်တော့်အတွက် အသင်းကို ကူညီဖို့က အရေးကြီးတဲ့အရာပါ"လို့ ပြောကြားသွားပါတယ်။
ကိုနာတေးဟာ ယခုရာသီအကုန်တွင် လီဗာပူးနှင့် စာချုပ်သက်တမ်းကုန်ဆုံးမယ့်သူ ဖြစ်ပြီး အနာဂတ်နှင့်ပတ်သက်ပြီး သတင်းများစွာ ထွက်ပေါ်နေသူလည်း ဖြစ်ပါတယ်။

လာလီဂါအား ၄ မှတ်ဖြတ်ပြီး ဦးဆောင်နိုင်အောင် ဘာစီလိုနာအတွက် ဂိုးသွင်းလာပြန်တဲ့ ရက်ဖို့ဒ်
===================
မားကပ်စ်ရက်ဖို့ဒ်ဟာ စနေနေ့ညတုန်းက အယ်ချီအား အနိုင်ရကာ ဘာစီလိုနာကို လာလီဂါအမှတ်ပေးဇယားထိပ်ဆုံးမှာ ၄ မှတ်ဖြတ်ပြီး ဦးဆောင်နိုင်အောင် ကူညီလာပါတယ်။
လက်ရှိချန်ပီယံ ဘာစီလိုနာဟာ ပွဲအစ ၆ မိနစ်မှာ ဒါနီအိုလ်မိုရဲ့ ဖန်တီးမှုကနေ လာမိန်းယာမဲလ်က အယ်ချီဂိုးသမားကို လိမ်ခေါက် သွင်းယူတဲ့ ဂိုးဖြင့် ပွဲကို စောစောစီးစီး ဦးဆောင်နိုင်ခဲ့ပါတယ်။
၁၉၇၄ ခုနှစ်တုန်းက ဘာစီလိုနာကို နောက်ဆုံးအကြိမ် ရှုံးနိမ့်ခဲ့တဲ့ အယ်ချီဟာ ၂၉ မိနစ်မှာ အယ်ဗာရိုရိုဒရီဂွက်ဇ်ရဲ့ ဘာစီလိုနာရဲ့ High Line ကို ကျော်ဖြတ်ပြီး သွေးအေးအေးဖြင့် သွင်းယူတဲ့ ဂိုးဖြင့် ချေပဂိုး ရခဲ့ပါတယ်။
ဒါပေမယ့် ဟန်ဆီဖလစ်ရဲ့ ဘာစီလိုနာဟာ ၁၁ မိနစ်အကြာမှာ ဖရန်ကီဒီယွန်ရဲ့ ခင်းပေးမှုကနေ ဖာရန်တောရက်စ်ရဲ့ အပြင်းကန်ချက်ဖြင့် ပြန်လည်ဦးဆောင်နိုင်ခဲ့ပါတယ်။
ယင်းနောက် ဒုတိယပိုင်းမှာ လူစားဝင်ရောက်လာတဲ့ ရက်ဖို့ဒ်က ပွဲချိန် ၇၂ မိနစ်မှာ ယာမဲလ်ရဲ့ အနိမ့်ဘောပေးပို့မှုကနေ တဆင့် ပိတ်သွင်းကာ ဘာစီလိုနာအတွက် အနိုင်သေချာစေမယ့် တတိယဂိုးအား သွင်းယူခဲ့ပါတယ်။
ဒီဂိုးဟာ ယူနိုက်တက်မှ အငှားဖြင့် လာကစားနေတဲ့ ရက်ဖို့ဒ်ရဲ့ ဘာစီလိုနာအတွက် ၁၀ ဂိုးမြောက်ဂိုးလည်း ဖြစ်ပါတယ်။ သူဟာ ကြားရက်တုန်းက ကိုပင်ဟေဂင်ကို အနိုင်ရတဲ့ ချန်ပီယံလိဂ်မှာလည်း ဂိုးသွင်းနိုင်ခဲ့တာကြောင့် နှစ်ပွဲဆက် ဂိုးသွင်းထားနိုင်ပါတယ်။
ဒီနိုင်ပွဲကြောင့် ဘာစီလိုနာဟာ ပြိုင်ပွဲအရပ်ရပ် နောက်ဆုံး ၁၆ ပွဲမှာ ၁၅ ပွဲအထိ အနိုင်ရထားသလို ဒုတိယနေရာမှ ရီးရဲလ်မက်ဒရစ်ကိုလည်း ဖိအားပေးလာနိုင်ပါတယ်။
ရီးရဲလ်မက်ဒရစ်က ယနေ့ညမှာ ဒေသတွင်းပြိုင်ဘက် ဗယ်လီကာနိုအား ဘာနေဗျူးမှာ ဧည့်ခံကစားရပါမယ်။

ယူနိုက်တက်တွင် နေရာပျောက်နေပေမယ့် ရာသီအကုန်အထိ ဆက်ရှိနေလိုတဲ့ ဇတ်ဇီး
=====================
ဂျိုရှာဇတ်ဇီးဟာ ရာသီအကုန်တွင် ယူနိုက်တက်တွင်ပင် ဆက်လက်ကစားသွားလိုနေကြောင်း သိရပါတယ်။
ယူနိုက်တက်တိုက်စစ်မှူးဟာ ယခုဆောင်းရာသီ အပြောင်းအရွှေ့ဈေးကွက်တွင် ရိုးမားရဲ့ ခေါ်ယူရန် စိတ်ဝင်စားခြင်းခံခဲ့ရသူလည်း ဖြစ်ပါတယ်။
ဒါပေမယ့် အသက် ၂၄ နှစ်ရှိ နယ်သာလန်တိုက်စစ်မှူးဟာ တနင်္လာနေ့ အပြောင်းအရွှေ့ဈေးကွက်ပိတ်ရက်အလွန် ရာသီအကုန်အထိ အိုးထရက်ဖို့ဒ်တွင် ဆက်ကစားသွားလိုနေပါတယ်။
တဖက်တွင် ယူနိုက်တက်ဘက်က ဆောင်းရာသီ အပြောင်းအရွှေ့တွင် မည်သည့်စီနီယာအသင်းကစားသမားမှ ထွက်ခွာခွင့်ပေးလာမှာ မဟုတ်ကြောင်း ဆိုထားသလို ဇတ်ဇီးရဲ့ အေးဂျင့်များကလည်း ကစားသမားကို ရာသီတစ်ဝက်ကာလတွင် အသင်းမပြောင်းစေလိုကြပါဘူး။
ဇတ်ဇီးဟာ ဒဏ်ရာကြောင့် ကာရစ်လက်ထက် ယူနိုက်တက်ရဲ့ နိုင်ပွဲ ၂ ပွဲကို လွဲချော်ခဲ့ပေမယ့် လေ့ကျင့်ခန်းပြန်ဆင်းနိုင်ပြီ ဖြစ်ပြီး တနင်္ဂနွေနေ့ ဖူလ်ဟမ်နှင့်ပွဲအတွက် ယူနိုက်တက်လူစာရင်းမှာ ပါဝင်လာပါမယ်။
ယူနိုက်တက်ဟာ လွန်ခဲ့တဲ့ ၁၈ လတုန်းက ဇတ်ဇီးကို ဘိုလော့ဂ်နာမှ ပေါင် ၃၆.၅ သန်းဖြင့် ခေါ်ယူခဲ့တာ ဖြစ်ပါတယ်။ ဒါပေမယ့် သူဟာ ပြီးခဲ့တဲ့နှစ်တုန်းက ပရီးမီးယားလိဂ်ဂိုး ၂ ဂိုးတည်းသာ သွင်းထားနိုင်ခဲ့ပါတယ်။
သူဟာ ယခုရာသီတွင် ပရီးမီးယားလိဂ်ပွဲ ၄ ပွဲ ပွဲထွက်ခွင့်ရထားပြီး ပဲလေ့စ်နိုင်ပွဲ၊ ဝုဗ်နှင့် သရေကျတဲ့ပွဲတို့တွင် ဂိုးသွင်းနိုင်ခဲ့ပါတယ်။
ဇတ်ဇီးဟာ ယခင်နည်းပြအမိုရမ်လက်ထက်တုန်းက ဆက်စ်ကိုရဲ့ အရန်အဖြစ်သာ ကစားခဲ့ရသလို လက်ရှိ ယာယီနည်းပြကာရစ်ကလည်း အမ်ဘူမိုအား အထောင်တိုက်စစ်တွင် အသုံးပြုနေတာကြောင့် နေရာရရှိရေး ဆက်လက် ရုန်းကန်လာရဖို့ ရှိနေပါတယ်။
ယူနိုက်တက်ဟာ နွေရာသီမှာတော့ ဇတ်ဇီးကို ရောင်းချလာဖို့ သေချာသလောက် ရှိနေပါတယ်။