စာချုပ်ပါအချက်ကို ချိုးဖောက်မှုဖြင့် ဝတ်စုံထောက်ပံ့တဲ့ ကုမ္ပဏီရဲ့ တရားစွဲခြင်းခံလာရတဲ့ ပရီးမီးယားလိဂ် ချန်ပီယံဟောင်း
=====================
ဘလက်ဘန်းအသင်းဟာ စာချုပ်ပါ အချက်အား ချိုးဖောက်မှုအတွက် အသင်းရဲ့ ဝတ်စုံအား ထောက်ပံ့ပေးနေတဲ့ ကုမ္ပဏီရဲ့ တရားစွဲဆိုခြင်းခံလာရပါတယ်။
အားကစားဝတ်စုံကုမ္ပဏီ Macron ဟာ ချန်ပီယံရှစ်ကလပ်အား တရားရုံးတွင် အမှုဖွင့်လာတာလည်း ဖြစ်ပါတယ်။
The Telegraph ရဲ့ ဖော်ပြလာမှုအရ ဘလက်ဘန်းဟာ Macron နှင့် စာချုပ်ကိစ္စဆွေးနွေးမှု မပြီးပြတ်သေးတဲ့အချိန်ကာလတွင် အခြား ဝတ်စုံထောက်ပံ့ပေးမယ့် ကုမ္ပဏီများနှင့် ဆွေးနွေးလာမှုကြောင့် ယခုကဲ့သို့ တရားစွဲဆိုခြင်းခံလာရခြင်း ဖြစ်ကြောင်း သိရပါတယ်။
ဘလက်ဘန်းဟာ Macron နှင့် ချုပ်ဆိုထားတဲ့ ၅ နှစ်စာချုပ်က ယခုရာသီအကုန်မှာ ကုန်ဆုံးမှာ ဖြစ်ပါတယ်။
Macron ဟာ ဘလက်ဘန်းဘက်က လာမယ့်ရာသီသစ်မှ စတင်ကာ အင်္ကျီစပွန်ဆာသစ်နှင့် လက်တွဲရန် သဘောတူညီမှု ရရှိထားကြောင့်း သတင်းထွက်လာပြီးနောက် ယခုကဲ့သို့ တရားစွဲလာတာလည်း ဖြစ်ပါတယ်။
ဘလက်ဘန်းဟာ Castore/Umbro နှင့် ပူးပေါင်းရန် သဘောတူညီမှု ရရှိထားကြောင်း သတင်းထွက်နေပါတယ်။
ပရီးမီးယားလိဂ်ချန်ပီယံဟောင်းဘလက်ဘန်းဟာ ချန်ပီယံရှစ်နောက်ဆုံး ၁၃ ပွဲတွင် ၁ ပွဲတည်းသာ အနိုင်ရရှိကာ လိဂ် ၁ သို့ တန်းဆင်းရမယ့်ကိန်းဆိုက်နေတဲ့အသင်းလည်း ဖြစ်ပါတယ်။
ဘလက်ဘန်းဟာ ၁၉၉၄-၉၅ ရာသီတုန်းက နည်းပြကန်နီဒဲလ်ကလစ်ရှ်ရဲ့ ဦးဆောင်မှု၊ အလန်ရှီးယားရဲ့ ခြေစွမ်းပြနိုင်မှုတို့ဖြင့် ပရီးမီးယားလိဂ်ချန်ပီယံ ဖြစ်ခဲ့ဖူးတဲ့ အသင်း ဖြစ်ပါတယ်။
ဘလက်ဘန်းဟာ ၂၀၁၂ ခုနှစ်တွင် ပရီးမီးယားလိဂ်မှ ချန်ပီယံရှစ်သို့ တန်းဆင်းသွားခဲ့ရပြီးနောက် ပရီးမီးယားလိဂ်သို့ ပြန်လည်တက်လှမ်းလာနိုင်ခဲ့ခြင်း မရှိပါဘူး။
