သိန္နီမှာ စီးပွားရေးလုပ်ငန်းအများစု တရုတ်နိုင်ငံသားတွေ လွှမ်းမိုးလာ

ရှမ်းပြည်နယ်မြောက်ပိုင်း၊ သိန္နီမြို့မှာ ဆိုင်တွေ၊ စီးပွားရေးလုပ်ငန်းတွေကို တရုတ်နိုင်ငံသားလုပ်ငန်းရှင်တွေက အများစု လွှမ်းမိုးလာနေပြီး ဒေသခံတွေ လုပ်ငန်းရှင်အဖြစ် ရပ်တည်ဖို့ ခက်ခဲလာနေတယ်လို့ ဒေသခံတွေက ပြောပါတယ်။
“သိန္နီမြို့တောင် ကျယ်ဂေါင်လို ဖြစ်သွားပြီ။ ဆိုင်ဆိုင်းဘုတ်တွေက အရင်ကတည်းက တရုတ်စာနဲ့ ဖြစ်နေပြီ၊ စူပါမားကတ်တွေ၊ စားသောက်ဆိုင်တွေကအစ တရုတ် သူဌေးတွေပဲ။ တရုတ်နိုင်ငံသား သူဌေးတွေ ကိုယ်တိုင် လာရောင်းနေကြတယ်။ ဒေသခံတွေကတော့ ဆိုင်ခန်းခ ဈေးမြင့်လာတာ၊ ရင်းနှီးမြှုပ်နှံမှု မယှဉ်နိုင်တာကြောင့် လုပ်ငန်းရှင်အဖြစ် မရပ်တည်နိုင်တော့တဲ့ အခြေအနေ ဖြစ်နေပြီ” လို့ ဒေသခံတဦးက ပြောပါတယ်။
သိန္နီမြို့မှာ တရုတ်ငွေ (ယွမ်) ကို တိုက်ရိုက် လက်ခံသုံးစွဲနေကြတာကိုလည်း တွေ့ရပြီး MNDAA က ဒေသကို စတင်ထိန်းချုပ်ခဲ့တဲ့ အချိန်ကတည်းက စားသောက်ဆိုင်များ၊ စူပါမားကတ်များမှာ ယွမ်နဲ့ ပေးချေမှုကို လက်ခံလာခဲ့ကြတာ ဖြစ်တယ်လို့ ဒေသခံတွေက ပြောပါတယ်။ ခေါက်ဆွဲတပွဲကို မြန်မာကျပ် ၅၀၀၀ နဲ့ ရောင်းသလို ယွမ် ၁၀ နဲ့လည်း လက်ခံရောင်းချနေကြတာမျိုးပါ ရှိနေပါတယ်။
လက်ရှိမှာ ဟိုတယ်လုပ်ငန်းတွေ၊ စားသောက်ဆိုင်တွေ အများစုကို တရုတ်နိုင်ငံသားတွေ လာဖွင့်ထားကြပြီး စီးပွားရေးလုပ်ငန်းစုစုပေါင်းရဲ့ သုံးပုံနှစ်ပုံခန့်ဟာ တရုတ်ဘက်က လုပ်ငန်းရှင်တွေ လက်ထဲ ရောက်ရှိနေနိုင်တယ်လို့ ဒေသခံတွေက ခန့်မှန်းပါတယ်။ ပန်လော့ဈေးအနီးမှာလည်း တရုတ်ဘက်က ရုပ်ရှင်ရုံ တည်ဆောက်ဖို့ စီစဉ်နေတယ်ဆိုတဲ့ သတင်းတွေ ထွက်ပေါ်နေပါတယ်။
ဒါအပြင် မြေနေရာတွေ၊ လယ်ကွင်းတွေကိုပါ တရုတ်နိုင်ငံသား လုပ်ငန်းရှင်တွေက ဝယ်ယူနေကြတာတွေ ရှိနေပြီး ဒေသတွင်းက အာဏာပိုင်တွေ ခွင့်ပြုချက် မပါဘဲ ဒီလို ရင်းနှီးမြှုပ်နှံမှုတွေ မဖြစ်နိုင်ဘူးလို့ ဒေသခံတွေက ယူဆကြပါတယ်။
ဒေသခံတဦးကလည်း “အခုလို နိုင်ငံရေး ရှုပ်ထွေးပြီး စီးပွားရေး ကြပ်တည်းနေတဲ့ကာလမှာ သိန်းသောင်းချီ ရင်းနှီးမြှုပ်နှံနိုင်တာက တရုတ်ဘက်ကပဲ ဖြစ်နိုင်တယ်။ မြေတွေလည်း ပိုက်ဆံပမာဏက ပေါက်ဈေးထက် ကျော်လွန်ပြီး ပေးလာရင်တော့ ဒေသခံတွေ မရောင်းချင်လည်း စီးပွားရေး အကြပ်အတည်းကြောင့် ရောင်းကြရတဲ့ အခြေအနေပါပဲ” လို့ ပြောပါတယ်။
သိန္နီမြို့မှာ တရုတ်နိုင်ငံသားလုပ်ငန်းရှင်တွေ ရင်းနှီးမြှုပ်နှံမှု တိုးလာတာနဲ့အမျှ ဒေသခံ စီးပွားရေးလုပ်ငန်းရှင်တွေ အတွက် ယှဉ်ပြိုင်ရပ်တည်ဖို့ ပိုမိုခက်ခဲလာနေပြီး ဒေသခံ လူမှုစီးပွားရေး ဖွဲ့စည်းပုံ ပြောင်းလဲလာနိုင်တယ်လို့ ဒေသခံတချို့က သုံးသပ်ပြောဆိုနေကြပါတယ်။

တရုတ်တွင် သံမဏိစက်ရုံပေါက်ကွဲမှုနှစ်ဦးသေဆုံး၊ ၈၀ ကျော်ဒဏ်ရာရ

တရုတ်နိုင်ငံမြောက်ပိုင်းရှိ စက်ရုံတစ်ရုံတွင် ကြီးမားသောပေါက်ကွဲမှုတစ်ခုကြောင့် လူနှစ်ဦးသေဆုံးပြီး ၈၄ ဦး ဒဏ်ရာရရှိခဲ့ကာ လူ ငါးဦး ပျောက်ဆုံးနေဆဲဖြစ်ကြောင်း နိုင်ငံပိုင်မီဒီယာများက ဇန်နဝါရီ ၁၉ ရက်တွင် ဖော်ပြထားသည်။
ပေါက်ကွဲမှုသည် ဇန်နဝါရီ ၁၈ ရက် ဒေသစံတော်ချိန် ညနေ ၃ နာရီခန့်တွင် အတွင်းမွန်ဂိုလီးယားရှိ ပေါက်ကန်းသံမဏိစက်ရုံ၌ ဖြစ်ပွားခဲ့ရာထိုဒေသတွင် သိသာထင်ရှားသော တုန်ခါမှုများ ဖြစ်ပေါ်ခဲ့သည်။
အွန်လိုင်း၌မျှဝေထားသောဗီဒီယိုတွင်မူ ပေါက်ကွဲမှုကြောင့် မီးခိုးလုံးကြီးများ ကောင်းကင်သို့ ထိုးတက် သွားသည်ကို ပြသထားပြီး မြေပြင်တွင် ပြိုကျထားသော မျက်နှာကြက်များနှင့် ပိုက်များအပါအဝင် အပျက်အစီးများ ပြန့်ကျဲနေသည်။
ဆေးရုံတက်နေရသူ ဒါဇင်ပေါင်းများစွာအနက် ငါးဦးသည် ပြင်းထန်သောဒဏ်ရာများရရှိခဲ့ကြောင်း နိုင်ငံပိုင်မီဒီယာများက ဖော်ပြသည်။ အာဏာပိုင်များသည် ပေါက်ကွဲမှု၏အကြောင်းရင်းကို စုံစမ်းစစ်ဆေးလျက်ရှိသည်။
အဆိုပါစက်ရုံသည် နိုင်ငံပိုင်သံနှင့် သံမဏိလုပ်ငန်းတစ်ခုဖြစ်သည်။တရုတ်နိုင်ငံတွင် စက်ရုံပေါက်ကွဲမှု များနှင့် သတ္တုတွင်းပြိုကျမှုများမှ မြေပြိုမှုများအထိ ပါဝင်သော စက်မှုလုပ်ငန်းမတော်တဆမှုများ မကြာခဏ ဖြစ်ပွားလေ့ရှိသည်။
၂၀၁၅ ခုနှစ်တွင် တီယန်ကျင်းဆိပ်ကမ်းတွင် ဖြစ်ပွားသည့် ကြီးမားသောပေါက်ကွဲမှုနှစ်ခုကြောင့် လူ ၁၇၃ ဦး သေဆုံးခဲ့ပြီး ရာပေါင်းများစွာ ဒဏ်ရာရရှိခဲ့ကာမြို့၏ဧရိယာ များစွာကို ပျက်စီးစေခဲ့သည်။ လွန်ခဲ့သည့်နှစ် မေလတွင် အရှေ့ပိုင်း ရှန်တုန်ပြည်နယ်ရှိ ဓာတုဗေဒစက်ရုံတစ်ရုံတွင် ပေါက်ကွဲမှုကြောင့် လူငါးဦးသေဆုံးပြီး အနည်းဆုံး ၁၉ ဦး ဒဏ်ရာရရှိခဲ့သည်။

အီရန်အစိုးရဆန့်ကျင်ရေး ဆန္ဒပြပွဲများ၌ သေဆုံးသူ ၁၆၅၀၀ ကျော်ရှိ

နိုင်ငံတစ်ဝန်း ဖြစ်ပွားခဲ့သောအစိုးရဆန့်ကျင်ရေး ဆန္ဒပြပွဲများအားအီရန်အစိုးရက အင်အားသုံးဖိနှိပ်မှုကြောင့် သေဆုံးခဲ့ရသူအရေအတွက်မှာ ၁၆၅၀၀ ကျော်အထိ ရှိလာနိုင်ကြောင်း ဇန်နဝါရီ ၁၈ ရက် သတင်းများတွင် ရေးသားတင်ပြထားသည်။
အဆိုပါ သေဆုံးသူအရေအတွက်သည် အီရန်ပြည်တွင်းရှိဆရာဝန်များ ကွန်ရက်တစ်ခုထံမှ ရရှိသော အရေအတွက်ဖြစ်ပြီး မူလခန့်မှန်းထားသော သေဆုံးသူအရေအတွက်ထက် များစွာကျော်လွန်နေကြောင်း ဗြိတိန်မီဒီယာများ၏ အဆိုအရသိရသည်။
အစိုးရဆန့်ကျင်ရေး ဆန္ဒပြပွဲများအတွင်း သေဆုံးသူအများစုမှာအသက် ၃၀ အောက် လူငယ်များဖြစ်
ကြပြီး ဒဏ်ရာရသူအရေအတွက်မှာလည်း အနည်းဆုံး ၃၃၀၀၀၀ အထိရှိနိုင်ကြောင်း ဗြိတိန်မီဒီယာများကသတင်းထုတ်ပြန်ထားသည်။
အထူးသဖြင့် အီရန်အစိုးရကအင်တာနက်လိုင်းများ ဖြတ်တောက်ခဲ့သော ဇန်နဝါရီ ၉ ရက်နှင့် ၁၀
ရက်တို့တွင် ဆန္ဒပြပြည်သူများသေဆုံးမှုနှုန်းမှာ တစ်ရှိန်ထိုးမြင့်တက်လာခဲ့ကြောင်း အီရန်ဆရာဝန်များကွန်ရက်၏အဆိုအရ သိရသည်။
အီရန်ဆရာဝန်များ ကွန်ရက်သည် ၎င်းတို့၏ ဆန္ဒပြပြည်သူများသေစာရင်းကို အဓိကဆေးရုံကြီး
ရှစ်ခုနှင့် အရေးပေါ်ဆေးကုသရေးဌာန ၁၆ ခုတို့မှ ရရှိသော အချက်အလက်များကို အခြေခံ၍ တွက်ချက်ထားခြင်းဖြစ်သည်။
စီးပွားရေး ကျပ်တည်းမှုကိုအကြောင်းပြု၍ ပြီးခဲ့သည့်နှစ် ဒီဇင်ဘာ ၂၈ ရက်တွင် စတင်ခဲ့သော ဈေး
ဆိုင်ပိုင်ရှင်များ၏ ဆန္ဒပြပွဲများသည်နောက်ပိုင်းတွင် ပြည်လုံးကျွတ်အစိုးရဆန့်ကျင်ရေး ဆန္ဒပြပွဲများအဖြစ်ပြောင်းလဲခဲ့သည်။

လန်ချန်း-မဲခေါင် ပူးပေါင်းဆောင်ရွက်မှု ၂.၀ ဗာရှင်းကို အတူတကွဖန်တီးရန်ဆန္ဒရှိဟု တရုတ်သံအမတ်ကြီးပြော

လန်ချန်း-မဲခေါင် ပူးပေါင်းဆောင်ရွက်မှု ၂.၀ ဗာရှင်းကို အတူတကွဖန်တီးရန်ဆန္ဒရှိဟု မြန်မာနိုင်ငံဆိုင်ရာ တရုတ်နိုင်ငံသံအမတ်ကြီး Ms. Ma Jia မှ ယနေ့ ဇန်နဝါရီ ၁၉ ရက်ကကျင်းပသည့် လန်ချန်း-မဲခေါင် အထူးရန်ပုံငွေဖြင့်ထောက်ပံ့သော “SME များ၏ Eco-Innovation နှင့် Green Practices တိုးတက်ရေး”အစည်းအဝေးတွင် ပြောကြားခဲ့ခြင်းဖြစ်သည်။
လန်ချန်း-မဲခေါင် စီမံကိန်းသည် ကောင်းမွန်သောဒေသတွင်း စံပြအကျိုးသက်ရောက်မှုကိုရရှိကာ လန်ချန်း-မဲခေါင် ပူးပေါင်းဆောင်ရွက်မှုသည် ကမ္ဘာ့တောင်ဘက်ခြမ်းနိုင်ငံပူးပေါင်းဆောင်ရွက်မှု၏အောင်မြင်သော စံနမူနာတစ်ခုဖြစ်သည်ဟု ပြောသည်။
ထို့ပြင် တရုတ်နိုင်ငံသည် လန်ချန်း-မဲခေါင် နိုင်ငံများရှိ SME များအား Eco-Innovation နှင့် အစိမ်းရောင် အသွင်ပြောင်းမှုတွင် ပံ့ပိုးပေးရေး၊ စည်းလုံးညီညွတ်မှုနှင့် ပူးပေါင်းဆောင်ရွက်မှု၊ တံခါးဖွင့်လှစ်မှုနှင့် အပြန်အလှန်အကျိုးဖြစ်ထွန်းမှု၊ အစိမ်းရောင်ဆန်းသစ်တီထွင်မှု၊ ငြိမ်းချမ်းရေးနှင့် တည်ငြိမ်အေးချမ်းမှုရှိသော "လန်ချန်း-မဲခေါင် ပူးပေါင်းဆောင်ရွက်မှု ၂.၀ ဗာရှင်း"ကို အတူတကွဖန်တီးရန် ဆန္ဒရှိသည်ဟု ပြောကြားခဲ့သည်။
အဆိုပါ စီမံကိန်းသည် လန်ချန်း-မဲခေါင်ဒေသနိုင်ငံများရှိ SME လုပ်ငန်း (၈၀) နီးပါးကို သုတေသနနှင့် အကဲ ဖြတ်ခြင်းပြုလုပ်မှုမှတစ်ဆင့် ဒေသတွင်းအစိမ်းရောင် ဖွံ့ဖြိုးတိုးတက်မှုကို ပံ့ပိုးကူညီရန် မူဝါဒအကြံပြုချက်များကို အဆိုပြုခဲ့သည်။

နိုဗယ်ငြိမ်းချမ်းရေးဆု မပေးသဖြင့် ငြိမ်းချမ်းရေးအတွက် စဉ်းစားရန်မရှိပြီဟု ထရမ့်ဆိုပြန်

နော်ဝေအစိုးရအနေဖြင့် သူ့အား နိုဗယ်ငြိမ်းချမ်းရေးဆု မပေးရန်ဆုံးဖြတ်ခဲ့ခြင်းကြောင့် သူ့အနေဖြင့်လည်း ငြိမ်းချမ်းရေးကိုသာ သန့်သန့်စင်စင် စဉ်းစားပေးရမည့် တာဝန်ရှိသည်ဟု မခံစားရတော့ကြောင့း သမ္မတထရမ့်က နော်ဝေဝန်ကြီးချုပ်ထံပေးပို့သော စာတွင် ထည့်သွင်းရေးသားထားသည်။
ရိုက်တာ(Reuters) သတင်းဌာနက မြင်တွေ့ခဲ့ရသည့် နော်ဝေ ဝန်ကြီးချုပ် ဂျိုးနပ်စ် ဂါး စတိုး ထံသို့ ထရမ့်က ပေးပို့သော စာတွင် ထရမ့်က “စစ်ပွဲပေါင်း ၈ ခုထက်မနည်းကို ကျွန်ုပ် ရပ်တန့်ပေးခဲ့သော်လည်း သင်၏နိုင်ငံက ကျွန်ုပ်ကို နိုဗယ်ငြိမ်းချမ်းရေးဆု မပေးရန် ဆုံးဖြတ်ခဲ့ခြင်းကြောင့်၊ ကျွန်ုပ်အနေဖြင့် ငြိမ်းချမ်းရေးကိုသာ သန့်သန့်စင်စင် စဉ်းစားပေးရမည့် တာဝန်ရှိသည်ဟု မခံစားရတော့ပါ။ ငြိမ်းချမ်းရေးသည် အမြဲတမ်း အဓိကဖြစ်နေမည် ဆိုသော်လည်း ယခုအခါ အမေရိကန်ပြည်ထောင်စုအတွက် ဘာက ကောင်းမွန်ပြီး သင့်တော်သလဲဆိုသည်ကို ကျွန်ုပ် စဉ်းစားနိုင်ပြီဖြစ်သည်” ဟု ရေးသားခဲ့ခြင်းဖြစ်သည်။
ဒိန်းမတ်နိုင်ငံအနေဖြင့် ဂရင်းလန်းကျွန်းကို ရုရှား သို့မဟုတ် တရုတ်တို့ရန်မှ မကာကွယ်နိုင်ပါဟူသော စွပ်စွဲချက်ကိုလည်း ထရမ့်က ယင်းစာထဲတွင် ထပ်လောင်းပြောကြားခဲ့သည်။
“... ပြီးတော့ သူတို့မှာကော ဘာကြောင့် ‘ပိုင်ဆိုင်ခွင့်’ ရှိနေရတာလဲ။ ကျွန်ုပ်တို့သည် ဂရင်းလန်းကျွန်းကို အလုံးစုံနှင့် အပြည့်အဝ ထိန်းချုပ်နိုင်ခြင်းမရှိသရွေ့ ကမ္ဘာကြီးသည် လုံခြုံမည်မဟုတ်ပါ” ဟုလည်း သူက ရေးသားခဲ့သည်။
အမေရိကန်အား ဂရင်းလန်းကျွန်းကို ဝယ်ယူခွင့်မပေးမချင်း EU အဖွဲ့ဝင်နိုင်ငံများဖြစ်သော ဒိန်းမတ်၊ ဆွီဒင်၊ ပြင်သစ်၊ ဂျာမနီ၊ နယ်သာလန်နှင့် ဖင်လန်နိုင်ငံတို့အပြင် ဗြိတိန်နှင့် နော်ဝေနိုင်ငံတို့အပေါ် ဖေဖော်ဝါရီ ၁ ရက်မှစတင်၍ တိုးမြှင့်သွင်းကုန်ခွန်များ ချမှတ်သွားမည်ဟု ထရန့်က စနေနေ့တွင် ကတိပြုပြောကြားခဲ့သည်။
ထရမ့်သည် နေတိုး (NATO) အဖွဲ့ဝင်ချင်းဖြစ်သော ဒိန်းမတ်နိုင်ငံထံမှ ဂရင်းလန်းကျွန်း၏ အချုပ်အခြာအာဏာကို သိမ်းယူရန် ကြိုးပမ်းမှုကို အရှိန်မြှင့်လုပ်ဆောင်လာခဲ့ပြီး၊ ၎င်း၏လမ်းကြောင်းကို ပိတ်ဆို့နေသည့် နိုင်ငံများအပေါ် ပြစ်ဒဏ်ခတ်သည့် သွင်းကုန်ခွန်များ ချမှတ်မည်ဟု ခြိမ်းခြောက်ခဲ့ရာ ဥရောပသမဂ္ဂ (EU) ဘက်ကလည်း ကိုယ်ပိုင်အစီအမံများဖြင့် တုံ့ပြန်ရန် စတင်ချိန်ဆလာခဲ့သည်။
ဤအငြင်းပွားမှုသည် ဆယ်စုနှစ်ပေါင်းများစွာကြာ အနောက်နိုင်ငံများ၏ လုံခြုံရေးကို အထောက်အပံ့ပေးခဲ့သည့် NATO မဟာမိတ်အဖွဲ့ကို ပျက်ပြားသွားစေရန် ခြိမ်းခြောက်လျက်ရှိသည်။ အဆိုပါမဟာမိတ်အဖွဲ့သည် ယူကရိန်းစစ်ပွဲနှင့် ပတ်သက်၍လည်းကောင်း၊ ကာကွယ်ရေးအသုံးစရိတ် လုံလောက်စွာ မသုံးစွဲသည့် မဟာမိတ်များကို ကာကွယ်ပေးရန် ထရမ့်က ငြင်းဆိုမှုကြောင့်လည်းကောင်း အဆင်မပြေမှုများ ရှိနှင့်ပြီးဖြစ်သည်။
ထို့အပြင် ယခင်နှစ်က ထရမ့်၏ အလွန်အမင်း မြင့်မားသော သွင်းကုန်ခွန်များကြောင့် နှစ်ဖက်ခေါင်းဆောင်များ ခက်ခက်ခဲခဲ ညှိနှိုင်းရရှိခဲ့သည့် ကုန်သွယ်ရေး သဘောတူညီချက်သည်လည်း ယခုအခါ ပြန်လည်မရေမရာ ဖြစ်လာခဲ့ပြီး EU နှင့် ၎င်း၏ အကြီးမားဆုံး ပို့ကုန်ဈေးကွက်ဖြစ်သော အမေရိကန်တို့အကြား ကုန်သွယ်ရေး ဆက်ဆံရေးကို ထိခိုက်စေခဲ့သည်။

ကျိုင်းယင်းဆရာတော်ကြီးအားချီးမြှင့်ထားသည့် "စည်သူ"ဘွဲ့တံဆိပ်တော်နှင့် အဆောင်အယောင်များကို နိုင်ငံတော် ယာယီသမ္မတမှ လက်ရောက်ဆက်ကပ်

ပြီးခဲ့သည့် ဇန်နဝါရီ ၄ ရက် (လွတ်လပ်ရေးနေ့) က နိုင်ငံတော် ယာယီသမ္မတ၊ နိုင်ငံတော်လုံခြုံရေးနှင့် အေးချမ်းသာယာရေးကော်မရှင် ဥက္ကဋ္ဌ၊ ဗိုလ်ချုပ်မှူးကြီးမင်းအောင်လှိုင်မှ ပြည်ထောင်စုစည်သူသင်္ဂဟဘွဲ့ဖြစ်သော "စည်သူ" ဘွဲ့အား ရှမ်းပြည်နယ်၊ ကျိုင်းတုံမြို့၊ ကျိုင်းယင်းကျောင်းတိုက်၏ ဦးစီးပဓာနနာယက သက်တော်ရှည်မဟာထေရ်မြတ်ကြီးအား ချီးမြှင့်ခဲ့သည်။
ထိုသို့ ချီးမြှင့်ခဲ့သည့် "စည်သူ"ဘွဲ့တံဆိပ်တော်များနှင့် အဆောင်အယောင်များကို နိုင်ငံတော်ယာယီသမ္မတမှ ယနေ့ ဇန်နဝါရီ ၁၉ ရက်နံနက်ပိုင်းက ကျိုင်းယင်းကျောင်းတိုက်၊ ဓမ္မာရုံတော်ကြီး၌ ကျိုင်းယင်းဆရာတော်ကြီးထံ လက်ရောက်ဆက်ကပ်လှူဒါန်းခဲ့သည်။
နိုင်ငံတော်ယာယီသမ္မတနှင့် တက်ရောက်လာကြသူ များမှ ကျိုင်းတုံမြို့၊ နိုင်ငံတော်ဩဝါဒါစရိယ၊ တူးယားကျောင်းတိုက် ဆရာတော်ထံမှ ငါးပါးသီလခံယူဆောက်တည်ပြီးနောက် နိုင်ငံတော်ယာယီသမ္မတမှ ကျိုင်းယင်းဆရာတော်ကြီးထံ“စည်သူဘွဲ့”တံဆိပ်တော်နှင့် အဆောင်အယောင်များ၊ လှူဖွယ်ပစ္စည်းများ၊ နဝကမ္မအလှူတော်ငွေများကိုဆက်ကပ်လှူဒါန်းရာ ဆရာတော်ကြီးက နိုင်ငံတော် ယာယီသမ္မတအား ဓမ္မလက်ဆောင်ပြန်လည်ပေးအပ်ခဲ့သည်။
ထို့နောက် ကြွရောက်တော်မူလာကြသည့် ဆရာတော်၊ သံဃာတော်များက မေတ္တာသုတ်အပါအဝင်ပရိတ်တရားတော်ကို ရွတ်ဖတ်ချီးမြှင့်ပူဇော်ကြပြီး ကျိုင်းယင်းဆရာတော်ကြီးမှ ဝမ်းမြောက်ကြောင်းနှင့်ဆုတောင်းမေတ္တာပို့သလွှာ ဩဝါဒကထာမိန့်ကြားတော်မူသည်။
" ပုဂံခေတ်မှစ၍ ကုန်းဘောင်ခေတ်အထိ သမိုင်း ကြောင်းကိုပြန်ကြည့်ပါက သက်တော်ရှည်ဆရာတော်ကြီးတစ်ပါးကို နိုင်ငံတော်အစိုးရမှာဘွဲ့တံဆိပ်တော် ဆက်ကပ်လှူဒါန်းသည်ကို မတွေ့ဖူး၊ မကြားဖူးသဖြင့် မိမိကိုယ်တိုင်နှင့် တိုင်းပြည်အုပ်ချုပ်သည့်အစိုးရအဖွဲ့တို့အတွက် ထူးခြားမှုတစ်ခုဟု မှတ်တမ်းတင်ရမည်ဖြစ်ကာ နိုင်ငံတော်ယာယီသမ္မတကြီးနှင့်တကွ တိုင်းသူပြည်သားများအားလုံး ကျန်းကျန်းမာမာချမ်းချမ်းသာသာဖြင့် လုပ်ငန်းဆောင်တာများကို အောင်မြင်စွာဆောင်ရွက်နိုင်ပြီး လိုအင်ဆန္ဒများပြည့်ဝပြည့်စုံကြပါစေရန် ဆုတောင်းမေတ္တာပို့သသည်"ဟု ကျိုင်းယင်းဆရာတော်ကြီးက မိန့်ကြားတော်မူခဲ့သည်။
ထို့နောက် နိုင်ငံတော်ယာယီသမ္မတနှင့် တက်ရောက်လာကြသူများက ကျိုင်းတုံမြို့၊ သာသနဝေပုလ္လပရိယတ္တိစာသင်တိုက် ပဓာန နာယက၊ အဂ္ဂမဟာ ဂန္ထဝါစကပဏ္ဍိတ၊ အဂ္ဂမဟာသဒ္ဒမ္မဇောတိကဓဇ ဘဒ္ဒန္တ ဝိဇယ ထံမှ အနုမောဒနာတရားနာယူ၍ လှူဒါန်းမှုအစုစုအ တွက် ရေစက်သွန်းလောင်းအမျှပေးဝေခဲ့ကြသည်။
“စည်သူဘွဲ့”တံဆိပ်တော်ရ ကျိုင်းတုံမြို့၊ ကျိုင်းယင်းကျောင်းတိုက် ဦးစီးပဓာနနာယက၊ အဂ္ဂမဟာသဒ္ဓမ္မ ဇောတိကဓဇ ဘဒ္ဒန္တခေမာစာရ သက်တော်ရှည်မဟာ ထေရ်မြတ်ကြီးသည် မိုင်းပျဉ်းမြို့၊ ပိန်းဆန်းကျောင်းစာသင်တိုက်၊ ကျိုင်းတုံမြို့နယ်၊ ယန်းလောကျေးရွာအုပ်စု၊ ယန်းလောစာသင်တိုက်၊ ပါလျှံလုံကျောင်းစာသင်တိုက်များတည်ထောင်ဖွင့်လှစ်၍ ပြည်နယ်အတွင်းပရိယတ္တိသာသနာတည်တံ့အောင် စွမ်းဆောင်လျက်ရှိခြင်း၊ ဆရာတော်ကြီးသည် ဂုံရှမ်းသံဃာတော်များ၏ အဓိပတိဖြစ်ပြီး ဂုံရှမ်းဘာသာဖြင့် နှစ်စဉ်သံဒိဋ္ဌပြက္ခဒိန်တွက်ချက်ရေးဆွဲခြင်းနှင့် မိုင်းခတ်မြို့၊ နှီးဘုရားကြီးပြု ပြင်ခြင်းအား ဦးဆောင်ပြုပြင်ခြင်းဖြင့် ဘာသာသာသ နာအကျိုးတို့ကို ထမ်းဆောင်တော်မူခြင်း၊ ဒေသအကျိုးကို စွမ်းစွမ်းတမံဆောင်ရွက်တော်မူခြင်းတို့ကြောင့် နိုင် ငံတော်ယာယီသမ္မတမှ ပြည်ထောင်စုစည်သူသင်္ဂဟဘွဲ့များမှ “စည်သူဘွဲ့”တံဆိပ်တော်ကို ဆက်ကပ်လှူဒါန်းခဲ့ခြင်းဖြစ်သည်။

အထူးစစ်နည်းဗျူဟာတွေကို ခေတ်နဲ့အညီကျင့်သုံးနိုင်ဖို့ဆောင်ရွက်ရန် ဗိုလ်ချုပ်မှူးကြီးမင်းအောင်လှိုင် မှာကြား

နည်းပညာခေတ်ဖြစ်၍ စစ်နည်းဗျူဟာများပြောင်းလဲကျင့်သုံးနိုင်ရေး သုတေသနပြုဆောင်ရွက်နေရမည်ဟု တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်မှ ယနေ့ ဇန်နဝါရီ ၁၉ ရက်နံနက်ပိုင်းက ကျိုင်းတုံတပ်နယ်ရှိ နယ်မြေခံတပ်မတော်တန်းမြင့်လေ့ကျင့်ရေးကျောင်းအားကြည့်ရှုစစ်ဆေးစဥ် တာဝန်ရှိသူများကို မှာကြားခဲ့ခြင်းဖြစ်သည်။
" ယနေ့ခေတ်ဟာ နည်းပညာခေတ်ဖြစ်တဲ့အတွက် နေ့ စဉ်နဲ့အမျှပြောင်းလဲတိုးတက်လာနေတဲ့ စစ်ဘက်အသုံးအဆောင်ပစ္စည်းတွေအပေါ်မူတည်ပြီး စစ်နည်းဗျူဟာတွေကို ပြောင်းလဲကျင့်သုံးနိုင်ဖို့ သုတေသနပြုဆောင်ရွက်နေရပါမယ်။ သမားရိုးကျစစ်နည်းဗျူဟာတွေကို ခေတ်နဲ့အညီ မွမ်းမံနိုင်ဖို့နဲ့ အထူးစစ်နည်းဗျူဟာတွေကို ခေတ်နဲ့အညီကျင့်သုံးနိုင်ဖို့ဆောင်ရွက်ရပါမယ်"ဟု ဗိုလ်ချုပ်မှူးကြီးမင်းအောင်လှိုင်က မှာကြားသည်။
ထို့ပြင် နည်းပြများအနေဖြင့်လည်း စံနမူနာပြဖြစ်နေရမည်ဖြစ်ပြီး မိမိတို့တာဝန်ယူရသည့် ဘာသာရပ်များအလိုက်ကျွမ်းကျင်ပိုင်နိုင်သူများဖြစ်ရန်လိုကာ သင်တန်းသားများ၏ နေရေး၊ ထိုင်ရေး၊ စားရေးတို့ကိုလည်း အဆင်ပြေချောမွေ့ မှုရှိအောင်စီမံဆောင်ရွက်ပေးရမည့်နည်းတူ ရပိုင်ခွင့်များအားလုံးရရှိအောင်လည်း ကြပ်မတ်ဆောင်ရွက်ပေးရမည်ဟု မှာကြားသည်။
ထို့အတူ တပ်မတော်တန်းမြင့်လေ့ကျင့်ရေးကျောင်း များ၏တာဝန်မှာ တပ်ရင်းတပ်ဖွဲ့များနှင့် စစ်သည်တစ်ဦးချင်းစီ၏ အရည်အသွေးများတိုးတက်လာအောင်လေ့ကျင့်ပေးခြင်းဖြစ်ရာ လေ့ကျင့်ရေးပိုင်းဆိုင်ရာများနှင့်ပတ်သက်ပါက လုံးဝလျှော့ပေါ့၍ရမည်မဟုတ်ဘဲ စနစ်တကျဖြင့် ကြပ်မတ်လေ့ကျင့်ရန်လိုကာ လေ့ကျင့်သားပြည့်ဝမှသာ တိုက်ရည်ခိုက်ရည်နှင့် ရဲစွမ်းသတ္တိများကောင်းမွန်လာမည်ဖြစ်ပြီး လက်တွေ့စစ်မြေပြင်တွင် ကောင်းမွန်သည့်ရလာဒ်ကိုဖော်ဆောင်နိုင်မည်ဟု ပြောသည်။
" သင်တန်းကျောင်းမှာ လက်တွေ့စစ်မြေပြင်သဖွယ်ဖန်တီးပြီး လေ့ကျင့်ပေးဖို့လိုပါတယ်။ သင်တန်းကျောင်းတွေက စနစ်တကျလေ့ကျင့်မွေးထုတ်ပေး လိုက်နိုင်မှသာ စစ်သည်တော်ကောင်းတွေရရှိလာမှာဖြစ်ပါတယ်"ဟု ဗိုလ်ချုပ်မှူးကြီးမင်းအောင်လှိုင်က ပြောသည်။
ထို့ပြင် မိမိတို့ လေ့ကျင့်မွေးထုတ်ပေးလိုက်သည့်စစ် သည်တော်များသည် ရုပ်ပိုင်းစိတ်ပိုင်းဆိုင်ရာ ကျန်းမာ ကြံ့ခိုင်သန်စွမ်းသူများဖြစ်ရမည်ဖြစ်ပြီး နိုင်ငံတော်နှင့် တပ်မတော်က အားကိုးအားထားပြုနိုင်ရမည်ဖြစ်ကာ နိုင်ငံတော်ကာကွယ်ရေးအခန်းကဏ္ဍသည် အလွန်ကျယ်ပြန့်၍ လေ့ကျင့်ရေးတာဝန်များကို အလေးအနက်ထားဆောင်ရွက်ရန် ဗိုလ်ချုပ်မှူးကြီးမင်းအောင်လှိုင်က မှာကြားခဲ့သည်။

မြန်မာနိုင်ငံ၏အခက်အခဲများစွာကို သစ္စာရှိနိုင်ငံ့ဝန်ထမ်းများ၊ တည်ငြိမ်အေးချမ်းမှုကိုလိုလားသော ပြည်သူလူထုတို့၏ ပူးပေါင်းပါဝင်မှုများဖြင့် ကြံ့ကြံ့ခံရင်ဆိုင်ကျော်လွှားနိုင်ခဲ့ဟု ယာယီသမ္မတ ပြော

အခက်အခဲများစွာကို သစ္စာရှိနိုင်ငံ့ဝန်ထမ်းများ၊ တည်ငြိမ်အေးချမ်းမှုကိုလိုလားသော ပြည်သူလူထုတို့၏ ပူးပေါင်းပါဝင်မှုများဖြင့် ကြံ့ကြံ့ခံရင်ဆိုင်ကျော်လွှားနိုင်ခဲ့သည်ဟု နိုင်ငံတော်ယာယီသမ္မတ၊ နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ၊ ဗိုလ်ချုပ်မှူးကြီးမင်းအောင်လှိုင်မှ ယနေ့ ဇန်နဝါရီ ၁၉ ရက်နံနက်ပိုင်းက ကျိုင်းတုံမြို့ရှိ ဌာနဆိုင်ရာတာဝန်ရှိသူများ၊ မြို့မိမြို့ဖများနှင့်တွေ့ဆုံစဥ် ပြောကြားခဲ့ခြင်းဖြစ်သည်။
အစိုးရတစ်ရပ်ဆိုသည်မှာ တိုင်းပြည်တည်ငြိမ်အေး ချမ်းရေးနှင့် ဖွံ့ဖြိုးတိုးတက်အောင်ဆောင်ရွက်ရန်တာဝန်ရှိကာ မိမိတို့အနေဖြင့် နိုင်ငံတော်၏တာဝန်များကို ရယူခဲ့စဉ် ကိုဗစ်-၁၉ ရောဂါဖြစ်ပေါ်လျက်ရှိပြီး ကျန်းမာရေး၊ ပညာရေးဝန်ထမ်းအချို့အပါအဝင် နိုင်ငံ့ဝန်ထမ်းအချို့ လုပ်ငန်းခွင်စွန့်ခွာမှုများကြောင့် အခက်အခဲအကြပ်အတည်းများစွာကိုရင်ဆိုင်ကြုံတွေ့ခဲ့ရသည်ဟု ပြောသည်။
ထို့ပြင် နိုင်ငံရေးအရဖြစ်ပေါ်လာသည့် ပြဿနာကို နိုင်ငံရေးအရမဖြေရှင်းဘဲ နိုင်ငံရေးသဘောထားကွဲလွဲမှုများကြောင့်ဖြစ်ပေါ်လာသည့် ဆူပူအကြမ်းဖက်မှုများနှင့် လက်နက်ကိုင်အကြမ်းဖက်မှုများကိုလည်း ရင်ဆိုင်ခဲ့ရသည့်အပြင် ရေကြီးရေလျှံမှုများ၊ လေပြင်းတိုက်ခတ်မှုများ၊ ငလျင်လှုပ်ခတ်မှုများကိုလည်းကြုံတွေ့ခဲ့ရသည်ဟုဘပြောသည်။
" မိမိတို့အနေနဲ့ အဲဒီလို အခက်အခဲ၊ အကြပ်အတည်းပေါင်းစုံတွေကြားက သစ္စာရှိနိုင်ငံ့ဝန်ထမ်းတွေ၊ တည် ငြိမ်အေးချမ်းမှုကိုလိုလားတဲ့ ပြည်သူလူထုတွေရဲ့ ပူးပေါင်းပါဝင်မှုတွေနဲ့ ကြံ့ကြံ့ခံရင်ဆိုင်ကျော်လွှားနိုင်ခဲ့ပါတယ်။ မိမိတို့အစိုးရအဖွဲ့အနေနဲ့ နိုင်ငံရေးအရပေးထားတဲ့ ကတိတွေအတိုင်းဆက်လက်အကောင်အထည်ဖော်ဆောင်သွားမှာပါ"ဟု နိုင်ငံတော် ယာယီသမ္မတက ပြောသည်။
ထို့ပြင် မည်သည့်အစိုးရဦးဆောင်သည်ဖြစ်စေ နိုင်ငံ့ပညာရေးကို မဖြစ်မနေအားပေးဆောင်ရွက်ရမည်ဖြစ်၍ ရှမ်းပြည်နယ်(အရှေ့ပိုင်း)အနေဖြင့် ပညာရေးကို ဆက် လက်အားပေးဆောင်ရွက်ရန်လိုကာ မိမိတို့ဒေသဖွံ့ဖြိုးတိုးတက်ရေးအတွက် ဒေသတွင်နေထိုင်သူများ၊ တာဝန်ထမ်းဆောင်နေသူများအားလုံးက ဝိုင်းဝန်းပူးပေါင်းကြိုးပမ်းဆောင်ရွက်ရမည်ဖြစ်ပြီး ဒေသတစ်ခုချင်းဖွံ့ ဖြိုးတိုးတက်မှုမှတဆင့် နိုင်ငံဖွံ့ဖြိုးတိုးတက်လာမည်ဟု နိုင်ငံတော် ယာယီသမ္မတက ပြောကြားခဲ့သည်။
ထို့နောက် နိုင်ငံတော်ယာယီသမ္မတမှ တွေ့ဆုံပွဲတက်ရောက်လာသည့် ဌာနဆိုင်ရာတာဝန်ရှိသူများ၊ မြို့မိမြို့ဖများနှင့် ဒေသခံများအား ရင်းရင်းနှီးနှီးနှုတ်ဆက်ပြီး ခင်းကျင်းပြသထားသည့် ရှမ်းပြည်နယ်(အရှေ့ပိုင်း)အတွင်းရှိ အသေးစား၊ အငယ်စားနှင့် အလတ်စားစီးပွား ရေး(MSME)လုပ်ငန်းများမှထွက်ရှိသည့် ထုတ်ကုန်ပစ္စည်းများအား ပြခန်းတစ်ခုချင်းစီအလိုက်ကြည့်ရှုခဲ့သည်။

ပြည်တွင်းစားသုံးဆီလိုအပ်ချက်အတွက် နှစ်စဉ် ပြည်ပမှ ဝယ်ယူတင်သွင်းနေရခြင်းသည် တိုင်းပြည်အတွက် နစ်နာမှုပင်ဖြစ်
ပြည်တွင်း၌ ဆီထွက်သီးနှံများ အောင်မြင်စွာစိုက်ပျိုးထုတ်လုပ်နိုင်သည်ဖြစ်သဖြင့် ပြည်တွင်းလိုအပ်ချက်ပြည့်မီအောင် ထုတ်လုပ်နိုင်ရေး ကြိုပမ်းဆောင်ရွက်သွားရန်လိုအပ်

ပြည်တွင်းစားသုံးဆီလိုအပ်ချက်အတွက် နှစ်စဉ်ပြည်ပမှ ဝယ်ယူတင်သွင်းနေရခြင်းသည်လည်း တိုင်းပြည်အတွက် နစ်နာမှုပင်ဖြစ်ကြောင်း၊ ဆီထွက်သီးနှံများသည် ပြည်တွင်း၌ အောင်မြင်စွာစိုက်ပျိုးထုတ်လုပ်နိုင်သည်ဖြစ်သဖြင့် ပြည်တွင်းလိုအပ်ချက်ပြည့်မီအောင် ထုတ်လုပ်နိုင်ရေး မိမိတို့အနေဖြင့် ကြိုးပမ်းဆောင်ရွက်သွားကြရန်လိုကြောင်း မြန်မာနိုင်ငံ ယာယီသမ္မတ နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင် ကပြောသည်။
ယနေ့ ဇန်နဝါရီ ၁၉ ရက်နေ့၌ ကျိုင်းတုံမြို့ရှိ ဌာနဆိုင်ရာတာဝန်ရှိသူများ၊ မြို့မိမြို့ဖများနှင့်တွေ့ဆုံစဉ် ယာယီသမ္မတ က အထက်ပါအတိုင်းပြောကြားခဲ့ခြင်းဖြစ်သည်။
စိုက်ပျိုးရေး၊ မွေးမြူရေးကို အခြေခံသည့် ကုန်ထုတ်လုပ်မှုလုပ်ငန်းများ ဖွံ့ဖြိုးတိုးတက်စေရေး အားပေးဆောင်ရွက်နေကြောင်း တိုင်းပြည်၏ စီးပွားရေးတက်စေလိုပါက အမှန်တကယ်လုပ်လုပ်ကြရန်လိုအပ်မည်ဖြစ်ကြောင်းလည်း ယာယီသမ္မတ ကပြောကြားခဲ့သည်။
ပြည်တွင်း၌ ထုတ်လုပ်၍ရသည့် စားကုန်၊ သောက်ကုန်၊ သုံးကုန်များကို ပြည်တွင်းလိုအပ်ချက်ကို ပြည့်မီအောင်ဆောင်ရွက်နိုင်မည်ဆိုပါက နိုင်ငံခြားငွေသုံးစွဲနေရမှုများ များစွာလျော့ကျလာမည်ဖြစ်ပြီး နိုင်ငံ၏စီးပွားရေးသည်လည်း တက်လာမည်ဖြစ်ကြောင်းလည်း ပြောကြားခဲ့သည်။
ထိုပြင် ရှမ်းပြည်နယ်(အရှေ့ပိုင်း)အတွင်း လူဦးရေ ၁ သန်းခန့်ရှိပြီး ဒေသတွင်းစားရေးဖူလုံမှုကို ဖော်ဆောင်ပေးနိုင်ရန်လိုကြောင်း၊ ဒေသတွင်းလိုအပ်ချက်နှင့်ထုတ်လုပ်မှု မျှတမှုမရှိပါက ကုန်ဈေးနှုန်းများကြီးမြင့်မှုကို ဖြစ်ပေါ်စေမည်ဖြစ်ကြောင်း နှင့် ဒေသတွင်းနေထိုင်ကြသူများစားရေးကို သက်သာစွာဖြင့်ဝယ်ယူစားသုံးနိုင်ရေး ဒေသတွင်းစိုက်ပျိုးမွေးမြူရေးထုတ်ကုန်များကို ဖူလုံစွာထုတ်လုပ်ပေးနိုင်အောင် ကြိုးပမ်းဆောင်ရွက်သွားကြရမည်ဖြစ်ကြောင်းလည်း ယာယီသမ္မတ ဗိုလ်ချုပ်မှုးကြီး မင်းအောင်လှိုင် ကပြောကြားခဲ့သည်။

တပ်မတော်သို့ ဝင်ရောက်တာဝန်ထမ်းဆောင်ကြသူများသည် မိမိတို့သဘောဆန္ဒအလျောက် ဝင်ရောက်လာကြခြင်းဖြစ်
နိုင်ငံကို ကာကွယ်လိုသည့်စိတ်ဖြင့် ဝင်ရောက်လာသည့် တပ်မတော်သားများအားလုံးကို အသိမှတ်ပြု

တပ်မတော်သို့ ဝင်ရောက်တာဝန်ထမ်းဆောင်ကြသူများသည် မိမိတို့၏ သဘောဆန္ဒအလျောက် ဝင်ရောက်လာကြခြင်းဖြစ်ကြောင်း နိုင်ငံတော်လုံခြုံရေးနှင့် အေးချမ်းသာယာရေးကော်မရှင် ဥက္ကဌ တပ်မတော်ကာကွယ်‌ရေးဦးစီးချုပ် ဗိုလ်ချုပ်မှုးကြီးမင်းအောင်လှိုင်ကပြောသည်။
တြိဂံဒေသတိုင်းစစ်ဌာနချုပ်နယ်မြေအတွင်းက တပ်နယ်ရှိ အရာရှိစစ်သည်မိသားစုများကို ယမန်နေ့ ဇန်နဝါရီ ၁၉ ရက်နေ့က တွေ့ဆုံစဉ် ဗိုလ်ချုပ်မှုးကြီး မင်းအောင်လှိုင်က အထက်ပါအတိုင်းပြောကြားခဲ့ခြင်းဖြစ်သည်။
ထိုအတူ နိုင်ငံ‌တော်ကို ကာကွယ်လိုသည့်စိတ်ဖြင့် ဝင်ရောက်လာကြည့်သည့် တပ်မတော်သားများအားလုံးကို မိမိအနေဖြင့် အသိမှတ်ပြုကြောင်း တပ်မတော်သားများ၏ ဝတ်စားဆင်ယင်မှုမှ အစ စားသောက်နေထိုင်ရေးထိ ဖြည့်ဆည်းဆောင်ရွက်ပေးလျက်ရှိကြောင်းလည်း တပ်မတော်ကာကွယ်‌ရေးဦးစီးချုပ် ဗိုလ်ချုပ်မှုးကြီးမင်းအောင်လှိုင် ကပြောသည်။
တပ်မတော်သားများ အားလုံးသည် မိမိတို့ အသက်အရွယ်နှင့်လျော်ညီသည့် ကျန်းမာကြံခိုင်မှုများရှိရန်လိုအပ်ကြောင်းနှင့် အမျိုးသားများအပြင် အမျိုးသမီးစစ်မှုထမ်းများ သည်လည်း တပ်မတော်အတွင်း သို့ ဝင်ရောက်ပြီး နိုင်ငံတော်ကာကွယ်ရေးတာဝန်များ ထမ်းဆောင်လျက်ရှိကြောင်းလည်း တပ်မတော်ကာကွယ်ရေးဦးစီးချုပ် ကပြောကြားခဲ့သည်။
တပ်မတော်သားများအနေဖြင့် အမြဲတိုက်ပွဲဝင်အသင့်ဖြစ်စေရေး ကိုယ်ခန္ဓာကြံ့ခိုင်မှုများ ရှိရန် လိုအပ်သကဲ့သို့ ရဲစွမ်းသတ္တိရှိရန်လည်း ‌လေ့ကျင့်ဆောင်ရွက်ရန်လိုအပ်ကြောင်းနှင့် စစ်မြေပြင်တွင် မိမိတို့သင်ကြားထားသည့် စစ်အတတ်ပညာများကို အပြည့်အဝအသုံးချနိုင်ရန်လိုအပ်ကြောင်းလည်း တပ်မတော်ကာကွယ်‌ရေးဦးစီးချုပ် ဗိုလ်ချုပ်မှုးကြီးမင်းအောင်လှိုင် ကပြောကြားခဲ့သည်။